1ܘܐܵܢܵܐ؛ ܐܵܚܘܿܢܘܵܬܝܼ̈؛ ܠܵܐ ܡܨܹܐܠܝܼ ܕܗܲܡܙܸܡܸܢ ܥܲܡܵܘܟܼܘܿܢ ܐܲܝܟܼ ܕܥܲܡ ܪ̈ܘܼܚܵܢܹܐ؛ ܐܸܠܵܐ ܐܲܝܟܼ ܕܥܲܡ ܦܲܓܼܪ̈ܵܢܹܐ؛ ܘܐܲܝܟܼ ܕܠܝܲܠܘܼܕܹ̈ܐ ܒܡܫܝܼܚܵܐ. 2ܚܲܠܒܼܵܐ ܩܲܡ ܝܵܗܒܸܢܵܘܟܼܘܿܢ؛ ܘܠܵܐ ܡܹܐܟܼܘܼܠܬܵܐ؛ ܣܵܒܵܒ ܗܹܫ ܠܹܐ ܡܵܨܝܼܬܘܿܢ ܗَܘܵܘ؛ ܐܸܠܵܐ ܐܘܼܦ ܐܵܕܝܼܵܐ ܠܹܐ ܡܵܨܝܼܬܘܿܢ. 3ܣܵܒܵܒ ܗܹܫ ܦܲܓܼܪ̈ܵܢܹܐ ܝܬܘܿܢ؛ ܣܵܒܵܒ ܟܲܕ ܐܝܼܬ ܓܵܘܵܘܟܼܘܿܢ ܒܲܚܸܠܵܢܘܼܬܵܐ؛ ܘܡܲܩܲܪܵܨܘܼܬܵܐ؛ ܘܕܘܼܒܵܪ̈ܘܼܝܵܬܹܐ؛ ܠܹܐ ܝܬܘܿܢ ܦܲܓܪ̈ܵܢܹܐ ܘܐܲܝܟܼ ܒܲܪܢܵܫܵܐ ܒܸܚܕܵܪܵܐ؛ 4ܣܵܒܵܒ ܐܝܼܡܲܢ ܕܐܵܡܸܪ ܚܲܕَ؛ ܐܵܢܵܐ ܕܦܵܘܠܘܿܣ ܝܼܘܸܢ؛ ܘܐَܚܹܪَܢܵܐ؛ ܐܵܢܵܐ ܕܐܵܦܲܠܘܿ ܝܘܸܢ؛ ܠܹܐ ܝܬܘܿܢ ܐَܢܵܫܹ̈ܐ؛ 5ܒܲܣ ܡܵܢܝܼ ܝܠܹܗ ܐܵܦܲܠܘܿ؛ ܘܡܵܢܝܼ ܝܠܹܗ ܦܵܘܠܘܿܣ؛ ܐܸܠܵܐ ܚܸܠܡܲܬܟܵܪܹ̈ܐ ܕܒܐܝܼܕܵܝ̈ܗܝ ܗܘܼܡܸܢܵܘܟܼܘܿܢ؛ ܘܠܟܠ ܚܲܕَ ܐܲܝܟܼ ܕܝܘܼܗَܒܼܸܠܹܗ ܐܸܠܵܐ ܡܵܪܝܵܐ. 6ܐܵܢܵܐ ܢܨܸܒܼܠܝܼ؛ ܘܐܵܦܲܠܘܿ ܡܘܼܫܬܹܐ ܠܹܗ؛ ܐܸܠܵܐ ܐܲܠܵܗܵܐ ܓܘܼܪܘܸܣܠܹܗ. 7ܒܲܣ ܠܵܐ ܗ̇ܘ ܕܢܵܨܸܒܼ ܡܸܢܕܝܼ ܝܠܹܗ؛ ܘܠܵܐ ܗ̇ܘ ܕܡܲܫܬܹܐ؛ ܐܸܠܵܐ ܐܲܠܵܗܵܐ ܕܟܹܐ ܓܲܪܘܸܣ. 8ܐܝܼܢܵܐ ܗ̇ܘ ܕܢܵܨܸܒܼ؛ ܘܗ̇ܘ ܕܡܲܫܬܹܐ؛ ܐܸܠܵܐ ܐܲܠܵܗܵܐ ܚܲܕَ ܝܼܢܵܐ. ܐܝܼܢܵܐ ܟܠ ܐَܢܵܫܵܐ ܒܸܬ ܩܵܒܸܿܠ ܗܵܩܹܗ ܐܲܝܟܼ ܓ̰ܵܦܹܗ. 9ܣܵܒܵܒ ܥܲܡ ܐܲܠܵܗܵܐ ܒܸܦܠܵܚܵܐ ܝܘܵܚ؛ ܘܚܲܩܠܵܐ ܕܐܲܠܵܗܵܐ ܘܒܸܢܝܵܢܵܐ ܕܐܲܠܵܗܵܐ ܐܲܚܬܘܿܢ ܝܼܬܘܿܢ. 10ܐܲܝܟܼ ܫܵܦܵܩܲܬ ܕܐܲܠܵܗܵܐ ܕܦܸܫܠܵܗ̇ ܝܘܼܗَܒܼܸܠܬܵܐ ܐܸܠܝܼ؛ ܡܘܼܬܸܒܼܠܝܼ ܒܸܢܝܲܬ ܐܲܝܟܼ ܡܸܥܡܵܪ ܥܵܩܸܠܕܵܪ؛ ܘܐَܚܹܪَܢܵܐ ܒܸܒܢܵܝܵܐ ܝܠܹܗ ܥܲܠܘܼܗܿ. ܐܝܼܢܵܐ ܟܠ ܐَܢܵܫܵܐ ܚܵܙܹܐ ܕܵܐܟܼܝܼ ܒܸܒܢܵܝܵܐ ܝܠܹܗ ܥܲܠܘܼܗܿ. 11ܣܵܒܵܒ ܕܒܸܢܝܲܬ ܐܚܹܪَܬܵܐ؛ ܫܒܼܘܿܩ ܡ̣ܢ ܐܵܗܵܐ ܕܡܘܼܬܸܒܼܬܵܐ ܝَܠܵܗ̇؛ ܐَܢܵܫܵܐ ܠܹܐ ܡܵܨܹܐ ܠܡܲܬܘܼܒܹܐ؛ ܕܝܼܠܵܗ̇ ܝܼܫܘܿܥ ܡܫܝܼܚܵܐ. 12ܘܐܸܢ ܐَܢܵܫܵܐ ܒܵܢܹܐ ܥܲܠ ܕܐܵܗܵܐ ܒܸܢܝܲܬ؛ ܕܲܗܒܼܵܐ؛ ܝܲܢ ܣܹܐܡܵܐ؛ ܝܲܢ ܟܹܐܦܹ̈ܐ ܛܝܼܡܵܢܹ̈ܐ؛ ܝܲܢ ܩܲܝܣܵܐ؛ ܝܲܢ ܓܸܠܵܐ؛ ܝܲܢ ܟܘܼܠܵܫ؛ 13ܦܘܼܠܚܵܢܵܐ ܕܟܠ ܐَܢܵܫܵܐ ܒܸܬ ܦܵܝܸܫ ܓܸܠܝܵܐ؛ ܣܵܒܵܒ ܗ̇ܘ ܝܵܘܡܵܐ ܒܸܬ ܓܵܠܹܐ ܠܹܗ؛ ܣܵܒܵܒ ܕܦܝܵܫܵܐ ܝܠܹܗ ܓܸܠܝܵܐ ܒܢܘܼܪܵܐ؛ ܘܦܘܼܠܚܵܢܵܐ ܕܟܠ ܐَܢܵܫܵܐ ܕܵܐܟܼܝܼ ܕܝܼܠܹܗ؛ ܢܘܼܪܵܐ ܒܸܬ ܦܵܪܸܫ ܠܹܗ. 14ܐܸܢ ܥܲܪܩܸܠ ܦܘܼܠܚܵܢܹܗ ܕܐَܢܵܫܵܐ ܗ̇ܘ ܕܒܸܢܝܵܐ ܝܠܹܗ؛ ܗܵܩܹܗ ܒܸܬ ܩܵܒܸܿܠ. 15ܐܸܢ ܝܵܩܸܕ ܦܘܼܠܚܵܢܹܗ ܕܐَܢܵܫܵܐ؛ ܒܸܬ ܩܵܒܸܠ ܚܘܼܣܪܵܢܵܐ. ܐܝܼܢܵܐ ܒܓܵܢܹܗ ܒܸܬ ܦܵܪܸܩ؛ ܐܝܼܢܵܐ ܗܲܕܟܼܵܐ ܐܲܝܟܼ ܕܡ̣ܢ ܢܘܼܪܵܐ. 16ܠܹܐ ܝܬܘܿܢ ܒܝܼܕܲܥܝܵܐ ܕܗܲܝܟܠܹܗ ܕܐܲܠܵܗܵܐ ܝܬܘܿܢ؛ ܘܪܘܼܚܹܗ ܕܐܲܠܵܗܵܐ ܒܥܡܵܪܵܐ ܝܠܹܗ ܓܵܘܵܘܟܼܘܿܢ؛ 17ܐܸܢ ܐَܢܵܫܵܐ ܡܲܚܪܸܒܼ ܠܗܲܝܟܠܹܗ ܕܐܲܠܵܗܵܐ؛ ܒܸܬ ܡܲܚܪܸܒܼ ܠܹܗ ܐܲܠܵܗܵܐ؛ ܣܵܒܵܒ ܗܲܝܟܠܹܗ ܕܐܲܠܵܗܵܐ ܩܲܕܝܼܫܵܐ ܝܠܹܗ؛ ܕܝܼܬܘܿܢ ܐܲܚܬܘܿܢ. 18ܐَܢܵܫܵܐ ܠܵܐ ܡܲܚܠܸܛ ܓܵܢܹܗ. ܐܸܢ ܐَܢܵܫܵܐ ܚܵܫܸܒܼ ܓܵܘܵܘܟܼܘܿܢ ܕܥܵܩܸܠܕܵܪ ܝܼܠܹܗ ܒܐܵܗܵܐ ܥܵܠܡܵܐ؛ ܗܵܘܹܐ ܢܲܙܵܢ؛ ܕܗܵܘܹܐ ܥܵܩܸܠܕܵܪ. 19ܣܵܒܵܒ ܥܵܩܸܠܕܵܪܘܼܬܹܗ ܕܐܵܗܵܐ ܥܵܠܡܵܐ ܢܲܙܵܢܘܼܬܵܐ ܝَܠܵܗ̇ ܠܟܸܣ ܐܲܠܵܗܵܐ؛ ܣܵܒܵܒ ܕܟܬܝܼܒܼܵܐ ܝܠܹܗ؛ ܟܹܐ ܕܵܒܸܩ ܠܥܵܩܸܠܕܵܪܹ̈ܐ ܒܝܲܕܘܼܥܘܼܬܵܝܗܝ. 20ܘܡܸܢَܕܪܸܫَ؛ ܡܵܪܝܵܐ ܟܹܐ ܝܲܕܸܥ ܚܘܼܫܵܒܹ̈ܐ ܕܥܵܩܸܠܕܵܪܹ̈ܐ؛ ܕܒܵܛܝܼܠܹܐ ܝܢܵܐ. 21ܣܵܒܵܒ ܕܐܵܗܵܐ؛ ܐَܢܵܫܵܐ ܠܵܐ ܥܵܒܼܸܕ ܫܘܼܒܼܗܵܪܵܐ ܒܒܢܲܝ̈ܢܵܫܵܐ؛ ܣܵܒܵܒ ܟܠ ܡܸܢܕܝܼ ܕܝܼܵܘܟܼܘܿܢ ܝܼܠܹܗ؛ 22ܐܸܢ ܦܵܘܠܘܿܣ؛ ܘܐܸܢ ܐܵܦܲܠܘܿ؛ ܘܐܸܢ ܟܹܐܦܵܐ؛ ܘܐܸܢ ܥܵܠܡܵܐ؛ ܘܐܸܢ ܚܲܝܹ̈ܐ؛ ܘܐܸܢ ܡܵܘܬܵܐ؛ ܘܐܸܢ ܡܸܢܕܝܼܵܢܹ̈ܐ ܕܐܵܕܝܼܵܐ؛ ܘܐܸܢ ܕܒܸܬ ܗܵܘܝܼ؛ ܟܠ ܡܸܢܕܝܼ ܕܝܼܵܘܟܼܘܿܢ ܝܼܠܹܗ؛ 23ܘܐܲܚܬܘܿܢ ܕܡܫܝܼܚܵܐ ܝܬܘܿܢ؛ ܘܡܫܝܼܚܵܐ ܕܐܲܠܵܗܵܐ.