ܚܲܕܼܒܫܲܒܵܐ ܕܚܲܡܫܵܐ ܕܨܵܘܡܵܐ
ܒܪܝܼܬܵܐ؛ ܝܘ؛ 1‐ ܝܙ؛ ܠܫܘܼܠܵܡܵܐ
ܬܸܒ̣ܘ ܘܲܫܠܵܘ ܒܪܝܼܬܵܐ ܣܸܦܪܵܐ ܩܲܕܡܵܝܵܐ ܕܐܘܿܪܵܝܬܵܐ؛
ܐܲܚܲܝ̈ ܒܲܪܸܟ̣ܡܵܪܝ܀
ܘܣܲܪܲܝ ܒܲܟ̣ܬܹܗ ܕܐܲܒ̣ܪܵܡ ܠܹܐ ܗ݇ܘܵܐ ܗܵܨܘܿܠܹܐ؛ ܘܐܝܼܬ ܗ݇ܘܵܐ ܠܵܗ̇ ܚܕܵܐ ܚܸܕܲܡܬܵܐ ܡܸܨܪܵܝܬܵܐ ܫܸܡܵܗ̇ ܗܵܓܲܪ.܀ ܘܐ݇ܡܸܪܵܗ̇ ܣܲܪܲܝ ܩܵܐ ܐܲܒ̣ܪܵܡ ܗܵܐ ܡܵܪܝܵܐ ܡܘܼܟܠܸܝܲܢܹܗ ܡ̣ܢ ܗܵܨܲܠܬܵܐ؛ ܥܒ̣ܘܿܪ ܥܲܠ ܚܸܕܲܡܬܝܼ؛ ܒܲܠܟܵܐ ܫܵܩܠܵܢܝ ܠܸܒܵܐ ܡܸܢܵܗ̇؛ ܘܫܡܝܼܥܠܹܗ ܐܲܒ̣ܪܵܡ ܒܩܵܠܵܗ̇ ܕܣܲܪܲܝ.܀ ܘܠܘܼܒܸܠܵܗ̇ ܣܲܪܲܝ ܒܲܟ̣ܬܹܗ ܕܐܲܒ̣ܪܵܡ ܠܗܵܓܲܪ ܡܸܨܪܵܝܬܵܐ ܚܸܕܲܡܬܵܗ̇؛ ܡ̣ܢ ܒܵܬ݇ܪ ܥܸܣܪܵܐ ܫܸܢܹ̈ܐ ܕܝ݇ܬܸܒ̣ܠܹܗ ܐܲܒ̣ܪܵܡ ܒܐܲܪܥܵܐ ܕܟܢܲܥܢ؛ ܘܝܘܼܗ݇ܒ̣ܵܗ̇ ܠܵܗ̇ ܒܲܟ̣ܬܵܐ ܩܵܐ ܐܲܒ̣ܪܵܡ ܓܲܒ̣ܪܵܗ̇.܀ ܘܥܒ̣ܸܪܹܗ ܥܲܠ ܗܵܓܲܪ ܘܒܛܸܢܵܗ̇؛ ܘܟܲܕ ܚܙܹܐܠܵܗ̇ ܕܒܸܛܸܢܵܗ̇؛ ܩܘܼܠܩܸܠܵܗ̇ ܡܵܪܬܵܗ̇ ܒܥܲܝܢܵܗ̇.܀ ܘܐ݇ܡܸܪܵܗ̇ ܣܲܪܲܝ ܠܐܲܒ̣ܪܵܡ ܙܠܘܼܡܝܝܼ ܥܲܠܘܼܟܼ؛ ܐܵܢܵܐ ܝܘܼܗ݇ܒ̣ܸܠܝܼ ܚܸܕܲܡܬܝܼ ܒܥܘܼܒܘܼܟܼ؛ ܘܟܲܕ ܚܙܹܐܠܵܗ̇ ܕܒܛܸܢܵܗ̇؛ ܩܘܼܠܩܸܠܝܼ ܒܥܲܝܢ̈ܵܗ̇؛ ܕܵܐܹܢ ܡܵܪܝܵܐ ܒܹܝܠܝܼ ܘܐܸܠܘܼܟܼ.܀ ܘܐ݇ܡܸܪܹܗ ܐܲܒ̣ܪܵܡ ܠܣܲܪܲܝ ܒܲܟ̣ܬܹܗ؛ ܗܵܐ ܚܸܕܲܡܬܵܟ̣ܝ ܣܘܼܦܝܼܬܵܐ ܒܐܝܼܕܵܟ̣ܝ؛ ܥܒ̣ܘܿܕܝ ܥܲܠܵܗ̇ ܡܸܢܕܝܼ ܕܫܵܦܸܪ ܒܥܲܝ̈ܢܵܟ̣ܝ؛ ܘܨܘܼܥܪܵܗ̇ ܠܵܗ̇ ܣܲܪܲܝ ܡܵܪܬܵܗ̇؛ ܘܥܪܸܩܠܵܗ̇ ܡ̣ܢ ܩܵܕ݇ܡܵܗ̇.܀ ܘܡܘܼܫ݇ܟ̰ܚܵܐ ܠܹܗ ܡܲܠܲܐܟ̣ܹܗ ܕܡܵܪܝܵܐ ܥܲܠ ܥܲܝܢܵܐ ܕܡܝܼܵܐ؛ ܓܵܘ ܒܲܪܝܼܵܐ ܒܐܘܼܪܚܵܐ ܕܓܵܪܸܪ.܀ ܘܐ݇ܡܸܪܹܗ ܐܸܠܵܗ̇؛ ܗܵܓܲܪ ܚܸܕܲܡܬܵܐ ܕܣܲܪܲܝ؛ ܡܐܲܝܟܵܐ ܒܹܐܬܵܝܵܐ ܝ݇ܘܲܬ̇ܝ؛ ܘܠܐܲܝܟܵܐ ܒܹܐܙܵܠܵܐ ܝ݇ܘܲܬ̇ܝ؟܀ ܘܐ݇ܡܸܪܵܗ̇ ܡ̣ܢ ܩܵܕ݇ܡ ܣܲܪܲܝ ܡܵܪܬܝܼ ܒܸܥܪܵܩܵܐ ܝ݇ܘܲܢܝ.܀ ܘܐ݇ܡܸܪܹܗ ܐܸܠܵܗ̇ ܡܲܠܲܐܟ̣ܹܗ ܕܡܵܪܝܵܐ؛ ܕܘܿܪܝ ܠܟܸܣ ܡܵܪܬܵܟ̣ܝ ܘܗܘܲܝ ܙܲܒܛ ܬܚܘܿܬ ܐܝܼܕܵܗ̇. ܘܐ݇ܡܸܪܹܗ ܐܸܠܵܗ̇ ܡܲܠܲܐܟ̣ܹܗ ܕܡܵܪܝܵܐ ܡܲܙܝܘܼܕܹܐ ܒܸܬ ܡܲܙܝܸܕܸܢ ܙܲܪܥܵܟ̣ܝ؛ ܘܠܹܐ ܦܵܐܹܫ ܡܸܢܝܵܐ ܡ̣ܢ ܒܘܼܫܵܝܘܼܬܹܗ.܀ ܘܐ݇ܡܸܪܹܗ ܐܸܠܵܗ̇ ܡܲܠܲܐܟ̣ܹܗ ܕܡܵܪܝܵܐ؛ ܗܵܐ ܒܛܸܢܬܵܐ ܝ݇ܘܲܬ̇ܝ ܘܒܸܬ ܗܲܨܠܵܬ̇ܝ ܒܪܘܿܢܵܐ؛ ܘܩܵܪܝܵܬ̇ܝ ܫܸܡܹܗ ܐܝܼܫܡܲܥܹܝܠ؛ ܣܵܒܵܒ ܫܡܝܼܥܠܹܗ ܡܵܪܝܵܐ ܙܠܘܼܡܝܵܟ̣ܝ.܀ ܘܗ̇ܘ ܒܸܬ ܗܵܘܹܐ ܚܡܵܪܵܐ ܟܹܘܝܼ ܕܒܢܲܝ̈ ܐ݇ܢܵܫܵܐ؛ ܐܝܼܕܹܗ ܥܲܠ ܟܠ؛ ܘܐܝܼܕܵܐ ܕܟܠ ܒܝܼܹܗ؛ ܘܥܲܠ ܬܸܚܘܼܒ ܕܟܠܲܝܗܝ ܐܵܚܘܿܢܘܵܬ̈ܘܼܗܝ ܒܸܬ ܫܵܪܹܐ܀ ܘܩܪܹܐܠܵܗ̇ ܫܸܡܹܗ ܕܡܵܪܝܵܐ ܕܗܘܼܡܙܸܡܠܹܗ ܥܲܡܵܗ̇ ܘܐ݇ܡܸܪܵܗ̇ ܐܲܢ݇ܬ̇ ܝܼܘܸܬ̇ ܐܲܠܵܗܵܐ ܒܚܸܙܘܵܐ؛ ܣܵܒܵܒ ܕܐ݇ܡܸܪܵܗ̇؛ ܘܗܵܐ ܐܘܼܦ ܚܸܙܘܵܐ ܚܙܹܐܠܝܼ ܡ̣ܢ ܒܵܬ݇ܪ ܕܚܸܙܝܲܢܹܗ.܀ ܒܘܼܬ ܕܐܵܗܵܐ؛ ܩܪܹܐܠܵܗ̇ ܠܗ̇ܝ ܒܹܐܪܵܐ؛ ܒܹܐܪܵܐ ܕܚܲܝܵܐ ܚܙܵܢܝ ܘܗܵܐ ܕܘܼ ܝ݇ܠܵܗ̇ ܒܹܝܠ ܪܩܸܡ ܘܒܹܝܠ ܓܵܕܵܪ.܀ ܘܗܘܼܨܸܠܵܗ̇ ܗܵܓܲܪ ܠܐܲܒ̣ܪܵܡ ܒܪܘܿܢܵܐ؛ ܘܩܪܹܐܠܹܗ ܐܲܒ̣ܪܵܡ ܫܸܡܵܐ ܕܒܪܘܿܢܹܗ ܕܗܘܼܨܸܠܵܗ̇ ܐܸܠܹܗ ܗܵܓܲܪ ܐܝܼܫܡܲܥܹܝܠ؛ ܘܐܲܒ̣ܪܵܡ ܒܲܪ ܬܡܵܢܐܝܼ ܘܐܸܫܬܵܐ ܫܸܢܹ̈ܐ؛ ܐܝܼܡܲܢ ܕܗܘܼܨܸܠܵܗ̇ ܗܵܓܲܪ ܐܝܼܫܡܲܥܹܝܠ ܠܐܲܒ̣ܪܵܡ܀
ܗ݇ܘܹܐܠܹܗ ܐܲܒ̣ܪܵܡ ܒܲܪ ܐܸܬܫܥܝܼ ܘܐܸܬܫܲܥ ܫܸܢܹ̈ܐ ܘܦܸܫܠܹܗ ܓܸܠܝܵܐ ܡܵܪܝܵܐ ܩܵܐ ܐܲܒ̣ܪܵܡ ܘܐ݇ܡܸܪܹܗ ܐܸܠܹܗ؛ ܐܵܢܵܐ ܝ݇ܘܸܢ ܐܸܠܫܲܕܲܝ ܐܲܠܵܗܵܐ. ܫܦܘܿܪ ܩܵܕ݇ܡܝܼ ܘܗܘܝܼ ܕܠܵܐ ܠܲܟܵܐ.܀ ܘܒܸܬ ܝܵܗ݇ܒ̣ܸܢ ܩܵܘܠܝܼ ܒܹܝܠܝܼ ܘܐܸܠܘܼܟܼ؛ ܘܒܸܬ ܡܲܙܝܸܕܢܘܼܟܼ ܪܵܒܵܐ ܪܵܒܵܐ.܀ ܘܢܦܸܠܹܗ ܐܲܒ̣ܪܵܡ ܥܲܠ ܦܵܬܹܗ؛ ܘܗܘܼܡܙܸܡܠܹܗ ܐܲܠܵܗܵܐ ܥܲܡܹܗ ܘܐ݇ܡܸܪܹܗ؛ ܗܵܐ ܡܲܩܘܼܡܹܐ ܝ݇ܘܸܢ ܩܵܘܠܝܼ ܥܲܡܘܼܟܼ؛ ܘܒܸܬ ܗܵܘܸܬ̇ ܒܵܒܵܐ ܠܪܵܒܵܐ ܛܵܝܸܦܹ̈ܐ.܀ ܘܠܵܐ ܦܵܐܹܫ ܩܸܪܝܵܐ ܡܸܕܪܹܐ ܫܸܡܘܼܟܼ ܐܲܒ̣ܪܵܡ. ܐܝܼܢܵܐ ܗܵܘܹܐ ܫܸܡܘܼܟܼ ܐܲܒ̣ܪܵܗܵܡ؛ ܣܵܒܵܒ ܒܵܒܵܐ ܠܒܘܼܫܵܝܘܼܬܵܐ ܕܛܵܝܸܦܹ̈ܐ ܝܘܼܗ݇ܒ̣ܸܠܝܼ ܐܸܠܘܼܟܼ.܀ ܘܡܲܦܪܸܢܘܼܟܼ ܘܡܲܙܝܸܕܸܢܘܼܟܼ ܪܵܒܵܐ ܪܵܒܵܐ. ܘܒܝܵܗ݇ܒ̣ܸܢܘܼܟܼ ܠܛܵܝܸܦܹ̈ܐ؛ ܘܡܲܠܟܹ̈ܐ ܡ̣ܢ ܚܵܨܘܼܟܼ ܒܸܬ ܦܵܠܛܝܼ.܀ ܘܒܸܬ ܬܲܡܸܡܸܢ ܩܵܘܠܝܼ ܒܹܝܠܝܼ ܘܒܹܝܠܘܼܟܼ؛ ܘܥܲܡ ܙܲܪܥܘܼܟܼ ܕܡ̣ܢ ܒܵܬ݇ܪܘܼܟܼ ܠܕܵܘܪ̈ܲܝܗܝ ܩܵܘܠܵܐ ܕܠܥܵܠܲܡ؛ ܘܒܸܬ ܗܵܘܸܢ ܩܵܬܘܼܟܼ ܐܲܠܵܗܵܐ ܘܩܵܐ ܙܲܪܥܘܼܟܼ ܕܡ̣ܢ ܒܵܬ݇ܪܘܼܟܼ.܀ ܘܒܸܬ ܝܵܗ݇ܒ̣ܸܢܘܼܟܼ ܘܩܵܐ ܙܲܪܥܘܼܟܼ ܕܡ̣ܢ ܒܵܬ݇ܪܘܼܟܼ ܐܲܪܥܵܐ ܕܡܲܥܸܡܪܘܼܟܼ؛ ܟܠܵܗ̇ ܐܲܪܥܵܐ ܕܟܢܲܥܢ ܝܵܪܬܘܼܬܵܐ ܠܥܵܠܲܡ؛ ܘܒܸܬ ܗܵܘܸܢ ܩܵܬܲܝܗܝ ܐܲܠܵܗܵܐ.܀ ܘܐ݇ܡܸܪܹܗ ܐܲܠܵܗܵܐ ܩܵܐ ܐܲܒ̣ܪܵܗܵܡ؛ ܐܲܢ݇ܬ̇ ܩܵܘܠܝܼ ܢܛܘܿܪ؛ ܐܲܢ݇ܬ̇ ܘܙܲܪܥܘܼܟܼ ܕܡ̣ܢ ܒܵܬ݇ܪܘܼܟܼ ܠܕܵܪ̈ܲܝܗܝ.܀ ܐܵܗܵܐ ܝ݇ܠܹܗ ܩܵܘܠܝܼ ܕܢܵܛܪܝܼܬܘܼܢ ܒܹܝܠܝܼ ܘܐܸܠܵܘܟ̣ܘܿܢ؛ ܘܒܹܝܠ ܙܲܪܥܘܼܟܼ ܕܡ̣ܢ ܒܵܬ݇ܪܘܼܟܼ؛ ܕܓܵܙܪܝܼܬܘܿܢ ܟܠ ܐܘܼܪܙܵܐ.܀ ܘܓܵܙܪܝܼܬܘܼܢ ܒܸܣܪܵܐ ܕܥܘܼܪܠܘܼܬܵܘܟ̣ܘܿܢ؛ ܘܗܵܘܝܵܐ ܢܝܼܫܲܢܩܵܐ ܕܩܵܘܠܵܐ ܒܹܝܠܝܼ ܘܐܸܠܵܘܟ̣ܘܿܢ.܀ ܘܒܲܪ ܬܡܵܢܝܵܐ ܝܵܘܡܵܢܹ̈ܐ ܦܵܐܹܫ ܓܙܝܼܪܵܐ ܡܸܢܵܘܟ̣ܘܿܢ ܟܠ ܐܘܼܪܙܵܐ ܠܕܵܘܪܵܘܟ̣ܘܿܢ؛ ܝ݇ܠܝܼܕܵܐ ܕܒܲܝܬܵܐ؛ ܘܙܒ̣ܝܼܢܵܐ ܒܙܘܼܙܹ̈ܐ؛ ܡ̣ܢ ܟܠ ܢܘܼܟ̣ܪܵܝܵܐ ܕܠܹܐ ܝ݇ܠܹܗ ܡ̣ܢ ܙܲܪܥܘܼܟܼ.܀ ܓܙܵܪܵܐ ܦܵܐܹܫ ܓܙܝܼܪܵܐ ܝ݇ܠܝܼܕܵܐ ܕܒܲܝܬܘܼܟܼ ܘܙܒ̣ܝܼܢܵܐ ܕܙܘܼܙ̈ܘܼܟܼ. ܘܗܵܘܹܐ ܩܵܘܠܝܼ ܒܒܸܣܪܵܘܟ̣ܘܿܢ ܩܵܘܠܵܐ ܠܥܵܠܲܡ.܀ ܘܥܘܼܪܠܵܐ ܐܘܼܪܙܵܐ ܕܠܵܐ ܓܵܙܸܪ ܒܸܣܪܵܐ ܕܥܘܼܪܠܘܼܬܹܗ؛ ܬܵܠܩܵܐ ܗ̇ܝ ܓܵܢܵܐ ܡ̣ܢ ܛܲܝܸܦܵܗ̇؛ ܣܵܒܵܒ ܩܵܘܠܝܼ ܒܘܼܛܸܠܵܗ̇.܀ ܘܐ݇ܡܸܪܹܗ ܐܲܠܵܗܵܐ ܩܵܐ ܐܲܒ̣ܪܵܗܵܡ؛ ܣܲܪܲܝ ܒܲܟ̣ܬܘܼܟܼ ܠܵܐ ܩܵܪܸܬ̇ ܫܸܡܘܿܗ̇ ܣܲܪܲܝ؛ ܣܵܒܵܒ ܕܣܲܪܵܐ ܝ݇ܠܹܗ ܫܸܡܘܿܗ̇.܀ ܘܒܸܬ ܒܲܪܟ̣ܸܢܵܗ̇ ܘܐܘܼܦ ܒܪܘܿܢܵܐ ܒܸܬ ܝܵܗ݇ܒ̣ܸܢܘܼܟܼ ܡܸܢܵܗ̇؛ ܘܒܸܬ ܒܲܪܟ̣ܸܢܹܗ ܘܒܗܵܘܹܐ ܠܛܵܝܸܦܹ̈ܐ؛ ܘܡܲܠܟܹ̈ܐ ܕܛܵܝܸܦܹ̈ܐ ܡܸܢܹܗ ܒܸܬ ܗܵܘܝܼ. ܘܢܦܸܠܹܗ ܐܲܒ̣ܪܵܗܵܡ ܥܲܠ ܦܵܬܹܗ ܘܓܚܸܟܠܹܗ؛ ܘܐ݇ܡܸܪܹܗ ܒܠܸܒܹܗ؛ ܩܵܐ ܒܲܪ ܐܸܡܵܐܐ ܫܸܢܹ̈ܐ ܦܵܐܹܫ ܝ݇ܠܝܼܕܵܐ ܒܪܘܿܢܵܐ؟ ܝܲܢ ܣܲܪܵܐ ܒܲܬ݇ܪ ܐܸܬܫܥܝܼ ܫܸܢܹ̈ܐ ܒܗܲܨܠܵܐ؟ ܘܐ݇ܡܸܪܹܗ ܐܲܒ̣ܪܵܗܵܡ ܩܵܐ ܐܲܠܵܗܵܐ؛ ܩܵܒܸܠ ܐܸܢ ܐܝܼܫܡܵܥܹܝܠ ܚܲܝܹܐ ܩܵܕ݇ܡܘܼܟܼ.܀ ܘܐ݇ܡܸܪܹܗ ܐܲܠܵܗܵܐ ܩܵܐ ܐܲܒ̣ܪܵܗܵܡ؛ ܒܫܲܪܝܼܪܘܼܬܵܐ ܣܲܪܵܐ ܒܲܟ̣ܬܘܼܟܼ ܒܸܬ ܗܲܨܠܵܐ ܠܘܼܟܼ ܒܪܘܿܢܵܐ؛ ܘܒܸܬ ܩܵܪܸܬ̇ ܫܸܡܹܗ ܐܝܼܣܚܵܩ؛ ܘܒܸܬ ܡܲܩܸܡܸܢ ܩܵܘܠܝܼ ܥܲܡܹܗ ܩܵܘܠܵܐ ܠܥܵܠܲܡ؛ ܘܩܵܐ ܙܲܪܥܹܗ ܕܡ̣ܢ ܒܵܬ݇ܪܹܗ.܀ ܘܥܲܠ ܐܝܼܫܡܵܥܹܝܠ ܫܡܝܼܥܠܝܼ ܐܸܠܘܼܟܼ؛ ܒܘܼܪܸܟ̣ܠܝܼ ܘܡܘܼܙܝܸܕܠܝܼ؛ ܘܓܘܼܪܘܸܣܠܝܼ ܪܵܒܵܐ ܪܵܒܵܐ. ܬܪܸܥܣܲܪ ܓܘܼܪ̈ܵܢܹܐ ܒܸܬ ܗܵܨܸܠ؛ ܘܒܸܬ ܝܵܗ݇ܒ̣ܸܢܹܗ ܠܥܲܡܵܐ ܓܘܼܪܵܐ.܀ ܘܩܵܘܠܝܼ ܒܸܬ ܡܲܩܸܡܸܢ ܥܲܡ ܐܝܼܣܚܵܩ ܕܗܲܨܠܵܠܘܼܟܼ ܣܲܪܵܐ ܒܐܵܗܵܐ ܙܲܒ̣ܢܵܐ ܫܹܢ݇ܬܵܐ ܐ݇ܚܹܪ݇ܬܵܐ.܀ ܘܟܲܕ ܬܘܼܡܸܡܠܹܗ ܠܗܲܡܙܘܼܡܹܐ ܥܲܡܹܗ؛ ܦܸܫܠܹܗ ܪܝܼܡܵܐ ܐܲܠܵܗܵܐ ܡ̣ܢ ܠܟܸܣ ܐܲܒ̣ܪܵܗܵܡ.܀ ܘܢܘܼܒܸܠܹܗ ܐܲܒ̣ܪܵܗܵܡ ܠܒܪܘܿܢܹܗ ܐܝܼܫܡܵܥܹܝܠ؛ ܘܟܠܲܝܗܝ ܗܘܼܨܠܹ̈ܐ ܕܒܲܝܬܹܗ ܘܙܒ̣ܝܼܢܹ̈ܐ ܒܙܘܼܙܹ̈ܗ؛ ܟܠ ܐܘܼܪܙܵܐ ܒܐ݇ܢܵܫܹܐ ܕܒܹܝܬ̣ ܐܲܒ̣ܪܵܗܵܡ؛ ܘܓܙܸܪܹܗ ܒܸܣܪܵܐ ܕܥܘܼܪܠܘܼܬܲܝܗܝ ܒܐܵܗܵܐ ܝܵܘܡܵܐ؛ ܐܲܝܟܼ ܕܗܘܼܡܙܸܡܠܹܗ ܥܲܡܹܗ ܐܲܠܵܗܵܐ.܀ ܘܐܲܒ̣ܪܵܗܵܡ ܒܲܪ ܐܬܸܫܥܝܼ ܘܐܸܬܫܥܵܐ ܫܸܢܹ̈ܐ ܗ݇ܘܵܐ ܟܲܕ ܓܙܸܪܹܗ ܒܸܣܪܵܐ ܕܥܘܼܪܠܘܼܬܹܗ.܀ ܘܐܝܼܫܡܵܥܹܝܠ ܒܪܘܿܢܹܗ ܒܲܪ ܬܸܠܬܲܥܣܲܪ ܫܸܢܹ̈ܐ ܗ݇ܘܵܐ ܟܕ ܓܙܸܪܹܗ ܒܸܣܪܵܐ ܕܥܘܼܪܠܘܼܬܹܗ.܀ ܗܲܪ ܒܐܵܗܵܐ ܝܵܘܡܵܐ ܓܙܸܪܹܗ ܐܲܒ̣ܪܵܗܵܡ ܠܐܝܼܫܡܵܥܹܝܠ ܒܪܘܿܢܹܗ؛ ܘܠܟܠܲܝܗܝ ܐ݇ܢܵܫܹ̈ܐ ܕܒܲܝܬܹܗ؛ ܗܘܼܨܠܹ̈ܐ ܕܒܲܝܬܹܗ ܘܙܒ̣ܝܼܢܹ̈ܐ ܒܙܘܼܙܹ̈ܐ؛ ܘܐܘܼܦ ܡ̣ܢ ܒܢܘܿܢܹ̈ܐ ܕܢܘܼܟ̣ܪ̈ܵܝܹܐ ܓܙܸܪܹܗ ܥܲܡܲܝܗܝ܀
ܚܲܒ̣ܪܹܗ
ܝܼܫܘܿܥ ܒܲܪܢܘܿܢ؛ ܛ؛ 15‐ܫܘܼܠܵܡܵܐ
ܫܠܵܘ ܟܬܵܒ̣ܵܐ ܕܝܼܫܘܿܥ ܒܲܪܢܘܿܢ؛ ܐܲܚܲܝ̈ ܒܲܪܸܟ̣ܡܵܪܝ܀
ܘܥܒ̣ܸܕܠܹܗ ܝܼܫܘܿܥ ܩܵܬܲܝܗܝ ܫܠܵܡܵܐ؛ ܘܝܘܼܗ݇ܒ̣ܸܠܹܗ ܐܸܠܲܝܗܝ ܝܲܡܝܼܢܵܐ ܠܚܲܝܲܝ̈ܗܝ؛ ܘܝ݇ܡܹܐܠܗ݇ܘܿܢ ܐܸܠܲܝܗܝ ܓܘܼܪ̈ܵܢܹܐ ܕܟܢܘܼܫܬܵܐ.܀ ܘܡ̣ܢ ܒܵܬ݇ܪ ܬܠܵܬܵܐ ܝܵܘܡܵܢܹ̈ܐ؛ ܡ̣ܢ ܒܵܬ݇ܪ ܕܝܘܼܗ݇ܒ̣ܸܠܹܗ ܐܸܠܲܝܗܝ ܝܲܡܝܼܢܵܐ؛ ܫܡܝܼܥܠܗ݇ܘܿܢ ܕܩܘܼܪܒܵܐ ܝ݇ܢܵܐ ܐܸܠܲܝܗܝ؛ ܘܓܵܘܲܝܗܝ ܫܸܪܝܹܐ ܝ݇ܢܵܐ.܀ ܡܘܼܛܥܸܢܗ݇ܘܿܢ [ܫܘܼܢܹܐܠܗ݇ܘܿܢ] ܒܢܲܝ̈ ܝܼܣܪܵܝܹܠ ܘܐ݇ܬܹܐܠܗ݇ܘܿܢ ܠܡܵܬܘܵܬܲܝ̈ܗܝ ܒܝܵܘܡܵܐ ܕܬܠܵܬܵܐ؛ ܘܫܸܡܵܢܹ̈ܐ ܕܡܵܬܘ̈ܵܬܲܝܗܝ؛ ܓܸܒ̣ܥܘܿܢ؛ ܟܦܝܼܪܵܐ؛ ܥܝܼܪܘܼܬ؛ ܘܩܘܼܪܝܲܬ ܢܲܥܪ̈ܝܼܢ.܀ ܘܠܵܐ ܩܛܝܼܠܲܝܗܝ ܠܗ݇ܘܿܢ ܒܢܲܝ̈ ܝܼܣܪܵܝܹܠ؛ ܣܵܒܵܒ ܕܝ݇ܡܹܐܠܗ݇ܘܿܢ ܐܸܠܲܝܗܝ ܓܘܼܪ̈ܵܢܹܐ ܕܟܢܘܼܫܬܵܐ ܒܡܵܪܝܵܐ ܐܲܠܵܗܵܐ ܕܝܼܣܪܵܝܹܠ. ܘܛܘܼܪܛܸܡܠܗ݇ܘܿܢ ܘܡܘܼܩܘܸܚܠܗ݇ܘܿܢ ܟܠܵܗ̇ ܟܢܘܼܫܬܵܐ ܥܲܠ ܓܘܼܪ̈ܵܢܹܐ.܀ ܘܐ݇ܡܸܪܗ݇ܘܿܢ ܓܘܼܪ̈ܵܢܹܐ ܕܟܢܘܼܫܬܵܐ؛ ܐܲܚܢܲܢ ܝ݇ܡܹܐܠܲܢ ܐܸܠܲܝܗܝ ܒܡܵܪܝܵܐ ܐܲܠܵܗܵܐ ܕܝܼܣܪܵܝܹܠ؛ ܘܐܵܕܝܼܵܐ ܠܹܐ ܡܵܨܲܚ ܕܚܲܙܕܸܓܲܚܠܗ݇ܘܿܢ؛ ܐܝܼܢܵܐ ܗܵܕܟ̣ܵܐ ܒܸܬ ܥܵܒ̣ܕܲܚ ܘܡܲܚܝܼܲܚܠܗ݇ܘܿܢ؛ ܕܠܵܐ ܗܵܘܹܐ ܥܲܠܲܢ ܟܲܪܒܵܐ؛ ܣܵܒܵܒ ܕܡܵܘܡܵܬܹ̈ܐ ܕܝ݇ܡܹܐܠܲܢ ܐܸܠܲܝܗܝ.܀ ܘܐ݇ܡܸܪܗ݇ܘܿܢ ܓܘܼܪ̈ܵܢܹܐ ܩܵܐ ܒܢܲܝ̈ ܝܼܣܪܵܝܹܠ؛ ܒܸܬ ܚܲܝܝܼ؛ ܘܗܵܘܝܼ ܓ̰ܲܡܸܥܝܵܢܹ̈ܐ ܕܩܲܝܣܹ̈ܐ ܘܡܲܠܝܵܢܹ̈ܐ ܕܡܝܼܵܐ ܩܵܐ ܟܠܵܗ̇ ܟܢܘܼܫܬܵܐ؛ ܘܗ݇ܘܹܐܠܗ݇ܘܿܢ ܓ̰ܲܡܸܥܝܵܢܹ̈ܐ ܕܩܲܝܣܹ̈ܐ ܘܡܲܠܝܵܢܹ̈ܐ ܕܡܝܼܵܐ ܠܟܢܘܼܫܬܹܗ ܕܡܵܪܝܵܐ ܗܲܠ ܐܸܕܝܘܿܡ݇ ܝܵܘܡܵܐ؛ ܐܲܝܟܼ ܕܐ݇ܡܸܪܗ݇ܘܿܢ ܐܸܠܲܝܗܝ ܓܘܼܪ̈ܵܢܹܐ.܀ ܘܩܸܪܝܲܝܗܝ ܠܹܗ ܝܼܫܘܿܥ ܘܐ݇ܡܸܪܹܗ ܐܸܠܲܝܗܝ؛ ܩܵܡܘܿܕܝܼ ܥܒ̣ܸܕܠܵܘܟ̣ܘܿܢ ܦܲܢܕܹ̈ܐ ܐܸܠܝܼ ܘܐ݇ܡܸܪܵܘܟ̣ܘܿܢ ܕܪܵܒܵܐ ܪܸܚܩܵܐ ܝ݇ܘܲܚ ܡܸܢܵܘܟ̣ܘܿܢ؛ ܘܗܵܐ ܠܟܸܣܠܲܢ ܫܸܪ̈ܝܹܐ ܝ݇ܬܘܿܢ؟܀ ܡܐܵܕܝܼܵܐ ܒܸܬ ܗܵܘܝܼܬܘܿܢ ܠܝܼܛܹ̈ܐ؛ ܘܠܹܐ ܦܵܪܸܩ ܡܓܵܘܵܘܟ̣ܘܿܢ ܐ݇ܢܵܫܵܐ ܓ̰ܲܡܸܥܝܵܢܵܐ ܕܩܲܝܣܹ̈ܐ ܘܡܲܠܝܵܢܵܐ ܕܡܝܼܵܐ ܠܒܲܝܬܹܗ ܕܐܲܠܵܗܵܐ.܀ ܓ̰ܘܼܘܸܒܠܗ݇ܘܿܢ ܘܐ݇ܡܸܪܗ݇ܘܿܢ ܠܝܼܫܘܿܥ؛ ܡܛܹܐܠܹܗ ܚܲܒܪܵܐ ܠܪܹ̈ܓܵܘܵܬܘܼܟܼ؛ ܕܡܸܢܕܝܼ ܕܦܘܼܩܸܕܠܹܗ ܡܵܪܝܵܐ ܐܲܠܵܗܘܼܟܼ ܠܡܘܼܫܹܐ ܪܹܓܹܗ؛ ܕܝܵܗ݇ܒ̣ܸܠ ܠܵܘܟ̣ܘܿܢ ܟܠܵܗ̇ ܐܲܪܥܵܐ؛ ܕܬܵܠܸܩ ܠܟܠܲܝܗܝ ܥܵܡܪ̈ܵܢܹܐ ܕܐܲܪܥܵܐ ܡ̣ܢ ܩܵܕ݇ܡܵܘܟ̣ܘܿܢ؛ ܙܕܝܼܥܠܲܢ ܪܵܒܵܐ ܥܲܠ ܓܵܢܲܢ؛ ܘܥܒ̣ܸܕܠܲܢ ܐܵܗܵܐ؛ ܐܝܼܢܵܐ ܐܵܕܝܼܵܐ ܩܵܕ݇ܡ ܐܝܼܕ̈ܘܼܟܼ ܝ݇ܘܲܚ؛ ܡܸܢܕܝܼ ܕܫܵܦܸܪ ܒܥܲܝܢ̈ܘܼܟܼ ܘܥܵܒ̣ܕܸܬ̇ܠܲܢ ܥܒ̣ܘܿܕܠܲܢ.܀ ܘܥܒ̣ܸܕܠܹܗ ܐܸܠܲܝܗܝ ܝܼܫܘܿܥ ܗܵܕܟ̣ܵܐ؛ ܘܦܘܼܨܝܲܝܗܝ ܠܹܗ ܡ̣ܢ ܐܝܼܕܵܐ ܕܝܼܣܪܵܝܹܠ؛ ܘܠܵܐ ܩܛܝܼܠܲܝܗܝ ܠܗ݇ܘܿܢ.܀ ܘܥܒ̣ܝܼܕܲܝܗܝ ܠܹܗ ܝܼܫܘܿܥ ܗܲܪ ܒܗ̇ܘ ܝܵܘܡܵܐ ܓ̰ܲܡܸܥܝܵܢܹ̈ܐ ܕܩܲܝܣܹ̈ܐ؛ ܘܡܲܠܝܵܢܹ̈ܐ ܕܡܝܼܵܐ ܠܟܢܘܼܫܬܵܐ ܘܠܡܲܕܒܚܹܗ ܕܡܵܪܝܵܐ ܗܲܠ ܐܸܕܝܘܿܡ݇ ܝܵܘܡܵܐ؛ ܒܗ̇ܝ ܕܘܼܟܬܵܐ ܕܒܲܣܡܵܐ ܠܹܗ ܡܵܪܝܵܐ.܀
♱♱♱♱♱♱♱♱♱
ܚܕܒܫܒܐ ܕܚܡܫܐ ܕܨܘܡܐ
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܪ̈ܗܘܿܡܵܝܹܐ ܐܲܚܲܝ̈ ܒܲܪܸܟܼܡܵܪܝ܀
ܒܸܛܠܵܒܵܐ ܝ݇ܘܸܢ ܡܸܢܵܘܟܼܘܿܢ ܐܵܚܘܿܢܘܵܬܝܼ̈ ܒܪ̈ܲܚܡܹܐ ܕܐܲܠܵܗܵܐ ܕܡܲܩܸܡܝܼܬܘܿܢ ܦܲܓܼܪܵܘܟܼܘܿܢ ܕܸܒܼܚܵܐ ܚܲܝܵܐ ܘܩܲܕܝܼܫܵܐ ܘܩܘܼܒܠܵܐ ܩܵܕ݇ܡ ܐܲܠܵܗܵܐ ܒܚܸܠܡܲܬ ܡܵܪܹܐ ܦܲܪܡܵܝܬܵܐ* ܘܠܵܐ ܦܵܝܫܝܼܬܘܿܢ ܕܘܼܡܝܹܐ ܠܐܵܗܵܐ ܕܘܼܢܝܹܐ؛ ܐܸܠܵܐ ܦܘܼܫܘܼܢ ܡܘܼܚܠܸܦܹܐ ܒܚܲܕܲܬܬܵܐ ܕܚܝܼܵܠܵܘܟܼܘܿܢ؛ ܘܗܵܘܝܼܬܘܿܢ ܒܸܦܪܵܫܵܐ ܐܲܝܢܝܼ ܝ݇ܠܹܗ ܪܸܙܵܝܹܗ ܕܐܲܠܵܗܵܐ ܛܵܒܼܵܐ ܘܡܲܩܒܘܼܠ ܘܟܵܡܝܼܠ* ܐܝܼܢܵܐ ܒܹܐܡܵܪܵܐ ܝ݇ܘܸܢ ܒܫܵܦܵܩܲܬ ܕܦܸܫܠܵܗ̇ ܝܘܼܗܒܸܠܬܵܐ ܐܸܠܝܼ ܩܵܐ ܟܠܵܘܟܼܘܿܢ؛ ܕܠܵܐ ܗܵܘܝܼܬܘܿܢ ܒܸܚܫܵܒܼܵܐ ܙܵܘܕܵܐ ܡ̣ܢ ܡܸܢܕܝܼ ܕܘܵܓ̰ܸܒ ܝܼܠܵܗ̇ ܕܚܵܫܒܼܝܼܬܘܿܢ. ܐܸܠܵܐ ܗܵܘܝܼܬܘܿܢ ܬܲܚܡܘܼܢܹܐ ܒܐܵܕܵܒܘܼܬܵܐ ܟܠ ܐ݇ܢܵܫܵܐ ܐܲܝܟܼ ܕܦܘܼܠܹܓ݇ܠܹܗ ܩܵܬܹܗ ܐܲܠܵܗܵܐ ܗܲܝܡܵܢܘܼܬܵܐ ܒܟܝܼܘܿܠܵܐ* ܣܵܒܵܒ ܕܵܐܟܼܝܼ ܕܒܚܲܕ݇ ܦܲܓܼܪܵܐ ܪܵܒܵܐ ܗܲܕܵܡܹ̈ܐ ܐܝܼܬ ܠܲܢ؛ ܘܟܠܲܝܗܝ ܗܲܕܵܡܹ̈ܐ ܠܲܝܬ ܠܗ݇ܘܿܢ ܚܲܕ݇ ܦܘܼܠܚܵܢܵܐ* ܗܲܕܟܼܵܐ ܐܘܼܦ ܐܲܚܢܲܢ ܕܪܵܒܵܐ ܝ݇ܘܲܚ. ܚܲܕ݇ ܦܲܓܼܪܵܐ ܝ݇ܘܲܚ ܒܡܫܝܼܚܵܐ ܟܠ ܚܲܕ݇ ܡܸܢܲܢ ܗܲܕܵܡܹ̈ܐ ܝ݇ܘܲܚ ܕܚܲܕ݇ ܕܗ̇ܘ ܐ݇ܚܹܪ݇ܢܵܐ* ܐܝܼܢܵܐ ܐܝܼܬ ܠܲܢ ܚܲܠܥܲܬܹ̈ܐ ܕܬܲܗܵܪܹ̈ܐ ܦܪ̈ܝܼܫܹܐ ܐܲܝܟܼ ܫܵܦܵܩܲܬ ܕܦܸܫܠܵܗ̇ ܝܘܼܗ݇ܒܼܸܠܬܵܐ ܩܵܬܲܢ. ܐܝܼܬ ܕܢܒܼܝܼܘܼܬܵܐ ܐܲܝܟܼ ܟܝܼܘܿܠܵܐ ܕܗܲܝܡܵܢܘܼܬܹܗ* ܘܐܝܼܬ ܕܚܸܠܡܲܬ ܐܝܼܬ ܠܹܗ ܒܚܸܠܡܲܬܹܗ؛ ܘܐܝܼܬ ܕܡܲܠܦܵܢܵܐ ܝ݇ܠܹܗ ܒܝܘܼܠܦܵܢܹܗ* ܘܐܝܼܬ ܕܝܵܗܒܼܵܢܵܐ ܕܠܸܒܵܐ ܝ݇ܠܹܗ ܒܗܲܡܙܲܡܬܹܗ. ܘܕܝܵܗܒܸܠ ܒܨܸܦܝܘܼܬܵܐ. ܘܟܵܠܹܐ ܒܪܹܫܵܐ ܒܚܵܦܵܛܘܼܬܵܐ ܘܥܵܒܼܸܕ ܪ̈ܲܚܡܹܐ ܒܦܨܝܼܚܘܼܬܵܐ* ܠܵܐ ܗܵܘܹܐ ܠܹܐܒܵܢܵܐ ܚܘܼܒܵܘܟܼܘܿܢ. ܐܸܠܵܐ ܗܵܘܝܼܬܘܿܢ ܒܸܣܢܵܝܵܐ ܠܒܝܼܫܵܬܹ̈ܐ ܘܒܸܬܒܲܥܝܵܐ ܠܛܵܒܼܵܬܹ̈ܐ* ܗܵܘܝܼܬܘܿܢ ܡܲܚܘܼܒܹܐ ܚܲܕ݇ ܠܗ̇ܘ ܐ݇ܚܸܪ݇ܢܵܐ ܒܚܘܼܒܵܐ ܕܐܵܚܘܿܢܘܵܬܹ̈ܐ* ܗܵܘܝܼܬܘܿܢ ܩܵܕ݇ܡܵܝܹ̈ܐ ܒܡܝܵܩܲܪܬܵܐ ܕܚܲܕ݇ ܠܗ̇ܘ ܐ݇ܚܹܪ݇ܢܵܐ* ܗܵܘܝܼܬܘܿܢ ܚܲܦܛܵܢܹ̈ܐ ܘܠܵܐ ܬܲܢܒܵܠܹ̈ܐ. ܗܵܘܝܼܬܘܿܢ ܒܸܪܬܵܚܵܐ ܒܪܘܼܚܵܐ* ܗܵܘܝܼܬܘܿܢ ܒܸܦܠܵܚܵܐ ܠܡܵܪܵܘܟܼܘܿܢ؛ ܘܒܸܚܕܵܝܵܐ ܒܗܹܒܼܝܼܵܘܟܼܘܿܢ. ܗܵܘܝܼܬܘܿܢ ܚܲܡܠܵܢܹ̈ܐ ܒܝܲܠܨܘܼܘܵܘܟܼܘܿܢ ܘܗܵܘܝܼܬܘܿܢ ܕܵܝܸܡ ܒܨܠܘܿܬܵܐ* ܗܵܘܝܼܬܘܿܢ ܫܲܪ̈ܝܼܟܹܐ ܠܣܢܝܼܩܘܼܬܵܐ ܕܩܲܕܝܼܫܹ̈ܐ؛ ܘܡܲܚܸܒܵܢܹ̈ܐ ܕܩܲܪ̈ܝܼܒܵܝܹܐ* ܒܵܪܟܼܘܿܢ ܠܟܲܡܪ̈ܵܢܵܘܟܼܘܿܢ ܒܵܪܟܼܘܿܢ ܘܠܵܐ ܠܵܝܛܝܼܬܘܿܢ ܚܕܹܐܡܘܿܢ ܥܲܡ ܕܐܵܢܝܼ ܕܚܵܕܝܼ؛ ܘܒܟܼܹܐܡܘܿܢ ܥܲܡ ܕܐܵܢܝܼ ܕܒܵܟܼܝܼ. ܗ̇ܘ ܡܸܢܕܝܼ ܕܚܵܫܒܼܝܼܬܘܿܢ ܥܲܠ ܓܵܢܵܘܟܼܘܿܢ ܗܵܕܵܐ ܐܘܼܦ ܥܲܠ ܐܵܚܘܿܢܘܵܬܵܘ̈ܟܼܘܿܢ؛ ܘܠܵܐ ܚܵܫܒܼܝܼܬܘܿܢ ܚܝܼܵܠ ܪܵܡܵܐ. ܐܸܠܵܐ ܬܒܸܥܡܘܿܢ ܠܐܵܢܝܼ ܕܝܼܢܵܐ ܡܲܟܝܼܟܹ̈ܐ. ܘܠܵܐ ܗܵܘܝܼܬܘܿܢ ܗܵܘܢܵܢܹ̈ܐ ܫܚܝܼܵܠ ܕܓܵܢܵܘܟܼܘܿܢ* ܘܠܵܐ ܦܵܪܥܝܼܬܘܿܢ ܠܐ݇ܢܵܫܵܐ ܒܝܼܫܬܵܐ ܡ̣ܢ ܓܹܒܵܐ ܕܒܝܼܫܬܵܐ؛ ܐܸܠܵܐ ܗܵܘܹܐ ܠܵܘܟܼܘܿܢ ܚܲܡ ܕܦܵܠܚܝܼܬܘܿܢ ܛܵܒܼܵܬܹ̈ܐ ܩܵܕ݇ܡ ܟܠܲܝܗܝ ܒܢܲܝ̈ܢܵܫܵܐ* ܘܐܸܢ ܡܵܨܝܵܐ ܐܲܝܟܼ ܕܡ̣ܢ ܠܟܸܣܠܵܘܟܼܘܿܢ ܥܲܡ ܟܠ ܒܲܪܢܵܫܵܐ ܫܠܵܡܵܐ ܥܒܼܘܿܕܘܿܢ* ܠܵܐ ܗܵܘܝܼܬܘܿܢ ܒܸܫܩܵܠܵܐ ܬܘܼܥܠܵܐ ܕܓܵܢܵܘܟܼܘܿܢ ܡܘܼܚܸܒܝܼ̈. ܐܸܠܵܐ ܗܲܒܼܠܗ݇ܘܿܢ ܕܘܼܟܬܵܐ ܩܵܐ ܟܲܪܒܵܐ. ܣܵܒܵܒ ܦܝܼܫܬܵܐ ܝ݇ܠܵܗ̇ ܟܬܝܼܒܼܬܵܐ؛ ܕܐܸܢ ܠܵܐ ܥܵܒܼܕܸܬ ܕܝܼܘܿܢ ܩܵܐ ܓܵܢܘܼܟܼ؛ ܐܵܢܵܐ ܒܸܬ ܥܵܒܼܕܸܢ ܕܝܼܘܵܢܘܼܟܼ ܒܹܐܡܵܪܵܐ ܝ݇ܠܹܗ ܐܲܠܵܗܵܐ* ܐܸܢ ܟܦܝܼܢܵܐ ܝ݇ܠܹܗ ܕܸܫܡܸܢܘܼܟܼ ܡܵܐܟܼܸܠܹܗ؛ ܘܐܸܢ ܨܸܦܝܵܐ ܝ݇ܠܹܗ ܡܲܫܬܝܼ ܠܹܗ؛ ܘܐܸܢ ܐܲܢܹܐ ܥܵܒܼܕܸܬ ܐܹܠܹܗ ܓܸܡܘܼܪ̈ܝܵܬܹܐ ܕܢܘܼܪܵܐ ܒܸܬ ܓ̰ܲܡܥܹܬ ܥܲܠ ܩܲܪܩܸܦܬܹܗ* ܠܵܐ ܓܼܵܠܒܵܐ ܠܵܘܟܼܘܿܢ ܒܝܼܫܬܵܐ؛ ܐܸܠܵܐ ܓܼܠܘܿܒܘܿܢ ܠܒܝܼܫܬܵܐ ܒܛܵܒܼܬܵܐ*
♱♱♱♱♱♱♱♱♱
ܝܘܚܢܢ ܙ: 37 ‐ ܚ: 12 ‐ 21
ܐܘܢܓܠܝܘܢ ܩܕܝܫܐ ܕܡܪܢ ܝܼܫܘܥ ܡܫܝܚܐ ܟܪܘܙܘܬܼܐ ܕܝܘܚܢܢ
♰ ܐܝܼܢܵܐ ܒܝܵܘܡܵܐ ܪܲܒܵܐ: ܕܝܼܠܹܗ ܐ݇ܚܵܪܵܝܵܐ ܕܥܲܕܥܹܕܵܐ: ܟܸܠܝܵܐ ܗ݇ܘܵܐ ܝܑܼܫܘܿܥ ܘܡܲܩܘܘܼܚܹܐ ܘܒܹܐܡܵܪܵܐ: ܐܸܢ ܐ݇ܢܵܫܵܐ ܨܸܗܝܵܐ ܝܠܹܗ، ܐܵܬܹܐ ܠܘܵܬܝܼ ܘܫܵܬܹܐ: ܟܠܡ̇ܢ ܕܡܗܲܝܡܸܢ ܒܝܼܝܼ، ܕܲܐܟܼܝܼ ܕܐ݇ܡܸܪܗ݇ܘܿܢ ܟܬܵܒܼܹ̈ܐ: ܢܲܗܪ̈ܵܘܵܬܹܐ ܕܡܝܼ̈ܵܐ ܕܚܲܝܹ̈ܐ ܒܸܬ ܓ̰ܵܪܝܼ ܡ̣ܢ ܟܵܪ݇ܣܹܗ: ܐܝܼܢܵܐ ܐܵܗܵܐ ܐ݇ܡܸܪܹܗ ܥܲܠ ܪܘܼܚܵܐ ܕܗܕܝܼܪܹܐ ܗ݇ܘܵܘ ܠܡܩܵܒܘܼܠܹܐ ܐܲܝܢܝܼ ܕܡܗܲܝܡܢܝܼ ܒܝܼܹܗ. ܣܵܒܵܒ ܗܵܠܵܐ ܠܹܐ ܗ݇ܘܵܐ ܦܝܼܫܬܵܐ ܝܘܼܗ݇ܒܼܸܠܬܵܐ ܪܘܼܚܵܐ. ܣܵܒܵܒ ܕܗܵܠܵܐ ܠܹܐ ܗ݇ܘܵܐ ܦܝܼܫܵܐ ܡܫܘܼܒܚܵܐ ܝܑܼܫܘܿܥ. ܐܝܼܢܵܐ ܪܵܒܵܐ ܡ̣ܢ ܟܸܢܫܵܐ ܕܫܡܸܥܠܗ݇ܘܿܢ ܗܹܡܸܙܡܵܢܘܼ̈ܗܝ: ܐܲܡܪܝܼ ܗ݇ܘܵܘ: ܐܵܗܵܐ ܫܲܪܝܼܪܵܐܝܼܬ ܝܼܠܹܗ ܢܒܼܝܼܵܐ: ܐ݇ܚܹܪ̈݇ܢܹܐ ܐܲܡܪܝܼ ܗ݇ܘܵܘ: ܐܵܗܵܐ ܝܼܠܹܗ ܡܫܝܼܚܵܐ. ܐ݇ܚܹܪَ̈ܢܹܐ ܐܲܡܪܝܼ: ܩܵܡܘܿ ܡ̣ܢ ܓܠܝܼܠܵܐ ܒܐܵܬܹܐ ܡܫܝܼܚܵܐ؟ ܠܹܐ ܗ݇ܘܵܐ ܟܬܵܒܼܵܐ ܐ݇ܡܸܪܹܗ ܕܡ̣ܢ ܙܲܪܥܹܗ ܕܕܵܘܝܼܕ، ܘܡ̣ܢ ܒܹܝܬܠܚܸܡ. ܡܵܬܵܐ ܕܕܵܘܝܼܕ ܒܸܬ ܐܵܬܹܐ ܡܫܝܼܚܵܐ؟ ܘܗ݇ܘܹܐܠܹܗ ܦܘܼܠܵܓܼܵܐ ܓܵܘ ܟܸܢܫܵܐ ܒܘܼܬ ܕܝܼܹܗ: ܘܐܝܼܬ ܗ݇ܘܵܘ ܐ݇ܢܵܫܹ̈ܐ ܡܸܢܲܝܗܝ ܕܒܵܥܝܼ ܗ݇ܘܵܘ ܕܕܲܒܼܩܝܼܠܹܗ. ܐܸܠܵܐ ܐܘܿܦ ܚܲܕ݇ ܐ݇ܢܵܫܵܐ ܠܵܐ ܕܪܹܐܠܹܗ ܥܲܠܘܼܗܝ ܐܝܼܕܵܬܹ̈ܐ: ܘܐ݇ܬܹܐܠܗ݇ܘܿܢ ܐܵܢܝܼ ܦܘܿܠܝܼܣܹ̈ܐ ܠܘܵܬ ܪ̈ܲܒܲܝ ܟܵܗܢܹ̈ܐ ܘܦܪ̈ܝܼܫܹܐ. ܘܐ݇ܡܸܪܗ݇ܘܿܢ ܟܵܗܢܹ̈ܐ ܐܸܠܲܝܗܝ: ܩܵܡܘܿܕܝܼ ܠܵܐ ܡܘܼܝܬܹܐ ܠܵܘܟܼܘܿܢ ܐܸܠܹܗ؟ ܐܲܡܪܝܼ ܦܘܿܠܝܼܣܹ̈ܐ ܐܸܠܲܝܗܝ: ܐܘܼܦ ܚܲܕ݇ ܒܲܪܢܵܫܵܐ ܠܹܐ ܝܠܹܗ ܗܘܼܡܙܸܡܵܐ ܗܲܕܟܼܵܐ ܐܲܝܟܼ ܕܗܲܡܙܘܼܡܹܐ ܝܠܹܗ ܐܵܗܵܐ ܓܲܒܼܪܵܐ. ܐܲܡܪܝܼ ܐܸܠܲܝܗܝ ܦܪ̈ܝܼܫܹܐ: ܒܲܠܟܵܐ ܐܘܿܦ ܐܲܚܬܘܿܢ ܚܠܸܛܠܵܘܟܼܘܿܢ؟ ܩܵܡܘܿ ܐ݇ܢܵܫܵܐ ܡ̣ܢ ܪܹ̈ܫܵܢܹܐ ܝܵܢ ܡ̣ܢ ܦܪ̈ܝܼܫܹܐ ܗܘܼܡܸܢܗ݇ܘܿܢ ܒܝܼܹܗ؟ ܐܸܠܵܐ ܐܸܢ ܐܵܗܵܐ ܥܲܡܵܐ ܕܠܹܐ ܝܠܹܗ ܒܝܼܕܵܥܵܐ ܢܵܡܘܿܣܵܐ ܠܝܼܛܹܐ ܝܢܵܐ: ܐܵܡܸܪ ܐܸܠܲܝܗܝ ܢܝܼܩܵܕܹܡܘܿܣ ܚܲܕ݇ ܡܸܢܲܝܗܝ: ܗ̇ܘ ܕܐܸܬܝܵܐ ܗ݇ܘܵܐ ܠܘܵܬ ܝܑܼܫܘܿܥ ܒܠܸܠܝܵܐ: ܩܵܡܘܿ ܢܵܡܘܿܣܵܐ ܕܝܼܵܢ ܟܹܐ ܥܵܒܼܸܕ ܚܲܝܵܒܼܵܐ ܠܒܲܪܢܵܫܵܐ: ܐܸܠܵܐ ܐܸܢ ܫܵܡܸܥ ܩܲܕ݇ܡܵܝܬܵܐ ܘܝܵܕܸܥ ܡܘܿܕܝܼ ܥܒܼܸܕܠܹܗ؟ ܓ̰ܘܼܘܸܒܠܗ݇ܘܿܢ ܘܐܲܡܪܝܼ ܐܸܠܹܗ: ܩܵܡܘܿ ܐܘܿܦ ܐܲܢ݇ܬ ܡ̣ܢ ܓܠܝܼܠܵܐ ܝܘܸܬ؟ ܨܲܚܨܝܼ ܘܚܙܝܼ ܕܢܒܼܝܼܵܐ ܡ̣ܢ ܓܠܝܼܠܵܐ ܠܹܐ ܩܵܐܸܡ: ܐܝܼܢܵܐ ܡܸܢ݇ܕܪܹܫ݇ ܗܘܼܡܙܸܡܠܹܗ ܥܲܡܲܝܗܝ ܝܑܼܫܘܿܥ ܘܐ݇ܡܸܪܹܗ: ܐܵܢܵܐ ܝܑܼܘܸܢ ܢܘܼܗܪܹܗ ܕܥܵܠܡܵܐ. ܡ̇ܢ ܕܒܵܬ݇ܪܝܼ ܐܵܬܹܐ. ܠܹܐ ܚܵܕܸܪ ܓܵܘ ܚܸܫܟܵܐ. ܐܸܠܵܐ ܒܸܬ ܡܵܫܟ̰ܸܚ ܠܓܵܢܹܗ ܢܘܼܗܪܵܐ ܕܚܲܝܹ̈ܐ: ܐܲܡܪܝܼ ܐܸܠܹܗ ܦܪ̈ܝܼܫܹܐ: ܐܲܢ݇ܬ ܥܲܠ ܓܵܢܘܼܟܼ ܒܸܣܗܵܕܵܐ ܝܘܸܬ. ܣܵܗܕܘܼܬܘܼܟܼ ܠܹܐ ܝܠܵܗ̇ ܫܲܪܝܼܪܬܵܐ: ܓ̰ܘܼܘܸܒܠܹܗ ܝܑܼܫܘܿܥ ܘܐ݇ܡܸܪܹܗ ܐܸܠܲܝܗܝ: ܐܵܦܸܢ ܐܵܢܵܐ ܒܸܣܗܵܕܵܐ ܝܘܸܢ ܥܲܠ ܓܵܢܝܼ. ܫܲܪܝܼܪܬܵܐ ܝܠܵܗ̇ ܣܵܗܕܘܼܬܝܼ، ܣܵܒܵܒ ܒܝܼܕܵܥܵܐ ܝܘܸܢ ܡ̣ܢ ܐܲܝܟܵܐ ܐ݇ܬܹܐܠܝܼ ܘܠܐܲܝܟܵܐ ܒܹܐܙܵܠܵܐ ܝܘܸܢ. ܐܝܼܢܵܐ ܐܲܚܬܘܿܢ ܠܹܐ ܝܬܘܿܢ ܒܝܼܕܵܥܵܐ، ܡ̣ܢ ܐܲܝܟܵܐ ܐ݇ܬܹܐܠܝܼ ܘܠܵܐ ܠܐܲܝܟܵܐ ܒܹܐܙܵܠܵܐ ܝܘܸܢ. ܐܲܚܬܘܿܢ ܦܲܓܼܪܵܢܵܐܝܼܬ ܒܸܕܝܵܢܵܐ ܝܬܘܿܢ. ܐܵܢܵܐ ܠܐܘܿܦ ܚܲܕ݇ ܐ݇ܢܵܫܵܐ ܠܹܐ ܝܘܸܢ ܒܸܕܝܵܢܵܐ. ܘܐܝܼܢܵܐ ܐܸܢ ܕܲܝܢܸܢ ܕܝܵܢܬܝܼ ܫܲܪܝܼܪܬܵܐ ܝܠܵܗ̇: ܣܵܒܵܒ ܕܠܹܐ ܝܘܸܢ ܠܚܘܼܕܝܼ. ܐܸܠܵܐ ܐܵܢܵܐ ܘܒܵܒܝܼ ܕܫܘܼܕܪܸܢܹܗ: ܘܓܵܘ ܢܵܡܘܿܣܵܘܟܼܘܿܢ ܟܬܝܼܒܼܵܐ ܝܠܹܗ: ܕܣܵܗܕܘܼܬܵܐ ܕܬܪܹܝ ܓܲܒܼܪܹ̈ܐ ܫܲܪܝܼܪܬܵܐ ܝܠܵܗ̇: ܐܵܢܵܐ ܕܒܸܣܗܵܕܵܐ ܝܘܸܢ ܥܲܠ ܓܵܢܝܼ. ܘܒܵܒܝܼ ܕܩܲܡ ܫܵܕܸܪܝܼ ܒܸܣܗܵܕܵܐ ܝܠܹܗ ܥܲܠܝܼ. ܐܲܡܪܝܼ ܐܸܠܹܗ ܐܲܝܟܵܐ ܝܠܹܗ ܒܵܒܘܼܟܼ؟ ܓ̰ܘܼܘܸܒܠܹܗ ܝܑܼܫܘܿܥ ܘܐ݇ܡܸܪܹܗ ܐܸܠܲܝܗܝ. ܘܠܵܐ ܐܸܠܝܼ ܒܝܼܕܵܥܵܐ ܝܬܘܿܢ ܘܠܵܐ ܠܒܵܒܝܼ. ܐܸܢ ܐܸܠܝܼ ܗܵܘܹܝܬܘܿܢ ܗ݇ܘܵܘ ܒܝܼܕܵܥܵܐ. ܐܘܿܦ ܠܒܵܒܝܼ ܒܸܬ ܝܲܕܥܝܼܬܘܿܢ ܗ݇ܘܵܘ: ܐܲܢܹܐ ܗܹܡܸܙܡܵܢܹ̈ܐ ܗܘܼܡܙܸܡܠܹܗ ܓܵܘ ܒܹܝܬ ܓܲܙܵܐ ܟܲܕ ܡܵܠܘܼܦܹܐ ܒܗܲܝܟܠܵܐ ܘܐ݇ܢܵܫܵܐ ܠܵܐ ܩܲܡ ܕܵܒܼܸܩܠܹܗ. ܣܵܒܵܒ ܗܵܠܵܐ ܠܹܐ ܗ݇ܘܵܐ ܐ݇ܬܹܐܬܵܐ ܣܵܥܲܬܹܗ܀
♱♱♱♱♱♱♱♱♱