0:00
/
1ܘܟܲܕ ܥܒܼܸܪܹܗ ܡ̣ܢ ܓܵܘ ܐܝܼܪܝܼܚܘܿ. 2ܘܗܵܐ: ܚܲܕَ ܐ݇ܢܵܫܵܐ ܕܫܸܡܹܗ ܙܲܟܲܝ: ܓܘܼܪܵܐ ܕܕܲܡܓ̣ܵܟ̰̈ܝܹܐ ܗ݇ܘܵܐ ܘܕܵܘܠܲܬܡܲܢܕ. 3ܘܒܵܥܝܹܐ ܗ݇ܘܵܐ ܕܚܵܙܹܐ ܠܝܼܫܘܿܥ: ܕܡܵܢܝܼ ܝܠܹܗ: ܘܠܹܐ ܡܵܨܹܐ ܗ݇ܘܵܐ ܡ̣ܢ ܟܸܢܫܵܐ: ܣܵܒܵܒ ܕܒܩܘܼܡܬܹܗ ܟܸܪܝܵܐ ܗ݇ܘܵܐ. 4ܘܪܚܸܛܠܹܗ ܠܩܵܕَܡܘܼܗܝ: ܘܐ݇ܣܸܩܠܹܗ ܠܬܹܬܵܐ ܦܲܟܝܼܗܬܵܐ ܕܚܵܙܹܐ ܠܹܗ: ܣܵܒܵܒ ܕܒܗ̇ܝ ܐܘܼܪܚܵܐ ܗܕܝܼܪܵܐ ܗ݇ܘܵܐ ܕܥܵܒܸܪ. 5ܘܟܲܕ ܐَܬܹܐܠܹܗ ܠܗ̇ܝ ܕܘܼܟܬܵܐ ܝܼܫܘܿܥ: ܚܸܪܹܗ ܠܥܸܠܸܠ ܘܚܙܹܐܠܹܗ: ܘܐَܡܝܼܪܹܗ ܐܸܠܹܗ: ܝܠܘܿܙ: ܨܠܝܼ ܙܲܟܲܝ: ܣܵܒܵܒ ܕܐܸܕܝܘܿܡَ ܘܵܓ̰ܸܒ ܝ݇ܠܵܗ̇ ܕܓܵܘ ܒܲܝܬܘܼܟ ܗܵܘܸܢ. 6ܘܡܘܼܠܝܸܙܠܹܗ ܨܠܹܐܠܹܗ: ܘܩܘܼܒܸܠܹܗ ܒܚܲܕܘܼܬܵܐ. 7ܐܝܼܢܵܐ ܟܲܕ ܚܙܹܐܠܗܘܿܢ ܟܠܵܝܗܝ ܛܘܼܪܛܸܡܠܗܘܿܢ: ܘܐَܡܸܪܗܘܿܢ: ܠܟܸܣ ܐ݇ܢܵܫܵܐ ܚܲܛܵܝܵܐ ܥܒܼܸܪܹܗ ܫܪܹܠܹܗ. 8ܐܝܼܢܵܐ ܩܸܡܠܹܗ ܙܲܟܲܝ ܘܐَܡܝܼܪܹܗ ܠܡܵܪܲܢ: ܗܵܐ: ܡܵܪܝܼ: ܦܲܠܓܵܐ ܕܡܸܢܕܝܝܼ̈ ܒܝܼܵܗَܒ̣ܵܐ ܝܘܸܢ ܠܡܸܣܟܹܢܹ̈ܐ: ܘܐܸܢ ܠܐ݇ܢܵܫܵܐ ܡܸܢܕܝܼ ܙܠܸܡܠܝܼ: ܚܲܕَ ܒܐܲܪܒܥܵܐ ܒܸܦܪܲܥܝܵܐ ܝܘܸܢ. 9ܐܵܡܸܪ ܐܸܠܹܗ ܝܼܫܘܿܥ: ܐܸܕܝܘܿܡَ ܗَܘܹܐܠܗَܘܿܢ ܚܲܝܹ̈ܐ ܠܐܵܗܵܐ ܒܲܝܬܵܐ: ܣܵܒܵܒ ܕܐܘܼܦ ܐܵܗܵܐ ܒܪܘܿܢܵܐ ܕܐܲܒ̣ܪܵܗܵܡ ܝܼܠܹܗ. 10ܣܵܒܵܒ ܕܐَܬܹܐܠܹܗ ܒܪܘܿܢܹܗ ܕܐ݇ܢܵܫܵܐ ܕܛܵܥܹܐ ܘܡܲܚܹܐ ܠܡܸܢܕܝܼ ܕܝܼܗ݇ܘܵܐ ܬܠܝܼܩܵܐ. 11ܘܟܲܕ ܫܡܸܥܠܗَܘܿܢ ܐܲܢܹܐ: ܡܘܼܙܝܸܕܠܹܗ ܠܹܐܡܵܪܵܐ ܡܵܣܵܠܵܐ: ܣܵܒܵܒ ܕܩܘܼܪܒܵܐ ܗ݇ܘܵܐ ܠܐܘܿܪܸܫܠܸܡ: ܘܚܵܫܒ̣ܝܼ ܗ݇ܘܵܘ ܕܒܗ̇ܝ ܣܵܥܲܬ ܗܕܝܼܪܬܵܐ ܗ݇ܘܵܐ ܕܦܵܝܫܵܐ ܐܲܫܟܵܪܵܐ ܡܲܠܟܘܼܬܹܗ ܕܐܲܠܵܗܵܐ. 12ܐَܡܝܼܪܹܗ ܗܲܕܟ̣ܵܐ: ܚܲܕَ ܐ݇ܢܵܫܵܐ ܕܡ̣ܢ ܐܘܼܓ̰ܵܓ̣ ܓܘܼܪܬܵܐ ܐَܙܸܠܹܗ ܠܐܲܬܪܵܐ ܪܸܚܩܵܐ: ܕܫܵܩܸܠ ܠܹܗ ܡܲܠܟܘܼܬܵܐ ܘܕܵܝܸܪ. 13ܘܩܪܹܐܠܹܗ ܥܸܣܪܵܐ ܪܹ̈ܓܵܘܵܬܘܼܗܝ: ܘܝܘܼܗَܒܼܸܠܹܗ ܐܸܠܵܝܗܝ ܥܸܣܪܵܐ ܟܲܟܪܹ̈ܐ: ܘܐَܡܝܼܪܹܗ ܐܸܠܵܝܗܝ: ܥܒ̣ܘܿܕܘܿܢ ܡܲܥܡܠܵܐ [ܩܢܵܝܬܵܐ] ܗܲܠ ܕܐܵܬܹܐ ܐَܢܵܐ. 14ܐܝܼܢܵܐ ܒܢܲܝ̈ ܡܕܝܼܢَܬܹܗ ܟܹܐ ܣܵܢܝܼ ܗ݇ܘܵܘ ܠܹܗ: ܘܫܘܼܕܸܪܗܘܿܢ ܩܵܨܸܕܹ̈ܐ ܒܵܬَܪܹܗ: ܘܐܵܡܪܝܼ: ܠܹܐ ܒܵܣܡܵܐ ܠܲܢ ܕܐܵܗܵܐ ܥܵܒܸܕ ܡܲܠܟܘܼܬܵܐ ܥܲܠܲܢ. 15ܘܗَܘܹܐ ܠܵܗ̇: ܟܲܕ ܫܩܸܠܹܗ ܡܲܠܟܘܼܬܵܐ ܘܕܸܪܹܗ: ܐَܡܝܼܪܹܗ ܕܩܵܪܝܼ ܗ݇ܘܵܘ ܠܗ݇ܘܿܢ ܠܟܸܣܠܹܗ ܐܵܢܝܼ ܪܹ̈ܓܵܘܵܬܘܼܗܝ ܕܝܘܼܗَܒܼܸܠܹܗ ܐܸܠܵܝܗܝ ܙܘܼܙܵܐ: ܕܝܵܕܸܥ ܡܘܼܕܝܼ ܟܠ ܚܲܕَ ܡܸܢܵܝܗܝ ܩܢܹܠܹܗ ܒܥܒ̣ܵܕܬܵܐ ܕܡܲܥܡܠܵܐ [ܕܩܢܵܝܬܵܐ]. 16ܘܐَܬܹܐܠܹܗ ܩܵܕَܡܵܝܵܐ ܘܐَܡܝܼܪܹܗ: ܡܵܪܝܼ: ܟܲܟܪܘܼܟܼ ܥܸܣܪܵܐ ܟܲܟܪܹ̈ܐ ܡܘܼܙܝܸܕܠܹܗ. 17ܐܵܡܸܪ ܐܸܠܹܗ: ܟ̰ܵܝܒܘܿ: ܪܹܓܵܐ ܛܵܒ̣ܵܐ: ܕܒܚܲܕَܟ̰ܵܐ ܗَܘܹܠܘܼܟܼ ܡܗܘܼܡܢܵܐ: ܗܵܘܹܐ ܠܘܼܟܼ ܗܘܼܟܡܵܐ ܥܲܠ ܥܸܣܲܪ ܡܕܝܼܢܵܬܹ̈ܐ. 18ܘܐَܬܹܐܠܹܗ ܕܬܪܹܝ: ܘܐَܡܝܼܪܹܗ: ܡܵܪܝܼ: ܟܲܟܪܘܼܟܼ ܚܲܡܫܵܐ ܟܲܟܪܹ̈ܐ ܥܒܸܕܠܹܗ. 19ܐَܡܝܼܪܹܗ ܐܘܼܦ ܠܐܵܗܵܐ: ܐܘܼܦ ܐܲܢَܬ ܗَܘܝܼ ܥܲܠ ܚܲܡܸܫ ܡܕܝܼܢܵܬܹ̈ܐ. 20ܘܐَܬܹܐܠܹܗ ܐ݇ܚܹܪ݇ܢܵܐ ܘܐܡܸܪܗ: ܡܵܪܝܼ: ܗܵܐ: ܗ̇ܘ ܟܲܟܪܘܼܟܼ: ܕܗَܘܹܐܠܹܗ ܠܟܸܣܠܝܼ ܡܘܼܬܒ̣ܵܐ ܒܝܵܠܸܚܬܵܐ. 21ܣܵܒܵܒ ܙܕܸܥܠܝܼ ܡܸܢܘܼܟ: ܕܐ݇ܢܵܫܵܐ ܩܸܫܝܵܐ ܝܘܸܬ: ܟܹܐ ܫܵܩܠܸܬ ܡܸܢܕܝܼ ܕܠܵܐ ܡܘܼܬܸܒ̣ܠܘܼܟܼ: ܘܟܹܐ ܚܵܨܕܸܬ ܡܸܢܕܝܼ ܕܠܵܐ ܙܪܸܥܠܘܼܟܼ. 22ܐܵܡܸܪ ܐܸܠܹܗ: ܡ̣ܢ ܦܘܼܡܘܼܟ ܒܸܬ ܕܵܝܢܸܢܘܼܟ: ܪܹܓܵܐ ܒܝܼܫܵܐ: ܒܝܼܕܲܥܝܝܼ ܝܘܸܬ ܗ݇ܘܵܐ ܕܐ݇ܢܵܫܵܐ ܩܸܫܝܵܐ ܝܘܸܢ: ܘܟܹܐ ܫܵܩܠܸܢ ܡܸܢܕܝܼ ܕܠܵܐ ܡܘܼܬܸܒ̣ܠܝܼ: ܘܚܵܨܕܸܢ ܡܸܢܕܝܼ ܕܠܵܐ ܙܪܸܥܠܝܼ. 23ܒܲܣ ܩܵܡܘܿܕܝܼ ܠܵܐ ܝܘܼܗَܒܼܸܠܘܼܟܼ ܙܘܼܙܝܼ ܥܲܠ ܨܘܼܦܪܵܐ (ܕܨܲܪܵܦ): ܘܐܵܢܵܐ ܟܲܕ ܐܵܬܸܢ ܗ݇ܘܵܐ ܒܸܬ ܛܵܠܒܸܢ ܗ݇ܘܵܐ ܠܹܗ ܥܲܡ ܙܵܘܕܘܿܢܝܹܗ. 24ܘܠܐܵܢܝܼ ܕܟܸܠܝܹܐ ܗ݇ܘܵܘ ܩܵܕَܡܘܼܗܝ ܐَܡܝܼܪܹܗ: ܫܩܘܿܠܘܿܢ ܡܸܢܹܗ ܡܲܢܝܵܐ: ܘܗܲܒَܠܘܿܢ ܠܗ̇ܘ ܕܐܝܼܬ ܠܹܗ ܥܸܣܪܵܐ ܟܲܟܪܹ̈ܐ. 25ܐܵܡܪܝܼ ܐܸܠܹܗ: ܡܵܪܲܢ: ܐܝܼܬ ܠܹܗ ܥܸܣܪܵܐ ܟܲܟܪܹ̈ܐ. 26ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܟܠ ܡ̇ܢ ܕܐܝܼܬ ܠܹܗ: ܒܸܬ ܦܵܐܹܫ ܝܘܼܗَܒ̣ܵܐ ܐܸܠܹܗ: ܘܡ̣ܢ ܕܗ̇ܘ ܕܠܲܝܬ ܠܹܗ: ܐܘܼܦ ܗ̇ܘ ܕܐܝܼܬ ܠܹܗ ܒܸܬ ܦܵܐܹܫ ܫܩܝܼܠܵܐ ܡܸܢܹܗ. 27ܐܝܼܢܵܐ ܠܐܵܢܝܼ ܕܸܫܡܸܢܝܼ̈: ܐܲܝܢܝܼ ܕܠܹܐ ܒܵܥܝܼ ܗ݇ܘܵܘ ܕܥܒ̣ܕܸܢ ܡܲܠܟܘܼܬܵܐ ܥܲܠܵܝܗܝ: ܡܲܝܬَܡܘܿܢ ܠܗ݇ܘܿܢ ܠܲܐܟ̣ܵܐ: ܘܩܛܘܿܠܘܿܢ ܠܗ݇ܘܿܢ ܩܵܕَܡܝܼ. 28ܘܟܲܕ ܐَܡܝܼܪܹܗ ܐܲܢܹܐ: ܦܠܸܛܠܹܗ ܠܵܩܵܕَܡܘܼܗܝ ܕܐܵܣܸܩ ܗ݇ܘܵܐ ܠܐܘܿܪܸܫܠܸܡ. 29ܘܗَܘܹܐ ܠܵܗ̇ ܕܟܲܕ ܩܘܼܪܒܸܢܹܗ ܠܒܹܝܬ ܦܵܓܹܐ ܘܒܹܝܬ ܥܲܢܝܵܐ: ܠܟܸܣ ܛܘܼܪܵܐ ܕܦܝܵܫܵܐ ܝܠܹܗ ܩܸܪܝܵܐ ܕܙܲܝܬܹ̈ܐ: ܫܘܼܕܸܪܹܗ ܬܪܹܝ ܡ̣ܢ ܬܲܠܡܝܼܕܘܼ̈ܗܝ. 30ܘܐَܡܝܼܪܹܗ ܐܸܠܵܝܗܝ: ܙܹܠَܡܘܿܢ ܠܡܵܬܵܐ ܕܠܒܲܪܩܘܼܒ̣ܠܲܢ: ܘܟܲܕ ܥܵܒܼܪܝܼܬܘܿܢ ܓܵܘܵܗ̇ ܒܸܬ ܡܲܫَܟ̰ܚܝܼܬܘܿܢ ܓ̰ܲܥܫܵܐ ܐَܣܝܼܪܵܐ: ܕܟ̰ܘܼ ܐ݇ܢܵܫܵܐ ܠܵܐ ܝܬܸܒ̣ܠܹܗ ܥܲܠܘܼܗܝ. ܫܪܹܝܡܘܿܢ ܡܲܝܬَܡܘܿܢ ܠܹܗ. 31ܘܐܸܢ ܐ݇ܢܵܫܵܐ ܒܵܩܸܪܵܘܟ̣ܘܿܢ: ܩܵܡܘܿܕܝܼ ܒܸܫܪܵܝܹܗ ܝܬܘܿܢ: ܗܲܕܟ̣ܵܐ ܐَܡܘܿܪܘܼܢ ܐܸܠܹܗ: ܠܡܵܪܲܢ ܠܵܙܸܡ ܝܼܠܹܗ. 32ܘܐَܙܸܠܗܘܿܢ ܐܵܢܝܼ ܕܦܸܫܠܗَܘܿܢ ܫܘܼܕܸܪܹܗ: ܘܡܘܼܫَܟ̰ܸܚܠܗܘܿܢ ܕܵܐܟ̣ܝܼ ܕܐَܡܝܼܪܹܗ ܐܸܠܵܝܗܝ. 33ܘܟܲܕ ܒܸܫܪܵܝܵܐ ܗ݇ܘܵܘ ܠܓ̰ܲܥܫܵܐ: ܐَܡܸܪܗܘܿܢ ܐܸܠܵܝܗܝ ܡܵܪ̈ܵܘܵܬܘܼܗܝ: ܩܵܡܘܿܕܝܼ ܒܸܫܪܵܝܵܐ ܝܬܘܿܢ ܠܓ̰ܲܥܫܵܐ. 34ܘܐَܡܸܪܗܘܿܢ ܐܸܠܵܝܗܝ: ܠܡܵܪܲܢ ܠܵܙܸܡ ܝܼܠܹܗ. 35ܘܡܘܼܬَܝܹܠܗܘܿܢ ܐܸܠܹܗ ܠܟܸܣ ܝܼܫܘܿܥ. ܘܕܪܹܠܗܘܿܢ ܥܲܠ ܓ̰ܲܥܫܵܐ ܓ̰ܘܼܠܵܝ̈ܗܝ: ܘܡܘܼܪܟܸܒ̣ܠܗܘܿܢ ܠܝܼܫܘܿܥ ܥܲܠܘܼܗܝ. 36ܐܝܼܢܵܐ ܟܲܕ ܒܹܐܙܵܠܵܐ ܗ݇ܘܵܐ: ܫܘܼܘܹܠܗܘܿܢ ܓ̰ܘܼܠܵܝ̈ܗܝ ܒܐܘܼܪܚܵܐ. 37ܘܟܲܕ ܩܘܼܪܒܸܢܹܗ ܠܡܲܨܠܵܝܬܵܐ ܕܛܘܼܪܵܐ ܕܙܲܝܬܹ̈ܐ: ܫܘܼܪܹܠܗܘܿܢ ܟܠܹܗ ܟܸܢܫܵܐ ܕܬܲܠܡܝܼܕܹ̈ܐ ܒܸܚܕܵܝܵܐ ܘܫܵܒܘܿܚܹܐ ܠܐܲܠܵܗܵܐ ܒܩܵܠܵܐ ܪܵܡܵܐ ܥܲܠ ܟܠܵܝܗܝ ܚܲܝܠܹܗ ܕܚܙܹܐܠܗܘܿܢ. 38ܒܹܐܡܵܪܵܐ: ܒܪܝܼܟ̣ܵܐ ܝܠܹܗ ܡܲܠܟܵܐ ܕܒܹܐܬܵܝܵܐ ܝܠܹܗ ܒܫܸܡܹܗ ܕܡܵܪܝܵܐ: ܫܠܵܡܵܐ ܒܫܡܲܝܵܐ: ܘܫܘܼܒ̣ܚܵܐ ܒܡܪ̈ܵܘܡܹܐ. 39ܐܝܼܢܵܐ ܐ݇ܢܵܫܹ̈ܐ ܡ̣ܢ ܦܪ̈ܝܼܫܹܐ ܡ̣ܢ ܓܵܘܵܐ ܕܟܸܢܫܹ̈ܐ ܐܵܡܪܝܼ ܐܸܠܹܗ: ܪܵܒܝܼ: ܢܓ̰ܘܿ ܒܬܲܠܡܝܼܕܘܼ̈ܟ. 40ܓ̰ܘܼܘܸܒܠܹܗ ܘܐَܡܝܼܪܹܗ: ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܐܸܢ ܐܲܢܹܐ ܫܵܬܩܝܼ ܟܹܐܦܹ̈ܐ ܒܸܬ ܡܲܩܘܸܚܝܼ. 41ܘܟܲܕ ܩܘܼܪܒܸܢܹܗ: ܚܸܙܝܵܠܹܗ ܠܡܕܝܼܢَܬܵܐ ܘܒܟܼܹܠܹܗ ܥܲܠܘܼܗ̇. 42ܘܐَܡܝܼܪܹܗ: ܐܸܢ ܝܲܕܥܲܬܝ ܗ݇ܘܵܐ ܒܐܵܗܵܐ ܝܵܘܡܵܐ: ܐܘܼܦ ܐܲܢَܬܝ: ܐܵܢܝܼ ܕܝܼܢܵܐ ܕܫܠܵܡܵܟ̣ܝ: ܐܝܼܢܵܐ ܐܵܕܝܼܵܐ ܦܸܫܠܗَܘܿܢ ܟܘܼܣܝܹܐ ܡ̣ܢ ܥܲܝܢܵܟ̣ܝ̈. 43ܣܵܒܵܒ ܒܸܬ ܐܵܬܝܼ ܥܲܠܵܟ̣ܝ ܝܵܘܡܵܢܹ̈ܐ: ܕܒܸܬ ܕܵܪܝܼ ܣܲܢܓܵܪ ܠܚܵܕܸܪ̈ܘܵܢܵܟ̣ܝ: ܘܒܸܬ ܚܲܪܕܝܼ ܠܵܟ̣ܝ ܡ̣ܢ ܟܠ ܕܘܼܟܵܐ. 44ܘܒܸܬ ܬܵܠܚܝܼ ܠܵܟ̣ܝ: ܘܠܒܢܘܼܢܵܟ̣ܝ̈ ܒܓܵܘܵܟ̣ܝ: ܘܠܹܐ ܫܵܒ̣ܩܝܼ ܓܵܘܵܟ̣ܝ ܟܹܐܦܵܐ ܥܲܠ ܟܹܐܦܵܐ: ܣܵܒܵܒ ܕܠܵܐ ܝܕܸܥܠܵܟ̣ܝ ܙܲܒ̣ܢܵܐ ܕܣܲܚܒܲܪܬܵܟ̣ܝ. 45ܘܟܲܕ ܥܒܼܸܪܹܗ ܠܗܲܝܟܠܵܐ: ܫܘܼܪܹܐܠܹܗ ܠܦܵܠܘܿܛܹܐ ܠܙܵܒ̇ܢܵܢܹ̈ܐ. 46ܘܐَܡܝܼܪܹܗ ܐܸܠܵܝܗܝ: ܟܬܝܼܒܹܐ ܝܠܹܗ: ܒܲܝܬܝܼ ܒܲܝܬܵܐ ܕܨܠܘܿܬܵܐ ܗܵܘܹܐ: ܐܝܼܢܵܐ ܐܲܚܬܘܿܢ ܥܒ̣ܝܼܕܘܼܗܝ ܝܬܘܿܢ ܓܸܦܝܼܬܵܐ ܕܓ̰ܵܠܵܠ̈ܝܹܐ. 47ܘܗ̇ܘ ܡܵܠܘܿܦܹܐ ܗ݇ܘܵܐ ܟܠܝܘܿܡ ܓܵܘ ܗܲܝܟܠܵܐ. ܐܝܼܢܵܐ ܓܘܼܪܵܢܹܐ ܕܟܵܗܢܹ̈ܐ ܘܣܵܦܪܹ̈ܐ ܕܛܵܝܸܦܵܐ ܛܸܥܠܗܘܿܢ ܠܬܵܠܘܿܩܹܗ. 48ܘܠܵܐ ܡܘܼܫَܟ̰ܸܚܠܗܘܿܢ ܡܘܼܕܝܼ ܥܵܒ̣ܕܝܼ ܗ݇ܘܵܘ: ܣܵܒܵܒ ܟܠܹܗ ܛܵܝܸܦܵܐ ܬܸܠܝܵܐ ܗ݇ܘܵܐ ܒܝܹܗ ܠܸܫܡܲܥܝܹܗ.