0:00
/
1ܘܐَܡܝܼܪܹܗ ܐܸܠܵܝܗܝ: ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܐܝܼܬ ܐ݇ܢܵܫܹ̈ܐ ܕܟܸܠܝܹܐ ܠܲܐܟ̣ܵܐ: ܕܠܹܐ ܛܵܥܡܝܼ ܡܵܘܬܵܐ: ܗܲܠ ܕܚܵܙܝܼ ܡܲܠܟܘܼܬܹܗ ܕܐܲܠܵܗܵܐ ܐܬܝܼܬܵܐ ܒܚܲܝܠܵܐ. 2ܘܒܵܬَܪ ܐܸܫܬܵܐ ܝܵܘܡܵܢܹ̈ܐ ܠܘܼܒܸܠܹܗ ܝܼܫܘܿܥ ܠܟܹܐܦܵܐ ܘܠܝܲܥܩܘܿܒ̣ ܘܠܝܘܿܚܲܢܵܢ: ܘܡܘܼܣܩܵܝܠܹܗ ܠܛܘܼܪܵܐ ܪܵܡܵܐ ܒܢܲܦ̮ܫܵܝܗܝ: ܘܦܸܫܠܹܗ ܫܘܼܚܠܸܦܵܐ ܩܵܕَܡܝܼ. 3ܘܝܵܗَܒ̣ܵܐ ܗ݇ܘܵܐ ܫܲܦ̮ܩܵܐ ܠܒܸܫܬܹܗ: ܡܲܚܘܘܼܪܹܐ ܪܵܒܵܐ: ܕܵܐܟ̣ܝܼ ܕܡܲܚܘܸܪܵܢܵܐ ܒܐܲܪܥܵܐ ܠܹܐ ܡܵܨܹܐ ܠܡܲܚܘܘܼܪܹܐ. 4ܘܦܸܫܠܗَܘܿܢ ܚܸܙܝܹܐ ܐܸܠܵܝܗܝ ܡܘܼܫܹܐ ܘܐܹܠܝܼܵܐ: ܟܲܕ ܗܲܡܙܘܼܡܹܐ ܥܲܡ ܝܼܫܘܿܥ. 5ܓ̰ܘܼܘܸܒܠܹܗ ܟܹܐܦܵܐ ܘܐَܡܝܼܪܹܗ ܠܝܼܫܘܿܥ: ܪܵܒܝܼ: ܨܦܵܝܝܼ ܝ݇ܠܵܗ̇ ܐܸܠܲܢ ܕܠܲܐܟ̣ܵܐ ܗܵܘܵܚ: ܘܥܵܒ̣ܕܵܚ ܬܠܵܬَ ܡܛܲܠܠܹ̈ܐ: ܚܕܵܐ ܐܸܠܘܼܟܼ: ܘܚܕܵܐ ܠܡܘܼܫܹܐ: ܘܚܕܵܐ ܠܐܹܠܝܼܵܐ. 6ܣܵܒܵܒ ܠܵܐ ܝܕܸܥܠܹܗ ܡܘܼܕܝܼ ܐܵܡܸܪ ܗ݇ܘܵܐ: ܣܵܒܵܒ ܕܒܙܕܘܿܥܬܵܐ ܗَܘܹܐܠܗَܘܿܢ. 7ܘܗَܘܹܐ ܠܵܗ̇ ܥܢܵܢܵܐ ܘܥܒܸܕܠܵܗ̇ ܛܸܠܵܢܝܼܬܵܐ ܥܲܠܵܝܗܝ: ܘܩܵܠܵܐ ܐَܬܹܐܠܹܗ ܡ̣ܢ ܥܢܵܢܵܐ: ܒܹܐܡܵܪܵܐ: ܐܵܗܵܐ ܝܠܹܗ ܒܪܘܿܢܝܼ ܡܘܼܚܸܒܵܐ: ܐܸܠܹܗ ܫܡܸܥܡܘܿܢ. 8ܘܡܸܢܫܸܠܬܵܢܹܐ: ܟܲܕ ܚܸܪܗܘܿܢ: ܐ݇ܚܹܪ݇ܢܵܐ ܠܐ݇ܢܵܫܵܐ ܠܵܐ ܚܙܹܐܠܗܘܿܢ: ܫܒ̣ܘܿܩ ܡ̣ܢ ܝܼܫܘܿܥ ܒܢܲܦ̮ܫܹܗ ܥܲܡܵܝܗܝ. 9ܘܟܲܕ ܒܸܨܠܵܝܵܐ ܗ݇ܘܵܘ ܡ̣ܢ ܛܘܼܪܵܐ: ܦܩܝܼܕܵܝܠܹܗ ܕܠܐ݇ܢܵܫܵܐ ܠܵܐ ܐܵܡܪܝܼ ܡܸܢܕܝܼ ܕܚܙܹܐܠܗܘܿܢ: ܐܸܠܵܐ ܐܸܢ ܐܝܼܡܲܢ ܕܩܵܝܸܡ ܒܪܘܿܢܹܗ ܕܐ݇ܢܵܫܵܐ ܡ̣ܢ ܡܝܼܬܹ̈ܐ. 10ܘܕܒ̣ܝܼܩܵܠܗܘܿܢ ܠܗܹܡܸܙܡܵܢ: ܘܒܵܩܪܝܼ ܗ݇ܘܵܘ ܓܵܘ ܓܵܢܵܝܗܝ: ܡܘܼܕܝܼ ܝ݇ܠܵܗ̇ ܕܩܵܝܸܡ ܡ̣ܢ ܡܝܼܬܹ̈ܐ. 11ܘܒܵܩܪܝܼ ܗ݇ܘܵܘ ܡܸܢܹܗ: ܘܐܵܡܪܝܼ: ܩܵܡܘܿܕܝܼ ܗܲܕܟ̣ܵܐ ܟܹܐ ܐܵܡܪܝܼ ܣܵܦܪܹ̈ܐ: ܕܐܹܠܝܼܵܐ ܘܵܓ̰ܸܒ ܝ݇ܠܵܗ̇ ܕܐܵܬܹܐ ܩܵܕَܡܵܝܬܵܐ. 12ܐَܡܝܼܪܹܗ ܐܸܠܵܝܗܝ: ܐܹܠܝܼܵܐ ܒܫܲܪܝܼܪܘܼܬܵܐ ܒܹܐܬܵܝܵܐ ܝܠܹܗ ܩܵܕَܡܵܝܬܵܐ: ܕܟܠ ܡܸܢܕܝܼ ܬܵܪܸܨ: ܘܕܵܐܟ̣ܝܼ ܕܟܬܝܼܒ̣ܵܐ ܝܠܹܗ ܥܲܠ ܒܪܘܿܢܹܗ ܕܐ݇ܢܵܫܵܐ: ܕܪܵܒܵܐ ܩܵܒܸ̇ܠ ܚܲܫܵܐ: ܘܦܵܐܹܫ ܡܘܼܣܠܝܼܵܐ. 13ܐܸܠܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܐܘܼܦ ܐܹܠܝܼܵܐ ܐܬܝܼܵܐ ܝܠܹܗ: ܘܥܒܸܕܠܗܘܿܢ ܒܝܹܗ ܟܠ ܡܸܢܕܝܼ ܕܒܣܸܡܠܵܐ ܠܗ݇ܘܿܢ: ܕܵܐܟ̣ܝܼ ܕܝܼܠܹܗ ܟܬܝܼܒ̣ܵܐ ܥܲܠܘܼܗܝ. 14ܘܟܲܕ ܐَܬܹܐܠܹܗ ܠܟܸܣ ܬܲܠܡܝܼܕܘܼ̈ܗܝ: ܚܙܹܐܠܹܗ ܠܟܸܣܠܝܼ ܟܸܢܫܵܐ ܪܵܒܵܐ: ܘܣܵܦܪܹ̈ܐ ܟܲܕ ܒܸܕܪܵܫܵܐ ܥܲܡܵܝܗܝ. 15ܘܕܲܪܣܵܥܲܬ ܟܠܹܗ ܟܸܢܫܵܐ ܚܙܹܐܠܗܘܿܢ ܐܸܠܹܗ: ܘܚܓ̰ܸܠܗܘܿܢ: ܘܪܚܸܛܠܗܘܿܢ ܕܪܹܠܗܘܿܢ ܫܠܵܡܵܐ ܐܸܠܹܗ. 16ܘܒܘܼܩܸܪܹܗ ܡ̣ܢ ܣܵܦܪܹ̈ܐ: ܩܵܡܘܿܕܝܼ ܒܸܕܪܵܫܵܐ ܝܬܘܿܢ ܥܲܡܵܝܗܝ. 17ܘܓ̰ܘܼܘܸܒܠܹܗ ܚܲܕَ ܡ̣ܢ ܟܸܢܫܵܐ ܘܐَܡܝܼܪܹܗ: ܡܲܠܦܵܢܵܐ: ܡܘܼܬَܝܹܠܝܼ ܒܪܘܿܢܝܼ ܠܟܸܣܠܘܼܟܼ: ܕܐܝܼܬ ܠܹܗ ܪܘܼܚܵܐ ܠܲܥܠܹܐ. 18ܘܐܲܝܟܵܐ ܕܕܵܒ̣ܩܵܐ ܠܹܗ: ܟܹܐ ܟ̰ܲܢܟ̰ܸܪܵܐ ܠܹܗ: ܕܟܹܐ ܓܲܒܓܸܒ ܦܘܼܡܹܗ: ܘܟܹܐ ܚܲܪܚܸܟ̰ ܟܹܟܘܼ̈ܗܝ: ܘܟܹܐ ܒܵܪܸܙ. ܘܐَܡܸܪܝܼ ܠܬܲܠܡܝܼܕܘܼ̈ܟ ܕܦܵܠܛܝܼ ܠܹܗ: ܘܠܵܐ ܡܨܹܐܠܗܘܿܢ. 19ܓ̰ܘܼܘܸܒܠܹܗ ܗ̇ܘ ܘܐَܡܝܼܪܹܗ ܐܸܠܵܝܗܝ: ܝܵܐ ܐܘܼܓ̰ܵܓ̣ ܠܵܐ ܗܘܼܡܸܢܬܵܐ: ܗܲܠ ܐܝܼܡܲܢ ܗܵܘܸܢ ܥܡܵܘܟ̣ܘܿܢ: ܘܗܲܠ ܐܝܼܡܲܢ ܩܵܒ̇ܠܸܢܵܘܟ̣ܘܿܢ: ܡܲܝܬَܡܘܿܢ ܠܹܗ ܠܟܸܣܠܝܼ. 20ܘܡܘܼܬَܝܹܠܗܘܿܢ ܐܸܠܹܗ ܠܟܸܣܠܹܗ ܘܟܲܕ ܚܙܹܐܠܹܗ: ܕܲܪܣܵܥܲܬ ܪܘܼܚܵܐ ܟ̰ܘܼܢܟ̰ܸܪܵܐ ܐܸܠܹܗ: ܘܢܦܸܠܹܗ ܥܲܠ ܐܲܪܥܵܐ: ܘܥܘܼܪܒܸܛܠܹܗ: ܘܓܲܒܓܘܼܒܹܐ ܦܘܼܡܹܗ. 21ܘܒܘܼܩܸܪܹܗ ܡ̣ܢ ܒܵܒܹܗ: ܟܡܵܐ ܙܲܒ̣ܢܵܐ ܐܝܼܬ ܡ̣ܢ ܕܐܵܗܵܐ ܗَܘܹܐ ܠܵܗ̇ ܐܸܠܹܗ: ܘܗ̇ܘ ܐَܡܝܼܪܹܗ: ܡ̣ܢ ܝܵܠܕ݇ܘܼܬܹܗ. 22ܘܪܵܒܵܐ ܙܲܒ̣ܢܹ̈ܐ ܕܪܹܠܵܗ̇ ܐܸܠܹܗ ܒܢܘܼܪܵܐ ܘܒܡ̈ܝܼܵܐ: ܕܬܵܠܩܵܐ ܗ݇ܘܵܐ ܠܹܗ. ܐܸܠܵܐ ܐܸܢ ܡܸܢܕܝܼ ܡܵܨܸܬ: ܪܵܚܸܡ ܥܲܠܲܢ: ܗܲܝܸܪܲܢ. 23ܐܵܡܸܪ ܐܸܠܹܗ ܝܼܫܘܿܥ: ܐܸܢ ܡܵܨܸܬ ܕܗܲܡܸܢܸܬ: ܟܠ ܡܸܢܕܝܼ ܟܹܐ ܡܵܨܹܐ ܕܗܵܘܹܐ ܠܡ̇ܢ ܕܗܲܡܸܢ. 24ܘܕܲܪܣܵܥܲܬ ܡܘܼܩܘܸܚܠܹܗ ܒܵܒܹܗ ܕܝܵܠܵܕَܐ: ܟܲܕ ܒܸܒܟ̣ܵܝܵܐ: ܘܐَܡܝܼܪܹܗ: ܗܲܡܘܼܢܹܐ ܝܘܸܢ: ܗܲܝܸܪ ܠܠܵܐ ܗܲܝܡܵܢܘܼܬܝܼ. 25ܐܝܼܢܵܐ ܟܲܕ ܚܙܹܐܠܹܗ ܝܼܫܘܿܥ ܕܒܸܪܚܵܛܵܐ ܟܸܢܫܵܐ ܘܒܸܓ̰ܡܲܥܝܵܐ: ܢܓ̰ܘܼܠܹܗ ܒܗ̇ܝ ܪܘܼܚܵܐ ܛܲܡܹܐܐ: ܘܐَܡܝܼܪܹܗ ܐܸܠܵܗ̇: ܪܘܼܚܵܐ ܟܲܪܹܐ ܘܠܲܥܠܹܐ: ܐܵܢܵܐ ܦܵܩܘܿܕܹܐ ܝܘܸܢ ܐܸܠܵܟ̣ܝ: ܦܠܘܿܛܝ ܡܸܢܹܗ: ܘܡܸܢَܕܪܸܫَ ܠܵܐ ܥܵܒܼܪܲܬܝ ܒܝܹܗ. 26ܘܡܘܼܩܘܸܚܠܹܗ: ܘܪܵܒܵܐ ܟ̰ܘܼܢܟ̰ܸܪܹܗ: ܘܦܠܸܛܠܹܗ: ܘܗَܘܹܐܠܹܗ ܐܲܝܟܼ ܡܝܼܬܵܐ: ܗܲܕܟ̣ܵܐ ܕܪܵܒܵܐ ܐَܡܸܪܗܘܿܢ: ܡܝܼܬܵܐ ܝܠܹܗ. 27ܐܝܼܢܵܐ ܝܼܫܘܿܥ ܕܒܸܩܠܹܗ ܒܐܝܼܕܹܗ: ܘܡܘܼܩܸܡܠܹܗ: ܘܗ̇ܘ ܩܸܡܠܹܗ. 28ܘܟܲܕ ܥܒܼܸܪܹܗ ܗ̇ܘ ܠܒܲܝܬܵܐ: ܒܘܼܩܸܪܗܘܿܢ ܡܸܢܹܗ ܬܲܠܡܝܼܕܘܼ̈ܗܝ ܒܢܲܦ̮ܫܵܝܗܝ: ܩܵܡܘܿܕܝܼ ܐܲܚܢܲܢ ܠܵܐ ܡܨܹܐܠܲܢ ܠܦܵܠܘܿܛܹܗ. 29ܐܵܡܸܪ ܐܸܠܵܝܗܝ: ܐܵܗܵܐ ܬܵܗܵܪ ܒܡܸܢܕܝܼ ܠܹܐ ܡܵܨܹܐ ܠܸܦܠܵܛܵܐ: ܫܒ̣ܘܿܩ ܡ̣ܢ ܒܨܵܘܡܵܐ ܘܒܨܠܘܼܬܵܐ. 30ܘܟܲܕ ܦܠܸܛܠܗܘܿܢ ܡ̣ܢ ܬܵܡܵܐ: ܒܸܥܒ̣ܵܪܵܐ ܗ݇ܘܵܘ ܡ̣ܢ ܓܵܘ ܓܠܝܼܠܵܐ: ܘܠܐ ܒܸܥܠܹܐ ܕܐ݇ܢܵܫܵܐ ܝܵܕܸܥ. 31ܣܵܒܵܒ ܕܡܵܠܸܦ ܗ݇ܘܵܐ ܠܬܲܠܡܝܼܕܘܼ̈ܗܝ. ܘܐܵܡܸܪ ܐܸܠܵܝܗܝ: ܕܒܪܘܿܢܹܗ ܕܐ݇ܢܵܫܵܐ ܦܝܵܫܵܐ ܝܠܹܗ ܣܘܼܦܝܵܐ ܒܐܝܼܕܵܬܹ̈ܐ ܕܒܢܲܝ̈ܢܵܫܵܐ: ܘܒܸܬ ܩܵܛܠܝܼ ܠܹܗ: ܘܟܲܕ ܦܸܫܠܹܗ ܩܛܝܼܠܵܐ: ܡܒܵܬَܪ ܬܠܵܬَܐ ܝܵܘܡܵܢܹ̈ܐ ܒܸܬ ܩܵܝܸܡ. 32ܐܝܼܢܵܐ ܐܵܢܝܼ ܠܹܐ ܗ݇ܘܵܘ ܒܝܼܕܵܥܝܵܐ ܠܗ̇ܝ ܗܹܡܸܙܡܵܢ: ܘܒܸܙܕܵܥܝܵܐ ܗ݇ܘܵܘ ܕܒܵܩܪܝܼ ܠܹܗ. 33ܘܐ݇ܬܹܐܠܗܘܿܢ ܠܟܦܲܪܢܵܚܘܿܡ. ܘܟܲܕ ܓܵܘ ܒܲܝܬܵܐ ܗ݇ܘܵܐ: ܒܘܼܩܸܪܹܗ ܡܸܢܵܝܗܝ: ܡܘܼܕܝܼ ܒܸܕܪܵܫܵܐ ܝܬܘܿܢ ܗ݇ܘܵܘ ܒܐܘܼܪܚܵܐ ܒܹܝܠܵܟܼܘܿܢ. 34ܐܝܼܢܵܐ ܐܵܢܝܼ ܫܬܝܼܩܹܐ ܗ݇ܘܵܘ: ܣܵܒܵܒ ܕܡܘܼܩܪܸܨܹܐ ܗ݇ܘܵܘ ܒܐܘܼܪܚܵܐ ܚܲܕَ ܥܲܡ ܕܗ̇ܘ ܐ݇ܚܹܪ݇ܢܵܐ: ܡܵܢܝܼ ܝܼܠܹܗ ܓܘܼܪܵܐ. 35ܘܝܬܸܒ̣ܠܹܗ ܘܩܪܹܐܠܹܗ ܠܬܪܸܥܣܲܪ: ܘܐَܡܝܼܪܹܗ ܐܸܠܵܝܗܝ: ܡ̇ܢ ܕܒܵܥܝܹܐ ܗܵܘܹܐ ܩܵܕَܡܵܝܵܐ: ܒܸܬ ܗܵܘܹܐ ܐَܚܵܪܵܝܵܐ ܕܟܠܵܝܗܝ: ܘܚܸܠܡܲܬܟܵܪ ܕܟܠܵܝܗܝ. 36ܘܫܩܸܠܹܗ ܚܲܕَ ܝܵܠܵܕَܐ ܙܥܘܿܪܵܐ ܘܡܘܼܟܠܹܐܠܹܗ ܒܒܹܝܦܲܠܓܵܝܗܝ: ܘܫܩܸܠܹܗ ܥܲܠ ܕܪܲܥܢܵܢܘܼܗܝ: ܘܐَܡܝܼܪܹܗ ܐܸܠܵܝܗܝ. 37ܟܠܡ̇ܢ ܕܩܵܒܸ̇ܠ ܚܲܕَ ܡ̣ܢ ܗܲܕܟ̣ܵܐ ܝܵܠܹܕَܐ ܙܥܘܿܪܹ̈ܐ ܒܫܸܡܝܼ: ܐܸܠܝܼ ܩܵܒ̇ܘܿܠܹܐ ܝܠܹܗ: ܘܡ̇ܢ ܕܐܸܠܝܼ ܩܵܒ̇ܘܿܠܹܐ ܝܠܹܗ: ܠܹܐ ܝܠܹܗ ܐܸܠܝܼ ܩܵܒ̇ܘܿܠܹܐ: ܐܸܠܵܐ ܠܡ̇ܢ ܕܫܘܼܕܪܸܢܹܗ. 38ܐَܡܝܼܪܹܗ ܐܸܠܹܗ ܝܘܿܚܲܢܵܢ: ܪܵܒܝܼ: ܚܙܹܐܠܲܢ ܐ݇ܢܵܫܵܐ ܦܵܠܘܿܛܹܐ ܕܲܝܘܹ̈ܐ ܒܫܸܡܘܼܟ: ܘܡܘܼܟܠܹܐܠܲܢ ܐܸܠܹܗ: ܣܵܒܵܒ ܕܠܹܐ ܗ݇ܘܵܐ ܒܹܐܬܵܝܵܐ ܒܵܬَܪܲܢ. 39ܐܝܼܢܵܐ ܐَܡܝܼܪܹܗ ܐܸܠܵܝܗܝ ܝܼܫܘܿܥ: ܠܵܐ ܡܲܟܠܝܼܬܘܿܢ ܠܹܗ: ܣܵܒܵܒ ܠܲܝܬ ܐ݇ܢܵܫܵܐ ܕܥܵܒܸܕ ܚܲܝܠܵܐ ܒܫܸܡܝܼ: ܘܡܵܨܹܐ ܓ̰ܲܠܕܹܐ ܐܵܡܸܪ ܥܲܠܝܼ ܕܣܸܪܝܵܐ. 40ܣܵܒܵܒ ܡ̇ܢ ܕܠܹܐ ܝܠܹܗ ܠܕܲܪܩܘܼܒ̣ܠܲܢ: ܠܵܓܹܒܲܢ ܝܼܠܹܗ. 41ܣܵܒܵܒ ܟܠ ܕܡܲܫܬܹܐ ܠܵܘܟ̣ܘܿܢ ܟܵܣܵܐ ܕܡ̈ܝܼܵܐ: ܒܫܸܡܵܐ ܕܕܡܫܝܼܚܵܐ ܝܬܘܿܢ: ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܠܹܐ ܬܵܠܸܩ ܗܵܩܹܗ. 42ܘܟܠ ܡ̇ܢ ܕܡܲܟܦܸܪ ܠܚܲܕَ ܡܐܲܢܹܐ ܙܥܘܿܪܹ̈ܐ ܕܗܲܡܘܼܢܹܐ ܝܢܵܐ ܒܝܼܝܼ: ܨܦܵܝܝܼ ܗ݇ܘܵܐ ܐܸܠܹܗ: ܐܸܢ ܗܵܘܝܵܐ ܗ݇ܘܵܐ ܬܠܝܼܬܵܐ ܐܸܪܚܹܐ ܕܚܡܵܪܵܐ ܒܩܕܵܠܹܗ: ܘܪܘܼܦܝܵܐ ܒܝܵܡܵܐ. 43ܐܝܼܢܵܐ ܐܸܢ ܐܝܼܕܘܼܟܼ ܡܲܟܦܸܪܵܐ ܠܘܼܟܼ: ܦܪܘܿܡܠܵܗ̇: ܨܦܵܝܝܼ ܝ݇ܠܵܗ̇ ܐܸܠܘܼܟܼ ܕܣܲܩܲܬ ܥܵܒܼܪܸܬ ܠܚܲܝܹ̈ܐ: ܡ̣ܢ ܟܲܕ ܐܝܼܬ ܠܘܼܟܼ ܬܲܪ̈ܬܹܝ ܐܝܼܕܵܬܹ̈ܐ ܕܐܵܙܸܠَܬ ܠܓܹܗܲܢܵܐ: ܠܢܘܼܪܵܐ ܕܠܹܐ ܟ̰ܲܡܹܐ. 45ܘܐܸܢ ܐܲܩܠܘܼܟܼ ܡܲܟܦܸܪܵܐ ܠܘܼܟܼ: ܦܪܘܿܡܠܵܗ̇: ܨܦܵܝܝܼ ܝ݇ܠܵܗ̇ ܐܸܠܘܼܟܼ ܕܥܵܒܼܪܸܬ ܠܚܲܝܹ̈ܐ ܫܸܠܵܐ: ܡ̣ܢ ܟܲܕ ܐܝܼܬ ܠܘܼܟܼ ܬܲܪ̈ܬܹܝ ܐܲܩܠܵܬܹ̈ܐ ܕܦܵܝܫܸܬ ܪܘܼܦܝܵܐ ܒܓܹܗܲܢܵܐ. 47ܘܐܸܢ ܥܲܝܢܘܼܟܼ ܡܲܟܦܸܪܵܐ ܠܘܼܟܼ: ܚܪܘܿܛܠܵܗ̇: ܨܦܵܝܝܼ ܝ݇ܠܵܗ̇ ܐܸܠܘܼܟܼ ܕܒܚܕܵܐ ܥܲܝܢܵܐ ܥܵܒܼܪܸܬ ܠܡܲܠܟܘܼܬܹܗ ܕܐܲܠܵܗܵܐ: ܡ̣ܢ ܟܲܕ ܐܝܼܬ ܠܘܼܟܼ ܬܲܪ̈ܬܹܝ ܥܲܝܢܹ̈ܐ: ܕܦܵܝܫܸܬ ܪܘܼܦܝܵܐ ܒܓܹܗܲܢܵܐ. 48ܐܲܝܟܵܐ ܕܬܸܘܸܠܥܵܝܗܝ ܠܹܐ ܡܵܝܬܵܐ: ܘܢܘܼܪܵܝܗܝ ܠܹܐ ܟ̰ܲܡܹܐ. 49ܣܵܒܵܒ ܕܟܠ ܒܢܘܼܪܵܐ ܟܹܐ ܦܵܐܹܫ ܡܘܼܡܠܸܚܵܐ: ܘܟܠ ܕܸܒ̣ܚܬܵܐ ܒܡܸܠܚܵܐ ܒܸܬ ܦܵܝܫܵܐ ܡܘܼܡܠܸܚܬܵܐ. 50ܨܦܵܝܝܼ ܝ݇ܠܵܗ̇ ܡܸܠܚܵܐ: ܐܝܼܢܵܐ ܐܸܢ ܡܸܠܚܵܐ ܦܵܝܟܵܐ: ܒܡܘܼܕܝܼ ܒܸܬ ܡܲܡܠܸܚܝܼܬܘܿܢ ܠܵܗ̇: ܗܵܘܝܵܐ ܒܝܼܵܘܟ̣ܘܿܢ ܡܸܠܚܵܐ: ܘܒܫܲܝܢܵܐ ܗَܘܹܝܡܘܿܢ ܚܲܕَ ܥܲܡ ܕܗ̇ܘ ܐ݇ܚܹܪ݇ܢܵܐ.