1ܦܲܛܪܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ؛ ܠܓܘܼܒܝܹ̈ܐ ܡܵܫܵܚܲܛܹ̈ܐ ܕܝܼܢܵܐ ܒܘܼܪܒܸܙܹܐ ܓܵܘ ܦܘܼܢܛܘܿܣ؛ ܘܓܵܘ ܓܲܠܵܛܝܼܵܐ؛ ܘܓܵܘ ܩܵܦܵܕܘܿܩܝܼܵܐ؛ ܘܓܵܘ ܐܵܣܝܼܵܐ؛ ܘܓܵܘ ܒܹܬܘܿܢܝܼܵܐ؛ 2ܐܵܢܝܼ ܕܦܸܫܠܗ݇ܘܿܢ ܓܘܼܒܝܹܐ ܒܝܕܹܥܬܹܗ ܩܵܕ݇ܡܵܝܬܵܐ ܕܐܲܠܵܗܵܐ ܒܵܒܵܐ؛ ܒܩܲܕܝܼܫܘܼܬܵܐ ܕܪܘܼܚܵܐ؛ ܠܡܲܨܝܲܬܬܵܐ ܘܠܡܲܪܝܲܣܬܵܐ ܕܕܸܡܹܗ ܕܝܼܫܘܿܥ ܡܫܝܼܚܵܐ؛ ܫܵܦܵܩܲܬ ܘܫܠܵܡܵܐ ܙܲܝܸܕ ܐܸܠܵܘܟܼܘܿܢ. 3ܡܒܘܼܪܟܼܵܐ ܝ݇ܠܹܗ ܐܲܠܵܗܵܐ؛ ܒܵܒܹܗ ܕܡܵܪܲܢ ܝܼܫܘܿܥ ܡܫܝܼܚܵܐ؛ ܗ̇ܘ ܕܒܟܵܪܲܡܹܗ ܪܵܒܵܐ ܩܲܡ ܡܲܠܸܕ ܠܲܢ ܡܸܢ݇ܕܪܹܫَ؛ ܒܩܝܵܡܬܵܐ ܡ̣ܢ ܡܝܼܬܹ̈ܐ ܕܝܼܫܘܿܥ ܡܫܝܼܚܵܐ؛ ܠܗܹܒܼܝܼ ܚܵܝܬܵܐ؛ 4ܘܠܝܵܪܬܘܼܬܵܐ ܠܵܐ ܚܵܪܒܼܵܢܬܵܐ؛ ܘܠܵܐ ܡܛܘܼܡܐܝܼܬܵܐ؛ ܘܠܵܐ ܢܵܘܠܵܢܬܵܐ؛ ܗ̇ܝ ܕܝܼܠܵܗ̇ ܢܛܝܼܪܬܵܐ ܒܫܡܲܝܵܐ ܐܸܠܵܘܟܼܘܿܢ؛ 5ܘܢܛܝܼܪܹܐ ܝ݇ܬܘܿܢ ܒܚܲܝܠܵܐ ܕܐܲܠܵܗܵܐ ܒܝܼܲܕ ܗܲܝܡܵܢܘܼܬܵܐ ܠܦܘܼܪܩܵܢܵܐ ܕܝܼܠܹܗ ܗܘܼܕܪܵܐ ܕܦܵܐܹܫ ܓܸܠܝܵܐ ܒܙܲܒܼܢܹ̈ܐ ܐ݇ܚܵܪ̈ܵܝܹܐ. 6ܕܒܝܼܹܗ ܒܸܦܨܵܚܵܐ ܝ݇ܬܘܿܢ؛ ܐܵܦܸܢ ܒܙܲܒܼܢܵܐ ܟܸܪܝܵܐ ܐܵܕܝܼܵܐ؛ ܐܸܢ ܗܵܘܝܵܐ ܠܵܙܸܡ؛ ܦܸܫܠܵܘܟܼܘܿܢ ܡܘܼܦܫܸܡܹܐ ܒܓ̰ܘܼܪ̈ܵܒܹܐ ܬܵܗܵܪܹ̈ܐ ܬܵܗܵܪܹ̈ܐ؛ 7ܕܵܐܟܼܝܼ ܕܒܵܚܲܪܬܵܐ ܕܗܲܝܡܵܢܘܼܬܵܘܟܼܘܿܢ ܕܝܼܠܵܗ̇ ܒܘܼܫ ܡܵܪܹܐ ܛܝܼܡܵܐ ܡ̣ܢ ܕܲܗܒܼܵܐ ܕܬܵܠܸܩ ܐܵܦܸܢ ܕܨܘܼܪܸܦܵܐ ܒܢܘܼܪܵܐ؛ ܦܵܝܫܵܐ ܡܘܼܫ݇ܟ̰ܸܚܬܵܐ ܠܬܸܫܒܘܿܚܬܵܐ ܘܠܐܝܼܩܵܪܵܐ ܘܠܚܸܩܪܵܐ؛ ܒܓܸܠܝܵܢܹܗ ܕܝܼܫܘܿܥ ܡܫܝܼܚܵܐ. 8ܗ̇ܘ ܕܠܵܐ ܚܙܹܐܠܵܘܟܼܘܿܢ ܐܸܠܹܗ ܘܡܲܚܘܼܒܘܼܗܝ ܝ݇ܬܘܿܢ؛ ܕܒܝܼܹܗ؛ ܟܲܕ ܐܵܕܝܼܵܐ ܠܹܐ ܚܵܙܹܝܬܘܿܢ ܠܹܗ؛ ܗܲܡܘܼܢܹܐ ܝ݇ܬܘܿܢ ܘܒܸܦܨܵܚܵܐ ܝ݇ܬܘܿܢ ܒܚܲܕܘܼܬܵܐ ܚܩܝܼܪܬܵܐ ܕܠܹܐ ܦܵܝܫܵܐ ܗܘܼܡܙܸܡܬܵܐ؛ 9ܕܩܵܒ̇ܠܝܼܬܘܿܢ ܚܲܪܬܵܐ ܕܗܲܝܡܵܢܘܼܬܵܘܟܼܘܿܢ؛ ܦܘܼܪܩܵܢܵܐ ܕܓܵܢܵܬܵܘ̈ܟܼܘܿܢ. 10ܗ̇ܘ ܦܘܼܪܩܵܢܵܐ ܕܒܘܼܩܸܪܘܿܢ ܥܲܠܘܼܗܝ ܘܨܘܼܚܨܹܠܗ݇ܘܿܢ ܢܒܼܝܼܹ̈ܐ؛ ܟܲܕ ܢܘܼܒܸܠܗ݇ܘܿܢ ܒܵܗ݇ܣ ܕܫܵܦܵܩܲܬ ܕ(ܗܕܝܼܪܬܵܐ ܗَܘܵܐ ܕܦܵܝܫܵܐ ܝܸܗ݇ܒܼܸܠܬܵܐ) ܐܸܠܵܘܟܼܘܿܢ. 11ܘܨܘܼܚܨܹܠܗܘܿܢ ܕܒܡܘܼܕܝܼ ܝܲܢ ܒܐܲܝܢܝܼ ܙܲܒܼܢܵܐ ܡܲܚܙܹܐ ܗَܘܵܐ ܪܘܼܚܹܗ ܕܡܫܝܼܚܵܐ ܕܝܼܗَܘܵܐ ܓܵܘܵܝܗܝ؛ ܟܲܕ ܩܵܕܘܿܡܹܐ ܣܗܸܕܠܹܗ ܒܘܼܬ ܚܲܫܹ̈ܐ ܕܡܫܝܼܚܵܐ؛ ܘܬܸܫܒܘܿܚܬܹܗ ܕܡ̣ܢ ܒܵܬ݇ܪ ܗܵܕܵܐ. 12ܘܦܸܫܠܹܗ ܓܸܠܝܵܐ ܐܸܠܵܝܗܝ؛ ܕܠܵܐ ܠܓܵܢܵܝܗܝ ܐܸܠܵܐ ܐܸܠܵܘܟܼܘܿܢ ܥܒܼܸܕܠܗ݇ܘܿܢ ܚܸܠܡܲܬ ܐܲܢܹܐ؛ ܐܲܝܢܝܼ ܕܐܵܕܝܼܵܐ ܦܸܫܠܗ݇ܘܿܢ ܓܸܠܝܹ̈ܐ ܐܸܠܵܘܟܼܘܿܢ ܒܝܼܲܕ ܕܐܵܢܝܼ ܕܡܘܫܚܸܕܠܗ݇ܘܿܢ ܐܸܠܵܘܟܼܘܿܢ؛ ܒܪܘܼܚܵܐ ܕܩܘܼܕܫܵܐ ܕܦܸܫܠܹܗ ܫܘܼܕܪܵܐ ܡ̣ܢ ܫܡܲܝܵܐ؛ ܕܗܲܪ ܒܐܲܢܹܐ ܐܘܼܦ ܡܲܠܲܐܟܼܹ̈ܐ ܟܹܐ ܫܲܗ݇ܘܸܬܝܼ ܕܚܵܝܪܝܼ. 13ܣܵܒܵܒ ܕܐܵܗܵܐ ܚܠܘܿܨܘܿܢ ܚܵܨܵܐ ܕܚܝܼܵܠܵܘ̈ܟܼܘܿܢ؛ ܘܦܘܼܫܘܿܢ ܪܥܝܼܫܹܐ ܘܕܪܹܡܘܿܢ ܗܹܒܼܝܼܵܘܟܼܘܿܢ ܒܬܲܡܵܡܵܬܘܼܬܵܐ ܥܲܠ ܫܵܦܵܩܲܬ ܕܐܵܬܝܵܐ ܐܸܠܵܘܟܼܘܿܢ ܒܓܸܠܝܵܢܹܗ ܕܡܵܪܲܢ ܝܼܫܘܿܥ ܡܫܝܼܚܵܐ؛ 14ܐܲܝܟܼ ܒܢܘܿܢܹ̈ܐ ܡܲܨܝܸܬܵܢܹ̈ܐ؛ ܘܠܵܐ ܡܲܕܡܝܼܬܘܿܢ ܓܵܢܵܘܟܼܘܿܢ ܠܫܲܗܘܲܬܝܵܬܹ̈ܐ ܩܵܕ݇ܡܵܝܹ̈ܐ ܕܒܠܵܐ ܝܕܹܥܬܵܘܟܼܘܿܢ. 15ܐܸܠܵܐ ܗ݇ܘܹܝܡܘܿܢ ܩܲܕܝܼܫܹ̈ܐ ܒܟܠܵܝܗܝ ܚܕܵܪ̈ܵܘܟܼܘܿܢ؛ ܐܲܝܟܼ ܕܩܲܕܝܼܫܵܐ ܝ݇ܠܹܗ ܗ̇ܘ ܕܩܲܡ ܩܵܪܹܐ ܠܵܘܟܼܘܿܢ. 16ܣܵܒܵܒ ܕܟܬܝܼܒܼܵܐ ܝ݇ܠܹܗ؛ ܗܵܘܹܝܬܘܿܢ ܩܲܕܝܼܫܹ̈ܐ؛ ܣܵܒܵܒ ܕܐܵܢܵܐ ܩܲܕܝܼܫܵܐ ܝ݇ܘܸܢ. 17ܘܐܸܢ ܐܲܝܟܼ ܠܒܵܒܵܐ ܒܸܩܪܵܝܵܐ ܝ݇ܬܘܿܢ؛ ܗ̇ܘ ܕܟܹܐ ܕܵܝܸܢ ܕܠܵܐ ܚܙܵܝܬܵܐ ܕܦܵܬܵܐ ܠܟܠ ܐ݇ܢܵܫܵܐ ܐܲܝܟܼ ܦܘܼܠܚܵܢ̈ܘܼܗܝ؛ ܒܙܕܘܼܥܬܵܐ ܬܲܓܒܸܪܘܿܢ ܓܵܢܵܘܟܼܘܿܢ ܒܐܵܗܵܐ ܙܲܒܼܢܵܐ ܕܡܵܫܵܚܲܛܘܼܬܵܘܟܼܘܿܢ؛ 18ܟܲܕ ܝܵܕܥܝܼܬܘܿܢ ܕܠܵܐ ܒܡܸܢܕܝܼܵܢܹ̈ܐ ܕܚܵܪܒܼܝܼ؛ ܣܹܐܡܵܐ ܝܲܢ ܕܲܗܒܼܵܐ؛ ܦܸܫܠܵܘܟܼܘܿܢ ܦܘܼܪܩܹܐ ܡ̣ܢ ܦܘܼܠܚܵܢܵܘ̈ܟܼܘܿܢ ܒܵܛܝܼܠܹ̈ܐ؛ ܐܵܢܝܼ ܕܩܘܼܒܸܠܵܘܟܼܘܿܢ ܡ̣ܢ ܒܵܒܵܘܵܬܵܘ̈ܟܼܘܿܢ؛ 19ܐܸܠܵܐ ܒܕܸܡܵܐ ܡܵܪܹܐ ܛܝܼܡܵܐ؛ ܐܲܝܟܼ ܕܦܹܪܵܐ ܕܡܘܼܡܵܐ ܘܠܵܘܡܵܐ ܠܲܝܬ ܒܝܼܹܗ؛ ܕܝܼܠܹܗ ܕܡܫܝܼܚܵܐ؛ 20ܗ̇ܘ ܕܡܩܵܕ݇ܡܵܝܬܵܐ ܦܪܝܼܫܵܐ ܗَܘܵܐ ܡ̣ܢ ܩܵܕ݇ܡ ܒܸܢܝܵܬܹ̈ܗ ܕܥܵܠܡܵܐ؛ ܐܝܼܢܵܐ ܦܸܫܠܹܗ ܓܸܠܝܵܐ ܒܚܲܪܬܵܐ ܕܙܲܒܼܢܹ̈ܐ ܒܚܵܬܸܪ ܕܝܼܵܘܟܼܘܿܢ؛ 21ܐܵܢܝܼ ܕܒܐܝܼܕܹܗ ܗܘܼܡܸܢܵܘܟܼܘܿܢ ܒܐܲܠܵܗܵܐ؛ ܗ̇ܘ ܕܡܘܼܩܸܡܠܹܗ ܡ̣ܢ ܡܝܼܬܹ̈ܐ؛ ܘܝܸܗ݇ܒܼܸܠܹܗ ܐܸܠܹܗ ܚܸܩܪܵܐ؛ ܕܵܐܟܼܝܼ ܕܗܲܝܡܵܢܘܼܬܵܘܟܼܘܿܢ ܘܗܹܒܼܝܼܵܘܟܼܘܿܢ ܗܵܘܝܵܐ ܒܐܲܠܵܗܵܐ. 22ܟܲܕ ܩܘܼܕܸܫܠܵܘܟܼܘܿܢ ܓܵܢܵܬ̈ܵܘܟܼܘܿܢ ܒܝܼܲܕ ܪܘܼܚܵܐ؛ ܠܚܘܼܒܵܐ ܕܐܵܚܘܿܢܘܼܬܵܐ ܕܠܵܐ ܡܲܣܲܒܼ ܒܐܲܦܘܼܬܵܐ؛ ܡ̣ܢ ܠܸܒܵܐ ܕܸܟܼܝܵܐ ܗܵܘܹܝܬܘܿܢ ܡܲܚܘܼܒܹܐ ܒܚܲܡܘܼܬܵܐ ܚܲܕ݇ ܠܗ̇ܘ ܐ݇ܚܹܪ݇ܢܵܐ؛ 23ܐܲܝܟܼ ܐ݇ܢܵܫܹ̈ܐ ܕܡܸܢ݇ܕܪܹܫَ ܦܸܫܠܵܘܟܼܘܿܢ ܝܠܝܼܕܹܐ؛ ܠܵܐ ܡ̣ܢ ܒܲܪܙܲܪܥܵܐ ܚܵܪܒܼܵܢܵܐ؛ ܐܸܠܵܐ ܡ̣ܢ ܕܗ̇ܘ ܠܵܐ ܚܵܪܒܼܵܢܵܐ؛ ܒܝܼܲܕ ܗܹܡܸܙܡܵܢ ܚܵܝܬܵܐ ܕܐܲܠܵܗܵܐ؛ ܕܟܹܐ ܦܵܝܫܵܐ ܠܥܵܠܲܡ. 24ܣܵܒܵܒ ܟܠ ܒܸܣܪܵܐ ܐܲܝܟܼ ܓܸܠܵܐ ܝ݇ܠܹܗ؛ ܘܟܠܹܗ ܚܸܩܪܵܐ ܕܒܲܪܢܵܫܵܐ ܐܲܝܟܼ ܦܸܩܚܵܐ ܕܓܸܠܵܐ. ܟܹܐ ܒܵܪܸܙ ܓܸܠܵܐ؛ ܘܦܸܩܚܹܗ ܟܹܐ ܢܵܬܸܪ؛ 25ܐܝܼܢܵܐ ܗܹܡܸܙܡܵܢ ܕܡܵܪܝܵܐ ܟܹܐ ܦܵܝܫܵܐ ܠܥܵܠܡܝܼܢ. ܘܐܵܗܵܐ ܝ݇ܠܵܗ̇ ܗܹܡܸܙܡܵܢ ܗ̇ܝ ܕܦܸܫܠܵܘܟܼܘܿܢ ܡܘܼܫܚܸܕܹܐ.