ܚܲܕܼܒ̇ܫܲܒܵܐ ܕܲܬܼܪܹܝܢ ܕܡܵܪܝ ܡܘܼܫܹܐ
ܡܲܪܡܝܼܬܼܵܐ ܕܐ݇ܪ̈ܵܙܹܐ. ܫܲܒܲܚܘ ܠܡܵܪܝܵܐ ܬܸܫܒܘܿܚܬܵܐ ܚܕܲܬܵܐ.
ܕܩܲܢܟܹ̇ܐ؛ ܒܠܵܟܼܘܼ ܩܵܪܹܝ̇ܢܲܢ. ܐܹܒܲܪܸܟܼ ܠܡܵܪܝܵܐ ܒܟܼܠܙܒܲܢ؛ ܘܲܒܼܟܼܠܙܒܲܢ ܬܸܫ̈ܒܚܵܬܹܗ ܒܦܘܼܡܝ. ܒܪܝܼܟܼܘܼ ܦܵܪܘܿܩܲܢ ܕܫ̣ܵܘܙܒܹܗ ܠܲܟܼܝܵܢܲܢ ܡ̣ܢ ܡܵܘܬܵܐ ܝܲܥܢܵܐ؛ ܬܢܝܼ. ܘܫܲܒܲܚ ܒܵܗ.
ܩܸܪܝܵܢܵܐ. ܬܸܢܝܵܢ ܢܵܡܘܿܣܵܐ؛ ܝܐ؛ 13‐ܝܒ؛ 2 ܚܲܒ̣ܪܹܗ؛ ܐܹܫܲܥܝܵܐ؛ ܡ؛ 18‐ܡܐ؛ 8
ܫܘܼܪܵܝܵܐ. ܘ܀ ܥ̣ܒܲܕܼܘ ܥܸܓ̣ܠܵܐ ܒܚܘܿܪܝܼܒ̣ ܘܲܣ̣ܓܸܕܼܘ ܠܲܢܣܝܼܟܼܵܐ* ܘܚܲܠܸܦ̣ܘ ܐܝܼܩܵܪܗܘܿܢ ܒܲܕܼܡܘܼܬܼܵܐ ܕܬܼܵܘܪܵܐ ܕܐܵܟܹ̇ܠ ܥܸܣܒܵܐ* ܘܲܛ̣ܥܵܘ ܠܐܲܠܵܗܵܐ ܕܲܦ̣ܪܲܩ ܐܸܢܘܿܢ* ܕܲܥ̣ܒܲܕܼ ܪܵܘ̱ܪ̈ܒ̣ܵܬܼܵܐ ܒܡܸܨܪܹܝܢ* ܘܬܸܕܼܡ̱ܪ̈ܵܬܼܵܐ ܒܐܲܪܥܵܐ ܕܚܵܡ* ܘܲܕܼܚܝܼ̈ܠܵܬܼܵܐ ܒܝܲܡܵܐ ܕܣܘܿܦ*
ܫܠܝܼܚܵܐ؛ ܓܲܠܵܛܵܝܹ̈ܐ؛ ܗ؛ 16‐ܫܘܼܠܵܡܵܐ
ܙܘܼܡܵܪܵܐ. ܒܲܨܠܝܼܒܼܵܟܼ. ܐܵܘܕܸ̇ܐ ܠܵܟܼ ܕܲܥ̣ܢܲܝܬܵܢܝ. ܘܲܗ݀ܘܲܝܬ̇ ܠܝܼ ܦܵܪܘܿܩܵܐ. ܟܹܐܦܵܐ ܕܐܲܣ̣ܠܝܼܘ ܒܲܢܵܝܹ̈ܐ. ܗܸܝ ܗܘܸܵܬܼ ܠܪܹܫܹܗ ܕܒܸܢܝܵܢܵܐ. ܕ܀ ܗܵܢܵܘ ܝܵܘܡܵܐ ܕܲܥ̣ܒܲܕܼ ܡܵܪܝܵܐ. ܬܵܘ ܢܕܼܘܼܨ ܘܢܸܚܕܸ̇ܐ ܒܹܗ. ܐܘܿ ܡܪܵܝܵܐ ܦܪܘܿܩܲܝܢܝ ܐܘܿ ܡܵܪܝܵܐ ܦܲܨܵܢܝ. ܒܪܝܼܟܼܘܼ ܕܐܵܬܹܐ ܒܲܫܡܹܗ ܕܡܵܪܝܵܐ. ܕ܀
ܐܹܘܲܢܓܲܠܝܼܘܿܢ. ܠܘܼܩܵܐ؛ ܚ؛ 40‐ܫܘܼܠܵܡܵܐ
ܕܐܹܘܲܢܓܲܠܝܼܘܿܢ. ܒܐܲܠܵܗܵܐ ܡܸܠܬܼܵܐ. ܡܲܢ̣ܘܼ ܐܲܟܼܘܵܬܼܵܟܼ ܡܵܪܝܵܐ؛ ܐܲܝܡܸܟܵܐ ܢܹܐܬܸܐ ܡܥܲܕܿܪܵܢܝ. ܕܨܘܼܪܬܵܐ. ܡܸܛܠ ܕܚܲܢܵܢܵܐ ܗ݇ܘ̣ ܘܪܸܚܡ̱ܬܼܵܢܵܐ ܡܵܪܝܵܐ. ܡܲܢ̣ܘܼ ܚܵܐܹ̇ܢ ܠܝܼ ܘܡܸܫܟܲܚ ܕܲܢܩܲܪܸܒܼ ܠܝܼ ܚܘܼܠܡܵܢܵܐ. ܘܲܢܦܲܨܹܝܢܝ ܡ̣ܢ ܟܝܼܡܘܿܢܵܐ ܩܲܫܝܵܐ ܕܡܲܪܕܿܝܼܬܼܵܐ. ܬܪܝܼܥܲܬܼ ܕܡܵܐ ܓܥܵܬܸ ܘܐܸܡܪܲܬܸ. ܕܐܵܣܵܘܵܬܼ̈ܵܐ ܕܲܒܼܢܲܝ̈ܢܵܫܵܐ ܟܠܡܸܕܸܡ ܕܐܝܼܬܼ ܠܝܼ ܫܩܲܠ̣ܘ. ܘܡܸܕܸܿܡ ܠܵܐ ܐܵܘܬ̇ܪܘܼܢܝ. ܘܐܸܢܵܐ ܡܸܟܹ̇ܝܠ ܒܢܵܡܘܿܣܵܐ ܡܲܣܠܲܝܬܵܐ ܐܝܼܬܲܝ. ܕܲܒ̣ܝܲܕܼ ܟܹܐܒ̣ܝ ܛܲܡ̇ܐܹܬܼ ܠܗܲܝܟ̇ܠܵܐ ܕܐܲܠܵܗܵܐ. ܡܲܛ̣ܝܼ ܠܹܗ ܦܣܲܩ ܣܲܒ̣ܪܵܐ ܘܲܚܢܲܩ ܢܲܦ̮ܫܵܐ. ܐܸܩܪܘܿܒ̣ ܐܸܠܒ̇ܘܿܟܼ ܠܟܸܢܦܵܐ ܕܲܦܪܝܼܣܹܗ ܕܩܲܕܿܝܼܫܵܐ ܘܗܘܸܝܘܼ ܡܲܐܣܸܐ ܠܝܼ. ܘܐܸܓ̣ܥܸܐ ܒܲܚܢܲܓ̣ܬܼܵܐ ܘܐܹܡܲܪ. ܡܵܪܝ ܕܐܲܢ݇ܬ̇ܘܼ ܒܲܠܚܘܿܕܼ ܡܠܸܐ ܪ̈ܲܚܡܹܐ. ܘܥܲܠ ܗܵܕܹܐ ܐܵܡ̇ܪܵܐ ܗ݇ܝܼ ܢܲܦ̮ܫܝ ܒܟܼܠܥܸܕܵܢ. ܡܒܲܪܲܟܼ ܗ݇ܘ̣ ܡܫܝܼܚܵܐ ܦܵܪܘܿܩܲܢ؛ ܬܢܝܼ؛ ܫܲܒܲܚ. ܒܲܡܫܝܼܚܵܐ ܐܸܬܼܝܼܠܸܕܼ. ܬܪܝܼܥܲܬܼ ܕܡܵܐ ܐܸܡܪܲܬܸ ܕܟܼܠܡܸܕܸܡ ܕܲܩܢܹ̇ܝܬܼ. ܫܩܲܠ̣ܘ ܐܵܣܵܘܵܬܼ̈ܵܐ ܘܡܸܕܸܡ ܠܵܐ ܐܵܘܬ̇ܪܘܼܢܝ. ܥܕܲܡܵܐ ܕܐܸܬ̣ܵܐ ܠܹܗ ܝܼܫܘܿܥ ܦܵܪܘܿܩܲܢ. ܠܟܸܢܦܵܐ ܕܲܦܪܝܼܣܹܗ ܩܸܪܒܹ̇ܬܼ ܘܐܸܬܼܐܲܣܝܼܬܼ.
ܕܐ݇ܪ̈ܵܙܹܐ. ܒܢܸܬ̇ܛܲܝܲܒܼ ܒܕܸܚܠ̱ܬܼܵܐ. ܬܵܘ ܢܫܲܒܲܚ ܠܡܵܪܝܵܐ؛ ܬܵܘ ܒܢܲܝ̈ܵܐ ܫܘܼܡܥܘܼܢܝ. ܕܨܘܼܪܬܵܐ. ܚܢܲܢ ܕܹܝܢ ܟܠܲܢ ܒܐܲܦܹ̈ܐ ܓܲܠ̈ܝܵܬܼܵܐ؛ ܐܸܠܵܐ ܛܲܝܸܒ̣ܘ ܢܲܦ̮ܫܟ̣ܘܿܢ ܠܐܲܠܵܗܵܐ. ܬܵܘ ܟܠܲܢ ܢܛܲܝܸܒ̣ ܢܲܦ̮ܫܲܢ ܥܲܡ ܦܲܓ̣ܪ̈ܲܝܢ. ܠܡܵܘܗܲܒܼܬܼܵܐ ܕܚܝܼܠܬܵܐ ܕܐ݇ܪ̈ܵܙܹܐ ܡܲܚܝܵܢܹ̈ܐ. ܕܗܸܢ̣ܘܿܢ ܦܵܪܩ̇ܝܼܢ ܠܲܢ ܡ̣ܢ ܡܵܘܬܵܐ ܘܲܚܒ̣ܵܠܵܐ. ܘܝܵܗ݇ܒ̇ܝܼܢ ܚܲܝܹ̈ܐ ܠܡܵܝܘܿܬܹ̈ܐ ܒܥܘܼܡܪܵܐ ܕܲܫܡܲܝܵܐ. ܬܢܝܼ. ܘܫܲܒܲܚ ܒܵܗ̇.
ܕܒܹܝܡ؛ ܥܘܼܢܵܝܵܐ. ܡܸܢܹܗ ܘܠܹܗ. ܪܲܗܒ̣ܘܿܢܵܐ ܕܚܲܝܹ̈ܐ ܚܲܕܼܬܹ̈ܐ. ܗܵܐ ܡܸܬܼܦܲܠܲܓ̣ ܒܓܼܵܘ ܒܹܝܬܼ ܩܘܼܕܼܫܵܐ܀ ܡܵܝܘܿܬܹ̈ܐ ܒܚܘܼܒܵܐ ܫܲܠܡܵܐ. ܩܪܘܿܒ̣ܘ ܣܲܒ̣ܘ ܘܲܚܝܵܘ ܘܐܸܬܼܚܲܣܵܘ ܒܹܗ.
ܒܵܬܹ̈ܐ؛ ܐܲܚܲܝ̈ ܩܲܒܸ̇ܠܘ ܦܲܓ̣ܪܹܗ ܕܲܒ̣ܪܵܐ. ܘܐܸܫܬܵܘ ܟܵܣܹܗ ܒܗܲܝܡܵܢܘܼܬܼܵܐ܀ ܡܵܝܘܿܬܹ̈ܐ ܒܚܘܼܒܵܐ...܀