ܕܘܼܟܼܪܵܢܵܐ ܕܡܵܪܝ
ܓܝܼܘܲܪܓܝܼܣ ܣܵܗܕܵܐ
ܕܗܵܘܹ̇ܐ (ܟܕ) ܒܢܝܼܣܵܢ ܝܲܪܚܵܐ
ܡܲܪܡܝܼܬܼܵܐ ܕܐ݇ܪ̈ܵܙܹܐ. ܫܡܲܝܵܐ ܡܸܫܬܲܥܹܝܢ ܫܘܼܒܼܚܹܗ ܕܐܲܠܵܗܵܐ.
ܐܲܩܲܦܬܵܐ؛ ܡܣܲܟܸ̇ܐ ܪܲܫܝܼܥܵܐ ܠܙܲܕ̇ܝܼܩܵܐ ܘܒ̣ܵܥܹܐ ܠܡܸܩܛܠܹܗ܀
ܥܘܼܢܵܝܵܐ. ܘܡܵܪܝܵܐ ܠܵܐ ܢܫܒ̇ܩܝܼܘܗܝ ܒܐܝܼܕܼܵܘ̈ܗܝ܀
ܕܩܲܢܟܹ̇ܐ. ܒܩܵܠ؛ ܣܵܗܕܵܘ̈ܗܝ ܕܲܒ̣ܪܵܐ.
ܢܸܬܸ̇ܠ ܠܵܟܼ ܡܵܪܝܵܐ ܐܲܝܟܼ ܠܸܒܵܟܼ. ܙܲܕ̇ܝܼܩܵܐ ܘܲܬܼܪܝܼܨܵܐ. ܡܵܪܝ ܓܝܼܘܲܪܓܝܼܣ ܛܘܼܒ̣ܵܢܵܐ. ܣܵܗܕܵܐ ܙܲܗܝܵܐ ܘܩܲܕ̇ܝܼܫܵܐ. ܕܩܲܒܸ̇ܠ ܡܵܘܬܵܐ ܚܠܵܦ ܡܵܪܹܗ. ܘܲܙܟܼܵܐ ܠܟܼܠܵܗ̇ ܒܝܼܫܘܼܬܼܗܘܿܢ. ܘܲܠܨܸܢ̈ܥܵܬ̣ܗܘܿܢ ܕܪ̈ܲܫܝܼܥܹܐ. ܒܚܲܝܠܹܗ ܪܲܒܵܐ ܕܲܨܠܝܼܒ̣ܵܐ؛ ܬܢܝܼ؛ ܫܲܒܲܚ. ܨܠܘܿܬܼܵܟܼ ܣܵܗܕܵܐ ܬܸܗܘܸܐ ܠܲܢ. ܫܘܼܪܵܐ ܪܵܡܵܐ ܘܒܹܝܬܼ ܓܵܘܣܵܐ. ܘܓܹܐܪ̈ܵܘܗܝ ܕܒܼܝܼܫܵܐ ܢܸܫܬܲܗܘܿܢ. ܕܠܵܐ ܢܸܒ̣ܪܘܿܨ ܒܲܢ ܠܘܿܠܝܼܬܹܗ. ܣܵܢ̇ܐܹܗ ܕܓܸܢܣܲܢ ܒܥܸܠܕܲܪܵܐ. ܕܨܵܒܹܐ ܟܠܫܵܥ ܒܐܲܒ̣ܕܵܢܲܢ.
ܩܸܪܝܵܢܵܐ؛ ܕܵܢܝܼܐܹܝܠ؛ ܘ؛ 6‐ܫܘܼܠܵܡܵܐ ܚܲܒ̣ܪܹܗ؛ ܦܪܲܟܿܣܝܼܣ؛ ܝܒ؛ 1‐25
ܫܘܼܪܝܵܐ؛ ܚܸܟ̣ܡܬܼܵܐ ܪܵܢܹ̇ܐ ܦܘܼܡܹܗ ܕܙܲܕܝܼܩܵܐ. ܠܕܘܼܟܼܪܵܢܹܗ ܕܣܵܗܕܵܐ ܢܝܲܩܲܪ؛ ܒܲܙܡܝܼܪ̈ܵܬܼܵܐ ܕܪܘܼܚܵܐ؛ ܗܲܠܸܠܘܼܝܲܗ ܗܲܠܸܠܘܼܝܲܗ ܐܹܗܲܠܸܠܘܼܝܲܗ܀ ܦܘܼܢܵܝܵܐ܀ ܘܠܸܫܵܢܹܗ ܡܡܲܠܸܠ ܕܝܼܢܵܐ؛ ܠܕܼܘܼܟܼܪܵܢܹܗ ܕܣܵܗܕܵܐ܀ ܫܲܒܲܚ܀ ܠܕܼܘܼܟܼܪܵܢܹܗ ܕܣܵܗܕܵܐ܀ ܥܵܠܲܡ܀ ܠܕܼܘܼܟܼܪܵܢܹܗ ܕܣܵܗܕܵܐ܀
ܫܠܝܼܚܵܐ؛ ܦܝܼܠܝܼܦܣܵܝܹ̈ܐ؛ ܐ؛ 12‐27. (ܐܵܘ) ܒ؛ ܩܘܿܪ̈ܲܢܬܼܵܝܹܐ. ܝܒ؛ 1‐14.
ܙܘܼܡܵܪܵܐ؛ ܒܪܵܥܝܹܗ܀ ܡܵܪܝܵܐ ܢܘܼܗ̱ܪܝ ܘܦܘܼܪܩܵܢܝ ܡ̣ܢ ܡܲܢ ܐܸܕܼܚܲܠ. ܡܵܪܝܵܐ ܥܘܼܫܢܵܐ ܕܚܲܝܲܝ̈ ܡ̣ܢ ܡܲܢܘܼ ܙܵܐܲܥ̇ ܐ݇ܢܵܐ. ܒ܀ ܟܲܕܼ ܩ̣ܪܸܒ̣ܘ ܠܝܼ ܒܝܼܫܹ̈ܐ ܠܡܹܐܟܲܠ ܒܸܣܪ̱ܝ. ܒܥܸܠܕܒܼܵܒܲܝ̈ ܘܣܵܢܐܲܝ̈. ܐܲܟ̣ܚ݇ܕܼܵܐ ܐܸܣܬܲܚܲܦܘ ܘܲܢ̣ܦܲܠܘ. ܓ܀
ܐܹܘܲܢܓܲܠܝܼܘܿܢ؛ ܡܲܬܲܝ؛ ܝ؛ 37‐ܫܘܼܠܵܡܵܐ. ܐܲܩܸܦ؛ ܝܛ؛ 27‐ܫܘܼܠܵܡܵܐ
ܕܐ݇ܪ̈ܵܙܹܐ؛ ܒܣܵܗܕܹ̈ܐ ܒܪ̈ܝܼܟܹܐ.
ܬܵܘ ܢܫܲܒܲܚ ܠܡܵܪܝܵܐ؛ ܐܲܝܠܹܝܢ ܕܩܵܝ̇ܡܝܼܢ ܒܒܲܝܬܹ̇ܗ ܕܡܵܪܝܵܐ ܒܠܲܝ̈ܠܵܘܵܬܼܵܐ. ܒܡܸ̈ܠܹܐ ܕܬܸܫ̈ܒ̇ܚܵܬܼܵܐ. ܙܥܘܿܪܹ̈ܐ ܥܲܡ ܪܵܘܪ̱̈ܒܹܐ. ܟܠܲܢ ܒܕܸܚܠ̱ܬܼܵܐ ܢܝܲܩܪܝܼܘܗܝ ܚܦܝܼܛܵܐܝܼܬܼ ܠܝܵܘܡܵܐ ܕܕܼܘܼܟܼܪܵܢܹܗ. ܕܣܵܗܕܵܐ ܙܲܗܝܵܐ ܘܩܲܕ̇ܝܼܫܵܐ. ܡܵܪܝ ܓܝܼܘܲܪܓܝܼܣ ܢܲܨܝܼܚܵܐ. ܕܲܗܘܸܵܐ ܕܸܒ̣ܚܵܐ ܠܐܲܠܵܗܵܐ. ܘܩܘܼܪܒܵܢܵܐ ܕܲܟ̣ܝܵܐ ܕܠܵܐ ܡܘܼܡ. ܒܲܨܠܘܿܬܹܗ ܢܸܗܘܘܿܢ ܥܠܲܝܢ ܪ̈ܲܚܡܹܐ؛ ܬܢܝܼ؛ ܫܲܒܲܚ. ܒܩܵܠ. ܗ̇ܘ ܕܒܼܐܝܼܬܼܘܼܬܹܗ. ܬܸܓ̣ܡܹ̈ܐ ܘܛܲܟܼܣܹ̈ܐ ܕܪ̈ܘܼܚܵܢܹܐ؛ ܥܲܡܗܘܿܢ ܕܟܼܵܗܢܹ̈ܐ ܒܥܹܕ̇ܬܵܐ ܗܵܐ ܙܵܡ̇ܪܝܼܢ ܬܸܫܒ̇ܘܿܚܬܵܐ ܒܕܼܘܼܟܼܪܵܢ ܣܵܗܕܵܐ ܩܲܕ̇ܝܼܫܵܐ؛ ܡܵܪܝ ܓܝܼܘܲܪܓܝܼܣ ܕܲܢ̣ܨܲܚ ܘܲܙ̣ܟܼܵܐ ܘܐܸܬܼܟܲܠܲܠ܀ ܘܣܲܝܒܲܪ ܚܲܫܹ̈ܐ ܘܐܘܼܠܨܵܢܹ̈ܐ؛ ܢܘܼܪܵܐ ܘܣܲܝܦܵܐ ܘܲܪܓ̣ܘܼܡܝܵܐ. ܘܫܸܢܕܹ̈ܐ ܕܲܙܢ̈ܝܼܢ ܙܢܝܼ̈ܢ؛ ܡܲܣܒ̇ܠܝܼܢ ܗ݇ܘ̣ܵܘ ܠܹܗ ܪ̈ܵܕܼܘܿܦܹܐ. ܘܐܲܒ̣ܗܸܬܼ ܠܡܲܠܟܵܐ ܪܲܫܝܼܥܵܐ؛ ܕܪܵܕܹܦ ܗ݇ܘ̣ܵܐ ܠܥܲܒ̣ܕܹ̈ܐ ܛܵܒܹ̈ܐ. ܘܒܲܣܲܪ ܠܐܝܼܩܵܪ ܫܘܼܠܛܵܢܹܗ؛ ܐܵܦ ܠܐܲܠܵܗܹ̈ܐ ܕܣܵܓܹܕܼ ܗ݇ܘ̣ܵܐ. ܙܝܼܘܿܣ ܘܐܵܦܲܠܘܿ ܘܐܲܪܛܹܡܝܼܣ؛ ܥܒ̣ܵܕܼ ܐܝܼ̈ܕܲܝܵܐ ܕܒܲܪܢܵܫܵܐ؛ ܘܲܩ̣ܥܵܐ ܓܲܢ݇ܒܵܪ ܚܲܝܠܵܐ ܡܵܪܝ ܓܝܼܘܲܪܓܝܼܣ؛ ܘܐܸܡܲܪ ܠܪܵܘܪ̈ܒ̣ܵܢܲܝ ܡܲܠܟܵܐ. ܕܠܵܐ ܠܲܡ ܬܸܣܓ̇ܕܼܘܼܢ ܠܲܦܬܲܟ̣ܪܹ̈ܐ؛ ܓܠܝܼܦܹ̈ܐ ܡܪ̈ܲܟ̇ܒܲܝ ܠܐܘܼܡܵܢܹ̈ܐ. ܕܗܵܐ ܡܫܝܼܚܵܐ ܡܲܠܟܵܐ ܕܡܲܠܟܹ̈ܐ؛ ܘܡܵܪܵܐ ܕܟ̣ܠܗܘܿܢ ܐܲܠܵܗܹ̈ܐ. ܡܵܘܪܸܬ̣ ܠܟܼܠܗܘܿܢ ܕܵܚܠܵܘ̈ܗܝ؛ ܓܢܘܿܢܵܐ ܘܛܘܼܒ̣ܵܐ ܕܠܵܐ ܥܵܒܲܪ. ܘܡܲܠܒܸ̇ܫ ܫܘܼܒ̣ܚܵܐ ܒܡܲܠܟ̇ܘܼܬܹܗ؛ ܠܣܵܗܕܹ̈ܐ ܙܗܲܝ̈ܵܐ ܕܗܲܝܡܸܢ̣ܘ ܒܹܗ܀ ܘܟܲܕܼ ܒܲܪܝܼܟܼ ܗ݇ܘ̣ܵܐ ܒܲܨܠܘܿܬܼܵܐ؛ ܩܕܼܵܡ ܡܵܪܹܗ ܘܡܸܬ̣ܟܲܫܲܦ ܗ݇ܘ̣ܵܐ ܘܒܼܵܥܹ̇ܐ ܘܐܵܡܲܪ. ܕܟܼܠ ܐܲܝܢܵܐ ܕܲܡܥܲܗܸܕܼ ܠܹܗ؛ ܠܝܵܘܡܵܐ ܗܵܢܵܐ ܕܲܪܕܼܝܼܦܘܼܬܼܝ. ܐܲܥܒܲܪ ܡܸܢܹܗ ܒܛܲܝܒ̇ܘܼܬܼܵܟܼ؛ ܒܲܪܕܼܵܐ ܘܟܲܦܢܵܐ ܘܡܵܘܬܵܢܵܐ. ܘܩܲܡܨܵܐ ܘܙܵܚܠܵܐ ܘܨܲܪܨܘܼܪܵܐ؛ ܘܫܵܘܒܵܐ ܡܚܲܒܸ̇ܠ ܚܲܩ̈ܠܵܬܼܵܐ. ܘܕܸܚܠ̱ܬܼܵܐ ܕܠܲܝ̈ܠܵܘܵܬܼܵܐ؛ ܘܟܼܠ ܡܲܪ̈ܕܘܵܬܼܵܐ ܒܝܼ̈ܫܵܬܼܵܐ. ܘܢܲܛܲܪ ܠܟܼܠܵܗ̇ ܥܵܡܲܪܬܵܐ. ܒܚܲܝܠܵܐ ܪܲܒܵܐ ܕܐܲܠܵܗܘܼܬܼܵܟܼ܀
ܕܒܹܝܡ؛ ܥܘܼܢܵܝܵܐ. ܒܗܵܘ̇ ܕܡܲܪܝܲܡ. ܒܪܝܼܟܼܘܼ ܕܐܵܘܪܸܒܼ ܒܲܚܢܵܢܹܗ. ܠܝܘܿܡ ܕܘܼܟܼܪܵܢܹܗ ܕܩܲܕ̇ܝܼܫܵܐ. ܘܢܲܨܝܼܚܵܐ ܡܵܪܝ ܓܝܼܘܲܪܓܝܼܣ. ܒܪܵܘܡܵܐ ܘܥܘܼܡܩܵܐ ܫܲܘܝܵܐܝܼܬܼ. ܘܡܸܛܠ ܗܵܕܹܐ ܐܵܦ ܚܢܲܢ ܟܠܲܢ ܡܫܲܒ̇ܚܝܼܢܲܢ. ܠܗܵܘ̇ ܕܐܲܫ̣ܘ̱ܝܹܗ ܠܗܵܢܵܐ ܫܘܼܒ̣ܚܵܐ܀ ܘܲܒܼܚܲܕܼܘܼܬܼܵܐ ܢܪܲܡܪܸܡ ܘܢܹܐܡܲܪ ܗܲܠܸܠܘܼܝܲܗ.
ܒܵܬܹ̈ܐ؛ ܬܵܘ ܚܲܒ̇ܝܼܒܲܝ̈ ܢܝܲܩܲܪ ܒܚܘܼܒܵܐ ܠܝܘܿܡ ܕܘܼܟܼܪܵܢܹܗ ܕܣܵܗܕܵܐ ܙܲܗܝܵܐ܀ ܣܵܗܕܵܐ ܙܲܗܝܵܐ ܡܵܪܝ ܓܝܼܘܲܪܓܝܼܣ. ܟܡܵܐ ܪܲܒ̇ ܛܘܼܒ̣ܵܐ ܕܲܡܛܲܝܲܒ̣ ܠܵܟܼ܀ ܘܲܒܼܚܲܕܼܘܼܬܼܵܐ ܢܪܲܡܪܸܡ ܘܢܹܐܡܲܪ ܗܲܠܸܠܘܼܝܲܗ.