ܚܲܕܼܒܫܲܒܵܐ ܩܲܕܡܵܝܵܐ ܕܡܵܪܝ ܡܘܼܫܹܐ
ܬܸܢܝܵܢ ܢܵܡܘܿܣܵܐ؛ ܝܐ؛ 1‐13
ܬܸܒ̣ܘ ܘܲܫܠܵܘ ܬܸܢܝܵܢ ܢܵܡܘܿܣܵܐ ܣܸܦܪܵܐ ܕܚܲܡܫܵܐ ܕܐܘܿܪܵܝܬܵܐ؛
ܐܲܚܲܝ̈ ܒܲܪܸܟ̣ܡܵܪܝ܀
ܘܐ݇ܡܸܪܹܗ ܡܘܼܫܹܐ ܠܟܠܹܗ ܝܼܣܪܵܝܹܠ؛ ܡܲܚܸܒ ܠܡܵܪܵܐ ܐܲܠܵܗܘܼܟܼ؛ ܘܢܛܘܿܪ ܢܛܵܪ̈ܝܵܬܘܼܗܝ؛ ܘܢܵܡܘܿܣ̈ܘܼܗܝ؛ ܘܕܝܼܘܵܢ̈ܘܼܗܝ ܘܦܘܼܩܕܵܢ̈ܘܼܗܝ ܟܠܲܝܗܝ ܝܵܘܡܵܢܹ̈ܐ܀ ܘܒܸܬ ܝܵܕܥܝܼܬܘܿܢ ܐܸܕܝܘܿܡ݇ ܝܵܘܡܵܐ؛ ܕܠܹܐ ܗ݇ܘܵܐ ܩܵܐ ܒܢܘܿܢܵܘܟ̣̈ܘܿܢ ܕܠܵܐ ܝ݇ܕܝܼܥܠܗ݇ܘܿܢ ܘܠܵܐ ܚܙܹܐܠܗ݇ܘܿܢ ܬܲܥܠܲܡܬܹܗ ܕܡܵܪܝܵܐ ܐܲܠܵܗܵܘܟ̣ܘܿܢ؛ ܘܓܘܼܪܘܼܬܹܗ ܘܐܝܼܕܹܗ ܚܲܝܠܵܢܬܵܐ ܘܕܪܵܥܢܹܗ ܪܵܡܵܐ܀ ܘܢܲܝܫܲܢܩܹ̈ܐ ܘܦܘܼܠܚܵܢܵܐ ܕܥܒ̣ܸܕܠܹܗ ܓܵܘ ܡܸܨܪܹܝܢ؛ ܠܦܸܪܥܘܿܢ ܡܲܠܟܵܐ ܕܡܸܨܪܹܝܢ؛ ܘܠܟܠܵܗ̇ ܐܲܪܥܹܗ܀ ܘܕܥܒ̣ܸܕܠܹܗ ܠܚܲܝܠܵܐ ܕܡܸܨܪ̈ܵܝܹܐ. ܠܣܘܼܣܵܘܵܬܹ̈ܐ؛ ܘܟܵܠܸܣܟܹ̈ܐ ܘܪ̈ܵܟܵܒ̣ܲܝܗܝ. ܘܡܘܼܫܦܸܚܠܹܗ ܡܝܼܵܐ ܕܝܵܡܵܐ ܕܣܘܿܦ ܥܲܠ ܦܵܬܲܝܗܝ ܟܲܕ ܛܪܝܼܕܠܗ݇ܘܿܢ ܒܵܬ݇ܪܲܝܗܝ؛ ܘܬܘܼܠܩܝܼܠܹܗ ܡܵܪܝܵܐ ܗܲܠ ܐܸܕܝܘܿܡ݇ ܝܵܘܡܵܐ܀ ܘܟܠ ܡܸܢܕܝܼ ܕܥܒ̣ܸܕܠܹܗ ܐܸܠܵܘܟ̣ܘܿܢ ܓܵܘ ܒܲܪܝܼܵܐ. ܗܲܠ ܕܐ݇ܬܹܐܠܵܘܟ̣ܘܿܢ ܠܐܵܗܵܐ ܐܲܬܪܵܐ܀ ܘܡܸܢܕܝܼ ܕܥܒ̣ܸܕܠܹܗ ܠܕܵܬܲܢ ܘܐܲܒ̣ܝܼܪܲܡ ܒܢܲܝ̈ ܐܸܠܝܼܵܒ. ܒܪܘܿܢܹܗ ܕܪܘܼܒ̣ܹܝܠ؛ ܕܦܬܸܚܠܵܗ̇ ܐܲܪܥܵܐ ܦܘܼܡܵܗ̇ ܘܒܸܠܥܲܝܗܝ ܠܵܗ̇؛ ܐܸܠܲܝܗܝ ܘܠܒܢܘܿܢܲܝ̈ܗܝ ܘܡܲܫܟܢܲܝ̈ܗܝ ܘܠܟܠ ܡܸܢܕܝܼ ܕܐܝܼܬ ܗ݇ܘܵܐ ܠܗ݇ܘܿܢ؛ ܕܟܸܠܝܹܐ ܗ݇ܘܵܘ ܥܲܠ ܐܲܩܠܵܬܲܝ̈ܗܝ ܓܵܘ ܟܠܹܗ ܝܼܣܪܵܝܹܠ܀ ܐܸܠܵܐ ܥܲܝܢ̈ܵܘܟ̣ܘܿܢ ܝܼܢܵܐ ܕܚܙܹܐܠܗ݇ܘܿܢ ܦܘܼܠܚܵܢܹ̈ܐ ܕܡܵܪܝܵܐ ܓܘܼܪܹ̈ܐ ܕܥܒ̣ܸܕܠܹܗ܀ ܢܛܘܿܪܘܿܢ ܟܠܲܝܗܝ ܦܘܼܩܕܵܢܹ̈ܐ ܕܒܸܦܩܵܪܵܐ ܝ݇ܘܸܢ ܐܸܠܵܘܟ̣ܘܿܢ ܐܸܕܝܘܿܡ݇ ܝܵܘܡܵܐ؛ ܘܗܵܘܝܼܬܘܿܢ ܚܲܝܠܵܢܹ̈ܐ؛ ܘܥܵܒ̣ܪܝܼܬܘܿܢ ܘܝܵܪܬܝܼܬܘܿܢ ܐܲܪܥܵܐ ܕܒܸܥܒ̣ܵܪܵܐ ܝ݇ܬܘܿܢ ܐܸܠܵܗ̇ ܠܸܪܝܵܬܵܗ̇܀ ܘܡܲܙܝܸܕܝܼܬܘܿܢ ܝܵܘܡܵܢܹ̈ܐ ܒܐܲܪܥܵܐ ܕܝ݇ܡܹܐܠܹܗ ܡܵܪܝܵܐ ܠܒܵܒܵܘܵܬܵܘ̈ܟ̣ܘܿܢ ܠܝܼܵܗ݇ܒ̣ܵܐ ܩܵܬܲܝܗܝ ܘܩܵܐ ܙܲܪܥܲܝܗܝ؛ ܐܲܪܥܵܐ ܡܲܓ̰ܪܝܼܵܢܬܵܐ ܕܚܲܠܒ̣ܵܐ ܘܕܸܒ̣ܫܵܐ܀ ܣܵܒܵܒ ܐܲܪܥܵܐ ܕܒܸܥܒ̣ܵܪܵܐ ܝ݇ܬܘܿܢ ܐܸܠܵܗ̇ ܠܸܪܝܵܬܵܗ̇؛ ܠܹܐ ܝ݇ܠܵܗ̇ ܐܲܝܟܼ ܐܲܪܥܵܐ ܕܡܸܨܪܹܝܢ ܕܦܠܸܛܠܵܘܟ̣ܘܿܢ ܡܸܢܵܗ̇؛ ܕܙܵܪܥܝܼܬܘܿܢ ܒܲܪܙܲܪܥܵܐ ܘܡܲܫܬܝܼܬܘܿܢ ܒܐܲܩܠܵܬܵܘ̈ܟ̣ܘܿܢ؛ ܐܲܝܟܼ ܚܲܩܠܵܐ ܕܡܲܫܬܵܝܬܵܐ܀ ܐܝܼܢܵܐ ܐܲܪܥܵܐ ܕܥܵܒ̣ܪܝܼܬܘܿܢ ܐܸܠܵܗ̇ ܠܸܪܝܵܬܵܗ̇؛ ܐܲܪܥܵܐ ܝ݇ܠܵܗ̇ ܕܛܘܼܪ̈ܵܢܹܐ ܘܕܸܫܝܵܬܹ̈ܐ. ܘܡ̣ܢ ܡܸܛܪܵܐ ܕܫܡܲܝܵܐ ܫܵܬܝܵܐ ܡܝܼܵܐ܀ ܐܲܪܥܵܐ ܕܡܵܪܝܵܐ ܐܲܠܵܗܘܼܟܼ ܟܹܐ ܒܵܥܝܹ݂ܐ ܠܵܗ̇ ܒܕܵܝܸܡܘܼܬܵܐ؛ ܘܥܲܝܢܹ̈ܐ ܕܡܵܪܝܵܐ ܐܲܠܵܗܘܼܟܼ ܒܝܼܵܗ̇؛ ܡ̣ܢ ܪܹܫܵܐ ܕܫܹܢ݇ܬܵܐ ܘܗܲܠ ܠܚܲܪܬܵܐ ܕܫܹܢ݇ܬܵܐ܀
ܚܲܒ̣ܪܹܗ
ܐܹܫܲܥܝܵܐ ܡ؛ 1‐18
ܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܗܲܒ̣݇ܠܘܿܢ ܠܸܒܵܐ؛ ܗܲܒ̣݇ܠܘܿܢ ܠܸܒܵܐ ܠܛܵܝܸܦܝܼ؛ ܒܹܐܡܵܪܵܐ ܝ݇ܠܹܗ ܐܲܠܵܗܵܘܟ̣ܘܿܢ܀ ܡܠܹܐܡܘܿܢ ܒܠܸܒܵܗ̇ ܕܐܘܿܪܸܫܠܸܡ ܘܩܪܹܐܡܘܿܢ ܠܵܗ̇. ܣܵܒܵܒ ܦܸܫܠܵܗ̇ ܡܠܝܼܬܵܐ ܚܲܝܠܵܐ؛ ܘܒܣܸܡܠܵܐ ܠܵܗ̇ ܒܚܛܝܼܬܵܐ. ܘܩܘܼܒܸܠܵܗ̇ ܡ̣ܢ ܐܝܼܕܵܐ ܕܡܵܪܝܵܐ ܚܲܕ݇ ܒܬܪܹܝ ܕܟܠܲܝܗܝ ܚܛܝܼܵܬ̈ܵܗ̇܀ ܩܵܠܵܐ ܕܩܵܪܹܐ ܒܒܲܪܝܼܵܐ؛ ܗܲܕܪܘܿܢ ܐܘܼܪܚܵܐ ܠܡܵܪܝܵܐ؛ ܘܬܲܪܨܘܿܢ ܓܵܘ ܕܸܫܬܵܐ ܓ̰ܵܕܵܘܵܬܹ̈ܐ ܠܐܲܠܵܗܲܢ؛ ܟܠܲܝܗܝ ܪ̈ܵܓ̣݇ܘܘܿܠܹܐ ܒܸܬ ܦܵܝܫܝܼ ܡܸܠܝܹ̈ܐ؛ ܘܟܠܲܝܗܝ ܛܘܼܪ̈ܵܢܹܐ ܘܪ̈ܘܼܡܝܵܬܹܐ ܒܸܬ ܦܵܝܫܝܼ ܡܘܼܟܸܦܹ̈ܐ؛ ܘܒܸܬ ܗܵܘܝܵܐ ܕܘܼܟܬܵܐ ܦܟ̰ܝܼܠܬܵܐ ܕܘܼܙ؛ ܘܕܘܼܟܬܵܐ ܥܲܣܩܵܐ ܠܕܸܫܬܵܐ܀ ܘܒܸܬ ܦܵܐܹܫ ܓܸܠܝܵܐ ܐܝܼܩܵܪܹܗ ܕܡܵܪܝܵܐ؛ ܘܒܸܬ ܚܵܙܝܼܠܹܗ ܟܠ ܒܸܣܪܵܐ. ܣܵܒܵܒ ܦܘܼܡܹܗ ܕܡܵܪܝܵܐ ܗܘܼܡܙܸܡܠܹܗ܀ ܩܵܠܵܐ ܕܒܹܐܡܵܪܵܐ ܩܪܝܼ. ܘܐ݇ܡܸܪܹܗ؛ ܡܘܼܕܝܼ ܩܵܪܸܢ؟ ܟܠ ܒܸܣܪܵܐ ܓܸܠܵܐ؛ ܘܟܠܹܗ ܫܘܼܦܪܹܗ ܐܲܝܟܼ ܦܸܩܚܵܐ ܕܕܸܫܬܵܐ܀ ܒܵܪܸܙ ܓܸܠܵܐ ܘܟ̰ܵܡܸܟ̰ ܦܸܩܚܵܐ؛ ܣܵܒܵܒ ܦܵܘܚܹܗ ܕܡܵܪܝܵܐ ܢܦܸܚܠܵܗ̇ ܒܝܼܹܗ؛ ܗܵܕܟ̣ܵܐ ܝ݇ܠܹܗ ܓܸܠܹܗ ܕܐܵܗܵܐ ܛܵܝܸܦܵܐ܀ ܒܪܸܙܠܹܗ ܓܸܠܵܐ ܘܟ̰ܡܸܟ̰ܠܹܗ ܦܸܩܚܵܐ؛ ܘܗܹܡܸܙܡܵܢ ܕܐܲܠܵܗܵܐ ܟܠܝܼܬܵܐ ܝ݇ܠܵܗ̇ ܗܲܠ ܥܵܠܲܡ܀ ܥܲܠ ܛܘܼܪ̈ܵܢܹܐ ܪ̈ܵܡܹܐ ܐ݇ܣܘܿܩܝ ܨܸܗܝܘܿܢ ܡܲܫܚܸܕܲܢܬܵܐ؛ ܡܵܪܸܡܝ ܩܵܠܵܟ̣ܝ ܒܚܲܝܠܵܐ؛ ܐܘܿܪܸܫܠܸܡ ܡܲܫܚܸܕܲܢܬܵܐ؛ ܡܵܪܸܡܝ ܘܠܵܐ ܙܵܕܥܲܬ̇ܝ. ܐ݇ܡܘܿܪܝ ܠܡܵܬܘܵܬܹ̈ܐ ܕܝܼܗܘܼܕܵܐ؛ ܗܵܐ ܐܲܠܵܗܵܘܟ̣ܘܿܢ܀ ܗܵܐ ܡܵܪܝܵܐ ܐܲܠܵܗܵܐ ܒܹܐܬܵܝܵܐ ܝ݇ܠܹܗ ܒܙܲܪܒ؛ ܘܕܪܵܥܢܹܗ ܚܲܝܠܵܢܵܐ؛ ܗܵܐ ܗܵܩܹܗ ܥܲܡܹܗ؛ ܘܦܘܼܠܚܵܢܹܗ ܩܵܕ݇ܡܹܗ؛ ܐܲܝܟܼ ܪܵܥܝܵܐ ܕܡܲܪܥܹܐ ܠܦܸܣܩܹܗ؛ ܘܒܕܪܵܥܢܹܗ ܡܓ̰ܲܡܸܥ ܦܵܐܪܹ̈ܐ؛ ܘܓܵܘ ܩܲܦܠܹܗ ܫܵܩܸܠ ܠܗ݇ܘܿܢ؛ ܘܠܐܵܢܝܼ ܕܡܲܡܸܨܝܼ ܡܬܲܪܣܹܐ܀ ܡܵܢܝܼ ܟܸܠܹܗ ܡܝܼܵܐ ܒܚܸܦܢܹܗ؛ ܘܫܡܲܝܵܐ ܡܫܸܚܠܹܗ ܒܦܵܫܘܿܚܬܹܗ؛ ܘܟ̤ܠܹܗ ܒܣܝܼܛܹܗ ܥܲܦܪܵܐ ܕܐܲܪܥܵܐ؛ ܘܬܩܸܠܹܗ ܛܘܼܪ̈ܵܢܹܐ ܒܡܲܬܩܵܠܵܐ ܘܪ̈ܘܼܡܝܵܬܹܐ ܒܡܲܣܲܐܬܵܐ؟܀ ܡܵܢܝܼ ܬܘܼܪܸܨܠܹܗ ܪܘܼܚܹܗ ܕܡܵܪܝܵܐ؛ ܝܲܢ ܡܵܢܝܼ ܗܘܹܐܠܹܗ ܐܸܠܹܗ ܥܵܒ̣ܕܵܢܵܐ ܕܪܵܐܝܝܼ܀ ܘܒܡܵܢܝܼ ܥܒ̣ܸܕܠܹܗ ܪܵܐܝܝܼ؛ ܘܡܘܼܠܸܦܠܹܗ ܐܸܠܹܗ. ܘܡܘܼܦܪܸܡܠܹܗ ܐܸܠܹܗ ܐܘܼܪܚܵܐ ܕܕܝܼܘܵܢ؛ ܘܡܘܼܠܸܦܠܹܗ ܝ݇ܕܵܥܝܬܵܐ؛ ܘܐܘܼܪܚܵܐ ܕܦܲܪܡܵܝܬܵܐ ܡܘܼܚܙܹܐܠܹܗ ܐܸܠܹܗ؟܀ ܗܵܐ ܛܵܝܸܦܹ̈ܐ ܐܲܝܟܼ ܚܕܵܐ ܢܵܛܘܼܦܵܬܵܐ ܡ̣ܢ ܡܲܪܸܓܠܵܐ ܘܐܲܝܟܼ ܓܢܵܝܬܵܐ ܕܡܲܣܲܐܬܵܐ؛ ܘܓܵܙܪ̈ܵܬܹܐ ܐܲܝܟܼ ܕܲܚܝܼܚܵܐ [ܥܘܼܦܪܵܐ ܕܲܩܝܼܩܵܐ] ܦܵܝܫܝܼ ܪܘܼܦܝܹܐ܀ ܘܠܸܒ̣ܢܲܢ ܠܹܐ ܝ݇ܠܹܗ ܦܝܼܫܵܐ ܚܘܼܫܒܸܢܵܐ ܐܸܠܹܗ ܩܵܐ ܝܲܩܕܵܢܵܐ؛ ܘܗܲܝܘܵܢ ܕܓܵܘܹܗ؛ ܠܹܐ ܝ݇ܠܵܗ̇ ܚܘܼܫܒܸܢܬܵܐ ܐܸܠܹܗ ܠܕܸܒ̣ܚܵܐ܀ ܘܟܠܲܝܗܝ ܛܵܝܸܦܹ̈ܐ ܐܲܝܟܼ ܗܝܼܟ̰ ܡܸܢܕܝܼ ܝ݇ܢܵܐ ܚܘܼܫܒܸܢܹ̈ܐ ܐܸܠܹܗ؛ ܠܬܠܵܩܵܐ ܘܠܚܪܵܒ̣ܵܐ ܚܘܼܫܒܸܢܹܐ ܝ݇ܢܵܐ ܐܸܠܹܗ܀
♱♱♱♱♱♱♱♱♱
ܚܕܒܫܒܐ ܐ ܕܡܘܫܐ
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܩܘܼܪ̈ܲܢܬܵܝܹܐ ܐܲܚܲܝ̈ ܒܲܪܸܟܼܡܵܪܝ܀
ܒ؛ ܩܘܿܪ̈ܲܢܬܼܵܝܹܐ؛ ܐ؛ 23‐ܒ؛ 17
ܐܝܼܢܵܐ ܐܵܢܵܐ ܩܵܐ ܐܲܠܵܗܵܐ ܒܝܼܵܗ݇ܒܼܵܐ ܝ݇ܘܸܢ ܣܵܗܕܘܼܬܵܐ ܒܘܼܬ ܓܵܢܝܼ؛ ܣܵܒܵܒ ܕܡܘܼܚܲܒܢܵܘܟܼܘܿܢ ܒܹܐܬܵܝܝܼ ܝ݇ܠܵܗ̇ ܠܵܐ ܐܵܬܹܐܠܝܼ ܠܩܘܼܪܲܢܬܘܿܣ* ܠܵܐ ܒܘܼܬ ܚܵܬܸܪ ܕܡܵܪ̈ܵܘܵܬܹܐ ܕܗܲܝܡܵܢܘܼܬܵܘܟܼܘܿܢ ܝܼܘܲܚ؛ ܐܸܠܵܐ ܗܲܝܸܪ̈ܵܢܹܐ ܝ݇ܘܲܚ ܕܚܲܕܘܼܬܵܘܟܼܘܿܢ ܣܵܒܵܒ ܒܗܲܝܡܵܢܘܼܬܵܐ ܟܸܠܝܸܐ ܝ݇ܬܘܿܢ* ܐܝܼܢܵܐ ܐܵܗܵܐ ܕܸܢܝܼ ܒܓܵܢܝܼ ܕܠܵܐ ܡܸܢ݇ܕܪܹܫ̄ ܒܦܵܫܲܡܬܵܐ ܐܵܬܸܢ ܠܟܸܣܠܵܘܟܼܘܿܢ* ܣܵܒܵܒ ܐܸܢ ܐܵܢܵܐ ܡܲܦܫܸܡܸܢ ܐܸܠܵܘܟܼܘܿܢ؛ ܡܵܢܝܼ ܒܸܬ ܡܲܚܕܸܐ ܠܝܼ ܐܸܠܵܐ ܗ̇ܘ ܕܐܵܢܵܐ ܡܘܼܦܫܸܡܠܝܼ ܐܸܠܹܗ* ܘܕܟܬܸܒܼܠܝܼ ܐܸܠܵܘܟܼܘܿܢ ܐܵܗܵܐ. ܕܠܵܐ ܐܝܼܡܲܢ ܕܐܵܬܸܢ ܡܲܦܫܸܡܝܼ ܠܝܼ ܐܵܢܝܼ ܕܠܵܙܸܡ ܝܼܗܘ̣ܵܐ ܕܡܲܚܕܝܼ ܗ݇ܘ̣ܵܘ ܠܝܼ ܐܝܼܢܵܐ ܐܝܼܬܠܝܼ ܗܹܒܼܝܼ ܥܲܠ ܟܠܵܘܟܼܘܿܢ ܕܚܲܕܘܼܬܝܼ ܕܟܠܵܘܟܼܘܿܢ ܝܼܠܵܗ̇܋ ܡܼܢ ܝܲܠܨܘܼܝ ܓܘܼܪܬܵܐ ܘܡܼܢ ܡܲܪܥܵܐ ܕܠܸܒܵܐ ܟܬܸܒܼܠܝܼ ܐܸܠܵܘܟܼܘܿܢ ܐܲܢܹܐ ܒܪܵܒܵܐ ܕܸܡܥܹ̈ܐ. ܠܵܐ ܒܘܼܬ ܣܵܒܵܒ ܕܡܲܦܫܸܡܸܢܵܘܟܼܘܿܢ. ܐܸܠܵܐ ܕܝܵܕܥܝܼܬܘܿܢ ܕܚܘܼܒܵܐ ܓܘܼܪܵܐ ܐܝܼܬܠܝܼ ܠܟܸܣܠܵܘܟܼܘܿܢ. ܐܸܢ ܚܲܕ݇ ܐ݇ܢܵܫܵܐ ܡܘܼܦܫܸܡܠܹܗ؛ ܠܹܐ ܝ݇ܠܹܗ ܐܸܠܝܼ ܐܲܚܟ̰ܝܼ ܡܘܼܦܫܸܡܵܐ؛ ܐܝܼܢܵܐ ܩܵܐ ܟܠܵܘܟܼܘܿܢ. ܕܠܵܐ ܝܵܩܪܸܢܵܐ ܗܹܡܸܙܡܲܢ ܥܲܠܵܘܟܼܘܿܢ* ܡܲܠܝܵܢܬܵܐ ܝ݇ܠܵܗ̇ ܩܵܐ ܕܐܵܗܵܐ ܡܲܢܟܼܲܣܬܵܐ ܕܡ̣ܢ ܪܵܒܵܐ* ܡܐܵܕܝܵܐ ܡ̣ܢ ܓܹܒܵܐ ܐ݇ܚܹܪ݇ܢܵܐ ܘܵܓ̰ܸܒ ܝܼܠܵܗ̇ ܕܦܵܚܠܝܼܬܘܿܢ ܠܹܗ ܘܝܵܗ݇ܒܼܝܼܬܘܿܢ ܠܹܗ ܠܸܒܵܐ؛ ܕܠܵܐ ܗܵܘܝܵܐ ܒܦܵܫܲܡܬܵܐ ܓܘܼܪܬܵܐ ܦܵܐܸܫ ܡܸܚܝܵܐ ܗ̇ܘ ܕܗܲܕܟܼܵܐ ܝ݇ܠܹܗ* ܒܘܼܬ ܕܐܵܗܵܐ ܒܸܛܠܵܒܵܐ ܝ݇ܘܸܢ ܡܸܢܵܘܟܼܘܿܢ ܕܡܲܩܘܝܼܬܘܿܢ ܓܵܘܹܗ ܚܘܼܒܵܘܟܼܘܿܢ* ܣܵܒܵܒ ܐܘܼܦ ܒܘܼܬ ܐܵܗܵܐ ܟܬܸܒܼܠܝܼ ܐܸܠܵܘܟܼܘܿܢ ܕܝܵܕܥܸܢ ܒܢܸܣܝܵܢܵܐ ܕܐܸܢ ܒܟܠ ܡܸܢܕܝܼ ܡܲܨܝܸܬܵܢܹ̈ܐ ܝ݇ܬܘܿܢ* ܠܡ̇ܢ ܕܐܲܚܬܘܿܢ ܦܵܚܘܿܠܹܐ ܝ݇ܬܘܿܢ ܐܘܼܦ ܐܵܢܵܐ. ܣܵܒܵܒ ܐܘܼܦ ܐܵܢܵܐ ܡܸܢܕܝܼ ܕܫܒܼܸܩܠܝܼ ܠܡ̇ܢ ܕܫܒܼܸܩܠܝܼ؛ ܒܘܼܬ ܚܵܬܸܪ ܕܕܝܼܵܘܟܼܘܿܢ ܫܒܼܸܩܠܝܼ ܒܦܲܪܨܘܿܦܸܗ ܕܡܫܝܼܚܵܐ؛ ܕܠܵܐ ܓܼܵܠܸܒܠܲܢ ܣܵܛܵܢܵܐ؛ ܣܵܒܵܒ ܟܹܐ ܝܵܕܥܲܚ ܚܘܼܫܵܒܼܹ̈ܐ ܕܝܼܹܗ* ܐܝܼܢܵܐ ܟܲܕ ܐ݇ܬܹܐܠܝܼ ܠܛܪܘܿܐܘܿܣ ܒܡܲܫܚܲܕܬܹܗ ܕܡܫܝܼܚܵܐ ܘܦܸܫܠܹܗ ܦܬܝܼܚܵܐ ܐܸܠܝܼ ܬܲܪܥܵܐ ܒܡܵܪܝܵܐ* ܠܵܐ ܗܘܹܐܠܵܗ̇ ܠܝܼ ܡܲܢܝܲܚܬܵܐ ܒܪܘܼܚܵܐ ܕܠܵܐ ܡܘܼܫ݇ܟ̰ܸܚܠܝܼ ܠܛܸܛܘܿܣ ܠܵܐ ܐܵܚܘܿܢܝܼ. ܐܸܠܵܐ ܫܒܼܝܼܩܵܝܠܝܼ ܘܦܠܸܛܠܝܼ ܠܡܵܩܹܕܘܿܢܝܼܵܐ* ܐܝܼܢܵܐ ܡܸܢܬܵܐ ܡ̣ܢ ܐܲܠܵܗܵܐ؛ ܕܒܟܼܠ ܥܕܵܢܵܐ ܚܙܵܝܬܵܐ ܒܸܥܒܼܵܕܲܢ ܝܼܠܹܗ ܒܡܫܝܼܚܵܐ ܘܒܸܓܠܵܝܵܐ ܝ݇ܠܹܗ ܒܝܼܲܢ ܪܹܝܚܵܐ ܕܝ݇ܕܵܥܝܬܹܗ ܒܟܠ ܕܘܼܟܬܵܐ ܣܵܒܵܒ ܪܹܚܵܐ ܝ݇ܘܲܚ ܒܲܣܝܼܡܵܐ ܒܡܫܝܼܚܵܐ ܠܐܲܠܵܗܵܐ ܒܐܵܢܝܼ ܕܚܲܝܝܼ ܘܒܐܵܢܝܼ ܕܬܵܠܩܝܼ* ܩܵܐ ܕܐܵܢܝܼ ܕܪܸܝܚܵܐ ܕܡܵܘܬܵܐ ܠܡܵܘܬܵܐ؛ ܘܩܵܐ ܕܐܵܢܝܼ ܕܪܹܝܚܵܐ ܕܚܲܝܹ̈ܐ ܠܚܲܝܹ̈ܐ؛ ܘܠܕܐܲܢܹܐ ܟܠ ܡ̇ܢ ܕܒܸܬ ܚܵܫܸܚ*
♱♱♱♱♱♱♱♱♱
ܚܲܕܼܒܫܲܒܵܐ ܩܲܕܡܵܝܵܐ ܕܡܵܪܝ ܡܘܼܫܹܐ
ܡܬܝ ܟܟ: 1 ‐ 17
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ
ܟܪܘܙܘܬܼܐ ܕܡܬܝ
♰ ܘܐ݇ܡܸܪܹܗ ܝܑܼܫܘܿܥ ܠܬܲܠܡܝܼ̈ܕܘܼܗܝ: ܣܵܒܵܒ ܟܹܐ ܕܵܡܝܵܐ ܡܲܠܟܘܼܬܵܐ ܕܫܡܲܝܵܐ ܠܓܲܒܼܪܵܐ ܡܵܪܵܐ ܕܒܲܝܬܵܐ: ܕܦܠܸܛܠܹܗ ܒܨܲܦܪܵܐ ܕܕܵܒܼܸܩ ܦܵܥܠܹ̈ܐ ܠܟܲܪܡܹܗ. ܐܝܼܢܵܐ ܩܛܸܥܠܹܗ ܥܲܡ ܦܵܥܠܹ̈ܐ ܡ̣ܢ ܕܹܝܢܵܪܵܐ ܒܝܵܘܡܵܐ. ܘܫܘܼܕܪܵܝܠܹܗ ܠܟܵܪܡܹܗ. ܘܦܠܸܛܠܹܗ ܒܣܵܥܵܬ ܕܬܠܵܬ ܘܚܙܹܐܠܹܗ ܐ݇ܚܹܪ̈݇ܢܹܐ ܒܫܘܼܩܵܐ ܘܒܲܛܝܼܠܹ̈ܐ. ܘܐ݇ܡܸܪܹܗ ܐܸܠܲܝܗܝ: ܙܹܠ݇ܡܘܿܢ ܐܘܿܦ ܐܲܚܬܘܿܢ ܠܟܲܪܡܵܐ. ܘܡܸܢܕܝܼ ܕܘܵܠܹܐ ܒܸܬ ܝܲܗ݇ܒܼܸܢܵܘܟܼܘܿܢ. ܐܝܼܢܵܐ ܐܵܢܝܼ ܐ݇ܙܸܠܗ݇ܘܿܢ. ܘܦܠܸܛܠܹܗ ܡܸܢ݇ܕܪܹܫ݇ ܒܣܵܥܵܬ ܫܬܵܐ، ܘܒܣܵܥܵܬ ܕܬܸܫܥܵܐ، ܘܥܒܼܸܕܠܹܗ ܗܲܕܟܼܵܐ. ܘܠܐܲܦܲܝ ܣܵܥܵܬ ܚܲܕܥܣܲܪ، ܦܠܸܛܠܹܗ ܘܡܘܼܫ݇ܟ̰ܸܚܠܹܗ ܐ݇ܚܹܪ̈݇ܢܹܐ ܕܟܸܠܝܹܐ ܘܒܲܛܝܼܠܹܐ، ܘܐ݇ܡܸܪܹܗ ܐܸܠܲܝܗܝ: ܩܵܡܘܼܕܝܼ ܟܸܠܝܹܐ ܝܬܘܿܢ ܟܠܹܗ ܝܵܘܡܵܐ ܘܒܲܛܝܼܠܹܐ؟ ܐܵܡܪܝܼ ܐܸܠܹܗ: ܕܐ݇ܢܵܫܵܐ ܠܵܐ ܩܲܡ ܕܵܒ̣ܸܩܠܲܢ ܒܗܵܩܵܐ. ܐܵܡܸܪ ܐܸܠܲܝܗܝ: ܙܹܠَܡܘܿܢ ܐܘܿܦ ܐܲܚܬܘܿܢ ܠܟܲܪܡܵܐ، ܘܡܸܢܕܝܼ ܕܘܵܠܹܐ ܒܸܬ ܫܲܩܠܝܼܬܘܿܢ. ܐܝܼܢܵܐ ܟܲܕ ܗ݇ܘܹܐܠܹܗ ܪܲܡܫܵܐ، ܐ݇ܡܸܪܹܗ ܡܵܪܵܐ ܕܟܲܪܡܵܐ ܠܪܲܒ ܒܲܝܬܹܗ: ܩܪܝܼ ܦܵܥܠܹ̈ܐ ܘܗܲܒܼܠܗ݇ܘܿܢ ܗܵܩܲܝܗܝ، ܘܫܵܪܝܼ ܡ̣ܢ ܐ݇ܚܵܪ̈ܵܝܹܐ ܘܗܲܠ ܠܩܲܕ݇ܡܵܝܹ̈ܐ. ܘܐ݇ܬܹܐ ܠܗ݇ܘܿܢ ܐܵܢܝܼ ܕܚܲܕܥܣܲܪ ܣܵܥܲܬܹ̈ܐ. ܫܩܸܠܗ݇ܘܿܢ ܕܹܝܢܵܪ ܕܹܝܢܵܪ. ܘܟܲܕ ܐ݇ܬܹܐ ܠܗ݇ܘܿܢ ܩܲܕ݇ܡܵܝܹ̈ܐ، ܘܚܫܸܒܼܠܗ݇ܘܿܢ ܕܒܘܼܫ ܙܵܘܕܵܐ ܒܸܬ ܫܲܩܠܝܼ. ܘܫܩܸܠܗ݇ܘܿܢ ܕܹܝܢܵܪ ܕܹܝܢܵܪ ܐܵܦ ܐܵܢܝܼ. ܘܟܲܕ ܫܩܸܠܗ݇ܘܿܢ. ܛܘܼܪܛܸܡܠܗ݇ܘܿܢ ܥܲܠ ܡܵܪܵܐ ܕܒܲܝܬܵܐ، ܘܐܲܡܪܝܼ: ܐܲܢܹܐ ܐ݇ܚܵܪ̈ܵܝܹܐ ܚܕܵܐ ܣܵܥܵܬ ܦܠܸܚܠܗ݇ܘܿܢ. ܘܥܒܼܝܼܕܝܼܠܘܼܟܼ ܒܵܪܵܢ݇ܒܲܪ ܥܲܡܲܢ ܕܫܩܸܠܲܢ ܝܘܼܩܪܹܗ ܕܝܵܘܡܵܐ ܘܚܸܡܹܗ. ܐܝܼܢܵܐ ܗ̇ܘ ܓ̰ܘܼܘܸܒܠܹܗ ܘܐ݇ܡܸܪܹܗ ܠܚܲܕ݇ ܡܸܢܲܝܗܝ: ܚܲܒܼܪܝܼ ܠܹܐ ܝܘܸܢ ܒܸܙܠܵܡܵܐ ܐܸܠܘܼܟܼ. ܠܹܐ ܗ݇ܘܵܐ ܒܕܹܝܢܵܪ ܩܛܸܥܠܘܼܟܼ ܥܲܡܝܼ؟ ܫܩܘܿܠ ܕܝܼܠ݇ܘܼܟܼ ܘܙܹܠ݇. ܐܝܼܢܵܐ ܐܵܢܵܐ ܒܣܵܡܝܼ ܝܠܵܗ̇ ܕܠܐܵܗܵܐ ܐ݇ܚܵܪܵܝܵܐ ܝܲܗܒܼܸܢ ܐܲܝܟܼ ܕܐܸܠܘܼܟܼ. ܝܲܢ ܠܹܐ ܝܠܵܗ̇ ܩܵܢܘܿܢܵܝܬܵܐ ܐܸܠܝܼ ܕܡܸܢܕܝܼ ܕܒܲܣܡܵܐ ܠܝܼ ܥܲܒܼܕܸܢ ܒܡܸܢܕܝܼ ܕܓܵܢܝܼ؟ ܝܲܢ ܥܲܝܢܘܼܟܼ ܒܝܼܫܬܵܐ ܝܠܵܗ̇ ܕܐܵܢܵܐ ܛܵܒܼܵܐ ܝܘܸܢ. ܗܲܕܟܼܵܐ ܒܸܬ ܗܵܘܝܼ ܐ݇ܚܵܪ̈ܵܝܹܐ ܩܲܕ݇ܡܵܝܹ̈ܐ. ܘܩܲܕ݇ܡܵܝܹ̈ܐ ܐ݇ܚܵܪ̈ܵܝܹܐ. ܣܵܒܵܒ ܪܵܒܵܐ ܝܢܵܐ ܩܸܪ̈ܝܹܐ ܘܚܲܕ݇ܟ̰ܵܐ ܝܢܵܐ ܓܘܼܒܝܹ̈ܐ.
♱♱♱♱♱♱♱♱♱