ܬܢܹܝܢ ܢܵܡܘܿܣܲܐ؛ ܕ؛ 1‐10 ܬܸܒ̣ܘ ܘܲܫܠܵܘ ܬܸܢܝܵܢ ܢܵܡܘܿܣܵܐ ܣܸܦܪܵܐ ܕܚܲܡܫܵܐ ܕܐܘܿܪܵܝܬܵܐ؛ ܐܲܚܲܝ̈ ܒܪܸܟ̣ܡܵܪܝ܀
ܡܐܵܕܝܼܵܐ ܝܼܣܪܵܝܹܠ؛ ܫܡܸܥܡܘܿܢ ܢܵܡܘܿܣܹ̈ܐ ܘܕܝܼܘܵܢܹ̈ܐ. ܕܡܲܠܦܸܢܵܘܟ̣ܘܿܢ ܐܸܕܝܘܿܡ݇ ܝܵܘܡܵܐ ܠܸܥܒ̣ܵܕܵܐ. ܕܒܸܬ ܚܲܝܝܼܬܘܿܢ ܘܥܵܒ̣ܪܝܼܬܘܿܢ ܘܝܵܪܬܝܼܬܘܿܢ ܐܲܪܥܵܐ ܕܝܵܗ݇ܒ̣ܸܠܵܘܟ̣ܘܿܢ ܡܵܪܝܵܐ ܐܲܠܵܗܵܐ ܕܒܵܒܵܘܵܬܵܘ̈ܟ̣ܘܿܢ؛ ܠܵܐ ܡܲܙܝܸܕܝܼܬܘܿܢ ܘܠܵܐ ܡܲܒܨܸܪܝܼܬܘܿܢ ܡ̣ܢ ܦܘܼܩܕܵܢܹ̈ܐ ܕܒܸܦܩܵܕܵܐ ܝ݇ܘܸܢ ܐܸܠܵܘܟ̣ܘܿܢ؛ ܐܸܠܵܐ ܢܛܘܿܪܘܿܢ ܦܘܼܩܕܵܢܹ̈ܐ ܕܡܵܪܝܵܐ ܕܒܸܦܩܵܕܵܐ ܝ݇ܘܸܢ ܐܸܠܵܘܟ̣ܘܿܢ܀ ܥܲܝܢܵܘ̈ܟ̣ܘܿܢ ܚܙܹܐܠܵܗ݇ܘܿܢ ܟܠ ܡܸܢܕܝܼ ܕܥܒ̣ܸܕܠܹܗ ܡܵܪܝܵܐ ܠܒܥܸܠ ܦܥܘܿܪ؛ ܣܵܒܵܒ ܟܠ ܐ݇ܢܵܫܵܐ ܕܐ݇ܙܸܠܹܗ ܒܵܬ݇ܪ ܒܥܸܠ ܦܥܘܿܪ؛ ܬܘܼܠܸܩܠܹܗ ܡܵܪܝܵܐ ܐܲܠܵܗܵܐ ܡ̣ܢ ܓܵܘܵܘܟ̣ܘܿܢ܀ ܘܐܲܚܬܘܿܢ ܕܗ݇ܘܹܐܠܵܘܟ̣ܘܿܢ ܬܲܒܲܥ ܠܡܵܪܝܵܐ ܐܲܠܵܗܵܐ؛ ܗܵܐ ܚܵܝܹܐ ܝ݇ܬܘܿܢ ܗܲܠ ܐܸܕܝܘܿܡ݇ ܝܵܘܡܵܐ. ܚܙܹܐܡܘܿܢ ܕܩܲܡ ܡܲܠܸܦܸܢܵܘܟ̣ܘܿܢ ܢܵܡܘܿܣܹ̈ܐ ܘܕܝܼܘܵܢܹ̈ܐ؛ ܐܲܝܟܼ ܕܦܘܼܩܕܸܢܹܗ ܡܵܪܝܵܐ ܐܲܠܵܗܵܐ܀ ܕܥܵܒ̣ܕܝܼܬܘܿܢ ܠܗ݇ܘܿܢ ܒܐܲܪܥܵܐ ܕܥܵܒ̣ܪܝܼܬܘܿܢ ܠܵܗ̇ ܠܸܪܝܵܬܵܗ̇܀ ܘܢܵܛܪܝܼܬܘܿܢ ܘܥܵܒ̣ܕܝܼܬܘܿܢ ܠܗ݇ܘܿܢ؛ ܕܐܵܗܵܐ ܝ݇ܠܵܗ̇ ܚܸܟ̣ܡܬܵܘܟ̣ܘܿܢ [ܥܵܩܸܠܕܵܪܘܼܬܵܘܟ̣ܘܿܢ] ܘܦܲܪܡܵܝܬܵܘܟ̣ܘܿܢ ܠܒܲܪܩܘܼܒ̣ܠ ܛܵܝܸܦܹ̈ܐ ܕܫܵܡܥܝܼ ܐܲܢܹܐ ܟܠܲܝܗܝ ܢܵܡܘܿܣܹ̈ܐ؛ ܘܒܸܬ ܐܵܡܪܝܼ ܕܦܲܪܡܝܼܵܢܵܐ ܝ݇ܠܹܗ ܘܗܵܘܢܵܢܵܐ ܐܵܗܵܐ ܛܵܝܸܦܵܐ ܓܘܼܪܵܐ܀ ܣܵܒܵܒ ܐܲܝܢܝܼ ܝ݇ܠܹܗ ܛܵܝܸܦܵܐ ܓܘܼܪܵܐ ܕܒܘܼܫ ܩܘܼܪܒܵܐ ܝ݇ܠܹܗ ܐܸܠܹܗ ܐܲܠܵܗܹܗ؛ ܐܲܝܟܼ ܡܵܪܝܵܐ ܐܲܠܵܗܲܢ ܒܟܠ ܕܩܵܪܲܚܠܹܗ؟܀ ܘܐܲܝܢܝܼ ܝ݇ܠܹܗ ܛܵܝܸܦܵܐ ܓܘܼܪܵܐ ܕܐܝܼܬܠܹܗ ܢܵܡܘܿܣܹ̈ܐ؛ ܘܕܝܼܘܵܢܹ̈ܐ ܙܲܕܝܼܩܹ̈ܐ ܐܲܝܟܼ ܟܠܹܗ ܐܵܗܵܐ ܢܵܡܘܿܣܵܐ ܕܒܝܼܵܗ݇ܒ̣ܵܐ ܝ݇ܘܸܢ ܩܵܕ݇ܡܵܘܟ̣ܘܿܢ ܐܸܕܝܘܿܡ݇ ܝܵܘܡܵܐ؟܀ ܐܲܚܟ̰ܝܼ ܗ݇ܘܹܐܡܘܿܢ ܗܸܫܝܲܪ ܪܵܒܵܐ؛ ܘܢܛܘܿܪܘܿܢ ܓܵܢܵܘܟ̣ܘܿܢ؛ ܕܠܵܐ ܡܲܢܫܝܼܬܘܿܢ ܟܠ ܡܸܢܕܝܼ ܕܚܙܹܐܠܗ݇ܘܿܢ ܥܲܝܢܵܘ̈ܟ̣ܘܿܢ؛ ܘܠܵܐ ܥܵܒ̣ܪܝܼ ܡ̣ܢ ܠܸܒܵܘܟ̣ܘܿܢ ܟܠܲܝܗܝ ܝܵܘܡܵܢܹ̈ܐ ܕܚܲܝܵܘܟ̣ܘܿܢ؛ ܘܡܲܕܥܹܡܘܿܢ ܠܗ݇ܘܿܢ ܠܒܢܘܿܢܵܘ̈ܟ̣ܘܿܢ ܘܩܵܐ ܒܢܘܿܢܹ̈ܐ ܕܒܢܘܿܢܵܘ̈ܟ̣ܘܿܢ܀ ܝܵܘܡܵܐ ܕܟܠܹܐܠܵܘܟ̣ܘܿܢ ܩܵܕ݇ܡ ܐܲܠܵܗܵܘܟ̣ܘܿܢ ܒܚܘܿܪܝܼܒ̣؛ ܐܝܼܡܲܢ ܕܐ݇ܡܸܪܹܗ ܐܸܠܝܼ ܡܵܪܝܵܐ ܓ̰ܲܡܸܥ ܩܵܕ݇ܡܝܼ ܠܛܵܝܸܦܵܐ ܘܡܲܫܡܸܥܢܗ݇ܘܿܢ ܚܲܒܪ̈ܝܼ؛ ܘܝܵܠܦܝܼ ܠܸܙܕܲܥܝܵܐ ܩܵܕ݇ܡܝܼ ܟܠܲܝܗܝ ܝܵܘܡܵܢܹ̈ܐ ܕܚܲܝܲܝ̈ܗܝ ܒܐܲܪܥܵܐ؛ ܘܡܲܠܦܝܼ ܩܵܐ ܒܢܘܿܢܲܝ̈ܗܝ܀
ܚܲܒ̣ܪܹܗ
ܐܹܫܲܥܝܵܐ؛ ܒ؛ 1‐20 ܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ ܐܲܚܲܝ̈ ܒܲܪܸܟ̣ܡܵܪܝ܀
ܡܸܢܕܝܼ ܕܚܙܹܐܠܹܗ ܐܹܫܲܥܝܵܐ ܒܲܪ ܐܵܡܘܿܨ ܥܲܠ ܝܼܗܘܼܕܵܐ ܘܥܲܠ ܐܘܿܪܸܫܠܹܡ܀ ܒܸܬ ܗܵܘܹܐ ܒܝܵܘܡܵܢܹ̈ܐ ܐ݇ܚܵܪ̈ܵܝܹܐ؛ ܛܘܼܪܵܐ ܕܒܲܝܬܹܗ ܕܡܵܪܝܵܐ؛ ܬܘܼܪܨܵܐ ܒܪܹܫܵܐ ܕܛܘܼܪ̈ܵܢܹܐ؛ ܘܒܘܼܫ ܪܵܡܵܐ ܡ̣ܢ ܪ̈ܘܼܡܝܵܬܹܐ؛ ܘܒܸܬ ܣܵܦܪܝܼ ܐܸܠܹܗ ܟܠܲܝܗܝ ܛܵܝܸܦܹ̈ܐ. ܪܵܒܵܐ ܛܵܝܸܦܹ̈ܐ ܒܸܬ ܐܵܙܠ݇ܝܼ ܘܒܸܬ ܐܵܡܪܝܼ؛ ܬܹܐܡܘܿܢ ܐܵܣܩܲܚ ܠܛܘܼܪܵܐ ܕܡܵܪܝܵܐ؛ ܘܠܒܲܝܬܹܗ ܕܐܲܠܵܗܹܗ ܕܝܲܥܩܘܿܒ̣؛ ܘܒܸܬ ܡܲܠܸܦܠܲܢ ܡ̣ܢ ܐܘܼܪ̈ܚܵܬܹܗ؛ ܘܒܸܬ ܚܵܕܪܲܚ ܒܓ̰ܵܕܵܘܵܬܹ̈ܗ؛ ܣܵܒܵܒ ܕܡ̣ܢ ܨܸܗܝܘܿܢ ܒܸܬ ܦܵܠܸܛ ܢܵܡܘܿܣܵܐ؛ ܘܗܹܡܸܙܡܵܢ ܕܡܵܪܝܵܐ ܡ̣ܢ ܐܘܿܪܸܫܠܸܡ܀ ܘܒܸܬ ܕܵܐܹܢ ܒܹܝܠ ܛܵܝܸܦܹ̈ܐ؛ ܘܡܲܢܟ̣ܸܣ ܠܛܵܝܸܦܹ̈ܐ ܪܵܒܵܐ ܕܒܪܸܚܩܵܐ؛ ܘܒܸܬ ܚܵܫܠܝܼ ܣܲܝܦܲܝܗܝ ܠܣܸܟܵܟܹ̈ܐ ܕܦܕܵܢܹ̈ܐ ܘܪ̈ܘܼܡܚܵܬܲܝܗܝ ܠܡܲܓܠܹ̈ܐ؛ ܘܛܵܝܸܦܵܐ ܥܲܠ ܛܵܝܸܦܵܐ ܠܹܐ ܫܵܩܸܠ ܣܲܝܦܵܐ؛ ܘܡܸܕܪܹܐ ܠܹܐ ܝܵܠܦܝܼ ܦܠܵܫܵܐ܀ ܬܹܐܡܘܿܢ ܝܵܐ ܒܲܝܬܹܗ ܕܝܲܥܩܘܿܒ̣ ܐܵܙܵܠ݇ܚ ܒܒܲܗܪܹܗ ܕܡܵܪܝܵܐ܀ ܡ̣ܢ ܣܵܒܵܒ ܕܫܒ̣ܸܩܠܘܼܟܼ ܠܛܵܝܸܦܘܼܟܼ ܕܒܹܝܬ̣ ܝܲܥܩܘܿܒ̣؛ ܣܵܒܵܒ ܕܡܠܹܐܠܗ݇ܘܿܢ ܐܲܝܟܼ ܕܡ̣ܢ ܩܲܕ݇ܡܵܝܬܵܐ ܘܒܸܥܒ̣ܵܕܵܐ ܝܢܵܐ ܚܸܪ̈ܫܹܐ ܐܲܝܟܼ ܦܠܸܫܬܵܝܹ̈ܐ؛ ܘܪܵܒܵܐ ܒܢܘܿܢܹ̈ܐ ܢܘܼܟ̣ܪ̈ܵܝܹܐ ܓܘܼܪܘܸܣܠܗ݇ܘܿܢ܀ ܡܠܹܐܠܵܗ̇ ܐܲܪܥܲܝܗܝ ܣܹܐܡܵܐ ܘܕܲܗܒ̣ܵܐ؛ ܘܠܲܝܬ̇ ܩܝܼܵܣ ܠܚܲܙ̈ܝܼܢܲܝܗܝ؛ ܘܡܠܹܐܠܵܗ̇ ܐܲܪܥܲܝܗܝ ܣܘܼܣܵܘܵܬܹ̈ܐ ܘܠܲܝܬ̇ ܩܝܼܵܣ ܠܟܵܠܸܣܟܲܝ̈ܗܝ؛ ܘܡܠܹܐܠܵܗ̇ ܐܲܪܥܲܝܗܝ ܨܵܢܲܡܹ̈ܐ ܘܠܦܘܼܠܚܵܢܵܐ ܕܐܝܼܕܵܬܲܝ̈ܗܝ ܒܸܣܓ̣ܵܕܵܐ ܝ݇ܢܵܐ؛ ܘܠܦܘܼܠܚܵܢܵܐ ܕܨܸܒܥܵܬܲܝ̈ܗܝ܀ ܦܸܫܠܹܗ ܡܘܼܟܸܦܵܐ ܐ݇ܢܵܫܵܐ ܘܡܘܼܫܦܸܠܵܐ ܓܲܒ̣ܪܵܐ؛ ܘܠܵܐ ܫܵܒ̣ܩܸܬ̇ ܠܗ݇ܘܿܢ؛ ܥܒ̣ܘܿܪܘܿܢ ܒܐܝܼܣܵܪܹ̈ܐ ܘܛܲܡܪܘܿܢ ܓܵܢܵܘܟ̣ܘܿܢ ܒܥܲܦܪܵܐ ܡ̣ܢ ܩܵܕ݇ܡ ܙܕܘܿܥܬܹܗ ܕܡܵܪܝܵܐ؛ ܘܡ̣ܢ ܣܸܩܠܵܐ ܕܚܲܝܠܹܗ܀ ܥܲܝܢܹ̈ܐ ܪ̈ܵܡܹܐ ܕܐ݇ܢܵܫܹ̈ܐ ܒܸܬ ܡܲܟܸܦ؛ ܘܒܸܬ ܦܵܝܫܵܐ ܡܘܼܟܸܦܬܵܐ ܪܵܡܘܼܬܵܐ ܕܓ̰ܘܲܢܩܵܐ. ܘܒܸܬ ܦܵܐܹܫ ܡܘܼܪܡܵܐ ܡܵܪܝܵܐ ܠܚܘܿܕܹܗ ܒܗ̇ܘ ܝܵܘܡܵܐ܀ ܣܵܒܵܒ ܕܝܵܘܡܹܗ ܕܡܵܪܝܵܐ ܥܲܠ ܟܠ ܚܬܝܼܪܵܐ [ܫܘܼܒ̣ܗܵܪܵܢܵܐ] ܘܪܵܡܵܐ؛ ܘܥܲܠ ܟܠ ܕܦܵܐܹܫ ܡܘܼܪܡܵܐ؛ ܕܦܵܐܹܫ ܡܘܼܟܸܦܵܐ܀ ܘܥܲܠ ܟܠܲܝܗܝ ܐܲܪ̈ܙܹܐ ܕܠܸܒ̣ܢܵܢ ܪ̈ܵܡܹܐ ܘܡܘܼܪܡܹܐ ܘܥܲܠ ܟܠܲܝܗܝ ܒܲܠܘܼܛܹ̈ܐ ܕܒ̣ܲܝܫܵܢ؛ ܘܥܲܠ ܟܠܲܝܗܝ ܛܵܘܼܪ̈ܵܢܹܐ ܪ̈ܵܡܹܐ؛ ܘܥܲܠ ܟܠ ܪ̈ܘܼܡܝܵܬܹܐ ܡܘܼܪ̈ܡܹܐ܀ ܘܥܲܠ ܟܠܲܝܗܝ ܒܘܼܪ̈ܓ̰ܹܐ ܪ̈ܵܡܹܐ؛ ܘܥܲܠ ܟܠܲܝܗܝ ܫܘܼܪ̈ܵܢܹܐ ܩܘܼܝܹ̈ܐ܀ ܘܥܲܠ ܟܠܲܝܗܝ ܓܵܡܝܼܹ̈ܐ ܕܬܲܪܫܝܼܫ ܘܥܲܠ ܟܠܲܝܗܝ ܚܙܵܝܵܬܹ̈ܐ ܕܫܘܼܦܪܵܐ܀ ܪܵܡܘܼܬܵܐ ܕܐ݇ܢܵܫܹ̈ܐ ܒܸܬ ܦܵܝܫܵܐ ܡܘܼܟܸܦܬܵܐ؛ ܘܪܵܡܘܼܬܵܐ ܕܓܲܒ̣ܪܵܐ ܦܵܝܫܵܐ ܡܘܼܫܦܸܠܬܵܐ܀ ܘܒܸܬ ܦܵܐܹܫ ܡܘܼܪܡܵܐ ܡܵܪܝܵܐ ܒܢܲܦ̮ܫܹܗ ܒܗ̇ܘ ܝܵܘܡܵܐ܀ ܘܨܵܢܲܡܹ̈ܐ ܬܲܡܵܡ ܒܸܬ ܒܲܛܠܝܼ܀ ܘܒܸܬ ܥܵܒ̣ܪܝܼ ܒܓܸܦܝܼܵܬܹ̈ܐ ܕܟܹܐܦܵܐ ܘܓܵܘ ܒܸܙܥܵܙܹ̈ܐ ܕܥܲܦܪܵܐ ܡ̣ܢ ܩܵܕ݇ܡ ܙܕܘܿܥܬܹܗ ܕܡܵܪܝܵܐ؛ ܘܡ̣ܢ ܩܵܕ݇ܡ ܫܲܦ̮ܩܵܐ ܕܚܸܩܪܹܗ؛ ܐܝܼܡܲܢ ܕܩܵܐܹܡ ܠܙܲܒܛܘܼܢܹܗ ܠܐܲܪܥܵܐ܀
♱♱♱♱♱♱♱♱♱
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ ܕܲܠܘܵܬܼ ܩܘܼܪ̈ܲܢܬܵܝܹܐ ܐܲܚܲܝ̈ ܒܲܪܸܟܼܡܵܪܝ܀
ܒܘܼܬ ܕܐܵܗܵܐ ܡܘܼܚܸܒ̈ܝܼ ܥܪܘܿܩܘܿܢ ܡ̣ܢ ܦܘܼܠܚܵܢܵܐ ܕܣܵܢܲܡܹ̈ܐ* ܐܲܝܟܼ ܕܩܵܐ ܗܵܘܢܵܢܹ̈ܐ ܒܹܐܡܵܪܵܐ ܝ݇ܘܸܢ. ܕܘܼܢܘܼܢ ܐܲܚܬܘܿܢ ܡܸܢܕܝܼ ܕܒܹܐܡܵܪܵܐ ܝ݇ܘܸܢ* ܗ̇ܘ ܟܵܣܵܐ ܕܫܵܟܲܪܬܵܐ ܕܒܵܪܘܿܟܼܹܐ ܝ݇ܘܲܚ؛ ܠܹܐ ܝ݇ܠܹܗ ܫܲܪܝܼܟܘܼܬܵܐ ܕܕܹܡܹܗ ܕܡܫܝܼܚܵܐ؟. ܘܗ̇ܘ ܠܲܚܡܵܐ ܕܒܸܩܨܵܝܵܐ ܝ݇ܘܲܚ ܠܹܐ ܝ݇ܠܹܗ ܫܲܪܝܼܟܘܼܬܵܐ ܕܦܲܓܼܪܹܗ ܕܡܫܝܼܚܵܐ؟. ܐܲܝܟܼ ܕܗ̇ܘ؛ ܚܲܕ݇ ܠܲܚܡܵܐ ܝ݇ܠܹܗ؛ ܗܲܕܟܼܵܐ ܐܘܼܦ ܐܲܚܢܲܢ ܚܲܕ݇ ܦܲܓܼܪܵܐ ܝ݇ܘܲܚ ܣܵܒܵܒ ܟܠܲܢ ܡ̣ܢ ܕܗ̇ܘ ܚܲܕ݇ ܠܲܚܡܵܐ ܒܸܫܩܵܠܵܐ ܝ݇ܘܲܚ* ܚܙܹܐܡܘܿܢ ܠܝܼܣܪܵܝܹܠ ܕܒܒܸܣܪܵܐ؛ ܟܠܲܝܗܝ ܐܵܢܝܼ ܕܐܵܟܼܠܝܼ ܕܸܒܼܚܹ̈ܐ ܠܹܐ ܗܵܘܝܼ ܫܲܪ̈ܝܼܟܹܐ ܠܡܲܕܒܚܵܐ؟* ܒܲܣ ܡܘܼܕܝܼ ܒܹܐܡܵܪܵܐ ܝ݇ܘܸܢ. ܕܣܲܢܲܡ ܡܸܢܕܝܼ ܝ݇ܠܹܗ ܝܲܢ ܕܸܒܼܚܵܐ ܕܣܲܢܲܡ ܡܸܢܕܝܼ ܝ݇ܠܹܗ؟؛ ܠܵܐ* ܐܸܠܵܐ ܗ̇ܘ ܡܸܢܕܝܼ ܕܕܵܒܼܚܝܼ ܚܲܢܦܹ̈ܐ؛ ܠܫܹܐܕܹ̈ܐ ܒܸܕܒܼܵܚܵܐ ܝ݇ܢܵܐ ܘܠܵܐ ܠܐܲܠܵܗܵܐ. ܗܲܕܟܼܵܐ ܠܹܐ ܒܵܥܝܸܢ ܕܗܵܘܝܼܬܘܿܢ ܫܲܪ̈ܝܼܟܹܐ ܠܫܹܐܕܹ̈ܐ؛ ܘܠܹܐ ܡܵܨܝܼܬܘܿܢ ܕܗܵܘܝܼܬܘܿܢ ܫܲܪ̈ܝܼܟܹܐ ܒܦܵܬܘܿܪܵܐ ܕܡܵܪܲܢ ܘܒܦܵܬܘܿܪܵܐ ܕܫܹܐܕܹ̈ܐ* ܝܲܢ ܩܵܡܘܿ ܒܩܲܝܪܲܬ ܡܲܥܒܼܘܼܪܹܐ ܝ݇ܘܲܚ ܠܡܵܪܲܢ؟؛ ܩܵܡܘܿ ܒܘܼܫ ܚܲܝܠܵܢܹ̈ܐ ܝ݇ܘܲܚ ܡܸܢܹܗ؟ ܐܝܼܬܠܝܼ ܕܲܣܬܘܼܪ ܩܵܐ ܟܠ ܡܸܢܕܝܼ. ܐܝܼܢܵܐ ܟܠ ܡܸܢܕܝܼ ܠܲܝܬ ܠܹܗ ܦܵܝܕܵܐ. ܟܠ ܡܸܢܕܝܼ ܐܝܼܬܠܝܼ ܕܲܣܬܘܼܪ؛ ܐܝܼܢܵܐ ܠܵܐ ܟܠ ܡܸܢܕܝܼ ܒܵܢܹܐ* ܠܵܐ ܟܠ ܐ݇ܢܵܫܵܐ ܗܵܘܹܐ ܒܸܒܥܵܝܵܐ ܒܘܼܬ ܓܵܢܹܗ. ܐܝܼܢܵܐ ܐܘܼܦ ܒܘܼܬ ܚܲܒܼܪܹܗ* ܟܠ ܡܸܢܕܝܼ ܕܦܵܐܸܫ ܙܘܼܒܢܵܐ ܓܵܘ ܡܵܩܹܠܘܿܢ؛ ܐܵܟܼܠܝܼܬܘܿܢ ܕܠܵܐ ܨܲܚܨܵܝܬܵܐ ܒܘܼܬ ܚܵܬܸܪ ܕܐܸܢܝܲܬ* ܣܵܒܵܒ ܕܐܲܪܥܵܐ ܕܡܵܪܝܵܐ ܝ݇ܠܵܗ̇ ܒܡܸܠܝܘܼܬܵܗ̇* ܐܝܼܢܵܐ ܐܸܢ ܚܲܕ݇ ܐ݇ܢܵܫܵܐ ܡ̣ܢ ܚܲܢܦܹ̈ܐ ܟ̰ܵܝܸܕܠܵܘܟܼܘܿܢ ܘܒܵܥܝܼܬܘܿܢ ܠܹܐܙܵܠܵܐ ܥܲܡܹܗ. ܟܠ ܡܸܢܕܝܼ ܕܦܵܐܸܫ ܡܘܼܬܒܼܵܐ ܩܵܕ݇ܡܵܘܟܼܘܿܢ ܐ݇ܟܼܘܿܠܘܿܢ ܕܠܵܐ ܨܲܚܨܵܝܬܵܐ ܒܘܼܬ ܚܵܬܸܪ ܕܐܸܢܝܲܬ* ܐܝܼܢܵܐ ܐܸܢ ܚܲܕ݇ ܐ݇ܢܵܫܵܐ ܐܵܡܸܪ ܐܸܠܵܘܟܼܘܿܢ ܕܐܵܗܵܐ ܕܸܒܼܚܵܐ ܕܣܵܢܲܡܹ̈ܐ ܝ݇ܠܹܗ. ܠܵܐ ܐܵܟܼܠܝܼܬܘܿܢ ܒܘܼܬ ܚܵܬܸܪ ܕܗ̇ܘ ܕܐ݇ܡܸܪܹܗ ܘܒܘܼܬ ܚܵܬܸܪ ܕܐܸܢܝܲܬ* ܠܹܐ ܝ݇ܘܸܢ ܒܘܼܬ ܚܵܬܸܪ ܕܐܸܢܝܲܬ ܕܝܼܵܘܟܼܘܿܢ ܒܹܐܡܵܪܵܐ. ܐܸܠܵܐ ܒܘܼܬ ܕܗ̇ܘ ܕܒܹܐܡܵܪܵܐ ܝ݇ܠܹܗ. ܩܵܡܘܿܕܝܼ ܐܵܙܵܕܘܼܬܝܼ ܦܵܝܫܵܐ ܕܝܼܢܬܵܐ ܡ̣ܢ ܐܸܢܝܲܬ ܕܐ݇ܚܹܪ݇ܢܹܐ* ܐܸܢ ܐܵܢܵܐ ܒܫܵܦܵܩܲܬ ܒܸܦܠܵܚܵܐ ܝ݇ܘܸܢ؛ ܩܵܡܘܿܕܝܼ ܦܝܵܫܵܐ ܝ݇ܘܸܢ ܓܕܝܼܦܵܐ ܒܘܼܬ ܡܸܢܕܝܼ ܕܐܵܢܵܐ ܡܵܘܕܘܿܝܹܐ ܝ݇ܘܸܢ؟܋ ܗܲܕܟܼܵܐ؛ ܐܸܢ ܐܵܟܼܠܝܼܬܘܿܢ ܘܐܸܢ ܫܵܬܝܼܬܘܿܢ ܘܐܸܢ ܡܸܢܕܝܼ ܐ݇ܚܹܪ݇ܢܵܐ ܥܵܒܼܕܝܼܬܘܿܢ؛ ܟܠ ܡܸܢܕܝܼ ܠܬܸܫܒܘܿܚܬܵܐ ܕܐܲܠܵܗܵܐ ܗܵܘܝܼܬܘܿܢ ܒܸܥܒܼܵܕܵܐ܋ ܕܠܵܐ ܬܲܪܩܲܠܬܵܐ ܗܘܹܐܡܘܿܢ ܠܝܗܘܼܕܵܝܹ̈ܐ ܘܠܐܲܪ̈ܡܵܝܹܐ ܘܠܥܹܕܬܹܗ ܕܐܲܠܵܗܵܐ܋
♱♱♱♱♱♱♱♱♱ ܠܘܩܐ ܝܒ: 57 ‐ ܝܓ 18 ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܠܘܩܐ
♰ ܘܐ݇ܡܸܪܹܗ ܝܑܼܫܘܿܥ ܠܟܸܢܫܵܐ ܕܝܗ݇ܘܼܕܵܝܹ̈ܐ: ܐܝܼܢܵܐ ܩܵܡܘܿܕܝܼ ܡ̣ܢ ܓܵܢܵܘܟܼܘܿܢ ܠܹܐ ܝܬܘܿܢ ܒܸܕܝܵܢܵܐ ܗܵܩܘܼܬܵܐ؟ ܣܵܒܵܒ ܐܝܼܡܵܢ ܕܒܹܐܙܵܠܵܐ ܝܘܸܬ ܐܲܢ݇ܬ ܥܲܡ ܒܥܸܠܕܝܼܢܘܼܟܼ ܠܘܵܬ ܕܲܝܵܢܵܐ. ܟܲܕ ܗܵܠܵܐ ܒܐܘܼܪܚܵܐ ܝܘܸܬ ܤܲܙܓܸܪ ܥܲܡܹܗ ܘܒܸܬ ܦܲܝܫܸܬ ܦܪܝܼܩܵܐ ܡܸܢܹܗ. ܕܠܵܐ ܠܵܒܸܠܘܼܟܼ ܠܘܵܬ ܕܲܝܵܢܵܐ. ܘܕܲܝܵܢܵܐ ܣܵܦܹܐ ܠܘܼܟܼ ܠܓܲܒܵܝܵܐ ܘܓܲܒܵܝܵܐ ܕܵܪܹܐ ܠܘܼܟܼ ܓܵܘ ܒܹܝܬ ܐܲܣܝܼܪܹ̈ܐ. ܘܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܘܼܟܼ: ܕܠܹܐ ܦܲܠܛܸܬ ܡ̣ܢ ܬܵܡܵܐ. ܗܲܠ ܕܝܲܗܒܼܸܬ ܫܵܡܘܿܢܵܐ ܐ݇ܚܵܪܵܝܵܐ. ܐܝܼܢܵܐ ܒܗ̇ܘ ܙܲܒܼܢܵܐ: ܐ݇ܬܹܐܠܗ݇ܘܿܢ ܐ݇ܢܵܫܹ̈ܐ ܐ݇ܡܸܪܗ݇ܘܿܢ ܐܸܠܹܗ: ܒܘܼܬ ܓܠܝܼܠܵܝܹ̈ܐ ܐܵܢܝܼ ܕܦܝܼܠܵܛܘܿܣ ܚܒܼܸܛܠܹܗ ܕܸܡܲܝܗܝ ܥܲܡ ܕܸܒܼܚܲܝ̈ܗܝ. ܘܓ̰ܘܼܘܸܒܠܹܗ ܝܑܼܫܘܿܥ ܘܐ݇ܡܸܪܹܗ ܐܸܠܲܝܗܝ: ܒܸܚܫܵܒܼܵܐ ܝܬܘܿܢ ܕܐܵܢܝܼ ܓܠܝܼܠܵܝܹ̈ܐ ܚܲܛܵܝܹ̈ܐ ܗ݇ܘܵܘ ܒܘܼܫ ܙܵܘܕܵܐ ܡ̣ܢ ܟܠܲܝܗܝ ܓܠܝܼܠܵܝܹ̈ܐ. ܕܗܲܕܟܼܵܐ ܗ݇ܘܹܐ ܠܵܗ̇ ܐܸܠܲܝܗܝ؟ ܠܵܐ. ܐܝܼܢܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܕܐܘܿܦ ܟܠܵܘܟܼܘܿܢ ܐܸܢ ܠܵܐ ܬܲܘܸܒܝܼܬܘܿܢ ܗܲܕܟܼܵܐ ܒܸܬ ܛܲܠܩܝܼܬܘܿܢ. ܝܲܢ ܐܵܢܝܼ ܬܡܵܢܸܥܣܲܪ ܕܢܦܸܠܹܗ ܥܲܠܲܝܗܝ ܒܘܼܪܓ̰ܵܐ ܒܫܝܼܠܘܼܚܵܐ ܘܩܛܝܼܠܵܝܠܹܗ. ܒܸܚܫܵܒܼܵܐ ܝܬܘܿܢ ܕܚܲܛܵܝܹ̈ܐ ܗ݇ܘܵܘ ܒܘܼܫ ܙܵܘܕܵܐ ܡ̣ܢ ܟܠܲܝܗܝ ܒܢܲܝ̈ܢܵܫܵܐ ܕܒܸܥܡܵܪܵܐ ܝܢܵܐ ܒܐܘܿܪܸܫܠܸܡ؟ ܠܵܐ. ܐܝܼܢܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܕܐܸܢ ܠܵܐ ܬܲܘܸܒܝܼܬܘܿܢ ܟܠܵܘܟܼܘܿܢ. ܐܲܝܟܼ ܕܝܼܵܝܗܝ ܒܸܬ ܛܲܠܩܝܼܬܘܿܢ. ܘܐ݇ܡܸܪܹܗ ܐܵܗܵܐ ܡܲܬܠܵܐ: ܚܕܵܐ ܬܹܐܢܵܐ ܐܝܼܬ ܗ݇ܘܵܐ ܠܚܲܕ݇ ܐ݇ܢܵܫܵܐ ܕܢܨܝܼܒܼܘܼܗ̇ ܗ݇ܘܵܐ ܓܵܘ ܟܲܪܡܹܗ. ܘܐ݇ܬܹܐܠܹܗ ܛܹܥ݇ܠܹܗ ܠܛܥܘܿܢܝܵܬܹ̈ܐ ܓܵܘܵܗ̇، ܘܠܵܐ ܡܘܼܫ݇ܟ̰ܸܚܠܹܗ. ܘܐ݇ܡܸܪܹܗ ܠܦܵܠܵܚܵܐ: ܗܵܐ ܬܠܵܬ ܫܸܢܹ̈ܐ ܒܹܐܬܵܝܵܐ ܝܘܸܢ ܒܥܵܝܵܐ ܝܘܸܢ ܛܥܘܿܢܝܵܬܹ̈ܐ ܒܐܵܗܵܐ ܬܹܐܢܵܐ، ܘܠܹܐ ܝܘܸܢ ܡܵܫ݇ܟ̰ܘܼܚܹܐ. ܩܛܝܼܥܠܵܗ̇. ܩܵܡܘܿ ܒܲܛܠܵܐ ܐܲܪܥܵܐ. ܐܵܡܸܪ ܐܸܠܹܗ ܦܵܠܵܚܵܐ: ܡܵܪܝܼ. ܫܒܼܘܿܩ ܠܵܗ̇ ܐܘܿܦ ܐܵܗܵܐ ܫܹܢ݇ܬܵܐ. ܗܲܠ ܕܦܲܠܚܸܢܵܗ̇ ܘܙܲܒܠܸܢܸܢ ܠܵܗ̇. ܘܐܸܢ ܥܒܼܝܼܕܠܵܗ̇ ܛܥܘܿܢܝܵܬܹ̈ܐ. ܘܐܸܢ ܠܵܐ. ܠܫܹܢ݇ܬܵܐ ܐ݇ܚܹܪ݇ܬܵܐ ܩܲܛܥܸܬܠܵܗ̇. ܐܝܼܢܵܐ ܟܲܕ ܡܵܠܘܼܦܹܐ ܗ݇ܘܵܐ ܝܑܼܫܘܿܥ ܒܫܲܒܬܵܐ. ܓܵܘ ܚܕܵܐ ܡ̣ܢ ܟܢܘܼܫܝܵܬܹ̈ܐ. ܐܝܼܬ ܗ݇ܘܵܐ ܬܵܡܵܐ ܚܕܵܐ ܒܲܟܼܬܵܐ ܕܐܝܼܬ ܗ݇ܘܵܐ ܠܵܗ̇ ܪܘܼܚܵܐ ܕܟܘܼܪܗܵܢܵܐ ܬܡܵܢܸܥܣܲܪ ܫܸܢܹ̈ܐ، ܘܟܦܝܼܦܬܵܐ ܗ݇ܘܵܐ. ܘܗܸܟ̰ ܠܹܐ ܡܲܨܝܵܐ ܗ݇ܘܵܐ ܕܦܲܝܫܵܐ ܦܫܝܼܛܬܵܐ. ܐܝܼܢܵܐ ܚܸܙܝܵܐ ܠܹܗ ܝܑܼܫܘܿܥ. ܘܩܸܪܝܵܐ ܠܹܗ ܘܐ݇ܡܸܪܹܗ ܐܸܠܵܗ̇: ܝܵܐ ܒܲܟܼܬܵܐ ܫܪܹܝܬܵܐ ܝܘܲܬܝ ܡ̣ܢ ܡܲܪܥܹܟܼܝ. ܘܡܘܼܬܸܒܼܠܹܗ ܐܝܼܕܹܗ ܥܲܠܘܼܗ̇، ܘܗܲܪ ܒܗ̇ܝ ܥܸܕܵܢܵܐ ܦܸܫܠܵܗ̇ ܦܫܸܛܬܵܐ. ܘܫܘܼܒܸܚܠܵܗ̇ ܠܐܲܠܵܗܵܐ. ܐܝܼܢܵܐ ܓ̰ܘܼܘܸܒܠܹܗ ܪܲܒ ܟܢܘܼܫܬܵܐ ܟܲܕ ܟܪܝܼܒܵܐ. ܥܲܠ ܕܒܘܼܣܸܡܠܹܗ ܒܫܲܒܬܵܐ ܝܑܼܫܘܿܥ. ܘܐ݇ܡܸܪܹܗ ܠܟܸܢܫܵܐ. ܫܬܵܐ ܝܵܘܡܵܢܹ̈ܐ ܝܢܵܐ ܕܒܝܼܵܝܗܝ ܘܵܓ̰ܸܒ ܝܠܵܗ̇ ܠܸܦܠܵܚܵܐ. ܒܝܼܵܝܗܝ ܗܵܘܹܝܬܘܿܢ ܒܹܐܬܵܝܵܐ ܘܦܝܵܫܵܐ ܒܣܝܼܡܹ̈ܐ. ܘܠܵܐ ܒܝܵܘܡܵܐ ܕܫܲܒܬܵܐ. ܐܝܼܢܵܐ ܝܑܼܫܘܿܥ ܓ̰ܘܼܘܸܒܠܹܗ ܘܐ݇ܡܸܪܹܗ ܐܸܠܹܗ: ܝܵܐ ܢܵܣܹܒܼ ܒܐܲܦܹ̈ܐ. ܟܠܚܲܕ݇ ܡܸܢܵܘܟܼܘܿܢ ܒܫܲܒܬܵܐ ܠܹܐ ܫܵܪܹܐ ܬܵܘܪܹܗ ܝܲܢ ܚܡܵܪܹܗ ܡ̣ܢ ܐܘܼܪܹܐ ܘܐܵܙܸܠ ܡܲܫܬܹܐܠܹܗ؟ ܐܝܼܢܵܐ ܐܵܗܵܐ ܕܒܪܵܬܵܐ ܕܐܲܒܼܪܵܗܲܡ ܝܼܠܵܗ̇. ܘܗܵܐ ܐ݇ܣܝܼܪܵܐ ܠܹܗ ܐܵܟܼܸܠܩܲܪܨܵܐ ܬܡܵܢܲܥܣܸܪ ܫܸܢܹ̈ܐ. ܠܹܐ ܗ݇ܘܵܐ ܘܵܓ̰ܸܒ ܕܦܲܝܫܵܐ ܫܪܹܝܬܵܐ ܡ̣ܢ ܐܵܗܵܐ ܐܸܣܘܼܪܵܐ ܒܝܵܘܡܵܐ ܕܫܲܒܬܵܐ؟ ܘܟܲܕ ܐܲܢܹܐ ܐܵܡܸܪ ܗ݇ܘܵܐ. ܢܲܚܦܝܼ ܗ݇ܘܵܘ ܟܠܲܝܗܝ ܐܲܝܢܝܼ ܕܩܲܝܡܝܼ ܗ݇ܘܵܘ ܕܲܠܩܘܼܒܼܠܹܗ. ܘܟܠܹܗ ܥܲܡܵܐ ܚܵܕܹܐ ܗ݇ܘܵܐ ܒܟܠܲܝܗܝ ܥܵܓ̰ܝܼܒܘܵܬܹ̈ܐ ܕܗܵܘܝܼ ܗ݇ܘܵܘ ܒܐܝܼܕܹܐ. ♱♱♱♱♱♱♱♱
The Assyrian Church
of the East did not yet sanction this document.
|