ܚܲܕܼܒ̇ܫܲܒܵܐ ܕܐܲܪܒܿܥܵܐ ܕܩܘܼܕܵܫ ܥܹܕܿܬܵܐ
ܡܲܪܡܝܼܬܼܵܐ ܕܐ݇ܪ̈ܵܙܹܐ؛ ܫܲܒܲܚܝ ܐܘܿܪܸܫܠܸܡ ܠܡܵܪܝܵܐ.
ܐܲܩܲܦܬܵܐ؛ ܩܲܕ̇ܝܼܫܘܼ ܒܹܝܬܼ ܡܲܫܪ̱ܝܹܗ ܕܲܡܪܲܝܡܵܐ܀
ܥܘܼܢܵܝܵܐ. ܐܲܠܵܗܵܐ ܒܓܼܵܘܵܗ̇ ܠܵܐ ܬܙܘܼܥ܀
ܕܩܲܢܟܹ̇ܐ. ܒܡܵܢ ܕܚܲܟܿܝܼܡ.
ܐܸܬܿܕܲܟܼܪ ܥܹܕܿܬܵܟܼ ܕܲܩ̣ܢܲܝܬ̇ ܡ̣ܢ ܩܕܼܝܼܡ؛ ܛܲܪ ܪ̈ܲܚܡܲܝܟ ܠܩܲܪ̈ܝܼܒܲܝܟ. ܡܵܪܲܢ ܒܪ̈ܲܚܡܲܝܟ ܢܲܛܲܪ ܥܹܕܿܬܵܟܼ ܕܲܓ̣ܒܲܝܬ̇. ܘܫܲܪܲܪܬ̇ ܡ̣ܢ ܩܕܼܝܼܡ. ܘܒܲܛܸܠ ܡܸܢܵܗ̇ ܩܪ̈ܵܒܹܐ ܘܬܲܟܼܬܿܘܼܫܹ̈ܐ. ܘܐܲܣܘܿܪ ܝܲܠܕܹܝ̈ܗ̇ ܒܚܘܼܒܵܐ ܘܐܵܘܝܘܼܬܼܵܐ. ܟܵܗܢܹܝ̈ܗ̇ ܢܸܗܘܘܿܢ ܒܲܫܠܵܡܵܐ. ܘܗܲܝܡܵܢܘܼܬܼܵܐ ܕܲܫܪܵܪܵܐ. ܠܪܵܥܝܵܗ̇ ܢܲܛܲܪ ܒܲܚܢܵܢܵܟܼ. ܕܢܸܗܘܸܐ ܣܢܹܐܓܼܪܵܐ؛ ܘܢܸܫܐܲܠ ܡܸܢܵܟܼ ܒܟܼܠܙܒܲܢ ܫܲܝܢܵܐ ܠܡܲܪܥܝܼܬܹܗ؛ ܬܢܝܼ؛ ܫܲܒܲܚ. ܒܪܵܐ ܡܫܝܼܚܵܐ ܕܐܸܬܼܵܐ ܠܦܘܼܪܩܵܢܲܢ. ܐܸܬ̇ܕܲܟܼܪ ܥܹܕܿܬܵܟܼ ܕܲܩ̣ܢܲܝܬ̇ ܡ̣ܢ ܩܕܼܝܼܡ. ܘܫܲܥܒܸ̇ܕܼ ܩܘܼܕܼܡܹܝܗ̇ ܥܲܡܡܹ̈ܐ ܕܨܵܒܹܝ̇ܢ ܩܪܵܒܼܵܐ. ܐܲܝܟܼ ܕܐܸܫܬܵܘܕܿܝܼܬܿ ܠܦܲܛܪܘܿܣ ܢܵܨܘܿܒ̣ܵܗ̇. ܕܬܲܪ̈ܥܹܝܗ̇ ܕܲܫܝܘܿܠ ܘܲܛܪ̈ܘܿܢܹܝܗ̇. ܠܵܐ ܚܵܣ̇ܢܝܼܢ ܠܵܗ̇ ܠܕܼܵܪܕܵܪ̈ܝܼܢ. ܐܲܫܲܪ ܠܵܗ̇ ܡܸܠܬܼܵܟܼ ܦܵܪܘܿܩܲܢ. ܕܐܲܢ݇ܬ̇ܘܼ ܡܲܠܟܵܗ̇. ܘܲܡܕܲܒܿܪܵܢܵܐ ܕܝܲܠܕܹܿܝ̈ܗ̇. ܘܫܘܼܒ̣ܗܵܪܵܐ ܕܥܵܡܘܿܪܹ̈ܝܗ̇.
ܩܸܪܝܵܢܵܐ. ܐ؛ܡܲܠܟܹ̈ܐ؛ ܘ؛ 1‐20 ܚܲܒ̣ܪܹܗ. ܚܹܙܲܩܝܵܐ؛ ܡܓ؛ 1‐7. ܐܲܩܸܦ؛ ܡܕ؛ 1‐6
ܫܘܼܪܵܝܵܐ. ܢܸܥܘܿܠ ܠܡܲܫܟܿܢܹܗ ܘܢܸܣܓܿܘܿܕܼ ܠܟܼܘܼܒܼܫܵܐ ܕܪܸ̈ܓܼܠܵܘܗܝ* ܩܘܼܡ ܡܵܪܝܵܐ ܠܲܢܝܵܚܬܵܟܼ* ܐܲܢ݇ܬ̇ ܘܩܹܒ̣ܘܿܬܼܵܐ ܕܥܘܼܫܢܵܟܼ* ܟܵܗܢܲܝ̈ܟ ܢܸܠܒܿܫܘܼܢ ܙܲܕܿܝܼܩܘܼܬܼܵܐ ܘܙܲܕܿܝܼܩܲܝ̈ܟ ܫܘܼܒ̣ܚܵܐ* ܡܸܛܠ ܕܵܘܝܼܕܼ ܥܲܒ̣ܕܵܟܼ ܠܵܐ ܬܲܗܦܸܟܼ ܐܲܦܵܘ̈ܗܝ ܕܲܡܫܝܼܚܵܟܼ* ܝܑܼܡ̣ܵܐ ܡܵܪܝܵܐ ܠܕܼܵܘܝܼܕܼ ܒܲܫܪܵܪܵܐ ܘܠܵܐ ܢܸܗܦܘܿܟܼ ܡܸܢܹܗ* ܕܡ̣ܢ ܦܹܐܪ̈ܲܝ ܟܲܪܣܵܟܼ ܐܵܘܬܸ̇ܒܼ ܥܲܠ ܟܘܼܪܣܝܵܟܼ*
ܫܠܝܼܚܵܐ؛ ܥܸܒܼܪ̈ܵܝܹܐ؛ ܛ؛ 16‐ܫܘܼܠܵܡܵܐ.
ܙܘܼܡܵܪܵܐ؛ ܫܘܼܚܠܵܦ ܛܘܼܒܲܝܗܘܿܢ. ܫܡܲܥܝ ܒܪܲܬܼܝ ܘܲܚܙܵܝ ܘܲܨܠܵܝ ܐܸܕܼܢܹܟܼܝ. ܘܲܛܥܵܝ ܥܲܡܹܟܼܝ ܘܒܹܝܬܼ ܐܲܒܼܘܼܟܼܝ. ܕܢܸܬܼܪܲܓ̣ܪܲܓ̣ ܡܲܠܟܵܐ ܠܫܘܼܦܪܹܟܼܝ. ܓ܀ ܟܠܹܗ ܫܘܼܒ̣ܚܵܗ̇ ܕܒܲܪ݇ܬ̣ ܡܲܠܟܵܐ ܡ̣ܢ ܠܓܼܵܘ. ܘܲܡܨܲܒܲܬܼ ܠܒ̣ܘܼܫܵܗ̇ ܒܕܲܗܒ̣ܵܐ ܛܵܒ̣ܵܐ. ܒܩܘܼܪ̈ܒܵܢܹܐ ܬܹܐܙܲܠ ܠܡܲܠܟܵܐ. ܘܢܵܘܒ̇ܠܘܼܢ ܒܬܼܘܼ̈ܠܵܬܼܵܐ ܚܲܒ̣ܪ̈ܵܬܼܵܗ̇ ܒܵܬܼܪܵܗ̇. ܕ܀
ܐܹܘܲܢܓܲܠܝܼܘܿܢ؛ ܡܲܬܲܝ؛ ܟܒ؛ 41‐ܟܓ؛ 23
ܕܐ݇ܪ̈ܵܙܹܐ؛ ܒܫܘܼܪܵܝ ܙܵܥܲܬ݀ ܐܲܪܥܵܐ. ܕܲܒܲܪ ܐܸܢܘܿܢ ܠܲܠܡܹܐܢܵܐ ܕܲܨܒ̣ܵܘ؛ ܙܡܲܪܘ ܠܡܵܪܝܵܐ ܒܟܸܢܵܪܹ̈ܐ ܘܲܒܼܩܵܠܵܐ ܕܲܙܡܵܪܵܐ. ܕܨܘܼܪܬܵܐ. ܥܕܲܡܵܐ ܠܗܵܪܟܵܐ ܣܵܘܦܵܗ̇ ܕܡܸܠܬܼܵܐ. ܠܲܠܡܹܐܢܵܐ ܕܐ݇ܪ̈ܵܙܹܐ ܠܵܐ ܡܸܬܼܡܲܠܠܵܢܹ̈ܐ. ܡܲܢܲܥ̣ܢ ܕܢܸܣܲܒ̣. ܘܢܸܫܬ̇ܘܸܐ ܟܠܲܢ ܕܲܢܫܝܼܓܼ ܨܵܐܘܼܬܼܵܐ ܡ̣ܢ ܢܲܦ̮ܫܲܢ. ܘܢܸܩܪܘܿܒ̣ ܠܕܸܒܼܚܵܐ ܕܲܟܼܝܵܐ ܕܠܵܐ ܡܘܼܡܵܐ. ܘܢܹܐܪܲܬܼ ܚܲܝܹ̈ܐ ܕܲܠܥܵܠܲܡ ܕܠܵܐ ܡܵܝ̇ܬܿܝܼܢ. ܐܲܝܟܼ ܕܐܸܫܬܵܘܕܿܝܼ ܡܫܝܼܚܵܐ ܡܲܠܟܲܢ ܠܪ̈ܵܚܡܵܘܗܝ. ܘܲܢܩܲܒܸ̇ܠ ܐܲܦܵܘ̈ܗܝ ܕܐܲܠܵܗܲܢ ܒܗܘܼ̈ܠܵܠܹܐ ܕܬܼܵܘܕܿܝܼܬܼܵܐ. ܘܥܲܡ ܐܲܠܦܹ̈ܐ ܕܲܟܼܪ̈ܘܿܒܹܐ ܘܪܸ̈ܒܿܘܵܬܼܵܐ ܕܲܣܪ̈ܵܦܹܐ ܫܲܘܝܵܐܝܼܬܼ ܢܹܐܡܲܪ. ܩܲܕܿܝܼܫ ܩܲܕܿܝܼܫ ܩܲܕܝܼܫܲܬ̇. ܡܲܠܟܵܐ ܓܲܐܝܵܐ ܕܬܸܫܒ̇ܘܿܚܬܵܐ ܪܲܚܸܡ ܥܠܲܝܢ؛ ܬܢܝܼ؛ ܫܲܒܲܚ. ܒܲܡܫܝܼܚܵܐ ܐܸܬܼܝܼܠܸܕܼ. ܠܥܹܕܿܬܵܟܼ ܦܵܪܘܿܩܲܢ ܩܲܕܸ̇ܫ ܒܲܚܢܵܢܵܟܼ. ܘܐܲܫܪܵܐ ܛܲܝܒ̇ܘܼܬܼܵܟܼ ܒܗܲܝܟ̇ܠܵܐ ܕܲܦܪܝܼܫ ܠܐܝܼܩܵܪܵܟܼ. ܘܲܬܼܪܘܿܨ ܒܓܵܘܹܗ ܡܲܕܼܒܿܚܵܟܼ ܙܲܗܝܵܐ. ܕܲܥܠܵܘܗܝ ܡܸܙܕܲܝܲܚ. ܦܲܓ̣ܪܵܟܼ ܘܲܕܼܡܵܟܼ ܡܵܪܝܵܐ.
ܕܒܹܝܡ؛ ܥܘܼܢܵܝܵܐ. ܒܩܵܠ ܠܐ݇ܪ̈ܵܙܹܐ ܫܒܼܝܼܚܹ̈ܐ. ܪܲܒܵܐ ܗ݇ܝܼ ܡܵܪܲܢ ܡܵܘܗܲܒܼܬܼܵܟܼ ܕܨܹܝܕܼ ܡܵܝܘܿܬܹ̈ܐ. ܕܫܵܘܬܸ̇ܦܬܵܝܗܝ ܠܓܸܢܣܲܢ ܒܐ݇ܪܵܙܵܐ ܕܲܟܼܣܸܐ ܒܹܗ ܣܲܡ ܚܲܝܹ̈ܐ. ܘܠܲܐܒ̇ܝܼܕܼܘܼܬܲܢ ܒܛܲܝܒܿܘܼܬܼܵܟܼ ܚܵܣ̣ܬ̇ ܘܟܲܢܸܫܬܵܗ̇ ܡ̣ܢ ܛܘܼܥܝܲܝ܀ ܘܥܲܠܗܵܕܼ ܥܹܕܿܬܵܐ ܒܟܸܢܫܹ̈ܝܗ̇. ܩܵܠ ܬܸܫܒ̇ܘܿܚܬܵܐ ܗܵܐ ܪܵܥ̇ܡܵܐ. ܒܥܘܼܗܕܵܢ ܦܸܪܢܝܼܬܼܵܐ ܕܝܲܗ̣݇ܒ̣ ܠܵܗ̇ ܒܲܪ ܡܲܠܟܵܐ ܒܚܘܼܒܹ̇ܗ. ܟܵܗܢܹ̈ܐ ܕܹܝܢ ܥܲܡ ܡܲܠܲܐܟܹ̈ܐ ܡܙܲܝܚܝܼܢ ܠܪܲܗܒܼܘܿܢ ܚܲܝܹ̈ܐ.
ܒܵܬܹ̈ܐ؛ ܟܠܝܼܠ ܙܵܟܼܘܼܬܼܵܐ ܝܲܗ̣݇ܒܼ ܠܵܗ̇ ܠܥܹܕܿܬܹܿܗ. ܡ̣ܢ ܟܠ ܦܘܼܡܝܼ̈ܢ ܫܘܼܒ̣ܚܵܐ ܠܲܫܡܹܗ܀ ܘܥܲܠ ܗܵܕܼ ܥܹܕܿܬܵܐ...܀