0:00
/
1ܒܗ̇ܝ ܕܪܵܒܵܐ ܒܣܸܡܠܵܐ ܠܗَܘܿܢ ܕܟܵܬܒܝܼ ܬܲܫܥـܝܵܬܹ̈ܐ ܒܘܼܬ ܕܦܘܼܠܚܵܢܹ̈ܐ ܐܲܝܢܝܼ ܕܐܲܚܢܲܢ ܒܵܠܲܕ ܝܘܵܚ ܒܝܼܝܵܗܝ. 2ܕܵܐܟ̣ܝܼ ܕܣܘܼܦܹܠܗܘܿܢ ܒܝܲܢ ܐܵܢܝܼ ܕܡ̣ܢ ܩܵܕَܡܵܝܬܵܐ ܗَܘܹܐܠܗَܘܿܢ ܚܵܙܝܵܢܹ̈ܐ ܘܚܸܠܡܲܬܟܵܪܹ̈ܐ ܕܗܹܡܸܙܡܵܢ. 3ܦܝܼܫܠܹܗ ܚܸܙܝܵܐ ܐܘܼܦ ܐܸܠܝܼ، ܣܵܒܵܒ ܕܡ̣ܢ ܩܵܕَܡܵܝܬܵܐ ܩܘܼܪܒܵܐ ܗܘܹܐܠܝܼ ܒܚܲܡܚܘܵܪܘܼܬܵܐ ܠܟܠܵܝܗܝ: ܕܟܠ ܡܸܢܕܝܼ ܕܒܪܹܐܙܵܐ ܟܵܬܒܸܢܘܼܟܼ: ܝܵܐ ܢܲܨܝܼܚܵܐ ܬܹܐܘܿܦܝܼܠܲܐ. 4ܕܝܵܕܥܸܬ ܫܲܪܝܼܪܘܼܬܵܐ ܕܐܵܢܝܼ ܗܹܡܸܙܡܵܢܹ̈ܐ ܕܦܸܫܠܘܼܟܼ ܬܘܼܠܡܸܕܵܐ ܐܸܠܵܝܗܝ. 5ܗَܘܹܐܠܹܗ ܒܝܵܘܡܵܢܹ̈ܐ ܕܗܹܪܘܿܕܸܣ: ܡܲܠܟܵܐ ܕܝܼܗܘܼܕܵܐ: ܚܲܕَ ܟܵܗܢܵܐ ܕܫܸܡܹܗ ܙܟܲܪܝܵܐ: ܡ̣ܢ ܚܸܠܡܲܬ ܕܒܹܝܬ ܐܲܒ̣ܝܼܵܐ: ܘܒܲܟ̣ܬܹܗ ܡ̣ܢ ܒܢܵܬܹ̈ܐ ܕܐܲܗܪܘܿܢ: ܫܸܡܵܗ̇ ܗ݇ܘܵܐ ܐܹܠܝܼܫܒܲܥ. 6ܘܬܸܪܘܸܢܬܵܝ ܙܲܕܝܼܩܹ̈ܐ ܗ݇ܘܵܘ ܩܵܕَܡ ܐܲܠܵܗܵܐ: ܒܸܚܕܵܪܵܐ ܒܟܠܵܝܗܝ ܦܘܼܩܕܵܢܹ̈ܐ ܘܩܵܢܘܿܢܹ̈ܐ ܕܡܵܪܝܵܐ ܕܠܵܐ ܠܵܘܡܵܐ. 7ܐܝܼܢܵܐ ܝܵܠܵܕَܐ ܠܲܝܬ ܗ݇ܘܵܐ ܠܗ݇ܘܿܢ: ܣܵܒܵܒ ܐܹܠܝܼܫܒܲܥ ܥܩܲܪܬܵܐ ܗ݇ܘܵܐ: ܘܬܸܪܘܸܢܬܵܝ ܪܵܒܵܐ ܗ݇ܘܵܘ ܒܝܵܘܡܵܢܵܝ̈ܗܝ. 8ܘܗَܘܹܐ ܠܵܗ̇ ܕܟܲܕ ܒܸܥܒ̣ܵܕܵܐ ܗ݇ܘܵܐ ܟܵܗܢܘܼܬܵܐ ܒܛܲܟ̣ܣܵܐ ܕܚܸܠܡܲܬܹܗ ܩܵܕَܡ ܐܲܠܵܗܵܐ. 9ܒܥܵܕܲܬ ܕܟܵܗܢܘܼܬܵܐ ܡܛܹܠܵܗ̇ ܐܸܠܹܗ ܕܡܵܩܸܕ ܒܸܣܡܹ̈ܐ: ܘܥܒܼܸܪܹܗ ܠܗܲܝܟܠܹܗ ܕܡܵܪܝܵܐ. 10ܘܟܠܵܗ̇ ܓ̰ܲܡܵܥܲܬ ܕܛܵܝܸܦܵܐ ܨܵܠܘܿܝܹܐ ܗ݇ܘܵܐ ܠܒܲܕܲܪ ܒܥܕܵܢܵܐ ܕܒܸܣܡܹ̈ܐ. 11ܘܦܸܫܠܹܗ ܚܸܙܝܵܐ ܐܸܠܹܗ ܡܲܠܲܐܟ̣ܵܐ ܕܡܵܪܝܵܐ: ܕܟܸܠܝܵܐ ܡ̣ܢ ܝܲܡܝܼܢܵܐ ܕܡܲܕܒܚܵܐ ܕܒܸܣܡܹ̈ܐ. 12ܘܦܸܫܠܹܗ ܫܓ̣ܝܼܫܵܐ ܙܟܲܪܝܵܐ ܟܲܕ ܚܙܹܐܠܹܗ: ܘܙܕܘܿܥܬܵܐ ܢܦܸܠܵܗ̇ ܥܲܠܘܼܗܝ. 13ܘܐَܡܝܼܪܹܗ ܐܸܠܹܗ ܡܲܠܲܐܟ̣ܵܐ: ܠܵܐ ܙܵܕܥܸܬ: ܙܟܲܪܝܵܐ: ܣܵܒܵܒ ܕܦܸܫܠܵܗ̇ ܫܡܥܝܼܬܵܐ ܦܲܪܦܲܠܬܘܼܟ: ܘܒܲܟ̣ܬܘܼܟ ܐܹܠܝܼܫܒܲܥ ܒܸܬ ܝܵܠܕܵܗ̇ ܠܘܼܟܼ ܒܪܘܿܢܵܐ: ܘܒܸܬ ܩܵܪܸܬ ܫܸܡܹܗ: ܝܘܿܚܲܢܵܢ. 14ܘܒܸܬ ܗܵܘܝܵܐ ܠܘܼܟܼ ܚܲܕܘܼܬܵܐ ܘܦܨܵܚܵܐ: ܘܪܵܒܵܐ ܒܸܬ ܚܵܕܝܼ ܒܗَܘܵܝܬܹܗ. 15ܣܵܒܵܒ ܕܒܸܬ ܗܵܘܹܐ ܓܘܼܪܵܐ ܩܵܕَܡ ܡܵܪܝܵܐ: ܘܚܲܡܪܵܐ ܘܥܵܪܵܩ ܠܹܐ ܫܵܬܹܗ: ܘܒܸܬ ܦܵܐܹܫ ܡܸܠܝܵܐ ܪܘܼܚܵܐ ܕܩܘܼܕܫܵܐ: ܗܲܪ ܡ̣ܢ ܟܹܪَܣܵܐ ܕܝܸܡܹܗ. 16ܘܪܵܒܵܐ ܡ̣ܢ ܒܢܲܝ̈ ܝܼܣܪܵܝܹܠ ܒܸܬ ܡܲܕܸܪ ܠܟܸܣ ܡܵܪܝܵܐ ܐܲܠܵܗܵܝܗܝ. 17ܘܗ̇ܘ ܒܸܬ ܐܵܙܸܠ ܩܵܕَܡܘܼܗܝ ܒܪܘܼܚܵܐ ܘܒܚܲܝܠܵܐ ܕܐܹܠܝܼܵܐ: ܕܡܲܕܸܪ ܠܸܒܵܘܵܬܹ̈ܐ ܕܐܲܒ̣ܵܗܹ̈ܐ ܠܒܢܘܿܢܹ̈ܐ: ܘܠܐܵܢܝܼ ܕܠܹܐ ܡܲܨܝܸܬܝܼ ܠܦܲܪܡܵܝܬܵܐ ܕܟܹܐܢܹ̈ܐ: ܘܕܗܵܕܸܪ ܠܡܵܪܝܵܐ ܛܵܝܸܦܵܐ ܟܵܡܝܼܠ. 18ܘܐَܡܝܼܪܹܗ ܙܟܲܪܝܵܐ ܠܡܲܠܲܐܟ̣ܵܐ: ܕܵܐܟ̣ܝܼ ܝܵܕܥܸܢ ܐܵܗܵܐ: ܣܵܒܵܒ ܐܵܢܵܐ ܣܵܒ̣ܵܐ ܝܘܸܢ: ܘܒܲܟ̣ܬܝܼ ܪܵܒܵܐ ܝ݇ܠܵܗ̇ ܒܝܵܘܡܵܢܘܼ̈ܗ̇. 19ܘܓ̰ܘܼܘܸܒܠܹܗ ܡܲܠܲܐܟ̣ܵܐ ܘܐَܡܝܼܪܹܗ ܐܸܠܹܗ: ܐܵܢܵܐ ܝܘܸܢ ܓܲܒ̣ܪܝܹܠ ܕܟܹܐ ܟܵܠܸܢ ܩܵܕَܡ ܐܲܠܵܗܵܐ: ܘܦܸܫܠܝܼ ܫܘܼܕܪܵܐ ܕܗܲܡܙܸܡܸܢ ܥܲܡܘܼܟ: ܘܡܲܫܚܸܕܸܢܘܼܟ ܐܲܢܹܐ. 20ܘܗܵܐ: ܒܸܬ ܗܵܘܸܬ ܫܬܝܼܩܵܐ: ܘܠܹܐ ܡܵܨܸܬ ܠܗܲܡܙܘܼܡܹܐ: ܗܲܠ ܝܵܘܡܵܐ ܕܐܲܢܹܐ ܗܵܘܝܼ: ܣܵܒܵܒ ܕܠܵܐ ܗܘܼܡܸܢܘܼܟ ܠܗܹܡܸܙܡܵܢܝܼ̈: ܐܵܢܝܼ ܕܒܸܬ ܦܵܝܫܝܼ ܬܘܼܡܸܡܹܐ ܒܙܲܒ̣ܢܵܝܗܝ. 21ܐܝܼܢܵܐ ܛܵܝܸܦܵܐ ܒܸܣܦܵܪܵܐ ܗ݇ܘܵܐ ܠܙܟܲܪܝܵܐ: ܘܥܘܼܓ̰ܒܹܐ ܗ݇ܘܵܘ ܒܥܲܪܩܲܠܬܹܗ ܓܵܘ ܗܲܝܟܠܵܐ. 22ܐܝܼܢܵܐ ܟܲܕ ܦܠܸܛܠܹܗ: ܠܹܐ ܡܵܨܹܐ ܗ݇ܘܵܐ ܕܗܲܡܙܸܡ ܥܲܡܵܝܗܝ: ܘܦܘܼܪܡܹܠܗܘܿܢ ܕܚܸܙܘܵܐ ܚܙܹܐܠܹܗ ܓܵܘ ܗܲܝܟܠܵܐ: ܘܗ̇ܘ ܪܡܵܙܵܐ ܪܵܡܸܙ ܗ݇ܘܵܐ ܠܗ݇ܘܿܢ: ܘܦܸܫܠܹܗ ܠܲܥܠܵܐ. 23ܘܗَܘܹܐ ܠܵܗ̇ ܕܟܲܕ ܦܸܫܠܗَܘܿܢ ܬܘܼܡܸܡܹܐ ܝܵܘܡܵܢܹ̈ܐ ܕܚܸܠܡܲܬܹܗ: ܐَܙܸܠܹܗ ܠܒܲܝܬܹܗ. 24ܘܡܒܵܬَܪ ܕܐܵܢܝܼ ܝܵܘܡܵܢܹ̈ܐ ܒܛܸܢܵܗ̇ ܐܹܠܝܼܫܲܒܲܥ ܒܲܟ̣ܬܹܗ: ܘܛܘܼܫܝܵܠܵܗ̇ ܓܵܢܘܼܗ̇ ܚܲܡܫܵܐ ܝܲܪ̈ܚܹܐ: ܘܐܵܡܪܵܗ̇ ܗ݇ܘܵܐ. 25ܗܲܕܟ̣ܵܐ ܥܒܸܕܠܹܗ ܐܸܠܝܼ ܡܵܪܝܵܐ: ܒܝܵܘܡܵܢܹ̈ܐ ܕܚܸܪܹܗ ܒܝܼܝܼ ܠܸܫܩܵܠܵܐ ܠܵܘܡܝܼ ܓܵܘ ܒܢܲܝ̈ܢܵܫܵܐ. 26ܘܒܝܲܪܚܵܐ ܕܐܸܫܬܵܐ ܦܸܫܠܹܗ ܫܘܼܕܪܵܐ ܓܲܒ̣ܪܝܹܠ ܡܲܠܲܐܟ̣ܵܐ ܡ̣ܢ ܠܟܸܣ ܐܲܠܵܗܵܐ ܠܡܕܝܼܢَܬܵܐ ܕܓܠܝܼܠܵܐ ܕܫܸܡܵܗ̇ ܢܵܨܪܲܬ. 27ܒܬܘܼܠܬܵܐ ܛܠܝܼܒܬܵܐ ܠܐ݇ܢܵܫܵܐ ܕܫܸܡܹܗ ܝܵܘܣܸܦ: ܡ̣ܢ ܒܹܝܬ ܕܵܘܝܼܕ: ܘܫܸܡܵܐ ܕܒܬܘܼܠܬܵܐ ܡܲܪܝܲܡ. 28ܘܥܒܸܪܹܗ ܓܵܘܵܝܝܼ ܠܟܸܣܠܵܗ̇: ܘܐَܡܝܼܪܹܗ ܐܸܠܵܗ̇: ܫܠܵܡܵܐ ܠܵܟ̣ܝ: ܡܠܝܼܬܵܐ ܫܵܦܵܩܲܬ: ܡܵܪܝܵܐ ܥܲܡܵܟ̣ܝ: ܒܪܝܼܟ̣ܬܵܐ ܓܵܘ ܒܲܟ̣ܬܵܬܹ̈ܐ. 29ܐܝܼܢܵܐ ܗ̇ܝ ܚܓ̰ܸܠܵܗ̇ ܒܗܹܡܸܙܡܵܢܹܗ: ܘܚܵܫܒ̣ܵܐ ܗ݇ܘܵܐ ܕܡܘܼܕܝܼ ܝܠܹܗ ܐܵܗܵܐ ܫܠܵܡܵܐ. 30ܘܐَܡܝܼܪܹܗ ܐܸܠܵܗ̇ ܡܲܠܲܐܟ̣ܵܐ: ܠܵܐ ܙܵܕܥܝܲܬܝ: ܡܲܪܝܲܡ: ܣܵܒܵܒ ܕܡܘܼܫَܟ̰ܸܚܠܵܟ̣ܝ ܫܵܦܵܩܲܬ ܠܟܹܣ ܐܲܠܵܗܵܐ. 31ܘܗܵܐ: ܒܸܬ ܩܵܒ̇ܠܲܬܝ ܒܛܵܢܵܐ: ܘܝܵܠܕܲܬܝ ܒܪܘܿܢܵܐ: ܘܒܸܬ ܩܵܪܝܲܬܝ ܫܸܡܹܗ: ܝܼܫܘܿܥ. 32ܐܵܗܵܐ ܒܸܬ ܗܵܘܹܐ ܓܘܼܪܵܐ: ܘܒܪܘܿܢܹܗ ܕܥܸܠܵܝܵܐ ܒܸܬ ܦܵܐܹܫ ܩܸܪܝܵܐ: ܘܒܸܬ ܝܵܗَܒܸܠ ܠܹܗ ܡܵܪܝܵܐ ܐܲܠܵܗܵܐ ܬܪܘܿܢܘܿܣ ܕܕܵܘܝܼܕ ܒܵܒܘܼܗܝ. 33ܘܒܸܬ ܥܵܒܸܕ ܡܲܠܟܘܼܬܵܐ ܥܲܠ ܒܲܝܬܹܗ ܕܝܲܥܩܘܿܒ̣ ܠܥܵܠܲܡ: ܘܠܡܲܠܟܘܼܬܹܗ ܬܝܵܡܵܐ ܠܹܐ ܗܵܘܹܐ. 34ܐܵܡܪܵܗ̇ ܡܲܪܝܲܡ ܠܡܲܠܲܐܟ̣ܵܐ: ܕܵܐܟ̣ܝܼ ܒܸܬ ܗܵܘܝܵܐ ܐܵܗܵܐ: ܣܵܒܵܒ ܕܠܐ݇ܢܵܫܵܐ ܠܹܐ ܝܘܵܢ ܝܕܥܝܼܬܵܐ. 35ܓ̰ܘܼܘܸܒܠܹܗ ܡܲܠܲܐܟ̣ܵܐ ܘܐَܡܝܼܪܹܗ ܐܸܠܵܗ̇: ܪܘܼܚܵܐ ܕܩܘܼܕܫܵܐ ܒܸܬ ܐܵܬܹܐ ܥܲܠܵܟ̣ܝ: ܘܚܲܝܠܹܗ ܕܥܸܠܵܝܵܐ ܒܸܬ ܥܵܒܸܕ ܛܸܠܵܢܝܼܬܵܐ ܥܲܠܵܟ̣ܝ: ܣܵܒܵܒ ܕܐܵܗܵܐ ܗ̇ܘ ܩܲܕܝܼܫܵܐ ܕܦܵܐܹܫ ܗَܘܝܼܵܐ: ܒܪܘܿܢܹܗ ܕܐܲܠܵܗܵܐ ܒܸܬ ܦܵܐܹܫ ܩܸܪܝܵܐ. 36ܘܗܵܐ: ܐܹܠܝܼܫܒܲܥ ܚܸܙܡܵܟ̣ܝ: ܐܘܼܦ ܗ̇ܝ ܒܛܝܼܢܬܵܐ ܝ݇ܠܵܗ̇ ܒܪܘܿܢܵܐ ܒܣܲܝܒܘܼܬܵܗ̇: ܘܐܵܗܵܐ ܝܲܪܚܵܐ ܕܐܸܫܬܵܐ ܝܠܹܗ ܠܗ̇ܝ ܕܦܵܝܫܵܐ ܩܪܝܼܬܵܐ: ܥܩܲܪܬܵܐ. 37ܣܵܒܵܒ ܕܠܹܐ ܝܠܹܗ ܥܸܨܝܵܐ ܠܐܲܠܵܗܵܐ ܟ̰ܘ ܡܸܢܕܝܼ. 38ܐܵܡܪܵܗ̇ ܡܲܪܝܲܡ: ܗܵܐ ܐܵܢܵܐ ܚܹܕܲܡܬܹܗ ܕܡܵܪܝܵܐ: ܗܵܘܝܵܐ ܠܝܼ ܐܲܝܟܼ ܗܹܡܸܙܡܵܢܘܼܟ: ܘܐَܙܸܠܹܗ ܡܲܠܲܐܟ̣ܵܐ ܡ̣ܢ ܠܟܸܣܠܵܗ̇. 39ܘܩܸܡܠܵܗ̇ ܡܲܪܝܲܡ ܒܐܵܢܝܼ ܝܵܘܡܵܢܹ̈ܐ ܘܐَܙܸܠܵܗ̇ ܒܝܲܠܙܘܼܝ ܠܛܘܼܪܵܐ: ܠܡܕܝܼܢَܬܵܐ ܕܝܼܗܘܼܕ. 40ܘܥܒܸܪܵܗ̇ ܠܒܲܝܬܹܗ ܕܙܲܟܲܪܝܵܐ: ܘܕܪܹܠܵܗ̇ ܫܠܵܡܵܐ ܠܐܹܠܝܼܫܒܲܥ. 41ܘܗَܘܹܐ ܠܵܗ̇ ܟܲܕ ܫܡܸܥܠܵܗ̇ ܐܹܠܝܼܫܒܲܥ ܫܠܵܡܵܐ ܕܡܲܪܝܲܡ: ܦܨܸܚܠܹܗ ܝܵܠܵܕَܐ ܒܟܹܪَܣܵܗ̇: ܘܦܸܫܠܵܗ̇ ܡܠܝܼܬܵܐ ܐܹܠܝܼܫܒܲܥ ܪܘܼܚܵܐ ܕܩܘܼܕܫܵܐ. 42ܘܩܘܼܘܸܚܠܵܗ̇ ܒܩܵܠܵܐ ܪܵܡܵܐ: ܘܐَܡܝܼܪܵܗ̇: ܒܪܝܼܟ̣ܬܵܐ ܝܘܲܬܝ ܓܵܘ ܒܲܟ̣ܬܵܬܹ̈ܐ: ܘܒܪܝܼܟ̣ܬܵܐ ܝ݇ܠܵܗ̇ ܛܥܘܿܢܬܵܐ ܕܟܹܪَܣܵܟ̣ܝ. 43ܡܐܲܝܟܵܐ ܠܝܼ ܐܵܗܵܐ: ܕܝܸܡܹܗ ܕܡܵܪܝܼ ܐܵܬܝܵܐ ܠܟܸܣܠܝܼ. 44ܣܵܒܵܒ ܗܵܐ: ܟܲܕ ܢܦܸܠܹܗ ܩܵܠܵܐ ܕܫܠܵܡܵܟ̣ܝ ܒܢܵܬܝܵܬܝܼ̈: ܒܚܲܕܘܼܬܵܐ ܓܘܼܪܬܵܐ ܦܨܸܚܠܹܗ ܝܵܠܵܕَܐ ܒܟܹܪَܣܝܼ. 45ܘܛܘܼܒ̣ܵܐ ܠܗ̇ܝ ܕܗܘܼܡܸܢܵܗ̇ ܕܗܵܘܹܐ ܬܝܵܡܵܐ ܠܐܵܢܝܼ ܕܦܸܫܠܗَܘܿܢ ܗܘܼܡܙܸܡܹܐ ܥܲܡܵܗ̇ ܡ̣ܢ ܠܟܸܣ ܡܵܪܝܵܐ. 46ܘܐَܡܝܼܪܵܗ̇ ܡܲܪܝܲܡ: ܡܲܓܘܘܼܪܹܐ ܝ݇ܠܵܗ̇ ܓܵܢܝܼ ܠܡܵܪܝܵܐ: 47ܘܚܕܹܠܵܗ̇ ܪܘܼܚܝܼ ܒܐܲܠܵܗܵܐ ܡܲܚܝܼܵܢܝܼ. 48ܣܵܒܒ ܕܚܸܪܹܗ ܒܡܵܟܝܼܟ̣ܘܼܬܵܐ ܕܚܹܕܲܡܬܹܗ: ܣܵܒܵܒ ܗܵܐ: ܡ̣ܢ ܐܵܕܝܼܵܐ ܛܘܼܒ̣ܵܐ ܒܸܬ ܝܵܗَܒ̣ܝܼ ܠܝܼ ܟܠܵܝܗܝ ܐܘܼ̈ܓ̰ܵܓܹܐ. 49ܣܵܒܵܒ ܕܥܒܸܕܠܹܗ ܠܟܸܣܠܝܼ ܫܘܼܠܹ̈ܐ ܓܘܼܪܹ̈ܐ ܗ̇ܘ ܕܝܼܠܹܗ ܚܲܝܠܵܢܵܐ: ܘܩܲܕܝܼܫܵܐ ܝܠܹܗ ܫܸܡܹܗ: 50ܘܪ̈ܲܚܡܹܗ ܠܕܵܘܪܹ̈ܐ ܘܕܵܘܪܹ̈ܐ ܥܲܠ ܕܐܵܢܝܼ ܕܙܵܕܥܝܼ ܡܸܢܹܗ. 51ܥܒܸܕܠܹܗ ܚܲܝܠܵܐ ܒܕܪܲܥܢܘܼܗܝ: ܘܒܘܼܪܒܸܙܠܹܗ ܠܚܬܝܼܪܹ̈ܐ ܒܚܝܼܵܠ ܕܠܸܒܵܝܗܝ. 52ܚܘܼܪܙܸܦܠܹܗ ܠܙܲܪ̈ܒܵܢܹܐ ܡ̣ܢ ܟܘܼܪ̈ܣܵܘܵܬܵܐ: ܘܡܘܼܪܸܡܠܹܗ ܠܡܵܟܝܼܟܹ̈ܐ. 53ܟܦܝܼܢܹ̈ܐ ܡܘܼܣܒܸܥܠܹܗ ܛܵܒ̣ܵܬܹ̈ܐ: ܘܕܵܘܠܲܬܡܲܢܕܹ̈ܐ ܫܘܼܕܸܪܹܗ ܣܦܝܼܩܹ̈ܐ. 54ܗܘܼܝܸܪܹܗ ܠܝܼܣܪܵܝܹܠ ܪܹܓܹܗ: ܠܸܕܟ̣ܵܪܵܐ ܪ̈ܲܚܡܹܐ: 55ܐܲܝܟܼ ܕܗܘܼܡܙܸܡܠܹܗ ܥܲܡ ܒܵܒܵܘ̈ܵܬܲܢ: ܠܟܸܣ ܐܲܒ̣ܪܵܗܵܡ ܘܠܟܸܣ ܙܲܪܥܹܗ: ܠܥܵܠܲܡ. 56ܘܥܘܼܪܩܸܠܵܗ̇ ܡܲܪܝܲܡ ܠܟܸܣܠܵܗ̇ ܐܲܝܟܼ ܬܠܵܬَܐ ܝܲܪ̈ܚܹܐ: ܘܕܸܪܵܗ̇ ܠܒܲܝܬܘܼܗ̇. 57ܘܐܹܠܝܼܫܒܲܥ ܬܘܼܡܸܡܠܹܗ ܙܲܒ̣ܢܵܐ ܕܝܵܠܕܵܗ̇ ܗ݇ܘܵܐ: ܘܝܠܸܕܠܵܗ̇ ܒܪܘܿܢܵܐ. 58ܘܫܡܸܥܠܗَܘܿܢ ܫܒ̣ܵܒ̣ܘܼ̈ܗ̇ ܘܚܸܙܡܘܼ̈ܗ̇ ܕܡܘܼܙܝܸܕܠܹܗ ܡܵܪܝܵܐ ܪ̈ܲܚܡܹܐ ܠܟܸܣܠܵܗ̇: ܘܚܕܹܐܠܗܘܿܢ ܥܲܡܵܗ̇. 59ܘܗَܘܹܐ ܠܵܗ̇ ܒܝܵܘܡܵܐ ܕܬܡܵܢܝܵܐ: ܐ݇ܬܹܐܠܗܘܿܢ ܠܸܓܙܵܪܹܗ ܠܝܵܠܵܕَܐ: ܘܩܵܪܝܼ ܗ݇ܘܵܘ ܠܹܗ ܒܫܸܡܵܐ ܕܒܵܒܹܗ: ܙܟܲܪܝܵܐ. 60ܘܓ̰ܘܼܘܸܒܠܵܗ̇ ܝܸܡܹܗ ܘܐܵܡܪܵܗ̇ ܐܸܠܵܝܗܝ: ܠܵܐ ܗܲܕܟ̣ܵܐ: ܐܸܠܵܐ ܦܵܐܹܫ ܩܸܪܝܵܐ: ܝܘܿܚܲܢܵܢ. 61ܘܐَܡܸܪܗܘܿܢ ܐܸܠܵܗ̇: ܠܲܝܬ ܐ݇ܢܵܫܵܐ ܒܐܘܼܓ̰ܵܓ̣ܵܟ̣ܝ ܕܦܵܐܹܫ ܩܸܪܝܵܐ ܒܐܵܗܵܐ ܫܸܡܵܐ. 62ܘܪܡܸܙܠܗܘܿܢ ܠܒܵܒܹܗ ܕܵܐܟ̣ܝܼ ܕܒܵܣܡܵܐ ܗ݇ܘܵܐ ܠܹܗ ܕܦܵܐܹܫ ܩܸܪܝܵܐ. 63ܘܛܠܸܒܠܹܗ ܦܸܢܩܝܼܬܵܐ: ܘܟܬܸܒ̣ܠܹܗ: ܘܐَܡܝܼܪܹܗ: ܝܘܿܚܲܢܵܢ ܝܼܠܹܗ ܫܸܡܹܗ. ܘܥܘܼܓ̰ܸܒܠܹܗ ܟܠ ܐ݇ܢܵܫܵܐ. 64ܘܕܲܪܣܵܥܲܬ ܦܸܫܠܹܗ ܦܬܝܼܚܵܐ ܦܘܼܡܹܗ ܘܠܸܫܵܢܹܗ: ܘܗܘܼܡܙܸܡܠܹܗ: ܘܫܘܼܒܸܚܠܹܗ ܠܐܲܠܵܗܵܐ. 65ܘܗَܘܹܐ ܠܵܗ̇ ܙܕܘܿܥܬܵܐ ܥܲܠ ܟܠܵܝܗܝ ܕܥܡܝܼܪܹܐ ܗ݇ܘܵܘ ܒܚܵܕܸܪ̈ܘܵܢܵܝܗܝ: ܘܒܟܠܹܗ ܛܘܼܪܵܐ ܕܝܼܗܘܼܕ ܐܲܢܹܐ ܡܸܢܕܝܼܵܢܹ̈ܐ ܦܵܝܫܝܼ ܗ݇ܘܵܘ ܗܘܼܡܙܸܡܹܐ. 66ܘܟܠܵܝܗܝ ܕܫܡܸܥܠܗَܘܿܢ ܚܵܫܒ̣ܝܼ ܗ݇ܘܵܘ ܒܠܸܒܵܝܗܝ ܘܐܵܡܪܝܼ: ܝܵܐ ܪܲܒ: ܡܘܼܕܝܼ ܒܸܬ ܗܵܘܹܐ ܐܵܗܵܐ ܝܵܠܵܕَܐ: ܣܵܒܵܒ ܐܝܼܕܹܗ ܕܡܵܪܝܵܐ ܥܲܡܹܗ ܗ݇ܘܵܐ. 67ܘܙܟܲܪܝܵܐ ܒܵܒܹܗ ܦܸܫܠܹܗ ܡܸܠܝܵܐ ܪܘܼܚܵܐ ܕܩܘܼܕܫܵܐ: ܘܢܘܼܒܸܠܹܗ: ܘܐَܡܝܼܪܹܗ: 68ܒܪܝܼܟ̣ܵܐ ܝܠܹܗ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܕܣܘܼܚܒܸܪܹܗ ܠܛܵܝܸܦܹܗ: ܘܥܒܸܕܠܹܗ ܦܘܼܪܩܵܢܵܐ ܐܸܠܹܗ: 69ܘܡܘܼܩܸܡܠܹܗ ܐܸܠܲܢ ܩܵܪَܢܵܐ ܕܦܘܼܪܩܵܢܵܐ: ܒܒܲܝܬܹܗ ܕܕܵܘܝܼܕ ܪܹܓܹܗ: 70ܐܲܝܟܼ ܕܗܘܼܡܙܸܡܠܹܗ ܒܦܘܼܡܵܐ ܕܢܒ̣ܝܼܘܼ̈ܗܝ ܩܲܕܝܼܫܹ̈ܐ ܕܡ̣ܢ ܥܵܠܲܡ: 71ܦܘܼܪܩܵܢܵܐ ܡ̣ܢ ܕܸܫ̈ܡܸܢܲܢ: ܘܡ̣ܢ ܐܝܼܕܵܐ ܕܟܠܵܝܗܝ ܣܵܢ̈ܝܵܢܲܢ: 72ܠܸܥܒ̣ܵܕܵܐ ܪ̈ܲܚܡܹܐ ܠܟܸܣ ܒܵܒܵܘܵܬܲܢ. ܘܠܸܕܟ̣ܵܪܵܐ ܠܕܝܵܬܹܩܘܼܗ̈ܝ ܩܲܕܝܼܫܹ̈ܐ: 73ܘܡܵܘܡܵܬܹ̈ܐ ܕܝܡܹܠܹܗ ܠܒܵܒܲܢ ܐܲܒ̣ܪܵܗܵܡ: 74ܕܝܵܗَܒܸܠ ܠܲܢ ܕܟܲܕ ܦܵܝܫܵܚ ܦܘܼܪܩܹܐ ܡ̣ܢ ܐܝܼܕܵܐ ܕܕܸܫ̈ܡܸܢܲܢ: ܕܠܵܐ ܙܕܘܿܥܬܵܐ ܦܵܠܚܵܚ ܐܸܠܹܗ: 75ܒܟܹܐܢܘܼܬܵܐ ܘܙܲܕܝܼܩܘܼܬܵܐ ܩܵܕَܡܘܼܗܝ ܟܠܵܝܗܝ ܝܵܘܡܵـ̈ـܢܲܢ. 76ܘܐܲܢَܬ: ܝܵܠܵܕَܐ: ܢܒ̣ܝܹܗ ܕܥܸܠܵܝܵܐ ܒܸܬ ܦܵܝܫܸܬ ܩܸܪܝܵܐ: ܣܵܒܵܒ ܒܸܬ ܐܵܙܸܠَܬ ܩܵܕَܡ ܦܵܬܹܗ ܕܡܵܪܝܵܐ ܕܗܵܕܪܸܬ ܐܘܼܪ̈ܚܵܬܘܼܗܝ: 77ܕܝܵܗَܒܸܠ ܝܕܵܥܬܵܐ ܕܚܲܝܹ̈ܐ ܠܛܵܝܸܦܹܗ: ܒܫܒ̣ܵܩܵܐ ܕܚܛܵܗܵܝ̈ܗܝ: 78ܒܪ̈ܲܚܡܹܐ ܘܚܢܵܢܵܐ ܕܐܲܠܵܗܲܢ: ܕܒܝܼܵܝܗܝ ܒܸܬ ܬܵܦܸܩ ܒܝܲܢ ܙܪܵܩܵܐ ܡ̣ܢ ܪܵܘܡܵܐ: 79ܠܒܲܗَܪܘܼܢܹܐ ܠܐܵܢܝܼ ܕܝܼܢܵܐ ܝܬܝܼܒܹܐ ܒܚܸܫܟܵܐ ܘܒܛܸܠܵܢܝܼܬܵܐ ܕܡܵܘܬܵܐ: ܠܸܥܒ̣ܵܕܵܐ ܬܪ̈ܘܼܨܹܐ ܐܲܩ̈ܠܲܢ ܒܐܘܼܪܚܵܐ ܕܫܠܵܡܵܐ. 80ܘܝܵܠܵܕَܐ ܓܲܪܘܸܣ ܗ݇ܘܵܐ ܘܦܵܐܹܫ ܗ݇ܘܵܐ ܚܘܼܠܸܢܵܐ ܒܪܘܼܚܵܐ: ܘܓܵܘ ܒܲܪܝܼܵܐ ܗ݇ܘܵܐ ܗܲܠ ܝܵܘܡܵܐ ܕܡܲܚܙܵܝܬܹܗ ܠܟܸܣ ܝܼܣܪܵܝܹܠ.