0:00
/
1ܘܦܠܸܛܠܹܗ ܡ̣ܢ ܬܵܡܵܐ: ܘܐَܬܹܐܠܹܗ ܠܐܲܬܪܹܗ: ܘܐَܙܸܠܗܘܿܢ ܒܵܬَܪܹܗ ܬܲܠܡܝܼܕܘܼ̈ܗܝ. 2ܘܟܲܕ ܗَܘܹܐ ܠܵܗ̇ ܫܲܒܬܵܐ: ܫܘܼܪܹܐܠܹܗ ܠܡܵܠܘܿܦܹܐ ܒܟܢܘܼܫܬܵܐ. ܘܪܵܒܵܐ ܕܫܡܸܥܠܗَܘܿܢ ܥܘܼܓ̰ܸܒܠܗܘܿܢ: ܘܐܵܡܪܝܼ: ܐܵܗܵܐ ܡܐܲܝܟܵܐ ܐܝܼܬ ܠܹܗ ܐܲܢܹܐ: ܘܡܘܼܕܝܼ ܝ݇ܠܵܗ̇ ܥܵܩܸܠܕܵܪܘܼܬܵܐ ܕܦܸܫܠܵܗ̇ ܝܘܼܗَܒܼܸܠܬܵܐ ܐܸܠܹܗ: ܕܗܲܕܟ̣ܵܐ ܚܲܝܠܹܗ ܒܐܝܼܕܘܼ̈ܗܝ ܒܸܗَܘܵܝܵܐ ܝܢܵܐ. 3ܠܹܐ ܝܠܹܗ ܐܵܗܵܐ ܢܲܓ̰ܵܪ: ܒܪܘܿܢܵܐ ܕܡܲܪܝܲܡ: ܘܐܵܚܘܿܢܹܗ ܕܝܲܥܩܘܿܒ̣: ܘܕܝܘܿܣܹܐ: ܘܕܝܼܗܘܼܕܵܐ: ܘܕܫܸܡܥܘܿܢ: ܘܠܹܐ ܝܢܵܐ ܚܵܬܘܵܬܹ̈ܗ ܠܲܐܟ̣ܵܐ ܠܟܸܣܠܲܢ: ܘܟܦܸܪܗܘܿܢ ܒܝܹܗ. 4ܘܐَܡܝܼܪܹܗ ܐܸܠܵܝܗܝ ܝܼܫܘܿܥ: ܠܲܝܬ ܢܒ̣ܝܼܵܐ ܕܒܹܐ ܐܝܼܩܵܪܵܐ ܫܒ̣ܘܿܩ ܡ̣ܢ ܓܵܘ ܐܲܬܪܹܗ: ܘܓܵܘ ܚܸܙܡܘܼ̈ܗܝ: ܘܓܵܘ ܒܲܝܬܹܗ. 5ܘܠܹܐ ܡܵܨܹܐ ܗ݇ܘܵܐ ܕܥܵܒܸܕ ܬܵܡܵܐ ܐܘܼܦ ܠܵܐ ܚܲܕَ ܚܲܝܠܵܐ: ܫܒ̣ܘܿܩ ܡ̣ܢ ܕܥܲܠ ܚܲܕَܟ̰ܵܐ ܡܸܪ̈ܥܝܹܐ ܡܘܼܬܸܒ̣ܠܹܗ ܐܝܼܕܹ̈ܗ ܘܒܘܼܣܡܵܝܠܹܗ. 6ܘܥܘܼܓ̰ܸܒܠܹܗ ܥܲܠ ܠܵܐ ܗܲܝܡܵܢܘܼܬܵܝܗܝ. ܘܒܸܚܕܵܪܵܐ ܗ݇ܘܵܐ ܒܡܵܬܘܵܬܹ̈ܐ ܟܲܕ ܡܵܠܘܿܦܹܐ. 7ܘܩܪܹܐܠܹܗ ܠܬܪܸܥܣܲܪܬܹܗ: ܘܫܘܼܪܹܐܠܹܗ ܕܫܵܕܸܪܗܘܿܢ ܬܪܹܝ ܬܪܹܝ: ܘܝܘܼܗَܒ̣ܵܝܠܹܗ ܗܘܼܟܡܵܐ ܥܲܠ ܪ̈ܘܼܚܹܐ ܛܲܡܹ̈ܐܐ. 8ܘܦܘܼܩܕܵܝܠܹܗ: ܕܠܵܐ ܫܵܩܠܝܼ ܡܸܢܕܝܼ ܩܵܐ ܐܘܼܪܚܵܐ: ܫܒ̣ܘܿܩ ܡ̣ܢ ܚܘܼܛܪܵܐ ܒܢܲܦ̮ܫܹܗ: ܠܵܐ ܓ̰ܲܢܬܵܐ: ܘܠܵܐ ܢܚܵܫܵܐ ܒܟܸܣܬܵܐ. 9ܐܸܠܵܐ ܕܠܵܒ̣ܫܝܼ ܟ̰ܵܪ̈ܘܿܚܹܐ: ܘܠܵܐ ܠܵܒ̣ܫܝܼ ܬܲܪ̈ܬܹܝ ܨܘܼܕܵܪ̈ܵܬܹܐ. 10ܘܐَܡܝܼܪܹܗ ܐܸܠܵܝܗܝ: ܟܠ ܐܲܝܟܵܐ ܕܥܵܒܼܪܝܼܬܘܿܢ ܠܒܲܝܬܵܐ: ܬܵܡܵܐ ܥܲܪܩܸܠܗܘܿܢ ܗܲܠ ܕܦܵܠܛܝܼܬܘܿܢ ܡ̣ܢ ܬܵܡܵܐ. 11ܘܟܠ ܡ̇ܢ ܕܠܵܐ ܩܵܒ̇ܠܝܼܠܵܘܟ̣ܘܿܢ: ܘܠܵܐ ܫܵܡܥܝܼ ܠܵܘܟ̣ܘܿܢ: ܟܲܕ ܦܵܠܛܝܼܬܘܿܢ ܡ̣ܢ ܬܵܡܵܐ: ܢܦܘܿܨܘܿܢ ܬܵܘܙ ܕܬܚܘܿܬ ܐܲܩܠܵܘ̈ܟ̣ܘܿܢ ܠܣܵܗܕܘܼܬܵܝܗܝ. 12ܘܦܠܸܛܠܗܘܿܢ ܘܡܘܼܟܪܸܙܠܗܘܿܢ ܕܬܲܘܸܒܝܼ ܗ݇ܘܵܘ. 13ܘܪܵܒܵܐ ܕܲܝܘܹ̈ܐ ܦܵܠܛܝܼ ܗ݇ܘܵܘ: ܘܡܵܫܚܝܼ ܗ݇ܘܵܘ ܒܡܸܫܚܵܐ ܪܵܒܵܐ ܡܸܪ̈ܥܝܹܐ ܘܒܵܣܡܝܼ ܗ݇ܘܵܘ ܠܗ݇ܘܿܢ. 14ܘܫܡܸܥܠܹܗ ܗܹܪܘܿܕܸܣ ܡܲܠܟܵܐ: ܣܵܒܵܒ ܕܗَܘܹܐܠܹܗ ܝܕܸܥܝܵܐ ܫܸܡܹܗ: ܘܐَܡܝܼܪܹܗ: ܝܘܿܚܲܢܵܢ ܡܲܥܡܕܵܢܵܐ ܩܸܡܠܹܗ ܡ̣ܢ ܡܝܼܬܹ̈ܐ: ܘܣܵܒܵܒ ܕܐܵܗܵܐ ܚܲܝܠܹ̈ܐ ܦܝܵܫܵܐ ܝܢܵܐ ܦܠܝܼܚܹܐ ܒܝܹܗ. 15ܐ݇ܚܹܪ̈݇ܢܹܐ ܐܵܡܪܝܼ ܗ݇ܘܵܘ: ܕܐܹܠܝܼܵܐ ܝܠܹܗ: ܘܐ݇ܚܹܪ̈݇ܢܹܐ ܐܵܡܪܝܼ: ܕܢܒ̣ܝܼܵܐ ܝܠܹܗ: ܐܲܝܟܼ ܚܲܕَ ܡ̣ܢ ܢܒ̣̈ܝܹܐ. 16ܐܝܼܢܵܐ ܟܲܕ ܫܡܸܥܠܹܗ ܗܹܪܘܿܕܸܣ: ܐَܡܝܼܪܹܗ: ܝܘܿܚܲܢܵܢ: ܗ̇ܘ ܕܐܵܢܵܐ ܦܪܸܡܠܝܼ ܪܹܫܹܗ: ܐܵܗܵܐ ܩܝܼܡܵܐ ܝܠܹܗ. 17ܣܵܒܵܒ ܕܗܹܪܘܿܕܸܣ ܒܓܵܢܹܗ ܫܘܼܕܪܵܐ ܗ݇ܘܵܐ ܕܒ̣ܝܼܩܹܗ ܠܝܘܿܚܲܢܵܢ ܘܕܸܪܝܹܗ ܓܵܘ ܒܹܝܬ ܐܲܣܝܼܪܹ̈ܐ: ܒܘܼܬ ܗܹܪܘܿܕܝܼܵܐ ܒܲܟ̣ܬܵܐ ܕܦܝܼܠܝܼܦܘܿܣ ܐܵܚܘܿܢܘܼܗܝ: ܣܵܒܵܒ ܕܓܒ̣ܝܼܪܘܼܗ̇ ܗ݇ܘܵܐ. 18ܣܵܒܵܒ ܕܐܵܡܸܪ ܗ݇ܘܵܐ ܝܘܿܚܲܢܵܢ ܠܗܹܪܘܿܕܸܣ: ܕܠܹܐ ܝ݇ܠܵܗ̇ ܒܕܲܣܬܘܼܪ ܐܸܠܘܼܟܼ ܕܓܵܒ̣ܪܸܬ ܒܲܟ̣ܬܵܐ ܕܐܵܚܘܿܢܘܼܟ. 19ܘܗ̇ܝ ܗܹܪܘܿܕܝܼܵܐ ܕܒ̣ܝܼܩܬܵܐ ܗ݇ܘܵܐ ܟܝܼܢ ܡܸܢܹܗ: ܘܒܲܥܝܵܐ ܗ݇ܘܵܐ ܠܸܩܛܵܠܹܗ: ܘܠܹܐ ܡܵܨܝܵܐ ܗ݇ܘܵܐ. 20ܣܵܒܵܒ ܗܹܪܘܿܕܸܣ ܟܹܐ ܙܵܕܸܥ ܗ݇ܘܵܐ ܡ̣ܢ ܝܘܿܚܲܢܵܢ: ܕܟܹܐ ܝܵܕܸܥ ܗ݇ܘܵܐ ܠܹܗ ܐ݇ܢܵܫܵܐ ܙܲܕܝܼܩܵܐ ܘܩܲܕܝܼܫܵܐ ܝܗܘܵܐ: ܘܢܵܛܸܪ ܗ݇ܘܵܐ ܠܹܗ. ܘܟܲܕ ܫܵܡܹܥ ܗ݇ܘܵܐ ܠܹܗ: ܪܵܒܵܐ ܥܵܒܸܕ ܗ݇ܘܵܐ: ܘܒܚܲܕܘܼܬܵܐ ܟܹܐ ܫܵܡܹܥ ܗ݇ܘܵܐ ܠܹܗ. 21ܘܗَܘܹܐܠܹܗ ܝܵܘܡܵܐ ܝܕܸܥܝܵܐ: ܟܲܕ ܗܹܪܘܿܕܸܣ ܒܒܹܝܬ ܝܲܠܕܹܗ ܥܒܸܕܠܹܗ ܡܸܫܬܘܼܬܵܐ ܠܓܘܼܪ̈ܵܢܘܼܗܝ: ܘܠܟܝܼܠܝܼܵܪ̈ܟܹܐ: ܘܠܪܹ̈ܫܵܢܹܐ ܕܓܠܝܼܠܵܐ. 22ܘܥܒܼܸܪܵܗ̇ ܒܪܵܬܵܗ̇ ܕܗܹܪܘܿܕܝܼܵܐ ܪܩܸܕܠܵܗ̇: ܘܫܦܸܪܵܐ ܠܗܹܪܘܿܕܸܣ ܘܠܐܵܢܝܼ ܕܝܼܗ݇ܘܵܘ ܝܬܝܼܒܹܐ ܠܨܘܼܦܪܵܐ ܥܲܡܹܗ: ܘܐَܡܝܼܪܹܗ ܡܲܠܟܵܐ ܠܒܪܵܬܵܐ: ܛܠܘܿܒܝ ܡܸܢܝܼ ܡܸܢܕܝܼ ܕܒܵܣܡܵܐ ܠܵܟ̣ܝ: ܘܒܸܬ ܝܵܗَܒܸܢܵܟ̣ܝ. 23ܘܝܡܹܠܹܗ ܐܸܠܵܗ̇: ܕܡܸܢܕܝܼ ܕܛܵܠܒܲܬܝ ܡܸܢܝܼ ܒܸܬ ܝܵܗَܒܸܢܵܟ̣ܝ: ܗܲܠ ܦܲܠܓܵܗ̇ ܕܡܲܠܟܘܼܬܝܼ. 24ܐܝܼܢܵܐ ܗ̇ܝ ܦܠܸܛܠܵܗ̇ ܘܐَܡܝܼܪܵܗ̇ ܠܝܸܡܘܼܗ̇: ܡܘܼܕܝܼ ܛܵܠܒܵܢ: ܐ݇ܡܸܪܵܗ̇ ܐܸܠܵܗ̇: ܪܹܫܹܗ ܕܝܘܿܚܲܢܵܢ ܡܲܥܡܕܵܢܵܐ. 25ܘܕܲܪܣܵܥܲܬ ܥܒܼܸܪܵܗ̇ ܒܝܲܠܙܘܼܝ ܠܟܸܣ ܡܲܠܟܵܐ: ܘܛܠܸܒܠܵܗ̇: ܒܹܐܡܵܪܵܗ̇: ܒܲܥܝܵܢ ܒܐܵܗܵܐ ܣܵܥܲܬ ܝܵܗَܒܸܬ ܠܝܼ ܥܲܠ ܛܲܫܬ ܪܹܫܹܗ ܕܝܘܿܚܲܢܵܢ ܡܲܥܡܕܵܢܵܐ. 26ܘܦܫܸܡܠܹܗ ܡܲܠܟܵܐ ܪܵܒܵܐ: ܐܝܼܢܵܐ ܣܵܒܵܒ ܕܡܵܘܡܵܬܹ̈ܐ ܘܒܚܵܬܸܪ ܕܐܵܢܝܼ ܕܝܼܗ݇ܘܵܘ ܝܬܝܼܒܹܐ ܠܨܘܼܦܪܵܐ ܥܲܡܹܗ: ܠܵܐ ܒܣܸܡܠܵܐ ܠܹܗ ܠܸܚܣܵܟ̣ܵܐ ܡܸܢܵܗ̇. 27ܘܕܲܪܣܵܥܲܬ ܫܘܼܕܸܪܹܗ ܡܲܠܟܵܐ ܓ̰ܲܠܵܕ: ܘܦܩܸܕܠܹܗ ܕܡܲܝܬَܝܹܐ ܗ݇ܘܵܐ ܪܹܫܹܗ. ܘܐَܙܸܠܹܗ ܦܪܸܡܠܹܗ ܪܹܫܹܗ ܓܵܘ ܒܹܝܬ ܐܲܣܝܼܪܹ̈ܐ. 28ܘܡܘܼܬَܝܠܹܗ ܪܹܫܹܗ ܒܛܲܫܬ: ܘܝܘܼܗَܒܼܸܠܹܗ ܠܒܪܵܬܵܐ: ܘܒܪܵܬܵܐ ܝܸܗܒܸܠܵܗ̇ ܠܝܸܡܘܼܗ̇. 29ܘܫܡܸܥܠܗَܘܿܢ ܬܲܠܡܝܼܕܘܼ̈ܗܝ: ܘܐ݇ܬܹܐܠܗܘܿܢ ܫܩܸܠܗܘܿܢ ܫܠܲܕܹܗ: ܘܡܘܼܬܒ̣ܵܠܗܘܿܢ ܓܵܘ ܒܹܝܬ ܩܒ̣ܘܼܪܵܐ. 30ܘܓ̰ܡܸܥܠܗܘܿܢ ܫܠܝܼܚܹ̈ܐ ܠܟܸܣ ܝܼܫܘܿܥ: ܘܡܘܼܕܸܥܠܗܘܿܢ ܐܸܠܹܗ ܟܠ ܡܸܢܕܝܼ ܕܥܒܸܕܠܗܘܿܢ: ܘܟܠ ܡܸܢܕܝܼ ܕܡܘܼܠܸܦܠܗܘܿܢ. 31ܘܐَܡܝܼܪܹܗ: ܐܸܠܵܝܗܝ: ܬܹܐܡܘܿܢ ܐܵܙܵܠَܚ ܠܕܘܼܟܵܐ ܚܵܪܵܒܵܐ ܒܢܲܦ̮ܫܲܢ: ܘܡܲܢܝܸܚܘܿܢ ܚܲܕَܟ̰ܵܐ. ܣܵܒܵܒ ܐܝܼܬ ܗ݇ܘܵܘ ܪܵܒܵܐ ܒܹܐܙܵܠܵܐ ܘܒܹܐܬܵܝܵܐ: ܘܠܲܝܬ ܗ݇ܘܵܐ ܠܗ݇ܘܿܢ ܡܵܘܗܠܲܬ: ܐܘܼܦ ܠܵܐ ܠܹܐܟ̣ܵܠܵܐ. 32ܘܐَܙܸܠܗܘܿܢ ܠܚܕܵܐ ܕܘܼܟܵܐ ܚܵܪܵܒܵܐ ܒܓܵܡܝܼ ܒܢܲܦ̮ܫܵܝܗܝ. 33ܘܚܸܙܝܵܝܠܗܘܿܢ ܟܲܕ ܒܹܐܙܵܠܵܐ: ܘܪܵܒܵܐ ܐ݇ܢܵܫܹ̈ܐ ܝܕܸܥܝܵܝܠܗܘܿܢ: ܘܒܒܸܪܙܵܐ ܪܚܸܛܠܗܘܿܢ ܠܬܵܡܵܐ ܡ̣ܢ ܟܠܵܝܗܝ ܡܕܝܼܢܵܬܹ̈ܐ: ܘܩܘܼܕܸܡܠܗܘܿܢ ܐܸܠܵܝܗܝ. 34ܘܦܠܸܛܠܹܗ ܝܼܫܘܿܥ ܚܙܹܐܠܹܗ ܟܸܢܫܵܐ ܓܘܼܪܵܐ: ܘܪܘܼܚܸܡܠܹܗ ܥܲܠܵܝܗܝ: ܕܝܼܗ݇ܘܵܘ ܐܲܝܟܼ ܥܸܪ̈ܒܹܐ ܕܠܲܝܬ ܠܗ݇ܘܿܢ ܪܵܥܝܵܐ. ܘܫܘܼܪܹܐܠܹܗ ܠܡܵܠܘܿܦܵܝܗܝ ܪܵܒܵܐ ܡܸܢܕܝܵܢܹ̈ܐ. 35ܘܟܲܕ ܗَܘܹܐ ܠܵܗ̇ ܥܕܵܢܵܐ ܪܵܒܵܐ: ܐ݇ܬܹܐܠܗܘܿܢ ܠܟܸܣܠܹܗ ܬܲܠܡܝܼܕܘܼ̈ܗܝ: ܘܐܵܡܪܝܼ ܐܸܠܹܗ: ܐܵܗܵܐ ܕܘܼܟܵܐ ܚܵܪܵܒܵܐ ܝ݇ܠܵܗ̇: ܘܥܕܵܢܵܐ ܪܵܒܵܐ ܥܒ̣ܝܼܪܬܵܐ ܝ݇ܠܵܗ̇. 36ܫܵܕܸܪܗܘܿܢ ܕܐܵܙܠَܝܼ ܠܩܸܫ̈ܠܵܚܹ̈ܐ (ܠܙܘܼܡܵܢܹ̈ܐ) ܕܚܵܕܸܪ̈ܘܵܢܲܢ ܘܠܡܵܬܘܵܬܹ̈ܐ: ܘܙܵܒ̣ܢܝܼ ܠܗ݇ܘܿܢ ܡܸܢܕܝܼ ܠܹܐܟ̣ܵܠܵܐ. 37ܐܝܼܢܵܐ ܗ̇ܘ ܓ̰ܘܼܘܸܒܠܹܗ ܘܐَܡܝܼܪܹܗ ܐܸܠܵܝܗܝ: ܗܲܒَܠܘܿܢ ܠܗ݇ܘܿܢ ܐܲܚܬܘܿܢ ܠܹܐܟ̣ܵܠܵܐ. ܐܵܡܪܝܼ ܐܸܠܹܗ: ܐܵܙܵܠَܚ ܙܵܒ̣ܢܵܚ ܠܲܚܡܵܐ ܕܬܪܹܝܡܵܐܐ ܕܹܝܢܵܪܹ̈ܐ ܘܝܵܗَܒ̣ܵܚ ܠܗ݇ܘܿܢ ܠܹܐܟ̣ܵܠܵܐ. 38ܐܝܼܢܵܐ ܗ̇ܘ ܐَܡܝܼܪܹܗ ܐܸܠܵܝܗܝ: ܟܡܵܐ ܠܲܚܡܹ̈ܐ ܐܝܼܬ ܠܵܘܟ̣ܘܿܢ: ܙܹܠَܡܘܿܢ ܚܙܹܝܡܘܿܢ. ܘܟܲܕ ܝܕܸܥܠܗܘܿܢ: ܐܵܡܪܝܼ ܐܸܠܹܗ: ܚܲܡܫܵܐ: ܘܬܪܹܝ ܢܘܼܢܹ̈ܐ. 39ܘܦܩܝܼܕܵܝܠܹܗ ܕܡܲܬܝܸܒ̣ܝܼ ܗ݇ܘܵܘ ܠܟܠܵܝܗܝ ܐ݇ܢܵܫܹ̈ܐ ܕܲܣܬܹ̈ܐ ܕܲܣܬܹ̈ܐ: ܥܲܠ ܓܸܠܵܐ ܩܝܼܢܵܐ. 40ܘܝܬܸܒ̣ܠܗܘܿܢ ܕܲܣܬܹ̈ܐ ܕܲܣܬܹ̈ܐ: ܕܡܵܐܐ ܡܵܐܐ: ܘܕܚܲܡܫܝܼ ܚܲܡܫܝܼ. 41ܘܫܩܸܠܹܗ ܠܐܵܢܝܼ ܚܲܡܫܵܐ ܠܲܚܡܹ̈ܐ ܘܬܪܹܝ ܢܘܼܢܹ̈ܐ: ܘܚܸܪܹܗ ܒܫܡܲܝܵܐ: ܘܒܘܼܪܸܟ̣ܠܹܗ ܘܩܨܹܐܠܹܗ ܠܲܚܡܹ̈ܐ: ܘܝܘܼܗَܒܼܸܠܹܗ ܠܬܲܠܡܝܼܕܘܼ̈ܗܝ ܕܡܲܬܒ̣ܝܼ ܩܵܕَܡܵܝܗܝ: ܘܠܐܵܢܝܼ ܬܪܹܝ ܢܘܼܢܹ̈ܐ ܦܘܼܠܹܠܗܘܿܢ ܠܟܠܵܝܗܝ. 42ܘܐَܟܼܸܠܗܘܿܢ ܟܠܵܝܗܝ ܘܣܒܹܥܠܗܘܿܢ. 43ܘܫܩܸܠܗܘܿܢ ܩܸܛܥܵܛܹ̈ܐ: ܬܪܸܥܣܲܪ ܩܘܼܦܹ̈ܐ ܡܸܠܝܹ̈ܐ: ܘܡ̣ܢ ܢܘܼܢܹ̈ܐ. 44ܐܝܼܢܵܐ ܐܵܢܝܼ ܕܐَܟܼܸܠܗܘܿܢ ܠܲܚܡܵܐ ܝܼܗ݇ܘܵܘ ܚܲܡܫܵܐ ܐܲܠܦܹ̈ܐ ܐ݇ܢܵܫܹ̈ܐ. 45ܘܕܲܪܣܵܥܲܬ ܡܘܼܠܝܸܨܠܹܗ ܠܬܲܠܡܝܼܕܘܼ̈ܗܝ ܕܐܵܣܩܝܼ ܠܓܵܡܝܼ: ܘܐܵܙܠَܝܼ ܩܵܕَܡܘܼܗܝ ܠܡܲܪܙܵܐ ܐ݇ܚܹܪ݇ܢܵܐ ܠܒܹܝܬ ܨܲܝܵܕܵܐ: ܗܲܠ ܕܗ̇ܘ ܫܵܕܸܪ ܗ݇ܘܵܐ ܠܟܸܢܫܵܐ. 46ܘܟܲܕ ܫܒ̣ܝܼܩܵܝܠܹܗ: ܐَܙܸܠܹܗ ܠܛܘܼܪܵܐ ܠܨܵܠܘܿܝܹܐ. 47ܐܝܼܢܵܐ ܟܲܕ ܗَܘܹܐܠܹܗ ܪܲܡܫܵܐ: ܓܵܡܝܼ ܒܒܹܝܦܲܠܓܵܐ ܕܝܵܡܵܐ ܗ݇ܘܵܐ: ܘܗ̇ܘ ܒܢܲܦ̮ܫܹܗ ܥܲܠ ܐܲܪܥܵܐ. 48ܘܚܸܙܝܵܝܠܹܗ ܥܘܼܓ̰ܸܙܹ̈ܐ ܟܲܕ ܒܸܛܪܵܝܵܐ: ܣܵܒܵܒ ܕܦܵܘܚܵܐ ܠܒܲܪܩܘܼܒ̣ܠܵܝܗܝ ܗ݇ܘܵܐ: ܘܐܲܝܟܼ ܒܒܲܕܠܵܐ ܕܐܲܪܒܲܥ ܕܠܲܝܠܹܐ ܐَܬܹܐܠܹܗ ܠܟܸܣܠܵܝܗܝ: ܟܲܕ ܒܸܚܕܵܪܵܐ ܥܲܠ ܝܵܡܵܐ: ܘܒܵܥܝܹܐ ܕܥܵܒܸܪ ܗ݇ܘܵܐ ܠܗ݇ܘܿܢ. 49ܘܐܵܢܝܼ ܚܙܹܐܠܗܘܿܢ ܐܸܠܹܗ ܒܸܚܕܵܪܵܐ ܥܲܠ ܝܵܡܵܐ: ܘܚܫܸܒ̣ܠܗܘܿܢ ܕܚܸܙܘܵܐ ܕܵܓܵܠܵܐ ܝܠܹܗ: ܘܡܘܼܩܘܸܚܠܗܘܿܢ. 50ܣܵܒܵܒ ܟܠܵܝܗܝ ܚܙܹܐܠܗܘܿܢ ܐܸܠܹܗ ܘܙܕܸܥܠܗܘܿܢ. ܘܕܲܪܣܵܥܲܬ ܗܘܼܡܙܸܡܠܹܗ ܥܲܡܵܝܗܝ: ܘܐَܡܝܼܪܹܗ ܐܸܠܵܝܗܝ: ܦܘܼܫܘܿܢ ܠܸܒܵܢܹ̈ܐ: ܐܵܢܵܐ ܝܘܸܢ: ܠܵܐ ܙܵܕܥܝܼܬܘܿܢ. 51ܘܐ݇ܣܸܩܠܹܗ ܠܟܸܣܠܵܝܗܝ ܠܓܵܡܝܼ: ܘܫܠܹܐܠܹܗ ܦܵܘܚܵܐ. ܘܪܵܒܵܐ ܥܵܓ̰ܒܝܼ ܗ݇ܘܵܘ ܒܓܵܢܵܝܗܝ. 52ܣܵܒܵܒ ܠܹܐ ܗ݇ܘܵܘ ܦܘܼܪܡܝܹܐ ܡܐܵܢܝܼ ܠܲܚܡܹ̈ܐ: ܣܵܒܵܒ ܕܠܸܒܵܝܗܝ ܩܸܫܝܵܐ ܗ݇ܘܵܐ. 53ܘܟܲܕ ܥܒܸܪܗܘܿܢ ܠܡܲܪܙܵܐ ܐ݇ܚܹܪ݇ܢܵܐ: ܐ݇ܬܹܐܠܗܘܿܢ ܠܐܲܪܥܵܐ ܕܓܹܢܣܲܪ: ܘܓܪܸܫܠܗܘܿܢ ܠܒܸܪܙܵܐ. 54ܘܟܲܕ ܦܠܸܛܠܗܘܿܢ ܡ̣ܢ ܓܵܡܝܼ: ܕܲܪܣܵܥܲܬ ܝܕܸܥܠܗܘܿܢ ܐܸܠܹܗ. 55ܘܪܚܸܛܠܗܘܿܢ ܒܟܠܹܗ ܗ̇ܘ ܐܲܬܪܵܐ ܚܵܕܸܪ̈ܘܵܢܹܐ: ܘܫܘܼܪܹܠܗܘܿܢ ܠܡܲܝܬܘܼܝܹܐ ܥܲܠ ܫܘܝܼܵܬܹ̈ܐ ܠܐܵܢܝܼ ܕܡܸܪܥܝܹܐ ܗ݇ܘܵܘ: ܠܐܲܝܟܵܐ ܕܫܵܡܥܝܼ ܗ݇ܘܵܘ ܕܝܼܗ݇ܘܵܐ. 56ܘܐܲܝܟܵܐ ܕܥܵܒܼܸܪ ܗ݇ܘܵܐ: ܓܵܘ ܡܵܬܘܵܬܹ̈ܐ ܝܲܢ ܓܵܘ ܡܕܝܼܢܵܬܹ̈ܐ: ܝܲܢ ܓܵܘ ܙܘܼܡܵܢܹ̈ܐ: ܓܵܘ ܫܘܼܩܹ̈ܐ ܟܹܐ ܡܲܬܒ̣ܝܼ ܗ݇ܘܵܘ ܡܸܪ̈ܥܝܹܐ: ܘܦܲܪܦܸܠܝܼ ܗ݇ܘܵܘ ܒܝܹܗ: ܕܐܸܢ ܐܘܼܦ ܒܫܸܦܘܼܠܵܐ ܕܠܒܸܫܬܹܗ ܕܵܩܪܝܼ ܗ݇ܘܵܘ. ܘܟܠܵܝܗܝ ܐܵܢܝܼ ܕܕܩܸܪܗܘܿܢ ܒܝܹܗ ܦܸܫܠܗَܘܿܢ ܒܘܼܣܡܹܐ..