1ܗܵܘܝܼܬܘܿܢ ܗܲܕܟܼܵܐ ܕܵܡܝܵܢܹ̈ܐ ܠܐܲܠܵܗܵܐ ܐܲܝܟܼ ܒܢܘܿܢܹ̈ܐ ܡܘܼܚܸܒܹ̈ܐ؛ 2ܘܚܕܘܿܪܘܿܢ ܒܚܘܼܒܵܐ؛ ܐܲܝܟܼ ܕܐܘܼܦ ܡܫܝܼܚܵܐ ܡܘܼܚܸܒܵܚܠܹܐ؛ ܘܣܘܼܦܝܵܠܹܗ ܓܵܢܹܗ ܡܒܵܕܵܠܲܢ؛ ܢܸܕܪܵܐ ܘܕܸܒܼܚܵܐ ܠܐܲܠܵܗܵܐ ܠܪܹܝܚܵܐ ܒܵܣܝܼܡܵܐ. 3ܐܝܼܢܵܐ ܙܵܢܝܘܼܬܵܐ؛ ܘܟܠܵܗ̇ ܛܲܢܦܘܼܬܵܐ؛ ܘܛܲܡܲܥܟܵܪܘܼܬܵܐ؛ ܐܘܼܦ ܠܵܐ ܩܪܵܝܵܐ ܦܵܝܫܵܐ ܩܪܝܼܬܵܐ ܓܵܘܵܘܟܼܘܿܢ؛ ܐܲܝܟܼ ܕܚܵܫܚܵܐ ܠܩܲܕܝܼܫܹ̈ܐ؛ 4ܘܠܵܐ ܫܪܝܼܚܘܼܬܵܐ؛ ܘܠܵܐ ܗܹܡܸܙܡܵܢܹ̈ܐ ܕܐܲܗܡܲܩܘܼܬܵܐ؛ ܝܲܢ ܪܸܫܚܲܢܕܘܼܬܵܐ؛ ܐܲܢܹܐ ܕܠܹܐ ܝܢܵܐ ܒܸܠܚܵܡܵܐ؛ ܐܸܠܵܐ ܡܒܵܕܵܠ ܕܐܲܢܹܐ؛ ܫܵܟܲܪܬܵܐ. 5ܣܵܒܵܒ ܕܐܵܗܵܐ ܒܝܼܕܲܥܝܵܐ ܝܬܘܿܢ؛ ܕܟܠ ܙܲܢܵܝܵܐ؛ ܝܲܢ ܛܲܢܦܵܐ؛ ܝܲܢ ܛܲܡܲܥܟܵܪ؛ ܕܝܼܠܹܗ ܣܵܓܼܕܵܢܵܐ ܕܨܵܢܲܡܹ̈ܐ؛ ܠܲܝܬ ܠܹܗ ܝܵܪܬܘܼܬܵܐ ܒܡܲܠܟܘܼܬܵܐ ܕܡܫܝܼܚܵܐ ܘܕܲܐܠܵܗܵܐ. 6ܠܵܐ ܐ݇ܢܵܫܵܐ ܡܲܚܠܸܛ ܠܵܘܟܼܘܿܢ ܒܗܹܡܸܙܡܵܢܹ̈ܐ ܒܵܛܝܼ̈ܠܹܐ؛ ܣܵܒܵܒ ܒܝܼܸܕ ܐܲܢܹܐ ܒܹܐܬܵܝܵܐ ܝَܠܵܗ̇ ܟܲܪܒܹܗ ܕܐܲܠܵܗܵܐ ܥܲܠ ܒܢܘܼܢܹ̈ܐ ܕܠܵܐ ܡܲܨܝܲܬܬܵܐ. 7ܒܲܣ ܠܵܐ ܗܵܘܝܼܬܘܿܢ ܥܲܡܵܝܗܝ ܫܵܪ̈ܝܼܟܹܐ. 8ܣܵܒܵܒ ܩܲܕ݇ܡܵܝܬܵܐ ܚܘܼܒܼܝܵܐ ܝܬܘܿܢ ܗ݇ܘܵܘ؛ ܐܝܼܢܵܐ ܐܵܕܝܼܵܐ ܒܲܗܪܵܐ ܝܬܘܿܢ ܒܡܵܪܲܢ. ܐܲܝܟܼ ܒܢܘܼܢܹ̈ܐ ܕܒܲܗܪܵܐ ܚܕܘܿܪܘܿܢ؛ 9ـ ܣܵܒܵܒ ܛܥܘܼܢܵܝܬܹ̈ܐ ܕܪܘܼܚܵܐ ܒܟܠܵܗ̇ ܛܵܒܼܬܵܐ ܝܢܵܐ؛ ܘܙܲܕܝܼܩܘܼܬܵܐ ܘܣܲܪܲܣܬܘܼܬܵܐ؛ 10ܘܗܵܘܝܼܬܘܿܢ ܒܸܦܪܵܫܵܐ ܡܘܼܕܝܼ ܝܠܹܗ ܫܵܦܝܼܪܵܐ ܩܵܕ݇ܡ ܡܵܪܲܢ. 11ܘܠܵܐ ܗܵܘܝܼܬܘܿܢ ܫܵܪ̈ܝܼܟܹܐ ܥܲܡ ܦܘܼܠܚܵܢܹ̈ܐ ܕܚܘܼܒܼܝܵܐ ܕܒܹܐ ܛܥܘܼܢܝܵܬܹ̈ܐ ܝܢܵܐ؛ ܐܸܠܵܐ ܡܒܵܕܵܠ ܕܗܵܕܵܐ؛ ܗܵܘܝܼܬܘܿܢ ܡܲܢܟܼܘܼܣܵܝ؛ 12ܣܵܒܵܒ ܡܸܢܕܝܼܵܢܹ̈ܐ ܕܒܛܸܫܘܵܐ ܥܒܼܝܼܕܹܐ ܝܢܵܐ؛ ܥܲܝܒܵܐ ܝܠܹܗ ܐܘܼܦ ܠܗܲܡܙܲܡܬܵܝܗܝ. 13ܐܝܼܢܵܐ ܟܠ ܡܸܢܕܝܼ ܟܲܕ ܦܵܝܸܫ ܡܘܼܢܟܼܸܣܵܐ؛ ܒܝܼܸܕ ܒܲܗܪܵܐ ܟܹܐ ܦܵܝܸܫ ܓܸܠܝܵܐ. ܣܵܒܵܒ ܟܠ ܡܸܢܕܝܼ ܕܝܼܠܹܗ ܓܸܠܝܵܐ؛ ܒܲܗܪܵܐ ܝܠܹܗ. 14ܣܵܒܵܒ ܕܐܵܗܵܐ ܐَܡܝܼܪܵܐ ܝܠܹܗ؛ ܪܥܘܿܫ؛ ܝܵܐ ܕܡܝܼܟܼܵܐ؛ ܘܩܘܼܡ݇ ܡ̣ܢ ܡܝܼܬܹ̈ܐ؛ ܘܒܸܬ ܒܲܗ݇ܪܸܢ ܐܸܠܘܼܟܼ ܡܫܝܼܚܵܐ. 15ܒܲܣ ܚܙܹܐܡܘܿܢ ܒܗܸܫܝܵܪܘܼܬܵܐ ܕܵܐܟܼܝܼ ܕܚܵܕܪܝܼܬܘܿܢ؛ ܠܵܐ ܐܲܝܟܼ ܣܲܟܼܠܹ̈ܐ؛ ܐܸܠܵܐ ܐܲܝܟܼ ܥܵܩܸܠܕܵܪܹ̈ܐ؛ 16ܒܸܙܒܼܵܢܵܐ ܦܸܪܣܲܬ؛ ܣܵܒܵܒ ܕܝܵܘܡܵܢܹ̈ܐ ܒܝܼܫܹ̈ܐ ܝܢܵܐ؛ 17ܣܵܒܵܒ ܕܐܵܗܵܐ ܠܵܐ ܗܵܘܝܼܬܘܿܢ ܟܝܼܡ ܚܝܼܵܠ؛ ܐܸܠܵܐ ܦܲܪܡܹܡܘܿܢ ܡܘܼܕܝܼ ܝܠܹܗ ܪܸܙܵܝܹܗ ܕܡܵܪܝܵܐ. 18ܘܠܵܐ ܗܵܘܝܼܬܘܿܢ ܒܸܪܘܵܝܵܐ ܒܚܲܡܪܵܐ؛ ܕܒܝܼܹܗ ܐܝܼܬ ܐܵܣܘܿܛܘܼܬܵܐ؛ ܐܸܠܵܐ ܦܘܼܫܘܿܢ ܡܸܠܝܹܐ ܡ̣ܢ ܪܘܼܚܵܐ؛ 19ܘܗܲܡܙܸܡܘܿܢ ܥܲܡ ܓܵܢܵܘܟܼܘܿܢ ܒܡܲܙܡܘܿܪܹ̈ܐ؛ ܘܒܬܸܫܒ̈ܚܵܬܵܐ؛ ܘܒܙܡܵܪ̈ܝܵܬܹܐ ܪ̈ܘܼܚܵܢܵܝܹܐ؛ ܫܵܒܘܿܚܹܐ ܘܒܸܙܡܵܪܵܐ ܒܠܸܒܵܘܵܬܵܘ̈ܟܼܘܿܢ ܠܡܵܪܝܵܐ. 20ܘܗܵܘܝܼܬܘܿܢ ܫܵܟܘܿܪܹܐ ܒܟܠ ܙܲܒܼܢܵܐ ܥܲܠ ܟܠܵܝܗܝ ܡܸܢܕܝܵܢܹ̈ܐ؛ ܒܫܸܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ؛ ܠܐܲܠܵܗܵܐ ܒܵܒܵܐ. 21ܘܗܵܘܝܼܬܘܿܢ ܙܲܒܛܘܼܢܹܐ ܓܵܢܵܘܟܼܘܿܢ ܚܲܕَ ܠܗ̇ܘ ܐَܚܹܪَܢܵܐ؛ ܒܙܕܘܼܥܬܹܗ ܕܡܫܝܼܚܵܐ. 22ܒܲܟܼܬܵܬܹ̈ܐ؛ ܙܲܒܛܸܢܝܼܬܘܿܢ ܓܵܢܵܘܟܼܘܿܢ ܠܓܲܒܼܪ̈ܵܢܵܘܟܼܘܿܢ؛ ܐܲܝܟܼ ܕܠܡܵܪܲܢ. 23ܣܵܒܵܒ ܓܲܒܼܪܵܐ ܪܹܫܵܐ ܕܒܲܟܼܬܵܐ ܝܠܹܗ؛ ܕܵܐܟܼܝܼ ܕܐܘܼܦ ܡܫܝܼܚܵܐ ܪܹܫܵܐ ܕܥܹܕܬܵܐ ܝܠܹܗ؛ ܘܗ̇ܘ ܝܼܠܹܗ ܡܲܚܝܼܵܢܵܐ ܕܦܲܓܼܪܵܐ. 24ܐܸܠܵܐ ܕܵܐܟܼܝܼ ܕܥܹܕܬܵܐ ܦܝܵܫܵܐ ܝَܠܵܗ̇ ܙܲܒܛ ܠܡܫܝܼܚܵܐ؛ ܗܲܕܟܼܵܐ ܐܘܼܦ ܒܲܟܼܬܵܬܹ̈ܐ ܠܓܲܒܼܪ̈ܵܢܵܝܗܝ ܒܟܠ ܡܸܢܕܝܼ. 25ܓܲܒܼܪܹ̈ܐ؛ ܡܲܚܸܒܘܿܢ ܠܒܲܟܼܬܵܬܵܘ̈ܟܼܘܿܢ؛ ܐܲܝܟܼ ܕܐܘܼܦ ܡܫܝܼܚܵܐ ܡܘܼܚܸܒܠܹܗ ܠܥܹܕܬܵܐ؛ ܘܓܵܢܹܗ ܣܘܼܦܝܵܐ ܠܹܗ ܒܚܵܬܸܪܵܗ̇؛ 26ܕܩܵܕܸܫ ܗ݇ܘܵܐ ܠܵܗ̇؛ ܘܕܵܟܹܐ ܗ݇ܘܵܐ ܠܵܗ̇ ܒܣܚܵܝܬܵܐ ܕܡ̈ܝܼܵܐ ܒܗܹܡܸܙܡܵܢ؛ 27ܕܡܲܩܸܡ ܗ݇ܘܵܐ ܠܵܗ̇ ܠܓܵܢܹܗ ܥܹܕܬܵܐ ܚܩܝܼܪܬܵܐ؛ ܕܠܲܝܬ ܒܝܼܵܗ̇ ܡܘܼܡܵܐ؛ ܘܠܵܐ ܩܲܪܡܲܟ̰ܬܵܐ؛ ܘܠܵܐ ܡܸܢܕܝܼ ܕܐܸܠܵܝܗܝ ܕܵܡܹܐ؛ ܐܸܠܵܐ ܕܗܵܘܝܵܐ ܩܲܕܝܼܫܬܵܐ ܕܠܵܐ ܡܘܼܡܵܐ. 28ܗܲܕܟܼܵܐ ܘܵܓ̰ܸܒ ܝܼܠܵܗ̇ ܠܓܲܒܼܪܹ̈ܐ ܕܡܲܚܸܒܝܼ ܒܲܟܼܬܵܬܹ̈ܐ ܕܓܵܢܵܝܗܝ ܐܲܝܟܼ ܕܠܦܲܓܼܪܹ̈ܐ ܕܓܵܢܵܝܗܝ. ܗ̇ܘ ܕܡܲܚܸܒ ܠܒܲܟܼܬܵܐ ܕܓܵܢܹܗ؛ ܠܓܵܢܹܗ ܡܲܚܘܼܒܹܐ ܝܠܹܗ. 29ܣܵܒܵܒ ܐ݇ܢܵܫܵܐ ܗܲܪ ܠܹܐ ܣܵܢܹܐ ܠܦܲܓܼܪܹܗ؛ ܐܸܠܵܐ ܟܹܐ ܬܲܪܣܹܐ ܠܹܗ؛ ܘܟܹܐ ܐܵܟܼܸܠ ܚܲܡ ܕܝܼܹܗ؛ ܐܲܝܟܼ ܕܐܘܼܦ ܡܫܝܼܚܵܐ ܕܥܹܕܬܵܐ؛ 30ܣܵܒܵܒ ܗܲܕܵܡܹ̈ܐ ܕܦܲܓܼܪܹܗ ܝܘܵܚ؛ ܘܡ̣ܢ ܒܸܣܪܹܗ ܝܘܵܚ ܘܡ̣ܢ ܓܲܪܡܘܼܗܝ. 31ܣܵܒܵܒ ܕܐܵܗܵܐ ܒܸܬ ܫܵܒܼܸܩ ܐ݇ܢܵܫܵܐ ܠܒܵܒܹܗ ܘܠܝܸܡܹܗ ܘܒܸܬ ܬܲܒܸܥ ܠܒܲܟܼܬܹܗ؛ ܘܒܸܬ ܗܵܘܝܼ ܬܸܪ̈ܘܵܝܗܝ ܚܲܕ݇ ܒܸܣܪܵܐ. 32ܐܵܗܵܐ ܣܸܪ ܓܘܼܪܵܐ ܝܠܹܗ. ܐܝܼܢܵܐ ܐܵܢܵܐ ܒܹܐܡܵܪܵܐ ܝܘܸܢ ܒܵܗ݇ܣ ܕܡܫܝܼܚܵܐ ܘܒܵܗ݇ܣ ܕܥܹܕܬܹܗ. 33ܐܝܼܢܵܐ ܐܘܼܦ ܐܲܚܬܘܿܢ ܟܠ ܚܲܕَ ܚܲܕَ ܡܸܢܵܘܟܼܘܿܢ ܗܲܕܟܼܵܐ ܡܲܚܸܒ ܠܒܲܟܼܬܵܐ ܕܓܵܢܹܗ ܐܲܝܟܼ ܕܠܓܵܢܹܗ؛ ܐܝܼܢܵܐ ܒܲܟܼܬܵܐ ܗܵܘܝܵܐ ܒܸܙܕܲܥܝܵܐ ܡ̣ܢ ܓܲܒܼܪܘܼܗ̇.