ܬܠܵܬܒܫܲܒܵܐ ܕܒܵܥܘܼܬ̣ܵܐ ܕܢܝܼܢܘܵܝܹ̈ܐ
ܐ. ܫܡܘܼܐܹܝܠ؛ ܙ؛ 3‐10
ܬܸܒ̣ܘ ܘܲܫܠܵܘ ܣܸܦܪܵܐ ܕܲܫܡܘܼܐܹܝܠ؛ ܐܲܚܲܝ̈ ܒܲܪܸܟ̣ܡܵܪܝ܀
ܘܐ݇ܡܸܪܹܗ ܫܡܘܼܐܹܝܠ ܩܵܐ ܟܠܹܗ ܒܹܝܬ̣ ܝܼܣܪܵܝܹܠ؛ ܐܸܢ ܒܟܠܹܗ ܠܸܒܵܘܟ̣ܘܿܢ ܕܵܝܪܝܼܬܘܿܢ ܠܟܸܣ ܡܵܪܝܵܐ؛ ܡܲܥܒ̣ܸܪܗ݇ܘܿܢ ܐܲܠܵܗܹ̈ܐ ܢܘܼܟ̣ܪ̈ܵܝܹܐ ܘܨܲܠܡܹ̈ܐ ܡ̣ܢ ܓܵܘܵܘܟ̣ܘܿܢ؛ ܘܗܲܕܪܘܿܢ ܠܸܒܵܘܟ̣ܘܿܢ ܠܟܸܣ ܡܵܪܝܵܐ؛ ܦܠܘܿܚܘܿܢ ܐܸܠܹܗ ܐܲܚܟ̰ܝܼ؛ ܕܦܵܨܹܐܠܵܘܟ̣ܘܿܢ ܡ̣ܢ ܐܝܼܕܵܐ ܕܦܠܸܫܬܵܝܹ̈ܐ.܀ ܡܘܼܥܒ̣ܸܪܗ݇ܘܿܢ ܒܢܲܝ̈ ܝܼܣܪܵܝܹܠ ܒܲܥܠܵܐ ܘܨܲܠܡܹ̈ܐ؛ ܘܦܠܸܚܠܗ݇ܘܿܢ ܠܡܵܪܝܵܐ ܒܢܲܦ̮ܫܹܗ.܀ ܘܐ݇ܡܸܪܹܗ ܫܡܘܼܐܹܝܠ ܓ̰ܲܡܥܹܡܘܿܢ ܠܟܠܹܗ ܝܼܣܪܵܝܹܠ ܠܡܲܨܦܝܵܐ؛ ܘܡܨܵܠܸܢ ܨܠܘܿܬܵܐ ܥܲܠܵܘܟ̣ܘܿܢ ܩܵܕ݇ܡ ܡܵܪܝܵܐ.܀ ܘܓ̰ܡܸܥܠܗ݇ܘܿܢ ܠܡܲܨܦܝܵܐ؛ ܘܡܠܹܐܠܗ݇ܘܿܢ ܡܝܼܵܐ ܘܬܘܼܦܸܚܠܗ݇ܘܿܢ ܩܵܕ݇ܡ ܡܵܪܝܵܐ. ܘܨܸܡܠܗ݇ܘܿܢ ܒܗ̇ܘ ܝܵܘܡܵܐ؛ ܘܐ݇ܡܸܪܗ̄ܘܿܢ ܡ̣ܢ ܣܵܒܵܒ ܕܚܛܹܐܠܲܢ ܠܡܵܪܝܵܐ. ܘܕܸܢܹܗ ܫܡܘܼܐܹܝܠ ܠܒܢܲܝ̈ ܝܼܣܪܵܝܹܠ ܒܡܲܨܦܝܵܐ.܀ ܘܫܡܝܼܥܠܗ݇ܘܿܢ ܦܠܸܫܬܵܝܹ̈ܐ؛ ܕܒܢܲܝ̈ ܝܼܣܪܵܝܹܠ ܓ̰ܡܝܼܥܠܗ݇ܘܿܢ ܒܡܲܨܦܝܵܐ؛ ܘܐ݇ܣܸܩܠܗ݇ܘܿܢ ܛܪ̈ܘܼܢܹܐ [ܙܵܠܝܼܡܹ̈ܐ] ܕܦܠܸܫܬܵܝܹ̈ܐ ܥܲܠ ܝܼܣܪܵܝܹܠ ܘܫܡܝܼܥܠܗ݇ܘܿܢ ܒܢܲܝ̈ ܝܼܣܪܵܝܹܠ ܘܙܕܝܼܥܠܗ݇ܘܿܢ ܡ̣ܢ ܩܵܕ݇ܡ ܦܠܸܫܬܵܝܹ̈ܐ.܀ ܘܐ݇ܡܸܪܗ݇ܘܿܢ ܒܢܲܝ̈ ܝܼܣܪܵܝܹܠ ܠܫܡܘܼܐܹܝܠ ܠܵܐ ܫܵܬܩܸܬ̇ ܡܸܢܲܢ ܠܨܵܠܘܿܝܹܐ ܩܵܕ݇ܡ ܡܵܪܝܵܐ ܐܲܠܵܗܲܢ؛ ܕܦܵܪܸܩܠܲܢ ܡ̣ܢ ܐܝܼܕܵܐ ܕܦܠܸܫܬܵܝܹ̈ܐ.܀ ܘܫܩܸܠܹܗ ܫܡܘܼܐܹܝܠ ܚܲܕ݇ ܦܵܐܪܵܐ ܕܚܲܠܒ̣ܵܐ ܘܡܘܼܣܸܩܠܹܗ ܕܸܒ̣ܚܵܐ ܟܵܡܝܼܠ ܠܡܵܪܝܵܐ؛ ܘܡܨܘܼܠܹܐܠܹܗ ܫܡܘܼܐܹܝܠ ܩܵܕ݇ܡ ܡܵܪܝܵܐ ܥܲܠ ܒܢܲܝ̈ ܝܼܣܪܵܝܹܠ ܘܓ̰ܘܼܘܸܒܠܹܗ ܡܵܪܝܵܐ܀
ܚܲܒ̣ܪܹܗ
ܐܹܫܲܥܝܵܐ ܢܛ؛ 1‐19
ܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܘܐ݇ܡܸܪܹܗ ܐܹܫܲܥܝܵܐ ܢܒ̣ܝܼܵܐ ܠܟܠܹܗ ܛܵܝܸܦܵܐ؛ ܠܹܐ ܝ݇ܠܵܗ̇ ܟܪܝܼܬܵܐ ܐܝܼܕܹܗ ܕܡܵܪܝܵܐ ܠܦܵܪܘܿܩܹܐ؛ ܘܐܵܦܠܵܐ ܢܵܬܹܗ ܝܲܩܘܼܪܬܵܐ ܠܸܫܡܲܥܝܵܐ.܀ ܐܸܠܵܐ ܓܢܵܗܵܘܟ̣ܘܿܢ ܦܪܸܫܠܗ݇ܘܿܢ ܒܹܝܠܵܘܟ̣ܘܿܢ ܘܠܐܲܠܵܗܵܘܟ̣ܘܿܢ؛ ܘܚܛܝܼܵܬܵܘ̈ܟ̣ܘܿܢ ܡܘܼܕܸܪܗ݇ܘܿܢ ܦܵܬܘܵܬܹ̈ܗ ܡܸܢܵܘܟ̣ܘܿܢ ܕܠܵܐ ܫܵܡܸܥ.܀ ܣܵܒܵܒ ܕܐܝܼܕܵܬܵܘ̈ܟ̣ܘܿܢ ܟ̰ܘܦܠܸܢܹܐ ܝ݇ܢܵܐ ܒܕܸܡܵܐ ܘܨܸܒܥܵܬܵܘ̈ܟ̣ܘܿܢ ܒܥܵܘܠܵܐ؛ ܘܣܸܦܘܵܬܵܘ̈ܟ̣ܘܿܢ ܗܲܡܙܘܼܡܹܐ ܒܘܼܚܬܲܢ؛ ܘܠܸܫܵܢܵܘ̈ܟ̣ܘܿܢ ܬܲܚܡܘܼܢܹܐ ܒܥܵܘܠܵܐ.܀ ܘܠܲܝܬ̇ ܕܩܵܪܹܐ ܒܙܲܕܝܼܩܘܼܬܵܐ؛ ܘܠܲܝܬ̇ ܕܕܵܐܸܢ ܒܗܲܝܡܵܢܘܼܬܵܐ.܀ ܦܸܫܠܗ݇ܘܿܢ ܒܗܹܒ̣ܝܼ ܥܲܠ ܣܦܝܼܩܘܼܬܵܐ؛ ܘܗܘܼܡܙܸܡܠܗ݇ܘܿܢ ܒܲܛܝܼܠܘܼܬܵܐ. ܒܛܸܢܗ݇ܘܿܢ ܦܸܟ̮ܠܹ̈ܐ ܘܗܘܼܨܸܠܗ݇ܘܿܢ ܡܲܪ̈ܥܹܐ؛ ܒܸܥܹ̈ܐ ܕܚܲܪܡܵܢܵܐ [ܕܚܘܼܘܵܐ] ܡܘܼܩܝܸܦܠܗ݇ܘܿܢ؛ ܘܐܲܝܟܼ ܓܲܪܕܵܐ ܕܐܵܙܠܵܐ ܟܘܼܫܵܐ ܙܩܸܪܗ݇ܘܿܢ؛ ܗ̇ܘ ܕܐܵܟ̣ܸܠ ܡ̣ܢ ܒܸܥܹܝ̈ܗܝ ܒܸܬ ܡܵܐܸܬ؛ ܘܗ̇ܘ ܕܫܵܡܸܛܠܵܗ̇ ܒܸܬ ܡܵܫ݇ܟ̰ܸܚ ܙܲܥܝܵܐ. ܙܩܘܿܪܲܝܗܝ ܠܹܐ ܗܵܘܹܐ ܩܵܐ ܠܒ̣ܸܫܬܵܐ؛ ܠܹܐ ܦܵܝܫܝܼ ܡܘܼܠܒ̣ܸܫܹܐ ܒܦܘܼܠܚܵܢܲܝ̈ܗܝ؛ ܦܘܼܠܚܵܢܲܝ̈ܗܝ ܦܘܼܠܚܵܢܹ̈ܐ ܕܦܸܟ̮ܠܵܐ ܝ݇ܢܵܐ؛ ܘܦܘܼܠܚܵܢܹ̈ܐ ܕܥܵܘܠܵܐ ܒܐܝܼܕ̈ܵܬܲܝܗܝ؛ ܘܐܲܩܠܵܬܲܝ̈ܗܝ ܒܸܪܚܵܛܵܐ ܝ݇ܢܵܐ ܠܒܝܼܫܬܵܐ؛ ܘܡܲܠܝܘܼܙܹܐ ܠܬܵܦܘܿܚܹܐ ܕܸܡܵܐ ܚܵܠܝܼܨ. ܚܝܼܵܠܲܝ̈ܗܝ ܚܝܼܵܠܹܐ ܝ݇ܢܵܐ ܕܦܸܟ̰ܠܵܐ ܘܣܠܵܒܵܐ ܘܬܒ̣ܵܪܵܐ ܒܐܘܼܪ̈ܚܵܬܲܝܗܝ.܀ ܐܘܼܪܚܵܐ ܕܫܠܵܡܵܐ ܠܵܐ ܝ݇ܕܥܝܼܠܗ݇ܘܿܢ؛ ܘܠܲܝܬ̇ ܕܝܼܘܵܢ ܒܚܕܵܪ̈ܝܵܬܲܝܗܝ.܀ ܘܓ̰ܵܕܵܘܵܬܲܝ̈ܗܝ ܦܟ̰ܝܼܠܹܐ ܝ݇ܢܵܐ؛ ܘܟܠ ܕܚܵܕܸܪ ܒܝܼܲܝܗܝ ܠܹܐ ܝܵܕܸܥ ܫܠܵܡܵܐ. ܒܘܼܬ ܕܐܵܗܵܐ؛ ܪܚܸܩܠܵܗ̇ ܡܸܢܲܢ ܕܝܼܘܵܢ ܘܙܲܕܝܼܩܘܼܬܵܐ ܠܹܐ ܡܵܛܝܵܐ ܠܲܢ؛ ܣܦܸܪܲܢ ܠܒܲܗܪܵܐ ܘܗ݇ܘܹܐܠܹܗ ܚܸܫܟܵܐ؛ ܘܠܫܲܒ̣ܩܵܐ ܘܒܥܲܡܛܵܢܵܐ ܚܕܸܪܲܢ.܀ ܦܘܼܠܬܸܫܠܲܢ ܓܘܼܕܵܐ ܐܲܝܟܼ ܟܘܼܪܹ̈ܐ؛ ܦܘܼܠܬܸܫܠܲܢ ܐܲܝܟܼ ܕܐܵܢܝܼ ܕܠܲܝܬ̇ ܠܗ݇ܘܿܢ ܥܲܝܢܹ̈ܐ. ܬܘܼܪܩܸܠܲܢ ܒܦܲܠܓܵܐ ܕܝܵܘܡܵܐ ܐܲܝܟܼ ܕܒܪܲܡܫܵܐ. ܘܬܘܼܢܸܚܠܲܢ ܐܲܝܟܼ ܕܐܵܢܝܼ ܕܩܘܼܪܒܵܐ ܝ݇ܢܵܐ ܠܸܡܝܵܬܵܐ ܓܘܼܪܓܸܡܠܲܢ ܟܠܲܢ ܐܲܝܟܼ ܕܹܒ̣ܹ̈ܐ؛ ܘܐܲܝܟܼ ܝܵܘܢܹ̈ܐ ܢܗܸܡܠܲܢ؛ ܣܦܸܪܲܢ ܠܕܝܼܘܵܢ ܘܠܲܝܬ̇؛ ܘܠܦܘܼܪܩܵܢܵܐ ܘܪܚܸܩܠܹܗ ܡܸܢܲܢ.܀ ܣܵܒܵܒ ܕܙܸܕܠܹܗ ܥܵܘܠܲܢ ܩܵܕ݇ܡܘܼܟܼ ܘܚܛ̈ܝܼܵܬܲܢ ܝܘܼܗ݇ܒ̣ܸܠܗ݇ܘܿܢ ܣܵܗܕܘܼܬܵܐ ܒܝܼܲܢ ܣܵܒܵܒ ܕܥܵܘܠܲܢ ܥܲܡܲܢ ܝܼܠܹܗ؛ ܘܚܛ̈ܝܼܵܬܲܢ ܐܲܫܟܵܪܵܐ ܝ݇ܢܵܐ.܀ ܥܒ̣ܸܕܠܲܢ ܥܵܘܠܵܐ ܘܕܘܼܓܸܠܲܢ ܒܡܵܪܝܵܐ؛ ܘܕܸܪܲܢ ܡ̣ܢ ܒܵܬ݇ܪ ܐܲܠܵܗܲܢ؛ ܗܘܼܡܙܸܡܠܲܢ ܙܠܘܼܡܝܵܐ؛ ܘܗܘܹܐܠܲܢ ܚܵܝܝܼܢ ܘܒܛܸܢܲܢ؛ ܘܬܘܼܚܡܸܢܲܢ ܡ̣ܢ ܠܸܒܲܢ ܗܹܡܸܙܡܵܢܹ̈ܐ ܕܒܘܼܚܬܲܢ.܀ ܡܘܼܕܸܪܲܢ ܕܝܼܘܵܢ ܠܵܒܵܬ݇ܪܵܐ؛ ܘܙܲܕܝܼܩܘܼܬܵܐ ܡܘܼܟܠܝܼܵܐ ܠܲܢ ܪܸܚܩܵܐ؛ ܣܵܒܵܒ ܕܬܘܼܪܩܸܠܵܗ̇ ܗܵܩܘܼܬܵܐ ܓܵܘ ܐܘܼܪܚܵܐ؛ ܘܡܲܢܟ̣ܲܣܬܵܐ ܠܹܐ ܡܵܨܝܵܐ ܠܹܐܬܵܝܵܐ. ܘܗܵܘܹܐܠܵܗ̇ ܗܵܩܘܼܬܵܐ ܒܛܸܫܘܵܐ ܘܒܛܸܠܵܗ̇ ܦܲܪܡܵܝܬܵܐ ܡ̣ܢ ܗܵܘܢܲܢ. ܘܚܙܹܐܠܹܗ ܡܵܪܝܵܐ ܕܠܲܝܬ̇ ܕܝܼܘܵܢ؛ ܘܗܘܹܐܠܵܗ̇ ܣܪܝܼܬܵܐ ܒܥܲܝܢ̈ܘܼܗܝ؛ ܘܚܙܹܐܠܹܗ ܕܠܲܝܬ̇ ܐ݇ܢܵܫܵܐ؛ ܘܥܘܼܓ̰ܸܒܠܹܗ ܕܠܲܝܬ̇ ܗܲܝܸܪܵܢܵܐ؛ ܘܦܘܼܪܸܩܠܹܗ ܕܪܵܥܹܗ؛ ܘܙܲܕܝܼܩܘܼܬܹܗ ܩܲܡ ܣܵܢܕܵܐ ܠܹܗ.܀ ܠܒ̣ܸܫܠܹܗ ܙܲܕܝܼܩܘܼܬܵܐ ܐܲܝܟܼ ܫܸܪܝܵܢܵܐ [ܡܵܕܵܠܵܐ]؛ ܘܟܘܼܣܝܼܬܵܐ ܕܦܘܼܪܩܵܢܵܐ ܒܪܹܫܹܗ ܠܒ̣ܸܫܠܹܗ ܠܒ̣ܸܫܬܵܐ ܕܦܘܼܪܥܵܢܵܐ ܕܫܵܩܸܠ ܬܘܼܥܠܵܐ ܡ̣ܢ ܣܵܢܝܵܢ̈ܘܼܗܝ ܘܦܲܪܸܥ ܠܕܸܫ̮ܡܸܢ̈ܘܼܗܝ؛ ܘܠܓܵܙܲܪ̈ܝܵܬܹܐ ܒܸܬ ܦܲܪܸܥ ܦܘܼܪܥܵܢܵܐ܀
♱♱♱♱♱♱♱♱
ܬܠܵܬܒܫܲܒܵܐ ܕܒܵܥܘܼܬܵܐ ܕܢܝܼܢܘܵܝܹ̈ܐ
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܪ̈ܗܘܿܡܵܝܹܐ ܐܲܚܲܝ̈ ܒܲܪܸܟܼܡܵܪܝ܀
ܒܸܛܠܵܒܵܐ ܝ݇ܘܸܢ ܡܸܢܵܘܟܼܘܿܢ ܐܵܚܘܿܢܘܵܬܝܼ̈ ܒܪ̈ܲܚܡܹܐ ܕܐܲܠܵܗܵܐ ܕܡܲܩܸܡܝܼܬܘܿܢ ܦܲܓܼܪܵܘܟܼܘܿܢ ܕܸܒܼܚܵܐ ܚܲܝܵܐ ܘܩܲܕܝܼܫܵܐ ܘܩܘܼܒܠܵܐ ܩܵܕ݇ܡ ܐܲܠܵܗܵܐ ܒܚܸܠܡܲܬ ܡܵܪܹܐ ܦܲܪܡܵܝܬܵܐ* ܘܠܵܐ ܦܵܝܫܝܼܬܘܿܢ ܕܘܼܡܝܹܐ ܠܐܵܗܵܐ ܕܘܼܢܝܹܐ؛ ܐܸܠܵܐ ܦܘܼܫܘܼܢ ܡܘܼܚܠܸܦܹܐ ܒܚܲܕܲܬܬܵܐ ܕܚܝܼܵܠܵܘܟܼܘܿܢ؛ ܘܗܵܘܝܼܬܘܿܢ ܒܸܦܪܵܫܵܐ ܐܲܝܢܝܼ ܝ݇ܠܹܗ ܪܸܙܵܝܹܗ ܕܐܲܠܵܗܵܐ ܛܵܒܼܵܐ ܘܡܲܩܒܘܼܠ ܘܟܵܡܝܼܠ* ܐܝܼܢܵܐ ܒܹܐܡܵܪܵܐ ܝ݇ܘܸܢ ܒܫܵܦܵܩܲܬ ܕܦܸܫܠܵܗ̇ ܝܘܼܗܒܸܠܬܵܐ ܐܸܠܝܼ ܩܵܐ ܟܠܵܘܟܼܘܿܢ؛ ܕܠܵܐ ܗܵܘܝܼܬܘܿܢ ܒܸܚܫܵܒܼܵܐ ܙܵܘܕܵܐ ܡ̣ܢ ܡܸܢܕܝܼ ܕܘܵܓ̰ܸܒ ܝܼܠܵܗ̇ ܕܚܵܫܒܼܝܼܬܘܿܢ. ܐܸܠܵܐ ܗܵܘܝܼܬܘܿܢ ܬܲܚܡܘܼܢܹܐ ܒܐܵܕܵܒܘܼܬܵܐ ܟܠ ܐ݇ܢܵܫܵܐ ܐܲܝܟܼ ܕܦܘܼܠܹܓ݇ܠܹܗ ܩܵܬܹܗ ܐܲܠܵܗܵܐ ܗܲܝܡܵܢܘܼܬܵܐ ܒܟܝܼܘܿܠܵܐ* ܣܵܒܵܒ ܕܵܐܟܼܝܼ ܕܒܚܲܕ݇ ܦܲܓܼܪܵܐ ܪܵܒܵܐ ܗܲܕܵܡܹ̈ܐ ܐܝܼܬ ܠܲܢ؛ ܘܟܠܲܝܗܝ ܗܲܕܵܡܹ̈ܐ ܠܲܝܬ ܠܗ݇ܘܿܢ ܚܲܕ݇ ܦܘܼܠܚܵܢܵܐ* ܗܲܕܟܼܵܐ ܐܘܼܦ ܐܲܚܢܲܢ ܕܪܵܒܵܐ ܝ݇ܘܲܚ. ܚܲܕ݇ ܦܲܓܼܪܵܐ ܝ݇ܘܲܚ ܒܡܫܝܼܚܵܐ ܟܠ ܚܲܕ݇ ܡܸܢܲܢ ܗܲܕܵܡܹ̈ܐ ܝ݇ܘܲܚ ܕܚܲܕ݇ ܕܗ̇ܘ ܐ݇ܚܹܪ݇ܢܵܐ* ܐܝܼܢܵܐ ܐܝܼܬ ܠܲܢ ܚܲܠܥܲܬܹ̈ܐ ܕܬܲܗܵܪܹ̈ܐ ܦܪ̈ܝܼܫܹܐ ܐܲܝܟܼ ܫܵܦܵܩܲܬ ܕܦܸܫܠܵܗ̇ ܝܘܼܗ݇ܒܼܸܠܬܵܐ ܩܵܬܲܢ. ܐܝܼܬ ܕܢܒܼܝܼܘܼܬܵܐ ܐܲܝܟܼ ܟܝܼܘܿܠܵܐ ܕܗܲܝܡܵܢܘܼܬܹܗ* ܘܐܝܼܬ ܕܚܸܠܡܲܬ ܐܝܼܬ ܠܹܗ ܒܚܸܠܡܲܬܹܗ؛ ܘܐܝܼܬ ܕܡܲܠܦܵܢܵܐ ܝ݇ܠܹܗ ܒܝܘܼܠܦܵܢܹܗ* ܘܐܝܼܬ ܕܝܵܗܒܼܵܢܵܐ ܕܠܸܒܵܐ ܝ݇ܠܹܗ ܒܗܲܡܙܲܡܬܹܗ. ܘܕܝܵܗܒܸܠ ܒܨܸܦܝܘܼܬܵܐ. ܘܟܵܠܹܐ ܒܪܹܫܵܐ ܒܚܵܦܵܛܘܼܬܵܐ ܘܥܵܒܼܸܕ ܪ̈ܲܚܡܹܐ ܒܦܨܝܼܚܘܼܬܵܐ* ܠܵܐ ܗܵܘܹܐ ܠܹܐܒܵܢܵܐ ܚܘܼܒܵܘܟܼܘܿܢ. ܐܸܠܵܐ ܗܵܘܝܼܬܘܿܢ ܒܸܣܢܵܝܵܐ ܠܒܝܼܫܵܬܹ̈ܐ ܘܒܸܬܒܲܥܝܵܐ ܠܛܵܒܼܵܬܹ̈ܐ* ܗܵܘܝܼܬܘܿܢ ܡܲܚܘܼܒܹܐ ܚܲܕ݇ ܠܗ̇ܘ ܐ݇ܚܸܪ݇ܢܵܐ ܒܚܘܼܒܵܐ ܕܐܵܚܘܿܢܘܵܬܹ̈ܐ* ܗܵܘܝܼܬܘܿܢ ܩܵܕ݇ܡܵܝܹ̈ܐ ܒܡܝܵܩܲܪܬܵܐ ܕܚܲܕ݇ ܠܗ̇ܘ ܐ݇ܚܹܪ݇ܢܵܐ* ܗܵܘܝܼܬܘܿܢ ܚܲܦܛܵܢܹ̈ܐ ܘܠܵܐ ܬܲܢܒܵܠܹ̈ܐ. ܗܵܘܝܼܬܘܿܢ ܒܸܪܬܵܚܵܐ ܒܪܘܼܚܵܐ* ܗܵܘܝܼܬܘܿܢ ܒܸܦܠܵܚܵܐ ܠܡܵܪܵܘܟܼܘܿܢ؛ ܘܒܸܚܕܵܝܵܐ ܒܗܹܒܼܝܼܵܘܟܼܘܿܢ. ܗܵܘܝܼܬܘܿܢ ܚܲܡܠܵܢܹ̈ܐ ܒܝܲܠܨܘܼܘܵܘܟܼܘܿܢ ܘܗܵܘܝܼܬܘܿܢ ܕܵܝܸܡ ܒܨܠܘܿܬܵܐ* ܗܵܘܝܼܬܘܿܢ ܫܲܪ̈ܝܼܟܹܐ ܠܣܢܝܼܩܘܼܬܵܐ ܕܩܲܕܝܼܫܹ̈ܐ؛ ܘܡܲܚܸܒܵܢܹ̈ܐ ܕܩܲܪ̈ܝܼܒܵܝܹܐ* ܒܵܪܟܼܘܿܢ ܠܟܲܡܪ̈ܵܢܵܘܟܼܘܿܢ ܒܵܪܟܼܘܿܢ ܘܠܵܐ ܠܵܝܛܝܼܬܘܿܢ ܚܕܹܐܡܘܿܢ ܥܲܡ ܕܐܵܢܝܼ ܕܚܵܕܝܼ؛ ܘܒܟܼܹܐܡܘܿܢ ܥܲܡ ܕܐܵܢܝܼ ܕܒܵܟܼܝܼ. ܗ̇ܘ ܡܸܢܕܝܼ ܕܚܵܫܒܼܝܼܬܘܿܢ ܥܲܠ ܓܵܢܵܘܟܼܘܿܢ ܗܵܕܵܐ ܐܘܼܦ ܥܲܠ ܐܵܚܘܿܢܘܵܬܵܘ̈ܟܼܘܿܢ؛ ܘܠܵܐ ܚܵܫܒܼܝܼܬܘܿܢ ܚܝܼܵܠ ܪܵܡܵܐ. ܐܸܠܵܐ ܬܒܸܥܡܘܿܢ ܠܐܵܢܝܼ ܕܝܼܢܵܐ ܡܲܟܝܼܟܹ̈ܐ. ܘܠܵܐ ܗܵܘܝܼܬܘܿܢ ܗܵܘܢܵܢܹ̈ܐ ܫܚܝܼܵܠ ܕܓܵܢܵܘܟܼܘܿܢ* ܘܠܵܐ ܦܵܪܥܝܼܬܘܿܢ ܠܐ݇ܢܵܫܵܐ ܒܝܼܫܬܵܐ ܡ̣ܢ ܓܹܒܵܐ ܕܒܝܼܫܬܵܐ؛ ܐܸܠܵܐ ܗܵܘܹܐ ܠܵܘܟܼܘܿܢ ܚܲܡ ܕܦܵܠܚܝܼܬܘܿܢ ܛܵܒܼܵܬܹ̈ܐ ܩܵܕ݇ܡ ܟܠܲܝܗܝ ܒܢܲܝ̈ܢܵܫܵܐ* ܘܐܸܢ ܡܵܨܝܵܐ ܐܲܝܟܼ ܕܡ̣ܢ ܠܟܸܣܠܵܘܟܼܘܿܢ ܥܲܡ ܟܠ ܒܲܪܢܵܫܵܐ ܫܠܵܡܵܐ ܥܒܼܘܿܕܘܿܢ* ܠܵܐ ܗܵܘܝܼܬܘܿܢ ܒܸܫܩܵܠܵܐ ܬܘܼܥܠܵܐ ܕܓܵܢܵܘܟܼܘܿܢ ܡܘܼܚܸܒܝܼ̈. ܐܸܠܵܐ ܗܲܒܼܠܗ݇ܘܿܢ ܕܘܼܟܬܵܐ ܩܵܐ ܟܲܪܒܵܐ. ܣܵܒܵܒ ܦܝܼܫܬܵܐ ܝ݇ܠܵܗ̇ ܟܬܝܼܒܼܬܵܐ؛ ܕܐܸܢ ܠܵܐ ܥܵܒܼܕܸܬ ܕܝܼܘܿܢ ܩܵܐ ܓܵܢܘܼܟܼ؛ ܐܵܢܵܐ ܒܸܬ ܥܵܒܼܕܸܢ ܕܝܼܘܵܢܘܼܟܼ ܒܹܐܡܵܪܵܐ ܝ݇ܠܹܗ ܐܲܠܵܗܵܐ* ܐܸܢ ܟܦܝܼܢܵܐ ܝ݇ܠܹܗ ܕܸܫܡܸܢܘܼܟܼ ܡܵܐܟܼܸܠܹܗ؛ ܘܐܸܢ ܨܸܦܝܵܐ ܝ݇ܠܹܗ ܡܲܫܬܝܼ ܠܹܗ؛ ܘܐܸܢ ܐܲܢܹܐ ܥܵܒܼܕܸܬ ܐܹܠܹܗ ܓܸܡܘܼܪ̈ܝܵܬܹܐ ܕܢܘܼܪܵܐ ܒܸܬ ܓ̰ܲܡܥܹܬ ܥܲܠ ܩܲܪܩܸܦܬܹܗ* ܠܵܐ ܓܼܵܠܒܵܐ ܠܵܘܟܼܘܿܢ ܒܝܼܫܬܵܐ؛ ܐܸܠܵܐ ܓܼܠܘܿܒܘܿܢ ܠܒܝܼܫܬܵܐ ܒܛܵܒܼܬܵܐ*
♱♱♱♱♱♱♱♱
ܠܘܩܐ ܝܚ: 1 ‐ 15
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܠܘܩܐ
♰ ܘܐ݇ܡܝܼܪܹܗ ܝܑܼܫܘܿܥ ܠܬܲܠܡܝܼ̈ܕܘܼܗܝ ܐܵܗܵܐ ܡܲܬܠܵܐ: ܕܒܟܠ ܥܸܕܵܢܵܐ ܨܵܠܝܼ ܨܠܘܿܬܵܐ ܘܠܵܐ ܣܲܩܕܝܼ: ܚܲܕ݇ ܕܲܝܵܢܵܐ ܐܝܼܬ ܗ݇ܘܵܐ ܓܵܘ ܚܕܵܐ ܡܕܝܼܢ݇ܬܵܐ. ܕܡ̣ܢ ܐܲܠܵܗܵܐ ܠܹܐ ܙܵܕܸܥ ܗ݇ܘܵܐ، ܘܡ̣ܢ ܒܢܲܝ̈ܢܵܫܵܐ ܠܹܐ ܢܵܚܸܦ ܗ݇ܘܵܐ: ܐܝܼܢܵܐ ܐܝܼܬ ܗ݇ܘܵܐ ܚܕܵܐ ܐܲܪܡܲܠܬܵܐ ܓܵܘ ܗ̇ܝ ܡܕܝܼܢ݇ܬܵܐ. ܘܟܹܐ ܐܲܬܝܵܐ ܗ݇ܘܵܐ ܠܟܸܣܠܹܗ ܘܐܲܡܪܵܐ ܗ݇ܘܵܐ: ܥܒܼܘܼܕܠܵܗ̇ ܕܝܼܘܵܢܝܼ ܡ̣ܢ ܒܥܸܠܕܝܼܢܝܼ. ܘܩܵܐ ܚܲܕ݇ ܙܲܒܼܢܵܐ ܪܵܒܵܐ ܠܹܐ ܒܲܣܡܵܐ ܗܘܵܐ ܠܹܗ: ܐܝܼܢܵܐ ܡ̣ܢ ܒܵܬ݇ܪ ܗܵܕܵܐ ܐ݇ܝܼܪܹܗ ܒܓܵܢܹܗ: ܐܸܢ ܡ̣ܢ ܐܲܠܵܗܵܐ ܠܹܐ ܝܘܸܢ ܒܸܙܕܵܥܵܐ، ܘܡ̣ܢ ܒܢܲܝ̈ܢܵܫܵܐ ܠܹܐ ܝܘܸܢ ܒܸܢܚܵܦܵܐ، ܐܵܦܸܢ ܒܘܼܬ ܕܝܼܠܵܗ̇ ܡܵܤܩܘܼܕܝܼ ܗܵܕܹܐ ܐܲܪܡܲܠܬܵܐ، ܒܸܬ ܥܲܒܼܕܸܢܵܗ̇ ܕܝܼܘܵܢܘܼܗ̇ ܕܠܵܐ ܒܟܠ ܥܸܕܵܢܵܐ ܗܵܘܝܵܐ ܒܹܐܬܵܝܵܐ ܡܲܣܩܘܼܕܝܼ. ܘܐ݇ܡܝܼܪܹܗ ܡܵܪܲܢ: ܫܡܝܼܥܡܘܿܢ ܡܘܿܕܝܼ ܐ݇ܡܝܼܪܹܗ ܕܲܝܵܢܵܐ ܕܥܵܘܠܵܐ! ܐܝܼܢܵܐ ܐܲܠܵܗܵܐ ܠܵܐ ܒܘܼܫ ܙܵܘܕܵܐ ܒܸܬ ܫܵܩܸܠ ܬܘܼܥܠܵܐ ܕܓܘܼܒܝ̈ܘܼܗܝ ܕܟܹܐ ܩܵܪܝܼܠܹܗ ܒܝܵܘܡܵܐ ܘܒܠܸܠܝܵܐ ܘܡܲܪܝܸܟܼ ܒܹܐܢܹܗ ܥܲܠܲܝܗܝ؟ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ ܒܸܬ ܥܵܒܼܸܕܠܵܗ̇ ܕܝܼܘܵܢܲܝܗܝ ܓ̰ܲܠܕܹܐ: ܐ݇ܡܝܼܪܹܗ ܒܸܕ ܐܵܬܹܐ ܒܪܘܿܢܹܗ ܕܐ݇ܢܵܫܵܐ: ܘܝܵܐ ܪܲܒ ܒܸܕ ܡܵܫ݇ܟ̰ܸܚ ܗܲܝܡܵܢܘܼܬܵܐ ܥܲܠ ܐܲܪܥܵܐ؟ ܘܐ݇ܡܝܼܪܹܗ ܐܵܗܵܐ ܡܲܬܠܵܐ ܠܘܼܩܒܼܲܠ ܐ݇ܢܵܫܹ̈ܐ ܐܲܝܢܝܼ ܐ݇ܢܵܫܹ̈ܐ ܕܒܗܝܼܒܼܝܼ ܗ݇ܘܵܘ ܥܲܠ ܓܵܢܲܝܗܝ ܕܙܲܕܝܼܩܹ̈ܐ ܝܢܵܐ: ܘܡܲܣܠܝܼ ܗ݇ܘܵܘ ܠܟܠ ܐ݇ܢܵܫܵܐ: ܬܪܲܝ ܐ݇ܢܵܫܹ̈ܐ ܣܝܼܠ݇ܩܠܗ݇ܘܿܢ ܠܗܲܝܟܠܵܐ ܠܡܨܵܠܘܼܝܹܐ: ܚܲܕ݇ ܦܪܝܼܫܵܐ ܘܐ݇ܚܹܪ݇ܢܵܐ ܡܵܟܼܣܵܐ: ܘܗ̇ܘ ܦܪܝܼܫܵܐ ܟܸܠܝܵܐ ܝܗ݇ܘܵܐ ܒܲܝܢܵܬ ܠܓܵܢܹܗ ܘܐܲܢܹܐ ܡܨܵܠܹܐ ܗ݇ܘܵܐ: ܝܵܐ ܐܲܠܵܗܵܐ ܡܵܘܕܘܼܝܹܐ ܝܘܸܢ ܐܸܠܘܼܟܼ، ܕܠܵܐ ܗ݇ܘܹܐ ܠܝܼ ܐܲܝܟܼ ܫܲܪܟܵܐ ܕܐ݇ܢܵܫܹ̈ܐ ܚܵܛܘܿܦܹ̈ܐ ܘܟ̰ܵܠܘܼܓ̰ܹ̈ܐ ܘܓܲܝܵܪܹ̈ܐ: ܘܠܵܐ ܐܲܝܟܼ ܐܵܗܵܐ ܡܵܟܼܣܵܐ: ܐܸܠܵܐ ܟܹܐ ܨܵܝܡܸܢ ܬܪܹܝ ܓܵܗܹ̈ܐ ܒܫܲܒܬܵܐ: ܘܟܹܐ ܝܲܗ݇ܒܼܸܢ ܡܲܥܣܵܪܹ̈ܐ ܥܲܠ ܟܠܡܸܢܕܝܼ ܕܩܵܢܸܢ: ܐܝܼܢܵܐ ܗܵܘ ܡܵܟܼܣܵܐ ܟܸܠܝܵܐ ܝܗ݇ܘܵܐ ܡ̣ܢ ܪܸܚܩܵܐ. ܘܠܹܐ ܒܵܥܹܐ ܗ݇ܘܵܐ ܐܵܦܠܵܐ ܥܲܝܢܘܼ̈ܗܝ ܡܵܪܸܡ ܠܸܫܡܲܝܵܐ. ܐܸܠܵܐ ܟܹܐ ܡܵܚܹܐ ܗ݇ܘܵܐ ܥܲܠ ܨܲܕܪܹܗ ܘܐܵܡܸܪ ܗ݇ܘܵܐ: ܝܵܐ ܐܲܠܵܗܵܐ ܪܲܚܸܡ ܥܲܠܝܼ ܚܲܛܵܝܵܐ. ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܕܨܠܹܐܠܹܗ ܐܵܗܵܐ ܠܒܲܝܬܹܗ ܡܘܼܟܫܸܛܵܐ ܒܘܼܫ ܡ̣ܢ ܗ̇ܘ ܦܪܝܼܫܵܐ: ܣܵܒܵܒ ܟܠ ܐ݇ܢܵܫܵܐ ܕܡܵܪܸܡ ܓܵܢܹܗ ܒܸܕ ܦܵܐܸܫ ܡܘܼܡܟܸܟܼܵܐ ܘܟܠ ܕܡܲܡܟܸܟܼ ܓܵܢܹܗ ܒܸܬ ܦܵܐܸܫ ܡܘܼܪܡܵܐ.
♱♱♱♱♱♱♱♱