ܚܲܕܼܒܫܲܒܵܐ ܕܫܲܒ̣ܥܵܐ ܕܨܵܘܡܵܐ
ܥܹܐܕܐ ܗ݇ܘ̣ ܕܐܘܿܫܲܥܢܹ̈ܐ
ܒܪܝܼܬܵܐ ܡܛ؛ 1‐13. 22‐27
ܬܸܒ̣ܘ ܘܲܫܠܵܘ ܒܪܝܼܬܵܐ ܣܸܦܪܵܐ ܩܲܕܼܡܵܝܵܐ ܕܐܘܿܪܵܝܬܵܐ
ܐܲܚܲܝ̈ ܒܲܪܸܟ̣ܡܵܪܝ܀
ܘܩܪܹܐܠܹܗ ܝܲܥܩܘܿܒ̣ ܠܒܢ̈ܘܿܢܹܗ ܘܐ݇ܡܸܪܹܗ ܐܸܠܲܝܗܝ. ܩܲܪܒܸܢܗ݇ܘܿܢ ܠܟܸܣܠܝܼ ܘܒܸܬ ܡܲܕܥܸܢܵܘܟ̣ܘܿܢ ܡܸܢܕܝܼ ܕܩܲܘܸܡ ܐܸܠܵܘܟ̣ܘܿܢ ܒܚܲܪܬܵܐ ܕܝܵܘܡܵܢܹ̈ܐ؛ ܓ̰ܡܸܥܡܘܿܢ ܘܫܡܸܥܡܘܿܢ ܒܢ̈ܘܿܢܹܐ ܕܝܲܥܩܘܿܒ̣؛ ܫܡܸܥܡܘܿܢ ܠܝܼܣܪܵܝܹܠ ܒܵܒܵܘܟ̣ܘܿܢ܀ ܪܘܼܒ̣ܹܝܠ ܒܘܼܟ̣ܪܝܼ ܝ݇ܘܸܬ̇ ܚܲܝܠܝܼ ܘܪܹܫܵܐ ܕܙܲܪܒܝܼ؛ ܣܵܡܵܐ ܦܝܼܫܵܐ ܕܝܘܼܩܪܵܐ ܘܣܵܡܵܐ ܦܝܼܫܵܐ ܕܚܲܝܠܵܐ܀ ܚܠܸܛܠܘܼܟܼ ܐܲܝܟܼ ܡܝܼܵܐ ܘܠܵܐ ܦܵܝܫܸܬ̇؛ ܣܵܒܵܒ ܐ݇ܣܸܩܠܘܼܟܼ ܠܕܡܲܟ̣ܬܹܗ ܕܒܵܒܘܼܟܼ ܒܣܲܪܲܣܬܘܼܬܵܐ ܟ̰ܘܼܦܠܸܢܘܼܟܼ ܫܘܝܼܬܝܼ ܘܐ݇ܣܸܩܠܘܼܟܼ܀ ܫܸܡܥܘܿܢ ܘܠܹܘܝܼ ܐܵܚܘܿܢܘܵܬܹ̈ܐ ܐܲܣܒܵܒܹ̈ܐ ܕܟܲܪܒܵܐ ܡ̣ܢ ܟܝܵܢܲܝܗܝ܀ ܒܡܵܨܠܵܗܲܬܲܝܗܝ ܠܵܐ ܥܒ̣ܸܪܵܗ̇ ܓܵܢܝܼ؛ ܘܒܓ̰ܵܡܵܥܲܬܲܝ̈ܗܝ ܠܵܐ ܨܠܹܐܠܝܼ ܡ̣ܢ ܐܝܼܩܵܪܝܼ. ܣܵܒܵܒ ܒܟܲܪܒܲܝܗܝ ܩܛܸܠܗ݇ܘܿܢ ܐ݇ܢܵܫܹ̈ܐ؛ ܘܒܚܸܡܬܲܝܗܝ ܥܩܸܪܗ݇ܘܿܢ ܫܘܼܪܵܐ܀ ܠܝܼܛܵܐ ܝ݇ܠܹܗ ܟܲܪܒܲܝܗܝ ܣܵܒܵܒ ܕܚܲܝܠܵܢܵܐ ܝ݇ܠܹܗ؛ ܘܚܸܡܬܲܝܗܝ ܣܵܒܵܒ ܩܫܝܼܬܵܐ ܝ݇ܠܵܗ̇؛ ܒܸܬ ܦܲܠܸܓ݇ܢܗ݇ܘܿܢ ܒܝܲܥܩܘܿܒ̣ ܘܒܲܪܒܸܙܸܢܗ݇ܘܿܢ ܒܝܼܣܪܵܝܹܠ܀ ܝܼܗܘܼܕܵܐ ܐܸܠܘܼܟܼ ܒܸܬ ܫܵܟܪܝܼ ܐܵܚܘܿܢܘܵܬ̈ܘܼܟܼ؛ ܐܝܼܕܘܼܟܼ ܥܲܠ ܩܕܵܠܵܐ ܕܕܸܫ̰ܡܸܢܘܼܟܼ؛ ܒܸܬ ܣܵܓ̣ܕܝܼ ܐܸܠܘܼܟܼ ܒܢܘܿܢܹ̈ܐ ܕܒܵܒܘܼܟܼ܀ ܓܘܼܪܝܵܐ ܕܐܲܪܝܵܐ ܝܼܗܘܼܕܵܐ؛ ܡ̣ܢ ܩܸܛܠܵܐ ܕܒܪܘܿܢܝܼ ܐ݇ܣܸܩܠܘܼܟܼ؛ ܒܪܸܟܠܹܗ ܘܕܡܸܟ̣ܠܹܗ ܐܲܝܟܼ ܐܲܪܝܵܐ؛ ܘܐܲܝܟܼ ܓܘܼܪܝܵܐ ܕܐܲܪܝܵܐ؛ ܘܡܵܢܝܼ ܒܸܬ ܡܲܩܸܡܠܹܗ؟ ܠܹܐ ܥܵܒ̣ܸܪ ܩܵܛܝܼܵܐ ܡ̣ܢ ܝܼܗܘܼܕܵܐ ܘܡܲܚܒܸܪܵܢܵܐ ܡ̣ܢ ܓܵܘ ܐܲܩܠ̈ܘܼܗܝ؛ ܗܲܠ ܕܐܵܬܹܐ ܡ̇ܢ ܕܕܝܼܹܗ ܝ݇ܠܵܗ̇؛ ܘܐܸܠܹܗ ܒܸܬ ܣܵܦܪܝܼ ܛܵܝܸܦܹ̈ܐ܀ ܒܸܬ ܐܵܣܸܪ ܒܓܸܦܬܵܐ ܓ̰ܲܥܫܹܗ ܘܒܦܲܥܘܵܐ ܒܲܪ ܚܡܲܪܬܹܗ؛ ܒܸܬ ܡܲܚܘܸܪ ܒܚܲܡܪܵܐ ܓ̰ܘܼܠܹ̈ܗ ܘܒܕܸܡܵܐ ܕܥܸܢܒ̣ܹ̈ܐ ܠܒ̣ܸܫܬܹܗ܀ ܣܡܘܼܩܹ̈ܐ ܝ݇ܢܵܐ ܥܲܝܢ̈ܘܼܗܝ ܡ̣ܢ ܚܲܡܪܵܐ ܘܚܘܵܪܹ̈ܐ ܝ݇ܢܵܐ ܟܹܐܟ̈ܘܼܗܝ ܡ̣ܢ ܚܲܠܒ̣ܵܐ܀ ܒܪܘܿܢܵܐ ܡܵܪܹܐ ܛܥܘܼܢܬܵܐ ܝܵܘܣܸܦ ܒܪܘܿܢܵܐ ܡܵܪܹܐ ܛܥܘܼܢܬܵܐ؛ ܥܲܠ ܥܲܝܢܵܐ ܕܡܝܼܵܐ ܒܸܟ̰ܪܵܚܵܐ ܘܒܸܣܢܵܕܵܐ. ܥܲܠ ܫܘܼܪܵܐ؛ ܡܘܼܩܪܸܨܠܗ݇ܘܿܢ ܥܲܡܹܗ܀ ܘܣܢܹܐܠܗ݇ܘܿܢ ܐܸܠܹܗ ܪܹ̈ܫܵܢܹܐ ܕܕܲܣܬܵܐ؛ ܘܕܸܪܵܗ̇ ܒܚܲܝܠܵܐ ܩܸܫܬܹܗ؛ ܒܘܼܪܒܸܙܠܗ݇ܘܿܢ ܕܪ̈ܲܥܢܵܢܹܐ ܕܐܝܼܕ̈ܘܼܗܝ؛ ܡ̣ܢ ܐܝܼܕܵܬܹ̈ܐ ܕܙܲܪܒܵܢܵܐ ܕܝܲܥܩܘܿܒ̣؛ ܘܡ̣ܢ ܫܸܡܵܐ ܕܪܵܥܝܵܐ ܕܟܹܐܦܵܐ ܕܝܼܣܪܵܝܹܠ܀ ܐܲܠܵܗܵܐ ܕܒܵܒܘܼܟܼ ܒܸܬ ܗܲܝܸܪܘܼܟܼ؛ ܘܐܹܝܠܫܲܕܲܝ ܒܸܬ ܒܲܪܸܟ̣ܠܘܼܟܼ؛ ܒܘܼܪܟܬܵܐ ܕܫܡܲܝܵܐ ܡ̣ܢ ܥܘܼܠܘܼܠ؛ ܒܘܼܪܟܬܵܐ ܕܥܘܼܡܩܵܐ ܕܝܼܠܵܗ̇ ܒܪܝܼܟ̣ܬܵܐ ܡ̣ܢ ܐܸܠܬܸܚܬ̇؛ ܒܘܼܪܟܬܵܐ ܕܒܸܙܵܙܹ̈ܐ ܘܕܪ̈ܲܚܡܹܐ܀ ܒܘܼܪ̈ܟܵܬܹܗ ܕܒܵܒܘܼܟܼ ܙܝܼܕܠܗ݇ܘܿܢ ܥܲܠ ܒܘܼܪ̈ܟܵܬܹܐ ܕܗܲܨܠܵܢ̈ܝܼ؛ ܗܲܠ ܗܹܒ̣ܝܼ ܕܪ̈ܘܼܡܝܵܬܹܐ ܕܥܵܠܲܡ. ܒܸܬ ܗܵܘܝܼ ܥܲܠ ܪܹܫܹܗ ܕܝܵܘܣܸܦ؛ ܘܥܲܠ ܪܹܫܵܐ ܕܟܠܝܼܠܵܐ ܕܐܵܚܘܿܢܘܵܬ̈ܘܼܗܝ܀
ܚܲܒ̣ܪܹܗ
ܙܟܲܪܝܵܐ ܕ؛ 8‐ܫܘܼܠܵܡܵܐ. ܙ؛ 9‐11. ܚ؛4‐6؛ 12‐20. ܛ؛ 9‐13
ܫܠܵܘ ܢܒ̣ܝܼܘܼܬܹܗ ܕܙܟܲܪܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܘܗ݇ܘܹܐܠܹܗ ܥܲܠܝܼ ܚܲܒܪܹܗ ܕܡܵܪܝܵܐ ܠܹܐܡܵܪܵܐ܀ ܐܝܼܕܹ̈ܐ ܕܙܘܼܪܒܵܒܹܠ ܡܘܼܬܸܒ̣ܠܗ݇ܘܿܢ ܫܲܬܐܸܣܹ̈ܐ ܕܐܵܗܵܐ ܒܲܝܬܵܐ ܘܐܝܼܕܹ̈ܗ ܒܸܬ ܬܲܡܸܡܝܼܠܹܗ؛ ܘܒܸܬ ܝܵܕܥܝܼܬܘܿܢ ܕܡܵܪܝܵܐ ܚܲܝܠܬܵܢܵܐ ܫܘܼܕܪܸܢܹܗ ܠܟܸܣܠܵܘܟ̣ܘܿܢ܀ ܣܵܒܵܒ ܡܵܢܝܼ ܒܸܬ ܡܲܣܠܹܐ ܠܐܲܢܹܐ ܝܵܘܡܵܢܹ̈ܐ ܙܥܘܿܪܹ̈ܐ؟ ܘܒܸܬ ܚܵܝܪܝܼ ܘܚܵܙܝܼ ܠܟܹܐܦܵܐ ܕܦܘܼܪܫܵܢܵܐ ܒܐܝܼܕܵܐ ܕܙܘܼܪܒܵܒܹܠ؛ ܐܲܢܹܐ ܝ݇ܢܵܐ ܫܲܒ̣ܥܵܐ ܥܲܝܢܹ̈ܐ ܕܡܵܪܝܵܐ ܕܒܸܚܝܵܪܵܐ ܝ݇ܢܵܐ ܒܟܠܵܗ̇ ܐܲܪܥܵܐ܀ ܓ̰ܘܼܘܸܒܠܝܼ ܘܐ݇ܡܸܪܝܼ ܐܸܠܹܗ؛ ܘܡܘܼܕܝܼ ܝ݇ܢܵܐ ܐܲܢܹܐ ܬܪܹܝ ܙܵܝܬܹ̈ܐ ܕܡ̣ܢ ܝܲܡܝܼܢܵܐ ܕܟܲܦܬܵܐ ܘܡ̣ܢ ܣܸܡܵܠܵܗ̇؟ ܓ̰ܘܼܘܸܒܠܝܼ ܓܵܗܵܐ ܕܬܪܹܝ ܘܐ݇ܡܸܪܝܼ ܐܸܠܹܗ ܘܡܘܼܕܝܼ ܝ݇ܢܵܐ ܐܲܢܹܐ ܬܪܹܝ ܦܵܥܘܵܢܹ̈ܐ ܕܙܵܝܬܵܐ ܒܹܝܠ ܬܪܹܝ ܢܲܚܝܼܪܹ̈ܐ ܕܕܲܗܒ̣ܵܐ؛ ܕܣܵܦܘܼܩܹܐ ܝ݇ܢܵܐ ܡܸܢܲܝܗܝ ܕܲܗܒ̣ܵܐ؟܀ ܐ݇ܡܸܪܹܗ ܐܸܠܝܼ ܠܹܐ ܝܵܕܥܸܬ̇ ܡܘܼܕܝܼ ܝ݇ܢܵܐ ܐܲܢܹܐ؟ ܘܐ݇ܡܸܪܝܼ ܠܵܐ ܡܵܪܝܼ܀ ܘܐ݇ܡܸܪܹܗ ܐܸܠܝܼ ܐܲܢܹܐ ܝ݇ܢܵܐ ܬܪܹܝ ܒܢܲܝ̈ ܕܘܼܗܵܢܵܐ ܕܒܸܟܠܵܝܵܐ ܝ݇ܢܵܐ ܩܵܕ݇ܡ ܡܵܪܵܐ ܕܟܠܵܗ̇ ܐܲܪܥܵܐ܀ ܕܝܼܘܵܢ ܕܗܵܩܘܼܬܵܐ ܕܘܼܢܘܼܢ؛ ܫܦܵܩܲܬ ܘܪ̈ܲܚܡܹܐ ܥܒ̣ܘܿܕܘܿܢ ܐ݇ܢܵܫܵܐ ܥܲܡ ܐܵܚܘܿܢܹܗ؛ ܠܐܲܪ̈ܡܸܠܝܵܬܹܐ ܘܝܵܬܘܿܡܹ̈ܐ ܘܡܸܣܟܹܢܹ̈ܐ ܘܠܗ̇ܘ ܕܕܵܐܸܪ ܠܟܸܣܠܝܼ ܠܵܐ ܙܵܠܡܝܼܬܘܿܢ ܘܠܵܐ ܟ̰ܵܠܓ̰ܝܼܬܘܿܢ؛ ܘܒܝܼܫܬܵܐ ܐ݇ܢܵܫܵܐ ܥܲܠ ܐܵܚܘܿܢܹܗ ܒܠܸܒܵܘܟ̣ܘܿܢ ܠܵܐ ܚܵܫܒ̣ܝܼܬܘܿܢ܀ ܡܐܵܕܝܼܵܐ ܒܸܬ ܝܵܬܒ̣ܝܼ ܣܵܒ̣ܹ̈ܐ ܘܣܵܒ̣ܝܵܬܹ̈ܐ ܒܥܵܠܘܿܠܵܢܹ̈ܐ ܕܐܘܿܪܸܫܠܹܡ؛ ܟܠ ܐ݇ܢܵܫܵܐ ܕܒ̣ܝܼܩܵܐ ܚܘܼܛܪܹܗ ܒܐܝܼܕܹܗ ܡ̣ܢ ܒܘܼܫܵܝܘܼܬܵܐ ܕܝܵܘܡܵܢܹ̈ܐ؛ ܘܥܵܠܘܿܠܵܢܹ̈ܐ ܕܡܕܝܼܢ݇ܬܵܐ ܒܸܬ ܡܵܠܝܼ ܝܵܠܹܕ̈݇ܐ ܘܒܢܵܬܹ̈ܐ ܛܵܐܘܿܠܹܐ ܒܥܵܠܘܿܠܵܢܹ̈ܐ. ܣܵܒܵܒ ܕܙܲܪܥܵܐ ܒܸܬ ܗܵܘܹܐ ܒܫܠܵܡܵܐ؛ ܘܓܸܦܬܵܐ ܒܸܬ ܝܵܗ݇ܒ̣ܵܐ ܛܥܘܼܢܝܵܬܹ̈ܐ؛ ܘܐܲܪܥܵܐ ܒܸܬ ܝܵܗ݇ܒ̣ܵܐ ܗܵܨܝܼܠܹ̈ܐ؛ ܘܫܡܲܝܵܐ ܒܸܬ ܝܵܗ݇ܒ̣ܵܐ ܛܠܘܼܠܵܐ؛ ܒܸܬ ܝܵܗ݇ܒ̣ܸܢ ܐܲܢܹܐ ܟܠܲܝܗܝ ܠܐܵܗܵܐ ܛܵܝܸܦܵܐ܀ ܐܲܝܟܼ ܕܗ݇ܘܹܐܠܵܘܟ̣ܘܿܢ ܠܵܘܛܬܵܐ ܓܵܘ ܛܵܝܸܦܹ̈ܐ ܒܹܝܬ̣ ܝܼܗܘܼܕܵܐ ܘܒܹܝܬ̣ ܝܼܣܪܵܝܹܠ؛ ܗܵܕܟ̣ܵܐ ܒܸܬ ܦܲܪܩܸܢܵܘܟ̣ܘܿܢ ܘܗܵܘܝܼܬܘܿܢ ܠܒܘܼܪܟܬܵܐ؛ ܘܒܸܬ ܚܲܠܸܢܝܼ ܐܝܼܕ̈ܵܬܵܘܟ̣ܘܿܢ ܘܠܵܐ ܙܵܕܥܝܼܬܘܿܢ. ܣܵܒܵܒ ܕܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ ܚܲܝܠܬܵܢܵܐ؛ ܐܲܝܟܼ ܕܚܫܸܒ̣ܠܝܼ ܠܸܥܒ̣ܵܕܵܐ ܣܪܝܼܬܵܐ ܐܸܠܵܘܟ̣ܘܿܢ ܟܲܕ ܡܘܼܟܪܸܒܠܗ݇ܘܿܢ ܐܸܠܝܼ ܒܵܒܵܘܵܬܵܘ̈ܟ̣ܘܿܢ ܒܹܐܡܵܪܵܐ ܝ݇ܠܹܗ ܡܵܪܝܵܐ ܚܲܝܠܬܵܢܵܐ ܘܠܵܐ ܕܸܪܝܼ܀ ܗܵܕܟ̣ܵܐ ܕܸܪܝܼ ܘܚܫܸܒ̣ܠܝܼ ܒܐܲܢܹܐ ܝܵܘܡܵܢܹ̈ܐ؛ ܝܵܘܡܵܢܹܐ؛ ܕܥܵܒ̣ܕܸܢ ܛܵܒ̣ܬܵܐ ܠܐܘܿܪܸܫܠܸܡ ܘܠܒܹܝܬ̣ ܝܼܗܘܼܕܵܐ ܠܵܐ ܙܵܕܥܝܼܬܘܿܢ܀ ܐܲܢܹܐ ܦܘܼܠܚܵܢܹ̈ܐ ܥܒ̣ܘܿܕܘܿܢ؛ ܗܲܡܙܸܡܘܿܢ ܗܵܩܘܼܬܵܐ ܐ݇ܢܵܫܵܐ ܥܲܡ ܚܲܒ̣ܪܹܗ ܘܕܝܼܘܵܢ ܘܗܵܩܘܼܬܵܐ ܘܫܠܵܡܵܐ ܕܘܼܢܘܿܢ ܒܬܲܪ̈ܥܵܢܵܘܟ̣ܘܿܢ؛ ܘܐ݇ܢܵܫܵܐ ܥܲܠ ܚܲܒ̣ܪܹܗ ܒܝܼܫܬܵܐ ܠܵܐ ܚܵܫܒ̣ܝܼܬܘܿܢ ܒܠܸܒܵܘܟ̣ܘܿܢ؛ ܘܡܵܘܡܵܬܹ̈ܐ ܕܘܼܓܠܵܢܹ̈ܐ ܠܵܐ ܡܲܚܸܒܝܼܬܘܿܢ؛ ܒܘܼܬ ܕܐܲܢܹܐ ܟܠܲܝܗܝ ܣܸܢܝܲܝܗܝ ܠܝܼ ܒܹܐܡܵܪܵܐ ܝ݇ܠܹܗ ܡܵܪܝܵܐ ܚܲܝܠܬܵܢܵܐ. ܗ݇ܘܹܐܠܹܗ ܥܲܠܝܼ ܚܲܒܪܹܗ ܕܡܵܪܝܵܐ ܚܲܝܠܬܵܢܵܐ ܠܹܐܡܵܪܵܐ. ܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ ܚܲܝܠܬܵܢܵܐ؛ ܨܵܘܡܵܐ ܕܐܲܪܒܥܵܐ؛ ܘܨܵܘܡܵܐ ܕܚܲܡܫܵܐ؛ ܘܨܵܘܡܵܐ ܕܫܲܒ̣ܥܵܐ؛ ܘܨܵܘܡܵܐ ܕܥܸܣܪܵܐ ܒܸܬ ܗܵܘܝܼ ܠܒܹܝܬ̣ ܝܼܗܘܼܕܵܐ ܠܦܨܵܚܵܐ ܘܚܲܕܘܼܬܵܐ ܘܥܹܐܕܵܘܵܬܹ̈ܐ ܛܵܒ̣ܹ̈ܐ. ܘܗܵܩܘܼܬܵܐ ܘܫܠܵܡܵܐ ܡܲܚܸܒܘܿܢ܀ ܦܨܘܿܚܝ ܪܵܒܵܐ ܒܪܵܬܵܐ ܕܨܸܗܝܘܿܢ؛ ܘܡܲܩܘܸܚܝ ܒܪܵܬܵܐ ܕܐܘܿܪܸܫܠܹܡ؛ ܗܵܐ ܡܲܠܟܵܟ̣ܝ ܒܹܐܬܵܝܵܐ ܐܸܠܵܟ̣ܝ؛ ܙܲܕܝܼܩܵܐ ܘܦܵܪܘܿܩܵܐ ܘܡܲܟܝܼܟ̣ܵܐ؛ ܘܪܟܝܼܒ̣ܵܐ ܥܲܠ ܚܡܵܪܵܐ ܘܥܲܠ ܓ̰ܲܥܫܵܐ ܒܲܪ ܚܡܵܪܬܵܐ؛ ܘܒܸܬ ܬܵܠܸܩ ܟܵܠܸܣܟܵܐ ܡ̣ܢ ܐܲܦܪܹܝܡ؛ ܘܣܘܼܣܹ̈ܐ ܡ̣ܢ ܐܘܿܪܸܫܠܹܡ؛ ܒܸܬ ܬܵܒ̣ܸܪ ܩܸܫܬܵܐ ܓܵܘ ܦܠܵܫܵܐ؛ ܘܗܲܡܙܸܡ ܫܠܵܡܵܐ ܥܲܡ ܛܵܝܸܦܹ̈ܐ؛ ܘܒܸܬ ܥܵܒ̣ܸܕ ܗܘܼܟܡܵܐ ܡ̣ܢ ܝܵܡܵܐ ܠܝܵܡܵܐ؛ ܘܡ̣ܢ ܢܲܗܪܵܐ ܗܲܠ ܡܲܪ̈ܙܵܢܹܐ ܕܐܲܪܥܵܐ܀ ܐܘܼܦ ܐܲܢ݇ܬ̇ ܒܕܸܡܵܐ ܕܩܵܘܠܵܐ ܕܝܼܘܼܟܼ ܫܪܹܐܠܘܼܟܼ ܐܲܣܝܼܪܹ̈ܐ ܡ̣ܢ ܓܘܼܒܵܐ ܕܠܲܝܬ̇ ܒܝܼܹܗ ܡܝܼܵܐ܀ ܝ݇ܬܘܿܒ̣ܘܿܢ ܒܩܲܠܥܵܐ ܐܲܣܝܼܪܹ̈ܐ ܕܟܢܘܼܫܬܵܐ؛ ܡ̣ܢ ܓܹܒܵܐ ܕܚܲܕ݇ ܝܵܘܡܵܐ ܬܪܹܝ ܒܸܬ ܦܲܪܥܸܢܵܘܟ̣ܘܿܢ܀
♱♱♱♱♱♱♱♱♱
ܥܹܐܕܵܐ ܕܐܘܿܫܲܥܢܹ̈ܐ
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܪ̈ܗܘܿܡܵܝܹܐ ܐܲܚܲܝ̈ ܒܲܪܸܟܼܡܵܪܝ܀
ܩܵܐ ܕܝܼܵܘܟܼܘܿܢ ܛܵܝܸܦܹ̈ܐ ܒܹܐܡܵܪܵܐ ܝ݇ܘܸܢ؛ ܐܵܢܵܐ ܕܝܼܘܸܢ ܫܠܝܼܚܵܐ ܕܛܵܝܸܦܹ̈ܐ ܠܚܸܠܡܲܬܝܼ ܒܸܚܩܵܪܵܐ ܝ݇ܘܸܢ* ܕܩܵܘܡܵܐ ܡܲܥܒܼܸܪܸܢ ܒܩܲܝܪܲܬ ܠܒܢܘܼܢܹ̈ܐ ܕܒܸܣܪܝܼ ܘܡܲܚܸܢ ܚܲܕ݇ܟܡܵܐ ܡܸܢܲܝܗܝ* ܣܵܒܵܒ ܐܸܢ ܡܲܣܠܲܝܬܵܝܗܝ ܗܘܹܐܠܵܗ̇ ܣܲܙܓܲܪܬܵܐ ܩܵܐ ܥܵܠܡܵܐ. ܟܡܵܐ ܒܘܼܫ ܙܵܘܕܵܐ ܕܝܵܪܬܲܝܗܝ؛ ܐܸܠܵܐ ܚܲܝܹ̈ܐ ܕܡ̣ܢ ܓܵܘ ܡܝܼܬܹ̈ܐ* ܐܝܼܢܵܐ ܐܸܢ ܚܡܝܼܪܵܐ ܩܲܕܝܼܫܵܐ ܝ݇ܠܹܗ ܐܘܼܦ ܓܒܼܝܼܠܬܵܐ؛ ܘܐܸܢ ܥܸܩܪܵܐ ܩܲܕܝܼܫܵܐ ܝ݇ܠܹܗ ܐܘܼܦ ܦܲܥܘܵܢܹ̈ܐ* ܘܐܸܢ ܚܲܕ݇ܟܡܵܐ ܡ̣ܢ ܦܲܥܘܵܢܹ̈ܐ ܦܸܫܠܗ݇ܘܿܢ ܟ̰ܠܝܼܦܹܐ؛ ܘܐܲܢ݇ܬ ܕܝܼܘܸܬ ܙܲܝܬܵܐ ܕܒܲܪܝܼܵܐ ܦܸܫܠܘܼܟܼ ܦܘܼܛܪܸܡܵܐ ܒܫܵܘܦܲܝܗܝ؛ ܘܗܘܹܐܠܘܼܟܼ ܫܲܪܝܼܟܵܐ ܠܥܸܩܪܹܗ ܘܫܲܡܝܼܢܘܼܬܹܗ ܕܙܲܝܬܵܐ* ܠܵܐ ܥܵܒܼܕܸܬ ܫܘܼܒܼܗܵܪܵܐ ܥܲܠ ܦܲܥܘܵܢܹ̈ܐ؛ ܘܐܸܢ ܥܵܒܼܕܸܬ ܫܘܼܒܼܗܵܪܵܐ ܠܹܐ ܝ݇ܘܸܬ ܐܲܢ݇ܬ ܛܥܝܼܢܵܐ ܠܥܸܩܪܵܐ. ܐܸܠܵܐ ܥܸܩܪܵܐ ܛܥܝܼܢܵܐ ܝ݇ܠܹܗ ܐܸܠܘܼܟܼ* ܕܩܵܘܡܵܐ ܐܵܡܪܸܬ؛ ܕܦܲܥܘܵܢܹ̈ܐ ܦܸܫܠܗ݇ܘܿܢ ܟ̰ܠܝܼܦܹܐ ܕܐܵܢܵܐ ܒܫܵܘܦܲܝܗܝ ܦܵܝܫܸܢ ܦܘܼܛܪܸܡܵܐ* ܨܦܵܝ؛ ܐܲܢܹܐ ܒܣܵܒܵܒ ܕܠܵܐ ܗܘܼܡܸܢܗ݇ܘܿܢ ܦܸܫܠܗ݇ܘܿܢ ܟ̰ܠܝܼܦܹܐ. ܐܝܼܢܵܐ ܐܲܢ݇ܬ ܒܗܲܝܡܵܢܘܼܬܵܐ ܟܠܹܐ ܠܘܼܟܼ. ܠܵܐ ܗܵܘܸܬ ܪܵܡܵܐ ܒܚܝܼܵܠܘܼܟܼ؛ ܐܸܠܵܐ ܙܕܝܼܥ* ܣܵܒܵܒ ܐܸܢ ܐܲܠܵܗܵܐ ܥܲܠ ܦܲܥܘܵܢܹ̈ܐ ܕܡ̣ܢ ܟܝܵܢܲܝܗܝ ܠܵܐ ܐ݇ܬܹܐܠܵܐ ܠܹܗ ܡܘܼܚܲܒܢܲܝܗܝ؛ ܒܲܠܟܵܐ ܐܘܼܦ ܥܲܠܘܼܟܼ ܠܹܐ ܐܵܬܝܵܐ ܠܹܗ ܡܘܼܚܲܒܢܘܼܟܼ* ܗܲܕܟܼܵܐ ܚܙܝܼ؛ ܒܲܣܝܼܡܘܼܬܹܗ ܘܩܸܫܝܘܼܬܹܗ ܕܐܲܠܵܗܵܐ. ܥܲܠ ܕܐܵܢܝܼ ܕܢܦܸܠܗ݇ܘܿܢ ܩܸܫܝܘܼܬܵܐ؛ ܐܝܼܢܵܐ ܥܲܠܘܼܟܼ ܒܲܣܝܼܡܘܼܬܵܐ. ܐܸܢ ܟܵܠܹܬ ܗܲܪ ܓܵܘ ܒܲܣܝܼܡܘܼܬܵܐ. ܘܐܸܢ ܠܵܐ؛ ܐܘܼܦ ܐܲܢ݇ܬ ܒܸܬ ܦܵܝܫܸܬ ܟ̰ܠܝܼܦܵܐ* ܘܐܘܼܦ ܐܵܢܝܼ ܐܸܢ ܠܵܐ ܟܠܵܝܼ ܒܒܵܨܘܿܪܘܼܬܵܐ ܕܗܲܝܡܵܢܘܼܬܲܝܗܝ؛ ܒܸܬ ܦܵܝܫܝܼ ܦܘܼܛܪܸܡܹܐ. ܣܵܒܵܒ ܡܵܨܹܐ ܐܲܠܵܗܵܐ ܕܡܸܢ݇ܕܪܹܫ̄ ܦܲܛܪܸܡ ܠܗ݇ܘܿܢ* ܐܸܢ ܐܲܢ݇ܬ ܕܒܟܝܵܢܘܼܟܼ ܦܸܫܠܘܼܟܼ ܟ̰ܠܝܼܦܵܐ ܡ̣ܢ ܙܲܝܬܵܐ ܕܒܲܪܝܼܵܐ. ܘܕܠܵܐ ܒܟܝܵܢܘܼܟܼ ܦܸܫܠܘܼܟܼ ܦܘܼܛܪܸܡܵܐ ܒܙܲܝܬܵܐ ܛܵܒܼܵܐ. ܒܲܣ ܟܡܵܐ ܒܘܼܫ ܙܵܘܕܵܐ ܐܵܢܝܼ ܐܸܢ ܦܵܝܫܝܼ ܦܘܼܛܪܸܡܹܐ ܒܙܲܝܬܵܐ ܕܐܲܨܠܲܝܗܝ*
♱♱♱♱♱♱♱♱♱
ܡܬܝ ܟ : 29 ‐ ܟܐ : 23
ܐܘܢܓܠܝܘܢ ܩܕܝܫܐ ܕܡܪܢ ܝܼܫܘܥ ܡܫܝܚܐ ܟܪܘܙܘܬܼܐ ܕܡܬܝ
♰ ܘܟܲܕ ܦܠܸܛܠܹܗ ܝܑܼܫܘܿܥ ܡ̣ܢ ܐܝܼܪܝܼܚܘܿ: ܐܵܬܹܐ ܗ݇ܘܵܐ ܒܵܬ݇ܪܹܗ ܟܸܢܫܵܐ ܪܵܒܵܐ: ܘܗܵܐ ܬܪܹܝ ܣܸܡܝܹܐ ܝܬܝܼܒܼܹܐ ܗ݇ܘܵܘ ܥܲܠ ܡܲܪܙܵܐ ܕܐܘܼܪܚܵܐ: ܘܟܲܕ ܫܡܸܥܠܗ݇ܘܿܢ ܕܝܼܫܘܿܥ ܒܸܥܒܼܵܪܵܐ ܝܠܹܗ: ܡܘܼܩܘܸܚܠܗ݇ܘܿܢ ܘܐܲܡܪܝܼ: ܥܒܼܘܼܕ ܪ̈ܲܚܡܹܐ ܥܲܠܲܢ ܡܵܪܝܼ ܒܪܘܿܢܹܗ ܕܕܵܘܝܼܕ: ܐܝܼܢܵܐ ܟܸܢܫܹ̈ܐ ܢܲܓ̰ܘܝܼ ܗ݇ܘܵܘ ܒܝܼܵܝܗܝ ܕܫܲܬܩܝܼ. ܘܐܵܢܝܼ ܒܘܼܫ ܙܵܘܕܵܐ ܡܘܼܪܸܡܠܗ݇ܘܿܢ ܩܵܠܲܝܗܝ ܘܐܲܡܪܝܼ: ܡܵܪܲܢ ܥܒܼܘܼܕ ܪ̈ܲܚܡܹܐ ܥܲܠܲܢ ܒܪܘܿܢܹܗ ܕܕܵܘܝܼܕ: ܘܟܠܹܐܠܹܗ ܝܑܼܫܘܿܥ، ܘܩܸܪܝܵܝܠܹܗ ܘܐ݇ܡܸܪܹܗ: ܡܘܿܕܝܼ ܒܣܵܡܵܘܟܼܘܿܢ ܝܼܠܹܗ ܕܥܲܒܼܕܸܢ ܐܸܠܵܘܟܼܘܿܢ؟ ܐܲܡܪܝܼ ܐܸܠܹܗ: ܡܵܪܲܢ ܕܦܲܝܫܝܼ ܦܬܝܼܚܹܐ ܥܲܝܢܲܝ̈ܢ: ܘܪܘܼܚܸܡܠܹܗ ܥܲܠܲܝܗܝ ܝܑܼܫܘܿܥ، ܘܕܩܸܪܹܗ ܒܥܲܝܢܲܝ̈ܗܝ: ܒܗ̇ܝ ܣܵܥܵܬ ܦܸܫܠܗ݇ܘܿܢ ܦܬܝܼܚܹܐ ܥܲܝܢܲܝܗܝ: ܘܐ݇ܙܸܠܗ݇ܘܿܢ ܒܲܬ݇ܪܹܗ. ܘܟܲܕ ܩܘܼܪܒܸܢܗ݇ܘܿܢ ܠܐܘܿܪܸܫܠܸܡ: ܘܐ݇ܬܹܐܠܗ݇ܘܿܢ ܠܒܹܝܬ ܦܵܓܹ̈ܐ ܥܲܠ ܓܹܒܵܐ ܕܛܘܼܪܵܐ ܕܙܲܝ̈ܬܹܐ: ܫܘܼܕܸܪܹܗ ܝܑܼܫܘܿܥ ܬܪܹܝ ܡ̣ܢ ܬܲܠܡܝܼܕ̈ܘܼܗܝ: ܘܐ݇ܡܸܪܹܗ ܐܸܠܲܝܗܝ: ܙܹܠ݇ܡܘܿܢ ܠܐܵܗܵܐ ܡܵܬܵܐ ܕܒܲܠܩܘܼܒ̣ܠܵܘܟܼܘܿܢ: ܒܗ̇ܝ ܥܕܵܢܵܐ ܒܸܬ ܡܲܫ݇ܟ̰ܚܝܼܬܘܿܢ ܐܲܬܵܢܵܐ ܕܐ݇ܣܝܼܪܬܵܐ ܘܥܝܼܠܵܐ ܥܲܡܵܗܿ: ܫܪܹܝܡܘܿܢ ܘܡܲܝܬܹܝܡܘܿܢ ܠܗ݇ܘܿܢ ܐܸܠܝܼ. ܘܐܸܢ ܐ݇ܢܵܫܵܐ ܐܵܡܸܪ ܐܸܠܵܘܟܼܘܿܢ ܡܸܢܕܝܼ، ܐ݇ܡܘܼܪܘܿܢ ܐܸܠܹܗ: ܕܠܡܵܪܲܢ ܠܵܙܸܡ ܝܼܢܵܐ: ܘܗܲܪ ܒܗ̇ܝ ܥܸܕܵܢܵܐ ܒܫܵܕܸܪܗ݇ܘܿܢ ܠܲܐܟܼܵܐ: ܐܝܼܢܵܐ ܐܵܗܵܐ ܟܠܵܗ̇ ܕܗ݇ܘܹܐܠܵܗ̇: ܕܦܵܐܸܫ ܬܘܼܡܸܡܵܐ ܡܸܢܕܝܼ ܕܦܸܫܠܹܗ ܐ݇ܡܝܼܪܵܐ ܒܝܲܕ ܢܒܼܝܼܵܐ ܕܐ݇ܡܸܪܹܗ: ܐ݇ܡܘܼܪܘܿܢ ܠܒܪܵܬܵܐ ܕܨܸܗܝܘܿܢ: ܗܵܐ ܡܲܠܟܹܟܼܝ ܒܹܐܬܵܝܹܟܼܝ ܝܠܹܗ: ܡܲܟܝܼܟܼܵܐ ܘܪܟܝܼܒܼܵܐ ܥܲܠ ܐܲܬܵܢܵܐ ܘܥܲܠ ܥܝܼܠܵܐ ܒܲܪ ܐܲܬܵܢܵܐ: ܘܐ݇ܙܸܠܗ݇ܘܿܢ ܬܲܠܡܝܼܕܹ̈ܐ ܘܥܒܼܸܕܠܗ݇ܘܿܢ ܕܲܐܟܼܝܼ ܕܦܩܝܼܕܠܹܗ ܐܸܠܲܝܗܝ ܝܑܼܫܘܿܥ: ܘܡܘܼܬܹܐܠܗ݇ܘܿܢ ܠܐܲܬܵܢܵܐ ܘܠܥܝܼܠܵܐ: ܘܡܘܼܬܝܼܒܼܠܗ݇ܘܿܢ ܥܲܠ ܥܝܼܠܵܐ ܓ̰ܘܼܠܲܝ̈ܗܝ: ܘܪܟܸܒܼܠܹܗ ܥܲܠܹܗ ܝܑܼܫܘܿܥ. ܘܒܘܼܫܵܝܝܼ ܕܟܸܢܫܹ̈ܐ ܫܵܘܝܼ ܗ݇ܘܵܘ ܓ̰ܘܼܠܲܝ̈ܗܝ ܒܐܘܼܪܚܵܐ: ܐܝܼܢܵܐ ܐ݇ܚܹܪ̈݇ܢܹܐ ܩܲܛܥܝܼ ܗ݇ܘܵܘ ܦܲܥܘܹ̈ܐ ܡ̣ܢ ܐܝܼܠܵܢܹ̈ܐ ܘܕܵܪܝܼ ܗ݇ܘܵܘ ܒܐܘܼܪܚܵܐ: ܐܝܼܢܵܐ ܟܸܢܫܹ̈ܐ ܕܐܵܙܠ݇ܝܼ ܗ݇ܘܵܘ ܩܵܕ݇ܡܵܐ ܩܵܕ݇ܡܘܼܗܝ ܘܐܵܬܝܼ ܗ݇ܘܵܘ ܒܵܬ݇ܪܵܐ ܒܵܬ݇ܪܹܗ: ܡܲܩܘܸܚܝܼ ܗ݇ܘܵܘ ܘܐܲܡܪܝܼ: ܐܘܿܫܲܥܢܵܐ ܠܲܒ̣ܪܹܗ ܕܕܵܘܝܼܕ: ܒܪܝܼܟܼܵܐ ܝܼܠܹܗ ܕܒܹܐܬܵܝܵܐ ܝܠܹܗ ܒܫܸܡܹܗ ܕܡܵܪܝܵܐ: ܐܘܿܫܲܥܢܵܐ ܒܲܡܪ̈ܵܘܡܹܐ. ܘܟܲܕ ܥܒܼܸܪܹܗ ܠܐܘܿܪܸܫܠܸܡ: ܫܓ݂ܝܼܫ̰ܠܵܗ̇ ܟܠܵܗ̇ ܡܕܝܼܢ݇ܬܵܐ: ܘܐܲܡܪܝܼ ܗ݇ܘܵܘ: ܡܵܢܝܼ ܝܠܹܗ ܐܵܗܵܐ؟ ܐܝܼܢܵܐ ܟܸܢܫܹ̈ܐ ܐܲܡܪܝܼ ܗ݇ܘܵܘ: ܐܵܗܵܐ ܝܼܠܹܗ ܝܑܼܫܘܿܥ ܢܒܼܝܼܵܐ ܕܡ̣ܢ ܢܵܨܪܲܬ ܕܓܠܝܼܠܵܐ: ܘܥܒܼܸܪܹܗ ܝܑܼܫܘܿܥ ܠܗܲܝܟܠܵܐ ܕܐܲܠܵܗܵܐ ܘܦܘܼܠܸܛܠܹܗ ܠܟܠܲܝܗܝ ܐܲܝܢܝܼ ܕܒܸܙܒܼܵܢܵܐ ܗ݇ܘܵܘ ܘܙܵܒܘܼܢܹܐ ܒܗܲܝܟܠܵܐ: ܘܡܘܼܚܕܸܪܹܗ ܦܵܬܘܿܪܹ̈ܐ ܕܨܲܪ̈ܵܦܹܐ ܘܟܘܼܪ̈ܣܵܘܵܬܵܐ ܕܐܵܢܝܼ ܕܡܙܵܒܘܼܢܹܐ ܗ݇ܘܵܘ ܝܵܘܢܹ̈ܐ: ܘܐ݇ܡܸܪܹܗ ܐܸܠܲܝܗܝ: ܟܬܝܼܒܼܵܐ ܝܠܹܗ: ܕܒܲܝܬܝܼ ܒܲܝܬܵܐ ܕܨܠܘܿܬܵܐ ܦܝܵܫܵܐ ܝܠܹܗ ܩܸܪܝܵܐ: ܐܝܼܢܵܐ ܐܲܚܬܘܿܢ ܥܒܼܸܕܠܵܘܟܼܘܿܢ ܓܸܦܝܼܬܵܐ ܕܠܸܣܛܵܝܹ̈ܐ. ܘܡܘܼܩܪܸܒܼܠܗ݇ܘܿܢ ܠܟܸܣܠܹܗ ܣܸܡܝܹ̈ܐ ܘܣܲܩܲܛܹ̈ܐ ܘܒܘܼܣܡܵܝܠܹܗ: ܐܝܼܢܵܐ ܟܲܕ ܚܙܹܐܠܗ݇ܘܿܢ ܪ̈ܲܒܲܝ ܟܵܗܢܹ̈ܐ ܘܦܪ̈ܝܼܫܹܐ ܥܵܓ̰ܒܘܵܬܹ̈ܐ ܕܥܵܒܼܸܕ ܗ݇ܘܵܐ: ܘܛܠܵܝܹ̈ܐ ܕܡܲܩܘܘܼܚܹܐ ܓܵܘ ܗܲܝܟܠܵܐ ܘܒܹܐܡܵܪܵܐ: ܐܘܿܫܲܥܢܵܐ ܠܲܒ̣ܪܹܗ ܕܕܵܘܝܼܕ: ܣܩܝܼܕܠܗ݇ܘܿܢ. ܘܐܲܡܪܝܼ ܐܸܠܹܗ: ܒܸܫܡܵܥܵܐ ܝܘܸܬ ܡܘܿܕܝܼ ܒܹܐܡܵܪܵܐ ܝܢܵܐ ܐܲܢܹܐ؟ ܐܵܡܸܪ ܐܸܠܲܝܗܝ ܝܑܼܫܘܿܥ ܗܹܐ: ܡ̣ܢ ܩܲܕ݇ܡܵܝܬܵܐ ܠܵܐ ܩܪܹܐܠܵܘܟܼܘܿܢ: ܕܡ̣ܢ ܦܘܼܡܵܐ ܕܛܠܵܝܹ̈ܐ ܘܕܝܲܠܘܼܕܹ̈ܐ ܬܘܼܪܸܨܠܘܼܟܼ ܬܸܫܒܘܿܚܬܵܐ؟ ܘܫܒܼܝܼܩܲܝܠܹܗ ܘܦܠܸܛܠܹܗ ܠܒܼܲܕܲܪ ܡ̣ܢ ܡܕܝܼܢ݇ܬܵܐ ܠܒܹܝܬ ܥܲܢܝܵܐ: ܘܦܸܫܠܹܗ ܒܠܸܠܝܵܐ ܬܵܡܵܐ: ܐܝܼܢܵܐ ܒܨܲܦܪܵܐ ܟܲܕ ܕܥܸܪܹܗ ܠܡܕܝܼܢ݇ܬܵܐ ܟܦܸܢܹܗ: ܘܚܙܹܐܠܹܗ ܚܕܵܐ ܬܹܐܢܵܐ ܒܐܘܼܪܚܵܐ: ܘܐ݇ܬܹܐܠܹܗ ܠܟܸܣܠܵܗ̇، ܘܠܵܐ ܡܘܼܫ݇ܟ̰ܸܚܠܹܗ ܒܝܼܵܗ̇ ܡܸܢܕܝܼ ܐܸܠܵܐ ܐܸܢ ܛܲܪ̈ܦܹܐ ܐܲܚܟ̰ܝܼ. ܘܐ݇ܡܸܪܹܗ ܐܸܠܵܗ̇: ܠܥܵܠܲܡ ܠܵܐ ܗܵܘܹܐ ܒܝܼܹܟܼܝ ܛܥܘܿܢܝܵܬܹ̈ܐ ܡܸܢ݇ܕܪܹܫ݇. ܘܗܲܪ ܒܗ̇ܝ ܥܕܵܢܵܐ ܒܪܸܙܠܵܗ̇ ܗ̇ܝ ܬܹܐܢܵܐ: ܘܚܙܹܐܠܗ݇ܘܿܢ ܬܲܠܡܝܼܕܹ̈ܐ ܘܥܘܼܓ̰ܸܒܠܗ݇ܘܿܢ ܘܐܲܡܪܝܼ: ܕܲܐܟܼܝܼ ܒܐܵܗܵܐ ܣܵܥܵܬ ܒܪܸܙܠܵܗ̇ ܬܹܐܢܵܐ؟ ܓ̰ܘܼܘܸܒܠܹܗ ܝܑܼܫܘܿܥ ܘܐ݇ܡܸܪܹܗ ܐܸܠܲܝܗܝ: ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܕܐܸܢ ܗܵܘܝܵܐ ܒܝܼܵܘܟܼܘܿܢ ܗܲܝܡܵܢܘܼܬܵܐ: ܘܠܵܐ ܗܵܘܹܐ ܒܝܼܵܘܟܼܘܿܢ ܦܘܼܠܵܓܼܵܐ: ܠܵܐ ܐܲܚܟ̰ܝܼ ܐܵܗܵܐ ܕܬܹܐܢܵܐ ܒܸܬ ܥܲܒܼܕܝܼܬܘܿܢ: ܐܸܠܵܐ ܐܵܦܸܢ ܠܐܵܗܵܐ ܛܘܼܪܵܐ ܐܲܡܪܝܼܬܘܿܢ: ܕܦܘܼܫ ܫܩܝܼܠܵܐ ܘܢܦܘܼܠ ܒܝܵܡܵܐ ܒܸܬ ܗܵܘܹܐ: ܘܟܠ ܡܸܢܕܝܼ ܕܛܲܠܒܝܼܬܘܿܢ ܒܨܠܘܿܬܵܐ ܘܗܲܡܸܢܝܼܬܘܿܢ: ܒܸܬ ܫܲܩܠܝܼܬܘܿܢ.
♱♱♱♱♱♱♱♱♱