0:00
/
1ܘܗَܘܹܐ ܠܵܗ̇ ܕܟܲܕ ܬܘܼܡܸܡܠܹܗ ܝܼܫܘܿܥ ܠܦܵܩܘܿܕܹܐ ܠܬܪܸܥܣܲܪ ܬܲܠܡܝܼܕܘܼ̈ܗܝ: ܫܘܼܢܹܐܠܹܗ ܡ̣ܢ ܬܵܡܵܐ ܠܡܵܠܘܿܦܹܐ ܘܠܡܲܟܪܘܿܙܹܐ ܒܡܕܝܼܢܵܬܵܝ̈ܗܝ. 2ܐܝܼܢܵܐ ܟܲܕ ܫܡܸܥܠܹܗ ܝܘܿܚܲܢܵܢ ܓܵܘ ܒܹܝܬ ܐܲܣܝܼܪܹ̈ܐ ܦܘܼܠܚܵܢܹ̈ܐ ܕܡܫܝܼܚܵܐ: ܫܘܼܕܸܪܹܗ ܒܝܲܕ ܬܲܠܡܝܼܕܘܼ̈ܗܝ. 3ܘܐَܡܝܼܪܹܗ ܐܸܠܹܗ: ܐܲܢَܬ ܝܼܘܸܬ ܗ̇ܘ ܕܐܵܬܹܐ: ܝܲܢ ܠܐ݇ܚܹܪ݇ܢܵܐ ܣܵܦܪܵܚ. 4ܝܼܫܘܿܥ ܓ̰ܘܼܘܸܒܠܹܗ ܘܐَܡܝܼܪܹܗ ܐܸܠܵܝܗܝ: ܙܹܠَܡܘܿܢ ܡܲܕܸܥܡܘܿܢ ܠܝܘܿܚܲܢܵܢ ܐܵܢܝܼ ܕܒܸܫܡܲܥܝܵܐ ܝܬܘܿܢ ܘܒܸܚܙܵܝܵܐ. 5ܣܸܡܝܹ̈ܐ ܒܸܚܙܵܝܵܐ ܝܢܵܐ: ܘܫܸܠܹ̈ܐ ܒܸܚܕܵܪܵܐ ܝܢܵܐ: ܘܓܸܪ̈ܒ̣ܵܢܹܐ ܦܝܵܫܵܐ ܝܢܵܐ ܕܘܼܟܝܹܐ: ܘܟܲܪܹ̈ܐ ܒܸܫܡܲܥܝܵܐ ܝܢܵܐ: ܘܡܝܼܬܹ̈ܐ ܦܝܵܫܵܐ ܝܢܵܐ ܡܘܼܩܸܡܹܐ: ܘܡܸܣܟܹܢܹ̈ܐ ܦܝܵܫܵܐ ܝܢܵܐ ܡܘܼܫܚܸܕܹܐ. 6ܘܛܘܼܒ̣ܵܐ ܠܗ̇ܘ ܕܠܵܐ ܟܵܦܸܪ ܒܝܼܝܼ. 7ܘܟܲܕ ܐَܙܸܠܗܘܿܢ: ܫܘܼܪܹܐܠܹܐ ܝܼܫܘܿܥ ܠܹܐܡܵܪܵܐ ܠܟܸܢܫܹ̈ܐ ܥܲܠ ܝܘܿܚܲܢܵܢ: ܡܘܼܕܝܼ ܦܠܸܛܠܵܘܟ̣ܘܿܢ ܠܒܲܪܝܼܵܐ ܠܸܚܙܵܝܵܐ: ܙܹܠܵܐ ܕܡ̣ܢ ܦܵܘܚܵܐ ܡܘܼܫܥܸܫܵܐ. 8ܐܸܠܵܐ ܡܘܼܕܝܼ ܦܠܸܛܠܵܘܟ̣ܘܿܢ ܠܸܚܙܵܝܵܐ: ܐ݇ܢܵܫܵܐ ܕܓ̰ܘܼܠܹ̈ܐ ܪ̈ܵܟܝܼܟܹܐ ܠܒ̣ܝܼܫܵܐ: ܗܵܐ: ܐܵܢܝܼ ܕ( ܓ̰ܘܼܠܹ̈ܐ) ܪ̈ܵܟܝܼܟܹܐ ܟܹܐ ܠܵܒ̣ܫܝܼ ܓܵܘ ܒܵܬܹ̈ܐ ܕܡܲܠܟܹ̈ܐ ܝܢܵܐ. 9ܐܸܠܵܐ ܡܘܼܕܝܼ ܦܠܸܛܠܵܘܟ̣ܘܿܢ ܠܸܚܙܵܝܵܐ: ܢܒ̣ܝܼܵܐ: ܗܹܐ: ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܘܙܵܘܕܵܐ ܡ̣ܢ ܢܒ̣ܝܼܵܐ. 10ܣܵܒܵܒ ܕܐܵܗܵܐ ܝܠܹܗ ܗ̇ܘ ܕܥܲܠܘܼܗܝ ܟܬܝܼܒ̣ܵܐ ܝܠܹܗ: ܗܵܐ: ܐܵܢܵܐ ܫܵܕܘܿܪܹܐ ܝܘܸܢ ܡܲܠܲܐܟ̣ܝܼ ܩܵܕَܡ ܦܵܬܘܼܟ: ܕܒܸܬ ܗܵܕܸܪ ܐܘܼܪܚܘܼܟ ܩܵܕَܡܘܼܟ. 11ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܠܵܐ ܩܸܡܠܹܗ ܒܗَܘܼ̈ܝܹܐ ܡ̣ܢ ܒܲܟ̣ܬܵܬܹ̈ܐ ܕܒܘܼܫ ܓܘܼܪܵܐ ܡ̣ܢ ܝܘܿܚܲܢܵܢ ܡܲܥܡܕܵܢܵܐ: ܐܝܼܢܵܐ ܙܥܘܿܪܵܐ ܒܡܲܠܟܘܼܬܵܐ ܕܫܡܲܝܵܐ ܓܘܼܪܵܐ ܝܠܹܗ ܡܸܢܹܗ. 12ܘܡ̣ܢ ܝܵܘܡܵܢܹ̈ܐ ܕܝܘܿܚܲܢܵܢ ܡܲܥܡܕܵܢܵܐ ܘܗܲܠ ܐܵܕܝܼܵܐ: ܡܲܠܟܘܼܬܵܐ ܕܫܡܲܝܵܐ ܒܚܲܝܠܵܐ ܟܹܐ ܦܵܝܫܵܐ ܠܘܼܒܸܠܬܵܐ: ܘܥܵܒ̣ܕܵܢܹ̈ܐ ܕܚܲܝܠܵܐ ܟܹܐ ܓܵܢܒܼܝ ܠܵܗ̇. 13ܣܵܒܵܒ ܟܠܵܝܗܝ ܢܒ̣̈ܝܹܐ ܘܢܵܡܘܿܣܵܐ ܗܲܠ ܝܘܿܚܲܢܵܢ ܢܘܼܒܹܠܘܿܢ. 14ܘܐܸܢ ܒܵܣܡܵܐ ܠܵܘܟ̣ܘܿܢ ܠܩܵܒܘܿܠܹܐ: ܐܵܗܵܐ ܝܠܹܗ ܐܹܠܝܼܵܐ ܕܝܼܠܹܗ ܗܕܝܼܪܵܐ ܠܹܐܬܵܝܵܐ. 15ܡ̇ܢ ܕܐܝܼܬ ܠܹܗ ܢܵܬܝܵܬܹ̈ܐ ܕܫܵܡܸܥ: ܫܵܡܹܥ. 16ܐܝܼܢܵܐ ܠܡ̇ܢ ܡܲܕܡܸܢܵܗ̇ ܐܵܗܵܐ ܐܘܼܓ̰ܵܓ̣: ܟܹܐ ܕܵܡܝܵܐ ܠܝܵܠܹ̈ܕَܐ ܕܝܵܬܒ̣ܝܼ ܒܫܘܼܩܹ̈ܐ: ܘܡܲܩܘܸܚܝܼ ܠܚܲܒ̣ܪ̈ܵܘܵܬܵܝܗܝ. 17ܘܐܵܡܪܝܼ: ܡܚܹܐܠܲܢ ܙܘܼܪܢܵܐ ܐܸܠܵܘܟ̣ܘܿܢ: ܘܠܵܐ ܪܩܸܕܠܵܘܟܘܿܢ: ܘܝܹܠܠܲܢ ܐܸܠܵܘܟ̣ܘܿܢ: ܘܠܵܐ ܥܒܸܕܠܵܘܟ̣ܘܿܢ ܬܵܙܝܼ. 18ܣܵܒܵܒ ܕܐَܬܹܐܠܹܗ ܝܘܿܚܲܢܵܢ ܠܵܐ ܒܹܐܟ̣ܵܠܵܐ ܘܠܵܐ ܒܸܫܬܵܝܵܐ: ܘܐܵܡܪܝܼ: ܕܲܝܘܵܐ ܐܝܼܬ ܠܹܗ. 19ܐَܬܹܐܠܹܗ ܒܪܘܿܢܹܗ ܕܐ݇ܢܵܫܵܐ ܒܹܐܟ̣ܵܠܵܐ ܘܒܸܫܬܵܝܵܐ: ܘܐܵܡܪܝܼ: ܗܵܐ: ܐ݇ܢܵܫܵܐ ܐܵܟ̣ܘܿܠܵܐ ܘܫܵܬܝܵܢܵܐ ܕܚܲܡܪܵܐ: ܘܕܵܘܣܬ ܕܕܲܡܓ̣ܵܟ̰̈ܝܹܐ ܘܚܲܛܵܝܹ̈ܐ. ܘܦܸܫܠܹܗ ܡܘܼܟܫܸܛܬܵܐ ܥܵܩܸܠܕܵܪܘܼܬܵܐ ܡ̣ܢ ܦܘܼܠܚܵܢܘܼ̈ܗ̇. 20ܒܗ̇ܝ ܥܕܵܢܵܐ ܫܘܼܪܹܐܠܹܐ ܝܼܫܘܿܥ ܠܸܠܝܵܡܵܐ ܠܡܕܝܼܢܵܬܹ̈ܐ: ܕܗَܘܹܐܠܗَܘܿܢ ܒܝܼܵܝܗܝ ܚܲܝܠܘܼ̈ܗܝ ܪܵܒܵܐ: ܕܠܵܐ ܬܘܼܘܸܒܠܗܘܿܢ. 21ܘܵܝ ܠܵܟ̣ܝ ܟܘܼܪܙܝܼܢ: ܘܵܝ ܠܵܟ̣ܝ ܒܹܝܬ ܨܲܝܵܕܵܐ: ܣܵܒܵܒ ܐܸܢ ܒܨܘܿܪ ܘܒܨܲܝܕܘܼܢ ܗܵܘܝܼ ܗ݇ܘܵܘ ܐܲܢܹܐ ܚܲܝܠܹܗ ܕܗَܘܹܐܠܗَܘܿܢ ܒܝܼܵܘܟ̣ܘܿܢ: ܡ̣ܢ ܓ̰ܲܠܕܹܐ ܒܣܲܩܹ̈ܐ ܘܩܸܛܡܵܐ ܒܸܬ ܬܲܘܸܒܝܼ ܗ݇ܘܵܘ. 22ܐܝܼܢܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܠܨܘܿܪ ܘܠܨܲܝܕܘܿܢ ܒܸܬ ܗܵܘܹܐ ܢܝܵܚܵܐ ܒܝܵܘܡܵܢܹ̈ܐ ܕܕܝܼܘܵܢ ܙܵܘܕܵܐ ܡ̣ܢ ܕܐܸܠܵܘܟ̣ܘܿܢ. 23ܘܐܲܢَܬܝܼ: ܟܦܲܪܢܵܚܘܿܢ: ܗܲܠ ܫܡܲܝܵܐ ܒܸܬ ܦܵܝܫܲܬܝ ܡܘܼܪܸܡܬܵܐ: ܗܲܠ ܫܝܘܿܠ ܒܸܬ ܦܵܝܫܲܬܝ ܡܘܼܨܠܝܼܬܵܐ: ܣܵܒܵܒ ܕܐܸܢ ܒܣܕܘܿܡ ܗܵܘܝܼ ܗ݇ܘܵܘ ܐܵܢܝܼ ܚܲܝܠܹ̈ܐ ܕܗَܘܹܐܠܗَܘܿܢ ܒܝܼܵܟ̣ܝ: ܒܸܬ ܦܵܝܫܵܐ ܗ݇ܘܵܐ ܗܲܠ ܐܸܕܝܘܿܡ. 24ܐܝܼܢܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܠܲܐܪܥܵܐ ܕܣܕܘܿܡ ܒܸܬ ܗܵܘܹܐ ܢܚܵܝܵܐ ܒܝܵܘܡܵܢܹ̈ܐ ܕܕܝܼܘܵܢ ܙܵܘܕܵܐ ܡ̣ܢ ܕܐܸܠܵܟ̣ܝ. 25ܒܗ̇ܘ ܙܲܒ̣ܢܵܐ ܓ̰ܘܼܘܸܒܠܹܗ ܝܼܫܘܿܥ ܘܐَܡܝܼܪܹܗ: ܫܵܟܘܿܪܹܐ ܝܘܸܢ ܐܸܠܘܼܟܼ: ܝܵܐ ܒܵܒܝܼ: ܡܵܪܵܐ ܕܫܡܲܝܵܐ ܘܐܲܪܥܵܐ: ܕܟܘܼܣܹܐܠܘܼܟܼ ܐܲܢܹܐ ܡ̣ܢ ܥܵܩܸܠܕܵܪܹ̈ܐ ܘܦܲܪ̈ܡܝܼܵܢܹܐ: ܘܓܸܠܝܵܝܠܘܼܟܼ ܠܝܵܠܹ̈ܕَܐ ܙܥܘܿܪܹ̈ܐ. 26ܗܹܐ: ܒܵܒܝܼ: ܣܵܒܵܒ ܕܗܲܕܟ̣ܵܐ ܗَܘܹܐ ܠܹܗ ܪܸܙܵܝܵܐ ܩܵܕَܡܘܼܟ. 27ܟܠ ܡܸܢܕܝܼ ܦܸܫܠܹܗ ܣܘܼܦܝܵܐ ܐܸܠܝܼ ܡ̣ܢ ܒܵܒܝܼ ܘܐ݇ܢܵܫܵܐ ܠܹܐ ܝܵܕܸܥ ܠܒܪܘܿܢܵܐ ܫܒ̣ܘܿܩ ܡ̣ܢ ܒܵܒܵܐ: ܐܘܼܦ ܠܒܵܒܵܐ ܐ݇ܢܵܫܵܐ ܠܹܐ ܝܵܕܸܥ ܫܒ̣ܘܿܩ ܡ̣ܢ ܒܪܘܿܢܵܐ: ܘܠܡ̇ܢ ܕܒܵܣܡܵܐ ܠܹܗ ܒܪܘܿܢܵܐ ܕܓܵܠܹܐ ܠܹܗ. 28ܬܹܐܡܘܿܢ ܠܟܸܣܠܝܼ: ܟܠܵܘܟ̣ܘܿܢ ܓ̰ܸܗَܝܹ̈ܐ ܘܫܩܝܼܠܹ̈ܐ ܟܵܪ̈ܵܬܹܐ: ܘܐܵܢܵܐ ܒܸܬ ܡܲܢܝܸܚܸܢܵܘܟ̣ܘܿܢ. 29ܫܩܘܿܠܘܿܢ ܢܝܼܪܝܼ ܥܲܠܵܘܟ̣ܘܿܢ: ܘܝܠܘܿܦܘܿܢ ܡܸܢܝܼ: ܕܢܝܼܚܵܐ ܝܘܸܢ ܘܡܲܟܝܼܟ̣ܵܐ ܒܠܸܒܵܐ: ܘܒܸܬ ܡܲܫَܟ̰ܚܝܼܬܘܿܢ ܢܝܵܚܵܐ ܠܓܵܢܵܬܵܘ̈ܟ̣ܘܿܢ. 30ܣܵܒܵܒ ܢܝܼܪܝܼ ܒܵܣܝܼܡܵܐ ܝܠܹܗ: ܘܟܵܪܬܝܼ ܩܵܠܘܿܠܬܵܐ ܝ݇ܠܵܗ̇.