ܚܲܕܼܒܫܲܒܵܐ ܕܲܬ̣ܪܹܝܢ
ܕܩܘܼܕܵܫ ܥܹܕܬܵܐ
ܡܲܦܩܵܢܵܐ؛ ܠܛ؛
32‐ܡ؛ 17
ܬܸܒ̣ܘ ܘܲܫܠܵܘ
ܡܲܦܩܵܢܵܐ ܣܸܦܪܵܐ ܕܬܼܲܪܹܝܢ ܕܐܘܿܪܵܝܬܵܐ؛
ܐܲܚܲܝ̈ ܒܲܪܸܟ̣ܡܵܪܝ܀
ܘܥܒ̣ܸܕܠܗ݇ܘܿܢ
ܒܢܲܝ̈ ܝܼܣܪܵܝܹܠ ܟܠ ܕܦܘܼܩܸܕܠܹܗ ܡܵܪܝܵܐ ܠܡܘܼܫܹܐ؛
ܗܵܕܟ̣ܵܐ ܥܒ̣ܸܕܠܗ݇ܘܿܢ܀ ܘܡܘܼܬܹܐܠܗ݇ܘܿܢ ܠܡܲܫܟܢܵܐ ܠܟܸܣ ܡܘܼܫܹܐ؛ ܡܲܫܟܢܵܐ ܘܟܠܲܝܗܝ
ܡܵܐܢ̈ܘܼܗܝ؛ ܗܵܠܲܩܝܵܬܹ̈ܐ ܦܸܫܟܘܼܫܹ̈ܐ؛ ܘܕܲܦܹ̈ܐ؛ ܘܣܸܟܵܟܹ̈ܐ؛ ܘܕܵܒ̣ܪܹ̈ܐ؛ ܘܐ݇ܣܛܘܼܢܹ̈ܐ؛
ܘܣܵܡܟܹ̈ܐ [ܘܣܢܵܕܝܵܬܹ̈ܐ]܀ ܘܦܲܪܕܵܐ ܕܓܸܠܕܹ̈ܐ ܕܒܲܪ̈ܥܵܢܹܐ ܨܒ̣ܝܼܥܵܐ ܣܡܘܼܩܵܐ؛
ܘܦܲܪܕܵܐ ܕܓܸܠܕܹ̈ܐ ܕܒܲܪ̈ܥܵܢܹܐ ܨܒ̣ܝܼܥܹ̈ܐ ܡܝܼܠܵܐ؛ ܘܣܸܬܪܵܐ ܕܦܲܪܕܵܐ܀ ܘܩܹܒ̣ܘܼܬܵܐ
ܕܣܵܗܕܘܼܬܵܐ؛ ܘܫܲܩܠܹ̈ܐ؛ ܘܚܘܼܣܵܝܵܐ؛ ܘܦܵܬܘܿܪܵܐ ܘܟܠܲܝܗܝ ܡܵܐܢ̈ܘܼܗܝ. ܘܠܚܸܡ
ܐܲܦܹ̈ܐ [ܘܠܲܚܡܵܐ ܕܩܘܼܪܒܵܢܵܐ]؛ ܘܩܲܢܕܹܝܠܵܐ ܕܸܟ̣ܝܵܐ ܘܫܪ̈ܵܓ̣݇ܝܵܬܹܐ؛ ܘܫܪܵܓ̣݇ܝܵܐ ܕܣܸܕܪܹ̈ܐ؛
ܘܟܠܲܝܗܝ ܡܵܐܢܹ̈ܐ؛ ܘܡܸܫܚܵܐ ܩܵܐ ܡܲܠܗܵܝܬܵܐ܀ ܘܡܲܕܒܚܵܐ ܕܕܲܗܒ̣ܵܐ؛ ܘܡܸܫܚܵܐ ܕܡܫܵܚܬܵܐ؛
ܘܒܸܣܡܹ̈ܐ ܪܹ̈ܝܚܵܢܹܐ؛ ܘܦܲܪܕܵܐ ܕܬܲܪܥܵܐ ܕܡܲܫܟܢܵܐ܀ ܘܡܲܕܒܚܵܐ ܕܒܪܸܢܓ̰؛ ܘܩܲܪܩܸܠ
[ܡܵܐܢܵܐ] ܕܝܼܹܗ ܕܒܪܸܢܓ̰؛ ܘܫܲܩܠܹ̈ܐ ܘܟܠܲܝܗܝ ܡܵܐܢܹ̈ܐ. ܘܠܲܩܢܵܐ [ܘܬܲܫܬܵܐ] ܘܒܲܣܸܣ
[ܘܕܘܼܟܬܵܐ ܕܝ݇ܬܝܵܒ̣ܬܵܐ/قاعدة] ܕܝܼܘܿܗ̇؛
ܘܣܸܕܪܹ̈ܐ ܕܕܵܪܬܵܐ؛ ܘܐ݇ܣܛܘܼܢܹ̈ܐ ܘܣܵܡܟܹ̈ܐ
[ܘܣܢܵܕܝܵܬܹ̈ܐ]؛ ܘܦܲܪܕܵܐ ܕܬܲܪܥܵܐ ܕܕܵܪܬܵܐ؛ ܘܚܲܒ̣ܠܹ̈ܐ ܘܣܸܟܵܟܹ̈ܐ؛ ܘܟܠܲܝܗܝ ܡܵܐܢܹ̈ܐ
ܕܦܘܼܠܚܵܢܵܐ ܕܡܲܫܟܲܢ ܙܲܒ̣ܢܵܐ؛ ܘܠܒ̣ܸܫܝܵܬܹ̈ܐ ܕܚܸܠܡܲܬ ܠܸܥܒ̣ܵܕܵܐ ܚܸܠܡܲܬ ܓܵܘ ܩܘܼܕܫܵܐ؛
ܘܠܒ̣ܸܫܝܵܬܹ̈ܐ ܕܩܘܼܕܫܵܐ ܩܵܐ ܐܲܗܪܘܿܢ ܟܵܗܢܵܐ ܘܠܒ̣ܸܫܝܵܬܹ̈ܐ ܩܵܐ ܒܢܘܿܢ̈ܘܼܗܝ ܠܟܵܗܢܘܼܬܵܐ܀
ܐܲܝܟܼ ܕܦܘܼܩܸܕܠܹܗ ܡܵܪܝܵܐ ܠܡܘܼܫܹܐ؛ ܗܵܕܟ̣ܵܐ ܥܒ̣ܸܕܠܗ݇ܘܿܢ ܒܢܲܝ̈ ܝܼܣܪܵܝܹܠ ܟܠܹܗ
ܦܘܼܠܚܵܢܵܐ܀ ܘܚܙܹܐܠܹܗ ܡܘܼܫܹܐ ܟܠܹܗ ܦܘܼܠܚܵܢܵܐ ܦܝܼܫܵܐ ܥܒ̣ܝܼܕܵܐ ܐܲܝܟܼ ܕܦܘܼܩܸܕܠܹܗ ܡܵܪܝܵܐ
ܠܡܘܼܫܹܐ ܗܵܕܟ̣ܵܐ ܥܒ̣ܸܕܠܗ݇ܘܿܢ؛ ܘܒܘܼܪܟ̣ܝܼܠܹܗ ܡܘܼܫܹܐ܀ ܘܐ݇ܡܸܪܹܗ ܡܵܪܝܵܐ ܠܡܘܼܫܹܐ؛
ܒܚܲܕ݇ ܒܝܲܪܚܵܐ ܩܵܕ݇ܡܵܝܵܐ ܡܲܩܸܡܠܹܗ ܡܲܫܟܲܢܙܲܒ̣ܢܵܐ܀ ܘܡܲܬܸܒ̣ ܬܵܡܵܐ ܩܹܒ̣ܘܼܬܵܐ
ܕܣܵܗܕܘܼܬܵܐ؛ ܘܦܪܘܿܣ ܥܲܠ ܩܹܒ̣ܘܼܬܵܐ ܦܲܪܕܵܐ؛ ܘܡܲܥܒ̣ܸܕ ܦܵܬܘܿܪܵܐ؛ ܘܡܲܪܝܸܙ ܣܸܕܪܹ̈ܐ؛
ܘܡܲܥܒ̣ܸܪ ܩܲܢܕܹܝܠܵܐ ܘܡܲܠܗܝܼ ܫܪ̈ܵܓ̣݇ܝܵܬܹܐ܀ ܘܡܲܬܸܒ̣ ܡܲܕܒܚܵܐ ܕܕܲܗܒ̣ܵܐ ܩܵܐ ܒܸܣܡܵܐ
ܩܵܕ݇ܡ ܩܹܒ̣ܘܼܬܵܐ ܕܣܵܗܕܘܼܬܵܐ؛ ܘܕܪܝܼ ܦܲܪܕܵܐ ܥܲܠ ܬܲܪܥܵܐ ܕܡܲܫܟܢܵܐ ܘܡܲܬܸܒ̣ ܡܲܕܒܚܵܐ
ܕܕܸܒ̣ܚܵܐ ܩܵܕ݇ܡ ܬܲܪܥܵܐ ܕܡܲܫܟܲܢܙܲܒ̣ܢܵܐ܀ ܘܡܲܬܸܒ̣ ܠܲܩܢܵܐ [ܬܲܫܬܵܐ] ܒܹܝܠ ܡܲܫܟܲܢ
ܙܲܒ̣ܢܵܐ ܠܡܲܕܒܚܵܐ؛ ܘܕܪܝܼ ܓܵܘܵܗ̇ ܡܝܼܵܐ܀ ܘܡܲܩܘܝܼ ܕܵܪܬܵܐ ܠܟܠܹܗ ܚܵܕܸܪܘܵܢܹܐ؛ ܘܕܪܝܼ
ܦܲܪܕܵܐ ܥܲܠ ܬܲܪܥܵܐ ܕܕܵܪܬܵܐ܀ ܘܫܩܘܿܠ ܡܸܫܚܵܐ ܕܡܫܝܼܚܘܼܬܵܐ ܘܡܫܘܿܚ ܠܡܲܫܟܢܵܐ ܘܠܟܠ ܡܸܢܕܝܼ
ܕܐܝܼܬ ܓܵܘܹܗ؛ ܘܩܵܕܸܫܠܹܗ؛ ܘܠܟܠܲܝܗܝ ܡܵܐܢ̈ܘܼܗܝ ܘܗܵܘܹܐ ܩܲܕܝܼܫܵܐ܀ ܘܡܫܘܿܚ ܠܡܲܕܒܚܵܐ
ܕܕܸܒ̣ܚܵܐ ܘܠܟܠܲܝܗܝ ܡܵܐܢ̈ܘܼܗܝ؛ ܘܩܵܕܸܫܠܹܗ ܠܡܲܕܒܚܵܐ؛ ܘܗܵܘܹܐ ܡܲܕܒܚܵܐ ܩܕܘܿܫ
ܩܘܼܕܫܹ̈ܐ܀ ܘܡܫܘܿܚ ܠܠܲܩܢܵܐ [ܠܬܲܫܬܵܐ]؛ ܘܒܵܣܸܣ [ܘܕܘܼܟܬܵܐ ܕܝ݇ܬܝܵܒ̣ܬܵܐ] ܕܝܼܘܿܗ̇؛
ܘܩܵܕܸܫܠܗ݇ܘܿܢ܀ ܘܡܲܩܪܸܒ̣ [ܘܩܲܪܒܸܢ] ܠܐܲܗܪܘܿܢ ܘܒܢܘܿܢ̈ܘܼܗܝ ܠܬܲܪܥܵܐ ܕܡܲܫܟܲܙܲܒ̣ܢܵܐ؛
ܘܡܲܣܚܝܼܠܗ݇ܘܿܢ ܒܡܝܼܵܐ܀ ܘܡܲܠܒ̣ܸܫ ܠܐܲܗܪܘܿܢ ܠܒ̣ܸܫܝܵܬܹ̈ܐ ܕܩܘܼܕܫܵܐ؛ ܘܡܫܘܿܚܠܹܗ
܆ܘܩܵܕܸܫܠܹܗ؛ ܘܚܘܼܫ ܥܵܒ̣ܸܕܠܝܼ ܟܵܗܢܘܼܬܵܐ؛ ܘܡܲܩܪܸܒ̣ [ܘܩܲܪܒܸܢ] ܠܒܢܘܿܢ̈ܘܼܗܝ ܘܡܲܠܒ̣ܸܫܠܗ݇ܘܿܢ
ܣܘܼܕܪ̈ܵܬܹܐ܀ ܘܡܫܘܿܚܠܗ݇ܘܿܢ ܐܲܝܟܼ ܕܡܫܝܼܚܠܘܼܟܼ ܠܐܲܗܪܘܿܢ ܐܵܚܘܿܢܘܼܟܼ؛ ܘܥܵܒ̣ܕܝܼ
ܠܝܼ ܟܵܗܢܘܼܬܵܐ؛ ܘܗܵܘܝܵܐ ܩܵܬܲܝܗܝ ܡܫܝܼܚܘܼܬܵܐ ܠܟܵܗܢܘܼܬܵܐ ܗܲܠ ܠܥܵܠܲܡ ܩܵܐ ܕܵܘܪܲܝܗܝ܀
ܘܥܒ̣ܸܕܠܹܗ ܡܘܼܫܹܐ ܟܠ ܡܸܢܕܝܼ ܕܦܘܼܩܸܕܠܹܗ ܡܵܪܝܵܐ؛ ܗܵܕܟ̣ܵܐ ܥܒ̣ܸܕܠܹܗ܀
ܚܲܒ̣ܪܹܗ
ܐ؛ ܡܲܠܟܹ̈ܐ؛
ܚ؛ 10‐29
ܫܠܵܘ ܟܬܵܒ̣ܵܐ
ܕܲܣܦܲܪ ܡܲܠܟܵܘܵܬ̣ܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܘܟܲܕ
ܦܠܸܛܠܗ݇ܘܿܢ ܟܵܗܢܹ̈ܐ ܡ̣ܢ ܩܘܼܕܫܵܐ؛ ܒܲܝܬܹܗ ܕܡܵܪܝܵܐ
ܦܸܫܠܹܗ ܡܸܠܝܵܐ ܥܢܵܢܵܐ܀ ܘܠܵܐ ܡܨܹܐܠܗ݇ܘܿܢ ܟܵܗܢܹ̈ܐ ܠܸܟܠܵܝܵܐ ܘܠܸܥܒ̣ܵܕܵܐ ܚܸܠܲܡܬ
ܡ̣ܢ ܩܵܕ݇ܡ ܥܢܵܢܵܐ؛ ܣܵܒܵܒ ܐܝܼܩܵܪܹܗ ܕܡܵܪܝܵܐ ܦܸܫܠܹܗ ܡܸܠܝܵܐ ܒܲܝܬܵܐ ܕܡܵܪܝܵܐ܀ ܗܵܝܓܵܗ̇
ܐ݇ܡܸܪܹܗ ܫܠܹܝܡܘܿܢ؛ ܝܵܐ ܡܵܪܝܵܐ ܐܲܢ݇ܬ̇ ܐ݇ܡܸܪܘܼܟܼ ܠܸܫܪܵܝܵܐ ܒܥܲܪܦܸܠܵܐ [ܒܡܸܫ]܀
ܘܐܵܢܵܐ ܒܢܵܝܵܐ ܒܢܹܐܠܝܼ ܒܹܝܬ̣ ܡܲܥܡܪܵܐ ܐܸܠܘܼܟܼ؛ ܕܘܼܟܬܵܐ ܩܵܐ ܝ݇ܬܝܵܒ̣ܬܘܼܟܼ ܠܥܵܠܡܝܼܢ܀
ܘܡܘܼܕܸܪܹܗ ܡܲܠܟܵܐ ܦܵܬܹܗ ܘܒܘܼܪܸܟ̣ܠܹܗ ܠܟܠܹܗ ܟܸܢܫܵܐ ܕܝܼܣܪܵܝܹܠ؛ ܘܟܠܹܗ ܟܸܢܫܵܐ
ܕܝܼܣܪܵܝܹܠ ܟܸܠܝܵܐ܀ ܘܐ݇ܡܸܪܹܗ؛ ܒܪܝܼܟ̣ܵܐ ܝ݇ܠܹܗ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ؛ ܕܗܘܼܡܙܸܡܠܹܗ
ܒܦܘܼܡܹܗ ܥܲܡ ܕܵܘܝܼܕ ܒܵܒܝܼ ܘܒܐܝܼܕܹ̈ܗ ܬܘܼܡܸܡܠܹܗ ܘܐ݇ܡܸܪܹܗ܀ ܡ̣ܢ ܝܵܘܡܵܐ ܕܦܘܼܠܸܛܠܝܼ
ܠܛܵܝܸܦܝܼ ܒܢܲܝ̈ ܝܼܣܪܵܝܹܠ ܡ̣ܢ ܡܸܨܪܹܝܢ؛ ܠܵܐ ܒܣܸܡܠܵܐ ܠܝܼ ܒܚܲܕ݇ ܡܕܝܼܢ݇ܬܵܐ ܡ̣ܢ
ܟܠܲܝܗܝ ܫܲܒ̣ܛܹ̈ܐ ܕܝܼܣܪܵܝܹܠ؛ ܠܸܒܢܵܝܵܐ ܒܲܝܬܵܐ ܕܗܵܘܹܐ ܫܸܡܝܼ ܬܵܡܵܐ. ܘܒܣܸܡܠܵܐ ܠܝܼ
ܒܕܵܘܝܼܕ ܕܗܵܘܹܐ ܥܲܠ ܛܵܝܸܦܝܼ ܝܼܣܪܵܝܹܠ܀ ܘܗܘܹܐܠܵܗ̇ ܒܠܸܒܹܗ ܕܕܵܘܝܼܕ ܒܵܒܝܼ ܠܸܒܢܵܝܵܐ
ܒܲܝܬܵܐ ܠܫܸܡܹܗ ܕܡܵܪܝܵܐ ܐܲܠܵܗܵܐ ܕܝܼܣܪܵܝܹܠ܀ ܘܐ݇ܡܸܪܹܗ ܡܵܪܝܵܐ ܠܕܵܘܝܼܕ ܒܵܒܝܼ؛
ܡܒܵܕܲܠ ܕܗܘܹܐܠܵܗ̇ ܒܠܸܒܘܼܟܼ ܠܸܒܢܵܝܵܐ ܒܲܝܬܵܐ ܠܫܸܡܝܼ؛ ܨܦܵܝܝܼ ܥܒ̣ܸܕܠܘܼܟܼ ܕܗ݇ܘܹܐܠܵܗ̇
ܒܠܸܒܘܼܟܼ܀ ܐܝܼܢܵܐ ܐܲܢ݇ܬ̇ ܠܹܐ ܒܵܢܸܬ̇ ܒܲܝܬܵܐ ܠܫܸܡܝܼ؛ ܐܸܠܵܐ ܐܸܢ ܒܪܘܿܢܘܼܟܼ
ܕܦܵܠܸܛ ܡ̣ܢ ܚܵܨܘܼܟܼ؛ ܗ̇ܘ ܒܸܬ ܒܵܢܹܐ ܒܲܝܬܵܐ ܠܫܸܡܝܼ܀ ܘܡܘܼܟܡܸܠܹܗ ܡܵܪܝܵܐ ܚܲܒܪܵܐ
ܕܐ݇ܡܸܪܹܗ؛ ܘܩܸܡܠܝܼ ܡ̣ܢ ܓܹܒܵܐ ܕܕܵܘܝܼܕ ܒܵܒܝܼ؛ ܘܝ݇ܬܸܒ̣ܠܝܼ ܥܲܠ ܟܘܼܪܣܝܵܐ ܕܝܼܣܪܵܝܹܠ
ܐܲܝܟܼ ܕܐ݇ܡܸܪܹܗ ܡܵܪܝܵܐ؛ ܘܒܢܹܐܠܝܼ ܒܲܝܬܵܐ ܠܫܸܡܹܗ ܕܡܵܪܝܵܐ ܐܲܠܵܗܵܐ ܕܝܼܣܪܵܝܹܠ܀
ܘܡܘܼܬܸܒ̣ܠܝܼ ܬܵܡܵܐ ܩܹܒ̣ܘܼܬܵܐ ܕܩܵܘܠܹܗ ܕܡܵܪܝܵܐ؛ ܕܡܘܼܩܸܡܠܹܗ ܥܲܡ ܒܵܒܵܘ̈ܵܬܲܢ
ܟܲܕ ܦܘܼܠܛܝܼܠܹܗ ܡ̣ܢ ܐܲܪܥܵܐ ܕܡܸܨܪܹܝܢ܀ ܘܟܠܹܐܠܹܗ ܫܠܹܝܡܘܿܢ ܩܵܕ݇ܡ ܡܲܕܒܚܹܗ ܕܡܵܪܝܵܐ
ܒܲܪܩܘܼܒ̣ܠ ܟܠܹܗ ܟܸܢܫܵܐ ܕܝܼܣܪܵܝܹܠ؛ ܘܦܪܸܣܠܹܗ ܐܝܼܕ̈ܘܼܗܝ ܠܫܡܵܝܵܐ ܘܨܘܼܠܹܐܠܹܗ ܘܐ݇ܡܸܪܹܗ܀
ܝܵܐ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ؛ ܠܲܝܬ̇ ܐܲܝܟܼ ܕܝܼܘܼܟܼ ܒܫܡܲܝܵܐ ܡ̣ܢ ܥܘܼܠܘܼܠ ܘܥܲܠ
ܐܲܪܥܵܐ ܡ̣ܢ ܐܸܠܬܸܚܬ̇؛ ܕܟܹܐ ܚܵܡܸܬ̇ ܩܵܘܠܵܐ ܘܛܲܝܒܘܼܬܵܐ ܠܪܹ̈ܓܵܘܵܬܘܼܟܼ ܕܚܵܕܪܝܼ ܩܵܕ݇ܡܘܼܟܼ
ܒܗܵܩܘܼܬܵܐ؛ ܒܟܠܹܗ ܠܸܒܲܝܗܝ ܘܒܟܠܵܗ̇ ܓܵܢܲܝܗܝ܀ ܕܬܘܼܡܸܡܠܘܼܟܼ ܠܪܹܓܘܼܟܼ ܕܵܘܝܼܕ
ܡܸܢܕܝܼ ܕܐ݇ܡܸܪܘܼܟܼ ܐܸܠܹܗ. ܘܗܘܼܡܙܸܡܠܘܼܟܼ ܒܦܘܼܡܘܼܟܼ؛ ܘܒܐܝܼܕ̈ܘܼܟܼ ܡܘܼܟܡܸܠܘܼܟܼ
ܐܲܝܟܼ ܕܐܸܕܝܘܿܡ݇ ܝܵܘܡܵܐ܀ ܘܐܵܕܝܼܵܐ ܝܵܐ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ؛ ܢܛܘܿܪ
ܠܪܹܓܘܼܟܼ ܕܵܘܝܼܕ ܒܵܒܝܼ ܡܸܢܕܝܼ ܕܐ݇ܡܸܪܘܼܟܼ ܐܸܠܹܗ. ܠܵܐ ܦܵܐܹܫ ܩܸܛܥܝܵܐ ܐܸܠܘܼܟܼ ܒܪܘܿܢܵܐ
ܡ̣ܢ ܩܵܕ݇ܡܝܼ ܕܝܵܬܸܒ̣ ܥܲܠ ܟܘܼܪܣܝܵܐ ܕܝܼܣܪܵܝܹܠ؛ ܐܲܚܟ̰ܝܼ ܐܸܢ ܢܵܛܪܝܼ ܒܢܘܿܢ̈ܘܼܟܼ
ܐܘܼܪ̈ܚܵܬܲܝܗܝ ܠܸܚܕܵܪܵܐ ܩܵܕ݇ܡܝܼ ܒܗܵܩܘܼܬܵܐ ܐܲܝܟܼ ܕܐܲܢ݇ܬ̇ ܚܕܸܪܘܼܟܼ ܩܵܕ݇ܡܝܼ܀
ܘܐܵܕܝܼܵܐ ܝܵܐ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ؛ ܦܵܐܹܫ ܡܘܼܩܘܝܼܵܐ ܚܲܒܪܘܼܟܼ ܕܝ݇ܡܹܐܠܘܼܟܼ
ܠܪܹܓܘܼܟܼ ܕܵܘܝܼܕ ܒܵܒܝܼ؛ ܣܵܒܵܒ ܒܫܲܪܝܼܪܘܼܬܵܐ ܐܲܠܵܗܵܐ ܝ݇ܬܸܒ̣ܠܹܗ ܥܲܠ ܐܲܪܥܵܐ.
ܗܵܐ ܫܡܲܝܵܐ ܘܫܡܲܝܵܬܹ̈ܐ ܕܫܡܲܝܵܐ ܠܹܐ ܡܵܨܝܼ ܩܲܒܠܝܼܠܘܼܟܼ؛ ܚܲܕ݇ ܒܟܡܵܐ ܐܵܗܵܐ ܒܲܝܬܵܐ
ܕܒܢܹܐܠܝܼ؟ ܕܘܼܪ ܥܲܠ ܨܠܘܿܬܹܗ ܘܥܲܠ ܒܵܥܘܼܬܹܗ ܕܪܹܓܘܼܟܼ ܝܵܐ ܡܵܪܝܵܐ ܐܲܠܵܗܝܼ؛ ܠܸܫܡܲܥܝܵܐ
ܒܵܥܘܼܬܵܐ ܘܨܠܘܿܬܵܐ ܕܪܹܓܘܼܟܼ ܒܐܵܗܵܐ ܝܵܘܡܵܐ ܡܨܵܠܘܿܝܹܐ ܝ݇ܠܹܗ ܩܵܕ݇ܡܘܼܟܼ܀ ܚܘܼܫ
ܗܵܘܝܼ ܥܲܝܢ̈ܘܼܟܼ ܦܬܝܼܚܹܐ ܒܠܲܝܠܹܐ ܒܐܝܼܡܵܡܵܐ ܥܲܠ ܕܐܵܗܵܐ ܒܲܝܬܵܐ؛ ܒܕܘܼܟܬܵܐ ܕܐ݇ܡܸܪܘܼܟܼ
ܕܗܵܘܹܐ ܫܸܡܝܼ ܬܵܡܵܐ ܠܸܫܡܲܥܝܵܐ ܨܠܘܿܬܵܐ؛ ܕܪܹܓܘܼܟܼ ܨܵܠܘܿܝܹܐ ܝ݇ܠܹܗ ܩܵܕ݇ܡܘܼܟܼ
ܥܲܠ ܕܐܵܗܵܐ ܐܲܬܪܵܐ܀
♱♱♱♱♱♱♱♱♱
ܚܲܕ݇ܒܼܫܹܒܵܐ
ܕܬܪܹܝ ܕܩܘܼܕܵܫ ܥܹܕܬܵܐ
ܦܵܘܠܘܿܣ ܫܠܝܼܚܵܐ
ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܥܸܒܼܪ̈ܵܝܹܐ
ܐܲܚܲܝ̈ ܒܲܪܸܟܼܡܵܪܝ܀
ܥܸܒ̣ܪܵܝܹܐ؛ ܚ؛ 1‐ܛ؛5
ܐܝܼܢܵܐ
ܪܹܫܵܐ ܕܟܠܲܝܗܝ ܐܲܢܹܐ ܐܝܼܬܠܲܢ ܓܘܼܪܵܐ ܕܟܵܗܢܹ̈ܐ ܐܲܝܢܝܼ
ܕܝ݇ܬܸܒܼܠܹܗ ܡ̣ܢ ܝܲܡܝܼܢܵܐ ܕܟܘܼܪܣܝܵܐ ܕܓܘܼܪܘܼܬܵܐ ܒܫܡܲܝܵܐ* ܘܗ݇ܘܹܐܠܹܗ ܚܸܠܡܲܬܟܲܪ
ܕܒܹܝܬ ܩܘܼܕܫܵܐ ܘܕܡܲܫܟܢܵܐ ܕܣܲܪܲܣܬܘܼܬܵܐ؛ ܗ̇ܘ ܕܬܘܼܪܸܨܠܹܗ ܐܲܠܵܗܵܐ ܘܠܵܐ ܒܲܪܢܵܫܵܐ*
ܣܵܒܵܒ ܟܠ ܓܘܼܪܵܐ ܕܟܵܗܢܹ̈ܐ ܕܩܵܐܸܡ ܩܵܐ ܕܡܲܩܪܸܒܼ ܩܘܼܪ̈ܒܵܢܹܐ ܘܕܸܒܼܚܹ̈ܐ. ܒܘܼܬ
ܕܐܵܗܵܐ ܘܵܓ̰ܸܒ ܝܼܗ݇ܘ̣ܵܐ ܐܘܼܦ ܩܵܐ ܕܐܵܗܵܐ ܕܗܵܘܹܐ ܠܹܗ ܚܲܕ݇ ܡܸܢܕܝܼ ܕܡܲܩܪܸܒܼ* ܘܐܸܢ
ܗܵܘܹܐ ܗ݇ܘ̣ܵܐ ܒܐܲܪܥܵܐ؛ ܐܘܼܦ ܟܵܗܢܵܐ ܠܹܐ ܗܵܘܹܐ ܗ݇ܘ̣ܵܐ ܣܵܒܵܒ ܐܝܼܬ ܗ݇ܘ̣ܵܘ ܟܵܗܢܹ̈ܐ
ܕܡܲܩܪܸܒܼܝܼ ܗ݇ܘ̣ܵܘ ܩܘܼܪ̈ܒܵܢܹܐ ܐܲܝܟܼ ܫܲܪܥܲܬ* ܐܵܢܝܼ ܕܥܵܒܼܕܝܼ ܚܸܠܡܲܬ ܠܕܵܡܵܝܬܵܐ
ܘܠܛܸܠܵܢܝܼܬܵܐ ܕܐܵܢܝܼ ܕܓܵܘ ܫܡܲܝܵܐ. ܐܲܝܟܼ ܕܦܸܫܠܵܗ̇ ܐ݇ܡܝܼܪܬܵܐ ܩܵܐ ܡܘܼܫܹܐ ܐܝܼܡܲܢ
ܕܬܵܪܘܿܨܹܐ ܗ݇ܘ̣ܵܐ ܡܲܫܟܢܵܐ. ܚܙܝܼ ܘܥܒܼܘܿܕ ܟܠ ܡܸܢܕܝܼ ܒܕܵܡܵܝܬܵܐ ܗ̇ܝ ܕܦܸܫܠܵܗ̇ ܡܘܼܚܙܝܼܬܵܐ
ܐܸܠܘܼܟܼ ܒܛܘܼܪܵܐ* ܐܝܼܢܵܐ ܐܵܕܝܼܵܐ ܚܸܠܡܲܬ ܒܘܼܫ ܨܦܵܝ ܡ̣ܢ ܕܗ̇ܝ ܩܘܼܒܸܠܹܗ ܝܼܫܘܿܥ
ܡܫܝܼܚܵܐ. ܐܲܝܟܼ ܕܒܘܼܫ ܨܦܵܝ ܝ݇ܠܵܗ̇ ܐܘܼܦ ܕܝܵܬܹܩܹܐ ܗ̇ܝ ܕܥܒܼܝܼܕܵܐ ܝ݇ܠܹܗ ܒܝܼܵܗ̇
ܢܵܘܸܢܓ̰ܝܼ. ܘܒܩܵܘܠܹ̈ܐ ܕܒܘܼܫ ܨܦܵܝ ܡ̣ܢ ܕܗ̇ܝ ܦܸܫܠܵܗ̇ ܝܘܼܗܒܸܠܬܵܐ* ܣܵܒܵܒ ܐܸܢ ܗ̇ܝ
ܩܵܕ݇ܡܵܝܬܵܐ ܗܵܘܝܵܐ ܗ݇ܘ̣ܵܐ ܕܠܵܐ ܠܵܘܡܵܐ؛ ܠܲܝܬ ܗ݇ܘ̣ܵܐ ܕܘܼܟܬܵܐ ܩܵܐ ܕܐܵܗܵܐ ܕܬܪܹܝ* ܣܵܒܵܒ
ܒܸܠܝܵܡܵܐ ܝ݇ܠܹܗ ܐܸܠܲܝܗܝ ܘܒܹܐܡܵܪܵܐ؛ ܕܗܵܐ ܒܹܐܬܵܝܵܐ ܝ݇ܢܵܐ ܝܵܘܡܵܢܹ̈ܐ ܒܹܐܡܵܪܵܐ ܝ݇ܠܹܗ
ܡܵܪܝܵܐ؛ ܒܸܬ ܬܲܡܸܡܸܢ ܥܲܠ ܒܲܝܬܵܐ ܕܒܹܝܬ ܝܼܗܘܼܕܵܐ ܕܝܵܬܹܩܹܐ ܚܲܕܬܵܐ* ܠܵܐ ܐܲܝܟܼ ܕܗ̇ܝ
ܕܝܵܬܹܩܹܐ ܕܝܘܼܗܒܼܸܠܝܼ ܩܵܐ ܒܵܒܵܘܵܬܲܝ̈ܗܝ؛ ܒܝܵܘܡܵܐ ܕܕܒܼܸܩܠܝܼ ܒܐܝܼܕܲܝܗܝ ܘܦܘܼܠܛܲܝܗܝ
ܠܝܼ ܡ̣ܢ ܐܲܪܥܵܐ ܕܡܸܨܪܹܝܢ. ܡ̣ܢ ܣܵܒܵܒ ܕܐܵܢܝܼ ܠܵܐ ܟܠܹܐܠܗ݇ܘܿܢ ܒܕܝܵܬܹܩܹܐ ܕܕܝܼܝܼ؛
ܐܘܼܦ ܐ݇ܢܵܐ ܡܘܼܣܠܹܐܠܝܼ ܐܸܠܲܝܗܝ ܒܹܐܡܵܪܵܐ ܝ݇ܠܹܗ ܡܵܪܝܵܐ* ܐܝܼܢܵܐ ܐܵܗܵܐ ܕܝܵܬܹܩܹܐ
ܕܒܸܬ ܝܵܗܒܼܸܢ ܩܵܐ ܒܲܝܬܵܐ ܕܒܹܝܬ ܝܼܣܪܵܝܹܠ ܒܵܬ݇ܪ ܕܐܵܢܝܼ ܝܵܘܡܵܢܹ̈ܐ ܒܸܐܡܵܪܵܐ ܝ݇ܠܹܗ
ܡܵܪܝܵܐ. ܒܸܬ ܝܵܗ݇ܒܼܸܢܵܗ̇ ܫܲܪܥܲܬܝܼ ܒܚܝܼܵܠܲܝܗܝ ܘܥܲܠ ܠܸܒܵܘܵܬܲܝ̈ܗܝ ܒܸܬ ܟܵܬܒܼܸܢܵܗ̇.
ܘܒܸܬ ܗܵܘܸܢ ܩܵܬܲܝܗܝ ܐܵܢܵܐ ܐܲܠܵܗܵܐ؛ ܘܐܵܢܝܼ ܒܸܬ ܗܵܘܝܼ ܩܵܬܝܼ ܛܵܝܸܦܵܐ* ܗܸܟ̃
ܐ݇ܢܵܫܵܐ ܠܹܐ ܡܵܠܸܦ ܠܒܪܘܼܢܵܐ ܕܡܕܝܼܢ݇ܬܹܗ؛ ܘܐܘܼܦ ܠܵܐ ܡܵܠܸܦ ܠܐܵܚܘܿܢܹܗ ܘܐܵܡܸܪ ܕܝ݇ܕܝܼܥ
ܠܡܵܪܝܵܐ. ܣܵܒܵܒ ܟܠܲܝܗܝ ܒܸܬ ܝܵܕܥܝܼ ܠܝܼ ܡ̣ܢ ܙܥܘܿܪܲܝܗܝ ܘܗܲܠ ܓܘܼܪܲܝܗܝ. ܘܒܸܬ ܦܵܚܠܸܢܗ݇ܘܿܢ
ܡ̣ܢ ܥܵܘܠܲܝܗܝ؛ ܘܚܛܝܼܵܬܲܝ̈ܗܝ ܡܸܢ݇ܕܪܹܫ̄ ܠܹܐ ܕܵܟܼܪܸܢ ܐܸܠܲܝܗܝ* ܒܗ̇ܝ ܕܐ݇ܡܸܪܹܗ
ܚܲܕܬܵܐ؛ ܥܵܒܼܸܕܠܹܗ ܥܲܬܝܼܩܬܼܵܐ ܠܗ̇ܝ ܩܵܕ݇ܡܵܝܬܵܐ؛ ܘܗ̇ܘ ܕܝܼܠܹܗ ܥܲܬܝܼܩܵܐ ܘܣܝܼܒܼܵܐ.
ܩܘܼܪܒܵܐ ܝ݇ܠܹܗ ܠܚܪܵܒܼܵܐ* ܒܕܝܵܬܹܩܹܐ ܩܵܕ݇ܡܵܝܬܵܐ ܐܝܼܬ ܗ݇ܘܼܵܐ ܦܘܼܩܵܕܹ̈ܐ ܕܚܸܠܡܲܬ
ܘܒܹܝܬ ܩܘܼܕܫܵܐ ܥܵܠܡܵܢܵܝܵܐ* ܣܵܒܵܒ ܡܲܫܟܢܵܐ ܩܵܕ݇ܡܵܝܵܐ ܕܦܸܫܠܹܗ ܬܘܼܪܨܵܐ ܐܝܼܬ ܗ݇ܘ̣ܵܐ
ܓܵܘܹܗ ܡܢܵܪܬܵܐ ܘܦܵܬܘܿܪܵܐ ܘܠܚܸܡ ܐܲܦܹ̈ܐ. ܘܦܵܐܸܫ ܗ݇ܘ̣ܵܐ ܩܸܪܝܵܐ ܒܹܝܬ ܩܘܼܕܫܵܐ* ܐܝܼܢܵܐ
ܡܲܫܟܢܵܐ ܓܵܘܵܝܵܐ ܕܠܓܵܘܵܝܝܼ ܡ̣ܢ ܣܸܬܪܵܐ ܕܬܲܪܥܵܐ ܕܬܪܹܝ. ܦܵܐܸܫ ܗ݇ܘ̣ܵܐ ܩܸܪܝܵܐ ܩܕܘܿܫ
ܩܘܼܕܫܹ̈ܐ؛ ܐܝܼܬ ܗ݇ܘ̣ܵܐ ܓܵܘܹܗ ܦܝܼܪܡܵܐ ܕܕܲܗܒܼܵܐ ܘܩܹܒܼܘܼܬܵܐ ܕܕܝܵܬܹܩܹܐ ܡܘܼܟܸܣܬܵܐ
ܟܠܵܗ̇ ܒܕܲܗܒܼܵܐ. ܘܐܝܼܬ ܗ݇ܘ̣ܵܐ ܓܵܘܵܗ̇ ܡܵܐܢܵܐ ܕܕܲܗܒܼܵܐ؛ ܗ̇ܘ ܕܐܝܼܬ ܗ݇ܘ̣ܵܐ ܓܵܘܹܗ
ܡܲܢܢܵܐ ܘܚܘܼܛܪܵܐ ܕܐܲܗܪܘܿܢ ܗ̇ܘ ܕܡܘܼܓ̰ܝܸܢܹܗ ܘܦܵܪ̈ܘܿܫܝܵܬܹܐ ܕܕܝܵܬܹܩܹܐ* ܘܥܘܼܠܘܼܠ
ܡܸܢܵܗ̇ ܟܪ̈ܘܿܒܹܐ ܕܚܸܩܪܵܐ ܒܸܥܒܼܵܕܵܐ ܛܸܠܵܢܝܼܬܵܐ ܥܲܠ ܚܘܼܣܵܝܵܐ. ܐܝܼܢܵܐ ܠܹܐ ܝ݇ܠܵܗ̇
ܥܕܵܢܵܐ ܕܗܲܡܙܸܡܲܚ ܒܘܼܬ ܟܠ ܚܕܵܐ ܡ̣ܢ ܕܐܲܢܹܐ ܕܵܐܟܼܝܼ ܦܝܼܫܹܐ ܗ݇ܘ̣ܵܘ ܬܘܼܪܨܹܐ* ܘܠܡܲܫܟܢܵܐ
ܒܲܪܵܝܵܐ ܒܟܠ ܥܕܵܢܵܐ ܥܵܒܼܪܝܼ ܗ݇ܘ̣ܵܘ ܟܵܗܢܹ̈ܐ ܘܬܲܡܸܡܝܼ ܗ݇ܘ̣ܵܘ ܚܸܠܡܲܬܲܝܗܝ* ܐܝܼܢܵܐ
ܠܡܲܫܟܢܵܐ ܕܠܓܵܘܵܝܝܼ ܡܸܢܹܗ ܚܕܵܐ ܓܵܗܵܐ ܒܫܹܢ݇ܬܵܐ ܐܲܚܟ̰ܝܼ ܟܹܐ ܥܵܒܹܪ ܗ݇ܘ̣ܵܐ ܓܘܼܪܵܐ
ܕܟܵܗܢܹ̈ܐ ܒܕܸܡܵܐ ܗ̇ܘ ܕܡܲܩܪܸܒܼ ܗ݇ܘ̣ܵܐ ܡ̣ܢ ܓܹܒܵܐ ܕܓܵܢܹܗ ܘܡ̣ܢ ܓܹܒܵܐ ܕܓܢܵܗܹ̈ܐ ܕܛܵܝܸܦܵܐ܋
ܐܝܼܢܵܐ ܒܐܵܗܵܐ ܡܲܕܘܼܥܝܹܐ ܗ݇ܘܼܵܐ ܪܘܼܚܵܐ ܕܩܘܼܕܫܵܐ ܕܗܵܠܵܐ ܐܘܼܪܚܵܐ ܕܩܲܕܝܼܫܹ̈ܐ
ܠܹܐ ܝܗ݇ܘܼܵܐ ܦܝܼܫܬܵܐ ܓܠܝܼܬܵܐ. ܟܡܵܐ ܥܕܵܢܵܐ ܕܐܝܼܬ ܗ݇ܘܼܵܐ ܩܵܘܠܵܐ ܠܡܲܫܟܢܵܐ
ܩܵܕ݇ܡܵܝܵܐ܋ ܐܝܼܬ ܗ݇ܘܼܵܐ ܐܵܗܵܐ ܡܲܬܠܵܐ ܩܵܐ ܕܗ̇ܝ ܥܕܵܢܵܐ ܕܒܝܼܵܗ̇ ܩܘܼܪ̈ܒܵܢܹܐ ܘܕܸܒܼܚܹ̈ܐ
ܦܵܝܫܝܼ ܗ݇ܘܼܵܘ ܡܘܼܩܪܸܒܼܹܐ ܐܵܢܝܼ ܕܠܹܐ ܡܵܨܝܼ ܗ݇ܘ̣ܵܘ ܠܬܲܡܘܼܡܹܐ ܐܸܢܝܲܬܹܗ ܕܗ̇ܘ
ܕܡܲܩܪܸܒܼ ܠܗ݇ܘܿܢ. ܐܸܠܵܐ ܒܐ݇ܟܼܵܠܬܵܐ ܘܫܬܵܝܬܵܐ ܐܲܚܟ̰ܝܼ ܘܚܲܠܲܠܝܵܬܹ̈ܐ ܕܬܲܗܵܪܹ̈ܐ ܬܲܗܵܪܹ̈ܐ
ܕܝܼܢܵܐ ܦܘܼܩܕܹ̈ܐ ܕܒܸܣܪܵܐ؛ ܦܝܼܫܹܐ ܡܘܼܬܒܼܹܐ ܗܲܠ ܙܲܒܼܢܵܐ ܕܬܘܼܪܵܨܵܐ܋
♱♱♱♱♱♱♱♱♱
ܡܬܝ ܝܒ: 1
‐ 21
ܐܘܢܓܠܝܘܢ ܩܕܝܫܐ ܕܡܪܢ
ܝܫܘܥ ܡܫܝܚܐ ܟܪܘܙܘܬܐ ܕܡܬܝ
♰ ܒܗ̇ܘ
ܙܲܒܼܢܵܐ ܒܸܚܕܵܪܵܐ ܗ݇ܘܵܐ ܝܑܼܫܘܿܥ ܒܫܲܒܬܵܐ ܒܹܝܬ ܙܲܪ̈ܥܹܐ. ܘܬܲܠܡܝܼ̈ܕܘܼܗܝ
ܟܦܸܢܗ݇ܘܿܢ. ܘܫܘܼܪܹܐ ܠܗ݇ܘܿܢ ܒܸܡܠܵܓܵܐ ܫܸܒܠܹ̈ܐ ܘܒܹܐܟܼܵܠܵܐ. ܐܝܼܢܵܐ ܦܪ̈ܝܼܫܹܐ
ܟܲܕ ܚܸܙܝܲܝܠܗ݇ܘܿܢ. ܐܲܡܪܝܼ ܐܸܠܹܗ: ܗܵܐ ܬܲܠܡܝܼ̈ܕܘܼܟܼ ܒܸܥܒܼܵܕܵܐ ܝܢܵܐ ܡܸܢܕܝܼ ܕܠܹܐ
ܝܠܹܗ ܩܵܢܘܿܢܵܝܵܐ ܠܸܥܒܼܵܕܵܐ ܒܫܲܒܬܵܐ. ܐܝܼܢܵܐ ܗ̇ܘ ܐ݇ܡܸܪܹܗ ܐܸܠܲܝܗܝ: ܠܵܐ ܩܪܹܐܠܵܘܟܼܘܿܢ
ܡܘܿܕܝܼ ܥܒܼܸܕܠܹܗ ܕܵܘܝܼܕ ܟܲܕ ܟܦܸܢܹܗ ܘܐܲܝܢܝܼ ܕܥܲܡܹܗ؟ ܕܲܐܟܼܝܼ ܥܒܼܸܪܹܗ ܠܒܲܝܬܵܐ
ܕܐܲܠܵܗܵܐ، ܘܠܲܚܡܵܐ ܕܦܵܬܘܿܪܹܗ ܕܡܵܪܝܵܐ ܐ݇ܟܸܠܹܗ. ܗ̇ܘ ܕܠܹܐ ܗ݇ܘܵܐ ܒܩܵܢܘܿܢ ܐܸܠܹܗ
ܠܹܐܟܼܵܠܵܐ. ܘܠܵܐ ܠܐܲܝܢܝܼ ܕܥܲܡܹܗ. ܐܸܠܵܐ ܐܸܢ ܠܟܵܗܢܹ̈ܐ ܐܲܚܟ̰ܝܼ. ܝܲܢ ܠܵܐ ܩܪܹܐܠܵܘܟܼܘܿܢ
ܒܐܘܿܪܵܝܬܵܐ ܕܟܵܗܢܹ̈ܐ ܒܗܲܝܟܠܵܐ ܟܹܐ ܫܵܪܝܼ ܠܵܗ̇ ܠܫܲܒܬܵܐ ܘܕܠܵܐ ܠܵܘܡܵܐ ܝܢܵܐ؟
ܐܝܼܢܵܐ ܐܵܢܵܐ ܒܹܐܡܵܪܵܐ ܝܘܸܢ: ܕܒܘܼܫ ܓܘܼܪܵܐ ܡ̣ܢ ܗܲܝܟܠܵܐ ܐܝܼܬ ܠܲܐܟܼܵܐ. ܐܝܼܢܵܐ ܐܸܢ
ܗܵܘܹܝܬܘܿܢ ܗ݇ܘܵܘ ܒܝܼܕܵܥܵܐ ܡܘܼܕܝܼ ܝܠܹܗ: ܚܢܵܢܵܐ ܒܥܵܝܵܐ ܝܘܸܢ ܘܠܵܐ ܕܸܒܼܚܬܵܐ. ܠܹܐ ܥܲܒܼܕܝܼܬܘܿܢ
ܗ݇ܘܵܐ ܚܲܝܵܒܼܹ̈ܐ ܠܐܲܝܢܝܼ ܕܠܵܐ ܠܵܘܡܵܐ ܝܢܵܐ. ܣܵܒܵܒ ܡܵܪܵܐ ܕܫܲܒܬܵܐ ܝܼܠܹܗ ܒܪܘܿܢܹܗ
ܕܐ݇ܢܵܫܵܐ. ܘܫܘܼܢܹܐ ܠܹܗ ܡ̣ܢ ܬܵܡܵܐ ܝܑܼܫܘܿܥ ܘܐ݇ܬܹܐ ܠܹܗ ܠܟܢܘܼܫܬܵܝܗܝ. ܘܚܲܕ݇ ܐ݇ܢܵܫܵܐ
ܐܝܼܬ ܗ݇ܘܵܐ ܬܵܡܵܐ ܕܒܪܝܼܙܬܵܐ ܝܗ݇ܘܵܐ ܐܝܼܕܹܗ. ܘܡܒܲܩܪܝܼ ܗ݇ܘܵܘ ܠܹܗ ܘܐܲܡܪܝܼ: ܕܐܸܢ
ܒܩܵܢܘܿܢ ܝܼܠܵܗ̇ ܒܫܲܒܬܵܐ ܠܒܵܣܘܼܡܹܐ، ܐܲܝܟܼ ܕܩܲܒ̣ܠܝܼ ܗ݇ܘܵܘ ܥܲܠܹܗ. ܐܝܼܢܵܐ ܗ̇ܘ ܐ݇ܡܸܪܹܗ
ܐܸܠܲܝܗܝ: ܡܵܢܝܼ ܡܸܢܵܘܟܼܘܿܢ ܓܲܒܼܪܵܐ ܕܐܝܼܬܠܹܗ ܚܲܕ݇ ܥܸܪܒܵܐ. ܘܐܸܢ ܢܵܦܸܠ ܓܵܘ ܒܹܪܵܐ
ܠܹܐ ܕܵܒܼܸܩ ܘܡܲܩܸܡܠܹܗ؟ ܐܝܼܢܵܐ ܟܡܵܐ ܒܘܼܫ ܙܵܘܕܵܐ ܝܠܹܗ ܐ݇ܢܵܫܵܐ ܡ̣ܢ ܥܸܪܒܵܐ. ܡ̣ܢ
ܐܵܕܝܼܵܐ ܒܩܵܢܘܿܢ ܝܼܠܵܗ̇ ܠܸܥܒܼܵܕܵܐ ܛܲܒ̣ܬܵܐ ܒܫܲܒܬܵܐ. ܗܿܝܓܵܗ ܐ݇ܡܸܪܹܗ ܠܗ̇ܘ ܐ݇ܢܵܫܵܐ
ܦܫܘܿܛ ܐܝܼܕܘܼܟܼ. ܘܦܫܸܛܠܹܗ ܐܝܼܕܹܗ. ܘܬܪܝܼܨܠܵܗ̇ ܐܲܝܟܼ ܚܵܒܼܸܪܬܵܗ̇. ܘܦܠܸܛܠܗ݇ܘܿܢ
ܦܪ̈ܝܼܫܹܐ ܘܥܒܼܸܕܠܗ݇ܘܿܢ ܡܸܠܟܵܐ ܥܲܠܘܼܗܝ ܐܲܝܟܼ ܕܛܲܠܩܝܼܠܹܗ. ܐܝܼܢܵܐ ܝܑܼܫܘܿܥ
ܝܕܸܥܠܹܗ ܘܫܘܼܢܹܐ ܠܹܗ ܡ̣ܢ ܬܵܡܵܐ. ܘܐ݇ܙܸܠܗ݇ܘܿܢ ܒܵܬ݇ܪܹܗ ܟܸܢܫܹ̈ܐ ܪܵܒܵܐ، ܘܒܘܼܣܡܵܝܠܹܗ.
ܘܦܩܝܼܕܠܹܗ ܐܸܠܲܝܗܝ ܕܠܵܐ ܡܲܕܥܝܼ ܒܘܼܬ ܕܝܼܹܗ. ܕܦܵܐܸܫ ܬܘܼܡܸܡܵܐ ܡܸܢܕܝܼ ܕܦܸܫܠܹܗ
ܐ݇ܡܝܼܪܵܐ ܒܝܲܕ ܐܹܫܲܥܝܵܐ ܢܒܼܝܼܵܐ ܕܐ݇ܡܸܪܹܗ: ܗܵܐ ܪܹܓܝܼ ܕܒܣܸܡܠܵܐ ܠܝܼ ܒܝܼܹܗ، ܚܲܒܝܼܒܼܝܼ
ܕܦܨܸܚܠܵܗ̇ ܒܝܼܹܗ ܓܵܢܝܼ. ܪܘܼܚܝܼ ܥܲܠܘܼܗܝ. ܘܕܝܼܘܵܢ ܠܥܲܡܡܹ̈ܐ ܒܸܬ ܡܲܟܪܸܙ. ܠܹܐ
ܡܲܩܪܸܨ ܘܠܹܐ ܡܲܩܒܼܸܚ. ܘܐ݇ܢܵܫܵܐ ܠܹܐ ܫܵܡܸܥ ܩܵܠܹܗ ܒܫܘܼܩܵܐ. ܙܹܐܠܵܐ ܛܘܼܚܛܸܚܵܐ ܠܹܐ ܬܵܒܼܸܪ.
ܘܫܪܵܓَܼܝܵܐ ܕܡܛܲܛܸܦܵܐ ܠܹܐ ܡܲܕܥܸܟܼ ܗܲܠ ܕܦܵܠܸܛ ܕܝܼܘܵܢ ܠܓܼܵܠܝܼܒܘܼܬܵܐ، ܘܒܫܸܡܹܗ
ܥܲܡܡܹ̈ܐ ܒܸܬ ܤܲܒܪܝܼ.
♱♱♱♱♱♱♱♱♱