1ܒܚܘܵܪܕܸܩܢܵܐ ܠܵܐ ܢܵܓ̰ܘܸܬ؛ ܐܸܠܵܐ ܦܲܪܦܸܠ ܒܝܼܹܗ ܐܲܝܟܼ ܕܠܒܵܒܵܐ؛ ܘܠܐܵܢܝܼ ܕܝܼܢܵܐ ܓ̰ܘܲܢܩܹ̈ܐ ܐܲܝܟܼ ܕܠܐܵܚܘܿܢܘܵܬܘܼ̈ܟܼ؛ 2ܘܠܚܘܵܪ̈ܟܵܘܣܹܐ ܐܲܝܟܼ ܕܠܝܸܡܵܬܹ̈ܐ. ܘܠܐܵܢܝܼ ܕܝܼܢܵܐ ܚܵܡܵܬܹ̈ܐ ܐܲܝܟܼ ܕܠܚܵܬܘܵܬܘܼ̈ܟܼ ܒܟܠܵܗ̇ ܕܸܟܼܝܘܼܬܵܐ. 3ܠܐܲܪ̈ܡܸܠܝܵܬܹܐ ܡܝܵܩܸܪ؛ ܠܐܵܢܝܼ ܕܝܼܢܵܐ ܐܲܪ̈ܡܸܠܝܵܬܹܐ ܫܲܪܝܼܪܵܐܝܼܬ. 4ܘܐܸܢ ܐܝܼܬ ܐܲܪܡܸܠܬܵܐ ܕܐܝܼܬ ܠܵܗ̇ ܒܢܘܼܢܹ̈ܐ ܝܲܢ ܢܵܘܸ̈ܓܹܐ؛ ܝܵܠܦܝܼ ܩܵܕ݇ܡܵܝܬܵܐ ܕܓܵܘ ܟܸܠܦܲܬܵܝܗܝ ܗܵܘܝܼ ܙܲܕܝܼܩܹ̈ܐ؛ ܘܦܲܪܥܝܼ ܡܸܢܬܵܐ ܠܐܲܒܼܵܗܵܝ̈ܗܝ؛ ܣܵܒܵܒ ܕܐܵܗܵܐ ܡܲܩܒܘܼܠ ܝܼܠܵܗ̇ ܩܵܕ݇ܡ ܐܲܠܵܗܵܐ؛ 5ܐܝܼܢܵܐ ܗ̇ܝ ܕܫܲܪܝܼܪܵܐܝܼܬ ܐܲܪܡܸܠܬܵܐ ܝَܠܵܗ̇ ܘܡܘܼܫܲܡܸܪ؛ ܗ̇ܝ ܗܹܒܼܝܼܘܼܗ̇ ܥܲܠ ܐܲܠܵܗܵܐ ܝَܠܵܗ̇؛ ܘܕܵܝܸܡ ܝܼܠܵܗ̇ ܒܨܠܵܘܵܬܹ̈ܐ ܘܒܦܲܪ̈ܦܲܠܝܵܬܹܐ؛ ܒܠܲܝܠܹܐ ܘܒܐܝܼܡܵܡܵܐ. 6ܐܝܼܢܵܐ ܗ̇ܝ ܕܚܲܝܵܐ ܒܟܵܝܦܚܘܿܫܘܼܬܵܐ؛ ܡܝܼܬܬܵܐ ܝَܠܵܗ̇ ܟܲܕ ܚܵܝܬܵܐ. 7ܐܲܢܹܐ ܗܵܘܸܬ ܦܵܩܘܿܕܵܝ؛ ܕܗܵܘܝܼ ܕܠܵܐ ܠܵܘܡܵܐ. 8ܣܵܒܵܒ ܐܸܢ ܐ݇ܢܵܫܵܐ ܥܲܠ ܕܐܵܢܝܼ ܕܝܼܢܵܐ ܕܝܼܹܗ؛ ܘܒܘܼܫ ܙܵܘܕܵܐ ܥܲܠ ܕܐܵܢܝܼ ܕܝܼܢܵܐ ܒܢܲܝ̈ ܒܲܝܬܹܗ؛ ܠܵܐ ܐܵܟܼܸܠ ܚܲܡ؛ ܐܵܗܵܐ ܟܦܝܼܪܵܐ ܝܠܹܗ ܒܗܲܝܡܵܢܘܼܬܵܐ؛ ܘܒܘܼܫ ܚܸܪܒܵܐ ܝܠܹܗ ܡ̣ܢ ܕܐܵܢܝܼ ܕܠܹܐ ܝܢܵܐ ܗܘܼܡܸܢܹܐ. 9ܦܵܝܫܵܐ ܓܘܼܒܝܼܬܵܐ ܐܲܪܡܸܠܬܵܐ ܗ̇ܝ ܕܠܵܐ ܗܵܘܝܵܐ ܒܵܨܘܿܪܬܵܐ ܡ̣ܢ ܐܸܫܬܝܼ ܫܸܢܹ̈ܐ؛ ܗ̇ܝ ܕܗ݇ܘܝܼܬܵܐ ܗ݇ܘܵܐ ܠܚܲܕَ ܓܲܒܼܪܵܐ؛ 10. ܐܝܼܬ ܠܵܗ̇ ܣܵܗܕܘܼܬܵܐ ܕܦܘܼܠܚܵܢܹ̈ܐ ܫܵܦܝܼܪܹ̈ܐ؛ ܐܸܢ ܓܘܼܪܘܸܣܠܵܗ ܝܵܠܹ̈ܕَܐ؛ ܐܸܢ ܡܘܼܫܪܹܠܵܐ ܢܘܼܟܼܪ̈ܵܝܹܐ؛ ܐܸܢ ܚܘܼܠܸܠܵܐ ܐܲܩܠܵܬܹ̈ܐ ܕܩܲܕܝܼܫܹ̈ܐ؛ ܐܸܢ ܡܘܼܢܝܸܚܠܵܐ ܠܡܘܼܠܝܼܨܹ̈ܐ؛ ܐܸܢ ܚܕܸܪܵܐ ܒܟܠ ܦܘܼܠܚܵܢܵܐ ܛܵܒܼܵܐ. 11ܐܝܼܢܵܐ ܐܲܪ̈ܡܸܠܝܵܬܹܐ ܕܝܼܢܵܐ ܚܵܡܵܬܹ̈ܐ؛ ܡܲܣܠܝܼ؛ ܣܵܒܵܒ ܐܝܼܡܲܢ ܕܒܲܛܪܸܢܝܼ ܕܲܪܩܘܼܒܼܠ ܕܡܫܝܼܚܵܐ؛ ܟܹܐ ܒܲܥܝܝܼ ܠܸܓܒܼܵܪܵܐ؛ 12ܘܐܝܼܬ ܠܗ݇ܘܿܢ ܕܝܼܘܵܢ؛ ܕܡܘܼܣܠܹܠܘܿܢ ܗܲܝܡܵܢܘܼܬܵܝܗܝ ܩܵܕ݇ܡܵܝܬܵܐ؛ 13ܘܒܸܠܝܵܦܵܐ ܝܢܵܐ ܐܘܼܦ ܡܲܟܣܸܠܵܢܘܼܬܵܐ؛ ܟܲܕ ܒܸܚܕܵܪܵܐ ܓܵܘ ܒܵܬܹ̈ܐ؛ ܘܠܵܐ ܡܲܟܣܸܠܵܢܘܼܬܵܐ ܗܲܪ؛ ܐܸܠܵܐ ܐܘܼܦ ܕܡܲܙܝܸܕܝܼ ܗܲܡܙܲܡܬܵܐ؛ ܘܚܵܒܼܛܝܼ ܒܫܘܼܠܹ̈ܐ ܒܵܛܝܼ̈ܠܹܐ؛ ܘܗܲܡܙܸܡܝܼ ܡܸܢܕܝܼ ܕܠܹܐ ܝܠܹܗ ܚܫܝܼܚܵܐ. 14ܒܲܣ ܒܸܒܲܥܝܵܐ ܝܘܸܢ ܕܚܵܡܵܬܹ̈ܐ ܓܵܒܼܪܝܼ؛ ܘܝܵܠܕܝܼ ܒܢܘܼܢܹ̈ܐ؛ ܘܬܲܓܒܸܪܝܼ ܒܵܬܵܝ̈؛ ܘܠܵܐ ܝܵܗ݇ܒܼܝܼ ܠܕܸܫ̰ܡܸܢ ܐܘܼܦ ܠܵܐ ܚܕܵܐ ܗܲܓ̰ܲܬ ܕܨܵܥܪܬܵܐ. 15ܣܵܒܵܒ ܐܵܕܝܼܵܐ ܩܠܸܒ݁ܠܘܿܢ ܐ݇ܢܵܫܵܐ ܐ݇ܢܵܫܵܐ ܒܵܬ݇ܪ ܣܵܛܵܢܵܐ. 16ܐܸܢ ܐ݇ܢܵܫܵܐ ܡܗܘܼܡܢܵܐ ܝܲܢ ܐܸܢ ܡܗܘܼܡܢܸܬܵܐ ܐܝܼܬ ܠܗ݇ܘܿܢ ܐܲܪ̈ܡܸܠܝܵܬܹܐ؛ ܬܲܪܣܝܼ ܠܗ݇ܘܿܢ؛ ܘܠܵܐ ܥܵܒܼܕܝܼ ܝܘܼܩܪܵܐ ܥܲܠ ܥܹܕܬܵܐ؛ ܕܬܲܪܣܝܼܵܐ ܠܐܵܢܝܼ ܕܫܲܪܝܼܪܵܐܝܼܬ ܐܲܪ̈ܡܸܠܝܵܬܹܐ ܝܢܵܐ. 17ܩܲܫܝܼܫܹ̈ܐ ܕܨܦܵܝܝܼ ܬܲܓܒܸܪܝܼ؛ ܠܐܝܼܩܵܪܵܐ ܚܲܕَ ܒܬܪ̈ܲܝ ܦܵܝܫܝܼ ܡܘܼܚܫܸܚܹܐ؛ ܒܘܼܫ ܙܵܘܕܵܐ ܐܵܢܝܼ ܕܓ̰ܲܗ݇ܝܝܼ ܒܗܹܡܸܙܡܵܢ ܘܒܝܘܼܠܦܵܢܵܐ. 18ܣܵܒܵܒ ܕܐَܡܝܼܪܹܗ ܟܬܵܒܼܵܐ؛ ܠܵܐ ܐܵܣܪܸܬ ܦܘܼܡܵܐ ܕܬܵܘܪܵܐ ܒܕܘܵܪܬܵܐ؛ ܐܘܼܦ؛ ܚܫܝܼܚܵܐ ܝܠܹܗ ܦܵܥܠܵܐ ܠܗܵܩܹܗ. 19ܥܲܠ ܩܲܫܝܼܫܵܐ ܕܲܪܗܲܩܘܼܬܵܐ ܠܵܐ ܩܵܒ݁ܠܸܬ؛ ܐܸܠܵܐ ܥܲܠ ܦܘܼܡܵܐ ܕܬܪ̈ܲܝ ܘܬܠܵܬ݇ܐ ܣܵܗܕܹ̈ܐ. 20ܠܐܵܢܝܼ ܕܚܵܛܝܼ؛ ܩܵܕ݇ܡ ܟܠ ܐ݇ܢܵܫܵܐ ܡܲܢܟܼܸܣ؛ ܕܐܘܼܦ ܐ݇ܢܵܫܹ̈ܐ ܐَܚܹܪ̈݇ܢܹܐ ܙܵܕܥܝܼ. 21ܒܝܼܵܗ݇ܒܼܵܐ ܝܘܸܢ ܣܵܗܕܘܼܬܵܐ ܐܸܠܘܼܟܼ ܩܵܕ݇ܡ ܐܲܠܵܗܵܐ؛ ܘܡܵܪܲܢ ܝܼܫܘܿܥ ܡܫܝܼܚܵܐ؛ ܘܡܲܠܲܐܟܼܘܼ̈ܗܝ ܓܘܼܒܝܹ̈ܐ؛ ܕܢܵܛܪܸܬ ܐܲܢܹܐ ܕܠܵܐ ܕܝܵܢܵܐ ܡܩܵܕ݇ܡ ܫܡܵܥܝܬܵܐ؛ ܘܠܵܐ ܥܵܒܼܕܸܬ ܡܸܢܕܝܼ ܒܚܙܵܝܬܵܐ ܕܦܵܬܵܐ. 22ܐܝܼܕܵܐ ܓ̰ܲܠܕܹܐ ܥܲܠ ܐ݇ܢܵܫܵܐ ܠܵܐ ܡܲܬܒܸܬ؛ ܘܠܵܐ ܗܵܘܹܬ ܫܵܪܝܼܟܵܐ ܒܚܛܝܼܵܬܹ̈ܐ ܕܐ݇ܢܵܫܹ̈ܐ ܐَܚܹܪ̈݇ܢܹܐ. ܓܵܢܘܼܟܼ ܢܛܘܿܪ ܒܕܸܟܼܝܘܼܬܵܐ. 23ܡܐܵܕܝܼܵܐ ܡ̈ܝܼܵܐ ܠܵܐ ܫܵܬܸܬ؛ ܐܸܠܵܐ ܚܲܕَܟ̰ܵܐ ܚܲܡܪܵܐ ܡܲܦܠܸܚ ܣܵܒܵܒ ܕܐܸܣܛܘܼܡܟܘܼܟܼ ܘܣܵܒܵܒ ܕܡܲܪ̈ܥܘܼܟܼ ܕܪܵܒܵܐ ܓܵܗܹ̈ܐ. 24ܐܝܼܬ ܒܢܲܝ̈ܢܵܫܵܐ ܕܚܛܝܼܵܬܵܝ̈ܗܝ ܝܕܸܥܝܹܐ ܝܢܵܐ؛ ܘܟܹܐ ܩܵܕܡܝܼ ܠܗ݇ܘܿܢ ܠܕܝܼܘܵܢ؛ ܘܐܝܼܬ ܕܒܵܬ݇ܪܵܝ ܟܹܐ ܐܵܙܠ݇ܝܼ. 25ܗܲܕܟܼܵܐ ܐܘܼܦ ܦܘܼܠܚܵܢܹ̈ܐ ܛܵܒܼܹ̈ܐ ܝܕܸܥܝܹܐ ܝܢܵܐ؛ ܘܐܵܢܝܼ ܕܚܲܕَ ܬܵܗܵܪ ܐ݇ܚܹܪ݇ܢܵܐ ܝܢܵܐ ܠܸܛܫܵܝܵܐ ܠܹܐ ܡܵܨܝܼ.