1ܡܐܵܕܝܼܵܐ ܐܵܚܘܿܢܘܵܬܝܼ̈ ܣܵܘܓܘܿܠܹ̈ܐ ܘܡܘܼܚܸܒܹ̈ܐ؛ ܚܲܕܘܼܬܝܼ ܘܟܠܝܼܠܝܼ؛ ܗܲܕܟܼܵܐ ܟܠܹܝܡܘܿܢ ܒܡܵܪܲܢ؛ ܡܘܼܚܸܒܝܼ̈. 2ܦܲܪܦܘܼܠܹܐ ܝܘܸܢ ܒܐܹܘܗܵܕܝܼܵܐ؛ ܘܦܲܪܦܘܼܠܹܐ ܝܘܸܢ ܒܣܘܼܢܛܹܟܹܐ؛ ܕܚܲܕَ ܚܝܼܵܠ ܗܵܘܹܐ ܠܗ݇ܘܿܢ ܒܡܵܪܲܢ. 3ܦܲܪܦܘܼܠܹܐ ܝܘܸܢ ܐܘܼܦ ܒܝܼܘܟܼ؛ ܒܲܪ ܙܵܘܓܝܼ ܫܲܪܝܼܪܵܐ؛ ܕܗܵܘܸܬ ܗܲܝܘܼܪܵܝ ܐܵܢܝܼ ܒܲܟܼܬܵܬܹ̈ܐ ܕܓ̰ܹܗ݇ܠܘܿܢ ܥܲܡܝܼ ܒܐܹܘܵܢܓܵܠܝܼܘܿܢ؛ ܥܲܡ ܩܠܹܡܝܼܣ؛ ܘܥܲܡ ܗܲܝܸܪ̈ܵܢܝܼ ܐܚܹܪ݇ܢܹܐ؛ ܐܵܢܝܼ ܕܫܸܡܵܢܵܝ̈ܗܝ ܒܟܬܵܒܼܵܐ ܕܚܲܝܹ̈ܐ ܝܢܵܐ. 4ܚܕܹܡܘܿܢ ܒܡܵܪܲܢ ܒܟܠ ܙܲܒܼܢܵܐ؛ ܘܡܸܢَܕܪܸܫَ ܒܹܐܡܵܪܵܐ ܝܘܸܢ؛ ܚܕܹܡܘܿܢ. 5ܡܵܟܝܼܟܼܘܼܬܵܘܟܼܘܿܢ ܦܵܝܫܵܐ ܝܕܥܝܼܬܵܐ ܠܟܸܣ ܟܠ ܐ݇ܢܵܫܵܐ. ܡܵܪܲܢ ܩܘܼܪܒܵܐ ܝܠܹܗ. 6ܡܸܢܕܝܼ ܠܵܐ ܐܵܟܼܠܝܼܬܘܿܢ ܚܲܡ؛ ܐܸܠܵܐ ܒܟܠ ܙܲܒܼܢܵܐ ܒܨܠܘܿܬܵܐ ܘܒܒܵܥܘܼܬܵܐ ܘܥܲܡ ܫܵܟܲܪܬܵܐ ܦܲܪ̈ܦܲܠܝܵܬܵܘܟܼܘܿܢ ܦܵܝܫܝܼ ܝܕܸܥܝܹܐ ܩܵܕ݇ܡ ܐܲܠܵܗܵܐ. 7ܫܠܵܡܹܗ ܕܐܲܠܵܗܵܐ ܗ̇ܘ ܕܝܼܠܹܗ ܓܘܼܪܵܐ ܡ̣ܢ ܟܠܵܗ̇ ܦܲܪܡܵܝܬܵܐ؛ ܒܸܬ ܢܵܛܸܪ ܠܠܸܒܵܘܵܬܵܘ̈ܟܼܘܿܢ ܘܚܝܼܵܠܵܘ̈ܟܼܘܿܢ ܒܝܼܫܘܿܥ ܡܫܝܼܚܵܐ. 8ܡܐܵܕܝܼܵܐ ܐܵܚܘܿܢܘܵܬܝܼ̈ ܐܵܢܝܼ ܡܸܢܕܝܵܢܹ̈ܐ ܕܝܼܢܵܐ ܣܲܪܲܣܬ؛ ܐܵܢܝܼ ܕܝܼܢܵܐ ܡܝܘܼܩܪܹ̈ܐ؛ ܐܵܢܝܼ ܕܝܼܢܵܐ ܗܲܩ؛ ܐܵܢܝܼ ܕܝܼܢܵܐ ܕܸܟܼܝܹ̈ܐ؛ ܐܵܢܝܼ ܕܝܼܢܵܐ ܡܘܼܚܸܒܹܐ؛ ܐܵܢܝܼ ܕܝܼܢܵܐ ܚܩܝܼܪܹܐ؛ ܐܸܢ ܐܝܼܬ ܕܛܵܒܼܬܵܐ؛ ܐܸܢ ܐܝܼܬ ܕܐܝܼܩܵܪܵܐ؛ ܐܲܢܹܐ ܚܫܘܿܒܼܘܿܢ. 9ܐܵܢܝܼ ܕܝܠܸܦܠܵܘܟܼܘܿܢ ܘܩܘܼܒܸܠܵܘܟܼܘܿܢ ܘܫܡܸܥܠܵܘܟܼܘܿܢ ܘܚܙܹܠܵܘܟܼܘܿܢ ܒܝܼܝܼ؛ ܐܲܢܹܐ ܦܠܘܿܚܘܿܢ. ܘܐܲܠܵܗܵܐ ܕܫܠܵܡܵܐ ܒܸܬ ܗܵܘܹܐ ܥܲܡܵܘܟܼܘܿܢ. 10ܐܝܼܢܵܐ ܪܵܒܵܐ ܚܕܹܠܝܼ ܒܡܵܪܲܢ؛ ܕܐܵܕܝܼܵܐ ܒܚܲܪܬܵܐ ܫܘܼܪܸܠܵܘܟܼܘܿܢ ܠܹܐܟܼܵܠܵܐ ܚܲܡ ܕܝܼܝܼ؛ ܕܵܐܟܼܝܼ ܕܐܘܼܦ ܐَܟܼܸܠܵܘܟܼܘܿܢ ܚܲܡ؛ ܐܝܼܢܵܐ ܠܲܝܬ ܗ݇ܘܵܐ ܠܵܘܟܼܘܿܢ ܦܸܪܣܲܬ. 11ܐܝܼܢܵܐ ܠܹܐ ܝَܠܵܗ̇ ܣܵܒܵܒ ܕܣܢܸܩܠܝܼ ܒܹܐܡܵܪܵܐ ܝܘܸܢ؛ ܣܵܒܵܒ ܐܵܢܵܐ ܝܠܝܼܦܵܐ ܝܘܸܢ ܕܡܵܠܹܐ ܠܝܼ ܗ̇ܘ ܡܸܢܕܝܼ ܕܐܝܼܬ ܠܝܼ. 12ܒܝܼܕܲܥܝܵܐ ܝܘܸܢ ܕܦܵܝܫܸܢ ܡܘܼܡܟܸܟܼܵܐ ܘܒܝܼܕܲܥܝܵܐ ܝܘܸܢ ܐܘܼܦ ܕܙܵܝܕܸܢ؛ ܒܟܠ ܕܘܼܟܵܐ ܘܒܟܠ ܡܸܢܕܝܼ ܝܠܝܼܦܵܐ ܝܘܸܢ ܐܘܼܦ ܠܸܣܒܼܲܥܝܵܐ ܐܘܼܦ ܠܸܟܦܵܢܵܐ؛ ܠܸܗ݇ܘܵܝܵܐ ܒܦܸܪܝܘܼܬܵܐ ܘܒܒܵܨܘܿܪܘܼܬܵܐ. 13ܟܠ ܡܸܢܕܝܼ ܟܹܐ ܡܵܨܹܐ ܒܗ̇ܘ ܕܚܲܠܘܼܢܝܼ ܝܠܹܗ. 14ܐܝܼܢܵܐ ܫܵܦܝܼܪܵܐ ܥܒܸܕܠܵܘܟܼܘܿܢ ܕܫܘܼܪܸܟܠܵܘܟܼܘܿܢ ܒܐܘܼܠܨܵܢܝܼ̈. 15ܘܒܝܼܕܲܥܝܵܐ ܝܬܘܿܢ ܐܘܼܦ ܐܲܚܬܘܿܢ؛ ܦܝܼܠܝܼܦܸܣܵܝܹ̈ܐ؛ ܕܒܫܵܪܵܝܬܵܐ ܕܡܲܫܚܲܕܬܵܐ؛ ܟܲܕ ܦܠܸܛܠܝܼ ܡ̣ܢ ܡܵܩܕܘܿܢܝܼܵܐ؛ ܐܘܼܦ ܚܕܵܐ ܡ̣ܢ ܥܹܕܵܬܹ̈ܐ ܠܵܐ ܫܘܼܪܸܟܠܵܐ ܥܲܡܝܼ ܒܫܘܼܠܵܐ ܕܝܵܗ݇ܒܼܵܐ ܘܩܵܒܘܿܠܹܐ؛ ܐܸܠܵܐ ܗܲܪ ܐܲܚܬܘܿܢ؛ 16ܣܵܒܵܒ ܐܘܼܦ ܠܬܹܣܵܠܘܿܢܝܼܩܹܐ ܚܕܵܐ ܓܵܗܵܐ ܘܬܲܪ̈ܬܹܝ ܫܘܼܕܸܪܵܘܟܼܘܿܢ ܠܣܢܝܼܩܘܼܬܝܼ. 17ܠܹܐ ܝَܠܵܗ̇ ܕܚܲܠܥܲܬ ܒܸܒܲܥܝܵܐ ܝܘܸܢ؛ ܐܸܠܵܐ ܒܸܒܲܥܝܵܐ ܝܘܸܢ ܕܛܘܥܘܼܢܝܵܬܹ̈ܐ ܙܵܝܕܝܼ ܠܚܸܫܒܘܼܢܵܘܟܼܘܿܢ. 18ܟܠ ܡܸܢܕܝܼ ܐܝܼܬ ܠܝܼ؛ ܘܙܵܘܕܵܐ ܝܠܹܗ ܐܸܠܝܼ؛ ܘܡܸܠܝܵܐ ܝܘܸܢ ܟܲܕ ܩܘܼܒܸܠܝܼ ܐܵܢܝܼ ܡܸܢܕܝܵܢܹ̈ܐ ܕܡܸܢܵܘܟܼܘܿܢ ܒܝܼܸܕ ܐܵܦܵܦܘܿܕܝܼܛܘܿܣ؛ ܪܹܝܚܵܐ ܒܵܣܝܼܡܵܐ ܘܕܸܒܼܚܵܐ ܩܘܼܒܠܵܐ؛ ܫܵܦܪܵܢܵܐ ܠܐܲܠܵܗܵܐ. 19ܘܐܲܠܵܗܝܼ ܒܸܬ ܡܵܠܹܐ ܟܠܵܗ̇ ܣܢܝܼܩܘܼܬܵܘܟܼܘܿܢ ܐܲܝܟܼ ܕܵܘܸܠܬܹܗ ܒܚܸܩܪܵܐ ܒܝܼܫܘܿܥ ܡܫܝܼܚܵܐ. 20ܐܝܼܢܵܐ ܠܐܲܠܵܗܵܐ ܒܵܒܲܢ ܚܸܩܪܵܐ ܠܥܵܠܲܡ ܥܵܠܡܝܼܢ؛ ܐܵܡܹܝܢ. 21ܗܲܒ݇ܠܘܿܢ ܫܠܵܡܵܐ ܠܟܠܵܝܗܝ ܩܲܕܝܼܫܹ̈ܐ ܕܒܝܼܫܘܿܥ ܡܫܝܼܚܵܐ. ܒܝܼܵܗ݇ܒܼܵܐ ܝܢܵܐ ܫܠܵܡܵܐ ܐܸܠܵܘܟܼܘܿܢ ܐܵܚܘܿܢܘܵܬܹ̈ܐ ܕܝܼܢܵܐ ܥܲܡܝܼ. 22ܒܝܼܵܗ݇ܒܼܵܐ ܝܢܵܐ ܫܠܵܡܵܐ ܐܸܠܵܘܟܼܘܿܢ ܟܠܵܝܗܝ ܩܲܕܝܼܫܹ̈ܐ؛ ܒܘܼܫ ܙܵܘܕܵܐ ܐܵܢܝܼ ܕܡ̣ܢ ܒܲܝܬܹܗ ܕܩܹܣܲܪ. 23ܫܵܦܵܩܲܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܥܲܡ ܟܠܵܘܟܼܘܿܢ؛ ܐܵܡܹܝܢ.