1ܦܵܘܠܘܿܣ؛ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܒܪܸܙܵܝܹܗ ܕܐܲܠܵܗܵܐ؛ ܘܛܝܼܡܵܬܹܐܘܿܣ ܐܵܚܘܿܢܵܐ؛ ܠܥܹܕܬܵܐ ܕܐܲܠܵܗܵܐ ܕܝܼܠܵܗ̇ ܒܩܘܿܪܲܢܬܘܿܣ؛ ܥܲܡ ܟܠܵܝܗܝ ܩܲܕܝܼܫܹ̈ܐ ܕܝܼܢܵܐ ܒܟܠܵܗܿ ܐܵܟܼܵܐܝܼܵܐ؛ 2ܫܵܦܵܩܲܬ ܥܲܡܵܘܟܼܘܿܢ ܘܫܠܵܡܵܐ ܡ̣ܢ ܐܲܠܵܗܵܐ ܒܵܒܲܢ ܘܡ̣ܢ ܡܵܪܲܢ ܝܼܫܘܿܥ ܡܫܝܼܚܵܐ. 3ܡܒܘܼܪܟܼܵܐ ܝܠܹܗ ܐܲܠܵܗܵܐ ܘܒܵܒܹܗ ܕܡܵܪܲܢ ܝܼܫܘܿܥ ܡܫܝܼܚܵܐ؛ ܒܵܒܵܐ ܕܪܲܚܡܹܐ؛ ܘܐܲܠܵܗܵܐ ܕܟܠ ܝܵܗَܒܲܠܬܵܐ ܕܠܸܒܵܐ؛ 4ܗ̇ܘ ܕܒܝܼܵܗَܒܲܢ ܝܼܠܹܗ ܠܸܒܵܐ ܒܟܠܵܝܗܝ ܐܘܼܠܨܵܢܲܢ؛ ܕܐܘܼܦ ܐܲܚܢܲܢ ܡܵܨܵܚ ܝܵܗَܒܼܵܚ ܠܸܒܵܐ ܠܐܵܢܝܼ ܕܝܼܢܵܐ ܒܟܠܵܝܗܝ ܐܘܼܠܨܵܢܹ̈ܐ؛ ܒܗ̇ܝ ܝܵܗَܒܲܠܬܵܐ ܕܠܸܒܵܐ ܕܐܲܚܢܲܢ ܦܝܵܫܵܐ ܝܘܵܚ ܝܘܼܗَܒܹܐ ܠܸܒܵܐ ܡ̣ܢ ܐܲܠܵܗܵܐ. 5ܣܵܒܵܒ ܕܵܐܟܼܝܼ ܕܒܸܙܝܵܕܵܐ ܝܢܵܐ ܒܝܼܲܢ ܚܲܫܹ̈ܐ ܕܡܫܝܼܚܵܐ؛ ܗܲܕܟܼܵܐ ܒܝܲܕ ܡܫܝܼܚܵܐ ܒܸܙܝܵܕܵܐ ܝَܠܵܗ̇ ܐܘܼܦ ܝܵܗَܒܲܠܬܲܢ ܕܠܸܒܵܐ. 6ܘܐܸܢ ܦܝܵܫܵܐ ܝܘܵܚ ܡܘܼܠܝܸܨܹܐ؛ ܒܚܵܬܸܪ ܕܝܵܗَܒܲܠܬܵܐ ܕܠܸܒܵܐ ܘܦܘܼܪܩܵܢܵܐ ܕܝܼܵܘܟܼܘܿܢ؛ ܘܐܸܢ ܦܵܝܫܵܐ ܝܘܵܚ ܝܘܼܗَܒܹܐ ܠܸܒܵܐ؛ ܒܚܵܬܸܪ ܕܝܵܗَܒܲܠܬܵܘܟܼܘܿܢ ܕܠܸܒܵܐ؛ ܗ̇ܝ ܕܟܹܐ ܦܵܠܚܵܐ ܒܚܡܵܠܬܵܐ ܕܐܵܢܝܼ ܚܲܫܹ̈ܐ ܕܐܘܼܦ ܐܲܚܢܲܢ ܩܵܒܘܿܠܹܐ ܝܘܵܚ. 7ܘܗܹܒܼܝܼܲܢ ܕܥܲܠܵܘܟܼܘܿܢ ܩܘܝܼܬܵܐ ܝَܠܵܗ̇؛ ܣܵܒܵܒ ܕܒܝܕܲܥܝܵܐ ܝܘܵܚ ܕܐܲܝܟܼ ܕܫܵܪ̈ܝܼܟܹܐ ܝܬܘܿܢ ܒܚܲܫܹ̈ܐ؛ ܗܲܕܟܼܵܐ ܐܘܼܦ ܒܝܵܗَܒܲܠܬܵܐ ܕܠܸܒܵܐ. 8ܐܝܼܢܵܐ ܒܸܒܥܵܝܹܐ ܝܘܲܚ ܕܵܕܥܝܼܬܘܿܢ ܐܵܚܘܿܢܘܵܬ̈ܲܢ؛ ܒܵܗَܣ ܕܐܘܼܠܨܵܢܵܐ ܕܗَܘܹܐܠܵܗ̇ ܠܲܢ ܒܐܵܣܝܼܵܐ؛ ܕܦܸܫܠܲܢ ܝܘܼܩܪܸܢܸܐ ܒܹܐ ܩܲܝܵܣ ܙܵܘܕܵܐ ܡ̣ܢ ܚܲܝܠܲܢ؛ ܗܲܠ ܕܩܛܹܥܠܲܢ ܗܹܒܼܝܼܲܢ ܐܘܼܦ ܡ̣ܢ ܚܲܝܹ̈ܐ. 9ܘܐܘܼܦ ܐܲܚܢܲܢ ܐܝܼܬ ܗَܘܵܐ ܒܓܵܢܲܢ ܦܸܬܘܵܐ ܕܡܵܘܬܵܐ؛ ܕܠܵܐ ܗܵܘܝܵܐ ܗَܘܵܐ ܠܲܢ ܗܹܒܼܝܼ ܥܲܠ ܓܵܢܲܢ؛ ܐܸܠܵܐ ܥܲܠ ܐܲܠܵܗܵܐ؛ ܗ̇ܘ ܕܟܹܐ ܡܲܩܸܡ ܡܝܼܬܹ̈ܐ. 10ܗ̇ܘ ܕܡ̣ܢ ܡܵܘܬܵܐ ܗܲܕܟܼܵܐ ܓܘܼܪܵܐ ܦܘܼܪܩܵܚܠܹܗ؛ ܘܒܸܬ ܦܵܪܸܩ؛ ܘܡܸܢَܕܪܸܫَ ܒܗܹܒܼܝܼ ܝܘܵܚ ܒܝܹܗ ܕܒܸܬ ܦܵܪܸܩ ܠܲܢ؛ 11ܒܗܲܝܲܪܬܵܐ ܕܦܲܪܦܲܠܬܵܐ ܐܘܼܦ ܕܝܼܵܘܟܼܘܿܢ ܡܒܵܕܵܠܲܢ؛ ܘܫܵܦܵܩܲܬ ܕܠܟܸܣܠܲܢ ܡ̣ܢ ܪܵܒܵܐ ܐَܢܵܫܹ̈ܐ ܗܵܘܝܵܐ ܠܫܵܟܲܪܬܵܐ ܒܪܵܒܵܐ ܒܚܵܬܸܪ ܕܝܼܲܢ. 12ܣܵܒܵܒ ܕܫܘܼܒܼܗܵܪܲܢ ܐܵܗܵܐ ܝܠܹܗ؛ ܣܵܗܕܘܼܬܵܐ ܕܐܸܢܝܲܬܲܢ؛ ܕܒܩܲܕܝܼܫܘܼܬܵܐ ܘܒܬܪܘܼܨܘܼܬܵܐ ܕܐܲܠܵܗܵܐ؛ ܠܵܐ ܒܥܵܩܸܠܕܵܪܘܼܬܵܐ ܦܲܓܼܪܵܢܵܝܬܵܐ؛ ܐܸܠܵܐ ܒܫܵܦܵܩܲܬ ܕܐܲܠܵܗܵܐ ܚܕܸܪܲܢ ܓܵܘ ܥܵܠܡܵܐ؛ ܘܒܘܼܫ ܙܵܘܕܵܐ ܠܟܸܣܠܵܘܟܼܘܿܢ. 13ܣܵܒܵܒ ܡܸܢܕܝܼܵܢܹ̈ܐ ܐَܚܹܪَ̈ܢܹܐ ܠܹܐ ܝܘܵܚ ܒܸܟܬܵܒܿܵܐ ܐܸܠܵܘܟܼܘܿܢ؛ ܐܸܠܵܐ ܐܵܢܝܼ ܕܟܹܐ ܩܵܪܝܼܬܘܿܢ ܝܲܢ ܡܵܘܕܝܼܬܘܿܢ؛ ܘܒܗܹܒܼܝܼ ܝܘܸܢ ܕܗܲܠ ܚܲܪܬܵܐ ܒܸܬ ܡܵܘܕܝܼܬܘܿܢ؛ 14ܕܵܐܟܼܝܼ ܕܐܘܼܦ ܩܲܡ ܡܵܘܕܝܼܬܘܿܢ ܐܸܠܲܢ ܒܚܲܕَ ܩܵܕܸܪ؛ ܕܫܘܼܒܼܗܵܪܵܘܟܼܘܿܢ ܝܼܘܵܚ؛ ܐܲܝܟܼ ܕܐܘܼܦ ܐܲܚܬܘܿܢ ܕܝܼܲܢ؛ ܒܝܵܘܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ. 15ܘܒܐܵܗܵܐ ܗܲܡܲܢܬܵܐ ܒܣܸܡܠܵܐ ܠܝܼ ܡ̣ܢ ܩܵܕَܡܵܝܬܵܐ ܕܐܵܬܸܢ ܠܟܸܣܠܵܘܟܼܘܿܢ؛ ܕܩܵܒܠܝܼܬܘܿܢ ܗَܘܵܘ ܫܵܦܵܩܲܬ ܕܬܲܪ̈ܬܹܝ؛ 16ܘܕܥܵܒܼܪܸܢ ܗَܘܵܐ ܡ̣ܢ ܓܵܘܵܘܟܼܘܿܢ ܠܡܵܩܹܕܘܿܢܝܼܵܐ؛ ܘܡܸܢَܕܪܸܫَ ܡ̣ܢ ܡܵܩܹܕܘܿܢܝܼܵܐ ܕܐܵܬܸܢ ܗَܘܵܐ ܠܟܸܣܠܵܘܟܼܘܿܢ؛ ܘܐܲܚܬܘܿܢ ܡܲܦܫܸܛܝܼܬܘܿܢ ܠܝܼ ܠܝܼܗܘܼܕ. 17ܟܲܕ ܐܵܗܵܐ ܗܲܕܟܼܵܐ ܚܫܸܒܼܠܝܼ؛ ܒܩܵܠܘܿܠܘܼܬܵܐ ܦܠܸܚܠܝܼ؛ ܝܲܢ ܐܵܢܝܼ ܕܒܸܚܫܵܒܼܵܐ ܝܘܸܢ؛ ܐܲܝܟܼ ܕܒܒܸܣܪܵܐ ܒܸܚܫܵܒܼܵܐ ܝܘܸܢ؛ ܕܗܵܘܝܵܐ ܠܟܸܣܠܝܼ ܗܹܐ ܗܹܐ؛ ܘܠܵܐ ܠܵܐ؛ 18ܐܸܠܵܐ ܡܗܘܼܡܢܵܐ ܝܠܹܗ ܐܲܠܵܗܵܐ؛ ܕܗܹܡܸܙܡܵܢܲܢ ܕܠܟܸܣܠܵܘܟܼܘܿܢ ܠܹܐ ܗَܘܵܐ؛ ܗܹܐ؛ ܘܠܵܐ. 19ܣܵܒܵܒ ܒܪܘܼܢܹܗ ܕܐܲܠܵܗܵܐ؛ ܝܼܫܘܿܥ ܡܫܝܼܚܵܐ؛ ܗ̇ܘ ܕܦܸܫܠܹܗ ܡܘܼܟܪܸܙܵܐ ܓܵܘܵܘܟܼܘܿܢ ܒܐܝܼܕܲܢ؛ ܒܝܲܕ ܕܝܼܝܼ ܘܒܣܸܠܘܵܢܘܿܣ ܘܒܛܝܼܡܵܬܹܐܘܿܣ؛ ܠܵܐ ܗَܘܹܐ ܠܹܗ ܗܹܐ ܘܠܵܐ؛ ܐܸܠܵܐ ܗܹܐ ܗَܘܹܐܠܵܗ̇ ܒܝܹܗ. 20ܣܵܒܵܒ ܟܠܵܝܗܝ ܩܵܘܠܹ̈ܐ ܕܐܲܠܵܗܵܐ ܒܝܹܗ؛ ܗܹܐ؛ ܘܒܝܹܗ ܐܵܡܹܝܢ؛ ܠܚܸܩܪܵܐ ܕܐܲܠܵܗܵܐ ܒܝܲܕ ܕܝܼܲܢ. 21ܐܝܼܢܵܐ ܗ̇ܘ ܕܡܲܩܘܘܼܝܲܢ ܝܼܠܹܗ ܥܲܡܵܘܟܼܘܿܢ ܒܡܫܝܼܚܵܐ؛ ܘܩܲܡ ܡܵܫܸܚ ܠܲܢ؛ ܐܲܠܵܗܵܐ ܝܠܹܗ؛ 22ܕܩܲܡ ܡܵܚܹܐ ܠܲܢ ܡܵܘܗܪ؛ ܘܝܘܼܗَܒܼܸܠܹܗ ܓܸܪܵܘ ܕܪܘܼܚܹܗ ܒܠܸܒܵܘܵܬ̈ܲܢ. 23ܐܝܼܢܵܐ ܐܵܢܵܐ ܒܸܩܪܵܝܵܐ ܝܘܸܢ ܠܐܲܠܵܗܵܐ ܣܵܗܕܵܐ ܥܲܠ ܓܵܢܝܼ؛ ܣܵܒܵܒ ܡܘܼܚܲܒܢܵܘܟܼܘܿܢ ܒܹܐܬܵܝܼܝܼ ܝَܠܵܗ̇ ܠܵܐ ܐَܬܹܠܝܼ ܠܩܘܿܪܲܢܬܘܿܣ. 24ܠܵܐ ܣܵܒܵܒ ܕܡܵܪܵܘܵܬܹܐ ܕܗܲܝܡܵܢܘܼܬܵܘܟܼܘܿܢ ܝܼܘܵܚ؛ ܐܸܠܵܐ ܗܲܝܸܪܵܢܹܐ ܕܚܲܕܘܼܬܵܘܟܼܘܿܢ ܝܼܘܵܚ؛ ܣܵܒܵܒ ܕܒܗܲܝܡܵܢܘܼܬܵܐ ܒܸܟܠܵܝܵܐ ܝܬܘܿܢ.