ܚܲܕܼܒܫܲܒܵܐ ܕܲܬ̣ܪܹܝܢ ܕܲܫܠܝܼܚܹ̈ܐ
ܝܘܼܐܹܝܠ ܒ؛ 15‐28. ܬܸܒ̣ܘ ܘܲܫܠܵܘ ܢܒ̣ܝܼܘܼܬܹܗ ܕܝܘܼܐܹܝܠ؛ ܐܲܚܲܝ̈ ܒܲܪܸܟ̣ܡܵܝ.
ܩܪܹܐܡܘܿܢ ܫܝܼܦܘܼܪܵܐ ܒܨܸܗܝܘܿܢ؛ ܩܲܕܫܘܿܢ ܨܵܘܡܵܐ؛ ܩܪܹܐܡܘܿܢ ܟܢܘܼܫܝܵܐ؛ ܓ̰ܡܸܥܡܘܿܢ ܛܵܝܸܦܵܐ؛ ܩܲܕܫܘܿܢ ܥܹܕܬܵܐ؛ ܓ̰ܡܸܥܡܘܿܢ ܣܵܒ̣ܹ̈ܐ ܓ̰ܘܲܢܩܹ̈ܐ ܘܡܲܝܨܵܢܹ̈ܐ ܕܒܸܙܵܙܹ̈ܐ. ܒܸܬ ܦܵܠܸܛ ܚܲܬܢܵܐ ܡ̣ܢ ܩܵܝܛܘܿܢܹܗ؛ ܘܟܲܠܬܵܐ ܡ̣ܢ ܒܹܝܬ̣ ܓܢܘܼܢܘܿܗ̇؛ ܒܹܝܠ ܩܸܣܛܪܘܼܡܵܐ ܠܡܲܕܒܚܵܐ ܒܸܬ ܒܵܟ̣ܝܼ ܟܵܗܢܹ̈ܐ ܘܡܫܲܡܫܵܢܹ̈ܐ ܕܡܵܪܝܵܐ ܘܐܵܡܪܝܼ؛ ܪܵܚܸܡ ܝܵܐ ܡܵܪܝܵܐ ܥܲܠ ܛܵܝܸܦܘܼܟܼ؛ ܘܠܵܐ ܝܵܗܒ̣ܸܬ̇ ܝܵܪܬܘܼܬܘܼܟܼ ܠܠܵܘܡܵܐ ܘܠܗܘܼܟܡܵܐ ܕܛܵܝܸܦܹ̈ܐ؛ ܕܠܵܐ ܐܵܡܪܝܼ ܛܵܝܸܦܹ̈ܐ ܐܲܝܟܵܐ ܝ݇ܠܹܗ ܐܲܠܵܗܲܝܗܝ؟܀ ܥܒ̣ܸܪܹܗ ܒܛܢܵܢܵܐ ܡܵܪܝܵܐ ܒܐܲܪܥܹܗ ܘܪܘܼܚܸܡܠܹܗ ܥܲܠ ܛܵܝܸܦܹܗ.܀ ܘܓ̰ܘܼܘܸܒܠܹܗ ܡܵܪܝܵܐ ܘܐ݇ܡܸܪܹܗ ܠܛܵܝܸܦܹܗ ܗܵܐ ܒܸܬ ܫܲܕܪܸܢܵܘܟ̣ܘܿܢ ܕܸܚܠܵܐ ܘܚܲܡܪܵܐ ܘܡܸܫܚܵܐ ܘܒܸܬ ܣܵܒ̣ܥܝܼܬܘܿܢ؛ ܘܠܹܐ ܝܵܗ݇ܒ̣ܸܢܵܘܟ̣ܘܿܢ ܡܸܕܪܹܐ ܕܗܵܘܝܼܬܘܿܢ ܠܵܘܡܵܐ ܕܛܵܝܸܦܹ̈ܐ؛ ܘܠܓܲܪܒܝܵܝܵܐ ܒܸܬ ܡܲܪܚܸܩܸܢ ܡܸܢܵܘܟ̣ܘܿܢ ܘܒܸܬ ܡܲܪܚܩܸܢܹܗ ܠܚܲܕ݇ ܐܲܪܥܵܐ ܨܗܝܼܬܵܐ ܘܚܵܪܵܒܵܐ؛ ܦܵܬܹܗ ܠܝܵܡܵܐ ܩܲܕ݇ܡܵܝܵܐ ܘܚܲܪܬܹܗ ܠܝܵܡܵܐ ܐ݇ܚܵܪܵܝܵܐ؛ ܘܒܸܬ ܡܵܚܹܐ ܪܹܝܚܹܗ ܘܐܵܣܸܩ ܬܸܢܢܹܗ؛ ܡ̣ܢ ܣܵܒܵܒ ܕܝ݇ܪܸܡܠܹܗ ܠܸܥܒ̣ܵܕܵܐ.܀ ܠܵܐ ܙܵܕܥܝܵܬ̇ܝ ܐܲܪܥܵܐ؛ ܦܨܘܿܚܝ ܘܚܕܵܝ؛ ܣܵܒܵܒ ܕܡܵܪܝܵܐ ܥܒ̣ܸܕܠܹܗ ܦܘܼܠܚܵܢܹ̈ܐ ܓܘܼܪܹ̈ܐ. ܠܵܐ ܙܵܕܥܝܵܬ̇ܝ ܗܲܝܘܵܢ ܕܒܲܪܝܼܵܐ؛ ܣܵܒܵܒ ܕܡܘܼܓ̰ܝܸܢܹܗ ܓܸܠܵܐ ܒܕܲܝܪܹ̈ܐ ܘܒܲܪܝܼܵܐ؛ ܘܐܝܼܠܵܢܵܐ ܝܘܼܗܒ̣ܸܠܹܗ ܛܥܘܼܢܝܵܬܹ̈ܐ ܘܓܸܦܬܵܐ ܘܬܹܐܢܵܐ ܝܘܼܗܒ̣ܸܠܗ݇ܘܿܢ ܚܲܝܠܲܝܗܝ.܀ ܒܢܲܝ̈ ܨܸܗܝܘܿܢ ܦܨܘܿܚܘܿܢ ܘܚܕܹܐܡܘܿܢ ܒܡܵܪܝܵܐ ܐܲܠܵܗܵܘܟ̣ܘܿܢ؛ ܕܝܵܗܒ̣ܸܠ ܠܵܘܟ̣ܘܿܢ ܡܹܐܟ̣ܘܼܠܬܵܐ ܕܙܲܕܝܼܩܘܼܬܵܐ؛ ܘܡܲܨܠܹܐ ܠܵܘܟ̣ܘܿܢ ܡܸܛܪܵܐ ܩܵܕ݇ܡܵܝܵܐ ܘܐ݇ܚܵܪܵܝܵܐ ܐܲܝܟܼ ܩܲܕ݇ܡܵܝܬܵܐ.܀ ܘܒܹܐܕܪ̈ܵܬܹܐ ܒܸܬ ܦܵܝܫܝܼ ܡܸܠܝܹܐ ܕܸܚܠܵܐ؛ ܘܡܲܥܨܵܪ̈ܝܵܬܹܐ ܒܸܬ ܫܵܦܚܝܼ ܚܲܡܪܵܐ ܘܡܸܫܚܵܐ؛ ܘܒܸܬ ܦܲܪܥܸܢܵܘܟ̣ܘܿܢ ܗ̇ܘ ܡܸܢܕܝܼ ܕܐ݇ܟ̣ܸܠܹܗ ܩܲܡܨܵܐ؛ ܘܣܸܢܸܟ ܘܨܸܨܪܵܐ ܘܬܵܘܠܥܵܐ؛ ܚܲܝܠܝܼ ܓܘܼܪܵܐ ܕܫܘܼܕܸܪܝܼ ܐܸܠܵܘܟ̣ܘܿܢ؛ ܘܒܸܬ ܐܵܟ̣ܠܝܼܬܘܿܢ ܘܣܵܒ̣ܥܝܼܬܘܿܢ ܘܫܵܒܚܝܼܬܘܿܢ ܠܫܸܡܹܗ ܕܡܵܪܝܵܐ ܐܲܠܵܗܵܘܟ̣ܘܿܢ؛ ܕܥܵܒ̣ܸܕ ܥܲܡܵܘܟ̣ܘܿܢ ܥܵܓ̰ܝܼܒܘܼܝܵܬܹ̈ܐ؛ ܘܠܹܐ ܢܵܟ̣ܸܦ ܛܵܝܸܦܝܼ ܗܲܠ ܥܵܠܲܡ.܀ ܘܒܸܬ ܝܵܕܥܝܼܬܘܿܢ ܕܓܵܘ ܒܢܲܝ̈ ܝܼܣܪܵܝܹܠ ܝܼܘܸܢ؛ ܐܵܢܵܐ ܝ݇ܘܸܢ ܡܵܪܝܵܐ ܐܲܠܵܗܵܘܟ̣ܘܿܢ؛ ܘܠܲܝܬ̇ ܡܸܕܪܹܐ ܫܒ̣ܘܿܩ ܡܸܢܝܼ؛ ܘܠܵܐ ܢܵܟ̣ܸܦ ܛܵܝܸܦܝܼ ܠܥܵܠܲܡ ܒܹܐܡܵܪܵܐ ܝ݇ܠܹܗ ܡܵܪܝܵܐ ܚܲܝܠܬܵܢܵܐ܀
ܚܲܒ̣ܪܹܗ
ܦܪܲܟܣܝܼܣ؛ ܕ؛ 5‐23 ܫܠܵܘ ܦܪܲܟܣܝܼܣ ܕܲܫܠܝܼܚܹ̈ܐ؛ ܐܲܚܲܝ̈ ܒܪܸܟ̣ܡܵܪܝ܀
ܘܒܝܵܘܡܵܐ ܐ݇ܚܹܪ݇ܢܵܐ ܓ̰ܡܝܼܥܠܗ݇ܘܿܢ ܪܹ̈ܫܵܢܹܐ ܘܩܲܫܝܼܫܹ̈ܐ ܘܣܵܦܪܹ̈ܐ܀ ܘܐܘܼܦ ܚܲܢܲܢ ܓܘܼܪܵܐ ܕܟܵܗܢܹ̈ܐ؛ ܘܩܲܝܵܦܵܐ ܘܝܘܿܚܲܢܵܢ ܘܐܵܠܸܟ̣ܣܲܢܕܪܘܿܣ؛ ܘܐܵܢܝܼ ܕܝܼܗ݇ܘܵܘ ܡ̣ܢ ܐܘܼܓ̰ܵܓ̣ ܕܓܘܼܪܵܐ ܕܟܵܗܢܹ̈ܐ܀ ܟܲܕ ܡܘܼܟܠܝܼܲܝܗܝ ܠܗ݇ܘܿܢ ܒܒܹܝܬ݇ܦܲܠܓܵܐ؛ ܒܲܩܪܝܼ ܗ݇ܘܵܘ ܠܗ݇ܘܿܢ؛ ܒܐܲܝܢܝܼ ܫܸܡܵܐ ܥܒ̣ܸܕܠܵܘܟ̣ܘܿܢ ܐܵܗܵܐ؟ ܗܵܝܓܵܗ̇ ܫܸܡܥܘܿܢ ܟܹܐܦܵܐ ܦܸܫܠܹܗ ܡܸܠܝܵܐ ܪܘܼܚܵܐ ܕܩܘܼܕܫܵܐ؛ ܘܐ݇ܡܸܪܹܗ ܐܸܠܲܝܗܝ؛ ܝܵܐ ܪܹ̈ܫܵܢܹܐ ܕܛܵܝܸܦܵܐ ܘܩܲܫܝܼܫܹ̈ܐ ܕܒܹܝܬ̣ ܝܼܣܪܵܝܹܠ ܫܡܸܥܡܘܿܢ܀ ܐܸܢ ܐܲܚܢܲܢ ܒܐܵܗܵܐ ܝܵܘܡܵܐ ܦܝܵܫܵܐ ܝ݇ܘܲܚ ܕܝܼܢܹܐ ܡܸܢܵܘܟ̣ܘܿܢ ܒܘܼܬ ܚܲܕ݇ ܛܵܒ̣ܬܵܐ ܕܗ݇ܘܹܐܠܵܗ̇ ܠܚܲܕ݇ ܒܲܪܢܵܫܵܐ ܡܸܪܥܝܵܐ؛ ܘܒܡܘܼܕܝܼ ܦܸܫܠܹܗ ܒܘܼܣܡܵܐ؟܀ ܐܵܗܵܐ ܦܵܝܫܵܐ ܝ݇ܕܝܼܥܬܵܐ ܐܸܠܵܘܟ̣ܘܿܢ؛ ܘܠܟܠܹܗ ܛܵܝܸܦܵܐ ܕܝܼܣܪܵܝܹܠ. ܕܒܫܸܡܹܗ ܕܝܼܫܘܿܥ ܡܫܝܼܚܵܐ ܢܵܨܪܵܝܵܐ ܗ̇ܘ ܕܐܲܚܬܘܿܢ ܡܚܹܐܠܵܘܟ̣ܘܿܢ ܠܙܩܝܼܦܵܐ؛ ܗ̇ܘ ܕܡܘܼܩܸܡܠܹܗ ܐܲܠܵܗܵܐ ܡ̣ܢ ܓܵܘ ܡܝܼܬܹ̈ܐ. ܗܲܪ ܒܗ̇ܘ؛ ܐܵܕܝܼܵܐ ܒܸܟܠܵܝܵܐ ܝ݇ܠܹܗ ܐܵܗܵܐ ܩܵܕ݇ܡܵܘܟ̣ܘܿܢ ܟܲܕ ܒܣܝܼܡܵܐ܀ ܐܵܗܵܐ ܝ݇ܠܹܗ ܗ̇ܘ ܟܹܐܦܵܐ ܕܡܘܼܣܠܹܐ ܠܵܘܟ̣ܘܿܢ ܐܲܚܬܘܿܢ ܒܲܢܵܝܹ̈ܐ؛ ܗܲܪ ܗ̇ܘ ܗܘܹܐܠܹܗ ܠܪܹܫܵܐ ܕܩܸܪܢܝܼܬܵܐ܀ ܘܠܲܝܬ̇ ܒܚܲܕ݇ ܐ݇ܢܵܫܵܐ ܐ݇ܚܹܪ݇ܢܵܐ ܦܘܼܪܩܵܢܵܐ. ܣܵܒܵܒ ܠܲܝܬ̇ ܚܲܕ݇ ܫܸܡܵܐ ܐ݇ܚܹܪ݇ܢܵܐ ܬܚܘܿܬ ܫܡܲܝܵܐ ܕܦܸܫܠܹܗ ܝܘܼܗ݇ܒ̣ܵܐ ܩܵܐ ܒܢܲܝ̈ܢܵܫܵܐ ܕܒܝܼܹܗ ܘܵܓ̰ܸܒ ܝܼܠܵܗ̇ ܠܸܚܵܝܵܐ܀ ܘܟܲܕ ܫܡܝܼܥܠܗ݇ܘܿܢ ܗܹܡܸܙܡܵܢ ܕܫܸܡܥܘܿܢ ܘܕܝܘܿܚܲܢܵܢ؛ ܕܒܓ̰ܘܼܪܐܲܬ ܐ݇ܡܝܼܪܵܐܠܗ݇ܘܿܢ؛ ܦܘܼܪܡܹܐܠܗ݇ܘܿܢ ܕܠܹܐ ܝܵܕܥܝܼ ܩܪܵܝܬܵܐ؛ ܘܠܲܝܬ̇ ܗ݇ܘܵܐ ܠܗ݇ܘܿܢ ܦܲܪܡܵܝܬܵܐ؛ ܘܥܘܼܓ̰ܸܒܠܗ݇ܘܿܢ ܒܝܼܲܝܗܝ؛ ܘܕܝܼܥܲܝܗܝ ܠܗ݇ܘܿܢ ܕܥܲܡ ܝܼܫܘܿܥ ܚܵܕܪܝܼ ܗ݇ܘܵܘ܀ ܘܒܸܚܙܵܝܵܐ ܗ݇ܘܵܘ ܕܟܸܠܝܹܐ ܗ݇ܘܵܐ ܥܲܡܲܝܗܝ ܗ̇ܘ ܣܲܩܲܬ ܕܦܸܫܠܹܗ ܒܘܼܣܡܵܐ؛ ܘܠܹܐ ܗ݇ܘܵܘ ܡܨܵܝܵܐ ܕܐܵܡܪܝܼ ܚܲܕ݇ ܡܸܢܕܝܼ ܕܲܪܩܘܼܒ̣ܠܲܝܗܝ܀ ܘܗܵܝܓܵܗ̇ ܦܘܼܩܸܕܠܗ݇ܘܿܢ ܕܦܵܠܛܝܼܠܗ݇ܘܿܢ ܡ̣ܢ ܟܸܢܫܲܝܗܝ؛ ܘܐܵܡܪܝܼ ܗ݇ܘܵܘ ܚܲܕ݇ ܠܗ̇ܘ ܐ݇ܚܹܪ݇ܢܵܐ܀ ܡܘܼܕܝܼ ܥܵܒ̣ܕܲܚ ܠܐܲܢܹܐ ܐ݇ܢܵܫܹ̈ܐ؟ ܗܵܐ ܢܝܼܫܲܢܩܵܐ ܐܲܫܟܵܪܵܐ ܕܗܘܹܐܠܹܗ ܒܐܝܼܕܲܝ̈ܗܝ؛ ܦܸܫܠܵܗ̇ ܝ݇ܕܝܼܥܬܵܐ ܠܟܠܲܝܗܝ ܥܵܡܪ̈ܵܢܹܐ ܕܐܘܿܪܸܫܠܹܡ؛ ܘܠܹܐ ܡܵܨܲܚ ܕܣܵܪܒ̣ܲܚ܀ ܐܝܼܢܵܐ ܕܠܵܐ ܦܵܠܸܛ ܐܵܗܵܐ ܚܲܒܪܵܐ ܒܘܼܫ ܙܵܘܕܵܐ ܓܵܘ ܛܵܝܸܦܵܐ. ܐܵܟ̣ܠܲܚ ܓܸܙܡܹ̈ܐ ܐܸܠܲܝܗܝ ܕܡܸܕܪܹܐ ܠܵܐ ܗܲܡܙܸܡܝܼ ܒܐܵܗܵܐ ܫܸܡܵܐ ܩܵܐ ܚܲܕ݇ ܐ݇ܢܵܫܵܐ ܡ̣ܢ ܒܢܲܝ̈ܢܵܫܵܐ܀ ܘܩܸܪܝܲܝܗܝ ܠܗ݇ܘܿܢ ܘܦܘܼܩܕܲܝܗܝ ܠܗ݇ܘܿܢ ܕܗܝܼܟ̰ ܠܵܐ ܗܲܡܙܸܡܝܼ ܘܠܵܐ ܡܲܠܦܝܼ ܒܫܸܡܵܐ ܕܝܼܫܘܿܥ܀ ܓ̰ܘܼܘܸܒܠܗ݇ܘܿܢ ܫܸܡܥܘܿܢ ܟܹܐܦܵܐ ܘܝܘܿܚܲܢܵܢ ܘܐ݇ܡܸܪܗ݇ܘܿܢ ܐܸܠܲܝܗܝ؛ ܐܸܢ ܗܲܩ ܝܼܠܵܗ̇ ܩܵܕ݇ܡ ܐܲܠܵܗܵܐ ܕܐܸܠܵܘܟ̣ܘܿܢ ܡܲܨܝܸܬܲܚ ܙܵܘܕܵܐ ܡ̣ܢ ܐܲܠܵܗܵܐ. ܕܘܼܢܘܼܢ؟܀ ܣܵܒܵܒ ܠܹܐ ܡܵܨܲܚ ܕܡܸܢܸܕܝܼ ܕܚܙܹܐܠܲܢ ܘܫܡܝܼܥܠܲܢ ܕܠܵܐ ܗܲܡܙܸܡܲܚܠܹܗ܀ ܘܐ݇ܟ̣ܸܠܗ݇ܘܿܢ ܓܸܙܡܹ̈ܐ ܐܸܠܲܝܗܝ ܘܫܸܪܝܲܝܗܝ ܠܗ݇ܘܿܢ. ܣܵܒܵܒ ܠܵܐ ܡܘܼܫ݇ܟ̰ܸܚܠܗ݇ܘܿܢ ܚܕܵܐ ܗܲܓ̰ܲܬ ܕܡܲܬܒ̣ܝܼ ܒܪܹܫܲܝܗܝ ܡ̣ܢ ܣܵܒܵܒ ܕܛܵܝܸܦܵܐ. ܟܠ ܐ݇ܢܵܫܵܐ ܫܵܒܘܿܚܹܐ ܗ݇ܘܵܐ ܠܐܲܠܵܗܵܐ ܥܲܠ ܡܸܢܕܝܼ ܕܗܘܹܐܠܹܗ܀ ܙܵܘܕܵܐ ܡ̣ܢ ܐܲܪܒܥܝܼ ܫܸܢܹ̈ܐ ܗ݇ܘܵܐ ܗ̇ܘ ܐ݇ܢܵܫܵܐ ܕܗܘܹܐܠܵܗ̇ ܒܝܼܹܗ ܐܵܗܵܐ ܢܝܼܫܲܢܩܵܐ ܕܒܵܣܲܡܬܵܐ܀
♱♱♱♱♱♱♱♱♱♱♱♱♱
ܚܲܕܼܒܫܲܒܵܐ ܕܲܬ̣ܪܹܝܢ ܕܲܫܠܝܼܚܹ̈ܐ ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ ܕܲܠܘܵܬܼ ܩܘܼܪ̈ܲܢܬܵܝܹܐ ܐܲܚܲܝ̈ ܒܵܪܸܟܼܡܵܪܝ܀ 1 Corinthians 5:6-6:11
ܠܹܐ ܝ݇ܠܹܗ ܨܦܵܝ ܫܘܼܒܼܗܵܪܵܘܟܼܘܿܢ ܠܹܐ ܝ݇ܬܘܿܢ ܒܝܼܕܲܥܝܵܐ ܕܚܲܕ݇ܟ̰ܵܐ ܚܡܝܼܪܵܐ ܟܠܵܗ̇ ܓܒܼܝܼܠܬܵܐ ܟܹܐ ܡܲܚܡܸܥ ܠܵܗ̇* ܒܵܟܹܐܡܘܿܢ ܡܸܢܵܘܟܼܘܿܢ ܚܡܝܼܪܵܐ ܥܲܬܝܼܩܵܐ ܕܗܵܘܝܼܬܘܿܢ ܓܒܼܝܼܠܬܵܐ ܚܲܕܬܵܐ ܐܲܝܟܼ ܕܝܼܬܘܿܢ ܦܲܛܝܼܬܵܐ* ܣܵܒܵܒ ܦܸܨܚܵܐ ܕܝܼـܲܢ ܡܫܝܼܚܵܐ ܝ݇ܠܹܗ ܕܦܸܫܠܹܗ ܦܪܝܼܡܵܐ ܡ̣ܢ ܓܹܒܲܢ* ܒܘܼܬ ܕܐܵܗܵܐ؛ ܥܵܒܼܕܲܚ ܥܹܐܕܵܐ ܠܵܐ ܒܚܡܝܼܪܵܐ ܥܲܬܝܼܩܵܐ ܘܠܵܐ ܒܚܡܝܼܪܵܐ ܕܒܝܼܫܘܼܬܵܐ ܘܟܲܪܒܵܐ ܐܸܠܵܐ ܒܚܡܝܼܪܵܐ ܕܕܸܟܼܝܘܼܬܵܐ ܘܩܲܕܝܼܫܘܼܬܵܐ* ܟܬܹܒܼܠܝܼ ܐܸܠܵܘܟܼܘܿܢ ܒܐܸܓܲܪܬܵܐ ܕܠܵܐ ܚܵܒܼܛܝܼܬܘܿܢ ܥܲܡ ܙܲܢܵܝܹ̈ܐ. ܐܝܼܢܵܐ ܠܹܐ ܝ݇ܘܸܢ ܒܹܐܡܵܪܵܐ ܥܲܡ ܙܲܢܨܝܹ̈ܐ ܕܓܵܘ ܕܐܵܗܵܐ ܥܵܠܡܵܐ ܝܲܢ ܥܲܡ ܟ̰ܵܠܘܿܓ̰ܹ̈ܐ؛ ܝܲܢ ܛܲܡܲܥܟܵܪܹ̈ܐ ܝܲܢ ܥܲܡ ܣܵܓܼܕܵܢܹ̈ܐ ܕܣܵܢܲܡܹ̈ܐ؛ ܘܐܸܢ ܠܵܐ؛ ܘܵܓ̰ܸܒ ܝܼܗ݇ܘ̣ܵܐ ܩܵܬܵܘܟܼܘܿܢ ܐܵܦ ܡ̣ܢ ܥܵܠܡܵܐ ܠܸܦܠܵܛܵܐ* ܐܝܼܢܵܐ ܐܵܗܵܐ ܕܟܬܸܒܼܠܝܼ ܐܸܠܵܘܟܼܘܿܢ ܕܠܵܐ ܚܵܒܼܛܝܼܬܘܿܢ. ܐܸܢ ܐܝܼܬ ܚܲܕ݇ ܕܦܵܐܸܫ ܩܸܪܝܵܐ ܐܵܚܘܿܢܵܐ؛ ܘܝܼܠܹܗ ܙܲܢܵܝܵܐ ܝܲܢ ܟ̰ܵܠܘܿܓ̰ܵܐ ܝܲܢ ܣܵܓܼܕܵܢܵܐ ܕܣܵܢܲܣܹ̈ܐ ܝܲܢ ܨܲܥܪܵܢܵܐ ܝܲܢ ܪܵܘܵܝܵܐ ܝܲܢ ܓܸܢܵܒܼܵܐ. ܥܲܡ ܕܗ̇ܘ ܕܗܲܕܟܼܵܐ ܝ݇ܠܹܗ ܐܵܦ ܠܲܚܡܵܐ ܠܵܐ ܐܵܟܼܠܝܼܬܘܿܢ* ܡܘܼܕܝܼ ܝ݇ܠܹܗ ܫܘܼܠܝܼ ܕܕܵܝܢܸܢ ܠܒܲܪ̈ܵܝܹܐ. ܐܝܼܢܵܐ ܐܲܚܬܘܿܢ ܕܠܓܵܘܵܝܝܼ ܕܘܼܢܘܼܢ. ܠܒܲܪ̈ܵܝܸܐ ܐܲܠܵܗܵܐ ܒܸܕ ܕܵܐܸܢ ܫܩܘܿܠܘܿܢ ܠܹܗ ܠܒܝܼܫܵܐ ܡ̣ܢ ܓܵܘܵܘܟܼܘܿܢ* ܒܸܕ ܩܲܫܕܸܪ ܚܲܕ݇ ܐ݇ܢܵܫܵܐ ܡܸܢܵܘܟܼܘܿܢ ܟܲܕ ܐܝܼܬ ܠܹܗ ܕܝܼܘܵܢ ܥܲܡ ܐܵܚܘܿܢܹܗ ܕܕܵܐܸܢ ܩܵܕ݇ܡ ܥܵܘܵܠܹ̈ܐ ܘܠܵܐ ܩܵܕ݇ܡ ܩܲܕܝܼܫܹ̈ܐ؟ ܝܲܢ ܠܹܐ ܝ݇ܬܘܿܢ ܒܝܼܕܲܥܝܵܐ ܕܩܲܕܝܼܫܹ̈ܐ ܠܥܵܠܡܵܐ ܒܸܕ ܕܵܝܢܝܼ. ܘܐܸܢ ܥܵܠܡܵܐ ܒܝܼܵܘܟܼܘܿܢ ܦܝܵܫܵܐ ܝ݇ܠܹܗ ܕܝܼܢܵܐ. ܠܹܐ ܚܵܫܚܝܼܬܘܿܢ ܠܸܕܝܵܢܵܐ ܕܝܼܘܵܢܹ̈ܐ ܙܥܘܿܪܹ̈ܐ* ܠܹܐ ܝ݇ܬܘܿܢ ܒܝܼܕܲܥܝܵܐ ܕܠܡܲܠܲܐܟܹ̈ܐ ܒܸܕܝܵܢܵܐ ܝ݇ܘܲܚ؛ ܟܡܵܐ ܒܘܼܫ ܙܵܘܕܵܐ ܐܵܢܝܼ ܕܐܵܗܵܐ ܥܵܠܡܵܐ ܝ݇ܢܵܐ* ܐܸܠܵܐ ܐܸܢ ܐܝܼܬ ܠܵܘܟܼܘܿܢ ܕܝܼܘܵܢ ܥܲܠ ܡܸܢܕܝܼܵܢܹ̈ܐ ܕܥܵܠܡܵܐ؛ ܠܐܵܢܝܼ ܕܝܼܢܵܐ ܡܘܼܣܠܝܼـܹܐ ܒܥܹܕܬܵܐ ܡܲܬܒܼܘܿܢ ܠܗ݇ܘܿܢ ܐܸܠܵܘܟܼܘܿܢ ܕܥܵܠܡܵܐ؛ ܠܐܵܢܝܼ ܠܢܚܸܦܬܵܐ ܒܹܐܡܵܪܵܐ ܝ݇ܘܸܢ ܐܸܠܘܟܼܘܿܢ. ܗܲܕܟܼܵܐ ܠܲܝܬ ܓܵܘܵܘܟܼܘܿܢ ܐܵܦ ܚܲܕ݇ ܗܵܘܢܵܢܵܐ ܕܡܵܨܹܐ ܣܲܙܓܸܪ ܒܹܝܠ ܐܵܚܘܿܢܵܐ ܠܐܵܚܘܿܢܹܗ. ܐܝܼܢܵܐ ܐܵܚܘܿܢܵܐ ܥܲܡ ܐܵܚܘܿܢܵܐ ܦܝܵܫܵܐ ܝ݇ܠܹܗ ܕܝܼܢܵܐ؛ ܘܐܘܼܦ ܗ̇ܝ ܩܵܕ݇ܡ ܕܐܵܢܝܼ ܕܠܹܐ ܝ݇ܢܵܐ ܡܗܘܼܡܢܹ̈ܐ* ܐܲܚܬܘܿܢ ܒܓܵܢܵܘܟܼܘܿܢ ܡܵܪܹܐ ܓܢܵܗܵܐ ܝ݇ܬܘܿܢ ܕܕܝܼܘܵܢ ܚܲܕ݇ ܥܲܡ ܕܗ̇ܘ ܐ݇ܚܹܪ݇ܢܵܐ ܐܝܼܬ ܠܵܘܟܼܘܿܢ. ܒܲܣ؛ ܩܵܡܘܿܕܝܼ ܠܹܐ ܝ݇ܬܘܿܢ ܦܝܵܫܵܐ ܙܠܝܼܡܹܐ؛ ܘܩܵܡܘܿܕܝܼ ܠܹܐ ܝ݇ܬܘܿܢ ܩܵܒܘܿܠܹܐ ܙܵܪܵܪ؟* ܐܝܼܢܵܐ ܐܲܚܬܘܿܢ ܒܸܙܠܵܡܵܐ ܝ݇ܬܘܿܢ ܘܒܸܥܒܼܵܕܵܐ ܙܵܪܵܪ ܐܵܦ ܠܐܵܚܘܿܢܘܵܬܵܘ̈ܟܼܘܿܢ* ܝܲܢ ܠܹܐ ܝ݇ܬܘܿܢ ܒܝܼܕܵܥܝܵܐ ܕܥܵܘܵܠܹ̈ܐ ܡܲܠܟܘܼܬܹܗ ܕܐܲܠܵܗܵܐ ܠܹܐ ܝܵܪܬܝܼ؟ ܠܵܐ ܚܵܠܛܝܼܬܘܿܢ؛ ܠܵܐ ܙܲܢܵܝܹ̈ܐ ܘܠܵܐ ܣܵܓܼܕܵܢܹ̈ܐ ܕܣܵܢܲܡܹ̈ܐ؛ ܘܠܵܐ ܓܲܝܵܪܹ̈ܐ؛ ܘܠܵܐ ܡܘܼܚܪܹ̈ܒܹܐ؛ ܘܠܵܐ ܕܵܡܟܼܵܢܹ̈ܐ ܥܲܡ ܐܸܪܙܹܐ؛ ܠܵܐ ܟ̰ܵܠܘܿܓ̰ܹ̈ܐ ܘܠܵܐ ܓܸܢܵܒܹ̈ܐ؛ ܠܵܐ ܪ̈ܵܘܵܝܸܐ ܘܠܵܐ ܨܵܥܪ̈ܵܢܹܐ؛ ܘܠܵܐ ܛܲܡܲܥܟܵܪܹ̈ܐ. ܐܲܢܹܐ ܡܲܠܟܘܼܬܹܗ ܘܐܲܠܵܗܵܐ ܠܹܐ ܝܵܪܬܝܼ* ܘܐܲܢܹܐ ܐܝܼܬ ܗ݇ܘ̣ܵܘ ܒܚܲܕ݇ܟܡܵܐ ܐ݇ܢܵܫܹ̈ܐ ܡܸܢܵܘܟܼܘܿܢ. ܐܝܼܢܵܐ ܥܡܸܕܠܵܘܟܼܘܿܢ ܘܦܸܫܠܵܘܟܼܘܿܢ ܩܘܼܕܫܹܐ ܘܡܘܼܟܫܸܛܹܐ ܒܫܸܡܵܐ ܕܡܵܪܲܢ ܝܼܫܘܿܥ ܡܫܝܼܚܵܐ ܘܒܪܘܼܚܹܗ ܕܐܲܠܵܗܲܢ*
♱♱♱♱♱♱♱♱♱♱♱♱♱
ܚܲܕܼܒܫܲܒܵܐ ܕܲܬ̣ܪܹܝܢ ܕܲܫܠܝܼܚܹ̈ܐ ܠܘܩܐ ܙ: 31 ‐ ܫܘܠܡܐ ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܠܘܩܐ
♰ ܘܐ݇ܡܸܪܹܗ ܝܑܼܫܘܿܥ ܠܬܲܠܡܝܼ̈ܕܘܼܗܝ: ܠܡ̇ܢ ܗܲܕܟܼܵܐ ܡܲܕܡܸܢ ܠܐ݇ܢܵܫܹ̈ܐ ܕܐܵܗܵܐ ܫܲܪܒܬܵܐ. ܘܠܡ̇ܢ ܟܹܐ ܕܵܡܝܼ؟ ܟܹܐ ܕܵܡܝܼ ܠܛܠܵܝܹ̈ܐ ܕܟܹܐ ܝܲܬܒܼܝܼ ܒܫܘܼܩܵܐ. ܘܡܲܩܘܸܚܝܼ ܠܚܲܒܼܪ̈ܵܘܵܬܲܝܗܝ ܘܐܲܡܪܝܼ: ܙܡܸܪܲܢ ܐܸܠܵܘܟܼܘܿܢ ܘܠܵܐ ܪܩܸܕܠܵܘܟܼܘܿܢ. ܘܠܝܹܐܠܲܢ ܐܸܠܵܘܟܼܘܿܢ ܘܠܵܐ ܒܟ݂ܹܐܠܵܘܟܼܘܿܢ ܣܵܒܵܒ ܐ݇ܬܹܐܠܹܗ ܝܘܿܚܲܢܵܢ ܡܲܥܡܕܵܢܵܐ ܠܵܐ ܒܹܐܟܼܵܠܵܐ ܠܲܚܡܵܐ. ܘܠܵܐ ܒܸܫܬܵܝܵܐ ܚܲܡܪܵܐ. ܘܒܹܐܡܵܪܵܐ ܝܬܘܿܢ: ܫܹܐܕܵܐ ܐܝܼܬ ܒܝܼܹܗ. ܐ݇ܬܹܐܠܹܗ ܒܪܘܿܢܹܗ ܕܐ݇ܢܵܫܵܐ ܒܹܐܟܼܵܠܵܐ ܘܒܸܫܬܵܝܵܐ. ܘܒܹܐܡܵܪܵܐ ܝܬܘܿܢ: ܗܵܐ ܓܲܒܼܪܵܐ ܐܵܟܼܘܿܠܵܐ ܘܫܲܬܝܵܢܵܐ ܕܚܲܡܪܵܐ. ܘܪܵܚܡܵܐ ܕܡܵܟܼܣܹ̈ܐ ܘܕܚܲܛܵܝܹ̈ܐ. ܘܦܸܫܠܵܗ̇ ܡܘܼܟܫܸܛܬܵܐ ܚܸܟܼܡܬܵܐ ܡ̣ܢ ܟܠܲܝܗܝ ܒܢܘܿܢ̈ܘܼܗ̇. ܐܝܼܢܵܐ ܐ݇ܬܹܐܠܹܗ ܚܲܕ݇ ܡ̣ܢ ܦܪ̈ܝܼܫܹܐ ܘܛܠܸܒܠܹܗ ܡܸܢܹܗ ܕܐܵܟܼܸܠ ܥܲܡܹܗ. ܘܥܒܼܸܪܹܗ ܠܒܲܝܬܵܐ ܕܗ̇ܘ ܦܪܝܼܫܵܐ ܝܬܸܒܼܠܹܗ. ܘܚܕܵܐ ܒܲܟܼܬܵܐ ܚܲܛܵܝܬܵܐ ܐܝܼܬ ܗ݇ܘܵܐ ܓܵܘ ܗ̇ܝ ܡܕܝܼܢ݇ܬܵܐ. ܘܟܲܕ ܝܕܸܥܠܵܗ̇ ܕܓܵܘ ܒܲܝܬܵܐ ܕܗ̇ܘ ܦܪܝܼܫܵܐ ܝܬܝܼܒܼܵܐ ܝܠܹܗ. ܫܩܸܠܵܗ̇ ܫܵܛܝܼܦܬܵܐ ܕܒܸܣܡܵܐ. ܘܟܠܹܐܠܵܗ̇ ܠܒܸܣܬܪܹܗ ܠܘܵܬ ܐܲܩܠܵܬܹ̈ܗ ܘܒܲܟܼܝܵܐ ܗ݇ܘܵܐ. ܘܫܘܼܪܹܐܠܵܗ̇ ܡܲܬܪܘܼܝܹܐ ܐܲܩ̈ܠܵܬܹܗ ܒܕܸܡܥ̈ܘܼܗ̇ ܘܒܣܲܥܪܵܐ ܕܪܹܫܵܗ̇ ܡܲܫܝܵܐ ܗ݇ܘܵܐܠܗ݇ܘܿܢ. ܘܢܲܫܩܵܐ ܗ݇ܘܵܐ ܐܲܩܠܵܬ̈ܘܼܗܝ. ܘܡܵܫܚܵܐ ܗ݇ܘܵܐ ܠܗ݇ܘܿܢ ܒܒܸܣܡܵܐ. ܐܝܼܢܵܐ ܟܲܕ ܚܙܹܐܠܹܗ ܗ̇ܘ ܦܪܝܼܫܵܐ ܕܩܲܡ ܩܵܪܹܐ ܠܹܗ، ܚܫܸܒܼܠܹܗ ܒܓܵܢܹܗ ܘܐ݇ܡܸܪܹܗ: ܐܵܗܵܐ ܐܸܢ ܢܒܼܝܼܵܐ ܗ݇ܘܵܐ، ܒܸܬ ܝܵܕܸܥ ܗ݇ܘܵܐ ܡܵܢܝܼ ܝܼܠܵܗ̇، ܘܡܘܿܕܝܼ ܒܵܗ݇ܣܘܼܗ̇. ܕܚܲܛܵܝܬܵܐ ܝܠܵܗ̇ ܗ̇ܝ ܒܲܟܼܬܵܐ ܕܩܘܼܪܒܸܢܵܗ̇ ܐܸܠܹܗ. ܐܝܼܢܵܐ ܓ̰ܘܼܘܸܒܠܹܗ ܝܑܼܫܘܿܥ ܘܐ݇ܡܸܪܹܗ ܐܸܠܹܗ: ܫܸܡܥܘܿܢ ܐܝܼܬܠܝܼ ܚܲܕ݇ ܡܸܢܕܝܼ ܕܐܲܡܪܸܢ ܐܸܠܘܼܟܼ. ܐܝܼܢܵܐ ܗ̇ܘ ܐ݇ܡܸܪܹܗ ܐܸܠܹܗ: ܐ݇ܡܘܿܪ ܪܵܒܝܼܝܼ. ܐܵܡܸܪ ܐܸܠܹܗ ܝܑܼܫܘܿܥ: ܬܪܹܝ ܕܲܝܢܵܢܹ̈ܐ ܐܝܼܬ ܗ݇ܘܵܘ ܠܚܲܕ݇ ܡܵܪܵܐ ܕܕܲܝܢܵܐ. ܚܲܕ݇ ܕܲܝܢܵܢܵܐ ܗ݇ܘܵܐ ܚܲܡܸܫܡܵܐܐ ܕܹܝܢܵܪܹ̈ܐ ܘܐ݇ܚܹܪ݇ܢܵܐ ܚܲܡܫܝܼ ܕܝܼܢܵܪܹ̈ܐ. ܘܕܠܲܝܬ ܗ݇ܘܵܐ ܠܗ݇ܘܿܢ ܠܸܦܪܵܥܵܐ. ܠܬܸܪܘܲܝܗܝ ܫܒܼܸܩܠܹܗ. ܗܲܕܟܼܵܐ ܐܲܝܢܝܼ ܡܸܢܲܝܗܝ ܒܘܼܫ ܙܵܘܕܵܐ ܒܸܬ ܡܲܚܸܒܠܹܗ؟ ܓ̰ܘܼܘܸܒܠܹܗ ܫܸܡܥܘܿܢ ܘܐ݇ܡܸܪܹܗ: ܒܸܚܫܵܒܼܵܐ ܝܘܸܢ ܗ̇ܘ ܕܦܸܫܠܹܗ ܫܒܼܝܼܩܵܐ ܐܸܠܹܗ ܪܵܒܵܐ. ܐܵܡܸܪ ܐܸܠܹܗ ܝܑܼܫܘܿܥ: ܬܪܝܼܨܵܐܝܼܬ ܕܸܢܘܼܟܼ. ܘܕܥܸܪܹܗ ܠܘܵܬ ܗ̇ܝ ܒܲܟܼܬܵܐ ܘܐ݇ܡܸܪܹܗ ܠܫܸܡܥܘܿܢ: ܒܸܚܙܵܝܘܼܗ̇ ܝܘܸܬ ܐܵܗܵܐ ܒܲܟܼܬܵܐ. ܠܒܲܝܬܘܼܟܼ ܥܒܼܸܪܝܼ. ܡܝܼ̈ܵܐ ܠܐܲܩܠܵܬ̈ܝܼ ܠܵܐ ܝܘܼܗ݇ܒܼܸܠܘܼܟܼ. ܐܝܼܢܵܐ ܐܵܗܵܐ ܒܕܸܡܥ̈ܘܼܗ̇ ܐܲܩܠܵܬ̈ܝܼ ܡܘܼܬܪܹܐܠܵܗ̇. ܘܒܟܵܘܣܘܼܗ̇ ܡܸܫܝܵܝܠܵܗ̇. ܐܲܢ݇ܬ ܠܵܐ ܢܫܝܼܩܸܢܘܼܟܼ. ܐܝܼܢܵܐ ܐܵܗܵܐ ܗܵܐ ܡ̣ܢ ܕܥܒܼܸܪܵܗ̇ ܠܵܐ ܫܠܹܐܠܵܗ̇ ܡ̣ܢ ܠܸܢܫܵܩܵܐ ܐܲܩܠܵܬ̈ܝܼ. ܐܲܢ݇ܬ ܡܸܫܚܵܐ ܠܪܹܫܝܼ ܠܵܐ ܡܫܝܼܚܠܘܼܟܼ. ܐܝܼܢܵܐ ܐܵܗܵܐ ܒܡܸܫܚܵܐ ܕܒܸܣܡܵܐ ܐܲܩܠܵܬ̈ܝܼ ܡܫܝܼܚܠܵܗ̇. ܒܘܼܬ ܕܐܵܗܵܐ ܒܹܐܡܵܪܵܐ ܝܘܸܢ ܐܸܠܘܼܟܼ. ܕܫܒܼܝܼܩܹܐ ܝܢܵܐ ܐܸܠܵܗ̇ ܚܛܝܼܵܬܘܼ̈ܗ̇ ܪܵܒܹܐ. ܣܵܒܵܒ ܕܡܘܼܚܸܒܠܵܗ̇ ܪܵܒܵܐ. ܐܝܼܢܵܐ ܗ̇ܘ ܕܚܲܕܟ̰ܵܐ ܦܵܐܸܫ ܫܒܼܝܼܩܵܐ ܐܸܠܹܗ. ܚܲܕ݇ܟ̰ܵܐ ܟܹܐ ܡܲܚܸܒ. ܘܐ݇ܡܸܪܹܗ ܠܗ̇ܝ ܒܲܟܼܬܵܐ: ܫܒܼܝܼܩܹܐ ܝܢܵܐ ܐܸܠܹܟܼܝ ܚܛܝܼܵܬܹܟܼ̈ܝ. ܐܝܼܢܵܐ ܫܘܼܪܹܐ ܠܗ݇ܘܿܢ ܐܵܢܝܼ ܕܝܼܗ݇ܘܵܘ ܝܬܝܼܒܼܹܐ ܒܹܐܡܵܪܵܐ ܓܵܘ ܓܵܢܲܝܗܝ: ܐܵܗܵܐ ܡܵܢܝܼ ܝܠܹܗ ܕܐܘܿܦ ܚܛܝܼܵܬܹ̈ܐ ܒܸܫܒܼܵܩܵܐ ܝܠܹܗ؟ ܐܝܼܢܵܐ ܝܑܼܫܘܿܥ ܐ݇ܡܸܪܹܗ ܠܗ̇ܝ ܒܲܟܼܬܵܐ: ܗܲܝܡܵܢܘܼܬܹܟܼܝ ܒܸܬ ܡܲܚܝܼܵܠܹܟܼܝ ܙܹܠ݇ܝ ܒܫܠܵܡܵܐ.
♱♱♱♱♱♱♱♱♱♱♱♱♱
|