ܚܲܕܼܒܫܲܒܵܐ ܕܐܲܪܒܥܵܐ ܕܕܸܢܚܵܐ
ܡܸܢܝܵܢܵܐ ܝܐ؛ 23 – ܫܘܼܠܵܡܵܐ.
ܬܸܒ̣ܘ ܘܲܫܠܵܘ ܡܸܢܝܵܢܵܐ ܣܸܦܪܵܐ ܕܐܲܪܒܥܵܐ ܕܐܘܿܪܵܝܬܵܐ؛
ܐܲܚܲܝ̈ ܒܲܪܸܟ̣ܡܵܪܝ܀
ܘܐ݇ܡܸܪܹܗ ܡܵܪܝܵܐ ܠܡܘܼܫܹܐ؛ ܐܝܼܕܹܗ ܕܡܵܪܝܵܐ ܒܸܬ ܡܬܲܡܸܡܵܐ؛ ܐܵܕܝܼܵܐ ܒܸܬ ܚܵܙܹܬ̇ ܐܸܢ ܗܵܘܝܵܐ ܐܲܝܟܼ ܚܲܒܪܝܼ ܝܲܢ ܠܵܐ.܀ ܘܦܠܸܛܠܹܗ ܡܘܼܫܹܐ ܘܐ݇ܡܸܪܹܗ ܩܵܐ ܛܵܝܸܦܵܐ ܚܲܒܪܹ̈ܐ ܕܡܵܪܝܵܐ؛ ܘܓ̰ܘܼܡܸܥܠܹܗ ܫܲܒ̣ܥܝܼ ܐ݇ܢܵܫܹ̈ܐ ܡ̣ܢ ܣܵܒ̣ܹ̈ܐ ܕܛܵܝܸܦܵܐ ܘܡܘܼܩܸܡܝܼܠܹܗ ܚܵܕܸܪ̈ܘܵܢܹܐ ܕܡܲܫܟܢܵܐ. ܘܨܠܹܐܠܹܗ ܡܵܪܝܵܐ ܒܥܢܵܢܵܐ ܘܗܘܼܡܙܸܡܠܹܗ ܥܲܡܹܗ؛ ܘܡܘܼܒܨܸܪܹܗ ܡ̣ܢ ܪܘܼܚܵܐ ܕܥܲܠܹܗ؛ ܘܡܘܼܬܸܒ̣ܠܹܗ ܥܲܠ ܫܲܒ̣ܥܝܼ ܐ݇ܢܵܫܹ̈ܐ ܣܵܒ̣ܹ̈ܐ. ܘܟܲܕ ܫܪܹܐܠܵܗ̇ ܥܲܠܲܝܗܝ ܪܘܼܚܵܐ؛ ܢܘܼܒܹܐܠܗ݇ܘܿܢ ܘܠܵܐ ܡܘܼܙܝܸܕܠܗ݇ܘܿܢ.܀ ܦܸܫܠܗ݇ܘܿܢ ܬܪܹܝ ܐ݇ܢܵܫܹ̈ܐ ܓܵܘ ܡܲܫܪܝܼܬܵܐ؛ ܫܸܡܹܗ ܕܚܲܕ݇ ܐܸܠܕܵܕ ܘܫܸܡܹܗ ܕܗ̇ܘ ܐ݇ܚܹܪ݇ܢܵܐ ܡܹܝܕܵܕ. ܫܪܹܐܠܵܗ̇ ܥܲܠܲܝܗܝ ܪܘܼܚܵܐ؛ ܘܐܘܼܦ ܐܵܢܝܼ ܟܬܝܼܒ̣ܹܐ ܗ݇ܘܵܘ؛ ܘܠܵܐ ܐ݇ܬܹܐܠܗ݇ܘܿܢ ܠܡܲܫܟܢܵܐ ܘܢܘܼܒܹܐܠܗ݇ܘܿܢ ܓܵܘ ܡܲܫܪܝܼܬܵܐ.܀ ܪܚܸܛܠܹܗ ܚܲܕ݇ ܓ̰ܘܲܢܩܵܐ ܘܡܘܼܕܸܥܠܹܗ ܠܡܘܼܫܹܐ؛ ܘܐ݇ܡܸܪܹܗ ܐܸܠܹܗ ܐܸܠܕܵܕ ܘܡܹܝܕܵܕ ܗܵܐ ܢܵܒܘܿܝܹܐ ܝ݇ܢܵܐ ܓܵܘ ܡܲܫܪܝܼܬܵܐ.܀ ܘܓ̰ܘܼܘܸܒܠܹܗ ܗܘܿܫܲܥ ܒܲܪܢܘܿܢ ܚܸܠܡܲܬܟܲܪ ܕܡܘܼܫܹܐ ܡ̣ܢ ܙܥܘܿܪܘܼܬܹܗ؛ ܘܐ݇ܡܸܪܹܗ ܐܸܠܹܗ؛ ܡܵܪܝܼ ܡܘܼܫܹܐ ܡܲܟܠܝܼ ܠܗ݇ܘܿܢ.܀ ܐ݇ܡܸܪܹܗ ܐܸܠܹܗ ܡܘܼܫܹܐ ܠܵܐ ܡܲܟܬܸܒܸܬ̇ ܠܝܼ؛ ܛܘܼܒ̣ܵܐ ܕܟܠܹܗ ܛܵܝܸܦܵܐ ܕܡܵܪܝܵܐ ܗܵܘܹܐ ܗ݇ܘܵܐ ܢܒ̣ܝܼܹ̈ܐ؛ ܣܵܒܵܒ ܕܝܘܼܗ݇ܒ̣ܸܠܹܗ ܡܵܪܝܵܐ ܪܘܼܚܹܗ ܥܲܠܲܝܗܝ.܀ ܥܒ̣ܸܪܹܗ ܡܘܼܫܹܐ ܘܣܵܒ̣ܹ̈ܐ ܕܝܼܣܪܵܝܹܠ ܠܡܲܫܪܝܼܬܵܐ.܀ ܘܦܵܘܚܵܐ ܪܸܡܠܵܗ̇ ܩܵܕ݇ܡ ܡܵܪܝܵܐ ܘܡܘܼܣܸܩܠܵܗ̇ ܩܘܼܦܫܝܼܢܹ̈ܐ (ܣܲܠܘܲܝ) ܡ̣ܢ ܝܵܡܵܐ ܘܪܘܼܦܹܐ ܠܵܗ̇ ܥܲܠ ܡܲܫܪܝܼܬܵܐ ܐܘܼܪܚܵܐ ܕܚܲܕ݇ ܝܵܘܡܵܐ ܠܐܵܗܵܐ ܦܵܬܵܐ؛ ܘܐܘܼܪܚܵܐ ܕܚܲܕ݇ ܝܵܘܡܵܐ ܐ݇ܚܹܪ݇ܢܵܐ ܠܗ̇ܝ ܦܵܬܵܐ ܐ݇ܚܹܪ݇ܬܵܐ ܕܡܲܫܪܝܼܬܵܐ ܐܲܝܟܼ ܬܪܹܝ ܝܲܡܝܼܢܹ̈ܐ ܥܲܠ ܦܵܬܵܐ ܕܐܲܪܥܵܐ.܀ ܘܩܸܡܠܹܗ ܛܵܝܸܦܵܐ ܟܠܹܗ ܗ̇ܘ ܝܵܘܡܵܐ ܘܟܠܹܗ ܠܲܝܠܹܐ ܘܟܠܹܗ ܝܵܘܡܵܐ ܕܒܵܬ݇ܪܹܗ؛ ܘܓ̰ܘܼܡܸܥܠܗ݇ܘܿܢ ܠܣܲܠܘܲܝ؛ ܘܗ̇ܘ ܒܵܨܘܿܪܵܐ ܓ̰ܘܼܡܸܥܠܹܗ ܥܸܣܪܵܐ ܩܘܼܚܵܢܹ̈ܐ؛ ܘܫܛܝܼܚܝܼܠܗ݇ܘܿܢ ܡܲܫܛܵܚܹ̈ܐ ܚܵܕܸܪ̈ܘܵܢܹܐ ܕܡܲܫܪܝܼܬܵܐ.܀ ܒܸܣܪܵܐ ܗܵܠܵܐ ܬܚܘܿܬ ܟܹܐܟܲܝ̈ܗܝ. ܘܟܲܪܒܹܗ ܕܡܵܪܝܵܐ ܚܸܡܠܵܗ̇ ܥܲܠ ܛܵܝܸܦܵܐ؛ ܘܡܚܹܐܠܹܗ ܒܝܼܝܲܗܝ ܡܚܲܝܬܵܐ ܪܵܒܵܐ ܓܘܼܪܬܵܐ.܀ ܘܩܪܹܐܠܹܗ ܫܸܡܹܗ ܕܗ̇ܘ ܐܲܬܪܵܐ ܩܲܒ̣ܪܹ̈ܐ ܕܫܲܗܘܲܬܵܐ؛ ܣܵܒܵܒ ܕܬܵܡܵܐ ܩܒ̣ܸܪܗ݇ܘܿܢ ܠܐܵܢܝܼ ܕܫܘܼܗ݇ܘܸܬܠܗ݇ܘܿܢ.܀ ܘܡ̣ܢ ܩܲܒ̣ܪܹ̈ܐ ܕܫܲܗܘܲܬܵܐ ܡܘܼܛܥܸܢܗ݇ܘܿܢ ܛܵܝܸܦܵܐ ܠܚܸܨܪܘܿܬ ܘܥܘܼܪܩܸܠܗ݇ܘܿܢ ܓܵܘ ܚܸܨܪܘܿܬ܀
ܚܲܒ̣ܪܹܗ
ܐܹܫܲܥܝܵܐ ܡܘ؛ 5‐ ܫܘܼܠܵܡܵܐ.
ܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܗܲܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ؛ ܠܡܵܢܝܼ ܩܲܡ ܕܵܡܝܼܬܘܿܢ ܠܝܼ ܘܥܵܒ̣ܕܝܼܬܘܿܢ ܠܝܼ ܒܵܪܵܒܲܪ؟ ܠܐܵܢܝܼ ܕܚܵܠܛܝܼ ܘܦܵܠܛܝܼ ܕܲܗܒ̣ܵܐ ܡ̣ܢ ܟܝܼܣܬܵܝܗܝ ܘܣܹܐܡܵܐ ܒܡܲܣܲܐܬܵܐ ܬܵܩܠܝܼ؛ ܘܕܵܒ̣ܩܝܼ ܒܗܵܩܵܐ ܙܲܪܓܲܪ؛ ܘܬܲܪܨܝܼ ܐܲܠܵܗܵܐ ܘܣܵܓ̣ܕܝܼ ܐܸܠܹܗ؛ ܘܐܘܼܦ ܨܵܠܝܼ ܨܠܘܿܬܵܐ ܩܵܬܹܗ.܀ ܘܫܵܩܠܝܼ ܠܹܗ ܥܲܠ ܪ̈ܘܼܦ̮ܫܵܢܲܝܗܝ ܘܡܲܚܕܸܪܝܼ ܠܹܗ؛ ܘܡܲܬܒ̣ܝܼܠܹܗ ܥܲܠ ܕܘܼܟܬܹܗ ܘܠܹܐ ܡܵܨܹܐ ܠܸܩܝܵܡܵܐ ܡ̣ܢ ܕܘܼܟܬܹܗ؛ ܘܐܘܼܦ ܡܨܵܠܝܼ ܨܠܘܿܬܵܐ ܩܵܕ݇ܡܹܗ ܘܠܹܐ ܓ̰ܲܘܸܒܠܗ݇ܘܿܢ ܘܠܹܐ ܦܵܪܸܩܠܗ݇ܘܿܢ ܡ̣ܢ ܝܲܠܨܘܼܘܲܝ̈ܗܝ.܀ ܕܟ̣ܘܿܪܘܿܢ ܐܲܢܹܐ ܘܦܲܪܡܹܐܡܘܿܢ ܘܡܲܝܬܹܐܡܘܿܢ ܥܲܠ ܠܸܒܵܘܟ̣ܘܿܢ؛ ܕܟ̣ܘܿܪܘܿܢ ܦܘܼܠܚܵܢܹ̈ܐ ܩܵܕ݇ܡܵܝܹ̈ܐ ܕܡ̣ܢ ܥܵܠܲܡ؛ ܕܐܵܢܵܐ ܝ݇ܘܸܢ ܐܲܠܵܗܵܐ؛ ܘܠܲܝܬ̇ ܐܲܠܵܗܵܐ ܐ݇ܚܹܪ݇ܢܵܐ ܡܐܲܝܟܼ ܕܝܼܝܼ.܀ ܡ̣ܢ ܫܘܼܪܵܝܵܐ ܟܹܐ ܡܲܕܥܸܢ ܡܸܢܕܝܼܵܢܹ̈ܐ ܐ݇ܚܵܪ̈ܵܝܹܐ ܘܡ̣ܢ ܩܲܕ݇ܡܵܝܬܵܐ ܐܵܢܝܼ ܕܠܹܐ ܝ݇ܢܵܐ ܦܝܼܫܹܐ ܥܒ̣ܝܼܕܹ̈ܐ ܟܹܐ ܐܵܡܪܸܢ؛ ܚܝܼܵܠܝܼ̈ ܟܹܐ ܡܲܩܸܡܸܢ ܘܟܠܹܗ ܪܸܙܵܐܝܝܼ ܟܹܐ ܥܵܒ̣ܕܸܢ؛ ܟܹܐ ܩܵܪܸܢ ܡ̣ܢ ܡܲܕܢܚܵܐ ܛܲܝܪܵܐ ܘܡ̣ܢ ܐܲܪܥܵܐ ܪܸܚܩܵܐ ܐ݇ܢܵܫܵܐ ܕܪܸܙܵܝܝܼ؛ ܐܵܢܵܐ ܟܹܐ ܗܲܡܙܸܡܸܢ ܘܐܘܼܦ ܡܲܝܸܬ݇ܢ؛ ܓܒ̣ܸܠܝܼ ܘܐܘܼܦ ܟܹܐ ܥܵܒ̣ܕܸܢ؛ ܫܡܸܥܡܘܿܢ ܠܝܼ ܙܲܚܡܹ̈ܐ ܕܠܸܒܵܐ ܘܪ̈ܚܝܼܩܹܐ ܡ̣ܢ ܙܲܕܝܼܩܘܼܬܵܐ.܀ ܩܘܼܪܒܸܢܵܗ̇ ܙܲܕܝܼܩܘܼܬܝܼ ܠܹܐܬܵܝܵܐ ܘܦܘܼܪܩܵܢܝܼ ܠܹܐ ܥܲܪܩܸܠ؛ ܘܒܸܬ ܝܵܗ݇ܒ̣ܸܢ ܒܨܸܗܝܘܿܢ ܦܘܼܪܩܵܢܵܐ ܘܠܝܼܣܪܵܝܹܠ ܬܸܫܒܘܿܚܬܝܼ܀
♱♱♱♱♱♱♱♱
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܥܸܒܼܪ̈ܵܝܹܐ ܐܲܚܲܝ̈ ܒܲܪܸܟܼܡܵܪܝ܀
ܐܝܼܢܵܐ ܫܘܼܚܠܵܦܵܐ ܕܗܘܹܐܠܹܗ ܠܦܘܼܩܕܵܢܵܐ ܩܵܕ݇ܡܵܝܵܐ؛ ܡ̣ܢ ܣܵܒܵܒ ܕܙܲܒܘܼܢܘܼܬܹܗ ܘܕܦܵܝܕܵܐ ܠܲܝܬ ܗ݇ܘ̣ܵܐ ܒܝܼـܹܗ* ܫܲܪܥܲܬ ܕܡܘܼܫܹܐ ܚܲܕ݇ ܡܸܢܕܝܼ ܠܵܐ ܡܘܼܟܡܸܠܵܗ̇؛ ܐܝܼܢܵܐ ܡ̣ܢ ܓܹܒܵܗ̇ ܥܒܼܸܪܵܗ̇ ܗܹܒܼܝܼ ܕܒܘܼܫ ܨܦܵܝ ܡܸܢܵܗ̇؛ ܕܒܝܼܵܗ̇ ܩܲܪܒܘܼܢܹܐ ܝ݇ܘܲܚ ܠܐܲܠܵܗܵܐ* ܘܡܘܼܩܘܝܼܵܐ ܠܹܗ ܩܵܬܲܢ ܒܡܵܘܡܵܬܹ̈ܐ ܐܲܝܟܼ ܕܐ݇ܡܸܪܹܗ ܐܸܠܹܗ ܒܝܼܲܕ ܕܵܘܝܼܕ. ܕܝ݇ܡܹܐܠܹܗ ܡܵܪܝܵܐ ܘܠܹܐ ܕܵܓܸܠ؛ ܕܐܲܢ݇ܬ ܝܼܘܸܬ ܟܵܗܢܵܐ ܠܥܵܠܲܡ؛ ܒܕܵܡܵܝܬܵܐ ܕܡܲܠܟܝܼܙܕܸܩ* ܚܲܕ݇ ܗܲܕܟܼܵܐ ܒܘܼܫ ܨܦܵܝ ܝ݇ܠܵܗ̇ ܐܵܗܵܐ ܕܝܵܬܹܩܹܐ ܕܗܘܹܐܠܹܗ ܒܝܼܵܗ̇ ܙܵܡܝܼܢ ܝܼܫܘܿܥ* ܡ̣ܢ ܕܐܵܢܝܼ ܗܘܹܐ ܠܗ݇ܘܿܢ ܪܵܒܵܐ ܟܵܗܢܹ̈ܐ؛ ܡ̣ܢ ܣܵܒܵܒ ܕܡܵܝܬܝܼ ܗ݇ܘ̣ܵܘ ܘܠܹܐ ܦܵܝܫܝܼ ܗܘ̣ܵܘ ܫܒܼܝܼܩܹܐ ܕܥܲܪܩܸܠܝܼ* ܐܝܼܢܵܐ ܐܵܗܵܐ ܡ̣ܢ ܣܵܒܵܒ ܕܗܲܠ ܐܵܒܲܕ ܟܸܠܝܵܐ ܝ݇ܠܹܗ ܘܟܵܗܢܘܼܬܹܗ ܠܹܐ ܒܵܛܠܵܐ* ܘܡܵܨܹܐ ܠܡܲܚܘܼܝܹܐ ܗܲܠ ܐܵܒܲܕ ܠܐܵܢܝܼ ܕܩܲܪܒܸܢܝܼ ܒܐܘܼܪܚܵܐ ܕܝܼـܹܗ ܠܟܸܣ ܐܲܠܵܗܵܐ. ܣܵܒܵܒ ܚܲܝܵܐ ܝ݇ܠܹܗ ܒܟܠ ܥܕܵܢܵܐ ܘܡܵܣܘܿܩܹܐ ܨܠܘܿܬܵܐ ܩܵܐ ܐܲܠܵܗܵܐ ܡ̣ܢ ܓܹܒܲܝܗܝ ܡܐܲܝܟܼ ܕܐܵܗܵܐ ܟܵܗܢܵܐ ܚܫܝܼܚܵܐ ܝ݇ܠܹܗ ܩܵܬܲܢ؛ ܕܸܟܼܝܵܐ ܘܕܠܵܐ ܒܝܼܫܘܼܬܵܐ ܘܕܠܵܐ ܠܲܟܵܐ ܘܪܸܚܩܵܐ ܡ̣ܢ ܚܛܝܼܬܵܐ ܘܡܘܼܪܡܵܐ ܠܥܘܼܠܘܼܠ ܡ̣ܢ ܫܡܲܝܵܐ* ܘܠܹܐ ܝ݇ܠܹܗ ܣܢܝܼܩܵܐ ܕܟܠܝܘܿܡ ܐܲܝܟܼ ܓܘܼܪܵܐ ܕܟܵܗܢܹ̈ܐ؛ ܕܩܵܕ݇ܡܵܝܬܵܐ ܡ̣ܢ ܓܹܒܵܐ ܕܓܵܢܹܗ ܡܲܩܪܸܒܼ ܕܸܒܼܚܵܐ ܘܒܵܬ̄ܪ ܗܵܕܵܐ ܡ̣ܢ ܓܹܒܵܐ ܕܛܵܝܸܦܵܐ. ܐܵܗܵܐ ܥܒܼܝܼܕܵܐ ܠܹܗ ܚܕܵܐ ܓܵܗܵܐ ܒܓܵܢܹܗ ܕܡܘܼܩܪܸܒܼܵܐ ܠܹܗ ܕܸܒܼܚܵܐ ܣܵܒܵܒ ܫܲܪܥܲܬ ܕܡܘܼܫܹܐ؛ ܡ̣ܢ ܒܢܲܝ̈ܢܵܫܵܐ ܙܲܒܘܼܢܹ̈ܐ ܡܲܩܸܡܵܐ ܟܵܗܢܹ̈ܐ. ܐܝܼܢܵܐ ܗܹܡܸܙܡܲܢ ܕܡܵܘܡܵܬܹ̈ܐ ܕܗܘܹܐܠܵܗ̇ ܡ̣ܢ ܒܵܬ̄ܪ ܫܲܪܥܲܬ̇؛ ܡܘܼܩܸܡܠܵܗ̇ ܒܪܘܼܢܵܐ ܟܵܡܝܼܠ ܗܲܠ ܐܵܒܲܕ*
♱♱♱♱♱♱♱♱
ܝܘܚܢܢ ܐ: 43 ܒ؛ 12
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܝܘܚܢܢ
♰ ܘܠܝܵܘܡܵܐ ܐ݇ܚܹܪ݇ܢܵܐ ܒܥܹܐܠܹܗ ܝܑܼܫܘܿܥ ܠܸܦܠܵܛܵܐ ܠܓܠܝܼܠܵܐ. ܘܡܘܼܫ݇ܟ̰ܸܚܠܹܗ ܠܦܝܼܠܝܼܦܘܿܣ ܘܐ݇ܡܝܼܪܹܗ ܐܸܠܹܗ: ܬܵܐ ܒܵܬ݇ܪܝܼ: ܐܝܼܢܵܐ ܐܵܗܵܐ ܦܝܼܠܝܼܦܘܿܣ ܝܑܼܗَܘܵܐ ܡ̣ܢ ܒܹܝܬ ܨܲܝܵܕܵܐ، ܡ̣ܢ ܡܕܝܼܢ݇ܬܹܗ ܕܐܲܢܕܪܹܐܘܿܣ ܘܕܫܸܡܥܘܿܢ: ܘܦܝܼܠܝܼܦܘܿܣ ܡܘܫ݇ܟ̰ܸܚܠܹܗ ܠܢܲܬܢܝܼܐܹܝܠ، ܘܐ݇ܡܝܼܪܹܗ ܐܸܠܹܗ: ܗ̇ܘ ܕܟܬܝܼܒܼܠܹܗ ܥܲܠܘܼܗܝ ܡܘܼܫܹܐ ܒܢܵܡܘܿܣܵܐ ܘܒܢܒܼܝܼܹ̈ܐ ܡܘܼܫ݇ܟ̰ܸܚܠܲܢ ܐܸܠܹܗ: ܕܝܼܠܹܗ ܝܑܼܫܘܿܥ ܒܲܪ ܝܵܘܣܸܦ ܕܡ̣ܢ ܢܵܨܪܲܬ: ܐܵܡܸܪ ܐܸܠܹܗ ܢܲܬܢܝܼܐܹܝܠ: ܡ̣ܢ ܢܵܨܪܲܬ ܟܹܐ ܡܵܨܹܐ ܡܸܢܕܝܼ ܕܛܵܒ̣ܵܐ ܗܵܘܹܐ؟ ܐܵܡܸܪ ܐܸܠܹܗ ܦܝܼܠܝܼܦܘܿܣ: ܬܵܐ ܘܒܸܕ ܚܵܙܸܬ: ܘܚܙܹܐܠܹܗ ܝܑܼܫܘܿܥ ܠܢܲܬܢܝܼܐܹܝܠ ܟܲܕ ܒܹܐܬܵܝܵܐ ܠܘܵܬܹܗ: ܘܐ݇ܡܝܼܪܹܗ ܒܘܼܬ ܕܝܼܹܗ: ܗܵܐ ܫܲܪܝܼܪܵܐܝܼܬ ܒܲܪ ܝܑܼܣܪܵܝܸܠ ܕܦܸܠܡܵܐ ܠܲܝܬ ܒܝܼܹܗ: ܐܵܡܸܪ ܐܸܠܹܗ ܢܲܬܢܝܼܐܹܝܠ: ܡ̣ܢ ܐܲܝܟܵܐ ܟܹܐ ܝܵܕܥܸܬ ܐܸܠܝܼ؟ ܐܵܡܸܪ ܐܸܠܹܗ ܝܑܼܫܘܿܥ ܗܵܠܵܐ ܠܵܐ ܩܪܵܝܘܼܟܼ ܦܝܼܠܝܼܦܘܿܣ، ܟܲܕ ܐܲܢ݇ܬ ܬܚܘܿܬ ܐܝܼܠܵܢܵܐ ܕܬܹܐܢܵܐ ܩܲܡ ܚܵܙܸܢܘܼܟܼ: ܓ̰ܘܼܘܸܒܠܹܗ ܢܲܬܢܝܼܐܹܝܠ ܘܐ݇ܡܝܼܪܹܗ ܐܸܠܹܗ: ܪܵܒܝܼ ܐܲܢ݇ܬ ܝܼܘܸܬ ܒܪܘܿܢܹܗ ܕܐܲܠܵܗܵܐ. ܐܲܢ݇ܬ ܝܼܘܸܬ ܡܲܠܟܵܐ ܕܝܼܣܪܵܝܸܠ: ܐܵܡܸܪ ܐܸܠܹܗ ܝܑܼܫܘܿܥ: ܥܲܠ ܕܐ݇ܡܝܼܪܝܼ ܐܸܠܘܼܟܼ ܕܩܲܡ ܚܵܙܸܢܘܼܟܼ ܬܚܘܼܬ ܐܝܼܠܵܢܵܐ ܕܬܹܐܢܵܐ ܡܗܘܼܡܸܢܘܼܟܼ؟ ܕܒܘܼܫ ܓܘܼܪܹܐ ܡ̣ܢ ܐܲܢܹܐ ܒܸܬ ܚܵܙܸܬ. ܐܵܡܸܪ ܐܸܠܹܗ ܝܑܼܫܘܿܥ: ܬܪܘܿܨܵܐ ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ. ܕܡ̣ܢ ܐܵܕܝܼܵܐ ܒܸܬ ܚܵܙܝܼܬܘܿܢ ܫܡܲܝܵܐ ܦܬܝܚܬܵܐ ܘܡܲܠܲܐܟܼܹ̈ܐ ܕܐܲܠܵܗܵܐ ܟܲܕ ܒܹܐܣܵܠ݇ܩܵܐ ܘܒܸܨܠܵܝܵܐ ܠܘܵܬ ܒܪܘܿܢܹܗ ܕܐ݇ܢܵܫܵܐ: ܘܠܝܵܘܡܵܐ ܕܬܠܵܬܵܐ ܗ݇ܘܹܐܠܵܗ̇ ܡܸܫܬܘܼܬܵܐ ܒܩܵܛܢܹܐ ܡܕܝܼܢ݇ܬܵܐ ܕܓܠܝܼܠܵܐ. ܘܝܸܡܹܗ ܕܝܑܼܫܘܿܥ ܬܵܡܵܐ ܗ݇ܘܵܐ. ܘܐܘܿܦ ܝܑܼܫܘܿܥ ܘܬܲܠܡܝܼܕܘܼ̈ܗܝ ܦܝܼܫܠܗ݇ܘܿܢ ܩܸܪܝܹܐ ܠܗ̇ܝ ܡܸܫܬܘܼܬܵܐ: ܘܚܣܝܼܪܗ݇ܘܵܐ ܠܹܗ ܚܲܡܪܵܐ: ܘܐܲܡܪܵܐ ܠܝܑܼܫܘܿܥ ܝܸܡܹܗ: ܚܲܡܪܵܐ ܠܲܝܬܠܗ݇ܘܿܢ: ܐܵܡܸܪ ܐܸܠܵܗ̇ ܝܑܼܫܘܿܥ: ܐܸܠܝܼ ܘܐܸܠܹܟܼܝ ܡܘܿܕܝܼ ܝܵܐ ܒܲܟܼܬܵܐ. ܗܵܠܵܐ ܠܹܐ ܝܠܵܗ̇ ܐ݇ܬܹܐܬܵܐ ܣܵܥܲܬܝܼ: ܐܵܡܪܵܐ ܝܸܡܹܗ ܠܸܡܫܲܡܫܵܢܹ̈ܐ: ܡܸܢܕܝܼ ܕܐܵܡܸܪ ܐܸܠܵܘܟܼܘܿܢ ܥܒܼܘܼܕܘܿܢ: ܐܝܼܢܵܐ ܐܝܼܬ ܗ݇ܘܵܐ ܬܵܡܵܐ ܫܬܵܐ ܠܝܼܢܝܵܬܹ̈ܐ ܕܟܹܐܦܵܐ. ܕܡܘܼܬܒܼܹܐ ܩܵܐ ܬܲܕܟܼܝܼܬܵܐ ܕܝܘܼܗَܕܵܝܹ̈ܐ. ܕܟܹܐ ܕܲܒܼܩܝܼ ܗ݇ܘܵܘ ܬܪܹܝ ܬܪܹܝ ܝܲܢ ܬܠܵܬܵܐ ܪܘܼܒܥܹ̈ܐ: ܐܵܡܸܪ ܐܸܠܲܝܗܝ ܝܑܼܫܘܿܥ: ܡܠܲܝܡܘܿܢ ܠܗ݇ܘܿܢ ܠܠܝܼܢܝܵܬܹ̈ܐ ܡܝܼ̈ܵܐ. ܘܡܸܠܝܲܝܠܗ݇ܘܿܢ ܗܲܠ ܠܥܸܠ: ܐܵܡܸܪ ܐܸܠܲܝܗܝ: ܐܵܕܝܼܵܐ ܕܪܲܝܡܘܿܢ ܘܡܲܝܬܲܝܡܘܿܢ ܠܪܹܫ ܣܡܵܟܼܵܐ. ܘܡܘܼܝܬܹܐ ܠܗ݇ܘܿܢ. ܘܟܲܕ ܛܥܝܼܡܠܹܗ ܗ̇ܘ ܪܹܫܵܐ ܕܣܡܵܟܼܵܐ ܐܵܢܝܼ ܡܝܼ̈ܵܐ ܕܗ݇ܘܹܐ ܠܗ݇ܘܿܢ ܚܲܡܪܵܐ، ܘܠܹܐ ܝܵܕܸܥ ܗ݇ܘܵܐ ܡ̣ܢ ܐܲܝܟܵܐ ܝܗ݇ܘܵܐ، ܐܝܼܢܵܐ ܡܫܲܡܫܵܢܹ̈ܐ ܒܝܼܕܵܥܵܐ ܝܗ݇ܘܵܘ، ܕܐܵܢܝܼ ܡܸܠܝܲܝܠܗ݇ܘܿܢ ܡܝܼ̈ܵܐ، ܩܪܹܐܠܹܗ ܪܹܫ ܣܡܵܟܼܵܐ ܠܚܲܬܢܵܐ: ܘܐ݇ܡܝܼܪܹܗ ܐܸܠܹܗ: ܟܠ ܐ݇ܢܵܫܵܐ ܩܲܕ݇ܡܵܝܬܵܐ ܚܲܡܪܵܐ ܛܵܒܼܵܐ ܟܹܐ ܡܲܝܬܹܐ. ܘܐܝܼܡܵܢ ܕܪܘܹܐܠܗ݇ܘܿܢ، ܗܵܝܓܵܗ̇ ܐܲܝܢܝܼ ܕܝܼܠܹܗ ܒܘܼܫ ܒܵܨܘܼܪܵܐ. ܐܝܼܢܵܐ ܐܲܢ݇ܬ ܢܛܝܼܪܘܼܟܼ ܠܚܲܡܪܵܐ ܛܵܒܼܵܐ ܗܲܠ ܐܵܕܝܼܵܐ: ܐܵܗܵܐ ܝܼܠܵܗ̇ ܥܵܓ̰ܝܼܒܘܼܬܵܐ ܩܲܕ݇ܡܵܝܬܵܐ ܕܥܒܼܝܼܕܠܹܗ ܝܑܼܫܘܿܥ ܒܩܵܛܢܹܐ ܕܓܠܝܼܠܵܐ: ܘܡܘܼܕܸܥܠܹܗ ܫܘܼܒܼܚܹܗ ܘܗܘܼܡܸܢܗ݇ܘܿܢ ܒܝܼܹܗ ܬܲܠܡܝܼ̈ܕܘܼܗܝ.
♱♱♱♱♱♱♱♱