1ܡܐܵܕܝܼܵܐ؛ ܐܵܚܘܿܢܘܵܬܝܼ̈؛ ܒܸܒܲܥܝܵܐ ܝܘܵܚ ܡܸܢܵܘܟܼܘܿܢ؛ ܘܦܲܪܦܘܼܠܹܐ ܝܘܵܚ ܒܝܼܵܘܟܼܘܿܢ؛ ܒܡܵܪܲܢ ܝܼܫܘܿܥ؛ ܕܐܲܝܟܼ ܕܩܘܼܒܸܠܵܘܟܼܘܿܢ ܡܸܢܲܢ ܕܵܐܟܼܝܼ ܘܵܓ̰ܸܒ ܝܼܠܵܗ̇ ܕܚܵܕܪܝܼܬܘܿܢ ܘܫܵܦܪܝܼܬܘܿܢ ܠܐܲܠܵܗܵܐ؛ ܕܵܐܟܼܝܼ ܕܐܘܼܦ ܒܸܚܕܵܪܵܐ ܝܬܘܿܢ؛ ܕܡܲܙܝܸܕܬܘܿܢ ܒܘܼܫ ܙܵܘܕܵܐ. 2ܣܵܒܵܒ ܒܝܼܕܲܥܝܵܐ ܝܬܘܿܢ ܡܘܼܕܝܼ ܦܘܼܩܕܵܢܹ̈ܐ ܝܸܗܒܸܠܲܢ ܐܸܠܵܘܟܼܘܿܢ ܒܡܵܪܲܢ ܝܼܫܘܿܥ. 3ܣܵܒܵܒ ܐܵܗܵܐ ܝܠܹܗ ܪܸܙܵܝܹܗ ܕܐܲܠܵܗܵܐ؛ ܩܲܕܝܼܫܘܼܬܵܘܟܼܘܿܢ؛ ܕܗܵܘܝܼܬܘܿܢ ܦܪܝܼܩܹܐ ܡ̣ܢ ܙܵܢܝܘܼܬܵܐ؛ 4ܘܗܵܘܹܐ ܒܝܼܕܲܥܝܵܐ ܟܠ ܐ݇ܢܵܫܵܐ ܡܸܢܵܘܟܼܘܿܢ ܠܸܢܛܵܪܵܐ ܡܵܐܢܹܗ ܒܩܲܕܝܼܫܘܼܬܵܐ ܘܒܐܝܼܩܵܪܵܐ؛ 5ܘܠܵܐ ܒܙܵܘܥܹ̈ܐ ܕܫܲܗ݇ܘܲܬܬܵܐ؛ ܐܲܝܟܼ ܛܵܝܸܦܹ̈ܐ؛ ܐܵܢܝܼ ܕܠܹܐ ܝܲܕܥܝܼ ܠܐܲܠܵܗܵܐ؛ 6ܘܠܵܐ ܗܵܘܝܼܬܘܿܢ ܒܸܥܒܼܵܪܵܐ ܘܒܸܙܠܵܡܵܐ ܐ݇ܢܵܫܵܐ ܠܐܵܚܘܿܢܹܗ ܒܐܵܗܵܐ ܫܘܼܠܵܐ؛ ܣܵܒܵܒ ܡܵܪܲܢ ܫܵܩܠܵܢܵܐ ܕܬܘܼܥܠܵܐ ܝܠܹܗ ܒܐܲܢܹܐ ܟܠܵܝܗܝ؛ ܕܵܐܟܼܝܼ ܕܐܘܼܦ ܡ̣ܢ ܩܵܕ݇ܡ ܚܲܕَ ܙܲܒܼܢܵܐ ܐَܡܸܪܲܢ ܐܸܠܵܘܟܼܘܿܢ ܘܣܗܸܕܠܲܢ. 7ܣܵܒܵܒ ܠܵܐ ܩܸܪܝܵܚܠܹܐ ܐܲܠܵܗܵܐ ܠܛܲܡܦܘܼܬܵܐ؛ ܐܸܠܵܐ ܠܩܲܕܝܼܫܘܼܬܵܐ. 8ܒܲܣ ܗ̇ܘ ܕܡܲܣܠܹܐ؛ ܠܹܐ ܝܠܹܗ ܠܒܲܪܢܵܫܵܐ ܡܲܣܠܘܼܝܹܐ؛ ܐܸܠܵܐ ܠܐܲܠܵܗܵܐ؛ ܗ̇ܘ ܕܝܘܼܗَܒܼܸܠܹܗ ܐܸܠܲܢ ܪܘܼܚܹܗ ܩܲܕܝܼܫܵܐ. 9ܐܝܼܢܵܐ ܒܵܗ݇ܣ ܕܚܘܼܒܵܐ ܕܐܵܚܘܿܢܘܵܬܹ̈ܐ ܠܹܐ ܝܬܘܿܢ ܣܢܝܼܩܹܐ ܕܟܵܬܒܼܸܢ ܐܸܠܵܘܟܼܘܿܢ؛ ܣܵܒܵܒ ܐܲܚܬܘܿܢ ܒܓܵܢܵܘܟܼܘܿܢ ܡܘܼܠܦܹܐ ܝܬܘܿܢ ܡ̣ܢ ܐܲܠܵܗܵܐ ܕܡܲܚܸܒܝܼܬܘܿܢ ܚܲܕَ ܠܗ̇ܘ ܐ݇ܚܹܪ݇ܢܵܐ؛ 10ܐܘܼܦ ܒܸܥܒܼܵܕܵܐ ܝܬܘܿܢ ܗܲܕܟܼܵܐ ܠܟܠܵܝܗܝ ܐܵܚܘܿܢܘܵܬܹ̈ܐ ܕܝܼܢܵܐ ܒܟܠܵܗ̇ ܡܵܩܹܕܘܿܢܝܼܵܐ. ܐܝܼܢܵܐ ܦܲܪܦܘܼܠܹܐ ܝܘܵܚ ܒܝܼܵܘܟܼܘܿܢ؛ ܐܵܚܘܿܢܘܵܬܝܼ̈؛ ܕܙܵܘܕܵܐ ܙܵܝܕܝܼܬܘܿܢ؛ 11ܘܚܵܒ݁ܛܝܼܬܘܿܢ ܠܸܗ݇ܘܵܝܵܐ ܫܸܠܝܹ̈ܐ؛ ܘܠܸܥܒܼܵܕܵܐ ܫܘܼܠܵܐ ܕܓܵܢܵܘܟܼܘܿܢ؛ ܘܠܸܦܠܵܚܵܐ ܒܐܝܼܕܵܬܵܘ̈ܟܼܘܿܢ؛ ܕܵܐܟܼܝܼ ܕܩܲܡ ܦܵܩܕܵܚ ܠܵܘܟܼܘܿܢ؛ 12ܕܗܵܘܝܼܬܘܿܢ ܒܸܚܕܵܪܵܐ ܒܐܵܕܵܒܘܼܬܵܐ ܠܟܸܣ ܒܲܪ̈ܵܝܹܐ ܘܥܲܠ ܐ݇ܢܵܫܵܐ ܠܵܐ ܣܵܢܩܝܼܬܘܿܢ. 13ܐܝܼܢܵܐ ܒܲܥܝܸܢ ܕܝܲܕܥܝܼܬܘܿܢ؛ ܐܵܚܘܿܢܘܵܬܝܼ̈؛ ܒܵܗ݇ܣ ܕܐܵܢܝܼ ܕܝܼܢܵܐ ܕܡܝܼܟܼܹܐ؛ ܠܵܐ ܗܵܘܝܼܬܘܿܢ ܒܸܦܫܵܡܵܐ ܐܲܝܟܼ ܐ݇ܢܵܫܹ̈ܐ ܐܚܹܪ̈݇ܢܹܐ ܕܗܹܒܼܝܼ ܠܲܝܬ ܠܗ݇ܘܿܢ. 14ܣܵܒܵܒ ܐܸܢ ܗܲܡܘܼܢܹܐ ܝܘܵܚ ܕܝܼܫܘܿܥ ܡܝܼܬܠܹܗ ܘܩܸܡܠܹܗ؛ ܗܲܕܟܼܵܐ ܐܘܼܦ ܐܲܠܵܗܵܐ ܠܐܵܢܝܼ ܕܕܡܸܟܼܠܘܿܢ ܒܝܼܫܘܿܥ ܒܸܬ ܡܲܝܬ݇ܝܹܐ ܥܲܡܹܗ. 15ܐܝܼܢܵܐ ܐܵܢܝܼ ܒܹܐܡܵܪܵܐ ܝܘܵܚ ܐܸܠܵܘܟܼܘܿܢ ܒܗܹܡܸܙܡܵܢ ܕܡܵܪܲܢ؛ ܕܐܲܚܢܲܢ ܐܵܢܝܼ ܕܗܵܘܵܚ ܚܵܝܹ̈ܐ؛ ܕܦܵܝܫܵܚ ܠܐَܬܵܝܬܹܗ ܕܡܵܪܲܢ؛ ܠܹܐ ܩܵܕܡܵܚ ܠܐܵܢܝܼ ܕܕܡܸܟܼܠܘܿܢ. 16ܣܵܒܵܒ ܡܵܪܲܢ ܒܓܵܢܹܗ؛ ܒܩܲܘܲܚܬܵܐ؛ ܘܒܩܵܠܵܐ ܕܪܸܫ ܡܲܠܲܐܟܼܹ̈ܐ؛ ܘܒܫܝܼܦܘܿܪܵܐ ܕܐܲܠܗܵܐ؛ ܒܸܬ ܨܵܠܹܐ ܡ̣ܢ ܫܡܲܝܵܐ؛ ܘܡܝܼܬܹ̈ܐ ܕܒܡܫܝܼܚܵܐ ܒܸܬ ܩܵܝܡܝܼ ܩܵܕ݇ܡܵܝܬܵܐ. 17ܘܗ̇ܝܓܵܗ ܐܲܚܢܲܢ ܕܚܵܝܹ̈ܐ؛ ܐܵܢܝܼ ܕܥܲܪܩܸܠܵܚ؛ ܒܸܬ ܦܵܝܫܵܚ ܓ̰ܢܝܼܘܹܐ ܥܲܡܵܝܗܝ ܡܸܚܕܵܕܹ̈ܐ ܒܥܢܵܢܹ̈ܐ؛ ܠܐܘܼܪܚܹܗ ܕܡܵܪܲܢ ܒܗܵܘܵܐ. ܘܗܲܕܟܼܵܐ ܒܟܠ ܙܲܒܼܢܵܐ ܥܲܡ ܡܵܪܲܢ ܒܸܬ ܗܵܘܵܚ. 18ܒܲܣ ܗ݇ܘܹܡܘܿܢ ܒܝܼܵܗ݇ܒܼܵܐ ܠܸܒܵܐ ܚܲܕَ ܠܗ̇ܘ ܐ݇ܚܹܪ݇ܢܵܐ ܒܐܲܢܹܐ ܗܹܡܸܙܡܵܢܹ̈ܐ.