ܚܲܕܼܒ̇ܫܲܒܵܐ ܕܲܬܼܠܵܬܼܵܐ ܕܲܫܠܝܼܚܹ̈ܐ
ܡܲܪܡܝܼܬܼܵܐ ܕܐ݇ܪ̈ܵܙܹܐ؛ ܐܹܪܲܡ̱ܪܡܵܟܼ ܡܵܪܝ ܡܲܠܟܵܐ.
ܕܩܲܢܟܹ̇ܐ. ܒܲܡܫܝܼܚܵܐ ܐܸܬܼܝܼܠܸܕܼ. ܐܲܝܢܵܐ ܕܕܲܟܼ̈ܝܵܢ ܐܝܼܕܼܵܘ̈ܗܝ ܘܲܓܼܒܸܐ ܒܠܸܒܹ̇ܗ. ܠܵܐ ܝܵܡܹ̇ܐ ܒܢܲܦ̮ܫܹܗ ܒܕܲܓܵܠܘܼܬܼܵܐ ܘܠܵܐ ܝܵܡܹ̇ܐ ܒܢܸܟܼܠܵܐ. ܒܥܸܕܵܢܵܐ ܕܥܵܐܹ̇ܠ ܟܵܗܢܵܐ ܠܒܹܝܬܼ ܩܘܼܕܼܫܵܐ. ܓܘܼܕܹ̈ܐ ܕܪ̈ܘܼܚܵܢܹܐ ܠܥܸܠ ܡܸܢܹܗ ܩܵܝ̈ܡܵܢ. ܘܚܵܝܪ̈ܵܢ ܒܹܗ ܒܟܼܵܗܢܵܐ ܕܩܵܨܹ̇ܐ ܘܲܡܦܲܠܸܓܼ. ܦܲܓܼܪܹܗ ܕܲܡܫܝܼܚܵܐ ܠܚܘܼܣܵܝܵܐ ܕܚܵܘܒܹ̈ܐ؛ ܬܢܝܼ؛ ܫܲܒܚ. ܨܠܝܼܒܼܵܐ ܕܲܗܘܸܵܐ ܠܲܢ ܥܸܠܲܬܼ ܛܵܒܼܵܬܼ̈ܵܐ. ܘܒܹܗܸܘ ܐܸܬܼܚܲܪܲܪ ܓܸܢܣܲܢ ܡܵܝܘܿܬܼܵܐ. ܗܸܘ ܡܵܪܝ ܢܸܗܘܸܐ ܠܲܢ ܫܘܼܪܵܐ ܚܲܣܝܼܢܵܐ. ܘܒܹܗ ܢܸܙܟܹ̇ܝܘܗܝ ܠܒܼܝܼܫܵܐ ܘܟܼܠܗܹܝܢ ܨܸܢ̈ܥܵܬܹܗ.
ܩܸܪܝܵܢܵܐ؛ ܬܸܢܝܵܢ ܢܵܡܘܿܣܵܐ؛ ܐ؛ 3‐18܀ ܚܲܒܼܪܹܗ؛ ܐܹܫܲܥܝܵܐ؛ ܐ؛ 1‐10. ܫܘܼܪܵܝܵܐ؛ ܐܸܠܘܼܠܵܐ ܡܵܪܝܵܐ ܕܲܗܘܸܵܐ ܠܝܼ ܥܵܕܼܘܿܪܵܐ* ܥܲܕܼ ܩܲܠܝܼܠ ܫܵܪܝܵܐ ܗ݇ܘ̣ܵܬܼ ܢܲܦ̮ܫܝ ܒܕܼܵܘܘܿܢܵܐ* ܘܐܸܢܵܐ ܐܸܡ̇ܪܹܬܼ ܕܡܵܛ̈ ܪܸ̈ܓܼܠܲܝ ܘܛܲܝܒ̇ܘܼܬܼܵܟܼ ܡܵܪܝܵܐ ܣܡܲܟܼܬܲܢܝ*
ܫܠܝܼܚܵܐ؛ ܐ؛ ܩܘܼܪ̈ܲܢܬܼܵܝܹܐ؛ ܙ؛ 1‐8
ܙܘܼܡܵܪܵܐ؛ ܪܹܫ ܣܝܼܥܬܵܐ. ܟܵܗܢܲܝ̈ܟ ܢܸܠܒ̇ܫܘܼܢ ܙܲܕܿܝܼܩܘܼܬܼܵܐ ܘܙܲܕ̇ܝܼܩܲܝ̈ܟ ܫܘܼܒܼܚܵܐ. ܡܸܛܠ ܕܵܘܝܼܕܼ ܥܲܒܼܕܵܟܼ ܠܵܐ ܬܲܗܦܸܟܼ ܐܲܦܵܘ̈ܗܝ ܕܲܡܫܝܼܚܵܟܼ. ܒ܀ ܠܟܼܘܼܡܪܹ̈ܝܗ̇ ܐܲܠܒܸ̇ܫ ܦܘܼܪܩܵܢܵܐ ܘܲܠܙܲܕ̇ܝܼܩܹܝ̈ܗ̇ ܫܘܼܒܼܚܵܐ. ܬܲܡܵܢ ܐܲܕܼܢܲܚ̣ ܩܲܪܢܵܐ ܠܕܼܵܘܝܼܕܼ. ܘܐܲܢܗܲܪ ܫܪܵܓܼܵܐ ܠܲܡܫܝܼܚܹܗ. ܓ܀
ܐܹܘܲܢܓܲܠܝܼܘܿܢ؛ ܠܘܼܩܵܐ؛ ܝ؛ 23‐ܫܘܼܠܵܡܵܐ
ܕܐܹܘܲܢܓܲܠܝܼܘܿܢ. ܒܙܲܝܢܵܐ ܕܪܘܼܚܵܐ؛ ܘܡܲܠܸܦ ܠܡܸܣܟܹ̇ܢܹ̈ܐ ܐܘܼܪܚܹܗ؛ ܐܘܼܪ̈ܚܵܬܼܵܟܼ ܡܵܪܝܵܐ ܚܵܘܵܢܝ. ܕܨܘܼܪܬܵܐ. ܗ݀ܘܲܝܬ̇ܘܿܢ ܡܲܚܒܼܝܼܢ ܠܐܲܚܲܝ̈ܟ̇ܘܿܢ ܘܪܵܚ̇ܡܝܼܢ ܚܲܕܼ ܠܚܲܕܼ. ܚܘܼܒܵܐ ܓܹܝܪ ܡܚܲܦܹܐ ܣܘܿܓܼܐܵܐ ܕܲܚܛܵܗܹ̈ܐ. ܚܘܼܒܵܐ ܘܪ̈ܲܚܡܹܐ ܐܲܠܸܦ̣ܬܵܢ. ܒܝܲܕܼ ܝܘܼܠܦܵܢܵܟܼ ܦܵܪܘܿܩܲܢ. ܒܕܲܐܟܸ̇ܣ̣ܬ̇؛ ܠܲܝܗܘܼܕܼܵܝܹ̈ܐ ܕܠܵܐ ܪ̈ܲܚܡܹܐ. ܒܝܲܕܼ ܦܸܠ̱ܐܬܼܵܐ ܕܐܸܡܲܪܬ̇ ܠܗܘܿܢ܀ ܕܓܲܒܼܪܵܐ ܚܲܕܼ ܢܵܚܹ̇ܬܼ ܗ݇ܘ̣ܵܐ. ܡ̣ܢ ܐܘܿܪܸܫܠܸܡ ܠܐܝܼܪܝܼܚܘܿ. ܘܲܢ̣ܦܲܠܘ ܥܠܵܘܗܝ ܠܸܣܛܵܝܹ̈ܐ. ܘܫܲܠ̣ܚܘܼܗܝ ܘܨܲܠܦ̣ܘܼܗܝ ܘܲܡ̣ܚܵܐܘܼܗܝ. ܘܫܲܒܼܩ̣ܘܼܗܝ ܟܲܕܼ ܪܡܸܐ ܒܛܘܼܪܵܦܵܐ܀ ܟܵܗܢܵܐ ܚܲܕܼ ܓܕܲܫ̣. ܐܵܦ ܠܹܘܵܝܵܐ ܕܡ̣ܢ ܢܵܡܘܿܣܵܐ. ܘܠܵܐ ܐܸܬܼܪܲܚܲܡܘ ܥܲܠ ܡܲܚܘܵܬܹ̈ܗ. ܒܕܲܓܼܠܝܼܙܝܼܢ ܗ݇ܘ̣ܵܘ ܡ̣ܢ ܪ̈ܲܚܡܹܐ܀ ܐ݇ܢܵܫ ܕܹܝܢ ܫܵܡܪܵܝܵܐ. ܚ̣ܙܵܝܗܝ ܗ݇ܘ̣ܵܐ ܘܲܥܨܲܒܼ ܡܲܚܘܵܬܹ̈ܗ. ܒܚܲܡܪܵܐ ܘܡܸܫܚܵܐ ܬܪܹܝܢ ܐ݇ܪ̈ܵܙܹܐ. ܕܪ̈ܲܚܡܹܐ ܫܦܝܼܥܹ̈ܐ ܕܛܲܝܒ̇ܘܼܬܼܵܟܼ܀ ܡܫܝܼܚܵܐ؛ ܐܵܣܝܵܐ ܡܲܐܣܸܐ ܟܠ ܟܹܐܒܼܝܼ̈ܢ. ܐܲܣܵܐ ܡܘܼܡܲܝ̈ܢ ܒܲܚܢܵܢܵܟܼ ܘܪܲܚܸܡ ܥܠܲܝܢ؛ ܬܢܝܼ؛ ܫܲܒܲܚ. ܒܠܵܟܼ ܕܲܝܵܢܵܐ. ܡܩܲܪܸܒܼ ܐ݇ܢܵܐ ܠܵܟܼ ܢܲܦ̮ܫܵܐ ܘܦܲܓܼܪܵܐ ܒܵܪܹܐ ܢܲܦ̮ܫܵܐ ܘܡܲܬܼܩܸܢ ܦܲܓܼܪܵܐ. ܐܲܣܵܐ ܡܵܪܝ ܬܪ̈ܲܝܗܘܿܢ ܕܲܟܼܪܝܼܗܝܼܢ. ܕܐܲܢ݇ܬ̇ܘܼ ܡܵܪܵܐ ܕܲܬܼܪܲܝܗܘܿܢ ܘܪܲܚܸܡ ܥܠܲܝ.
ܕܐ݇ܪ̈ܵܙܹܐ؛ ܒܢܸܬ̇ܛܲܝܲܒܼ ܒܕܸܚܠ̱ܬܼܵܐ. ܬܵܘ ܢܫܲܒܲܚ ܠܡܵܪܝܵܐ. ܬܵܘ ܒܢܲܝ̈ܵܐ ܫܘܼܡܥܘܼܢܝ. ܙܥܘܿܪܹ̈ܐ ܥܲܡ ܪܵܘܪ̈ܒܹܐ. ܕܨܘܼܪܬܵܐ. ܬܵܘ ܢܹܐܙܲܠ ܢܨܲܠܸܐ ܩܕܼܵܡ ܡܵܪܝܵܐ. ܬܵܘ ܟܠܲܢ ܢܹܐܚܘܿܕܼ ܓܵܘܣܵܐ ܒܲܨܠܘܿܬܼܵܐ. ܕܗܸ݀ܝ ܐܝܼܬܹܝܗ̇ ܩܠܝܼܕܼܵܐ ܕܓܲܙܵܐ ܫܡܲܝܵܢܵܐ. ܘܐܲܟܼܡܵܐ ܕܚܲܠ̈ܝܵܢ ܢܸܥ̈ܡܵܬܼܵܐ ܕܩܵܠܲܝ̈ܢ. ܗܵܟܲܢ ܢܸܗܘܘܿܢ ܕܘܼܒܵܪ̈ܲܝܢ ܩܕܼܵܡܵܘܗܝ. ܕܲܒܼܝܲܕܼ ܡܸܠܹ̈ܐ ܘܒܲܥܒܼܵܕܹ̈ܐ. ܢܸܫܦܲܪ ܠܹܗ ܠܡܵܪܝܵܐ؛ ܬܢܝܼ؛ ܘܫܲܒܲܚ ܒܵܗ̇.
ܕܒܹܝܡ؛ ܥܘܼܢܵܝܵܐ. ܬܵܘ ܟܠܲܢ ܢܸܬܼܩܲܪܲܒܼ ܠܦܲܓܼܪܹܗ ܘܲܕܼܡܹܗ ܕܲܡܫܝܼܚܵܐ ܒܕܸܚܠ̱ܬܼܵܐ ܘܒܲܪܬܹܝܬܼܵܐ. ܘܲܒܼܚܘܼܒܵܐ ܢܸܣܒܼܝܼܘܗܝ ܘܲܢܫܲܒܲܚ. ܗܸܘ ܓܹܝܪ ܒܐ݇ܪܵܙܵܐ ܠܐܹܫܲܥܝܵܐ ܢܒܼܝܼܵܐ ܐܸܬܼܚܵܘܝܼ ܗ̣݇ܘܵܐ. ܓܡܘܼܪܬܵܐ ܝܲܗ̣݇ܒܼ ܠܹܗ ܪܘܼܚܵܢܵܐ ܘܐܸܬܼܚܲܣܝܼܘ ܚܵܘܒܵܘ̈ܗܝ܀ ܠܘܵܬܹܗ ܢܸܣܬܲܪܗܲܒܼ ܟܠܲܢ. ܘܠܲܐܠܵܗܘܼܬܹܗ ܢܸܣܓ̇ܘܿܕܼ ܥܲܡ ܟܸܢܫܲܝ̈ ܪܵܘܡܵܐ. ܟܲܕܼ ܐܵܡ̇ܪܝܼܢܲܢ ܩܲܕ̇ܝܼܫܲܬ̇. ܩܲܕ̇ܝܼܫܲܬ̇. ܩܲܕ̇ܝܼܫܲܬ̇ ܐܝܼܬܼܝܵܐ ܓܢܝܼܙܵܐ ܗܲܠܸܠܘܼܝܲܗ. ܒܵܬܹ̈ܐ؛ ܗܵܢܵܘ ܣܲܒܼܪܵܐ ܕܠܹܗ ܡܣܲܟܹ̇ܝܢ ܗ݇ܘ̣ܵܘ ܢܒܼܝܹ̈ܐ ܒܐ݇ܪ̈ܵܙܹܐ. ܝܑܼܫܘܿܥ ܡܲܠܟܲܢ ܕܲܕܼܢܲܚ ܒܚܘܼܒܹ̇ܗ ܡ̣ܢ ܒܹܝܬܼ ܕܵܘܝܼܕܼ܀ ܠܘܵܬܹܗ ܢܸܣܬܲܪܗܲܒܼ ܟܠܲܢ...܀ ܗܵܢܵܘ ܕܲܚ̣ܙܵܐ ܢܒܼܝܼܵܐ ܕܝܵܬܹܒܼ ܥܲܠ ܡܲܪܟܲܒܼܬܼܵܐ. ܘܗܵܫܵܐ ܐܝܼܬܼܵܘܗܝ ܡ̣ܢ ܝܲܡܝܼܢܵܐ ܘܒܼܵܥܹ̇ܐ ܚܠܵܦܲܝܢ܀ ܠܘܵܬܹܗ ܢܸܣܬܲܪܗܲܒܼ...܀
|