ܚܲܕܼܒܫܲܒܵܐ ܕܲܬ̣ܠܵܬ̣ܵܐ ܕܡܵܪܝ ܕܡܘܼܫܹܐ
ܬܸܢܝܵܢ ܢܵܡܘܿܣܵܐ؛ ܝܓ؛ 12 ‐ ܫܘܼܠܵܡܵܐ
ܬܸܒ̣ܘ ܘܲܫܠܵܘ ܬܸܢܝܵܢ ܢܵܡܘܿܣܵܐ ܣܸܦܪܵܐ ܕܚܲܡܫܵܐ ܕܐܘܿܪܵܝܬܵܐ؛
ܐܲܚܵܝ̈ ܒܲܪܸܟ̣ܡܵܪܝ܀
ܘܐ݇ܡܸܪܹܗ ܡܘܼܫܹܐ ܠܟܠܹܗ ܝܼܣܪܵܝܹܠ. ܘܐܝܼܡܲܢ ܕܫܵܡܥܸܬ̇ ܒܚܕܵܐ ܡ̣ܢ ܡܵܬܘܵܬ̈ܘܼܟܼ ܕܝܵܗ݇ܒ̣ܸܠܘܼܟܼ ܡܵܪܝܵܐ ܐܲܠܵܗܘܼܟܼ ܠܸܬܝܵܒ̣ܵܐ ܒܝܼܵܗ̇؛ ܘܐܵܡܪܝܼ ܐܸܠܘܼܟܼ܀ ܕܦܠܸܛܠܗ݇ܘܿܢ ܐ݇ܢܵܫܹ̈ܐ ܒܢܘܿܢܹ̈ܐ ܕܚܛܝܼܬܵܐ ܡ̣ܢ ܓܵܘܘܼܟܼ؛ ܘܡܘܼܚܠܸܛܠܗ݇ܘܿܢ ܠܐ݇ܢܵܫܹ̈ܐ ܕܡܵܬܲܝܗܝ؛ ܘܐ݇ܡܸܪܗ݇ܘܿܢ ܐܵܙܲܠ݇ܚ ܦܵܠܚܲܚ ܠܐܲܠܵܗܹ̈ܐ ܐ݇ܚܹܪ̈݇ܢܹܐ ܕܠܵܐ ܝܵܕܥܝܼܬܘܿܢ؛ ܒܲܩܸܪ ܘܨܲܚܨܝܼ؛ ܘܝ݇ܕܝܼܥ ܨܦܵܝܝܼ؛ ܐܵܗܵܐ ܚܲܒܪܵܐ ܕܘܼܙ ܝܼܠܹܗ؛ ܘܐܵܗܵܐ ܛܲܢܦܘܼܬܵܐ [ܟ̰ܲܦܵܠܘܼܬܵܐ] ܦܸܫܠܵܗ̇ ܥܒ̣ܝܼܕܬܵܐ ܓܵܘܘܼܟܼ܀ ܡܲܚܪܸܒ̣ ܠܥܵܡܪ̈ܵܢܹܐ ܕܗ̇ܝ ܡܵܬܵܐ ܒܦܘܼܡܵܐ ܕܣܲܝܦܵܐ؛ ܘܡܲܚܪܸܒ̣ ܠܵܗ̇ ܘܟܠ ܡܸܢܕܝܼ ܕܐܝܼܬ ܓܵܘܵܗ̇؛ ܘܗܲܝܘܵܢܵܗ̇ ܒܦܘܼܡܵܐ ܕܣܲܝܦܵܐ؛ ܟܠܹܗ ܡܸܢܕܝܼܵܗ̇ ܓ̰ܲܡܸܥ ܠܓܵܘ ܕܲܪܬܵܗ̇ ܘܡܲܩܸܕܠܵܗ̇ ܡܵܬܵܐ ܒܢܘܼܪܵܐ؛ ܘܟܠ ܡܸܢܕܝܼ ܕܐܝܬ ܓܵܘܵܗ̇؛ ܩܵܕ݇ܡ ܡܵܪܝܵܐ ܐܲܠܵܗܘܼܟܼ ܘܒܸܬ ܗܵܘܝܵܐ ܪܘܼܡܬܵܐ ܗܲܠ ܥܵܠܲܡ؛ ܘܠܹܐ ܦܵܝܫܵܐ ܒܢܝܼܬܵܐ܀ ܘܠܵܐ ܫܵܩܠܵܐ ܐܝܼܕܘܼܟܼ ܡܸܢܕܝܼ ܡ̣ܢ ܚܸܪܡܵܐ؛ ܩܵܐ ܕܕܵܐܸܪ ܡܵܪܝܵܐ ܡ̣ܢ ܚܸܡܬܵܐ ܕܟܲܪܒܹܗ؛ ܘܝܵܗ݇ܒ̣ܸܠܘܼܟܼ ܪ̈ܲܚܡܹܐ ܘܪܵܚܸܡ ܥܲܠܘܼܟܼ؛ ܘܡܲܚܸܒܠܘܼܟܼ ܘܡܲܙܝܸܕܠܘܼܟܼ ܐܲܝܟܼ ܕܝ݇ܡܹܐܠܹܗ ܠܒܵܒܵܘܵܬ̈ܘܼܟܼ܀ ܐܸܢ ܫܵܡܥܸܬ̇ ܒܩܵܠܹܗ ܕܡܵܪܝܵܐ ܐܲܠܵܗܘܼܟܼ ܘܢܵܛܪܸܬ̇ ܦܘܼܩܕܵܢ̈ܘܼܗܝ ܕܒܸܦܩܵܕܵܐ ܝ݇ܘܸܢ ܐܸܠܘܼܟܼ ܐܸܕܝܘܿܡ݇ ܝܵܘܡܵܐ؛ ܘܥܵܒ̣ܕܸܬ̇ ܨܦܵܝܝܼ ܩܵܕ݇ܡ ܡܵܪܝܵܐ ܐܲܠܵܗܘܼܟܼ܀
ܚܲܒ̣ܪܹܗ
ܦܪܲܟܣܝܼܣ؛ ܝܓ؛ 13‐24
ܫܠܵܘ ܦܪܲܟܣܝܼܣ ܕܲܫܠܝܼܚܹ̈ܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܐܝܼܢܵܐ ܦܵܘܠܘܿܣ ܘܒܲܪܢܒ̣ܵܐ ܪ݇ܚܸܫܠܗ݇ܘܿܢ ܒܝܵܘܡܵܐ ܡ̣ܢ ܦܵܦܘܿܣ ܡܕܝܼܢ݇ܬܵܐ؛ ܘܐ݇ܬܹܐܠܗ݇ܘܿܢ ܠܦܲܪܓܹܐ ܡܕܝܼܢ݇ܬܵܐ ܕܦܵܡܦܸܘܠܝܼܵܐ؛ ܘܦܪܸܫܠܹܗ ܡܸܢܲܝܗܝ ܝܘܿܚܲܢܵܢ ܘܐ݇ܙܸܠܹܗ ܠܐܘܿܪܸܫܠܸܡ܀ ܘܐܵܢܝܼ ܦܠܸܛܠܗ݇ܘܿܢ ܡ̣ܢ ܦܲܪܓܹܐ؛ ܘܐ݇ܬܹܐܠܗ݇ܘܿܢ ܠܐܲܢܛܝܵܟ̣ܝܵܐ ܡܕܝܼܢ݇ܬܵܐ ܕܦܝܼܣܝܼܕܝܵܐ؛ ܘܥܒ̣ܸܪܗ݇ܘܿܢ ܠܟܢܘܼܫܬܵܐ ܘܝ݇ܬܸܒ̣ܠܗ݇ܘܿܢ ܒܝܵܘܡܵܐ ܕܫܲܒܬܵܐ܀ ܘܒܵܬ݇ܪ ܕܦܸܫܠܗ݇ܘܿܢ ܩܸܪ̈ܝܹܐ ܢܵܡܘܿܣܵܐ ܘܢܒ̣ܝܼܹ̈ܐ؛ ܫܘܼܕܸܪܗ݇ܘܿܢ ܠܟܸܣܠܲܝܗܝ ܩܲܫܝܼܫܹ̈ܐ ܕܟܢܘܼܫܬܵܐ ܘܐ݇ܡܸܪܗ݇ܘܿܢ؛ ܝܵܐ ܐ݇ܢܵܫܹ̈ܐ ܐܵܚܘܿܢ̈ܘܵܬܲܢ؛ ܐܸܢ ܐܝܼܬܠܵܘܟ̣ܘܿܢ ܗܹܡܸܙܡܲܢ ܕܒܘܼܝܵܐܵܐ؛ ܗܲܡܙܸܡܗ݇ܘܿܢ ܥܲܡ ܛܵܝܸܦܵܐ܀ ܘܩܸܡܠܹܗ ܦܵܘܠܘܿܣ ܘܫܥܸܫܠܹܗ ܐܝܼܕܹܗ ܘܐ݇ܡܸܪܹܗ. ܝܵܐ ܐ݇ܢܵܫܹ̈ܐ ܒܢܲܝ̈ ܝܼܣܪܵܝܹܠ ܘܐܵܢܝܼ ܕܙܵܕܥܝܼ ܡ̣ܢ ܐܲܠܵܗܵܐ ܫܡܸܥܡܘܿܢ܀ ܐܲܠܵܗܵܐ ܕܐܵܗܵܐ ܛܵܝܸܦܵܐ ܓܘܼܒܹܐܠܹܗ ܠܒܵܒܵܘ̈ܵܬܲܢ؛ ܘܡܘܼܪܸܡܠܹܗ ܘܓܘܼܪܘܸܣܲܝܠܹܗ ܟܲܕ ܗ݇ܘܹܐܠܗ݇ܘܿܢ ܬܵܘܬܵܒ̣ܹ̈ܐ [ܡܵܫܵܚܲܛܹ̈ܐ] ܒܐܲܪܥܵܐ ܕܡܸܨܪܹܝܢ. ܘܒܕܪܵܥܵܐ ܪܵܡܵܐ ܦܘܼܠܛܲܝܗܝ ܠܹܗ ܡܸܢܵܗ̇܀ ܘܬܘܼܪܣܝܼܲܝܗܝ ܠܹܗ ܓܵܘ ܒܲܪܝܼܵܐ ܐܲܪܒܥܝܼ ܫܸܢܹ̈ܐ؛ ܘܛܘܼܚܛܸܚܠܹܗ ܫܲܒ̣ܥܵܐ ܛܵܝܸܦܹ̈ܐ ܒܐܲܪܥܵܐ ܕܟܢܲܥܢ؛ ܘܝܘܼܗ݇ܒ̣ܸܠܹܗ ܩܵܬܲܝܗܝ ܐܲܪܥܲܝܗܝ ܝܵܪܬܘܼܬܵܐ܀ ܘܐܲܪܒܲܥܡܵܐܐ ܘܚܲܡܫܝܼ ܫܸܢܹ̈ܐ ܝܘܼܗ݇ܒ̣ܸܠܹܗ ܐܸܠܲܝܗܝ ܕܲܝܵܢܹ̈ܐ ܗܲܠ ܫܡܘܼܐܹܝܠ ܢܒ̣ܝܼܵܐ܀ ܘܗܵܝܓܵܗ̇ ܛܠܸܒܠܗ݇ܘܿܢ ܐܸܠܲܝܗܝ ܡܲܠܟܵܐ؛ ܘܝܘܼܗ݇ܒ̣ܸܠܹܗ ܐܸܠܲܝܗܝ ܐܲܠܵܗܵܐ ܫܵܐܘܿܠ ܒܲܪ ܩܝܼܫ. ܚܲܕ݇ ܐ݇ܢܵܫܵܐ ܡ̣ܢ ܐܘܼܓ̰ܵܓ̣ ܕܒܸܢܝܵܡܹܝܢ ܩܵܐ ܐܲܪܒܥܝܼ ܫܸܢܹ̈ܐ܀ ܘܫܩܸܠܹܗ؛ ܘܡܘܼܩܸܡܠܹܗ ܩܵܬܲܝܗܝ ܠܕܵܘܝܼܕ ܡܲܠܟܵܐ؛ ܘܝܘܼܗ݇ܒ̣ܸܠܹܗ ܣܵܗܕܘܼܬܵܐ ܒܘܼܬ ܕܝܼܹܗ ܘܐ݇ܡܸܪܹܗ؛ ܕܡܘܼܫ݇ܟ̰ܸܚܠܝܼ ܠܕܵܘܝܼܕ ܒܪܘܿܢܹܗ ܕܐܝܼܫܲܝ؛ ܚܲܕ݇ ܐ݇ܢܵܫܵܐ ܐܲܝܟܼ ܠܸܒܝܼ؛ ܘܗ̇ܘ ܒܸܬ ܥܵܒ̣ܸܕ ܟܠܹܗ ܪܸܙܵܝܝܼ. ܡ̣ܢ ܙܲܪܥܹܗ ܕܐܵܗܵܐ؛ ܡܘܼܩܸܡܠܹܗ ܐܲܠܵܗܵܐ ܠܝܼܣܪܵܝܹܠ ܐܲܝܟܼ ܕܩܘܼܘܸܠܹܗ ܠܝܼܫܘܿܥ ܦܵܪܘܿܩܵܐ܀
♱♱♱♱♱♱♱♱♱
ܚܲܕܼܒܿܫܲܒܵܐ ܓ ܕܡܘܼܫܹܐ
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܓܵܠܵܛܵܝܹ̈ܐ؛ ܐܲܚܲܝ̈ ܒܲܪܸܟܼܡܵܪܝ܀
ܐܵܚܘܿܢܘܵܬܝܼ̈؛ ܐܸܢ ܚܲܕ݇ ܐ݇ܢܵܫܵܐ ܡܸܢܵܘܟܼܘܿܢ ܦܵܐܸܫ ܕܒܼܝܼܩܵܐ ܒܓܢܵܗܵܐ؛ ܐܲܚܬܘܿܢ ܐܵܢܝܼ ܕܒܪܘܼܚܵܐ ܝ݇ܬܘܿܢ ܬܲܪܨܘܿܢ ܠܹܗ ܒܪܘܼܚܵܐ ܡܲܟܝܼܟܼܬܵܐ؛ ܘܗܵܘܝܼܬܘܿܢ ܗܸܫܝܲܪ ܕܠܵܐ ܗܵܘܝܵܐ ܐܵܦ ܐܲܚܬܘܿܢ ܦܵܝܫܝܼܬܘܿܢ ܓ̰ܘܼܪܒܹܐ* ܘܛܥܘܿܢܘܿܢ ܝܘܼܩܪܵܐ ܕܚܲܕ݇ ܕܗ̇ܘ ܐ݇ܚܹܪ݇ܢܵܐ. ܕܗܲܕܟܼܵܐ ܡܲܟܡܘܼܠܹܐ ܝ݇ܬܘܿܢ ܢܵܡܘܿܣܵܐ ܕܡܫܝܼܚܵܐ* ܐܸܢ ܚܲܕ݇ ܐ݇ܢܵܫܵܐ ܚܵܫܸܒܼ ܕܝܑܼܠܹܗ ܡܸܢܕܝܼ ܟܲܕ ܠܹܐ ܝ݇ܠܹܗ؛ ܓܵܢܹܗ ܡܲܚܠܘܼܛܹܐ ܝ݇ܠܹܗ. ܐܸܠܵܐ ܟܠ ܐ݇ܢܵܫܵܐ ܦܘܼܠܚܵܢܹܗ ܗܵܘܹܐ ܐܲܫܟܵܪܵܐ ܘܗ݁ܝܓܵܗ ܒܹܝܠܹܗ ܘܠܓܵܢܹܗ ܗܵܘܹܐ ܫܘܼܒܼܗܵܪܹܗ ܘܠܵܐ ܒܐ݇ܚܹܪ̈݇ܢܹܐ. ܣܵܒܵܒ ܟܠ ܐ݇ܢܵܫܵܐ ܟܲܪܬܵܐ ܕܓܵܢܹܗ ܒܸܬ ܛܵܥܸܢ* ܐܝܼܢܵܐ ܗܵܘܹܐ ܫܲܪܝܼܟܵܐ ܗ̇ܘ ܕܫܲܡܸܥ ܠܗ̇ܘ ܕܡܲܫܡܸܥ ܠܹܗ ܒܟܠܲܝܗܝ ܛܵܒܼܵܬܹ̈ܐ* ܠܵܐ ܚܵܠܛܝܼܬܘܿܢ؛ ܐܲܠܵܗܵܐ ܠܹܐ ܦܵܐܸܫ ܥܘܼܠܕܝܼܵܐ* ܣܵܒܵܒ ܗ̇ܘ ܡܸܢܕܝܼ ܕܙܲܪܸܥ ܒܲܪܢܵܫܵܐ ܗ̇ܘ ܒܸܬ ܚܵܨܹܕ. ܡ̣ܢ ܕܒܒܸܣܪܵܐ ܙܲܪܸܥ ܡ̣ܢ ܒܸܣܪܵܐ ܚܪܵܒܼܵܐ ܟܹܐ ܚܵܨܸܕ؛ ܘܡ̇ܢ ܕܒܪܘܼܚܵܐ ܙܲܪܸܥ ܡ̣ܢ ܪܘܼܚܵܐ ܚܲܝܹ̈ܐ ܕܠܥܵܠܲܡ ܒܸܬ ܚܵܨܸܕ* ܘܟܲܕ ܒܸܥܒܼܵܕܵܐ ܡܸܢܕܝܼ ܛܵܒܼܵܐ ܠܵܐ ܣܵܩܕܲܚ* ܒܲܣ ܐܵܕܝܼܵܐ ܟܲܕ ܐܝܼܬܠܲܢ ܥܕܵܢܵܐ؛ ܚܘܼܫ ܦܵܠܚܲܚ ܛܵܒܼܵܬܹ̈ܐ ܠܟܸܣ ܟܠ ܐ݇ܢܵܫܵܐ ܘܒܘܼܫ ܙܵܘܕܵܐ ܠܟܸܣ ܒܢܲܝ̈ ܒܲܝܬܵܐ ܕܗܲܝܡܵܢܘܼܬܵܐ* ܚܙܹܐܡܘܿܢ ܡܘܼܕܝ݇ ܟܬܵܒܼܵܐ ܟܬܸܒܼܠܝܼ ܐܸܠܵܘܟܼܘܿܢ ܒܐܝܼܕܵܬ̈ܝܼ* ܐܵܢܝܼ ܕܒܵܥܝܝܼ ܕܥܵܒܼܕܝܼ ܫܘܼܒܼܗܵܪܵܐ ܒܒܸܣܪܵܐ؛ ܐܵܢܝܼ ܡܲܠܝܘܼܨܹܐ ܝ݇ܢܵܐ ܐܸܠܵܘܟܼܘܿܢ ܕܦܵܝܫܝܼܬܘܿܢ ܓܙܝܼܪܹܐ. ܕܐܲܚܟ̰ܝܼ ܒܙܩܝܼܦܹܗ ܕܡܫܝܼܚܵܐ ܠܵܐ ܦܵܝܫܝܼ ܪܕܝܼܦܹܐ* ܣܵܒܵܒ ܗܲܪ ܐܵܦ ܐܲܢܹܐ ܕܒܸܓܙܵܪܵܐ ܝ݇ܢܵܐ ܠܹܐ ܝ݇ܢܵܐ ܒܸܢܛܵܪܵܐ ܢܵܡܘܿܣܵܐ؛ ܐܸܠܵܐ ܒܵܥܝܝܼ ܕܐܲܚܬܘܿܢ ܦܵܝܫܝܼܬܘܿܢ ܓܙܝܼܪܹܐ. ܕܒܒܸܣܪܵܐ ܕܝܼܵܘܟܼܘܿܢ ܥܵܒܼܕܝܼ ܫܘܼܒܼܗܵܪܵܐ* ܐܝܼܢܵܐ ܐܵܢܵܐ ܚܵܣܠܝܼ ܕܥܵܒܼܕܸܢ ܫܘܼܒܼܗܵܪܵܐ؛ ܐܸܠܵܐ ܐܸܢ ܒܙܩܝܼܦܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܕܒܝܼܹܗ ܥܵܠܡܵܐ ܦܝܼܫܵܐ ܝ݇ܠܹܗ ܡܸܚܝܵܐ ܠܙܩܝܼܦܵܐ ܐܸܠܝܼ ܘܐܵܢܵܐ ܠܥܵܠܡܵܐ* ܣܵܒܵܒ ܓܙܘܼܪܬܵܐ ܠܹܐ ܝ݇ܠܵܗ̇ ܚܲܕ݇ ܡܸܢܕܝܼ؛ ܘܠܵܐ ܥܘܼܪܠܘܼܬܵܐ ܐܸܠܵܐ ܒܪܝܼܬܵܐ ܚܲܕܬܵܐ* ܘܐܵܢܝܼ ܕܠܐܵܗܵܐ ܐܘܼܪܚܵܐ ܬܲܒܿܥܝܼ؛ ܫܠܵܡܵܐ ܒܸܬ ܗܵܘܹܐ ܥܲܠܲܝܗܝ ܘܪ̈ܲܚܡܹܐ ܥܲܠ ܝܼܣܪܵܝܹܠ ܕܐܲܠܵܗܵܐ* ܡܐܵܕܝܼܵܐ ܗܸܟ̃ ܐ݇ܢܵܫܵܐ ܥܲܠܝܼ ܝܘܼܩܪܵܐ ܠܵܐ ܡܲܬܸܒܼ. ܣܵܒܵܒ ܐܵܢܵܐ ܕܲܪ̈ܒܵܬܹܗ ܕܝܼܫܘܿܥ ܡܫܝܼܚܵܐ ܒܦܲܓܼܪܝܼ ܫܩܝܼܠܵܐ ܝ݇ܘܸܢ* ܫܵܦܵܩܲܬ ܕܡܵܪܲܢ ܝܼܫܘܿܥ ܡܫܝܼܚܵܐ ܥܲܡ ܪܘܼܚܵܘܟܼܘܿܢ ܐܵܚܘܿܢܘܵܬܝܼ̈ ܐܵܡܹܝܢ*
♱♱♱♱♱♱♱♱♱
ܚܕܒܫܒܐ ܕܬܼܠܬܼܐ ܕܡܘܫܐ
ܝܘܚܢܢ ܗ: 1 ‐ 19
ܐܘܢܓܠܝܘܢ ܩܕܝܫܐ ܕܡܪܢ ܝܼܫܘܥ ܡܫܝܚܐ ܟܪܘܙܘܬܼܐ ܕܝܘܚܢܢ
♰ ܒܵܬܲܪ ܐܲܢܹܐ ܗ݇ܘܹܐܠܹܗ ܥܲܕܥܹܕܵܐ ܕܝܘܼܗَܕܵܝܹ̈ܐ: ܘܣܸܠ݇ܩܠܹܗ ܝܑܼܫܘܿܥ ܠܐܘܿܪܸܫܠܸܡ: ܐܝܼܢܵܐ ܐܝܼܬ ܗ݇ܘܵܐ ܬܵܡܵܐ ܓܵܘ ܐܘܿܪܸܫܠܸܡ ܚܕܵܐ ܕܘܼܟܬܵܐ ܕܡܲܥܡܘܿܕܝܼܬܵܐ: ܕܟܹܐ ܦܲܝܫܵܐ ܗ݇ܘܵܐ ܩܪܹܝܬܵܐ ܥܸܒܼܪܵܐܝܼܬ ܒܹܝܬ ܚܸܣܕܵܐ. ܘܐܝܼܬ ܗ݇ܘܵܐ ܓܵܘܵܗ̇ ܚܲܡܫܵܐ ܥܵܠܘܼܠܹ̈ܐ: ܘܓܵܘ ܕܐܲܢܹܐ ܥܲܡܵܐ ܤܲܓܝܼܐܵܐ ܕܡܸܪ̈ܥܝܹܐ: ܘܣܸܡܝܹ̈ܐ: ܘܣܲܩܲܛܹ̈ܐ: ܘܒܪܝܼܙܹ̈ܐ: ܫܛܝܼܚܹܐ ܗ݇ܘܵܘ، ܘܒܸܤܦܵܪܵܐ ܠܫܥܵܫܵܐ ܕܡܝܼ̈ܵܐ. ܣܵܒܵܒ ܡܲܠܲܐܟܼܵܐ ܡ̣ܢ ܥܸܕܵܢܵܐ ܠܥܸܕܵܢܵܐ ܟܹܐ ܨܵܠܹܐ ܗ݇ܘܵܐ ܠܡܲܥܡܘܿܕܝܼܬܵܐ ܘܡܲܫܥܸܫ ܗ݇ܘܵܐ ܠܡܝܼ̈ܵܐ. ܘܐܲܝܢܝܼ ܕܩܲܕ݇ܡܵܝܵܐ ܨܵܠܹܐ ܗ݇ܘܵܐ ܡ̣ܢ ܒܵܬ݇ܪ ܫܥܵܫܵܐ ܕܡܝܼ̈ܵܐ، ܦܵܐܸܫ ܗ݇ܘܵܐ ܒܣܝܼܡܵܐ ܟܠ ܐܲܝܢܝܼ ܟܹܐܒܼܵܐ ܕܐܝܼܬ ܗܘܵܐ ܠܹܗ: ܐܝܼܢܵܐ ܐܝܼܬ ܗ݇ܘܵܐ ܬܵܡܵܐ ܚܲܕ݇ ܐ݇ܢܵܫܵܐ ܕܬܠܵܬܝܼ ܘܬܡܵܢܝܵܐ ܫܸܢܹ̈ܐ ܝܼܗَܘܵܐ ܒܟܘܼܪܗܵܢܵܐ: ܠܐܵܗܵܐ ܚܙܹܐܠܹܗ ܝܑܼܫܘܿܥ ܕܫܛܝܼܚܵܐ: ܘܝܕܸܥܠܹܗ ܕܪܵܒܵܐ ܙܲܒܼܢܵܐ ܐܝܼܬܠܹܗ، ܘܐ݇ܡܸܪܹܗ ܐܸܠܹܗ: ܒܵܥܸܬ ܕܦܲܝܫܸܬ ܒܣܝܼܡܵܐ؟ ܓ̰ܘܼܘܸܒܠܹܗ ܗ̇ܘ ܡܸܪܥܝܵܐ ܘܐ݇ܡܸܪܹܗ: ܗܹܐ ܡܵܪܝܼ. ܐܝܼܢܵܐ ܠܲܝܬܠܝܼ ܐ݇ܢܵܫܵܐ ܕܐܝܼܡܵܢ ܦܸܫܠܗ݇ܘܿܢ ܫܥܝܼܫܹܐ ܡܝܼ̈ܵܐ ܕܕܵܪܹܐ ܠܝܼ ܓܵܘ ܡܲܥܡܘܿܕܝܼܬܵܐ. ܐܸܠܵܐ ܗܲܠ ܕܐܵܢܵܐ ܒܹܐܬܵܝܵܐ ܝܘܸܢ: ܚܲܕ݇ ܐ݇ܚܹܪ݇ܢܵܐ ܡ̣ܢ ܩܲܕ݇ܡ ܕܝܼܝܼ ܒܸܨܠܵܝܵܐ ܝܠܹܗ: ܐܵܡܸܪ ܐܸܠܹܗ ܝܑܼܫܘܿܥ: ܩܘܼܡ ܫܩܘܿܠ ܫܘܝܼܬܘܼܟܼ ܘܙܹܠ݇. ܘܗܲܪ ܒܗ̇ܝ ܣܵܥܵܬ ܦܸܫܠܹܗ ܒܣܝܼܡܵܐ ܗ̇ܘ ܐ݇ܢܵܫܵܐ: ܘܩܸܡܠܹܗ ܫܩܸܠܹܗ ܫܘܝܼܬܹܗ ܘܐ݇ܙܸܠܹܗ: ܘܗ̇ܘ ܝܵܘܡܵܐ ܫܲܒܬܵܐ ܗ݇ܘܵܐ: ܘܐܲܡܪܝܼ ܝܗ݇ܘܼܕܵܝܹ̈ܐ ܠܗ̇ܘ ܕܦܸܫܠܹܗ ܒܘܼܤܡܵܐ: ܫܲܒܬܵܐ ܝܠܵܗ̇: ܠܹܐ ܝܠܵܗ̇ ܒܕܲܤܬܘܼܪ ܐܸܠܘܼܟܼ ܕܫܲܩܠܸܬ ܫܘܝܼܬܘܼܟܼ: ܐܝܼܢܵܐ ܗ̇ܘ ܓ̰ܘܼܘܸܒܠܹܗ ܘܐ݇ܡܸܪܹܗ ܐܸܠܲܝܗܝ: ܗ̇ܘ ܕܩܲܡ ܒܵܤܸܡܠܝܼ ܗ̇ܘ ܐ݇ܡܸܪܹܗ ܐܸܠܝܼ ܕܫܩܘܿܠ ܫܘܝܼܬܘܼܟܼ ܘܙܹܠ݇:ܘܒܘܼܩܸܪܗ݇ܘܿܢ ܡܸܢܹܗ: ܡܵܢܝܼ ܝܠܹܗ ܐܵܗܵܐ ܐ݇ܢܵܫܵܐ ܕܐ݇ܡܸܪܹܗ ܐܸܠܘܼܟ: ܕܫܩܘܼܠ ܫܘܝܼܬܘܼܟܼ ܘܙܹܠ݇؟ ܐܝܼܢܵܐ ܗ̇ܘ ܕܦܸܫܠܹܗ ܒܘܼܤܡܵܐ: ܠܹܐ ܝܵܕܸܥ ܗ݇ܘܵܐ ܡܵܢܝܼ ܝܠܹܗ: ܣܵܒܵܒ ܝܑܼܫܘܿܥ ܓܸܢܝܵܐ ܗ݇ܘܵܐ ܓܵܘ ܟܸܢܫܵܐ ܪܵܒܵܐ ܕܐܝܼܬ ܗ݇ܘܵܐ ܒܗ̇ܝ ܕܘܼܟܬܵܐ: ܒܵܬ݇ܪ ܚܕܵܐ ܥܸܕܵܢܵܐ ܡܘܼܫ݇ܟ̰ܸܚܠܹܗ ܝܑܼܫܘܿܥ ܒܗܲܝܟܠܵܐ ܘܐ݇ܡܸܪܹܗ ܐܸܠܹܗ: ܗܵܐ ܒܣܝܼܡܵܐ ܝܘܸܬ: ܡܸܢ݇ܕܪܹܫ݇ ܠܵܐ ܚܵܛܸܬ: ܕܠܵܐ ܗܵܘܹܐ ܠܘܼܟܼ ܡܸܢܕܝܼ ܒܘܼܫ ܣܸܪܝܵܐ ܡ̣ܢ ܩܲܕ݇ܡܵܝܬܵܐ: ܘܐ݇ܙܸܠܹܗ ܗ̇ܘ ܓܲܒܼܪܵܐ ܘܐ݇ܡܸܪܹܗ ܠܝܗ݇ܘܼܕܵܝܹ̈ܐ: ܕܝܼܫܘܿܥ ܝܠܹܗ ܗ̇ܘ ܕܩܲܡ ܒܵܣܸܡܠܹܗ. ܘܒܘܼܬ ܐܵܗܵܐ ܪܵܕܦܝܼ ܗ݇ܘܵܘ ܝܘܼܗَܕܵܝܹ̈ܐ ܠܝܼܫܘܿܥ ܘܒܵܥܝܼ ܗ݇ܘܵܘ ܠܸܩܛܵܠܹܗ: ܕܐܲܢܹܐ ܥܵܒܼܸܕ ܗ݇ܘܵܐ ܒܫܲܒܬܵܐ: ܐܝܼܢܵܐ ܝܑܼܫܘܿܥ ܐ݇ܡܸܪܹܗ ܐܸܠܲܝܗܝ: ܒܵܒܝܼ ܗܲܠ ܐܵܕܝܼܵܐ ܒܸܥܒܼܵܕܵܐ ܝܠܹܗ ܐܵܦ ܐܵܢܵܐ ܒܸܥܒܼܵܕܵܐ ܝܘܸܢ: ܒܘܼܬ ܕܐܵܗܵܐ ܒܘܼܫ ܙܵܘܕܵܐ ܒܵܥܝܼ ܗ݇ܘܵܘ ܝܘܼܗَܕܵܝܹ̈ܐ ܠܸܩܛܵܠܹܗ، ܠܵܐ ܐܲܚܟ̰ܝܼ ܕܫܵܪܹܐ ܗ݇ܘܵܐ ܫܲܒܬܵܐ: ܐܸܠܵܐ ܐܵܦ ܕܥܲܠ ܐܲܠܵܗܵܐ ܐܵܡܸܪ ܗ݇ܘܵܐ ܕܒܵܒܘܼܗܝ ܝܠܹܗ. ܘܥܵܒܼܸܕ ܗ݇ܘܵܐ ܓܵܢܹܗ ܫܵܘܝܵܐ ܥܲܡ ܐܲܠܵܗܵܐ.
♱♱♱♱♱♱♱♱♱