1ܘܟܠܹܐܠܹܗ ܥܲܠ ܣܹܠܵܐ ܕܝܵܡܵܐ. ܘܚܙܹܠܝܼ ܕܐَܣܸܩܠܹܗ ܕܵܒܵܐ ܡ̣ܢ ܝܵܡܵܐ؛ ܕܐܝܼܬ ܠܹܗ ܥܸܣܪܵܐ ܩܵܪ̈݇ܢܵܢܹܐ؛ ܘܫܲܒܼܥܵܐ ܪܹ̈ܫܵܢܹܐ؛ ܘܥܲܠ ܩܵܪ̈݇ܢܵܢܘܼܗܝ ܥܸܣܪܵܐ ܬܵܐܓ̰ܹ̈ܐ؛ ܘܥܲܠ ܪܹ̈ܫܵܢܘܼܗܝ ܫܸܡܵܢܹ̈ܐ ܕܓܘܼܕܵܦܵܐ. 2ܘܕܵܒܵܐ؛ ܗ̇ܘ ܕܚܙܹܠܝܼ؛ ܟܹܐ ܕܵܡܹܐ ܗ݇ܘܵܐ ܠܢܸܡܪܵܐ؛ ܘܐܲܩܠܘܼ̈ܗܝ ܐܲܝܟܼ ܕܕܸܒܵܐ؛ ܘܦܘܼܡܹܗ ܐܲܝܟܼ ܦܘܼܡܵܐ ܕܐܲܪܝܵܐ؛ ܘܝܘܼܗَܒܼܸܠܹܗ ܐܸܠܹܗ ܗ̇ܘ ܬܵܢܝܼܢܵܐ ܚܲܝܠܹܗ ܘܬܪܘܿܢܘܿܣܹܗ ܘܗܘܼܟܡܵܐ ܓܘܼܪܵܐ. 3ܘܚܙܹܠܝܼ ܚܲܕَ ܡ̣ܢ ܪܹ̈ܫܵܢܹܐ ܕܝܼܹܗ ܐܲܝܟܼ ܦܪܝܼܡܵܐ ܠܡܵܘܬܵܐ؛ ܘܡܚܘܼܬܵܐ ܕܡܵܘܬܵܐ ܕܝܼܹܗ ܒܣܸܡܠܵܐ. ܘܥܓ̰ܸܒܠܵܐ ܟܠܵܗ̇ ܐܲܪܥܵܐ ܒܵܬ݇ܪ ܕܗ̇ܘ ܕܵܒܵܐ؛ ܘܣܓܼܸܕܠܘܿܢ ܠܬܵܢܝܼܢܵܐ؛ ܣܵܒܵܒ ܕܝܸܗܒܼܸܠܹܗ ܗܘܼܟܡܵܐ ܠܗ̇ܘ ܕܵܒܵܐ؛ ܘܣܓܸܕܠܘܿܢ ܠܗ̇ܘ ܕܵܒܵܐ ܟܲܕ ܐܵܡܪܝܼ؛ ܡܵܢܝܼ ܟܹܐ ܕܵܡܹܐ ܠܕܵܒܵܐ؛ ܡܵܨܹܐ ܠܸܦܠܵܫܵܐ ܥܲܡܹܗ؛ 5ܘܦܸܫܠܹܗ ܝܘܼܗ݇ܒܼܵܐ ܐܸܠܹܗ ܦܘܼܡܵܐ ܕܗܲܡܙܸܡ ܫܘܼܠܹ̈ܐ ܓܘܼܪܹ̈ܐ ܘܓܘܼܕܵܦܹ̈ܐ؛ ܘܦܸܫܠܹܗ ܝܘܼܗ݇ܒܼܵܐ ܐܸܠܹܗ ܗܘܼܟܡܵܐ ܠܸܥܒܼܵܕܵܐ ܐܲܪܒܥܝܼ ܘܬܪܹܝ ܝܲܪ̈ܚܹܐ. 6ܘܦܬܸܚܠܹܗ ܦܘܼܡܹܗ ܠܓܘܼܕܵܦܵܐ ܥܲܠ ܐܲܠܵܗܵܐ؛ ܠܸܓܕܵܦܵܐ ܠܫܸܡܹܗ؛ ܘܠܡܵܫܸܟܢܹܗ؛ ܘܠܐܲܢܹܐ ܕܒܫܡܲܝܵܐ ܫܵܪܝܼ. 7ܘܦܸܫܠܹܗ ܝܘܼܗ݇ܒܼܵܐ ܐܸܠܹܗ ܗܘܼܟܡܵܐ ܥܲܠ ܟܠ ܐܘܼܓ̰ܵܓܼ؛ ܘܛܵܝܸܦܵܐ؛ ܘܠܸܫܵܢܵܐ؛ ܘܡܸܠܲܬ. ܘܦܸܫܠܹܗ ܝܘܼܗ݇ܒܼܵܐ ܐܸܠܹܗ ܠܸܥܒܼܵܕܵܐ ܦܠܵܫܵܐ ܥܲܠ ܩܲܕܝܼܫܹ̈ܐ ܘܠܸܓܼܠܵܒܵܝ. 8ܘܒܸܬ ܣܵܓܼܕܝܼ ܐܸܠܹܗ ܟܠܵܝܗܝ ܐܵܢܝܼ ܕܒܸܥܡܵܪܵܐ ܝܢܵܐ ܥܲܠ ܐܲܪܥܵܐ؛ ܐܵܢܝܼ ܕܠܹܐ ܝܠܹܗ ܟܬܝܼܒܼܵܐ ܫܸܡܵܝ ܓܵܘ ܟܬܵܒܼܵܐ ܕܚܲܝܹ̈ܐ ܕܗ̇ܘ ܦܹܪܵܐ ܦܪܝܼܡܵܐ ܡ̣ܢ ܒܸܢܝܲܬܹ̈ܗ ܕܥܵܠܡܵܐ. 9ܐܸܢ ܐ݇ܢܵܫܵܐ ܐܝܼܬ ܠܹܗ ܢܵܬܝܵܬܹ̈ܐ؛ ܫܲܡܸܥ. 10ܐܸܢ ܐ݇ܢܵܫܵܐ ܒܣܠܵܒܵܐ ܠܵܒܸܠ؛ ܒܣܠܵܒܵܐ ܒܸܬ ܐܵܙܸܠ؛ ܐܸܢ ܐ݇ܢܵܫܵܐ ܒܣܲܝܦܵܐ ܩܵܛܸܠ؛ ܘܵܓ̰ܸܒ ܝܼܠܵܗ̇ ܕܒܣܲܝܦܵܐ ܦܵܝܸܫ ܩܛܝܼܠܵܐ. ܠܲܐܟܼܵܐ ܝَܠܵܗ̇ ܚܡܵܠܬܵܐ ܘܗܲܝܡܵܢܘܼܬܵܐ ܕܩܲܕܝܼܫܹ̈ܐ. 11ܘܚܙܹܠܝܼ ܚܲܕَ ܕܵܒܵܐ ܐَܚܹܪَܢܵܐ ܕܒܹܐܣܵܩܵܐ ܡ̣ܢ ܐܲܪܥܵܐ؛ ܘܐܝܼܬ ܗ݇ܘܵܘ ܠܹܗ ܬܲܪ̈ܬܹܝ ܩܵܪ̈݇ܢܵܢܹܐ ܕܕܵܡܝܼ ܗ݇ܘܵܘ ܠܐܵܢܝܼ ܕܚܲܕَ ܦܹܪܵܐ؛ ܘܗܲܡܙܸܡ ܗ݇ܘܵܐ ܐܲܝܟܼ ܬܵܢܝܼܢܵܐ. 12ܘܒܸܥܒܼܵܕܵܐ ܝܠܹܗ ܩܵܕ݇ܡܘܼܗܝ ܟܠܹܗ ܗܘܼܟܡܵܐ ܕܕܵܒܵܐ ܩܵܕ݇ܡܵܝܵܐ؛ ܘܒܸܥܒܼܵܕܵܐ ܝܠܹܗ ܠܐܲܪܥܵܐ ܘܠܐܵܢܝܼ ܕܒܸܥܡܵܪܵܐ ܝܢܵܐ ܓܵܘܵܗ̇ ܕܣܵܓܼܕܝܼ ܠܕܵܒܵܐ ܩܵܕ݇ܡܵܝܵܐ؛ ܗ̇ܘ ܕܒܣܸܡܠܵܐ ܡܚܘܼܬܵܐ ܕܡܵܘܬܹܗ. 13ܒܸܥܒܼܵܕܵܐ ܝܠܹܗ ܢܝܼܫܲܢܩܹ̈ܐ ܓܘܼܪܹ̈ܐ؛ ܕܵܐܟܼܝܼ ܕܐܘܼܦ ܢܘܼܪܵܐ ܒܸܬ ܥܵܒܸܕ ܠܸܨܠܵܝܵܐ ܡ̣ܢ ܫܡܲܝܵܐ ܥܲܠ ܐܲܪܥܵܐ ܩܵܕ݇ܡ ܒܢܲܝ̈ܢܵܫܵܐ. 14ܘܟܹܐ ܡܲܚܠܸܛ ܠܐܵܢܝܼ ܕܒܸܥܡܵܪܵܐ ܝܢܵܐ ܥܲܠ ܐܲܪܥܵܐ ܣܵܒܵܒ ܕܥܵܓ̰ܸܒܘ̈ܵܬܵܐ ܕܦܸܫܠܗَܘܿܢ ܝܘܼܗ݇ܒܼܹܐ ܐܸܠܹܗ ܠܸܥܒܼܵܕܵܐ ܩܵܕ݇ܡ ܕܵܒܵܐ؛ ܒܹܐܡܵܪܵܐ ܠܐܵܢܝܼ ܕܥܵܡܪܝܼ ܥܲܠ ܐܲܪܥܵܐ؛ ܕܥܵܒܼܕܝܼ ܨܲܠܡܵܐ ܠܗ̇ܘ ܕܵܒܵܐ ܕܐܝܼܬ ܗ݇ܘܵܐ ܠܹܗ ܡܚܘܼܬܵܐ ܕܣܲܝܦܵܐ؛ ܘܚܹܝܠܹܐ. 15ܘܦܸܫܠܹܗ ܝܘܼܗ݇ܒܼܵܐ ܐܸܠܹܗ ܠܝܼܵܗ݇ܒܼܵܐ ܢܵܦܵܣ ܠܨܲܠܡܵܐ ܕܕܵܒܵܐ؛ ܕܨܲܠܡܵܐ ܕܕܵܒܵܐ ܐܘܼܦ ܗܲܡܙܸܡ ܘܐܘܼܦ ܥܵܒܸܕ ܕܟܠܵܝܗܝ ܐܵܢܝܼ ܕܠܵܐ ܣܵܓܼܕܝܼ ܠܗ̇ܘ ܨܲܠܡܵܐ ܕܕܵܒܵܐ؛ ܦܵܝܫܝܼ ܩܛܝܼܠܹܐ. 16ܘܒܸܬ ܥܵܒܸܕ ܠܟܠܵܝܗܝ؛ ܠܙܥܘܿܪܹ̈ܐ ܘܠܓܘܼܪܹ̈ܐ؛ ܘܠܕܵܘܠܲܬܡܲܢܕܹ̈ܐ ܘܠܡܸܣܟܹܢܹ̈ܐ؛ ܘܠܵܐܙܵܕܹ̈ܐ ܘܠܩܘܼ̈ܠܹܐ؛ ܕܦܵܝܸܫ ܝܘܼܗ݇ܒܼܵܐ ܐܸܠܵܝܗܝ ܪܘܼܫܡܵܐ ܥܲܠ ܐܝܼܕܵܬܵܝ̈ܗܝ ܕܝܲܡܝܼܢܵܐ؛ ܝܲܢ ܥܲܠ ܩܸܨܵܝ̈. 17ܘܕܐ݇ܢܵܫܵܐ ܠܵܐ ܡܵܨܹܐ ܙܵܒܼܸܢ ܘܙܵܒܸ̇ܢ؛ ܐܸܠܵܐ ܗ̇ܘ ܕܐܝܼܬ ܠܹܗ ܪܘܼܫܡܵܐ ܫܸܡܵܐ ܕܗ̇ܘ ܕܵܒܵܐ؛ ܝܲܢ ܡܸܢܝܵܢܵܐ ܕܫܸܡܹܗ. 18ܠܲܐܟܼܵܐ ܐܝܼܬ ܥܵܩܸܠܕܵܪܘܼܬܵܐ. ܗ̇ܘ ܕܐܝܼܬ ܠܹܗ ܗܵܘܢܵܐ؛ ܚܲܫܒܸܢ ܠܡܸܢܝܵܢܵܐ ܕܕܵܒܵܐ؛ ܣܵܒܵܒ ܡܸܢܝܵܢܵܐ ܕܒܲܪܢܵܫܵܐ ܝܠܹܗ. ܘܡܸܢܝܵܢܹܗ؛ ܐܸܫܸܬܡܵܐܐ ܘܐܸܫܬܝܼ ܘܐܸܫܬܵܐ ܝܠܹܗ.