1ܟܠ ܡ̇ܢ ܕܗܲܡܸܢ ܕܝܼܫܘܿܥ ܝ݇ܠܹܗ ܡܫܝܼܚܵܐ؛ ܡ̣ܢ ܐܲܠܵܗܵܐ ܗ݇ܘܹܐܠܹܗ. ܘܟܠ ܕܡܲܚܸܒ ܠܝܵܠܘܿܕܵܐ؛ ܟܹܐ ܡܲܚܸܒ ܐܘܼܦ ܠܗ̇ܘ ܕܗ݇ܘܹܐܠܹܗ ܡܸܢܹܗ. 2ܘܒܵܐܗܵܐ ܒܝܼܕܵܥܝܵܐ ܝ݇ܘܵܚ ܕܡܲܚܘܼܒܹܐ ܝ݇ܘܵܚ ܠܒܢܘܿܢܹ̈ܐ ܕܐܲܠܵܗܵܐ؛ ܐܝܼܡܲܢ ܕܠܐܲܠܵܗܵܐ ܡܲܚܘܼܒܹܐ ܝ݇ܘܵܚ ܘܒܸܥܒܼܵܕܵܐ ܝ݇ܘܵܚ ܦܘܼܩܕܵܢ̈ܘܼܗܝ. 3ܣܵܒܵܒ ܐܵܗܵܐ ܝ݇ܠܹܗ ܚܘܼܒܹܗ ܕܐܲܠܵܗܵܐ؛ ܕܢܵܛܪܲܚ ܦܘܼܩܕܵܢ̈ܘܼܗܝ؛ ܘܦܘܼܩܕܵܢ̈ܘܼܗܝ ܠܹܐ ܝ݇ܢܵܐ ܝܵܩܘܿܕܹ̈ܐ. 4ܣܵܒܵܒ ܟܠ ܕܝܼܠܹܗ ܗ݇ܘܝܼܵܐ ܡ̣ܢ ܐܲܠܵܗܵܐ؛ ܟܹܐ ܓܼܵܠܸܒ ܠܥܵܠܡܵܐ. ܘܐܵܗܵܐ ܝ݇ܠܵܗ̇ ܓܼܵܠܹܒܘܼܬܵܐ ܕܓܼܠܸܒܠܵܗ̇ ܠܥܵܠܡܵܐ؛ ܗܲܝܡܵܢܘܼܬܲܢ. 5ܡܵܢܝܼ ܝ݇ܠܹܗ ܕܓܼܵܠܸܒ ܠܥܵܠܡܵܐ؛ ܐܸܠܵܐ ܗ̇ܘ ܕܗܲܡܸܢ ܕܝܼܫܘܿܥ ܝ݇ܠܹܗ ܒܪܘܿܢܹܗ ܕܐܲܠܵܗܵܐ؛ 6ܐܵܗܵܐ ܝ݇ܠܹܗ ܕܐ݇ܬܹܐܠܹܗ ܒܝܼܲܕ ܡܝܼ̈ܵܐ ܘܕܸܡܵܐ؛ ܝܼܫܘܿܥ ܡܫܝܼܚܵܐ. ܠܹܐ ܗَܘܵܐ ܒܡܝܼ̈ܵܐ ܗܲܪ؛ ܐܸܠܵܐ ܒܡܝܼ̈ܵܐ ܘܕܸܡܵܐ. 7ܘܪܘܼܚܵܐ ܝ݇ܠܹܗ ܕܒܝܼܵܗ݇ܒܼܵܐ ܝ݇ܠܹܗ ܣܵܗܕܘܼܬܵܐ؛ ܣܵܒܵܒ ܪܘܼܚܵܐ ܣܲܪܲܣܬܘܼܬܵܐ ܝ݇ܠܹܗ. 8ܘܬܠܵܬ݇ܐ ܝܼܢܵܐ ܕܝܵܗ݇ܒܼܝܼ ܣܵܗܕܘܼܬܵܐ ܒܐܲܪܥܵܐ؛ ܪܘܼܚܵܐ؛ ܘܡܝܼ̈ܵܐ؛ ܘܕܸܡܵܐ؛ ܘܬܸܠܘܼܢܬܵܝܗܝ ܒܚܲܕ݇ ܝܼܢܵܐ. 9ܐܸܢ ܣܵܗܕܘܼܬܵܐ ܕܒܢܲܝ̈ܢܵܫܵܐ ܩܵܒ̇ܠܲܚ؛ ܣܵܗܕܘܼܬܹܗ ܕܐܲܠܵܗܵܐ ܒܘܼܫ ܓܘܼܪܬܵܐ ܝ݇ܠܵܗ̇؛ ܣܵܒܵܒ ܐܵܗܵܐ ܝ݇ܠܵܗ̇ ܣܵܗܕܘܼܬܹܗ ܕܐܲܠܵܗܵܐ؛ ܕܝܸܗ݇ܒܼܸܠܹܗ ܣܵܗܕܘܼܬܵܐ ܒܵܗ݇ܣ ܕܒܪܘܿܢܹܗ. 10ܟܠܡ̇ܢ ܕܗܲܡܸܢ ܒܒܪܘܿܢܹܗ ܕܐܲܠܵܗܵܐ؛ ܐܝܼܬ ܠܹܗ ܣܵܗܕܘܼܬܵܐ ܒܓܵܢܹܗ. ܘܟܠ ܕܠܵܐ ܗܲܡܸܢ ܒܐܲܠܵܗܵܐ؛ ܕܲܓܵܠܵܐ ܥܒܼܸܕܠܹܗ؛ ܣܵܒܵܒ ܠܵܐ ܗܘܼܡܸܢܹܗ ܠܣܵܗܘܼܬܵܐ ܕܝܸܗ݇ܒܼܸܠܹܗ ܐܲܠܵܗܵܐ ܒܵܗ݇ܣ ܕܒܪܘܿܢܹܗ. 11ܘܐܵܗܵܐ ܝ݇ܠܵܗ̇ ܣܵܗܕܘܼܬܵܐ؛ ܕܚܲܝܹ̈ܐ ܕܠܐܵܒܲܕ ܝܸܗ݇ܒܼܸܠܹܗ ܐܸܠܲܢ ܐܲܠܵܗܵܐ. ܘܐܲܢܹܐ ܚܲܝܹ̈ܐ ܒܒܪܘܿܢܹܗ ܝ݇ܢܵܐ. 12ܟܠ ܕܐܝܼܬ ܠܹܗ ܒܪܘܿܢܵܐ؛ ܐܝܼܬ ܠܹܗ ܐܘܼܦ ܚܲܝܹ̈ܐ؛ ܘܟܠ ܕܠܲܝܬ ܠܹܗ ܒܪܘܿܢܹܗ ܕܐܲܠܵܗܵܐ ܠܲܝܬ ܠܹܗ ܚܲܝܹ̈ܐ. 13ܐܲܢܹܐ ܟܬܸܒܼܠܝܼ ܐܸܠܵܘܟܼܘܿܢ؛ ܕܝܵܕܥܝܼܬܘܿܢ ܕܚܲܝܹ̈ܐ ܕܠܵܐܒܲܕ ܐܝܼܬ ܠܵܘܟܼܘܿܢ؛ ܘܕܗܲܡܸܢܝܼܬܘܿܢ ܒܫܸܡܵܐ ܕܒܪܘܿܢܹܗ ܕܐܲܠܵܗܵܐ. 14ܘܐܵܗܵܐ ܝ݇ܠܵܗ̇ ܒܸܣܬܵܝܘܼܬܵܐ ܕܐܝܼܬ ܠܲܢ ܠܟܸܣܠܹܗ؛ ܕܐܸܢ ܡܸܢܕܝܼ ܛܵܠܒܲܚ ܡܸܢܹܗ ܐܲܝܟܼ ܪܸܙܵܝܹܗ؛ ܟܹܐ ܫܵܡܹܥ ܠܲܢ. 15ܘܐܸܢ ܒܝܼܕܵܥܝܵܐ ܝܘܵܚ ܕܟܹܐ ܫܵܡܹܥܠܲܢ ܥܲܠ ܡܸܢܕܝܼ ܕܛܵܠܒܲܚ ܡܸܢܹܗ؛ ܒܝܼܕܵܥܝܵܐ ܝ݇ܘܵܚ ܕܐܝܼܬ ܠܲܢ ܡܲܛ̈ܠܵܒܲܢ ܕܛܠܸܒ̇ܠܲܢ ܡܸܢܹܗ؛ 16ܐܸܢ ܐ݇ܢܵܫܵܐ ܚܵܙܹܐ ܠܐܵܚܘܿܢܹܗ ܕܚܵܛܹܐ ܚܛܝܼܬܵܐ ܠܵܐ ܠܡܵܘܬܵܐ؛ ܛܵܠܸܒ ܘ(ܐܲܠܵܗܵܐ) ܒܸܬ ܝܵܗ݇ܒܼܸܠ ܠܹܗ ܚܲܝܹ̈ܐ ܠܐܵܢܝܼ ܕܠܵܐ ܐܲܝܟܼ ܕܠܡܵܘܬܵܐ ܚܵܛܝܼ. ܐܝܼܬ ܚܛܝܼܬܵܐ ܕܠܡܵܘܬܵܐ. ܠܹܐ ܝ݇ܠܵܗ̇ ܥܲܠ ܕܐܵܗܵܐ ܒܹܐܡܵܪܵܐ ܝ݇ܘܸܢ ܕܦܲܪܦܸܠ ܐ݇ܢܵܫܵܐ. 17ܟܠ ܥܵܘܠܵܐ ܚܛܝܼܬܵܐ ܝ݇ܠܹܗ؛ ܘܐܝܼܬ ܚܛܝܼܬܵܐ ܕܠܹܐ ܝ݇ܠܵܗ̇ ܠܡܵܘܬܵܐ. 18ܒܝܼܕܵܥܝܵܐ ܝ݇ܘܵܚ ܕܟܠ ܕܝܼܠܹܗ ܗ݇ܘܝܼܵܐ ܡ̣ܢ ܐܲܠܵܗܵܐ؛ ܠܹܐ ܚܵܛܹܐ؛ ܐܸܠܵܐ ܗ̇ܘ ܕܝܼܠܹܗ ܗ݇ܘܝܼܵܐ ܡ̣ܢ ܐܲܠܵܗܵܐ ܟܹܐ ܢܵܛܸܪ ܓܵܢܹܗ؛ ܘܒܝܼܫܵܐ ܠܹܐ ܩܲܪܒܸܢ ܐܸܠܹܗ. 19ܒܝܼܕܵܥܝܵܐ ܝ݇ܘܵܚ ܕܡ̣ܢ ܐܲܠܵܗܵܐ ܝ݇ܘܵܚ ܘܟܠܹܗ ܥܵܠܡܵܐ ܒܒܝܼܫܵܐ ܡܘܼܬܒܼܵܐ ܝ݇ܠܹܗ. 20ܘܒܝܼܕܵܥܝܵܐ ܝ݇ܘܵܚ ܕܒܪܘܿܢܹܗ ܕܐܲܠܵܗܵܐ ܐܬܝܼܵܐ ܝ݇ܠܹܗ؛ ܘܝܸܗ݇ܒܼܸܠܹܗ ܐܸܠܲܢ ܝ݇ܕܸܥܬܵܐ؛ ܕܝܵܕܥܲܚ ܠܗ̇ܘ ܫܲܪܝܼܪܵܐ؛ ܘܝܼܘܵܚ ܒܗ̇ܘ ܫܲܪܝܼܪܵܐ؛ ܒܒܪܘܿܢܹܗ؛ ܝܼܫܘܿܥ ܡܫܝܼܚܵܐ. ܐܵܗܵܐ ܝ݇ܠܹܗ ܐܲܠܵܗܵܐ ܫܲܪܝܼܪܵܐ؛ ܘܚܲܝܹ̈ܐ ܕܠܐܵܒܲܕ. 21ܒܢܘܿܢ̈ܝܼ؛ ܢܛܘܿܪܘܿܢ ܓܵܢܵܘܟܼܘܿܢ ܡ̣ܢ ܨܵܢܲܡܹ̈ܐ.