1ܐܝܼܢܵܐ ܦܲܪܦܘܼܠܹܐ ܝ݇ܘܸܢ ܒܩܲܫܝܼܫܹ̈ܐ ܕܐܝܼܬ ܓܵܘܵܘܟܼܘܿܢ؛ ܐܵܢܵܐ ܩܲܫܝܼܫܵܐ ܚܲܒܼܪܵܘܟܼܘܿܢ؛ ܘܣܵܗܕܵܐ ܕܚܲܫܹ̈ܐ ܕܡܫܝܼܚܵܐ؛ ܘܫܲܪܝܼܟܵܐ ܕܚܸܩܪܹܗ ܕܗܕܝܼܪܵܐ ܝ݇ܠܹܗ ܕܦܵܐܹܫ ܓܸܠܝܵܐ؛ 2ܡܲܪܥܸܡܘܿܢ ܡܲܪܥܝܼܬܵܐ ܕܐܲܠܵܗܵܐ ܕܓܵܘܵܘܟܼܘܿܢ؛ ܟܲܕ ܬܲܓܒܸܪܝܼܬܘܿܢ؛ ܒܚܲܝܠܵܐ؛ ܐܸܠܵܐ ܒܪܸܙܵܝܵܐ؛ ܠܵܐ ܒܩܢܵܝܬܵܐ ܛܲܢܦܬܵܐ؛ ܐܸܠܵܐ ܡ̣ܢ ܟܠܹܗ ܠܸܒܵܘܟܼܘܿܢ؛ 3ܘܠܵܐ ܐܲܝܟܼ ܡܵܪ̈ܵܘܵܬܹܐ ܕܝܵܪܬܘܼܬܵܐ ܣܘܼܦܝܼܬܵܐ (ܒܝܼܵܘܟܼܘܿܢ)؛ ܐܸܠܵܝܗܝ ܐܲܝܟܼ ܕܗܵܘܹܝܬܘܿܢ ܐܸܠܵܐ ܛܘܼܦ̮ܣܵܐ ܕܡܲܪܥܝܼܬܵܐ. 4ܘܟܲܕ ܦܵܐܹܫ ܓܸܠܝܵܐ ܓܘܼܪܵܐ ܕܪ̈ܵܥܝܹܐ؛ ܒܸܬ ܩܵܒ̇ܠܝܼܬܘܿܢ ܡܸܢܹܗ ܟܠܝܼܠܵܐ ܕܚܸܩܪܵܐ ܕܠܹܐ ܟ̰ܵܡܸܥܟ̰. 5ܐܘܼܦ ܗܲܕܟܼܵܐ ܐܲܚܬܘܿܢ؛ ܓ̰ܘܲܢܩܹ̈ܐ؛ ܦܘܼܫܘܿܢ ܙܲܒܛ ܠܩܲܫܝܼܫܹ̈ܐ؛ ܘܟܠܵܘܟܼܘܿܢ ܗܵܘܹܝܬܘܿܢ ܙܲܒܛ ܚܲܕ݇ ܠܗ̇ܘ ܐ݇ܚܹܪ݇ܢܵܐ. ܠܒܼܘܿܫܘܿܢ ܡܲܟܝܼܟܼܘܼܬܵܐ ܚܲܕ݇ ܠܟܸܣ ܗ̇ܘ ܐ݇ܚܹܪ݇ܢܵܐ؛ ܣܵܒܵܒ ܐܲܠܵܗܵܐ ܕܲܪܩܘܼܒܼܠ ܝ݇ܠܹܗ ܠܐܵܢܝܼ ܕܡܵܪܡܝܼ ܓܵܢܵܝܗܝ؛ ܐܝܼܢܵܐ ܠܡܲܟܝܼܟܼܹ̈ܐ ܟܹܐ ܝܵܗ݇ܒܼܸܠ ܫܵܦܵܩܲܬ. 6ܒܲܣ ܡܲܡܟܸܟܼܘܿܢ ܓܵܢܵܘܟܼܘܿܢ ܬܚܘܿܬ ܐܝܼܕܹܗ ܙܲܪܒܵܢܬܵܐ ܕܐܲܠܵܗܵܐ؛ ܕܗ̇ܘ ܡܵܪܸܡ ܠܵܘܟܼܘܿܢ ܒܙܲܒܼܢܵܐ ܕܚܵܫܸܚ؛ 7ܘܟܠܵܗ̇ ܚܲܡܵܘܟܼܘܿܢ ܕܪܹܡܘܿܢ ܥܲܠܘܼܗܝ؛ ܣܵܒܵܒ ܗ̇ܘ ܟܹܐ ܐܵܟܼܸܠ ܚܲܡ ܥܲܠܵܘܟܼܘܿܢ. 8ܦܘܼܫܘܿܢ ܪܥܝܼܫܹܐ؛ ܘܥܒܼܘܿܕܘܿܢ ܫܵܗܲܪܬܵܐ؛ ܣܵܒܵܒ ܕܸܫܡܸܢܵܘܟܼܘܿܢ ܐܵܟܼܸܠܩܲܪܨܵܐ؛ ܐܲܝܟܼ ܐܲܪܝܵܐ ܓܲܪܓܸܡܵܢܵܐ ܟܹܐ ܚܵܕܸܪ؛ ܘܟܹܐ ܛܵܥܹܐ ܠܡܵܢܝܼ ܒܵܠܸܥ. 9ܩܘܼܡܘܿܢ ܠܕܲܪܩܘܼܒܼܠܹܗ؛ ܟܲܕ ܡܘܼܩܘܝܼܹܐ ܝ݇ܬܘܿܢ ܒܗܲܝܡܵܢܘܼܬܵܐ؛ ܘܝܸܕܸܥܡܘܿܢ ܕܐܘܼܦ ܥܲܠ ܐܵܚܘܿܢܘܵܬܵܘ̈ܟܼܘܿܢ ܕܒܥܵܠܡܵܐ ܗܲܪ ܐܲܢܹܐ ܚܲܫܹ̈ܐ ܟܹܐ ܦܵܝܫܝܼ ܬܘܼܡܸܡܹܐ. 10ܐܝܼܢܵܐ ܐܲܠܵܗܵܐ ܕܟܠܵܗ̇ ܫܵܦܵܩܲܬ؛ ܗ̇ܘ ܕܩܲܡ ܩܵܪܹܐ ܠܵܘܟܼܘܿܢ ܠܚܸܩܪܹܗ ܕܠܥܵܠܲܡ ܒܝܼܫܘܿܥ ܡܫܝܼܚܵܐ؛ ܟܲܕ ܩܵܒ̇ܠܝܼܬܘܿܢ ܐܲܢܹܐ ܐܲܢܹܐ ܐܘܼܠܨܵܢܹ̈ܐ ܚܲܕَܟ̰ܵܐ ܙܲܒܼܢܵܐ؛ ܒܸܬ ܡܲܟܡܸܠ؛ ܘܚܲܠܸܢ؛ ܘܡܲܩܘܹܐ ܠܵܘܟܼܘܿܢ ܠܥܵܠܲܡ. 11ܐܸܠܹܗ ܚܸܩܪܵܐ ܘܗܘܼܟܡܵܐ ܠܥܵܠܡܹ̈ܐ ܕܥܵܠܡܹ̈ܐ؛ ܐܵܡܹܝܢ. 12ܚܲܕَܟ̰ܵܐ ܡܸܢܕܝܼܵܢܹ̈ܐ ܟܬܸܒܼܠܝܼ ܐܸܠܵܘܟܼܘܿܢ ܒܝܼܲܕ ܣܸܠܘܿܢܘܿܣ ܐܵܚܘܿܢܵܐ ܡܗܘܼܡܢܵܐ؛ ܐܲܝܟܼ ܕܚܵܫܒܸܢ؛ ܟܲܕ ܢܵܘܢܘܿܝܹܐ ܘܒܸܣܗܵܕܵܐ ܕܐܵܗܵܐ ܝ݇ܠܵܗ̇ ܫܵܦܵܩܲܬ ܫܲܪܝܼܪܬܵܐ ܕܐܲܠܵܗܵܐ؛ ܟܠܹܝܡܘܿܢ ܒܝܼܵܗ̇. 13ܒܝܼܵܗܒܼܵܐ ܝ݇ܠܵܗ̇ ܫܠܵܡܵܐ ܐܸܠܵܘܟܼܘܿܢ (ܥܹܕܬܵܐ) ܓܘܼܒܝܼܬܵܐ ܕܓܵܘ ܒܵܒܹܠ؛ ܘܡܵܪܩܘܿܣ ܒܪܘܿܢܝܼ. 14ܗܲܒܼ݇ܠܗܘܿܢ ܫܠܵܡܵܐ ܚܲܕ݇ ܠܗ̇ܘ ܐ݇ܚܹܪ݇ܢܵܐ ܒܢܫܘܼܩܬܵܐ ܩܲܕܝܼܫܬܵܐ. ܫܠܵܡܵܐ ܥܲܡ ܟܠܵܘܟܼܘܿܢ ܐܵܢܝܼ ܕܒܡܫܝܼܚܵܐ ܝ݇ܢܵܐ؛ ܐܵܡܹܝܢ.