ܚܲܕܼܒܫܲܒܵܐ ܕܲܬܠܵܬܵܐ ܕܲܩܝܵܡܬܵܐ
ܐܹܫܲܥܝܵܐ ܢܘ؛ 1‐8
ܬܸܒ̣ܘ ܘܲܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ. ܢܛܘܿܪܘܿܢ ܕܝܼܘܵܢ ܘܥܒ̣ܘܿܕܘܿܢ ܙܲܕܝܼܩܘܼܬܵܐ. ܣܵܒܵܒ ܕܩܘܼܪܒܵܐ ܝ݇ܠܹܗ ܦܘܼܪܩܵܢܝܼ ܠܹܐܬܵܝܵܐ. ܘܙܲܕܝܼܩܘܼܬܝܼ ܠܦܝܵܫܵܐ ܓܠܝܼܬܵܐ܀ ܛܘܼܒ̣ܵܐ ܠܗ̇ܘ ܐ݇ܢܵܫܵܐ ܕܥܵܒ̣ܸܕ ܐܵܗܵܐ؛ ܘܒܲܪܢܵܫܵܐ ܕܦܵܐܹܫ ܚܘܼܠܸܢܵܐ ܒܝܼܵܗ̇. ܘܢܵܛܸܪ ܫܲܒܬܵܐ ܕܠܵܐ ܫܵܪܹܐܠܵܗ̇؛ ܘܚܵܡܹܐ ܐܝܼܕܹ̈ܗ ܕܠܵܐ ܥܵܒ̣ܸܕ ܒܝܼܫܬܵܐ܀ ܘܠܵܐ ܐܵܡܸܪ ܒܲܪ ܢܘܼܟ̣ܪ̈ܵܝܹܐ ܕܬܲܒܸܥ ܠܡܵܪܝܵܐ؛ ܦܪܵܫܵܐ ܒܸܬ ܦܵܪܸܫܠܝܼ ܡܵܪܝܵܐ ܡ̣ܢ ܛܵܝܸܦܹܗ؛ ܘܠܵܐ ܐܵܡܸܪ ܡܗܲܝܡܢܵܐ ܕܐܝܼܠܵܢܵܐ ܝ݇ܘܸܢ ܒܲܪܘܼܙܵܐ܀ ܣܵܒܵܒ ܕܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ؛ ܠܡܗܲܝܡܢܹ̈ܐ ܕܢܵܛܪܝܼ ܫܵܒܵܬ̈ܝܼ؛ ܘܓܵܒܝܼ ܡܸܢܕܝܼ ܕܒܲܣܡܵܐ ܠܝܼ؛ ܘܗܵܘܝܼ ܚܲܝܠܵܢܹ̈ܐ ܒܩܵܘܠܝܼ܀ ܒܸܬ ܝܵܗ݇ܒ̣ܸܢܗ݇ܘܿܢ ܓܵܘ ܒܲܝܬܝܼ ܘܓܵܘ ܓܘܼܕܵܢ̈ܝܼ ܕܘܼܟܬܵܐ؛ ܘܫܸܡܵܐ ܒܘܼܫ ܨܦܵܝܝܼ ܡ̣ܢ ܒܢܘܿܢܹ̈ܐ ܘܡ̣ܢ ܒܢܵܬܹ̈ܐ؛ ܘܒܸܬ ܝܵܗ݇ܒ̣ܸܢܲܝܗܝ ܫܸܡܵܐ ܕܥܵܠܲܡ ܕܠܹܐ ܬܵܐܹܡ܀ ܘܒܢܲܝ̈ ܢܘܼܟ̣ܪ̈ܵܝܹܐ ܕܬܵܒܥܝܼ ܠܡܵܪܝܵܐ ܠܸܥܒ̣ܵܕܹܗ ܚܸܠܡܲܬ؛ ܘܠܡܲܚܘܼܒܹܐ ܫܸܡܹܗ ܕܡܵܪܝܵܐ؛ ܘܕܗܵܘܝܼ ܐܸܠܹܗ ܪܹ̈ܓܵܘܵܬܹܐ. ܟܠ ܕܢܵܛܸܪ ܫܲܒܬܵܐ ܘܠܵܐ ܫܵܪܹܐ ܠܵܗ̇ ܘܗܵܘܝܼ ܚܲܝܠܵܢܹ̈ܐ ܒܩܵܘܠܝܼ܀ ܒܸܬ ܡܲܝܬ݇ܝܸܢܗ݇ܘܿܢ ܠܛܘܼܪܝܼ ܩܲܕܝܼܫܵܐ؛ ܘܒܸܬ ܡܲܚܕܸܢܗ݇ܘܿܢ ܒܒܲܝܬܵܐ ܕܨܠܘܿܬܝܼ؛ ܘܩܘܼܪ̈ܒܵܢܲܝܗܝ ܘܕܸܒ̣ܚܲܝ̈ܗܝ ܠܪܸܙܵܝܵܐ ܠܡܲܕܒܚܝܼ. ܣܵܒܵܒ ܕܒܲܝܬܝܼ ܒܲܝܬܵܐ ܕܨܠܘܿܬܵܐ ܒܸܬ ܦܵܐܹܫ ܩܸܪܝܵܐ ܠܟܠܲܝܗܝ ܛܵܝܸܦܹ̈ܐ܀
ܚܲܒ̣ܪܹܗ
ܦܪܲܟܣܝܼܣ؛ ܗ؛ 34 – ܫܘܼܠܵܡܵܐ.
ܫܠܵܘ ܦܪܲܟܣܝܼܣ ܕܲܫܠܝܼܚܹ̈ܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܘܩܸܡܠܹܗ ܚܲܕ݇ ܡ̣ܢ ܦܪ̈ܝܼܫܹܐ ܕܫܸܡܹܗ ܗ݇ܘܵܐ ܓܲܡܠܝܼܐܹܝܠ ܡܲܠܦܵܢܵܐ ܕܢܵܡܘܿܣܵܐ؛ ܘܡܵܪܹܐ ܐܝܼܩܵܪܵܐ ܓܵܘ ܟܠܹܗ ܛܵܝܸܦܵܐ؛ ܘܦܩܸܕܠܹܗ ܕܦܵܠܛܝܼ ܠܗ݇ܘܿܢ ܫܠܝܼܚܹ̈ܐ ܠܒ̣ܲܕܲܪ ܩܵܐ ܚܲܕ݇ ܥܸܕܵܢܵܐ ܟܪܝܼܬܵܐ܀ ܘܐ݇ܡܸܪܹܗ ܐܸܠܲܝܗܝ ܝܵܐ ܐ݇ܢܵܫܹ̈ܐ ܒܢܲܝ̈ ܝܼܣܪܵܝܹܠ ܗ݇ܘܹܐܡܘܿܢ ܗܸܫܝܲܪ ܒܓܵܢܵܘܟ̣ܘܿܢ؛ ܘܚܙܹܐܡܘܿܢ ܡܘܼܕܝܼ ܘܵܓ̰ܸܒ ܝܼܠܵܗ̇ ܠܸܥܒ̣ܵܕܵܐ ܒܘܼܬ ܕܐܲܢܹ̈ܐ ܐ݇ܢܵܫܹ̈ܐ؟܀ ܣܵܒܵܒ ܡ̣ܢ ܩܵܕ݇ܡ ܚܲܕ݇ܟ̰ܵܐ ܥܸܕܵܢܵܐ ܩܝܼܡܵܐ ܗ݇ܘܵܐ ܬܵܘܕܵܐ؛ ܘܐ݇ܡܸܪܹܗ ܒܘܼܬ ܓܵܢܹܗ ܕܚܲܕ݇ ܡܸܢܕܝܼ ܓܘܼܪܵܐ ܝ݇ܠܹܗ؛ ܘܐ݇ܙܸܠܗ݇ܘܿܢ ܒܵܬ݇ܪܹܗ ܐܲܝܟܼ ܐܲܪܒܲܥܡܵܐܐ ܐ݇ܢܵܫܹ̈ܐ ܘܗ̇ܘ ܦܸܫܠܹܗ ܩܛܝܼܠܵܐ ܘܐܵܢܝܼ ܕܐܵܙܠ݇ܝܼ ܗ݇ܘܵܘ ܒܵܬ݇ܪܹܗ ܒܘܼܪܒܸܙܠܗ݇ܘܿܢ ܘܗ݇ܘܹܐܠܗܘܿܢ ܗܝܼܟ̰ ܡܸܢܕܝܼ܀ ܘܩܸܡܠܹܗ ܡ̣ܢ ܒܵܬ݇ܪ ܡܸܢܹܗ ܝܼܗܘܼܕܵܐ ܓܠܝܼܠܵܝܵܐ ܒܝܵܘܡܵܢܹ̈ܐ ܕܦܝܵܫܵܐ ܗ݇ܘܵܘ ܟܬܝܼܒ̣ܹܐ ܐ݇ܢܵܫܹ̈ܐ ܩܵܐ ܚܲܪ̈ܓ̰ܹܐ ܕܪܹܫܵܐ. ܘܡܘܼܦܬܸܠ ܠܹܗ ܥܲܠܡܵܐ ܪܵܒܵܐ ܒܵܬ݇ܪܹܗ؛ ܘܗ̇ܘ ܡܝܼܬܠܹܗ؛ ܘܟܠܲܝܗܝ ܐܵܢܝܼ ܕܐܵܙܠ݇ܝܼ ܗ݇ܘܵܘ ܒܵܬ݇ܪܹܗ ܒܘܼܪܒܸܙܠܗ݇ܘܿܢ܀ ܘܐܵܕܝܼܵܐ ܒܹܐܡܵܪܵܐ ܝ݇ܘܸܢ ܐܸܠܵܘܟ̣ܘܿܢ؛ ܪܚܘܿܩܘܿܢ ܡ̣ܢ ܕܐܲܢܹܐ ܐ݇ܢܵܫܹ̈ܐ ܘܫܒ̣ܘܿܩܘܿܢ ܠܗ݇ܘܿܢ؛ ܕܐܸܢ ܡ̣ܢ ܒܢܲܝ̈ܢܵܫܹܵܐ ܝ݇ܠܵܗ̇ ܐܵܗܵܐ ܚܝܼܵܠ ܘܐܵܗܵܐ ܦܘܼܠܚܵܢܵܐ؟ ܒܸܬ ܒܲܛܠܝܼ ܘܬܲܠܩܝܼ ܘܐܸܢ ܡ̣ܢ ܐܲܠܵܗܵܐ ܝ݇ܠܵܗ̇؛ ܠܹܐ ܡܵܛܝܵܐ ܒܐܝܼܕܵܘܟ̣ܘܿܢ ܕܒܲܛܠܝܼܬܘܿܢ ܠܵܗ̇؛ ܕܠܵܐ ܗܵܘܝܵܐ ܕܦܵܝܫܝܼܬܘܿܢ ܡܫ݇ܟ̰ܝܼܚܹ̈ܐ ܩܵܝܡܵܢܹ̈ܐ ܕܲܪܩܘܼܒ̣ܠ ܕܐܲܠܵܗܵܐ܀ ܘܡܘܼܨܝܸܬܠܗ݇ܘܿܢ ܐܸܠܹܗ. ܘܩܸܪܝܲܝܗܝ ܠܗ݇ܘܿܢ ܫܠܝܼܚܹ̈ܐ ܘܓ̰ܘܼܢܓ̰ܸܪܲܝܗܝ ܠܗ݇ܘܿܢ؛ ܘܦܘܼܩܕܲܝܗܝ ܠܗ݇ܘܿܢ ܕܠܵܐ ܗܵܘܝܵܐ ܕܗܲܡܙܸܡܝܼ ܒܫܸܡܵܐ ܕܝܼܫܘܿܥ ܘܫܸܪܝܲܝܗܝ ܠܗ݇ܘܿܢ܀ ܘܦܠܸܛܠܗ݇ܘܿܢ ܡ̣ܢ ܩܵܕ݇ܡܲܝܗܝ ܟܲܕ ܒܸܚܕܵܝܵܐ ܕܚܫܝܼܚܹܐ ܗ݇ܘܵܘ ܒܘܼܬ ܚܵܬܸܪ ܕܫܸܡܵܐ ܦܵܝܫܝܼ ܡܘܼܟܸܦܹܐ؛ ܘܠܹܐ ܫܵܠܝܼ ܗ݇ܘܵܘ ܟܠܝܘܿܡ ܡ̣ܢ ܡܵܠܲܦܬܵܐ ܒܗܲܝܟܠܵܐ ܘܒܒܲܝܬܵܐ ܘܠܡܲܫܚܘܼܕܹܐ ܒܘܼܬ ܡܵܪܲܢ ܝܼܫܘܿܥ ܡܫܝܼܚܵܐ܀
♱♱♱♱♱♱♱♱♱
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܐܵܦܸܣܵܝܹ̈ܐ ܐܲܚܲܝ̈ ܒܲܪܸܟܼܡܵܪܝ܀
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܒܪܸܙܵܝܹܗ ܕܐܲܠܵܗܵܐ ܠܐܵܢܝܼ ܕܝܼܢܵܐ ܓܵܘ ܐܵܦܸܣܘܿܣ ܩܲܕܝܼܫܹ̈ܐ ܘܡܗܘܼܡܢܹ̈ܐ ܒܝܼܫܘܿܥ ܡܫܝܼܚܵܐ* ܒܘܼܪܟܼܵܐ ܝ݇ܠܹܗ ܐܲܠܵܗܵܐ ܒܵܒܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܗ̇ܘ ܕܩܲܡ ܒܵܪܸܟܼ ܠܲܢ ܒܟܠܲܝܗܝ ܒܘܼܪ̈ܟܵܬܹܐ ܕܪܘܼܚܵܐ ܒܫܡܲܝܵܐ ܒܡܫܝܼܚܵܐ* ܕܵܐܟܼܝܼ ܕܡ̣ܢ ܩܵܕ݇ܡܵܝܬܵܐ ܩܲܡ ܓܵܒܹܐ ܠܲܢ ܒܝܼܹܗ ܡ̣ܢ ܩܵܕ݇ܡ ܒܸܢܝܲܬܹ̈ܐ ܕܥܵܠܡܵܐ؛ ܕܗܵܘܲܚ ܩܲܕܝܼܫܹ̈ܐ ܘܕܠܵܐ ܠܲܟܵܐ ܩܵܕ݇ܡܘܼܗܝ* ܘܒܚܘܼܒܵܐ ܡ̣ܢ ܩܵܕ݇ܡܵܝܬܵܐ ܩܲܡ ܪܵܫܸܡ ܠܲܢ ܘܡܲܬܸܒܼܠܲܢ ܕܗܵܘܲܚ ܒܢܘܼܢܹ̈ܐ ܒܝܼܫܘܿܥ ܡܫܝܼܚܵܐ ܐܲܝܟܼ ܕܫܦܸܪܵܗ̇ ܠܪܸܙܵܝܹܗ* ܕܦܵܐܸܫ ܚܩܝܼܪܵܐ ܫܘܼܒܼܚܵܐ ܕܫܵܦܵܩܲܬܹܗ ܗ̇ܘ ܕܡܘܼܫܦܸܚܠܹܗ ܥܲܠܲܢ ܒܝܼܲܕ ܡܘܼܚܸܒܹܗ. ܕܒܝܼܹܗ ܐܝܼܬܠܲܢ ܦܘܼܪܩܵܢܵܐ ܘܒܕܸܡܹܗ ܫܒܼܵܩܵܐ ܕܚܛܝܼܵܬܹ̈ܐ؛ ܐܲܝܟܼ ܕܵܘܸܠܬܵܐ ܕܫܵܦܵܩܲܬܹܗ܋ ܗ̇ܝ ܕܦܸܫܠܵܗ̇ ܡܘܼܙܝܸܕܬܵܐ ܒܝܼܲܢ ܒܟܠ ܚܸܟܼܡ̱ܬܵܐ ܘܒܟܠ ܦܲܪܡܵܝܬܵܐ ܕܪܘܼܚܵܐ* ܘܡܘܼܕܸܥܠܹܗ ܩܵܬܲܢ ܐ݇ܪܵܙܵܐ ܕܪܸܙܵܝܹܗ ܕܡܼܢ ܩܵܕ݇ܡܵܝܬܵܐ ܡܘܼܬܸܒܼܠܹܗ ܕܦܵܠܸܚ ܒܝܼܹܗ܋ ܠܡܕܲܒܪܵܢܘܼܬܵܐ ܕܬܲܡܲܡܬܵܐ ܕܙܲܒܼܢܵܐ ܕܟܠ ܡܸܢܕܝܼ ܡܸܢ݇ܕܪܹܫ̄ ܦܵܐܸܫ ܚܘܼܕܸܬܵܐ ܒܡܫܝܼܚܵܐ؛ ܒܫܡܲܝܵܐ ܘܒܐܲܪܥܵܐ* ܘܒܝܼܹܗ ܐܲܚܢܲܢ ܦܸܫܠܲܢ ܓܘܼܒܝܹܐ ܐܲܝܟܼ ܕܡ̣ܢ ܩܵܕ݇ܡܵܝܬܵܐ ܩܲܡ ܪܵܫܸܡ ܠܲܢ. ܘܒܣܸܡܠܵܐ ܠܹܗ ܗ̇ܘ ܕܟܠ ܡܸܢܕܝܼ ܒܸܦܠܵܚܵܐ ܝ݇ܠܹܗ ܐܲܝܟܼ ܚܝܼܵܠ ܕܪܸܙܵܝܹܗ* ܕܗܵܘܲܚ ܐܲܚܢܲܢ ܐܵܢܝܼ ܕܡ̣ܢ ܩܵܕ݇ܡܵܝܬܵܐ ܦܸܫܠܲܢ ܒܗܹܒܼܝܼ ܕܡܫܝܼܚܵܐ ܠܣܵܩܲܠܬܵܐ ܕܬܸܫܒܘܿܚܬܹܗ* ܐܘܼܦ ܐܲܚܬܘܿܢ ܒܝܼܹܗ ܫܡܝܼܥܠܵܘܟܼܘܿܢ ܗܹܡܸܙܡܲܢ ܕܗܵܩܘܿܬܵܐ ܕܝܼܠܵܗ̇ ܡܲܫܚܲܕܬܵܐ ܕܚܲܝܵܘ̈ܟܼܘܿܢ. ܘܒܝܼܹܗ ܗܘܼܡܸܢܵܘܟܼܘܿܢ ܘܦܸܫܠܵܘܟܼܘܿܢ ܚܬܝܼܡܹܐ ܒܪܘܼܚܵܐ ܕܩܘܼܕܫܵܐ ܕܦܝܼܫܬܵܐ ܗ݇ܘ̣ܵܐ ܩܘܹܘܸܠܬܵܐ* ܗ̇ܝ ܕܝܼܠܵܗ̇ ܪܲܗܒܼܘܿܢܵܐ ܕܝܵܪܬܘܼܬܲܢ ܩܵܐ ܦܘܼܪܩܵܢܵܐ ܕܐܵܢܝܼ ܕܚܲܝܹܐ ܝ݇ܢܵܐ ܘܠܚܸܩܪܵܐ ܕܐܝܼܩܵܪܹܗ*
♱♱♱♱♱♱♱♱♱
ܝܘܚܢܢ ܝܕ: 1 ‐ 15
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܝܘܚܢܢ
♰ ܘܐ݇ܡܸܪܹܗ ܝܑܼܫܘܿܥ ܠܬܲܠܡܝܼ̈ܕܘܼܗܝ: ܠܵܐ ܦܵܐܸܫ ܫ̰ܓܼܝܼܫ̰ܵܐ ܠܸܒܵܘܟܼܘܿܢ. ܗܲܡܸܢܘܿܢ ܒܐܲܠܵܗܵܐ. ܘܒܝܼܝܼ ܗܲܡܸܢܘܿܢ. ܪܵܒܵܐ ܝܢܵܐ ܐܵܘܵܢܹ̈ܐ ܒܹܝܬ ܒܵܒܝܼ. ܘܐܸܢ ܠܵܐ: ܒܸܬ ܐܲܡܪܸܢ ܗ݇ܘܵܐ ܐܸܠܵܘܟܼܘܿܢ: ܕܒܹܐܙܵܠܵܐ ܝܘܸܢ ܕܗܲܕܪܸܢ ܕܘܼܟܬܵܐ ܐܸܠܵܘܟܼܘܿܢ. ܘܐܸܢ ܐܵܙܸܠ݇ܢ ܗܲܕܪܸܢ ܕܘܼܟܬܵܐ ܐܸܠܵܘܟܼܘܿܢ. ܡܸܢ݇ܕܪܹܫ݇ ܒܸܬ ܐܵܬܸܢ ܘܠܲܒܠܸܢܵܘܟܼܘܿܢ ܠܘܵܬܝܼ. ܕܐܲܝܟܵܐ ܕܐܵܢܵܐ ܝܼܘܸܢ، ܐܘܿܦ ܐܲܚܬܘܿܢ ܗܵܘܹܝܬܘܿܢ. ܘܠܐܲܝܟܵܐ ܕܒܹܐܙܵܠܵܐ ܝܘܸܢ ܒܝܼܕܵܥܵܐ ܝܬܘܿܢ. ܘܐܘܼܪܚܵܐ ܒܝܼܕܵܥܵܐ ܝܬܘܿܢ. ܐܵܡܸܪ ܐܸܠܹܗ ܬܐܘܿܡܵܐ: ܡܵܪܲܢ: ܠܹܐ ܝܘܲܚ ܒܝܼܕܵܥܵܐ ܠܐܲܝܟܵܐ ܒܹܐܙܵܠܵܐ ܝܘܸܬ. ܘܕܲܐܟܼܝܼ ܒܡܵܨܲܚ ܠܐܘܼܪܚܵܐ ܠܝܼܕܵܥܵܐ؟ ܐܵܡܸܪ ܐܸܠܹܗ ܝܑܼܫܘܿܥ: ܐܵܢܵܐ ܝܘܸܢ ܐܘܼܪܚܵܐ ܘܫܪܵܪܵܐ ܘܚܲܝܹ̈ܐ. ܐ݇ܢܵܫܵܐ ܠܹܐ ܐܵܬܹܐ ܠܘܵܬ ܒܵܒܝܼ ܐܸܠܵܐ ܐܸܢ ܒܝܼܝܼ. ܐܸܢ ܐܸܠܝܼ ܗܵܘܹܝܬܘܿܢ ܗ݇ܘܵܘ ܒܝܼܕܵܥܵܐ، ܐܘܿܦ ܠܒܵܒܝܼ ܒܸܬ ܝܲܕܥܝܼܬܘܿܢ ܗ݇ܘܵܘ. ܘܡ̣ܢ ܐܵܕܝܼܵܐ ܝܲܕܥܝܼܬܘܿܢ ܠܹܗ، ܘܚܙܹܐ ܠܵܘܟܼܘܿܢ ܐܸܠܹܗ. ܐܵܡܸܪ ܐܸܠܹܗ ܦܝܼܠܝܼܦܘܿܣ: ܡܵܪܲܢ: ܡܲܚܙܝܼܠܲܢ ܒܵܒܵܐ ܘܒܲܣܵܐ ܝܠܵܗ̇ ܐܸܠܲܢ. ܐܵܡܸܪ ܐܸܠܹܗ ܝܑܼܫܘܿܥ: ܐܵܗܵܐ ܙܲܒܼܢܵܐ ܟܠܹܗ ܥܲܡܵܘܟܼܘܿܢ ܝܘܸܢ. ܘܠܵܐ ܩܲܡ ܝܲܕܥܸܬܠܝܼ ܦ̮ܝܼܠܝܼܦܵܐ؟ ܡ̇ܢ ܕܐܸܠܝܼ ܚܵܙܹܐ، ܚܙܹܐܠܹܗ ܠܒܵܒܵܐ. ܘܕܲܐܟܼܝܼ ܐܲܢ݇ܬ ܒܹܐܡܵܪܵܐ ܝܘܸܬ: ܡܲܚܙܝܼܠܲܢ ܒܵܒܵܐ؟ ܠܹܐ ܝܘܸܬ ܡܗܲܝܡܘܼܢܹܐ ܕܐܵܢܵܐ ܒܒܵܒܝܼ ܝܘܸܢ ܘܒܵܒܝܼ ܒܝܼܝܼ؟ ܘܗܹܡܸܙܡܵܢܹ̈ܐ ܐܲܝܢܝܼ ܕܐܵܢܵܐ ܡܗܲܡܙܘܼܡܹܐ ܝܘܸܢ. ܡ̣ܢ ܓܵܢܝܼ ܠܹܐ ܝܘܸܢ ܗܲܡܙܘܼܡܹܐ. ܐܝܼܢܵܐ ܒܵܒܝܼ ܕܒܝܼܝܼ ܒܸܥܡܵܪܵܐ ܝܠܹܗ، ܗ̇ܘ ܒܸܥܒܼܵܕܵܐ ܝܠܹܗ ܐܲܢܹܐ ܥܒܼܵܕܹ̈ܐ. ܗܲܡܸܢܘܿܢ ܕܐܵܢܵܐ ܒܒܵܒܝܼ ܝܘܸܢ. ܘܒܵܒܝܼ ܒܝܼܝܼ. ܘܐܸܢ ܠܵܐ، ܐܵܦܸܢ ܡܸܛܠ ܥܒܼܵܕܹ̈ܐ ܗܲܡܸܢܘܿܢ. ܬܪܘܿܨܵܐ ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܕܡ̇ܢ ܕܡܗܲܝܡܸܢ ܒܝܼܝܼ. ܥܒܼܵܕܹ̈ܐ ܐܲܝܢܝܼ ܕܐܵܢܵܐ ܒܸܥܒܼܵܕܵܐ ܝܘܸܢ. ܐܘܿܦ ܗ̇ܘ ܒܸܬ ܥܵܒܼܸܕ. ܘܕܒܘܼܫ ܙܵܘܕܵܐ ܡ̣ܢ ܐܲܢܹܐ ܒܸܬ ܥܵܒܼܸܕ. ܕܐܵܢܵܐ ܠܘܵܬ ܒܵܒܵܐ ܒܹܐܙܵܠܵܐ ܝܘܸܢ. ܘܡܸܢܕܝܼ ܕܛܲܠܒܝܼܬܘܿܢ ܒܫܸܡܝܼ، ܒܸܬ ܥܲܒܼܕܸܢ ܐܸܠܵܘܟܼܘܿܢ ܕܦܵܐܸܫ ܡܫܘܼܒܚܵܐ ܒܵܒܵܐ ܒܒܪܘܿܢܹܗ. ܘܐܸܢ ܛܲܠܒܝܼܬܘܿܢ ܡܸܢܝܼ ܒܫܸܡܝܼ. ܐܵܢܵܐ ܒܸܬ ܥܲܒܼܕܸܢ.
♱♱♱♱♱♱♱♱♱