ܚܲܕܼܒܫܲܒܵܐ ܕܫܘܼܠܵܡ ܫܵܒ̣ܘܿܥܵܐ ܕܲܫܠܝܼܚܹ̈ܐ
ܘܩܲܕܼܡܵܝܵܐ ܗ݇ܘ̣ ܕܩܲܝܛܵܐ. ܘܡܸܬܼܩܪܹܐ ܢܘܼܣܲܪܕܹܝܠ
ܘܡܸܬܦܲܫܲܩ ܥܹܐܕܵܐ ܕܐܲܠܵܗܵܐ
ܐ؛ ܡܲܠܟܹ̈ܐ ܝܚ؛ 30‐40
ܬܸܒ̣ܘ ܘܲܫܠܵܘ ܟܬܵܒ̣ܵܐ ܕܲܣܦܲܪ ܡܲܠܟܹ̈ܐ
ܐܲܚܲܝ̈ ܒܲܪܸܟܡܵܪܝ܀
ܘܐ݇ܡܸܪܹܗ ܐܹܠܝܼܵܐ ܠܟܠܹܗ ܛܵܝܸܦܵܐ؛ ܩܲܪܒܸܢܗ݇ܘܿܢ ܠܟܸܣܠܝܼ؛ ܘܩܘܼܪܒܸܢܗ݇ܘܿܢ ܟܠܹܗ ܛܵܝܸܦܵܐ ܠܟܸܣܠܹܗ؛ ܘܚܘܼܕܸܬܠܹܗ ܡܲܕܒܚܵܐ ܕܡܵܪܝܵܐ ܕܝܼܗ݇ܘܵܐ ܬܠܝܼܚܵܐ.܀ ܘܫܩܸܠܹܗ ܐܹܠܝܼܵܐ ܬܪܸܥܣܲܪ ܟܹܐܦܹ̈ܐ؛ ܐܲܝܟܼ ܡܸܢܝܵܢܵܐ ܕܫܲܒ̣ܛܹ̈ܐ ܕܒܢܲܝ̈ ܝܲܥܩܘܿܒ̣؛ ܗ̇ܘ ܕܗܘܹܐ ܠܹܗ ܥܲܠܹܗ ܚܲܒܪܹܗ ܕܡܵܪܝܵܐ ܘܐ݇ܡܸܪܹܗ ܐܸܠܹܗ؛ ܝܼܣܪܵܝܹܠ ܒܸܬ ܗܵܘܹܐ ܫܸܡܘܼܟܼ؛ ܘܒܸܢܝܲܝܗܝ ܠܹܗ ܠܟܹܐܦܹ̈ܐ؛ ܡܲܕܒܚܵܐ ܒܫܸܡܹܗ ܕܡܵܪܝܵܐ؛ ܘܥܒ̣ܸܕܠܹܗ ܚܲܕ݇ ܚܲܢܕܲܩ ܕܡܝܼܵܐ؛ ܐܲܝܟܼ ܕܘܼܟܬܵܐ ܕܬܪܹܝ ܟܝܼܘܿܠܹܐ ܒܲܪܙܲܪܥܵܐ؛ ܘܚܘܼܪܕܹܐܠܹܗ ܠܡܲܕܒܚܵܐ؛ ܘܒܢܹܐܠܹܗ ܠܩܲܝܣܹ̈ܐ؛ ܘܩܘܼܛܩܸܛܠܹܗ ܠܒܸܣܪܵܐ ܕܬܵܘܪܵܐ؛ ܘܡܘܼܬܸܒ̣ܠܹܗ ܥܘܼܠܘܼܠ ܡ̣ܢ ܩܲܝܣܹ̈ܐ.܀ ܘܐ݇ܡܸܪܹܗ ܡܠܹܐܡܘܿܢ ܐܲܪܒܥܵܐ ܬܲܠܡܹ̈ܐ ܡܝܼܵܐ ܘܡܲܪܝܸܣܗ݇ܘܿܢ ܥܲܠ ܕܸܒ̣ܚܵܐ ܘܥܲܠ ܩܲܝܣܹ̈ܐ؛ ܘܐ݇ܡܸܪܹܗ ܬܢܹܐܡܘܿܢ؛ ܘܬܢܹܐܠܗ݇ܘܿܢ ܘܐ݇ܡܸܪܹܗ ܕܪܹܐܡܘܿܢ ܓܵܗܵܐ ܕܬܠܵܬܵܐ؛ ܘܕܪܹܐܠܗ݇ܘܿܢ ܓܵܗܵܐ ܕܬܠܵܬܵܐ؛ ܘܚܕܸܪܗ݇ܘܿܢ ܡܝܼܵܐ ܠܚܵܕܸܪ̈ܘܵܢܹܐ ܕܡܲܕܒܚܵܐ؛ ܘܐܘܼܦ ܚܲܢܕܲܩ ܡܸܠܝܵܐ ܠܗ݇ܘܿܢ ܡܝܼܵܐ.܀ ܘܒܡܵܣܲܩܬܵܐ ܕܩܘܼܪܒܵܢܵܐ؛ ܩܘܼܪܒܸܢܹܗ ܐܹܠܝܼܵܐ ܢܒ̣ܝܼܵܐ ܘܐ݇ܡܸܪܹܗ؛ ܡܵܪܝܵܐ ܐܲܠܵܗܹܗ ܕܐܲܒ̣ܪܵܗܵܡ ܘܕܐܝܼܣܚܲܩ ܘܕܝܼܣܪܵܝܹܠ؛ ܐܸܕܝܘܿܡ݇ ܦܵܝܫܵܐ ܝ݇ܕܝܼܥܬܵܐ ܕܐܲܢ݇ܬ̇ ܝ݇ܘܸܬ̇ ܐܲܠܵܗܵܐ ܒܝܼܣܪܵܝܹܠ؛ ܘܐܵܢܵܐ ܪܹܓܘܼܟܼ؛ ܘܒܚܲܒܪܘܼܟܼ ܥܒ̣ܸܕܠܝܼ ܟܠܲܝܗܝ ܐܲܢܹܐ ܡܸܢܕܝܼܵܢܹ̈ܐ.܀ ܓ̰ܲܘܸܒܠܝܼ ܝܵܐ ܡܵܪܝܵܐ ܓ̰ܲܘܸܒܠܝܼ؛ ܘܚܘܼܫ ܝܵܕܥܝܼ ܟܠܹܗ ܛܵܝܸܦܵܐ ܕܐܲܢ݇ܬ̇ ܝܼܘܸܬ̇ ܡܵܪܝܵܐ ܐܲܠܵܗܵܐ؛ ܘܐܲܢ݇ܬ̇ ܡܘܼܕܸܪܘܼܟܼ ܠܸܒܲܝܗܝ ܦܟ̰ܝܼܠܵܐ.܀ ܘܢܦܸܠܵܗ̇ ܢܘܼܪܹܗ ܕܡܵܪܝܵܐ؛ ܘܐ݇ܟ̣ܸܠܵܗ̇ ܕܸܒ̣ܚܵܐ ܘܩܲܝܣܹ̈ܐ ܘܟܹܐܦܹ̈ܐ ܘܥܲܦܪܵܐ ܘܡܝܼܵܐ ܕܓܵܘ ܚܲܢܕܲܩ ܠܟܸܚܠܵܗ̇.܀ ܘܚܙܹܐܠܗ݇ܘܿܢ ܟܠܹܗ ܛܵܝܸܦܵܐ؛ ܘܢܦܸܠܗ݇ܘܿܢ ܥܲܠ ܦܲܬܘܵܬܲܝ̈ܗܝ ܠܐܲܪܥܵܐ ܘܐ݇ܡܸܪܗ݇ܘܿܢ؛ ܡܵܪܝܵܐ ܝ݇ܠܹܗ ܐܲܠܵܗܵܐ؛ ܡܵܪܝܵܐ ܝ݇ܠܹܗ ܐܲܠܵܗܵܐ܀
ܚܲܒ̣ܪܹܗ
ܦܪܲܟܣܝܼܣ ܗ؛ 12‐ 33
ܫܠܵܘ ܦܪܲܟܣܝܼܣ ܕܲܫܠܝܼܚܹ̈ܐ ܐܲܚܲܝ̈ ܒܲܪܸܟ̣ܡܵܪܝ܀
ܪܵܒܵܐ ܢܝܼܫܲܢܩܹ̈ܐ ܘܥܵܓ̰ܝܼܒܘܼܝܵܬܹ̈ܐ ܦܝܵܫܵܐ ܗ݇ܘܵܘ ܦܠܝܼܚܹ̈ܐ ܒܝܲܕ ܫܠܝܼܚܹ̈ܐ ܓܵܘ ܛܵܝܸܦܵܐ؛ ܘܟܠܲܝܗܝ ܡܐܘܼܕܵܠܹܐ ܓ̰ܸܡܥܝܹܐ ܗ݇ܘܵܘ ܓܵܘ ܨܘܼܦܵܐ ܕܫܠܹܝܡܘܿܢ؛ ܘܗܝܼܟ̰ ܚܲܕ݇ ܐ݇ܢܵܫܵܐ ܐ݇ܚܹܪ݇ܢܵܐ ܠܹܐ ܩܲܫܕܸܪ ܗ݇ܘܵܐ ܠܩܲܪܒܘܼܢܹܐ ܠܟܸܣܠܲܝܗܝ؛ ܐܸܠܵܐ ܦܝܼܫܹܐ ܗ݇ܘܵܘ ܡܝܘܼܩܪܹܐ ܒܝܼܲܕ ܛܵܝܸܦܵܐ؛ ܘܝܵܘܡܵܐ ܩܵܐ ܝܵܘܡܵܐ ܒܘܼܫ ܒܸܙܝܵܕܵܐ ܗ݇ܘܵܐ ܡܸܢܝܵܢܵܐ ܕܐܵܢܝܼ ܕܗܲܡܘܼܢܹܐ ܗ݇ܘܵܘ ܒܡܵܪܝܵܐ ܟܸܢܫܵܐ ܕܓܲܒ̣ܪܹ̈ܐ ܘܕܒܲܟ̣ܬܵܬܹ̈ܐ؛ ܕܵܐܟ̣ܝܼ ܕܓܵܘ ܥܵܠܘܿܠܵܢܹ̈ܐ ܦܵܠܛܝܼ ܗ݇ܘܵܘ ܠܡܸܪ̈ܥܝܹܐ ܟܲܕ ܕܸܪܝܹܐ ܓܵܘ ܫܘܝܼܵܬܹ̈ܐ؛ ܕܐܝܼܡܲܢ ܕܗܵܘܹܐ ܒܹܐܬܵܝܵܐ ܫܸܡܥܘܿܢ؛ ܐܘܼܦ ܐܸܢ ܛܸܠܵܢܝܼܬܹܗ ܢܵܦܠܵܐ ܥܲܠܲܝܗܝ. ܘܪܵܒܵܐ ܐܵܬܝܼ ܗ݇ܘܵܘ ܠܟܸܣܠܲܝܗܝ ܡ̣ܢ ܡܕܝܼܢܵܬܹ̈ܐ ܐ݇ܚܹܪ̈݇ܢܹܐ ܕܚܵܕܸܪ̈ܘܵܢܹܐ ܕܐܘܿܪܸܫܠܹܡ؛ ܘܟܲܕ ܡܲܝܬ݇ܝܼ ܗ݇ܘܵܘ ܡܸܪ̈ܥܝܹܐ ܘܐܵܢܝܼ ܕܐܝܼܬ ܗ݇ܘܵܐ ܠܗ݇ܘܿܢ ܪ̈ܘܼܚܹܐ ܟ̰ܲܦܵܠܹ̈ܐ ܘܟܠܲܝܗܝ ܒܲܣܡܝܼ ܗ݇ܘܵܘ.܀ ܘܓܘܼܪܵܐ ܕܟܵܗܢܹ̈ܐ ܘܟܠܲܝܗܝ ܐܵܢܝܼ ܕܥܲܡܹܗ ܦܸܫܠܗ݇ܘܿܢ ܡܸܠܝܹܐ ܒܲܚܝܼܠܘܼܬܵܐ؛ ܕܝܼܗ݇ܘܵܘ ܡ̣ܢ ܝܘܼܠܦܵܢܵܐ ܕܙܲܕܘܼܩܵܝܹ̈ܐ.܀ ܘܕܪܹܐܠܗ݇ܘܿܢ ܐܝܼܕܵܬܹ̈ܐ ܥܲܠ ܫܠܝܼܚܹ̈ܐ؛ ܘܕܒ̣ܸܩܠܗ݇ܘܿܢ ܘܕܸܪܝܲܝܗܝ ܠܗ݇ܘܿܢ ܓܵܘ ܒܹܝܬ̣ ܐܲܣܝܼܪܹ̈ܐ.܀ ܗܵܝܓܵܗ̇ ܒܠܲܝܠܹܐ ܡܲܠܲܐܟ̣ܵܐ ܕܡܵܪܝܵܐ ܦܬܸܚܠܹܗ ܬܲܪܥܵܐ ܕܒܹܝܬ̣ ܐܲܣܝܼܪܹ̈ܐ.܀ ܘܦܘܼܠܛܲܝܗܝ ܠܹܗ ܘܐ݇ܡܸܪܹܗ ܐܸܠܲܝܗܝ.܀ ܙܹܠ݇ܡܘܿܢ ܘܟܠܹܐܡܘܿܢ ܒܗܲܝܟܠܵܐ ܘܗܲܡܙܸܡܗ݇ܘܿܢ ܥܲܡ ܛܵܝܸܦܵܐ ܟܠܲܝܗܝ ܐܲܢܹܐ ܗܹܡܸܙܡܵܢܹ̈ܐ ܕܚܲܝܹ̈ܐ؛ ܘܦܠܸܛܠܗ݇ܘܿܢ ܒܥܸܕܵܢܵܐ ܕܩܵܝܕܲܡܬܵܐ؛ ܘܥܒ̣ܸܪܗ݇ܘܿܢ ܠܗܲܝܟܠܵܐ ܘܡܲܠܦܝܼ ܗ݇ܘܵܘ. ܐܝܼܢܵܐ ܓܘܼܪܵܐ ܕܟܵܗܢܹ̈ܐ ܘܐܵܢܝܼ ܕܥܲܡܹܗ؛ ܩܪܹܐܠܗ݇ܘܿܢ ܠܚܲܒ̣ܪ̈ܵܘܵܬܲܝܗܝ ܘܠܚܘܲܪ̈ܕܸܩܢܹܐ ܕܝܼܣܪܵܝܹܠ؛ ܘܫܘܼܕܸܪܗ݇ܘܿܢ ܠܒܹܝܬ̣ ܐܲܣܝܼܪܹ̈ܐ ܕܡܲܝܬ݇ܝܼ ܠܗ݇ܘܿܢ ܫܠܝܼܚܹ̈ܐ.܀ ܘܐܵܢܝܼ ܕܦܸܫܠܗ݇ܘܿܢ ܫܘܼܕܪܹܐ ܟܲܕ ܐ݇ܙܸܠܗ݇ܘܿܢ ܘܠܵܐ ܡܘܼܫ݇ܟ̰ܚܲܝܗܝ ܠܗ݇ܘܿܢ ܓܵܘ ܒܹܝܬ̣ ܐܲܣܝܼܪܹ̈ܐ. ܘܕܸܪܗ݇ܘܿܢ ܘܐ݇ܬܹܐܠܗ݇ܘܿܢ؛ ܘܐ݇ܡܸܪܗ݇ܘܿܢ ܡܘܼܫ݇ܟ̰ܸܚܠܲܢ ܒܹܝܬ̣ ܐܲܣܝܼܪܹ̈ܐ ܕܒ̣ܝܼܪܵܐ ܒܗܸܫܝܵܪܘܼܬܵܐ؛ ܘܐܘܼܦ ܢܵܛܘܿܪܹ̈ܐ ܟܸܠܝܹܐ ܩܵܕ݇ܡ ܬܲܪܥܵܐ. ܘܦܬܸܚܠܲܢ ܘܗܝܼܟ̰ ܐ݇ܢܵܫܵܐ ܠܵܐ ܡܘܼܫ݇ܟ̰ܸܚܠܲܢ ܬܵܡܵܐ.܀ ܘܟܲܕ ܫܡܝܼܥܠܗ݇ܘܿܢ ܐܲܢܹܐ ܗܹܡܸܙܡܵܢܹ̈ܐ ܓܘܼܪ̈ܵܢܹܐ ܕܟܵܗܢܹ̈ܐ ܘܪܹ̈ܫܵܢܹܐ ܕܗܲܝܟܠܵܐ؛ ܥܵܓ̰ܒܝܼ ܗ݇ܘܵܘ ܒܘܼܬ ܕܝܼܲܝܗܝ؛ ܘܐܵܡܪܝܼ ܗ݇ܘܵܘ ܐܵܗܵܐ ܡܘܼܕܝܼ ܝ݇ܠܵܗ̇؟܀ ܘܗܵܝܓܵܗ̇ ܐ݇ܬܹܐܠܹܗ ܚܲܕ݇ ܐ݇ܢܵܫܵܐ ܘܡܘܼܚܒܸܪܹܗ ܐܸܠܲܝܗܝ؛ ܕܐܵܢܝܼ ܐ݇ܢܵܫܹ̈ܐ ܕܚܒ̣ܝܼܫܠܵܘܟ̣ܘܿܢ ܓܵܘ ܒܹܝܬ̣ ܐܲܣܝܼܪܹ̈ܐ؛ ܗܵܐ ܟܸܠܝܹܐ ܝ݇ܢܵܐ ܓܵܘ ܗܲܝܟܠܵܐ ܘܡܲܠܘܼܦܹܐ ܩܵܐ ܛܵܝܸܦܵܐ؛ ܗܵܝܓܵܗ̇ ܐ݇ܙܸܠܗ݇ܘܿܢ ܪܹ̈ܫܵܢܹܐ ܥܲܠ ܢܵܛܘܿܪܹ̈ܐ ܩܵܐ ܕܡܲܝܬ݇ܝܼ ܠܗ݇ܘܿܢ ܐܝܼܢܵܐ ܠܵܐ ܒܚܲܝܠܵܐ؛ ܣܵܒܵܒ ܒܸܙܕܲܥܝܵܐ ܗ݇ܘܵܘ ܕܠܵܐ ܪܵܓ̰ܸܡ ܠܗ݇ܘܿܢ ܛܵܝܸܦܵܐ.܀ ܡܘܼܬܝܲܝܗܝ ܠܗ݇ܘܿܢ؛ ܡܘܼܟܠܝܼܲܝܗܝ ܠܗ݇ܘܿܢ ܩܵܕ݇ܡ ܟܠܹܗ ܟܸܢܫܵܐ؛ ܘܐ݇ܡܸܪܹܗ ܐܸܠܲܝܗܝ ܓܘܼܪܵܐ ܕܟܵܗܢܹ̈ܐ.܀ ܩܵܡܘܼ ܠܹܐ ܝ݇ܘܲܚ ܦܩܝܼܕܵܘܟ̣ܘܿܢ ܕܩܵܐ ܗܝܼܟ̰ ܐ݇ܢܵܫܵܐ ܠܵܐ ܡܲܠܦܝܼܬܘܿܢ ܒܐܵܗܵܐ ܫܸܡܵܐ؟ ܐܝܼܢܵܐ ܐܲܚܬܘܿܢ ܡܸܠܝܵܐ ܠܵܘܟ̣ܘܿܢ ܐܘܿܪܸܫܠܹܡ ܡ̣ܢ ܝܘܼܠܦܵܢܵܘܟ̣ܘܿܢ؛ ܘܒܵܥܝܼܬܘܿܢ ܕܡܲܝܬ݇ܝܼܬܘܿܢ ܥܲܠܲܢ ܕܸܡܹܗ ܕܐܵܗܵܐ ܐ݇ܢܵܫܵܐ؟܀ ܓ̰ܘܼܘܸܒܠܹܗ ܫܸܡܥܘܿܢ ܥܲܡ ܫܠܝܼܚܹ̈ܐ ܘܐ݇ܡܸܪܹܗ ܐܸܠܲܝܗܝ؛ ܡܲܨܝܲܬܵܐ ܠܐܲܠܵܗܵܐ ܒܘܼܫ ܕܘܼܙ ܝܼܠܵܗ̇ ܡ̣ܢ ܡܲܨܝܲܬܵܐ ܠܒܢܲܝ̈ܢܫܵܐ.܀ ܐܲܠܵܗܵܐ ܕܒܵܒܵܘ̈ܵܬܲܢ ܡܘܼܩܸܡܠܹܗ ܠܝܼܫܘܿܥ ܗ̇ܘ ܕܐܲܚܬܘܿܢ ܩܛܸܠܵܘܟ̣ܘܿܢ ܟܲܕ ܬܠܹܐܠܵܘܟ̣ܘܿܢ ܥܲܠ ܩܲܝܣܵܐ.܀ ܗܲܪ ܠܐܵܗܵܐ؛ ܡܘܼܩܸܡܠܹܗ ܐܲܠܵܗܵܐ ܪܹܫܵܐ ܘܡܲܚܝܼܵܢܵܐ؛ ܘܡܘܼܪܸܡܠܹܗ ܒܝܲܡܝܼܢܹܗ؛ ܩܵܐ ܕܝܵܗ݇ܒ̣ܸܠ ܬܝܵܒ̣ܘܼܬܵܐ ܘܦܵܚܲܠܬܵܐ ܕܚܛܝܼܵܬܹ̈ܐ ܠܝܼܣܪܵܝܹܠ؛ ܘܐܲܚܢܲܢ ܣܵܗܵܕܹܐ ܝ݇ܘܲܚ ܕܐܲܢܹܐ ܗܹܡܸܙܡܵܢܹ̈ܐ. ܘܪܘܼܚܵܐ ܕܩܘܼܕܫܵܐ ܗ̇ܘ ܕܝܘܼܗ݇ܒ̣ܸܠܹܗ ܐܲܠܵܗܵܐ ܠܐܵܢܝܼ ܕܗܲܡܸܢܝܼ ܒܝܼܹܗ܀
♱♱♱♱♱♱♱♱♱
ܚܲܕ݇ܒܼܫܹܒܵܐ ܕܫܘܼܠܵܡ ܫܵܒܼܘܿܥܵܐ ܕܫܠܝܼܚܹ̈ܐ
ܕܦܵܐܹܫ ܩܸܪܝܵܐ ܢܘܼܣܲܪܕܹܝܠ ܝܵܥܢܹܐ ܥܹܐܕܵܐ ܕܐܲܠܵܗܵܐ
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܩܘܼܪ̈ܲܢܬܵܝܹܐ ܐܲܚܲܝ̈ ܒܲܪܸܟܼܡܵܪܝ܀
ܒܸܚܫܵܒܼܵܐ ܝ݇ܘܸܢ ܕܩܵܬܲܢ ܫܠܝܼܚܹ̈ܐ ܐ݇ܚܵܪ̈ܵܝܹܐ ܩܲܡ ܡܲܬܸܒܼ ܠܲܢ ܐܲܠܵܗܵܐ ܩܵܐ ܡܵܘܬܵܐ ܕܗܵܘܲܚ ܡܲܣܚܵܪ̈ܵܐ ܩܵܐ ܕܘܼܢܝܹܐ ܘܩܵܐ ܡܲܠܲܐܟܹ̈ܐ ܘܩܵܐ ܒܢܲܝ̈ܢܵܫܵܐ* ܐܲܚܢܲܢ ܡܘܼܣ̈ܠܝܼـܹܐ ܒܘܼܬ ܚܵܬܸܪ ܕܡܫܝܼܚܵܐ؛ ܐܝܼܢܵܐ ܐܲܚܬܘܿܢ ܥܵܩܸܠܕܵܪܹ̈ܐ ܒܡܫܝܼܚܵܐ؛ ܐܲܚܢܲܢ ܡܸܪ̈ܥܝܹܐ ܘܐܲܚܬܘܿܢ ܚܲܝܠܵܢܹ̈ܐ؛ ܐܲܚܬܘܿܢ ܦܝܵܫܵܐ ܚܩܝܼܪܹܐ ܘܐܲܚܢܲܢ ܡܘܼܣܠܝܼـܹܐ* ܗܲܠ ܕܐܵܗܵܐ ܣܵܥܲܬ؛ ܟܦܝܼܢܹ̈ܐ ܝ݇ܘܲܚ ܘܨܸܗܝܹ̈ܐ ܝ݇ܘܲܚ ܫܘܼܠܚܵܝܹ̈ܐ ܝ݇ܘܲܚ ܘܩܘܼܪܦܸܚܹܐ؛ ܘܕܘܼܟܬܵܐ ܕܟܠܵܝܬܵܐ ܠܲܝܬ ܠܲܢ. ܒܸܓ̰ܗܵܝܵܐ ܝ݇ܘܲܚ ܟܲܕ ܒܸܦܠܵܚܵܐ ܒܐܝܼܕ̈ܵܬܲܢ؛ ܒܸܥܒܼܵܕܵܐ ܝ݇ܢܵܐ ܒܹܐܨܘܿܪ ܩܵܬܲܢ؛ ܒܵܪܘܿܟܼܹܐ ܝ݇ܘܲܚ؛ ܒܸܛܪܵܕܲܢ ܝܼܹܵܐ ܒܸܚܡܵܠܵܐ ܝ݇ܘܲܚ܋ ܨܵܥܘܿܪܹܐ ܝ݇ܢܵܐ ܩܵܬܲܢ ܦܲܪܦܘܼܠܹܐ ܝ݇ܘܲܚ؛ ܒܝܼܲܝܗܝ ܐܲܝܟܼ ܬܘܿܙ ܕܕܘܼܢܝܹܐ ܗܘܹܐܠܲܢ ܘܟܢܲܫܬܵܐ ܕܟܠ ܐ݇ܢܵܫܵܐ ܗܲܠ ܐܵܕܝܼܵܐ* ܠܹܐ ܝ݇ܘܸܢ ܒܸܟܬܵܒܼܵܘܟܼܘܿܢ ܐܲܢܸܐ ܩܵܐ ܡܲܢܚܲܦܬܵܘܟܼܘܿܢ؛ ܐܝܼܢܵܐ ܐܲܝܟܼ ܒܢܘܼܢܹ̈ܐ ܡܘܼܚܸܒܹ̈ܐ ܡܵܠܘܿܦܹܐ ܝ݇ܘܸܢ* ܣܵܒܵܒ ܐܸܢ ܥܸܣܪܵܐ ܐܲܠܦܹ̈ܐ ܡܲܠܦܵܢܹ̈ܐ ܗܵܘܝܼ ܠܵܘܟܼܘܿܢ؛ ܐܝܼܢܵܐ ܠܵܐ ܪܵܒܵܐ ܒܵܒܵܘܵܬܹ̈ܐ. ܣܵܒܵܒ ܒܝܼܫܘܿܥ ܡܫܝܼܚܵܐ ܐܵܢܵܐ ܩܲܡ ܗܲܨܠܸܢܵܘܟܼܘܿܢ ܒܐܹܘܲܢܓܲܠܝܼܘܿܢ. ܒܲܣ ܦܲܪܦܘܼܠܸܐ ܝ݇ܘܸܢ ܒܝܼܵܘܟܼܘܿܢ ܕܦܵܝܫܝܼܬܘܿܢ ܕܘܼܡܝܹܐ ܒܝܼܝܼ* ܒܸܒܥܵܝܵܐ ܝ݇ܘܲܚ ܐܵܚܘܿܢܘܵܬܝܼ̈ ܕܝܵܕܥܝܼܬܘܿܢ ܒܘܼܬ ܝܲܠܨܘܼܝܼ ܕܗܘܹܐܠܵܗ̇ ܐܸܠܲܢ ܒܐܵܣܝܼܵܐ؛ ܦܸܫܠܲܢ ܡܘܼܠܝܹܨܹܐ ܙܵܘܕܵܐ ܡ̣ܢ ܚܲܝܠܲܢ؛ ܗܲܠ ܕܩܘܼܪܒܵܐ ܝܗ݇ܘ̣ܵܘ ܚܲܝ̈ܝܲܢ ܠܸܬܠܵܩܵܐ* ܘܥܲܠ ܓܵܢܲܢ ܩܛܸܥܠܲܢ ܡܵܘܬܵܐ. ܕܠܵܐ ܗܵܘܹܐ ܠܲܢ ܗܹܒܼܝܼ ܥܲܠ ܓܵܢܲܢ؛ ܐܸܠܵܐ ܥܲܠ ܐܲܠܵܗܵܐ ܗ̇ܘ ܕܡܲܩܸܡ ܡܝܼܬܹ̈ܐ* ܗ̇ܘ ܕܡ̣ܢ ܡܵܘܬܹ̈ܐ ܚܲܝܠܵܢܹ̈ܐ ܩܲܡ ܦܵܪܸܩܲܠܢ ܘܡܸܢ݇ܕܪܹܫ̄ ܐܝܼܬܠܲܢ ܗܸܒܼܝܼ ܕܒܸܬ ܦܵܪܸܩܠܲܢ* ܒܗܲܝܲܪܬܵܐ ܕܒܵܥܘܼܬܵܘܟܼܘܿܢ ܕܡ̣ܢ ܓܹܒܲܢ؛ ܕܚܲܠܥܲܬܹܗ ܕܠܟܸܣܠܲܢ ܗܵܘܝܵܐ ܫܵܦܵܩܲܬ ܡ̣ܢ ܓܹܒܵܐ ܕܪܵܒܵܐ ܐ݇ܢܵܫܹ̈ܐ. ܘܪܵܒܵܐ ܐ݇ܢܵܫܹ̈ܐ ܒܸܬ ܫܵܟܪܝܼ ܠܹܗ ܡ̣ܢ ܓܹܒܲܢ* ܣܵܒܵܒ ܫܘܼܒܼܗܵܪܲܢ ܐܵܗܵܐ ܝ݇ܠܹܗ ܣܵܗܕܘܼܬܵܐ ܕܚܝܼܵܠܲܝ̈ܢ. ܒܨܸܦܝܘܼܬܵܐ ܘܕܸܟܼܝܘܼܬܵܐ ܘܫܵܦܵܩܲܬ ܕܐܲܠܵܗܵܐ ܚܕܸܪܲܢ ܓܵܘ ܕܐܵܗܵܐ ܕܘܼܢܝܹܐ؛ ܘܠܵܐ ܒܥܵܩܸܠܕܵܪܘܼܬܵܐ ܕܦܲܓܼܪܵܐ ܘܒܘܼܫ ܙܵܘܕܵܐ ܠܟܸܣܠܵܘܟܼܘܿܢ* ܠܹܐ ܝ݇ܘܲܚ ܒܸܟܬܵܒܼܵܘܟܼܘܿܢ ܡܸܢܕܝܼܵܢܹ̈ܐ ܢܘܼܟܼܪ̈ܵܝܹܐ؛ ܐܝܼܢܵܐ ܐܵܢܝܼ ܕܝܵܕܥܝܼܬܘܿܢ ܘܦܲܪܡܝܼܬܘܿܢ؛ ܘܐܝܼܬܠܝܼ ܗܹܒܼܝܼ ܕܗܲܠ ܚܲܪܬܵܐ ܒܸܬ ܝܵܕܥܝܼܬܘܿܢ ܕܕܵܐܟܼܝܼ ܕܐܘܼܦ ܦܘܼܪܡܹܐܠܵܘܟܼܘܿܢ ܚܲܕ݇ܟ̰ܵܐ ܡ̣ܢ ܪܵܒܵܐ؛ ܕܫܘܼܒܼܗܵܪܵܘܟܼܘܿܢ ܝܼܘܲܚ ܐܲܝܟܼ ܕܐܘܼܦ ܐܲܚܬܘܿܢ ܕܕܝܼܲܢ ܒܝܵܘܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ *
♱♱♱♱♱♱♱♱♱
ܚܕܒܫܒܐ ܩܕܡܝܐ ܕܩܝܛܐ: ܘܡܬܼܩܪܐ ܢܘܣܪܕܝܠ
ܘܕܘܟܼܪܢܐ ܗَ̣ܘ ܕܬܪܥܣܪ ܫܠܝܚ̈ܐ
ܠܘܩܐ ܝ: 16‐25، ܝܕ: 1‐15
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܠܘܩܐ
♰ ܘܐ݇ܡܸܪܹܗ ܝܑܼܫܘܿܥ ܠܬܲܠܡܝܼܕܘܼ̈ܗܝ: ܡ̇ܢ ܕܐܸܠܵܘܟܼܘܿܢ ܫܵܡܸܥ ܐܸܠܝܼ ܒܸܫܡܵܥܵܐ ܝܠܹܗ. ܘܡ̇ܢ ܕܐܸܠܵܘܟܼܘܿܢ ܙܵܠܸܡ ܐܸܠܝܼ ܒܸܙܠܵܡܵܐ ܝܠܹܗ: ܘܡ̇ܢ ܕܐܸܠܝܼ ܙܵܠܸܡ ܒܸܙܠܡܵܐ ܝܠܹܗ ܠܡ̇ܢ ܕܫܘܼܕܪܸܢܹܗ: ܘܕܥܸܪܗ݇ܘܿܢ ܐܵܢܝܼ ܫܲܒܼܥܝܼ ܕܫܘܼܕܪܵܝܠܹܗ ܒܚܲܕܘܼܬܵܐ ܪܲܒܬܵܐ ܘܐܲܡܪܝܼ ܐܸܠܹܗ: ܡܵܪܲܢ: ܐܘܿܦ ܫܹܐܕܹ̈ܐ ܒܸܗ݇ܘܵܝܵܐ ܝܢܵܐ ܙܲܒܛ ܐܸܠܲܢ ܒܫܸܡܘܼܟܼ. ܐܝܼܢܵܐ ܗ̇ܘ ܐ݇ܡܸܪܹܗ ܐܸܠܲܝܗܝ: ܒܸܚܙܵܝܵܐ ܝܘܸܢ ܠܣܵܛܵܢܵܐ ܕܢܦܸܠܹܗ ܐܲܝܟܼ ܒܲܪܩܵܐ ܡ̣ܢ ܫܡܲܝܵܐ: ܗܵܐ ܒܝܼܵܗ݇ܒܼܵܐ ܝܘܸܢ ܐܸܠܵܘܟܼܘܿܢ ܫܘܼܠܛܵܢܵܐ ܕܗܵܘܹܝܬܘܿܢ ܒܸܕܝܵܫܵܐ ܚܘܵܘܵܬܹ̈ܐ ܘܥܲܩܸܪ̈ܒ̣ܹܐ ܘܟܠܹܗ ܚܲܝܠܵܐ ܕܕܸܫܡܸܢ ܘܡܸܢܕܝܼ ܠܵܐ ܚܲܙܕܸܓܠܵܘܟܼܘܿܢ: ܐܝܼܢܵܐ ܒܐܵܗܵܐ ܠܵܐ ܚܵܕܝܼܬܘܿܢ، ܕܫܹ̈ܐܕܹܐ ܒܸܗ݇ܘܵܝܵܐ ܝܢܵܐ ܙܲܒܛ ܐܸܠܵܘܟܼܘܿܢ: ܐܸܠܵܐ ܚܕܹܝܡܘܿܢ ܕܫܸܡܵܢܵܘ̈ܟܼܘܿܢ ܦܸܫܠܗ݇ܘܿܢ ܟܬܝܼܒܼܹܐ ܓܵܘ ܫܡܲܝܵܐ: ܒܗ̇ܝ ܣܵܥܵܬ ܦܨܸܚܠܹܗ ܝܑܼܫܘܿܥ ܒܪܘܼܚܵܐ ܕܩܘܼܕܫܵܐ ܘܐ݇ܡܸܪܹܗ: ܫܵܟܘܼܪܹܐ ܝܘܸܢ ܐܸܠܘܼܟܼ ܒܵܒܝܼ ܡܵܪܵܐ ܕܫܡܲܝܵܐ ܘܕܐܲܪܥܵܐ، ܕܟܘܼܣܹܐܠܘܼܟܼ ܐܲܢܹܐ ܡ̣ܢ ܚܲܟܝܼܡܹ̈ܐ ܘܦܲܪܡܝܼܵܢܹ̈ܐ ܘܓܸܠܝܵܝܠܘܼܟܼ ܠܝܲܠܘܼܕܹ̈ܐ. ܗܹܐ ܒܵܒܝܼ ܕܗܲܕܟܼܵܐ ܗ݇ܘܹܐܠܹܗ ܨܸܒܼܝܵܢܵܐ ܩܵܕ݇ܡܘܼܟܼ. ܘܕܥܸܪܹܗ ܠܘܵܬ ܬܲܠܡܝܼܕܘܼ̈ܗܝ ܘܐ݇ܡܸܪܹܗ ܐܸܠܲܝܗܝ: ܟܠܡܸܢܕܝܼ ܦܸܫܠܹܗ ܣܘܼܦܝܵܐ ܐܸܠܝܼ ܡ̣ܢ ܒܵܒܝܼ. ܘܐ݇ܢܵܫܵܐ ܠܹܐ ܝܲܕܸܥ ܡܵܢܝܼ ܝܼܠܹܗ ܒܪܘܿܢܵܐ ܐܸܠܵܐ ܐܸܢ ܒܵܒܵܐ. ܘܡܵܢܝܼ ܝܼܠܹܗ ܒܵܒܵܐ ܐܸܠܵܐ ܐܸܢ ܒܪܘܿܢܵܐ. ܘܠܡ̇ܢ ܕܐܸܢ ܒܲܣܡܵܐܠܹܗ ܒܪܘܿܢܵܐ ܕܓܵܠܹܐ: ܘܕܥܸܪܹܗ ܠܘܵܬ ܬܲܠܡܝܼܕܘܼ̈ܗܝ ܠܚܘܼܕܲܝܗܝ ܘܐ݇ܡܸܪܹܗ: ܛܘܼܒܼܵܐ ܠܥܲܝܢܹ̈ܐ ܕܒܸܚܙܵܝܵܐ ܝܢܵܐ ܡܸܢܕܝܼ ܕܐܲܚܬܘܿܢ ܒܸܚܙܵܝܵܐ ܝܬܘܿܢ. ܣܵܒܵܒ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܕܪܵܒܵܐ ܢܒܼܝܹ̈ܐ ܘܡܲܠܟܹ̈ܐ ܒܣܸܡܠܵܐ ܠܗ݇ܘܿܢ ܕܚܵܙܝܼ ܡܸܢܕܝܼ ܕܐܲܚܬܘܿܢ ܒܸܚܙܵܝܵܐ ܝܬܘܿܢ، ܘܠܵܐ ܚܙܹܐܠܗܘܿܢ. ܘܠܸܫܡܵܥܵܐ ܡܸܢܕܝܼ ܕܐܲܚܬܘܿܢ ܒܸܫܡܵܥܵܐ ܝܬܘܿܢ ܘܠܵܐ ܫܡܸܥܠܗ݇ܘܿܢ: ܘܗ݇ܘܹܐܠܵܗ̇ ܟܲܕ ܥܒܼܸܪܹܗ ܝܑܼܫܘܿܥ ܠܒܲܝܬܵܐ ܕܚܲܕ݇ ܡ̣ܢ ܪܹ̈ܫܵܢܹܐ ܕܦܪ̈ܝܼܫܹܐ ܕܐܵܟܼܸܠ ܠܲܚܡܵܐ ܒܝܵܘܡܵܐ ܕܫܲܒܬܵܐ: ܘܐܵܢܝܼ ܢܲܛܪܝܼ ܗ݇ܘܵܘ ܠܹܗ. ܘܗܵܐ ܐܝܼܬ ܗ݇ܘܵܐ ܩܵܕ݇ܡܘܼܗܝ ܬܵܡܵܐ ܚܲܕ݇ ܓܲܒܼܪܵܐ ܕܙܝܼܪܵܐ ܡ̣ܢ ܡܝܼ̈ܵܐ. ܓ̰ܘܼܘܸܒܠܹܗ ܝܑܼܫܘܿܥ ܘܐ݇ܡܸܪܹܗ ܠܣܵܦܪܹ̈ܐ ܘܠܦܪ̈ܝܼܫܹܐ: ܕܐܸܢ ܒܕܲܣܬܘܼܪ ܝܼܠܵܗ̇ ܒܫܲܒܬܵܐ ܠܡܒܵܣܘܼܡܹܐ؟ ܐܝܼܢܵܐ ܐܵܢܝܼ ܫܬܸܩܠܗ݇ܘܿܢ. ܘܕܒܼܸܩܠܹܗ ܗ̇ܘ ܘܒܘܼܣܸܡܠܹܗ ܐܸܠܹܗ ܘܩܲܡ ܫܵܪܹܐ ܠܹܗ: ܘܐ݇ܡܸܪܹܗ ܐܸܠܲܝܗܝ: ܡܵܢܝܼ ܡܸܢܵܘܟܼܘܿܢ ܕܢܵܦܸܠ ܒܪܘܿܢܹܗ ܝܲܢ ܬܵܘܪܹܗ ܓܵܘ ܒܹܪܵܐ ܒܝܵܘܡܵܐ ܕܫܲܒܬܵܐ ܘܠܹܐ ܗܲܪ ܒܗ̇ܝ ܥܕܵܢܵܐ ܓܵܪܸܫ ܘܡܵܣܸܩܠܹܗ؟ ܘܠܵܐ ܡܨܹܐܠܗ݇ܘܿܢ ܠܝܼܵܗ݇ܒܼܵܐ ܐܸܠܹܗ ܓ̰ܘܼܘܵܒ ܥܲܠ ܕܐܵܗܵܐ. ܘܐ݇ܡܸܪܹܗ ܚܲܕ݇ ܡܲܬܠܵܐ ܠܘܵܬ ܐܵܢܝܼ ܕܝܼܗ݇ܘܵܘ ܟ̰ܝܼܕܹܐ ܬܵܡܵܐ: ܣܵܒܵܒ ܒܸܚܙܵܝܲܝܗܝ ܗ݇ܘܵܐ ܕܓܵܒܘܼܝܹܐ ܕܘܼܟܵܢܹ̈ܐ ܒܪܹܫ ܣܡܵܟܼܵܐ: ܐܝܼܡܵܢ ܕܦܝܵܫܵܐ ܝܘܸܬ ܟ̰ܝܼܕܵܐ ܡ̣ܢ ܚܲܕ݇ ܐ݇ܢܵܫܵܐ ܠܒܹܝܬ ܡܸܫܬܘܼܬܵܐ، ܠܵܐ ܐܵܙܸܠ݇ܬ ܝܲܬܒܼܸܬ ܒܪܹܫܵܐ ܕܡܵܘܬܒ̣ܵܐ: ܕܒܲܠܟܵܐ ܗܵܘܹܐ ܟ̰ܝܼܕܵܐ ܬܵܡܵܐ ܚܲܕ݇ ܐ݇ܢܵܫܵܐ ܒܘܼܫ ܡܝܘܼܩܪܵܐ ܡܸܢܘܼܟܼ، ܘܒܸܬ ܐܵܬܹܐ ܗ̇ܘ ܡ̇ܢ ܕܐܸܠܘܼܟܼ ܘܐܸܠܹܗ ܩܪܹܐܠܹܗ، ܘܐܵܡܸܪ ܐܸܠܘܼܟܼ: ܕܗܲܒَܼܠ ܕܘܼܟܬܵܐ ܠܐܵܗܵܐ. ܘܒܸܬ ܢܲܚܦܸܬ ܟܲܕ ܩܲܝܡܸܬ ܘܕܲܒܼܩܸܬ ܕܘܼܟܬܵܐ ܐ݇ܚܹܪ݇ܬܵܐ. ܐܸܠܵܐ ܐܝܼܡܵܢ ܕܦܸܫܠܘܼܟܼ ܟ̰ܝܼܕܵܐ. ܙܹܠ݇ ܝܬܘܼܒܼ ܒܚܲܪܬܵܐ ܕܐܝܼܡܵܢ ܕܐ݇ܬܹܐܠܹܗ ܗ̇ܘ ܕܩܲܡ ܟ̰ܵܝܸܕ ܠܘܼܟܼ ܒܸܬ ܐܵܡܸܪ ܐܸܠܘܼܟܼ: ܪܲܚܡܝܼ ܪܘܼܡ ܠܥܘܼܠܘܼܠ ܘܝܬܘܼܒܼ: ܘܒܸܬ ܗܵܘܹܐ ܠܘܼܟܼ ܚܸܩܪܵܐ ܩܵܕ݇ܡ ܟܠܲܝܗܝ ܕܟ̰ܝܼܕܹܐ ܝܢܵܐ ܥܲܡܘܼܟܼ. ܣܵܒܵܒ ܟܠ ܕܡܵܪܸܡ ܓܵܢܹܗ ܒܸܬ ܦܵܐܸܫ ܡܘܼܟܸܦܵܐ. ܘܟܠ ܕܡܲܡܟܸܚ ܓܵܢܹܗ ܒܸܬ ܦܵܐܸܫ ܡܘܼܪܡܵܐ: ܐܝܼܢܵܐ ܐ݇ܡܸܪܹܗ ܐܘܼܦ ܠܗ̇ܘ ܕܩܲܡ ܟ̰ܵܝܸܕܠܹܗ: ܐܝܼܡܵܢ ܕܥܒܼܵܕܵܐ ܝܘܸܬ ܫܵܪܘܼܬܵܐ ܝܲܢ ܐ݇ܟ݂ܲܠܪܲܡܫܵܐ، ܠܵܐ ܗܵܘܸܬ ܒܸܩܪܵܝܵܐ ܠܚܲܒ̣ܪ̈ܵܘܵܬܘܼܟܼ ܐܘܼܦܠܵܐ ܐܲܚܘܿܢ̈ܘܵܬܘܼܟܼ ܝܲܢ ܚܸܙܡܵܢ̈ܘܼܟܼ ܘܠܵܐ ܫܒܼܵܒܼ̈ܘܼܟܼ ܥܲܬܝܼܪܹ̈ܐ. ܕܒܲܠܟܵܐ ܐܘܿܦ ܐܵܢܝܼ ܟ̰ܲܝܕܝܼܠܘܼܟܼ ܘܗܵܘܹܐ ܠܘܼܟܼ ܐܵܗܵܐ ܦܘܼܪܥܵܢܵܐ. ܐܸܠܵܐ ܐܝܼܡܵܢ ܕܥܒ̣ܵܕܵܐ ܝܘܸܬ ܡܸܫܬܘܼܬܵܐ: ܩܪܝܼ ܠܡܸܣܟܹܢܹ̈ܐ ܣܲܩܲܛܹ̈ܐ ܟ̰ܘܼܠܵܓܼܹ̈ܐ، ܣܸܡܝܹ̈ܐ، ܘܛܘܼܒܼܵܐ ܐܸܠܘܼܟܼ ܕܠܲܝܬܠܗ݇ܘܿܢ ܕܦܲܪܥܝܼܠܘܼܟܼ. ܣܵܒܵܒ ܒܸܬ ܗܵܘܹܐ ܦܘܪܥܵܢܘܼܟܼ ܒܩܝܵܡܬܵܐ ܕܙܲܕܝܼܩܹ̈ܐ.
♱♱♱♱♱♱♱♱♱
The Assyrian Church
of the East did not yet sanction this document.
Please email any errors/corrections you may find to Fr. Lawrance Namato via Lnamato@gmail.com
1: This Document is typed using EastAssyrian Font. 3: Install the downloaded font. 4: Copy any part of this page and Paste into Microsoft Word, then change the font to EastAssyrian or to your favorite Assyrian font.
Qasha Lawrance Namato |