ܕܘܼܟ̣ܪܵܢܵܐ ܕܡܵܪܝ ܓܝܼܘܲܪܓܝܼܣ ܣܵܗܕܵܐ
ܕܗܵܘܹܐ ܟܕ ܒܢܝܼܣܵܢ
ܕܵܢܝܼܐܹܝܠ؛ ܘ؛ 6‐25
ܬܸܒ̣ܘ ܘܲܫܠܵܘ ܢܒ̣ܝܼܘܼܬܹܗ ܕܕܵܢܝܼܐܹܝܠ؛ ܐܲܚܲܝ̈ ܒܲܪܸܟ̣ܡܵܪܝ܀
ܗܵܝܓܵܗ̇ ܩܘܼܪܒܸܢܗ݇ܘܿܢ ܗܵܟܝܼܡܹ̈ܐ ܘܓܘܼܪ̈ܵܢܹܐ ܕܚܲܝܠܵܘܵܬܹ̈ܐ ܠܟܸܣ ܡܲܠܟܵܐ ܘܐܵܡܪܝܼ ܐܸܠܹܗ؛ ܕܲܪܝܵܘܿܫ ܡܲܠܟܵܐ ܠܥܵܠܲܡ ܚܝܝܼ܀ ܩܛܸܥܠܗ݇ܘܿܢ ܟܠܲܝܗܝ ܪܹ̈ܫܵܢܹܐ ܕܡܲܠܟܘܼܬܵܐ ܘܓܘܼܪ̈ܵܢܹܐ ܘܪ̈ܲܒܲܝ ܚܲܝܠܹ̈ܐ ܘܡܵܪ̈ܵܘܵܬܹܐ ܠܡܲܩܘܼܡܹܐ ܩܵܘܠܵܐ ܩܵܐ ܡܲܠܟܵܐ ܘܠܡܲܩܘܘܼܝܹܐ ܝܸܣܘܼܪܵܐ ܕܟܠ ܐ݇ܢܵܫܵܐ ܕܛܵܠܸܒ ܚܲܕ݇ ܡܲܛܠܲܒ ܡ̣ܢ ܟܠ ܐܲܠܵܗܵܐ ܘܐ݇ܢܵܫܵܐ؛ ܗܲܠ ܬܠܵܬܝܼ ܝܵܘܡܵܢܹ̈ܐ ܫܒ̣ܘܿܩ ܡܸܢܘܼܟܼ ܡܲܠܟܵܐ؛ ܦܵܐܹܫ ܪܘܼܦܝܵܐ ܒܓܘܼܒܵܐ ܕܐܲܪ̈ܝܵܘܵܬܹܐ܀ ܡܐܵܕܝܼܵܐ ܡܲܠܟܵܐ ܒܸܬ ܦܲܩܕܸܬ̇ ܐܵܗܵܐ ܦܘܼܩܕܵܢܵܐ؛ ܘܒܸܬ ܟܵܬܒ̣ܸܬ̇ ܟܬܵܒ̣ܵܐ ܕܠܵܐ ܫܲܚܠܸܦ ܒܢܵܡܘܿܣܵܐ ܕܡܵܕܲܝ ܘܦܵܪܸܣ ܕܠܹܐ ܦܵܐܹܫ ܡܘܼܚܠܸܦܵܐ܀ ܗܵܝܓܵܗ̇ ܕܲܪܝܵܘܿܫ ܡܲܠܟܵܐ ܪܫܝܼܡܠܹܗ ܟܬܵܒ̣ܵܐ ܘܦܩܸܕܠܹܗ ܦܘܼܩܕܵܢܵܐ܀ ܘܟܲܕ ܝ݇ܕܝܼܥܠܹܗ ܕܵܢܝܼܐܹܝܠ؛ ܕܦܸܫܠܹܗ ܪܫܝܼܡܵܐ ܟܬܵܒ̣ܵܐ؛ ܥܒ̣ܸܪܹܗ ܠܒܲܝܬܹܗ؛ ܘܟܵܘܵܬܹ̈ܐ ܠܥܸܠܝܼܬܵܐ ܦܬܝܼܚܹ̈ܐ ܗ݇ܘܵܘ ܒܲܪܩܘܼܒ̣ܠ ܐܘܿܪܸܫܠܹܡ܀ ܘܬܵܠܵܬܵܐ ܓܵܗܹ̈ܐ ܒܝܵܘܡܵܐ ܒܵܪܸܟ ܗ݇ܘܵܐ ܥܲܠ ܒܸܪ̈ܟܵܟܘܼܗܝ ܘܨܵܠܹܐ ܗ݇ܘܵܐ ܨܠܘܿܬܵܐ ܘܡܵܘܕܹܐ ܗ݇ܘܵܐ ܩܵܕ݇ܡ ܐܲܠܵܗܹܗ؛ ܐܲܝܟܼ ܕܥܵܒ̣ܸܕ ܗ݇ܘܵܐ ܡ̣ܢ ܩܲܕ݇ܡܵܝܬܵܐ܀ ܗܵܝܓܵܗ̇ ܐܵܢܝܼ ܐ݇ܢܵܫܹ̈ܐ ܢܛܸܪܗ݇ܘܿܢ ܘܡܘܼܫ݇ܟ̰ܸܚܠܗ݇ܘܿܢ ܠܕܵܢܝܼܐܹܝܠ ܟܲܕ ܒܸܛܠܵܒܵܐ ܘܦܲܪܦܘܼܠܹܐ ܩܵܕ݇ܡ ܐܲܠܵܗܹܗ܀ ܗܵܝܓܵܗ̇ ܩܘܼܪܒܸܢܗ݇ܘܿܢ ܘܐ݇ܡܸܪܗ݇ܘܿܢ ܩܵܕ݇ܡ ܡܲܠܟܵܐ. ܡܲܠܟܵܐ ܠܥܵܠܲܡ ܚܝܝܼ؛ ܠܵܐ ܩܛܝܼܥܠܘܼܟܼ ܝܵܐ ܡܲܠܟܵܐ ܘܪܫܝܼܡܠܘܟܼ؛ ܕܟܠ ܐ݇ܢܵܫܵܐ ܕܛܵܠܸܒ ܚܲܕ ܡܲܛܠܲܒ ܡ̣ܢ ܟܠ ܐܲܠܵܗܵܐ ܘܐ݇ܢܵܫܵܐ ܗܲܠ ܬܠܵܬܝܼ ܝܵܘܡܵܢܹ̈ܐ؛ ܫܒ̣ܘܿܩ ܡܸܢܘܼܟܼ ܡܲܠܟܵܐ ܦܵܐܹܫ ܪܘܼܦܝܵܐ ܒܓܘܼܒܵܐ ܕܐܲܪ̈ܝܵܘܵܬܹܐ؟ ܓ̰ܘܼܘܸܒܠܹܗ ܡܲܠܟܵܐ ܗܲܩ ܝܼܠܹܗ ܐܵܗܵܐ ܚܲܒܪܵܐ؛ ܐܲܝܟܼ ܢܵܡܘܿܣܵܐ ܕܡܵܕܲܝ ܘܦܵܪܸܣ ܕܠܹܐ ܫܲܚܠܸܦ܀ ܗܵܝܓܵܗ̇ ܓ̰ܘܼܘܸܒܠܗ݇ܘܿܢ ܘܐܵܡܪܝܼ ܩܵܕ݇ܡ ܡܲܠܟܵܐ. ܕܵܢܝܼܐܹܝܠ ܡ̣ܢ ܒܢܲܝ̈ ܫܒ̣ܝܼܬܵܐ ܕܝܼܗܘܼܕ؛ ܠܵܐ ܟܠܹܐܠܹܗ ܥܲܠ ܩܛܥܵܝܬܵܐ ܕܩܛܝܼܥܠܘܼܟܼ. ܘܬܠܵܬܵܐ ܓܵܗܹ̈ܐ ܒܝܵܘܡܵܐ ܒܸܛܠܵܒܵܐ ܝ݇ܠܹܗ ܒܵܥܘܼܬܹܗ܀ ܐܝܼܡܲܢ ܕܡܲܠܟܵܐ ܫܡܝܼܥܠܹܗ ܐܵܗܵܐ ܚܲܒܪܵܐ ܪܵܒܵܐ ܦܫܝܼܡܠܹܗ؛ ܘܩܛܸܥܠܹܗ ܒܚܝܼܵܠܹܗ ܕܦܵܨܹܐܠܹܗ ܕܵܢܝܼܐܹܝܠ؛ ܗܲܠ ܓܢܵܝܬܵܐ ܕܫܸܡܫܵܐ ܓ̰ܵܪܘܿܒܹܐ ܗ݇ܘܵܐ ܕܦܵܨܹܐܠܹܗ܀ ܗܵܝܓܵܗ̇ ܐܵܢܝܼ ܐ݇ܢܵܫܹ̈ܐ ܡܘܼܩܘܸܚܠܗ݇ܘܿܢ ܥܲܠ ܡܲܠܟܵܐ ܘܐ݇ܡܸܪܗ݇ܘܿܢ ܐܸܠܹܗ؛ ܝ݇ܕܝܼܥ ܝܵܐ ܡܲܠܟܵܐ؛ ܕܐܝܼܬ ܫܲܪܥܲܬ ܠܡܵܕܲܝ ܘܦܵܪܸܣ؛ ܕܟܠ ܩܛܥܵܝܬܵܐ ܘܩܵܘܠܵܐ ܕܡܲܬܸܒ̣ ܡܲܠܟܵܐ ܠܹܐ ܡܫܵܢܹܐ܀ ܗܵܝܓܵܗ̇ ܦܘܼܩܸܕܠܹܗ ܡܲܠܟܵܐ ܘܡܘܼܬܹܐܠܗ݇ܘܿܢ ܕܵܢܝܼܐܹܝܠ ܘܕܪܹܐܠܗ݇ܘܿܢ ܓܵܘ ܓܘܼܒܵܐ ܕܐܲܪ̈ܝܵܘܵܬܹܐ. ܓ̰ܘܼܘܸܒܠܹܗ ܡܲܠܟܵܐ ܘܐ݇ܡܸܪܹܗ ܠܕܵܢܝܼܐܹܝܠ؛ ܐܲܠܵܗܘܼܟܼ ܕܐܲܢ݇ܬ̇ ܦܵܠܚܸܬ̇ܠܹܗ ܒܕܵܝܸܡܘܼܬܵܐ؛ ܗ̇ܘ ܒܸܬ ܦܵܪܸܩܠܘܼܟܼ܀ ܘܡܘܼܬܹܐܠܗ݇ܘܿܢ ܚܲܕ݇ ܟܹܐܦܵܐ ܘܡܘܼܬܸܒ̣ܠܗ݇ܘܿܢ ܥܲܠ ܦܘܼܡܹܗ ܕܓܘܼܒܵܐ ܘܚܬܝܼܡܠܹܗ ܡܲܠܟܵܐ ܒܥܹܙܲܩܬܹܗ؛ ܘܒܥܹܙܲܩܬܵܐ ܕܓܘܼܪ̈ܵܢܹܐ؛ ܕܠܵܐ ܡܫܲܢܝܵܐ ܩܸܣܲܬ ܕܕܵܢܝܼܐܹܝܠ܀ ܗܵܝܓܵܗ̇ ܐ݇ܙܸܠܹܗ ܡܲܠܟܵܐ ܠܒܲܝܬܹܗ ܕܡܝܼܟ̣ܠܹܗ ܕܠܵܐ ܐ݇ܟ̣ܵܠ݇ܪܲܡܫܵܐ؛ ܘܡܹܐܟ̣ܘܼܠܬܵܐ ܠܵܐ ܡܘܼܥܒ̣ܸܪܗ݇ܘܿܢ ܩܵܕ݇ܡܹܗ؛ ܘܫܸܢܬܹܗ ܦܪܸܕܠܵܗ̇ ܡܸܢܹܗ܀ ܒܩܵܝܕܲܡܬܵܐ ܩܸܡܠܹܗ ܡܲܠܟܵܐ ܒܡܲܠܝܲܙܬܵܐ؛ ܘܓ̰ܲܠܕܹܐ ܐ݇ܙܸܠܹܗ ܠܓܘܼܒܵܐ ܕܐܲܪ̈ܝܵܘܵܬܹܐ܀ ܘܟܲܕ ܩܘܼܪܒܸܢܹܗ ܠܓܘܼܒܵܐ؛ ܩܪܹܐܠܹܗ ܠܕܵܢܝܼܐܹܝܠ ܒܩܵܠܵܐ ܪܵܡܵܐ. ܘܐ݇ܡܸܪܹܗ؛ ܕܵܢܝܼܐܹܝܠ ܪܹܓܹܗ ܕܐܲܠܵܗܵܐ ܚܵܝܵܐ؛ ܐܲܠܵܗܘܼܟܼ ܕܐܲܢ݇ܬ̇ ܦܵܠܚܸܬ̇ܠܹܗ ܒܕܵܝܸܡܘܼܬܵܐ ܡܨܹܐܠܹܗ ܕܦܵܨܹܐܠܘܼܟܼ ܡ̣ܢ ܐܲܪ̈ܝܵܘܵܬܹܐ؟܀ ܗܵܝܓܵܗ̇ ܗܘܼܡܙܸܡܠܹܗ ܕܵܢܝܼܐܹܝܠ ܥܲܡ ܡܲܠܟܵܐ ܘܐ݇ܡܸܪܹܗ؛ ܡܲܠܟܵܐ ܠܥܵܠܲܡ ܚܝܝܼ܀ ܐܲܠܵܗܝܼ ܫܘܼܕܸܪܹܗ ܡܲܠܲܐܟ̣ܹܗ ܘܥܟ̰ܸܡܠܹܗ ܦܘܼܡܵܐ ܕܐܲܪ̈ܝܵܘܵܬܹܐ ܘܠܵܐ ܥܒ̣ܸܕܠܗ݇ܘܿܢ ܚܘܼܙܕܵܓܵܐ ܥܲܠܝܼ؛ ܣܵܒܵܒ ܚܵܠܝܼܨܘܼܬܵܐ ܩܵܕ݇ܡܘܼܗܝ ܦܸܫܠܵܗ̇ ܡܘܼܫ݇ܟ̰ܸܚܬܵܐ ܐܸܠܝܼ؛ ܘܐܘܼܦ ܩܵܕ݇ܡܘܼܟܼ ܝܵܐ ܡܲܠܟܵܐ ܚܲܕ݇ ܓܢܵܗܵܐ ܠܹܐ ܝ݇ܘܸܢ ܥܒ̣ܝܼܕܵܐ܀ ܗܵܝܓܵܗ̇ ܥܲܠ ܡܲܠܟܵܐ ܪܵܒܵܐ ܡܘܼܚܕܹܐܠܹܗ؛ ܘܦܘܼܩܸܕܠܹܗ ܠܡܵܣܲܩܬܹܗ ܕܕܵܢܝܼܐܹܝܠ ܡ̣ܢ ܓܘܼܒܵܐ؛ ܘܡܘܼܣܸܩܠܗܘܿܢ ܠܕܵܢܝܼܐܹܝܠ ܡ̣ܢ ܓܘܼܒܵܐ؛ ܘܗܝܼܟ̰ ܡܸܢܕܝܼ ܚܪܵܒ̣ܵܐ ܠܵܐ ܦܸܫܠܹܗ ܡܘܼܫ݇ܟ̰ܚܵܐ ܒܝܼܹܗ؛ ܣܵܒܵܒ ܕܗܘܼܡܸܢܵܐ ܗ݇ܘܵܐ ܒܐܲܠܵܗܹܗ܀ ܘܐ݇ܡܸܪܹܗ ܡܲܠܟܵܐ ܡܲܝܬܹܐܡܘܿܢ ܠܐܵܢܝܼ ܐ݇ܢܵܫܹ̈ܐ ܕܡܚܹܐܠܗ݇ܘܿܢ ܕܲܪܗܲܩ ܕܕܵܢܝܼܐܹܝܠ؛ ܘܕܪܹܐܡܘܿܢ ܠܗ݇ܘܿܢ ܓܵܘ ܓܘܼܒܵܐ ܕܐܲܪ̈ܝܵܘܵܬܹܐ؛ ܠܐܵܢܝܼ ܘܠܒܲܟ̣ܬܵܬܲܝ̈ܗܝ ܘܒܢܘܿܢܲܝ̈ܗܝ ܘܕܸܪܝܲܝܗܝ ܠܗ݇ܘܿܢ ܓܵܘ ܓܘܼܒܵܐ. ܘܡ̣ܢ ܩܵܕ݇ܡ ܕܡܵܛܝܼ ܠܐܸܫܬܹܗ ܕܓܘܼܒܵܐ؛ ܗܘܼܟܸܡܠܗ݇ܘܿܢ ܒܝܼܲܝܗܝ ܐܲܪ̈ܝܵܘܵܬܹܐ ܘܕܘܼܩܕܸܩܠܗ݇ܘܿܢ ܟܠܲܝܗܝ ܓܲܪ̈ܡܲܝܗܝ܀
ܚܲܒ̣ܪܹܗ
ܦܪܲܟܣܝܼܣ؛ ܝܒ؛ 1‐25
ܫܠܵܘ ܦܪܲܟܣܝܼܣ ܕܲܫܠܝܼܚܹ̈ܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܒܗ̇ܘ ܙܲܒ̣ܢܵܐ ܦܘܼܫܛܵܐ ܗ݇ܘܵܐ ܐܝܼܕܵܬܹ̈ܐ ܗܹܪܘܿܕܸܣ ܡܲܠܟܵܐ ܗ̇ܘ ܕܦܵܐܹܫ ܗ݇ܘܵܐ ܩܸܪܝܵܐ ܐܵܓ̣ܸܪܦܘܿܣ ܥܲܠ ܐ݇ܢܵܫܹ̈ܐ ܕܓܵܘ ܥܹܕܬܵܐ؛ ܐܲܝܟܼ ܕܥܵܒ̣ܸܕ ܣܪܝܼܬܵܐ ܥܲܠܲܝܗܝ܀ ܘܩܛܸܠܹܗ ܒܣܲܝܦܵܐ ܠܝܲܥܩܘܿܒ̣ ܐܵܚܘܿܢܹܗ ܕܝܘܿܚܲܢܵܢ܀ ܘܟܲܕ ܚܙܹܐܠܹܗ ܕܐܵܗܵܐ ܡܘܼܚܕܹܐܠܵܗ̇ ܠܝ݇ܗܘܼܕܵܝܹ̈ܐ. ܡܘܼܙܝܸܕܠܹܗ ܠܸܕܒ̣ܵܩܵܐ ܐܘܼܦ ܠܫܸܡܥܘܿܢ ܟܹܐܦܵܐ. ܘܝܵܘܡܵܢܹ̈ܐ ܕܦܲܛܝܼܪܹ̈ܐ ܗ݇ܘܵܘ܀ ܘܕܒ̣ܸܩܠܹܗ ܘܕܪܹܐܠܹܗ ܓܵܘ ܒܹܝܬ̣ ܐܲܣܝܼܪܹ̈ܐ؛ ܘܣܘܼܦܹܐܠܹܗ ܠܐܸܫܬܲܥܣܲܪ ܢܵܛܘܿܪܹ̈ܐ ܕܢܲܛܪܝܼܠܹܗ؛ ܕܡ̣ܢ ܒܵܬ݇ܪ ܦܸܨܚܵܐ ܒܸܬ ܣܵܦܹܐܠܹܗ ܠܛܵܝܸܦܵܐ ܕܝܗ݇ܘܼܕܵܝܹ̈ܐ܀ ܘܟܲܕ ܫܸܡܥܘܿܢ ܦܝܼܫܵܐ ܗ݇ܘܵܐ ܢܛܝܼܪܵܐ ܓܵܘ ܒܹܝܬ̣ ܐܲܣܝܼܪܹ̈ܐ. ܨܠܘܿܬܵܐ ܕܠܵܐ ܟܠܵܝܬܵܐ ܡ̣ܢ ܥܹܕܬܵܐ ܦܵܝܫܵܐ ܗ݇ܘܵܐ ܡܘܼܩܪܸܒ̣ܬܵܐ ܡ̣ܢ ܓܹܒܹܗ ܠܐܲܠܵܗܵܐ܀ ܘܗܲܪ ܒܗ̇ܘ ܠܲܝܠܹܐ ܕܠܩܵܝܕܲܡܬܵܐ ܗܘܼܕܪܵܐ ܗ݇ܘܵܐ ܕܣܵܦܹܐܠܹܗ؛ ܟܲܕ ܕܡܝܼܟ̣ܵܐ ܗ݇ܘܵܐ ܫܸܡܥܘܿܢ ܒܹܝܠ ܬܪܹܝ ܢܵܛܘܿܪܹ̈ܐ؛ ܘܐ݇ܣܝܼܪܵܐ ܒܬܪܹܝ ܫܸܫܸܠܝܵܬܹ̈ܐ؛ ܘܐܵܢܝܼ ܐ݇ܚܹܪ̈݇ܢܹܐ ܒܸܢܛܵܪܵܐ ܗ݇ܘܵܘ ܬܲܪ̈ܥܵܢܹܐ ܕܒܹܝܬ̣ ܐܲܣܝܼܪܹ̈ܐ܀ ܡܲܠܲܐܟ̣ܵܐ ܕܡܵܪܝܵܐ ܟܠܹܐܠܹܗ ܥܘܼܠܘܼܠ ܡܸܢܹܗ؛ ܘܒܲܗܪܵܐ ܒܘܼܗܪܸܢܹܗ ܓܵܘ ܟܠܹܗ ܒܲܝܬܵܐ؛ ܘܕܩܸܪܹܗ ܒܕܸܦܢܹܗ ܘܡܘܼܩܸܡܠܹܗ ܘܐ݇ܡܸܪܹܗ ܐܸܠܹܗ؛ ܩܘܼܡ ܓ̰ܲܠܕܹܐ؛ ܘܢܦܸܠܗ݇ܘܿܢ ܫܸܫܸܠܝܵܬܹ̈ܐ ܡ̣ܢ ܐܝܼܕܹ̈ܗ܀ ܘܐ݇ܡܸܪܹܗ ܐܸܠܹܗ ܡܲܠܲܐܟ̣ܵܐ؛ ܐ݇ܣܘܿܪ ܚܵܨܘܼܟܼ؛ ܘܠܒ̣ܘܿܫ ܟ̰ܵܪ̈ܘܿܚܘܼܟܼ؛ ܘܥܒ̣ܸܕܠܹܗ ܗܵܕܟ̣ܵܐ؛ ܘܡܸܕܪܹܐ ܐ݇ܡܸܪܹܗ؛ ܠܒ̣ܘܼܫ ܥܵܒܵܝܬܘܼܟܼ ܘܬܵܐ ܒܵܬ݇ܪܝܼ܀ ܘܦܠܸܛܠܹܗ ܘܐܵܙܹܠ ܗ݇ܘܵܐ ܒܵܬ݇ܪܹܗ؛ ܟܲܕ ܠܹܐ ܗ݇ܘܵܐ ܒܝܼܕܲܥܝܵܐ؛ ܕܣܲܪܲܣܬ ܝܼܠܹܗ ܗ̇ܘ ܡܸܢܕܝܼ ܕܒܸܗܘܵܝܵܐ ܗ݇ܘܵܐ ܒܝܼܲܕ ܡܲܠܲܐܟ̣ܵܐ܀ ܘܒܸܚܫܵܒ̣ܵܐ ܗ݇ܘܵܐ ܕܚܸܙܘܵܐ ܒܸܚܙܵܝܵܐ ܗ݇ܘܵܐ܀ ܟܲܕ ܥܒ̣ܸܪܗ݇ܘܿܢ ܡܲܛܲܪܬܵܐ ܩܲܕ݇ܡܵܝܬܵܐ ܘܕܬܪܹܝ؛ ܘܐ݇ܬܹܐܠܗ݇ܘܿܢ ܗܲܠ ܬܲܪܥܵܐ ܕܦܲܪܙܠܵܐ؛ ܘܦܸܫܠܹܗ ܦܬܝܼܚܵܐ ܡ̣ܢ ܓܵܢܹܗ. ܟܲܕ ܦܠܸܛܠܗ݇ܘܿܢ ܘܥܒ̣ܸܪܗ݇ܘܿܢ ܚܲܕ݇ ܥܵܠܘܿܠܵܐ؛ ܪܚܸܩܠܹܗ ܡ̣ܢ ܠܟܸܣܠܹܗ ܡܲܠܲܐܟ̣ܵܐ܀ ܗܵܝܓܵܗ̇ ܝ݇ܕܝܼܥܠܹܗ ܫܸܡܥܘܿܢ ܘܐ݇ܡܸܪܹܗ؛ ܐܵܕܝܼܵܐ ܝ݇ܕܝܼܥܠܝܼ ܒܗܵܩܘܼܬܵܐ ܕܡܵܪܝܵܐ ܫܘܼܕܸܪܹܗ ܡܲܠܲܐܟ̣ܹܗ ܘܦܘܼܠܛܸܢܹܗ ܡ̣ܢ ܐܝܼܕܹ̈ܗ ܕܗܹܪܘܿܕܸܣ ܡܲܠܟܵܐ؛ ܘܡ̣ܢ ܡܸܢܕܝܼ ܕܒܸܚܫܵܒ̣ܵܐ ܗ݇ܘܵܘ ܝ݇ܗܘܼܕܵܝܹ̈ܐ ܒܘܼܬ ܕܝܼܝܼ܀ ܘܟܲܕ ܦܘܼܪܡܹܐܠܹܗ ܐ݇ܬܹܐܠܹܗ ܠܒܲܝܬܵܐ ܕܡܲܪܝܲܡ ܝܸܡܹܗ ܕܝܘܿܚܲܢܵܢ ܗ̇ܘ ܕܦܸܫܠܹܗ ܩܸܪܝܵܐ ܡܲܪܩܘܿܣ. ܣܵܒܵܒ ܕܪܵܒܵܐ ܐܵܚܘܿܢܘܵܬܹ̈ܐ ܓ̰ܸܡܥܝܹܐ ܗ݇ܘܵܘ ܬܵܡܵܐ ܘܒܸܥܒ̣ܵܕܵܐ ܨܠܘܿܬܵܐ܀ ܬܘܼܩܬܸܩܠܹܗ ܒܬܲܪܥܵܐ ܕܕܵܪܬܵܐ. ܘܦܠܸܛܠܵܗ̇ ܕܓ̰ܲܘܸܒܵܐܠܹܗ ܚܕܵܐ ܒܪܵܬܵܐ ܫܸܡܵܗ̇ ܪܘܿܕܵܐ. ܘܝ݇ܕܝܼܥܠܵܗ̇ ܩܵܠܹܗ ܕܫܸܡܥܘܿܢ. ܘܡ̣ܢ ܚܲܕܘܼܬܵܗ̇ ܠܵܐ ܦܬܸܚܠܵܗ̇ ܐܸܠܹܗ ܬܲܪܥܵܐ. ܐܸܠܵܐ ܕܐܸܪܵܗ̇ ܡܲܪܚܘܼܛܹܐ ܘܐ݇ܡܸܪܵܗ̇ ܐܸܠܲܝܗܝ؛ ܫܸܡܥܘܿܢ ܟܸܠܝܵܐ ܝ݇ܠܹܗ ܒܬܲܪܥܵܐ ܕܕܲܪܬܵܐ܀ ܘܐܵܡܪܝܼ ܐܸܠܵܗ̇ ܙܕܲܥܝܵܐ ܙܕܝܼܥ ܠܵܟ̣ܝ. ܘܗ̇ܝ ܕܵܪܫܵܐ ܗ݇ܘܵܐ ܕܐܵܗܵܐ ܗܵܕܟ̣ܵܐ ܝ݇ܠܵܗ̇؛ ܘܐܵܡܪܝܼ ܐܸܠܵܗ̇ ܥܒ̣ܘܼܕ ܒܵܘܲܪ ܡܲܠܲܐܟ̣ܹܗ ܝ݇ܠܹܗ܀ ܘܫܸܡܥܘܿܢ ܬܲܩܬܘܼܩܹܐ ܗ݇ܘܵܐ ܒܬܲܪܥܵܐ. ܘܦܠܸܛܠܗ݇ܘܿܢ ܘܚܙܹܐܠܗ݇ܘܿܢ ܐܸܠܹܗ ܘܥܘܼܓ̰ܸܒܠܗ݇ܘܿܢ. ܘܫܵܥܸܫ ܗ݇ܘܵܐ ܐܝܼܕܹܗ ܐܸܠܲܝܗܝ ܕܫܵܬܩܝܼ. ܘܥܒ̣ܸܪܹܗ ܘܗܘܼܩܹܐܠܹܗ ܐܸܠܲܝܗܝ ܕܵܐܟ̣ܝܼ ܡܵܪܝܵܐ ܦܘܼܠܸܛܠܹܗ ܡ̣ܢ ܒܹܝܬ̣ ܐܲܣܝܼܪܹ̈ܐ. ܘܐ݇ܡܸܪܹܗ ܐܸܠܲܝܗܝ؛ ܗܵܩܹܐܡܘܿܢ ܐܲܢܹܐ ܠܝܲܥܩܘܿܒ̣ ܘܠܐܵܚܘܿܢ̈ܘܵܬܲܢ؛ ܘܦܠܸܛܠܹܗ ܘܐ݇ܙܸܠܹܗ ܠܚܲܕ݇ ܕܘܼܟܬܵܐ ܐ݇ܚܹܪ݇ܬܵܐ܀ ܘܟܲܕ ܗ݇ܘܹܐܠܵܗ̇ ܩܵܝܕܲܡܬܵܐ؛ ܩܲܠܡܵܩܵܠ ܓܘܼܪܬܵܐ ܐܝܼܬ ܗ݇ܘܵܐ ܓܵܘ ܢܵܛܘܿܪܹ̈ܐ ܒܘܼܬ ܫܸܡܥܘܿܢ ܕܡܘܼܕܝܼ ܩܘܼܘܸܡܠܹܗ ܥܲܠܹܗ؟܀ ܐܝܼܢܵܐ ܗܹܪܘܿܕܸܣ ܟܲܕ ܛܠܸܒܠܹܗ ܘܠܵܐ ܡܘܼܫ݇ܟ̰ܸܚܠܹܗ ܕܝܼܢܵܝܠܹܗ ܢܵܛܘܿܪܹ̈ܐ ܘܦܘܼܩܸܕܠܹܗ ܕܡܵܝܬܝܼ. ܘܦܠܸܛܠܹܗ ܡ̣ܢ ܝܼܗܘܼܕ؛ ܘܝܼܗ݇ܘܵܐ ܒܩܹܣܲܪܝܼܵܐ܀ ܡ̣ܢ ܣܵܒܵܒ ܕܟܪܝܼܒܵܐ ܗ݇ܘܵܐ ܥܲܠ ܨܘܼܪ̈ܵܝܹܐ ܘܨܲܝܕܵܢܵܝܹ̈ܐ. ܘܓ̰ܡܝܼܥܠܗ݇ܘܿܢ ܘܐ݇ܬܹܐܠܗ݇ܘܿܢ ܠܟܸܣܠܹܗ ܡܐܘܼܕܵܠܹܗ؛ ܥܒ̣ܸܕܠܗ݇ܘܿܢ ܪܵܐܙܝܼ ܠܒܠܹܣܛܘܿܣ ܩܲܝܛܘܿܢܩܵܢܵܐ [ܪܹܓܵܐ ܕܡܲܢܙܸܠ] ܕܡܲܠܟܵܐ؛ ܘܛܠܸܒܠܗ݇ܘܿܢ ܕܗܵܘܹܐ ܫܠܵܡܵܐ ܒܹܝܠܲܝܗܝ؛ ܣܵܒܵܒ ܕܬܘܼܪܣܵܝܵܐ ܕܐܲܬܪܲܝܗܝ ܡ̣ܢ ܡܲܠܟܘܼܬܵܐ ܗ݇ܘܵܐ ܕܗܹܪܘܿܕܸܣ܀ ܒܚܲܕ݇ ܝܵܘܡܵܐ ܝ݇ܕܝܼܥܵܐ ܗܹܪܘܿܕܸܣ ܠܒ̣ܝܼܫܵܐ ܗ݇ܘܵܐ ܠܒ̣ܸܫܬܵܐ ܕܡܲܠܟܘܼܬܵܐ ܘܝ݇ܬܝܼܒ̣ܵܐ ܥܲܠ ܒܹܝܡ ܘܗܲܡܙܘܼܡܹܐ ܥܲܡ ܟܸܢܫܵܐ܀ ܘܛܵܝܸܦܵܐ ܟܠܹܗ ܡܲܩܘܘܼܚܹܐ ܗ݇ܘܵܐ ܘܒܹܐܡܵܪܵܐ؛ ܐܲܢܹܐ ܒܪܵܬ݇ ܩܵܠܹ̈ܐ ܕܐܲܠܵܗܵܐ ܝ݇ܢܵܐ؛ ܘܠܹܐ ܝ݇ܢܵܐ ܕܒܢܲܝ̈ܢܵܫܵܐ܀ ܘܡ̣ܢ ܓܹܒܵܐ ܕܠܵܐ ܝܘܼܗ݇ܒ̣ܸܠܹܗ ܬܸܫܒܘܿܚܬܵܐ ܠܐܲܠܵܗܵܐ؛ ܗܲܪ ܒܗ̇ܝ ܥܸܕܵܢܵܐ ܡܲܠܲܐܟ̣ܵܐ ܕܡܵܪܝܵܐ ܡܚܹܐܠܹܗ؛ ܘܦܸܫܠܹܗ ܐ݇ܟ̣ܝܼܠܵܐ ܒܬܸܘܠܥܹ̈ܐ ܘܡܝܼܬܠܹܗ܀
♱♱♱♱♱♱♱♱♱♱♱♱
ܕܗܵܘܹܐ ܟܕ ܒܢܝܼܣܵܢ.
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܩܘܼܪ̈ܲܢܬܵܝܹܐ؛ ܐܲܚܲܝ̈ ܒܲܪܸܟܼܡܵܪܝ܀
ܘܵܓ̰ܸܒ ܝܑܼܠܵܗ݁ ܠܸܥܒܼܵܕܵܐ ܫܘܼܒܼܗܵܪܵܐ؛ ܐܸܠܵܐ ܠܹܐ ܝ݇ܠܵܗ̇ ܚܫܝܼܚܬܵܐ. ܣܵܒܵܒ ܒܹܐܬܵܝܵܐ ܝ݇ܘܸܢ ܠܚܸܙܘܹ̈ܐ ܘܠܓܸܠܝܵܢܹ̈ܐ ܕܡܵܪܲܢ. ܟܹܐ ܝܵܕܥܸܢ ܚܲܕ݇ ܓܲܒܼܪܵܐ ܒܡܫܝܼܚܵܐ ܡ̣ܢ ܩܵܕ݇ܡ ܐܲܪܒܲܥܣܲܪ ܫܸܢܹ̈ܐ. ܐܸܢ ܒܦܲܓܼܪܵܐ ܘܐܸܢ ܕܠܵܐ ܦܲܓܼܪܵܐ ܠܹܐ ܝܵܕܥܸܢ؛ ܐܲܠܵܗܵܐ ܝ݇ܠܹܗ ܕܝܲܕܸܥ. ܗܲܪ ܐܵܗܵܐ ܕܦܸܫܠܹܗ ܓ̰ܢܝܼܒܼܵܐ ܠܫܡܲܝܵܐ ܕܬܠܵܬܵܐ* ܘܝܵܕܥܸܢܹܗ ܐܵܗܵܐ ܒܲܪܢܵܫܵܐ؛ ܐܸܢ ܒܦܲܓܼܪܵܐ ܘܐܸܢ ܕܠܵܐ ܦܲܓܼܪܵܐ ܠܹܐ ܝܵܕܥܸܢ؛ ܐܲܠܵܗܵܐ ܝ݇ܠܹܗ ܕܝܲܕܸܥ* ܕܦܸܫܠܹܗ ܓ̰ܢܝܼܒܼܵܐ ܠܦܲܪܕܲܝܣܵܐ ܘܫܡܝܼܥܠܹܗ ܗܹܡܸܙܡܵܢܹ̈ܐ ܕܠܹܐ ܐܵܬܝܼ ܠܗܲܡܙܘܼܡܹܐ ܐܵܢܝܼ ܕܠܲܝܬ ܠܹܗ ܒܲܪܢܵܫܵܐ ܦܣܵܣܵܐ ܕܗܲܡܙܸܡ ܠܗ݇ܘܿܢ* ܒܘܼܬ ܐܵܗܵܐ ܡܸܢܕܝܼ ܒܸܬ ܥܵܒܼܕܸܢ ܫܘܼܒܼܗܵܪܵܐ. ܐܝܼܢܵܐ ܒܘܼܬ ܓܵܢܝܼ ܠܹܐ ܥܵܒܼܕܸܢ ܫܘܼܒܼܗܵܪܵܐ ܐܸܠܵܐ ܒܙܲܒܘܼܢܘܼܬܵܐ* ܣܵܒܵܒ ܐܸܢ ܒܵܥܝܸܢ ܕܥܵܒܼܕܸܢ ܫܘܼܒܼܗܵܪܵܐ ܠܹܐ ܝ݇ܘܸܢ ܒܸܚܠܵܛܵܐ. ܣܵܒܵܒ ܣܲܪܲܣܬܘܼܬܵܐ ܒܹܐܡܵܪܵܐ ܝ݇ܘܸܢ؛ ܐܝܼܢܵܐ ܦܫܵܡܵܐ ܝ݇ܘܸܢ ܕܒܲܠܟܵܐ ܚܲܕ݇ ܐ݇ܢܵܫܵܐ ܬܲܚܡܸܢ ܒܘܼܬ ܕܝܼܝܼ ܙܵܘܕܵܐ ܡ̣ܢ ܡܸܢܕܝܼ ܕܚܵܙܹܐ ܘܫܲܡܸܥ ܡܸܢܝܼ* ܘܩܵܐ ܕܠܵܐ ܦܵܝܫܸܢ ܡܘܼܪܡܵܐ ܒܙܵܘܕܘܼܢܝܘܼܬܵܐ ܕܓܸܠܝܵܢܹ̈ܐ. ܦܸܫܠܹܗ ܣܘܼܦܝܵܐ ܟܸܬܘܵܐ ܠܒܸܣܪܝܼ؛ ܡܲܠܲܐܟܼܹܗ ܕܣܵܛܵܢܵܐ ܕܗܵܘܹܐ ܩܲܪܦܘܼܚܹܐ ܐܸܠܝܼ ܕܠܵܐ ܝܵܪܡܸܢ* ܘܒܘܼܬ ܗܲܕܟܼܵܐ؛ ܬܠܵܬ ܓܵܗܹ̈ܐ ܛܠܸܒܠܝܼ ܡ̣ܢ ܡܵܪܝܼ ܕܡܲܪܚܸܩ ܠܹܗ ܡܸܢܝܼ܋ ܘܐ݇ܡܸܪܹܗ ܐܸܠܝܼ ܡܵܠܝܵܐ ܠܘܼܟܼ ܫܵܦܵܩܲܬܝܼ. ܣܵܒܵܒ ܚܲܝܠܝܼ ܒܙܲܒܘܼܢܘܼܬܵܐ ܦܵܐܸܫ ܬܘܼܡܸܡܵܐ. ܗܲܕܟܼܵܐ؛ ܒܚܲܕܘܼܬܵܐ ܒܸܬ ܥܵܒܼܕܸܢ ܫܘܼܒܼܗܵܪܵܐ ܒܙܲܒܘܼܢܘܼܬܝܼ؛ ܕܚܲܝܠܹܗ ܕܡܫܝܼܚܵܐ ܫܵܪܹܐ ܥܲܠܝܼ* ܒܘܼܬ ܕܐܵܗܵܐ ܟܹܐ ܒܵܣܡܵܐ ܠܝܼ ܒܡܲܪ̈ܥܸܐ ܘܡܲܢܟܼܲܣܝܵܬܹ̈ܐ؛ ܒܝܲܠܨܘܼܘܹ̈ܐ ܘܟܵܡܲܪ̈ܝܵܬܹܐ ܒܚܒܼܘܼܫܝܹ̈ܐ ܕܒܘܼܬ ܚܵܬܸܪ ܕܡܫܝܼܚܵܐ. ܣܵܒܵܒ ܐܝܼܡܲܢ ܕܙܲܒܘܼܢ ܝܑܼܘܸܢ ܗ݁ܝܓܵܗ ܚܲܝܠܵܢܵܐ ܝ݇ܘܸܢ* ܗܵܐ ܚܠܸܛܠܝܼ ܒܫܘܼܒܼܗܵܪܝܼ ܕܐܲܚܬܘܿܢ ܩܲܡ ܚܵܠܨܝܼܬܘܿܢ ܠܝܼ ܠܹܐܡܵܪܵܐ. ܐܲܚܬܘܿܢ ܕܵܝܢܵܢܹ̈ܐ ܝ݇ܬܘܿܢ ܗَܘܵܘ ܕܝܵܗَܒܼܝܼܬܘܿܢ ܣܵܗܕܘܼܬܵܐ ܒܘܼܬ ܕܝܼܝܼ* ܣܵܒܵܒ ܒܗܸܟ̃ ܡܸܢܕܝܼ ܠܹܐ ܝ݇ܘܸܢ ܒܵܨܘܿܪܵܐ ܡ̣ܢ ܫܠܝܼܚܹ̈ܐ ܐܵܢܝܼ ܕܪܵܒܵܐ ܒܘܼܫ ܥܹܠܵܝܹ̈ܐ ܝ݇ܢܵܐ؛ ܐܵܦܸܢ ܕܐܵܢܵܐ ܠܹܐ ܝ݇ܘܸܢ ܚܲܕ݇ ܡܸܢܕܝܼ* ܢܝܼܫܲܢܩܹ̈ܐ ܕܫܠܝܼܚܹ̈ܐ ܦܠܸܚܠܝܼ ܓܵܘܵܘܟܼܘܿܢ ܒܟܠ ܚܡܲܠܬܵܐ. ܘܒܦܘܼܠܚܵܢܹ̈ܐ ܓܘܼܪܹ̈ܐ؛ ܒܥܵܓ̰ܝܼܒܘܼܝܵܬܹ̈ܐ ܘܒܚܲܝܠܹ̈ܐ* ܒܡܘܼܕܝܼ ܗܘܹܐܠܵܘܟܼܘܿܢ ܒܘܼܫ ܒܵܨܘܿܪܹ̈ܐ ܡ̣ܢ ܥܹܕܵܬܹ̈ܐ ܐ݇ܚܹܪَ̈ܢܹܐ. ܫܒܼܘܿܩ ܡ̣ܢ ܕܐܵܢܵܐ ܠܵܐ ܗܘܹܐܠܝܼ ܝܘܼܩܪܵܐ ܥܲܠܵܘܟܼܘܿܢ ܫܒܼܘܿܩܘܿܢ ܠܝܼ ܐܵܗܵܐ ܓܢܵܗܵܐ* ܗܵܐ ܐܵܗܵܐ ܓܵܗܵܐ ܕܬܠܵܬ ܝܑܼܠܵܗ̇ ܕܗܘܼܕܪܵܐ ܝ݇ܘܸܢ ܕܐܵܬܸܢ ܠܟܸܣܠܵܘܟܼܘܿܢ. ܘܠܵܐ ܗܵܘܸܢ ܝܘܼܩܪܵܐ ܥܲܠܵܘܟܼܘܿܢ. ܣܵܒܵܒ ܕܠܹܐ ܒܵܥܝܸܢ ܡܸܢܕܝܼ ܕܝܼܵܘܟܼܘܿܢ ܐܝܼܢܵܐ ܐܸܠܵܘܟܼܘܿܢ؛ ܣܵܒܵܒ ܠܹܐ ܝ݇ܢܵܐ ܕܵܝܢܵܢܹ̈ܐ ܒܢܘܿܢܹ̈ܐ ܕܡܲܬܒܼܝܼ ܚܲܙܝܼܢܹ̈ܐ ܩܵܐ ܐܲܒܼܵܗܹ̈ܐ؛ ܐܸܠܵܐ ܐܲܒܼܵܗܹ̈ܐ ܩܵܐ ܒܢܘܿܢܹ̈ܐ*
♱♱♱♱♱♱♱♱♱♱♱♱
ܕܘܟܼܪܢܐ ܕܡܪܝ ܓܝܘܪܓܝܣ ܣܗܕܐ ܘܢܨܝܚܐ
ܡܬܝ ܝ: 34 ‐ ܫܘܠܡܐ، ܝܛ: 27 ‐ ܫܘܠܡܐ
ܐܘܢܓܠܝܘܢ ܩܕܝܫܐ
ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܡܬܝ.
♰ ܘܐ݇ܡܸܪܹܗ ܝܑܼܫܘܿܥ ܠܬܲܠܡܝܼ̈ܕܘܼܗܝ: ܠܵܐ ܚܲܫܒܼܝܼܬܘܿܢ ܕܐ݇ܬܹܐܠܝܼ ܕܕܵܪܸܢ ܫܲܝܢܵܐ ܒܐܲܪܥܵܐ. ܠܵܐ ܐ݇ܬܹܐܠܝܼ ܕܕܵܪܸܢ ܫܲܝܢܵܐ ܐܸܠܵܐ ܣܲܝܦܵܐ. ܣܵܒܵܒ ܐ݇ܬܹܐܠܝܼ ܕܦܲܠܸܓَܼܢ ܓܲܒܼܪܵܐ ܥܲܠ ܒܵܒܘܼܗܝ. ܘܒܪܵܬܵܐ ܥܲܠ ܝܸܡܵܗ̇. ܘܟܲܠܬܵܐ ܥܲܠ ܚܡܵܬܵܗ̇. ܘܕܸܫ̰ܡܸܢܹ̈ܐ ܕܓܲܒܼܪܵܐ ܒܢܲܝ̈ ܒܲܝܬܹܗ ܝܢܵܐ. ܡ̇ܢ ܕܡܲܚܸܒ ܒܵܒܵܐ ܝܲܢ ܝܸܡܵܐ ܒܘܼܫ ܙܵܘܕܵܐ ܡ̣ܢ ܕܐܸܠܝܼ. ܠܹܐ ܚܵܫܸܚ ܐܸܠܝܼ. ܘܡ̇ܢ ܕܡܲܚܸܒ ܒܪܘܿܢܵܐ ܝܲܢ ܒܪܵܬܵܐ ܒܘܼܫ ܙܵܘܕܵܐ ܡ̣ܢ ܕܐܸܠܝܼ. ܠܹܐ ܚܵܫܸܚ ܐܸܠܝܼ. ܘܟܠ ܕܠܵܐ ܫܵܩܸܠ ܙܩܝܼܦܹܗ ܘܐܵܬܹܐ ܒܵܬ݇ܪܝܼ. ܠܹܐ ܚܵܫܸܚ ܐܸܠܝܼ. ܡ̇ܢ ܕܡܵܫ݇ܟ̰ܸܚ ܓܵܢܹܗ ܒܸܬ ܛܵܠܸܩܠܵܗ̇. ܘܡ̇ܢ ܕܛܵܠܸܩ ܓܵܢܹܗ ܣܵܒܵܒ ܕܝܼܠ݇ܝܼ ܒܸܬ ܡܵܫ݇ܟ̰ܸܚܠܵܗ̇. ܡ̇ܢ ܕܡܩܵܒܸܠ ܐܸܠܵܘܟܼܘܿܢ، ܐܸܠܝܼ ܡܩܵܒܘܼܠܹܐ ܝܠܹܗ. ܘܡ̇ܢ ܕܐܸܠܝܼ ܡܩܵܒܸܠ، ܠܡ̇ܢ ܕܡܫܘܼܕܪܸܢܹܗ ܡܩܵܒܘܼܠܹܐ ܝܠܹܗ. ܡ̇ܢ ܕܡܩܵܒܸܠ ܢܒܼܝܼܵܐ ܒܫܸܡܵܐ ܕܢܒܼܝܼܵܐ. ܗܵܩܵܐ ܕܢܒܼܝܼܵܐ ܒܸܬ ܫܵܩܸܠ. ܘܡ̇ܢ ܕܡܩܵܒܸܠ ܙܲܕܝܼܩܵܐ ܒܫܸܡܵܐ ܕܙܲܕܝܼܩܵܐ. ܗܵܩܵܐ ܕܙܲܕܝܼܩܵܐ ܒܸܬ ܫܵܩܸܠ. ܘܟܠ ܕܡܲܫܬܹܐ ܠܚܲܕ݇ ܡ̣ܢ ܐܲܢܹܐ ܙܥܘܿܪܹ̈ܐ ܟܵܣܵܐ (ܕܡܝܼ̈ܵܐ) ܩܲܪܝܼܪܹ̈ܐ ܐܲܚܟ̰ܝܼ ܒܫܸܡܵܐ ܕܬܲܠܡܝܼܕܵܐ. ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ ܕܠܹܐ ܛܵܠܸܩ ܗܵܩܹܗ. ܗܿܝܓܵܗ ܓ̰ܘܼܘܸܒܠܹܗ ܟܹܐܦܵܐ ܘܐ݇ܡܸܪܹܗ ܐܸܠܹܗ: ܗܵܐ ܐܲܚܢܲܢ ܫܒܼܸܩܠܲܢ ܟܠܡܸܢܕܝܼ ܘܐ݇ܬܹܐܠܲܢ ܒܵܬ݇ܪܘܼܟܼ. ܝܵܐ ܪܲܒ ܡܘܿܕܝܼ ܒܸܬ ܗܵܘܹܐ ܠܲܢ؟ ܐܵܡܸܪ ܐܸܠܲܝܗܝ ܝܑܼܫܘܿܥ: ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ. ܕܐܲܚܬܘܿܢ ܕܐ݇ܬܹܐܠܵܘܟܼܘܿܢ ܒܵܬ݇ܪܝܼ. ܒܥܵܠܡܵܐ ܚܲܕܬܵܐ ܐܝܼܡ̇ܢ ܕܝܵܬܹܒܼ ܒܪܘܿܢܹܗ ܕܐ݇ܢܵܫܵܐ ܥܲܠ ܬܪܘܿܢܘܿܣ ܕܫܘܼܒܼܚܹܗ. ܒܸܬ ܝܵܬܒܼܝܼܬܘܿܢ ܐܘܿܦ ܐܲܚܬܘܿܢ ܥܲܠ ܬܪܸܥܣܲܪ ܟܘܼܪ̈ܣܵܘܵܬܵܐ. ܘܒܸܬ ܕܲܝܢܝܼܬܘܿܢ ܬܪܸܥܣܲܪ ܫܲܒܼܛܹ̈ܐ ܕܝܼܣܪܵܝܸܠ. ܘܟܠ ܐ݇ܢܵܫܵܐ ܕܫܵܒܼܸܩ ܒܵܬܹ̈ܐ ܝܲܢ ܐܲܚܘܿܢܘܵܬܹ̈ܐ ܝܲܢ ܚܲܬܘܵܬܹ̈ܐ ܝܲܢ ܒܵܒܵܐ ܝܲܢ ܝܸܡܵܐ ܝܲܢ ܒܲܟܼܬܵܐ ܝܲܢ ܒܢܘܿܢܹ̈ܐ ܝܲܢ ܚܲܩܠܵܬܹ̈ܐ ܡܸܛܠ ܫܸܡܝܼ. ܚܲܕ݇ ܒܲܡܵܐܐ ܒܸܬ ܩܵܒܸܠ. ܘܚܲܝܹ̈ܐ ܕܲܠܥܵܠܵܡ ܒܸܬ ܝܵܪܸܬ. ܐܝܼܢܵܐ ܪܵܒܵܐ ܩܲܕ݇ܡܵܝܹ̈ܐ ܒܸܬ ܗܵܘܝܼ ܐ݇ܚܵܪ̈ܵܝܹܐ. ܘܐ݇ܚܵܪ̈ܵܝܹܐ ܩܵܕ݇ܡܵܝܹ̈ܐ.
♱♱♱♱♱♱♱♱♱♱♱♱