ܟܬܼܵܒ̣ܵܐ ܕܡܹܐܡܪܹ̈ܐ

ܕܒܵܥܘܼܬܼܵܐ ܕܢܝܼܢ̈ܘܵܝܹܐ؛

ܒܠܸܫܵܢܵܐ ܣܘܵܕܵܝܵܐ.

ܬܘܼܪܓܸܡܵܐ ܒܝܕ؛

ܩܫܝܫܐ ܝܑܼܣܚܲܩ ܪܹܗܵܢܵܐ

ܣܕܝܼܪܵܐ ܒܲܫܩܲܠܛܲܥܢܵܐ؛

ܕܲܡܫܲܡܫܵܢܵܐ ܐܹܠܝܼܫܲܥ ܫܸܡܥܘܼܢ.

ܛܒܼܝܼܥܵܐ ܒܝܲܕ؛

ܥܹܕܬܵܐ ܕܡܲܕܢ̱ܚܵܐ ܕܐܵܬܼܘܿܪ̈ܵܝܹܐ؛

ܗܸܘܦܲܪܟܝܼܵܐ ܕܟܵܠܝܼܦ̮ܘܿܪܢܝܼܵܐ.

ܐܲܨܲܚܬܵܐ ܬܠܝܼܬܵܝܬܵܐ؛

ܒَܝܙ ܠܡܪܢ܀

♱♱♱♱♱♱♱♱♱

ܥܠܬܼܐ ܕܒܥܘܬܼܐ ܕܢܝܢܘܝ̈ـܐ

ܥܸܠܬܵܐ ܩܵܕَܡܵܝܬܵ‌ܐ ܕܒܵܥܘܼܬܵܐ ܕܒܸܥܒ̣ܵܕܵܐ ܝَܠܵܗ̇ ܥܹܕܬܵܐ ܕܝܼܲܠَܢ ܕܐܲܠܵܗܵܐ ܒܵܥܘܼܬܵܐ ܝܗَܘܵܐ ܕܢܝܼܢܘܵܝܹ̈ܐ؛ ܕܗܘܹܐ ܠܵܗ̇ ܩܘܼܪܒܵܐ ܠܫܹܢَܬܵܐ 862 ܡܩܵܕَܡ ܡܫܝܼܚܵܐ. ܒܝܲܕ ܟܵܪܘܿܙܘܼܬܵܐ ܕܝܵܘܢܵܢ ܢܒ̣ܝܼܵܐ ܒܲܪ ܡܲܬܲ‌ܝ [ܝܗَܘܼܕܵܝܵܐ] ܒܗ̇‌ܝ ܒܵܥܘܼܬܵܐ. ܢܝܼܢܘܵܝܹ̈ܐ ܨܝܼܡܠܗَܘܿܢ ܨܵܘܡܵܐ؛ ܘܠܒ̣ܝܼܫܠܗَܘܿܢ ܣܲܩܵܐ؛ ܘܟܲܕ ܚܙܹܠܹܗ ܐܲܠܵܗܵܐ ܬܝܵܒ̣ܘܼܬܲܝܗܝ ܡܘܼܕܸܪܹܗ ܡܸܢܲܝܗܝ ܚܸܡܬܵ‌ܐ ܕܟܲܪܒܹܗ ܘܠܵܐ ܡܛܘܼܠܩܲܝܗܝ ܠܹܗ.

     ܗܲܓ̰ܲܬ ܐَܚܹܪَܬܵܐ ܕܒܘܼܬ ܕܝܼܘܼܗ̇ ܒܐܵܗܵܐ ܙܲܒ̣ܢܵܐ ܦܝܵܫܵܐ ܝَܠܵܗ̇ ܥܒ̣ܝܼܕܬܵ‌ܐ ܒܥܹܕܬܵܐ ܕܡܲܕܢ̱ܚܵܐ؛ ܫܘܼܪܹܐ ܠܹܗ ܡܵܘܬܵܢܵܐ ܕܫܲܪܥܘܼܛܵܐ (ܫܘܼܚܢܵܐ) ܒܫܸܢܹ̈ܐ ܐَܚܵܪ̈ܵܝܹܐ ܕܗܵܟܲܡܬܵܐ ܕܟ̣ܘܼܣܪܘܼ ܩܲܕَܡܵܝܵܐ ܐܵܢܘܼܫܪܘܵܐ ܒܫܹܢَܬܵܐ 568 ܕܠܡܵܪܲܢ. ܡܥܘܼܪܩܸܠܹܗ ܬܪܸܥܣܲܪ ܫܸܢܹ̈ܐ ܩܵܐ ܗܲܠ ܣܵܗܡܵܐ ܐَܚܵܪܵܝܵܐ ܕܫܸܢܹ̈ܐ ܕܗܘܼܪܡܝܼܙܕ ܪܒ̣ܝܼܥܵܝܵܐ ܡܲܠܟܵܐ ܕܦܲܪ̈ܣܵܝܹܐ. ܝܵܥܢܹܐ ܩܵܐ ܗܲܠ ܫܹܢَܬܵܐ 580 ܠܡܵܪܲܢ.[1] ܒܝܵܘܡܵܢܹ̈ܐ ܕܐܲܒ̣ܵܗ̈ܵܬܵܐ ܡܵܪܝ ܝܵܘܣܸܦ؛ ܘܡܵܪܝ ܚܲܙܩܝܼܐܹܝܠ ܩܵܬܼܘܿܠܝܼܩܹ̈ܐ ܦܵܛܲܪܝܲܪ̈ܟܹܐ ܕܡܲܕܢ̱ܚܵܐ. ܡ̣ܢ ܣܵܒܵܒ ܒܘܼܫܵܝܘܼܬܵܐ ܕܚܛܝܼܵܬܹ̈‌ܐ ܕܒܢܲܝܢܵܫܵܐ ܕܒܗ̇ܘ ܙܲܒ̣ܢܵܐ. ܚܲܕَܟ̰ܵܐ ܦܝܵܫܵܐ ܡܦܘܼܢܹܐܠܹܗ ܠܟܠܹܗ ܥܵܠܡܵܐ ܕܒܸܥܡܵܪܵܐ ܝܗَܘܵܐ ܒܐܵܬܘܿܪ؛ ܘܢܝܼܢܘܹܐ ܘܐܲܪܒܹܝܠ ܘܒܹܝܬ ܓܵܪܡܲܝ. ܟܲܕ ܡܨܵܠܘܿܝܹܐ ܝܗَܘܵܐ ܩܵܐ ܐܲܠܵܗܵܐ؛ ܦܝܼܫܠܹܗ ܫܸܡܥܝܵܐ ܩܵܠܵܐ ܕܡܲܠܲܐܟ̣ܵܐ ܕܒܹܐܡܵܪܵܐ: «ܠܲܝܬ ܦܵܝܕܵܐ ܒܸܥܪܵܩܵܐ ܠܛܘܼܪ̈ܵܢܹܐ ܘܠܕܸܫܝܵܬܹ̈‌ܐ. ܩܛܸܥܡܘܿܢ ܨܵܘܡܵܐ؛ ܥܒ̣ܘܿܕܘܼܢ ܒܵܥܘܼܬܵܐ؛ ܓ̰ܡܸܥܡܘܿܢ ܠܥܘܼܡܪ̈ܵܢܹܐ؛ ܘܨܵܠܹܝܡܘܿܢ ܨܠܘܿܬܵܐ؛ ܬܵܘܸܒܘܿܢ ܘܒܸܬ ܟܵܠܹܐ ܡܵܘܬܵܢܵܐ ܡܸܢܵܘܟ̣ܘܼܢ».[2] ܘܗܲܪ ܒܗ݁ܝ ܥܕܵܢܵܐ ܦܩܸܕܠܗَܘܿܢ ܐܲܒܼܵܗܵܬ̈ܵܐ ܘܪ̈ܵܥܵܘܵܬܵܐ ܘܥܲܠܠܵܢܹ̈ܐ ܕܓ̰ܲܡܥܹܐ ܛܵܝܸܦܹܗ ܕܡܵܪܝܵܐ ܡܫܝܼܚܵܐ ܒܟܠ ܬܸܓܼܡܵܝܗܝ ܠܒܲܝܬܹܗ ܕܡܵܪܝܵܐ ܘܡܨܘܿܠܹܐ ܠܗَܘܿܢ ܘܥܒܸܕܠܗَܘܿܢ ܒܵܥܘܼܬܵܐ.

     ܒܗ̇ܘ ܝܵܘܡܵܐ ܩܵܕَܡܵܝܵܐ ܕܒܵܥܘܼܬܵܐ ܕܝܑܼܠܹܗ ܬܪܹܝܢܒܫܲܒܵܐ؛ ܓܪܝܼܫܠܹܗ ܡܲܠܲܐܟ̣ܵܐ ܐܝܼܕܹܗ ܡ̣ܢ ܦܢܵܝܬܵ‌ܐ ܘܩܛܲܠܬܵ‌ܐ ܕܥܵܠܡܵܐ؛ ܘܠܵܐ ܡܝܼܬܠܹܗ ܐَܢܵܫܵܐ؛ ܐܸܠܵܐ ܐܸܢ ܕܲܠܝܼܠܹ̈ܐ؛ ܝܲܥܢܹܐ ܐܵܢܝܼ ܕܦܝܼܫܹܐ ܗَܘܵܘ ܡܸܚܝܹ̈ܐ ܒܡܲܪܥܵܐ. ܘܟܲܕ ܡܛܹܐܠܹܗ ܝܵܘܡܵܐ ܕܐܸܫܬܵ‌ܐ ܒܫܲܒܬܵ‌ܐ؛ ܕܝܑܼܠܹܗ ܝܵܘܡܵܐ ܕܥܪܘܼܒ̣ܬܵ‌ܐ. ܘܩܵܕܲܫܬܵ‌ܐ ܕܐَܪ݁ܵܙܹܐ ܩܲܕܝܼܫܹ̈ܐ ܕܦܲܓ̣ܪܹܗ ܘܕܸܡܹܗ ܕܡܫܝܼܚܵܐ ܡܵܪܲܢ؛ ܐܵܦ ܠܵܐ ܚܲܕَ ܡ̣ܢ ܕܐܵܢܝܼ ܙܹܐ ܕܛܸܦܝܵܐ ܗَܘܵܐ ܒܡܲܪܥܵܐ ܕܫܲܪܥܘܼܛܵܐ [ܗ.ܕ܊ ܫܘܼܚܢܵܐ] ܡܝܼܬܠܹܗ. ܗܵܐ ܡ̣ܢ ܕܗ̇ܘ ܙܲܒ̣ܢܵܐ ܟܲܕ ܚܙܹܐܠܗܘܿܢ ܒܢܲܝ̈ ܥܹܕܬܵܐ ܪ̈ܵܥܵܘܵܬܵܐ ܘܡܲܪ̈ܥܝܵܬܲܝܗܝ ܪ̈ܲܚܡܹܐ ܕܗَܘܹܐ ܠܗܘܿܢ ܥܲܠܲܝܗܝ ܒܥܸܠܬܼܵܐ ܕܒܵܥܘܼܬܵܐ ܕܥܒ̣ܝܼܕܠܗَܘܿܢ؛ ܡܘܼܬܸܒ̣ܠܗَܘܿܢ. ܘܐܲܒ̣ܵܗ̈ܵܬܵܐ ܡܘܼܪܝܸܙܠܗَܘܿܢ ܕܦܵܝܫܵܐ ܥܒ̣ܝܼܕܬܵܐ ܒܟܠ ܫܹܢَܬܵܐ. ܟܹܐ ܫܵܪܝܵܐ ܥܸܣܪܝܼ ܝܵܘܡܵܢܹ̈ܐ ܡ̣ܢ ܩܵܕَܡ ܪܹܫܵܐ ܕܨܵܘܡܵܐ ܪܲܒܵܐ ܡܵܪܵܢܵܝܵܐ. ܘܦܝܼܫܬܵܐ ܝَܠܵܗ̇ ܥܒܼܝܼܕܬܵܐ ܩܵܢܘܿܢܵܐܝܼܬ ܡ̣ܢ ܕܗ݁ܝܓܵܗ ܘܗܲܠ ܐܵܕܝܼܵܐ ܒܐܲܢܹܐ ܐܲܬܪ̈ܵܘܵܬܹܐ ܕܝܼܲܠَܢ: ܘܐܵܢܝܼ ܕܡܘܼܪܝܸܙܵܐ ܠܗَܘܿܢ ܠܒܵܥܘܼܬܵܐ ܦܩܸܕܠܗَܘܿܢ ܕܦܵܐܸܫ ܥܒ̣ܝܼܕܵܐ ܕܘܼܟܼܪܵܢܵܐ ܕܐܲܒ̣ܵܗܵܬ̈ܵܐ ܡܲܠܦܵܢܹ̈ܐ ܒܥܪܘܿܒ̣ܬܵܐ ܕܝܼܠَܘܿܗ݁ ܕܐܵܗܵܐ ܫܲܒܬܵܐ ܕܒܵܥܘܼܬܵܐ؛ ܡܣܵܒܵܒ ܒܝܼܹܗ ܒܐܵܗܵܐ ܝܵܘܡܵܐ ܕܕܘܼܟܼܪܵܢܵܐ ܗܘܹܝܠܗَܘܿܢ ܪ̈ܲܚܡܹܐ ܘܦܸܫܠܹܗ ܡܘܼܟܠܝܼܵܐ ܡܵܘܬܵܢܵܐ.

top

ܬܪܝܢܒܼܫܒܐ ܕܒܥܘܬܼܐ

ܟܪܘܙܘܬܼܐ.

ܢܩܘܼܡ ܫܲܦܝܼܪ ܟܠܲܢ ܒܚܲܫܵܐ ܘܒܸܚܦܝܼܛܘܼܬܵܐ ܛܵܠܒܲܚ ܘܐܵܡܪܲܚ؛ ܡܵܪܲܢ ܥܒ̣ܘܼܿܕ ܪ̈ܲܚܡܹܐ ܥܲܠܲܢ.

     ܘܓ̰ܲܘܸܒܝܼ: ܡܵܪܲܢ ܐܸܬܼܪܲܚܲܡܥܠܲܝܢ‌܀

ܡܵܪܝܵܐ ܚܲܝܠ̱ܬܼܵܢܵܐ ܫܵܡܘܿܥܵܐ ܕܨܠܵܘܵܬܹ̈ܐ ܕܟܹܐܢܹ̈ܐ ܘܕܙܲܕܝܼܩܹ̈ܐ؛ ܒܐܝܼܡܵܡܵܐ ܘܠܸܠܝܵܐ؛ ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܡܵܪܝܵܐ ܚܲܝܠ̱ܬܼܵܢܵܐ ܕܠܬܲܪܥܘܼܟܼ ܡܩܲܕܘܿܡܹܐ ܝَܠܗ݁ ܡܲܪܥܝܼܬܘܼܟܼ؛ ܘܒܨܠܘܿܬܼܵܐ ܬܲܩܬܘܿܩܹܐ ܝَܠܗ݁ ܒܬܲܪܥܵܐ ܕܡܵܪܘܼܬܘܼܟܼ. ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܡܵܪܝܵܐ ܚܲܝܠ̱ܬܼܵܢܵܐ ܓ̰ܲܘܸܒ ܠܣܵܓܼܕܵܢ̈ܘܼܟܼ ܐܲܝܟܼ ܩܵܘܠܘܼܟܼ؛ ܕܛܠܘܿܒܘܼܢ ܘܒܸܬ ܦܵܐܸܫ ܝܘܼܗَܒܼܵܐ ܐܸܠܵܘܟܼܘܿܢ؛ ܘܒܥܹܝܡܘܿܢ ܘܒܸܬ ܡܲܫَܟ̰ܚܝܼܬܘܿܢ؛  ܬܲܩܬܸܩܘܿܢ ܘܒܸܬ ܦܵܐܸܫ ܦܬܝܼܚܵܐ ܐܸܠܵܘܟܼܘܿܢ؛ ܒܸܛܠܵܒܵܐ ܝَܘܲܚ ܡܸܢܘܼܟܼ‌‌܀ ܡܵܪܝܵܐ ܚܲܝܠ̱ܬܼܵܢܵܐ ܓ̰ܲܘܸܒ ܠܣܵܓܼܕܵܢ̈ܘܼܟܼ؛ ܐܲܝܟܼ ܕܓ̰ܘܼܘܸܒܠܘܼܟܼ ܠܐܲܒܼܪܵܗܵܡ ܒܘܼܬ ܐܘܼܓ̰ܵܓܼܹܗ ܘܡܘܼܫܹܐ ܒܘܼܬ ܛܲܝܸܦܹܗ؛ ܒܸܛܠܵܒܵܐ ܝَܘܲܚ ܡܸܢܘܼܟܼ‌‌܀ ܡܵܪܝܵܐ ܚܲܝܠ̱ܬܼܵܢܵܐ ܢܛܘܿܪ ܠܣܵܓܼܕܵܢ̈ܘܼܟܼ ܡ̣ܢ ܣܵܢܝܵܢܹ̈ܐ ܘܕܸܫ̃ܡܸܢܹ̈ܐ ܕܫܸܡܘܼܟܼ؛ ܐܲܝܟܼ ܕܢܛܸܪܘܼܟܼ ܠܕܵܢܝܼܐܹܝܠ ܪܹܝܓܘܼܟܼ ܡ̣ܢ ܓܘܼܒܵܐ ܕܐܲܪ̈ܝܵܘܵܬܹܐ؛ ܒܸܛܠܵܒܵܐ ܝَܘܲܚ ܡܸܢܘܼܟܼ‌‌܀ ܡܵܪܝܵܐ ܚܲܝܠ̱ܬܼܵܢܵܐ ܦܵܫܸܛ ܐܝܼܕܵܐ ܕܡܪܲܚܡܵܢܘܼܬܘܼܟܼ ܥܲܠ ܛܲܝܸܦܘܼܟܼ؛ ܐܲܝܟܼ ܕܦܘܼܫܸܛܠܘܼܟܼ ܐܝܼܕܘܼܟܼ ܥܲܠ ܝܵܘܢܵܢ ܘܓܪܸܫܠܘܼܟܼ ܡ̣ܢ ܝܵܡܵܐ؛ ܒܸܛܠܵܒܵܐ ܝَܘܲܚ ܡܸܢܘܼܟܼ‌‌܀ ܡܵܪܝܵܐ ܚܲܝܠ̱ܬܼܵܢܵܐ ܫܲܕܸܪܠܲܢ ܦܘܼܪܩܵܢܵܐ ܘܡܲܢܝܸܚܠܲܢ ܡ̣ܢ ܛܘܼܪ̈ܵܦܲܢ ܐܲܝܟܼ ܕܫܘܼܕܸܪܘܼܟܼ ܠܢܝܼܢܘܵܝܹ̈ܐ ܘܩܘܼܒܸܠܘܼܟܼ ܬܝܵܒܼܘܼܬܵܝܗܝ؛ ܒܸܛܠܵܒܵܐ ܝَܘܲܚ ܡܸܢܘܼܟܼ‌‌܀ ܥܲܠ ܚܘܼܠܡܵܢܵܐ ܕܐܲܒ̣ܵܗܵܬ̈ܲܢ ܩܲܕܝܼܫܹ̈ܐ: ܡܵܪܝ ܦܠ݁ܢ ܩܵܬ̣ܘܿܠܝܼܩܵܐ ܦܵܛܲܪܝܵܪܟܵܐ. ܘܡܵܪܝ ܦܠ݁ܢ ܡܝܼܛܪܵܦܘܿܠܹܝܛܵܐ [ܐܵܘ ܐܲܦܸܣܩܘܿܦܵܐ]: ܘܥܲܠ ܟܠܵܝܗ‌ܝ ܒܢܲܝ̈ ܚܸܠܡܲܬܵܝܗ‌ܝ.  ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܐܲܠܵܗܵܐ ܡܪܲܚܡܵܢܵܐ: ܗ݁ܘ ܕܒܪ̈ܲܚܡܹܐ ܟܹܐ ܬܲܓܒܸܪ ܠܟܠ. ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܗܵܘ ܕܒܸܫܡܲܝܵܐ ܒܦܝܵܫܵܐ ܝَܠܹܗ ܚܩܝܼܪܵܐ ܘܒܐܲܪܥܵܐ ܦܝܵܫܵܐ ܝَܠܹܗ ܣܓ̣ܝܼܕܵܐ.  ܒܸܛܠܵܒܵܐ ܝَܘܲܚ ܡܸܢܘܼܟܼ‌‌‌܀ ܦܪܘܿܩ ܘܫܲܝܸܢ ܠܛܲܝܸܦܘܼܟܼ ܘܦ‌‌ܸܣܩܵܐ ܕܡܲܪܥܝܼܬܘܼܟܼ؛ ܘܢܛܘܿܪ ܠܥܹܕܬܘܼܟܼ ܦܪܝܼܩܬܵܐ ܒܨܠܝܼܒܼܘܼܟܼ؛ ܡܫܝܚܵܐ ܡܲܠܟܲܢ ܡܸܠܝܵܐ ܪ̈ܲܚܡܹܐ ܘܥܒܼܘܿܕ ܪ̈ܲܚܡܹܐ ܥܲܠܲܢ܀

ܘܡܨܲܠܝܼ ܬܸܪܬܹܝ ܨܠܵܘܵܬܹ̈ܐ ܡ̣ܢ ܐܲܒܘܼܚܲܠܝܼܡ.

ܘܡܲܩܦܝܼ ܡܹܐܡܪܹ̈ܐ ܡܓܘܼܒܝܹ̈ܐ ܡ̣ܢ ܡܹܐܡܪ̈ܘܼܗܝ ܕܛܘܼܒܼܵܢܵܐ ܡܵܪܝ ܐܲܦܪܹܝܡ؛ ܘܡܛܘܼܟܿܣܹ̈ܐ ܝَܢܵܐ ܘܡܘܼܠܚܸܡܹ̈ܐ ܠܡܵܪܝ ܪܲܒܲܢ ܝܲܩܝܼܪܵܐ (ܪܹܫ ܥܘܼܡܪܵܐ ܕܡܵܪܝ ܐܹܠܝܼܵܐ)؛ ܕܦܵܝܫܝܼ ܩܸܪ̈ܝܹܐ ܒܒܵܥܘܼܬܵܐ ܕܢܝܼܢܘܵܝܹ̈ܐ.

ܡܘܬܿܒܼܐ ܩܕܡܝܐ.

ܨܠܘܿܬܵܐ ܕܬܪܹܝܢَܒܼܫܲܒܵܐ ܕܒܵܥܘܼܬܵܐ؛

ܕܚܲܣܝܵܐ ܡܵܪܝ ܐܹܠܝܼܵܐ.

ܐܸܠܘܼܟܼ ܝܵܐ ܡܲܒܘܼܥܵܐ ܕܛܵܒܼܵܬܹ̈ܐ ܘܥܲܝܢܵܐ ܕܡܝܼ̈ܵܐ ܕܪ̈ܲܚܡܹܐ: ܬܢܝܼ. ܗ݁ܘ ܕܡ̣ܢ ܓܵܘ ܒܘܼܪ̈ܵܢܹܐ ܐܲܡܘܼܪܹ̈ܐ ܕܫܦܲܚܝܵܬܹ̈ܐ ܕܫܘܼܟܵܢ̈ܘܼܗ‌ܝ ܡܬܘܿܡܵܝܹ̈ܐ ܒܦܝܵܫܵܐ ܝَܢܵܐ ܡܘܼܫܦܸܚܹܐ ܠܲܦܹ̈ܐ ܕܪ̈ܲܚܡܹܐ ܥܲܠ ܟܠܲܝܗ‌ܝ ܗܵܘܢܹ̈ܐ ܡܩܲܒܠܵܢܹ̈ܐ ܕܪ̈ܲܚܡܹܐ. ܗ݁ܘ ܕܒܛܵܒܼܘܼܬܵܐ ܐܲܠܵܗܵܝܬܵܐ ܕܟܝܵܢܹܗ ܘܐܝܼܬܘܼܬܵܐ ܕܛܘܼܒܼܬܵܢܘܼܬܹܗ ܡܘܼܗܘܹܝܠܹܗ ܟܠܲܝܗ‌ܝ ܗܘܝܼܹ̈ܐ، ܘܒܚܸܟܼܡ̱ܬܹܗ ܕܠܹܐ ܐܵܬܝܵܐ ܠܨܲܚܨܘܼܝܹܐ.  ܒܨܲܠܡܵܐ ܕܐܵܕܵܡ ܬܘܼܪܸܨܠܹܗ ܟܠܲܝܗ‌ܝ ܒܸܪ̈ܝܹܐ، ܘܒܬܵܓܼܵܐ ܕܐܝܼܩܵܪܵܐ ܡܲܠܟܘܼܬܵܢܵܝܵܐ ܩܲܡ ܬܲܓ̰ܸܢܹܗ. ܘܠܥܸܠܸܠ ܡ̣ܢ ܟܠܲܝܗ‌ܝ ܡܸܬܚܲܙܝܵܢܹ̈ܐ ܕܲܪܓܼܹܗ ܡܘܼܪܸܡܠܹܗ. ܘܒܸܠܒܼܝܼܫܝܵܬܹ̈ܐ ܩܘܼܕܫܵܢܵܝܹ̈ܐ ܐܲܝܟܼ ܟܵܗܢܵܐ ܘܢܒܼܝܼܵܐ ܩܲܡ ܣܵܩܸܠܹܗ. ܘܒܝܲܕ ܚܵܘܵܐ ܢܟ̰ܝܼܠܬܵܐ ܡ̣ܢ ܓܲܒܵܐ ܝܲܡܝܼܢܵܝܵܐ ܘܒܪܝܼܬܵܐ ܡ̣ܢ ܗܘܼܠܹ̈ܐ ܐܸܠܥܵܝܹ̈ܐ ܩܲܡ ܗܲܝܸܪܹܗ. ܘܓܵܘ ܒܹܝܬܦܲܠܓܵܐ ܕܦܲܪܕܲܝܣܵܐ ܥܕܹܢܵܝܵܐ ܥܲܠ ܬܪܘܿܢܘܿܣ ܕܫܘܼܒܼܚܵܐ ܩܲܡ ܡܲܬܸܒܼܠܹܗ. ܘܡ̣ܢ ܐَܟܼܲܠܬܵܐ ܕܛܥܘܿܢܝܵܬܹ̈ܐ ܕܐܝܼܠܵܢܵܐ ܕܝَܕܲܥܬܵܐ ܕܛܵܒܼܬܵܐ ܘܒܝܼܫܬܵܐ ܡܘܼܟܠܹܐܠܹܗ. ܘܐܸܢ ܗܵܘܝܵܐ ܕܥܵܒܼܹܪ ܥܲܠ ܦܘܼܩܕܵܢܵܐ ܒܬܲܢܒܵܐ ܕܡܵܘܬܵܐ ܚܛܝܼܬܵܢܵܝܵܐ ܩܛܲܥܬܵܐ ܕܕܝܼܘܵܢ ܥܲܠܹܗ ܥܒܸܕܠܹܗ. ܘܟܲܕ ܐܲܝܟܼ ܚܸܠܡܵܐ ܗَܘܹܐܠܹܗ ܒܸܚܠܵܡܵܐ ܐܵܗܵܐ ܐܸܣܘܼܪܵܐ ܕܒܪܝܼܬܵܐ ܠܡܸܬܐܲܠܗܵܢܘܼܬܵܐ ܕܠܵܐ ܒܙܲܒܼܢܹܗ، ܫܘܼܗܒܸܬܠܹܗ ܠܕܲܪܓܼܵܐ ܕܪܘܼܚܵܢܘܼܬܵܐ ܕܠܵܐ ܒܥܸܕܵܢܹܗ. ܘܒܫܘܼܕܵܠܵܐ ܚܸܘܝܵܝܵܐ، ܘܒܪܵܐܝܝܼ ܚܵܘܵܝܵܐ ܡ̣ܢ ܕܲܪܓܼܵܐ ܕܫܘܼܠܛܵܢܹܗ ܢܦܸܠܹܗ. ܘܩܛܝܼܘܠܹܗ ܥܲܠ ܓܵܢܹܗ ܒܸܪ̈ܘܵܢܹܐ ܕܓܸܠܕܵܐ ܠܟܵܣܘܿܝܹܐ ܢܟܼܸܦܬܹܗ، ܘܦܸܫܠܹܗ ܡܟ̰ܘܼܡܟ̰ܸܡܵܐ ܒܒܲܪܕܘܼܩܲܢ ܟܹܐܢܘܼܬܵܢܵܝܬܵܐ ܠܣܘܼܪܓܘܼܢܘܼܬܵܐ ܕܠܵܘܛܬܹܗ. ܐܝܼܢܵܐ ܡܲܒܘܼܥܵܐ ܕܛܵܒܼܵܬܹ̈ܐ ܘܥܲܝܢܵܐ ܕܡܝܼ̈ܵܐ ܕܪ̈ܲܚܡܹܐ ܠܵܐ ܡܘܼܚܦܸܠܹܗ ܡ̣ܢ ܬܘܼܪܵܨܵܐ ܕܓܒܼܝܼܠܬܹܗ، ܘܠܵܐ ܪܘܼܦܹܐܠܹܗ ܓܵܘ ܗܵܘܬܵܐ ܚܛܝܼܬܵܢܵܝܬܵܐ ܠܨܲܠܡܵܐ ܕܟܲܣܝܘܼܬܹܗ، ܐܸܠܵܐ ܒܓܲܦܹ̈ܐ ܢܒܼܝܼܵܝܹ̈ܐ ܩܲܡ ܡܲܢܟܼܸܣܠܹܗ، ܘܒܡܲܪ̈ܥܲܫܝܵܬܹܐ ܟܵܗܢܵܝܹ̈ܐ ܩܲܡ ܡܲܪܝܸܙܠܹܗ. ܟܲܕ ܡ̣ܢ ܠܲܟܵܐ ܚܵܘܒܬܵܢܵܝܵܐ ܠܵܐ ܦܸܫܠܹܗ ܢܦܝܼܨܵܐ، ܘܡ̣ܢ ܩܵܘܕܘܼ̈ܗ‌ܝ ܫܲܗܘܲܬܵܢܵܝܹ̈ܐ ܠܵܐ ܦܸܫܠܹܗ ܡܦܘܼܨܝܵܐ، ܠܸܫܪܵܓَܼܝܵܐ ܕܐَܢܵܫܘܼܬܵܐ ܕܡ̣ܢ ܓܸܢܣܲܢ ܒܙܲܗܪ̈ܝܼܪܹܐ ܕܐܲܠܵܗܘܼܬܹܗ ܩܲܡ ܡܲܢܗܸܪܹܗ، ܘܠܒܲܪܟܝܵܢܵܐ ܕܐܝܼܬܘܼܬܵܐ ܒܐَܚܲܪܬܵܐ ܕܙܲܒܼܢܹ̈ܐ ܠܦܘܼܪܩܵܢܹܗ ܫܘܼܕܸܪܹܗ، ܟܲܕ ܩܛܝܼܘܵܐ ܡ̣ܢ ܒܬܘܼܠܬܵܐ ܕܥܵܠܲܡ ܐܲܪ̈ܓܘܵܢܹܐ ܕܒܸܣܪܵܐ ܘܠܒܼܝܼܫܵܐ ܦܲܓܼܪܵܐ ܕܡܘܼܟܵܟܼܵܐ ܥܲܠ ܠܵܘܓ̰ܵܐ ܕܢܘܼܗܪܵܐ: ܡܩܲܕܘܿܫܹܐ ܝَܘܲܚ ܘܡܲܣܘܿܩܹܐ ܗܲܠܸܠܘܼܝܵܐ ܘܒܸܛܠܵܒܵܐ ܡܸܢܘܼܟܼ: ܐܲܢَܬ ܡܵܪܝܼ ܒܪ̈ܲܚܡܘܼܟܼ ܕܪ̈ܵܡܹܐ ܝَܢܵܐ ܡ̣ܢ ܟܝܼܢ ܦܵܚܸܠܲܢ، ܘܒܸܡܪܲܚܡܵܢܘܼܬܘܼܟܼ ܦܲܪܩܵܢܬܵܐ ܕܥܵܠܡܹ̈ܐ ܡ̣ܢ ܚܛܝܼܬܵܐ ܓܵܫܸܩ ܥܲܠ ܙܲܒܘܼܢܘܼܬܲܢ ܘܠܵܐ ܫܲܒܼܩܸܬܠܲܢ ܐܲܝܟܼ ܕܐܲܚܢܲܢ ܩܲܡ ܫܲܒܼܩܸܚܠܘܼܟܼ، ܘܠܵܐ ܟܲܪܒܸܬ ܡܸܢܲܢ ܕܵܐܟܼܝܼ ܕܐܲܚܢܲܢ ܩܲܡ ܡܲܟܪܸܒܸܚܠܘܼܟܼ. ܒܗ݁‌ܝ ܕܐܲܚܢܲܢ ܐܲܝܟܼ ܒܵܒܲܢ ܩܲܕَܡܵܝܵܐ ܠܦܘܼܩܕܵܢܹ̈ܐ ܐܲܠܵܗܵܝܹ̈ܐ ܡܘܼܣܠܹܐܠܲܢ، ܘܥܲܠ ܦܘܼܩܵܕܹ̈ܐ ܐܹܘܲܢܓܲܠܵܝܹ̈ܐ ܥܒܼܸܪܲܢ. ܘܡ̣ܢ ܐܘ̣ܪܚܵܐ ܕܡܲܠܟܵܐ ܫܡܲܝܵܢܵܐ ܕܝܑܼܠܵܗ݁ ܬܲܡܝܼܙ ܡ̣ܢ ܟܸܬܘܹ̈ܐ ܕܚܸܠܛܘܸܢܝܘܼܬܵܐ ܦܠܸܛܠܲܢ، ܘܐܲܝܟ݂ ܕܘܼܪ̈ܒܸܢܹܐ ܘܐܲܝܟܼ ܒܢܘܿܢܹ̈ܐ ܕܢܘܼܟܼܪ̈ܵܝܹܐ ܪܸ̈ܦܝܹܐ ܦܝܼܕܠܲܢ ܘܚܛܹܐܠܲܢ. ܡܵܢܝܼ ܝَܠܹܗ ܡ̣ܢ ܓܒܼܝܼܠܹ̈ܐ ܕܛܝܼܢܵܐ ܕܦܵܐܸܫ ܡܘܼܟܫܸܛܵܐ، ܘܡܵܢܝܼ ܡ̣ܢ ܝܑܼܠܝܼܕܹ̈ܐ ܕܒܸܣܪܵܐ ܕܚܣܝܼܟܼܵܐ ܝَܠܹܗ ܡ̣ܢ ܚܛܝܼܵܬܹ̈ܐ؟ ܡܵܢܝ݂ ܝَܠܹܗ ܡ̣ܢ ܬܘܼܚܡܵܐ ܕܒܹܝܬَ ܐܵܕܵܡ ܕܠܹܐ ܗܵܘܹܐ ܚܲܝܵܒܼܵܐ؟ ܘܡܵܢܝܼ ܝَܠܹܗ ܡ̣ܢ ܠܒܼܝܼܫܵܐ ܕܚܲܫܹ̈ܐ ܕܦܵܐܸܫ ܚܘܼܪܸܪܵܐ ܡ̣ܢ ܠܲܟܵܐ؟ ܐܸܢ ܗܵܘܝܵܐ ܕܠܓܹܗܲܢܵܐ ܟ̰ܲܡܟ̰ܸܡܵܐ ܠܲܢ ܟܹܐܢܘܼܬܘܼܟܼ ܠܹܐ ܦܵܝܫܵܐ ܠܝܼܡܬܵܐ، ܘܝܲܢ ܓܵܘ ܐܘܿܩܝܵܢܘܼܣܹ̈ܐ ܬܲܚܬܵܝܹ̈ܐ ܦܲܩܕܵܐ ܠܲܢ ܕܥܲܡܪܵܚ ܠܹܐ ܦܲܝܫܵܐ ܠܝܼܡܬܵܐ. ܠܘܼܟܸܢܹ̈ܐ ܝَܘܲܚ ܘܚܲܛܵܝܹ̈ܐ، ܘܠܲܝܬ ܓܵܘܲܢ ܟܹܐܢܹ̈ܐ ܕܡܲܪܕܵܝܠܘܼܟܼ، ܣܵܒܵܒ ܦܘܼܩܕܵܢܵܐ ܕܝܼܘܼܟ ܝܑܼܠܹܗ ܠܸܥܒܼܕܵܐ ܛܵܒܼܬܵܐ ܝܲܢ ܣܪܝܼܬܵܐ ܥܲܡܲܢ. ܡܘܿܕܝܼ ܒܐܵܡܸܪ ܪܹܓܵܐ ܠܡܵܪܹܗ ܘܛܝܼܢܵܐ ܠܓܵܒܼܘܿܠܹܗ؟ ܥܲܦܪܵܐ ܝَܘܲܚ ܐܲܚܢܲܢ  ܡܵܪܝܼ ܘܩܸܛܡܵܐ، ܐܲܝܟܼ ܡܵܐܢܹ̈ܐ ܕܦܲܚܵܪܵܐ ܓܒܼܝܼ̈ܠܹܐ ܒܡܝܼ̈ܵܐ ܕܚܲܫܹ̈ܐ. ܐܲܢَܬ ܡ̣ܢ ܗܘܼܠܡܘܼܟܼ ܛܘܼܪܹ̈ܐ ܟܹܐ ܦܲܫܪܝܼ، ܘܡ̣ܢ ܗܵܘܓܵܐ ܕܦܲܐܬܘܵܬ̈ܘܼܟܼ ܬܹܒܹܝܠ ܟܹܐ ܝܲܩܕܵܐ. ܐܲܢَܬ ܕܥܲܠ ܟܵܠܸܣܟܵܐ ܕܢܘܼܪܵܐ ܝَܬܝܼܒܼܵܐ ܝَܘܸܬ، ܘܠܵܗܵܐ ܕܢܘܼܪܵܐ ܩܲܕَܡ ܗܸܙܘܼܪܘܼܟ ܒܸܠܗܵܝܵܐ ܝَܠܵܗ݁. ܐܲܢَܬ ܕܡ̣ܢ ܢܓ̰ܲܘܬܘܼܟܼ ܥܵܠܡܵܐ ܟܹܐ ܪܵܓܹܕ، ܘܡ̣ܢ ܚܸܡܬܘܼܟܼ ܝܵܡܵܬܹ̈ܐ ܟܹܐ ܫܲܓܼܫܝܼ. ܡܵܢܝܼ ܝَܠܹܗ ܕܡ̣ܢ ܪܹ̈ܓܵܘܵܬܹܐ ܪܸ̈ܦܝܹܐ ܕܠܹܐ ܥܵܒܹܕ ܓܢܵܗܵܐ، ܘܡܵܢܝܼ ܝَܠܹܗ ܡ̣ܢ ܡܵܪ̈ܵܘܵܬܹܐ ܡܪ̈ܲܚܡܵܢܹ̈ܐ ܕܡ̣ܢ ܣܲܟܼܠܘܼܬܵܐ ܠܹܐ ܥܵܒܹܪ. ܠܵܐ ܡܵܪܝܵܐ، ܠܵܐ ܡܵܪܝܵܐ: ܠܵܐ ܟܲܪܒܸܬ ܥܲܠ ܨܘܼܪܬܵܐ ܕܨܲܠܡܵܐ ܕܟܲܣܝܘܼܬܘܼܟܼ، ܠܵܐ ܟܲܪܒܸܬ ܥܲܠ ܦܪ̈ܝܼܩܹܐ ܕܩܸܢܝܵܝܠܘܼܟܼ ܒܢܸܛܘܼܦܝܵܬܹ̈ܐ ܕܕܸܡܵܐ ܘܡܝܼ̈ܵܐ ܕܡܫܝܼܚܘܼܟܼ. ܠܵܐ ܣܵܦܸܬܠܗَܘܿܢ ܠܸܬܒܼܵܪܵܐ ܓܵܢܵܬܹ̈ܐ ܕܒܸܣܦܵܪܵܐ ܝَܢܵܐ ܐܸܠܘܼܟܼ. ܠܵܐ ܥܲܟ̰ܡܸܬ ܬܲܪܥܵܐ ܕܡܪܲܚܡܵܢܘܼܬܘܼܟܼ ܓܵܘ ܦܲܐܬܵܐ ܕܣܲܟܼܠܹ̈ܐ ܘܚܸܫܟܵܢܹ̈ܐ ܕܠܲܡܦܹ̈ܝܕܹܐ، ܥܒܼܘܿܕ ܪ̈ܲܚܡܹܐ ܡܵܪܝܼ ܥܲܠ ܨܲܠܡܲܢ ܕܫܘܼܚܬܸܢܹܗ ܒܚܛܝܼܬܵܐ، ܘܥܲܠ ܓܒܼܝܼܠܬܵܐ ܕܐܵܕܵܡ ܕܦܸܫܠܵܗ݁ ܠܘܼܟܸܢܬܵܐ ܒܚܲܫܹ̈ܐ. ܚܘܼܪ ܥܲܠ ܙܘܼܙܵܐ ܕܐَܢܵܫܘܼܬܲܢ ܕܛܠܸܩܠܹܗ ܓܵܘ ܥܲܦܪܵܐ ܕܚܸܠܛܘܼܢܝܘܼܬܵܐ، ܘܥܲܠ ܥܸܪܒܵܐ ܕܓܸܢܣܲܢ ܕܛܠܸܩܠܹܗ ܓܵܘ ܛܘܼܪܵܐ ܕܚܛܝܼܵܬܹ̈ܐ. ܥܒܼܘܿܕ ܪ̈ܲܚܡܹܐ ܥܲܠ ܒܢܘܿܢܹ̈ܐ ܐܵܣܘܿܛܹ̈ܐ ܕܠܵܐ ܣܒܼܸܥܠܗَܘܿܢ ܡ̣ܢ ܚܲܪ̈ܢܘܼܟܹܐ ܕܓܢܵܗܵܬܹ̈ܐ، ܘܦܠܘܿܛ ܛܵܐܝܼ ܒܵܬَܪܲܝܗ‌ܝ ܒܐܲܩܠܵܐ ܕܪ̈ܲܚܡܘܼܟܼ، ܕܒܸܣܒܵܪܵܐ ܝَܢܵܐ ܠܚܦܵܩܬܘܼܟܼ، ܕܐܲܢَܬ ܝܑܼܘܸܬ ܝܵܡܵܐ ܕܪ̈ܲܚܡܹܐ ܘܐܘܿܩܝܵܢܘܼܣ ܕܚܢܵܢܵܐ ܘܕܡܪܲܚܡܵܢܘܿܬܵܐ، ܡܵܪܵܐ ܕܟܠ: ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܫܵܐ ܠܥܵܠܡܝܼܢ.

ܚܒܲܪܬܵܐ ܕܝܼܠܹܗ.

ܐܸܠܘܼܟܼ، ܝܲܡܵܐ ܫܦܝܼܟܼܵܐ ܕܪ̈ܲܚܡܹܐ ܘܕܠܹܐ ܦܵܐܸܫ ܡܩܘܼܝܸܣܵܐ، ܘܐܘܿܩܝܵܢܘܼܣ ܕܒܲܣܝܼܡܘܼܬܵܐ ܕܠܹܐ ܦܵܐܸܫ ܡܸܛܝܵܐ ܥܘܼܡܩܘܼܗ‌ܝ ܒܸܩܪܵܝܵܐ ܝَܘܲܚ: ܘܡ̣ܢ ܒܹܝܬ ܓܲܙܘܼܟܼ ܥܲܬܝܼܪܵܐ ܗ݁ܘ ܕܠܹܐ ܩܵܛܸܥ ܡܲܒܘܼܥܹܗ ܡ̣ܢ ܝܵܗَܒܼܲܠܬܵܐ ܕܗܲܝܵܪ̈ܝܵܬܹܐ ܠܒܢܘܿܢܹ̈ܐ ܕܨܲܠܡܹܗ ܒܸܛܠܵܒܵܐ ܝܘܲܚ: ܦܬܘܿܚ، ܡܵܪܲܢ ܘܐܲܠܵܗܲܢ ܥܲܢܒܵܪܹ̈ܐ ܕܡܪܲܚܡܵܢܘܼܬܘܼܟܼ ܩܵܕَܡ ܓܵܢܵܬܹ̈ܐ ܓ̰ܘܼܢܓ̰ܸܪܹ̈ܐ ܕܬܲܩܬܘܿܩܹܐ ܝَܢܵܐ ܥܲܠ ܬܲܪܥܵܐ ܕܡܵܪܘܼܬܘܼܟܼ. ܘܡܲܓ̰ܪܝܼ ܫܦܲܚܝܵܬܹ̈ܐ ܡܬܘܿܡܵܝܹ̈ܐ ܕܚܢܵܢܘܼܟܼ ܥܲܠ ܠܸܒܵܘܵܬܹ̈ܐ ܚܲܫܵܢܹ̈ܐ ܘܡܵܪܹܐ ܕܲܪ̈ܕܹܐ ܕܒܚܲܫܵܐ ܒܸܩܪܵܝܘܼܟܼ ܝܑܼܢܵܐ. ܗܲܒَܼܠܲܢ ܡܲܛ̈ܠܵܒܲܢ ܕܒܝܲܕ ܦܲܪܦܵܠܬܵܐ ܒܦܝܵܫܵܐ ܝَܢܵܐ ܡܘܼܩܪܸ̈ܒܼܹܐ ܠܘܵܬܘܼܟܼ. ܘܒܛܠܘܿܠܵܐ ܕܪ̈ܲܚܡܘܼܟܼ ܡܲܦܨܸܚܠܗَܘܿܢ ܦܲܐܬ̈ܘܵܬܲܢ ܦܫܝܼܡܹ̈ܐ، ܘܡܲܢܗܸܪ ܦܲܪܨܘܿܦܲܢ ܒܫܘܼܒܼܩܵܢܵܐ ܕܓܢܵܗܵܬܹ̈ܐ ܘܚܘܼܣܵܝܵܐ ܕܣܲܟܼ̈ܠܘܵܬܲܢ ܘܒܓܪܵܕܬܵܐ ܕܡܸܬܥܲܒܼܪ̈ܵܢܝܵܬܲܢ ܐܲܝܟܼ ܕܐَܡܸܪܘܼܟܼ ܓܵܘ ܩܵܘܠܘܼܟܼ. ܘܒܵܣܸܡ ܕܲܪ̈ܕܹܐ ܕܦܲܓܼܪ̈ܲܝܢ ܘܠܲܟܹ̈ܐ ܕܓܵܢ̈ܵܬܲܢ، ܘܡܲܢܗܸܪ ܦܲܐܬܘܵܬ̈ܘܼܟܼ ܘܦܵܪܸܩܠܲܢ ܒܛܲܝܒܘܼܬܘܼܟܼ، ܕܚܵܕܸܚ ܒܚܲܕܘܼܬܘܼܟܼ ܘܦܲܝܫܵܚ ܡܫܘܼܒܚܹ̈ܐ ܒܝܵܪܬܘܼܬܘܼܟܼ ܘܒܦܘܼܪܩܵܢܵܐ ܕܡܸܢܘܼܟܼ. ܡܵܪܵܐ ܕܟܠ: ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܫܵܐ ܠܥܵܠܡܝܼܢ.

ܩܲܕܼܡܵܝܑܼܬܼ؛

ܡܲܦܲܩ ܒܪܘܼܚܵܐ.

ܡܘܼܚܸܒ̈ܝܼ (ܬܢܝܼ)؛ ܫܡܸܥܡܘܿܢ ܒܗܵܘܢܵܢܘܼܬܵܐ ܘܦܲܪܡܹܝܡܘܿܢ ܒܦܵܪܘܿܫܘܼܬܵܐ؛ ܐܝܼܢܵܐ ܕܡ̣ܢ ܐܲܕܝܼܵܐ ܡܫܲܪܘܿܝܹܐ ܝَܘܲܚ ܒܝܲܕ ܐܲܠܵܗܵܐ ܒܐܵܗܵܐ ܟܬܵܒ̣ܵܐ؛ ܒܸܕܟܼܵܪܵܐ ܝَܘܲܚ ܠܐܲܝܢܝܼ ܕܒܙܕܘܿܥܬܵܐ ܕܐܲܠܵܗܵܐ ܡܲܨܝܘܼܬܹܐ ܝَܢܵܐ ܥܲܠܲܢ؛ ܕܓܠܝܼܬܵܐ ܝَܠܵܗ݁ ܕܐܲܢܹܐ  ܡܹܐܡܪܹ̈ܐ ܕܒܵܥܘܼܬܵܐ ܨܠܘܿܬܵܐ ܝَܢܵܐ ܘܦܲܪܦܲܠܬܵܐ ܠܘܵܬܼ ܐܲܠܵܗܵܐ ܘܡܲܢܟܲܣܬܵܐ ܕܥܒ̣ܵܕ̈ܲܢ ܒܝܼܫܹ̈ܐ؛ ܘܢܲܣܝܼܗܲܬ ܕܒܘܼܬ ܕܘܼܒܵܪܹ̈ܐ ܫܲܦܝܪܹ̈ܐ. ܘܐܵܗܵܐ ܡܲܠܦܵܢܵܐ ܒܫܵܘܦܵܐ ܕܠܸܫܵܢܵܐ ܝَܠܹܗ ܕܟܠܹܗ ܓܘܼܫܡܵܐ ܥܹܕܬܵܢܵܝܵܐ؛ ܟܲܕ ܚܲܕܟܡܵܐ ܓܵܗܹܐ ܒܸܛܠܵܒܵܐ ܝَܠܹܗ ܚܢܵܢܵܐ ܠܘܵܬܼ ܐܲܠܵܗܵܐ ܒܦܲܪܨܘܿܦܵܐ ܕܟܠܲܢ، ܘܒܸܛܠܵܒܵܐ ܝَܠܹܗ ܪ̈ܲܚܡܹܐ ܡܓܹܢَܒܲܢ؛ ܐܝܼܢܵܐ ܒܓܵܗܹܐ ܐَܚܹܪ̈ܢܹܐ ܡܲܢܟܼܘܼܣܲܢ ܝܑܼܠܹܗ ܒܘܼܬ ܚܵܬܸܪ ܕܒܝܼܫܵܬ̈ܲܢ، ܟܲܕ ܒܹܐܡܵܪܵܐ؛ ܕܒܟܹܐܢܘܼܬܵܐ ܒܦܝܵܫܵܐ ܝَܘܲܚ ܬܘܼܥܠܸܡܹ̈ܐ ܡ̣ܢ ܡܵܪܲܢ، ܩܵܐ ܕܠܵܐ ܥܲܡ ܥܵܠܡܵܐ ܦܵܝܫܲܚ ܥܒ̣ܝܼܕܹ̈ܐ ܚܲܝܵܒܹ̈ܐ. ܘܡܸܢَܕܪܸܫَ ܒܓܵܗܹܐ ܐَܚܹܪ̈ܢܹܐ ܒܹܝܵܗَܒ̣ܵܐ ܝَܠܹܗ ܩܵܬܲܢ ܢܲܣܝܼܗܲܬ ܕܕܵܥܪܲܚ ܡ̣ܢ ܚܛܝܼܵܬ̈ܲܢ ܘܦܲܪܦܸܠܲܚ ܘܛܵܠܒܲܚ ܪ̈ܲܚܡܹܐ؛ ܟܲܕ ܠܵܐ ܩܵܛܥܲܚ ܗܹܒ̣ܝܼ ܕܦܘܼܪܩܵܢܵܐ ܕܓܵܢܵܬ̈ܲܢ. ܡܣܵܒܵܒ ܕܩܘܼܪܒܵܐ ܝَܠܹܗ ܡܵܪܝܵܐ ܠܫܡܝܼܛܹ̈ܐ ܕܠܸܒܵܐ، ܘܠܡܲܟܝܼܟܹ̈ܐ ܕܪܘܼܚܵܐ ܟܹܐ ܦܵܪܸܩ [ܡܙܡ܊ ܠܕ؛18].

     ܘܒܘܼܬ ܐܵܗܵܐ؛ ܥܲܠ ܕܐܲܢܹܐ ܘܡܐܲܝܟܼ ܕܐܲܢܹܐ ܥܘܼܕܪ̈ܵܢܹܐ ܡܫَܟ̰ܝܼܚܹ̈ܐ ܝَܢܵܐ ܒܐܲܢܹܐ ܡܹܐܡܪܹ̈ܐ؛ ܚܫܝܼܚܬܵܐ ܝَܠܵܗ݁ ܐܸܠܲܢ ܕܒܚܵܦܵܛܘܼܬܵܐ ܫܲܡܥܲܚܠܗَܘܿܢ ܐܝܼܡܲܢ ܕܒܸܦܝܵܫܵܐ ܝَܢܵܐ ܩܸܪ̈ܝܹܐ ܟܲܕ ܠܵܐ ܣܵܩܕܵܐ ܠܲܢ. ܗܲܕܟܼܵܐ؛ ܓܠܝܼܬܵܐ ܝَܠܵܗ݁ ܕܗ݁ܘ ܕܡܲܨܝܸܬ ܩܸܪ̈ܝܵܢܹܐ ܕܐܲܢܹܐ ܡܹܐܡܪܹ̈ܐ ܐܝܼܡܲܢ ܕܒܸܦܝܵܫܵܐ ܝَܢܵܐ ܩܸܪ̈ܝܹܐ، ܒܸܬ ܦܵܐܸܫ ܡܸܠܝܵܐ ܚܲܫܵܐ ܘܦܵܫܲܡܬܵܐ. ܐܝܼܢܵܐ ܒܲܠܟܵܐ ܐܵܦ ܕܸܡܥܹ̈ܐ ܡܲܓ̰ܪܹܐ ܒܦܵܫܲܡܬܵܐ، ܘܠܸܒܵܐ ܥܝܼܩܵܐ ܐܲܠܵܗܵܐ ܠܹܐ ܡܲܣܠܹܐ. ܘܐܝܼܡܲܢ ܕܟܵܠܹܐ ܓܵܘ ܚܸܠܡܲܬ ܒܚܲܫܵܐ ܟܹܐ ܙܵܡܸܪ ܟܲܕ ܠܵܐ ܒܵܕܹܐ ܪܸܥܝܵܢܹܗ ܠܲܐܟܼܵܐ ܘܬܵܡܵܐ، ܘܟܠܹܗ ܝܵܘܡܵܐ ܒܦܵܫܲܡܬܵܐ ܟܹܐ ܗܵܘܹܐ؛ ܨܠܘܿܬܹܗ ܒܸܬ ܐܵܣܠَܩܵܐ ܠܫܡܲܝܵܐ، ܐܲܝܟܼ ܥܸܛܪܵܐ ܕܒܸܣܡܹ̈ܐ ܛܵܒܹ̈ܐ ܘܐܲܝܟܼ ܕܸܒ̣ܚܵܐ ܡܩܘܼܒܠܵܐ. ܐܝܼܢܵܐ ܗ݁ܘ ܕܗܵܘܹܐ ܥܵܨܝܼ ܥܲܠ ܫܡܥܵܝܬܵܐ ܕܩܪܵܝܬܵܐ ܕܡܹܐܡܪܹ̈ܐ، ܒܗ݁ܝ ܕܒܸܚܫܵܒ̣ܵܐ ܝَܠܹܗ ܒܓܵܢܹܗ ܕܟܠܵܗ݁ ܒܵܥܘܼܬܵܐ ܒܚܸܠܡܲܬ ܕܡܲܙܡܘܿܪܹ̈ܐ ܐܲܚܟ̰ܝܼ ܡܬܘܼܚܲܒܬܵܐ ܘܩܸܪܝܵܢܵܐ ܡ̣ܢ ܙܵܘܕܘܼܢܝܵܐ ܝَܠܹܗ، ܘܦܵܠܸܛ ܠܒܲܕܲܪ ܠܵܐ ܡ̣ܢ ܥܸܠܬܵܐ ܕܐܵܢܲܢܩܹܐ ܘܝܵܬܸܒ̣ ܘܬܵܢܹܐ ܗܲܩܝܲܬܹ̈ܐ ܥܵܠܡܵܢܵܝܹ̈ܐ ܘܐܵܙܸܠ ܘܦܵܠܸܚ ܚܲܕَ ܫܘܼܓَܼܠܵܐ ܕܕܵܡܘܼܪܟ̰ܝܼܝܘܼܬܵܐ ܗܲܠ ܕܦܵܪܸܩ ܩܸܪܝܵܢܵܐ؛ ܐܵܗܵܐ ܚܘܼܫ ܕܝܵܕܥܹܐ ܕܐܵܦ ܐܝܼܡܲܢ ܕܐܵܬܹܐ ܘܟܵܠܹܐ ܓܵܘ ܒܚܸܠܡܲܬ، ܬܵܡܵܐ ܒܸܒܕܵܝܵܐ ܝَܠܹܗ ܪܸܥܝܵܢܹܗ ܒܗ݁ܘ ܡܸܢܕܝܼ ܕܫܒ̣ܸܩܠܹܗ، ܝܲܢ ܒܗܲܩܝܲܬܹ̈ܐ ܒܲܛܝܼܠܹ̈ܐ ܕܫܡܸܥܠܹܗ ܝܲܢ ܕܬܘܼܢܹܐ ܠܹܗ ܩܵܐ ܐَܚܪܹ̈ܢܹܐ؛ ܐܲܝܟܼ ܕܒܸܚܫܵܒ̣ܵܐ ܝَܘܸܢ ܠܹܐ ܝَܠܹܗ ܚܲܕَ ܚܘܼܣܪܵܢܵܐ ܙܥܘܿܪܵܐ ܕܒܸܬ ܗܵܘܹܐ ܠܹܗ ܡ̣ܢ ܐܵܗܵܐ ܡܲܚܦܲܠܬܵܐ. ܡ݁ܢ ܕܐܝܼܬ ܠܹܗ ܢܵܬܝܵܬܹ̈ܐ ܕܫܵܡܸܥ ܚܘܼܫ ܫܵܡܸܥ، ܘܥܲܠܲܢ ܠܵܐ ܛܲܪܛܸܡ. ܐܝܼܢܵܐ؛ ܐܲܝܢܝܼ ܕܡܲܣܠܹܐ ܥܲܠ ܕܐܲܢܹܐ ܡܸܢܕܝܼܵܢܹ̈ܐ ܕܡ̣ܢ ܥܸܠܸܠ، ܠܵܐ ܐܲܚܟ̰ܝܼ ܠܓܵܢܹܗ ܒܸܩܛܵܥܝܵܐ ܝَܠܹܗ ܡ̣ܢ ܛܵܒ̣ܵܬܹ̈ܐ، ܐܸܠܵܐ ܐܵܦ ܩܵܐ ܚܲܙܝܵܢܹ̈ܐ ܒܸܗܘܵܝܵܐ ܝَܠܹܗ ܥܸܠܬܵܐ ܕܟܦܘܼܪܝܵܐ، ܘܐܸܣܟܹܝܡܲܢ ܒܸܦܝܵܫܵܐ ܝَܠܹܗ ܡܘܼܣܠܝܼܵܐ. ܐܝܼܢܵܐ ܗ݁ܘ ܕܥܵܒܸܕ ܚܲܝܠܵܐ ܥܲܠ ܓܵܢܹܗ ܘܚܵܡܸܠ ܘܫܵܡܸܥ ܩܪܵܝܬܵܐ، ܠܵܐ ܐܲܚܟ̰ܝܼ ܝܘܼܬܪܵܢܵܐ ܪܵܒܵܐ ܒܸܬ ܩܵܛܸܦ ܩܵܐ ܓܵܢܹܗ ܐܸܠܵܐ ܐܵܦ ܥܸܠܬܵܐ ܕܛܵܒ̣ܵܬܹ̈ܐ ܠܐَܚܹܪ̈ܢܹܐ ܒܗܵܘܹܐ. ܘܦܘܼܪܥܵܢܵܐ ܚܲܕَ ܒܬܪܹܝ ܬܵܩܹ̈ܐ ܒܸܬ ܩܲܒܸܠ ܡ̣ܢ ܡܵܪܲܢ. ܕܗ݁ܘ ܒܛܲܝܒܘܼܬܹܗ ܩܲܒܸܠ ܨܠܘܿܬܲܢ ܘܒܵܥܘܼܬܲܢ ܘܡܲܕܥܸܪ ܡܲܛ̈ܠܵܒܲܢ ܘܝܵܗَܒܸܠܲܢ ܕܐܲܝܟܼ ܨܸܒ̣ܝܵܢܹܗ ܦܵܝܫܲܚ ܬܘܼܓܒܸܪܹ̈ܐ ܟܠܵܝܗܝ ܝܵܘܡܵܢܹ̈ܐ ܕܚܲܝܲܝ̈ܢ؛ ܐܵܡܹܝܢ.

ܘܗ݁ܝܓܵܗ ܡܲܩܸܦ ܩܵܪܘܿܝܵܐ ܘܩܵܪܹܐ ܐܵܗܵܐ ܩܸܪܝܵܢܵܐ ܩܲܕَܡܵܝܵܐ ܒܐܸܣܟܹܿܝܡܵܐ ܦܫܝܼܡܵܐ ܘܒܢܝܼܫܵܐ ܡܙܝܼܓܼܵܐ ܒܦܵܫܲܡܬܵܐ.

ܩܪܝܢܐ. ܐ.

ܐܲܝܢܝܼ ܕܐܵܬܹܐ ܠܒܵܥܘܼܬܵܐ؛ (ܬܢܝܼ) ܚܘܼܫ ܕܦܵܐܸܫ ܡܨܘܼܠܸܠܵܐ ܡ̣ܢ ܚܘܼܫܵܒܹ̈ܐ. ܘܡܗܵܕܸܪܵܗ̇ ܐܵܦ ܫܡܸܥܬܹܗ؛ ܒܕܵܡܵܝܬܵ‌ܐ ܕܐܲܪܥܵܐ ܠܐܲܟܵܪܵܐ. ܒܸܪܙܲܪܥܵܐ ܕܚܲܝܹ̈ܐ ܒܢܵܦܸܠ ܒܝܼܘܿܗ̇؛ ܐܸܢ ܡܲܨܝܵܐ ܕܚܲܒܪܵܗ̇ ܒܝܹܗ. ܢܲܬܝܵܬܹ̈‌ܐ ܕܟܠ ܐَܢܵܫܵܐ ܚܘܿܫ ܗܵܘܝܼ ܡܬܘܼܡܸܙܹܐ؛ ܐܲܝܟܼ ܥܲܝܢܵܐ ܩܵܕَܡ ܒܲܗܪܵܐ. ܡܘܼܡܟܸܢ ܐܝܼܬ ܥܲܝܢܵܐ ܕܙܲܒܘܼܢ ܝَܠܵܗ̇؛ ܘܠܹܐ ܡܵܨܝܵܐ ܕܩܵܒܠܵܐ ܚܲܝܠܵܐ ܕܙܲܗܪܝܼܪܹ̈ܐ. ܩܵܘܡܵܐ ܐܝܼܬ ܢܵܬܵ‌ܐ ܕܡܪܝܼܥܬܵܐ ܝَܠܵܗ̇؛ ܘܠܹܐ ܡܵܨܝܵܐ ܕܫܲܡܥܵܐ ܗܹܡܸܙܡܵܢܹ̈ܐ. ܩܵܘܡܵܐ ܐܝܼܬ ܐܸܢܝܲܬ ܕܩܠܝܼܒܬܵܐ ܝَܠܵܗ̇؛ ܘܟܹܐ ܡܓܲܢܓܸܙܵܐ ܡ̣ܢ ܕܸܪܡܵܢܵܐ ܕܚܲܝܹ̈ܐ. ܩܵܘܡܵܐ ܐܝܼܬ ܕܦܲܓܼܪܹܗ ܠܲܐܟ̣ܵܐ ܝَܠܹܗ؛ ܟܲܕ ܪܸܥܝܵܢܹܗ ܠܹܐ ܝَܠܹܗ ܠܲܐܟ̣ܵܐ. ܩܵܘܡܵܐ ܐܝܼܬ ܕܛܸܠܵܢܝܼܬܹܗ؛ ܒܸܚܙܵܝܵܐ ܝَܘܲܚ ܡܓܹܢَܒ ܪܸܥܝܵܢܹܗ. ܩܵܘܡܵܐ ܐܝܼܬ ܕܡܬܲܚܡܘܼܢܹܐ ܝَܠܹܗ ܒܠܲܚܡܵܐ؛ ܘܗܵܐ ܒܹܐܟܼܵܠܵܐ ܝَܠܹܗ ܟܲܕ ܠܵܐ ܒܸܣܒܲܥܝܵܐ. ܩܵܘܡܵܐ ܐܝܼܬ ܕܨܵܘܡܵܐ ܥܲܠ ܦܘܼܡܹܗ ܝَܠܹܗ؛ ܘܡ̣ܢ ܓܵܘܹܗ ܚܘܼܫܲܒܼ ܕܡܹܐܟܼܘܼܠܬܵ‌ܐ. ܩܵܘܡܵܐ ܐܝܼܬ ܕܬܲܚܡܘܼܢܹܐ ܝَܠܹܗ ܒܚܲܡܪܵܐ؛ ܘܗܵܐ ܟܹܐ ܛܵܥܸܡ ܟܠ ܚܲܡܪ̈ܵܢܹܐ. ܩܵܘܡܵܐ ܐܝܼܬ ܕܬܲܚܡܘܿܢܹܐ ܝَܠܹܗ ܒܕܵܘܸܠܬܹܗ؛ ܘܚܲܫܒܘܿܢܹܐ ܝَܠܹܗ ܥܲܡ ܕܵܝܢܵܢ̈ܘܼܗ‌ܝ. ܩܵܘܡܵܐ ܐܝܼܬ ܐَܢܵܫܵܐ ܕܬܲܚܡܘܼܢܹܐ ܝَܠܹܗ ܒܫܩܵܠܬܵ‌ܐ ܕܬܘܼܥܠܘܼܗ‌ܝ؛ ܘܗܵܐ ܥܲܝܢܘܼ̈ܗ‌ܝ ܥܲܠ ܛܲܡܥܵܟܵܪܘܼܬܵܐ ܝَܢܵܐ. ܩܵܘܡܵܐ ܐܝܼܬ ܕܠܹܐ ܝَܘܲܚ ܐܸܠܸܗ ܒܸܚܙܵܝܵܐ؛ ܐܸܠܵܐ ܐܸܢ ܠܛܸܠܵܢܝܼܬܹܗ ܒܸܚܙܵܝܵܐ ܝَܘܲܚ. ܩܵܘܡܵܐ ܐܝܼܬ ܕܒܸܣܢܵܝܵܐ ܝَܠܹܗ ܠܐܲܚܘܿܢܹܗ؛ ܘܗܵܐ ܒܸܪܕܵܦܘܼܗܝ ܝَܠܹܗ ܒܛܸܫܘܵܐ. ܩܵܘܡܵܐ ܐܝܼܬ ܕܟܹܐ ܣܵܢܹܐ ܠܚܲܒܼܪܹܗ؛ ܘܗܵܐ ܟܹܐ ܐܵܟܹܠ ܐܵܦ ܡ̣ܢ ܒܸܣܪܹܗ. ܩܵܘܡܵܐ ܐܝܼܬ ܕܛܲܢܵܢܵܐ ܝَܠܹܗ: ܘܗܵܐ ܒܸܩܝܵܕܵܐ ܝَܠܹܗ ܡ̣ܢ ܠܓܵܘܵܝܹܗ.  ܩܵܘܡܵܐ ܕܐܝܼܬ ܕܡܥܵܓ̰ܘܼܙܹܐ ܝَܠܹܗ ܠܐَܚܹܪَ̈ܢܹܐ؛ ܘܒܓܵܢܹܗ ܡܲܩܘܘܿܚܹܐ ܝَܠܹܗ ܒܸܨܠܘܿܬܵܐ.  ܩܵܘܡܵܐ ܟܲܕ ܟܠܹܗ ܠܲܐܟܼܵܐ ܝَܠܹܗ؛ ܘܓܵܫܲܩܬܹܗ ܒܕܝܼܬܵ‌ܐ ܝَܠܵܗ̇ ܒܝܼܫܵܐܝܼܬ.  ܩܵܘܡܵܐ ܕܠܸܒܹܗ ܠܹܐ ܝَܠܹܗ ܠܲܐܟܼܵܐ؛ ܘܦܲܪܨܘܿܦܹܗ ܗܵܐ ܒܸܚܙܵܝܵܐ ܝَܘܲܚ.  ܩܵܘܡܵܐ ܕܓܢܵܒܼܵܐ ܒܸܓܢܵܒܲܢ ܝَܠܹܗ؛ ܕܒܫܸܬܩܹܗ ܗܵܐ ܡܲܚܠܘܼܛܲܢ ܝَܠܹܗ.  ܩܵܘܡܵܐ ܐܝܼܬ ܕܒܹܐܪܝܼܙܵܐ ܝَܠܹܗ ܒܓܵܫܲܩܬܹܗ؛ ܘܗܵܐ ܒܸܬܝܵܒܼܵܐ ܝَܠܹܗ ܒܹܝܠ ܡܝܲܩܪܹ̈ܐ. ܐܵܗܵܐ ܟܦܘܼܪܝܵܐ ܓܘܼܪܵܐ ܝَܠܹܗ؛ ܕܠܲܐܟܼܵܐ ܡܲܟܪܸܒ ܒܲܪܢܵܫܵܐ. ܗ݁ܘ ܥܵܘܠܵܐ ܙܥܘܿܪܵܐ ܕܠܲܐܟ̣ܵܐ؛ ܡ̣ܢ ܛܘܼܪܵܐ ܓܘܼܪܵܐ ܒܘܼܫ ܓܘܼܪܵܐ ܝَܠܹܗ. ܣܵܒܵܒ ܚܲܕَ ܗܲܕܵܡܵܐ ܣܸܢܝܵܐ؛ ܠܟܠܹܗ ܓܘܼܫܡܵܐ ܟܹܐ ܡܲܣܠܝܼܠܹܗ. ܚܲܕَ ܗَܘܵܐ ܥܵܟܲܪ ܒܢܲܦ̮ܫܹܗ؛ ܘܠܟܠܹܗ ܛܵܝܸܦܵܐ ܡܬܘܼܪܩܸܠܹܗ. ܐܸܢ ܐܸܫܬܵ‌ܐ ܡܵܐܐ ܐܲܠܦܹ̈ܐ ܡܬܘܼܪܩܸܠܗَܘܿܢ؛ ܡ̣ܢ ܣܵܒܵܒ ܕܚܲܕَ ܓܲܒܼܪܵܐ ܕܚܛܹܐܠܹܗ. ܒܲܣ ܐܵܗܵܐ ܟܸܢܫܲܢ ܙܲܒܘܼܢ؛ ܕܵܐܟܼܝܼ ܒܓܼܵܠܸܒ ܓܵܘ ܚܲܛܵܝܹ̈ܐ‌܀ ܬܵܝܡܘܿܢ ܕܡܵܚܲܚ ܕܲܪܩܘܼܒܼܠ ܕܒܝܼ̈ܫܵܬܲܢ؛ ܕܒܝܼـܲܝܗ‌ܝ ܒܝܼܫܵܐ ܦܵܐܸܫ ܡܕܘܼܪܩܸܠܵܐ. ܡܣܵܒܵܒ ܡܗܲܝܸܪܵܢܵܐ ܝَܠܹܗ ܕܸܚܛܝܼܬܵ‌ܐ؛ ܚܘܼܫ ܡ̣ܢ ܟܠܲܢ ܦܵܐܸܫ ܡܘܼܢܟܼܸܣܵܐ. ܗܵܐ ܒܸܪܚܵܛܵܐ ܝَܠܹܗ ܟܲܪܒܵܐ ܒܐܲܪܥܵܐ؛ ܩܵܐ ܕܡܩܲܠܩܸܠ ܪܸܚܛܹܗ ܬܲܝܵܒܼܵܐ. ܗܵܘܲܚ ܠܨܵܘܡܹ̈ܐ ܐܲܟܵܪܹ̈ܐ؛ ܡܲܗܨ̈ܘܼܠܹܐ ܕܐܵܬܝܼ ܚܲܕَ ܒܡܵܐܐ. ܗܵܘܲܚ ܦܲܠܵܚܹ̈ܐ ܠܸܨܠܘܿܬܵܐ؛ ܓܸܦܬܵ‌ܐ ܕܚܲܡܪܘܿܗ݁ ܝܵܗَܒܼܵܢܬܵܐ ܕܠܸܒܵܐ. ܗܵܘܲܚ ܒܲܢܵܝܹ̈ܐ ܕܪܸ̈ܥܝܵܢܲܢ؛ ܡܲܢܙܝܼܠܹ̈ܐ ܕܚܵܫܚܝܼ ܠܐܲܠܵܗܵܐ‌܀ ܐܸܢ ܓܘܼܪܵܐ ܓܵܘ ܒܲܝܬܘܼܟܼ ܫܵܪܹܐ؛ ܐܝܼܩܵܪܵܐ ܠܬܲܪܥܘܼܟܼ ܒܗܵܘܹܐ. ܒܲܣ ܟܡܵܐ ܒܸܬ ܡܓܲܪܘܸܣ ܬܲܪܥܘܼܟܼ؛ ܐܸܢ ܫܵܪܹܐ ܒܝܼܘܼܟܼ ܡܵܪܹܟܠ؟ ܗܘܝܼ ܐܸܠܹܗ ܗܲܝܟܠܵܐ ܘܐܵܦ ܟܘܼܡܪܵܐ؛ ܘܒܓܵܘ ܡܲܢܙܝܼܠܘܼܟܼ ܥܒܼܘܿܕ ܠܹܗ ܚܸܠܡܲܬ. ܐܲܝܟܼ ܕܗَܘܹܐ ܠܹܗ ܒܘܼܬ ܚܵܬܸܪܘܼܟܼ؛ ܡܲܕܒܚܵܐ ܘܟܘܼܡܪܵܐ ܘܩܘܼܪܒܵܢܵܐ. ܘܟܲܕ ܗَܘܹܐ ܠܹܗ ܡܲܢܙܝܼܠ ܪܸܥܝܵܢܘܼܟܼ؛ ܠܵܐ ܫܲܒܼܩܸܬ ܓܵܘܹܗ ܫܸܚܬܵ‌ܐ. ܠܵܐ ܫܲܒܼܩܸܬ ܓܵܘ ܒܲܝܬܹܗ ܕܐܲܠܵܗܵܐ؛ ܡܸܢܕܝܼ ܕܣܸܢܝܵܐ ܝَܠܹܗ ܠܐܲܠܵܗܵܐ. ܡܣܵܩܸܠܹܗ ܒܲܝܬܹܗ ܕܐܲܠܵܗܵܐ؛ ܒܡܸܢܕܝܼ ܕܚܵܫܹܚ ܠܐܲܠܵܗܵܐ. ܐܸܢ ܐܝܼܬ ܚܸܡܬܵ‌ܐ ܬܵܡܵܐ؛ ܨܲܥܲܪܬܵܐ ܒܫܵܪܝܵܐ ܬܵܡܵܐ. ܐܸܢ ܐܝܼܬ ܟܲܪܒܵܐ ܬܵܡܵܐ؛ ܬܸܢܵܐ ܡܬܲܢܬܘܼܢܹܐ ܝَܠܹܗ ܬܵܡܵܐ. ܦܵܠܸܛܠܹܗ ܟܝܼܢ ܡ̣ܢ ܬܵܡܵܐ؛ ܘܒܲܚܲܠܬܵܐ ܕܪܹܝܚܘܼܗ̇ ܡܓܘܼܢܓܸܙܵܐ. ܡܲܥܒܸܪ ܡܲܬܸܒܼ ܬܵܡܵܐ ܚܘܼܒܵܐ؛ ܦܝܼܪܡܵܐ ܕܡܸܠܝܵܐ ܝَܠܹܗ ܒܸܣܡܵܢܹ̈ܐ. ܟܢܘܿܫ ܘܦܵܠܸܛ ܙܸܒܠܵܐ ܡܸܢܹܗ؛ ܥܵܕܲܬܹ̈ܐ ܒܝܼܫܹ̈ܐ ܘܣܸܢܝܹ̈ܐ. ܬܵܦܸܚ ܒܝܹܗ ܒܘܼܠܓܵܢܹ̈ܐ ܛܵܒܹ̈ܐ؛ ܐܲܝܟܼ ܦܸܩܚܹ̈ܐ ܘܐܲܝܟܼ ܟ̰ܘܼ̈ܟ̰ܵܓܹܐ. ܘܡ̣ܢ ܓܹܢَܒ ܘܲܪ̈ܕܹܐ ܘܫܘܼܫܲܢܹ̈ܐ؛ ܡܣܵܩܸܠܹܗ ܒܸܨܠܵܘܵܬܹ̈ܐ‌܀ ܦܵܐܸܫ ܢܓ̰ܝܼܘܵܐ ܥܵܘܠܵܐ؛ ܐܸܢ ܒܝܼـܲܢ ܝَܠܹܗ ܘܐܸܢ ܒܐَܚܹܪَ̈ܢܹܐ. ܐܸܢ ܒܝܼـܲܢ ܝَܠܹܗ ܚܘܿܫ ܦܵܐܸܫ ܡܘܼܢܟܼܸܣܵܐ؛ ܗܲܝܲܪܬܵܐ ܝَܠܵܗ̇ ܕܪܸ̈ܥܝܵܢܲܢ. ܘܐܸܢ ܒܐَܚܹܪَ̈ܢܹܐ ܝَܠܹܗ ܦܵܐܸܫ ܡܕܘܼܪܩܸܠܵܐ؛ ܦܵܝܕܵܐ ܝَܠܹܗ ܩܵܐ ܗܲܕܵܡܲܝ̈ܢ. ܡ̣ܢ ܠܲܐܟܼܵܐ ܘܬܵܡܵܐ ܒܦܵܐܸܫ ܚܲܝܵܒܼܵܐ؛ ܐܸܢ ܗܵܘܲܚ ܐܸܠܹܗ ܟܵܡܪ̈ܵܢܹܐ. ܐܸܢ ܠܵܐ ܦܵܐܸܫ ܠܝܼܡܵܐ ܥܵܘܠܵܐ؛ ܠܹܐ ܡܵܨܹܐ ܫܵܠܹܐ ܥܵܒܼܘܿܕܹܗ. ܐܸܢ ܠܵܐ ܦܵܐܸܫ ܡܕܘܼܪܩܸܠܵܐ ܕܘܼܓܠܵܐ؛ ܗܸܟ̃ ܠܹܐ ܙܲܕܥܹܐ ܕܲܓܵܠܵܐ. ܐܸܢ ܠܵܐ ܥܵܒܸܪ ܘܛܵܪܸܕܠܹܗ؛ ܕܲܪܡܵܢܵܐ ܠܡܲܪܥܵܐ ܠܹܐ ܦܵܠܸܛ. ܦܲܪܡܵܢܵܐ ܟܹܐ ܥܵܒܸܪ ܘܥܵܩܸܪܹܗ؛ ܠܡܲܪܥܵܐ ܡ̣ܢ ܓܵܘ ܗܲܕܵܡܲܝ̈ܢ. ܟܹܐ ܟ̰ܵܠܸܦ ܦܲܠܵܚܵܐ ܠܐܲܪܥܵܐ: ܘܫܵܩܸܠ ܡܸܢܵܗ̇ ܙܝܼܘܵܢܹ̈ܐ. ܘܟܹܐ ܟ̰ܵܠܸܦ ܠܲܝܡܵܢܵܐ ܠܠܸܒܵܐ؛ ܘܫܵܩܸܠ ܡܸܢܹܗ ܚܘܼܙܕܵܓܹ̈ܐ. ܐܸܢ ܠܵܐ ܢܵܓ̰ܘܵܐ ܣܲܝܒܘܼܬܵܐ؛ ܠܹܐ ܟܵܠܝܵܐ ܝܵܠܕَܘܼܬܵܐ. ܐܸܢ ܠܵܐ ܓܲܪܓܸܡܵܐ ܟܹܐܢܘܼܬܵܐ؛ ܠܹܐ ܚܵܓ̰ܠܝܼ ܛܲܥܡܵܟܵܪܹ̈ܐ. ܩܘܝܼܠܹܗ ܦܲܐܬܵܐ ܕܥܵܘܠܵܐ ܪܵܒܵܐ؛ ܕܥܲܠ ܟܠܵܝܗ‌ܝ ܬܲܪܥܵܢܹ̈ܐ ܒܸܟܠܵܝܵܐ ܝَܠܹܗ. ܠܹܐ ܝَܠܹܗ ܥܲܡܲܢ ܒܸܦܠܵܫܵܐ؛ ܠܲܝܡܵܢܵܐ ܕܗܲܝܘܼܪܹܐ ܝَܠܹܗ ܐܸܠܲܢ. ܐܸܢ ܥܘܼܕܪܵܢܵܐ ܡܵܩܢܘܼܝܲܢ ܝَܠܹܗ؛ ܒܲܣ ܠܹܐ ܝَܠܹܗ ܢܟܼܸܦܬܵ‌ܐ ܡܲܠܒܼܘܼܫܲܢ. ܒܡܵܨܠܵܗܲܬ ܡܠܝܼܬܵ‌ܐ ܥܘܼܕܪ̈ܵܢܹܐ؛ ܟܹܐ ܡܵܨܝܵܐ ܕܫܵܩܸܠ ܡܲܢܟܼܲܣܬܵ‌ܐ. ܗܲܕܟܼܵܐ ܠܲܟܵܐ ܕܸܚܛܝܼܬܵ‌ܐ؛ ܟܹܐ ܦܵܐܸܫ ܠܝܼܡܵܐ ܒܚܲܛܵܝܹ̈ܐ. ܐܝܼܡܲܢ ܕܗܲܕܵܡܹ̈ܐ ܦܵܝܫܝܼ ܦܪ̈ܝܼܡܹܐ؛ ܦܠܵܫܵܐ ܕܐܵܣܝܵܐ ܝَܠܹܗ ܥܲܡ ܡܲܪܥܵܐ. ܟܲܕ ܚܲܛܵܝܵܐ ܦܵܐܸܫ ܡܘܼܢܟܼܸܣܵܐ؛ ܦܠܵܫܵܐ ܕܗܵܩܘܼܬܵܐ ܝَܠܹܗ ܥܲܡ ܥܵܘܠܵܐ. ܒܝܼܫܵܐ ܡܲܚܫܘܼܒܲܢ ܝܑܼܠܹܗ ܐܵܗܵܐ؛ ܕܐܲܚܢܲܢ ܒܦܝܵܫܵܐ ܝَܘܲܚ ܡܘܼܢܟܼܸܦܹܐ. ܕܐܲܝܟܼ ܡܲܥܪܸܩܠܲܢ ܡ̣ܢ ܠܵܘܡܵܐ؛ ܒܓܵܢܹܗ ܥܵܪܸܩ ܡ̣ܢ ܢܓ̰ܵܘܬܵܐ. ܘܐܲܝܟܼ ܕܟܹܐ ܣܵܢܲܚܠܵܗ݁ ܠܝܵܡܬܵܐ؛ ܒܓܵܢܹܗ ܦܲܪܬܸܟ ܡ̣ܢ ܥܲܝܒܵܐ. ܡܵܣܢܘܿܝܲܢ ܝَܠܹܗ ܐܵܣܵܘܵܬܹ̈ܐ؛ ܕܥܲܪܩܸܠ ܡܲܪܥܘܼܗ‌ܝ ܒܗܲܕܵܡܲܝ̈ܢ. ܟܲܕ ܒܸܣܢܵܝܵܐ ܝَܘܲܚ ܕܲܪ̈ܡܵܢܹܐ؛ ܒܥܲܪܩܸܠ ܒܝܼـܲܢ ܟܘܼܪܗܵܢܘܼܗ‌ܝ. ܡܛܵܦܘܿܪܲܢ ܝܑܼܠܹܗ ܒܗ݁ܘ ܕܩܵܡ ܠܵܝܸܡܠܲܢ؛ ܩܵܐ ܕܩܲܛܥܝܼܠܲܢ ܡܥܘܼܕܪ̈ܵܢܹܐ. ܡܲܣܢܘܼܝܲܢ ܝܑܼܠܹܗ ܡܵܠܘܿܟܹ̈ܐ؛ ܕܠܵܐ ܗܵܘܝܼ ܐܸܠܲܢ ܣܵܢܕܵܢܹ̈ܐ. ܕܥܲܒܼܕܲܚ ܥܸܕܵܐ ܕܒܹܨܘܼܪܘܼܬܲܢ ܒܝܼܵܗܒܲܢ ܝَܠܹܗ ܪܵܐܝܼ؛ ܩܵܐ ܕܙܵܝܸܕ ܠܵܘܡܲܢ ܓܵܘ ܕܝܼܘܵܢ. ܗܲܪ ܗ̇ܘ ܟܹܐ ܡܲܚܛܹܐ ܘܟܹܐ ܡܟܵܣܹܐ؛ ܕܛܵܫܹܐ ܒܝܼـܲܢ ܥܒܼܵܕܘܼܗ̈‌ܝ ܣܸܢܝܹ̈ܐ. ܟܹܐ ܡܲܠܸܦ ܠܲܢ ܕܲܓܵܠܘܼܬܵܐ؛ ܕܗܵܘܝܵܐ ܠܠܲܟ̈ܘܼܗܝ ܟܵܣܵܝܬܵ‌ܐ. ܟܹܐ ܡܲܠܸܦ ܠܲܢ ܐܵܦ ܪܵܡܘܼܬܵܐ؛ ܕܠܵܐ ܦܵܐܸܫ ܡܘܼܣܟܸܢܵܐ ܫܘܼܒܼܗܵܪܹܗ. ܡܲܩܢܘܿܝܲܢ ܝَܠܹܗ ܡܲܟܝܼܟܼܘܼܬܵܐ؛ ܕܚܵܒܸܛ ܡܲܪܝܼܪܘܼܬܹܗ ܒܚܸܠܝܘܼܬܵܐ. ܡܙܵܘܘܿܓܹܐ ܝَܠܹܗ ܕܘܼܓܠܹܗ ܠܸܫܪܵܪܵܐ؛ ܕܗܵܘܹܐ ܠܕܘܼܓܠܹܗ ܛܵܫܵܝܬܵ‌ܐ. ܒܓܸܠܕܵܐ ܕܦܵܐܪܹ̈ܐ ܦܝܵܫܵܐ ܝَܠܹܗ ܡܣܘܼܩܠܵܐ؛ ܕܠܵܐ ܚܵܓ̰ܠܝܼ ܡܸܢܹܗ ܥܸܪ̈ܒܹܐ. ܦܵܫܲܡܬܵܐ ܕܓܵܢܵܐ ܕܐܲܝܟܼ ܢܵܘܪܵܐ ܝَܠܵܗ̇؛ ܠܹܐ ܝَܠܹܗ ܒܸܫܒܼܵܩܘܿܗ̇ ܒܲܝܢܵܬܲܢ. ܕܩܵܘܡܵܐ ܚܵܙܲܚ ܒܝܼܘܿܗ̇ ܠܲܟܲܝ̈ܢ؛ ܘܡܲܪܩܲܚ ܡܸܢܲܢ ܥܒܼܵܕܘܼܗ̈‌ܝ ܣܸܢܝܹ̈ܐ.  ܟܸܠܝܵܐ ܝَܠܹܗ ܕܲܪܩܘܼܒ̣ܠ ܕܡܵܢܟܼܲܣܬܵ‌ܐ؛ ܕܠܵܐ ܦܵܝܫܵܐ ܓܠܝܼܬܵܐ ܣܵܢܝܘܼܬܹܗ. ܡܵܢܟܼܲܣܬܵ‌ܐ ܟܹܐ ܡܵܨܝܵܐ ܕܗܵܘܝܵܐ؛ ܠܥܒܼܵܕܘܼܗ̈‌ܝ ܣܸܢܝܹ̈ܐ ܐܲܝܟܼ ܢܵܘܪܵܐ. ܩܸܫܝܘܼܬܵܐ ܕܠܸܒܵܐ ܟܹܐ ܡܲܩܢܝܼܠܲܢ؛ ܕܒܝܼܘܿܗ̇ ܩܵܢܲܚ ܚܘܼܣܪ̈ܵܢܘܼܗ‌ܝ. ܩܸܘܝܘܼܬܵܐ ܒܸܡܙܵܓܼܵܐ ܝَܠܹܗ ܒܝܼـܲܢ؛ ܩܵܐ ܕܡܵܪܝܸܟܸܚܲ ܒܹܝܢܲܢ ܠܟܸܣ ܓ̰ܵܥܦܘܼ̈ܗ‌ܝ. ܩܲܫ̃ܕܲܪܬܵܐ ܡܵܩܢܘܿܝܲܢ ܝَܠܹܗ؛ ܕܩܲܫ̃ܕܸܪܲܚ ܘܫܲܩܠܲܚ ܚܪܵܒܼܵܐ. ܦܲܐܬܵܢܘܼܬܵܐ ܒܸܡܙܵܓܼܵܐ ܝَܠܹܗ ܒܝܼܲܢ؛ ܕܠܵܐ ܢܵܟܼܦܲܚ ܟܲܕ ܕܢܵܓ̰ܘܝܼ ܒܝܼـܲܢ. ܐܵܦ ܦܵܢܕܵܢܘܼܬܵܐ ܡܵܠܘܿܦܲܢ ܝَܠܹܗ؛ ܕܒܐܘܼܡܵܢܘܼܬܵܐ ܚܵܛܹܐ ܐَܢܵܫܵܐ. ܠܸܡܠܝܼܠܘܼܬܵܐ ܒܸܓܪܵܫܲܢ ܝَܠܹܗ؛ ܕܓܼܵܠܸܒ ܐَܢܵܫܵܐ ܟܲܕ ܚܲܝܵܒܼܵܐ ܝَܠܹܗ. ܘܐܝܼܡܲܢ ܕܚܛܹܐܠܹܗ ܕܵܥܸܪ ܘܡܦܲܪܦܸܠ؛ ܘܐܝܼܡܲܢ ܕܥܒܼܝܼܕܠܹܗ ܣܲܟܼܠܘܼܬܵܐ ܡܲܕܥܸܪ ܓ̰ܘܼܘܵܒ. ܕܒܦܲܪܦܲܠܬܹܗ ܐܵܦ ܒܸܥܒܼܵܕܘܼܗ̈‌ܝ؛ ܬܸܪܬܹܝ ܓܢܵܗܹ̈ܐ ܩܵܢܲܚܠܗܘܿܢ. ܬܲܗܵܪܹ̈ܐ  ܕܗܹܡܸܙܡܵܢܹ̈ܐ ܡܵܠܘܿܦܹܐ ܝَܠܹܗ؛ ܕܠܵܐ ܦܵܐܸܫ ܚܲܝܵܒܼܵܐ ܟܲܕ ܦܵܐܸܫ ܡܒܘܼܩܪܵܐ. ܕܐܝܼܡܲܢ ܕܚܛܹܐܠܲܢ ܒܸܥܒܼܵܕܵܐ؛ ܕܵܥܪܲܚ ܘܓܼܵܠܒܲܚ ܒܸܕܪܵܫܵܐ. ܠܝܵܠܘܼܕَܬܵܐ ܟܹܐ ܡܲܩܢܸܐ ܦܲܐܬܵܢܘܼܬܵܐ؛ ܘܸܠܣܲܝܒܘܼܬܵܐ ܙܕܘܿܥܬܵ‌ܐ. ܕܦܵܝܫܵܐ ܙܵܕܥܘܵܢܬܵܐ ܣܲܝܒܘܼܬܵܐ؛ ܕܠܵܐ ܡܵܢܟܼܸܣܵܐ ܩܵܐ ܝܵܠܕَܘܼܬܵܐ. ܠܩܲܫ̃ܕܸܪܵܢܵܐ ܡܵܠܘܿܦܹܐ ܝَܠܹܗ ܒܹܝܨܘܼܪܘܼܬܵܐ؛ ܘܸܠܠܵܝܡܵܢܵܐ ܙܕܘܿܥܬܵ‌ܐ. ܕܐܝܼܡܲܢ ܕܙܕܸܥܠܹܗ ܡܲܢܟܼܸܣܵܢܵܐ: ܠܵܐ ܦܵܐܸܫ ܡܒܘܼܣܡܵܐ ܡܸܪܥܝܵܐ. ܗܵܐ ܡܵܣܢܘܿܝܲܢ ܝَܠܹܗ ܒܛܸܫܘܵܐ؛ ܘܡܣܵܩܘܿܠܲܢ ܝَܠܹܗ ܒܐܲܫܟܵܪܵܐ. ܕܗܵܘܲܚܠܹܗ ܩܲܒܼܪܹ̈ܐ ܣܸܪ̈ܝܹܐ؛ ܕܡܸܠܝܹ̈ܐ ܡ̣ܢ ܓܵܘܵܐ ܛܲܢܦܘܼܬܵܐ. ܫܸܡܵܢܹ̈ܐ ܢܵܓ̰ܸܒ ܡܵܠܒܼܘܼܫܲܢ ܝَܠܹܗ؛ ܥܒܼܵܕܹ̈ܐ ܣܸܢܝܹ̈ܐ ܡܵܩܢܘܿܝܲܢ ܝَܠܹܗ. ܒܫܸܡܵܢܹ̈ܐ ܠܘܵܬܼ ܝܲܡܝܼܢܵܐ؛ ܘܒܸܥܒܼܵܕܹ̈ܐ ܠܘܵܬܼ ܣܸܡܵܠܵܐ. ܐܸܢ ܐَܢܵܫܵܐ ܛܵܥܹܐ ܒܵܬَܪ ܫܸܡܵܐ؛ ܗ̇ܘ ܒܘܼܫ ܡܝܘܼܩܪܵܐ ܡܘܼܬܒ̣ܵܐ ܝَܠܹܗ ܥܲܠܲܢ. ܒܸܬ ܡܵܫَܟ̰ܸܚܠܹܗ ܐܲܝܟܼ ܟܵܣܵܝܬܵܐ؛ ܦܪܝܼܣܬܵ‌ܐ ܥܲܠ ܡܘܼܡܲܝ̈ܢ ܓܵܘܵܝܹ̈ܐ. ܚܸܪܹܗ ܣܵܛܵܢܵܐ ܒܐܲܠܵܗܵܐ؛ ܕܚܘܼܪܵܝܼܝ ܒܘܼܪܒܸܙܠܹܗ ܝَܠܹܗ ܚܲܙܝܼܢܘܼ̈ܗ‌ܝ. ܦܬܝܼܚܠܹܗ ܐܵܦ ܒܝܼܫܵܐ ܒܹܝܬ ܓܲܙܘܼܗܝ؛ ܘܚܘܼܪܵܝܼܝ ܒܘܼܪܒܸܙܵܠܹܗ ܕܵܘܸܠܬܘܼܗ‌ܝ. ܠܚܲܕَ ܝܘܼܗَܒܸܠܹܗ ܪܵܡܘܼܬܵܐ ܕܪܘܼܚܵܐ؛ ܘܠܐَܚܹܪَܢܵܐ ܩܸܫܝܘܼܬܵܐ ܕܠܸܒܵܐ. ܠܚܲܕَ ܩܲܡ ܦܵܫܸܛܠܹܗ  ܡܲܣܚܲܪܬܵܐ؛ ܘܠܚܲܒܼܪܹܗ ܐَܚܹܪَܢܵܐ ܡܲܣܠܵܝܬܵ‌ܐ. ܠܚܲܕَ ܡܘܼܠܸܦܠܹܗ ܙܠܘܼܡܝܵܐ؛ ܘܠܗ̇ܘ ܐَܚܹܪَܢܵܐ ܒܲܚܲܠܬܵ‌ܐ. ܠܗ̇ܘ ܕܓܒܼܝܼܠܬܹܗ ܩܲܕܝܼܫܬܵ‌ܐ ܝَܠܵܗ̇؛ ܚܲܕَܟ̰ܵܐ ܚܡܝܼܪܵܐ ܩܲܡ ܡܲܕܝܸܢܹܗ. ܘܗ̇ܘ ܕܦܠܝܼܚܠܹܗ ܘܡܕܘܼܟܼܝܵܐ ܠܹܗ ܐܸܢܝܲܬܹܗ؛ ܒܲܪܙܲܪܥܵܐ ܕܟܸܬ̈ܘܹܐ ܩܲܡ ܦܵܫܸܛܠܹܗ. ܘܠܗ̇ܘ ܕܒܸܬܝܵܒܼܵܐ ܗَܘܵܐ  ܒܐܵܕܵܒܘܼܬܵܐ؛ ܩܲܡ ܡܲܬܸܒܼܠܹܗ ܒܒܹܐܪܘܼܙܘܼܬܵܐ. ܘܠܐܲܝܢܝܼ ܕܟܵܠܝܼ ܗَܘܵܐ ܒܛܵܒܼܘܼܬܵܐ؛ ܟܟ̰ܝܼܚܠܹܗ ܒܝܼܘܼܗ‌ܝ ܕܟܵܠܹܐ ܒܝܼܫܵܐܝܼܬ. ܘܐܝܼܬ ܐܲܝܢܝܼ ܗܘܹܐ ܠܹܗ ܕܘܼܒܵܪ ܒܝܼܹܗ؛ ܘܡܘܼܢܟܼܸܦܠܹܗ ܬܵܡܵܐ ܥܒܼܵܕ̈ܘܼܗ‌ܝ ܣܸܢܝܹ̈ܐ. ܟܹܐ ܓܼܵܠܸܒ ܘܡܲܟܝܸܦ ܓܲܢَܒܵܪܹ̈ܐ؛ ܐܝܼܢܵܐ ܡܙܲܒܘܼܢܹ̈ܐ ܟܹܐ ܦܵܐܸܫ ܓܼܠܝܼܒܵܐ. ܠܓܹܒܿ ܐܵܣܘܿܛܹ̈ܐ ܚܲܝܠܵܢܵܐ ܝَܠܹܗ؛ ܘܡ̣ܢ ܨܲܝܵܡܹ̈ܐ ܟܹܐ ܦܵܐܸܫ ܡܘܼܫܦܸܠܵܐ. ܟܹܐ ܡܨܵܠܹܐ ܩܘܼܠܬܹܗ ܒܟܠ ܓܹܢَܒܵܢܹ̈ܐ؛ ܘܟܹܐ ܡܲܪܝܸـܟܼ ܒܹܝܢܹܗ ܠܘܵܬܼ ܨܵܠܝܼܵܬ̈ܘܼܗܝ. ܠܹܐ ܡܲܟܣܸܠ ܐܵܦ ܠܹܐ ܟܵܟ̰ܸܚ؛ ܕܡܫܲܚܠܸܦ ܠܗَܘܿܢ ܨܵܠܝܼܵܬ̈ܘܼܗܝ ܒܟܠ ܣܵܥܲܬ. ܪܸܒܘܼܬܵܐ ܕܨܵܠܝܼܵܬܹ̈‌ܐ ܟܹܐ ܡܨܵܠܹܐ؛ ܩܵܐ ܕܚܕܵܐ ܓܵܢܵܐ ܨܵܝܸܕܠܵܗ̇. ܘܵܝ ܐܸܠܲܢ ܡܘܿܕܝَ ܐܵܬܠܹܝܛܵܐ؛ ܒܸܩܝܵܡܵܐ ܝَܠܹܗ ܕܲܪܩܘܼܒܼܠܲܢ ܒܸܦܠܵܫܵܐ. ܐܝܼܢܵܐ ܢܲܨܝܼܚܹ̈ܐ ܛܘܼܒܼܵܐ ܐܸܠܵܝܗܝ؛ ܕܒܝܹܗ ܡܓܘܼܪܘܸܣܠܗَܘܿܢ ܟܠܝܼܠܲܝ̈ܗܝ. ܠܸܒܹܗ ܕܝܼـܹܗ ܠܘܵܬܼ ܨܵܠܝܼܵܬ̈ܘܗܝ؛ ܐܝܼܢܵܐ ܕܝܼܲܠَܢ ܠܘܵܬܼ ܩܸܢܝܵـܢܹ̈ܐ. ܗܵܘܢܹܗ ܕܝܼܹܠَܗ ܠܘܵܬܼ ܨܵܠܝܼܵܬ̈ܘܼܗܝ؛ ܐܝܼܢܵܐ ܕܝܼܲܠَܢ ܠܘܵܬܼ ܒܸܢܝ̈ܵܢܹܐ. ܓܸܢܝܵܐ ܝَܠܹܗ ܠܘܵܬܼ ܓܲܪ̈ܕܘܼܗ‌ܝ؛ ܘܐܸܢܝܲܬܲܢ ܠܘܵܬܼ ܢܨܸܒܼܝܵܬܹ̈‌ܐ. ܓܵܢܲܢ ܒܠܝܼܓܬܵ‌ܐ ܝَܠܵܗ̇ ܒܢܨܸܒܼܝܵܬܹ̈‌ܐ؛ ܘܚܛܝܼܬܵܐ ܒܓܲܪ̈ܕܘܼܗܝ. ܠܸܒܵܐ ܕܝܼܹܠَܗ ܠܘܵܬܼ  ܨܵܠܝܼܵܬ̈ܘܼܗܝ ܝَܠܹܗ؛ ܘܠܸܒܵܐ ܕܝܼܲܠَܢ ܠܘܵܬܼ ܙܘܼܙܵܐ. ܠܹܐ ܝَܠܹܗ ܟܸܟ̰ܚܵܐ ܩܵܬܹܗ ܐܵܕܝܼܵܐ؛ ܕܒܠܵܐ ܓ̰ܵܥܦܵܐ ܗܵܐ ܒܸܨܝܵܕܲܢ ܝَܠܹܗ. ܐܲܚܢܲܢ ܐܵܕܝܼܵܐ ܒܚܲܝܠܵܐ؛ ܒܸܥܒ̣ܵܪܵܐ ܝَܘܲܚ ܓܵܘ ܓܲܪ̈ܕܘܼܗܝ. ܦܠܝܼܚܠܹܗ ܘܙܪܸܥܠܹܗ ܒܝܼـܲܢ ܣܵܛܵܢܵܐ؛ ܒܩܵܕَܡܵܝܬܵ‌ܐ ܥܵܕܵܬܹ̈ܐ ܒܝܼܫܹ̈ܐ. ܘܕܠܵܐ ܟܸܟ̰ܚܵܐ ܐܲܕܝܼܵܐ ܒܸܨܝܵܕܵܐ ܝَܠܹܗ؛ ܕܥܵܕ̈ܵܬܲܢ ܒܸܨܝܵܕܲܢ ܝَܢܵܐ. ܘܵܝ ܐܸܠܲܢ ܕܵܐܟ̣ܝܼ ܡܥܘܼܪܩܸܠܲܢ؛ ܘܵܝ ܐܸܠܲܢ ܠܓܹܒܿ ܡܵܢܝܼ ܦܝܼܫܠܲܢ ܡܪܘܼܦܝܹܐ. ܘܵܝ ܐܸܠܲܢ ܒܐܲܡܝܼܢܘܼܬܹܗ؛ ܘܛܘܼܒ̣ܵܐ ܐܸܠܲܢ ܒܙܲܒܘܼܢܘܼܬܹܗ. ܟܡܵܐ ܕܦܵܢܕܵܢܵܐ ܝَܠܹܗ ܒܝܼܫܵܐ ܒܨܲܝܕܹܗ؛ ܚܲܕَ ܗܵܕܟ̣ܵܐ ܙܲܒܘܼܢ ܝَܠܹܗ ܒܚܲܝܠܹܗ. ܣܵܒܵܒ ܐܸܢ ܐܝܼܬ ܗَܘܵܐ ܠܹܗ ܚܲܝܠܵܐ؛ ܠܹܐ ܣܵܢܸܩ ܗَܘܵܐ ܥܲܠ ܦܲܢܕܹ̈ܐ. ܦܲܢܕܘܼ̈ܗܝ ܩܲܡ ܡܲܦܪܸܡܝܼܠܲܢ؛ ܕܠܹܐ ܝَܠܹܗ ܒܚܲܝܠܵܐ ܠܵܒܘܼܠܲܢ. ܐܝܼܡܲܢ ܕܡܘܼܚܦܸܠܲܢ ܚܲܝܠܵܢܵܐ ܝَܠܹܗ؛ ܘܐܝܼܡܲܢ ܕܡܨܘܼܠܝܼܠܲܢ ܙܲܒܘܼܢ ܝَܠܹܗ. ܣܸܡܲܠܬܵ‌ܐ ܓܘܼܪܬܵܐ ܬܘܼܪܸܨܠܹܗ؛ ܐܲܠܵܗܵܐ ܩܵܐ ܒܢܲܝܢܵܫܵܐ. ܕܐܲܣܩܝܼ ܗܵܘܝܼ ܦܲܓܼܪ̈ܵܢܹܐ؛ ܪ̈ܘܼܚܵܢܹܐ ܐܲܝܟܼ ܥܸܠܵܝܹ̈ܐ. ܒܟܠ ܕܲܪ̈ܓܹܐ ܡܵܣܘܿܩܹܐ ܝَܠܹܗ ܛܵܒܼܵܐ؛ ܒܟܠ ܦܲܢܕܹ̈ܐ ܡܲܨܠܘܿܝܹܐ ܝَܠܹܗ ܒܝܼܫܵܐ. ܗܵܐ ܒܕܲܪܓܼܵܐ ܕܒܬܼܘܼܠܘܼܬܼܵܐ؛ ܒܬܼܘܼܠܹ̈ܐ ܡܲܣܘܿܩܹܐ ܝَܠܹܗ ܠܸܫܡܲܝܵܐ. ܗܵܐ ܒܕܲܪܓܼܘܿܗ݁ ܕܩܲܕܝܼܫܘܼܬܵܐ؛ ܒܸܪܝܵܡܵܐ ܝَܢܵܐ ܐܵܦ ܩܲܕܝܼܫܹ̈ܐ. ܚܙܹܐܠܹܗ ܒܝܼܫܵܐ ܕܒܟܠ ܕܲܪ̈ܓܹܐ؛ ܦܲܓܼܪܵܐ ܒܸܣܝܵܩܵܐ ܝَܠܹܗ ܠܸܫܡܲܝܵܐ. ܬܠܹܐ ܠܹܗ ܒܝܼܹܗ ܟܠ ܝܘܼܩܪܹ̈ܐ؛ ܕܡ̣ܢ ܗ̇‌ܝ ܪܵܡܘܼܬܵܐ ܨܵܠܹܐ. ܡܲܙܝܘܿܕܹܐ ܝَܠܹܗ ܒܝܼܫܵܐ ܥܲܪ̈ܩܲܠܝܵܬܹ‌ܐ؛ ܕܫܵܓܼܸܫ ܐَܢܵܫܵܐ ܡ̣ܢ ܐܘܼܪܚܹܗ. ܓ̰ܪ̈ܲܛܝܵܬܹ‌ܐ ܒܦܲܠܵܟܵܢܹ̈ܐ ܟܹܐ ܥܵܒܸܕ؛ ܘܫܵܗܘܲܬܝܵܬܹ̈‌ܐ ܒܐܲܪܥܵܐ ܟܹܐ ܡܲܚܙܹܐ. ܩܵܐ ܕܡܲܕܥܸܪܹܗ ܠܸܒܲܢ ܡ̣ܢ ܥܸܠܸܠ؛ ܩܵܐ ܕܚܵܝܪܲܚ ܒܥܘܼܡܩܹ̈ܐ ܕܐܲܪܥܵܐ. ܠܹܐ ܝَܢܵܐ ܙܸܪ̈ܥܝܹܐ ܒܚܲܕَ ܒܲܪܢܵܫܵܐ؛ ܟܠܲܝܗ‌ܝ ܥܵܕܵܬܹ̈ܐ ܣܸܢܝܹ̈ܐ. ܒܙܝܼܩܹ̈ܐ ܝَܢܵܐ ܒܬܵܗܵܪܹ̈ܐ ܬܵܗܵܪܹ̈ܐ؛ ܟܠܲܝܗ‌ܝ ܒܟܠܵܗ̇ ܐَܢܵܫܘܼܬܵܐ. ܣܵܒܵܒ ܕܙܸܪܥܝܲܝܗ‌ܝ ܝَܠܹܗ ܒܵܪܘܿܝܵܐ؛ ܠܫܵܗܘܲܬܝܵܬܹ̈‌ܐ ܓܵܘ ܒܪܝܼܬܵܐ. ܠܵܐ ܟܠܲܝܗ‌ܝ ܒܚܲܕَ ܒܲܪܢܵܫܵܐ؛ ܕܠܵܐ ܛܵܠܸܩ ܗَܘܵܐ ܒܲܪܢܵܫܵܐ.  ܐܵܦ ܠܵܐ ܡ̣ܢ ܟܠܲܝܗ‌ܝ ܪܸ̈ܚܩܹܐ ܝَܢܵܐ؛ ܕܠܵܐ ܗܵܘܝܼ ܗَܘܵܘ ܒܲܛܝܼ̈ܠܹܐ. ܒܫܵܗܘܲܬܝܵܬܹ̈‌ܐ ܟܹܐ ܦܵܝܫܵܐ ܚܙܝܼܬܵ‌ܐ؛ ܢܲܨܝܼܚܘܼܬܵܐ ܕܢܲܨܝܼܚܹ̈ܐ. ܡ̣ܢ ܫܵܗܘܲܬܵܐ ܠܸܦܠܵܫܵܐ؛ ܘܡ̣ܢ ܦܠܵܫܵܐ ܠܫܩܲܠܬܵܐ ܕܟܠܝܼܠܵܐ. ܒܲܣ ܒܙܝܼܩܹ̈ܐ ܝَܢܵܐ ܒܘܼܣܵܡܹ̈ܐ؛ ܟܠܲܝܗ‌ܝ ܒܟܠܵܗ̇ ܐَܢܵܫܘܼܬܵܐ. ܕܗܵܘܹܐ ܒܸܥܒܼܵܕܵܐ ܒܲܪܢܵܫܵܐ؛ ܦܠܵܫܵܐ ܓܵܘ ܪܸܥܝܵܢܹܗ. ܐܝܼܬ ܕܪܵܙܝܼ ܝَܠܹܗ ܒܐܵܣܘܼܛܘܼܬܵܐ؛ ܘܠܹܐ ܒܲܣܡܵܐ ܠܹܗ ܒܓܲܝܵܪܘܼܬܵܐ. ܘܐܝܼܬ ܕܪܵܙܝܼ ܝَܠܹܗ ܒܫܘܼܒܼܗܵܪܵܐ. ܘܠܹܐ ܒܲܣܡܵܐ ܠܹܗ ܒܓܲܢܵܒܼܘܼܬܵܐ. ܐܝܼܬ ܕܦܝܼܫܵܐ ܝَܠܹܗ ܓܼܠܝܼܒܵܐ ܒܫܵܗܘܲܬܵܐ ܕܕܲܗܒܼܵܐ؛ ܘܡܘܼܣܠܝܼܬܵ‌ܐ ܝَܠܵܗ̇ ܐܸܠܹܗ ܫܵܗܘܲܬܵܐ ܕܒܸܣܪܵܐ.  ܐܝܼܬ ܕܪܵܙܝܼ ܝَܠܹܗ ܒܩܘܼܠܵܣܵܐ؛ ܘܐَܚܹܪَܢܵܐ ܥܲܠ ܠܵܙܲܬܹ̈ܐ. ܐܝܼܬ ܕܫܵܩܸܠ ܠܸܒܵܐ ܒܚܲܡܪܵܐ؛ ܘܐܝܼܬ ܕܟܹܐ ܫܵܩܸܠ ܠܸܒܵܐ  ܒܫܘܼܒܼܗܵܪܵܐ. ܐܝܼܬ ܕܪܸܚܩܵܐ ܝَܠܹܗ ܡ̣ܢ ܓܲܝܵܪܘܼܬܵܐ؛ ܘܫܪܝܼܬܵ‌ܐ ܝَܠܵܗ̇ ܒܝܼܘܼܗܝ ܡܵܣܚܲܪܬܵܐ. ܐܝܼܬ ܕܪܵܙܝܼ ܝَܠܹܗ ܥܲܠ ܨܵܥܲܪܬܵܐ؛ ܘܐَܚܹܪَܢܵܐ ܥܲܠ ܫܩܲܠܬܵܐ ܕܪܸܫܘܲܬܐ. ܐܝܼܬ ܕܟܹܐ ܡܦܲܦܠܸܚ ܓ̰ܵܚܲܕܬܵܐ؛ ܘܚܲܕَ ܐَܚܹܪَܢܵܐ ܡܲܩܪܲܨܬܵܐ. ܐܝܼܬ ܕܥܸܠܸܠ ܝܑܼܠܹܗ ܡ̣ܢ ܚܲܕَ ܥܵܘܠܵܐ؛ ܘܒܚܲܕَ ܐَܚܹܪَܢܵܐ ܡܛܘܼܒܥܝܵܐ ܝَܠܹܗ ܟܠܹܗ. ܐܝܼܬ ܕܚܣܝܼܟܼܵܐ ܝَܠܹܗ ܡ̣ܢ ܚܲܕَ ܠܲܟܵܐ؛ ܘܒܚܲܕَ ܐَܚܹܪَܢܵܐ ܡܟ̰ܘܼܦܠܸܢܵܐ ܝَܠܹܗ ܟܠܹܗ. ܐܝܼܬ ܕܥܸܠܸܠ ܝܑܠܹܗ ܝَܠܹܗ ܡ̣ܢ ܚܕܵܐ ܨܵܠܝܼܬܵܐ؛ ܘܡܪܘܼܦܝܵܐ ܝَܠܹܗ ܒܓܵܘ ܚܲܕَ ܓܘܼܒܵܐ. ܒܲܣ ܟܲܕ ܗܲܕܟܼܵܐ ܪܵܒܵܐ ܝَܢܵܐ؛ ܡܸܢܝܵܢܲܝ̈ܗ‌ܝ ܕܸܚܛܝܼܵܬܹ̈‌ܐ. ܒܒܵܨܘܼܪܘܼܬܲܝܗܝ ܒܦܝܵܫܵܐ ܝَܢܵܐ ܡܦܘܼܪܡܝܼܹܐ؛ ܐܵܦ ܩܝܼܵܣܲܝܗ‌ܝ ܪ̈ܵܒܹܐ. ܟܠ ܡܸܢܕܝܼ ܒܒܵܨܘܼܪܘܼܬܹܗ؛ ܟܹܐ ܦܵܝܫܵܐ ܛܥܝܼܡܬܵ‌ܐ ܪܵܒܵܘܼܬܵܐ. ܐܝܼܡܲܢ ܕܟܹܐ ܐܵܣܸܪ ܒܝܼܫܵܐ؛ ܠܒܲܪܢܵܫܵܐ ܒܫܵܗ̈ܘܲܬܝܵܬܹ‌ܐ. ܒܗ̇‌ܝ ܕܪܵܙܝܼ ܝَܠܹܗ ܟܹܐ ܐܵܣܸܪܹܗ ܒܲܪܢܵܫܵܐ؛ ܕܗܵܘܹܐ ܒܣܵܡܹܗ ܗ̇ܘ ܝܸܣܘܼܪܵܐ. ܣܵܒܵܒ ܕܪܵܙܝܼ ܝَܠܹܗ ܒܝܸܣܘܼܪܘܼܗ‌ܝ؛ ܠܹܐ ܫܵܪܹܗ ܝܸܣܘܼܪܹܗ ܡ̣ܢ ܓܵܢܹܗ. ܒܗ̇‌ܝ ܕܐَܣܝܼܪܵܐ ܝَܠܹܗ ܒܪܵܙܝܼܘܼܬܹܗ؛ ܒܥܲܪܩܸܠ ܠܥܵܠܲܡ ܒܝܸܣܘܿܪܹܗ. ܡܣܵܒܵܒ ܚܲܟܝܼܡܵܐ ܝَܠܹܗ ܐܲܣܪܵܢܲܢ؛ ܕܕܵܐܟ̣ܝܼ ܘܒܡܘܼܕܝܼ ܐܵܣܸܪܲܢ. ܣܵܒܵܒ ܟܹܐ ܝܲܕܥܹܐ ܕܐܸܢ ܐܵܣܸܪܲܢ؛ ܒܚܲܕَ ܝܸܣܘܼܪܵܐ ܕܠܹܐ ܒܲܣܸܡܠܲܢ. ܒܸܬ ܩܲܛܥܝܼܠܹܗ ܪܸܥܝܵܢܲܢ؛ ܠܝܸܣܘܼܪܹܗ ܡܸܢܹܗ ܒܓ̰ܲܠܕܘܼܬܵܐ. ܠܟܠ ܚܲܕَ ܟܹܐ ܐܵܣܸܪ ܒܪܸܙܵܝܘܼܗܝ؛ ܒܡܸܢܕܝܼ ܕܪܵܙܝܼ ܝَܠܹܗ ܒܝܼܘܼܗܝ. ܐܝܼܢܵܐ ܚܹܐܪܘܼܬܲܢ ܐܝܼܬ ܠܵܗ̇ ܫܘܼܠܛܵܢܵܐ؛ ܕܩܵܛܥܵܐ  ܝܸܣܘܼܪ̈ܘܼܗܝ ܡܓܵܢܘܿܗ݁. ܒܝܸܣܘܼܪܹ̈ܐ ܕܬܵܗܵܪܹ̈ܐ ܬܵܗ̈ܵܪܹܐ؛ ܒܩܵܘܕܹ̈ܐ ܦܪ̈ܝܼܫܹܐ ܦܪ̈ܝܼܫܹܐ. ܐَܣܝܼܪܹܐ ܝَܘܲܚ ܘܪܵܙܝܼ ܝَܘܲܚ؛ ܐَܣܝܼܪܹܐ ܝَܘܲܚ ܘܡܫܬܲܒܼܗܘܿܪܐ ܝَܘܲܚ. ܣܵܒܵܒ ܗ̇ܘ ܕܐَܣܝܼܪܵܐ ܝَܠܹܗ ܒܒܲܚܲܠܬܵܐ؛ ܟܲܕ ܕܒܓܲܝܵܪܘܼܬܵܐ ܠܹܐ ܝَܠܹܗ ܐَܣܝܼܪܵܐ. ܒܸܚܫܵܒ̣ܵܐ ܝَܠܹܗ ܣܲܟܼܠܵܐ ܕܫܸܪܝܵܐ ܝَܠܹܗ؛ ܘܗ̇ܘ ܕܐَܣܝܼܪܵܐ ܝَܠܹܗ ܒܡܲܣܚܵܪܘܼܬܵܐ. ܒܗ݁ܝ ܕܒܓܲܢܵܒܼܘܼܬܵܐ ܠܐ ܐَܣܸܪܠَܗܘܿܢ؛ ܟܹܐ ܚܵܫܸܒܼ ܕܗܲܪ ܠܵܐ ܩܲܡ ܐܲܣܪܝܼܠܹܗ. ܓܚܸܟܠܲܢ ܟܠܲܢ ܚܲܕَ ܒܗ̇ܘ ܐَܚܹܪَܢܵܐ؛ ܘܓܸܚܟܵܐ ܝَܠܹܗ ܒܝܼܫܵܐ ܥܲܠ ܟܠܲܢ. ܗ̇ܘ ܒܸܣܝܵܪܵܐ ܝَܠܹܗ ܐܵܦ ܡܲܓܚܘܿܟܹܐ؛ ܕܡܲܚܫܸܒ̣ܠܲܢ ܕܗܸܟ̃ ܠܵܐ ܩܲܡ ܐܲܣܪܝܼܠܲܢ. ܗܲܪ ܗ݁ܘ ܟܹܐ ܐܵܣܸܪ ܐܵܦ ܡܲܪܘܹܐ؛ ܩܵܐ ܕܡܲܚܫܸܒܼܠܲܢ ܕܠܹܐ ܝَܘܲܚ ܐَܣܝܼܪܹ̈ܐ. ܒܝܼܫܵܐ ܠܲܝܬ ܠܹܗ ܚܲܫܵܐ ܥܲܠ ܕܐܵܗܵܐ؛ ܕܒܬܵܗܵܪܹ̈ܐ ܦܪ̈ܝܼܫܹܐ ܐܵܣܸܪܲܢ. ܪܵܙܝܼ ܝَܠܹܗ ܟܠܹܗ ܥܲܠ ܕܐܵܗܵܐ؛ ܕܒܬܵܗܵܪܹ̈ܐ ܕܝܸܣܘܼܪܹ̈ܐ ܩܲܡ ܐܵܣܸܪܲܢ. ܒܟܠܲܝܗܝ ܦܲܢܕܹ̈ܐ ܐܵܗܵܐ ܟܹܐ ܒܵܥܹܐ؛ ܕܒܢܝܼܪܹܗ ܦܵܠܸܚ ܟܠ ܐَܢܵܫܵܐ. ܐܵܦ ܐܲܠܵܗܵܐ ܒܟܠ ܗܵܓ̰ܵܬܹ̈‌ܐ؛ ܢܝܼܪܹܗ ܟܹܐ ܡܲܬܸܒܼ ܥܲܠ ܟܠ ܐَܢܵܫܵܐ. ܣܵܒܵܒ ܦܘܼܠܸܓَܠܹܗ ܘܬܩܸܠܹܗ ܛܲܥܢܹ̈ܐ؛ ܘܡܫܸܚܠܹܗ ܘܡܘܼܪܝܸܙܠܹܗ ܐܵܘܵܢܹ̈ܐ. ܕܟܠ ܐَܢܵܫܵܐ ܛܵܥܸܢ ܐܲܝܟܼ ܚܲܝܠܹܗ؛ ܟܲܕ ܠܵܒܘܿܠܹܐ ܐܲܝܟܼ ܡܨܵܝܬܹܗ. ܒܘܼܬ ܕܐܵܗܵܐ ܠܵܙܸܡ ܝَܠܵܗ̇ ܩܵܬܲܢ؛ ܕܗܵܘܵܚ ܣܵܢܝܵـܢܹ̈ܐ ܠܲܚܛܝܼܬܵܐ. ܘܩܵܛܠܲܚ ܠܥܵܘܠܵܐ ܕܒܸܩܛܵܠܲܢ ܝَܠܹܗ. ܒܣܲܝܦܵܐ ܕܕܸܟܼܝܘܼܬܵܐ ܕܪܥܸܝܵܢܲܢ. ܪܲܦܲܚ ܡܸܢܲܢ ܟܠ ܝܘܼܩܪܹ̈ܐ؛ ܡܛܲܒܥܵܢܹ̈ܐ ܕܥܒܼܵܕܹ̈ܐ ܫܲܦܝܼܪܹ̈ܐ. ܘܠܲܒ̣ܫܲܚ ܟ̰ܲܟܵܐ ܪܘܼܚܵܢܵܐ؛ ܒܲܪܩܘܼܒܼܠ ܕܚܲܫܹ̈ܐ ܚܲܒܼܛܵܢܹ̈ܐ. ܥܒܸܪܹܗ ܠܲܝܠܹܐ ܕܚܛܝܼܬܵܐ؛ ܘܙܪܸܩܠܹܗ ܒܲܗܪܵܐ ܕܐܝܼܡܵܡܵܐ. ܐܲܝܟܼ ܕܒܒܲܗܪܵܐ ܟܹܐ ܚܲܫܚܵܐ ܠܲܢ؛ ܕܡܲܪܝܸܙܲܚܠܗܘܿܢ ܠܚܕܲܪ̈ܝܵܬܲܢ. ܗܲܠ ܐܝܼܡܲܢ ܒܸܬ ܕܵܡܟܼܝܼܬܘܼܢ؛ ܚܲܛܵܝܹ̈ܐ ܒܫܸܢܬܵܐ ܕܥܵܘܠܵܐ؟. ܩܘܿܡܘܼܢ ܢܦܘܿܨܘܼܢ ܝܘܼܩܪܵܐ ܕܓܢܵܗܵܘ̈ܟ̣ܘܿܢ؛ ܘܦܘܼܫܘܼܢ ܡܕܘܼܟܼܝܹ̈ܐ ܒܬܝܵܒܼܘܼܬܵܐ. ܗܵܐ ܛܲܝܒܘܼܬܵܐ ܦܠܝܼܛܬܵܐ ܝَܠܵܗ̇؛ ܡܛܵܥܘܿܝܹܐ ܒܵܬَܪ ܥܸܪ̈ܒܹܐ ܛܠܝܼܩܹ̈ܐ. ܕܥܘܿܪܘܼܢ ܠܟܸܣܠܵܗ̇ ܘܦܲܪܦܸܠܘܿܢ ܒܝܼܘܿܗ̇؛ ܕܡܲܕܥܸܪܵܐ ܠܵܘܟܼܘܢ ܠܐܲܪܥܵܐ ܕܚܲܝܹ̈ܐ.

ܡܕܪܫܐ.

     ܥܘܼܢܵܝܵܐ. ܬܵܘ ܢܸܬܿܬܿܘܸܐ ܗܵܪܟܵܐ؛ ܥܲܕܼ ܐܝܼܬܼ ܠܲܢ ܐܲܬܼܪܵܐ. ܕܠܵܐ ܢܸܬܿܬܿܘܸܐ ܬܲܡܵܢ؛ ܬܘܵܬܼܵܐ ܕܠܵܐ ܝܘܼܬܼܪܵܢ. 

     ܒܵܬܹ̈‌ܐ. ܐܲܝܢܵܐ ܕܢܲܓܿܝܼܪܵܐ؛ ܪܘܼܚܹܗ ܕܢܸܫܬܲܥܸܐ. ܥܲܠ ܡܲܓܿܪܲܬܼ ܪܘܼܚܵܟܼ؛ ܕܲܡܣܲܝܒܿܪܵܐ ܚܵܘܒܲܝ̈ܢ. ܚ̣ܛܲܝܢ ܐܸܬܼܡ̱ܠܝܼܢ ܥ̣ܵܘܠܵܐ؛ ܫ̣ܦܲܪܢ ܐܸܬܼܡ̱ܠܝܼܢ ܚܘܼܬܼܪܵܐ. ܘܐܝܼܬܲܝܢ ܠܲܚܕܼܵܕܹ̈ܐ؛ ܚܲܪ̈ܡܹܐ ܕܠܵܐ ܪ̈ܲܚܡܹܐ. ܕܝܼܪܸܒܼ ܚܣܲܡ̣ܢܲܢ ܒܹܗ؛ ܘܕܲܢܦܲܠ̣ ܚܕܲܝܢܲܢ ܠܹܗ. ܘܟܲܕܼ ܛܵܒܼ ܟܪܹܝܢ ܚܲܝܲܝ̈ܢ. ܚܵܘܒܲܝ̈ܢ ܐܲܪܝܼܟܼܝܼܢ‌܀ ܐܲܙܥ̣ܲܪܬܿ ܡܘܼܫ̈ܚܵܬܲܢ؛ ܫܲܒܼܥܝܼܢ ܫܢ̈ܝܼܢ ܟܲܕܼ ܛܵܒܼ. ܚܢܲܢ ܕܹܝܢ ܥܲܠ ܫܲܒܼܥܝܼܢ؛ ܫܒܲܥ ܫܒܲܥ ܚ̣ܛܲܝܢܲܢ ܠܵܟܼ. ܒܪ̈ܲܚܡܲܝܟ ܟܪܝܼܘ ܚܲܝܲܝ̈ܢ؛ ܕܠܵܐ ܢܹܐܪܟܼܘܼܢ ܚܵܘܒܲܝ̈ܢ. ܒܪ̈ܲܚܡܲܝܟ ܬܵܡܲܗ ܐَܢܵܐ؛ ܕܚܲܦ̣ܝܘܼܗ̇ ܠܟܹܐܢܘܼܬܼܵܟܼ. ܕܟܲܕܼ ܐَܢܵܫ ܛܡܲܐ ܣܵܢܹ̇ܐ؛ ܠܛܲܡܵܐܐ ܕܕܼܵܡܹ̇ܐ ܠܹܗ. ܐܲܢَܬܿ ܕܹܝܢ ܕܩܲܕܿܝܼܫܲܬܿ؛ ܠܵܐ ܢܲܕܬܿ ܡ̣ܢ ܚܵܘܒܲܝ̈ܢ‌܀ ܒܵܗ̇ ܬܘܼܒܼ ܒܟܹܐܢܘܼܬܼܵܟܼ؛ ܬܸܗ̇ܪܹܬܼ ܕܠܵܐ ܢܸܕܲܬ̤. ܥܲܡܵܗ̇ ܕܛܲܝܒܿܘܼܬܼܵܟܼ؛ ܒܲܕܼ ܡܲܟܿܣܵܢܝܼܬܼܵ‌ܐ ܗَ‌ܝܼ. ܕܐܲܝܟܲܢ ܕܢܝܼܚ ܫܸܡܫܵܟܼ؛ ܥܲܠ ܡܲܢ ܕܡܲܪܓܸܿܙ ܠܵܟܼ. ܓܡܲܪܬܲܢ ܕܠܵܐ ܣܵܟܼܵܐ؛ ܚ̣ܣܲܪܢܲܢ ܕܠܵܐ ܡܘܼܫܚܵܐ. ܐܲܠܸܦ̣ܬܿ ܬܲܩ̈ܢܵܬܼܵ‌ܐ؛ ܣ̣ܥܲܪܢܲܢ ܕܲܗܦܝܼ̈ܟܼܵܢ. ܫܡܵܗܹ̈ܐ ܥܛܝܼܦܝܼܢܲܢ؛ ܥܒܼܵܕܹ̈ܐ ܫܠܝܼܚܝܼܢܲܢ‌܀

ܩܪܝܢܐ. ܒ.

     ܐܲܠܵܗܵܐ ܚܣܘܿܟܼ ܥܲܠ ܛܵܝܸܦܘܼܟܼ. (ܬܢܝܼ)؛ ܕܒܸܬܝܵܒܼܘܼܬܵܐ ܒܸܩܪܵܝܘܼܟܼ ܝَܠܹܗ. ܚܙܝܼ ܕܪܵܒܵܐ ܩܲܡ ܡܲܟܪܸܒܸܚܠܘܼܟܼ؛ ܘܠܫܸܡܘܼܟܼ ܙܹܐ ܪܵܒܵܐ ܡܘܼܕܹܝܠܲܢ. ܠܹܐ ܝَܠܵܗ̇ ܚܫܝܼܚܬܵܐ ܠܐܲܒܼܵܗܘܼܬܘܼܟܼ؛ ܕܒܚܲܫܵܐ ܐܲܟ̰ܡܸܬ ܠܹܗ ܬܲܪܥܘܼܟܼ. ܒܲܪܢܵܫܵܐ ܠܚܲܒܼܪܹܗ ܟܹܐ ܝܵܗَܒܸܠ ܠܸܒܵܐ؛ ܒܲܣ ܚܘܿܫ ܙܵܝܕܵܐ ܠܟܸܣܠܲܢ ܝܵܗَܒܲܠܬܘܼܟܼ ܕܠܸܒܵܐ. ܒܐܵܗܵܐ ܡܵܪܝܼ ܣܲܙܓܸܪ ܥܲܡܲܢ؛ ܕܐܲܢَܬ ܝܑܼܘܸܬ ܫܘܼܒ̣ܪܵܗܲܢ. ܠܵܐ ܝَܕܸܥܠܲܢ ܬܲܪܥܵܐ ܐَܚܹܪَܢܵܐ؛ ܫܒܼܘܿܩ ܡ̣ܢ ܬܲܪܥܘܼܟܼ ܥܵܒ̣ܘܿܕܲܢ. ܒܡܵܢܝܼ ܐܵܙܲܠَܚ ܘܡܵܚܲܚ ܚܲܨܵܐ؛ ܐܸܢ ܗܵܘܝܵܐ ܕܡܵܪܲܢ ܫܵܒܸܩܠܲܢ. ܡܵܢܝܼ ܝَܠܹܗ ܕܟܹܐ ܕܵܡܹܐ ܠܒܵܪܘܿܝܲܢ؛ ܕܡܲܚܠܸܦܲܚ ܒܝܼـܹܗ ܠܐܲܠܵܗܲܢ؟ ܡܵܢܝܼ ܝَܠܹܗ ܒܲܣܝܼܡܵܐ ܡܐܲܟܼܘܵܬܘܼܟܼ؛ ܕܩܵܠܸܒ ܒܵܬَܪܹܗ ܪܸܥܝܵܢܲܢ؟. ܗܲܒَܼܠܲܢ ܦܸܪܣܲܬ ܒܸܚܢܵܢܘܼܟܼ؛ ܕܐܲܚܢܲܢ ܬܲܥܠܡܸܚ ܠܸܩܢܘܿܡܲܢ. ܗܲܒَܼܠܲܢ ܥܸܕܵܢܵܐ ܒܛܲܝܒܿܘܼܬܘܼܟܼ؛ ܕܐܲܚܢܲܢ ܡܲܢܟܼܸܣܲܚ ܠܒܝܼ̈ܫܵܬܲܢ. ܗܲܒَܼܠܲܢ ܦܸܪܣܲܬ ܕܲܝܵܢܲܢ؛ ܕܕܵܝܢܲܚܠܵܗ̇ ܓܵܢܲܢ ܒܦܘܼܠܚܵܢܲܝ̈ܢ. ܗܲܒَܼܠܲܢ ܥܸܕܵܢܵܐ ܝܵܐ ܫܲܩܠܵܢܵܐ ܕܬܘܼܥܠܲܢ؛ ܕܒܕܸܡܥܹ̈ܐ ܓܲܪܕܲܚ ܠܓܢܵܗܵܬܲܝ̈ܢ. ܗܲܒَܼܠܲܢ ܦܸܪܣܲܬ ܪܲܒܟܘܼܡܪܹ̈ܐ؛ ܕܦܵܝܫܲܚ ܡܕܘܼܟܼܝܹܐ ܘܟܵܠܲܚ ܩܵܕَܡܘܼܟܼ܀ ܫܡܝܼܥ ܡܵܪܝܼ ܒܵܥܘܼܬܵܐ ܕܣܵܓܼܕܵܢܘܼܟܼ؛ ܘܡܲܕܥܸܪ ܒܪ̈ܲܚܡܘܼܟܼ ܡܲܛ̈ܠܵܒܲܢ. ܨܠܘܿܬܵܐ ܕܝܑܼܠܵܗ̇ ܩܕܝܼܠܵܐ ܕܒܪܝܼܬܵܐ؛ ܦܲܬܚܵܐ ܠܲܢ ܚܲܙܝܼܢܵܐ ܕܪ̈ܲܚܡܘܼܟܼ. ܛܵܒܼܵܐ ܕܡ̣ܢ ܫܘܼܪܵܝܵܐ ܠܵܐ ܥܘܼܪܩܸܠܹܗ؛ ܚܘܿܫ ܕܡܲܠܝܸܙ ܓ̰ܵܠܕܹܐ ܦܘܼܪܩܵܢܘܼܟܼ. ܡܵܘܕܘܿܝܹܐ ܝَܘܲܚ ܡܵܪܝܼ ܕܚܛܝܼܠܲܢ؛ ܠܵܐ ܟܵܦܪܵܐ ܛܲܝܒܘܼܬܘܼܟܼ. ܐܵܗܵܐ ܟܹܐ ܡܲܠܝܵܐ ܠܡܲܢܟܼܲܣܬܲܢ؛ ܕܒܝܼܘܼܟܼ ܒܲܣܝܼܡܵܐ ܥܒܼܝܼܕܠܲܢ ܣܲܟܼܠܘܼܬܵܐ. ܣܵܒܵܒ ܠܐܲܝܢܝܼ ܕܦܲܪܡܝܼܵܢܵܐ ܝَܠܹܗ؛ ܠܵܘܡܵܐ ܒܘܼܫ ܓܘܼܪܵܐ ܝَܠܹܗ ܡ̣ܢ ܓ̰ܘܼܢܓ̰ܵܪܵܐ. ܠܝܲܕܥܵܢܵܐ، ܒܘܼܫ ܡ̣ܢ ܩܵܛܝܼܵܐ؛ ܒܝܼܫܬܵܐ ܝَܠܵܗ̇ ܐܸܠܹܗ  ܣܲܟܼܠܘܼܬܵܐ ܕܥܒܼܝܼܕܠܹܗ. ܠܒܲܪ ܚܹܐܪܹ̈ܐ ܒܘܼܫ ܡ̣ܢ ܠܵܘܡܵܐ؛ ܒܥܵܘܠܵܐ ܕܥܒܼܝܼܕܠܹܗ ܟܹܐ ܢܵܟܼܸܦ. ܗ̇ܘ ܕܐܝܼܬܠܹܗ ܦܲܪܡܵܝܬܵܐ؛ ܓܢܵܗܵܐ ܐܸܠܹܗ ܒܘܼܫ ܩܫܝܼܬܵ‌ܐ ܝَܠܵܗ݁ ܡܩܵܛܝܼܵܐ. ܗ̇ܘ ܕܡ̣ܢ ܩܵܛܝܼܵܐ ܟܹܐ ܙܲܕܥܹܐ؛ ܩܵܐ ܚܕܵܐ ܣܵܥܵܬ ܐܲܚܟ̰ܝܼ ܟܹܐ ܙܵܕܸܥ. ܐܲܝܢܝܼ ܕܡ̣ܢ ܥܵܘܠܵܐ ܙܵܕܸܥ؛ ܙܕܘܿܥܬܹܗ ܟ̰ܲܟܵܐ ܟܹܐ ܗܵܘܝܵܐ ܠܹܗ. ܗ̇ܘ ܕܢܵܟܼܸܦ ܡ̣ܢ ܐَܢܵܫܹ̈ܐ؛ ܓܵܘ ܡܵܢܙܸܠ ܟܹܐ ܡܵܨܹܐ ܕܚܵܛܹܐ. ܘܐܲܝܢܝܼ ܕܢܵܟܼܸܦ ܡ̣ܢ ܛܵܒ̣ܵܐ؛ ܠܹܐ ܡܵܨܹܐ ܕܚܵܛܹܐ ܒܛܸܫܘܵܐ. ܣܵܒܵܒ ܕܠܲܝܬ ܕܘܼܟܬܵܐ ܕܚܵܛܹܐ ܒܝܼܘܿܗ̇؛ ܒܗ݁‌ܝ ܕܐܲܠܵܗܵܐ ܒܟܠ ܕܘܼܟܬܵܐ ܝَܠܹܗ. ܟܲܕ ܠܵܐ ܓ̰ܲܢܓ̰ܸܪܸܬ ܠܐَܢܵܫܵܐ ܬܪܘܿܨܵܐ؛ ܣܲܟܼܠܘܼܬܹܗ ܒܓ̰ܲܢܓ̰ܸܪܵܐ ܠܹܗ. ܗ݁ܘ ܕܚܲܟܝܼܡܵܐ ܝَܠܹܗ ܡ̣ܢ ܓܵܢܹܗ؛ ܩܵܛܝܼـܹܗ ܒܓ̰ܲܢܓ̰ܸܪ ܠܩܢܘܿܡܹܗ. ܟܹܐ ܡܵܠܝܵܐ ܠܹܗ ܢܟܼܸܦܬܹܗ؛ ܗ̇ܘ ܕܚܵܒܸܪ ܕܥܒܼܝܼܕܠܹܗ ܣܲܟܼܠܘܼܬܵܐ ܒܝܼܘܼܟܼ. ܟܹܐ ܡܲܠܝܵܗ݁ ܠܲܢ ܟܘܼܡܦܵܬܘܼܬܵܐ؛ ܕܸܠܥܵܒܿܘܿܕܲܢ ܡܘܼܟܪܸܒܠܲܢ. ܦܫܲܡܬܵܐ ܕܓܵܢܵܐ ܒܝܼـܲܢ ܨܘܼܠܡܸܢܬܵܐ ܝَܠܵܗ݁؛  ܕܝܑܼܠܵܗ̇ ܢܝܼܫܲܢܩܵܐ ܕܢܟܼܝܼܦܹ̈ܐ. ܡܲܠܝܵܐ ܠܲܢ ܡܵܪܝܼ ܢܟܼܸܦܬܲܢ؛ ܕܛܵܠܘܿܡܹ̈ܐ ܠܛܵܒܼܵܐ ܗܘܹܐ ܠܲܢ. ܟܹܐ ܡܲܠܝܵܐ  ܡܵܪܝܼ ܠܚܲܛܵܝܹ̈ܐ؛ ܕܥܲܒܼܕܹ̈ܐ ܒܝܼܫܹ̈ܐ ܦܝܼܫܠܗَܘܿܢ ܩܸܪ̈ܝܹܐ. ܐܵܦ ܗ݁‌ܝ ܒܪܝܼܬܵ‌ܐ ܒܟܹܐܢܘܼܬܵܐ؛ ܒܓܸܠܝܵܐ ܪܵܒܵܐ ܠܝܼܡܲܚܠܹܗ. ܕܛܘܼܫܹܐ ܠܹܗ ܟܠ ܚܲܕَ ܒܝܼܫܵܬܘܼܗ̈‌ܝ؛ ܟܲܪܒܵܐ ܓܠܹܐ ܠܹܗ ܒܝܼ̈ܫܵܬܲܢ. ܒܗ݁‌ܝ ܕܠܲܝܬ ܢܒܼܝܼܵܐ ܕܡܲܢܟܼܸܣܠܲܢ؛ ܟܲܪܒܵܐ ܡܲܩܘܘܼܚܹܐ ܝَܠܹܗ ܥܲܠ ܒܝܼܫܹ̈ܐ. ܒܗ݁‌ܝ ܕܩܲܡ ܫܵܒܼܩܵܐ ܠܲܢ ܪܘܼܚܵܐ ܕܩܘܼܕܫܵܐ؛ ܥܒܼܝܼܪܵܗ̇ ܒܝܼـܲܢ ܓܵܪܕܵܒܘܼܠܹܐ. ܒܗ݁‌ܝ ܠܲܝܬ ܚܲܕَ ܕܡܲܢܟܼܸܣ ܘܢܵܓ̰ܸܘ؛ ܫܸܬܩܹܗ ܕܩܲܡܨܵܐ ܡܲܢܟܼܘܼܣܲܢ ܝَܠܹܗ. ܒܗ݁‌ܝ ܕܠܲܝܬ ܕܡܲܩܘܸܚ ܐܵܘ ܡܟ̰ܵܚܸܣ ܠܲܢ؛ ܡܲܢܟܼܸܣܵܢܵܐ ܒܲܪܕܵܐ ܗَܘܹܐ ܠܹܗ ܐܸܠܲܢ. ܠܲܝܬ ܕܒܩܵܛܝܼܹܗ ܕܡܲܙܕܸܥܠܲܢ؛ ܫܥܵܫܵܐ ܕܐܲܪܥܵܐ ܡܲܚܓ̰ܘܼܠܲܢ ܝَܠܹܗ. ܐَܟܼܵܠܬܵ‌ܐ ܕܓܲܦܹ̈ܐ ܕܗܵܘܵܐ ܕܗܘܵܘ ܠܗَܘܿܢ؛ ܡܲܢܟܼܲܣܬܵܐ ܓܘܼܪܬܵܐ ܝܘܼܗَܒܲܚܠܗَܘܿܢ. ܕܦܝܼܫ̈ܐ ܝَܘܲܚ ܗَܘܵܐ ܚܫܝܼܒܹ̈ܐ ܚܲܕَ ܡܸܢܕܝܼ؛ ܗَܘܹܐ ܠܲܢ ܐܲܝܟܼ ܗܲܪ ܗܸܟ̃ ܡܸܢܕܝܼ. ܕܦܵܝܫܲܚ ܗَܘܵܐ ܚܫܝܼܒܹܐ ܐܲܝܟܼ ܐَܢܵܫܹ̈ܐ؛ ܗܲܝܘܵܢ ܡܸܢܲܢ ܗܵܘܢܵܢܬܵ‌ܐ ܝَܠܵܗ̇. ܟܪܸܒܠܗَܘܿܢ ܥܲܠܲܢ ܒܸܪ̈ܝܵܬܹ‌ܐ؛ ܕܸܠܒܵܪܘܿܝܲܢ ܡܘܼܟܪܸܒܠܲܢ. ܫܸܡܫܵܐ ܒܪܵܘܡܵܐ ܛܫܹܐܠܹܗ؛ ܒܗ݁‌ܝ ܕܙܘܼܪܒܸܢܵܗ̇ ܒܐܲܪܥܵܐ ܣܲܟܼܠܘܼܬܲܢ. ܚܹܝܦܘܼܬܵܐ ܦܪܝܼܣܠܵܗ݁ ܥܲܠ ܦܲܐܬܘܵܬ̈ܘܼܗܝ؛ ܕܥܵܒܸܕ ܠܗَܘܿܢ ܡܵܪܹ̈ܐ ܐܵܕܲܒ ܛܵܠܘܿܡܹ̈ܐ. ܣܲܗܪܵܐ ܫܪܵܓَܼܝܵܐ ܕܚܸܫܟܵܐ؛ ܥܢܵܢܵܐ ܗَܘܹܐ ܠܵܗ̇ ܐܸܠܹܗ ܟܵܣܵܝܬܵܐ. ܐܲܝܟܼ ܡܘܼܫܹܐ ܒܦܝܵܫܵܐ ܗَܘܵܐ ܡܝܘܼܩܪܵܐ؛ ܕܐܲܚܢܲܢ ܙܵܘܕܵܐ ܦܵܝܫܲܚ ܡܘܼܢܟܼܸܦܹܐ. ܩܲܡܨܵܐ ܕܟܹܐ ܦܵܐܸܫ ܕܝܼܫܵܐ ܒܸܕܝܵܫܲܢ ܝَܠܹܗ؛ ܚܲܝܠܵܐ ܙܲܒܘܼܢ ܒܸܓܼܠܵܒܲܢ ܝَܠܹܗ. ܐܲܝܟܵܐ ܕܐܝܼܬ ܗَܘܵܐ ܟܹܐܢܹ̈ܐ ܡܵܪܹܐ ܐܵܕܵܒ؛ ܠܓܲܢَܒܵܪܹ̈ܐ ܓܼܠܝܼܒܠܗَܘܿܢ ܒܸܨܠܘܿܬܵܐ. ܙܲܕܝܼܩܹ̈ܐ ܡܝܼܬܹ̈‌ܐ ܡܘܼܚܝܹܝܠܗَܘܿܢ؛ ܐܸܠܲܢ ܒܸܪܥܵܝܵܐ ܝَܠܹܗ ܡܵܘܬܵܢܵܐ. ܒܵܬܹ̈‌ܐ ܒܟܹܐܢܹ̈ܐ ܦܝܼܫܠܗَܘܿܢ ܡܒܘܼܪ̈ܟܹܐ؛ ܒܐܸܣܩܘܼܦܝܵܬܹ̈‌ܐ ܣܸܠَܩܠܗَܘܿܢ ܚ̈ܛܝܼܵܬܲܢ. ܙܲܪ̈ܒܸܟܹܐ ܘܡܘܼܫܪܹ̈ܐ ܡܘܼܕܸܥܠܗܘܿܢ؛ ܕܐَܟ̰ܝܵܡܬܵܐ ܕܦܘܼܡܵܐ ܚܲܫܚܵܐ ܠܲܢ. ܦܩܝܼܕܠܹܗ ܡܘܼܫܹܐ ܠܩܲܡܨܵܐ ܘܫܘܼܢܹܐܠܹܗ؛ ܒܘܼܬ ܥܵܘܠܲܢ ܒܐܲܬܪܲܢ ܩܸܢܵܐ ܡܬܘܼܪܸܨܠܹܗ. ܫܥܵܫܹ̈ܐ ܕܡܵܪܓܘܼܕܲܢ ܝܑܼܢܵܐ؛ ܠܟܹܐܢܹ̈ܐ ܐܲܝܟܼ ܚܸܠܡܹ̈ܐ ܚܫ̈ܝܼܒ̣ـܹܐ ܗَܘܵܘ. ܠܵܐ ܙܕܸܥܠܗَܘܿܢ ܐܵܢܝܼ ܟܲܕ ܪ̈ܥܝܼܫܹܐ؛ ܐܝܼܢܵܐ ܐܲܚܢܲܢ ܒܚܸܠܡܹ̈ܐ ܪܓܸܕܠܲܢ. ܠܸܒܵܢܵܐ ܗَܘܵܐ ܓܵܘ ܓܘܼܒܵܐ ܕܵܢܝܼܐܹܝܠ؛ ܘܕܒܹܝܬ ܚܲܢܵܢܝܵܐ ܒܐܵܬܘܿܢܵܐ. ܐܸܠܲܢ ܙܕܘܿܥܬܵ‌ܐ ܒܡܲܢܙ̈ܝܼܠܹܐ؛ ܒܓܵܘ ܫܘܝܼܬܵ‌ܐ ܚܸܠܡܹ̈ܐ ܫܓܼܝܫܲܚܠܗَܘܿܢ. ܐܲܢܹܐ ܟܹܐ ܡܵܠܝܼ ܩܵܐ ܡܲܢܟܼܲܦܬܲܢ؛ ܕܡ̣ܢ ܩܵܠܵܐ ܕܛܲܪܦܵܐ ܒܸܦܢܵܝܵܐ ܝَܘܲܚ. ܐܲܢܹܐ ܟܹܐ ܡܵܠܝܼ ܕܡܲܦܪܸܡܝܼܠܲܢ؛ ܕܟ̰ܡܸܥܠܵܗ̇ ܒܝܼـܲܢ ܐܵܕܵܒܘܼܬܵܐ. ܒܐܲܢܹܐ ܟܹܐ ܡܵܨܹܐ ܐَܢܵܫܵܐ ܕܝܵܠܸܦܠܲܢ؛ ܠܵܐ ܠܐܲܪܥܵܐ ܐܵܦ ܠܵܐ ܠܙܸܒܠܵܐ. ܠܒܢܘܿܢܹ̈ܐ ܩܸܪܝܲܚܠܹܗ ܥܸܠܵܝܵܐ؛ ܟܲܕ ܠܥܲܒܼܕܹ̈ܐ ܠܹܐ ܚܲܫܚܲܚ. ܠܲܝܬ ܕܐَܬܹܐ ܠܵܗ݁ ܥܲܠ ܒܵܠܹܗ؛ ܕܬܲܚܡܸܢ ܐܸܢ ܥܒ̣ܝܼܕܠܹܗ ܓܢܵܗܵܐ. ܗܵܓ̰ܵܬܹ̈‌ܐ ܕܠܩܵܕَܡܵܝܹ̈ܐ؛ ܕܢܟܼܸܦܬܵ‌ܐ ܡܲܪܝܼܪܬܵܐ ܗَܘܵܘ ܠܗܘܿܢ. ܫܘܼܒܼܗܵܪܵܐ ܝَܢܵܐ ܐܸܠܹܗ ܐܵܕܝܼܵܐ؛ ܠܐܵܗܵܐ ܕܵܪܲܢ ܩܲܠܒܵܢܵܐ. ܓܲܚܙܝܼ ܕܓܢܝܼܒܼܠܹܗ ܦܝܼܫܠܹܗ ܠܝܼܡܵܐ؛ ܘܪܵܡܵܐ ܝَܠܹܗ ܩܵܠܵܐ ܕܓܹܢܵܒܼܘܼܬܲܢ. ܨܵܥܲܪܬܵܐ ܕܒܹܝܬَ ܢܵܒܼܵܠ؛ ܩܵܬܲܢ ܫܒܼܝܼܩܵܗ݁ ܠܗَܘܿܢ ܝܲܪܬܘܼܬܵܐ. ܗ̇ܝܓܵܗ ܫܸܬܩܵܐ ܠܝܲܠܘܼܕܹ̈ܐ؛ ܘܐܸܕܝܘܿܡ ܐܵܢܝܼ ܡܵܠܘܿܟܹ̈ܐ ܝَܢܵܐ. ܡܓܹܢَܒ ܟܹܐܢܘܼܬܵܐ ܕܩܵܕَܡܵܝܹ̈ܐ؛ ܚܲܕَܟ̰ܵܐ ܝَܠܵܗ̇ ܐܸܠܲܢ ܛܵܠܘܿܡܘܼܬܵܐ. ܐܸܕܝܘܿܡ ܠܹܐ ܝَܠܹܗ ܡܘܼܚܸܒܵܐ ܡܲܟܝܼܟ̣ܵܐ؛ ܡܐܲܝܟܼ ܨܲܗܡܵܢܵܐ ܘܒܹܐܵܕܲܒ. ܡܸܢܝܵܬܹ̈‌ܐ ܒܝܼܫܹ̈ܐ ܒܸܕܪܵܝܵܐ ܝَܠܹܗ ܐَܢܵܫܵܐ؛ ܕܗܵܘܹܐ ܡܲܙܕܸܥܝܵܢܵܐ ܒܸܫܒܼܵܒܼܘܼܬܹܗ. ܡܸܣܟܹܢܘܼܬܵܐ ܕܸܫܠܝܼܚܹ̈ܐ؛ ܠܫܸܡܥܘܿܢ ܟܹܐܦܵܐ ܫܘܼܒܼܗܵܪܵܐ ܗَܘܵܐ. ܕܠܲܝܬ ܗَܘܵܐ ܒܐܝܼܕ̈ܘܼܗܝ ܡܵܡܘܿܢܵܐ؛ ܚܘܼܠܡܵܢܵܐ ܝܘܼܗَܒܸܠܵܗ̇ ܐܝܼܕܹܗ. ܠܠܵܘܡܵܐ ܗَܘܵܐ ܡܸܣܟܹܢܘܼܬܵܐ؛ ܕܙܘܼܙܵܐ ܡܵܪܵܐ ܗَܘܹܐ ܠܹܗ ܐܸܠܲܢ. ܡܘܼܣܠܝܼܵܐ ܝَܠܹܗ ܒܕܵܪܲܢ ܡܸܣܟܹܢܵܐ؛ ܟܲܕ ܡܵܪܲܢ ܛܘܼܒ̣ܵܐ ܝܘܼܗَܒܸܠܹܗ ܐܸܠܹܗ. ܠܝܵـܠܵܕَܐ ܟܹܐ ܦܲܠܸܓَܼ ܐܝܼܩܵܪܵܐ؛ ܣܵܒܼܵܐ ܕܩܵܐܸܡ ܡ̣ܢ ܩܵܕَܡܹܗ. ܒܕܵܪܲܢ ܐܲܢܹܐ ܒܦܝܵܫܵܐ ܝَܢܵܐ ܦܠܝܼܚܹ̈ܐ؛ ܥܘܼܓ̰ܵܒܵܐ ܝَܠܹܗ ܕܵܐܟܼܝܼ ܟܸܠܝܵܐ ܝَܠܹܗ. ܒܥܹܩܘܼ ܝَܘܲܚ ܩܵܐ ܕܫܓܼܝܼܫܹ̈ܐ ܝَܢܵܐ؛ ܒܸܪ̈ܝܵܬܵ‌ܐ ܡ̣ܢ ܛܘܼܟܵܣܲܝ̈ܗ‌ܝ.  ܥܘܼܓ̰ܵܒܵܐ ܝَܠܹܗ ܐܲܚܘܿܢ̈ܘܵܬܝܼ؛ ܕܵܐܟܼܝܼ ܒܸܟܠܵܝܵܐ ܝَܘܲܚ. ܠܵܐ ܡܥܵܓ̰ܒܸܬ ܕܐَܬܹܐܠܹܗ ܟܲܪܒܵܐ؛ ܡܥܵܓ̰ܸܒ ܕܵܐܟܼܝܼ ܡܥܘܼܪܩܸܠܹܗ. ܣܵܒܵܒ ܠܹܐ ܝَܠܹܵܗ ܥܘܼܓ̰ܵܒܵܐ ܕܐَܬܹܐܠܹܗ؛ ܥܵܓ̰ܝܼܒܘܼܬܵܐ ܝܼܠܵܗ̇ ܐܸܢ ܗܵܘܝܵܐ ܕܐܵܙܸܠ. ܛܠܸܩܠܗَܘܿܢ ܛܘܼܟܵܣܹ̈ܐ ܕܐَܢܵܫܘܼܬܵܐ؛ ܦܪܝܼܩܬܵܐ ܝَܠܵܗ̇ ܡܸܢܲܢ ܟܹܐܢܘܼܬܵܐ. ܠܹܐ ܠܵܗ̇ ܥܵܓ̰ܝܼܒܘܼܬܵܐ ܕܗܵܘܵܐ ܚܲܕَ ܗܵܕܟܼܵܐ ܫܓܼܝܼܫܵܐ ܝَܠܹܗ܀ ܐܝܼܢܵܐ ܥܵܓ̰ܝܼܒܘܼܬܵܐ ܝَܠܵܗ̇ ܕܵܐܟ̣ܝܼ؛ ܠܵܐ ܚܪܝܼܩܵܗ݁ ܠܹܗ ܥܵܘܠܲܢ ܠܐܲܪܥܵܐ. ܡܘܼܟܪܸܙܠܹܗ ܢܘܿܚ ܟܲܪܒܵܐ ܚܲܕَܬܵܐ؛ ܘܒܗ̇‌ܝ ܕܚܲܕَܬܼܵܐ ܗَܘܵܐ ܠܵܐ ܦܝܼܫܠܹܗ ܡܗܘܼܝܡܸܢܵܐ. ܢܒ̣ܝܹ̈ܐ ܘܲܫܠܝܼܚܹ̈ܐ ܡܲܩܘܘܼܚܹܐ ܝَܢܵܐ. ܟ̰ܲܢܟ̰ܵܢܝܵܬܹ̈‌ܐ ܗَܘܵܘ ܠܗَܘܿܢ ܐܸܠܲܢ ܩܵܠܲܝ̈ܗܝ. ܐܲܝܟܼ ܚܸܠܡܵܐ ܡܲܕܡܘܼܝܹܐ ܝَܠܵܗ̇: ܗ̇‌ܝ ܕܝܼܘܵܢ ܓܘܼܪܬܵܐ ܕܗܘܼܕܸܪܬܵܐ ܝَܠܵܗ̇‌. ܩܵܘܠܵܐ ܩܵܬܲܢ ܛܸܠܵܢܝܼܬܵܐ ܝَܠܹܗ: ܘܕܵܘܸܠܬܵ‌ܐ ܡܘܼܚܸܒܬܲܢ ܝَܠܵܗ̇. ܡܵܢܝܼ ܝَܠܹܗ ܕܡܘܼܥܝܸܩܵܐ ܝَܠܹܗ ܒܘܼܬ ܚܲܒܼܪܹܗ: ܢܝܵܚܵܐ ܕܓܵܢܹܗ ܟܹܐ ܒܵܥܹܐ ܟܠ ܐَܢܵܫܵܐ. ܠܓܵܘܵܝܼ ܘܲܠܒܲܕܲܪ ܢܵܣܒܲܝ̈ ܒܐܲܦܹ̈ܐ. ܠܓܵܘܵܝ ܘܠܒܲܕܲܪ ܐܵܦ ܡܚܲܙܕܸܓܵܢܹ̈ܐ. ܡܵܢܝܼ ܝَܼܠܹܗ ܕܸܟ̣ܝܵܐ ܠܸܫܵܢܹܗ: ܠܡܲܢܚܘܼܟܼܹܐ ܥܲܠ ܗܵܩܘܼܬܵܐ. ܢܲܟ̣ܦܘܼܬܵܐ ܕܚܹܐܪܹ̈ܐ ܦܝܼܫܠܵܗ̇ ܡܙܘܼܒܸܢܬܵܐ: ܒܪܸܫܘܲܬ ܦܝܼܫܠܵܗ̇ ܡܘܼܚܪܸܒ̣ܬܵܐ. ܗܘܼܟܸܡܠܵܗ̇ ܩܲܫ̃ܕܲܪܬܵܐ ܓܵܘ ܒܹܝܬ ܥܲܝܢܹ̈ܐ: ܢܲܟ̣ܦܘܼܬܵܐ ܫܘܼܢܹܐܠܵܗ̇ ܡ̣ܢ ܕܘܼܟܬܵܗ̇. ܣܸܩܠܵܐ ܕܣܸܢܝܵܐ ܝَܠܹܗ  ܠܪܵܒܵܐ: ܒܐܵܗܵܐ ܕܵܪܲܢ ܡܘܼܚܸܒܵܐ ܝَܠܹܗ ܪܵܒܵܐ. ܒܟܠܲܝܗܝ ܕܵܪܹ̈ܐ ܣܸܢܝܹ̈ܐ ܝَܢܵܐ ܕܘܼܓܠܵܢܹ̈ܐ: ܘܒܕܵܪܲܢ ܪܵܒܵܐ ܡܘܼܚܸܒܵܐ ܝَܢܵܐ. ܟܦܘܼܪܝܵܐ ܘܡܲܣܚܲܪܬܵܐ ܘܡܲܣܠܵܝܬܵ‌ܐ: ܒܲܝܢܵܬܲܢ ܗܸܟ̃ ܠܹܐ ܝَܢܵܐ ܣܸܢܝܹ̈ܐ. ܟܡܵܐ ܣܸܢܝܵܐ ܝَܠܹܗ ܕܵܪܲܢ: ܕܐܵܦ ܒܝܼܫܵܬܹ̈‌ܐ ܠܹܐ ܝَܢܵܐ ܣܸܢܝܹ̈ܐ ܐܸܠܹܗ. َ ܐܵܗܵܐ ܪܵܒܵܐ ܚܸܪܒܵܐ ܝَܠܵܗ݁: ܕܒܝܼܫܵܬܹ̈‌ܐ ܙܹܐ ܠܹܐ ܝَܢܵܐ ܒܝܼܫܹ̈ܐ ܐܸܠܹܗ. ܒܝܼܫܵܬܹ̈‌ܐ ܕܡܘܼܬܹܐܠܹܗ ܟܹܐܢܵܐ: ܐܲܚܟ̰ܝܼ ܐܵܢܝܼ ܝَܢܵܐ ܒܝܼܫܹ̈ܐ ܐܸܠܹܗ. ܡܲܣܚܲܪܬܵܐ ܕܟܹܐ ܩܵܛܠܵܐ ܠܪܵܒܵܐ: ܩܵܬܲܢ ܡܲܦܝܸܓ̣ܬܵ‌ܐ ܕܠܸܒܵܐ ܝَܠܵܗ̇. ܩܸܫܝܘܼܬܵܐ ܕܟܲܪܒܵܐ ܡܲܩܕܲܢܬܵ‌ܐ ܝَܠܵܗ̇: ܠܚܝܼܵܠܲܝ̈ܢ ܡܲܢܝܸܚܵܢܬܵ‌ܐ ܝَܠܵܗ̇. ܡ̣ܢ ܒܸܪܩܵܐ ܗܸܫܝܲܪ ܝܑܼܘܲܚ: ܟܲܕ ܫܵܗܘܲܬܵܐ ܒܓܵܘܲܢ ܝَܠܵܗ̇. ܦܵܘܚܵܐ ܕܙܲܪܒܲܢ ܟܹܐ ܦܵܐܸܫ ܣܸܢܝܵܐ: ܘܪܘܼܚܲܢ ܪܲܡܬܵܐ ܠܹܐ ܝَܠܵܗ̇ ܦܝܵܫܵܐ ܣܢܝܼܬܵܐ. ܦܵܘܚܵܐ ܕܙܘܼܪܒܸܢܹܗ ܦܝܼܫܠܹܗ ܓܼܠܝܼܒܵܐ: ܘܪܘܼܚܵܐ ܪܵܡܬܵܐ ܠܵܐ ܢܟܼܸܦܠܵܐ. ܒܝܼܫܵܬܹ̈‌ܐ ܒܦܝܵܫܵܐ ܝَܢܵܐ ܚܫܝܼܒܹ̈ܐ ܐܸܠܲܢ: ܐܲܢܹ̈ܐ ܕܡܸܠܝܹܐ ܝَܢܵܐ ܗܲܝܲܪܬܵܐ. ܟܲܕ ܒܝܼܫܵܬܹ̈‌ܐ ܕܸܫܪܵܪܵܐ: ܡ̣ܢ ܚܹܐܪܘܼܬܲܢ ܦܵܝܫܝܼ ܝَܠܝܼܕܹ̈ܐ. ܐܵܦ ܟܵܦܘܿܪܹ̈ܐ ܠܬܲܥܠܲܡܬܵ‌ܐ: ܒܝܼܫܬܵ‌ܐ ܫܘܼܡܸܗܠܗܘܿܢ ܘܩܸܪܝܵܗ݁ ܠܗَܘܿܢ. ܠܕܲܓܵܠܘܼܬܲܢ ܘܸܠܚܸܡܬܲܢ: ܟܠܝܘܿܡ ܡܣܲܝܒܘܼܪܹܐ ܝَܠܹܗ ܐܲܠܵܗܵܐ. ܬܲܥܠܲܡܬܹܗ ܡܠܝܼܬܵ‌ܐ ܝَܠܵܗ̇ ܚܲܝܹ̈ܐ: ܗ݁ܝ ܕܝܼܲܠَܢ ܝܘܼܩܪܵܐ ܝَܠܹܗ ܩܵܬܲܢ. ܛܲܥܡܲܟܵܪܘܼܬܵܐ ܩܲܠܘܼܠܬܵܐ ܝَܠܵܗ݁ ܐܸܠܲܢ: ܘܠܦܲܪ̈ܡܝܼܵܢܹܐ ܪܵܒܵܐ ܓܘܼܪܬܵܐ ܝَܠܵܗ̇. ܬܲܥܠܲܡܬܵܐ ܟܹܐ ܣܵܢܲܚܠܵܗ̇: ܕܠܝܵܕܘܿܥܹ̈ܐ ܡܵܪܹܐ ܦܵܝܕܵܐ ܝَܠܵܗ̇. ܒܲܣ ܡܵܢܝܼ ܝَܠܹܗ ܕܠܹܐ ܒܵܟ̣ـܹܐ: ܕܟܡܵܐ ܣܡܝܼܬܵ‌ܐ ܝَܠܵܗ̇ ܐܸܢܝܲܬܲܢ؟. ܗܵܣܵܢܵܝܼ ܝَܢܵܐ ܟ̰ܵܬܘܼܢܘܼܝܵܬܹ̈‌ܐ: ܘܦܫܝܼܩܵܬܹ̈‌ܐ ܝܵܩܘܿܪܹ̈ܐ. ܡܘܼܚܸܒܹܐ ܝَܢܵܐ ܐܸܠܲܢ ܚܲܝܹ̈ܐ ܕܙܲܒ̣ܢܵܐ: ܒܘܼܫ ܡ̣ܢ ܚܲܝܹ̈ܐ ܡܩ̈ܘܼܘܸܠܹܐ. ܓܲܦܹ̈ܐ ܕܐَܢܵܫܵܐ ܟܹܐ ܡܲܙܕܸܥ: ܒܘܼܫ ܡ̣ܢ ܓܹܗܲܢܵܐ ܕܗܘܼܕܸܪܬܵܐ ܝَܠܵܗ̇. ܦܵܬܘܿܪܵܐ ܕܙܲܒ̣ܢܵܐ ܡܘܼܚܸܒܵܐ ܝَܠܹܗ: ܒܘܼܫ ܡ̣ܢ ܦܵܬܘܿܪܵܐ ܕܡܲܠܟܘܼܬܵܐ. ܒܘܼܫ ܛܵܒܼܬܵܐ ܝَܠܵܗ݁ ܩܵܬܲܢ ܓܲܢܬܵ‌ܐ ܕܝܲܪ̈ܩܹܐ: ܡ̣ܢ ܕܗ̇‌ܝ ܕܝَܪܸܬܠܹܗ ܓܲܝܵܣܵܐ. ܒܐܝܼܠܵܢܹ̈ܐ ܙܥܘܿܪܹ̈ܐ ܕܐܲܬܪܲܢ: ܡܘܼܚܠܸܦܠܲܢ ܐܝܼܠܵܢܵܐ ܕܚܲܝܹ̈ܐ. ܡܘܼܚܸܒܹܐ ܝَܢܵܐ ܐܸܠܲܢ ܢܨܲܒ̣ܝܵܬܹ̈‌ܐ: ܒܘܼܫ ܡ̣ܢ ܦܲܪܕܹܝܣܹܗ ܕܐܲܠܵܗܵܐ. ܠܲܝܬ ܠܲܢ ܚܲܡ ܥܲܠ ܪ̈ܥܝܵܢܲܢ: ܐܲܝܟܼ ܕܐܝܼܬ ܠܲܢ ܚܲܡ ܥܲܠ ܟܲܪܡܲܢ. ܐܸܢܝܲܬ ܒܲܝܲܪܬܵܐ ܝَܠܵܗ̇ ܟܠܝܘܿܡ: ܡ̣ܢ ܓܹܒܵܗ̇ ܐܲܪܥܵܐ ܒܦܠܵܚܵܐ ܝَܘܲܚ. ܒܸܒܥܵܝܵܐ ܝَܘܲܚ ܕܐܲܪܥܵܐ ܬܵܪܨܵܐ: ܒܘܼܫ ܡ̣ܢ ܕܐܲܚܢܲܢ ܬܲܪܨܲܚ. ܘܕܗܵܘܵܐ ܗܵܘܹܐ ܨܸܦܝܵܐ: ܒܘܼܫ ܡ̣ܢ ܕܐܲܚܢܲܢ ܗܵܘܲܚ ܨܸܦܝܹ̈ܐ. ܗܲܝܘܵܢ ܕܐܝܼܬܠܲܢ ܒܲܥܝܲܚ: ܕܒܘܼܫ ܡܸܢܲܢ ܗܵܘܝܵܐ ܗܵܘܢܵܢܬܵ‌ܐ. ܠܐܘܼܠܵܓܼ ܠܵܓܼܵܘܵܐ ܡܬܘܼܪ̈ܨܹܐ ܝَܢܵܐ: ܘܐܲܚܢܲܢ ܒܸܒܕܵܝܵܐ ܝَܢܵܐ ܚܝܼܵܠܲܝ̈ܢ. ܠܚܲܝ̈ܘܵܬܹܐ ܒܢܝܼܪܵܐ ܒܸܣܝܵܪܵܐ ܝَܘܲܚ. ܘܠܸܒܲܢ ܒܸܥܪܵܩܵܐ ܝܼܠܹܗ ܡ̣ܢ ܢܝܼܪܵܐ. ܡܲܨܝܘܼܬܹܐ ܝَܢܵܐ ܗܲܝܘܵܢܹ̈ܐ: ܘܒܓܵܢܘܼܗܝ ܥܵܣܝܼ ܝܼܠܹܗ ܥܲܠ ܒܲܪܝܵܢܘܼܗܝ. ܠܵܓܼܵܘܵܐ ܒܗܵܝܘܵܢܹ̈ܐ ܒܸܕܪܵܝܵܐ ܝܼܠܹܗ: ܕܝܼܢܵܐ ܕܠܵܐ ܦܲܪܡܵܝܬܵܐ. ܒܲܪܢܵܫܵܐ ܡܵܠܘܿܦܹܐ ܠܹܗ ܠܚܲܝܘܵܬ̈ܵܐ: ܘܗ̇ܘ ܒܓܵܢܘܼܗܝ ܕܠܵܐ ܦܲܪܡܵܝܬܵ‌ܐ ܝܼܠܹܗ܀ ܟܹܐ ܣܵܢܹܐ ܠܵܓܼܵܘܵܐ ܕܟܹܐܢܘܼܬܵܐ: ܕܡܲܟܠܘܼܝܘܼܗܝ ܝܼܠܹܗ ܡ̣ܢ ܬܘܼܪ̈ܩܵܠܹܐ. ܠܬܵܘܪܵܐ ܟܹܐ ܡܙܲܒܛܸܢ ܒܲܪܢܵܫܵܐ ܘܒܓܵܢܘܼܗܝ ܒܸܗܘܵܝܵܐ ܝܼܠܹܗ ܟܹܘܝܼ. ܠܬܵܘܪܵܐ ܟܹܐ ܡܵܚܹܐ ܕܠܵܐ ܢܲܩܹ̈ܐ ܟܲܕ ܗ̇ܘ ܟܹܐ ܢܲܩܹܐ ܠܪܵܒܵܐ. ܟܹܐ ܡܲܟܠܹܐ ܠܐܘܼܠܵܓܼ ܕܠܵܐ ܡܲܚܝܵܐ ܪ̈ܲܦܣܹܐ: ܒܲܪܢܵܫܵܐ ܕܛܪܸܣܠܹܗ ܕܪܹܐ ܠܹܗ ܪ̈ܲܦܣܹܐ܀ ܠܟܵܦܘܿܪܵܐ ܟܲܠܒܹܗ ܟܹܐ ܝܲܕܸܥ: ܘܗ̇ܘ ܠܒܲܪܝܵܢܹܗ ܠܹܐ ܝܲܕܥܹܐ ܚܡܲܪܬܹܗ ܕܒܸܠܥܲܡ ܩܲܡ ܡܲܠܦܵܐ ܠܹܗ: ܕܠܵܐ ܦܲܪܡܵܝܬܵ‌ܐ ܒܹܐܙܵܠܵܐ ܝܗَܘܵܐ. ܗَܘܹܐ ܠܵܗ̇ ܚܡܲܪܬܹܗ ܐܲܝܟܼ ܐَܢܵܫܵܐ: ܘܒܓܵܢܹܗ ܗَܘܹܐ ܠܹܗ ܐܲܝܟܼ ܗܲܝܘܵܢ. ܐܲܝܟܼ ܩܵܛܝܼܵܐ ܕܐَܢܵܫܵܐ ܡܵܠܘܿܦܹܐ ܝܼܠܹܗ: ܒܲܣ ܟܡܵܐ ܩܵܛܝܼـܹܗ ܕܐܵܠܵܗܵܐ܀ ܠܹܐ ܕܵܝܸܪ ܡܵܪܵܐ ܛܵܒ̣ܵܐ: ܡ̣ܢ ܪܸ̈ܓܵܘܵܬܘܼܗܝ ܕܚܵܪܒ̣ܝܼ ܘܒܵܒܵܐ ܚܲܟܝܼܡܵܐ ܠܹܐ ܫܵܠܹܐ: ܕܡܵܠܸܦ ܒܩܵܛܝܼܘܼܗܝ ܠܒܢܘܿܢ̈ܘܼܗܝ. ܪܵܒܵܐ ܒܝܼܫܬܵܐ ܝܼܠܵܗ̇ ܛܲܝܒܘܼܬܹܗ: ܕܐܵܣܝܵܐ ܕܚܵܣܸـܟܼ ܥܲܠ ܡܲܪܥܵܐ. ܠܹܐ ܝܼܠܵܗ̇ ܫܵܦܵܩܲܬ ܕܪܵܚܸܡ: ܘܠܵܐ ܦܵܪܸܡܠܹܗ ܩܵܐ ܗܵܝܸܪܬܵܐ܀ ܐܵܣܝܵܐ ܒܗܵܩܵܐ ܟܹܐ ܦܵܪܸܡܠܲܢ: ܟܹܐ ܦܵܪܸܡ ܘܟܵܘܹܐ ܘܡܒܵܣܸܡ ܠܲܢ. ܠܹܐ ܝܼܠܵܗ̇ ܒܣܵܡܘܼܟܼ ܕܐܲܠܵܗܵܐ: ܚܘܼܪܵܝ ܝܘܼܗَܒܸܬ ܠܹܗ ܥܘܼܕܪ̈ܵܢܹܐ ܫܝܲܥܫܹ̈ܐ ܗَܘܵܘ ܕܲܪ̈ܡܵܢܹܐ: ܨܵܚܘܼܬܵܐ ܕܪܘܼܚܵܐ ܝܘܼܗَܒܸܚܠܹܗ. ܠܵܐ ܚܫܘܼܒ̣ܠܹܗ ܩܸܫܝܵܐ: ܠܒܲܣܝܼܡܵܐ ܘܪܵܚܸܡ ܐَܢܵܫܵܐ ܠܵܐ ܫܒ̣ܝܼܩܸܬ ܠܹܗ ܐܲܢَܬ ܫܒ̣ܝܼܩܠܘܼܟܼ: ܒܬܲܥܠܸܡܬܘܼܗܝ ܟܹܐ ܩܵܪܝܼܠܘܼܟܼ. ܣܵܒܵܒ ܠܹܐ ܡܲܚܦܸܠ ܒܲܣܝܼܡܵܐ. ܡ̣ܢ ܕܐܵܢܝܼ ܕܕܵܥܪܝܼ ܡܸܢܹܗ. ܐܲܢَܬܿ ܕܣܢܝܼܩܵܐ ܝَܘܸܬܿ ܗَܘܵܐ ܫܒ̣ܝܼܩܠܘܼܟܼ: ܩܸܪܝܸܬ ܠܹܗ ܕܝܵܗَܒܸܠܘܼܟܼ ܪܵܒܵܐ. ܠܩܵܠܵܐ ܛܵܒ̣ܵܐ ܕܟܹܐ ܩܵܪܝܼܠܘܼܟܼ: ܐܲܝܟܼ ܙܲܪܒܵܢܵܐ ܟܹܐ ܚܲܫܒܸܬ܀ ܐܵܦ ܝܘܼܠܦܵܢܹ̈ܐ ܚܠܝܼܛܹ̈ܐ: ܐܲܝܟܼ ܩܸܫܝܵܐ ܫܒ̣ܝܼܩܠܗَܘܿܢ ܘܥܪܝܼܩܠܗܘܿܢ. ܡܵܢܚܘܼܣܲܝܗܝ ܝܼܠܵܗ̇ ܛܲܝܒܘܼܬܹܗ: ܕܟܹܐ ܡܵܨܹܐ ܡܲܡܪܸܥ ܘܒܸܚܡܵܠܵܐ ܝَܠܹܗ ܕܵܐܟ̣ܝܼ ܒܸܩܪܵܝܘܼܗܝ ܝَܢܵܐ ܛܵܠܘܿܡܵܐ: ܟܲܕ ܣܲܝܒܘܼܪܹܐ ܝܼܠܹܗ ܓܘܼܕܵܦܲܝܗ̈ܝ. ܕܵܐܟ̣ܝܼ ܒܸܚܫܵܒܼܘܼܗܝ ܝَܢܵܐ ܙܲܪܒܵܢܵܐ: ܟܲܕ ܒܸܫܡܲܥܝܵܐ ܝܼܠܹܗ ܘܠܹܐ ܝܼܠܹܗ ܒܸܟܪܵܒܵܐ܀ ܕܟܹܐ ܡܵܨܹܐ ܡܵܚܹܐ ܘܠܹܐ ܝَܠܹܗ ܒܸܡܚܵܝܵܐ: ܒܲܣܝܼܡܵܐ ܝܼܠܹܗ ܠܟܸܣ ܕܲܪ̈ܩܘܼܠܵܝܘܼܗܝ. ܒܐܵܗܵܐ ܡܲܚܙܘܼܝܹܐ ܝَܠܹܗ ܫܵܦܵܩܲܬܘܼܗܝ: ܕܠܹܐ ܝܼܠܹܗ ܡܲܕܘܼܪܹܐ ܐܸܠܲܝܗܝ ܦܘܼܪ̈ܥܵܢܲܝܗܝ. ܣܵܒܵܒ ܝܼܠܹܗ ܙܠܝܼܡܵܐ ܕܟܹܐ ܪܵܚܸܡ: ܐܲܝܢܝܼ ܝܼܠܹܗ ܛܵܒ̣ܵܐ ܕܟܹܐ ܕܵܡܹܐ ܐܸܠܹܗ. ܟܲܕ ܟܹܐܢܵܐ ܝܼܠܹܗ ܘܐܲܝܟܼ ܠܵܐ ܟܹܐܢܵܐ: ܫܸܡܫܹܗ ܟܹܐ ܡܲܙܪܸܩܠܹܗ ܥܲܠ ܒܝܼܫܹ̈ܐ܀ ܒܲܣ ܬܵܝܡܘܿܢ ܝܵܐ ܚܲܛܵܝܹ̈ܐ: ܫܩܘܼܠܘܼܢ ܕܸܪ̈ܡܵܢܹܐ ܕܛܲܝܒܘܼܬܵܐ. ܡܲܬܒ̣ܘܼܢ ܠܗَܘܿܢ ܥܲܠ ܫܘܼܚܢܹ̈ܐ ܕܕܲܪ̈ܒܵܬܹ‌ܐ ܕܲܚܛܝܼܬܵ‌ܐ. ܓܠܵܝܡܘܿܢ ܘܡܲܚܙܵܝܡܘܿܢ ܕܲܪ̈ܕܵܘܟ̣ܘܿܢ. ܠܐܵܣܝܵܐ ܛܵܒ̣ܵܐ ܘܚܲܟܝܼܡܵܐ. ܕܟܹܐ ܝܲܕܥܝܼܠܗَܘܿܢ ܗܵܓ̰ܲܬܹ̈‌ܐ ܕܨܵܚܘܼܬܵܐ: ܕܟܹܐ ܚܵܫܚܝܼ ܠܬܒ̣ܵܪܵܐ ܕܥܵܘܠܵܐ. ܓܪܘܿܫܘܼܢ ܠܹܗ ܨܲܠܡܹܗ ܕܲܡܫܝܼܚܵܐ: ܥܲܠ ܕܲܦܹ̈ܐ ܕܚܝܼܵܠܵܘܟ̣ܘܿܢ. ܕܓܪܝܼܕܠܵܘܟ̣ܘܿܢ ܒܲܚܛܝܼܬܵ‌ܐ: ܟܬܘܿܒ̣ܘܿܢ ܠܹܗ ܥܘܼܗܕܵܢܘܼܗܝ ܒܦܵܫܸܡܬܵ‌ܐ ܕܠܵܐ ܦܵܝܫܝܼ ܡܕܘܼܓܠܹܐ ܩܵܘܠܘܼܗ̈‌ܝ: ܡܣܵܒܵܒ ܪܸܦܝܘܼܬܵܐ ܕܕܘܼܒܵܪ̈ܲܢ ܕܠܵܐ ܗܵܘܝܵܐ ܗܵܒܲܣ ܐَܬܵܝܬܹܗ: ܟܲܕ ܡܥܲܪܩܸܠܲܚ ܒܲܚܛܝܼܬܲܢ܀ ܐܝܼܬ ܗܹܒ̣ܝܼ ܠܛܠܝܼܩܹ̈ܐ: ܘܨܵܚܘܼܬܵܐ ܠܢܦܝܼ̈ܠܹܐ ܒܡܲܪ̈ܥܹܐ ܐܸܢ ܫܵܠܚܝܼ ܠܥܵܘܠܵܐ ܣܸܢܝܵܐ: ܘܠܲܒܼܫܝܼ ܓ̰ܘܼܠܹ̈ܐ ܕܦܘܼܚܵܠܵܐ. ܠܹܐ ܚܵܣܪܵܐ ܚܸܙܝܼܢܬܵ‌ܐ ܕܪ̈ܲܚܡܘܼܗܝ: ܐܸܢ ܗܵܘܝܵܐ ܕܛܲܠܒܝܼ ܒܲܥܝܵܢܹ̈ܐ. ܠܹܐ ܒܲܨܪܵܐ ܛܲܝܒܘܼܬܵܐ: ܐܸܢ ܦܵܝܫܝܼ ܡܘܼܟܫܸܛܹܐ ܚܲܛܵܝܹ̈ܐ܀ ܒܚܲܝܹ̈ܐ ܕܲܩܢܘܿܡܘܼܗܝ ܝَܡܝܼܠܹܗ: ܕܚܵܝܵܐ ܝَܘܸܢ ܒܹܐܡܵܪܵܐ ܝܼܠܹܗ ܐܲܠܵܗܵܐ ܕܠܹܐ ܒܲܣܡܵܠܝܼ ܒܡܵܘܬܵܘܟ̣ܘܿܢ. ܚܲܛܵܝܹ̈ܐ ܡܝܼܬܹ̈‌ܐ ܒܥܵܘܠܵܐ. ܕܥܘܿܪܘܼܢ ܠܟܸܣܠܝܼ ܘܚܙܵܝܡܘܼܢ ܘܛܥܘܿܡܘܼܢ ܕܛܵܒ̣ܬܵ‌ܐ ܝܼܠܵܗ̇ ܬܲܥܠܸܡܬ‌ܝܼ ܠܛܠܝܼܩܹ̈ܐ. ܕܐܵܦ ܩܸܫܝܘܼܬܵܐ ܕܗܹܡܸܙ̈ܡܵܢܝܼ: ܦܵܝܕܵܐ ܝܼܠܵܗ̇ ܠܗ̇ܘ ܕܫܲܡܥܹܠܵܗ̇܀ ܗܵܐ ܕܲܪ̈ܡܵܢܹܐ ܒܸܟܬܵܒܹ̈ܐ: ܕܟܹܐ ܒܲܣܡܝܼ ܓܵܢܵܐ ܘܗܲܕܵܡܹ̈ܐ. ܡܲܬܒܸܚܠܗَܘܿܢ ܥܲܠ ܠܲܟܹ̈ܐ ܕܚܝܼ̈ܵܠܲܢ ܘܗܲܕ̈ܵܡܲܢ. ܗܵܐ ܪ̈ܲܚܡܹܐ ܐܲܝܟܼ ܩܵܨܸܕܹ̈ܐ: ܦܠܝܼܛܹ̈ܐ ܝَܢܵܐ ܒܵܬَܪ ܓܵܢ̈ܵܬܲܢ. ܦܲܪܦܸܠܲܚ ܒܝܼـܝܵܗܝ ܕܣܵܙܓܸܪܝܼܠܲܢ: ܥܲܡ ܡܲܠܟܵܐ ܕܫܘܼܕܪܝܼܠܹܗ܀ ܗܵܐ ܚܘܼܒܹܗ ܕܒܵܒܵܐ ܕܪ̈ܲܚܡܹܐ: ܒܸܬ ܚܵܕܹܐ ܠܒܲܪܩܘܼܒ̣ܠ ܕܝܵܪܬܲܢ ܐܵܡܪܲܚ ܠܹܗ ܐܲܝܟܼ ܗ̇ܘ ܕܕܝܼܪܹܗ: ܕܚܛܝܼܠܲܢ ܐܸܠܘܼܟܼ ܠܵܐ ܪܵܦܸܬܠܲܢ. ܐܵܗܵܐ ܝܼܠܹܗ ܥܵܒ̣ܘܼܕܲܢ ܛܵܒ̣ܵܐ ܫܲܟܪܸܚܠܹܗ ܥܲܠ ܛܲܝܒܘܼܬܹܗ. ܐܵܗܵܐ ܝܼܠܹܗ ܡܵܪܲܢ ܒܲܣܝܼܡܵܐ: ܡܵܘܕܸܚܠܹܗ ܥܲܠ ܬܲܥܠܸܡܬܹܗ ܛܵܒ̣ܵܐ ܝܼܠܹܗ ܣܵܒܵܒ ܟܹܐ ܪܵܚܸܡ: ܘܒܲܣܝܼܡܵܐ ܝܼܠܹܗ ܣܵܒܵܒ ܟܹܐ ܡܓ̰ܲܢܓ̰ܸܪ. ܒܚܘܼܒܹܗ ܟܹܐ ܬܲܥܠܸܡ ܠܒܢܘܿܢܘܼ̈ܗܝ: ܕܠܵܐ ܗܵܘܝܼ ܐܸܠܹܗ ܢܘܼܟ̣ܪ̈ܵܝܹܐ. ܗ̇ܘ ܩܵܛܝܼܵܐ ܕܟܹܐ ܬܲܥܠܸܡ ܠܒܢܘܿܢܘܼ̈ܗܝ: ܦܵܝܕܵܐ ܟܹܐ ܡܲܙܝܸܕ ܠܒܢܘܿܢܘܼ̈ܗܝ. ܗ̇ܘ ܟܹܐ ܬܲܥܠܸܡ ܐܘܿܦ ܟܹܐ ܡܲܙܝܸܕ: ܝܘܼܬܪܵܢܵܐ ܠܒܢܲܝ̈ ܒܲܝܬܘܼܗܝ܀ ܠܹܐ ܐَܢܵܫܵܐ ܬܲܥܠܸܡ ܢܘܼܟܼܪ̈ܵܝܹܐ: ܩܵܐ ܝܘܼܬܪܵܢܵܐ ܕܢܘܼܟܼܪ̈ܵܝܹܐ. ܐَܢܵܫܵܐ ܠܹܐ ܡܲܚܦܸܠ ܡ̣ܢ ܐَܢܵܫܘܼܗܝ: ܟܲܕ ܚܵܪܸܒܼ ܘܠܵܐ ܢܵܓ̰ܘܼ ܒܝܼـܹܗ. ܐܲܠܵܗܵܐ ܟܹܐ ܬܲܥܠܸܡ ܩܵܐ ܕܩܵܢܹܐ: ܘܐܲܢَܬܿ ܒܸܟܪܵܒܵܐ ܝَܘܸܬܿ ܥܲܠ ܕܐܵܗܵܐ. ܛܵܒ̣ܵܐ ܟܹܐ ܬܲܥܠܸܡ ܕܥܵܒܸܕܠܘܼܟܼ ܚܲܟܝܼܡܵܐ. ܘܐܲܢَܬܿ ܡܛܲܪܛܘܼܡܹܐ ܝَܘܸܬܿ ܥܲܠ ܩܵܛܝܼܘܼܗܝ܀ ܟܹܐ ܢܵܓ̰ܘܼ ܕܡܲܙܝܸܕ ܛܵܒ̣ܬܵܐ: ܘܦܫܝܼܡܵܐ ܝَܘܸܬܿ ܥܲܠ ܥܘܼܕܪ̈ܵܢܘܼܗܝ. ܒܪܝܼܟ̣ܵܐ ܝَܠܹܗ ܕܝܘܼܗَܒܸܠܹܗ ܬܲܥܠܸܡܬܵܐ: ܘܡܘܼܬܒܼܵܐ ܠܹܗ ܩܵܬܲܢ ܐܲܝܟܼ ܢܵܘܪܵܐ. ܚܝܼܪܹܗ ܒܝܼܵܗ̇ ܟܸܢܫܲܢ ܘܬܘܼܡܸܙܵܐ ܠܹܗ ܓܵܢܹܗ: ܡ̣ܢ ܫܸܚܬܵ‌ܐ ܕܠܸܒܹܗ ܛܫܝܼܬܵ‌ܐ. ܚܝܼܪܹܗ ܒܝܼܵܗ̇ ܟܠ ܐَܢܵܫܵܐ ܘܫܦܝܼܪܹܗ: ܓܲܠܝܵܐܝܼܬ ܐܘܿܦ ܟܲܣܝܵܐܝܼܬ܀ ܚܲܙܝܼܢܵܐ ܛܫܝܼܬܵ‌ܐ ܒܲܫܡܲܝܵܐ: ܘܒܓܵܘ ܐܲܪܥܵܐ ܦܘܼܚܵܠܵܐ. ܝܵܗَܒܸܠ ܐَܢܵܫܵܐ ܬܸܫܒܘܿܚܬܵ‌ܐ: ܠܗ̇ܘ ܕܡܘܼܙܝܸܕܠܹܗ ܐܸܠܲܢ  ܚܲܙܝܼܢܵܐ. ܐܲܡܪܲܚ ܟܠܲܢ ܒܡܲܩܘܲܚܬܵ‌ܐ ܫܘܼܒܼܚܵܐ ܠܘܼܟܼ ܥܲܠ ܬܲܥܠܲܡܬܘܼܟܼ. ܘܡܲܙܝܸܕܲܚ ܘܐܲܡܪܲܚ ܒܚܘܼܝܵܕܵܐ: ܫܘܼܒ̣ܚܵܐ ܐܸܠܘܼܟܼ ܡ̣ܢ ܡܲܪܥܝܼܬܘܼܟܼ܀

ܡܕܪܫܐ.

     ܥܘܼܢܵܝܵܐ. ܒܥܵܘ ܒܲܥܵܝܹ̈ܐ ܘܠܵܐ ܬܸܫܠܘܿܢ: ܥܲܕܼ ܐܝܼܬ̣ ܐܲܬ̣ܪܵܐ ܠܒ̣ܵܥܘܼܬ̣ܵܐ. ܥܲܕܼ ܠܵܐ ܡܸܬ̇ܬ̇ܚܸܕܼ ܠܹܗ ܬܲܪܥܵܐ: ܘܟ̣ܵܠܹ̇ܐ ܓܲܙܹܗ ܝܵܗܘܿܒ̣ܵܐ.

     ܒܵܬܹ̈‌ܐ. ܐܸܢ ܩܵܪܹܝܬ̇ܘܿܢ ܒܲܚܢܲܓ̣ܬܼܵ‌ܐ: ܥܵܢܹ̇ܐ ܠܟ̣ܘܿܢ ܒܲܣܝܼܡܵܐܝܼܬܼ. ܘܐܸܢ ܫܵܐܠܝܼܬܿܘܼܢ ܒܲܬ̣ܘܵܬ̣ܵܐ: ܢܵܣܒ̇ܝܼܬ̇ܘܿܢ ܥܲܬ̇ܝܼܪܵܐܝܼܬ̣. ܥܲܬ̇ܝܼܪܵܐ ܘܲܡܠܸܐ ܪ̈ܲܚܡܹܐ: ܠܵܐ ܡܸܬ̣ܡܲܣܟܲܢ ܟܲܕܼ ܝܵܗܹ̇ܒܼ. ܓܲܙܹܗ ܗَܘ̣ ܕܲܚܢܵܢܵܐ: ܘܲܬ̣ܗܘܿܡܵܐ ܗَܘܼ ܡܠܸܐ ܚܵܘܣܵܢܵܐ‌܀ ܩܪܘܿܒ̣ܘ ܬܲܝܵـܒ̣ܹ̈ܐ ܫܐܲܠܘ ܪ̈ܲܚܡܹܐ: ܥܲܕܼ ܐܝܼܬ̣ ܐܲܬ̣ܪܵܐ ܠܲܬ̣ܘܵܬ̣ܵܐ. ܢܸܫܒܿܘܿܩ ܟܠܢܵܫ ܕܲܒ̣ܠܸܒܹܿܗ: ܘܢܸܫܐܲܠ ܪ̈ܲܚܡܹܐ ܘܲܚܢܵܢܵܐ. ܢܲܐܣܸܐ ܘܢܸܬ̣ܐܲܣܸܐ ܐܲܚܲܝ̈: ܕܢܸܗܘܸܐ ܚܠܝܼܡܹ̈ܐ ܠܲܥܒ̣ܵܕܵܐ. ܙܲܒ̣ܢܵܐ ܗَܘܼ ܓܹܝܪ ܕܲܬܝܵܒ̣ܘܼܬܼܵܐ: ܢܗܸܐ ܦܲܠܵܚܹ̈ܐ ܒܬܲܟ̣ܫܲܦ̮ܬܼܵ‌ܐ‌܀ ܗܵܐ ܪܵܗܹܛ̇ ܪܘܼܓ̣ܙܵܐ ܒܐܲܪܥܵܐ: ܢܲܩܸܠ ܪܲܗܛܹܗ ܬܲܝܵܒ̣ܵܐ. ܢܸܗܘܸܐ ܠܨܵܘܡܵܐ ܐܲܟܵܪܹ̈ܐ: ܙܲܪ̈ܥܹܐ ܕܐܵܬܹ̇ܝܢ ܚܲܕܼ ܒܲܡܵܐܐ. ܢܗܸܐ ܦܲܠܵܚܹ̈ܐ ܠܲܨܠܘܿܬܼܵܐ: ܓܦܸܬܵܐ ܕܚܲܡܪܵܗ̇ ܒܘܼܝܵܐܵܐ ܗَܘܼ. ܢܗܸܐ ܒܲܢܵܝܹ̈ܐ ܕܪܸ̈ܥܝܵܢܲܝܢ: ܢܵܘܣܹ̈ܐ ܕܚܵܫܚܝܼܢ ܠܐܲܠܵܗܵܐ‌܀

܀ܒܘܪ̈ܟܬ̣ܐ܀

     ܛܵܒ̣ܵܐ ܕܡܘܼܚܙܹܝܠܹܗ: ܚܘܼܒܹܗ ܓܘܼܪܵܐ ܒܒܪܵܝܬܵ‌ܐ ܕܐَܢܵܫܵܐ: ܡܓ̰ܵܘܸܒܝܼ ܐܹܝܢ ܡܵܪܝ. ܡܫܲܝܢܸܢ ܥܵܠܡܵܐ: ܚܒܝܼܛܵܐ ܘܫܓ̣ܝܼܫܵܐ ܒܥܵܘܠܵܐ ܕܐَܢܵܫܵܐ‌܀ ܘܐܵܡܪܝܼ ܐܵܡܹܝܢ. [ܘܗܵܕܟ̣ܵܐ ܡܓ̰ܵܘܸܒܝܼ ܒܟܠܵܝܗܝ ܦܸܬܓ̣ܵܡܹ̈ܐ].

     ܪܵܚܸܡ ܐَܢܵܫܵܐ: ܙܪܝܼܥ ܣܘܼܙܓܵܪܵܐ ܓܵܘ ܒܢܲܝܢ̈ܵܫܵܐ: ܩܵܐ ܕܠܵܐ ܫܵܓ̣ܫܝܼ: ܘܠܵܐ ܡܚܲܙܕܸܓܝܼ ܐَܢܵܫܵܐ ܒܐَܢܵܫܵܐ‌܀

     ܡܲܠܟܵܐ ܕܡܲܠܟܹ̈ܐ: ܕܝܘܼܗَܒܸܠܹܗ ܠܡܠܟܹ̈ܐ ܫܘܼܠܛܵܢ ܐَܢܵܫܵܐ: ܡܲܢܝܸܚ ܚܲܝܠܵܐ: ܕܠܸܒܵܐ ܕܡܲܠܟܹ̈ܐ ܥܲܠ ܒܢܲܝܢ̈ܵܫܵܐ‌܀

     ܒܲܛܸܠ ܦܠܵܫܹ̈ܐ: ܘܡܲܫܠܝܼ ܫܓܼܘܼܫܝܹ̈ܐ ܡ̣ܢ ܒܢܲܝܢ̈ܵܫܵܐ: ܕܠܵܐ ܩܲܫ̰ܕܸܪܝܼ ܕܸܫ̃ܡܸܢ ܕܐَܢܵܫܵܐ ܠܚܒ̣ܵܛܵܐ ܠܐَܢܵܫܹ̈ܐ‌܀

     ܠܥܹܕܬܘܼܟܼ ܡܲܩܝܸܡ: ܕܒܬܲܪܥܵܐ ܕܪ̈ܲܚܡܘܼܟܼ ܟܹܐ ܬܲܩܬܸܩܵܐ: ܕܠܵܐ ܦܵܝܫܵܐ ܓ̣ܠܝܼܒܬܵ‌ܐ: ܡ̣ܢ ܡܵܪܘܿܕܵܐ ܣܵܢܹܐ ܐَܢܵܫܵܐ‌܀

     ܠܝܵܠ̈ܕَܘܿܗ̇ ܐَܣܘܿܪܠَܘܿܢ: ܒܚܘܼܒܵܐ ܟܵܡܝܼܠ ܕܸܠܟܸܣ ܐَܢܵܫܹ̈ܐ: ܘܥܩܘܿܪ ܡ̣ܢ ܓܵܘܵܝܗܝ: ܚܣܵܡܵܐ ܘܦܸܠܡܵܐ ܘܣܢܵܝܬܵ‌ܐ ܕܐَܢܵܫܵܐ܀

     ܠܪܵܥܝܵܐ ܢܛܘܿܪܹܠَܗ: ܘܡܲܙܝܸܕ ܒܝܵܘܡܵܢܘܼ̈ܗܝ ܫܠܵܡܵܐ ܠܐَܢܵܫܹ̈ܐ: ܕܗܵܘܹܐ ܣܢܓܹܐܓܼܪܵܐ ܘܛܲܠܒܵܢܵܐ ܘܓܵܪܸܫ ܚܢܵܢܘܼܟܼ ܩܵܐ ܒܢܲܝܢ̈ܵܫܵܐ‌܀

     ܠܪ̈ܵܥܵܘܵܬܹܐ: ܕܡܘܼܩܝܸܡܠܹܗ ܪܸܡܙܘܼܟܼ ܕܡܲܪܥܝܼ ܠܐَܢܵܫܹ̈ܐ: ܡܗܲܝܸܪ ܘܣܢܘܿܕ ܠܗَܘܿܢ: ܩܵܐ ܕܒܚܲܕܘܼܬܵܐ ܬܲܓܒܸܪܝܼ ܠܐَܢܵܫܹ̈ܐ‌܀

      ܐܵܗܵܐ ܥܘܼܡܪܵܐ: ܕܓܵܘܗܹܗ ܟܹܐ ܦܵܐܸܫ ܡܫܘܼܒܚܵܐ ܫܸܡܘܼܟܼ: ܐܲܢَܬ ܡܚܵܡܝܼܠܹܗ: ܡ̣ܢ ܟܠ ܚܒ̣ܵܛܵܐ ܘܣܢܵܝܬܵ‌ܐ ܕܐَܢܵܫܵܐ‌܀

     ܐܲܠܵܗܵܐ ܕܟܠܵܐ: ܕܚܘܼܒܹܗ ܫܦܝܼܟܼܵܐ ܥܲܠ ܒܢܲܝܢ̈ܵܫܵܐ: ܢܛܘܿܪ ܠܪܹܫ ܥܘܼܡܪܵܐ: ܘܗܲܒَ̣ܠܹܗ ܚܲܝܠܵܐ ܕܩܵܐܸܡ ܒܪܹܫܵܐ‌܀

     ܠܟܵܗܢܹ̈ܐ ܡܲܨܦܝܼ: ܕܗܵܘܝܼ ܕܸܟ̣ܝܹ̈ܐ ܒܦܲܓܼܪܵܐ ܘܓܵܢܵܐ: ܩܲܒܸܠ ܕܸܒ̣ܚܲܝ̈ܗܝ: ܕܡܲܩܪܸܒ̣ܝܼܠܘܼܟܼ ܡܓܹܢَܒ ܒܢܲܝܢ̈ܵܫܵܐ‌܀

     ܐܵܦ ܠܡܫܲܡܫܵܢܹ̈ܐ: ܕܟܹܐ ܡܫܲܡܫܝܼܠܘܼܟܼ ܒܓܵܘ ܒܹܝܬ ܩܘܼܕܫܵܐ: ܡܩܲܕܸܫ ܐܸܠܵܝܗܝ: ܕܗܵܘܝܼ ܕܠܵܐ ܠܲܟܵܐ ܘܸܕܠܵܐ ܠܵܘܡܵܐ‌܀

     ܠܡܲܠܦܵܢܹ̈ܐ ܨܦܵܝ: ܡܲܟܡܸܠ ܒܣܘܼܟ̈ܵܠܹܐ ܬܪ̈ܝܼܨܹܐ ܕܢܝܼܫܵܐ: ܘܸܠܝܵܠܘܿܦܹ̈ܐ ܡܗܵܘܢܸܢ ܒܚܝܼܵܠ ܘܸܒܕܘܼܪܵܫܵܐ‌܀

     ܐܵܦ ܠܲܡܗܲܝܡܢܹ̈ܐ: ܚܬܝܼܡܹ̈ܐ ܒܪܘܼܫܡܵܐ ܕܨܠܝܼܒ̣ܘܼܟܼ ܡܩܘܼܕܫܵܐ: ܒܲܪܸܟܼ ܐܸܠܵܝܗܝ: ܕܦܵܐܸܫ ܡܩܘܼܕܫܵܐ ܫܸܡܘܼܟܼ ܩܲܕܝܼܫܵܐ‌܀

     ܐܵܦ ܠܐܵܡܪܵܢܵܐ: ܕܟܠܝܘܿܡ ܡܲܩܘܸܚ ܠܟܸܣܠܘܼܟܼ ܒܚܲܫܵܐ: ܣܲܚܒܸܪ ܒܪ̈ܲܡܘܼܟܼ ܘܠܵܐ ܡܣܵܦܹܝܬ ܠܹܗ ܒܐܝܼܕܹܗ ܕܒܝܼܫܵܐ‌܀

     ܐܵܦ ܠܡܘܼܠܝܸܨܹ̈ܐ: ܘܟܠܵܝܗܝ ܡܥܵܩܹ̈ܐ ܗܲܒَ̣ܠ ܡܲܢܝܲܚܬܵܐ: ܠܟܠܵܝܗܝ ܙܠܝܼܡܹ̈ܐ: ܓܼܵܠܝܼܒܘܼܬܵܐ ܘܪܹܫܵܐ ܪܵܡܵܐ‌܀

     ܠܟܠܵܝܗܝ ܛܠܝܼܩܹ̈ܐ: ܕܒܸܛܠܵܩܵܐ ܝَܢܵܐ ܒܐܘܼܪܚܵܐ ܦܟ̰ܝܼܠܬܵ‌ܐ: ܡܲܚܙܝܼ ܐܘܼܪܚܘܼܟܼ: ܗ݁ܝ ܕܸܠܚܲܝܹ̈ܐ ܗܕܝܼܪܹ̈ܐ ܠܵܒܠܵܐ‌܀

     ܘܠܐܵܢܝܼ ܕܐܵܙܠَܝܼ: ܥܲܠ ܗܹܒ̣ܝܼܘܼܟܼ ܒܝܵܡܵܐ ܘܒܸܪܙܵܐ: ܡܦܵܨܝܼ ܐܸܠܵܝܗܝ: ܡ̣ܢ ܟܠ ܛܠܵܩܵܐ ܘܡ̣ܢ ܙܲܗܡܲܬܹ̈‌ܐ‌܀

     ܫܡܝܼܥ ܐܵܦ ܒܪ̈ܲܚܡܘܼܟܼ: ܨܠܘܿܬܵܐ ܕܐܸܠܘܼܟܼ ܡܫܘܼܡܸܫܬܵܐ ܝَܠܵܗ݁: ܘܩܲܒܸܠ ܒܚܘܼܒܘܼܟܼ: ܐܵܦ ܒܵܥܘܼܬܵܐ ܕܐܸܠܘܼܟܼ ܦܪܝܼܫܬܵ‌ܐ‌܀

     ܘܚܲܝܠܘܼܟܼ ܗܵܘܹܐ: ܫܘܼܪܵܐ ܪܵܡܵܐ ܠܐܵܗܵܐ ܟܸܢܫܵܐ: ܕܓܲܪܓܸܡ ܦܘܼܡܲܢ: ܫܘܼܒ̣ܚܵܐ ܠܫܸܡܘܼܟܼ ܐܵܕܝܼܵܐ ܘܗܲܡܵܫܵܐ‌܀ ܫܲܝܢܵܐ ܓܘܼܪܵܐ: ܡܲܟܝܸܦ ܘܡܲܫܪܝܼ ܒܐܲܚܘܿܢܘܵܬܹ̈ܐ: ܕܠܵܐ ܗܵܘܹܐ ܣܪܝܼܩܵܐ: ܓܘܼܫܡܵܐ ܟܵܡܝܼܠ ܕܓ̰ܵܡܵܥܲܬܲܝܗܝ‌܀

     ܠܵܐ ܡܵܪܝ ܗܵܘܹܐ: ܟܦܘܼܪܝܵܐ ܘܡܲܩܪܵܨܘܼܬܵܐ ܓܵܘ ܐܲܚܘܿܢܘܵܬܹ̈ܐ: ܘܠܵܐ ܦܵܪܸܩ ܚܘܼܒܵܐ ܟܵܡܝܼܠ ܒܐܵܪܵܠܸܓ̣ـܲܝܗ‌ܝ‌܀ ܘܠܐܲܚܹ̈ܐ ܕܩܵܝܡܝܼ: ܒܦܘܼܠܚܵܢܵܐ ܕܓܵܘܵܐ ܒܚܲܦܵܛܘܼܬܵܐ: ܨܠܘܿܬܵܐ ܕܓܵܘܵܐ: ܢܵܛܪܵܐ ܩܵܬܵܝܗܝ ܡ̣ܢ ܟܠ ܓܸܕܫܹ̈ܐ‌܀

     ܠܐܲܚܹ̈ܐ ܕܦܠܸܛܠܗَܘܿܢ: ܒܐܘܼܪܚܵܐ ܕܓܵܘܵܐ ܡܣܵܒܵܒ ܕܟܠܲܝܗܝ: ܥܘܼܕܪܵܢ ܪ̈ܲܚܡܘܼܟܼ ܡܲܦܫܸܛ ܐܸܠܵܝܗܝ ܕܦܵܝܫܝܼ ܢܛܝܼܪܹ̈ܐ‌܀

     ܠܟܠܹܗ ܓܵܘܵܐ: ܟ̰ܲܟܘܼܟܼ ܚܲܪܕܝܼܠܹܗ ܐܲܝܟܼ ܫܘܼܪܵܐ ܪܵܡܵܐ: ܘܒܵܛܸܠ ܡܸܢܹܗ ܦܲܢܕܹ̈ܐ ܨܢܝܼܥܹ̈ܐ ܕܐܵܟܸܠܩܲܪܨܵܐ‌܀

     ܘܐܸܠܝܼ ܙܲܒܘܼܢ: ܕܡܘܼܩܪܸܒ̣ܠܝܼ ܗܹܡܸܙܡܵܢܹ̈ܐ ܡܓܹܢَܒ ܩܘܼܪ̈ܒܵܢܹܐ: ܡܩܲܒܸܠ ܐܸܠܵܝܗܝ: ܠܐܵܢَܝ ܛܥܘܿܢܝܵܬܹ̈ܐ ܕܡܘܼܩܪܸܒ̣ܠܹܗ ܪܹܝܓܘܼܟܼ‌܀

     ܐܵܦ ܠܟܵܬܘܿܒ̣ܵܐ: ܕܟܬܝܼܒ̣ܠܹܗ ܘܟܟ̰ܸܚܠܹܗ ܒܚܵܬܸܪ ܕܚܘܼܒܘܼܟܼ: ܦܪܥܝܼܠܹܗ ܗܵܩܵܐ: ܕܗܵܘܝܵܐ ܕܥܵܡܸܪ ܥܲܡ ܩܲܕܝܼܫ̈ܘܼܟܼ‌܀   

     ܘܥܲܠ ܐܵܡܪܵܢܵܐ: ܘܥܲܠ ܫܲܡܥܵܢܹ̈ܐ ܚܢܵܢܘܼܟܼ ܡܛܲܠܠܸܢ: ܘܡ̣ܢ ܦܘܼܡ ܟܠܲܢ: ܒܟܠ ܥܸܕܵܢܹ̈ܐ ܫܸܡܘܼܟܼ ܦܵܐܸܫ ܡܫܘܼܒܚܵܐ‌܀

     ܘܥܲܡ ܐܸܚܕܵܕܹܐ: ܡܲܣܩܲܚ ܫܘܼܒ̣ܚܵܐ ܠܚܲܕَ ܐܲܠܵܗܵܐ: ܕܪ̈ܲܚܡܘܼܗܝ ܗܵܘܝܼ: ܥܲܠ ܣܵܓ̣ܕܵܢܘܼ̈ܗܝ ܠܥܵܠܲܡ ܥܵܠܡܝܼܢ‌܀    ܩܲܕܝܼܫ ܒܐܲܪܥܵܐ: ܚܩܝܼܪܵܐ ܒܫܡܲܝܵܐ ܡܩܲܕܸܫ ܐَܢܵܫܹ̈ܐ: ܬܸܫܒܘܿܚܬܵ‌ܐ ܠܘܼܟܼ: ܡܟܠܵܝܗܝ ܦܘܼܡܹ̈ܐ ܐܵܡܹܝܢ ܘܐܵܡܹܝܢ‌܀

ܟܪܘܙܘܬ̣ܐ.

ܢܩܘܼܡ ܫܲܦܝܼܪ ܟܠܲܢ ܒܚܲܫܵܐ ܘܒܲܚܦܝܼܛܘܼܬܵܐ ܛܵܠܒܲܚ ܘܐܵܡܪܲܚ ܡܵܪܲܢ ܥܒ̣ܘܼܿܕ ܪ̈ܲܚܡܹܐ ܥܲܠܲܢ. ܘܓ̰ܲܘܸܒܝܼ: ܡܵܪܲܢ ܥܒ̣ܘܿܕ ܪ̈ܲܚܡܹܐ ܥܲܠܲܢ܀ ܐܲܠܵܗܵܐ ܐܝܼܬܝܵܐ ܕܡ̣ܢ ܥܵܠܲܡ. ܗܵܘ ܡ̣ܢ ܫܘܼܪܵܝܵܐ ܛܵܒ̣ܵܐ ܝَܠܹܗ ܘܡ̣ܢ ܛܵܒ̣ܘܼܬܹܗ ܠܹܐ ܦܵܐܹܫ ܫܘܼܚܠܸܦܵܐ. ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܗܵܘ ܕܓܠܹܐܠܹܗ ܥܲܩܸܠܕܵܪܘܼܬܵܐ ܕܚܲܝܠܹܗ. ܘܡܘܼܚܙܹܐܠܹܗ ܛܘܼܒ̣ܬܵܢܘܼܬܹܗ ܓܵܘ ܒܸܪ̈ܝܵܬܹ‌ܐ ܕܡܘܼܩܸܡܠܹܗ ܪܸܡܙܹܗ.  ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܗܵܘ̇ ܕܡܘܼܕܸܥܠܹܗ ܓܘܼܪܘܼܬܵܐ ܕܚܘܼܒܹܗ. ܒܦܪܝܼܫܘܼܬܵܐ ܒܪܵܝܬܹܗ ܕܟܝܵܢܲܢ ܕܒܫܸܡܵܐ ܕܨܲܠܡܵܐ ܕܐܝܼܩܵܪܹܗ‌‌.  ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܗܵܘ ܕܡܘܼܚܙܝܼܠܹܗ ܐَܟ̣ܵܠܬܵܐ ܕܚܲܡ ܒܫܵܦܲܚܬܵ‌ܐ ܕܪ̈ܲܚܡܘܼܗ‌ܝ ܒܦܸܠܚܵܢܵܐ ܕܵܝܸܡ. ܩܵܐ ܓܲܪܘܵܣܬܵܐ ܕܗܲܝܲܪܬܲܢ ܒܟܠ ܕܵܪ̈ܘܼܗ‌ܝ ܕܥܵܠܡܵܐ‌.  ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܗܵܘ ܕܡܘܼܫܦܸܟܼܠܹܗ ܦܸܪܝܘܼܬܵܐ ܕܛܲܝܒܘܼܬܹܗ ܒܐَܚܵܪܵܝܬܵ‌ܐ ܕܙܲܒܼܢܹ̈ܐ. ܒܓܸܠܝܵܢܵܐ ܕܝܲܠܕܵܐ ܚܩܝܼܪܵܐ ܕܡܸܢܹܗ. ܩܵܐ ܦܘܼܪܩܵܢܹܗ ܕܟܝܵܢܲܢ ܘܠܚܘܼܕܵܬܵܐ ܕܟܠ ܒܸܪ̈ܝܵܬܹ‌ܐ.  ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܗܵܘ ܕܩܘܼܕܸܫܠܹܗ ܠܟܝܵܢܲܢ ܒܫܵܪܵܝܬܵ‌ܐ ܩܲܕܝܼܫܬܵܐ ܕܫܩܸܠܹܗ ܡܸܢܲܢ. ܘܫܘܼܪܸܟܵܠܹܗ ܒܚܕܵܢܵܝܘܼܬܵܐ ܕܚܸܩܪܵܐ ܕܒܪܘܼܬܹܗ ܘܕܡܵܪܘܼܬܹܗ‌.  ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܗܵܘ ܕܓܪܸܫܠܹܗ ܨܲܠܡܵܐ ܕܛܘܼܠܩܵܢܲܢ ܘܕܦܘܼܢܵܝܲܢ. ܒܥܸܪܒܵܐ ܛܠܝܼܩܵܐ ܘܒܒܪܘܿܢܵܐ ܛܠܝܼܩܵܐ ܕܦܝܼܫܠܹܗ ܡܘܼܫَܟ̰ܚܵܐ ܘܚܝܼܠܹܗ.  ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܗܵܘ ܕܒܘܼܗܪܸܢܹܗ ܫܪܵܓَ̣ܝܵܐ ܕܩܢܘܿܡܵܐ ܕܐَܢܵܫܘܼܬܹܗ. ܒܠܵܘ̈ܓ̰ܹܐ ܚܩܝܼܪܹ̈ܐ ܕܩܢܘܿܡܵܐ ܕܐܲܠܵܗܘܼܬܹܗ. ܘܒܥܹܐܠܹܗ ܒܝܼܲܕ ܙܘܼܙܵܐ ܛܠܝܼܩܵܐ ܠܨܲܠܡܲܢ ܕܛܠܸܩܠܹܗ ܓܵܘ ܥܲܦܪܵܗ̇ ܕܒܪܝܼܬܵܐ. ܘܒܡܵܫَܟ̰ܲܚܬܹܗ ܡܘܼܚܕܹܐܠܹܗ ܠܡܲܠܲܐܟ̣ܘ̈ܗ‌ܝ.  ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܗܵܘ ܕܩܵܡ ܩܵܪܹܐܠܲܢ ܒܒܲܣܝܼܡܘܼܬܹܗ. ܘܩܵܡ ܥܵܒ̣ܸܕܠܲܢ ܚܲܦܛܵܢܹ̈ܐ ܠܡܲܩܪܘܼܒ̣ܹܐ ܒܟܠ ܥܕܵܢܵܐ ܡܲܛ̈ܠܵܒܲܢ ܩܵܕَܡܘܼܗ‌ܝ. ܒܦܘܼܢܵܝܵܐ ܢܝܼܫܵܐ  ܕܣܦܲܪܬܲܢ ܐܲܝܟܼ ܛܵܒܼܘܼܬܹܗ ܕܠܹܐ ܡܕܲܡܝܵܐ.  ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܗܵܘ ܕܫܒܼܸܩܠܹܗ ܐܸܠܲܢ ܕܠܵܐ ܫܠܵܝܬܵܐ ܕܩܵܪܲܚ ܠܹܗ ܘܒܸܬ ܓ̰ܵܘܸܒܠܲܢ. ܐܝܼܢܵܐ ܒܘܼܫ ܙܵܘܕܵܐ ܒܟܠ ܥܸܕܵܢܹ̈ܐ‌ ܕܣܢܝܼܩܘܼܬܲܢ.  ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܐܲܩܸܦ. ܫܡܸܥ ܒܵܥܘܼܬܲܢ ܘܪܲܚܸܡ ܥܲܠܲܢ. ܘܓ̰ܲܘܸܒܝܼ: ܫܡܸܥ ܒܵܥܘܼܬܲܢ ܘܪܲܚܸܡ ܥܲܠܲܢ. ܘܡܲܩܸܦ. ܛܵܒ̣ܵܐ ܡܫܘܼܪܵܝܵܐ ܪܲܚܸܡ ܥܲܠܲܢ‌܀ ܚܩܝܼܪܵܐ ܒܐܝܼܬܘܼܬܹܗ ܪܲܚܸܡ ܥܲܠܲܢ‌܀ ܒܲܪܝܵܢܵܐ ܕܒܪܝܼܬܵ‌ܐ‌܀ ܩܲܕܝܼܫܵܐ ܝَܠܹܗ ܒܟܝܵܢܹܗ‌܀ ܒܲܪܝܵܢܵܐ ܕܟܠܵܐ‌܀ ܡܝܲܩܪܵܢܵܐ ܕܓܸܢܣܲܢ‌܀ ܒܲܣܡܵܐ ܠܹܗ ܒܚܲܝ̈ܝܲܢ‌܀ ܐܲܢَܬܿ ܗܲܝܸܪܵܢܲܢ‌܀ ܐܲܢَܬܿ ܐܵܟ̣ܠܵܢܵܐ ܕܚܲܡܲܢ‌܀ ܐܲܢَܬܿ ܚܲܢܵܢܵܐ‌܀ ܓܲܫܸܩ ܥܲܠܲܢ‌܀ ܐܲܢَܬܿ ܗܲܝܸܪܵܢܲܢ‌܀ ܬܵܐ ܠܗܲܝܲܪܬܲܢ‌܀ ܘܡܲܩܸܦ. ܫܡܸܥ ܒܩ̈ܵܠܲܢ ܘܪܲܚܸܡ ܥܲܠܲܢ.  ܘܓ̰ܲܘܸܒܝܼ. ܡܵܪܲܢ ܪܲܚܸܡ ܥܲܠܲܢ. ܘܡܲܩܸܦ. ܥܲܠ ܫܲܝܢܵܐ ܘܐܵܘܝܘܼܬܵܐ ܘܣܢܵܕܬܵܐ ܕܟܠܹܗ ܥܵܠܡܵܐ ܘܕܟܠܵܝܗ‌ܝ ܥܹܕܵܬܹ̈ܐ.  ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܥܲܠ ܐܲܬܪܲܢ ܘܥܲܠ ܟܠ ܐܲܬܪ̈ܵܘܵܬܹܐ. ܘܥܲܠ ܐܵܢܝܼ ܕܒܗܲܝܡܵܢܘܼܬܵܐ ܒܸܚܵܝܵܐ ܝَܢܵܐ ܒܝܼܵܝܗ‌ܝ‌.  ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܥܲܠ ܡܘܼܙܵܓ̣ܹ̈ܗ ܕܗܵܘܵܐ. ܘܦܸܪܝܘܼܬܵܐ ܕܫܲܢَܬܵܐ. ܘܡܲܗܨܘܼܠܹ̈ܐ ܕܛܥܘܿܢܝܵܬܹ̈‌ܐ. ܘܥܲܠ ܬܘܼܪܵܨܵܐ ܕܟܠܹܗ ܥܵܠܡܵܐ.  ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܥܲܠ ܚܘܼܠܡܵܢܵܐ ܕܐܲܒ̣ܵܗܵܬ̈ܲܢ ܩܲܕܝܼܫܹ̈ܐ: ܡܵܪܝ ܦܠ݁ܢ ܩܵܬ̣ܘܿܠܝܼܩܵܐ ܦܵܛܲܪܝܵܪܟܵܐ. ܘܡܵܪܝ ܦܵܠ݁ܢ ܡܝܼܛܪܵܦܘܿܠܹܝܛܵܐ [ܐܵܘ ܐܲܦܸܣܩܘܿܦܵܐ]: ܘܥܲܠ ܟܠܵܝܗܝ ܒܢܲܝ̈ ܚܸܠܡܲܬܵܝܗܝ.  ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܐܲܠܵܗܵܐ ܡܪܲܚܡܵܢܵܐ: ܗ݁ܘ ܕܒܪ̈ܲܚܡܹܐ ܟܹܐ ܬܲܓܒܸܪ ܠܟܠ. ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܗܵܘ ܕܒܸܫܡܲܝܵܐ ܒܦܝܵܫܵܐ ܝَܠܹܗ ܚܩܝܼܪܵܐ ܘܒܐܲܪܥܵܐ ܦܝܵܫܵܐ ܝَܠܹܗ ܣܓ̣ܝܼܕܵܐ.  ܒܸܛܠܵܒܵܐ ܝَܘܲܚ ܡܸܢܘܼܟܼ‌‌‌܀ ܦܪܘܿܩ ܠܟܠܲܢ ܡܫܝܼܚܵܐ ܡܵܪܲܢ ܒܛܲܝܒܘܼܬܘܼܟܼ. ܘܡܲܙܝܸܕ ܥܲܡܲܢ ܫܲܝܢܘܼܟܼ ܘܫܠܵܡܘܼܟܼ ܘܪܲܚܸܡ ܥܲܠܲܢ‌‌܀

ܩܪܝܢܐ؛ ܐ

ܡܘܬܒ̣ܐ؛ ܒ.

     ܡܲܟܠܝܼ ܡܵܪܝܼ ܚܲܕَܟ̰ܵܐ ܟܹܐܢܘܼܬܘܼܟܼ. (ܬܢܝܼ): ܩܵܐ ܕܒܛܲܝܒܘܼܬܘܼܟܼ ܡܓܲܪܘܸܣܲܚ. ܟܲܕ ܙܲܪܒܵܢܬܵ‌ܐ ܝَܠܵܗ̇ ܟܹܐܢܘܼܬܘܼܟܼ: ܛܲܝܒܘܼܬܘܼܟܼ ܒܲܣܝܼܡܬܵ‌ܐ ܝَܠܵܗ̇ ܐܸܠܲܢ. ܩܸܫܝܵܐ ܝَܠܹܗ ܡܵܪܝܼ ܠܙܲܒܘܼܢܘܼܬܲܢ: ܕܛܲܥܡܵܐ ܘܙܲܪܒܵܐ ܕܟܹܐܢܘܼܬܘܼܟܼ. ܥܘܼܕܪ̈ܵܢܹܐ ܕܛܲܝܒܘܼܬܘܼܟܼ: ܟܹܐ ܚܵܫܚܝܼ ܠܵܗ̇ ܠܙܲܒܘܼܢܘܼܬܲܢ. ܡܲܟܠܝܼܠܹܗ ܡܵܪܝܼ ܟܲܪܒܘܼܟܼ ܡ̣ܢ ܚܲܛܵܝܹ̈ܐ: ܕܡܘܼܡܟܸܢ ܗܵܘܝܼ ܬܲܝܵܒܹ̈ܐ. ܗܲܒَܼܠܵܗ̇ ܡܘܼܗܠܲܬ ܚܹܐܪܘܼܬܲܢ: ܕܫܲܠܚܵܐ ܠܗَܘܿܢ ܡܸܢܘܼܗ̇ ܫܘܓَܼܠܵܢ̈ܘܿܗ݁ ܣܸܢܝܹ̈ܐ. ܚܘܼܠܵܐ ܡܵܪܝ ܬܵܙܵܐ: ܒܸܠܝܵܦܵܐ ܝَܘܸܬ ܕܵܐܟ̣ܝܼ ܝܑܼܘܲܚ. ܦܸܪܣܲܬ ܐܸܠܲܢ ܒܝܼܵܗܒ̣ܘܿܗ݁ ܝَܘܸܬ: ܕܦܲܪܡܲܚ ܟܡܵܐ ܥܒܸܕܠܘܼܟܼ ܚܢܵܢܵܐ ܥܲܡܲܢ. ܠܟܠܹܗ ܥܵܘܠܲܢ ܟܹܐ ܝܲܕܥܸܬ: ܘܠܚܲܕَܟ̰ܵܐ ܡܸܢܹܗ ܟܹܐ ܫܵܩܠܸܬ ܬܘܼܥܠܵܐ. ܟܲܕ ܝܵܕܥܵܢܵܐ ܝَܘܸܬ ܠܹܐ ܒܵܣܡܵܐ ܠܘܼܟܼ: ܕܒܟܠܹܗ ܥܵܘܠܲܢ ܚܲܒܪܸܬ. ܚܘܼܫ ܠܵܐ ܙܵܘܕܵܐ ܡܲܢܟܸܣ ܚܘܼܒܘܼܟܼ: ܕܠܵܐ ܦܵܐܸܫ ܓܘܼܢܵܗܟܲܪ ܚܲܛܵܝܵܐ. ܠܟܲܪܒܵܐ ܬܩܝܼܠܹܗ ܪܸܙܵܝܘܼܟܼ: ܡܘܼܙܝܸܕܠܹܗ ܘܡܘܼܒܨܸܪܹܗ ܐܲܝܟܼ ܕܒܣܝܼܡܠܵܐ ܠܹܗ. ܡܵܘܬܵܢܹ̈ܐ ܐܲܝܟܼ ܩܵܨܸܕܹ̈ܐ: ܦܝܼܫܠܗَܘܿܢ ܡܫܘܼܕܪܹܐ ܠܐܲܝܟܵܐ ܕܦܝܼܫܠܗَܘܿܢ ܦܩܝܼܕ̈ܐ. ܠܙܝܼܘܼܪܹ̈ܐ ܦܩܝܼܕܠܹܗ ܪܸܙܵܝܘܼܟܼ: ܕܒܐܲܝܢܝܼ ܦܲܓ̣ܪܵܐ ܗܵܘܝܼ. ܦܠܝܼܛܠܗَܘܿܢ ܡܲܫܪܹ̈ܐ ܥܲܠ ܗܲܕܵܡܹ̈ܐ: ܚܲܕَ ܒܚܲܕَ ܒܕܘܼܟܬܵܐ ܕܦܝܼܫܠܗَܘܿܢ ܦܩܝܼܕܹ̈ܐ. ܐܝܼܬ ܕܩܛܸܠܗَܘܿܢ ܐܲܝܟܼ ܪܸܙܵܝܘܼܟܼ: ܘܐܝܼܬ ܕܡܘܼܚܹܐ ܠܹܗ ܦܘܼܩܕܵܢܘܼܟܼ. ܐَܫܵܬܵ‌ܐ ܒܬܵܗܵܪܹ̈ܐ ܕܟܝܘܼ̈ܠܹܐ: ܦܝܵܫܵܐ ܝَܠܵܗ̇ ܦܠܝܼܛܬܵ‌ܐ ܡ̣ܢ ܓܵܘ ܦܲܓ̣ܪܹ̈ܐ. ܡܲܙܝܲܕܬܵܐ ܘܡܲܒܨܲܪܬܵܐ ܕܦܘܼܩܕܵܢܘܼܟܼ ܝܼܠܵܗ̇: ܕܝܵܗَܒܸܬ ܥܘܼܕܪܵܢܵܐ. ܐܸܢ ܒܲܥܝܸܬ ܒܝܲܕ ܝَܕܵܥܬܵ‌ܐ ܡܲܟ̰ܡܝܼܠܹܗ: ܠܢܘܼܪܵܐ ܛܸܫܝܵܐ ܕܓܵܘܲܢ. ܘܕܵܐܟ̣ܝܼ ܕܡܸܢَܕܪܸܫَ ܐܸܢ ܒܲܥܝܹܐ: ܒܪܸܡܙܵܐ ܛܸܫܝܵܐ ܡܲܠܗܝܼܠܹܗ. ܐܲܢܹܐ ܕܥܒ̣ܝܼܕܠܹܗ ܘܒܸܥܒ̣ܵܕܵܐ ܝَܠܹܗ: ܩܵܐ ܕܡܲܚܙܝܼܠܲܢ ܬܵܗܵܪ̈ܘܼܗܝ܀ ܕܠܲܝܬ ܠܗَܘܿܢ ܫܘܼܠܛܵܢܵܐ ܒܸܪ̈ܝܵܬܹ‌ܐ: ܩܵܐ ܕܬܲܓܒܸܪܝܼ ܠܒܢܲܝ̈ܢܵܫܵܐ. ܠܒܲܪܢܵܫܵܐ ܝܘܼܗَܒܸܠܹܗ ܫܘܼܠܛܵܢܵܐ: ܕܡܲܟܠܝܼܠܗَܘܿܢ ܒܲܨܠܘܿܬܵܐ. ܒܟܲܪܒܵܐ ܙܥܘܿܪܵܐ ܟܹܐ ܦܵܐܸܫ ܡܘܼܪܓܸܕܵܐ: ܕܦܵܐܸܫ ܡܦܘܼܨܝܵܐ ܡ̣ܢ ܕܗ̇ܘ ܚܲܝܠܵܢܵܐ. ܒܐܵܗܵܐ ܬܲܥܠܸܡܬܵ‌ܐ ܕܗَܘܹܐ ܠܵܗ̇: ܝܵܠܦܲܚ ܛܲܝܒܘܼܬܵܐ ܕܗܘܹܐܠܵܗ̇܀ ܪܵܒܵܐ ܝܘܼܗَܒܸܠܵܗ̇ ܫܵܦܵܩܲܬܘܼܟܼ: ܚܲܕَܟ̰ܵܐ ܫܩܝܼܠܵܗ̇ ܟܹܐܢܘܼܬܘܼܟܼ. ܡܲܗܨܘܼܠ ܕܦܝܼܫܠܵܗ̇ ܦܵܝܫܵܐ ܡܒܘܼܪܸܟ̣ܬܵܐ. ܕܫܵܩܸܠ ܠܸܒܵܐ ܒܝܼܵܗ̇ ܥܲܠ ܟܠ ܕܬܘܼܠܸܩܠܹܗ. ܡܠܝܼ ܠܗَܘܿܢ ܝܵܐ ܡܵܪܝܼ ܥܲܢܒܵܪܹ̈ܐ ܕܐܲܟܵܪܵܐ: ܕܣܦܝܼܩܠܗܘܿܢ ܐܝܼܡܲܢ ܕܙܪܸܥܠܹܗ. ܕܡܘܼܕܝܸܢܹܗ ܘܙܪܝܼܥܠܹܗ ܝܲܗَܒ̣ܵܐ ܠܹܗ: ܚܲܩܠܹܗ ܙܵܘܕܘܼܢܝܵܐ ܘܦܵܝܕܵܐ܀ ܐَܟ̣ܝܼܠܹܗ ܥܲܬܝܼܩܵܐ ܟܲܕ ܙܪܝܼܥܠܹܗ: ܐܵܟܸܠ ܚܲܕܬܵܐ ܐܝܼܡܲܢ ܕܓ̰ܘܼܡܸܥܠܹܗ. ܚܵܕܹܐ ܠܸܒܵܗ̇ ܕܐܲܪܡܸܠܬܵ‌ܐ: ܕܣܒܸܥܬܵ‌ܐ ܝܘܼܗَܒܸܠܵܗ̇ ܠܸܒܵܐ ܠܟܦܝܼܢܘܼܬܵܗ̇. ܠܝܵܬܘܿܡܹ̈ܐ ܙܵܝܕܵܐ ܬܲܓܒܸܪܬܵܐ: ܘܠܡܸܣܟܹܢܵܐ ܗܲܝܸܪܬܵܐ ܕܪܸܙܩܵܐ. ܡܵܢܫܝܼܠܲܢ ܝܵܐ ܡܵܪܝܼ ܒܟܵܪܵܡܘܼܟܼ ܥܵܩܵܬܹ̈‌ܐ ܕܒܠܝܼܠܲܢ ܒܓܵܘܲܝ̈ـܗܝ܀ ܡܲܥܒܸܪ ܡܸܢܲܢ ܐܘܿܦ ܒܲܗܣܹ̈ܐ: ܡܲܪܝܼܪܹ̈ܐ ܕܫܡܸܥܠܗَܘܿܢ ܢܵܬ̈ܝܵܬܲܢ. ܒܘܼܫ ܙܵܘܕܵܐ ܒܵܛܸܠ ܒܪ̈ܲܚܡܘܼܟܼ: ܫܝܲܥܫܹ̈ܐ ܕܚܙܹܐܠܗَܘܿܢ ܥܲܝ̈ܢܲܢ. ܚܙܵܝܬܵ‌ܐ ܠܥܲܝܢܹ̈ܐ ܗܵܘܝܵܐ ܨܦܝܼܬܵ‌ܐ: ܘܫܡܸܥܬܵ‌ܐ ܠܢܵܬܝܵܬܹ̈‌ܐ ܝܘܼܗَܒܸܠܬܵ‌ܐ. ܠܦܘܼܡܵܐ ܡܲܙܝܸܕ ܒܘܼܣܵܡܵܐ: ܕܙܵܘܕܵܐ ܝܵܗَܒܸܠ ܫܵܟܵܪܬܵܐ܀ ܐܝܼܕܵܐ ܕܓ̰ܵܡܥܝܼܵܐ ܡܲܗܨܘܼ̈ܠܹܐ ܕܡܸܢܲܝܗܝ ܥܲܒ̣ܕܝܼ ܐܸܪ̈ܘܵܢܹܐ. ܡܬܵܪܸܨ ܐܲܪܥܵܐ ܠܚܲܕܪ̈ܵܢܹܐ: ܕܐܵܬܝܼ ܠܒܲܝܬܘܼܟܼ ܒܦܸܨܚܵܐ. ܡ̣ܢ ܕܟܲܪܒܵܐ ܓ̰ܡܸܥܝܼܠܲܢ. ܒܫܹܝܢܵܐ ܠܒܲܝܬܘܼܟܼ ܓ̰ܲܡܥܲܚ. ܗ̇‌ܝ ܕܫܝܲܥܫܵܐ ܕܚܲܝܠܵܐ ܝَܠܵܗ̇: ܘܗ̇‌ܝ ܕܫܲܝܢܵܐ ܕܚܹܐܪܘܼܬܲܢ ܝܼܠܵܗ̇ ܟܠܹܗ ܓܘܼܫܡܵܐ ܚܘܼܫ ܕܦܵܐܸܫ ܡܒܘܼܪܟ̣ܵܐ: ܕܡܵܘܕܝܼܠܘܼܟܼ ܥܲܡ ܗܲܕܵܡܘܼ̈ܗܝ. ܟܠܵܗ̇ ܒܪܝܼܬܵ‌ܐ ܚܘܼܫ ܕܦܵܝܫܵܐ ܡܣܘܼܙܓܸܪܬܵܐ: ܕܫܲܟܪܝܼܠܘܼܟܼ ܥܲܡ ܥܲܡܪ̈ܵܢܘܿܗ̇. ܠܥܵܠܡܵܐ ܚܘܼܫ ܡܲܚܸܒܵܐ ܛܲܝܒܘܼܬܘܼܟܼ: ܐܲܝܟܼ ܕܒܪܝܼܠܘܼܟܼ ܡ̣ܢ ܫܘܼܪܵܝܵܐ. ܫܘܼܪܵܐ ܕܥܘܼܡܪܲܢ ܢܛܘܼܪܹܗ ܝܵܐ ܡܵܪܝܼ: ܕܓܵܘܹܗ ܗܵܘܝܵܐ ܚܸܠܡܲܬܘܼܟܼ܀ ܗܘܝܼ ܢܵܛܘܿܪܵܐ ܕܠܹܐ ܕܵܡܸـܟܼ: ܠܒܲܝܬܵܐ ܕܥܸܪ̈ܒܘܼܟܼ ܫܸܪ̈ܝܹܐ ܝَܢܵܐ ܒܝܼـܹܗ. ܪ̈ܲܚܡܘܼܟܼ ܢܵܛܪܝܼ ܒܟܵܡܝܼܠܘܼܬܵܐ: ܠܒܹܝܬ ܩܘܼܕܫܵܐ ܘܠܲܡܫܲܡܫܵܢܘܼ̈ܗܝ. ܟܲܪܒܵܐ ܒܩܘܼܕܫܵܐ ܠܵܐ ܡܗܵܟܸܡ: ܕܡܸܢܹܗ ܟܹܐ ܦܵܠܸܛ ܦܘܼܪܩܵܢܵܐ. ܠܵܐ ܡܲܚܪܸܒܸܬܿ ܡܣܵܒܵܒ ܥܵܘܠܲܢ: ܠܒܲܝܬܵ‌ܐ ܕܒܸܢܝܵܐ ܝܼܠܹܗ ܠܐܝܼܩܵܪܘܼܟܼ܀ ܓܵܘ ܒܹܝܬ ܩܘܼܕܫܵܐ ܒܟ̣ـܹܐܠܹܗ ܚܹܙܲܩܝܵܐ: ܘܦܠܝܼܛܠܹܗ ܡܸܢܹܗ ܦܘܼܪܩܵܢܵܐ. ܐܸܢ ܚܲܕَ ܕܒܟ̣ـܹܐܠܹܗ ܗܵܘܹܐ ܠܹܗ ܓ̣ܵܠܒܵܢܵܐ: ܒܲܣ ܟܡܵܐ ܝܵܐ ܪܲܒ ܐܸܢ ܒܵܟ̣ܝܼ ܪ̈ܵܒܹܐ. ܝܵܐ ܕܚܙܹܐܠܹܗ ܕܸܡܥܹ̈ܐ ܕܥܲܝܢܹ̈ܐ ܕܡܲܠܟܹ̈ܐ: ܫܡܝܼܥ ܠܩܵܠܵܐ ܕܪܹܫܵܐ ܕܡܲܪܥܝܼܬܲܢ. ܩܘܼܕܫܵܐ ܒܨܵܘܡܵܐ ܟܹܐ ܗܵܘܹܐ ܓ̣ܵܠܒܵܢܵܐ: ܐܵܦ ܟܵܗܢܘܼܬܵܐ ܒܲܨܠܘܿܬܵܐ܀ ܠܵܐ ܚܘܼܫ ܟܲܪܒܘܼܟܼ ܡܲܫܥܸܫܠܗَܘܿܢ ܡܲܢ̈ܙܝܼܠܹܐ: ܕܓܵܘܵܝܗ̈‌ܝ ܡܨܘܼܠܹܐܠܗَܘܿܢ ܩܲܕܝܼܫܹ̈ܐ. ܘܠܵܐ ܚܘܼܫ ܪܵܓܕܝܼ ܐܘܿܦ ܐܸܣܛܘܿܢܹ̈ܐ: ܕܠܵܐ ܬܵܠܚܝܼ ܒܸܢܝܵـܢܹ̈ܐ. ܘܡܲܫܪܝܼ ܫܲܝܢܘܼܟܼ ܒܕܵܪ̈ܵܬܹܐ: ܕܐܸܪ̈ܘܵܢܹܐ ܒܓܵܘܲܝܗܝ ܦܝܼܫܠܗَܘܿܢ ܡܦܘܼܠܓَܝܹ̈ܐ. ܡܠܝܼ ܣܒܸܥܬܵܐ ܥܲܠ ܦܵܬܘܿܪܹ̈ܐ: ܕܡܲܒܣܸܡܝܼ ܒܝܼـܲܝܗܝ ܡܸܣܟܹܢܹ̈ܐ܀ ܫܲܝܢܵܐ ܒܓܵܘ ܒܲܝܬܵ‌ܐ ܬܲܦܸܩ ܒܝܼܲܢ: ܘܫܠܵܡܵܐ ܠܒܲܕܲܪ ܡ̣ܢ ܒܲܝܬܵܐ. ܨܠܝܼܒ̣ܵܐ ܛܸܫܝܵܐ ܠܥܹܕܵܬܹ̈ܐ: ܢܵܛܸܪ ܠܐܲܪܒܲܥܦܸܢܝܵܬܹ̈‌ܐ. ܬܲܪ̈ܥܵܢܹܐ ܕܥܘܼܡܪ̈ܵܢܹܐ ܗܵܘܝܼ ܠܲܢ: ܡܲܒܘܼܥܹ̈ܐ ܕܟܠ ܚܵܕܘܼܝܵܬܹ̈‌ܐ. ܐܲܢܹܐ ܘܐܲܝܟܼ ܐܲܢܹܐ ܗܲܒَ̣ܠܲܢ: ܛܵܒ̣ܵܐ ܕܡ̣ܢ ܩܵܕَܡܵܝܬܵ‌ܐ ܠܵܐ ܡܘܼܚܦܸܠܹܗ܀ ܠܵܐ ܗܵܘܹܐ ܫܝܲܥܫܵܐ ܕܡܘܼܡܟܸܢ: ܒܸܬ ܗܵܘܹܐ ܒܝܼـܹܗ ܐܵܦ ܒܘܼܠܒܵܠܵܐ. ܠܵܐ ܐَܢܵܫܵܐ ܗܵܘܹܐ ܒܸܒܥܵܝܵܐ ܠܚܲܒ̣ܪܘܼܗܝ: ܒܥܸܕܵܢܵܐ ܕܙܕܥܘܼܬܵܐ. ܠܐܵܢܝܼ ܕܪܸܚܩܵܐ ܝَܢܵܐ ܘܩܘܼܪܒܵܐ: ܗܲܒَ̣ܠ ܡܵܪܝܼ ܫܲܝܢܵܐ ܝܵܪܝܼܟ̣ܵܐ. ܥܲܠ ܪ̈ܲܚܝܼܩܹܐ ܘܩܲܪ̈ܝܼܒܹܐ: ܕܗܵܘܝܼ ܡܵܪܹܐ ܐܸܗܬܘܼܒܲܪ ܘܫܸܠܝܵܐ܀ ܠܵܐ ܡܲܚܙܸܬ ܢܝܼܫܲܢܩܵܐ ܕܟܲܪܒܵܐ: ܩܵܐ ܕܟܠ ܐَܢܵܫܵܐ ܗܵܘܹܐ ܒܸܒܥܵܝܵܐ ܠܚܲܒ̣ܪܹܗ. ܟܠ ܐܝܼܡܲܢ ܕܟܹܐ ܗܵܘܹܐ ܟܲܪܒܵܐ: ܠܚܲܒ̣ܪܹܗ ܟܹܐ ܒܵܥܝܹܐ ܟܠ ܐَܢܵܫܵܐ. ܗܲܒَ̣ܠܲܢ ܡܵܪܝܼ ܕܐܲܚܟ̰ܝܼ ܐܸܠܘܼܟܼ: ܒܲܥܝܲܚ ܒܥܸܕܵܢܵܐ ܕܫܲܝܢܵܐ ܘܟܲܪܒܵܐ. ܐܵܦ ܐܲܢَܬܿ ܛܵܒ̣ܵܐ ܘܒܲܣܝܼܡܵܐ: ܡܛܲܥܘܝܼ ܘܡܵܫَܟ̰ܸܚ ܠܛܠܝܼܩܘܼܬܲܢ܀ ܠܵܐ ܡܛܲܥܘܸܬ ܒܵܬَܪܲܢ ܒܡܲܙܕܸܥܬܵ‌ܐ: ܪ̈ܲܚܡܹܐ ܟܹܐ ܚܵܫܚܝܼ ܠܛܠܝܼܩܹ̈ܐ. ܠܹܐ ܝܗَܘܵܐ ܒܟܲܪܒܵܐ ܡܘܼܫَܟ̰ܸܚܠܘܼܟܼ: ܠܗ̇ܘ ܥܸܪܒܵܐ ܕܕܝܼܪܹܗ ܒܪ̈ܲܚܡܘܼܟܼ. ܡܒܵܕܵܠ ܓܲܦܹ̈ܐ ܕܟܹܐܢܘܼܬܘܼܟܼ: ܦܝܼܫܠܹܗ ܡܙܘܼܝܸܚܵܐ ܥܲܠ ܕܪ̈ܲܥܢܵܢܘܼܟܼ. ܒܦܹܐܪܵܐ ܚܵܝܵܐ ܕܐܲܠܵܗܵܐ: ܕܝܼܪܹܗ ܥܸܪܒܵܐ ܛܠܝܼܩܵܐ܀ ܨܠܹܐܠܹܗ ܦܹܐܪܵܐ ܚܵܝܵܐ ܘܓܥܹܐܠܹܗ [ܦܘܼܦܹܐܠܹܗ]: ܘܫܡܸܥܠܗَܘܿܢ ܩܵܠܘܼܗܝ ܥܸܪ̈ܒܹܐ ܘܕܥܸܪܘܼܢ. ܦܹܐܪܹܗ ܕܐܲܠܵܗܵܐ ܩܲܡ ܥܵܒܸܕܠܹܗ: ܠܗ̇ܘ ܦܹܐܪܵܐ ܦܸܣܩܵܐ ܓܘܼܪܵܐ. ܡ̣ܢ ܐܘܼܓ̰ܵܚ ܕܗ̇ܘ ܛܠܝܼܩܵܐ ܝܘܲܚ. ܡܛܲܥܘܝܼ ܒܵܬَܪܲܢ ܒܲܣܝܼܡܵܐܝܼܬ. ܢܓ̰ܘܿ ܒܟܲܪܒܵܐ ܕܗܵܐ ܒܸܫܓ̣ܵܫܲܢ ܝܼܠܹܗ: ܩܵܐ ܕܚܵܝܪܲܚ ܒܝܼܘܼܟܼ ܒܨܸܦܝܘܼܬܵܐ܀ ܗܲܒَ̣ܠܲܢ ܕܵܘܸܠܬܵ‌ܐ ܕܪ̈ܲܚܡܘܼܟܼ: ܩܵܐ ܕܨܵܠܲܚ ܨܠܘܿܬܵܐ ܒܲܣܝܼܡܵܐܝܼܬ. ܫܓ̣ܝܼܫܵܐ ܟܹܐ ܚܵܙܝܼܠܘܼܟܼ ܝܵܐ ܡܵܪܝܼ: ܗ̇ܘ ܕܒܟܲܪܒܵܐ ܚܵܙܝܼܠܘܼܟܼ ܒܙܕܘܼܥܬܵܐ ܟܹܐ ܓܵܫܸܩ ܒܝܼܘܼܟܼ: ܟܠ ܕܒܚܲܫܵܐ ܩܵܪܝܼܠܘܼܟܼ. ܠܹܐ ܝܼܠܵܗ̇ ܠܵܚܘܼܡܬܵ‌ܐ ܘܒܙܕܘܼܥܬܵܐ: ܡܩܲܪܒܸܢܲܚ ܠܟܸܣ ܫܸܠܝܘܼܬܘܼܟܼ܀ ܡܒܵܣܸܡ ܝܵܐ ܡܵܪܝܼ ܕܠܵܐ ܚܲܫܵܐ: ܘܕܠܵܐ ܦܪܲܡܬܵ‌ܐ ܥܒ̣ܘܿܕ ܚܘܼܠܡܵܢܵܐ. ܒܵܪܸܟܼ ܡܵܪܝܼ ܛܥܘܼܢܝܵܬܹ̈‌ܐ ܕܐܲܪܥܵܐ: ܕܫܲܟܪܝܼܠܘܼܟܼ ܐܲܟ̣ܠܵܢܲܝܗ̈‌ܝ. ܒܵܪܸܟܼ ܒܸܕܪ̈ܵܬܹܐ ܒܡܲܗܨܘܼ̈ܠܹܐ ܕܫܲܟܪܝܼܠܘܼܟܼ: ܐܲܟܵܪ̈ܲܝܗ‌ܝ. ܒܵܪܸܟܼ ܟܲܪ̈ܡܹܐ ܘܢܸܨܒ̣ܵܬܹ̈‌ܐ: ܩܵܐ ܕܫܲܒܚܝܼܠܘܼܟܼ ܡܘܼܥܝܸܩܹ̈ܐ܀ ܐܘܿܦ ܡܫܲܡܫܵܢܹ̈ܐ ܒܒܹܝܬ ܩܘܼܕܫܵܐ ܒܩܘܼܪܒܵܢܵܐ ܕܦܲܓ̣ܪܘܼܟܼ ܘܕܸܡܘܼܟܼ. ܐܲܠܵܗܵܐ ܕܠܹܐ ܦܵܐܸܫ ܡܩܘܼܝܸܣܵܐ: ܘܐܝܼܬܠܹܗ ܪ̈ܲܚܡܹܐ ܕܠܵܐ ܩܝܼܵܣ ܒܗܵܘܓܵܐ ܙܥܘܿܪܵܐ ܕܟܵܪ̈ܵܡܘܼܟܼ: ܡܲܫܠܝܼ ܟܲܪܒܵܐ ܙܲܪܒܵܢܵܐ. ܛܵܒ̣ܵܐ ܕܛܘܼܟܸܣܠܹܗ ܒܪ̈ܵܚܡܘܼܗܝ: ܡܲܫܪܝܵܐ ܕܥܝܼܪܹ̈ܐ ܥܸܠܵܝܹ̈ܐ܀ ܡܲܠܚܸܡ ܠܵܗ̇ ܐܲܪܥܵܐ ܠܬܲܚܬܵܝܹ̈ܐ: ܕܫܵܪܝܼ ܒܫܲܝܢܵܐ ܥܲܠ ܦܲܐܬܵܗ̇. ܡ̣ܢ ܥܸܠܵܝܹ̈ܐ ܘܬܲܚܬܵܝܹ̈ܐ: ܫܘܼܒ̣ܚܵܐ ܓܘܼܪܵܐ ܐَܣܸܩܠܘܼܟܼ. ܛܲܠܒܝܼ ܥܲܡܲܢ ܥܸܠܵܝܹ̈ܐ: ܕܠܵܐ ܫܵܓ̣ܫܝܼ ܡ̣ܢ ܟܠ ܡܸܢܕܝܼ. ܩܵܐ ܕܡܫܲܝܢܸܢ ܠܥܵܠܡܵܐ ܫܓ̣ܝܼܫܵܐ: ܒܫܵܦܵܩܲܬ ܥܲܠ ܚܲܛܵܝܹ̈ܐ܀ ܗ̇‌ܝ ܛܲܝܒܘܼܬܵ‌ܐ ܕܡ̣ܢ ܫܘܼܪܵܝܵܐ: ܠܵܐ ܡܘܼܥܝܸܩܠܵܗ̇ ܠܥܝܼܪܹ̈ܐ ܥܸܠܵܝܹ̈ܐ. ܝܵܗܒܼܵܐ ܠܸܒܵܐ ܒܓ̰ܲܠܕܘܼܬܵܐ ܠܚܲܛܵܝܹ̈ܐ: ܕܦܝܼܫܹܐ ܝَܢܵܐ ܒܲܚܛܝܼܵܬܲܝܗ̈‌ܝ. ܗ̇ܘ ܕܡܘܼܫܪܹܐܠܹܗ ܠܥܝܼܪܹ̈ܐ ܕܠܥܘܿܠܘܿܠ: ܒܗ̇ܘ ܢܘܼܗܪܵܐ ܕܠܹܐ ܦܵܐܸܫ ܫܓ̣ܝܼܫܵܐ. ܐܘܿܦ ܥܲܡܲܢ ܡܣܵܙܓܸܪ ܒܪܝܼܬܵܐ: ܕܫܝܼܓ̣ܫܬܵ‌ܐ ܝܼܠܵܗ̇ ܥܲܠܲܢ܀ ܠܦܸܩܚܹ̈ܐ ܟܹܐ ܕܵܡܝܼ ܚܲܛܵܝܹ̈ܐ: ܕܡ̣ܢ ܗܵܘܓܵܐ ܕܟܲܪܒܵܐ ܟܹܐ ܟ̰ܲܡܟ̰ـܝܼ. ܒܫܲܝܢܵܐ ܙܲܝܵܪܹ̈ܐ ܝَܢܵܐ ܪܸ̈ܦܝܹܐ: ܘܡ̣ܢ ܟܲܪܒܵܐ ܙܥܘܿܪܵܐ ܟܹܐ ܚܵܓ̰ܠܝܼ. ܒܫܲܝܢܵܐ ܟܹܐ ܗܵܘܝܼ ܓܲܢَܒܵܪܹ̈ܐ: ܘܒܟܲܪܒܵܐ ܟܹܐ ܗܵܘܝܼ ܙܲܒܘܼܢܹ̈ܐ. ܒܢܲܝܢܵܫ̈ܵܐ ܝܘܲܚ ܙܲܒܘܼܢܹ̈ܐ: ܟ̰ܘܼܟ̰ܵܓܹ̈ܐ ܕܒܓ̰ܲܠܕܘܼܬܵܐ ܟܹܐ ܟ̰ܲܡܟ̰ܝܼ܀ ܒܥܸܕܵܢܵܐ ܕܫܲܝܢܵܐ ܟܹܐ ܫܲܦܪܸ̈ܢܝܼ: ܐܸܢ ܡܛܹܐܠܹܗ ܟܲܪܒܵܐ ܟܹܐ ܒܲܪܙܝܼ. ܒܨܵܚܘܼܬܵ‌ܐ ܐܲܪ̈ܙܹܐ ܪ̈ܵܡܹܐ: ܘܒܡܲܪܥܵܐ ܛܸܠܵܢܝܼܵܬܹ̈‌ܐ. ܐَܬܹܐܠܵܗ̇ ܪܵܡܘܼܬܵܐ ܥܒ̣ܝܼܕܠܗَܘܿܢ ܫܘܼܒ̣ܗܵܪܵܐ: ܡܘܼܒܝܸܢܹܗ ܟܲܪܒܵܐ ܘܫܦܝܼܠܗَܘܿܢ. ܒܓܵܘ ܟܲܪܒܵܐ ܠܹܐ ܝܼܠܹܗ ܟܲܠܝܵܢܵܐ: ܥܲܠܲܝܗܝ ܗ̇ܘ ܫܘܼܦܪܵܐ ܩܵܕَܡܵܝܵܐ܀ ܠܹܐ ܕܲܟ̣ܪܝܼܠܹܗ ܒܥܸܕܵܢܵܐ ܕܫܲܝܢܵܐ: ܠܗ̇ܘ ܟܲܪܒܵܐ ܕܡܸܢܹܗ ܦܪܝܼܩܠܗَܘܿܢ. ܗܲܒَ̣ܠܲܢ ܡܸܢَܕܪܸܫَ ܕܒܥܸܕܵܢܵܐ ܕܫܲܝܢܵܐ: ܕܲܟ̣ܪܲܚ ܠܟܵܣܲܢ ܡܲܪܝܼܪܵܐ. ܗܲܒَ̣ܠܲܢ ܝܵܐ ܡܵܪܝܼ ܕܒܥܸܕܵܢܵܐ ܕܟܲܪܒܵܐ: ܠܵܐ ܐܵܬܲܚ ܠܩܛܸܥܬܵ‌ܐ ܕܗܹܒ̣ܝܼ. ܗܲܒَ̣ܠܲܢ ܙܹܐ ܕܠܫܘܼܒ̣ܗܵܪܵܐ: ܠܵܐ ܐܵܬܲܚ ܒܙܲܒ̣ܢܵܐ ܕܫܲܝܢܵܐ܀ ܒܥܸܕܵܢܵܐ ܕܟܲܪܒܵܐ ܕܲܟ̣ܪܲܚ ܠܨܠܘܿܬܵܐ: ܘܒܥܸܕܵܢܵܐ ܕܫܲܝܢܵܐ ܠܬܲܥܠܲܡܬܵ‌ܐ. ܒܟܲܪܒܵܐ ܕܲܟ̣ܪܲܚ ܠܫܘܼܒ̣ܗܵܪܲܢ: ܕܠܹܐ ܝܗَܘܵܐ ܘܵܓ̰ܸܒ ܕܐܸܫܬܲܒ̣ܗܸܪܲܚ. ܕܲܟ̣ܪܲܚ ܡܵܪܝܼ ܒܥܸܕܵܢܵܐ ܕܚܲܫܵܐ: ܕܟܡܵܐ ܡܵܪܹܐ ܚܘܼܣܪܵܢܵܐ ܝܼܠܹܗ ܫܘܼܒ̣ܗܵܪܵܐ. ܘܕܲܟ̣ܪܲܚ ܙܹܐ ܒܥܸܕܵܢܵܐ ܕܫܠܵܡܵܐ: ܕܟ̰ܲܟܵܐ ܛܵܒ̣ܵܐ ܝܼܠܹܗ ܡܘܼܟܵܟ̣ܵܐ܀ ܡܦܵܨܝܼ ܝܵܐ ܡܵܪܝܼ ܘܡܵܙܝܸܕ ܘܗܲܒَ̣ܠܲܢ: ܕܠܵܐ ܡܲܢܫܲܚ ܕܦܝܼܫܠܲܢ ܡܒܘܼܣܡܹܐ. ܗ̇ܘ ܕܕܵܟ̣ـܸܪ ܐܘܼܠܨܵܢܘܼ̈ܗܝ: ܠܹܐ ܡܵܨܹܐ ܕܡܲܢܫܹܐ ܦܘܼܪܩܵܢܘܼܗܝ. ܘܗ̇ܘ ܕܡܲܢܫܹܐ ܓ̰ܘܼܢܓ̰ܵܪ̈ܘܼܗܝ: ܕܵܐܟ̣ܝܼ ܒܸܬ ܕܵܟ̣ـܸܪ ܦܘܼܪܩܵܢܘܼܗܝ. ܡܒܵܣܸܡ ܡܵܪܝܼ ܘܡܲܙܝܸܕ ܘܗܲܒَ̣ܠܲܢ: ܩܵܐ ܕܲܟ̣ܪܲܚ ܕܵܐܟ̣ܝܼ ܩܲܡ ܡܦܵܨܸܬܠܲܢ܀ ܗ̇ܘ ܨܵܚ ܕܡܲܢܫܹܐ ܡܲܪܥܘܼܗܝ: ܡܸܪܥܝܵܐ ܝܼܠܹܗ ܒܚܘܼܠܛܸܢܝܘܼܬܵܐ ܕܚܝܼܵܠܘܼܗ̈ܝ. ܠܵܐ ܦܵܝܫܲܚ ܡܒܘܼܣܡܹܐ ܡ̣ܢ ܚܲܕَ ܡܲܪܥܵܐ: ܘܕܵܝܪܲܚ ܘܢܵܦܠܲܚ ܒܚܲܕَ ܡܲܪܥܵܐ ܐَܚܹܪَܢܵܐ. ܒܵܣܸܡ ܠܲܢ ܡܵܪܝܼ ܡ̣ܢ ܬܸܪ̈ܘܲܝܗܝ: ܡ̣ܢ ܡܲܪܥܵܐ ܐܘܿܦ ܡ̣ܢ ܚܸܠܛܵܐ. ܩܵܐ ܕܒܝܲܕ ܕܨܵܚܘܼܬܵܐ ܫܲܟܪܸܚܠܘܼܟܼ: ܘܒܡܲܪܥܵܐ ܕܲܟ̣ܪܸܚܠܘܼܟܼ܀ ܗܲܒَ̣ܠܵܗ̇ ܡܵܪܝܼ ܠܙܲܒܘܼܢܘܼܬܲܢ: ܕܠܵܐ ܩܲܒܠܵܐ ܚܲܫܵܐ ܘܠܵܐ ܚܸܠܛܵܐ. ܠܹܐ ܝܼܠܹܗ ܣܢܝܼܩܵܐ ܗ̇ܘ ܕܒܸܕܟ̣ܵܪܵܐ ܝܼܠܹܗ: ܕܗܵܘܹܐ ܟܲܪܒܵܐ ܡܲܕܟ̣ܘܼܪܘܼܗܝ. ܠܛܵܝܸܦܵܐ ܕܡܘܼܢܫܹܐ ܠܹܗ ܦܘܼܪܩܵܢܘܼܗܝ: ܒܝܲܚܣܝܼܪܘܼܬܵܐ ܕܟ̣ܝܼܪܹܗ ܠܦܵܪܘܿܩܘܼܗܝ. ܘܡܵܣܸܩܬܵ‌ܐ ܕܡܸܨܪܹܝܢ ܡܘܼܢܫܝܼܵܠܹܗ: ܒܨܠܵܝܬܵ‌ܐ ܠܒܵܒܸܠ ܕܟ̣ܝܼܪܵܗ݁ ܠܹܗ܀ ܒܩܵܛܝܼܵܐ ܕܟܲܪܒܵܐ ܕܟ̣ܝܼܪܹܗ: ܠܚܘܼܛܪܵܐ ܕܩܲܡ ܦܵܪܸܩܠܹܗ ܡ̣ܢ ܚܲܫܵܐ. ܘܡܘܼܢܫܝܼܵܐ ܠܗَܘܿܢ ܚܢܵܩܬܵ‌ܐ ܕܝܲܠܘܿܕܲܝܗ̈‌ܝ. ܟ̰ܪܸܦܠܵܗ̇ ܒܵܒܸܠ ܝܲܠܘܿܕܲܝ̈ܗܝ. ܘܡܘܼܢܫܝܼܠܲܢ ܐܵܦ ܕܙܠܝܼܡܠܲܢ:  ܐܵܦ ܐܸܠܲܢ ܡܲܙܝܸܕ ܥܘܼܗܕܵܢܵܐ. ܕܙܠܝܼܡܠܲܢ ܫܲܝܢܵܐ ܩܵܕَܡܵܝܵܐ: ܐَܬܹܐܠܹܗ ܟܲܪܒܵܐ ܠܸܫܩܵܠܵܐ ܬܘܼܥܠܵܐ܀ ܕܡܘܼܢܫܹܝܠܲܢ ܡܲܟܝܼܟ̣ܘܼܬܵܐ: ܒܘܼܪ̈ܵܢܹܐ ܕܟܲܪܒܵܐ ܫܓ̣ܝܼܫܲܚܠܗَܘܿܢ. ܙܲܕܥܲܚ ܐܵܚܘܿܢ̈ܘܵܬܝܼ ܡ̣ܢ ܩܵܛܝܼـܹܗ: ܕܗ̇ܘ ܕܒܪ̈ܲܚܡܘܼܗܝ ܟܹܐ ܡܣܲܚܒܸܪܲܢ. ܡܚܲܕܸܬܲܚ ܩܵܘܠܵܐ ܘܡܲܬܒܲܚ ܠܹܗ ܐܲܝܟܼ ܢܵܘܪܵܐ ܠܥܘܼܕܪܵܢܲܢ. ܒܝܼـܹܗ ܕܲܟ̣ܪܲܚ ܡܦܵܨܵܝ̈ܵܬܲܢ ܘܒܝܼـܹܗ ܕܲܟ̣ܪܲܚ ܐܵܦ ܩܵܘܠܲܢ܀ ܐܲܝܟܼ ܕܟܹܐ ܡܵܚܸܒܲܚ ܡܦܵܨܵܝ̈ܵܬܲܢ: ܗܵܘܲܚ ܫܲܪܝܼܪܹ̈ܐ ܒܩܵܘܠܲܢ. ܝܵܐ ܐܲܠܵܗܵܐ ܗܲܒَ̣ܠܲܢ ܚܲܝܠܵܐ: ܕܒܝܼܘܼܟܼ ܡܲܟܡܸܠܲܚ ܩܵܘܠܲܢ. ܠܹܐ ܦܵܐܸܫ ܡܘܼܟܡܸܠܵܐ ܕܠܵܐ ܗܵܝܸܪܬܘܼܟܼ: ܩܵܘܠܵܐ ܕܙܲܒܘܼܢܘܼܬܲܢ. ܡܣܵܒܵܒ ܚܘܼܒܘܼܟܼ ܫܘܼܠܵܡܵܐ ܥܲܠ ܬܸܪܘܘܼܢ̈ܬܲܝܗܝ ܐܲܣܩܵܐ ܠܘܼܟܼ: ܬܸܫܒܘܿܚܬܵܐ ܡ̣ܢ ܡܲܪܥܝܼܬܘܼܟܼ܀

ܡܕܪܫܐ.

     ܥܘܼܢܵܝܵܐ. ܒܵܗܬ̇ܝܼܢܲܢ ܡܵܪܝ ܕܲܢܪܲܥܹܝܟܼ: ܕܡܵܐ ܕܪܲܥܝܼܢܵܟܼ ܐܲܪܓܸܿܙܢ̣ܵܟܼ. ܢܵܟܼܦ̇ܝܼܢܲܢ ܒܲܬܼܝܵܒܼܘܼܬܲܢ: ܕܲܕܼܢܸܚܛܸܐ ܬܘܼܒܼ ܣܝܼܡܵܐ ܠܲܢ.

     ܒܵܬܹ̈‌ِܐ. ܐܵܦ ܗ݀ܘ ܪܘܼܓܼܙܵܐ ܒܵܣܲܪ ܠܲܢ: ܕܐܸܢܗ݀ܘ ܕܲܥ̣ܒܲܪ ܕܲܓܸ̇ܠ̣ܢܲܢ. ܠܵܘ ܬܲܝܵܒ̣ܹ̈ܐ ܠܵܐ ܪܵܚܹ̇ܡ: ܥܲܠ ܗܵܘܿ ܗَܘܼ ܠܵܐ ܫܵܡܲܥ ܠܲܢ. ܬܲܝܵـܒܹ̈ܐ ܕܙܹܐܦܵܐ ܣܵܢܹ̇ܐ: ܡܸܛܠ ܗܵܘܿ ܠܵܐ ܥܵܢܹ̇ܐ ܠܲܢ. ܦܨܝܼܚ ܗَܘܼ ܠܘܼܩܒܲܠ ܬܲܝܵـܒܹ̈ܐ: ܐܸܢ ܠܵܐ ܦܵܢܹ̇ܝܢ ܨܹܝܕܼ ܥܵܘ̣ܠܵܐ‌܀ ܫܹܐ̈ܠܵܬܲܢ ܠܵܐ ܟܵܠܹ̇ܐ ܗَܘ̣ܵܐ: ܐܸܠܘܼ ܬܘܼܒܼ ܠܵܐ ܣܵܛܹ̇ܝܢ ܗَ̣ܘܲܝܢ. ܠܵܘ ܠܲܬ̣ܝܵܒܼܘܼܬܲܢ ܫܵܐܹ̇ܛ. ܒܥܵܘܠܲܢ ܕܲܥܬܼܝܼܕܼ ܡܸܬܼܒܲܩܸܐ. ܡܢܵܬ̣ܡܵܠܝ ܘܐܸܬ̣ܡܲܠܝ ܚܲܛܵܝܹ̈ܐ: ܝܵܘܡܵܢ ܘܲܡܚܵܪ ܬܲܝܵܒܹ̈ܐ‌܀ ܠܝܵܘܡܵܐ ܐَܚܪܹܢܵܐ ܥܵܘ̈ܵܠܹܐ: ܡܸܢܹܗ ܘܲܠܗܵܠ ܥܲܢܵܬܹ̈‌ܐ. ܐܸܢ ܫܵܡܲܥ ܠܲܢ ܗܵܘܹ̇ܐ ܠܹܗ: ܐܲܝܟܼ ܠܵܐ ܝܵܕܲܥ ܕܲܥܬ̣ܝܼ̈ܕܵܢ. ܘܗܵܘ̇ܝܵܐ ܠܹܗ ܕܲܬܼܝܵܒܼܘܼܬܲܢ: ܘܓܲܒ̣ܝܵܐ ܠܹܗ ܕܲܡܠܸܐ ܙܲܒ̣ܢܵܐ. ܡ̣ܢ ܨܹܐܕܲܝܢ ܐܲܚܝܼܕܼ ܬܲܪܥܵܐ: ܒܐܲܦܲܝ̈ ܟܠܗܹܝܢ ܫܹܐ̈ܠܵܬܲܢ‌܀

ܩܪܝܢܐ؛ ܒ

ܡܘܬܒ̣ܐ؛ ܒ.

     ܛܵܒ̣ܵܐ ܒܩܵܛܝܼܘܼܟܼ ܚܘܼܫ ܦܲܪܡܝܼܵܚ: (ܬܢܝܼ) ܕܠܹܐ ܗَܘܵܐ ܡ̣ܢ ܒܝܼܫܬܵ‌ܐ ܟܹܐ ܡܵܚܸܬ. ܒܢܓ̰ܵܘܬܘܼܟܼ ܡܵܪܝܼ ܥܲܒ̣ܕܵܚ ܫܘܼܒ̣ܗܵܪܵܐ: ܕܠܹܐ ܗَܘܵܐ ܩܵܐ ܛܵܠܸܩܬܵܐ ܬܲܥܠܸܡܬܘܼܟܼ. ܡܘܼܕܝܼ ܒܸܬ ܝܵܗܒܸܠܲܢ ܐܲܠܵܗܵܐ: ܕܐܲܝܟܼ ܕܠܒܢܘܿܢܹ̈ܐ ܬܲܥܠܘܼܡܲܢ ܝܼܠܹܗ ܬܲܥܠܸܡܬܘܼܟܼ ܪܵܒܵܐ ܒܘܼܚܸܠܬܵ‌ܐ ܝܼܠܵܗ̇: ܒܝܼܵܗ̇ ܝܵـܪ̈ܘܿܬܹܐ ܒܸܗܘܵܝܵܐ ܝܘܲܚ܀ ܐَܟ̣ܵܠܬܵ‌ܐ ܕܚܲܡܘܼܟܼ ܥܲܠ ܕܐܵܢܝܼ ܕܝܼܘܼܟܼ: ܒܝܲܕ ܬܲܥܠܸܡܬܘܼܟܼ ܦܝܵܫܵܐ ܝܼܠܵܗ̇ ܝَܕܸܥܬܵ‌ܐ. ܟܠܵܗ̇ ܬܲܥܠܸܡܬܘܼܟܼ ܫܘܼܒ̣ܗܵܪܵܐ ܝܼܠܵܗ̇. ܕܒܢܘܿܢ̈ܘܼܟܼ ܒܸܥܒ̣ܵܕܲܢ ܝܼܠܵܗ̇. ܬܲܥܠܸܡܬܘܼܟܼ ܩܵܬܲܢ ܬܸܫܒܘܿܚܬܵ‌ܐ ܝܼܠܵܗ̇: ܝܵܪ̈ܘܿܬܹܐ ܩܲܡ ܩܵܪܸܬܠܲܢ. ܢܓ̰ܵܘܬܘܼܟܼ ܠܗ̇ܘ ܕܦܲܪܡܝܼܵـܢܵܐ ܝܼܠܹܗ ܡܵܠܘܿܦܘܼܗܝ ܝܼܠܵܗ̇ ܕܠܵܐ ܡܢܲܟ̣ܪܝܼܵܐ ܠܹܗ ܡܸܢܘܼܟܼ. ܟܲܕ ܦܝܵܫܵܐ ܝܼܠܹܗ ܡܘܼܢܚܸܣܵܐ ܒܸܠܝܵܦܵܐ ܝܼܠܹܗ: ܕܠܹܐ ܝَܠܹܗ ܢܘܼܟ̣ܪܵܝܵܐ ܠܐܲܠܵܗܘܼܬܘܼܟܼ. ܐَܟܼܲܠܬܵ‌ܐ ܕܚܲܡܘܼܟܼ ܕܥܲܠܘܼܗܝ ܣܗܸܕܠܵܗ̇: ܕܒܪܘܿܢܵܐ ܣܵܘܓܘܿܠ ܕܒܲܝܬܘܼܟܼ ܝܼܠܹܗ. ܩܵܛܝܼܘܼܟܼ ܕܟܹܐ ܡܲܩܘܸܚ ܘܬܲܥܠܸܡ: ܚܸܙܝܼܢܘܼܟܼ ܟܹܐ ܒܲܥܝܹܐ ܕܝܵܗَܒܸܠܲܢ. ܩܝܼܪܲܬ ܕܩܵܛܝܼܘܼܟܼ ܐܵܗܵܐ ܝܼܠܵܗ̇: ܕܥܵܒܸܕܠܗَܘܿܢ ܚܲܟܝܼܡܹ̈ܐ ܠܝܵܪ̈ܘܿܬܹ̈ܐ [ܡܝܼܪܵܬܓܵܪܹ̈ܐ]܀ ܠܗܲܝܘܵܢ ܩܵܛܝܼܵܐ ܟܹܐ ܡܵܠܸܦܠܹܗ: ܒܲܣ ܟܡܵܐ ܠܒܢܲܝܢܵܫ̈ܵܐ. ܡܵܢܲܚ ܒܝܼܫܵܬܹ̈‌ܐ ܕܓܵܢܲܢ: ܕܡܲܦܪܸܡܝܼܠܲܢ ܥܲܠ ܛܵܒ̣ܵܬܹ̈‌ܐ. ܬܲܩܠܲܚ ܥܵܕ̈ܵܬܲܢ ܣܸܢܝܹ̈ܐ: ܕܒܝܼـܲܝܗܝ ܦܵܝܫܝܼ ܡܘܼܟܪܸܙܹܐ ܚܸܙܝܼܢܝܵܬܹ̈ܗ. ܘܒܓܢ̈ܵܗܲܢ ܦܵܝܫܲܚ ܠܝܼܡܹ̈ܐ: ܕܟܡܵܐ ܟܹܐ ܫܵܒܸܩ ܗܲܡܵܫܵܐ܀ ܒܙܵܠܝܼܡܘܼܬܲܢ ܟܹܐ ܦܲܪܡܲܚ: ܕܟܡܵܐ ܓܘܼܪܬܵܐ ܝܼܠܵܗ̇ ܫܵܦܵܩܲܬܹܗ. ܒܦܲܢܕܵܢܘܼܬܲܢ ܦܝܵܫܵܐ ܝܼܠܵܗ̇ ܝܕܸܥܬܵ‌ܐ: ܘܫܲܪܝܼܪܘܼܬܹܗ ܠܟܸܣܠܲܢ. ܒܕܵܓܵܠܘܼܬܲܢ ܦܝܵܫܵܐ ܝܼܠܵܗ̇ ܝَܕܝܼܥܬܵ‌ܐ ܕܠܹܐ ܝܼܠܹܗ ܡܫܲܚܠܸܦܵܢܵܐ ܐܲܟ̣ܘܵܬܲܢ. ܒܟܲܪܒܲܢ ܦܝܵܫܵܐ ܝܼܠܹܗ ܡܩܘܼܝܸܣܵܐ: ܕܠܹܐ ܟܵܪܸܒ ܐܵܦ ܐܸܢ ܡܲܟܪܸܒܲܚ ܠܹܗ. ܛܘܼܒ̣ܵܐ ܠܪ̈ܝܼܓܵܘܵܬܹܐ ܕܐܝܼܬ ܠܗَܘܿܢ. ܚܲܕَ ܗܵܕܟ̣ܵܐ ܡܵܪܵܐ ܒܲܣܝܼܡܵܐ܀ ܛܘܼܒ̣ܵܐ ܠܒܢܘܿܢܹ̈ܐ ܫܲܪܝܼܪܹ̈ܐ: ܕܒܵܒܵܐ ܫܲܪܝܼܪܵܐ ܐܝܼܬܠܗَܘܿܢ. ܫܩܘܿܠܘܼܢ ܠܸܒܵܐ ܝܵܐ ܚܲܛܵܝܹ̈ܐ: ܕܫܲܒ̣ܩܵܢܵܐ ܕܓܢܵܗܹ̈ܐ ܐܝܼܬܠܵܘܟ̣ܘܿܢ. ܦܘܿܫܘܼܢ ܠܸܒܵܢܹ̈ܐ ܝܵܐ ܬܠܝܼܩܹ̈ܐ ܗܵܐ ܡܲܫَܟ̰ܚܵܢܵܐ ܕܟܠ ܐܝܼܬ ܠܵܘܟ̣ܘܿܢ. ܦܘܿܫܘܼܢ ܠܸܒܵܢܹ̈ܐ ܝܵܐ ܡܸܪ̈ܥܝܹܐ: ܕܐܵܣܝܵܐ ܚܘܼܪܵܝܝܼ ܐܝܼܬܠܵܘܟ̣ܘܿܢ܀ ܗَܘܵܝܡܘܼܢ ܠܸܒܵܢܹ̈ܐ ܝܵܐ ܚܲܝܵܒ̣̈ـܹܐ: ܕܥܲܪܵܒ̣ܵܐ [ܟܲܦܝܼܠ] ܓܘܼܪܵܐ ܩܸܢܝܹܐ ܝَܬܘܿܢ. ܠܵܐ ܙܲܕܥܸܬ ܝܵܐ ܕܓ̰ܪܝܼܛܠܹܗ: ܕܗܵܐ ܡܲܩܝܸܡܵܢܘܼܟܼ ܥܲܠ ܕܸܦܢܘܼܟܼ ܝܼܠܹܗ. ܠܵܐ ܙܲܕܥܸܬܿ ܝܵܐ ܕܫܡܝܼܛܵܐ ܝܼܠܹܗ: ܕܗܵܐ ܐܵܣܸܪ ܫܸܡܛܹ̈ܐ ܒܸܚܝܵܪܵܐ ܝܼܠܹܗ ܒܝܼܘܼܟܼ. ܝܵܐ ܠܘܼܟܸܢܵܐ ܠܵܐ ܙܲܕܥܸܬܿ ܕܗܵܐ ܙܘܿܦܵܐ [ܙܵܠܵܐ܇ ܐܸܣܦܘܼܓܵܐ] ܡܲܚܘܸܪܵܢܵܐ ܕܬܲܡܸܙܠܘܼܟܼ܀ ܠܵܐ ܥܲܝܩܝܼܬܘܼܢ ܡ̣ܢ ܟܲܪܒܵܐ: ܟܠܹܗ ܥܸܠܬܵ‌ܐ ܕܥܘܼܕܪܵܢܵܐ ܝܼܠܹܗ. ܗ̇ܘ ܕܡܲܫܡܘܼܥܝܲܢ ܝܼܠܹܗ ܐܵܚܘܿܢܘܵܬ̈ܝܼ: ܕܥܲܡ ܕܐܵܗܵܐ ܡܵܪܵܐ ܦܲܠܚܲܚ. ܣܵܒܵܒ ܠܹܐ ܒܲܣܡܵܐ ܠܹܗ ܛܵܒ̣ܵܐ ܕܒܩܸܫܝܘܼܬܵܐ ܡܪܲܦܬܸܪ ܥܲܡܲܢ. ܠܹܐ ܝܼܠܹܗ ܪܵܙܝܼ ܗ̇ܘ ܒܲܣܝܼܡܵܐ ܕܡܪܵܪܹ̈ܐ ܡܲܫܬܹ‌ܐ ܠܒܢܘܿܢܘܼܗܝ܀ ܚܘܼܫ ܡܲܕܥܝܼܠܵܘܟ̣ܘܿܢ ܐܲܒ̣ܵܗܹ̈ܐ: ܥܲܠ ܕܗ̇ܘ ܒܵܒܵܐ ܡܪܲܚܡܵܢܵܐ. ܣܵܒܵܒ ܐܝܼܡܲܢ ܕܟܹܐ ܬܲܥܠܡܝܼ ܐܲܒ̣ܵܗܹ̈ܐ: ܟܹܐ ܡܲܡܪܸܥ ܐܝܼܡܲܢ ܕܟܹܐ ܡܵܚܝܼ. ܡ̣ܢ ܠܒܲܕܲܪ ܟܹܐ ܬܲܥܠܡܝܼ ܒܩܵܛܝܲܝܗܝ: ܘܡ̣ܢ ܠܓܵܘܵܝܼ ܟܹܐ ܡܲܩܘܸܚܝܼ ܪ̈ܲܚܡܲܝܗܝ. ܐܵܦܸܢ ܕܟܹܐ ܡܵܚܝܼ ܐܲܒ̣ܵܗܹ̈ܐ: ܒܪ̈ܲܚܡܹܐ ܟܹܐ ܡܵܚܝܼ ܠܒܢܘܿܢܲܝ̈ܗܝ܀ ܣܵܒܵܒ ܠܹܐ ܡܣܲܝܒܸܪ ܗ̇ܘ ܚܘܼܒܵܐ: ܕܚܵܙܝܼܠܗَܘܿܢ ܟܲܕ ܒܸܚܪܵܒ̣ܵܐ ܐܸܢ ܡܲܚܦܸܠ ܡ̣ܢ ܚܪܲܒ̣ܬܲܝܗܝ: ܠܹܐ ܝܼܠܹܗ ܫܲܪܝܼܪܵܐ ܘܠܵܐ ܙܹܐ ܚܲܟܝܼܡܵܐ: ܘܐܸܢ ܠܵܐ ܩܵܒܸܠ ܚܲܫܵܐ ܟܲܕ ܒܸܡܚܵܝܲܝܗܝ ܝܼܠܹܗ ܒܲܣ ܠܹܐ ܝܼܠܹܗ ܦܲܪܡܝܼܵܢܵܐ ܘܠܵܐ ܡܪܲܚܡܵܢܵܐ. ܐܝܼܢܵܐ ܠܲܝܬ ܐܲܢܹܐ ܠܟܸܣ ܚܘܼܒܵܐ: ܘܐܸܢ ܠܲܝܬ ܒܲܣ ܠܹܐ ܝܼܠܹܗ ܚܘܼܒܵܐ܀ ܫܸܡܵܐ ܕܚܘܼܒܵܐ ܐܝܼܬ ܬܵܡܵܐ: ܘܠܵܐ ܚܲܝܠܘܼܗܝ ܘܐܘܿܦ ܠܵܐ ܫܪܵܪܘܼܗܝ. ܣܵܒܵܒ ܚܘܼܒܵܐ ܠܹܐ ܚܵܣܸـܟܼ: ܘܐܸܢ ܚܵܣܸـܟܼ ܘܐܸܢ ܠܵܐ ܚܵܣܸـܟܼ. ܣܵܒܵܒ ܐܸܢ ܚܵܣܸـܟܼ ܠܹܐ ܝܼܠܹܗ ܡܪܲܚܡܵܢܵܐ: ܘܐܸܢ ܡܲܚܦܸܠ ܠܹܐ ܝܼܠܹܗ ܡܲܚܸܒܵܢܵܐ. ܣܵܒܵܒ ܟܠ ܕܡܲܚܸܒ ܠܒܪܘܿܢܘܼܗܝ: ܒܚܵܒܵܛܘܼܬܵܐ ܟܹܐ ܬܲܥܠܸܡܠܹܗ. ܚܙܝܼ ܠܐܲܒ̣ܵܗܹ̈ܐ ܡܪ̈ܲܚܡܵܢܹܐ: ܘܚܘܿܪ ܒܒܢܘܿܢܹ̈ܐ ܡܲܚܪܸ̈ܒ̣ܵܢܹܐ. ܡܼܢ ܐܲܒ̣ܵܗܹ̈ܐ ܛܵܒ̣ܵܬܹ̈‌ܐ. ܢܛܝܼܪܹ̈ܐ ܝَܢܵܐ ܘܡܘܼܬ̈ܒܹܐ ܩܵܐ ܒܢܘܿܢܹ̈ܐ ܐܵܢܝܼ ܒܢܘܿܢܹ̈ܐ ܡܵܪ̈ܘܿܕܹܐ: ܓܵܢܲܝܗܝ ܡܢܲܟ̣ܪܘܼܝܘܼܗ̇ ܝَܢܵܐ ܡ̣ܢ ܝܘܼܪ̈ܬܵܢܹܐ. ܒܢܘܿܢܹ̈ܐ ܡܲܠܝܘܿܨܹܐ ܝَܢܵܐ ܠܐܲܒ̣ܵܗܲܝܗ̈ܝ ܕܗܵܘܝܼ ܐܲܝܟܼ ܕܝܼـܲܝܗܝ ܦܟ̰ܝܼ̈ܠܹܐ. ܐܵܢܝܼ ܝܵܗܒ̣ܵܢܹ̈ܐ ܕܝܘܼܪܬܵܢܵܐ: ܕܗܵܘܝܼ ܒܝܼܵܗَܒ̣ܵܐ ܓ̰ܘܼܢܓ̰ܵܪܹ̈ܐ܀ ܚܘܼܠܵܐ ܐܵܢܝܼ ܐܲܒ̣ܵܗܹ̈ܐ: ܡܲܙܝܘܼܕܹܐ ܝَܢܵܐ ܡܲܣܠܵܝܬܵ‌ܐ ܠܒܢܘܿܢܲܝ̈ܗܝ. ܚܪܝܼܒ̣ܘܼܬܵܐ ܕܒܪܘܿܢܵܐ ܢܵܙܲܢ ܡܢܲܟ̣ܪܘܼܝܘܼܗܝ ܝܼܠܵܗ̇ ܡ̣ܢ ܝܘܼܪܬܵܢܵܐ. ܫܹܐܕܵܢܘܼܬܘܼܗܝ ܩܲܡ ܡܒܲܨܪܵܐ ܠܹܗ: ܘܐܵܣܘܿܛܘܼܬܘܼܗܝ ܩܲܡ ܡܓ̰ܲܢܓ̰ܸܪܵܐ ܠܹܗ. ܗܲܪ ܗ̇‌ܝ ܢܵܙܵܢܘܼܬܹܗ ܬܘܼܪܸܨܠܵܗ̇ ܐܸܠܹܗ: ܝܸܣܘܼܪܹ̈ܐ ܘܩܵܘ̈ܕܹܐ ܕܕܸܪ̈ܝܹܐ ܝَܢܵܐ ܒܝܼـܹܗ܀ ܒܲܣ ܐܸܢ ܐܲܒ̣ܵܗܹ̈ܐ ܚܘܼܒܵܢܹ̈ܐ ܡܬܲܥܠܘܼܡܹܐ ܝَܢܵܐ ܠܸܩܢܵܝܵܐ ܝܵܠܵܕَܝ̈ـܗܝ. ܟܡܵܐ ܙܵܘܕܵܐ ܗ̇ܘ ܒܵܒܵܐ ܫܲܪܝܼܪܵܐ: ܒܪ̈ܲܚܡܘܼܗܝ ܟܹܐ ܬܲܥܠܸܡ ܠܗَܘܿܢ ܒܢܘܿܢܘܼ̈ܗܝ. ܐܸܢ ܒܸܟܪܵܒܵܐ ܝَܘܸܬ ܕܩܲܡ ܡܵܚܝܼܠܘܼܟܼ: ܐܵܦ ܒܪܘܿܢܘܼܟܼ ܒܸܟܪܵܒܵܐ ܝܼܠܹܗ ܒܸܡܚܵܝܘܼܗܝ ܝَܘܸܬ. ܗ̇ܘ ܕܝܘܼܗَܒܸܠܹܗ ܩܵܬܘܼܟܼ ܩܵܛܝܼܵܐ: ܕܒܝܼـܹܗ ܬܲܥܠܡܸܬ ܘܩܵܢܸܬ ܠܒܪܘܿܢܘܼܟܼ܀ ܡܛܲܪܛܘܼܡܹܐ ܝَܘܸܬ ܥܲܠ ܩܵܛܝܼܘܼܗܝ: ܕܬܲܥܠܘܼܡܘܼܟܼ ܝܼܠܹܗ ܕܩܵܢܝܼܠܘܼܟܼ. ܝܲܢ ܪܲܦܝܼ ܩܵܛܝܼܘܼܟܼ ܡ̣ܢ ܐܝܼܕܘܼܟܼ ܕܠܵܐ ܬܲܥܠܡܸܬܿ ܒܝܼـܹܗ ܠܝܵܪܘܼܬܘܼܟܼ. ܝܲܢ ܚܘܼܫ ܕܡܵܘܕܹܐ ܩܵܛܝܼܘܼܟܼ ܠܩܵܛܝܼܘܼܗܝ: ܕܩܵܛܝܼܘܼܟܼ ܡܗܵܘܢܸܢ ܠܒܪܘܿܢܘܼܟܼ. ܗ̇ܘ ܝܘܼܗَܒܸܬܠܹܗ ܦܲܪܡܵܝܬܵ‌ܐ: ܕܒܝܼܵܗ̇ ܬܲܥܠܡܸܬܿ ܘܩܵܢܸܬܿ ܠܒܪܘܿܢܘܼܟܼ܀ ܠܦܲܪܡܵܝܬܘܼܗܝ ܒܸܒܥܵܝܵܐ ܝَܘܸܬ: ܘܒܸܣܢܵܝܵܐ ܝَܘܸܬ ܬܲܥܠܸܡܬܘܼܗܝ. ܘܐܸܢ ܒܸܣܢܵܝܵܐ ܝَܘܸܬ ܬܲܥܠܸܡܬܹܗ: ܐܵܦ ܬܲܥܠܸܡܬܘܼܟܼ ܣܢܝܼܬܵ‌ܐ ܝܼܠܵܗ̇. ܘܐܸܢ ܩܵܛܝܼܘܼܟܼ ܠܒܪܘܿܢܘܼܟܼ ܨܦܵܝܼ ܝܼܠܹܗ ܟܡܵܐ ܙܵܘܕܵܐ ܩܵܛܝܼܵܐ ܕܬܲܥܠܡܵܢܵܐ ܕܟܠ. ܫܩܘܿܠ ܛܘܼܦ̮ܣܵܐ ܡ̣ܢ ܓܵܢܘܼܟܼ ܘܝَܠܘܿܦܠܹܗ: ܕܐܸܠܹܗ ܝܲܠܦܸܬ ܠܹܐ ܒܲܥܝܸܬ: ܗ̇ܘ ܕܩܲܡ ܝܵܗَܒܸܠܘܼܟܼ ܪܹܝܓܵܐ: ܥܒ̣ܝܼܕܸܬܠܹܗ ܐܵܦ ܐܲܢَܬ ܚܲܕَ ܪܹܝܓܘܼܗܝ. ܕܟ̣ܘܿܪ ܠܡܵܪܘܼܟܼ ܟܲܕ ܬܲܥܠܘܼܡܹܐ ܝَܘܸܬ: ܒܬܲܥܠܸܡܬܵ‌ܐ ܕܪܹܝܓܘܼܟܼ ܠܓܵܢܘܼܟܼ ܬܲܥܠܘܼܡܹܐ ܝَܘܸܬ. ܐܵܦ ܐܲܢَܬܿ ܗܕܝܼܪܵܐ ܝَܘܸܬ ܐܲܟ̣ܘܵܬܘܼܗܝ ܕܦܵܝܫܸܬ ܡܬܘܼܥܠܡܵܐ ܡ̣ܢ ܒܲܪܝܵܢܘܼܟܼ ܐܸܢ ܠܵܐ ܡܲܫܦܸܟܼܸܬܿ ܪ̈ܲܚܡܹܐ ܥܲܠ ܪܹܝܓܘܼܟܼ: ܕܥܒ̣ܝܼܕܠܹܗ ܣܲܟܼܠܘܼܬܵܐ ܒܝܼܘܼܟܼ܀ ܐܵܦ ܠܵܐ ܥܲܠܘܼܟܼ ܒܸܬ ܗܵܘܝܼ ܪ̈ܲܚܡܹܐ: ܕܠܵܐ ܡܪܘܼܚܸܡܠܘܼܟܼ ܥܲܠ ܒܪܘܿܢܵܐ ܕܒܲܝܬܘܼܟܼ. ܐܸܢ ܪܹܝܓܘܼܟܼ ܘܒܪܘܿܢܘܼܟܼ ܡܬܲܥܠܘܼܡܹܐ ܝَܘܸܬ: ܒܲܣ ܗܘܝܼ ܚܲܕَ ܡ̣ܢ ܪܹ̈ܝܓܵܘܵܬܹܐ ܘܒܢܘܿܢܹ̈ܐ. ܗܘܝܼ ܠܹܗ ܪܹܝܓܵܐ ܠܡܵܪܵܐ ܕܟܠ: ܐܵܦ ܝܵܪܘܿܬܵܐ ܠܡܲܪܝܸܬܵܢܵܐ ܕܟܠ. ܐܸܢ ܣܢܝܼܬܵ‌ܐ ܝَܠܵܗ̇ ܐܸܠܘܼܟܼ ܬܲܥܠܸܡܬܹܗ: ܒܲܣ ܠܵܐ ܬܲܥܠܸܡܸܬ ܠܪܝܼܓܘܼܟܼ ܘܠܒܪܘܿܢܘܼܟܼ܀ ܘܐܸܢ ܠܹܐ ܡܵܨܹܐ ܚܘܼܒܘܼܟܼ ܕܡܲܚܦܸܠ: ܕܵܐܟ̣ܝܼ ܒܸܬ ܡܲܚܦܸܠ ܪܵܚܸܡ ܟܠ. ܟܹܐ ܒܲܥܝܸܬ ܕܬܲܥܠܸܡܸܬ ܠܝܵܪܘܼܬܘܼܟܼ: ܘܒܓܵܢܘܼܟܼ ܗܵܘܸܬܿ ܥܵܨܝܼ ܥܲܠ ܝܘܼܪܬܵܢܵܐ. ܟܹܐ ܒܲܥܝܸܬ ܕܙܲܒܛܸܢܸܬܿ ܠܣܘܼܣܵܐ: ܘܒܓܵܢܘܼܟܼ ܗܵܘܸܬ ܚܲܕَ ܟܹܘܝܼ. ܢܘܼܚܬܵ‌ܐ ܒܓܘܼܡܠܵܐ ܡܚܵܝܵܐ ܝَܘܸܬ: ܘܥܒܼܝܼܕܘܼܗܝ ܝَܘܸܬ ܦܘܼܡܘܼܟܼ ܕܠܵܘ̈ܛܵܬܵ‌ܐ܀ ܗܲܝܘܵܢܹ̈ܐ ܬܚܘܿܬ ܢܝܼܪܵܐ ܒܸܣܝܵܪܵܐ ܝَܘܸܬ: ܘܐܲܢَܬ ܒܲܥܝܸܬ ܕܗܵܘܸܬ ܚܡܵܪܵܐ ܟܹܘܝܼ. ܒܟܲܠܒܵܐ ܕܢܵܒܸܚ ܟܹܐ ܢܵܓ̰ܘܸܬ: ܘܐܲܝܟܼ ܢܵܒ̣ܵܠ ܡܲܣܠܝܼ ܒܹܨܘܼܪܘܼܬܵܐ ܕܡܲܚܪܘܼܒ̣ܘܼܟܼ ܝܼܠܵܗ̇. ܡܲܚܸܒ ܚܘܼܒܵܐ ܕܗܲܝܸܪܘܼܟܼ ܒܘܼܪܟܬܵ‌ܐ ܚܘܼܫ ܝܵܠܸܦ ܦܘܼܡܘܼܟܼ: ܘܡܲܟܠܝܼ ܡܸܢܹܗ ܠܵܘܛܵܬܹ̈‌ܐ ܕܠܵܐ ܢܟ̣ܸܦܬܵ‌ܐ ܘܟܲܠܒܵܐ ܡܘܼܣܠܝܼܵܐ ܝَܢܵܐ: ܘܡܓܘܼܢܓܸܙܵܐ ܝَܠܹܗ ܡܸܢܲܝܗܝ ܠܲܝܵܛܵܐ ܥܲܠ ܟܸܪܫ̃ܵܠܵܐ ܓܸܚܟܵܐ ܝَܘܸܬ: ܘܒܘܼܫ ܦܟ̰ܝܼܠܵܐ ܝَܠܹܗ ܡܸܢܹܗ ܪܸܥܝܵܢܘܼܟܼ. ܦܟ̰ܝܼܠܘܼܬܹܗ ܕܗ̇ܘ ܕܟܝܵܢܵܐ ܝܼܠܵܗ̇: ܐܝܼܢܵܐ ܕܝܼܘܼܟܼ ܕܪܸܙܵܝܘܼܟܼ ܝܼܠܵܗ̇. ܒܗ̇ܘ ܦܟ̰ܝܼܠܵܐ ܐܵܦ ܕܘܿܙ: ܒܲܪܢܵܫܵܐ ܡܵܢܟܼܘܼܣܹܐ ܝَܠܹܗ ܓܵܢܘܼܗܝ܀ ܠܕܹܐܒ̣ܵܐ ܕܟܦܝܼܢܹܗ ܟܹܐ ܣܵܢܸܬ: ܘܒܸܣܠܵܒܵܐ ܝَܠܵܗ̇ ܠܟܦܝܼܢܹ̈ܐ ܣܒܼܥܹܝܬܘܼܟܼ. ܢܘܼܪܵܐ ܛܸܦܝܵܐ ܡܲܟ̰ܡܘܼܝܹܐ ܝَܘܸܬ: ܘܚܲܕَ ܢܘܼܪܵܐ ܐَܚܹܪَܢܵܐ ܡܲܠܗܘܼܝܹܐ ܝَܘܸܬ. ܡܲܟ̰ܡܘܼܝܹܐ ܝܘܲܚ ܠܲܗܵܐ: ܘܢܘܼܪܵܐ ܒܓܵܘܲܢ ܛܸܦܝܵܐ ܝܼܠܹܗ. ܠܚܘܼܘܹܐ ܙܥܘܿܪܵܐ ܒܸܣܢܵܝܵܐ ܝَܘܸܬ: ܘܫܸܪܝܵܐ ܝܼܠܹܗ ܒܓܵܘܘܼܟܼ ܬܲܢܝܼܢܵܐ܀ ܟܹܐ ܩܲܛܠܸܬܿ ܐܵܦ ܠܥܵܩܸܪܒ̣ܵܐ: ܘܒܘܼܫ ܡܸܢܵܗ̇ ܟܹܐ ܢܵܐܸܨ ܠܸܫܵܢܘܼܟܼ. ܐܵܗܵܐ ܡܲܚܙܵܝܬܵ‌ܐ ܬܘܼܪܸܨܠܹܗ: ܐܲܠܵܗܵܐ ܩܵܕَܡ ܒܢܲܝܢܵܫ̈ܵܐ. ܩܵܐ ܕܒܐܲܢܹܐ ܒܲܪ̈ܵܝܹܐ ܝܵܠܦܲܚ: ܒܝܼܫܵܬܹ̈‌ܐ ܕܓܵܘܵܝܲܢ. ܕܗَܘܵܘ ܠܗَܘܿܢ ܪܸ̈ܓ̰ܒܹܐ ܘܚܲܝ̈ܘܵܬܵܐ: ܝܵܠܦܲܚ ܕܐܸܠܲܝܗܝ ܟܹܐ ܡܲܕܡܲܚ܀ ܕܠܛܵܒܹ̈ܐ ܠܹܐ ܡܲܕܡܲܚ: ܠܙܵܠܝܼܡܹ̈ܐ ܟܹܐ ܡܲܕܡܲܚ ܒܪܹܐܠܹܗ ܒܵܪܘܿܝܵܐ ܒܝܼܫܵܬܹ̈‌ܐ. ܕܒܝܼܵܝܗܝ ܡܲܢܚܸܣ ܒܝܼܫ̈ܵܬܲܢ. ܘܐܸܢ ܟܲܕ ܠܐܲܢܹܐ ܒܝܼܫܵܬܹ̈‌ܐ: ܕܠܒܲܕܲܪ ܡ̣ܢ ܓܵܢܘܼܟܼ ܒܸܛܪܵܕܵܐ ܝَܘܸܬ. ܟܡܵܐ ܠܵܙܸܡ ܛܲܪܕܸܬ ܡ̣ܢ ܓܵܢܘܼܟܼ. ܒܝܼܫܵܬܹ̈‌ܐ ܕܓܵܘܘܼܟܼ ܝَܢܵܐ: ܩܵܐ ܡܘܼܕܝܼ ܪܸܓ̰ܒܵܐ ܒܸܩܛܵܠܵܐ ܝَܘܸܬ: ܩܵܐ ܕܠܵܐ ܡܚܲܙܕܸܓܠܘܼܟܼ. ܗܵܐ ܠܸܫܵܢܘܼܟܼ ܕܒܸܩܛܵܠܘܼܟܼ ܝܼܠܹܗ: ܐܘܿܦ ܡ̣ܢ ܚܲܝܹ̈ܐ ܕܗܘܼܕܪܹ̈ܐ ܝܼܢܵܐ. ܓ̰ܘܼܠܘܼܟܼ ܐܵܦ ܥܵܒܵܝܘܼܟܼ: ܡ̣ܢ ܪܸܓ̰ܒܵܐ ܙܲܒܘܼܢ ܟܹܐ ܦܵܠܸܬ. ܪܸ̈ܓ̰ܒܹܐ ܐَܚܹܪَ̈ܢܹܐ ܕܓܵܘ ܪܹܫܘܼܟܼ. ܡ̣ܢ ܓܵܘ ܣܲܥܪܵܐ ܟܹܐ ܨܵܝܕܸܬܠܗَܘܿܢ܀ ܘܫܲܒ̣ܥܵܐ ܬܲܪ̈ܥܵܢܹܐ ܕܓܵܘ ܪܹܫܘܼܟܼ: ܡܦܵܠܘܿܛܹܗ ܝܼܢܵܐ ܘܡܲܥܒ̣ܘܼܪܹܐ ܓ̰ܵܠܵܠܝܹ̈ܐ ܡܲܥܒ̣ܘܼܪܹܐ ܝَܢܵܐ ܬܲܪ̈ܥܵܢܹܐ ܕܫܡܸܥܬܵܐ: ܡܚܵܝܬܵ‌ܐ ܕܲܪܗܲܩ ܕܲܓܲܠܬܵ‌ܐ. ܡܲܥܒ̣ܘܼܪܹܐ ܝَܢܵܐ ܬܲܪ̈ܥܵܢܹܐ ܕܥܲܝܢܹ̈ܐ: ܓܵܫܲܩܬܵ‌ܐ ܣܢܝܼܬܵ‌ܐ ܘܡܘܼܣܠܝܼܬܵ‌ܐ. ܡܲܥܒ̣ܘܼܪܹܐ ܝَܢܵܐ ܬܲܪ̈ܥܵܢܹܐ ܕܫܩܲܠܬܵܐ ܕܢܵܦܲܣ: ܪܹܝܚܵܐ ܙܲܠܝܼܠܵܐ ܕܒܸܣܡܹ̈ܐ܀ ܐܵܦ ܦܘܼܡܵܐ ܬܲܪܥܵܐ ܓܘܼܪܵܐ: ܦܠܵܛܵܐ ܝܼܠܹܗ ܡܸܢܹܗ ܥܵܘܠܵܐ ܓܘܼܪܵܐ. ܝܵܐ ܩܲܪܩܲܦܬܵ‌ܐ ܕܥܒ̣ܝܼܕܬܵܐ ܝܼܠܵܗ̇: ܓܸܦܝܼܬܵ‌ܐ ܡܠܝܼܬܵ‌ܐ ܓܹܢܵܒ̣̈ـܹܐ. ܒܐܵܗܵܐ ܨܲܠܡܵܐ ܕܒܲܪܢܵܫܵܐ: ܡܝܘܼܩܪܵܐ ܝَܠܹܗ ܡ̣ܢ ܟܠ ܒܲܪܢܵܫܵܐ. ܒܐܵܗܵܐ ܨܲܠܡܵܐ ܓܘܼܪܵܐ ܡ̣ܢ ܟܠ: ܡܒܵܨܘܿܪܹܐ ܝܼܠܹܗ ܓܵܢܘܼܗܝ ܒܲܪܢܵܫܵܐ܀ ܒܐܵܗܵܐ ܨܲܠܡܵܐ ܦܝܼܫܠܹܗ ܡܝܘܼܩܪܵܐ: ܐܵܕܵܡ ܡ̣ܢ ܟܠܵܝܗܝ ܒܸܪ̈ܝܵܬܹ‌ܐ. ܒܐܵܗܵܐ ܨܲܠܡܵܐ ܥܒ̣ܝܼܪܹܗ ܒܩܝܼܪܲܬ ܒܝܼܫܵܐ: ܘܡܘܼܥܒܸܪܹܗ ܠܓܵܘ ܛܠܵܩܵܐ. ܐܲܠܵܗܵܐ ܦܬܝܼܚܠܹܗ ܐܸܠܲܢ ܢܵܬܝܵܬܹ̈‌ܐ: ܕܒܘܼܫ ܙܵܘܕܵܐ ܫܲܡܥܲܚ ܢܵܡܘܿܣܘܼ̈ܗܝ. ܥܟ̰ܝܼܡܲܝܗܝ ܠܹܗ ܒܝܼܫܵܐ ܢܵܬ̈ܝܵܬܲܢ: ܘܟܠܹܐ ܠܹܗ ܦܘܼܩܕܵܢܵܐ ܠܒܲܕܲܪ܀ ܒܢܵܬܝܵܬܹ̈‌ܐ ܥܟ̰ܝܼܡܹ̈ܐ ܡܬܲܩܬܘܼܩܹܐ ܝܼܠܹܗ: ܪܲܥܡܵܐ ܘܩܵܠܵܐ ܕܩܸܪܝܵـܢܵܐ. ܠܲܝܬ ܬܵܡܵܐ ܚܲܕَ ܟ̰ܸܠܦܵܐ ܕܥܵܒܸܪ: ܗ̇ܘ ܩܵܠܵܐ ܕܡ̣ܢ ܟܠ ܒܘܼܫ ܢܵܙܸܟ. ܢܵܛܸܪ ܬܲܪܥܵܐ ܒܸܟܠܵܝܵܐ ܝَܠܹܗ ܩܵܕَܡ ܢܵܬܵ‌ܐ: ܕܗ̇ܘ ܝܼܠܹܗ ܕܟܹܐ ܥܵܟ̰ܸܡ ܘܦܵܬܸܚ. ܟܠ ܩܵܠܵܐ ܕܐܵܬܹܐ ܠܢܵܬܲܢ: ܦܘܼܡܵܐ ܕܢܵܬܲܢ ܟܹܐ ܛܵܥܸܡ ܠܹܗ܀ ܐܸܢ ܐܝܼܬ ܒܝܼـܹܗ ܚܵܝܹ̈ܐ ܟܹܐ ܦܵܠܸܛܠܹܗ: ܘܐܸܢ ܣܲܡܵܐ ܕܡܵܘܬܵܐ ܟܹܐ ܒܲܠܥܝܼܠܹܗ. ܪܸܙܵܝ ܒܝܼܫܵܐ ܟܹܐ ܩܵܐܸܡ: ܐܲܝܟܼ ܓܘܼܪܵܐ ܥܲܠ ܗܲܕܵܡܹ̈ܐ. ܠܦܘܼܡܵܐ ܟܹܐ ܡܵܠܸܦ ܠܵܘܛܵܬܹ̈‌ܐ: ܘܲܠܠܸܫܵܢܵܐ ܨܵܥܪ̈ܝܵܬܹ‌ܐ. ܡܵܠܘܿܦܹܐ ܝܼܠܹܗ ܠܐܝܼܕܵܐ ܬܲܪܬܹܝ: ܐܝܼܡܲܢ ܕܦܫܝܼܛܠܵܗ̇ ܘܫܩܝܼܠܵܗ̇ ܓܲܪܫܵܐ܀ ܠܥܲܝܢܵܐ ܡܵܠܘܿܦܹܐ ܝܼܠܹܗ ܨܢܝܼܥܘܼܬܵܐ: ܕܓܵܢܒ̣ܵܐ ܠܐܵܪܵܐ ܕܚܙܲܝܬܘܼܗܝ. ܠܚܲܕَ ܚܲܕَ ܡ̣ܢ ܪܸ̈ܓ̣ܫܹܐ ܒܲܪ̈ܵܝܹܐ: ܬܲܪܬܹܝ ܡܵܠܘܿܦܹܐ ܝَܠܹܗ. ܟܬܵܒ̣ܵܐ ܘܟܝܵܢܵܐ ܒܸܗܘܵܝܵܐ ܝَܢܵܐ: ܡܲܠܦܵܢܹ̈ܐ ܩܵܐ ܒܢܲܝܢܵܫ̈ܵܐ. ܕܡܵܪܸܡ ܩܵܛܝܼܝܹܗ ܒܟܹܐܢܘܼܬܵܐ: ܘܬܲܥܠܸܡ ܠܗ̇ܘ ܕܥܵܒܸܕ ܢܲܙܵܢܘܼܬܵܐ ܒܝܼـܹܗ܀ ܠܹܐ ܝَܠܹܗ ܒܸܚܒܵܪܵܐ ܕܐܵܦ ܗ̇ܘ ܒܝܼܵܗَܒ̣ܘܼܗ̇ ܝܼܠܹܗ: ܓܵܢܘܼܗܝ ܠܩܵܛܝܼܵܐ ܕܟܹܐܢܘܼܬܵܐ. ܗ̇‌ܝ ܕܝܼܘܵܢ ܕܕܝܼܢܹܗ ܒܸܬ ܕܵܝܢܵܐ ܠܹܗ: ܩܵܛܝܼܵܐ ܕܫܩܝܼܠܹܗ ܒܸܬ ܡܲܢܚܸܣܠܹܗ. ܠܹܐ ܝَܘܸܬ ܣܢܝܼܩܵܐ ܥܲܠ ܢܵܡܘܿܣܵܐ: ܕܡܲܠܦܵܢܵܐ ܓܘܼܪܵܐ ܥܲܡܘܼܟܼ ܝܼܠܹܗ ܠܐܵܚܘܿܢܘܼܟܼ ܡܲܚܸܒ ܐܲܝܟܼ ܓܵܢܘܼܟܼ: ܕܝܵܬܸܩܹ̈ܐ ܚܲܕܬܵܐ ܐܵܗܵܐ ܝܼܠܵܗ̇܀ ܥܲܠܘܼܟܼ ܒܝܼܫܬܵܐ ܠܵܐ ܥܲܒ̣ܕܸܬ. ܗܵܐ ܢܵܡܘܿܣܵܐ ܘܲܢܒ̣ܝܼ̈ـܹܐ. ܐܵܦ ܥܲܬܝܼܩܬܵ‌ܐ ܘܚܲܕܬܵܐ: ܒܘܼܬ ܐܵܕܵܡ ܝَܢܵܐ ܬܸܪܘܸܢܬܲܝܗܝ. ܕܥܲܬܝܼܩܬܵ‌ܐ ܓܒ̣ܝܼܠܵܐ ܡ̣ܢ ܥܲܦܪܵܐ: ܘܒܚܲܕܬܵܐ ܦܪܝܼܩܵܐ ܡ̣ܢ ܡܵܘܬܵܐ. ܫܘܼܒ̣ܚܵܐ ܠܡܵܪܵܐ ܕܬܸܪܘܸܢܬܲܝܗܝ: ܕܒܘܼܬ ܕܝܼܘܼܗܝ ܝَܢܵܐ ܬܸܪܘܸܢܬܲܝܗܝ܀ ܒܬܲܥܠܸܡܬܵ‌ܐ ܘܒܡܲܢܟܼܸܣܬܵ‌ܐ: ܩܵܢܲܚ ܚܲܝܹ̈ܐ ܒܛܲܝܒܘܼܬܹܗ. ܘܫܲܟܪܲܚ ܠܒܵܒܵܐ ܘܠܒܪܘܿܢܵܐ: ܘܠܪܘܼܚܩܘܼܕܫܵܐ ܐܹܝܢ ܘܐܵܡܹܝܢ܀

ܡܕܪܫܐ.

     ܥܘܼܢܵܝܵܐ. ܒܲܨܠܘܿܬܼ ܟܹܐܢܹ̈ܐ ܕܲܫ̣ܦܲܪܘ ܠܵܟܼ: ܚܘܼܢ ܠܚܲܛܵܝܹ̈ܐ ܕܩܵܪܹܝܢ ܠܵܟܼ. ܘܫܲܕܲܪ ܠܲܢ ܡ̣ܢ ܒܹܝܬܼ ܓܲܙܵܟܼ: ܚܢܵܢܵܐ ܘܪ̈ܲܚܡܹܐ ܘܦܘܼܪܩܵܢܵܐ.

     ܒܵܬܹ̈‌ܐ. ܠܵܟܼܘܼ ܩܵܪܹܐ ܚܲܛܵܝܵܐ: ܕܲܒܼܫܘܼܒ̣ܩܵܢܵܟܼ ܢܸܙܕܲܕܲܩ. ܠܘܵܬ̣ܵܟܼ ܓܵܥܹ̇ܐ ܚܲܝܵܒܼܵܐ: ܕܐܸܫܛܵܪܹܗ ܒܵܟܼ ܢܸܬ̣ܩܲܕܲܕ. ܒܫܘܼܦܪܵܟܼ ܚܵܐܲܪ ܟܠ ܕܲܣܢܸܐ: ܕܒ̣ܵܟܼ ܬܸܨܛܲܒܲܬ̣ ܣܲܢܝܘܼܬܹܗ. ܠܘܵܬܼܵܟܼ ܗَܘܼ ܚܵܐܲܪ ܟܠܫܵܥ: ܕܡܸܢܵܟܼ ܟܠܢܵܫ ܢܸܬ̇ܬܲܪܣܸܐ‌܀ ܠܵܟܼ ܡܵܪܝ ܚܵܝ̇ܪܵܐ ܡܲܪܥܝܼܬܼܵܟܼ: ܕܬܸܟܼܠܸܐ ܡܸܢܵܗ̇ ܢܸܟ̣ܝܵܢܹ̈ܐ. ܠܵܟ̣ܘܼ ܚܵܝ̇ܪܝܼܢ ܡܲܟܿܝܼܟܹ̈ܐ: ܕܲܒ̣ܪܘܼܡܪܵܡܵܟܼ ܢܸܬ̣ܥܲܠܘܿܢ. ܛܵܒ̣ܵܐ ܕܡ̣ܢ ܡܬ̣ܘܿܡ ܚܲܢܵܢܵܐ ܗَܘܼ: ܪܲܚܸܡ ܡܵܪܝ ܐܲܝܟܼ ܕܲܡܥܵܕܲܬ̇. ܠܵܐ ܡܵܪܝ ܬܸܪܓܲܙ ܥܲܠ ܥܲܦܪܲܢ: ܕܲܟ̣ܡܵܐ ܕܝܵܪܹܒܼ ܕܲܚܝܼܚܵܐ ܗَܘܼ‌܀ ܐܲܢَܬ̇ ܗَܘ̣ ܡܵܪܝ ܐܝܼܬܲܝܟ ܒܠܚܘܿܕܼ: ܫܵܡܲܥ ܟܠ ܐܵܦ ܥܵܢܹ̇ܐ ܟܠ. ܠܵܐ ܬܹܐܚܘܿܕܼ ܐܘܿ ܒܲܪ ܛܵܒ̣ܵܐ: ܬܲܪܥܵܐ ܕܓܲܙܵܟܼ ܥܲܬ̇ܝܼܪܵܐ. ܦܬܲܚ ܡܵܪܝ ܬܲܪܥܵܐ ܠܲܨܠܘܿܬܲܢ: ܘܬܸܬ̣ܩܲܒܲܠ ܐܲܝܟܼ ܩܘܼܪܒܵܢܵܐ. ܓܥܵܬܲܢ ܬܸܗܘܸܐ ܠܬܲܪܥܘܼܬ̣ܵܟܼ: ܘܲܠܨܸܒ̣ܝܵܢܵܟ ܒܵܥܘܼܬܲܢ‌܀

܀ܒܘܪ̈ܟܬ̣ܐ܀

     ܝܵܡܵܐ ܓܘܼܪܵܐ: ܕܡܸܠܝܵܐ ܫܠܵܡܵܐ ܘܡܫܲܝܢܘܼܬܵܐ: ܡܓ̰ܵܘܸܒܝܼ ܐܹܝܢ ܡܵܪܝ. ܫܲܢܸܢ ܥܵܠܡܵܐ: ܫܓܼܝܼܫܵܐ ܘܚܒ̣ܝܼܛܵܐ ܒܕܘܼܒܵܪܘܼܬܵܐ܀ ܘܐܲܡܪܝܼ ܐܵܡܹܝܢ܀ [ܘܗܵܕܟ̣ܵܐ ܡܓ̰ܵܘܸܒܝܼ ܒܟܠܲܝܗܝ ܦܸܬܓ̣ܵܡܹ̈ܐ].

     ܫܲܢܸܢ ܠܸܒܵܐ: ܕܡܲܠܟܹ̈ܐ ܟܠܵܝܗܝ ܠܒܲܝܬܵܝܘܼܬܵܐ: ܘܡܒܲܛܸܠ ܦܠܵܫܹ̈ܐ: ܥܲܡ ܕܘܼܪ̈ܫܹܐ ܡ̣ܢ ܥܵܡܲܪܬܵܐ܀

     ܕܟܼܘܿܪܹܗ ܩܵܘܠܘܼܟܼ: ܕܠܟܸܣ ܪܹܫܵܐ ܕܸܫܠܝܼܚܘܼܬܵܐ: ܗ݁ܘ ܒܲܪ ܝܘܿܢܵܐ: ܕܩܘܼܘܸܠܘܼܟܼ ܐܸܠܹܗ ܒܫܲܪܝܼܪܘܼܬܵܐ܀

     ܕܬܲܪ̈ܥܹܐ ܕܸܫܝܘܿܠ: ܠܹܐ ܙܲܪܒܸܢܝܼ ܠܥܹܕܬܵܐ ܡܓܘܼܒܹܝܬܵܐ: ܗ݁ܝ ܕܡܓܘܼܒܝܵܗ݁ ܠܘܼܟܼ ܡܟܠܵܝܗܝ ܥܲܡܡܹ̈ܐ ܘܡ̣ܢ ܐܸܡܘܵܬܹ̈ܐ܀

     ܠܪܲܥܝܘܿܗ݁ ܒܲܪܸܟܼ: ܘܡܲܩܝܸܡ ܘܢܛܘܿܪܹܠَܗ ܒܸܙܗܝܼܪܘܼܬܵܐ: ܕܡܲܪܥܹܐ ܠܦܵܐܪ̈ܘܿܗ݁ ܐܵܦ ܙܹܐ ܠܘܲܥܢ̈ܘܿܗ݁ ܒܬܲܡܝܼܡܘܼܬܵܐ܀

     ܗܲܒَ̣ܠܹܗ ܡܵܪܲܢ: ܚܲܝܠܵܐ ܘܙܲܪܒܵܐ ܘܓܲܢَܒܵܪܘܼܬܵܐ: ܩܵܐ ܕܓܼܵܠܸܒܠܗَܘܿܢ ܠܟܠ ܣܲܢܝܵܢ̈ܘܼܗ݁ ܒܢܲܝ̈ ܛܵܥܝܘܼܬܵܐ܀

     ܠܬܸܓܼܡܹ̈ܐ ܕܟܵܗܢ̈ܘܿܗ݁: ܪ̈ܚܝܼܡܹܐ ܘܚܩܝܼܪܹ̈ܐ ܫܩܝܼܠܹ̈ܐ ܦܸܕܬܵܐ: ܒܲܪܸܟܼ ܐܸܠܵܝܗܝ: ܘܩܲܒܸܠ ܡܸܢܵܝܗܝ ܟܠ ܒܘܼܪ̈ܟܵܬܹܐ܀

     ܘܠܸܡܫܲܡܫܵܢܹ̈ܐ: ܕܕܵܐܸܡ ܒܲܠܓܝܼ ܒܝܲܕ ܬܸܫܡܸܫܬܵܐ: ܥܒ̣ܘܿܕܠܗَܘܿܢ ܨܸܦܝܹ̈ܐ: ܩܵܐ ܕܚܲܕܡܝܼܠܘܼܟܼ ܒܩܲܕܝܼܫܘܼܬܵܐ܀

     ܐܵܦ ܠܐܵܡܪܵܢܵܐ: ܕܫܗܸܪܹܗ ܓܵܘܵܘܿܗ݁ ܒܕܵܐܸܡܘܼܬܵܐ: ܡܲܚܫܲܚ ܠܢܘܼܗܪܵܐ: ܕܗܸܟ̰ ܠܹܐ ܩܵܢܹܐ ܚܸܫܟܵܢܘܼܬܵܐ܀

     ܡܗܲܝܡܢ̈ܘܼܟܼ ܕܡܵܚܝܼ: ܚܲܨܵܐ ܒܝܼܘܿܗ݁ ܒܗܲܝܡܢܵܘܼܬܵܐ: ܢܲܛܪܸܬ ܐܸܠܵܝܗܝ ܡ̣ܢ ܚܘܼܙܕܵܓܹ̈ܐ ܘܬܲܪ̈ܩܲܠܝܵܬܹܐ܀

     ܠܣܵܒ̣ܹ̈ܐ ܕܓܵܘܵܝܗܝ: ܡܗܲܝܸܪ ܘܣܢܘܿܕܠܗَܘܿܢ ܒܡܲܟܝܼܟܼܘܼܬܵܐ: ܘܐܵܦ ܠܲܥܠܲܝܡܵܝܗ̈ܝ: ܡܲܚܕܝܼ ܐܸܠܵܝܗܝ ܒܙܲܕܝܼܩܘܼܬܵܐ܀

     ܘܐܵܦ ܩܵܐ ܛܠܵܝܹ̈ܐ: ܘܐܵܦ ܝܵܠܘܼܕܹ̈ܐ ܒܢܲܝ̈ ܬܲܪܒܝܼܬܵܐ: ܡܓܲܪܘܸܣ ܐܸܠܵܝܗܝ ܘܫܵܩܠܝܼ ܩܵܘܡܬܵܐ ܠܟܵܡܝܼܠܘܼܬܵܐ܀

     ܘܡܲܣܩܲܚ ܫܘܼܒ̣ܚܵܐ: ܠܒܵܒܵܐ ܘܠܒܪܘܿܢܵܐ ܘܲܠܪܘܼܚܩܘܼܕܫܵܐ: ܘܥܲܠܲܢ ܪ̈ܲܚܡܘܼܗܝ: ܒܟܠ ܥܸܕܵܢܹ̈ܐ ܐܵܡܹܝܢ ܘܐܵܡܹܝܢ܀

top

ܬܠܬܒܼܫܒܐ ܕܒܥܘܬܼܐ

ܟܪܘܙܘܬ̣ܐ.

ܢܩܘܼܡ ܫܲܦܝܼܪ ܟܠܲܢ ܒܚܲܫܵܐ ܘܒܲܚܦܝܼܛܘܼܬ̣ܵܐ ܛܵܠܒܲܚ ܘܐܵܡܪܲܚ: ܡܵܪܲܢ ܥܒ̣ܘܿܕ ܪ̈ܲܚܡܹܐ ܥܲܠܲܢ. (ܘܓ̰ܲܘܸܒ ܥܲܡܵܐ. ܡܵܪܲܢ ܥܒ̣ܘܿܕ ܪ̈ܲܚܡܹܐ ܥܲܠܲܢ.) ܡܲܩܸܦ. ܐܲܠܵܗܵܐ ܐܝܼܬܼܝܵܐ ܓܢܝܼܙܵܐ ܚܲܕ ܟܝܵܢܵܐ ܣܓܼܝܼܕܵܐ ܬܠܝܼܬܵܝܵܐ ܕܩܢܘܿܡܹ̈ܐ: ܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܕܫܵܐ: ܒܸܛܠܵܒܵܐ ܝَܘܲܚ ܡܸܢܘܼܟܼ܀ ܡܬܘܿܡܵܝܵܐ ܕܟܸܣܝܵܐ ܗَܘܵܐ ܒܝܼܲܕ ܦܸܠܚܵܢ̈ܘܼܗ‌ܝ ܓܠܹܐܠܹܗ ܘܙܪܸܩܠܹܗ ܠܟܠ:  ܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܕܫܵܐ: ܒܸܛܠܵܒܵܐ ܝَܘܲܚ ܡܸܢܘܼܟܼ܀  ܐܵܟ̣ܠܵܢܵܐ ܕܚܲܡ ܕܒܪܸܡܙܵܐ ܕܚܲܝܠܹܗ ܒܫܵܦܵܩܲܬܹܗ ܕܒ̣ܝܼܩܵܐ ܝَܠܹܗ ܠܟܠ:  ܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܕܫܵܐ: ܒܸܛܠܵܒܵܐ ܝَܘܲܚ ܡܸܢܘܼܟܼ܀  ܛܵܒ̣ܵܐ ܝَܠܹܗ ܕܒܘܼܫܵܝܘܼܬܵܐ ܕܫܵܦܵܩܲܬܹܗ ܡ̣ܢ ܠܵܐ ܡܸܢܕܝܼ ܒܪܹܐܠܹܗ ܟܠ:  ܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܕܫܵܐ: ܒܸܛܠܵܒܵܐ ܝَܘܲܚ ܡܸܢܘܼܟܼ܀  ܪܵܡܵܐ ܕܦܝܼܫܠܹܗ ܨܸܠܝܵܐ ܠܟܸܣ ܥܲܦܪ̈ܵܢܹܐ ܕܦܲܠܸܛܠܗَܘܿܢ ܡ̣ܢ ܛܘܼܠܩܵܢܵܐ:  ܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܕܫܵܐ: ܒܸܛܠܵܒܵܐ ܝَܘܲܚ ܡܸܢܘܼܟܼ܀  ܪܵܥܝܵܐ ܛܵܒ̣ܵܐ ܕܦܠܸܛܠܹܗ ܠܛܵܐܘܼܝܹܐ ܥܲܠܲܢ: ܘܡܘܼܫَܟ̰ܸܚܠܹܗ ܠܛܘܼܠܩܵܢܹܗ ܕܟܝܵܢܲܢ:  ܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܕܫܵܐ: ܒܸܛܠܵܒܵܐ ܝَܘܲܚ ܡܸܢܘܼܟܼ܀  ܚܲܙܢܵܐ ܓܘܼܪܵܐ ܕܟܠ ܥܘܼܕܪ̈ܵܢܹܐ: ܘܠܒܲܢܕܲܪ ܕܟܠ ܢܝܼܫܹ̈ܐ:  ܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܕܫܵܐ: ܒܸܛܠܵܒܵܐ ܝَܘܲܚ ܡܸܢܘܼܟܼ܀  ܚܲܢܵܢܵܐ ܘܡܸܠܝܵܐ ܪ̈ܲܚܡܹܐ ܕܒܪ̈ܲܚܡܘܼܗ‌ܝ ܟܹܐ ܚܵܐܹ̇ܢ ܠܟܠ:  ܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܕܫܵܐ: ܒܸܛܠܵܒܵܐ ܝَܘܲܚ ܡܸܢܘܼܟܼ܀  ܒܡܲܪܝܵܟ̣ܬܵ‌ܐ ܕܒܹܐܢܵܐ ܘܦܸܪܝܘܼܬܵܐ ܕܫܵܦܵܩܲܬ ܕܒܚܘܼܒܹܗ ܡܲܪܝܘܼܟ̣ܹܐ ܝَܠܹܗ ܒܹܐܢܹܗ ܘܡܲܙܝܘܼܕܹܐ ܝَܠܹܗ ܫܵܦܵܩܲܬܹܗ:  ܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܕܫܵܐ: ܒܸܛܠܵܒܵܐ ܝَܘܲܚ ܡܸܢܘܼܟܼ܀  (ܐܲܩܸܦ). ܫܡܸܥ ܒܵܥܘܼܬܲܢ: ܘܪܲܚܸܡ ܥܲܠܲܢ‌܀  ܘܓ̰ܲܘܸܒܝܼ:  ܫܡܸܥ ܒܵܥܘܼܬܲܢ: ܘܪܲܚܸܡ ܥܲܠܲܢ‌܀ (ܐܲܩܸܦ). ܒܵܒܵܐ ܚܲܝܵܐ: ܪܲܚܸܡ ܥܲܠܲܢ‌܀ ܒܪܵܐ ܡܬܘܿܡܵܝܵܐ: ܪܲܚܸܡ ܥܲܠܲܢ‌܀ ܛܸܫܝܵܐ ܒܟܝܵܢܹܗ: ܪܲܚܸܡ ܥܲܠܲܢ‌܀ ܕܲܝܵܢܵܐ ܕܟܠ: ܪܲܚܸܡ ܥܲܠܲܢ‌܀ ܫܠܝܼܚܵܐ ܕܫܲܝܢܵܐ: ܪܲܚܸܡ ܥܲܠܲܢ‌܀ ܘܲܥܕܵܐ ܕܚܘܼܒܵܐ: ܪܲܚܸܡ ܥܲܠܲܢ‌܀ ܙܲܟܵܝܵܐ ܕܟܠ: ܪܲܚܸܡ ܥܲܠܲܢ‌܀ ܚܵܐܹܢ ܟܠܵܐ: ܪܲܚܸܡ ܥܲܠܲܢ‌܀ ܛܵܒ̣ܵܐ ܡܫܘܼܪܵܝܵܐ: ܪܲܚܸܡ ܥܲܠܲܢ‌܀ ܝܵܡܵܐ ܕܪ̈ܲܚܡܹܐ: ܪܲܚܸܡ ܥܲܠܲܢ‌܀

     ܫܲܚܠܸܦ. ܫܡܸܥ ܒܩܵܠܲܝ̈ܢ: ܘܪܲܚܸܡ ܥܲܠܲܢ‌܀  ܘܓ̰ܲܘܸܒܝܼ: ܡܵܪܲܢ ܪܲܚܸܡ ܥܲܠܲܢ‌܀

   ܐܲܩܸܦ.  ܥܲܠ ܫܲܝܢܵܐ ܕܦܸܪܝܘܼܬܵܐ ܘܫܠܵܡܵܐ ܕܡܲܠܟܘܼܬܵܐ ܘܣܢܵܕܬܵܐ ܕܥܹܕܵܬܹ̈ܐ ܘܢܛܵܪܬܵܐ ܕܟܠܵܗ̇ ܐَܢܵܫܘܼܬܵܐ:  ܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܕܫܵܐ: ܒܸܛܠܵܒܵܐ ܝَܘܲܚ ܡܸܢܘܼܟܼ܀ ܥܲܠ ܐܲܬܪܲܢ ܘܥܵܡܪ̈ܵܢܘܼܗ‌ܝ ܘܟܠܵܝܗ‌ܝ ܐܲܬܪ̈ܵܘܵܬܹܐ ܘܥܵܡܪ̈ܵܢܵܝܗ‌ܝ:  ܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܕܫܵܐ: ܒܸܛܠܵܒܵܐ ܝَܘܲܚ ܡܸܢܘܼܟܼ܀ ܥܲܠ ܛܥܘܿܢܝܵܬܹ̈‌ܐ ܕܐܲܪܥܵܐ ܘܡܘܼܙܵܓ̈ܘܼܗ‌ܝ ܕܗܵܘܵܐ ܘܟܠܝܼܠܵܐ ܕܫܹܢَܬܵܐ ܘܦܸܪܝܘܼܬܵܐ ܕܡܲܗܨܘܼܠܹ̈ܐ:  ܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܕܫܵܐ: ܒܸܛܠܵܒܵܐ ܝَܘܲܚ ܡܸܢܘܼܟܼ܀  ܥܲܠ ܚܘܼܠܡܵܢܵܐ ܕܐܲܒ̣ܵܗܵܬ̈ܲܢ ܩܲܕܝܼܫܹ̈ܐ: ܡܵܪܝ ܦܠ݁ܢ ܩܵܬ̣ܘܿܠܝܼܩܵܐ ܦܵܛܲܪܝܵܪܟܵܐ. ܘܡܵܪܝ ܦܵܠ݁ܢ ܡܝܼܛܪܵܦܘܿܠܹܝܛܵܐ [ܐܵܘ ܐܲܦܸܣܩܘܿܦܵܐ]: ܘܥܲܠ ܟܠܵܝܗܝ ܒܢܲܝ̈ ܚܸܠܡܲܬܵܝܗܝ. ܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܕܫܵܐ: ܒܸܛܠܵܒܵܐ ܝَܘܲܚ ܡܸܢܘܼܟܼ܀ ܥܲܠ ܩܲܫܝܼܫܹ̈ܐ ܕܦܵܝܫܝܼ ܡܩܘܼܕܫܹܐ: ܘܡܫܲܡܫܵܢܹ̈ܐ ܕܗܵܘܝܼ ܒܢܵܓ̰ܝܼܒܘܼܬܵܐ: ܘܛܵܝܸܦܵܐ ܟܠܹܗ ܕܗܵܘܸܐ ܨܸܦܝܵܐ:  ܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܕܫܵܐ: ܒܸܛܠܵܒܵܐ ܝَܘܲܚ ܡܸܢܘܼܟܼ܀ ܥܲܠ ܕܐܵܢܝܼ ܒܬܲܚܡܵܢܬܵܐ ܪܘܼܚܵܢܵܝܬܵܐ ܕܵܐܸܡ ܟܹܐ ܗܵܘܝܼ ܒܸܕܡܵܝܵܐ:  ܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܕܫܵܐ: ܒܸܛܠܵܒܵܐ ܝَܘܲܚ ܡܸܢܘܼܟܼ܀ ܥܲܠ ܡܸܪ̈ܥܝܹܐ ܘܟܪ̈ܝܼܗܹܐ ܘܡܘܼܠܝܸܨܹ̈ܐ ܘܓ̰ܘܼܢܓ̰ܸܪܹ̈ܐ:  ܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܕܫܵܐ: ܒܸܛܠܵܒܵܐ ܝَܘܲܚ ܡܸܢܘܼܟܼ܀ ܐܲܠܵܗܲܢ ܪܵܒܵܐ ܝَܢܵܐ ܪ̈ܲܚܡܘܼܗ‌ܝ ܟܹܐ ܓ̰ܵܘܘܸܒ ܠܐܵܢܝܼ ܕܩܵܪܹܐܠܹܗ:  ܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܕܫܵܐ: ܒܸܛܠܵܒܵܐ ܝَܘܲܚ ܡܸܢܘܼܟܼ܀ ܗܵܘ ܕܒܲܫܡܲܝܵܐ ܦܝܵܫܵܐ ܝَܠܹܗ ܚܩܝܼܪܵܐ ܡ̣ܢ ܬܸܓ̣ܡܹ̈ܐ ܢܘܼܪ̈ܵܢܹܐ: ܘܒܐܲܪܥܵܐ ܦܝܵܫܵܐ ܝَܠܹܗ ܣܓ̣ܝܼܕܵܐ ܡ̣ܢ ܟܸܢܫܹ̈ܐ ܕܐܲܪ̈ܥܵܢܹܐ:  ܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܕܫܵܐ: ܒܸܛܠܵܒܵܐ ܝَܘܲܚ ܡܸܢܘܼܟܼ܀ ܦܪܘܿܩ ܠܟܠܲܢ ܡܫܝܼܚܵܐ ܡܵܪܲܢ ܡ̣ܢ ܝܘܼܩܪܵܐ ܕܡܵܝܘܿܬܘܼܬܵܐ: ܘܡܲܙܝܸܕ ܥܲܡܲܢ ܫܲܝܢܵܐ ܘܫܠܵܡܵܐ ܒܵܝܢܵܬ ܦܲܓ̣ܪܵܐ ܠܓܵܢܵܐ: ܘܩܲܒܸܠ ܨܵܘܡܲܢ ܥܲܡ ܨܠܵܘ̈ܵܬܲܢ ܘܪܲܚܸܡ ܥܲܠܲܢ‌܀

ܩܪܝܢܐ؛ ܐ

ܡܘܬܒ̣ܐ؛ ܐ.

ܗܵܐ ܒܢܝܼܢܘܹܐ ܝܵܘܢܵܢ ܡܘܼܟܪܸܙܠܹܗ: ܝܗَܘܼܕܵܝܵܐ ܒܲܝܢܵܬ ܥܘܼܪ̈ܠܹܐ [ܗ.ܕ܊ ܠܵܐ ܓܙܝܼܪܹ̈ܐ]. ܠܐܲܬܪܵܐ ܕܥܒ̣ܝܼܪܹܗ ܙܲܪܒܵܢܵܐ: ܘܒܩܵܠܹ̈ܐ ܡܲܙܕܸܥܝܵܢܹ̈ܐ ܚܒ̣ܝܼܛܠܹܗ. ܡܕܝܼܢَܬܵܐ ܕܛܵܝܸܦܹ̈ܐ ܦܫܝܼܡܠܵܗ̇: ܒܝܲܕ ܟܵܪܘܿܙܵܐ ܥܸܒܼܪܵܝܵܐ. ܐܲܝܟܼ ܝܵܡܵܐ ܒܸܫܓ̣ܵܫܵܐ ܗَܘܵܐ: ܒܝܵܘܢܵܢ ܣܸܠَܩܠܹܗ ܡ̣ܢ ܝܵܡܵܐ܀ ܛܪܸܦܠܗَܘܿܢ ܥܲܠܘܿܗ̇ ܒܘܼܪ̈ܵܢܹܐ. ܐܲܝܟܼ ܠܲܦܹ̈ܐ ܕܓܵܘ ܝܵܡܵܐ. ܨܠܹܐܠܹܗ ܝܵܘܢܵܢ ܠܝܵܡܵܐ ܘܫܓ̣ܝܼܫܠܹܗ: ܘܣܸܠَܩܠܹܗ ܠܒܸܪܙܵܐ ܘܚܒ̣ܝܼܛܠܹܗ. ܫܓ̣ܝܼܫܠܹܗ ܝܵܡܵܐ ܟܲܕ ܒܸܥܪܵܩܵܐ ܝܗَܘܵܐ: ܘܫܥܸܫܠܹܗ ܒܸܪܙܵܐ ܟܲܕ ܡܲܟܪܘܿܙܹܐ ܝܗَܘܵܐ. ܫܠܹܐܠܹܗ ܝܵܡܵܐ ܒܲܨܠܘܿܬܵܐ: ܐܵܦ ܒܸܪܙܵܐ ܒܲܬܝܵܒ̣ܘܼܬܵܐ܀ ܗ̇ܘ ܡܨܘܼܠܹܐܠܹܗ ܓܵܘ ܢܘܼܢܵܐ ܓܘܼܪܬܵܐ: ܘܢܝܼܢܘܵܝܹ̈ܐ ܒܐܲܬܪܵܐ ܓܘܼܪܵܐ. ܨܠܘܿܬܵܐ ܠܝܵܘܢܵܢ ܡܦܘܼܪܸܩܠܵ̇ܗ̇: ܘܠܢܝܼܢܘܵܝܹ̈ܐ ܒܵܥܘܼܬܵܐ. ܥܪܸܩܠܹܗ ܝܵܘܢܵܢ ܡ̣ܢ ܐܲܠܵܗܵܐ: ܘܢܝܼܢܘܵܝܹ̈ܐ ܡ̣ܢ ܕܸܟ̣ܝܘܼܬܵܐ. ܕܒ̣ܝܼܩܲܝܗܝ ܠܵܗ̇ ܟܹܐܢܘܼܬܵܐ ܠܬܸܪܘܲܝ ܐܲܝܟܼ ܡܵܪܹܐ ܓܢܵܗܵܐ܀ ܬܝܵܒ̣ܘܼܬܵܐ ܡܘܼܩܪܸܒ̣ܠܗَܘܿܢ ܐܸܠܵܗ̇: ܬܸܪܘܲܝ ܓܲܒܹ̈ܐ ܘܦܝܼܫܠܗَܘܿܢ ܡܦܘܼܨܝܹ̈ܐ. ܒܝܵܡܵܐ ܠܝܵܘܢܵܢ ܡܦܘܼܪܸܩܠܵܗ̇: ܘܠܢܝܼܢܘܵܝܹ̈ܐ ܒܓܵܘ ܒܸܪܙܵܐ. ܡ̣ܢ ܓܵܢܹܗ ܝَܠܸܦܠܹܗ ܝܵܘܢܵܢ: ܕܚܫܝܼܚܬܵ‌ܐ ܝܼܠܵܗ̇ ܕܚܵܝܝܼ ܬܵܘܒܵܟܵܪܹ̈ܐ. ܕܵܡܵܝܬܵ‌ܐ ܒܓܵܢܘܼܗܝ ܝܘܼܗَܒܸܠܵܗ̇ ܐܸܠܹܗ: ܫܵܦܵܩܲܬ ܥܲܠ ܚܲܛܵܝܹ̈ܐ܀ ܕܐܲܝܟܼ ܕܗ̇ܘ ܦܝܼܫܠܹܗ ܡܘܼܣܩܵܐ ܡ̣ܢ ܝܵܡܵܐ: ܗܵܕܟ̣ܵܐ ܙܹܐ ܠܐܲܬܪܵܐ ܛܸܒܥܝܵܐ ܒܸܬ ܡܵܣܸܩ. ܢܝܼܢܘܹܐ ܝܵܡܬܵ‌ܐ ܫܓ̣ـܸܫܠܵܗ̇: ܒܝܵܘܢܵܢ ܕܦܠܝܼܛܠܹܗ ܡ̣ܢ ܝܵܡܵܐ. ܦܬܝܼܚܠܹܗ ܝܵܘܢܵܢ ܦܘܼܡܹܗ ܟܹܐܢܵܐ: ܢܝܼܢܘܹܐ ܫܡܸܥܠܵܗ̇ ܘܦܫܝܼܡܠܵܗ̇. ܚܲܕَ ܟܵܪܘܿܙܵܐ ܥܸܒ̣ܪܵܝܵܐ: ܩܲܡ ܚܵܒܸܛܠܹܗ ܠܐܲܬܪܵܐ ܟܠܹܗ܀ ܡܠܹܐܠܹܗ ܦܘܼܡܹܗ ܘܝܘܼܗَܒܸܠܹܗ ܘܵܝܵܐ: ܘܠܫܲܡܥܵܢܹ̈ܐ ܦܠܝܼܓَܠܹܗ ܡܵܘܬܵܐ. ܩܝܼܡܠܹܗ ܟܵܪܘܿܙܵܐ ܙܲܒܘܼܢ: ܒܚܕܵܐ ܡܕܝܼܢَܬܵܐ ܕܓܲܢَܒܵܪܹ̈ܐ. ܫܡܸܛܠܹܗ ܩܵܠܹܗ ܠܠܸܒܵܐ ܕܡܲܠܟܹ̈ܐ: ܡܕܝܼܢَܬܵܝܗܝ ܥܲܠܲܝܗܝ ܒܸܚܪܵܩܵܐ ܝܗَܘܵܐ. ܒܚܲܕَ ܩܵܠܵܐ ܕܩܛܸܥܬܵ‌ܐ ܕܗܹܒ̣ܝܼ: ܟܵܣܵܐ ܕܟܲܪܒܵܐ ܡܲܫܬܘܿܝܹܐ ܝܗَܘܵܐ܀ ܫܡܸܥܠܗَܘܿܢ ܡܲܠܟܹ̈ܐ ܘܫܦܝܼܠܗَܘܿܢ: ܪܘܼܦܝܼܠܗَܘܿܢ ܬܵܓ̰ܲܝܗ̈‌ܝ ܘܡܟܝܼܟ̣ܠܗَܘܿܢ. ܫܡܸܥܠܗَܘܿܢ ܚܹܐܪܹ̈ܐ ܘܚܓ̰ܝܼܠܗَܘܿܢ: ܡܒܵܕܲܠ ܓ̰ܘܼ̈ܠܹܐ ܣܲܩܹ̈ܐ ܠܒ̣ܝܼܫܠܗَܘܿܢ. ܫܡܸܥܠܗَܘܿܢ ܣܵܒ̣̈ـܹܐ ܡܝܘܼܩܪܹ̈ܐ: ܩܸܛܡܵܐ ܕܪܹܐܠܗَܘܿܢ ܥܲܠ ܪܹ̈ܫܲܝܗ‌ܝ. ܫܡܸܥܠܗَܘܿܢ ܕܵܘܠܵܬܡܲܢܕܹ̈ܐ ܘܦܬܝܼܚܠܗَܘܿܢ: ܚܸܙܝܼܢܲܝܗ̈‌ܝ ܩܵܕَܡ ܡܸܣܟܹܢܹ̈ܐ܀ ܫܡܸܥܠܗَܘܿܢ ܡܵܪ̈ܵܘܬܹܐ ܕܕܵܝܢܵܐ: ܘܒܐܸܫܛܵܪܵܐ [ܩܵܒܵܠܹ̈ܐ] ܦܠܝܼܚܠܗَܘܿܢ ܐܸܪ̈ܘܵܢܹܐ. ܫܡܸܥܠܗَܘܿܢ ܡܲܕܝܸܢܵܢܹ̈ܐ ܕܗܲܩ ܝܼܠܵܗ̇: ܕܠܵܐ ܣܵܪܒ̣ܝܼ ܠܗَܘܿܢ ܕܲܝܢܲܝܗ̈‌ܝ. ܡܵܕܝܸܢܵܢܹ̈ܐ ܗَܘܵܘ ܠܗَܘܿܢ ܦܲܪ̈ܥܵܢܹܐ: ܘܡܵܪ̈ܵܘܵܬܹܐ ܕܕܵܝܢܵܐ ܦܵܚܠܵܢܹ̈ܐ. ܟܠ ܐَܢܵܫܵܐ ܥܲܠ ܥܘܼܕܪܵܢܹܗ ܚܲܡ ܒܹܐܟ̣ܵܠܵܐ ܝܗَܘܵܐ ܒܟܹܐܢܘܼܬܵܐ܀ ܠܲܝܬ ܗَܘܵܐ ܒܸܪܢܵܫܵܐ: ܕܥܵܒܸܕ ܗَܘܵܐ ܦܲܢܕܹ̈ܐ ܘܙܠܘܼܡܝܵܐ. ܒܚܲܕَ ܦܠܵܫܵܐ ܟܹܐܢܵܐ ܢܦܝܼܠܹ̈ܐ ܝܗَܘܵܘ: ܕܟܠ ܐَܢܵܫܵܐ ܓܵܢܘܼܗܝ ܡܦܵܪܸܩ ܗܘܵܐ. ܠܝܵܘܢܵܢ ܫܡܸܥܠܗَܘܿܢ ܓܲܢܵܒ̣̈ـܹܐ: ܡܘܼܕܸܪܘܿܢ ܕܲܝܢܵܐ ܠܡܵܪ̈ܲܝܗܝ. ܡܵܪܹ̈ܐ ܕܣܠܵܒܹ̈ܐ ܡܘܼܚܦܸܠܗَܘܿܢ: ܘܣܵܠܒܵܢܹ̈ܐ ܡܦܘܼܚܸܠܗَܘܿܢ܀ ܟܠ ܐَܢܵܫܵܐ ܓܵܢܘܼܗܝ ܒܸܕܝܵܢܵܐ ܝܗَܘܵܐ: ܘܠܒܲܪ ܙܵܘܓܹܗ ܡܲܚܘܼܒܹܐ ܝܗَܘܵܐ. ܠܲܝܬ ܕܠܚܲܒ̣ܪܹܗ ܕܵܐܸܢ ܗَܘܵܐ: ܟܠ ܚܲܕَ ܓܵܢܘܼܗܝ ܒܸܕܝܵܢܵܐ ܝَܘܵܐ. ܠܲܝܬ ܕܠܚܲܒ̣ܪܹܗ ܡܲܢܟܼܸܣ ܗَܘܵܐ: ܟܲܪܒܵܐ ܠܟܠܲܝܗܝ ܡܵܢܚܘܼܣܹܐ ܝܗَܘܵܐ. ܫܡܸܥܠܗَܘܿܢ ܩܵܛ̈ܘܿܠܹܐ ܘܡܵܘܕܝܼܠܗَܘܿܢ: ܘܡܵܘܣܠܹܐܠܗَܘܿܢ ܠܙܕܘܿܥܬܵܐ ܕܕܲܝܵـܢܹ̈ܐ ܫܡܸܥܠܗَܘܿܢ ܕܲܝܵـܢܹ̈ܐ ܘܡܘܼܚܦܸܠܗَܘܿܢ: ܘܕܝܼܘܵܢܹ̈ܐ ܒܟܲܪܒܵܐ ܫܬܸܩܠܗَܘܿܢ ܠܵܐ ܒܥܹܐܠܗَܘܿܢ ܠܸܕܝܵـܢܵܐ ܒܟܹܐܢܘܼܬܵܐ: ܕܠܵܐ ܦܵܝܫܝܼ ܗَܘܵܘ ܕܝܼܢܹܐ ܒܟܹܐܢܘܼܬܵܐ. ܟܠ ܐَܢܵܫܵܐ ܪ̈ܲܚܡܹܐ ܒܸܙܪܲܥܝܵܐ ܝܗܘܵܐ: ܕܡܸܢܲܝܗܝ ܚܵܨܸܕ ܗَܘܵܐ ܦܘܼܪܩܵܢܵܐ. ܠܝܵܘܢܵܢ ܫܡܸܥܠܗَܘܿܢ ܚܲܛܵܝܹ̈ܐ: ܘܡܵܘܕܝܼܠܹܗ ܟܠ ܚܲܕَ ܒܚܛܝܼܵܬܹ̈ܗ܀ ܫܡܸܥܠܹܗ ܐܵܦ ܐܲܬܪܵܐ ܣܸܢܝܵܐ: ܫܠܝܼܚܠܹܗ ܓ̰ܲܠܕܹܐ ܒܝܼܫܵܬ̈ܘܼܗܝ. ܫܡܸܥܠܘܿܢ ܐܵܦ ܡܵܪ̈ܵܘܵܬܵܐ: ܩܪܹܐ ܠܗَܘܿܢ ܚܹܐܪܘܼܬܵܐ ܠܩܘܼܠܲܝܗ̈ܝ. ܫܡܸܥܠܗَܘܿܢ ܠܩܘܼ̈ܠܠܹܐ ܒܟܹܐܢܘܼܬܵܐ: ܙܵܘܕܵܐ ܡܝܘܼܩܸܪܘܼܢ ܠܡܵܪ̈ܵܘܵܬܲܝܗܝ. ܒܩܵܠܹܗ ܕܝܵܘܢܵܢ ܚܹܐܪ̈ܵܬܹܐ: ܪܵܡܘܼܬܵܐ ܒܣܲܩܹ̈ܐ ܡܘܼܡܟܸܚܠܗَܘܿܢ܀ ܬܝܵܒ̣ܘܼܬܵܐ ܝܗَܘܵܐ ܕܲܫܪܵܪܵܐ: ܕܡܵܪ̈ܵܬܵܐ ܠܒ̣ܝܼܫܠܗَܘܿܢ ܡܘܼܟܵܟ̣ܵܐ. ܩܵܕَܡ ܥܲܝܢܹ̈ܐ ܕܗ̇‌ܝ ܬܝܵܒ̣ܘܼܬܵܐ: ܐܵܗܵܐ ܕܝܼـܲܢ ܐܲܝܟܼ ܚܲܕَ ܚܸܠܡܵܐ ܝܼܠܵܗ̇. ܘܒܥܲܝܢܹ̈ܐ ܕܗ̇‌ܝ ܒܵܥܘܼܬܵܐ: ܐܵܗܵܐ ܕܝܼـܲܢ ܚܕܵܐ ܛܸܠܵܢܝܼܬܵ‌ܐ ܝܼܠܵܗ̇. ܠܟܸܣ ܕܗ̇ܘ ܡܘܼܟܵܟ̣ܵܐ: ܐܵܗܵܐ ܕܝܼـܲܢ ܕܘܼܡܝܵܐ ܝَܠܹܗ ܕܡܘܼܟܵܟ̣ܵܐ܀ ܣܵܒܵܒ ܚܲܕَܟ̰ܵܐ ܝَܢܵܐ ܕܫܒ̣ܝܼܩܠܗَܘܿܢ: ܓܢܵܗܹ̈ܐ ܒܐܵܗܵܐ ܨܵܘܡܵܐ. ܢܝܼܢܘܵܝܹ̈ܐ ܥܒܼܝܼܕܠܗَܘܿܢ ܐܸܪ̈ܘܵܢܹܐ: ܐܲܚܢܲܢ ܚܘܼܫ ܕܫܵܠܲܚ ܡ̣ܢ ܬܵܢܸܚܝܵܬܹ̈‌ܐ. ܢܝܼܢܘܵܝܹ̈ܐ ܠܩܘܼ̈ܠܠܹܐ ܥܒ̣ܝܼܕܠܗَܘܿܢ ܚܹܐܪܹ̈ܐ: ܡܲܚܸܒܘܼܢ ܐܲܚܬܘܼܢ ܠܒܢܲܝ̈ ܚܹܐܪܹ̈ܐ: ܝܵܘܢܵܢ ܟܲܕ ܦܝܼܫܠܹܗ ܡܫܘܼܕܪܵܐ: ܠܗ̇ܘ ܐܲܬܪܵܐ ܡܸܠܝܵܐ ܓܢܵܗܹ̈ܐ܀ ܡܟ̰ܘܼܟܒܸܢܬܘܼܗܝ ܝܗَܘܵܐ ܟܹܐܢܘܼܬܵܐ: ܒܩܵܠܹ̈ܐ ܡܲܙܕܸܥܝܵـܢܹ̈ܐ ܫܘܼܕܸܪܵܗ̇. ܦܪܲܡܬܵ‌ܐ ܠܕܲܪ̈ܕܹܐ ܝܘܼܗَܒܸܠܵܗ̇ ܐܸܠܹܗ: ܥܲܡ ܕܲܪ̈ܡܵܢܹܐ ܡܲܩܕܵܢܹ̈ܐ. ܐܵܣܝܵܐ ܡܲܙܕܸܥܝܵـܢܵܐ ܦܝܼܫܠܹܗ ܡܫܘܼܕܪܵܐ: ܠܲܡܕܝܼܢَܬܵܐ ܡܠܝܼܬܵܐ ܡܲܪ̈ܥܹܐ. ܦܬܝܼܚܠܹܗ ܘܡܘܼܚܙܝܼܵܝܗܝ ܠܹܗ ܕܲܪ̈ܡܵܢܘܼܗܝ: ܡܲܙܕܸܥܝܵـܢܹ̈ܐ ܝܗَܘܵܘ ܚܲܝܠܵܢܹ̈ܐ܀ ܫܵܦܵܩܲܬ ܒܐܵܗܵܐ ܩܵܘܠܵܐ: ܩܲܡ ܡܫܲܕܪܵܐ ܠܹܗ ܠܢܒ̣ܝܼܵܐ. ܠܵܐ ܩܵܐ ܕܐܲܬܪܵܐ ܡܲܚܪܸܒ̣ ܗَܘܵܐ: ܐܸܠܵܐ ܡܬܵܪܸܨ ܗَܘܵܐ. ܐܝܼܢܵܐ ܠܵܐ ܡܩܘܼܘܸܠܹܗ ܟܵܪܘܿܙܵܐ. ܠܒܢܲܝ̈ ܐܵܬܘܿܪ ܕܬܵܘܸܒܝܼ ܗَܘܵܘ. ܠܡܲܕܥܘܼܝܲܝܗ‌ܝ ܕܐܲܝܢܝܼ ܕܡܘܼܠܝܸܨܵܐ ܝܼܠܹܗ: ܗ̇ܘ ܚܘܼܫ ܟ̰ܲܠܸܫ ܥܲܠ ܗܲܝܸܪܬܘܼܗܝ܀ ܐَܟ̰ܝܼܡܠܹܗ ܬܲܪܥܵܐ ܥܲܠܲܝܗܝ: ܠܡܲܕܥܘܼܝܹܐ ܟܡܵܐ ܬܘܼܩܬܸܩܠܗَܘܿܢ. ܩܛܸܥܬܵ‌ܐ ܕܝܼܘܵܢ ܕܡܘܼܟܪܸܙܠܹܗ: ܐَܡܝܼܪܵܐ ܠܗَܘܿܢ ܛܵܝܸܦܹ̈ܐ ܘܒܘܼܛܠܵܠܗَܘܿܢ. ܠܡܲܕܥܘܼܝܹܐ ܕܵܐܟ̣ܝܼ ܟܹܐ ܡܵܨܝܵܐ: ܬܝܵܒ̣ܘܼܬܵܐ ܠܡܣܵܙܓܘܼܪܹܐ ܘܕܵܐܟ̣ܝܼ ܘܟܡܵܐ ܠܵܙܸܡ ܡܲܩܪܸܨ ܬܵܘܒܵܟܲܪ: ܘܒܩܲܫܕܸܪܬܵܐ ܫܵܩܸܠ ܪ̈ܲܚܡܹܐ܀ ܡܲܪܥܵܐ ܝܗَܘܵܐ ܕܚܛܝܼܬܵܐ ܕܪܸܙܵܝܼ ܘܠܵܐ ܕܡܲܓ̰ܒܘܼܪܘܼܬܵܐ. ܩܵܠܵܐ ܨܲܗܡܵܢܵܐ ܡܲܙܕܘܼܥܝܹܐ ܝܗَܘܵܐ: ܒܗܿܘ ܬܵܗܲܪ ܕܣܲܝܦܵܐ. ܩܵܐ ܕܩܲܫܕܸܪܵܢܵܐ ܡ̣ܢ ܙܕܘܼܥܬܵ‌ܐ ܒܵܣܸܡ ܗَܘܵܐ ܡ̣ܢ ܢܲܙܵܢܘܼܬܵܐ. ܐܵܣܝܵܐ ܕܐَܙܝܼܠܹܗ ܕܕܲܪܡܸܢ ܗَܘܵܐ ܣܲܝܦܵܐ ܡܘܼܚܙܹܐܠܹܗ ܠܡܸܪ̈ܥܝܹܐ܀ ܡܕܝܼܢَܬܵܐ ܚܙܹܐܠܵܗ̇ ܘܚܓ̰ܝܼܠܵܗ̇: ܕܐܲܝܟܼ ܩܵܨܲܒ ܒܸܟܠܵܝܵܐ ܝܗَܘܵܐ. ܡܸܪ̈ܥܝܹܐ ܢܦܝܼ̈ܠܹܐ ܡ̣ܢ ܙܕܘܼܥܬܵ‌ܐ: ܩܝܼܡܠܗَܘܿܢ ܪܚܸܛܠܗَܘܿܢ ܒܲܬܝܵܒ̣ܘܼܬܵܐ. ܩܵܠܹܗ ܕܝܵܘܢܵܢ ܐܲܝܟܼ ܣܲܝܦܵܐ ܕܲܪ̈ܕܹܐ ܥܲܬܝܼܩܹ̈ܐ ܟܹܐ ܦܵܪܸܡ ܗَܘܵܐ. ܐܵܣܝܵܐ ܝܗَܘܵܐ ܕܒܘܼܣܸܡܠܹܗ ܒܩܵܛܝܼـܹܗ: ܒܘܼܫ ܡ̣ܢ ܕܲܪ̈ܡܵܢܹܐ ܕܐَܚܹܪَ̈ܢܹܐ܀ ܐܵܣܝܵܐ ܟܹܐ ܡܫܵܕܸܠ ܘܡܒܵܣܸܡ: ܝܵܘܢܵܢ ܡܲܩܘܘܼܚܹܐ ܝܗَܘܵܐ ܘܡܒܵܣܘܼܡܹܐ: ܒܢܓ̰ܲܘܝܵܬܹ̈‌ܐ ܚܲܝܠܵܢܹ̈ܐ: ܡܣܲܚܒܘܼܪܹܐ ܝܗَܘܵܐ ܒܗܵܘܢܵܢܘܼܬܵܐ. ܐܵܗܵܐ ܝܼܠܹܗ ܣܵܥܘܿܪܵܐ ܕܡܘܼܙܕܸܥܠܹܗ: ܒܦܸܠܚܵܢܘܼ̈ܗܝ ܠܟܠܲܝܗܝ ܡܸܪ̈ܥܝܲܝܗܝ. ܡܸܪܥܝܵܐ ܫܘܝܼܬܹܗ ܟܹܐ ܫܵܒܸܩ ܗَܘܵܐ: ܕܩܵܛܝܼܵܐ ܕܟܲܪܒܵܐ ܟܹܐ ܚܵܙܝܼ ܗَܘܵܐ܀ ܣܵܒܵܒ ܨܵܚ ܝܗَܘܵܘ ܡܸܪ̈ܥܝܲܝܗܝ: ܒܡܲܪܥܵܐ ܕܫܵܗܘܸܬܝܵܬܹ̈‌ܐ ܡܸܪ̈ܥܝܹܐ ܗَܘܵܘ ܒܫܵܗܘܸܬܘܼܗܝ ܟܠ ܐَܢܵܫܵܐ ܒܸܢܓ̰ܵܘܵܐ ܗَܘܵܐ: ܐܵܣܝܵܐ ܠܓܵܢܘܼܗܝ ܒܸܗܘܵܝܵܐ ܗَܘܵܐ. ܫܵܪܘܼܬܵܐ ܕܡܲܠܟܹ̈ܐ ܒܛܸܠܗ̇. ܘܐَܟ̣ܵܠَܪܲܡܫܵܐ ܕܪܹ̈ܫܵܢܹܐ. ܐܸܢ ܝܲܠܘܼܕܹ̈ܐ ܨܝܼܡܠܗَܘܿܢ ܡ̣ܢ ܚܲܠܒ̣ܵܐ. ܡܵܢܝܼ ܝَܠܹܗ ܕܒܥܹܐܠܹܗ ܒܘܼܣܵܡܹ̈ܐ܀ ܠܗܲܝܘܵܢܹ̈ܐ ܩܛܸܥܠܗَܘܿܢ ܡ̣ܢ ܡܝܼ̈ܵܐ. ܡܵܢܝܼ ܝَܠܹܗ ܕܚܲܡܪܵܐ ܫܵܬ‌ܝܼ ܗَܘܵܐ. ܐܸܢ ܡܲܠܟܵܐ ܣܲܩܵܐ ܠܒ̣ܝܼܫܠܹܗ: ܡܵܢܝܼ ܗَܘܵܐ ܕܓ̰ܘܼ̈ܠܠܹܐ ܠܵܒܸܫ ܗَܘܵܐ. ܐܸܢ ܛܲܡܵܐܬܹ̈ܐ ܦܝܼܫܠܗَܘܿܢ ܡܩܘܼܕܫܹ̈ܐ: ܡܵܢܝܼ ܝَܠܹܗ ܕܕܥܸܪܹܗ ܠܓܲܒ̣ܪܵܐ. ܐܸܢ ܒܹܐܵܕܲܒ ܗَܘܵܘ ܙܕܸܥܠܗَܘܿܢ: ܡܵܢܝܼ ܝَܠܹܗ ܕܓܸܚܟܵܐ ܡܲܦܠܸܚ ܗَܘܵܐ܀ ܐܸܢ ܦܨܝܼܚܹ̈ܐ ܒܸܟ̣ܝܵܐ ܗَܘܵܘ: ܠܡܵܢܝܼ ܫܸܥܝܵܐ [ܗܲܩܝܵܬ] ܡܲܒܣܸܡ ܗَܘܵܐ. ܐܸܢ ܓܲܢܵܒ̣ܵـܹܐ ܦܝܼܫܠܗَܘܿܢ ܡܦܘܼܚܠܹܐ. ܡܵܢܝܼ ܝَܠܹܗ ܕܠܚܲܒ̣ܪܹܗ ܙܵܠܸܡ ܗَܘܵܐ. ܐܸܢ ܐܲܬܪܵܐ ܒܸܫܝܲܥܫܵܐ ܗَܘܵܐ: ܡܵܢܝܼ ܗَܘܵܐ. ܕܒܲܝܬܹܗ ܢܵܛܸܪ ܗَܘܵܐ. ܪܘܼܦܝܵܐ ܕܲܗܒ̣ܵܐ ܘܠܲܝܬ ܕܓܵܢܸܒ̣ ܗَܘܵܐ. ܦܬܝܼܚܬܵ‌ܐ ܚܲܙܝܼܢܵܐ ܘܠܲܝܬ ܕܣܵܠܸܒ ܗَܘܵܐ܀ ܓܲܝܵـܪܹ̈ܐ ܐَܟ̰ܝܼܡܠܗَܘܿܢ ܥܲܝܢܵܝܗ̈‌ܝ: ܕܒܒܲܟ̣ܬܵܬܹ̈ܐ ܠܵܐ ܓܵܫܩܝܼ ܗَܘܵܘ. ܡܘܼܣܠܝܼܠܗَܘܿܢ ܒܲܟ̣ܬܵܬܹ̈ܐ ܫܘܼܦܪ̈ܲܝܗܝ: ܕܚܵܙܝܵـܢܹ̈ܐ ܠܵܐ ܬܲܪܩܸܠܝܼ ܗَܘܵܘ. ܣܵܒܵܒ ܒܐܵܗܵܐ ܒܵܠܲܕ ܗَܘܵܘ: ܕܚܘܼܣܪܵܢܵܐ ܕܟܠܲܝܗܝ ܒܸܬ ܗܵܘܝܼ ܗَܘܵܐ. ܕܐܸܢ ܚܵܙܝܵـܢܹ̈ܐ ܬܲܪܩܸܠܝܼ ܗَܘܵܘ: ܐܵܦ ܐܵܢܝܼ ܠܹܐ ܦܲܪܩܝܼ ܗَܘܵܘ܀ ܠܵܐ ܡܥܘܼܪܩܸܠܗَܘܿܢ ܚܵܢܝܼܡܹ̈ܐ: ܬܝܵܒ̣ܘܼܬܵܐ ܕܒܢܲܝ̈ ܐܲܬܪܵܐ. ܒܝܼܕܲܥܝܵܐ ܗَܘܵܘ ܕܡܒܵܕܵܠܲܝܗܝ: ܒܸܓ̰ܢܵܢܵܐ ܗَܘܵܘ ܬܲܝܵܒ̣̈ـܹܐ. ܡܒܘܼܣܸܡܠܗَܘܿܢ ܘܦܝܼܫܠܗَܘܿܢ ܡܒܘܼܣܡܹܐ: ܚܲܕَ ܡ̣ܢ ܚܲܒ̣ܪܹܗ ܒܲܬܝܵܒ̣ܘܼܬܵܐ. ܠܲܝܬ ܕܠܚܲܒ̣ܪܹܗ ܡܲܚܛܝܼ ܗَܘܵܐ: ܟܠ ܐَܢܵܫܵܐ ܥܵܘܠܵܐ ܟܹܐ ܪܵܕܸܦ [ܟܵܡܸܪ] ܗَܘܵܐ܀ ܟܠ ܐَܢܵܫܵܐ ܚܲܒ̣ܪܹܗ ܟܹܐ ܓܵܪܸܫ ܗَܘܵܐ: ܠܲܨܠܘܿܬܵܐ ܘܠܒܵܥܘܼܬܵܐ. ܗَܘܹܐ ܠܹܗ ܟܠܹܗ ܐܲܬܪܵܐ: ܚܲܕَ ܓܘܼܫܡܵܐ ܒܲܬܝܵܒ̣ܘܼܬܵܐ. ܟܠܹܗ ܠܟܠܹܗ ܟܹܐ ܢܵܛܸܪ ܗَܘܵܐ: ܕܐܲܝܟܼ ܒܩܵܕَܡܵܝܬܵ‌ܐ ܠܹܐ ܥܵܒܸܕ ܗَܘܵܐ ܢܲܙܵܢܘܼܬܵܐ. ܟܠ ܐَܢܵܫܵܐ ܚܲܒ̣ܪܹܗ ܟܹܐ ܡܵܠܸܦ ܗَܘܵܐ: ܕܒܗܲܕܵܡܘ̈ܗܝ ܦܵܐܸܫ ܗَܘܵܐ ܙܲܕܝܼܩܵܐ܀ ܐَܢܵܫܵܐ ܠܵܐ ܡܨܘܿܠܹܗ ܠܹܗ ܬܵܡܵܐ: ܕܐܲܚܟ̰ܝܼ ܠܓܵܢܘܼܗܝ ܡܲܚܝܼ ܗَܘܵܐ. ܣܵܒܵܒ ܗܲܕܵܡܹ̈ܐ ܗَܘܵܘ ܒܵܪܵܒܲܪ: ܟܠ ܐَܢܵܫܵܐ ܠܚܲܒ̣ܪܹܗ ܟܹܐ ܡܨܵܠܹܐ ܗَܘܵܐ. ܟܠܹܗ ܐܲܬܪܵܐ ܦܝܼܫܠܹܗ ܟ̰ܝܼܕܵܐ: ܠܚܪܵܒ̣ܵܐ ܐܲܝܟܼ ܚܲܕَ ܓܘܼܫܡܵܐ. ܠܹܐ ܡܵܨܝܼ ܗَܘܵܐ ܡܵܪܹܐ ܐܵܕܵܒ: ܕܚܲܝܝܼ ܗَܘܵܐ ܕܠܵܐ ܚܲܛܵܝܵܐ܀ ܕܐܲܝܟܼ ܗܲܕܵܡܹ̈ܐ ܐܲܣܝܼܪܹ̈ܐ ܗَܘܵܘ ܛܵܒܹ̈ܐ ܘܒܝܼܫܹ̈ܐ ܡܐܸܚܕܵܕܹ̈ܐ. ܙܲܕܝܼܩܹ̈ܐ ܟܹܐ ܒܵܟ̣ܝܼ ܗَܘܵܘ: ܡ̣ܢ ܓܹܢَܒܵܐ ܕܚܲܛܵܝܹ̈ܐ ܕܦܲܪܩܝܼ ܗَܘܵܘ. ܘܚܲܛܵܝܹ̈ܐ ܟܹܐ ܒܵܟ̣ܝܼ ܗَܘܵܘ: ܕܙܲܕܝܼܩܹ̈ܐ ܦܵܝܫܝܼ ܗَܘܵܘ ܫܸܡܥܝܹ̈ܐ. ܟܹܐܢܲܝܗ̈‌ܝ ܟܹܐ ܒܵܥܝܼ ܗَܘܵܘ: ܕܥܵܘܵܠܲܝܗ̈‌ܝ ܦܵܝܫܝܼ ܡܦܘܼܨܝܹ̈ܐ܀ ܘܥܵـܘ̈ܵܠܹܐ ܟܹܐ ܒܵܟ̣ܝܼ ܗَܘܵܘ: ܨܠܘܿܬܵܐ ܕܟܹܐܢܹ̈ܐ ܦܵܝܫܵܐ ܡܩܘܼܒܸܠܬܵ‌ܐ. ܒܸܟ̣ܝܵܐ ܙܵܪܝܼܦ ܕܝܲܠܘܼܕܹ̈ܐ: ܠܟܠܹܗ ܐܲܬܪܵܐ ܡܲܒܟ̣ܘܼܝܹܐ ܝܗَܘܵܐ. ܩܵܠܵܐ ܕܨܲܒ̈ܝܼـܹܐ ܟܲܕ ܒܸܣܝܵܩܵܐ: ܠܸܒܵܐ ܘܚܘܼܒܵܐ ܡܫܲܚܠܘܼܦܹܐ ܝܗَܘܵܐ. ܣܵܒ̣̈ـܹܐ ܒܩܸܛܡܵܐ ܡܓܘܼܪ̈ܡܸܠܹܐ: ܢܟ̰ܝܼܠܵܐ ܘܪܘܼܦܝܵܐ ܟܵܘܣܲܝܗܝ ܚܘܵܪܵܐ ܕܐܝܼܩܵܪܵܐ܀ ܚܲܫܵܐ ܕܒܹܨܘܼܪܘܼܬܵܐ ܠܒ̣ܝܼܫܠܹܗ [ܟܘܼܣܹܐܠܹܗ] ܥܠܲܝܡܹ̈ܐ ܕܚܙܹܐܠܗَܘܿܢ ܣܵܒ̣ـܲܝܗ̈‌ܝ: ܙܵܘܕܵܐ ܒܟ̣ـܹܐܠܗَܘܿܢ ܒܡܲܩܘܵܚܬܵ‌ܐ. ܣܵܒ̣̈ـܹܐ ܡܘܼܒܟ̣ـܹܠܗَܘܿܢ ܠܥܠܲܝܡܹ̈ܐ: ܩܵܛ̈ܝܹܐ ܛܵܒ̣̈ـܹܐ ܕܣܲܝܒܘܼܬܵܐ. ܒܟ̣ـܹܐܠܗَܘܿܢ ܡܐܘܼܕܵܠܹܐ ܕܦܝܵܫܵܐ ܝَܗܘܵܘ ܩܒ̣ܝܼܪܹ̈ܐ ܩܲܒ̣ܪ̈ܵܢܹܐ ܘܦܵܝܫܵܢܹ̈ܐ ܩܒ̣ܝܼܪܹ̈ܐ܀ ܡܝܲܩܪܹ̈ܐ ܢܵܓ̰ܝܼܒܹ̈ܐ ܘܡܵܪ̈ܵܘܵܬܵܐ: ܟܵܘܣܵܝܗܝ ܢܟ̰ܝܼܠܗَܘܿܢ ܒܲܨܠܘܿܬܵܐ. ܩܝܼܡܠܵܗ̇ ܝܸܡܵܐ ܒܲܡܨܲܥܬܵ‌ܐ [ܒܹܝܬَܦܲܠܓܵܐ]: ܘܟܪ̈ܝܼܟ̣ـܹܐ ܐܸܠܵܗ̇ ܣܵܘܓܘܿܠܘܼ̈ܗ̇. ܟܲܕ ܡܬܲܢܕܘܼܠܹܐ ܒܫܸܦܘܼܠܘܼ̈ܗ̇: ܩܵܐ ܕܦܵܨܝܵܐ ܠܗَܘܿܢ ܡ̣ܢ ܡܵܘܬܵܐ. ܡ̣ܢ ܩܵܠܵܐ ܕܫܝܲܥܫܵܐ ܒܸܛܫܵܝܵܐ ܗَܘܵܐ ܝܲܠܘܿܕܵܐ ܒܥܘܼܒܵܐ ܕܝܸܡܹܗ܀ ܘܓܵܘ ܫܲܦܘܼܠܵܐ ܕܡܲܡܨܲܢܬܹܗ: ܡ̣ܢ ܙܕܘܼܥܬܵ‌ܐ ܒܸܛܫܵܝܵܐ ܝܗَܘܵܐ ܝܵـܠܵܕَܐ. ܙܪܸܩܠܵܗ̇ ܘܚܘܼܫܟܸܢܵܗ̇ ܟܹܐ ܡܵܢܝܼ ܗَܘܼܘ: ܝܵܘܡܵܢܹ̈ܐ ܕܩܛܸܥܠܹܗ ܝܵܘܢܵܢ. ܟܠܚܲܕَ ܡܚܲܫܒܘܼܢܹܐ ܝܗَܘܵܐ ܝܵܘܡܵܢܹ̈ܐ: ܕܥܒ̣ܝܼܪܘܼܢ ܘܐܵܢܝܼ ܕܦܝܵܫܵܐ ܝَܗܘܵܘ. ܐܝܼܡܲܢ ܕܓܢܹܐܠܹܗ ܝܵܘܡܵܐ ܝܼܠܸܠܗَܘܿܢ [ܥܒ̣ܝܼܕܠܗَܘܿܢ ܬܵܙܝܼ] ܒܨܸܪܹܐ ܡ̣ܢ ܚܲܝܲܝܗ̈‌ܝ. ܥܲܡ ܗ̇ܘ ܝܵܘܡܵܐ ܕܓܢܹܐܠܹܗ: ܕܐܲܝܟܼ ܓܵܢܲܝܗ‌ܝ ܦܠܵܛܵܐ ܝܗَܘܵܐ܀ ܒܢܘܿܢܹ̈ܐ ܡܒܘܼܩܸܪܘܼܢ ܒܸܒܟ̣ܵܝܬܵ‌ܐ: ܒܕܸܡܥܲܝܗ̈‌ܝ ܡ̣ܢ ܐܲܒ̣ܵܗܲܝ̈ܗ‌ܝ. ܡܬܵܢܵܝܡܘܼܢ ܠܲܢ ܐܲܒ̣̈ܵܗܲܢ: ܕܟܡܵܐ ܝܵܘܡܵܢܹ̈ܐ ܗܵܠܵܐ ܦܝܼܫܵܐ ܡ̣ܢ ܝܵܘܡܵܢܹ̈ܐ ܕܩܛܸܥܠܹܗ ܐܸܠܲܢ: ܗ̇ܘ ܟܵܪܘܿܙܵܐ ܥܸܒܼܪܵܝܵܐ؟. ܘܐܲܝܢܝܼ ܝܼܠܵܗ̇ ܗ̇‌ܝ ܣܵܥܲܬ ܪܫܝܼܡܬܵܐ: ܕܒܝܼܵܗ̇ ܒܨܵܠܲܚܢَ ܚܵܝܹ̈ܐ ܠܫܝܘܿܠ؟. ܝܵܐ ܪܲܒ ܐܲܝܢܝܼ ܝܼܠܹܗ ܗ̇ܘ ܝܵܘܡܵܐ ܕܒܝܼـܹܗ: ܒܸܬ ܚܵܪܸܒ̣ ܐܲܬܪܵܐ ܙܲܪܝܼܦ؟. ܝܵܐ ܪܲܒ ܐܲܝܢܝܼ ܝܼܠܹܗ ܗ̇ܘ ܝܵܘܡܵܐ ܐَܚܵܪܵܝܵܐ: ܕܡ̣ܢ ܒܵܬَܪܹܗ ܐَܚܹܪَܢܵܐ ܠܹܐ ܗܵܘܲܚܢَ؟. ܘܐܲܝܢܝܼ ܝܼܠܵܗ̇ ܗ̇‌ܝ ܥܸܕܵܢܵܐ ܕܒܝܼܘܼܗ̇: ܒܕܵܒܸܩ ܠܟܠܲܢ ܥܲܡܛܵܢܵܐ؟. ܘܐܲܝܢܝܼ ܝܼܠܹܗ ܗ̇ܘ ܝܵܘܡܵܐ ܕܓܵܘ ܒܪܝܼܬܵܐ. ܦܵܪܸܚ ܒܲܗَܣ ܕܛܠܵܩܲܢ؟܀ ܘܥܲܒ̣ܪܝܼ ܚܵܙܝܵـܢܹ̈ܐ ܘܚܲܙܝܼ: ܠܐܲܬܪܵܐ ܚܪܝܼܒ̣ܵܐ ܥܲܠ ܡܵܪ̈ܵܘܵܬܹܗ: ܐܲܒ̣ܵܗܹ̈ܐ ܟܲܕ ܫܡܸܥܠܗَܘܿܢ ܠܐܲܢܹܐ: ܡ̣ܢ ܦܘܼܡܵܐ ܕܝܲܠܘܼܕܲܝܗ̈‌ܝ. ܕܸܡܥܲܝܗ̈‌ܝ ܒܡܲܪܝܼܪܘܼܬܵܐ: ܪܬܝܼܚܠܗَܘܿܢ ܘܓ̰ܪܹܐ ܠܗَܘܿܢ ܥܲܠ ܝܵܠܲܕَܝܗ̈‌ܝ ܡܐܘܼܕܵܠܹܐ ܡܘܼܓ̰ܪܝܼܠܗَܘܿܢ ܕܸܡܥܹ̈ܐ: ܐܵܡܪ̈ܵܢܹܐ ܐܘܿܦ ܫܲܡܥܵܢܹ̈ܐ܀ ܠܵܐ ܡܨܹܐܠܗَܘܿܢ ܐܲܒ̣ܵܗܹ̈ܐ ܒܬܵܢܲܚܬܵ‌ܐ ܠܡܗܲܡܙܘܼܡܹܐ. ܣܵܒܵܒ ܕܒ̣ܝܼܩܬܵܐ ܝܼܗܘܵܐ ܦܵܫܸܡܬܵܐ: ܠܐܘܼܪܚܵܐ ܨܦܝܼܬܵ‌ܐ ܕܗܹܡܸܙܡܵܢܲܝܗ̈‌ܝ. ܟܠܹܐܠܵܗ̇ ܗܹܡܸܙܡܵܢܲܝܗ̈‌ܝ: ܡ̣ܢ ܒܸܟ̣ܝܵܐ ܕܣܵܘܓܘܼܠܲܝܗ̈‌ܝ. ܕܠܵܐ ܡܲܙܝܸܕܝܼ ܗَܘܵܐ ܐܲܒ̣ܵܗܹ̈ܐ: ܠܡܓ̰ܲܢܓ̰ܘܼܪܹܐ ܠܒܢܘܿܢܲܝܗ̈‌ܝ܀ ܕܡ̣ܢ ܩܵܕَܡ ܕܗ̇ܘ ܝܵܘܡܵܐ ܩܸܛܥܝܵܐ: ܡܵܝܬ‌ܝܼ ܗَܘܵܘ ܡ̣ܢ ܦܵܫܸܡܬܵ‌ܐ. ܡܘܼܟܠܹܗ ܠܗَܘܿܢ ܐܲܒ̣ܵ̈ܗܹ̈ܐ ܕܸܡܥܲܝܗ̈‌ܝ: ܘܕܒ̣ܝܼܩܠܗَܘܿܢ ܘܡܘܼܠܝܸܨܠܗَܘܿܢ ܪ̈ܲܚܡܲܝܗܝ. ܕܝܵܗَܒ̣ܝܼ ܗَܘܵܘ ܠܸܒܵܐ ܚܲܟܝܼܡܵܐܝܼܬ: ܠܝܵܠܕَܘܼܬܵܐ ܥܲܠ ܒܵܩܸܪܬܘܼܗܿ. ܣܵܒܵܒ ܒܸܙܕܲܥܝܵܐ ܝܼܗَܘܵܘ ܐܲܒ̣ܵܗܹ̈ܐ: ܕܓܵܠܝܼ ܗَܘܵܘ ܫܪܵܪܵܐ ܠܒܢܘܿܢܲܝܗ̈‌ܝ܀ ܕܩܘܼܪܒܸܢܹܗ ܝܵܘܡܵܐ ܘܡܛܹܐܠܹܗ: ܐܲܝܟܼ ܗܹܡܸܙܡܲܢ ܕܲܢܒ̣ܝܼܵܐ. ܐܵܗܵܐ ܫܩܝܼܠܗَܘܿܢ ܒܸܒܟ̣ܵܝܬܵ‌ܐ: ܒܹܐܡܵܪܵܐ ܩܵܐ ܣܵܘܓܘܿܠܲܝܗ̈‌ܝ. ܛܵܒ̣ܵܐ ܝܼܠܹܗ ܘܒܲܣܝܼܡܵܐ ܐܲܠܵܗܵܐ: ܘܠܹܐ ܡܲܚܪܸܒ̣ ܨܲܠܡܵܐ ܕܬܘܼܪܸܨܠܹܗ. ܨܲܝܵܪܵܐ ܕܓܵܪܸܫ ܫܸܟܵܠܵܐ: ܟܹܐ ܢܵܛܸܪܹܗ ܒܗܸܫܵܪܘܼܬܵܐ܀ ܒܲܣ ܟܡܵܐ ܒܸܬ ܢܵܛܸܪ ܛܵܒ̣ܵܐ: ܨܲܠܡܹܗ ܚܵܝܵܐ ܘܡܗܲܡܙܸܡܵܢܵܐ؟. ܠܵܐ ܒܢ̈ܘܿܢܲܢ ܐܲܬܪܲܢ ܠܹܐ ܚܵܪܸܒ̣: ܐܵܦ ܠܵܐ ܡܕܝܼܢَܬܲܢ ܒܸܬ ܚܲܪܒ̣ܵܐ ܒܝܲܕ ܓܸܙܡܹ̈ܐ [ܗܲܪ̈ܒܹܐ] ܕܛܠܵܩܵܐ: ܒܸܩܪܵܝܲܢ ܝَܠܹܗ ܠܲܬܝܵܒܘܼܬܵܐ: ܘܒܝܲܕ ܟܲܪܒܵܐ ܙܲܪܒܵܢܵܐ: ܡܵܕܥܘܼܪܲܢ ܝَܠܹܗ ܠܕܸܟ̣ܝܘܼܬܵܐ܀ ܐܲܚܬܘܿܢ ܒܢܘܿܢܹ̈ܐ ܣܵܘܓܘܿܠܹ̈ܐ: ܟܡܵܐ ܓܵܗܹ̈ܐ ܦܝܼܫܠܵܘܟ̣ܘܿܢ ܬܘܼܥܠܡܹ̈ܐ ܡܸܢܲܢ. ܘܦܝܼܫܠܵܘܟ̣ܘܿܢ ܡܓ̰ܘܼܢܓ̰ܸܪܹ̈ܐ ܕܥܒ̣ܝܼܕܠܵܘܟ̣ܘܿܢ ܢܲܙܵܢܘܼܬܵܐ ܘܗܘܝܼܠܵܘܟ̣ܘܿܢ ܗܵܘܢܵܢܹ̈ܐ ܒܬܲܥܠܸܡܬܵ‌ܐ ܕܠܹܐ ܝܼܗܘܵܐ ܒܟܲܪܒܵܐ ܦܝܼܫܠܹܗ ܫܩܝܼܠܵܐ: ܗ̇ܘ ܩܵܛܝܼܵܐ ܠܡܲܚܪܘܼܒ̣ـܹܐ. ܩܲܡ ܬܲܥܠܸܡܠܵܘܟ̣ܘܿܢ ܣܵܒܵܒ ܥܒ̣ܝܼܕܠܵܘܟ̣ܘܿܢ ܢܲܙܵܢܘܼܬܵܐ. ܘܚܕܝܼܠܵܘܟ̣ܘܿܢ ܣܵܒܵܒ ܦܝܼܫܠܵܘܟ̣ܘܿܢ ܡܬܘܼܥܠܡܹܐ܀  ܐܵܦ ܐܲܚܬܘܿܢ ܝَܕܸܥܠܵܘܟ̣ܘܿܢ: ܕܒܚܘܼܒܵܐ ܐَܟܼܝܼܠܲܢ ܗܲܪ̈ܒܹܐ.  ܐܵܦ ܐܲܚܬܘܿܢ ܡܦܘܼܪܡܝܼܠܵܘܟ̣ܘܿܢ: ܕܒܪ̈ܲܚܡܹܐ ܦܝܼܫܠܵܘܟ̣ܘܿܢ: ܡܓ̰ܘܼܢܓ̰ܸܪܹ̈ܐ ܒܬܲܥܠܸܡܬܵ‌ܐ ܦܝܼܫܠܵܘܟ̣ܘܿܢ ܡܗܘܼܝܸܪܹܐ: ܝܵܪ̈ܘܼܬܹܐ ܡܸܢܵܗܿ ܗܘܝܼܠܵܘܟ̣ܘܿܢ. ܗ̇‌ܝ ܦܵܫܸܡܬܵܐ ܕܓ̰ܘܼܢܓ̰ܵܪܵܘܟ̣ܘܿܢ: ܗَܘܹܐ ܠܵܗ̇ ܚܲܕܘܼܬܵܐ.  ܐܵܦ ܚܲܫܵܐ ܕܩܵܛܝܼܵܘܟ̣ܘܿܢ ܗَܘܹܐܠܹܗ ܚܸܙܝܼܢܵܐ ܕܥܘܼܕܪ̈ܵܢܹܐ. ܘܕܝܼܪܵܗ̇ ܥܝܼܩܘܼܬܵܘܟ̣ܘܿܢ: ܘܗَܘܹܐܠܵܗ̇ ܟܠܵܗ̇ ܒܘܼܣܵܡܵܐ. ܒܲܣ ܝَܠܘܿܦܘܼܢ ܡܘܼܚܸܒܲܢ: ܡ̣ܢ ܢܸܣܝܵܢܵܐ ܕܓ̰ܘܼܢܓ̰ܵܪܵܘܟ̣ܘܿܢ. ܘܦܵܪܡܵܝܡܘܼܢ ܐܵܦ ܡ̣ܢ ܩܵܛܝܼܵܐ: ܚܲܟܝܼܡܵܐ ܕܐܲܒ̣̈ܵܗܵܘܟ̣ܘܿܢ܀ ܕܠܥܘܼܕܪܵܢܲܢ ܟܹܐ ܬܲܥܠܸܡܠܲܢ: ܗ̇ܘ ܒܵܒܵܐ ܕܟܹܐ ܒܲܥܝܹܐ ܚܲܟܝܼܡܹ̈ܐ ܥܵܒܸܕܠܲܢ. ܩܵܛܝܼܘܼܗ‌ܝ ܒܟܲܪܒܵܐ ܟܹܐ ܦܵܐܸܫ ܫܩܝܼܠܵܐ: ܩܵܐ ܕܡܲܙܕܸܥ  ܐܵܦ ܬܲܥܠܸܡܠܲܢ. ܣܵܒܵܒ ܐܲܝܟܼ ܕܐܲܚܢܲܢ ܐܲܒ̣ܵܗܹ̈ܐ: ܐܸܠܵܘܟ̣ܘܿܢ ܒܢܓ̰ܵܘܬܵܐ ܟܹܐ ܬܲܥܠܡܸܚ. ܩܵܐ ܗܵܝܸܪܬܵܘܟ̣ܘܿܢ ܟܹܐ ܝܵܗَܒܸܚܠܵܘܟ̣ܘܿܢ ܚܲܫܵܐ܀  ܐܵܦ ܗ̇ܘ ܛܵܒ̣ܵܐ ܘܒܲܣܝܼܡܵܐ: ܒܢܓ̰ܵܘܬܘܼܗܝ ܟܹܐ ܬܲܥܠܸܡܠܲܢ. ܘܒܛܲܝܒܘܼܬܹܗ ܟܹܐ ܦܵܪܸܩܠܲܢ: ܘܚܲܙܝܼܢܵܐ ܕܪ̈ܲܚܡܘܼܗܝ ܟܹܐ ܡܲܫܦܸܟܼܠܲܢ. ܒܩܵܛܝܼܘܼܗܝ ܚܘܼܒܹܗ ܟܹܐ ܡܲܚܙܝܼܠܲܢ ܒܓ̰ܲܢܓ̰ܵܪܬܘܼܗܝ ܚܸܙܝܼܢܹܗ ܟܹܐ ܦܵܬܸܚܠܲܢ. ܐܸܢ ܐܵܗܵܐ ܐܸܠܵܘܟ̣ܘܿܢ ܡܲܥܠܘܼܡ ܝܼܠܵܗ̇ ܕܡ̣ܢ ܚܘܼܒܵܐ ܐܸܠܵܘܟ̣ܘܿܢ ܟܹܐ ܓ̰ܲܢܓ̰ܸܪܲܚ܀ ܒܲܣ ܕܵܐܟ̣ܝܼ ܚܲܫܒܼܲܚ ܕܐܲܠܵܗܵܐ: ܠܹܐ ܝَܠܹܗ ܡ̣ܢ ܚܘܼܒܵܐ ܡܬܲܥܠܘܼܡܲܢ. ܐܵܗܵܐ ܬܲܥܠܸܡܬܵܐ ܕܝܼـܲܢ ܚܘܼܫ ܗܵܘܝܵܐ ܠܵܘܟ̣ܘܿܢ ܐܲܝܟܼ ܢܵܘܪܵܐ. ܕܚܵܙܝܼܬܘܿܢ ܒܝܼܵܗ̇ ܠܗ̇‌ܝ ܬܲܥܠܲܡܬܵ‌ܐ ܕܫܵܦܵܩܲܬ ܕܛܲܝܒܘܼܬܵܐ. ܠܹܐ ܡܵܨܲܚ ܝܵܐ ܡܘܼܚܸܒܲܢ. ܕܚܲܕَ ܗܵܕܟ̣ܵܐ ܡܲܚܸܒܵܚܠܵܘܟ̣ܘܿܢ܀ ܕܵܐܟ̣ܝܼ ܟܹܐ ܡܲܚܸܒ ܐܲܠܵܗܵܐ ܠܒܢܲܝ̈ܢܵܫܵܐ ܒܪ̈ܲܚܡܘܼܗܝ. ܙܥܘܿܪܵܐ ܝܼܠܹܗ ܚܘܼܒܲܢ ܠܟܸܣܠܵܘܟ̣ܘܿܢ: ܡ̣ܢ ܗ̇ܘ ܚܘܼܒܹܗ ܕܠܟܸܣܠܲܢ. ܘܟܲܕ ܪܵܒܵܐ ܓܘܼܪܬܵܐ ܝܼܠܵܗ̇ ܬܲܥܠܸܡܬܹܗ: ܓܘܼܪܬܵܐ ܝܼܠܵܗ̇ ܙܹܐ ܡܸܢܵܗ̇ ܛܲܝܒܘܼܬܹܗ. ܒܬܲܥܠܲܡܬܹܗ ܟܹܐ ܦܵܝܫܵܐ ܝܵܘܼܗَܒܸܠܬܵܐ: ܬܝܵܒ̣ܘܼܬܵܐ ܠܒܢܲܝ̈ܢܵܫܵܐ܀ ܒܢܘܿܢܹ̈ܐ ܦܫܝܼܡܹ̈ܐ ܫܩܘܿܠܘܼܢ ܠܸܒܵܐ ܘܡܵܫܠܘܼܢ ܚܲܕَܟ̰ܵܐ ܕܸܡܥܵܘ̈ܟ̣ܘܿܢ. ܫܝܲܥܫܵܐ ܡܸܢܲܢ ܒܸܬ ܫܵܠܹܐ: ܘܟܲܪܒܵܐ ܡܸܢܲܢ ܒܸܬ ܥܵܒܸܪ. ܘܐܲܬܪܵܐ ܓ̰ܵܠܕܹܐ ܒܸܬ ܫܵܩܸܠ ܠܸܒܵܐ: ܡܕܝܼܢَܬܲܢ ܓ̰ܵܠܕܹܐ ܒܸܬ ܦܲܨܚܵܐ. ܘܒܸܬ ܚܵܕܹܐ ܬܲܥܠܸܡܵܢܵܐ ܕܚܵܙܹܐ ܕܒܢܘܿܢܹ̈ܐ ܡܘܼܪ̈ܕܸܢܹܐ ܕܗَܘܵܘ ܠܵܘܟ̣ܘܿܢ܀

ܡܕܪܫܐ.

(ܒܠܵܟܼ ܫܘܼܒ̣ܚܵܐ ܟܣܸܐ)

     ܥܘܼܢܵܝܵܐ. ܐܘܿ ܕܲܒ̣ܪܵܢ ܡ̣ܢ ܠܵܐ ܡܸܕܸܿܡ: ܠܵܐ ܬܲܣܠܹܝܢ ܐܲܝܟܼ ܠܵܐ ܡܸܕܸܿܡ. ܘܐܸܢܗ݀ܘ ܕܚܵܘܒܲܝ̈ܢ ܣܲܓ̇ܝܼܐܝܼܢ. ܕܝܼܠܵܟܼ ܫܦܝܼܥܵܐ ܗَ‌ܝܼ ܛܲܝܒܿܘܼܬ̣ܵܟܼ. 

     ܒܵܬܹ̈‌ܐ. ܥܲܠ ܬܘܼܟ̣ܠܵܢܵܐ ܗَܘܼ ܕܲܚܢܵܢܵܟܼ: ܡܸܬܼܟܲܫܦܝܼܢܲܢ ܚܵܐܹ̇ܢ ܟܠ. ܦܬܲܚ ܠܵܗ̇ ܬܲܪܥܵܐ ܠܒܼܵܥܘܼܬܲܢ: ܕܢܵܩ̇ܫܵܐ ܒܲܬܼܪܲܥ ܛܲܝܒܿܘܼܬ̣ܵܟܼ. ܟܐܝܼ ܒܟܹܐܢܘܼܬܼܵܟܼ ܒܲܣܝܼܡܵܐ: ܕܠܵܐ ܬܸܬ̣ܡܲܪܡܲܪ ܥܲܠ ܥܵܘ̣ܠܲܢ. ܢܫܲܝܢܵܟܼ ܚܘܼܒܵܐ ܕܨܸܒ̣ܝܵܢܵܟܼ: ܐܲܝܟܼ ܕܲܡܥܵܕܲܬ̇ ܣܵܥܲܪ ܐܲܢَܬ̇‌܀ ܠܵܐ ܬܸܬ̣ܒܲܩܸܐ ܝܼܕܲܥܬ̣ܵܟܼ: ܒܣܲܢ̈ܝܵܬܲܢ ܚܲܬܿܝܼܬ̣ܵܐܝܼܬܼ. ܘܠܵܐ ܬܲܥܸܠܲܝܢ ܠܲܒܼܨܵܬ̣ܵܐ: ܒܗܵܘ̇ ܕܝܼܢܵܐ ܕܒܼܵܚܲܪ ܟܠܵܐ. ܕܟܲܪܝܵܐ ܡܸܠܲܬ̣ ܒܵܥܘܼܬܲܢ: ܘܠܵܐ ܡܵܛ̇ܝܵܐ ܠܪܵܘܡܵܐ ܕܲܠܥܸܠ. ܦܫܘܿܛ ܠܵܗ̇ ܐܝܼܕܼܵܐ ܕܲܚܢܵܢܵܟܼ. ܘܬܸܣܲܩ ܒܵܗ̇ ܠܘܵܬ̣ ܫܘܼܒ̣ܩܵܢܵܐ‌܀ ܟܡܵܐ ܐܸܢ ܪܲܒܵܐ ܣܲܟ̣ܠܘܼܬܲܢ: ܙܥܘܿܪܝܵܐ ܗَ‌ܝܼ ܣܲܓ̇ܝܼ ܠܲܚܢܵܢܵܟܼ. ܘܐܸܢ ܠܲܝܬ̇ ܦܸܚܡܵܐ ܠܒܼܝܼܫܘܼܬܲܢ: ܠܛܲܝܒܿܘܼܬܼܵܟܼ ܐܲܝܟܼ ܛܸܠܵܠܵܐ ܗَ‌ܝܼ. ܠܵܐ ܡܵܕܹܝܢ ܬܹܐܚܘܿܕܼ ܬܲܪܥܵܐ: ܕܥܘܼܬ̣ܪܹܗ ܪܲܒܵܐ ܕܲܚܢܵܢܵܟܼ. ܘܠܵܐ ܡܸܬ̣ܟܲܠܝܵܐ ܒܵܥܘܼܬܲܢ: ܒܐܲܦܲܝ̈ ܬܲܪܥܵܐ ܕܣܲܟܼܠܘܼܬܲܢ‌܀

ܩܪܝܢܐ؛ ܒ

ܡܘܬܒ̣ܐ؛ ܐ.

ܘܐܲܢܹܐ ܘܐܲܝܟܼ ܕܐܲܢܹܐ ܡܗܘܼܡܙܸܡܠܗَܘܿܢ: ܢܝܼܢܘܵܝܹ̈ܐ ܠܚܲܒܝܼܒܲܝܗ̈‌ܝ. ܟܲܕ ܒܸܒܥܵܝܵܐ ܝܼܗَܘܵܘ ܠܝܵܗَܒܲܝܗ‌ܝ ܠܸܒܵܐ: ܥܲܠ ܫܲܝܢܵܐ ܡܢܵܒܘܼܝܹܐ ܗَܘܵܘ. ܕܗَܘܵܘ ܠܗَܘܿܢ ܒܓ̰ܲܠܕܘܼܬܵܐ ܬܲܝܵܒ̣̈ـܹܐ: ܡܢܘܿܒܹܐ ܠܗَܘܿܢ ܐܲܝܟܼ ܫܲܪܝܼܪܹ̈ܐ. ܬܝܵܒ̣ܘܼܬܵܐ ܝܼܗَܘܵܐ ܕܦܸܠܚܵܢܵܐ: ܢܒ̣ܝܼܘܼܬܵܐ ܝܼܗَܘܵܐ ܕܲܫܪܵܪܵܐ܀ ܐܵܦܸܢ ܗܵܕܟ̣ܵܐ ܗܲܡܙܘܼܡܹܐ ܗَܘܵܘ ܡ̣ܢ ܒܸܟ̣ܝܵܐ ܠܹܐ ܝܼܗَܘܵܘ ܒܸܫܠܵܝܵܐ. ܐܵܦܸܢ ܗܵܕܟ̣ܵܐ ܒܝܼܵܗَܒ̣ܵܐ ܗَܘܵܘ ܠܸܒܵܐ: ܡ̣ܢ ܠܝܵܝܬܵܐ ܠܹܐ ܗَܘܵܘ ܒܸܫܠܵܝܵܐ. ܙܕܘܼܥܬܵ‌ܐ ܨܵܘܡܵܐ ܡܲܙܝܘܼܕܹܐ ܝܼܗَܘܵܐ ܘܚܓ̰ܲܠܬܵ‌ܐ ܠܲܨܠܘܿܬܵܐ. ܣܵܒܵܒ ܚܝܼܪܘܼܢ ܒܗܵܘܢܵܢܘܼܬܵܐ: ܕܐܸܢ ܙܲܕܝܼܩܹ̈ܐ ܠܹܐ ܝَܢܵܐ ܒܸܫܠܵܝܵܐ܀ ܒܲܣ ܟܡܵܐ ܠܵܙܸܡ ܒܵܟ̣ܝܼ ܚܲܛܵܝܹ̈ܐ: ܕܚܲܪܬܵܐ ܩܵܕَܡ ܬܲܪܥܵܐ ܒܸܟܠܵܝܵܐ ܗَܘܵܐ. ܦܠܝܼܛܠܹܗ ܡܲܠܟܵܐ ܘܡܘܼܚܙܝܼܵܗܿ ܠܹܗ ܓܵܢܹܗ: ܘܪܓܝܼܕܠܹܗ ܛܵܝܸܦܵܐ ܕܚܙܹܐܠܹܗ ܣܲܩܹܗ. ܡ̣ܢ ܥܸܠܵܝܵܐ ܒܸܙܕܲܥܝܵܐ ܗَܘܵܐ. ܕܟܸܬܲܢ ܒܟܲܪܒܵܐ ܠܵܒܸܫ ܗَܘܵܐ  ܐܵܦ ܡܲܠܟܵܐ ܕܚܙܹܐܠܹܗ ܒܟ̣ـܹܐܠܹܗ: ܘܒܸܠܝܵܝܵܐ ܗَܘܵܐ ܟܠܹܗ ܥܲܠܡܵܐ܀ ܒܟ̣ـܹܐܠܹܗ ܡܲܠܟܵܐ ܠܒܲܪܩܘܼܒ̣ܠ ܛܵܝܸܦܹܗ ܕܒܝܲܕ ܣܲܩܹ̈ܐ ܡܘܼܟܸܡܠܹܗ ܟܠܹܗ. ܥܲܠܡܵܐ ܟܠܹܗ ܒܸܟ̣ܝܵܐ ܗَܘܵܐ: ܟܹܐܦܹ̈ܐ ܒܓܘܼܕܵܢܹ̈ܐ ܡܲܒܟ̣ܘܼܝܹܐ ܗَܘܵܘ. ܡܵܢܝܼ ܗَܘܵܐ ܕܗܵܕܟ̣ܵܐ ܡܨܘܿܠܹܐܠܹܗ: ܡܵܢܝܼ ܗَܘܵܐ ܕܗܵܕܟ̣ܵܐ ܡܦܘܼܪܦܸܠܹܗ. ܡܵܢܝܼ ܝَܠܹܗ ܕܚܲܕَ ܗܵܕܟ̣ܵܐ ܡܟܝܼܟ̣ܠܹܗ: ܡܵܢܝܼ ܝَܠܹܗ ܕܗܵܕܟ̣ܵܐ ܒܪܸܟܠܹܗ ܡܵܢܝܼ ܗَܘܵܐ ܕܫܠܸܚܠܹܗ ܣܢܵܝܵܬ̈ܘܼܗܝ: ܕܛܸܫܝܹ̈ܐ ܗَܘܵܘ ܘܓܸܠܝܹ̈ܐ. ܡܵܢܝܼ ܗَܘܵܐ ܕܦܪܝܼܡܠܹܗ ܘܪܘܼܦܹܐܠܹܗ ܡ̣ܢ ܓܵܢܘܼܗܝ: ܒܘܼܣܵܡܘܼܗ̈‌ܝ ܐܲܝܟܼ ܗܲܕܵܡܘܼ̈ܗܝ. ܡܵܢܝܼ ܗَܘܵܐ ܕܫܡܸܥܠܹܗ ܐܲܚܟ̰ܝܼ ܩܵܠܵܐ: ܘܟ̰ܠܝܼܦܠܹܗ ܠܸܒܘܼܗܝ ܒܚܛܝܼܵܬܘܼ̈ܗܝ. ܡܵܢܝܼ ܗَܘܵܐ ܕܫܡܸܥܠܹܗ ܗܹܡܸܙܡܲܢ ܕܦܘܼܡܵܐ: ܘܗܘܹܐܠܹܗ ܓܘܼܢܚܵܐ ܒܪܸܥܝܵܢܘܼܗܝ܀ ܡܵܢܝܼ ܗَܘܵܐ ܕܡ̣ܢ ܩܵܠܵܐ ܙܲܒܘܼܢ ܫ̃ܵܢܹ̈ܐ ܕܡܵܘܬܵܐ ܕܒ̣ܝܼܩܠܗَܘܿܢ. ܡܵܢܝܼ ܗَܘܵܐ ܕܨܘܼܠܡܸܢܹܗ ܠܐܲܠܵܗܵܐ: ܩܵܕَܡ ܥܲܝܢ̈ܘܼܗ‌ܝ ܒܲܬܝܵܒ̣ܘܼܬܵܐ. ܡܵܢܝܼ ܗَܘܵܐ ܕܚܙܹܐܠܹܗ ܠܟܹܐܢܵܐ: ܟܲܕ ܓܪܝܼܫܵܐ ܣܲܝܦܘܼܗܝ ܛܸܫܝܵܐ. ܡܵܢܝܼ ܗَܘܵܐ ܕܚܙܹܐܠܹܗ ܠܐܲܬܪܵܐ ܓܘܼܪܵܐ ܡܲܩܘܘܼܚܹܐ ܘܒܸܟ̣ܝܵܐ ܟܠܹܗ܀ ܡܵܢܝܼ ܟܹܐ ܡܵܨܝܼ ܗَܘܵܐ: ܕܣܲܝܒܸܪ ܗَܘܵܐ: ܩܵܠܵܐ ܕܒܸܟ̣ܝܵܐ ܕܝܲܠܘܼܕܹ̈ܐ. ܡܲܚܸܒܵܢܹ̈ܐ ܕܚܲܝܹ̈ܐ ܝܵܪ̈ܝܼܟ̣ـܹܐ: ܫܡܸܥܠܗَܘܿܢ ܕܚܲܝܲܝܗ̈‌ܝ ܒܸܬ ܟܵܪܝܼ. ܡܵܢܝܼ ܗَܘܵܐ ܕܡܵܨܝܼ ܗَܘܵܐ: ܕܣܲܝܒܸܪ ܗَܘܵܐ ܡܲܩܘܲܚܬܵܐ ܕܣܵܒܹ̈ܐ. ܡܲܚܸܒܵܢܹ̈ܐ ܕܩܲܒ̣ܪܹ̈ܐ ܘܩܲܒ̣ܪ̈ܵܢܹܐ: ܫܡܸܥܠܗَܘܿܢ ܕܡܕܝܼܢَܬܲܝܗܝ ܒܸܬ ܚܲܪܩܵܐ܀ ܡܵܢܝܼ ܡܵܨܝܼ ܗَܘܵܐ ܕܣܲܝܒܸܪ ܗَܘܵܐ: ܒܸܟ̣ܝܵܐ ܓܘܼܪܵܐ ܕܲܥܠܲܝܡܹ̈ܐ. ܘܒܸܚܝܵܪܵܐ ܗَܘܵܘ ܠܲܚܠܘܼܠܲܝܗ̈‌ܝ. ܘܦܝܵܫܵܐ ܗَܘܵܘ ܟ̰ܝܼܕܹܐ ܠܡܵܘܬܲܝܗܝ. ܡܵܢܝܼ ܡܵܨܝܼ ܗَܘܵܐ ܕܣܲܝܒܸܪ ܗَܘܵܐ: ܩܵܠܵܐ ܘܒܸܟ̣ܝܵܐ ܕܟܲܠܠܵܬܹ̈‌ܐ. ܟܲܕ ܒܸܬܝܵܒ̣ܵܐ ܒܸܓܢܘܿܢܲܝܗ̈‌ܝ: ܠܦܲܚܬܵ‌ܐ [ܟ̰ܵܠܹܐ] ܕܐܲܪܥܵܐ ܦܝܵܫܵܐ ܟ̰ܝܼܕܹ̈ܐ܀ ܡܵܢܝܼ ܡܵܨܝܼ ܗَܘܵܐ ܕܠܵܐ ܒܵܟ̣ܝܼ ܗَܘܵܐ: ܒܸܚܙܵܝܵܐ ܠܡܲܠܟܵܐ ܕܒܸܟ̣ܝܵܐ ܗَܘܵܐ. ܕܡ̣ܢ ܓܹܒ ܗܲܝܟܠܵܐ ܕܡܲܠܟܘܼܬܹܗ ܕܨܵܠܹܐ ܠܫܝܘܿܠ ܦܝܵܫܵܐ ܟ̰ܝܼܕܵܐ. ܘܕܡܲܠܟܵܐ ܗَܘܵܐ ܓܵܘ ܚܵܝܹ̈ܐ: ܕܗܵܘܹܐ ܥܲܦܪܵܐ ܓܵܘ ܡܝܼܬܹ̈‌‌ܐ. ܡ̣ܢ ܓܹܒ ܡܲܪܟܲܒ̣ܬܵ‌ܐ ܕܐܝܼܩܵܪܹܗ: ܫܡܸܥܠܹܗ ܕܡܕܝܼܢَܬܹܗ ܒܸܬ ܚܲܪܩܵܐ܀ ܡ̣ܢ ܓܹܒ ܕܠܵܙܲܬܹ̈ܐ ܘܒܘܼܣܵܡܹ̈ܐ: ܫܡܸܥܠܹܗ ܕܡܵܘܬܵܐ ܒܲܠܸܥܠܹܗ. ܘܡ̣ܢ ܓܹܒ ܫܘܝܼܬܵ‌ܐ ܕܸܢܝܵܚܹܗ: ܒܟܲܪܒܵܐ ܠܥܘܼܡܩܵܐ ܦܝܼܫܠܹܗ ܟ̰ܝܼܕܵܐ. ܠܡܵܘܬܵܐ ܒܚܲܝܲܝܗ̈‌ܝ ܦܝܼܫܠܗَܘܿܢ ܟ̰ܝܼܕܹ̈ܐ: ܛܵܝܸܦܵܐ ܘܡܲܠܟܹܗ ܡܸܢܫܸܠܬܵܢܹܐ. ܩܪܹܐܠܹܗ ܡܲܠܟܵܐ ܠܚܲܝܠܵܘܵܬܹ̈ܗ: ܘܒܟ̣ܹܐܠܹܗ ܥܲܠܲܝܗܝ ܘܐܵܢܝܼ ܥܲܠܘܼܗܝ܀ ܡܬܘܼܢܹܐܠܹܗ ܡܲܠܟܵܐ ܐܸܠܲܝܗܝ: ܕܒܟܡܵܐ ܦܠܵܫܹ̈ܐ ܦܝܼܫܠܗَܘܿܢ ܡܬܘܼܓ̰ܸܢܹ̈ܐ. ܘܡܘܼܕܸܥܠܹܗ  ܐܵܦ ܐܸܠܲܝܗ‌ܝ. ܕܒܟܡܵܐ ܡܲܩܪ̈ܵܨܘܼܝܵܬܹ‌ܐ ܗَܘܵܘ ܠܗَܘܿܢ ܓ̣ܵܠܒܵܢܹ̈ܐ. ܒܨܸܪܵܗ̇ ܓܵܢܹܗ ܘܫܦܸܠܠܹܗ. ܕܠܲܝܬ ܡܸܢَܕܪܸܫَ ܕܦܵܪܸܩ ܘܗܲܝܸܪ. ܡܫܘܼܪܹܐܠܹܗ ܒܹܐܡܵܪܵܐ ܐܸܠܲܝܗܝ: ܕܠܹܐ ܝَܠܹܗ ܦܠܵܫܵܐ ܡܘܼܚܸܒܝܼ܀ ܕܦܵܠܛܲܚ ܘܓ̣ܵܠܒܲܚ ܐܲܝܟܼ ܥܵܕܲܬܲܢ: ܘܗܵܘܲܚ ܢܲܨܝܼܚܹ̈ܐ ܐܲܝܟܼ ܪܸܙܵܝܲܢ. ܕܐܵܦ ܓܲܢَܒܵܪܹ̈ܐ ܒܸܚܓ̰ܵܠܵܐ ܝَܢܵܐ: ܡ̣ܢ ܒܲܗَܣ ܕܐܵܬܘܿܪ ܓܘܼܪܬܵܐ. ܐܲܚܢܲܢ ܕܓ̣ܠܝܼܒܠܲܢ ܠܪܵܒܵܐ. ܚܲܕَ ܥܸܒ̣ܪܵܝܵܐ ܒܸܓ̣ܠܵܒܲܢ ܝܑܼܠܹܗ. ܩܵܠܲܢ ܠܡܲܠܟܹ̈ܐ ܟܹܐ ܡܲܚܓ̰ܸܠ ܗَܘܵܐ: ܘܩܵܠܹܗ ܕܝܼܘܼܗ‌ܝ ܒܸܫܓ̣ܵܫܲܢ ܝܼܠܹܗ܀ ܠܪܵܒܵܐ ܡܕܝܼܢܵܬܹ̈‌ܐ ܬܠܝܼܚܠܲܢ. ܘܓܵܘ ܡܕܝܼܢ̈ܵܬܲܢ ܒܸܓ̣ܠܵܒܲܢ ܝܑܼܠܹܗ. ܢܝܼܢܘܹܐ ܝܸܡܵܐ ܕܓܲܢَܒܵܪܹ̈ܐ ܡ̣ܢ ܚܲܕَ ܙܲܒܘܼܢ ܙܕܸܥܠܵܗ̇. ܐܲܪܝܘܼܬܵܐ ܒܡܲܪܒܘܿܥܝܼܬܘܿܗ̇ [ܗ.ܕ܊ ܓܵܘ ܕܘܼܟܬܵܗ̇.] ܚܓ̰ܸܠܵܐ ܡ̣ܢ ܥܸܒ̣ܪܵܝܵܐ. ܓܘܼܪܓܸܡܠܵܗ̇ ܐܵܬܘܿܪ ܓܵܘ ܒܪܝܼܬܵܐ: ܘܩܵܠܹܗ ܕܝܵܘܢܵܢ ܡܓܲܪܓܘܼܡܹܐ ܝَܠܹܗ ܒܝܼܘܿܗ̇܀ ܚܲܕَ ܗܵܕܟ̣ܵܐ ܫܦܸܠܠܹܗ: ܙܲܪܥܹܗ ܕܢܸܡܪܘܿܕ ܓܲܢَܒܵܪܵܐ. ܝܘܼܗَܒܸܠܹܗ ܡܲܠܟܵܐ ܪܵܥܝܼ ܛܵܒ̣ܵܐ: ܠܚܲܝܠܵܘܵܬܘܼ̈ܗܝ ܙܲܪ̈ܒܵܢܹܐ ܒܸܥܒ̣ܵܕܵܘܟ̣ܘܿܢ ܝܼܘܸܢ ܪܵܥܝܼ ܣܵܘܓܘܿܠܝܼ: ܕܐܵܦ ܐܵܕܝܼܵܐ ܠܵܐ ܫܲܪܫܲܚ. ܦܵܠܫܲܚ ܐܲܝܟܼ ܓܲܢَܒܵܪܹ̈ܐ: ܕܠܵܐ ܛܲܠܩܲܚ ܐܲܝܟܼ ܙܲܒܘܼܢܹ̈ܐ܀ ܣܵܒܵܒ ܗ̇ܘ ܕܒܓ̰ܘܼܪ̈ܵܒܘܼܗܝ. ܗܵܘܹܐ ܠܸܒܵܢܵܐ  ܐܵܦ ܓܲܢَܒܵܪܵܐ. ܐܸܢ ܡܵܐܸܬ ܐܲܝܟܼ ܓܲܢَܒܵܪܵܐ. ܘܐܸܢ ܚܵܝܹܐ ܐܲܝܟܼ ܢܲܨܝܼܚܵܐ. ܐܸܢ ܡܵܘܬܵܐ ܝܼܠܹܗ ܕܫܸܡܵܐ ܛܵܒ̣ܵܐ. ܘܐܸܢ ܙܹܐ ܚܲܝܹ̈ܐ ܕܢܲܨܝܼܚܘܼܬܵܐ. ܬܪܹܝ ܝܘܼܬܪ̈ܵܢܹܐ ܟܹܐ ܩܵܢܹܐ ܢܲܨܝܼܚܵܐ ܒܠܸܒܵܢܘܼܬܹܗ܀ ܕܵܐܟ̣ܝܼ ܕܬܪܹܝ ܡܲܪ̈ܥܹܐ: ܟܹܐ ܩܵܢܹܐ ܗ̇ܘ ܕܝܼܠܹܗ ܪܸܦܝܵܐ. ܘܟܠܹܗ ܡܵܘܬܹܗ ܢܟܼܝܼܦܬܵ‌ܐ ܝَܠܹܗ. ܘܐܵܦ ܚܲܝܘܼ̈ܗ‌ܝ ܕܫܸܡܵܐ ܒܝܼܫܵܐ. ܒܲܣ ܡܟ̰ܲܟܒܸܢܲܚ ܐܵܦ ܗܵܘܲܚ ܠܸܒܵܢܹ̈ܐ: ܗܵܘܲܚ ܓܲܢَܒܵܪܹ̈ܐ ܐܵܦ ܡܲܪ̈ܕܹܐ. ܐܵܦܸܢ ܕܗܸܟ̰ ܡܸܢܕܝܼ ܠܹܐ ܩܵܢܲܚ ܐܝܼܢܵܐ ܫܸܡܵܐ ܕܡܲܪ̈ܕܹܐ ܚܘܫܼ ܕܩܵܢܲܚ܀ ܫܡܝܼܥܠܲܢ ܡ̣ܢ ܝܘܼܒܵܠܵܐ: ܕܐܲܒ̣ܵܗ̈ܵܬܲܢ ܩܵܕَܡܵܝܹ̈ܐ. ܕܐܝܼܬ ܠܹܗ ܟܹܐܢܘܼܬܵܐ ܐܲܠܵܗܵܐ: ܘܐܝܼܬܠܹܗ  ܐܵܦ ܫܵܦܵܩܲܬ. ܒܝܲܕ ܟܹܐܢܘܼܬܹܗ ܟܹܐ ܐܵܟ̣ܸܠ ܓܸܙܡܹ̈ܐ: ܘܒܫܵܦܵܩܲܬܹܗ ܟܹܐ ܡܪܲܚܸܡ. ܒܲܣ ܣܵܙܓܸܪܲܚ ܥܲܡ ܟܹܐܢܘܼܬܹܗ: ܘܒܘܼܫ ܙܵܘܕܵܐ ܡܝܲܩܪܲܚ ܠܛܲܝܒܘܼܬܹܗ܀ ܕܐܸܢ ܡܣܘܼܙܓܸܪܵܐ ܥܲܡܲܢ ܟܹܐܢܘܼܬܹܗ: ܒܲܣ ܡܗܲܝܸܪܲܢܬܲܢ ܝܑܼܠܵܗ̇ ܐܵܦ  ܛܲܝܒܘܼܬܹܗ. ܘܐܸܢ ܟܪܝܼܒܬܵ‌ܐ ܝَܠܵܗ̇ ܟܹܐܢܘܼܬܹܗ. ܠܹܐ ܦܵܝܫܵܐ ܠܝܼܡܬܵܐ ܒܵܥܘܼܬܲܢ. ܐܵܦܸܢ ܕܗ̇‌ܝ ܠܹܐ ܡܣܵܙܓܸܪܵܐ: ܐܝܼܢܵܐ ܠܹܐ ܦܵܝܫܵܐ ܠܝܼܡܬܵ‌ܐ ܦܲܪܦܸܠܬܲܢ. ܒܹܝܠ ܟܹܐܢܘܼܬܵܐ ܠܛܲܝܒܘܼܬܵܐ: ܬܝܵܒ̣ܘܼܬܵܐ ܠܹܐ ܦܵܝܫܵܐ ܙܠܝܼܡܬܵ‌ܐ܀ ܬܲܪܨܸܚܠܲܢ ܙܲܝܢܵܐ [ܟ̰ܲܟܵܐ] ܚܲܕܬܵܐ: ܠܦܠܵܫܵܐ ܚܲܕܬܵܐ ܕܩܸܪܝܲܚܠܹܗ. ܦܠܵܫܵܐ ܚܲܕܬܵܐ ܝَܠܹܗ ܡܘܼܚܸܒܝܼ̈: ܟ̰ܲܟܵܐ ܚܲܕܬܵܐ ܫܲܩܠܲܚ ܠܲܢ. ܫܡܝܼܥܠܲܢ ܡ̣ܢ ܩܵܕَܡܵܝܹ̈ܐ: ܕܡܘܼܟܪܸܙܠܗܘܿܢ ܗܵܩܘܼܬܵܐ ܓܵܘ ܒܪܝܼܬܵ‌ܐ. ܒܝܘܼܒܵܠܵܐ ܦܝܼܫܠܗَܘܿܢ ܠܘܼܒܠܹܐ ܩܵܠܲܝܗ̈‌ܝ:  ܐܵܦ ܒܲܗܣܹ̈ܐ ܕܓ̣ܵܠܝܼܒܘܼܬܲܝܗ̈‌ܝ܀ ܣܵܒܵܒ ܠܹܐ ܝَܠܵܗ̇ ܦܪܝܼܩܬܵ‌ܐ ܐَܢܵܫܘܼܬܵܐ: ܡ̣ܢ ܝَܕܸܥܬܵ‌ܐ ܕܫܘܼܚܠܵܦܹ̈ܐ. ܚܕܝܼܪܘܼܢ ܒܲܗܣܹ̈ܐ ܓܵܘ ܒܪܝܼܬܵ‌ܐ: ܕܟܹܐܢܹ̈ܐ ܕܵܐܟ̣ܝܼ ܓ̣ܠܝܼܒܠܗَܘܿܢ. ܦܝܼܫܠܵܗ̇ ܡܘܼܡܠܸܚܬܵ‌ܐ ܟܠܵ̇ܗ̇ ܒܪܝܼܬܵ‌ܐ: ܕܗ̇ܘ ܕܒܹܐ ܛܲܥܡܵܐ ܝَܠܹܗ ܦܵܐܸܫ ܡܘܼܡܠܸܚܵܐ. ܫܡܸܥܠܲܢ ܙܹܐ ܥܲܠ ܥܵـܘ̈ܵܠܹܐ: ܕܵܐܟ̣ܝܼ ܩܘܼܫܕܸܪܘܼܢ ܘܦܝܼܫܠܗَܘܿܢ ܚܲܝܵܒ̣̈ـܹܐ [ܡܵܪܹ̈ܐ ܓܢܵܗܵܐ]܀ ܐܵܦ ܢܵܘܪܵܐ ܦܝܼܫܠܹܗ ܬܘܼܪܨܵܐ: ܗ̇ܘ ܕܫܘܼܚܬܸܢܵܐ ܝَܠܹܗ ܚܵܙܹܐ ܠܲܟܘܼ̈ܗ‌ܝ: ܢܝܼܫܲܢܩܵܐ ܡܘܼܬܒ̣ܵܐ ܝَܠܹܗ ܓܵܘ ܒܪܝܼܬܵܐ: ܕܡܲܕܡܝܼ ܒܝܼܘܼܗ‌ܝ ܚܲܙܝܵـܢܹ̈ܐ. ܫܵܦܵܩܲܬ ܦܝܼܫܠܵܗ̇ ܡܘܼܟܪܸܙܬܵܐ: ܕܓܵܫܩܝܼ ܒܝܼܵܗ̇ ܫܲܡܥܵܢܹ̈ܐ. ܬܝܵܒ̣ܘܼܬܵܐ ܓܪܝܼܫܵܐ ܝَܠܹܗ ܫܸܟܠܘܼܗ̇ ܥܲܠ ܐܲܪܥܵܐ: ܕܚܵܝܪܝܼ ܒܝܼܵܗ̇ ܚܲܛܵܝܹ̈ܐ܀ ܡܵܢܝܼ ܝَܠܹܗ ܕܠܹܐ ܝَܠܹܗ ܚܒܝܼܪܵܐ: ܒܘܼܬ ܗ̇ܘ  ܡܸܠܐܵܐ [ܡܸܠܝܵܐ] ܙܲܪܒܵܢܵܐ؟ ܩܘܼܪܒܵܐ ܝَܠܵܗ̇ ܥܲܠܲܢ ܬܲܫܥܝܼܬܵ‌ܐ: ܕܛܵܘܦܵܢܵܐ ܕܒܝܵܘܡܵܢܹ̈ܐ ܕܢܘܿܚ. ܒܸܫܒ̣ܵܒ̣ܘܼܬܵܐ ܕܩܹܒ̣ܘܼܬܵܐ: ܒܸܥܡܵܪܵܐ ܝَܠܵܗ̇ ܟܠܵܗ̇ ܒܪܝܼܬܵ‌ܐ. ܠܲܝܬ ܕܦܪܝܼܩܵܐ ܝَܠܹܗ ܡ̣ܢ ܦܲܪܡܵܝܬܵ‌ܐ: ܘܠܲܝܬ ܕܣܸܡܝܵܐ ܝَܠܹܗ ܡ̣ܢ ܝَܕܸܥܬܵ‌ܐ܀ ܥܲܡ ܒܲܟ̣ܬܵܬܹ̈ܐ ܥܒ̣ܝܼܕܠܗَܘܿܢ ܚܛܝܼܬܵ‌ܐ: ܗ̇ܘ ܕܵܪܵܐ ܕܝܵܘܡܵܢܹ̈ܐ ܕܢܘܿܚ. ܐܵܦ ܬܵܡܵܐ ܡܘܼܟܪܸܙܠܹܗ ܩܵܠܵܐ: ܥܲܠ ܛܵܘܦܵܢܵܐ ܕܒܹܐܬܵܝܵܐ ܗَܘܵܐ. ܥܵـܘ̈ܵܠܹܐ ܕܫܡܸܥܠܗَܘܿܢ ܟܪܸܒܠܗَܘܿܢ: ܘܒܗ̇ܘ ܩܵܠܵܐ ܡܲܣܚܘܿܪܹܐ ܗَܘܵܘ. ܩܵܠܵܐ ܕܚܲܨܝܼܢܵܐ ܘܡܲܩܵܪܵܐ: ܥܲܠ ܡܸܠܐܵܐ [ܡܸܠܝܵܐ] ܡܲܟܪܘܿܙܹܐ ܗَܘܵܐ܀ ܩܵܠܵܐ ܕܢܝܼܣܵܪܬܵܐ ܟܲܕ ܒܸܢܣܵܪܵܐ: ܥܲܠ ܛܵܘܦܵܢܵܐ ܡܲܩܘܘܼܚܹܐ ܗَܘܵܐ. ܒܩܵܠܵܐ ܕܚܲܨܝܼܢܵܐ ܡܲܣܚܘܼܪܹܐ ܗَܘܵܘ: ܘܒܩܵܠܵܐ ܕܡܲܩܵܪܵܐ ܡܲܣܠܘܼܝܹܐ ܗَܘܵܘ. ܟܲܕ ܦܪܝܼܩܠܵܗ̇ ܩܹܒ̣ܘܼܬܵܐ: ܗ̇ܝܓܵܗ ܗَܘܹܐܠܵܗ̇ ܐܲܫܟܵܪܵܐ ܟܹܐܢܘܼܬܵܐ. ܘܟܲܕ ܦܝܼܫܠܵܗ̇ ܓܠܝܼܬܵ‌ܐ ܟܹܐܢܘܼܬܵܐ: ܦܝܼܫܠܵܗ̇ ܓܘܼܢܵܗܟܵܪ ܩܲܫ̃ܕܲܪܬܵܝܗ‌ܝ܀ ܬܪܸܥܠܗَܘܿܢ ܡܲܒܘܼ̈ܥܹܐ ܘܓܘܼܪܓܸܡܠܗَܘܿܢ: ܥܲܠ ܥܵـܘ̈ܵܠܹܐ ܕܡܲܣܠܘܼܝܘܼܗ̇ ܗَܘܵܘ. ܩܘܼܘܸܚܠܹܗ ܡܸܠܐܵܐ [ܡܸܠܝܵܐ] ܡܸܢܫܸܠܬܵܢܹܐ: ܥܲܠ ܪ̈ܲܫܝܼܥܹܐ ܕܡܲܣܚܘܼܪܹܐ ܗَܘܵܘ ܒܝܼܘܿܗ݁. ܐܵܢܝܼ ܕܒܩܵܠܵܐ ܕܚܲܨܝܼܢܵܐ  ܡܘܼܣܚܸܪܘܼܢ: ܒܩܵܠܵܐ ܕܪ̈ܲܥܡܹܐ ܡܓ̰ܘܼܢܓ̰ܸܪܘܼܢ. ܘܐܵܢܝܼ ܕܒܩܵܠܵܐ ܕܢܝܼܣܲܪܬܵܐ ܡܘܼܣܚܸܪܘܼܢ: ܒܦܩܲܥܝܵܬܹ̈‌ܐ ܘܒܸܪ̈ܩܹܐ ܣܡܝܼܠܗَܘܿܢ܀ ܡܫܘܼܪܹܐ ܠܗَܘܿܢ ܠܸܪܚܵܛܵܐ ܠܟܸܣ ܩܹܒ̣ܘܬܵܐ: ܐܵܢܝܼ ܕܡܲܣܚܘܼܪܹܐ ܗَܘܵܘ ܒܝܼܘܿܗ̇. ܐَܟ̰ܝܼܡܠܵܗ̇ ܬܲܪܥܵܐ ܥܲܠܲܝܗܝ: ܣܵܒܵܒ ܒܬܵܪܲܨܬܘܿܗ̇ ܡܲܣܚܘܿܪܹܐ ܗَܘܵܘ. ܒܲܣ ܠܵܐ ܡܲܣܠܲܚ ܠܹܗ ܐܲܚܘܿܢܘܵܬ̈‌ܝܼ: ܩܵܠܹܗ ܕܝܵܘܢܵܢ ܥܸܒ̣ܪܵܝܵܐ. ܠܹܐ ܝَܠܵܗ̇ ܘܵܓ̰ܸܒ ܕܒܡܲܣܠܵܝܬܵ‌ܐ: ܚܵܝܪܲܚ ܒܝܼܘܿܗ̇ ܒܟܵܪܘܿܙܘܼܬܹܗ܀ ܒܦܲܪܡܵܝܬܵ‌ܐ ܚܵܝܪܲܚ ܒܝܼܘܿܗ̇: ܘܡ̣ܢ ܟܠܵܝܗܝ ܓܹܢَܒܵܢܹ̈ܐ ܓܵܫܩܲܚ ܒܝܼܘܿܗ̇. ܒܫܸـܟܘܼܬܵܐ ܓܘܼܪܬܵܐ ܢܦܸܠܝܼ: ܥܲܠ ܩܵܠܵܐ ܕܟܵܪܘܿܙܘܼܬܹܗ. ܩܲܫ̃ܕܲܪܬܵܐ ܒܸܬ ܦܵܝܫܵܐ ܚܫܝܼܒ̣ܬܵ‌ܐ: ܫܹܐܕܵܢܘܼܬܵܐ ܒܸܬ ܦܵܝܫܵܐ ܐَܡܝܼܪܬܵܐ. ܕܐܸܢ ܐَܢܵܫܵܐ ܫܹܐܕܵܢܵܐ ܩܵܪܹܐܠܹܗ: ܚܲܙܝܼܢܵܐ ܓܘܼܪܬܵܐ ܝَܠܹܗ ܕܚܸܟ̣ܡ̱ܬܵ‌ܐ܀ ܕܒܝܼܘܿܗ݁ ܝَܠܵܗ̇ ܦܲܪܡܵܝܬܵ‌ܐ ܐܵܦ ܪܸܥܝܵܢܵܐ: ܘܒܸܢܒ̣ـܲܥܝܵܐ ܝَܠܵܗ̇ ܡܸܢܹܗ ܝَܕܸܥܬܵ‌ܐ. ܚܙܲܝܬܹܗ ܡܘܼܣܠܝܼܬܵܐ ܝَܠܵܗ̇ ܘܫܚܝܼܡܬܵ‌ܐ: ܗܲܡܙܲܡܬܹܗ ܓܘܼܪܬܵܐ ܝَܠܵܗ̇ ܘܡܝܘܼܩܲܪܬܵܐ. ܣܵܒܵܒ ܩܵܕَܡ ܥܲܝܢܵܘ̈ܟ̣ܘܿܢ ܒܘܼܩܸܪܝܼ: ܒܘܼܩܵܪܹ̈ܐ ܕܥܲܠܲܢ ܟܹܐ ܫܲܦܪܝܼ ܗَܘܵܘ: ܘܐܲܝܟܼ ܕܓܵܘ ܟܘܼܪܵܐ ܦܝܼܫܠܗܘܿܢ ܡܨܘܼܪܸ̈ܦܹܐ: ܗܹܡܸܙܡܵܢܹ̈ܐ ܕܗܲܡܙܘܼܡܹܐ ܗَܘܵܘ܀ ܠܵܐ ܙܕܸܥܠܹܗ ܘܠܵܐ ܫܓ̣ܝܼܫܠܹܗ: ܘܠܵܐ ܬܘܼܪܩܸܠܹܗ ܘܠܵܐ ܪܓܝܼܕܠܹܗ. ܘܠܵܐ ܫܘܼܚܠܸܦܠܹܗ ܗܹܡܸܙܡܲܢ ܕܦܘܼܡܹܗ: ܣܵܒܵܒ ܐَܣܝܼܪܬܵܐ ܗَܘܵܐ ܒܲܫܪܵܪܵܐ. ܠܹܐ ܗَܘܵܐ ܒܸܫܒ̣ܵܩܵܐ ܠܗܲܩܝܲܬܹܗ: ܣܵܒܵܒ ܪܵܒܵܐ ܓܘܼܪܵܐ ܗَܘܵܐ ܥܘܼܗܕܹܵܢܹܗ. ܩܲܡ ܫܲܥܫܸܢܹܗ ܠܵܐ ܚܓ̰ܝܼܠܹܗ: ܩܲܡ ܡܲܙܕܸܥܢܹܗ ܠܵܐ ܪܓܝܼܕܠܹܗ܀ ܡܘܼܚܙܹܐܠܝܼ ܕܵܘܸܠܬܵ‌ܐ ܓܚܸܟܠܹܗ: ܐܵܦ ܥܲܠ ܣܲܝܦܵܐ ܒܘܼܨܸܪܹܗ. ܗܘܹܐ ܠܹܗ ܠܣܲܝܦܵܐ ܢܘܼܟ̣ܪܵܝܵܐ: ܘܠܦܲܫܟܲܫ ܒܘܼܫ ܙܵܘܕܵܐ. ܐܝܼܬ ܐَܢܵܫܵܐ ܒܕܵܘܸܠܬܵܐ ܟܹܐ ܦܵܐܸܫ ܡܫܘܼܕܠܵܐ: ܘܐܝܼܬ ܒܣܲܝܦܵܐ ܟܹܐ ܦܵܐܸܫ ܡܘܼܙܕܸܥܝܵܐ. ܝܲܢ ܟܹܐ ܡܲܙܕܸܥܝܵܐ ܠܹܗ ܬܲܥܠܲܡܬܵ‌ܐ: ܝܲܢ ܟܹܐ ܫܲܕܠܵܐ ܠܹܗ ܡܵܘܗܲܒ̣ܬܵ‌ܐ܀ ܒܹܝܠ ܫܵܕܲܠܬܵ‌ܐ ܘܠܡܲܙܕܸܥܬܵ‌ܐ: ܡܘܼܬܸܒ̣ܠܲܢ ܠܐܵܗܵܐ ܥܸܒ̣ܪܵܝܵܐ. ܦܠܝܼܛܠܹܗ ܚܠܝܼܨܠܹܗ ܡ̣ܢ ܬܸܪ̈ܘܲܝܗ‌ܝ: ܒܬܸܪ̈ܘܵܢܬܲܝܗܝ ܡܘܼܣܚܸܪܹܗ. ܡܘܼܚܙܹܐܠܲܢ ܕܵܘܸܠܬܵ‌ܐ ܓܚܸܟܠܹܗ: ܘܥܲܠ ܣܲܝܦܵܐ ܣܸܦܬܹܗ ܡܘܼܪܸܛܠܹܗ. ܡܵܚܲܒܬܵ‌ܐ ܕܙܘܼܙܹ̈ܐ ܦܝܼܫܠܵܗ̇ ܓ̣ܠܝܼܒܬܵ‌ܐ: ܘܙܕܘܿܥܬܵ‌ܐ ܕܡܵܘܬܵܐ ܡܘܼܒܨܸܪܬܵܐ܀ ܟܠ ܚܲܒܪܵܐ ܕܒܹܐܡܵܪܵܐ ܗَܘܵܐ ܒܚܲܪܝܼܦܘܼܬܹܗ: ܟܹܐܦܹ̈ܐ ܒܸܦܪܵܡܵܐ ܗَܘܵܐ. ܠܵܐ ܙܕܸܥܠܹܗ ܡ̣ܢ ܙܲܪܒܵܢܘܼܬܝܼ: ܘܠܵܐ ܚܙܹܐܠܹܗ ܚܵܬܸܪ ܕܡܝܘܼܩܪܘܼܬܝܼ. ܟܠܹܗ ܐܝܼܩܵܪܲܢ ܚܫܝܼܒ̣ܠܹܗ: ܐܲܝܟܼ ܙܸܒܠܵܐ ܪܘܼܦܝܵܐ ܠܐܲܪܥܵܐ. ܠܕܵܘܸܠܬܲܢ ܙܹܐ ܡܘܼܣܠܹܗ ܠܹܗ: ܘܥܲܠ ܣܲܝܦܲܢ ܪܵܒܵܐ ܡܘܼܒܨܸܪܹܗ܀ ܝܵܐ ܪܲܒ ܡܘܼܕܝَ ܒܹܝܬ ܥܲܝܢܹ̈ܐ ܕܒܸܪܸܢܓ̰: ܬܘܼܪܸܨܠܹܗ ܐܸܠܹܗ ܘܐَܬܹܐܠܹܗ ܠܐܲܬܪܲܢ. ܘܒܗܸܟ̃ ܡܸܢܕܝܼ ܠܹܐ ܗَܘܵܐ ܪܵܙܝܼ ܕܕܵܒܸܩ ܗَܘܵܐ ܚܵܬܸܪ ܕܡܲܠܟܘܼܬܲܢ. ܗܲܡܙܲܡܬܘܼܗܝ ܗܘܹܐܠܵܗ̇ ܐܲܝܟܼ ܢܵܘܪܵܐ: ܕܒܝܼܘܼܗ̇ ܚܸܙܝܲܝܗ‌ܝ ܠܲܢ ܠܲܟ̈ـܲܢ. ܘܒܝܼܘܼܗ̇ ܚܙܹܐܠܲܢ ܠܐܲܠܵܗܵܐ ܕܒܹܐܟ̣ܵܠܵܐ ܗَܘܵܐ: ܓܸܙܡܹ̈ܐ ܥܲܠ ܣܵܢ̈ܝܵܬܲܢ܀ ܒܝܼܘܼܗ‌ܝ ܚܸܙܝܵܐ ܠܲܢ ܟܹܐܢܘܼܬܵܐ: ܕܟܪܝܼܒܬܵ‌ܐ ܗَܘܵܐ ܥܲܠ ܓܢܵܗ̈ܵܬܲܢ. ܒܝܼܘܼܗܝ ܚܸܙܝܵܐ ܠܲܢ ܡܕܝܼܢَܬܲܢ: ܕܩܛܸܥܬܵ‌ܐ ܕܕܝܼܘܵܢܘܿܗ̇ ܡܛܝܼܬܵ‌ܐ ܝَܠܵܗ̇. ܒܝܼܘܼܗ‌ܝ ܚܙܹܐܠܲܢ ܠܟܵܪܘܿܙܘܼܬܹܗ: ܕܡ̣ܢ ܦܘܼܡܵܐ ܟܹܐܢܵܐ ܦܠܝܼܛܠܵܗ̇. ܠܹܐ ܗَܘܵܐ ܕܐܘܼܡܵܢܘܼܬܵܐ: ܝܲܢ ܬܵܪܲܨܬܵܐ ܕܦܲܢܕܹ̈ܐ܀ ܐܸܢ ܗܵܘܝܼ ܗَܘܵܐ ܫܲܝܢܵܐ ܡܘܼܟܪܸܙܲܢ: ܐܝܼܬ ܗَܘܵܐ ܠܸܚܫܵܒ̣ܵܐ ܕܐܘܼܡܵܢܵܐ ܝَܠܹܗ: ܚܲܒܪܵܐ ܛܵܒ̣ܵܐ ܕܡܘܼܟܪܸܙܠܹܗ: ܩܵܐ ܕܗܵܩܵܐ ܨܦܵܝܼ ܫܵܩܸܠ ܗَܘܵܐ. ܣܵܒܵܒ ܗ̇ܘ ܕܡܲܚܸܒ ܝܘܼܬܪܵܢܵܐ: ܐܵܦ ܓܸܠܝܵܢܘܼܗ‌ܝ ܫܵܦܝܼܪܵܐ ܝَܠܹܗ. ܣܵܒܵܒ ܩܵܨܘܿܡܵܐ ܕܝܑܼܠܹܗ ܒܵܠܘܿܥܵܢܵܐ: ܐܵܦ ܩܵܘܠܘܼ̈ܗܝ ܡܥܲܠܕܝܼܵـܢܹ̈ܐ ܝَܢܵܐ܀ ܟܲܠܕܵܝܵܐ[3] ܡܣܵܒܵܒ ܕܟܦܸܢܹܗ: ܒܹܝܬ ܝܲܠܕܵܐ ܛܵܒ̣ܵܐ ܟܹܐ ܩܵܪܹܐ. ܩܵܐ ܕܙܵܘܕܵܐ ܫܵܩܸܠ ܡ̣ܢ ܣܲܟܼܠܵܐ: ܐܸܩܒܲܠ ܘܕܵܘܸܠܬܵܐ ܟܹܐ ܩܵܪܹܐ ܠܹܗ. ܠܹܐ ܗَܘܵܐ ܕܝܵܗَܒܸܠ ܟܹܐ ܚܵܦܸܛ: ܘܐܵܦ ܠܵܐ ܕܝܵܗَܒܸܠ ܟܹܐ ܒܲܥܝܹܐ. ܠܫܲܒܼܪܵܐ ܒܕܵܘܸܠܬܵ‌ܐ ܟܹܐ ܣܵܠܸܒ ܠܹܗ: ܘܐܵܦ ܗ݁ܘ ܕܐܝܼܬܠܹܗ ܟܹܐ ܫܵܩܸܠܹܗ܀ ܐܵܣܝܵܐ ܕܟܠܹܗ ܫܲܪܝܼܪܵܐ ܝَܠܹܗ: ܫܪܵܪܵܐ ܟܹܐ ܬܵܢܹܐ ܩܵܐ ܡܸܪ̈ܥܝܹܐ. ܦܪܲܡܬܵ‌ܐ ܟܹܐ ܥܵܒܸܪ ܘܬܵܢܹܐܠܹܗ: ܒܓܵܘ ܒܲܝܬܹܗ ܕܗ̇ܘ ܡܲܪܥܵܢܵܐ. ܟܘܵܝܹ̈ܐ ܕܢܘܼܪܵܐ ܡܲܪܝܼܪܹ̈ܐ: ܓܵܘ ܡܵܢܙܝܼܠܹܗ ܟܹܐ ܐܵܡܸܪܹܗ. ܠܹܐ ܙܲܕܥܹܐ ܡ̣ܢ ܕܗ݁ܘ ܙܲܒܘܼܢ: ܕܥܩܲܪܬܵܐ ܕܟܹܐܟܹ̈ܐ ܬܵܢܝܼܠܹܗ܀ ܠܹܐ ܙܲܕܥܹܐ ܐܵܦ ܡ̣ܢ ܡܲܠܟܵܐ: ܕܐܲܢܹܐ ܒܡܲܪܥܘܼܗܝ ܬܵܢܝܼܠܹܗ. ܠܹܐ ܙܲܕܥܹܐ ܡ̣ܢ ܒܲܪ ܡܲܠܟܵܐ: ܕܕܲܪܡܵܢܵܐ ܚܲܝܠܵܢܵܐ ܡܲܫܬܝܼܠܹܗ. ܠܹܐ ܙܲܕܥܹܐ ܡ̣ܢ ܪܲܒ ܚܲܝܠܵܐ: ܕܐܵܣܸܪܹܗ ܘܐܵܦ ܦܵܪܸܡܠܹܗ. ܠܹܐ ܫܲܥܝܸܫ ܡ̣ܢ ܓܲܢَܒܵܪܵܐ: ܕܚܲܝܠܹܗ ܡܲܫܦܸܠܹܗ ܒܟܘܵܝܵܬܹ̈ܐ ܀ ܡܵܢܝܼ ܝَܠܹܗ ܕܩܵܪܹܐ ܠܹܗ ܕܲܓܵܠܵܐ: ܠܸܢܒ̣ܝܼܵܐ ܕܡܘܼܟܪܸܙܠܹܗ ܟܲܪܒܵܐ. ܣܵܒܵܒ ܐܸܢ ܕܲܓܵܠܵܐ ܗَܘܵܐ: ܐܵܦ ܗ݁ܘ ܩܵܠܹܗ ܫܲܓܼܫܵܢܵܐ ܝَܠܹܗ. ܘܐܸܢ ܩܵܠܹܗ ܙܲܪܒܵܢܵܐ ܝَܠܹܗ: ܐܵܦ ܪܸܥܝܵܢܘܼܗܝ ܫܲܪܝܼܪܵܐ ܝَܠܹܗ. ܟܲܕ ܐܵܣܝܵܐ ܗܸܟ̃ ܠܹܐ ܙܲܕܥܹܐ: ܐܸܠܵܐ ܕܒܼܝܼܩܵܐ ܒܗܵܩܵܐ ܙܲܒܛ ܝܑܼܠܹܗ܀ ܐܵܗܵܐ ܢܒܼܝܼܵܐ ܥܸܒ̣ܪܵܝܵܐ: ܕܲܪܓܼܘܗܝ ܒܘܼܫ ܓܘܼܪܵܐ ܝَܠܹܗ ܡ̣ܢ ܟܠ. ܐܲܝܟܼ ܕܐܵܦ ܩܵܠܘܼܗܝ ܚܲܝܠܵܢܵܐ ܝَܠܹܗ: ܒܘܼܫ ܡ̣ܢ ܕܲܪܓܼܵܐ ܕܐܵܣܵܘܵܬܹ̈ܐ. ܒܗ݁‌ܝ ܐܵܦ ܠܵܐ ܠܲܚܡܵܐ ܫܚܝܼܡܵܐ: ܠܹܐ ܒܲܥܝܹܐ ܕܐܵܟܸܠ ܡ̣ܢ ܐܲܬܪܲܢ. ܡ̣ܢ ܝܵܘܡܵܐ ܕܐَܬܹܐܠܹܗ ܠܟܸܣܠܲܢ: ܒܨܵܘܡܵܐ ܝَܠܹܗ ܘܒܚܲܫܵܐ ܓܘܼܪܵܐ. ܡܵܢܝܼ ܡܘܼܠܝܸܨܠܹܗ ܐܸܠܹܐ ܕܠܵܐ ܦܵܝܕܵܐ: ܕܟܲܪܒܵܐ ܩܸܫܝܵܐ ܡܲܟܪܸܙܠܲܢ. ܕܵܐܟ̣ܝܼ ܠܹܐ ܗَܘܵܐ ܒܸܙܕܲܥܝܵܐ: ܕܓܵܘ ܐܵܗܵܐ ܐܲܬܪܲܢ ܡܲܟܪܸܙܠܲܢ܀ ܫܡܸܥܝܹܐ ܝَܘܲܚ ܒܘܼܬ ܥܸܒ̣ܪ̈ܵܝܹܐ: ܒܘܼܬ ܡܘܼܫܹܐ ܘܒܘܼܬ ܐܹܠܝܼܵܐ. ܕܨܝܼܡܠܗَܘܿܢ ܡ̣ܢ ܠܲܚܡܵܐ ܒܝܵܘܡܵܢܹ̈ܐ: ܐܲܪܒܥܝܼ ܐܲܪܒܥܝܼ ܒܡܸܢܝܵܢܵܐ. ܡܘܼܡܟܸܢ ܗܵܕܟ̣ܵܐ ܒܸܨܝܵܡܵܐ ܝَܠܹܗ: ܐܵܗܵܐ ܢܒ̣ܝܼܵܐ ܥܸܒ̣ܪܵܝܵܐ. ܘܐܸܢ ܒܸܨܝܵܡܵܐ ܝَܠܹܗ ܟܲܕ ܙܲܕܝܼܩܵܐ: ܒܲܣ ܬܵܝܡܘܼܢ ܕܨܵܝܡܲܚ ܒܗ݁‌ܝ ܕܚܛܹܝܠܲܢ. ܐܸܢ ܟܲܕ ܟܹܐܢܵܐ ܝَܠܹܗ ܘܦܲܪܦܘܼܠܹܐ ܝَܠܹܗ: ܐܲܚܢܲܢ ܚܘܼܫ ܣܲܩܹ̈ܐ ܘܩܸܛܡܵܐ ܡܲܡܟܸܚܠܲܢ. ܕܩܵܘܡܵܐ ܨܵܘܡܹܗ ܐܵܦ ܨܠܘܿܬܹܗ: ܕܠܵܐ ܦܵܐܸܫ ܡܕܘܼܓܠܹܐ ܒܲܝܢܵܬܲܢ. ܩܵܐ ܕܚܲܪܩܵܐ ܡܕܝܼܢَܬܲܢ ܦܲܪܦܘܼܠܹܐ ܝَܠܹܗ: ܩܵܐ ܕܟܵܪܘܿܙܘܼܬܹܗ ܦܵܝܫܵܐ ܡܗܘܼܝܡܸܢܬܵ‌ܐ. ܒܝܲܕ ܨܵܘܡܵܐ ܦܠܵܫܵܐ ܝَܠܹܗ ܥܲܡܲܢ: ܒܲܣ ܚܘܼܫ ܒܨܵܘܡܵܐ ܦܵܠܫܲܚ ܥܲܡܘܼܗ‌ܝ. ܐܝܼܢܵܐ ܠܵܐ ܥܲܡ ܢܒ̣ܝܼܵܐ ܦܵܠܫܲܚ: ܐܸܠܵܐ ܦܵܠܫܲܚ ܒܸܬܝܵܒ̣ܘܼܬܵܐ. ܒܗ݁‌ܝ ܕܠܹܐ ܝَܠܹܗ ܗ݁ܘ ܥܒܼܝܕܵܐ ܓܢܵܗܵܐ ܒܝܼܲܢ: ܚܛܝܼ̈ܵܬܲܢ ܥܒ̣ܝܼܕܠܗَܘܿܢ ܓܢܵܗܵܐ ܒܝܼܲܢ. ܠܹܐ ܝَܠܹܗ ܥܸܒܼܪܵܝܵܐ ܒܸܬܠܵܚܹܗ: ܠܐܲܬܪܵܐ ܕܥܵܘܠܹܗ ܒܸܬܠܵܚܘܼܗܝ ܠܹܗ. ܚܲܕَ ܕܸܫ̰ܡܸܢ ܐَܚܹܪَܢܵܐ ܛܸܫܝܵܐ: ܐܝܼܬܠܵܘܟ̣ܘܿܢ ܝܵܐ ܡܘܼܚܸܒ̈ܝܼ. ܕܲܪܩܘܼܒ̣ܠܘܼܗܝ ܘܵܓ̰ܸܒ ܝَܠܵܗ̇ ܐܸܠܲܢ: ܕܦܵܠܫܲܚ ܓܲܢَܒܵܪܵܐܝܼܬ. ܒܲܢܵܬܲܢ ܝܑܼܠܵܗ̇ ܬܲܫܥܝܼܬܹܗ: ܕܐܝܼܘܿܒ̣ ܟܹܐܢܵܐ ܩܵܕَܡܵܝܵܐ. ܒܗ݁‌ܝ ܕܐܵܦ ܚܲܝܘܵܬܹ̈ܐ ܠܲܥ̈ܠܹܐ: ܩܵܘܡܵܐ ܫܡܸܥܠܗَܘܿܢ ܒܘܼܬ ܢܸܨܚܵܢܘܼ̈ܗ‌ܝ. ܓ̰ܘܼܪܵܒܘܼܗܝ ܐܲܝܟܼ ܫܝܼܦܘܿܪܵܐ: ܡܘܼܟܪܸܙܠܹܗ ܒܐܲܪܥܵܐ ܓ̣ܵܠܝܼܒܘܼܬܹܗ. ܣܵܛܵܢܵܐ ܗَܘܵܐ ܕܡܚܹܐܠܹܗ ܕܲܪܗܲܩܘܼܗܝ: ܐܲܝܟܼ ܬܲܫܥܝܼܬܵ‌ܐ ܕܐܲܒ̣ܵܗ̈ܵܬܲܢ. ܣܵܒܵܒ ܕܐܸܢ ܒܝܼܫܵܐ ܡܚܹܐ ܗَܘܵܐ ܠܹܗ: ܕܲܪܗܲܩ ܕܟܹܐܢܹ̈ܐ ܩܵܕَܡܵܝܹ̈ܐ. ܒܲܣ ܟܡܵܐ ܦܬܝܼܚܵܐ ܝَܠܹܗ ܦܘܼܡܹܗ: ܕܡܵܚܹܐ ܕܲܪܗܲܩ ܕܚܲܛܵܝܹ̈ܐ. ܦܪܝܼܫܬܵ‌ܐ ܝَܠܵܗ̇ ܘܒܵܪܵܒܲܪ ܒܝܼܫܘܼܬܹܗ: ܠܟܸܣ ܙܲܕܝܼܩܹ̈ܐ ܘܚܲܛܵܝܹ̈ܐ. ܣܵܒܵܒ ܠܙܲܕܝܼܩܵܐ ܟܹܐ ܪܵܕܸܦܠܹܗ: ܕܩܵܘܡܵܐ ܗܵܘܹܐ ܚܲܛܵܝܵܐ. ܘܠܚܲܛܵܝܵܐ ܟܹܐ ܩܵܛܸܠܹܗ: ܕܠܵܐ ܕܵܥܸܪ ܘܗܵܘܹܐ ܬܲܝܵܒ̣ܵܐ. ܘܗ̇ܘ ܝܑܼܗَܘܵܐ ܕܦܠܝܼܛܠܹܗ ܘܡܘܼܬܠܸܚܠܹܗ: ܠܗ̇ܘ ܒܲܝܬܵܐ ܕܒܢܘܿܢܹ̈ܐ ܕܐܝܼܘܿܒܼ. ܚܒܸܛܠܹܗ ܕܸܡܲܝܗ‌ܝ ܥܲܡ ܚܲܡܪ̈ܵܢܹܐ: ܘܟܵܣܲܝ̈ܗ‌ܝ ܥܲܡ ܓܲܪ̈ܡܲܝܗ‌ܝ. ܗܲܪ ܗ̇ܘ ܡܘܼܚܪܸܒ̣ܠܹܗ ܠܡܸܫܬܘܼܬܵܝܗ‌ܝ: ܘܠܒܲܝܬܵ‌ܐ ܥܲܠ ܥܲܡܪ̈ܵܢܘܼܗ‌ܝ. ܘܩܵܘܡܵܐ ܗܲܪ ܗ݁ܘ ܦܝܵܫܵܐ ܝَܠܹܗ ܡܫܘܼܕܪܵܐ: ܕܡܲܬܠܸܚܠܹܗ ܠܐܲܬܪܲܢ ܘܡܕܝܼܢَܬܲܢ. ܓܵܘ ܦܠܵܫܹ̈ܐ ܠܡܲܠܟܹ̈ܐ ܓ̣ܠܝܼܒܠܵܘܟ̣ܘܿܢ: ܠܣܵܛܵܢܵܐ ܓܼܠܘܿܒܘܼܢ ܒܸܨܠܘܿܬܵܐ. ܒܲܣ ܚܘܼܫ ܦܵܠܛܝܼ ܚܲܝܠܵܘ̈ܵܬܵܘܟ̣ܘܿܢ: ܠܸܥܒ̣ܵܕܵܐ ܦܠܵܫܵܐ ܕܲܪܩܘܼܒ̣ܠܘܼܗܝ. ܫܠܘܼܚܘܼܢ ܘܪܲܦܵܘ ܠܒ̣ܝܼܫܬܵܘܟ̣ܘܿܢ ܕܦܲܪܙܠܵܐ: ܒܣܲܩܹ̈ܐ ܒܲܪܩܘܼܒ̣ܠܘܼܗܝ ܡܟ̰ܲܟܒܸܢܘܿܢ. ܘܬܒ̣ܘܿܪܘܿܢ ܘܪܲܦܵܘ ܩܸܫܬܵܬܹ̈ܐ: ܘܡܚܹܝܡܘܿܢ ܚܲܨܵܐ ܒܨܠܵܘܵܬܹ̈ܐ. ܡܲܣܠܹܝܡܘܿܢ ܣܲܝܦܹ̈ܐ ܙܲܒܘܼܢܹ̈ܐ: ܘܓܵܒܹܝܡܘܿܢ ܨܵܘܡܵܐ ܢܲܨܝܼܚܵܐ. ܕܚܸܪܦܵܐ ܕܨܵܘܡܵܐ ܒܸܬ ܦܲܪܸܡ ܠܹܗ: ܠܥܵܘܠܵܐ ܛܸܫܝܵܐ ܕܓܵܘ ܐܲܬܪܲܢ. ܠܹܐ ܗَܘܵܐ ܡܸܢܕܝܼ ܗ̇‌ܝ ܓ̣ܵܠܝܼܒܘܼܬܵܐ: ܕܫܩܝܼܠܵܗ݁ ܠܵܘܟ̣ܘܿܢ ܓܵܘ ܦܠܵܫܹ̈ܐ. ܣܵܒܵܒ ܠܲܐܟ̣ܵܐ ܝܼܠܵܗ̇ ܐܸܢ ܓ̣ܲܠܒܲܚ: ܒܘܼܫ ܓܘܼܪܬܵܐ ܝَܠܗ݁ ܡ̣ܢ ܟܠ ܓ̣ܵܠܝܼܒܘܼܬܲܢ. ܘܟܲܕ ܐܵܢܵܐ ܩܵܕَܡܵܝܵܐ ܥܒܸܪ ܗَܘܵܐ ܠܝܼ: ܓܵܘ ܦܠܵܫܵܐ ܘܓܵܘ ܨܲܝܕܹ̈ܐ. ܘܐܵܢܵܐ ܡܸܢَܕܪܹܫَ ܒܗܵܘܸܢ ܩܵܕَܡܵܝܵܐ: ܒܐܵܗܵܐ ܦܠܵܫܵܐ ܙܲܪܒܵܢܵܐ. ܒܲܣ ܐܲܟ̣ܘܵܬܝܼ ܡܟ̰ܲܟܒܸܢܘܿܢ: ܝܵܐ ܚܲܝܠܵܘܵܬ̈ܝܼ ܚܲܒܝܼܒ̣̈ـܹܐ. ܩܝܼܡܠܹܗ ܡܲܠܟܵܐ ܫܘܼܠܚܝܼܠܹܗ ܓ̰ܘܼܠܘܼ̈ܗ‌ܝ: ܫܠܸܚܠܗَܘܿܢ ܟܠܲܝܗ‌ܝ ܐܲܝܟܼ ܐܲܟܼܘܵܬܹܗ. ܪܚܸܛܠܹܗ ܡܲܠܟܵܐ ܘܠܒ̣ܝܼܫܠܹܗ ܣܲܩܵܐ: ܘܡܘܼܟܸܡܠܗَܘܿܢ ܣܸܕܪ̈ܲܝܗ‌ܝ ܐܲܟܼܘܵܬܹܗ. ܐܵܬܘܿܪ̈ܵܝܹܐ ܝܑܼܗَܘܵܘ ܫܲܦܝܼܪܹ̈ܐ: ܗܸܢܕܘܵܝܹ̈ܐ ܗَܘܵܘ ܠܗَܘܿܢ ܡܸܢܫܸܠܬܵܢܹܐ. ܒܗ̇‌ܝ ܡܲܣܠܵܝܬܵܐ ܕܒܝܲܕ ܣܲܩܲܝ̈ܗ‌ܝ: ܐَܪܵܙܹܗ ܕܝܲܥܩܘܿܒ̣ ܦܝܼܫܠܗܘܿܢ ܩܛܝܼܘܹ̈ܐ. ܕܠܝܵܘܢܵܢ ܥܘܼܠܕܝܼܠܗܘܿܢ ܘܓܢܝܼܒ̣ܠܗَܘܿܢ: ܓ̣ܵܠܝܼܒܘܼܬܵܐ ܒܸܬܝܵܒ̣ܘܼܬܵܐ. ܦܝܼܫܠܹܗ ܚܲܝܵܒ̣ܵܐ ܣܵܛܵܢܵܐ ܐܲܝܟܼ ܥܹܣܘܿ: ܗ̇ܘ ܓܘܼܪܵܐ ܐܲܝܟܼ ܬܲܠܡܝܼܕ̈ܘܼܗ‌ܝ. ܘܐܲܢܹ̈ܐ ܓ̣ܠܝܼܒܠܗَܘܿܢ ܐܲܝܟܼ ܝܲܥܩܘܿܒ̣: ܐܲܝܟܼ ܪܵܒܝܼ ܐܵܦ ܬܲܠܡܝܼܕ̈ܘܼܗܝ. ܩܪܹܐܠܹܗ ܡܲܠܟܵܐ ܠܪ̈ܲܒܲܝ ܚܲܝܠܵܘܵܬ̈ܘܼܗ‌ܝ: ܘܦܠܸܛܠܗܘܿܢ ܘܣܘܼܚܒܸܪܘܿܢ ܠܡܲܫܪܝܼܬܘܼܗ‌ܝ. ܟܵܪ̈ܘܿܙܹܐ ܒܚܲܝܠܵܐ ܚܕܝܼܪܘܿܢ: ܕܟܠ ܚܲܕَ ܗܵܘܹܐ ܬܲܝܵܒ̣ܵܐ. ܛܲܡܐܵܐ ܫܵܠܸܚ ܛܲܡܐܘܼܬܹܗ: ܕܠܵܐ ܓ̣ܲܠܒܵܐ ܠܹܗ ܓܵܘ ܦܠܵܫܵܐ. ܛܲܡܲܥܟܲܪ ܪܲܦܹܐ ܛܲܡܲܥܟܵܪܘܼܬܹܗ: ܕܠܵܐ ܫܵܓܼܸܫ ܓܵܘ ܦܠܵܫܵܐ. ܟܪܝܼܒܵܐ ܡܣܲܙܓܸܪ ܥܲܡ ܚܲܒ̣ܪܹܗ: ܕܣܲܙܓܸܪ ܟܹܐܢܵܐ ܕܟܪܝܼܒܵܐ ܝَܠܹܗ. ܟܝܼܢ ܓܵܘ ܠܸܒܵܐ ܠܵܐ ܗܵܘܹܐ: ܕܠܵܐ ܡܥܲܪܩܸܠܹܗ ܦܘܼܪܩܵܢܵܐ. ܠܵܐ ܠܵܝܸܛ ܦܘܼܡܵܐ ܘܨܲܥܘܸܪ: ܕܐܲܬܪܵܐ ܒܪ̈ܲܚܡܹܐ ܦܵܐܸܫ ܒܘܼܪܟ̣ܵܐ܀ ܗܸܟ̰ ܚܲܕَ ܠܵܐ ܡܲܠܝܸܨ ܘܠܵܐ ܙܵܠܸܡ: ܐܵܦ ܠܵܐ ܝܵܡܹܐ ܘܡܕܵܓܸܠ. ܕܠܵܐ ܒܟܹܐܢܘܼܬܵܐ ܦܵܝܫܵܐ ܫܘܼܪܸܪܬܵܐ: ܕܝܼܘܵܢ ܕܝܑܼܠܵܗ݁ ܩܛܝܼܥܬܵܐ ܥܲܠܲܢ. ܫܵܪܲܚ ܩܸܛܪܹ̈ܐ ܕܓܵܘ ܠܸܒܲܢ: ܕܠܵܐ ܦܵܝܫܵܐ ܡܥܘܼܪܩܸܠܬܵ‌ܐ ܒܵܥܘܼܬܲܢ. ܐَܢܵܫܵܐ ܠܵܐ ܬܲܥܠܸܡ ܣܲܟܼܠܘܼܬܼܵܐ: ܩܵܐ ܕܙܵܝܸܕ ܒܐܲܬܪܲܢ ܫܘܼܒ̣ܩܵܢܵܐ.

ܡܕܪܫܐ.

     ܥܘܼܢܵܝܵܐ. ܩܲܒܸܿܠ ܛܵܒ̣ܵܐ ܒܵܥܘܼܬܲܢ: ܘܲܒܼܪܹܗ ܕܛܵܒ̣ܵܐ ܬܲܟ̣ܫܲܦ̮ܬܲܢ. ܒܚܲܫܵܐ ܘܕܸܡܥܹ̈ܐ ܡܦܝܼܣܝܼܢܲܢ: ܠܵܐ ܬܲܗܡܸܐ ܚܝܵܪܵܟܼ ܡܸܢܲܢ.

     ܒܵܬܹ̈‌ܐ. ܫܡܲܥ ܡܵܪܝ ܒܵܥܘܼܬ̣ ܣܵܓ̣ܘܿܕܲܝ̈ܟ: ܛܵܒ̣ܵܐ ܕܠܵܐ ܟܵܠܹܐ ܪ̈ܲܚܡܵܘܗ‌ܝ. ܘܩܲܒܸܿܠ ܦܹܐܪܹ̈ܐ ܕܣܸܦ̈ܘܵܬܲܢ: ܕܲܡܩܲܪܒ̣ܝܼܢܲܢ ܠܡܵܪܘܼܬ̣ܵܟܼ. ܘܫܲܕܲܪ ܠܲܢ ܡ̣ܢ ܒܹܝܬܼ ܓܲܙܵܟܼ: ܚܢܵܢܵܐ ܘܪ̈ܲܚܡܹܐ ܘܦܘܼܪܩܵܢܵܐ. ܕܢܸܗܘܘܿܢ ܠܚܘܼܣܵܝ ܚܵܘ̈ܒܵܬܲܢ: ܕܠܵܐ ܢܸܬ̣ܩܲܛܪܲܓ̣ ܒܹܝܬܼ ܕܝܼܢܵܐ‌܀ ܠܘܵܬܼܵܟܼ ܓܵܥ̈ܝܵܢ ܢܲܦ̮ܫ̈ܵܬܲܢ: ܛܵܒ̣ܵܐ ܕܨܵܒܹ̇ܐ ܒܬܲܝܵܒܹ̈ܐ. ܦܬܲܚ ܠܲܢ ܡܵܪܝ ܬܲܪܥܵܐ ܕܪ̈ܲܚܡܲܝܟ: ܕܢܵܩܫܝܼܢܲܢ ܒܹܗ ܚܲܢܵܢܵܐ. ܪܲܚܸܡ ܡܵܪܝ ܘܲܪܕܝܼ ܘܲܩܢܝܼ: ܘܠܵܐ ܬܸܫܕܸܐ ܓܒܼܝܼܠܬܵܟܼ ܠܐܲܒ̣ܕܵܢ. ܕܐܲܢَܬܿܘܼ ܣܲܒܼܪܲܢ ܘܫܘܼܒܼܗܵܪܲܢ: ܠܵܐ ܬܲܗܡܸܐ ܡ̣ܢ ܬܲܟܼܫܲܦ̮ܬܲܢ‌܀ ܐܸܢ ܥܵܘ̣ܠܲܢ ܣܗܸܕܼ ܒܲܢ ܡܵܪܲܢ: ܚܘܼܣܥܠܲܝܢ ܡܸܛܠ ܨܲܠܡܵܟܼ. ܘܠܵܐ ܢܸܬ̣ܚܲܒܲܠ ܬܘܼܩܵܢܵܟܼ: ܡܸܛܠ ܪ̈ܲܚܡܲܝܟ ܣܲܓܿܝܼ̈ܐܹܐ. ܒܪܵܫܝܼܬܼ ܐܸܬܲܝܢ ܠܲܗܘܵܝܵܐ: ܒܪܸܡܙܵܟܼ ܛܵܒ̣ܵܐ ܘܒܲܣܝܼܡܵܐ. ܐܲܦܝܼܣ ܐܲܢَܬ̇ ܠܵܟܼ ܚܲܢܵܢܵܐ: ܕܲܚܢܲܢ ܠܵܐ ܓܲܠ̈ܝܵܢ ܐܲܦܲܝ̈ܢ‌܀

܀ܒܘܪ̈ܟܬ̣ܐ܀

     ܐܘܿ ܕܪ̈ܫܝܼܡܹܐ ܝَܢܵܐ: ܪܵܘܡܵܐ ܘܥܘܼܡܩܵܐ ܒܠܲܚܦܵܐ ܕܐܝܼܕܘܼܗ̈‌ܝ: ܒܥܲܝܢܵܐ ܛܵܒ̣ܬܵܐ: ܚܘܼܪ ܒܸܒܪܝܼܬܘܼܟܼ: ܘܪܲܚܸܡ ܥܲܠܘܿܗ݁܀

     ܡܲܒܘܼܥܵܐ ܕܚܲܝܹ̈ܐ: ܕܡܸܢܹܗ ܓ̰ܪܹܝܠܗَܘܿܢ ܚܲܝܹ̈ܐ ܠܐَܢܵܫܹ̈ܐ: ܒܝܼܘܼܟܼ ܘܒܪ̈ܲܚܡܘܼܟܼ: ܫܲܢܸܢ ܥܵܠܡܵܐ ܚܒ̣ܝܼܛܵܐ ܒܚܛܝܼܬܵܐ܀

     ܒܲܪܸܟܼ ܡܵܪܲܢ: ܢܛܘܿܪ ܝܵܐ ܡܵܪܲܢ ܘܗܲܝܸܪ ܡܵܪܲܢ: ܠܪܵܥܝܵܐ ܪܲܒܵܐ: ܦܵܛܲܪܝܵܪܟܝܼܣ ܡܕܲܒܪܵܢܵܐ ܕܥܲܡܲܢ܀

     ܗܵܘܝܵܐ ܨܠܘܿܬܹܗ: ܦܝܼܪܡܵܐ ܕܡܲܪܕܹܐ ܠܐܲܠܵܗܘܼܬܘܼܟܼ: ܘܡܲܕܥܸܪ ܐܸܠܹܗ: ܡܲܛܠܲܒ ܕܢܲܦ̮ܫܹܗ ܐܲܝܟܼ ܕܗ݁ܘ ܩܵܘܠܘܼܟܼ܀

     ܒܲܪܸܟܼ ܡܵܪܲܢ: ܠܟܠܝܼܠܵܐ ܕܫܹܢَܬܵܐ ܒܲܝܕ ܛܲܝܒܘܼܬܘܼܟܼ: ܘܡܲܠܟܹ̈ܐ ܕܐܲܪܥܵܐ: ܗܵܘܝܼ ܒܫܲܝܢܵܐ ܓܵܘ ܐܘܼܚܕܵܢܵܝܗ̈‌ܝ܀

     ܒܲܪܸܟܼ ܡܵܪܲܢ: ܠܐܵܗܵܐ ܥܘܼܡܪܵܐ ܒܟܠ ܒܘܼܪ̈ܟܵܬܹܐ: ܘܩܵܐ ܥܵܡܪ̈ܵܢܘܼܗ‌ܝ: ܢܛܘܿܪܠَܗܘܿܢ ܒܓܘܼܠܦܹ̈ܐ ܕܚܲܡܚܵܘܪܘܼܬܘܼܟܼ܀

     ܡܲܩܢܹܝܬ ܐܸܠܵܝܗ‌ܝ: ܒܡܵܐܠ ܕܥܵܠܡܵܐ ܙܲܒ̣ܢܵܢܵܝܵܐ: ܘܗܲܒَ̣ܠ ܒܐܝܼܕܵܬܵܝܗ̈‌ܝ: ܡܸܢܕܝܼ ܕܛܵܠܒܝܼ ܡ̣ܢ ܓܘܼܪܘܼܬܘܼܟܼ܀

     ܢܛܘܿܪܠَܗܘܿܢ ܡܵܪܲܢ: ܒܐܲܢܹܐ ܚܲܝܹ̈ܐ ܠܙܲܒ̣ܢܵܐ ܐَܪܝܼܟܼܵܐ: ܘܡܲܦܪܸܥ ܩܵܬܵܝܗ‌ܝ: ܡܵܐܠ ܘܡܸܢܕܝܼܵܢܹ̈ܐ ܐܵܦ ܕܵܘܸܠܬܵܐ܀

     ܒܲܪܸܟܼ ܡܵܪܲܢ: ܠܗ݁ܘ ܕܕܒ̣ܝܼܩܵܐ ܝَܠܹܗ ܪܹܫܵܢܘܼܬܵܐ: ܘܚܲܠܸܢ ܪܸ̈ܓܼܫܘܼܗܝ: ܕܩܵܐܸܡ ܒܪܹܫܲܢ ܒܕܵܐܸܡܘܼܬܵܐ܀

     ܒܲܪܸܟܼ ܡܵܪܲܢ: ܩܵܐ ܚܒ̣ܝܼܫܵܝܹ̈ܐ ܘܐܵܦ ܠܫܲܪ̈ܘܵܝܹܐ: ܘܗܲܒَ̣ܠܗَܘܿܢ ܗܵܩܵܐ: ܕܦܘܼܪܥܵܢ ܓ̰ܵܥܦܵܝܗܝ ܡܲܠܟܘܼܬ ܪܵܘܡܵܐ܀

     ܒܲܪܸܟܼ ܡܵܪܲܢ: ܠܟܵܗܢܹ̈ܐ ܟܠܵܝܗܝ ܘܠܸܡܫܲܡܫܵܢܹ̈ܐ: ܕܗܵܘܝܼ ܡܓܘܼܒܝܹ̈ܐ: ܩܵܕَܡ ܓܘܼܪܘܼܬܘܼܟܼ ܒܝܲܕ ܦܘܼܠܚܵܢܵܝܗ̈ܝ܀

     ܒܲܪܸܟܼ ܡܵܪܲܢ: ܠܣܵܒܹ̈ܐ ܕܥܬܸܩܠܗَܘܿܢ ܘܥܒܸܪܘܿܢ ܒܫܸܢܹ̈ܐ: ܣܢܘܿܕ ܣܲܝܒܘܼܬܵܝܗܝ ܘܐܵܦ ܡܲܚܕܝܼܠܗَܘܿܢ ܒܚܲܝܹ̈ܐ ܗܕܝܼܪܹ̈ܐ܀

     ܗܲܒَ̣ܠ ܩܵܐ ܥܠܲܝܡܹ̈ܐ: ܕܣܵܝܒ̣ܝܼ ܒܚܲܝܹ̈ܐ ܙܲܒ̣ܢܵܢܵܝܹ̈ܐ: ܘܩܵܐ ܝܵܠܕَܘܼܬܵܐ: ܕܝܵܪܸܟܼ ܙܲܒ̣ܢܵܐ ܕܫܸܢܹ̈ܐ ܕܚܲܝ̈ܘܿܗ݁܀

     ܦܩܘܿܕ ܠܥܲܝܘܵܬܹ̈ܐ: ܕܨܵܠܝܵܐ ܡܸܛܪܵܐ ܥܲܠ ܚܲܩ̈ܠܵܬܲܢ:ܘܥܲܠ ܒܵܘ̈ܵܬܲܢ ܐܵܦ ܐܲܪ̈ܥܵܬܲܢ ܛܠܘܿܠܵܐ ܕܪ̈ܲܚܡܘܼܟܼ܀

     ܒܲܪܸܟܼ ܡܵܪܲܢ: ܠܙܲܪ̈ܥܹܐ ܘܟܲܪ̈ܡܹܐ ܘܟܠܵܝܗܝ ܦܹܐܪܹ̈ܐ: ܘܡ̣ܢ ܛܵܒ̣ܵܬ̈ܘܼܟܼ: ܐܵܟ̣ܠܝܼ ܘܡܫܲܒܚܝܼ ܪܹ̈ܝܓܵܘܵܬܘܼܟܼ܀

     ܘܸܠܝܲܬܘܿܡܹ̈ܐ: ܒܲܪܸܟܼ ܘܡܬܲܪܣܝܼ ܘܠܐܲܪ̈ܡܸܠܝܵܬܹܐ: ܕܝܑܼܘܸܬ ܒܵܒܵܐ ܩܵܐ ܝܲܬܘܿܡܹ̈ܐ ܘܡܬܲܪܣܝܼܵܢܵܐ܀

     ܗܲܒَ̣ܠܲܢ ܡܵܪܲܢ: ܒܪ̈ܲܚܡܹܐ ܕܠܟܸܣܠܲܢ ܩܲܡ ܫܵܕܪܝܼܠܘܼܟܼ: ܕܗܸܟ̰ ܠܵܐ ܪܲܚܩܲܚ: ܡ̣ܢ ܒܘܼܣܵܡܵܐ ܕܒܹܝܬ ܡܲܠܟܘܼܬܘܼܟܼ܀

     ܗܲܒَ̣ܠܲܢ ܡܵܪܲܢ: ܕܡ̣ܢ ܝܲܡܝܼܢܘܼܟܼ ܙܵܡܪܲܚ ܫܘܼܒ̣ܚܵܐ: ܒܲܝܢܵܬ ܟܹܐܢܹ̈ܐ: ܐܵܢܝَ ܕܡܘܼܚܸܒܠܗَܘܿܢ ܠܫܸܡܘܼܟܼ ܓܘܼܪܵܐ܀

      ܒܗ݁ܘ ܥܸܕܵܢܵܐ: ܕܩܵܪܝܵܐ ܩܵܪَܢܵܐ ܒܝܘܿܡ ܢܘܼܚܵܡܵܐ: ܚܵܙܲܚ ܐܸܠܘܼܟܼ ܒܗ݁‌ܝ ܡܲܠܟܘܼܬܵܐ ܡܠܝܼܬܵܐ ܛܘܼܒܹ̈ܐ܀

     ܪ̈ܲܚܡܘܼܟܼ ܗܵܘܝܼ: ܣܢܹܐܓܼܪܹ̈ܐ ܡܓܹܢَܒܲܢ ܒܗ݁ܘ ܥܸܕܵܢܵܐ: ܘܠܵܐ ܛܵܪܛܝܼ ܠܲܢ ܓܢ̈ܵܗܲܢ ܡܸܢܘܼܟܼ ܪܵܚܸܡ ܐَܢܵܫܵܐ܀

     ܒܝܵܘܡܵܐ ܕܐَܬܹܝܬܘܼܟܼ: ܕܒܡܲܒܝܸܢ ܠܵܘܓ̰ܵܐ ܕܐܲܠܵܗܘܼܬܘܼܟܼ: ܥܲܡ ܩܲܕܝܼܫ̈ܘܼܟܼ: ܚܵܫܚܲܚ ܕܥܵܒ̣ܪܲܚ ܠܓܢܘܿܢܵܐ ܕܢܘܼܗܪܵܐ܀

     ܙܲܒܘܿܢ ܕܩܪܹܐ ܠܹܗ: ܐܲܢܹܐ ܡܹܐܡܪܹ̈ܐ ܚܘܼܒܵܢܵܐܝܼܬ: ܪܲܚܸܡ ܥܲܠܘܼܗ‌ܝ: ܘܦܵܐܸܫ ܚܠܝܼܨܵܐ ܡ̣ܢ ܟܹܐܢܘܼܬܘܼܟܼ܀

     ܚܵܙܲܚ ܦܲܐܬܵܐ: ܕܡܵܪܵܐ ܕܙܩܸܦܠܗَܘܿܢ ܒܘܼܬ ܚܵܬܸܪܲܢ: ܘܠܵܐ ܫܵܕܪܝܼܠܲܢ ܠܚܸܫܟܵܐ ܕܠܒܲܕܲܪ ܥܲܡ ܟܵܦܘܿܪܹ̈ܐ܀

      ܘܫܘܼܒ̣ܚܵܐ ܡܲܣܩܲܚ: ܠܗ݁ܘ ܕܟܹܐ ܡܵܪܸܡ ܠܪܹ̈ܝܓܵܘܵܬܘܗ‌ܝ: ܘܥܲܠܲܢ ܪ̈ܲܚܡܘܼܗ‌ܝ: ܠܥܵܠܲܡ ܥܵܠܡܝܼܢ ܐܵܡܹܝܢ ܘܐܵܡܹܝܢ܀

ܟܪܘܙܘܬ̣ܐ.

ܢܩܘܼܡ ܫܲܦܝܼܪ ܟܠܲܢ ܒܚܲܫܵܐ ܘܒܲܚܦܝܼܛܘܼܬܼܵܐ ܛܵܠܒܲܚ ܘܐܵܡܪܲܚ  ܡܵܪܲܢ ܪܲܚܸܡ ܥܲܠܲܢ. ܘܓ̰ܲܘܸܒܝܼ: ܡܵܪܲܢ ܪܲܚܸܡ ܥܲܠܲܢ‌܀ ܐܝܼܬܝܵܐ ܡܬܘܿܡܵܝܵܐ. ܗܵܘ ܕܒܪܸܡܙܹܗ ܗܘܵܘ ܠܗَܘܿܢ ܒܸܪ̈ܝܵܬܹ‌ܐ. ܐܵܢܝܼ ܕܦܝܵܫܵܐ ܝَܢܵܐ ܚܸܙܝܹ̈ܐ ܘܐܵܢܝܼ ܕܠܹܐ ܝَܢܵܐ ܦܝܵܫܵܐ ܚܸܙܝܹ̈ܐ. ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܐܲܠܵܗܲܢ ܡܵܪܵܐ ܕܟܠ ܗ݁ܘ ܕܡܸܠܝܹܐ ܝَܢܵܐ ܡܸܢܹܗ ܫܡܲܝܵܐ ܘܐܲܪܥܵܐ. ܘܕܒ̣ܝܼܩܵܐ ܝَܠܹܗ ܘܬܲܓܒܘܼܪܹܐ ܝَܠܹܗ ܠܟܠܵܝܗ‌ܝ ܥܒܼܝܼܕܹ̈ܐ‌܀ ܡܪܲܚܡܵܢܵܐ ܘܪܲܦܪܸܦܵܢܵܐ ܐܵܟ̣ܠܵܢܵܐ ܕܚܲܡ ܕܓܸܢܣܲܢ ܘܡܚܲܕܸܬܵܢܵܐ ܕܓܒ̣ܝܼܠܬܲܢ ܘܬܲܓܒܸܪܵܢܵܐ ܕܟܠܵܝܗ‌ܝ ܛܵܒ̣̈ܵܬܲܢ‌܀ ܗ݁ܘ ܕܩܵܡ ܬܵܪܸܨܠܲܢ ܡ̣ܢ ܫܘܼܪܵܝܵܐ ܒܛܲܝܒܘܼܬܹܗ. ܘܩܵܡ ܦܲܪܸܩܠܲܢ ܒܐَܚܵܪܵܝܬܵܐ ܒܲܡܫܝܼܚܹܗ‌܀ ܗ݁ܘ ܕܚܘܼܕܸܬܠܹܗ ܠܟܠ ܕܦܝܵܫܵܐ ܝَܠܹܗ ܚܸܙܝܵܐ ܘܠܟܠ ܕܠܹܐ ܝَܠܹܗ ܦܝܵܫܵܐ ܚܸܙܝܵܐ‌܀ ܗ݁ܘ ܕܝܵܪܸܟ̣ܬܵ‌ܐ ܝَܠܵܗ̇ ܒܹܐܢܹܗ ܘܪܵܒܵܐ ܝَܠܹܗ ܚܲܝܠܹܗ. ܘܬܪܝܼܨܵܐ ܝَܠܹܗ ܕܝܼܘܵܢܹܗ ܘܓܘܼܪܬܵܐ ܝَܠܵܗ̇ ܥܵܩܸܠܕܵܪܘܼܬܹܗ‌܀ ܗ݁ܘ  ܕܐܵܗܵܐ ܠܥܵܠܡܵܐ ܝܘܼܗَܒ̣ܸܠܹܗ ܩܵܐ ܡܲܠܲܦܬܲܢ. ܐܝܼܢܵܐ ܠܥܵܠܡܵܐ ܕܲܥܬܝܼܕ ܢܛܸܪܹܗ ܩܵܐ ܦܘܼܪܥܵܢܵܐ ܕܟܹܐܢܹ̈ܐ ܘܕܥܵܘܵܠܹ̈ܐ‌܀ ܥܲܠ ܕܐܵܢܝܼ ܡܘܼܠܝܸܨܹ̈ܐ ܝَܢܵܐ ܘܡܘܼܥܝܸܩܹ̈ܐ ܘܟܘܼܡܪܹ̈ܐ ܒܘܼܬ ܫܪܵܪܵܐ ܕܗܲܝܡܵܢܘܼܬܵܝܗ‌ܝ‌܀ ܥܲܠ ܐܵܢܝܼ ܕܙܠܝܼܡܹ̈ܐ ܝَܢܵܐ ܘܠܘܼܒܠܹܐ ܝَܢܵܐ ܒܚܲܝܠܵܐ ܕܥܵܘܠܵܐ‌܀ ܥܲܠ ܕܐܵܢܝܼ ܕܒܣܠܵܒܵܐ ܘܒܓܵܙܲܪ̈ܝܵܬܹ‌ܐ ܘܒܐܘܼܪ̈ܚܵܬܹ‌ܐ ܪ̈ܲܚܝܼܩܵܬܹܐ ܝَܢܵܐ‌܀ ܥܲܠ ܡܸܪ̈ܥܝܹܐ ܩܵܐ ܕܒܲܣܡܝܼ. ܘܓ̰ܘܼܢܓ̰ܸܪܹ̈ܐ ܩܵܐ ܕܡܲܢܝܸܚܝܼ. ܘܡܘܼܠܝܸܨܹ̈ܐ ܩܵܐ ܕܗܵܘܝܼ ܪܲܗܲܬ. ܘܡܘܼܥܝܸܩܹ̈ܐ ܩܵܐ ܕܦܵܝܫܝܼ ܝܘܼܗَܒ̣ܹܐ ܠܸܒܵܐ‌܀

     ܐܲܩܸܦ. ܫܡܸܥ ܒܵܥܘܼܬܲܢ ܘܪܲܚܸܡ ܥܲܠܲܢ.  ܘܓ̰ܲܘܸܒܝܼ:  ܫܡܸܥ ܒܵܥܘܼܬܲܢ ܘܪܲܚܸܡ ܥܲܠܲܢ.  ܒܵܬܹ̈‌ܐ. ܒܵܒܵܐ ܛܵܒ̣ܵܐ ܪܲܚܸܡ ܥܲܠܲܢ‌܀ ܒܪܵܐ ܡܬܘܿܡܵܝܵܐ: ܪܲܚܸܡ ܥܲܠܲܢ‌܀ ܪܘܼܚܵܐ ܕܩܘܼܕܫܵܐ:  ܪܲܚܸܡ ܥܲܠܲܢ‌‌܀ ܛܸܫܝܵܐ ܒܟܝܵܢܹܗ:  ܪܲܚܸܡ ܥܲܠܲܢ‌‌܀ ܟܸܣܝܵܐ ܒܚܙܵܝܬܹܗ:  ܪܲܚܸܡ ܥܲܠܲܢ‌‌܀ ܥܵܓ̰ܒܵܢܵܐ ܒܦܸܠܚܵܢ̈ܘܼܗ‌ܝ‌:  ܪܲܚܸܡ ܥܲܠܲܢ‌܀ ܐܲܢَܬ̇ ܗܲܝܸܪܵܢܲܢ: ܪܲܚܸܡ ܥܲܠܲܢ‌‌܀ ܐܲܢَܬ ܡܲܚܝܼܵܢܲܢ‌: ܪܲܚܸܡ ܥܲܠܲܢ‌܀ ܐܲܢَܬ̇ ܒܹܝܬܼ ܓܵܘܣܲܢ‌: ܪܲܚܸܡ ܥܲܠܲܢ‌܀

     ܫܲܚܠܸܦ. ܫܡܝܼܥ ܒܩܵܠܲܝ̈ܢ ܘܪܲܚܸܡ ܥܲܠܲܢ. ܘܓ̰ܲܘܸܒܝܼ:  ܡܵܪܲܢ ܪܲܚܸܡ ܥܲܠܲܢ‌܀ ܥܲܠ ܫܲܝܢܵܐ ܕܥܹܕܵܬܹ̈ܐ ܘܫܠܵܡܵܐ ܕܦܸܢ̈ܝܵܬܹ‌ܐ. ܘܚܲܝܘܼܬܵܐ ܫܠܝܼܬܵܐ ܘܐܘܼܪܚܵܐ ܪܲܗܲܬ ܕܚܲܝ̈ܝܲܢ‌.  ܒܸܛܠܵܒܵܐ ܝَܘܲܚ ܡܸܢܘܼܟܼ‌܀  ܥܲܠ ܚܘܼܠܡܵܢܵܐ ܕܐܲܒ̣ܵܗܵܬ̈ܲܢ ܩܲܕܝܼܫܹ̈ܐ: ܡܵܪܝ ܦܠ݁ܢ ܩܵܬ̣ܘܿܠܝܼܩܵܐ ܦܵܛܲܪܝܵܪܟܵܐ. ܘܡܵܪܝ ܦܵܠ݁ܢ ܡܝܼܛܪܵܦܘܿܠܹܝܛܵܐ [ܐܵܘ ܐܲܦܸܣܩܘܿܦܵܐ]: ܘܥܲܠ ܟܠܵܝܗܝ ܒܢܲܝ̈ ܚܸܠܡܲܬܵܝܗܝ. ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܥܲܠ ܐܲܒ̣ܵܗ̈ܵܬܲܢ ܐܲܦܸܣܩܘܿܦܹ̈ܐ ܬܪ̈ܝܼܨܲܝ ܫܘܼܒ̣ܚܵܐ ܐܵܢܝܼ ܕܐܝܼܢܵܐ ܒܟܠܵܗ̇ ܥܵܡܲܪܬܵܐ‌.  ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܥܲܠ ܩܲܫܝܼܫܹ̈ܐ ܘܡܫܲܡܫܵܢܹ̈ܐ ܘܫܲܪܟܵܐ ܕܟܠܵܝܗ‌ܝ ܬܸܓ̣ܡܹ̈ܐ ܥܹܕܬܵܢܵܝܹ̈ܐ. ܘܟܠܵܝܗ‌ܝ ܗܲܕܵܡܹ̈ܐ ܕܡܫܝܼܚܵܐ‌.  ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܥܲܠ ܐܵܢܝܼ ܕܒܸܕܡܵܝܵܐ ܝَܢܵܐ ܒܕܘܼܒܵܪܹ̈ܐ ܕܡܲܠܲܐܟ̣ܹ̈ܐ. ܐَܢܵܫܹ̈ܐ ܟܹܐܢܹ̈ܐ ܕܠܹܐ ܚܵܫܸܚ ܐܸܠܵܝܗ‌ܝ ܥܵܠܡܵܐ‌.  ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܗ݁ܘ ܕܒܣܸܡܠܵܐ ܠܹܗ ܒܬܘܼܪܵܨܵܐ ܕܓܢܵܗܵܬܹ̈ܐ. ܘܒܡܲܕܥܲܪܬܵܐ ܕܚܲܛܵܝܹ̈ܐ. ܘܒܚܲܝܹ̈ܐ ܘܒܦܘܼܪܩܵܢܵܐ ܕܟܠܵܝܗ‌ܝ ܒܢܲܝ̈ܢܵܫܵܐ‌.  ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܐܲܠܵܗܲܢ ܡܵܪܵܐ ܕܟܠ. ܗ݁ܘ ܕܝܼܠَܘܼܗ‌ܝ ܝَܠܵܗ̇ ܠܵܐ ܡܵܝܘܿܬܘܼܬܵܐ ܘܠܵܐ ܚܪܵܒ̣ܬܵܐ. ܘܒܫܘܼܪܵܝܲܢ ܦܝܵܫܵܐ ܝَܠܹܗ ܣܓ̣ܝܼܕܵܐ ܡ̣ܢ ܡܲܠܲܐܟ̣ܹ̈ܐ ܘܒܢܲܝ̈ܢܵܫܵܐ ܒܪܘܼܚܵܐ ܘܒܫܪܵܪܵܐ‌.  ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܕܫܘܼܪܵܝܵܐ ܠܲܝܬ ܠܹܗ. ܘܫܘܼܠܡܵܐ ܠܹܐ ܗܵܘܹܐ ܠܹܗ.  ܒܸܛܠܵܒܵܐ ܝَܘܲܚ ܡܸܢܘܼܟܼ‌‌܀ ܦܪܘܿܩ ܠܟܠܲܢ ܡܫܝܼܚܵܐ ܡܵܪܲܢ ܒܛܲܝܒܘܼܬܘܼܟܼ. ܘܡܲܫܪܝܼ ܫܲܝܢܘܼܟܼ ܘܫܠܵܡܘܼܟܼ ܒܟܠܵܗ̇ ܥܵܡܲܪܬܵܐ. ܘܪܲܚܸܡ ܥܲܠܲܢ‌܀

     ܢܨܲܠܹܐ ܫܠܵܡܵܐ ܥܲܡܲܢ. ܣܝܼܡܘ ܒܘܼܪܟܵܐ. ܘܩܘܼܡܘ ܒܚܲܝܠܵܐ ܕܐܲܠܵܗܵܐ: ܘܓ̰ܲܘܸܒܝܼ: ܫܘܼܒ̣ܚܵܐ ܠܚܲܝܠܹܗ ܕܐܲܠܵܗܵܐ.

ܩܪܝܢܐ؛ ܐ

ܡܘܬܒ̣ܐ؛ ܒ.

ܡܲܠܟܵܐ ܕܢܝܼܢܘܹܐ ܩܵܐܸܡ ܗَܘܵܐ: ܒܚܲܫܵܐ ܘܬܵܙܝܼ ܘܦܵܫܲܡܬܵ‌ܐ. ܩܛܸܥܠܹܗ ܨܵܘܡܵܐ ܠܡܸܫܪܝܼܬܘܼܗܝ: ܓܵܝܸܡܟ̰ܵܪܵܐ ܕܫܘܼܒ̣ܚܵܐ ܝܘܼܗَܒ̣ܵܗ݁ ܠܹܗ. ܩܸܪܝܵܗ̇ ܠܹܗ ܘܡܩܘܼܪܒܸܢܵܐ ܠܹܗ ܠܲܨܠܘܿܬܵܐ: ܕܝܼܠܵܗ̇ ܡܵܛܵܠܵܐ ܕܟܠܹܗ ܦܘܼܪܩܵܢܵܐ. ܡܘܼܟܪܸܙܵܐ ܠܹܗ ܡܲܟܝܼܟ̣ܘܼܬܵܐ: ܕܝܼܠܵܗ̇ ܩܸܫܬܵ‌ܐ ܕܓܹܐܪܹ̈ܐ ܢܲܨܝܼܚܹ̈ܐ܀ ܠܟܸܣ ܚܘܼܒܵܐ ܚܵܝܵܐ ܓܪܝܼܫܵܗ̇ ܠܹܗ: ܕܝܼܠܹܗ ܣܲܝܦܵܐ ܝܵܗَܒ̣ܵܢܵܐ ܕܓ̣ܵܠܝܼܒܘܼܬܵܐ. ܡ̣ܢ ܒܵܬَܪ ܕܣܘܼܚܒܸܪܹܗ ܡܲܠܟܵܐ: ܡܟ̰ܘܼܟܒܸܢܲܝܗܝ ܠܹܗ ܚܲܝܠܵܘܵܬ̈ܘܼܗܝ ܒܕܸܟ̣ܝܘܼܬܵܐ. ܕܝܼܪܹܗ ܩܵܐ ܕܡܟ̰ܲܟܒܸܢ ܗَܘܵܐ ܠܥܲܠܡܵܐ: ܓܲܒ̣ܪܹ̈ܐ ܘܒܲܟ̣ܬܵܬܹ̈ܐ ܡܐܘܼܕܵܠܹܐ. ܕܟܠܹܗ ܛܵܝܸܦܵܐ ܡ̣ܢ ܩܝܼܵܣܘܼܗܝ: ܦܵܠܸܫ ܗَܘܵܐ ܩܵܐ ܦܘܼܪܩܵܢܘܼܗܝ. ܒܣܲܩܹ̈ܐ ܝܘܼܗَܒܸܠܹܗ ܛܘܼܦ̮ܣܵܐ: ܡܕܝܼܢَܬܵܐ ܒܣܲܩܹ̈ܐ ܡܟ̰ܲܟܒܘܼܢܹܐ ܝܼܗَܘܵܐ ܒܪܘܿܢܹܗ ܕܢܸܡܪܘܿܕ ܓܲܢَܒܵܪܵܐ: ܨܲܝܵܕܵܐ ܘܙܪܝܼܙܵܐ ܘܙܸܪܲܢܓ. ܫܒܸܩܠܹܗ ܩܛܲܠܬܵ‌ܐ ܕܚܲܝܘܵܬ̈ܵܐ: ܘܫܲܗܒܸܬܝܵܬܹ̈‌ܐ ܟܹܐ ܩܵܛܸܠ ܗَܘܵܐ. ܡܒܵܕܵܠ ܚܲܝܘ̱ܬܵܐ ܦܵܪܘܿܛܬܵ‌ܐ ܕܩܵܛܸܠ ܗَܘܵܐ: ܒܝܼܫܵܬܹ̈‌ܐ ܕܐܲܬܪܹܗ ܟܹܐ ܩܵܛܸܠ ܗَܘܵܐ. ܚܠܵܦ ܨܲܝܕܵܐ ܕܓܵܘ ܒܲܪܝܼܵܐ: ܠܐܲܬܪܵܐ ܡܕܘܼܟ̣ـܹܐܠܹܗ ܡܼܢ ܓܢܵܗܹ̈ܐ܀ ܫܒܸܩܠܹܗ ܠܗܲܝܘܵܢܹ̈ܐ ܕܠܒܲܕܲܪ: ܘܥܵܘܠܵܐ ܕܠܓܵܘܵܝܵܐ ܟܹܐ ܩܵܛܸܠ ܗَܘܵܐ. ܡܘܼܣܠܹܐܠܹܗ ܠܣܲܡܵܐ ܕܬܲܢܝܼܢܵܐ: ܒܨܵܘܡܵܐ ܡܘܼܚܠܹܐܠܹܗ ܚܘܼܫܵܒ̣ܘܼ̈ܗܝ. ܡ̣ܢ ܒܵܕܵܠ ܕܡܲܪܟܲܒ̣ܬܵ‌ܐ ܕܐܝܼܩܵܪܹܗ: ܒܐܲܩܠܘܼ̈ܗܝ ܐܲܬܪܵܐ ܟܹܐ ܡܣܲܚܒܸܪ ܗَܘܵܐ. ܠܛܵܝܸܦܵܐ ܟܠܹܗ ܟܹܐ ܡܣܲܚܒܸܪ ܗَܘܵܐ: ܕܡܲܪܥܸܫ ܗَܘܵܐ ܠܹܗ ܠܲܬܝܵܒ̣ܘܼܬܵܐ܀ ܡܲܠܟܵܐ ܒܫܘܼܩܹ̈ܐ ܒܸܚܕܵܪܵܐ ܝܼܗَܘܵܐ: ܕܬܲܡܸܙ ܗَܘܵܐ ܠܗَܘܿܢ ܡ̣ܢ ܫܸܚܬܵ‌ܐ. ܒܸܚܕܵܪܵܐ ܝܼܗَܘܵܐ ܒܡܲܟܝܼܟ̣ܘܼܬܵܐ: ܡܘܼܫܠܹܐܠܹܗ ܠܐܲܬܪܵܐ ܕܒܸܫܥܵܫܵܐ ܝܼܗَܘܵܐ. ܒܦܵܣܘܼܥܝܵܬܹ̈‌ܐ: ܡܲܟܝܼܟ̣̈ـܹܐ ܙܪܸܥܠܹܗ ܫܲܝܢܵܐ ܒܓܵܘ ܫܘܼܩܹ̈ܐ. ܚܙܹܐܠܹܗ ܝܵܘܢܵܢ ܘܕܒ̣ܝܼܩܠܵܗ̇ ܥܵܓ̰ܝܼܒܘܼܬܵܐ: ܘܒܒܢܲܝ̈ ܛܵܝܸܦܘܼܗܝ ܒܸܢܟܼܵܦܵܐ ܗَܘܵܐ܀ ܒܢܝܼܢܘܵܝܹ̈ܐ ܚܙܹܐܠܹܗ ܢܸܨܚܵܢܵܐ: ܘܥܲܠ ܙܲܪܥܹܗ ܕܐܲܒ̣ܪܵܗܵܡ ܒܟ̣ـܹܐܠܹܗ. ܚܙܹܐܠܹܗ ܠܙܲܪܥܹܗ ܕܲܟ̣ܢܲܥܢ ܕܬܪܸܨܠܹܗ: ܘܙܲܪܥܹܗ ܕܝܲܥܩܘܿܒ̣ ܦܝܼܫܠܹܗ ܡܘܼܣܠܝܼܵܐ. ܚܙܹܐܠܹܗ ܠܥܘܼܪ̈ܠܹܐ ܕܓܙܝܼܪܘܿܢ ܠܸܒܲܝܗ‌ܝ: ܘܠܓܙܝܼܪܹ̈ܐ ܕܡܘܼܩܫܝܼܠܗَܘܿܢ ܠܸܒܲܝܗ‌ܝ. ܚܙܹܐܠܗَܘܿܢ ܠܫܲܒܵܬܹ̈‌ܐ ܕܠܹܐ ܝَܢܵܐ ܦܝܵܫܵܐ ܢܛܝܼܪܹ̈ܐ ܒܢܝܼܢܘܹܐ ܦܘܼܩܕܵܢܹ̈ܐ ܦܝܵܫܵܐ ܝَܢܵܐ ܢܛܝܼܪܹ̈ܐ܀ ܕܠܵܐ ܫܲܒܬܵ‌ܐ ܗَܘܹܐܠܹܗ ܦܘܼܪܩܵܢܵܐ: ܘܕܠܵܐ ܓܙܘܼܪܬܵܐ ܢܸܨܚܵܢܵܐ. ܡܒܘܼܣܸܪܹܗ ܝܵܘܢܵܢ ܠܒܢܲܝ̈ ܛܵܝܸܦܘܼܗܝ: ܕܫܵܒܵܬܹ̈‌ܐ ܟܹܐ ܥܲܒ̣ܕܝܼ ܗَܘܵܘ ܫܘܼܒ̣ܗܵܪܵܐ ܡܒܘܼܣܪܝܼܠܹܗ ܙܹܐ ܕܓܙܘܼܪܬܵܐ: ܒܹܝܠ ܡܵܘܬܵܐ ܠܚܲܝܹ̈ܐ ܡܘܼܬܒ̣ܵܐ ܠܗَܘܿܢ. ܡܲܠܟܵܐ ܕܢܝܼܢܘܹܐ ܒܝܼܕܲܥܝܵܐ ܝܼܗَܘܵܐ. ܕܗܵܓ̰ܲܬ ܕܟܲܪܒܵܐ ܚܛܝܼܬܵ‌ܐ ܝܼܠܵܗ̇܀ ܦܣܝܼܩܵܐܠܹܗ ܠܗܵܓ̰ܲܬ ܕܒܝܼܫܵܬܹ̈‌ܐ: ܘܟܠܹܐܠܗَܘܿܢ ܒܓ̰ܵܠܕܘܼܬܵܐ ܒܘܼܪ̈ܵܢܹܐ. ܐܵܣܝܵܐ ܝܼܗܘܵܐ ܕܣܘܼܚܒܸܪܵ̇ܐ ܠܹܗ ܡܕܝܼܢَܬܘܼܗܝ: ܘܕܝܼܥܠܹܗ ܕܡܘܿܕܝَ ܕܸܪܡܵܢܵܐ ܟܹܐ ܚܵܫܸܚ ܠܵܗ̇. ܒܨܵܘܡܵܐ ܕܲܪܡܵܢܵܐ ܕܓ̣ܵܠܝܼܒܘܼܬܵܐ: ܡܲܪ̈ܥܹܐ ܕܥܲܠܡܵܐ ܡܒܘܼܣܸܡܠܹܗ. ܒܣܲܩܵܐ ܘܩܸܛܡܵܐ ܪܕܝܼܦܵܐ ܠܹܗ: ܠܲܚܛܝܼܬܵܐ ܡ̣ܢ ܓܵܘ ܐܲܬܪܵܐ܀ ܐܵܢܝܼ ܕܫܒ̣ܝܼܩܠܗَܘܿܢ ܓܢܵܗܹ̈ܐ: ܛܵܒ̣ܵܐ ܡܘܼܙܝܸܕܠܹܗ ܦܘܼܚܵܠܹܗ ܒܣܵܠܲܡ ܘܙܘܼܕܘܼܢܝܵܐ ܕܫܒ̣ܝܼܩܠܗَܘܿܢ: ܡܕܝܼܢَܬܵܐ ܘܥܵܠܡܵܐ ܡܘܼܢܬܝܼܠܗَܘܿܢ. ܝܵܘܢܵܢ ܓܢܵܗܹ̈ܐ ܡܚܲܫܒܘܼܢܹܐ ܗَܘܵܐ: ܨܵܘܡܵܐ ܚܛܝܼܵܬܹ̈‌ܐ ܒܸܫܒ̣ܵܩܵܐ ܝܼܗَܘܵܐ. ܓ̰ܡܝܼܥܠܗَܘܿܢ ܘܥܒ̣ܝܼܕܠܗَܘܿܢ ܪܵܐܝܼ ܟܠܲܝܗܝ: ܢܝܼܢܘܵܝܹ̈ܐ ܕܵܐܟ̣ܝܼ ܚܲܝܝܼ ܗَܘܵܘ܀ ܡܘܼܬܸܒ̣ܠܹܗ ܩܵܘܠܵܐ ܩܵܐ ܟܠܹܗ ܥܵܠܡܵܐ: ܕܣܵܙܓܸܪܝܼ ܗَܘܵܘ ܥܲܡ ܐܲܠܵܗܵܐ. ܠܢܝܼܢܘܵܝܹ̈ܐ ܡܵܢܝܼ ܡܘܼܕܸܥܠܹܗ: ܐَܪܵܙܵܐ ܛܸܫܝܵܐ ܕܐܲܠܵܗܵܐ. ܕܟܹܐ ܡܵܨܹܐ ܨܵܘܡܵܐ ܫܵܪܝܼܠܵܗܿ: ܠܩܛܸܥܬܵ‌ܐ ܕܝܼܘܵܢ ܕܐܲܠܵܗܵܐ. ܣܵܒܵܒ ܐܵܗܵܐ ܝܵܘܢܵܢ ܠܵܐ ܡܘܼܕܸܥܠܹܗ: ܕܒܸܙܕܲܥܝܵܐ ܗَܘܵܐ ܡ̣ܢ ܫܘܼܒ̣ܩܵܢܵܐ܀ ܠܢܝܼܢܘܵܝܹ̈ܐ ܝܵܘܢܵܢ ܡܘܼܟܪܸܙܠܹܗ: ܕܩܛܸܥܬܵ‌ܐ ܕܝܼܘܵܢܘܼܗܝ ܫܲܪܝܼܪܬܵܐ ܝܼܠܵܗ̇ ܟܲܕ ܠܩܵܠܹܗ ܕܝܵܘܢܵܢ ܡܗܘܼܝܡܸܢܘܿܢ: ܠܩܛܸܥܬܵ‌ܐ ܕܝܼܘܵܢܘܼܗܝ ܒܘܼܛܸܠܗَܘܿܢ. ܐܲܝܟܼ ܦܵܪ̈ܘܿܫܹܐ ܝܕܸܥܠܗܘܿܢ: ܠܐܲܠܵܗܵܐ ܘܠܒܲܪܢܵܫܵܐ ܐܲܝܟܼ ܒܲܪܢܵܫܵܐ ܝܼܠܹܗ: ܘܐܲܠܵܗܵܐ ܡܪܲܚܡܵܢܵܐ ܝܼܠܹܗ܀ ܚܙܹܐ ܠܗَܘܿܢ ܕܲܢܒܼܝܼܵܐ ܩܸܫܝܵܐ ܝܼܠܹܗ: ܘܦܘܼܪܡܝܼܠܗَܘܿܢ ܕܐܲܠܵܗܵܐ ܒܲܣܝܼܡܵܐ ܝܼܠܹܗ. ܠܵܐ ܕܪܝܼܫܠܗَܘܿܢ ܥܲܡ ܕܗ̇ܘ ܩܸܫܝܵܐ: ܥܲܡ ܡܪܲܚܡܵܢܵܐ ܡܣܘܼܙܓܸܪܘܿܢ. ܠܢܒ̣ܝܼܵܐ ܝܘܼܗَܒܸܠܗَܘܿܢ ܟܹܐܢܘܼܬܵܐ: ܐܝܼܢܵܐ ܠܐܲܠܵܗܵܐ ܫܵܟܲܪܬܵܐ. ܟܲܕ ܝܵܘܢܵܢ ܗܹܒ̣ܝܼ ܒܸܩܛܲܥܝܵܐ ܗَܘܵܐ: ܒܨܵܘܡܵܐ ܗܹܒ̣ܝܼ ܒܸܙܝܵܕܵܐ ܗَܘܵܐ܀ ܟܲܕ ܝܵܘܢܵܢ ܒܸܫܡܵܛܵܐ ܗَܘܵܐ ܠܸܒܵܐ: ܨܠܘܿܬܵܐ ܠܠܸܒܵܐ ܒܸܣܢܵܕܵܐ ܝܼܗَܘܵܐ. ܟܲܕ ܟܲܪܒܵܐ ܡܙܲܪܒܘܼܢܹܐ ܗَܘܵܐ: ܚܸܡܬܘܼܗܝ ܒܣܲܩܹ̈ܐ ܒܸܡܟܵܟ̣ܵܐ ܗَܘܵܐ. ܥܢܵܢܹ̈ܐ ܕܩܪܝܼܡܠܗَܘܿܢ ܐَܟܘܼܡܵܐ: ܒܪ̈ܲܢܓܹܐ ܕܣܲܩܹ̈ܐ ܦܝܼܫܠܹܗ ܡܒܘܼܛܠܵܐ. ܦܫܝܼܡܵܐ ܗَܘܵܐ ܗܵܘܵܐ ܬܵܡܵܐ: ܦܨܝܼܚܠܹܗ ܒܲܬܝܵܒ̣ܘܼܬܵܐ܀ ܐܸܣܛܘܿܢܹ̈ܐ ܕܐܲܪܥܵܐ ܪܓܝܼܕܠܗَܘܿܢ: ܣܢܝܼܕܝܼܠܵܗ̇ ܟܹܐܢܘܼܬܵܐ. ܫܥܸܫܠܹܗ ܐܲܬܪܵܐ ܠܸܢܦܵܠܵܐ: ܦܝܼܫܠܹܗ ܣܢܝܼܕܵܐ ܒܐܸܪ̈ܘܵܢܹܐ. ܡܵܡܘܿܢܵܐ [ܙܘܼܙܵܐ] ܕܟܹܐ ܡܲܙܝܸܕ ܓܢܵܗܹ̈ܐ: ܒܝܼܘܼܗܝ ܦܝܼܫܠܗَܘܿܢ ܦܘܼܚܠܹܐ ܓܢܵܗܹ̈ܐ. ܨܲܒ̈ܝܹܐ ܒܫܸܦܘܼܠܵܠܹ̈ܐ ܦܝܼܫܠܗَܘܿܢ ܢܛܝܼܪܹ̈ܐ: ܕܝَܠܸܦܠܗَܘܿܢ ܨܵܘܡܵܐ ܒܐܘܼܠܨܵܢܹ̈ܐ܀ ܡܘܼܩܘܸܚܠܗَܘܿܢ ܣܵܒ̣̈ـܹܐ ܥܲܠ ܣܲܩܲܝ̈ܗ‌ܝ: ܦܝܼܫܠܗَܘܿܢ ܡܘܼܙܝܸܕܹܐ ܚܲܝܲܝܗ̈‌ܝ. ܕܒܟ̣ـܹܐܠܗَܘܿܢ ܓ̰ܘܲܢܩܹ̈ܐ: ܢܛܝܼܪܲܝܗ‌ܝ ܠܗَܘܿܢ ܟܠܝܼܠܲܝܗ̈‌ܝ. ܘܟܲܕ ܠܒ̣ܝܼܫܠܗَܘܿܢ ܚܲܫܵܐ ܟܲܠܠܵܬܹ̈‌ܐ: ܕܝܼܪܘܿܢ ܠܓܢܘܼ̈ܢܲܝܗ‌ܝ. ܩܲܘܘܼܚܹܐ ܗَܘܵܘ ܕܲܣܬܹ̈‌ܐ ܕܲܣܬܹ̈‌ܐ: ܗܲܝܘܵܢܹ̈ܐ ܕܨܝܼܡܠܗَܘܿܢ ܡ̣ܢ ܡܝܼ̈ܵܐ܀ ܡܲܩܘܲܚܬܵ‌ܐ ܝܼܗَܘܵܐ ܕܟܠ ܩܵܠܹ̈ܐ: ܕܒܲܪܢܵܫܵܐ ܘܕܗܲܝܘܵܢܹ̈ܐ. ܩܲܘܸܚܬܲܝܗ‌ܝ ܫܸܡܥܝܵܐ ܠܵܗ̇ ܟܹܐܢܘܼܬܵܐ: ܡܕܝܼܢَܬܲܝܗ‌ܝ ܦܘܼܪܩܵܠܵܗ̇ ܫܵܦܵܩܲܬ. ܡ̣ܢ ܝܵܘܡܵܐ ܕܩܛܹܐܠܹܗ ܝܵܘܢܵܢ: ܙܕܘܼܥܬܵ‌ܐ ܙܝܵܕܵܐ ܒܸܙܝܵܕܵܐ ܝܼܗَܘܵܐ. ܗܲܡܵܫܵܐ ܝܼܗَܘܵܐ ܒܵܥܘܼܬܵܐ: ܨܵܘܡܵܐ ܠܨܵܘܡܵܐ ܒܸܙܝܵܕܵܐ ܗَܘܵܐ܀ ܣܲܩܵܐ ܠܣܲܩܵܐ ܒܸܚܠܵܡܵܐ  ܗَܘܵܐ: ܘܩܸܛܡܵܐ ܥܲܠܲܝܗܝ ܒܸܙܝܵܕܵܐ  ܗَܘܵܐ. ܠܵܐ ܫܠܹܐܠܵܗ̇ ܥܲܝܢܵܐ ܬܵܡܵܐ: ܡ̣ܢ ܒܸܟ̣ܝܵܐ ܕܬܝܵܒ̣ܘܼܬܵܐ. ܠܵܐ ܫܬܝܼܩܠܹܗ ܠܸܫܵܢܵܐ ܬܵܡܵܐ: ܡ̣ܢ ܩܲܘܸܚܬܵ‌ܐ ܘܛܠܵܒܵܐ ܪ̈ܲܚܡܹܐ. ܠܵܐ ܫܡܸܥܠܵܗ̇ ܢܵܬܵ‌ܐ ܬܵܡܵܐ. ܚܲܕَ ܩܵܠܵܐ ܐَܚܹܪَܢܵܐ ܕܗܸܟ̃ ܡܸܢܕܝܼ܀ ܩܵܠܵܐ ܕܠܝܵܝܬܵ‌ܐ ܘܒܸܟ̣ܝܵܐ: ܡ̣ܢ ܟܠܲܝܗܝ ܓܹܒܵܢܹ̈ܐ ܟܹܐ ܐܵܬܝܼ ܗَܘܵܐ. ܠܵܐ ܚܙܝܼܠܗَܘܿܢ ܒܸܒܸܠܝܵܬܹ̈‌ܐ ܕܥܲܝܢܹ̈ܐ ܬܵܡܵܐ: ܪܲܢܓܵܐ ܒܲܗܪܵܢܵܐ ܕܦܲܐܬܘܵܬܹ̈ܐ. ܘܐܵܦ ܠܵܐ ܦܘܼܡܵܐ ܟܲܕ ܒܓܸܚܟܵܐ: ܕܦܫܝܼܡܹ̈ܐ ܝܼܗَܘܵܘ ܐܘܿܦ ܡܥܘܼܓ̰ܒܹ̈ܐ. ܕܸܡܥܹ̈ܐ ܚܲܕ̈ܬܹܐ ܟܠ ܣܵܥܲܬ: ܡܵܓ̰ܪܘܼܝܹܐ ܗَܘܵܘ ܒܲܬܝܵܒ̣ܘܼܬܵܐ܀ ܐܸܪ̈ܘܵܢܹܐ ܕܟܠ ܬܵܗܵܪܹ̈ܐ: ܟܠܝܘܿܡ ܬܵܡܵܐ ܦܝܵܫܵܐ ܗَܘܵܘ ܥܒ̣ܝܼܕܹ̈ܐ. ܨܠܵܘܵܬܹ̈ܐ ܕܟܠܵܝܗܝ ܦܘܼܪ̈ܫܵܢܹܐ [ܬܵܗܵܪܹ̈ܐ]: ܟܠܝܘܿܡ ܬܵܡܵܐ ܦܝܼܫܠܗَܘܿܢ ܨܘܼܠܝܹ̈ܐ. ܦܲܪ̈ܦܸܠܝܵܬܹ‌ܐ ܕܟܠ ܥܘܼܕܪ̈ܵܢܹܐ: ܬܵܡܵܐ ܦܝܼܫܠܗَܘܿܢ ܚܸܙܝܹ̈ܐ. ܡܲܒܘܼܥܵܐ ܕܟܠ ܝܵܗَܒܲܠܬܵ‌ܐ ܕܠܸܒܵܐ: ܒܪ̈ܲܚܡܹܐ ܬܵܡܵܐ ܦܝܼܫܠܹܗ ܦܬܝܼܚܵܐ܀ ܐܵܕܵܒܘܼܬܵܐ ܕܠܵܐ ܥܲܪܩܲܠܬܵܐ: ܓܲܒ̣ܪܹ̈ܐ ܘܒܲܟ̣ܬܵܬܹ̈ܐ ܠܒ̣ܝܼܫܠܗَܘܿܢ. ܕܸܟ̣ܝܘܼܬܵܐ ܕܠܵܐ ܪܵܙܝܼܠܘܼܬܵܐ: ܒܨܵܘܡܵܐ ܬܵܡܵܐ ܦܝܼܫܠܵܗ̇ ܢܛܝܼܪܬܵܐ. ܒܲܣܝܼܡܘܼܬܵܐ ܒܹܝܠܲܝܗ‌ܝ: ܡܘܼܚܠܝܼܠܗَܘܿܢ ܒܝܼܵܗ̇ ܠܹܫܵܢܲܝܗܝ. ܒܣܵܙܓܵܪܘܼܬܵܐ ܘܫܲܢܸܢܬܵ‌ܐ: ܐܲܝܟܼ ܗܲܕܵܡܹ̈ܐ ܐَܣܝܼܪܹ̈ܐ ܗَܘܵܘ ܒܸܚܕܵܕܹ̈ܐ܀ ܟܸܦܠܵܗ̇ ܐܵܦ ܫܵܦܵܩܲܬ: ܘܥܲܠܲܝܗܝ ܡܘܼܪܝܸܣܠܵܗ̇ ܪ̈ܲܚܡܹܐ. ܒܹܝܠ ܝܵـܠܵܕَܐ ܚܘܼܒܵܐ ܒܹܝܠ ܓܲܒ̣ܪܵܐ ܠܚܲܒ̣ܪܹܗ ܗܵܩܘܼܬܵܐ. ܒܹܝܠ ܟܪܝܼܒܵܐ ܣܵܙܓܵܪܘܼܬܵܐ: ܘܒܹܝܠ ܦܸܠܓَܝܹ̈ܐ ܒܵܪܵܒܵܪܘܼܬܵܐ. ܒܹܝܠ ܒܲܟ̣ܬܵܬܲܝܗ̈‌ܝ ܫܸܠܝܘܼܬܵܐ: ܫܸܬܩܵܐ ܕܡܸܠܝܵܐ ܝܼܠܹܗ ܥܘܼܕ̈ܪܵܢܹܐ܀ ܒܹܝܠ ܣܵܒܲܝܗ̈‌ܝ ܣܵܙܓܵܪܘܼܬܵܐ: ܡܵܨܠܵܗܲܬ ܡܠܝܼܬܵ‌ܐ ܝܘܼܬܪ̈ܵܢܹܐ: ܠܥܠܲܝܡܲܝ̈ܗ‌ܝ ܐܵܕܵܒܘܼܬܵܐ: ܠܒܬܘܼܠܵܬܲܝ̈ܗ‌ܝ ܕܸܟ̣ܝܘܼܬܵܐ. ܒܹܝܠ ܚܸܕܲܡܝܵܬܹ̈‌ܐ ܘܚܹܐܪ̈ܵܬܵܐ: ܚܕܵܐ ܒܵܪܵܒܵܪܘܼܬܵܐ ܝܼܗَܘܵܐ: ܚܲܕَ ܝܼܗَܘܵܐ ܚܸܙܘܵܐ ܕܡܲܣܠܵܝܬܵ‌ܐ: ܚܲܕܵܐ ܝܑܗܘܵܐ ܠܒ̣ܝܼܫܬܵܐ ܕܡܘܼܟܵܟ̣ܵܐ܀ ܠܲܝܬ ܗَܘܵܐ ܬܵܡܵܐ ܥܵܪܵܝܬܵܐ. ܛܢܵܢܵܐ ܒܟܲܪܒܵܐ ܦܝܼܫܠܹܗ ܡܒܘܼܛܠܵܐ. ܚܕܵܐ ܝܼܗَܘܵܐ ܙܹܐ ܚܸܦܝܵܝܘܼܬܵܐ: ܠܪܹ̈ܝܓܵܘܵܬܹܐ ܘܠܡܵܪ̈ܵܘܵܬܹܐ. ܚܲܕَ ܝܼܗَܘܵܐ ܠܲܚܡܵܐ ܕܡܘܼܟܵܟ̣ܵܐ: ܠܕܵܘܠܵܬܡܵܢܕܹ̈ܐ ܘܠܡܸܣܟܹܢܹ̈ܐ: ܚܲܕَ ܝܼܗَܘܵܐ ܫܬܵܝܬܵܐ ܕܒܵܪܵܒܵܪܘܼܬܵܐ: ܠܡܵܪ̈ܵܘܵܬܹܐ ܘܠܩܘܼܠܲܝ̈ܗ‌ܝ܀ ܚܲܕَ ܣܲܩܵܐ ܝܼܗَܘܵܐ ܬܚܘܿܬ ܟܠܵܝܗ‌ܝ: ܕܒ̣ܝܼܩܹ̈ܐ ܒܗܵܩܵܐ ܘܐܵܙܵܕܹ̈ܐ. ܒܚܲܕَ ܢܝܼܪܵܐ ܟܠܹܗ ܐܲܬܪܵܐ: ܒܸܪܚܵܛܵܐ ܗَܘܵܐ ܒܲܬܝܵܒ̣ܘܼܬܵܐ. ܚܲܕَ ܦܘܼܠܚܵܢܵܐ ܦܠܵܚܵܐ ܗَܘܵܐ: ܕܚܲܕَ ܦܘܼܪܩܵܢܵܐ ܫܵܩܸܠ ܗَܘܵܐ. ܓ̰ܢܲܢܬܵ‌ܐ ܒܩܵܠܹ̈ܐ ܦܪ̈ܝܼܫܹܐ: ܟܠܝܘܿܡ ܬܵܡܵܐ ܦܝܼܫܠܵܗ̇ ܐَܡܝܼܪܬܵܐ܀ ܘܬܵܢܲܚܬܵ‌ܐ ܒܚܲܫܹ̈ܐ ܘܕܲܪ̈ܕܹܐ: ܬܵܡܵܐ ܟܠܝܘܿܡ ܦܝܼܫܠܵܗ̇ ܡܫَܟ̰ܝܼܚܬܵ‌ܐ. ܡܲܩܘܲܚܬܵ‌ܐ ܒܡܲܪ̈ܥܹܐ ܦܪ̈ܝܼܫܹܐ: ܡ̣ܢ ܠܟܸܣ ܟܠܵܝܗܝ ܦܝܼܫܠܵܗ̇ ܫܡܸܥܬܵ‌ܐ. ܒܥܘܼܓ̰ܵܒܹ̈ܐ ܕܬܵܗܵܪܹ̈ܐ ܦܪ̈ܝܼܫܹܐ: ܫܓ̣ܝܼܫܵܐ ܝܼܗَܘܵܐ ܟܠܹܗ ܐܲܬܪܵܐ: ܒܚܓ̰ܵܠܬܵ‌ܐ ܕܟܠ ܪ̈ܓܘܼܕܹܐ: ܟܠܹܗ ܐܲܬܪܵܐ ܪܲܬܪܘܼܬܹܐ ܗَܘܵܐ܀ ܐܲܝܟܼ ܨܸܦܪܵܐ: ܡܥܲܠ ܟܸܬܘܵܐ ܡܕܝܼܢَܬܵܐ ܒܸܙܕܘܿܥܬܵ‌ܐ ܒܸܬܝܵܒ̣ܵܐ ܗَܘܵܐ. ܐܲܬܪܵܐ ܒܸܫܥܵܫܵܐ ܗَܘܵܐ ܘܒܸܪܓܵܕܵܐ: ܐܲܝܟܼ ܙܹܠܵܐ ܡ̣ܢ ܩܵܕَܡ ܦܵܘܚܵܐ. ܐܸܢ ܙܪܝܼܩܠܵܗ̇ ܠܹܐ ܝܼܗَܘܵܘ ܒܸܚܫܵܒ̣ܵܐ: ܕܝܵܘܡܵܐ ܥܲܠܲܝܗ‌ܝ ܒܸܬ ܓܵܢܝܼ ܗَܘܵܐ. ܘܐܸܢ ܡܚܘܼܫܟܸܢܵܐ ܠܹܐ ܝܼܗَܘܵܘ ܡܗܲܝܡܘܼܢܹܐ: ܕܨܲܦܪܵܐ ܥܲܠܲܝܗ‌ܝ ܒܸܬ ܙܵܪܸܩ ܗَܘܵܐ܀ ܥܲܠ ܦܘܼܡܵܐ ܕܩܲܒ̣ܪܵܐ ܒܸܟܠܵܝܵܐ ܝܼܗَܘܵܐ: ܟܠܹܗ ܛܵܝܸܦܵܐ ܟܲܕ ܒܸܪܓܵܕܵܐ. ܒܬܲܪܥܵܐ ܕܫܝܘܼܠ ܡܬܲܩܬܘܼܩܹܐ ܝܼܗَܘܵܐ: ܟܠܹܗ ܥܲܠܡܵܐ ܡ̣ܢ ܩܝܼܵܣܘܼܗܝ. ܝܵܘܢܵܢ ܒܸܡܢܵܝܵܐ ܝܵܘܡܵܢܹ̈ܐ: ܘܢܝܼܢܘܵܝܹ̈ܐ ܡܚܲܫܒܘܼܢܹܐ ܓܢܵܗܲܝ̈ܗ‌ܝ. ܚܘܼܫܒܸܢܹܗ ܝܵܘܢܵܢ ܠܲܝܠܵܘܵܬܹ̈ܐ: ܘܢܝܼܢܘܹܐ ܡܚܘܼܫܒܸܢܵܗ̇ ܒܝܼܫܵܬ̈ܘܼܗ̇܀ ܟܟ̰ܸܚܠܵܗ̇ ܐܸܫܬܵ‌ܐ ܫܵܒ̣ܘܿܥܹ̈ܐ [ܗ.ܕ܊ ܫܵܒܵܬܹ̈ܐ]: ܒܒܸܟ̣ܝܵܐ ܘܫܵܗܲܪܬܵܐ ܘܩܵܘܲܚܬܵ‌ܐ. ܒܡܛܲܠܬܵ‌ܐ ܓܸܢܝܵܐ ܝܼܗَܘܵܐ ܝܵܘܢܵܢ: ܘܢܝܼܢܘܵܝܹ̈ܐ ܒܸܟ̣ܝܵܐ ܒܐܲܬܪܵܐ. ܝܵܘܢܵܢ ܕܚܙܹܐܠܹܗ ܕܸܡܥܲܝ̈ܗ‌ܝ ܙܕܸܥܠܹܗ ܪܵܒܵܐ ܡ̣ܢ ܨܵܘܡܲܝܗ‌ܝ. ܐܸܠܹܗ ܛܸܠܵܢܝܼܬܵ‌ܐ ܕܫܪܘܿܪܵܐ ܬܵܟܵܟܵܐ ܕܩܲܪܐܵܐ. ܘܥܲܠܲܝܗ‌ܝ ܚܸܡܵܐ ܚܲܡܝܼܡܵܐ܀ ܛܸܠܵܢܝܼܬܹܗ ܦܝܼܫܠܵܗ̇ ܡܟܘܼܪܦܸܫܬܵ‌ܐ: ܘܥܲܠܲܝܗ‌‌ܝ ܟܝܼܦܠܵܗ̇ ܝܲܡܝܼܢܵܐ. ܒܩܘܼܦܪܵܢܵܐ ܓܸܢܝܵܐ ܗَܘܵܐ ܝܵܘܢܵܢ: ܘܢܝܼܢܘܵܝܹ̈ܐ ܒܐܲܬܪܵܐ ܒܸܟ̣ܝܵܐ. ܟܲܕ ܚܙܹܐܠܹܗ ܝܵܘܢܵܢ ܕܸܡܥܲܝ̈ܗ‌ܝ: ܙܕܸܥܠܹܗ ܪܵܒܵܐ ܡ̣ܢ ܨܵܘܡܲܝܗ‌ܝ. ܥܲܠܹܗ ܛܸܠܵܢܝܼܬܵ‌ܐ ܕܫܪܘܿܪܵܐ [ܬܵܟܵܟܵܐ]: ܘܥܠܲܝܗ‌ܝ ܚܸܡܵܐ ܡܲܩܕܵܢܵܐ܀ ܛܸܠܵܢܝܼܬܹܗ ܦܝܼܫܠܵܗ̇ ܡܟܘܼܪܦܸܫܬܵ‌ܐ: ܘܥܲܠܲܝܗܝ ܢܛܝܼܪܵܗ̇ ܝܲܡܝܼܢܵܐ ܚܙܹܐܠܹܗ ܓܢܵܗܵܬܲܝܗ̈‌ܝ ܫܦܝܼܟܹ̈ܐ: ܐܲܝܟܼ ܡܝܼ̈ܵܐ ܩܵܕَܡ ܥܸܠܵܝܵܐ. ܚܙܹܐܠܹܗ ܠܡܲܠܟܹ̈ܐ ܒܪ̈ܝܼܟܹܐ ܝܼܗَܘܵܘ: ܥܲܠ ܩܸܛܡܵܐ ܟܲܕ ܒܸܨܝܵܡܵܐ. ܚܙܹܐܠܹܗ ܠܝܲܠܘܿܕܹ̈ܐ ܟܲܕ ܡܲܩܘܘܼܚܹܐ. ܡܘܼܓ̰ܹ̈ܐ ܘܦܹܐܪܹ̈ܐ ܡܦܵܘܦܘܿܝܹܐ܀ ܚܙܹܐܠܹܗ ܠܝܸܡܵܬܹ̈‌ܐ ܟܲܕ ܡܬܘܼܦܚܹܐ: ܪ̈ܲܚܡܲܝܗܝ ܥܲܠ ܝܵܠܲܕَܝܗ‌ܝ. ܨܲܒ̈ܝܼـܹܐ ܒܥܘܼܒܹ̈ܐ ܦܝܼܫܠܗَܘܿܢ ܡܘܼܬܪ̈ܝܼـܹܐ: ܒܕܸܡܥܹ̈ܐ ܕܥܲܝܢܹ̈ܐ ܕܝܸܡܵܬܲܝܗ̈‌ܝ. ܚܙܹܐܠܹܗ ܠܣܵܒܹ̈ܐ ܟܲܕ ܒܸܟ̣ܝܵܐ. ܘܣܵܒ̣̈ـܹܐ ܕܛܵܝܸܦܘܼܗܝ ܒܹܐܵܕܵܒ. ܚܸܙܝܵܗ̇ ܠܹܗ ܠܢܝܼܢܘܹܐ ܟܲܕ ܒܸܠܝܵܝܵܐ: ܘܠܨܗܸܝܘܼܢ ܟܲܕ ܫܪܝܼܚܬܵ‌ܐ܀ ܚܸܙܝܵܗ̇ ܠܹܗ ܠܐܵܬܘܿܪ ܘܒܘܼܫ ܒܘܼܣܪܵܠܹܗ: ܠܗ̇‌ܝ ܐܘܿܪܸܫܠܸܡ ܫܘܼܒ̣ܗܵܪܵܢܬܵ‌ܐ. ܚܙܹܐܠܹܗ ܠܛܲܡ̈ܐܵܬܵܐ ܕܦܝܼܫܠܗَܘܿܢ ܡܵܪܹܐ ܐܵܕܵܒ: ܠܒܢܵܬܹ̈‌ܐ ܕܛܵܝܸܦܘܼܗܝ ܡܛܘܼܢܦܹ̈ܐ. ܚܙܹܐܠܹܗ ܒܢܝܼܢܘܹ̈ܐ ܠܫܓ̣ܝܼܫܹ̈ܐ: ܕܡܫܘܼܝܢܸܢܘܿܢ ܘܝَܠܸܦܠܗَܘܿܢ ܟܹܐܢܘܼܬܵܐ. ܘܚܙܹܐܠܹܗ ܒܨܸܗܝܘܿܢ ܠܢܒ̣ܝܼ̈ـܹܐ: ܕܲܓܵܠܹ̈ܐ ܘܡܸܠܝܹ̈ܐ ܕܘܼܓܠܵܐ܀ ܚܙܹܐܠܹܗ ܠܣܵܢܵܡܹ̈ܐ ܕܒܐܸܫܟܵܪܵܐ ܦܝܵܫܵܐ ܫܡܝܼܛܹ̈ܐ ܓܵܘ ܛܵܝܸܦܹ̈ܐ. ܘܓܘܼܫܸܩܠܹܗ ܚܙܹܐܠܹܗ ܒܡܲܢܙܝܼܠܹ̈ܐ: ܕܛܵܝܸܦܘܼܗܝ ܡܸܠܝܹ̈ܐ ܚܲܢܦܘܼܬܵܐ. ܫܩܝܼܠܵܐ ܗَܘܵܐ ܥܸܒ̣ܪܵܝܵܐ: ܢܸܣܝܵـܢܵܐ ܡ̣ܢ ܓܵܘ ܛܵܝܸܦܹ̈ܐ. ܕܟܘܼܡܪܵܐ ܠܡܘܼܫܹܐ ܡܩܘܼܒܠܵܐ ܗَܘܵܐ. ܐܵܦ ܠܐܹܠܝܼܵܐ ܐܲܪܡܲܠܬܵ‌ܐ܀ ܕܵܘܝܼܕ ܟܲܕ ܪܕܸܦܠܹܗ [ܟܘܼܡܸܪܹܗ]  ܫܵܐܘܿܠ ܓܵܘ ܛܵܝܸܦܹ̈ܐ ܦܝܼܫܠܹܗ ܡܝܘܼܩܪܵܐ. ܒܸܙܕܲܥܝܵܐ ܝܼܗَܘܵܐ ܕܠܵܐ ܦܵܐܸܫ ܗَܘܵܐ ܡܕܘܼܓܠܵܐ: ܗ̇ܘ ܟܵܪܘܿܙܵܐ ܕܦܝܼܫܠܹܗ ܡܫܘܼܕܪܵܐ. ܕܒܝܼܕܲܥܝܵܐ ܝܼܗَܘܵܐ ܕܟܵܪܘܿܙܘܼܬܹܗ: ܒܸܬ ܦܵܝܫܵܐ ܫܪܝܼܬܵ‌ܐ ܒܬܝܵܒ̣ܘܼܬܵܐ ܠܢܝܼܢܘܹܐ ܝܵܘܢܵܢ ܒܸܚܙܵܝܵܐ ܗَܘܵܐ: ܐܲܝܟܼ ܥܹܕܬܵܐ ܓ̰ܡܸܥܠܵܗ̇ ܟܠܵܗ̇܀ ܟܠ ܐَܢܵܫܵܐ ܠܒܪܘܿܢܹܗ ܒܸܟ̣ܝܵܐ ܗَܘܵܐ: ܘܥܲܠ ܒܲܪ ܓܸܢܣܘܼܗܝ ܒܸܓ̰ܢܵܢܵܐ ܗَܘܵܐ. ܚܵܝܹ̈ܐ ܟܹܐ ܒܵܟ̣ܝܼ ܥܲܠ ܡܝܼܬܹ̈‌ܐ: ܘܢܝܼܢܘܵܝܹ̈ܐ ܒܟ̣ـܹܐܠܗَܘܿܢ ܥܲܠ ܚܵܝܹ̈ܐ. ܫܘܼܦܪܵܐ ܕܒܲܟ̣ܬܵܬܹ̈ܐ ܦܝܼܫܠܹܗ ܡܘܼܚܪܸܒ̣ܵܐ: ܡ̣ܢ ܒܸܟ̣ܝܵܐ ܘܡ̣ܢ ܡܘܼܟܵܟ̣ܵܐ. ܟܠ ܐَܢܵܫܵܐ ܚܲܒ̣ܪܹܗ ܒܸܢܫܵܩܵܐ ܗَܘܵܐ: ܘܥܲܠ ܨܲܕܪܹܗ ܒܸܡܚܵܝܵܐ ܗَܘܵܐ܀ ܓܘܼܪܬܵܐ ܝܼܗَܘܵܐ ܬܵܙܝܼ ܕܗܘܹܐܠܵܗ̇ ܬܵܡܵܐ: ܡܲܙܕܸܥܝܵܢܵܐ ܝܼܗَܘܵܐ ܚܲܫܵܐ ܕܗܘܹܐܠܹܗ ܬܵܡܵܐ ܕܒܚܲܝܲܝ̈ܗ‌ܝ ܦܝܼܫܠܗَܘܿܢ ܟ̰ܝܼܕܹ̈ܐ: ܬܚܘܿܬ ܐܲܪܥܵܐ ܦܵܝܫܝܼ ܚܒ̣ܝܼܫܹܐ. ܟܡܵܐ ܕܝܵܘܡܵܢܹ̈ܐ ܒܸܟܪܵܝܵܐ ܗَܘܵܘ: ܕܸܡܥܲܝ̈ܗ‌ܝ ܒܘܼܫ ܒܸܓ̰ܪܵܝܵܐ ܗَܘܵܘ ܐܲܝܟܼ ܐَܢܵܫܹ̈ܐ ܕܡܐܵܕܝܼܵܐ ܒܸܬ ܦܲܪܩܝܼ: ܘܠܹܐ ܗܵܘܝܼ ܡܸܢَܕܪܸܫَ ܓܵܘ ܒܪܝܼܬܵ‌ܐ܀ ܡܛܹܐܠܹܗ ܝܵܘܡܵܐ. ܕܗܵܐ ܒܸܬ ܚܲܪܒ̣ܵܐ ܡܩܘܼܪܒܸܢܹܗ ܝܵܘܡܵܐ ܕܗܵܐ ܒܸܬ ܬܲܠܚܵܐ. ܗܘܹܐܠܵܗ̇ ܟܠܵܗ̇ ܡܕܝܼܢَܬܵܐ: ܒܬܵܙܝܼ ܘܒܸܟ̣ܝܵܐ ܘܡܲܩܘܲܚܬܵ‌ܐ. ܥܲܦܪܵܐ ܕܐܲܪܥܵܐ ܦܝܼܫܠܹܗ ܡܘܼܬܪܝܼܵܐ: ܕܓܒ̣ܝܼܠܗَܘܿܢ ܒܕܸܡܥܹ̈ܐ ܕܥܲܝܢܲܝ̈ܗ‌ܝ. ܡܘܼܩܝܸܡ ܠܗَܘܿܢ ܐܲܒ̣ܵܗܹ̈ܐ ܠܒܢܘܿܢܲܝ̈ܗ‌ܝ ܘܝܘܼܪ̈ܬܵܢܲܝܗ‌ܝ ܩܵܕَܡܲܝܗܝ܀ ܕܡܲܒܟܼܝܼ ܗَܘܵܘ ܠܗَܘܿܢ ܡܐܘܼܕܵܠܹܐ: ܠܝܵـܪ̈ܘܼܬܹܐ ܘܡܲܪ̈ܬܝܵܢܹܐ. ܠܛܠܝܼܒܹ̈ܐ ܘܛܠܝܼܒܝܵܬܹ̈ܐ: ܡܘܼܟܠܝܼܵܝܗ‌ܝ ܠܗَܘܿܢ ܒܣܸܕܪܹ̈ܐ [ܪܹ̈ܝܙܹܐ] ܟܲܕ ܒܸܒܟܼܵܝܵܐ. ܒܡܵܢܝܼ ܦܝܼܫܠܵܗ̇ ܓܵܢܵܐ ܒܐܵܗܵܐ ܚܸܙܘܵܐ ܡܲܪܝܼܪܵܐ ܡܘܼܩܝܼܡܲܝܗܝ ܠܗَܘܿܢ ܚܲܬܢܹ̈ܐ ܘܟܲܠܠܵܬܹ̈‌ܐ: ܫܓ̣ܝܼܫܠܗَܘܿܢ ܩܵܠܲܝ̈ܗ‌ܝ ܥܲܡ ܕܸܡܥܲܝ̈ܗ‌ܝ܀ ܡܘܼܩܝܼܡܲܝܗ‌ܝ ܠܗَܘܿܢ ܨܲܒܝܼ̈ـܹܐ ܘܫܲܒ̣ܪ̈ܵܬܵܐ: ܘܡܛܹܐܠܵܗ̇ ܡܲܩܘܲܚܬܲܝܗ‌ܝ ܠܲܫܡܲܝܵܐ. ܚܸܪܘܿܢ ܒܫܘܼܦܪܵܐ ܕܝܲܠܘܿܕܲܝ̈ܗܝ ܘܒܩܘܼܡܬܵ‌ܐ ܕܒܢܘܿܢܲܝ̈ܗ‌ܝ. ܚܘܼܫܟܸܢܵܗ̇ ܐܲܪܥܵܐ ܩܵܕَܡ ܥܲܝܢܲܝ̈ܗ‌ܝ: ܘܒܸܚܫܵܒ̣ܵܐ ܗَܘܵܘ ܕܒܸܬ ܬܲܠܚܵܐ. ܐܲܝܟܼ ܓܵܡܝܼ ܦܝܵܫܵܐ ܗَܘܵܐ ܚܫܝܼܒ̣ܬܵܐ: ܕܒܹܐܙܵܠܵܐ ܘܒܹܐܬܵܝܵܐ ܬܚܘܿܬܲܝܗ‌ܝ: ܩܝܼܡܠܗَܘܿܢ ܐܵܦ ܣܵܒ̣̈ـܹܐ ܘܣܵܒ̣ܝܵܬܹ̈‌ܐ: ܩܲܒ̣ܪ̈ܵܢܲܝܗ‌ܝ ܠܟܸܣܠܲܝܗ‌ܝ. ܘܒܸܓ̰ܢܵܢܵܐ ܘܒܸܟ̣ܝܵܐ ܥܲܠ ܕܐܵܗܵܐ: ܕܡܵܢܝܼ ܒܸܬ ܐܵܟ̰ܸܡ ܥܲܝܢܲܝ̈ܗ‌ܝ ܘܟܵܪܸܟ̣ܠܗܘܿܢ. ܒܸܟ̣ܝܵܐ ܗَܘܵܘ ܥܲܠ ܡܵܘܬܲܝܗ‌ܝ: ܕܠܲܝܬ ܡܸܢَܕܪܸܫَ ܕܩܵܒܸܪ ܘܒܵܟ̣ـܹܐ. ܒܸܟ̣ܝܵܐ ܗَܘܵܘ ܥܲܠ ܩܲܒ̣ܪ̈ܲܝܗ‌ܝ: ܕܠܲܝܬ ܕܚܵܦܸܪ ܘܡܲܟܸܣ: ܒܸܟ̣ܝܵܐ ܗَܘܵܘ ܥܲܠ ܓ̰ܘܼܠܲܝ̈ܗ‌ܝ. ܕܠܲܝܬ ܕܡܲܟܸܣ ܗَܘܵܐ ܫܘܼܠܚܵܝܘܼܬܲܝܗ‌ܝ. ܟܠ ܐَܢܵܫܵܐ ܡܵܘܬܹܗ ܒܸܨܝܵܪܘܼܗܝ [ܨܲܠܡܘܼܢܘܼܗܝ] ܗܘܵܐ: ܩܵܕَܡ ܥܲܝܢ̈ܘܼܗܝ ܒܡܲܪܝܼܪܘܼܬܵܐ. ܘܐܝܼܡܲܢ ܕܕܟ̣ܝܼܪܘܼܢ ܓ̰ܢܸܢܘܼܢ ܕܠܐܲܝܢܝܼ ܚܲܪܬܵܐ [ܦܪܵܩܬܵܐ] ܦܝܼܫܠܗَܘܿܢ ܟ̰ܝܼܕܹ̈ܐ. ܟܠ ܐَܢܵܫܵܐ ܡܥܵܓ̰ܘܼܒܹܐ ܗَܘܵܐ ܘܡܬܲܚܡܘܿܢܹܐ: ܕܠܐܲܝܢܝܼ ܡܵܘܬܵܐ ܦܝܼܫܵܐ ܗَܘܵܐ ܡܗܘܼܕܪܵܐ܀ ܟܠ ܐَܢܵܫܵܐ ܠܸܒܹܗ ܒܸܟ̰ܠܵܦܵܐ ܗَܘܵܐ: ܕܫܡܸܥܠܹܗ ܕܐܲܪܥܵܐ ܒܸܬ ܟ̰ܵܠܦܵܐ. ܫܘܼܚܠܸܦܠܹܗ ܓܵܘܢܵܐ [ܪܲܢܓܵܐ] ܕܦܲܐܬ̈ܘܵܬܲܝܗ‌ܝ: ܫܡܸܥܠܗَܘܿܢ ܕܐܲܪܥܵܐ ܒܸܬ ܚܲܪܒ̣ܵܐ ܩܝܼܡܠܗَܘܿܢ ܡܲܠܟܹ̈ܐ ܘܡܲܠܟܝܵܬܹ̈‌ܐ: ܘܬܵܓ̰ܲܝ̈ܗ‌ܝ ܥܲܠ ܣܲܩܲܝ̈ܗ‌ܝ. ܚܝܼܪܘܼܢ ܕܩܵܐ ܩܘܼܕܡܹܐ ܠܹܐ ܗܵܘܝܼ ܒܬܪܹܝ ܬܵܩܹ̈ܐ ܙܝܼܕܠܗَܘܿܢ ܚܲܫܲܝ̈ܗ‌ܝ: ܟܠ ܐَܢܵܫܵܐ ܥܲܠ ܥܲܦܪܵܐ ܡܓܲܪܡܘܼܠܹܐ ܗَܘܵܐ: ܘܐܲܠܵܗܵܐ ܡܸܢَܕܪܸܫَ ܒܸܩܪܵܝܵܐ ܗَܘܵܐ. ܟܠ ܐَܢܵܫܵܐ ܡܲܩܘܘܼܚܹܐ ܗَܘܵܐ ܒܨܠܘܿܬܵܐ: ܘܩܛܝܼܪܘܼܗܝ ܩܸܛܡܵܐ ܡܠܵܝܵܐ ܝܼܗَܘܵܐ. ܠܲܝܬ ܓ̰ܢܵܢܵܐ ܕܠܵܐ ܦܝܼܫܠܵܗ̇: ܓ̰ܢܝܼܢܬܵ‌ܐ ܬܵܡܵܐ ܘܒܟ̣ܝܼܬܵ‌ܐ. ܣܲܩܹ̈ܐ ܫܘܼܪ̈ܵܢܹܐ ܡܲܒܟ̣ܘܼܝܹܐ ܗَܘܵܘ: ܢܦܝܼܠܹ̈ܐ ܒܩܸܛܡܵܐ ܩܲܪܝܼܪܵܐ܀ ܐܵܦ ܝܵܘܡܵܐ ܚܲܫܟܘܼܢܹܐ ܝܼܗَܘܵܐ. ܡ̣ܢ ܣܲܩܹ̈ܐ ܕܐܝܼܬ ܗَܘܵܐ ܬܵܡܵܐ. ܐܵܦ ܗܵܘܵܐ ܚܒ̣ܝܼܛܵܐ ܝܼܗَܘܵܐ: ܘܫܸܡܫܵܐ ܫܓ̣ܝܼܫܵܐ ܝܼܗَܘܵܐ. ܥܢܵܢܹ̈ܐ ܥܲܡ ܥܲܪ̈ܦܸܠܹܐ [ܚܹܝܦܘܼܬܵܐ]: ܩܫܝܼܠܗَܘܿܢ ܘܙܘܼܪܒܸܢܘܼܢ ܥܲܡܛܵܢܹ̈ܐ. ܦܩܸܥܬܵ‌ܐ ܠܦܩܸܥܬܵ‌ܐ ܬܲܩܬܘܼܩܹܐ ܗَܘܵܐ. ܪܲܥܡܵܐ [ܓܲܪܓܲܡܬܵܐ] ܠܚܲܒ̣ܪܹܗ ܒܸܬܦܵܩܵܐ ܝܼܗَܘܵܐ܀ ܘܒܲܪܩܵܐ ܠܒܲܪܩܵܐ ܒܸܬܢܵܝܵܐ ܝܼܗَܘܵܐ: ܘܪܓܘܼܕܵܐ ܘܬܵܢܲܚܬܵ‌ܐ ܕܠܸܒܵܐ. ܒܐܲܪܥܵܐ ܟܠ ܐَܢܵܫܵܐ ܡܓܵܫܘܿܩܹܐ ܝܼܗَܘܵܐ: ܟܲܕ ܒܸܚܫܵܒ̣ܵܐ ܕܚܪܝܼܩܠܵܗ̇. ܒܟ̣ـܹܐܠܗܘܿܢ ܟܠܵܝܗ‌ܝ ܠܸܚܕܵܕܹ̈ܐ: ܐܲܝܟܼ ܐَܢܵܫܹ̈ܐ ܕܒܸܦܢܵܝܵܐ ܗَܘܵܘ ܡܸܢܫܸܠܬܵܢܹܐ ܟܠ ܐَܢܵܫܵܐ ܠܐܲܚܘܿܢܹܗ ܒܸܟ̣ܝܵܐ ܗَܘܵܐ: ܘܥܲܠ ܣܵܘܓܘܿܠܘܼܗܝ ܒܸܓ̰ܢܵܢܵܐ ܗَܘܵܐ܀ ܟܠ ܐَܢܵܫܵܐ ܠܚܲܒ̣ܪܹܗ ܟܹܐ ܩܵܪܝܼ ܗَܘܵܐ: ܕܚܵܙܝܼ ܗَܘܵܐ ܠܹܗ ܘܣܵܒ̣ܥܝܼ ܗَܘܵܐ ܡ̣ܢ ܦܲܪܨܘܿܦܹܗ. ܘܕܦܲܪܩܵܐ ܗَܘܵܐ ܗܹܡܸܙܡܵܢܘܼܗܝ ܥܲܡ ܕܝܼܠَܘܼܗܝ: ܘܨܵܠܝܼ ܗَܘܵܘ ܡܐܸܚܕܵܕܹܐ ܠܫܝܘܿܠ. ܒܥܸܕܵܢܵܐ ܕܦܪܝܼܩܠܗَܘܿܢ ܝܵܘܡܵܢܹ̈ܐ: ܟܠܹܐܠܗَܘܿܢ ܡܐܸܚܕܵܕܹܐ ܒܕܲܪܓ̣ܵܐ ܕܡܵܘܬܵܐ. ܟܲܕ ܕܒ̣ܝܼܩܹ̈ܐ ܒܐܸܚܕܵܕܹܐ: ܘܒܸܟ̣ܝܵܐ ܘܒܸܓ̰ܢܵܢܵܐ ܠܐܸܚܕܵܕܹܐ܀ ܡܛܹܐܠܹܗ ܗ̇ܘ ܝܵܘܡܵܐ ܕܩܛܸܥܬܵ‌ܐ ܕܗܹܒ̣ܝܼ: ܕܒܝܼܹܗ ܟܲܪܒܵܐ ܒܸܬ ܦܵܐܸܫ ܗَܘܵܐ ܡܬܘܼܡܸܡܵܐ. ܡܛܹܐܠܹܗ ܗ̇ܘ ܠܲܝܠܹܐ ܕܝܼܗܘܵܐ: ܡܒܵܬَܪ ܐܸܫܬܵ‌ܐ ܫܵܒ̣ܘܿܥܹ̈ܐ. ܡܬܲܚܡܘܼܢܹܐ ܗَܘܵܘ ܟܲܕ ܒܸܟ̣ܝܵܐ: ܕܒܐܲܝܢܝܼ ܣܵܥܲܬ ܒܸܬ ܚܲܪܩܵܐ. ܝܵܐ ܪܲܒ ܒܐܲܝܢܝܼ ܥܸܕܵܢܵܐ: ܕܐܵܗܵܐ ܠܲܝܠܹܐ ܒܸܬ ܚܲܪܒ̣ܵܐ؟. ܝܵܐ ܪܲܒ ܒܪܲܡܫܵܐ ܒܸܬ ܚܲܪܒܼܵܐ: ܝܲܢ ܒܩܵܝܕܲܡܬܵ‌ܐ ܒܸܬ ܚܲܪܒ̣ܵܐ؟. ܒܐܲܝܢܝܼ ܒܲܕܠܵܐ ܒܸܬ ܐܵܬܹܐ: ܩܵܠܵܐ ܕܓܘܼܢܚܘܿܗ̇ ܡܲܪܝܼܪܵܐ؟. ܚܫܝܼܒ̣ܠܗَܘܿܢ ܕܒܪܲܡܫܵܐ ܒܸܬ ܚܲܪܩܵܐ: ܡܛܹܐܠܹܗ ܪܲܡܫܵܐ ܘܗܵܐ ܟܵܠܝܵܢܬܵܐ (ܗَܘܵܬ). ܚܫܝܼܒ̣ܠܗَܘܿܢ ܕܒܠܲܝܠܹܐ ܒܸܬ ܦܵܝܫܝܼ ܒܸܠܥܝܹ̈ܐ: ܘܗَܘܹܐܠܹܗ ܠܲܝܠܹܐ ܘܗܸܫ ܢܛܝܼܪܹ̈ܐ ܗَܘܵܘ܀ ܚܫܝܼܒ̣ܠܗَܘܿܢ ܕܒܚܸܫܟܵܐ ܒܸܬ ܦܵܝܫܝܼ ܡܚܘܼܪ̈ܙܸܦܹܐ: ܥܒ̣ܝܼܪܹܗ ܚܸܫܟܵܐ ܘܠܵܐ ܦܝܼܫܠܗَܘܿܢ ܡܘܼܚܪܸ̈ܒ̣ܹܐ. ܬܘܼܚܡܸܢܘܿܢ ܕܒܩܵܝܕܲܡܬܵ‌ܐ ܒܸܬ ܚܲܪܒ̣ܵܐ: ܡܛܹܐܠܵܗ̇ ܩܵܝܕܲܡܬܵܐ ܘܙܝܼܕܠܵܗ̇ ܗܹܒ̣ܝܼ. ܒܥܸܕܵܢܵܐ ܕܚܫܝܼܒ̣ܠܗَܘܿܢ ܕܒܸܬ ܦܵܢܝܼ ܗَܘܵܘ ܟܠܵܝܗ‌ܝ: ܗܘܹܐܠܹܗ ܡܸܢܫܸܠܬܵܢܹܐ ܦܘܼܪܩܵܢܵܐ. ܠܚܲܒ̣ܪܹܗ ܟܠ ܐَܢܵܫܵܐ ܒܸܚܙܵܝܵܐ ܗَܘܵܐ: ܘܠܣܵܘܓܘܿܠܹܗ ܡܘܼܫܬܵܪܝܼ ܕܚܙܵܝܬܘܼܗܝ܀ ܐܲܪܒܥܝܼ ܝܵܘܡܵܢܹ̈ܐ ܡ̣ܢ ܫܝܲܥܫܵܐ: ܠܵܐ ܫܠܹܐܠܵܗ̇ ܐܲܪܥܵܐ ܡ̣ܢ ܒܸܪܓܵܕܵܐ. ܝܵܘܢܵܢ ܒܸܟܠܵܝܵܐ ܗَܘܵܐ ܡ̣ܢ ܪܘܼܚܩܵܐ. ܡܬܲܚܡܘܼܢܹܐ ܕܡܘܼܡܟܸܢ ܒܸܬ ܦܵܠܸܛ ܕܲܓܵܠܵܐ. ܫܠܹܐܠܹܗ ܫܝܲܥܫܵܐ ܐܵܦ ܪܵܘܕܵܢܵܐ: ܒܥܸܕܵܢܵܐ ܕܩܛܸܥܬܵܐ ܕܗܹܒ̣ܝܼ. ܡܲܫܚܲܕܬܵܐ ܕܪ̈ܲܚܡܹܐ ܦܝܼܫܠܵܗ̇ ܝܘܼܗَܒܸܠܬܵ‌ܐ: ܕܚܙܹܐܠܗَܘܿܢ ܢܝܼܫܲܢܩܵܐ ܕܚܲܢܵܢܵܐ [ܟܵܪܲܡܕܲܪ]. ܐܵܗܵܐ ܝܼܗَܘܵܐ ܢܝܼܫܲܢܩܵܐ ܕܫܸܚܕܵܐ: ܕܫܠܹܐܠܵܗ̇ ܐܲܪܥܵܐ ܡ̣ܢ ܫܝܲܥܫܵܐ. ܒܲܪ̈ܩܹܐ ܘܪ̈ܲܥܡܹܐ ܫܬܝܼܩܠܗَܘܿܢ: ܘܢܵܬܵ‌ܐ ܘܥܲܝܢܵܐ ܦܨܝܼܚܠܗَܘܿܢ. ܛܵܒ̣ܵܐ ܕܚܙܹܐܠܹܗ ܕܸܡܥܲܝ̈ܗ‌ܝ: ܡܪܘܼܚܸܡܠܹܗ ܥܲܠ ܚܲܝܲܝ̈ܗ‌ܝ. ܐܵܦܸܢ ܕܠܵܐ ܡܝܼܬܠܗَܘܿܢ ܡܓ̰ܘܼܢܓ̰ܸܪܘܿܢ: ܕܠܡܵܘܬܵܐ ܒܚܲܝܲܝ̈ܗ‌ܝ ܛܥܝܼܡܠܗَܘܿܢ. ܒܐܲܢܹܐ ܐܸܫܬܵ‌ܐ ܫܵܒ̣ܘܿܥܹ̈ܐ [ܫܵܒܵܬܹ̈ܐ]: ܒܘܼܫ ܢܝܵܚܵܐ ܝܼܗَܘܵܐ ܠܡܝܼܬܹ̈‌ܐ ܡ̣ܢ ܕܐܸܠܲܝܗ‌ܝ. ܚܵܝܹ̈ܐ ܝܼܗَܘܵܘ ܕܒܚܲܝܲܝ̈ܗ‌ܝ: ܡܝܼܬܹ̈‌ܐ ܝܼܗَܘܵܘ ܟܲܕ ܠܵܐ ܩܒ̣ܝܼܪܹ̈ܐ. ܐܲܚܘܿܢܵܐ ܒܐܲܚܘܿܢܵܐ ܒܸܬܦܵܩܵܐ ܝܼܗَܘܵܐ: ܠܹܐ ܝܼܗَܘܵܐ ܦܪܵܫܵܐ ܨܘܼܪܬܹܗ܀ ܐܵܦ ܠܵܐ ܢܵܬܵ‌ܐ ܡܨܹܐܠܵܗܿ: ܕܦܲܪܫܵܐ ܗَܘܵܐ ܩܵܠܵܐ ܡ̣ܢ ܩܵܠܵܐ. ܕܵܐܟ̣ܝܼ ܕܐܵܦ ܠܵܐ ܥܲܝܢܵܐ ܦܪܝܼܫܠܵܗ̇ ܨܲܠܡܵܐ. ܐܲܝܟܼ ܛܸܠܵܢܝܼܵܬܹ̈‌ܐ ܚܸܫܟܵܢܹ̈ܐ ܡܲܕܡܘܼܝܹܐ ܗَܘܵܘ ܡ̣ܢ ܓ̰ܘܼܢܓ̰ܵܪܹ̈ܐ. ܐܲܝܟܼ ܒܵܕܘܼܘܹ̈ܐ ܡܚܘܼܪ̈ܟ̣ـܹܐ [ܩܝܼܕܹ̈ܐ] ܗَܘܵܘ: ܡ̣ܢ ܕܗ̇ܘ ܨܵܘܡܵܐ ܩܸܫܝܵܐ܀ ܐَܟܝܼܡܠܹܗ ܦܲܓ̣ܪ̈ܲܝܗ‌ܝ ܡܼܢ ܫܵܗܲܪܬܵܐ: ܦܝܼܫܠܗَܘܿܢ ܓܲܪ̈ܡܹܐ ܘܘܲܪ̈ܝܼܕܹܐ. ܒܥܸܕܵܢܵܐ ܕܚܫܝܼܒ̣ܠܹܗ ܝܵܘܢܵܢ: ܕܗܵܐ ܐܵܕܝܼܵܐ ܒܸܬ ܚܲܪܩܵܐ ܡܕܝܼܢَܬܵܐ. ܒܝܼـܹܗ ܒܗ̇ܘ ܝܵܘܡܵܐ ܘܥܸܕܵܢܵܐ: ܦܪܝܼܩܠܵܗ̇ ܡ̣ܢ ܛܠܵܩܵܐ. ܥܲܝܘܵܬܹ̈ܐ ܘܥܲܪ̈ܦܸܠܹܐ ܡܢܵܓܸܣܬܵܢ: ܒܘܼܪܒܸܙܠܗَܘܿܢ ܘܦܪܸܩܠܗَܘܿܢ ܘܛܠܝܼܩܠܗَܘܿܢ: ܗَܘܹܐܠܹܗ ܫܸܠܝܵܐ ܘܙܝܼܕܠܵܗ̇ ܗܹܒ̣ܝܼ ܡܢܘܼܚܸܡܠܹܗ ܐܲܬܪܵܐ ܡܝܼܬܵܐ. ܠܒ̣ܝܼܫܠܹܗ ܝܵܘܢܵܢ ܚܲܫܵܐ ܓܘܼܪܵܐ: ܘܢܝܼܢܘܵܝܹ̈ܐ ܪܲܢܓܵܐ ܒܲܗܪܵܢܵܐ. ܡܲܫܚܲܕܬܵܐ ܠܟܠܵܝܗ‌ܝ ܦܝܼܫܠܵܗ̇ ܝܘܼܗَܒܸܠܬܵܐ: ܕܚܙܹܐܠܗَܘܿܢ ܠܗܵܘܵܐ ܦܨܝܼܚܠܹܗ. ܒܪܸܟܠܗَܘܿܢ ܥܲܠ ܒܘܼܪ̈ܟܵܟܲܝܗ‌ܝ ܒܨܠܘܿܬܵܐ: ܦܫܝܼܛܠܗَܘܿܢ ܐܝܼܕܵܬܲܝ̈ܗ‌ܝ ܠܫܡܲܝܵܐ܀ ܝܘܼܗَܒܸܠܗَܘܿܢ ܬܸܫܒܘܿܚܬܵ‌ܐ ܒܟܠܵܝܗܝ ܦܘܼܡܹ̈ܐ: ܘܫܵܟܲܪܬܵܐ ܒܟܠܵܝܗܝ ܠܹܫܵܢܹ̈ܐ. ܠܗ̇ܘ ܕܒܪ̈ܲܚܡܘܼܗܝ ܡܘܼܕܸܥܪܲܝܗ‌ܝ ܠܹܗ ܐܸܠܲܝܗ‌ܝ: ܚܲܝ̈ܝܲܝܗ‌ܝ ܒܲܬܝܵܒ̣ܘܼܬܵܐ܀

ܡܕܪܫܐ.

(ܒܲܒ̣ܪܝܼܟܼܘܼ ܕܲܡܥܝܼܪ).

     ܥܘܼܢܵܝܵܐ. ܚܲܢܵܢܵܐ ܘܲܡܠܸܐ ܪ̈ܲܚܡܹܐ: ܠܵܐ ܬܲܗܡܸܐ ܚܝܵܪܵܟܼ ܡܸܢܲܢ. ܘܫܲܕܲܪ ܠܲܢ ܡ̣ܢ ܒܹܝܬ̣ ܓܲܙܵܟܼ: ܚܢܵܢܵܐ ܘܪ̈ܲܚܡܹܐ ܘܦܘܼܪܩܵܢܵܐ.

     ܒܵܬܹ̈‌ܐ. ܚܢܵܢܵܟ ܚܵܐܹ̇ܢ ܠܚܲܛܵܝܹ̈ܐ: ܓܲܙܵܟܼ ܡܲܥܬܲܪ ܠܲܣܢܝܼܩܹ̈ܐ. ܒܵܟܼ ܡܵܪܝ ܢܸܥܬ̇ܪܘܼܢ ܣܵܓ̣ܿܘܿܕܲܝ̈ܟ: ܛܵܒ̣ܵܐ ܕܠܵܐ ܟܵܠܹ̇ܐ ܪ̈ܲܚܡܵܘܗ‌ܝ. ܠܵܐ ܡܵܪܝ ܬܲܣܠܸܐ ܒܵܥܘܼܬܲܢ. ܘܠܵܐ ܬܹܐܚܘܿܕܼ ܬܲܪܥܵܐ ܒܐܲܦܲܝ̈ܢ. ܐܸܠܵܐ ܥܢܝܼܢ ܐܲܝܟܼ ܕܲܡܥܵܕܲܬ̇: ܘܦܲܢܵܐ ܒܪ̈ܲܚܡܲܝܟ ܫܹܐ̈ܠܵܬܲܢ‌܀ ܡܵܪܵܐ ܛܵܒ̣̰ܵܐ ܘܒܲܣܝܼܡܵܐ: ܕܐܸܬܼܵܐ ܕܢܸܦܪܘܿܩ ܚܲܛܵܝܹ̈ܐ. ܬܵܐ ܠܐܝܼܵܠܲܢ ܘܲܦܪܘܿܩܲܝܢ: ܕܠܵܟܼ ܗَܘܼ ܡܣܵܟ̈ܝܵܢ ܢܲܦ̮ܫ̈ܵܬܲܢ. ܐܵܣ̇ܝܵܐ ܡܲܐܣܸܐ ܟܠ ܟܹܐܒ̣ܝܼ̈ܢ: ܐܲܣܵܐ ܟܹܐܒܹ̈ܐ  ܕܲܚܛܵܗܲܝ̈ܢ. ܘܣܲܡܡܵܢܹ̈ܐ ܕܡ̣ܢ ܛܲܝܒܿܘܼܬܼܵܟܼ: ܒܗܘܿܢ ܐܵܣܵܐ ܠܲܚܒ̣ܵܪ̈ܵܬܲܢ‌܀ ܠܵܟܼܘܼ ܡܫܝܼܚܵܐ ܩܵܪܹܝܢܲܢ: ܘܡܸܢܵܟܼ ܪ̈ܲܚܡܹܐ ܫܵܐ̇ܠܝܼܢܲܢ ܫܡܲܥ ܒܵܥܘܼܬܲܢ ܚܲܢܵܢܵܐ: ܘܗܲܒ̣ ܦܘܼܢܵܝܵܐ ܠܫܹܐ̈ܠܵܬܲܢ. ܢܓ̣ܘܼܠܘܼܢ ܪ̈ܲܚܡܲܝܟ ܥܲܠ ܚܵܘܒܲܝ̈ܢ: ܕܒܲܕܼܡܵܟܼ ܚܲܝܵܐ ܙܒ̣ܝܼܢܝܼܢܲܢ. ܘܐܲܫܝܼܓ̣ ܨܵܐܬ̣ܵܐ ܕܲܚܛܵܗܲܝ̈ܢ: ܒܙܘܿܦܵܐ ܪܲܒܵܐ ܕܲܚܢܵܢܵܟܼ.

ܩܪܝܢܐ؛ ܒ

ܡܘܬܒ̣ܐ؛ ܒ.

ܐܝܼܢܵܐ ܢܝܼܢܘܵܝܹ̈ܐ ܟܲܕ ܓ̰ܡܸܥܠܗَܘܿܢ: ܕܥܲܡ ܝܵܘܢܵܢ ܡܣܵܙܓܸܪܝܼ ܘܝܵܗَܒ̣ܝܼ ܠܹܗ ܠܸܒܵܐ. ܫܘܼܪܹܐܠܗَܘܿܢ ܟܠܲܝܗ‌ܝ ܡܐܸܚܕܵܕܹܐ: ܒܹܐܡܵܪܵܐ ܩܵܐ ܢܒ̣ܝܼܵܐ. ܚܕܝܼ ܥܲܡܲܢ ܝܵܐ ܒܲܪ ܡܲܬܲ‌ܝ: ܕܚܝܹܐܠܲܢ ܚܲܝܹ̈ܐ ܚܲܕܬܹ̈ܐ. ܒܡܸܨܥܵܝܘܼܬܘܼܟܼ ܡܘܼܫَܟ̰ܸܚܠܲܢ: ܠܐܲܢܹܐ ܚܲܝܹ̈ܐ ܕܬܦܝܼܩܠܗَܘܿܢ ܒܝܼـܲܢ܀ ܗܸܟ̃ ܠܹܐ ܝَܘܸܬ ܡܕܘܼܓܠܵܐ: ܕܡ̣ܢ ܚܸܫܟܵܐ ܠܚܲܝܹ̈ܐ ܩܲܡ ܡܲܕܥܸܪܸܬܠܲܢ. ܒܡܸܨܥܵܝܘܼܬܘܼܟܼ ܡܘܼܫَܟ̰ܸܚܠܲܢ: ܠܩܕܝܼܠܵܗ̇ ܕܬܝܵܒܼܘܼܬܵܐ. ܕܡ̣ܢ ܚܸܙܝܼܢܹܗ ܕܐܲܠܵܗܵܐ: ܗܹܒ̣ܝܼ ܛܵܒ̣ܬܵ‌ܐ ܝܘܼܗَܒܸܠܵܗ ܐܸܠܲܢ. ܡܘܼܕܝܼ ܒܸܬ ܡܵܛܝܼ ܗَܘܵܐ ܠܘܼܟܼ ܥܸܒ̣ܪܵܝܵܐ: ܐܸܢ ܟܠܲܢ ܛܵܠܩܲܚ ܗَܘܵܐ؟ ܡܘܿܕَܝ ܒܸܬ ܩܵܢܸܬ ܗَܘܵܐ ܟܵܪܘܿܙܵܐ: ܐܸܢ ܟܠܲܢ ܚܵܪܒܲܚ ܗَܘܵܐ؟ ܡܘܿܕܝܼ ܒܸܬ ܗܲܝܸܪ ܗَܘܵܐ ܠܘܼܟܼ ܒܲܪ ܡܲܬܲ‌ܝ: ܐܸܢ ܒܫܝܘܿܠ ܦܵܝܫܲܚ ܗَܘܵܐ ܡܘܼܫܬܸܩܹܐ؟ ܐܵܕܝܼܵܐ ܡܘܿܕܝَ ܙܵܪܲܪ ܝܼܠܵܗ̇: ܕܒܲܬܝܵܒ̣ܘܼܬܲܢ ܦܝܼܫܠܘܼܟܼ ܢܲܨܝܼܚܵܐ؟ ܩܵܐ ܡܘܿܕܝܼ ܦܫܵܡܵܐ ܝَܘܸܬ ܕܩܲܡ ܒܲܣܡܸܬ ܠܲܢ: ܟܸܢܫܲܢ ܟܠܹܗ ܫܵܟܘܿܪܘܼܟܼ ܝܼܠܹܗ؟ ܩܵܐ ܡܘܿܕܝܼ ܦܫܵܡܵܐ ܝَܘܸܬ ܥܲܠ ܕܐܵܗܵܐ: ܕܗܵܐ ܩܸܢܝܵܠܘܼܟܼ ܠܲܡܕܝܼܢَܬܲܢ؟ ܡܘܿܕܝܼ ܒܸܚܫܵܒ̣ܵܐ ܝَܘܸܬ ܝܵܐ ܢܲܨܝܼܚܵܐ: ܕܒܝܲܕ ܬܝܵܒ̣ܘܼܬܲܢ ܗَܘܹܐ ܠܘܼܟܼ ܢܲܨܝܼܚܵܐ؟ ܗܵܘܝܵܐ ܠܘܼܟܼ ܐܵܗܵܐ ܕܗَܘܹܐܠܵܗ̇: ܣܵܢܕܵܢܵܐ ܘܠܵܐ ܚܲܪܙܸܦܵܢܵܐ. ܚܘܼܫ ܡܲܠܝܵܐ ܐܵܗܵܐ ܠܚܲܕܘܼܬܘܼܟܼ: ܕܠܥܝܼܪܹ̈ܐ [ܗ.ܕ܊ ܡܲܠܲܐܟܹ̈ܐ] ܒܪܵܘܡܵܐ ܡܘܼܚܕܹܐܠܘܼܟܼ܀ ܒܐܲܪܥܵܐ ܘܵܓ̰ܸܒ ܝܼܠܵܗ̇ ܕܚܵܕܸܬܿ ܗَܘܵܐ: ܕܐܲܠܵܗܵܐ ܚܕܹܐܠܹܗ ܒܲܫܡܲܝܵܐ. ܘܒܕܐܵܗܵܐ ܚܘܼܫ ܡܓܲܪܘܸܣ ܪܸܥܝܵܢܘܼܟܼ: ܕܟܠܲܢ ܡܵܘܕܘܿܝܹܐ ܝܘܲܚ ܠܐܲܠܵܗܘܼܟܼ. ܗܲܒَ̣ܠ ܠܸܒܵܐ ܩܵܐ ܓܵܢܘܼܟܼ: ܕܐܲܬܪܵܐ ܘܡܲܠܟܹܗ ܒܸܣܓ̣ܵܕܘܼܟܼ ܝَܢܵܐ. ܚܘܿܪ ܒܨܲܒܝܼ̈ـܹܐ ܕܦܝܼܫܠܗَܘܿܢ ܡܦܘܼܨܝܹܐ: ܘܡܸܢَܕܪܸܫَ ܡܨܵܠܝܼ ܥܲܠ ܚܲܝܲܝ̈ܗ‌ܝ܀ ܓܵܫܸܩ ܒܝܵܠܹ̈ܕَܐ ܕܦܝܼܫܠܗَܘܿܢ ܢܛܝܼܪܹ̈ܐ: ܘܡܲܬܸܒ̣ ܐܝܼܕܘܼܟܼ ܥܲܠ ܪܹ̈ܫܲܝܗ‌ܝ. ܒܲܪܸܟܼ ܠܐܲܬܪܲܢ ܕܦܝܼܫܠܹܗ ܢܛܝܼܪܵܐ: ܕܙܵܝܸܕ ܒܓܵܘܹܗ ܕܘܼܟ̣ܪܵܢܘܼܟܼ. ܒܲܪܸܟܼ ܝܵܘܢܵܢ ܠܡܕܝܼܢَܬܲܢ: ܕܡ̣ܢ ܐܵܕܝܼܵܐ ܒܫܸܡܘܼܟܼ ܒܸܬ ܦܵܝܫܵܐ ܩܪܝܼܬܵ‌ܐ. ܐܸܫܬܵ‌ܐ ܫܵܒ̣ܘܿܥܹ̈ܐ ܡܐܸܚܕܵܕܹܐ: ܨܝܼܡܠܹܗ ܦܘܼܡܘܼܟܼ ܡ̣ܢ ܡܹܐܟ̣ܘܼܠܝܵܬܹ̈‌ܐ܀ ܫܪܝܼ ܨܵܘܡܘܼܟܼ ܘܡܲܥܒܸܪ ܚܲܫܘܼܟܼ: ܚܕܝܼ ܥܲܡܲܢ ܒܲܪ ܥܸܒ̣ܪ̈ܵܝܹܐ. ܕܥܹܐܕܵܐ ܓܘܼܪܵܐ ܝَܠܹܗ ܐܵܗܵܐ: ܕܒܟܠ ܕܵܪܹ̈ܐ ܕܘܼܟ̣ܪܵܢܹܗ. ܕܵܪܵܐ ܠܚܲܒ̣ܪܹܗ ܒܸܬ ܡܗܵܩܝܼ: ܥܲܠ ܚܲܫܲܢ ܘܥܲܠ ܦܘܼܪܩܵܢܲܢ. ܐܲܢܹܐ ܡܗܘܼܡܙܸܡܠܗَܘܿܢ: ܘܪܵܒܵܐ ܙܵܘܕܵܐ ܡ̣ܢ ܕܐܲܢܹܐ܀ ܠܒܲܕܲܪ ܡ̣ܢ ܡܕܝܼܢَܬܵܐ ܒܸܬܝܵܒ̣ܵܐ ܗَܘܵܐ: ܦܠܝܼܛܠܹܗ ܠܟܸܣܠܹܗ ܟܠܹܗ ܥܵܠܡܵܐ. ܘܫܲܡܥܝܼ ܗَܘܵܘ ܕܒܵܩܘܼܪܹܐ ܗَܘܵܐ: ܗ̇ܘ ܝܵܘܢܵܢ ܐܵܦ ܦܝܵܫܵܐ ܗَܘܵܐ ܡܒܘܼܩܪܵܐ. ܪܘܼܚܵܐ ܕܩܘܼܕܫܵܐ ܓܵܘ ܦܘܼܡܹܗ: ܕܪܝܼܫܠܵܗ̇ ܥܲܡܹܗ ܕܲܪܩܘܼܒ̣ܠܹܗ. ܬܪܹܝ ܦܲܪ̈ܨܘܿܦܹܐ ܗܘܼܡܙܸܡܠܵܗ̇ ܒܝܼـܹܗ. ܕܐܵܠܵܗܵܐ ܘܐܵܦ ܕܢܒ̣ܝܼܵܐ܀ ܒܸܫܡܲܥܝܵܐ ܗَܘܵܐ ܟܠܹܗ ܛܵܝܸܦܵܐ: ܠܢܒ̣ܝܼܵܐ ܟܲܕ ܒܹܐܡܵܪܵܐ ܗَܘܵܐ. ܡܒܵܕܲܠ ܬܵܟܵܟܵܐ ܕܩܲܪܐܵܐ ܘܓܵܢܹܗ: ܘܡܒܵܕܵܠ ܡܵܪܹܗ ܘܡܕܝܼܢَܬܹܗ. ܘܒܸܫܡܥܵܝܘܼܗܝ ܗَܘܵܘ ܟܲܕ ܒܸܕܪܵܫܵܐ: ܥܲܡ ܡܵܪܹܗ ܡܣܵܒܵܒ ܕܐܲܬܪܵܐ. ܗܲܪ ܡܸܢܹܗ ܒܦܝܵܫܵܐ ܗَܘܵܘ ܫܸܡܥܝܹ̈ܐ: ܚܲܒܪ̈ܵܢܹܐ ܕܬܸܪܘܲܝ ܓܹܒܵܢܹ̈ܐ. ܝܵܐ ܣܢܹܐܓܼܪܵܐ [ܡܘܼܗܵܡܝܼ] ܥܸܒ̣ܪܵܝܵܐ: ܕܩܵܐ ܬܸܪܘܲܝ ܓܲܒܹ̈ܐ ܡܗܲܡܙܘܼܡܹܐ ܗَܘܵܐ. ܕܲܣܬܹ̈‌ܐ ܕܲܣܬܹ̈‌ܐ ܒܸܓ̰ܡܵܥܝܵܐ ܝܼܗَܘܵܘ. ܠܸܫܡܲܥܝܵܐ ܩܵܠܹܗ ܕܢܒ̣ܝܼܵܐ. ܒܸܫܡܲܥܝܐ ܗَܘܵܘ ܕܒܹܐܡܵܪܵܐ ܗَܘܵܐ: ܒܠܸܫܵܢܲܝܗܝ ܩܵܕَܡ ܐܲܠܵܗܵܐ. ܕܦܫܸܡܠܹܗ ܘܛܠܝܼܒܠܹܗ ܡܵܘܬܵܐ: ܥܲܠ ܡܲܒܪܲܙܬܵܐ ܕܒܸܪܵܐ ܕܩܲܪܐܵܐ. ܕܥܸܪܵܗ̇ ܪܘܼܚܵܐ ܕܩܘܼܕܫܵܐ: ܕܓܵܘ ܦܘܼܡܹܗ ܘܦܠܝܼܫܠܵܗ̇ ܕܲܪܩܘܼܒ̣ܠܘܼܗܝ. ܒܠܸܫܵܢܹܗ ܦܠܝܼܫܠܵܗ̇ ܥܲܡܹܗ: ܡ̣ܢ ܓܹܢَܒ ܕܦܲܪܨܘܿܦܹܗ ܕܐܲܠܵܗܵܐ. ܫܡܸܥܠܗَܘܿܢ ܡܸܢܹܗ ܟܲܕ ܒܸܕܪܵܫܵܐ: ܐܲܠܵܗܵܐ ܒܘܼܬ ܚܵܬܸܪ ܕܐܲܬܪܵܐ. ܐܸܢ ܐܲܢَܬ ܝܵܘܢܵܢ ܦܫܸܡܠܘܼܟܼ: ܥܲܠ ܕܗ̇ܘ ܬܵܟܵܟܵܐ ܕܩܲܪܐܵܐ ܙܲܒܘܼܢ. ܕܠܵܐ ܟܟ̰ܸܚܠܘܼܟܼ ܒܝܼـܹܗ ܘܠܵܐ ܓܘܼܪܘܸܣܠܘܼܟܼ: ܕܒܠܲܝܠܹܐ ܡܘܼܓ̰ܝܸܢܹܐ ܘܟ̰ܡܸܟ̰ܠܹܗ. ܒܗ̇ܘ ܒܸܪܵܐ ܕܩܲܪܐܵܐ ܕܒܪܝܼܙܠܹܗ: ܚܘܼܫ ܦܵܐܸܫ ܡܘܼܕܡܝܼܵܐ ܛܵܝܸܦܵܐ ܕܚܝܹܐܠܹܗ. ܬܵܟܵܟܵܐ ܚܘܼܫ ܗܵܘܹܐ ܐܸܠܘܼܟܼ ܓܘܼܪܵܐ ܘܝَܠܘܿܦ ܡܸܢܹܗ ܦܲܪܡܵܝܬܵ‌ܐ. ܒܬܵܟܵܟܵܐ ܙܲܒܘܼܢ ܫܩܘܿܠܘܼܟܼ ܢܸܣܝܵـܢܵܐ: ܘܝَܕܸܥ ܡܘܿܕܝܼ ܝَܠܹܗ ܚܘܼܒܹܗ ܕܡܪܲܚܡܵܢܵܐ. ܐܲܢَܬ ܒܸܚܣܵܟ̣ܵܐ ܝَܘܸܬ ܥܲܠ ܩܲܪܐܵܐ: ܘܐܵܢܵܐ ܡܪܵܚܘܿܡܹܐ ܝَܘܸܢ ܥܲܠ ܛܵܝܸܦܵܐ ܛܸܠܵܢܝܼܬܘܼܟܼ ܗܵܘܝܵܐ ܠܘܼܟܼ ܛܘܼܦ̮ܣܵܐ: ܠܐܵܗܵܐ ܡܕܝܼܢَܬܵܐ ܕܬܵܘܒܵܟܵܪܹ̈ܐ. ܩܘܼܦܪ̈ܵܢܹܐ ܒܐܲܪܥܵܐ ܡܲܩܘܘܼܝܹܐ ܝَܘܸܬ: ܘܡܕܝܼܢܵܬܹ̈‌ܐ ܒܸܥܩܵܪܵܐ ܝَܘܸܬ. ܬܲܟܵܟܵܐ ܕܩܲܪܐܵܐ ܒܸܢܛܵܪܵܐ ܝَܘܸܬ ܘܐܲܬܪܵܐ ܓܘܼܪܵܐ ܡܲܬܠܘܼܚܹܐ ܝَܘܸܬ܀ ܒܲܣ ܐܲܝܟܵܐ ܝܠܵܗ̇ ܟܹܐܢܘܼܬܘܼܟܼ ܝܵܐ ܝܵܘܢܵܢ: ܕܐܲܬܪܵܐ ܠܩܲܪܐܵܐ ܠܹܐ ܝَܘܸܬ ܡܲܕܡܘܼܝܹܐ. ܠܟܸܣ ܛܸܠܵܢܝܼܬܵ‌ܐ ܛܲܝܒܘܼܬܘܼܟܼ: ܘܠܟܸܣ ܡܕܝܼܢَܬܵܐ ܩܸܫܝܘܼܬܘܼܟܼ. ܩܲܪܐܵܐ ܕܝܑܼܠܹܗ ܡܹܐܟ̣ܘܼܠܬܵ‌ܐ: ܒܘܼܫ ܓܘܼܪܵܐ ܝܼܠܹܗ ܩܵܬܘܼܟܼ ܡ̣ܢ ܐܲܟ̣ܠܵܢܵܐ. ܬܵܟܵܟܵܐ ܕܡܘܼܓ̰ـܝܸܢܵܐ ܝܼܠܹܗ ܠܸܚܪܵܒ̣ܵܐ: ܒܘܼܫ ܙܵܘܕܵܐ ܝَܠܹܗ ܐܸܠܘܼܟܼ ܡ̣ܢ ܬܲܝܵܒ̣̈ـܹܐ [ܬܵܘܒܵܟܵܪܹ̈ܐ]. ܛܲܪ̈ܦܹܐ ܕܩܲܪܐܵܐ ܡܲܛܐܘܼܒ̣ـܹܐ ܝَܘܸܬ: ܒܘܼܫ ܡ̣ܢ ܒܢܲܝܢܵܫ̈ܵܐ ܡܗܲܡܙܸܡܵܢܹ̈ܐ. ܦܸܩܚܹ̈ܐ ܘܒܸܪ̈ܛܘܼܡܹܐ ܕܬܵܟܵܟܵܐ: ܡ̣ܢ ܨܲܒܝܼ̈ـܹܐ ܘܝܲܠܘܿܕܹ̈ܐ. ܫܡܸܥܠܹܗ ܛܵܝܸܦܵܐ ܘܒܚܲܕَ ܩܵܠܵܐ: ܝܘܼܗَܒܸܠܗَܘܿܢ ܬܸܫܒܘܿܚܬܵܐ ܠܐܲܠܵܗܵܐ. ܣܵܒܵܒ ܡ̣ܢ ܓܹܢَܒܲܝܗ‌ܝ ܒܸܕܝܵـܢܵܐ ܝܗَܘܵܐ: ܘܒܘܼܬ ܚܵܬܸܪܲܝܗ‌ܝ ܦܠܵܫܵܐ ܝܗَܘܵܐ܀ ܡܸܨܥܵܝܵܐ ܥܒ̣ܝܼܕܠܹܗ ܠܢܒ̣ܝܼܵܐ: ܕܕܲܥܘܵܟ̰ܝܼܘܼܗ‌ܝ ܓܵܘ ܕܝܼܘܵܢ: ܡܲܓ̣ܠܘܼܒܹܐ ܝܼܗَܘܵܐ ܐܵܦ ܐܸܢ ܕܠܹܐ ܒܲܥܝܼ ܗَܘܵܐ. ܐܲܠܵܗܵܐ ܡܕܘܼܓܸܠܹܗ ܒܗܹܡܸܙܡܵܢ̈ܘܼܗܝ ܩܵܐ ܕܒܢܲܝ̈ ܐܲܬܪܵܐ ܦܲܪܩܝܼ ܗَܘܵܘ. ܘܝܵܘܢܵܢ ܗܘܹܐܠܹܗ ܒܸܛܠܵܒܵܐ: ܡ̣ܢ ܐܲܠܵܗܵܐ ܕܠܵܐ ܡܕܵܓܸܠ ܗَܘܵܐ. ܠܹܐ ܦܵܝܫܝܼ ܡܘܼܥܝܸܩܹ̈ܐ ܙܲܕܝܼܩܹ̈ܐ: ܒܝܲܕ ܬܝܵܒ̣ܘܼܬܵܐ ܕܥܵܘܵܠܹ̈ܐ. ܐܵܦ ܝܵܘܢܵܢ ܠܵܐ ܦܫܝܼܡܠܹܗ: ܒܲܬܝܵܒ̣ܘܼܬܵܐ ܕܚܲܛܵܝܹ̈ܐ. ܐܲܢܹܐ ܗܲܓ̰ܵܬܹ̈‌ܐ ܦܝܼܫܵܐ ܝܗَܘܵܘ ܡܘܼܪ̈ܝܸܙܹܐ: ܩܵܐ ܕܫܲܡܥܝܼ ܗَܘܵܐ ܛܵܝܸܦܵܐ ܦܘܼܪܩܵܢܘܼܗܝ. ܠܹܐ ܝܗَܘܵܐ ܚܫܝܼܚܬܵ‌ܐ ܕܫܵܢܝܼ ܗَܘܵܐ: ܡ̣ܢ ܠܟܸܣܠܲܝܗܝ ܕܠܵܐ ܡܲܦܪܲܡܬܵ‌ܐ܀ ܟܲܕ ܠܵܐ ܒܝܼܕܲܥܝܵܐ ܬܲܝܵܒܹ̈ܐ: ܕܵܐܟ̣ܝܼ ܡܩܘܼܘܸܡܠܗَܘܿܢ ܐܲܢܹܐ ܗܵܓ̰ܵܬܹ̈‌ܐ. ܘܕܵܐܟ̣ܝܼ ܟܪܸܒܠܵܗ̇ ܟܹܐܢܘܼܬܵܐ: ܘܕܵܐܟ̣ܝܼ ܡܘܼܚܝܼܠܵܗ̇ ܬܝܵܒ̣ܘܼܬܵܐ. ܗَܘܵܘ ܠܗَܘܿܢ ܗܲܓ̰ܵܬܹ̈‌ܐ ܒܹܝܦܲܠܓܵܐ: ܩܵܐ ܕܝܲܠܦܵܐ ܝܵܠܕَܘܼܬܵܐ. ܡܘܼܟܪܸܙܠܹܗ ܝܵܘܢܵܢ ܕܡܲܚܙܝܼ ܗَܘܵܐ: ܟܡܵܐ ܟܪܝܼܒܬܵ‌ܐ ܝَܠܵܗ̇ ܟܹܐܢܘܼܬܵܐ܀ ܒܸܪܵܐ ܕܩܲܪܐܵܐ ܡܲܩܘܘܼܚܹܐ ܝܼܗَܘܵܐ: ܕܟܡܵܐ ܡܪܘܼܚܸܡܠܵܗ̇ ܛܲܝܒܘܼܬܵܐ. ܗ̇ܘ ܛܵܝܸܦܵܐ ܕܥܲܠ ܓܹܢَܒܵܐ ܕܝܵܘܢܵܢ: ܒܩܲܘܲܚܬܵ‌ܐ ܝܘܼܗَܒܸܠܗَܘܿܢ ܬܸܫܒܘܿܚܬܵ‌ܐ. ܥܲܠ ܕܫܡܸܥܠܗَܘܿܢ ܒܢܲܬ̈ܝܵܬܲܝܗ‌ܝ: ܘܥܲܠ ܟܠ ܕܚܙܹܐܠܗَܘܿܢ ܒܥܲܝܢܲܝ̈ܗ‌ܝ. ܘܒܢܲܬ̈ܝܵܬܲܝܗ‌ܝ ܫܡܸܥܠܗَܘܿܢ ܠܸܕܪܵܫܵܐ: ܒܥܲܝܢܲܝ̈ܗ‌ܝ ܚܙܹܐܠܗَܘܿܢ ܠܬܵܟܵܟܵܐ܀ ܒܩܲܪܐܵܐ ܕܡܘܼܓ̰ܝܸܢܹܗ ܡܢܵܓܸܣܬܲܢ: ܚܙܹܐܠܗَܘܿܢ ܢܝܼܫܲܢܩܵܐ ܕܠܵܐ ܒܸܟܝܵܢܵܐ. ܒܒܪܵܙܬܹܗ ܙܵܘܕܵܐ ܝَܠܝܼܦܠܗَܘܿܢ: ܠܫܵܦܵܩܲܬ ܕܙܝܼܕܠܵܗ̇ ܡ̣ܢ ܟܝܘܼܠܵܐ. ܢܝܼܢܘܵܝܹ̈ܐ ܒܚܘܼܒܵܐ ܚܛܸܦܠܗَܘܿܢ: ܠܟܵܪܘܿܙܵܐ ܒܲܪ ܥܸܒ̣ܪ̈ܵܝܹܐ. ܥܲܠ ܐܝܼܕܵܬܲܝ̈ܗ‌ܝ ܦܝܼܫܠܹܗ ܡܙܘܼܝܸܚܵܐ: ܘܐܲܝܟܼ ܡܲܠܟܵܐ ܥܒ̣ܝܼܪܹܗ ܒܐܝܼܩܵܪܵܐ܀ ܒܕܘܼܟܬܵ‌ܐ ܕܝَܼܬܝܼܒ̣ܵܐ ܗَܘܵܐ ܣܓܼܝܼܕܠܗَܘܿܢ ܐܸܠܹܗ ܟܸܢܫܹ̈ܐ ܟܸܢܫܹ̈ܐ ܕܬܲܝܵܒ̣̈ـܹܐ ܡܘܼܐَܬܹܐ ܠܗَܘܿܢ ܦܲܫܟܵܫܲܝ̈ܗ‌ܝ: ܡܘܼܩܪܸܒ̣ܠܗَܘܿܢ ܐܸܠܹܗ ܡܲܥܣܵܪ̈ܲܝܗ‌ܝ. ܫܩܝܼܠܗَܘܿܢ ܘܝܘܼܗَܒܸܠܗَܘܿܢ ܢܸܕܪ̈ܲܝܗ‌ܝ ܝܼܗَܘܵܘ ܕܢܕܝܼܪ̈ܲܝܗ‌ܝ ܒܐܘܼܠܨܵܢܲܝ̈ܗ‌ܝ. ܓ̰ܘܵܢܩܹ̈ܐ ܡܘܼܩܪܸܒ̣ܠܗَܘܿܢ ܣܲܗܪ̈ܘܼܢܲܝܗ‌ܝ. ܘܥܠܲܝܡܹ̈ܐ ܝܘܼܗَܒܸܠܗَܘܿܢ ܬܵܘܩܲܝ̈ܗ‌ܝ܀ ܘܪܹ̈ܫܵܢܹܐ ܝܘܼܗَܒܸܠܗَܘܿܢ ܬܵܓ̰ܵܝܗ̈‌ܝ: ܟܵܡܵܪ̈ܲܝܗ‌ܝ ܥܲܡ ܐَܣܲܪ̈ ܚܵܨܲܝܗ‌ܝ. ܦܬܝܼܚܠܹܗ ܡܲܠܟܵܐ ܚܲܙܢܹܗ ܓܘܼܪܵܐ: ܘܡܘܼܩܪܸܒ̣ܠܹܗ ܐܸܠܹܗ ܛܘܼܒ̣ܵܐ ܓܘܼܪܵܐ. ܡ̣ܢ ܟܠܲܝܗ‌ܝ ܦܘܼܡܹ̈ܐ ܦܝܼܫܠܹܗ ܡܫܘܼܒܚܵܐ: ܐܲܠܵܗܵܐ ܐܲܝܟܼ ܡܪܲܚܡܵܢܵܐ. ܡ̣ܢ ܟܠ ܦܘܼܡܹ̈ܐ ܦܝܼܫܠܹܗ ܡܒܘܼܪܟ̣ܵܐ: ܐܵܦ ܝܵܘܢܵܢ ܐܲܝܟܼ ܟܵܪܘܿܙܵܐ܀ ܥܒ̣ܝܼܪܵܗ̇ ܡܲܪܟܲܒ̣ܬܵܐ ܘܫܩܝܼܠܵܗ̇: ܦܲܫܟܵܫܹ̈ܐ ܘܢܸܕܪܹ̈ܐ ܕܝܘܼܗَܒܸܠܗَܘܿܢ. ܘܒܐܝܼܩܵܪܵܐ ܓܘܼܪܵܐ ܐܵܣܸܩ: ܠܗ̇‌ܝ ܐܲܪܥܵܐ ܕܐَܬܹܐܠܹܗ ܡܸܢܵܗ̇. ܒܙܘܼܝܵܚܵܐ ܣܸܠَܩܠܹܗ ܝܵܘܢܵܢ: ܐܲܝܟܼ ܡܲܠܟܵܐ ܥܲܠ ܡܲܪܟܲܒ̣ܬܵ‌ܐ. ܐܲܝܟܼ ܡܲܠܟܵܐ ܘܒܪܘܿܢܹܗ ܕܡܲܠܟܵܐ: ܦܝܵܫܵܐ ܗَܘܵܐ ܡܙܘܼܝܸܚܵܐ ܒܲܪ ܡܲܬܲܝ‌. ܢܘܼܢܵܐ ܒܝܵܡܵܐ ܛܥܝܼܢܬܹܗ ܗَܘܵܐ: ܘܒܓܵܘ ܒܸܪܙܵܐ ܡܲܪܟܲܒ̣ܬܵ‌ܐ: ܬܚܘܿܬ ܐܲܪܥܵܐ ܦܝܼܫܠܹܗ ܡܘܼܟܸܦܵܐ: ܘܠܥܘܿܠܘܿܠ ܡܸܢܘܿܗ̇ ܦܝܼܫܠܹܗ ܡܘܼܪܡܵܐ. ܦܸܫܟܵܐ ܒܝܵܡܵܐ ܩܲܡ ܡܲܢܟ̣ܸܣܵܐ ܠܹܗ: ܡܕܝܼܢَܬܵܐ ܒܒܸܪܙܵܐ ܩܲܡ ܡܩܲܠܣܵܐ ܠܹܗ. ܢܘܼܢܹ̈ܐ ܩܵܕَܡܘܼܗܝ ܒܹܐܬܵܝܵܐ ܗَܘܵܐ: ܒܓܵܘ ܝܵܡܵܐ ܟܲܕ ܒܸܥܪܵܩܵܐ ܗَܘܵܐ. ܘܥܲܠ ܒܸܪܙܵܐ ܪܵܟܵܒ̣̈ـܹܐ: ܡܲܦܫܘܼܛܘܼܗܝ ܝܼܗَܘܵܘ. ܟܲܕ ܒܸܣܵܠَܩܵܐ ܝܼܗܘܵܐ. ܟ̰ܠܝܼܦܠܹܗ ܠܝܵܡܵܐ ܟܲܕ ܒܸܥܪܵܩܵܐ ܝܼܗَܘܵܐ: ܫܥܝܼܫܠܹܗ ܒܸܪܙܵܐ ܟܲܕ ܒܸܣܵܠَܩܵܐ ܝܼܗَܘܵܐ. ܪܥܝܼܫܠܗَܘܿܢ ܒܝܼـܹܗ ܢܘܼܢܹ̈ܐ ܕܝܵܡܵܐ ܘܒܢܲܝܢܵܫ̈ܵܐ ܕܥܲܠ ܒܸܪܙܵܐ. ܗܘܹܐܠܹܗ ܒܘܼܪܵܢ ܒܥܘܼܡܩܵܐ ܕܝܵܡܵܐ: ܘܒܐܲܬܪܵܐ ܫܝܲܥܫܵܐ ܓܘܼܪܵܐ܀ ܒܐܘܼܪܚܵܐ ܬܲܠܝܼܠܬܵ‌ܐ ܒܸܨܠܵܝܵܐ ܗَܘܵܐ: ܘܒܒܸܪܙܵܐ ܒܸܣܵܠَܩܵܐ ܗَܘܵܐ ܙܕܸܥܠܗَܘܿܢ ܡܸܢܹܗ ܐܵܦ ܗܲܝܘܵܢܹ̈ܐ: ܡܲܙܕܸܥܝܵـܢܹ̈ܐ ܕܓܵܘ ܝܵܡܵܐ. ܡܕܝܼܢܵܬܹ̈‌ܐ ܚܲܝܠܵܢܹ̈ܐ ܘܙܲܪ̈ܒܵܢܹܐ: ܝܘܼܗَܒܸܠܗَܘܿܢ ܕܘܼܟܵܐ ܟܲܕ ܒܸܣܵܠَܩܵܐ ܗَܘܵܐ. ܢܘܼܢܵܐ ܕܩܲܡ ܒܲܠܲܥܠܹܗ ܓܘܼܪܬܵܐ ܗَܘܵܐ: ܘܡܲܠܟܵܐ ܕܩܲܡ ܫܲܡܸܥܠܹܗ ܙܲܪܒܵܢܵܐ ܗَܘܵܐ. ܢܘܼܢܵܐ ܫܒ̣ܝܼܠܵܐ [ܐܘܼܪܚܵܐ] ܗܘܼܕܸܪܹܗ ܐܸܠܹܗ: ܘܡܲܠܟܵܐ ܐܘܼܪܚܵܐ ܡܘܼܫܘܹܐ ܠܹܗ ܩܵܬܹܗ. ܠܢܘܼܢܹܗ ܢܘܼܢܹ̈ܐ ܡܘܼܦܫܸܛܠܗَܘܿܢ: ܐܵܦ ܠܡܲܪܟܲܒ̣ܬܹܗ ܪ̈ܵܟܵܒ̣ـܹܐ. ܡܲܠܟܵܐ ܕܢܝܼܢܘܹ̈ܐ ܐܝܼܙܓܲܕܹ̈ܐ: ܒܡܲܠܝܵܙܬܵܐ ܡܫܘܼܕܸܪܹܗ ܩܵܕَܡܘܼܗܝ. ܩܵܐ ܕܗܲܕܪܝܼ ܩܵܐ ܢܒ̣ܝܼܵܐ: ܡܵܢܙܝܼܠܹ̈ܐ ܕܫܵܪܹܐ ܒܝܼـܲܝܗ‌ܝ܀ ܐܲܠܵܗܵܐ ܡܘܼܚܙܹܐ ܠܹܗ ܐܘܼܪܚܵܐ: ܠܢܘܼܢܵܐ ܕܕܵܐܟ̣ܝܼ ܐܵܙܸܠ ܗَܘܵܐ. ܡܲܠܟܵܐ ܙܹܐ ܡܘܼܚܙܹܐ ܠܹܗ ܐܘܼܪܚܵܐ: ܠܢܒ̣ܝܼܵܐ ܕܕܵܐܟ̣ܝܼ ܐܵܣܸܩ ܗَܘܵܐ. ܒܐܝܼܩܵܪܵܐ ܘܒܦܲܫܟܵܫܹ̈ܐ ܒܸܣܵܠَܩܵܐ ܗَܘܵܐ ܒܙܘܼܝܵܚܵܐ. ܟܠ ܐَܢܵܫܵܐ ܠܐܘܼܪܚܘܼܗܝ ܦܠܵܛܵܐ ܗَܘܵܐ: ܘܒܙܕܘܼܥܬܵ‌ܐ ܐܸܠܹܗ ܒܸܣܓ̣ܵܕܵܐ ܗَܘܵܐ܀ ܡܲܠܟܹ̈ܐ ܡܸܢܹܗ ܪܓܝܼܕܠܗَܘܿܢ: ܕܗ̇ܘ ܟܵܪܘܿܙܵܐ ܙܲܪܒܵܢܵܐ. ܒܐܝܼܩܵܪܵܐ ܓܘܼܪܵܐ ܬܦܝܼܩܠܘܿܢ ܒܝܼـܹܗ: ܡ̣ܢ ܙܕܘܼܥܬܵ‌ܐ ܕܟܵܪܘܿܙܘܼܬܹܗ. ܟܠ ܐܲܬܪܵܐ ܕܚܙܹܐܠܹܗ ܙܕܸܥܠܹܗ: ܕܡܘܼܡܟܸܢ ܒܸܬ ܥܵܒܸܪ ܘܡܲܬܠܸܚܠܹܗ: ܒܲܡܕܝܼܢܵܬܹ̈‌ܐ ܦܝܼܫܠܹܗ ܡܝܘܼܩܪܵܐ: ܕܗَܘܹܐܠܵܗ̇ ܢܝܼܢܘܹܐ ܚܲܕَ ܛܘܼܦ̮ܣܵܐ. ܗَܘܹܐܠܵܗ̇ ܛܘܼܦ̮ܣܵܐ ܓܵܘ ܒܪܝܼܬܵܐ: ܕܒܝܼܵܗ̇ ܦܝܼܫܠܵܗ̇ ܚܙܝܼܬܵ‌ܐ ܟܹܐܢܘܼܬܵܐ܀ ܟܲܕ ܝܵܘܢܵܢ ܡܛܹܐܠܹܗ ܠܐܲܬܪܹܗ: ܠܬܸܚܘܼܒ ܕܒܢܲܝ̈ ܛܵܝܸܦܘܼܗܝ. ܡܦܘܼܪܦܸܠܹܗ ܒܡܲܦܫܸܛܵܢܘܼ̈ܗܝ: ܕܒܲܫܠܵܡܵܐ ܕܲܥܪܝܼ ܡܸܢܹܗ. ܕܒܸܢܟ̣ܵܦܵܐ ܝܼܗَܘܵܐ ܕܡܘܼܡܟܸܢ ܒܸܬ ܚܲܙܝܼ: ܠܚܲܢܦܘܼܬܵܐ ܕܒܢܲܝ̈ ܛܵܝܸܦܘܼܗܝ. ܕܠܵܐ ܥܵܒ̣ܪ̈ܝܼ ܗَܘܵܘ ܬܲܝܵܒܹ̈ܐ: ܘܚܵܪܒ̣ܝܼ ܗَܘܵܘ ܓܵܘ ܥܵܘܵܠܹ̈ܐ. ܘܕܠܵܐ ܥܵܒ̣ܪ̈ܝܼ ܡ̣ܢ ܛܵܝܸܦܹ̈ܐ: ܘܝܵܠܦܝܼ ܥܵܘܠܵܐ ܡ̣ܢ ܛܵܝܸܦܘܼܗܝ. ܒܸܙܕܲܥܝܵܐ ܗَܘܵܐ ܕܡܘܼܡܟܸܢ ܒܸܬ ܛܵܫܝܼ ܗَܘܵܐ ܠܡܲܪ̈ܥܹܐ ܕܡܸܢܲܝܗ‌ܝ ܦܝܼܫܠܗَܘܿܢ ܡܒܘܼܣܡܹܐ ܘܚܬܝܼܡܹ̈ܐ. ܒܸܛܥܵܢܵܐ ܗَܘܵܐ ܡܸܢܬܵ‌ܐ: ܕܡܲܦܫܸܛܵܢܘܼ̈ܗܝ ܕܐَܬܹܠܗَܘܿܢ ܥܲܡܹܗ܀ ܢܫܝܼܩܝܼܠܹܗ ܒܣܵܘܓܘܼܠܘܼܬܵܐ: ܒܘܼܪܟ̣ܝܼܠܹܗ ܒܨܸܦܝܘܼܬܵܐ. ܡܩܘܼܒܸܠܗَܘܿܢ ܡܸܢܹܗ ܦܫܝܼܛܹ̈ܐ: ܦܲܪܦܲܠܬܵ‌ܐ ܕܡܘܼܩܪܸܒ̣ܠܹܗ ܩܵܕَܡܲܝܗ‌ܝ. ܦܪܝܼܫܠܗَܘܿܢ ܡܸܢܹܗ ܘܣܓܸܕܠܗَܘܿܢ ܐܸܠܹܗ: ܘܩܘܼܒܸܠܗَܘܿܢ ܡܸܢܹܗ ܟܠ ܒܘܼܪ̈ܟܵܬܹ‌ܐ. ܦܫܸܡܠܹܗ ܟܠܹܗ ܟܸܢܫܲܝ̈ܗ‌ܝ: ܘܦܪܝܼܫܠܗَܘܿܢ ܡܸܢܹܗ ܟܲܕ ܒܸܟ̣ܝܵܐ. ܛܥܝܼܢܘܿܢ ܡܸܢܬܹܗ ܟܠܵܝܗ‌ܝ: ܟܲܕ ܒܹܐَܡܵܪܵܐ ܗَܘܵܘ ܒܹܝܠܲܝܗ‌ܝ. ܐܵܗܵܐ ܢܒ̣ܝܼܵܐ ܛܘܼܒ̣ܵܢܵܐ: ܒܐܲܬܪܲܢ ܙܵܝܸܕ ܕܘܼܟ̣ܪܵܢܹܗ. ܕܗَܘܹܐܠܹܗ ܩܵܬܲܢ ܥܸܠܬܵ‌ܐ ܕܚܲܝܹ̈ܐ: ܚܲܕَ ܗܵܕܟ̣ܵܐ ܦܝܼܫܠܹܗ ܡܫܘܼܒܚܵܐ. ܟܲܕ ܐܲܢܹܐ ܐَܡܝܼܪܘܼܢ ܬܵܡܵܐ: ܩܠܸܒܠܗَܘܿܢ ܘܕܝܼܪܘܼܢ ܒܸܦܨܵܚܵܐ. ܐَܡܝܼܪܘܼܢ ܟܠܵܝܗ‌ܝ ܒܸܦܪܲܫܬܲܝܗ‌ܝ: ܟܲܕ ܒܸܚܕܵܝܵܐ ܒܬܪܘܿܨܘܼܬܵܐ. ܐܸܠܹܗ ܬܸܫܒܘܿܚܬܵ‌ܐ ܠܐܲܠܵܗܵܐ ܕܠܛܵܝܸܦܵܐ ܡܘܼܢܚܸܦܠܹܗ. ܕܩܘܼܕܸܡܠܹܗ ܘܝܘܼܗَܒܸܠܹܗ ܓܸܪܵܘ: ܠܦܘܼܪܩܵܢܵܐ ܓܘܼܪܵܐ ܕܲܥܬܝܼܕ. ܡ̣ܢ ܚܲܛܵܝܹ̈ܐ ܦܝܼܫܠܹܗ ܡܘܼܟܫܸܛܵܐ: ܩܵܠܹ̈ܐ ܕܫܘܼܒ̣ܚܵܐ ܡܘܼܣܸܩܠܗَܘܿܢ ܐܸܠܹܗ. ܡ̣ܢ ܛܲܡܐܸ̈ܐ ܕܬܘܼܘܸܒܠܗَܘܿܢ ܘܦܸܫܠܗَܘܼܢ ܕܘܼܟ̣ܝܹ̈ܐ: ܦܹܐܪܹ̈ܐ ܕܸܟ̣ܝܹ̈ܐ ܡܘܼܦܫܸܛܠܗَܘܿܢ ܐܸܠܹܗ. ܡ̣ܢ ܪܸ̈ܥܝܵܢܹܐ ܚܒ̣ܝܼܛܹ̈ܐ: ܫܘܼܒ̣ܚܵܐ ܨܸܦܝܵܐ ܡܘܼܩܪܸܒ̣ܠܗَܘܿܢ ܐܸܠܹܗ. ܐܵܦ ܟܝܼܢܵـܢܹ̈ܐ ܘܟܪ̈ܝܼܒܹܐ ܘܫܘܼܟܸܪܘܿܢ ܒܘܼܬ ܣܵܙܓܵܪܬܲܝܗ‌ܝ: ܛܥܝܼܢܘܿܢ ܡܝܼܢܬܵ‌ܐ ܐܵܦ ܛܲܡܲܥܟܵܪܹ̈ܐ: ܕܡܘܼܠܦܝܼܠܹܗ ܥܒ̣ܵܕܵܐ ܐܸܪ̈ܘܵܢܹܐ. ܫܘܼܒܸܚܠܗَܘܿܢ ܐܵܦ ܐܵܣܘܿܛܹ̈ܐ: ܕܝَܠܸܦܠܗَܘܿܢ ܘܡܘܼܙܝܸܕ ܠܗَܘܿܢ ܨܵܘܡܵܐ ܫܘܼܟܸܪܘܿܢ ܐܵܦ ܚܵܛܘܿܦܹ̈ܐ: ܕܕܥܸܪܘܿܢ ܘܗَܘܵܘ ܠܗَܘܿܢ ܝܵܗَܒ̣ܵܢܹ̈ܐ. ܒܘܼܪܸܟ̣ܠܗَܘܿܢ ܙܲܢܵܝܹ̈ܐ ܙܵܘܕܵܐ: ܕܦܝܼܫܠܗَܘܿܢ ܚܹܐܪܹ̈ܐ ܡ̣ܢ ܠܵܘܛܬܵ‌ܐ. ܛܥܸܢܘܿܢ ܡܸܢܬܹܗ ܩܲܫܕܸܪ̈ܵܢܹܐ: ܕܫܲܪܬ ܕܟܹܐܢܹ̈ܐ ܢܛܝܼܪܘܿܢ. ܫܘܼܟܸܪܹܗ ܐܸܠܹܗ ܐܵܦ ܠܲܝܵܛܵܐ. ܕܝَܠܸܦܠܹܗ ܦܘܼܡܹܗ ܒܘܼܪ̈ܟܵܬܹܐ. ܛܥܸܢܹܗ ܡܝܼܢܬܹܗ ܝܲܬܘܿܡܵܐ: ܕܗܘܹܐܠܹܗ ܐܲܝܟܼ ܩܲܝܘܼܡܵܐ. ܣܓܸܕܠܵܗ̇ ܐܸܠܹܗ ܐܵܦ ܐܲܪܡܲܠܬܵ‌ܐ: ܕܫܩܝܼܠܹܗ ܙܠܘܼܡܝܵܗ̇ ܒܟܵܪܵܡܘܼܗܝ. ܘܫܘܼܟܸܪܹܗ ܐܵܦ ܓܹܒ̣ܵܝܵܐ: ܕܡܠܹܐܠܹܗ ܣܵܠܹܗ ܒܘܼܪ̈ܟܵܬܵ‌ܐ܀ ܛܥܸܢܹܗ ܡܝܼܢܬܹܗ ܐܵܦ ܐܲܟܵܪܵܐ: ܒܘܼܫ ܙܵܘܕܵܐ ܐَܣܝܼܪܹܗ ܦܬܵܢܹܗ. ܕܦܝܼܫܠܹܗ ܒܘܼܪܟ̣ܵܐ ܒܡܲܗܨܘܼ̈ܠܹܐ: ܘܡܸܠܝܵܗ݁ ܠܹܗ ܟܵܪَܣܹܗ ܣܒܸܥܬܵ‌ܐ. ܫܘܼܟܸܪܹܗ ܐܵܦ ܦܲܠܵܚܵܐ ܘܡܵܪܹܐ ܟܲܪܡܵܐ ܡܫܘܼܒܸܚܠܹܗ. ܛܥܸܢܘܿܢ ܡܝܼܢܬܵ‌ܐ ܡܵܪ̈ܲܝ ܕܵܪ̈ܵܬܹܐ: ܕܫܪܹܐ ܠܹܗ ܫܲܝܢܵܐ ܒܕܵܪ̈ܵܬܲܝܗ‌ܝ: ܫܘܼܟܸܪܘܿܢ ܒܓ̰ܡܵܝܵܬܲܝ̈ܗ‌ܝ: ܕܣܦܝܼܩܹ̈ܐ ܗَܘܵܘ ܒܵܬܵܝܗ̈‌ܝ. ܛܥܸܢܘܿܢ ܡܸܢܬܹܗ ܨܵܢܥܲܬܟܵܪܹ̈ܐ: ܕܦܬܝܼܚܠܗَܘܿܢ ܨܵܢܥܲܬܲܝܗ‌ܝ ܘܩܢܹܐܠܗَܘܿܢ. ܫܘܼܟܸܪܘܿܢ  ܐܵܦ ܐܲܒ̣ܵܗܹ̈ܐ: ܕܙܝܼܕܠܵܗ̇ ܗܹܒ̣ܝܼ ܠܒܢ̈ܘܿܢܲܝܗ‌ܝ: ܛܥܸܢܘܿܢ ܡܝܼܢܬܹܗ  ܐܵܦ ܡܲܠܟܹ̈ܐ: ܕܚܙܵܝܠܗَܘܿܢ ܕܐܲܬܪܵܐ ܡܫܘܼܝܢܸܢܸܗ܀ ܫܩܝܼܠܗَܘܿܢ ܘܪܘܼܦܵܝܠܗَܘܿܢ ܬܵܓ̰ܲܝܗ̈‌ܝ: ܒܪ̈ܲܚܡܹܐ ܢܛܝܼܪܠܗَܘܿܢ ܬܵܓ̰ܲܝܗ̈‌ܝ. ܫܘܼܟܸܪܘܿܢ ܚܲܝܠܵܘܵܬܹ̈ܐ: ܕܦܝܼܫܠܗَܘܿܢ ܡܒܘܼܪ̈ܟ̣ـܹܐ ܒܡܵܥܵܫܲܝ̈ܗ‌ܝ. ܛܥܸܢܘܿܢ ܡܝܼܢܬܵ‌ܐ  ܐܵܦ ܪܹ̈ܫܵܢܹܐ: ܕܕܝܼܪܘܿܢ ܡܸܢَܕܪܸܫَ ܥܲܠ ܫܘܼܠܛܵܢܲܝܗ‌ܝ. ܫܘܼܟܸܪܘܿܢ  ܐܵܦ ܥܲܬܝܼܪܹ̈ܐ: ܕܕܝܼܪܘܿܢ ܘܚܸܙܝܲܝܗ‌ܝ ܠܗَܘܿܢ ܒܹܝܬ ܓܲܙܲܝܗ̈‌ܝ܀ ܬܸܦܹ̈ܠܹܐ ܛܥܸܢܘܿܢ ܡܝܼܢܬܵ‌ܐ: ܕܦܠܝܼܛܠܗَܘܿܢ ܠܝܘܼܠܦܵܢܵܐ ܘܠܛܵܐܲܠܬܵ‌ܐ. ܫܘܼܟܸܪܘܿܢ  ܐܵܦ ܝܲܠܘܿܕܹ̈ܐ: ܕܦܝܼܫܠܗَܘܿܢ ܡܩܘܼܒܠܹܐ ܥܲܠ ܪ̈ܘܼܦ̰ܫܵܢܹܐ. ܛܥܸܢܘܿܢ ܡܝܼܢܬܵ‌ܐ ܐܘܿܦ ܬܲܓܵܪܹ̈ܐ: ܕܝَܠܝܼܦܠܗَܘܿܢ ܡܸܢܹܗ ܟܹܐܢܘܼܬܵܐ. ܡܵܘܕܹܐ ܠܹܗ ܟܹܐܢܵܐ ܝَܠܸܦܠܹܗ: ܕܙܵܘܕܵܐ ܩܵܢܹܐ ܛܲܝܒܘܼܬܵܐ܀ ܛܥܸܢܹܗ ܡܸܢܬܹܗ  ܐܵܦ ܛܲܠܒܵܢܵܐ: ܕܗܵܘܹܐ ܠܹܗ ܙܵܘܕܵܐ ܫܲܒ̣ܩܵܢܵܐ. ܣܸܠَܩܠܹܗ ܫܘܼܒ̣ܚܵܐ ܡ̣ܢ ܫܘܼܩܹ̈ܐ: ܕܓܵܘܲܝܗ‌ܝ ܟܠ ܐَܢܵܫܵܐ ܒܸܟ̣ܝܵܐ ܝܼܗَܘܵܐ. ܫܘܼܟܸܪܘܿܢ ܓܵܘ ܡܵܢܙܝܼܠܲܝܗ̈‌ܝ: ܕܠܸܬܠܵܚܵܐ ܦܝܼܫܵܐ ܝܼܗَܘܵܘ ܟ̰ܝܼܕܹ̈ܐ  ܐܵܦ ܫܘܼܪܹ̈ܐ ܡܫܘܼܒܸܚܠܗَܘܿܢ: ܕܡܘܼܩܘܝܼـܲܝܗ‌ܝ ܠܹܗ ܡܪܲܚܡܵܢܵܐ: ܫܘܼܟܸܪܘܿܢ ܐܵܦ ܟܵܠܵܬܹ̈‌ܐ: ܕܥܒ̣ܝܼܪܘܿܢ ܘܚܕܹܝܠܗَܘܿܢ ܒܸܓܢ̈ܘܼܢܲܝܗ‌ܝ. ܛܥܸܢܘܿܢ ܡܝܼܢܬܹܗ  ܐܵܦ ܝܸܡܵܬܹ̈‌ܐ: ܕܒܝܵܠܲܕَܝܗ̈‌ܝ ܦܝܼܫܠܗَܘܿܢ ܡܒܘܼܪ̈ܟ̣ـܹܐ.  ܐܵܦ ܡܵܡܸܨܵܢܬܵ‌ܐ ܩܲܡ ܒܲܪܟ̣ܵܐ ܠܹܗ: ܕܓܘܼܫܸܩܠܹܗ ܨܲܒܝܼܵܐ ܡ̣ܢ ܓܵܘ ܚܵܢܘܿܗ̇. ܛܠܝܼܒܝܵܬܹ̈‌ܐ ܙܹܐ ܫܘܼܟܸܪܘܿܢ ܐܸܠܹܗ: ܕܡܸܢَܕܪܸܫَ ܕܝܼܪܘܿܢ ܠܲܚܠܘܼ̈ܠܲܝܗ‌ܝ: ܒܬܘܼܠܵܬܹ̈‌ܐ ܡܵܘܕܝܼܠܗَܘܿܢ ܕܚܣܝܼܟ̣ـܲܝܗ‌ܝ ܠܹܗ ܚܲܝܲܝ̈ܗ‌ܝ ܡ̣ܢ ܛܠܵܩܵܐ. ܒܩܲܠܥܵܬܹ̈‌ܐ ܝܘܼܗَܒܸܠܗَܘܿܢ ܫܵܟܲܪܬܵܐ: ܕܒܸܪܓܵܕܵܐ ܗَܘܵܘ ܐܸܣܛܘܿܢܲܝܗ̈‌ܝ. ܒܩܲܨܪܹ̈ܐ ܝܘܼܒܸܠܗَܘܿܢ ܐܸܪ̈ܘܵܢܹܐ ܕܦܝܼܫܠܗَܘܿܢ ܢܛܝܼܪܹ̈ܐ ܬܵܒܵܩܲܝܗ̈‌ܝ. ܕܦܝܼܫܹܐ ܝܼܗَܘܵܘ ܡܘܼܟܪ̈ܝܼـܹܐ ܚܲܝܲܝܗ̈‌ܝ: ܦܝܼܫܠܗَܘܿܢ ܡܒܘܼܪ̈ܟ̣ـܹܐ ܒܫܸܢܹ̈ܐ ܝܵܪ̈ܝܼܟ̣ـܹܐ܀ ܒܘܼܫ ܙܵܘܕܵܐ ܒܘܼܪܸܟ̣ܠܗَܘܿܢ ܕܲܝܵـܢܹ̈ܐ: ܕܠܵܐ ܦܝܼܫܠܗَܘܿܢ ܕܝܼܢܹ̈ܐ ܐܲܝܟܼ ܕܝܵܢܬܲܝܗ‌ܝ. ܫܵܩܠܵܢܹ̈ܐ ܕܬܘܼܥܠܵܐ ܒܘܼܪܸܟ̣ܠܗَܘܿܢ ܠܛܵܒ̣ܵܐ: ܕܡܸܢܲܝܗ‌ܝ ܠܵܐ ܦܝܼܫܠܵܗ̇ ܫܩܝܼܠܬܵ‌ܐ ܬܘܼܥܠܵܐ. ܫܲܩܠܵܢܹ̈ܐ ܕܣܵܠܲܡ ܫܘܼܒܸܚܠܗَܘܿܢ: ܕܠܵܐ ܦܝܼܫܠܹܗ ܛܠܝܼܒܵܐ ܕܲܝܢܲܝܗ‌ܝ. ܡܵܪ̈ܵܘܵܬܹܐ ܕܕܵܝܢܵܐ ܒܘܼܪܸܟ̣ܠܗَܘܿܢ: ܕܐܸܫܛܵܪܹ̈ܐ ܕܕܲܝܢܵܐ ܩܘܼܛܩܸܛܲܝܗ‌ܝ ܠܗَܘܿܢ܀ ܣܲܠܒܵܢܹ̈ܐ ܝܘܼܗَܒܸܠܗَܘܿܢ ܬܸܫܒܘܿܚܬܵܐ: ܕܠܵܐ ܚܨܸܕܠܗَܘܿܢ ܐܲܝܟܼ ܕܙܸܪܥܝܹܐ ܗَܘܵܘ. ܚܵܛܘܿܦܹ̈ܐ ܝܘܼܗَܒܸܠܗَܘܿܢ ܫܵܟܲܪܬܵܐ: ܕܠܵܐ ܦܝܼܫܠܗَܘܿܢ ܦܸܪܥܝܹܐ ܐܲܝܟܼ ܦܘܼܪܥܵܢܲܝܗ‌ܝ. ܡܲܡܪܸ̈ܥܝܵܢܹܐ ܝܘܼܗَܒܸܠܗَܘܿܢ ܫܵܟܲܪܬܵܐ: ܘܦܵܝܫܵܢܹ̈ܐ ܡܘܼܡܪܸ̈ܥܝܹܐ ܬܸܫܒܘܿܚܬܵܐ. ܘܟܠܲܝܗ‌ܝ ܫܘܼܒܸܚܠܗَܘܿܢ ܡܐܘܼܕܵܠܹܐ: ܕܦܝܵܫܵܐ ܝܼܗَܘܵܘ ܡܗܘܼܝܸܪܹܐ ܒܒܵܪܵܒܵܪܘܼܬܵܐ. ܡܚܵܙܕܸܓܵܢܵܐ ܕܠܵܐ ܦܝܼܫܠܹܗ ܡܚܘܼܙܕܸܓܵܐ: ܘܦܵܝܫܵܢܵܐ ܡܚܘܼܙܕܸܓܵܐ ܕܦܝܼܫܠܹܗ ܢܛܝܼܪܵܐ.  ܐܵܦ ܪܹ̈ܝܓܵܘܵܬܲܝܗ‌ܝ ܡܫܘܼܒܸܚܠܗَܘܿܢ ܠܡܲܪܘܸܚܵܢܵܐ ܕܡܘܼܠܝܸܨܹ̈ܐ. ܢܝܵܚܵܐ ܝَܠܹܗ ܬܚܘܿܬ ܢܝܼܪܵܐ ܡ̣ܢ ܡܵܘܬܵܐ: ܘܩܘܼܠܘܼܬܵܐ ܡ̣ܢ ܛܠܵܩܵܐ. ܪܝܼܓܘܼܬܵܐ ܕܒܲܝܬܵ‌ܐ ܒܘܼܫ ܨܦܵܝܼ ܝܼܠܵܗ̇: ܡ̣ܢ ܚܹܐܪܘܼܬܵܐ ܕܓܵܘ ܩܲܒ̣ܪܹ̈ܐ܀ ܚܕܹܐܠܵܗ̇ ܝܸܡܵܐ ܕܥܒ̣ܝܼܕܠܵܗ̇ ܬܵܙܝܼ: ܕܕܝܼܪܵܗ̇ ܘܚܙܹܠܵܗ̇ ܠܣܵܘܓܘܿܠܘܼܗ̇. ܝܸܡܵܐ ܕܣܲܓܝܼܐܹ̈ܐ ܣܓܸܕܠܵܗ̇: ܕܕܥܸܪܘܿܢ ܠܟܸܣܠܘܿܗ̇ ܪ̈ܵܒܹܐ. ܘܝܸܡܹܗ ܕܝܼܚܝܼܕܵܝܵܐ [ܝܲܟܵܢܵܐ] ܣܓܸܕܠܵܗ̇: ܥܲܠ ܝܼܚܝܼܕܵܝܵܗ̇ ܕܦܪܝܼܩܠܹܗ. ܫܘܼܟܸܪܘܿܢ ܬܵܡܵܐ ܚܸܡܬܵܢܹ̈ܐ: ܕܒܝܲܕ ܟܲܪܒܵܐ ܚܸܡܬܵ‌ܐ ܛܥܸܟ̣ܠܵܗ̇܀ ܠܹܐ ܕܵܡܝܼ ܗَܘܵܘ ܥܲܠܲܢ: ܬܝܵܒ̣ܘܼܬܲܢ ܐܲܫܟܵܪܵܐ ܝܼܠܵܗ̇. ܚܲܕَܟ̰ܵܐ ܥܕܵܢܵܐ ܟܹܐ ܙܵܕܸܥ ܒܸܪܢܵܫܵܐ: ܐܝܼܡܲܢ ܕܥܒ̣ܝܼܪܹܗ ܟܲܪܒܵܐ ܟܹܐ ܡܲܢܫܹܐ. ܒܫܘܼܪܵܝܵܐ ܕܟܲܪܒܵܐ ܬܵܘܒܵܟܵܪܹ̈ܐ: ܘܒܫܘܼܠܵܡܵܐ ܡܵܪ̈ܘܿܕܹܐ. ܟܹܐ ܡܩܲܫܕܸܪ ܐܲܝܟܼ ܕܐܸܢ ܦܪܝܼܩܠܹܗ: ܘܐَܚܹܪَܢܵܐ ܠܹܐ ܐܵܬܹܐ ܚܘܼܙܕܵܓܵܐ ܒܦܲܪܦܲܠܬܘܼܗܝ ܒܥܸܠܵܝܵܐ: ܕܠܵܐ ܡܸܢَܕܪܸܫَ ܡܬܲܥܠܸܡ ܠܣܲܟ̣ܠܘܼܬܵܐ. ܐܲܝܟܼ ܕܐܸܢ ܚܛܝܼܬܵ‌ܐ ܘܟܲܪܒܵܐ: ܐܲܚܟ̰ܝܼ ܣܸܢ̈ܝܹܐ ܝَܢܵܐ ܠܐܲܠܵܗܵܐ. ܘܡ̣ܢ ܓܢܵܗܹ̈ܐ ܐَܚܹܪَ̈ܢܹܐ ܐܵܚܘܿܢܘܵܬ̈ܝܼ: ܗܸܟ̃ ܠܹܐ ܟܲܪܒܵܐ ܟܹܐܢܘܼܬܵܐ. ܬܲܝܵܒ̣ܵܐ ܫܲܪܝܼܪܵܐ ܐܵܚܘܿܢܘܵܬ̈ܝܼ: ܒܥܸܕܵܢܵܐ ܕܫܲܝܢܵܐ ܟܹܐ ܫܵܦܸܪ ܪܵܒܵܐ܀ ܐܝܼܡܲܢ ܕܦܝܼܫܠܹܗ ܡܬܘܼܥܠܡܵܐ ܒܕܲܥܒܲܪ: ܟܠܝܘܿܡ ܟܹܐ ܕܵܟ̣ـܸܪ ܠܬܲܥܠܲܡܬܹܗ. ܪܹܝܓܵܐ ܩܲܫ̃ܕܸܪܵܢܵܐ ܟܠܝܘܿܡ: ܟܹܐ ܡܵܢܫܝܼܠܗَܘܿܢ ܓ̰ܘܢܓ̰ܵܪ̈ܘܼܗ‌ܝ ܩܵܕَܡܵܝܹ̈ܐ. ܢܝܼܢܘܵܝܹ̈ܐ ܒܫܲܝܢܵܐ ܡܫܘܼܒܸܚܠܗَܘܿܢ: ܠܗ̇ܘ ܕܬܘܼܥܠܸܡܝܼܠܹܗ ܘܡܪܘܼܚܸܡܠܹܗ ܐܸܠܲܝܗ‌ܝ. ܫܘܼܟܸܪܹܗ ܐܸܠܹܗ ܟܠܹܗ ܐܲܬܪܵܐ: ܕܟܠܝܘܿܡ ܒܸܪܓܵܕܵܐ ܗَܘܵܐ ܟܠܹܗ. ܟܠܵܗ̇ ܡܕܝܼܢَܬܵܐ ܩܲܡ ܒܲܪܟ̣ܵܐ ܠܹܗ: ܐܲܝܟܼ ܓܵܡܝܼ ܒܸܫܥܵܫܵܐ ܗَܘܵܐ. ܡܫܘܼܟܸܪܘܿܢ ܡܵܪ̈ܵܘܵܬܹܐ ܕܗܲܝܘܵܢܹ̈ܐ: ܕܨܝܼܡܠܗَܘܿܢ ܗܲܝܘܵܢܲܝܗ̈‌ܝ ܡ̣ܢ ܡܝܼ̈ܵܐ. ܡܵܪܵܐ ܕܩܸܢܝܵـܢܹ̈ܐ ܒܘܼܪܸܟ̣ܠܹܗ: ܕܦܝܼܫܠܹܗ ܡܒܘܼܪܟ̣ܵܐ ܥܲܡ ܩܸܢܝܵܢܘܼ̈ܗܝ. ܘܕܐَܟ̣ܝܼܠܗَܘܿܢ ܠܲܚܡܵܐ ܕܡܘܼܟܵܟ̣ܵܐ: ܕܥܸܪܘܿܢ ܘܡܗܘܼܕܸܪܘܿܢ ܦܵܬܘܿܪ̈ܲܝܗ‌ܝ. ܥܲܠ ܫܘܝܼܵܬܲܝ̈ܗ‌ܝ ܒܘܼܪܸܟ̣ܠܗَܘܿܢ: ܕܓܲܪܡܘܼܠܹܐ ܝܼܗَܘܵܘ ܥܲܠ ܥܲܦܪܵܐ. ܥܲܠ ܟܘܼܪ̈ܣܵܘܵܬܲܝܗ‌ܝ ܫܘܼܒܸܚܠܗَܘܿܢ: ܕܨܸܠܝܵܐ ܗَܘܵܘ ܘܝَܬܝܼܒܹ̈ܐ ܥܲܠ ܩܸܛܡܵܐ. ܘܒܠܒ̣ܝܼܫܬܵܐ ܫܵܦܝܼܪܬܵܐ ܫܘܼܒܸܚܠܗَܘܿܢ: ܕܠܒ̣ܝܼܫܬܵܐ ܕܚܲܫܵܐ ܘܬܵܙܝܼ ܠܒ̣ܝܼܫܹ̈ܐ ܝܼܗَܘܵܘ. ܡ̣ܢ ܓܹܒܵܐ ܕܣܲܩܲܝ̈ܗ‌ܝ ܐَܟܘܼܡܹ̈ܐ: ܠܒ̣ܝܼܫܝܵܬܹ̈‌ܐ ܚܘܵܪܹ̈ܐ ܠܒ̣ܝܼܫܠܗَܘܿܢ ܘܫܘܼܒܸܚܠܗَܘܿܢ. ܒܪܝܼܟ̣ܵܐ ܝَܠܹܗ ܕܟܹܐ ܪܵܚܸܡ ܠܙܲܕܝܼܩܹ̈ܐ: ܕܡܘܼܙܝܸܕܠܹܗ ܒܐܵܬܘܿܪ ܬܲܝܵܒ̣̈ـܹܐ. ܡ̣ܢ ܙܲܕܝܼܩܹ̈ܐ ܘܬܲܝܵܒ̣̈ـܹܐ ܫܘܼܒ̣ܚܵܐ ܠܹܗ  ܐܵܦ ܠܲܡܫܝܼܚܹܗ. ܘܐܵܡܪܲܚ ܟܠܲܢ ܕܫܡܸܥܠܲܢ: ܫܘܼܒ̣ܚܵܐ ܐܸܠܹܗ ܡ̣ܢ ܦܘܼܡܹ̈ܐ ܕܟܠܲܢ. ܠܒܵܒܵܐ ܘܒܪܘܿܢܵܐ ܘܪܘܼܚܩܘܼܕܼܫܵܐ: ܬܸܫܒܘܿܚܬܵ‌ܐ ܐܵܡܹܝܢ ܘܐܵܡܹܝܢ܀

ܡܕܪܫܐ.

(ܒܲܒ̣ܪܝܼܟܼܘܼ ܕܲܡܥܝܼܪ).

     ܥܘܼܢܵܝܵܐ. ܐܘܿ ܕܐܲܚܝܼܕܼ ܩܠܝܼܕܲܝ̈ ܪܵܘܡܵܐ: ܘܦܵܬܲܚ̇ ܘܐܵܣܲܪ ܟܲܣܝܵܐܝܼܬ̣. ܦܬܲܚܠܲܢ ܡܵܪܝ ܬܲܪܥܵܐ ܕܪ̈ܲܚܡܲܝܟܼ: ܕܢܵܩ̇ܫܝܼܢܲܢ ܒܹܗ ܚܲܢܵܢܵܐ.

     ܒܵܬܹ̈‌ܐ. ܡܲܠܟܵܐ ܪܵܚܹ̇ܡ ܫܲܦܝܼܪܹ̈ܐ: ܒܵܟܼ ܬܸܨܛܲܒܲܬ̣ ܣܲܢܝܘܼܬܲܢ. ܡܲܪܕܘܼܬ̣ܵܟܼ ܡܵܪܝ ܐܵܣܝܼܬ̣ܵ‌ܐ ܗَ‌ܝܼ: ܒܣܲܡܵܗ̇ ܟܹܐܒܲܢ ܡܸܬ̣ܐܲܣܸܐ. ܠܵܐ ܬܲܣܓܸ̇ܐ ܚܸܣܕܲܢ ܡܵܪܲܢ: ܒܹܝܬ̣ ܟܵܦ̇ܘܿܪܹ̈ܐ ܕܣܵܢܹ̇ܝܢ ܠܵܟܼ. ܢܸܗܘܸܐ ܠܲܢ ܒܵܟܼ ܫܘܼܒ̣ܗܵܪܵܐ: ܕܒ̣ܵܟܼ ܐܸܫܬܲܡܥܲܬ݀ ܒܵܥܘܼܬܲܢ‌܀ ܗܲܒ̣ܠܲܢ ܡܵܪܝ ܓܲܠܝܘܼܬ̣ ܐܲܦܹ̈ܐ: ܕܒ̣ܵܟܼ ܐܸܬ̣ܦܲܢ̈ܝܼ ܫܹܐ̈ܠܵܬܲܢ. ܠܵܐ ܬܸܫܬܵܘܚܲܪ ܒܵܥܘܼܬܲܢ: ܕܠܵܐ ܢܸܬ̣ܡܵܣܟܲܢ ܫܘܼܒ̣ܗܵܪܲܢ. ܠܵܐ ܬܹܐܚܘܿܕܼ ܒܲܙܒܲܢ ܪܘܼܓ̣ܙܵܐ: ܬܲܪܥܵܟܼ ܒܐܲܦܲܝ̈ ܒܵܥܘܼܬܲܢ. ܬܝܵܒ̣ܘܼܬܲܢ ܡܵܪܝ ܬܸܒ̣ܣܲܡ ܠܵܟܼ: ܕܲܒ̣ܚܲܫܵܐ ܡܙܝܼܓ̣ܵܐ ܟܠܵܗ̇‌܀ ܠܵܐ ܝܵܐܹ̇ܐ ܠܒܲܣܝܼܡܘܼܬ̣ܵܟܼ: ܕܲܒ̣ܚܲܫܵܐ ܬܹܐܚܘܿܕܼ ܬܲܪܥܵܟܼ. ܒܗܵܕܹܐ ܡܵܪܝ ܐܸܬ̣ܪܲܥܵܐ ܠܲܢ: ܕܲܨܠܝܼܒ̣ܵܟܼ ܗَܘܼ ܫܘܼܒ̣ܗܵܪܲܢ. ܠܵܐ ܝَܕܲܥ̣ܢ ܬܲܪܥܵܐ ܐَܚܪܹܢܵܐ: ܥܲܡ ܗܵܘ̇ ܬܲܪܥܵܟܼ ܒܵܪܘܿܝܲܢ. ܥܠܲܝܟܘܼ ܡܵܪܝ ܣܝܼܡ ܬܘܼܟ̣ܠܵܢܲܢ: ܦܲܢܵܐ ܒܪ̈ܲܚܡܲܝܟܼ ܫܹܐ̈ܠܵܬܲܢ‌܀

܀ܒܘܪ̈ܟܬܼܐ܀

     ܕܥܘܿܪ ܝܵܐ ܡܵܪܝܵܐ: ܡܫܡܲܝܵܐ ܕܩܘܼܕܫܘܼܟܼ ܘܒܲܪܸܟܼ ܠܬܹܒܹܝܠ: ܘܡܲܫܪܝܼ ܫܲܝܢܘܼܟܼ: ܒܐܲܪܒܲܥܦܸܢܝܵܢ ܘܒܟܠ ܕܘܼܟܵܢܹ̈ܐ‌܀

     ܟܠܝܼܠܵܐ ܕܫܹܢَܬܵܐ: ܥܲܡ ܟܠ ܚܕܵܪ̈ܘܼܗ‌ܝ ܬܲܓܒܸܪ ܪܸܡܙܘܼܟܼ: ܥܲܡ ܫܘܼܚܠܵܦ̈ܘܼܗ‌ܝ: ܐܲܪܒܥܘܼܢܬܲܝܗ‌ܝ ܡܲܦܪܥܝܼ ܘܡܲܙܝܸܕ‌܀

     ܠܥܹܕܬܵܐ ܕܩܘܼܕܫܵܐ: ܕܓܘܼܒܹܐܠܘܼܟܼ ܐܸܠܘܼܟܼ ܡܟܠ ܡܸܠܲܬܹ̈‌ܐ: ܢܛܘܿܪܹܗ ܠܩܵܘܠܘܼܟܼ. ܘܬܲܡܸܡ ܠܟܸܣܠܘܿܗ̇ ܕܒܝܼܘܼܟܼ ܟܵܠܝܵܐ‌܀

     ܠܪܵܥܝܘܿܗ݁ ܪܲܒܵܐ: ܘܪܹܫܵܐ ܕܛܘܼܗܡܘܿܗ݁ ܦܵܛܲܪܝܵܪܟܝܼܣ: ܒܝܲܡܝܼܢܘܼܟܼ ܝܲܪܡܵܐ: ܐܵܦ ܝܲܡܝܼܢܹܗ ܥܲܠ ܟܠ ܬܵܘܕܝܵܬܹ̈‌ܐ‌܀ ܐܲܒܼܵܗܵܬܹ̈ܐ؛ ܘܪ̈ܵܥܵܘܵܬܹܐ ܕܟܠܵܗ݁ ܬܹܒܹܝܠ؛ ܒܚܘܼܛܪܵܐ ܕܲܪܒܵܐ؛ ܡܣܵܩܸܠ ܐܸܠܵܝܗܝ ܐܲܡܝܼܢܵܐܝܼܬ܀

     ܣܲܚܒܸܪ ܠܟܪܝܼܗܵܐ؛ ܐَܣܘܿܪ ܠܸܫܡܝܼܛܵܐ ܒܡܸܨܥܵܝܘܼܬܵܝܗܝ؛ ܣܢܘܿܕ ܠܸܡܚܝܼܠܵܐ ܡܲܫَܟ̰ܸܚ ܠܛܝܼܩܵܐ ܒܸܨܠܵܘܵܬܵܝ̈ܗܝ‌܀   

     ܘܸܠܩܲܫܝܼܫܹ̈ܐ؛ ܕܡܟܵܗܢܝܼ ܐܸܠܘܼܟܼ ܒܐܲܬܪ̈ܵܘܵܬܹܐ؛ ܡܓܲܪܘܸܣ ܐܸܠܵܝܗܝ ܒܕܲܪܓܼܵܐ ܒܬܸܪܘܵܝܗܝ ܥܵܠܡܹ̈ܐ‌܀

     ܟܵܗܢܹ̈ܐ ܒܬܘܼܠܹ̈ܐ؛ ܡܠܲܓ̰ܠܸܓ̰ ܫܘܼܦܪܵܐ ܕܩܲܕܝܼܫܘܼܬܵܝܗܝ؛ ܒܕܡܘܼܬܵܐ ܕܕܵܗܒܼܵܐ ܨܸܦܝܵܐ ܘܒܚܝܼܪܵܐ ܘܕܠܵܐ ܗܸܟ̰ ܡܘܼܡܵܐ‌܀

     ܙܩܘܿܪ ܝܵܐ ܡܵܪܝܼ؛ ܟܠܝܼܠܵܐ ܕܪܘܼܚܵܐ ܠܸܡܫܲܡܫܵܢܹ̈ܐ؛ ܕܗܵܘܹܐ ܩܵܠܵܐ ܕܟܵܪܘܿܙܘܼܬܵܝܗܝ ܠܣܲܙܓܲܪܬܵܐ ܕܚܘܼܒܘܼܟܼ‌܀

     ܒܬܘܼܠܹ̈ܐ ܕܓܵܘܵܝܗܝ؛ ܠܢܝܼܫܵܐ ܡܵܛܝܼ ܕܐܸܣܛܲܦܵܢܘܿܣ؛ ܘܐܵܦ ܗܲܕܵܡܵܝܗ̈ܝ ܢܵܘܣܹ̈ܐ ܕܸܟܼܝܹ̈ܐ ܡܩܲܕܫܝܼ ܐܸܠܘܼܟܼ‌܀    

     ܕܟܼܘܿܪ ܝܵܐ ܡܵܪܲܢ؛ ܐܵܦ ܡܲܠܦܵܢܹ̈ܐ ܬܪ̈ܝܼܨܲܝ ܫܘܼܒܼܚܵܐ؛ ܘܦܬܘܿܚ ܚܲܙܝܼܢܵܐ  ܐܵܢܝܼ ܛܸܫܝܹ̈ܐ ܩܵܐ ܚܘܼܫܵܒܼܵܝܗ̈ܝ‌܀

      ܕܟܼܘܿܪ ܝܵܐ ܡܵܪܝܵܐ؛ ܠܐܵܣܟܘܿܠܵܝܹܐ ܘܠܡܲܕܪ̈ܲܫܝܵܬܹܐ؛ ܘܥܒܼܘܿܕܠܗَܘܿܢ ܚܲܟܿܝܼܡܹ̈ܐ ܒܐَܪ̈ܵܙܹܐ ܛܸܫܝܹ̈ܐ ܕܐܲܠܵܗܘܼܬܘܼܟܼ‌܀ ܝܑܼܚܝܼܕܵܝܹ̈ܐ؛ ܕܣܢܹܝܠܗَܘܿܢ ܥܵܠܡܵܐ ܒܘܼܬ ܚܵܬܸܪܘܼܟܼ؛ ܡܚܲܝܸܕ ܐܸܠܵܝܗܝ ܒܸܚܕܵܝܘܼܬܵܐ ܕܐܲܠܵܗܘܼܬܘܼܟܼ‌܀

     ܪܹ̈ܫܹܐ ܕܥܘܼܡܪܹ̈ܐ؛ ܕܡܓܘܼܪܘܸܣܵܝܗܝ ܠܘܼܟܼ ܒܸܚܕܵܝܘܼܬܵܐ؛ ܙܪܝܼܥ ܡܘܼܟܵܟܼܵܐ ܘܸܡܫܲܝܢܘܼܬܵܐ ܓܵܘ ܚܘܼܫܵܒܼܵܝܗ̈ܝ‌܀

ܘܗܵܘܹܐ ܥܘܼܡܪܵܐ؛ ܒܲܕܡܘܼܬ ܫܡܲܝܵܐ ܗ݁ܘ ܥܸܠܵܝܵܐ؛ ܘܡܲܡܛܝܼ ܐܸܠܵܝܗܝ ܠܘܲܥܕܵܐ ܪܚܝܼܡܵܐ ܕܒܹܝܬَ ܐܲܢܛܘܿܢܝܼܣ܀

     ܝܑܼܚܝܼܕܵܝܹ̈ܐ: ܕܣܢܹܐܠܗَܘܿܢ ܥܵܠܡܵܐ ܒܘܼܬ ܚܵܬܸܪܘܼܟܼ: ܚܲܝܸܕ ܠܗَܘܿܢ. ܒܲܚܕܵܝܘܼܬܵܐ ܪܘܼܚܵܢܵܝܬܵ‌ܐ‌܀

     ܘܸܠܩܢܘܿܒ̣ܵܝܹ̈ܐ: ܕܢܦܸܠܵܗ݁ ܒܠܸܒܵܝܗܝ ܢܘܼܪܵܐ ܕܚܘܼܒܘܼܟܼ: ܡܗܲܝܸܪ ܐܸܠܵܝܗܝ ܠܸܡܫܵܪܘܿܝܹܐ ܘܐܵܦ ܠܸܚܬܵܡܵܐ‌܀

     ܠܟܠܹܗ ܬܸܓܼܡܵܐ ܕܝܼܚܝܼܕܵܝܹ̈ܐ ܕܟ̣ܘܿܪ ܝܵܐ ܡܵܪܲܢ: ܘܗܲܒَ̣ܠ ܠܸܡܗܲܝܡܢܹ̈ܐ: ܩܵܐ ܕܫܵܘܬܸܦܝܼ ܒܸܨܠܵܘܵܬܵܝܗ̈ܝ‌܀

     ܠܲܡܙܲܡܪ̈ܵܢܹܐ: ܘܸܠܒܢܲܝ̈ ܩܝܵܡܵܐ ܡܲܢܬܸܬ ܥܲܡܵܝܗܝ: ܘܐܵܦ ܡܲܡܛܸܬܠܗَܘܿܢ: ܠܕܲܪܓܼܵܐ ܪܵܡܵܐ ܕܥܸܣܪܵܐ ܟܲܟܿܪܹ̈ܐ܀

     ܡܲܠܟܵܐ ܕܡܲܠܟܹ̈ܐ: ܕܡܲܩܝܸܡ ܡܲܠܟܹ̈ܐ ܘܡܲܥܒܸܪ ܡܲܠܟܹ̈ܐ: ܦܪܘܿܣ ܠܵܗ݁ ܙܕܥܘܿܥܬܘܼܟܼ: ܥܲܠ ܚܘܼܫܵܒܹ̈ܐ ܕܡܲܠܟܵܐ ܕܙܲܒ̣ܢܲܢ‌‌܀

     ܥܲܝܢ̈ܘܼܟܼ ܗܵܘܝܼ: ܒܐܲܡܝܼܢܘܼܬܵܐ ܐܵܦ ܥܲܠ     ܥܘܼܡܪܲܢ: ܘܢܛܘܿܪ ܠܥܲܡܪ̈ܵܢܘܼܗܝ: ܡ̣ܢ ܚܘܼܙܕܵܓܹ̈ܐ ܕܐܵܟܸܠܩܲܪܨܵܐ‌܀

     ܐܹܝܠ ܐܲܠܵܗܵܐ: ܘܠܝܼ ܚܲܛܵܝܵܐ ܐܵܦ ܡܸܣܟܹܢܵܐ: ܡܲܫܡܸܥ ܩܵܬܝܼ ܠܗ݁ܝ ܒܪܵܬَܩܵܠܵܐ ܕܩܵܐ ܓܲܝܵܣܵܐ‌܀

     ܐܹܝܠ ܐܲܠܵܗܵܐ: ܩܲܒܸܠ ܩܵܠܹ̈ܐ ܘܸܙܡܝܼܪ̈ܵܬܹܐ: ܕܡ̣ܢ ܚܲܛܵܝܘܼܬܝܼ: ܐܲܝܟܼ ܫܵܡܘܿܢܹ̈ܐ ܕܗ݁ܝ ܐܲܪܡܲܠܬܵܐ‌܀

     ܐܹܝܠ ܐܲܠܵܗܵܐ: ܡܲܚܫܸܚܠܝܼ ܥܲܡܘܼܟܼ ܠܗ݁ܝ ܡܲܠܟܘܼܬܵܐ: ܡܓܹܢَܒ ܓܵܘܓܵܝܬܵܐ: ܕܡ̣ܢ ܠܸܫܵܢܵܝܼ ܡܲܚܸܒ ܫܸܬܩܵܐ‌܀

     ܘܡ̣ܢ ܟܠ ܦܘܼܡܵܐ: ܘܟܠ ܠܸܫܵܢܵܐ ܐܸܠܘܼܟܼ ܫܘܼܒ̣ܚܵܐ: ܒܵܒܵܐ ܘܒܪܘܿܢܵܐ: ܘܪܘܼܚܵܐ ܕܩܘܼܕܫܵܐ ܠܥܵܠܲܡ ܥܵܠܡܝܼܢ‌܀

top

ܐܪܒܥܒܼܫܒܐ ܕܒܥܘܬܼܐ

ܟܪܘܙܘܬܼܐ.

ܢܩܘܼܡ ܫܲܦܝܼܪ ܟܠܲܢ ܒܚܲܫܵܐ ܘܒܲܚܦܝܼܛܘܼܬܵܐ ܛܵܠܒܲܚ ܘܐܵܡܪܲܚ. ܡܵܪܲܢ ܪܲܚܸܡ ܥܲܠܲܢ. ܘܓ̰ܲܘܸܒܝܼ.  ܡܵܪܲܢ ܪܲܚܸܡ ܥܲܠܲܢ‌܀ ܐܲܠܵܗܲܢ ܛܵܒ̣ܵܐ ܗܵܘ ܕܡܫܘܼܪܵܝܵܐ ܛܵܒ̣ܵܐ ܝَܠܹܗ. ܘܡ̣ܢ ܛܵܒܼܘܼܬܹܗ ܠܹܐ ܡܫܲܚܠܸܦ. ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܒܲܪ ܛܵܒ̣ܵܐ ܕܒܛܵܒ̣ܘܼܬܹܗ ܟܹܐ ܡܬܲܓܒܸܪ ܠܟܠ.  ܒܸܛܠܵܒܵܐ ܝَܘܲܚ ܡܸܢܘܼܟܼ‌‌܀ ܛܵܒ̣ܵܐ ܕܒܸܪܝܵܚܠܹܗ ܒܛܲܝܒܘܼܬܹܗ ܘܓܒܼܝܼܠܲܚܠܹܗ ܒܡܪܲܚܡܵܢܘܼܬܹܗ‌.  ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܒܲܪ ܛܵܒ̣ܵܐ ܕܣܘܼܚܒܸܪܲܚܠܹܗ ܒܪ̈ܲܚܡܘܼܗ‌ܝ ܘܦܘܼܪܩܲܚܠܹܗ ܒܸܚܢܵܢܹܗ.  ܒܸܛܠܵܒܵܐ ܝَܘܲܚ ܡܸܢܘܼܟܼ‌‌܀ ܛܵܒ̣ܵܐ ܕܫܘܼܕܸܪܹܗ ܠܢܒ̣ܝܼܘܼ̈ܗ‌ܝ ܕܡܲܕܸܪܝܼ ܠܛܵܝܸܦܹ̈ܐ ܡ̣ܢ ܣܓ̣ܵܕܬܵܐ ܕܨܵܢܲܡܹ̈ܐ.  ܒܸܛܠܵܒܵܐ ܝَܘܲܚ ܡܸܢܘܼܟܼ‌‌܀ ܒܲܪ ܛܵܒ̣ܵܐ ܕܫܘܼܕܸܪܹܗ ܠܫܠܝܼܚܘܼܗ̈‌ܝ ܕܡܲܟܠܝܼ ܠܛܵܝܸܦܹ̈ܐ ܡ̣ܢ ܛܘܼܠܩܵܢܵܐ ܕܒܵܬَܪ ܫܹܐܕܹ̈ܐ.  ܒܸܛܠܵܒܵܐ ܝَܘܲܚ ܡܸܢܘܼܟܼ‌܀

     ܫܲܚܠܸܦ. ܒܵܒܵܐ ܛܵܒ̣ܵܐ ܪܲܚܸܡ ܥܲܠܲܢ.  ܘܓ̰ܲܘܸܒܝܼ. ܫܡܸܥ ܒܵܥܘܼܬܲܢ ܘܪܲܚܸܡ ܥܲܠܲܢ. ܐܲܩܸܦ. ܛܵܒ̣ܵܐ ܕܡܫܘܼܪܵܝܵܐ ܪܲܚܸܡ ܥܲܠܲܢ‌܀ ܚܩܝܼܪܵܐ ܒܐܝܼܬܘܼܬܹܗ ܪܲܚܸܡ ܥܲܠܲܢ‌܀ ܩܲܕܝܼܫܵܐ ܒܟܝܵܢܹܗ‌ ܪܲܚܸܡ ܥܲܠܲܢ‌܀ ܟܸܣܝܵܐ ܒܓܵܫܲܩܬܹܗ‌ ܪܲܚܸܡ ܥܲܠܲܢ‌܀ ܒܲܪܝܵܢܵܐ ܕܒܪܝܼܬܵܐ‌ ܪܲܚܸܡ ܥܲܠܲܢ‌܀ ܒܲܪܝܵܢܵܐ ܕܟܠܵܐ‌ ܪܲܚܸܡ ܥܲܠܲܢ‌܀ ܐܲܢَܬ̇ ܓܵܒ̣ܘܿܠܲܢ‌ ܪܲܚܸܡ ܥܲܠܲܢ‌܀ ܓܲܪܘܸܣ ܓܸܢܣܲܢ ܪܲܚܸܡ ܥܲܠܲܢ‌‌܀ ܐܲܢَܬ̇ ܚܲܢܵܢܵܐ‌ ܪܲܚܸܡ ܥܲܠܲܢ‌܀ ܪܵܚܹܡܢܵܫܵܐ  ܪܲܚܸܡ ܥܲܠܲܢ‌.

     ܫܲܚܠܸܦ. ܫܡܸܥ ܒܩܵܠܲܝ̈ܢ ܘܪܲܚܸܡ ܥܲܠܲܢ.  ܘܓ̰ܲܘܸܒܝܼ. ܡܵܪܲܢ ܪܲܚܸܡ ܥܲܠܲܢ. ܐܲܩܸܦ. ܛܵܒ̣ܵܐ ܒܟܠ ܕܵܪܵܐ ܡܘܼܚܙܝܼܠܹܗ ܥܵܓ̰ܝܼܒܘܼܝܵܬܹ̈ܗ‌.  ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܒܲܪ ܛܵܒ̣ܵܐ ܕܒܙܲܒ̣ܢܹ̈ܐ ܐَܚܵܪ̈ܵܝܹܐ ܡܘܼܚܙܝܼܠܹܗ ܚܸܩܪ̈ܘܼܗ‌ܝ ܒܓܸܠܝܵܢܹܗ ܒܒܸܣܪܵܐ. ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܛܵܒ̣ܵܐ ܕܟܹܐ ܬܲܥܠܸܡ ܘܠܹܐ ܡܲܡܝܸܬ. ܘܟܹܐ ܡܵܚܹܐ ܐܵܦ ܟܹܐ ܒܲܣܸܡ‌. ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܒܲܪ ܛܵܒ̣ܵܐ ܕܒܘܼܣܸܡܠܹܗ ܒܪ̈ܝܼܢܵܬܲܢ ܘܡܘܼܚܝܝܹܠܹܗ ܡܝܼܬܘܼܬܲܢ. ܘܡܘܼܩܸܡܠܹܗ ܢܦܲܠܬܲܢ.  ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܛܵܒ̣ܵܐ ܕܟܹܐ ܒܲܣܡܵܐ ܠܹܗ ܒܚܲܝܵܝ̈ܗ‌ܝ ܕܒܢܲܝ̈ܢܵܫܵܐ‌.  ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܒܲܪ ܛܵܒ̣ܵܐ ܕܐَܬܹܐܠܹܗ ܕܩܵܪܹܐ ܠܚܲܛܵܝܹ̈ܐ ܠܬܝܵܒ̣ܘܼܬܵܐ‌.  ܒܸܛܠܵܒܵܐ ܝَܘܲܚ ܡܸܢܘܼܟܼ܀

     ܫܲܚܠܸܦ. ܒܪܵܐ ܡܬܘܼܡܵܝܵܐ ܪܲܚܸܡ ܥܲܠܲܢ‌܀  ܘܓ̰ܲܘܸܒܝܼ. ܫܡܸܥ ܒܵܥܘܼܬܲܢ ܘܪܲܚܸܡ ܥܲܠܲܢ‌܀ ܐܲܩܸܦ. ܒܪܵܐ ܝܼܚܝܼܕܵܝܵܐ ܪܲܚܸܡ ܥܲܠܲܢ‌܀ ܡܫܝܼܚܵܐ ܗܸܝܒ̣ܝܼܲܢ ܪܲܚܸܡ ܥܲܠܲܢ‌‌܀ ܐܵܘ ܚܲܢܵܢܵܐ ܪܲܚܸܡ ܥܲܠܲܢ‌‌܀ ܐܵܘ ܡܪܲܚܡܵܢܵܐ‌ ܪܲܚܸܡ ܥܲܠܲܢ‌܀ ܐܵܘ ܡܪܲܚܦܵܢܵܐ‌ ܪܲܚܸܡ ܥܲܠܲܢ‌܀ ܦܲܚܠܵܢܵܐ ܕܚܛܝܼܵܬܹ̈‌ܐ‌ ܪܲܚܸܡ ܥܲܠܲܢ‌܀ ܦܲܚܠܵܢܵܐ ܕܓܢܵܗܵܬܹ̈‌ܐ‌ ܪܲܚܸܡ ܥܲܠܲܢ‌܀ ܒܲܣܡܵܢܵܐ ܕܡܲܪ̈ܥܹܐ‌ ܪܲܚܸܡ ܥܲܠܲܢ‌܀ ܡܲܚܝܼܵܢܵܐ ܕܡܝܼܬܹ̈‌ܐ ܪܲܚܸܡ ܥܲܠܲܢ‌‌܀ ܡܲܩܝܼܡܵܢܵܐ ܕܣܲܩܲܬܹ̈‌ܐ‌ ܪܲܚܸܡ ܥܲܠܲܢ‌܀

     ܫܲܚܠܸܦ. ܫܡܸܥ ܒ̈ܩܵܠܲܢ ܘܪܲܚܸܡ ܥܲܠܲܢ‌܀  ܘܓ̰ܲܘܸܒܝܼ. ܡܵܪܲܢ ܪܲܚܸܡ ܥܲܠܲܢ. ܐܲܩܸܦ. ܥܲܠ ܫܲܝܢܵܐ ܘܣܘܼܙܓܵܪܵܐ ܘܣܢܵܕܬܵܐ ܕܟܠܹܗ ܥܵܠܡܵܐ ܘܕܟܠܵܝܗ‌ܝ ܥܹܕܵܬܹ̈ܐ. ܒܸܛܠܵܒܵܐ ܝَܘܲܚ ܡܸܢܘܼܟܼ‌‌܀ ܥܲܠ ܐܲܬܪܲܢ ܘܥܲܠ ܟܠ ܐܲܬܪ̈ܵܘܵܬܹܐ. ܘܥܲܠ ܐܵܢܝܼ ܕܒܗܲܝܡܵܢܘܼܬܵܐ ܒܸܥܡܵܪܵܐ ܝَܢܵܐ ܒܝܼܵܝܗ‌ܝ. ܒܸܛܠܵܒܵܐ ܝَܘܲܚ ܡܸܢܘܼܟܼ‌‌܀ ܥܲܠ ܡܘܼܙܵܓܹ̈ܐ ܕܗܵܘܵܐ. ܘܦܸܪܝܘܼܬܵܐ ܕܫܹܢَܬܵܐ ܘܡܲܗܨܘܼܠܹ̈ܐ ܕܛܥܘܿܢܝܵܬܹ̈‌ܐ. ܘܥܲܠ ܬܪܝܼܨܘܼܬܵܐ ܕܟܠܹܗ ܥܵܠܡܵܐ‌. ܒܸܛܠܵܒܵܐ ܝَܘܲܚ ܡܸܢܘܼܟܼ‌܀  ܥܲܠ ܚܘܼܠܡܵܢܵܐ ܕܐܲܒ̣ܵܗܵܬ̈ܲܢ ܩܲܕܝܼܫܹ̈ܐ: ܡܵܪܝ ܦܠ݁ܢ ܩܵܬ̣ܘܿܠܝܼܩܵܐ ܦܵܛܲܪܝܵܪܟܵܐ. ܘܡܵܪܝ ܦܵܠ݁ܢ ܡܝܼܛܪܵܦܘܿܠܹܝܛܵܐ [ܐܵܘ ܐܲܦܸܣܩܘܿܦܵܐ]: ܘܥܲܠ ܟܠܵܝܗܝ ܒܢܲܝ̈ ܚܸܠܡܲܬܵܝܗܝ. ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܐܲܠܵܗܵܐ ܡܪܲܚܡܵܢܵܐ ܗܵܘ ܕܒܪ̈ܲܚܡܹܐ ܟܹܐ ܡܬܲܓܒܸܪ ܠܟܠ. ܒܸܛܠܵܒܵܐ ܝَܘܲܚ ܡܸܢܘܼܟܼ‌‌܀ ܗܵܘ ܕܒܫܡܲܝܵܐ ܦܝܵܫܵܐ ܝَܠܹܗ ܚܩܝܼܪܵܐ. ܘܒܐܲܪܥܵܐ ܦܝܵܫܵܐ ܝَܠܹܗ ܣܓ̣ܝܼܕܵܐ‌. ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܦܪܘܿܩ ܠܟܠܲܢ ܡܫܝܼܚܵܐ ܡܵܪܲܢ ܒܫܵܦܵܩܲܬܘܼܟܼ. ܘܡܲܙܝܸܕ ܥܲܡܲܢ ܫܲܝܢܘܼܟܼ ܘܫܠܵܡܘܼܟܼ. ܘܪܲܚܸܡ ܥܲܠܲܢ‌܀

ܡܕܪܫܐ؛ ܐ.

     ܥܘܼܢܵܝܵܐ. ܐܹܝܠ ܐܲܠܵܗܵܐ ܫܡܲܥ ܒܵܥܘܼܬܲܢ ܕܲܫܡܝܼܥܵܐ ܠܵܟܼ: ܘܦܲܢܵܐ ܒܪ̈ܲܚܡܲܝܟ ܫܹܐܠܲܬ̣ ܢܲܦ̮ܫܲܢ ܕܲܡܦܵܣܲܬ̇ ܒܵܗ̇.   ܒܵܬܹ̈‌ܐ. ܫܡܝܼܥ ܒܲܚܢܵܢܹܗ ܚܵܘܵܐ ܚܘܼܒܵܟܼ ܐܲܝܟܼ ܕܲܡܥܵܕܲܬ̇: ܕܠܵܐ ܢܲܗܸܠ ܒܹܗ ܣܵܢ̇ܐܵܐ ܕܐَܢܵܫܵܐ ܒܲܥܒ̣ܵܕܼ ܐܝܼܕܲܝ̈ܟ. ܥܲܬ̇ܝܼܪ ܡ̣ܢ ܟܠ ܦܬܲܚ ܒܹܝܬܼ ܓܲܙܵܟܼ ܠܲܣܢܝܼܩܘܼܬܲܢ: ܕܠܵܐ ܢܸܬ̣ܡܲܣܟܲܢ ܘܢܵܘܓܲܪ ܢܲܦ̮ܫܲܢ ܥܲܡ ܢܵܟ̣ܘܿܠܵܐ. ܓܲܢَܒܵܪ ܥܵܠܡܹ̈ܐ ܣܡܘܿܟܼ ܬܘܼܩܵܢܵܟܼ ܒܬ̣ܘܼܩܦܵܐ ܕܚܲܝܠܵܟܼ: ܕܗܵܐ ܡܸܙܕܲܥܙܲܥ ܡ̣ܢ ܩܲܫܝܘܼܬ̣ܵܐ ܕܚܲܫܹ̈ܐ ܘܫܹܐܕܹ̈ܐ‌܀ ܐܝܼܬ̣ܝܵܐ ܕܲܡܠܹܝܢ ܫܡܲܝܵܐ ܘܐܲܪܥܵܐ ܡ̣ܢ ܐܝܼܬܘܼܬܹܗ: ܡܠܝܼܢ ܨܸܒ̣ܝܵܢܵܟ ܕܢܸܬ̣ܩܲܕܲܫ ܒܲܢ ܫܡܵܟܼ ܩܲܕܿܝܼܫܵܐ. ܓܢܝܼܙ ܒܲܟ̣ܝܵܢܹܗ ܡ̣ܢ ܪ̈ܘܼܚܵܢܹܐ ܘܦܲܓ̣ܪ̈ܵܢܵܝܹܐ: ܓܠܝܼ ܒܲܢ ܚܲܝܠܵܟܼ ܘܚܵܘܵܢ ܥܘܼܬ̣ܪܵܐ ܕܒܲܣܝܼܡܘܼܬ̣ܵܟܼ. ܡܲܬܩܸܢ ܟܠܵܐ ܕܲܒ̣ܪܵܐ ܒܪܝܼܬܵܐ ܡ̣ܢ ܠܵܐ ܡܸܕܸܿܡ: ܚܘܼܣ ܥܲܠ ܥܲܡܠܵܟܼ ܕܠܵܐ ܢܸܬ̣ܚܲܒܲܠ ܒܥܸܠܲܬܼ ܚܵܘܒܲܝ̈ܢ‌܀ ܙܵܐܹ̇ܢ ܡܲܓܵܢ ܘܡܲܚܸܐ ܒܛܲܝܒܿܘܼ ܡܠܝܼܠܹ̈ܐ ܘܚܲܪ̈ܫܹܐ: ܦܫܘܿܛ ܝܲܡܝܼܢܵܟܼ ܘܣܲܒܲܥ ܟܠܲܢ ܡ̣ܢ ܡܵܘܗܲܒܼܬܼܵܟܼ. ܠܵܐ ܚܲܣܝܼܪܵܐ ܕܡ̣ܢ ܡܲܠܝܘܼܬܹܗ ܡܠܹܝܢ ܬܘܼܩܵܢܵܘ̈ܗ‌ܝ: ܦܬܲܚ ܠܲܦܝܵܣܲܢ ܬܪܲܥ ܒܹܝܬ̣ ܓܲܙܵܟܼ ܕܐܲܚܝܼܕܼ ܒܐܲܦܲܝ̈ܢ. ܓܡܝܼܪ ܒܐܝܼܬܼܘܼܬܹܗ ܘܠܲܝܬܿ ܫܘܼܪܵܝܵܐ ܠܐܲܡܝܼܢܘܼܬܹܗ: ܓܡܘܿܪ ܒܲܥܒ̣ܵܕܼܵܐ ܫܘܼܘܕܵܝ ܡܸܠܲܝ̈ܟ ܕܲܠܘܵܬ̣ ܓܸܢܣܲܢ‌܀

ܩܪܝܢܐ؛ ܐ

ܡܘܬܒ̣ܐ؛ ܐ.

(ܒܩܪܵܝܬܵܐ ܢܲܪܣܵܝܬܵܐ).

      ܕܥܝܼ ܝܵܐ ܡܵܪܝ ܩܵܪܘܿܝܵܐ؛ ܕܥܵܕܲܬ ܐܝܼܬ ܕܟܹܐ ܩܵܪܝ ܒܡܵܘܬܒܼܵܐ ܩܲܕَܡܵܝܵܐ ܕܝܵܘܡܵܐ ܕܐܲܪܒܲܥܒܼܫܹܒܵܐ ܡܐܹܡܪܵܐ ܕܩܲܕܝܼܫܵܐ ܡܵܪܝ ܢܲܪܣܲܝ؛ ܩܲܫܝܼܫܵܐ ܘܡܲܠܦܵܢܵܐ؛ ܕܘܟܼܪܵܢܹܗ ܗܵܘܹܐ ܠܟܠ ܒܘܼܪ̈ܟܵܬܹܐ؛ ܐܵܡܹܝܢ. ܟܲܕ ܐܵܡܪܝܼ ܡܲܕܪ̈ܵܫܹܐ ܒܫܘܼܪܵܝܹܗ ܘܒܹܝܬَܦܲܠܓܹܗ ܘܒܫܘܼܠܵܡܹܗ ܕܡܹܐܡܪܵܐ.

ܝܵܐ ܓܲܪܫܵܢܵܐ ܕܒܪܝܼܬܵ‌ܐ ܒܪܲܢܓܵܐ ܕܗܸܟ̰ ܠܹܐ ܚܵܪܸܒ̣: ܬܲܡܸܙ ܠܫܸܚܬܵ‌ܐ ܕܠܵܐ ܝَܕܸܥܬܵ‌ܐ ܡ̣ܢ ܪܸܥܝܵܢܲܢ. ܡܲܠܚܸܡ ܓܘܼܫܡܹ̈ܐ ܘܢܵܦܸܚ ܓܵܢܵܐ ܓܵܘ ܗܲܕܵܡܹ̈ܐ. ܡܵܩܘܝܼ ܫܵܗܘܵܬܲܢ ܕܠܵܐ ܦܵܝܫܲܚ ܪܸ̈ܦܝܹܐ ܩَܵܡ ܫܵܗܘܲܬܝܵܬܹ̈‌ܐ. ܡܝܲܩܪܵܢܵܐ ܕܐَܢܵܫܵܐ ܒܘܼܫ ܙܵܘܕܵܐ ܡ̣ܢ ܟܠ ܒܘܼܬ ܚܘܼܒܹܗ: ܥܒ̣ܘܿܕ ܫܵܦܵܩܲܬ ܥܲܠ ܨܲܠܡܵܐ ܕܡܝܲܩܪܘܼܬܘܼܟܼ ܕܠܵܐ ܦܵܐܸܫ ܡܘܼܒܨܸܪܵܐ. ܒܫܸܡܵܐ ܕܐܝܼܬܘܼܬܘܼܟܼ ܗ̇ܘ ܕܠܹܐ ܝܼܠܹܗ ܒܸܪܝܵܐ ܩܪܹܐܠܘܼܟܼ ܠܒܪܝܼܬܲܢ: ܠܵܐ ܦܵܐܸܫ ܚܪܝܼܒ̣ܵܐ ܫܸܡܘܼܟܼ ܡܝܲܩܪܵܐ ܒܚܪܵܒ̣ܵܐ ܕܝܼـܲܢ. ܡܘܼܚܙܹܐܠܘܼܟܼ ܠܚܘܼܒܘܼܟܼ ܓܘܼܪܵܐ ܠܟܸܣ ܒܸܪ̈ܝܘܼܟܼ: ܠܵܐ ܡܵܚܙܸܬ̇ ܒܝܼܲܢ  ܢܝܼܫܲܢܩܵܐ ܕܟܲܪܒܵܐ ܠܦܸܠܚܵܢܵܐ ܕܐܝܼܕܵܬ̈ܘܼܟܼ. ܒܝܼـܲܢ ܩܘܼܝܸܣܠܘܼܟܼ ܥܸܕܵܢܵܐ ܠܓܘܼܪܘܼܬܵܐ ܕܐܘܼܡܵܢܘܼܬܘܼܟܼ: ܒܝܲܕ ܒܪܝܼܬܲܢ ܚܒ̣ܝܼܫܲܝ̈ܗ‌ܝ ܠܘܼܟܼ ܐܲܪ̈ܥܵܢܹܐ ܘܫܡܲܝܵـܢܹ̈ܐ. ܒܝܼـܲܢ ܒܪܹܐܠܘܼܟܼ ܠܪܵܘܡܵܐ ܘܥܘܼܡܩܵܐ ܐܲܝܟܼ ܚܲܕَ ܓܘܼܫܡܵܐ. ܐܵܢܝܼ ܕܠܲܥ̈ܠܹܐ ܝَܢܵܐ ܗَܘܹܐܠܗَܘܿܢ ܓܵܘ ܦܲܓ̣ܪܲܢ ܘܐܵܢܝܼ ܗܲܡܙܸܡܵܢܹ̈ܐ ܗَܘܹܐܠܗَܘܿܢ ܓܵܘ ܓܵܢܲܢ. ܐܵܗܵܐ ܥܘܼܓ̰ܵܒܵܐ ܓܘܼܪܵܐ ܝܼܠܹܗ. ܠܵܐ ܒܲܛܠܸܬ̇ ܠܹܗ ܝܵܐ ܡܵܪܝܼ ܠܐܵܗܵܐ ܒܸܪܝܵܐ ܕܒܪܹܐܠܹܗ ܚܘܼܒܘܼܟܼ: ܘܠܵܐ ܙܹܐ ܦܵܐܸܫ ܪܸܦܝܵܐ ܐܵܗܵܐ ܝܸܣܘܼܪܵܐ ܓܘܼܪܵܐ ܕܐَܣܸܪܹܗ ܪܸܡܙܘܼܟܼ. ܒܐܵܗܵܐ ܒܪܝܼܬܵ‌ܐ ܓܘܼܫܸܩܠܵܗ̇ ܗܲܡܙܲܡܬ‌ܝܼ ܙܲܒܘܼܢ ܕܚܲܝܠܵܐ ܘܒܥܹܐܠܵ̇ܗ̇ ܕܐܵܙܵܠَܐ ܒܐܘܼܪܚܵܐ ܕܗܲܝܡܸܙܡܵܢܹ̈ܐ ܐܵܢܝܼ ܕܐَܣܝܼܪܹ̈ܐ ܝَܢܵܐ ܒܝܼـܹܗ. ܒܐܵܗܵܐ ܝܸܣܘܼܪܵܐ ܟܠܹܐܠܹܗ ܚܝܼܵܠܝܼ ܗ̇ܘ ܕܝܼܠܹܗ ܒܵܨܘܿܪܵܐ ܕܦܲܪܡܵܝܬܵ‌ܐ. ܒܘܼܫ ܙܵܘܕܵܐ ܥܲܓ̰ܒܵܢܵܐ ܝܼܠܹܗ ܒܐܘܼܡܵܢܘܼܬܵܐ ܕܗ̇ܘ ܪܸܡܙܵܐ ܕܐَܣܸܪܹܗ ܒܐܵܗܵܐ ܦܘܼܠܚܵܢܵܐ ܕܒܸܪ̈ܝܵܬܹܐ ܛܠܸܩܠܗَܘܿܢ ܬܲܚܡܲܢܝܵܬ̈‌ܝܼ ܟܸܪ̈ܝܹܐ: ܘܗܘܼܕܸܪܘܿܢ ܗܹܡܸܙܡܵܢܹ̈ܐ ܕܐܵܡܪܸܢ ܠܐܵܗܵܐ ܩܸܣܲܬ ܩܵܕَܡ ܫܲܡܥܵܢܹ̈ܐ. ܒܐܵܗܵܐ ܗܹܒ̣ܝܼ ܐَܣܸܪܝܼ ܗܹܡܸܙܡܵܢ̈ܝܼ: ܒܵܬَܪ ܗܹܡܸܙܡܵܢܹ̈ܐ: ܕܦܵܠܛܸܢ ܘܡܵܝܬَܝܸܢ ܡܲܫܚܲܕܬܵܐ ܕܫܸܡܘܼܟܼ ܠܦܸܠܚܵܢܵܐ ܕܐܝܼܕܘܼܟܼ. ܒܐܵܗܵܐ ܩܵܘܠܵܐ ܦܘܼܪܡܝܼܠܝܼ ܓܵܘ ܚܲܩܠܵܐ ܕܟܬܲܒ̣ܝܵܬ̈ܘܼܟܼ: ܩܵܐ ܕܡܲܠܦܸܢ ܠܐَܢܵܫܹ̈ܐ ܐܵܗܵܐ ܩܸܣܲܬ ܓܘܼܪܬܵܐ ܕܒܪܝܼܬܘܼܟܼ: ܒܐܵܗܵܐ ܦܸܨܠܵܐ ܒܸܓܪܵܫܵܐ ܝܼܠܵܗ̇ ܗܹܡܸܙܡܵܢܝܼ ܒܩܲܢܝܵܐ [ܒܩܵܠܵܡܵܐ] ܕܠܸܫܵܢܝܼ ܕܓܲܪܫܸܢ ܫܸܟܠܵܐ ܠܟܠ ܐَܢܵܫܵܐ ܒܗ̇ܘ ܨܲܠܡܵܐ ܫܲܦܝܼܪܵܐ ܕܦܸܠܚܵܢܘܼܟܼ: ܨܲܠܡܵܐ ܕܒܪܝܼܬܘܼܟܼ ܚܙܹܐܠܝܼ ܣܘܼܩܠܵܐ ܝܼܗَܘܵܐ ܒܥܵܩܸܠܕܵܪܘܼܬܵܐ. ܘܒܥܹܐܠܝܼ ܕܓܵܠܸܢܵܗ̇ ܠܵܚܘܼܡܘܼܬܵܐ ܕܫܘܼܦܪܹܗ ܩܵܕَܡ ܟܠܲܝܗ‌ܝ ܚܲܙܝܵܢܹ̈ܐ. ܒܨܲܠܡܵܐ ܕܨܲܠܡܲܢ ܚܙܹܐܠܝܼ ܕܐَܣܝܼܪܬܵܐ ܝܼܠܵܗ̇ ܟܠܵܗ̇ ܒܪܝܼܬܵ‌ܐ: ܩܪܹܐ ܠܝܼ ܟܠܲܝܗܝ ܐَܢܵܫܹ̈ܐ ܕܐܵܬܝܼ ܘܚܵܙܝܼ ܒܸܟܝܵܢܲܢ: ܩܲܡ ܓܵܪܸܫܠܝܼ ܕܚܵܙܸܢ ܟܝܵـܢܹ̈ܐ ܐܵܢܝܼ ܕܐَܣܝܼܪܹ̈ܐ ܝَܢܵܐ ܒܝܼـܹܗ. ܕܵܐܟ̣ܝܼ ܘܟܡܵܐ ܡܵܨܝܵܢܵܐ ܝܼܠܹܗ ܙܲܒܘܼܢ ܕܓ̣ܵܠܸܒ: ܒܟܝܵܢܲܢ ܚܙܹܐܠܝܼ ܥܵܩܸܠܕܵܪ̈ܘܼܝܵܬܹ‌ܐ ܕܐܲܠܵܗܘܼܬܘܼܟܼ: ܘܬܘܼܚܡܸܢܝܼ ܕܐܝܼܬ ܗܹܒ̣ܝܼ ܩܵܐ ܐَܢܵܫܵܐ ܟܡܵܐ ܕܝܼܠܹܗ ܚܲܛܵܝܵܐ. ܚܙܹܐܠܝܼ ܫܸܡܵܐ ܕܐܝܼܬܘܼܬܘܼܟܼ. ܫܸܪܝܵܐ ܝܼܠܹܗ ܒܝܼـܹܗ ܐܲܝܟܼ ܕܐܸܢ ܓܵܘ ܗܲܝܟܠܵܐ: ܩܲܡ ܕܵܒܸܩܠܝܼ ܥܘܼܓ̰ܵܒܵܐ ܕܵܐܟ̣ܝܼ ܡܵܨܹܐ ܗ̇ܘ ܕܝܼܠܹܗ ܡܘܼܣܠܝܼܵܐ ܕܛܵܫܹܐܠܵܗ̇ ܓܵܢܹܗ: ܗ̇ܘ ܕܪܵܒܵܐ ܡܘܼܣܠܝܼܵܐ ܝܼܠܹܗ ܘܐܲܢَܬܿ ܩܲܡ ܡܝܲܩܪܸܬ ܠܹܗ ܙܵܘܕܵܐ ܡ̣ܢ ܩܝܼܵܣ: ܡܵܢܝܼ ܠܹܐ ܥܵܓ̰ܸܒ ܕܠܡܲܣܠܲܝܬܹܗ ܩܲܡ ܥܲܒ̣ܕܸܬܠܹܗ ܒܘܼܫ ܨܸܦܝܵܐ ܡ̣ܢ ܟܠ ܐܸܢ ܐܵܗܵܐ ܝܼܠܹܗ ܚܘܼܒܘܼܟܼ ܩܲܡ ܨܵܦܝܼ ܠܹܗ ܒܘܼܫ ܡ̣ܢ ܟܠ. ܘܩܪܹܐܠܹܗ ܒܫܸܡܹܗ ܒܲܣ ܟܡܵܐ ܓܵܪܸܓ ܗܵܘܹܐ ܩܘܼܝܵܐ ܕܠܵܐ ܡܲܣܠܸܬ̇ ܠܵܗ̇ ܗ̇‌ܝ ܓܵܒܲܝܬܵ‌ܐ ܕܓܘܼܒܝܼܠܘܼܟܼ ܐܸܠܹܗ. ܘܐܸܢ ܡܵܪܘܼܬܘܼܟܼ ܩܲܡ ܥܲܒ̣ܕܵܠܹܗ ܡܵܪܵܐ ܥܲܠ ܟܠ. ܡܵܢܝܼ ܠܹܐ ܐܵܣܸܪ ܓܵܢܹܗ ܒܢܝܼܪܵܐ ܕܦܘܼܠܚܵܢܵܐ ܕܚܲܝܘܼ̈ܗܝ. ܘܐܸܢ ܝَܕܸܥܠܘܼܟܼ ܩܲܡ ܩܵܪܝܵܐ ܠܹܗ ܘܩܲܪܒܸܢܵܗ̇ ܠܹܗ ܠܕܲܪܓ̣ܵܐ ܪܵܡܵܐ: ܡܵܢܝܼ ܠܹܐ ܡܵܘܕܹܐ ܕܣܵܪܵܣܬ ܝܑܼܠܹܗ ܕܲܪܓܼܹܗ ܘܓܘܼܪܵܐ ܝَܠܹܗ ܗܘܼܟܡܹܗ. ܐܸܢ ܒܝܲܕ ܓܠܵܝܬܵܐ ܕܟܲܣܝܘܼܬܘܼܟܼ ܓܸܠܝܵܠܘܼܟܼ ܩܵܐ ܪ̈ܝܼܓܵܘܵܬܘܼܟܼ: ܡܵܢܝܼ ܝܼܠܹܗ ܕܠܹܐ ܚܲܝܸܕ ܓܵܫܲܩܬܹܗ ܡ̣ܢ ܟܠ ܓܹܒܵܐ ܠܟܸܣ ܒܪܝܼܬܹܗ. ܘܐܸܢ ܓܲܫܩܸܬ̇ ܒܝܼـܹܗ ܝܑܼܠܹܗ ܚܲܕَ ܐَܪܵܙܵܐ ܕܒܪܘܿܢܵܐ ܘܪܘܼܚܵܐ: ܡܵܢܝܼ ܠܹܐ ܩܲܪܒܸܢ ܠܟܸܣ ܥܵܩܸܠܕܵܪ̈ܘܼܝܵܬܹ‌ܐ ܕܟܸܣܝܹ̈ܐ ܝَܢܵܐ ܒܫܸܡܹܗ. ܘܐܸܢ ܒܝܼـܹܗ ܡܘܼܚܙܹܐܠܘܼܟܼ ܒܲܣܝܼܡܘܼܬܘܼܟܼ ܩܵܐ ܡܲܠܲܐܟܹ̈ܐ ܘܐَܢܵܫܹ̈ܐ: ܡܵܢܝܼ ܝܼܠܹܗ ܕܠܹܐ ܡܵܚܹܐ ܚܵܨܵܐ ܒܦܲܓ̣ܪܹܗ ܕܗ̇ܘ ܕܦܲܪܦܘܼܠܹܐ ܝܼܠܹܗ ܒܘܼܬ ܕܝܼܘܼܗܝ. ܘܐܸܢ ܗܲܪ ܝܑܼܠܹܗ ܗ̇‌ܝ ܗܹܡܸܙܡܵܢ ܕܦܠܸܛܠܵܗ̇ ܡܸܢܘܼܟܼ ܘܒܚܘܼܒܵܐ ܥܡܸܪܵܗ̇ ܒܝܼـܹܗ: ܡܵܢܝܼ ܝܼܠܹܗ ܕܠܹܐ ܩܵܪܹܐ ܠܹܗ ܗܲܟܡܵܢܵܐ ܕܪܵܘܡܵܐ ܘܥܘܼܡܩܵܐ. ܘܐܸܢ ܒܝܼـܹܗ ܬܘܼܡܸܡܠܘܼܟܼ ܦܸܠܚܵܢܹ̈ܐ ܒܘܼܬ ܚܵܬܸܪ ܕܟܠܵܝܗ‌ܝ. ܡܵܢܝܼ ܝܼܠܹܗ ܕܠܹܐ ܟܵܟ̰ܸܚ ܒܟܸܟ̰ܚܵܐ ܕܦܘܼܠܚܵܢܹܗ. ܘܐܸܢ ܒܝܼـܹܗ ܗܕܝܼܪܵܐ ܝَܘܸܬ̇ ܕܕܵܝܢܸܬ̇ ܐܲܪܥܵܐ ܒܐَܚܲܪܬܵܐ ܕܙܲܒ̣ܢܹ̈ܐ: ܡܵܢܝܼ ܝܼܠܹܗ ܕܠܹܐ ܙܲܕܥܹܐ ܡܼܢ ܗ̇ܘ ܝܵܘܡܵܐ ܕܕܝܼܘܵܢ ܒܐܝܼܕܵܬ̈ܘܼܗܝ ܝܼܠܹܗ. ܘܐܸܢ ܒـܝܼـܹܗ ܒܝܼܵܗَܒ̣ܵܐ ܝَܘܸܬ ܗܵܩܵܐ ܠܛܵܒ̣̈ـܹܐ ܘܓ̰ܘܼܢܓ̰ܵܪܵܐ ܠܒܝܼܫܹ̈ܐ ܡܵܢܝܼ ܝܼܠܹܗ ܕܠܹܐ ܦܲܪܦܸܠ ܒܝܼܘܼܗܝ ܕܗܵܘܹܐ ܘܲܟܝܼܠ ܒܘܼܬ ܓܢܵܗܵܬ̈ܘܼܗܝ. ܐܸܢ ܗ̇ܘ ܝܼܠܹܗ ܗܲܟܡܵܢܵܐ ܥܲܠ ܐܵܗܵܐ ܥܵܠܡܵܐ ܘܥܲܠ ܗ̇ܘ ܕܲܥܬܝܼܕ: ܡܵܢܝܼ ܝܼܠܹܗ ܕܠܹܐ ܡܗܲܝܡܸܢ ܕܝܼܠܹܗ ܬܪܲܝܵـܢܵܐ ܕܐܲܠܵܗܘܼܬܵܐ: ܠܐܲܢܹܐ ܕܲܪ̈ܓ̣ـܹܐ ܚܙܹܐܠܝܼ ܕܐܝܼܢܵܐ ܒܘܼܫ ܥܸܠܵܝܹ̈ܐ ܡ̣ܢ ܟܝܵܢܲܢ ܡܘܼܣܠܝܼܵܐ. ܘܩܲܡ ܓܵܪܸܫ ܠܚܝܼܵܠܝܼ ܕܗܵܘܸܢ ܬܘܼܥܠܡܵܐ ܒܗܹܡܸܙܡܵܢܹ̈ܐ ܠܟܸܣ ܗܘܼܟܡܘܼܗܝ ܘܓܘܼܪܘܼܬܵܐ ܕܕܲܪܓ̣ـܹܗ ܩܲܡ ܥܵܒ̣ܕܵܐ ܠܝܼ ܡܲܓ̰ܒܘܼܪ ܕܩܲܫܕܸܪܸܢ ܠܒܲܕܲܪ ܡ̣ܢ ܛܲܟ̣ܣܵܐ: ܘܒܸܬ ܐܵܙܸܠَܢ ܒܐܘܼܪܚܵܐ ܗ̇‌ܝ ܨܲܚܨܲܝܬܘܿܗ̇ ܓܘܼܪܬܵܐ ܝܼܠܵܗ̇ ܒܘܼܫ ܡ̣ܢ ܣܵܗܕܘܼܝܵܬܹ̈‌ܐ: ܒܝܲܕ ܓܲܠܝܘܼܬܹܗ ܒܥܹܐܠܝܼ ܕܩܲܪܒܸܢܸܢ ܠܟܸܣ ܟܲܣܝܘܼܬܘܼܟܼ: ܦܵܫܸܛ ܠܝܼ ܐܝܼܕܘܼܟܼ ܐܲܝܟܼ ܠܫܸܡܥܘܿܢ ܕܩܲܪܒܸܢܸܢ ܒܚܝܼ̈ܵܠܝܼ ܘܦܲܪܦܸܠܸܢ ܒܗܹܡܸܙܡܵܢܹ̈ܐ ܒܘܼܬ ܐܵܢܝܼ ܐܵܙܵܠَܢܹ̈ܐ ܝَܢܵܐ ܓܵܘ ܝܵܡܵܐ ܕܗܵܘܝܼ ܨܵܠܵܡܲܬ ܘܚܵܝܹ̈ܐ: ܪܸܡܙܘܼܟܼ ܩܲܡ ܓܵܪܸܫܠܝܼ ܕܠܵܐ ܛܲܒܥܸܢ ܒܡܸܢܕܝܼܵـܢܹ̈ܐ ܠܵܐ ܚܫܝܼܚܹ̈ܐ. ܒܸܬ ܩܲܪܒܸܢܸܢ ܘܦܲܪܦܸܠܸܢ ܒܘܼܬ ܚܘܼܣܪ̈ܵܢܹܐ ܕܝܼܝܼ ܘܲܕܚܲܒ̣ܪ̈ܵܘܵܬܝܼ: ܗܲܒَ̣ܠ ܚܲܝܠܵܐ ܠܬܲܚܡܸܢܝܵܬ̈‌ܝܼ ܕܠܵܐ ܦܵܝܫܝܼ ܪ̈ܘܼܦܝܹܐ ܝܲܢ ܫܒ̣ܝܼܩܹ̈ܐ. ܗܲܠ ܕܦܵܝܫܝܼ ܫܸܡܥܝܹ̈ܐ.

ܡܕܪܫܐ؛ ܒ.

(ܒܲܒܼܪܝܼܟܼ ܕܲܒܼܛܲܝܒܿܘܼ).

     ܥܘܼܢܵܝܵܐ. ܒܲܬܼܪܲܥ ܪ̈ܲܚܡܲܝܟܼ ܢܵܩ̇ܫܝܼܢ ܥܲܒܼܕܲܝ̈ܟ ܨܵܒܹܿܐ ܒܚܲܝܲܝ̈ܢ: ܦܬܲܚܠܲܢ ܕܢܸܥܘܿܠ ܘܢܸܣܲܒܼ ܙܸܕܼܩܵܐ ܐܲܝܟܼ ܡܸܣܟܹܿܢܹ̈ܐ.     ܒܵܬܹ̈ܐ. ܡܸܣܟܹܿܝܢ ܘܲܨܪܝܼܟܼ ܓܸܢܣܲܢ ܫܝܼܛܵܐ ܡ̣ܢ ܟܠ ܛܵܒ̣̈ܵܢ: ܣܡܘܿܟܼ ܫܝܼܛܘܼܬܹܗ ܒܢܸܬܼܪܵܐ ܙܥܘܿܪܵܐ ܕܡ̣ܢ ܡܵܘܗܲܒ̣ܬܼܵܟܼ. ܡܚܝܼܠ ܗَܘܼ ܣܲܓܿܝܼ ܕܲܢܟܲܢܸܫ ܠܹܗ ܡܵܙܘܿܢ ܙܲܒ̣ܢܵܐ: ܘܠܵܐ ܡܨܸܐ ܦܵܠܲܚ̇ ܐܲܪܥܵܐ ܒܚܲܝܠܹܗ ܒܸܠܥܵܕܼ ܚܲܝܠܵܟܼ‌܀ ܩܸܢܛܵܐ ܪܲܒܵܐ ܡܠܸܐ ܦܘܼܠܚܵܢܹܗ ܟܡܵܐ ܐܸܢ ܦܵܠܲܚ̇: ܘܠܲܝܬ̇ ܬܘܼܟ̣ܠܵܢܵܐ ܥܲܠ ܡܵܙܘܿܢܹܗ ܟܡܵܐ ܐܸܢ ܣܲܓܿܝܼ. ܚܲܫܹ̈ܐ ܘܟܹܐܒܹ̈ܐ ܠܘܹܝܢ ܠܲܬ̣ܥܵܫܹܗ ܩܲܝܛܵܐ ܘܣܲܬ̣ܘܵܐ: ܘܟܼܠ ܢܸܟ̣ܝܵܢ̈ܝܼܢ ܐܲܡܝܼܢܝܼܢ ܠܹܗ ܠܹܗ ܘܲܠܕܼܝܼܠܹܗ‌܀ ܣܲܓܿܝܼ ܥܲܡܠܹܗ ܘܲܙܥܘܿܪ ܐܲܓ̣ܪܵܐ ܕܡܸܬܼܦܲܢܸܐ ܠܹܗ: ܘܪܲܒܵܐ ܠܹܐܘܬܹܗ ܘܫܝܼܛ ܘܲܡܙܲܠܗܲܙ ܡܵܙܘܿܢ ܚܲܝܵܘ̈ܗ‌ܝ. ܙܵܪܲܥ̇ ܣܲܓܿܝܼ ܘܚܵܡܹ̇ܠ ܩܲܠܝܼܠ ܡ̣ܢ ܣܲܓܿܝܼ̈ܐܹܐ: ܡܛܲܪܲܦ ܘܲܫܚܝܼܩ ܘܥܲܕܼ ܡܸܬ̣ܒܲܣܲܡ ܒܲܠܥܹܗ ܡܵܘܬܵܐ‌܀

ܩܪܝܢܐ؛ ܒ

ܡܘܬܒ̣ܐ؛ ܐ.

ܒܙܕܥܘܿܬܵܐ ܟܹܐ ܙܵܪܸܥ ܘܒܸܙܕܥܘܿܬܵܐ ܘܒܸܪܓܘܼܕܵܐ ܟܹܐ ܓ̰ܵܡܸܥ ܛܥܘܼܢܝܵܬܹ̈‌ܐ. ܘܠܹܐ ܝَܠܹܗ ܒܗܹܒ̣ܝܼ ܕܚܵܕܹܐ ܠܸܒܹܗ ܒܟܸܟ̰ܚܹܗ ܘܠܵܐ ܒܓ̰ܵܡܥܲܝܬܹܵܗ.  ܟܹܐ ܡܪܲܦܹܐ ܠܲܚܡܹܗ ܥܲܠ ܦܲܐܬܵܐ ܕܚܲܩܠܹܗ ܩܵܐ ܕܕܵܥܸܪ ܐܸܠܹܗ: ܒܸܙܕܲܥܝܵܐ ܝَܠܹܗ ܘܒܥܹܩܘܼ ܕܒܲܠܟܵܐ ܚܲܝܘܼ̈ܗܝ ܒܸܬ ܛܲܠܩܝܼ ܘܦܵܪܩܝܼ. ܐܲܟܵܪܵܐ ܬܲܚܡܘܼܢܹܐ ܝܼܗܘܵܐ ܒܘܼܬ ܛܥܘܼܢܝܵܬܹ̈‌ܐ ܒܲܠܟܵܐ ܕܚܲܪ̈ܒ̣ܝܼ: ܘܒܪܸܚܫܵܐ ܗَܘܵܐ ܒܐܘܼܪܚܵܐ ܘܒܸܬܝܵܒ̣ܵܐ ܘܡܵܘܬܵܐ ܒܸܣܦܵܪܘܼܗܝ ܗَܘܵܐ. ܐܲܝܟܼ ܗܵܨܠܵܢܬܵ‌ܐ ܕܟܹܐ ܣܵܦܪܵܐ ܠܛܥܘܼܢܝܵܬܹ̈‌ܐ ܐܲܝܟܼ ܕܩܵܐ ܨܲܒܝܼ̈ـܹܐ. ܘܫ̰ܵܢܹ̈ܐ ܕܡܵܘܬܵܐ ܒܸܡܚܵܝܵܐ ܝܼܗَܘܵܐ ܟܠ ܣܵܥܲܬ ܠܦܪܵܫܬܘܼܗܝ ܓܵܘ ܦܠܵܫܵܐ ܕܚܲܫܹ̈ܐ ܒܸܟܠܵܝܵܐ ܝܼܠܹܗ ܟܠ ܣܵܥܲܬ ܠܲܝܠܹܐ ܘܝܵܘܡܵܐ. ܘܠܲܝܬ ܦܪܵܩܬܵ‌ܐ ܠܡܵܝܕܲܢ ܕܫܵܗܘܲܬܝܵܬ̈ܘܼܗܝ. ܒܟܠ ܥܸܕܵܢܵܐ ܦܠܵܫܵܐ ܓܘܼܪܵܐ ܝܼܠܹܗ ܕܲܪܩܘܼܒ̣ܠ ܫܵܗܘܵܬܹܗ: ܐܸܢ ܢܸܡܠܹܗ ܘܕܡܸܟ̣ܠܹܗ ܥܒܸܪܹܗ ܘܓܢܝܼܒ̣ܵܐ ܠܹܗ ܫܵܗܘܵܬܹܗ ܘܐܵܙܵܕܘܼܬܹܗ. ܗ̇ܘ ܕܝܼܠܹܗ ܙܲܒܘܼܢ ܒܬܪܹܝ ܦܠܵܫܹ̈ܐ ܢܦܝܼܠܵܐ ܝܼܠܹܗ ܚܲܕَ ܒܘܼܫ ܚܸܪܒܵܐ ܡܼܢ ܗ̇ܘ ܐَܚܹܪَܢܵܐ. ܒܚܲܫܹ̈ܐ ܕܦܲܓ̣ܪܵܐ ܘܬܘܼܪܣܵܝܵܐ ܕܙܲܒ̣ܢܵܐ ܩܵܐ ܚܲܝܘܼ̈ܗܝ ܘܓ̰ܘܼܢܓ̰ܵܪܹ̈ܐ ܩܸܫܝܹ̈ܐ ܐܲܝܟܼ ܐܸܢ ܒܝܲܕ ܬܲܣܡܵܬܹ̈‌ܐ ܡܓ̰ܲܢܓ̰ܘܼܪܹܐ ܝܼܗܘܵܐ ܒܐܝܼܕܵܐ ܕܫܵܗܘܵܬܹܗ ܠܲܝܬ ܗَܘܵܐ ܒܝܼـܹܗ ܕܘܼܟܬܵ‌ܐ ܕܠܲܝܬ ܗَܘܵܐ ܒܪ̈ܝܼܢܵܬܹ‌ܐ ܘܡܠܝܼܬܵ‌ܐ ܡ̣ܢ ܚܲܫܹ̈ܐ. ܦܫܝܼܡܵܐ ܝܼܠܹܗ ܘܒܥܝܹܩܘܼ ܒܘܼܬ ܚܲܝܘܼ̈ܗܝ ܘܟܸܟ̰ܚܘܼܗܝ: ܠܲܝܬ ܗَܘܵܐ ܥܸܕܵܢܵܐ ܠܹܐ ܗܵܘܹܐ ܗَܘܵܐ ܬܲܚܡܘܼܢܹܐ ܒܡܲܪܝܼܪܘܼܬܵܐ. ܐܸܢ ܫܸܡܫܵܐ ܝܘܼܗَܒܸܠܵܗ̇ ܚܲܡܝܼܡܘܼܬܵܐ ܟܹܐ ܫܵܓ̣ܸܫ ܗَܘܵܐ ܒܚܝܼܵܠܘܼ̈ܗܝ ܩܵܕَܡ ܙܪܘܼܥܬܘܼܗܝ ܘܐܸܢ ܡܸܛܪܵܐ ܩܛܸܥܠܵܗ̇ ܟܹܐ ܒܵܪܙܝܼ ܗَܘܵܐ ܚܘܼܫܵܒ̣ܘܼܗܝ ܥܲܡ ܢܨܸܒ̣ܝܵܬ̈ܘܼܗܝ. ܘܐܸܢ ܙܸܕܠܵܐ ܚܲܡܝܼܡܘܼܬܵܐ ܟܹܐ ܩܵܛܸܠܹܗ ܨܵܗܘܵܐ. ܘܐܸܢ ܙܸܕܠܵܐ ܩܲܪܝܼܪܘܼܬܵܐ ܒܸܬ ܡܵܐܸܬ ܡ̣ܢ ܩܲܪܬܵܐ. ܘܐܸܢ ܗَܘܹܐ ܠܹܗ ܡܸܣܟܹܢܵܐ ܟܹܐ ܛܵܥܸܢ ܬܲܡܒܵܠܘܼܬܵܐ ܘܗܵܨܸܠ ܙܠܘܼܡܝܵܐ. ܘܐܸܢ ܗܘܹܐ ܠܹܗ ܡܵܪܵܐ ܕܵܘܸܠܬܵ‌ܐ ܟܹܐ ܫܵܩܸܠ ܫܘܼܒ̣ܗܵܪܵܐ ܘܪܵܡܘܼܬܵܐ ܕܪܘܼܚܵܐ. ܐܸܢ ܦܝܼܫܠܹܗ ܡܘܼܟܫܸܛܵܐ ܟܹܐ ܡܵܣܚܸܪ ܘܓܵܚܸـܟ ܥܲܠ ܚܲܛܵܝܹ̈ܐ. ܘܐܸܢ ܚܛܹܐܠܹܗ ܟܹܐ ܗܵܘܹܐ ܙܲܒܘܼܢ ܘܦܵܪܸܩ܀ ܘܡܸܕܪܹܐ ܠܲܝܬ ܗܹܒܼܝܼ. ܘܐܸܢ ܗܘܹܐ ܠܹܗ ܥܵܩܸܠܕܲܪ ܟܹܐ ܡܲܢܫܹܐ ܠܟܝܵܢܵܐ ܕܥܲܦܪܹܗ ܡܘܼܣܠܝܼܵܐ. ܘܐܸܢ ܥܒܸܕܠܹܗ ܫܘܼܒ̣ܗܵܪܵܐ ܟܹܐ ܗܵܘܹܐ ܐܲܝܟܼ ܗܵܝܘܲܢ ܕܠܵܐ ܦܵܪܡܲܝܬܵܐ. ܒܪܵܒܵܐ ܘܚܲܕَܟ̰ܵܐ ܚܲܫܘܼ̈ܗܝ ܒܸܙܝܵܕܵܐ ܝَܢܵܐ ܘܥܵܘܠܹܗ ܓܲܪܘܘܼܣܹܐ ܝܼܠܹܗ. ܡܘܼܕܝܼ ܥܵܒܸܕ ܘܠܐܲܝܟܵܐ ܥܵܪܸܩ ܫܓ̣ܝܼܫܵܐ ܝܼܠܹܗ ܓܵܘ ܚܲܝܘܼ̈ܗ‌ܝ. ܒܹܝܠ ܙܵܘܕܵܐ ܘܒܵܨܘܼܪܵܐ ܚܣܵܪܵܐ ܒܸܚܣܵܪܵܐ ܝܼܠܹܗ. ܕܵܐܟ̣ܝܼ ܡܵܨܹܐ ܕܢܵܛܸܪܘܿܢ ܚܲܝܘܼ̈ܗܝ ܡ̣ܢ ܚܘܼܙ̈ܕܵܓܹܐ. ܟ̰ܵܬܘܼܢ ܝܼܠܵܗ̇ ܪܵܒܵܐ ܩܵܐ ܒܢܲܝܢܵܫ̈ܵܐ ܠܸܚܵܝܵܐ ܨܦܵܝܼ: ܘܠܵܐ ܙܹܐ ܝܑܼـܠܵܗ̇ ܗܲܣܵܢܵܐܝܼ ܦܸܠܚܵܢܵܐ ܕܙܲܕܝܼܩܘܼܬܵܐ ܠܦܲܓ̣ܪ̈ܵܢܵܝܹܐ. ܦܲܓ̣ܪܵܐ ܗܲܪ ܦܲܓ̣ܪܵܐ ܝܼܠܹܗ ܟܡܵܐ ܕܫܵܗܒ̣ܘܼܬܵܐ ܝܼܠܵܗ̇ ܓܵܢܵܐ ܕܒܲܪܢܵܫܵܐ: ܐܘܿܦ ܫܵܗܘܵܬܵܐ ܠܹܐ ܝܼܠܵܗ̇ ܕܝܼܘܼܗܝ ܐܸܠܵܐ ܕܐَܚܹܪَܢܵܐ ܝܼܠܵܗ̇: ܐَܚܹܪَܢܵܐ ܒܸܥܡܵܪܵܐ ܝܼܠܹܗ ܓܵܘ ܗ̇ܘ ܩܲܨܪܵܐ ܬܘܼܪܨܵܐ ܝܼܠܹܗ ܡ̣ܢ ܛܝܼܢܵܐ ܚܲܪܒ̣ܵܢܵܐ. ܒܥܸܕܵܢܵܐ ܕܝܼܠܹܗ ܚܵܝܵܐ ܚܲܕَܟ̰ܵܐ ܟܹܐ ܒܵܪܛܸܢ ܡ̣ܢ ܩܵܕَܡ ܕܚܵܪܸܒ̣ ܚܲܪܒ̣ܵܢܵܐ ܝܼܠܹܗ ܟܡܵܐ ܕܐܸܢ ܐܝܼܬ ܒܝܼـܹܗ ܣܵܡܵܐ ܕܚܲܝܹ̈ܐ. ܐܘܿܦ ܗܲܪ ܗ̇‌ܝ ܕܚܲܝܘܼܗ̇ ܟܸܪܝܹܐ ܝَܢܵܐ ܩܵܐ ܡܲܚܲܝܬܹܗ. ܘܐܸܢ ܚܲܝܘܼܬܵܐ ܕܐܝܼܬ ܒܝܼܹܗ ܒܵܨܘܼܪܬܵܐ ܝܼܠܵܗ̇ ܡ̣ܢ ܚܲܝܘܼܬܵܐ. ܕܵܐܟ̣ܝܼ ܡܵܨܹܐ ܠܸܚܵܝܵܐ ܓܵܘ ܚܲܝܹ̈ܐ ܕܟܹܐ ܐܵܬܝܼ ܠܸܚܪܵܒ̣ܵܐ.

ܡܕܪܫܐ؛ ܓ.

(ܒܫܘܼܒ̣ܚܵܐ ܠܪ̈ܲܚܡܲܝܟ).

     ܥܘܼܢܵܝܵܐ. ܢܹܐܬ̣ܘܿܢ ܪ̈ܲܚܡܲܝܟ ܡܵܪܝ ܠܐܝܼܵܠܹܗ ܕܓܸܢܣܲܢ ܫܝܼܛܵܐ: ܕܗܵܐ ܚ̣ܵܒܼ ܘܐܲܫܦܸܠ ܚܹܝܠ ܚܲܝܘܼܬܹܗ ܒܐܵܓ̣ܘܿܢ ܚܲܫܹ̈ܐ.

     ܒܵܬܹ̈‌ܐ. ܦܫܘܿܛ ܠܹܗ ܐܝܼܕܼܵܐ ܠܐܵܓ̣ܘܿܢܸܣܛܵܐ ܪܦܸܐ ܪܸܥܝܵܢܵܐ: ܕܗܵܐ ܙܩܲܦ̣ ܨܸܒ̣ܥܵܐ ܘܠܵܐ ܡܨܸܐ ܕܢܹܐܚܘܿܕܼ ܕܲܪܵܐ ܒܓܸܠܝܵܐ. ܩܥܝܼ ܘܠܲܒܸܿܒܲܝܗ‌ܝ ܠܲܩܪܲܒ̣ܬܼܵܢܵܐ ܡܸܬܼܚܲܒܿܠܵܢܵܐ: ܕܗܵܐ ܐܸܬ̣ܪܲܦܝܼܘ ܕܪ̈ܵܥܹܐ ܕܐܝܼܕܵܘ̈ܗ‌ܝ ܠܡܸܚܢܵܐ ܠܢܝܼܫܵܐ‌܀ ܦܩܘܿܕܼ ܠܲܟ̣ܝܵܢܹ̈ܐ ܡܸܬܼܝܲܕܼܥܵܢܹ̈ܐ ܕܲܢܥܲܕܪܘܼܢܵܝܗ‌ܝ: ܕܗܵܐ ܦܸܕܲܬ݀ ܠܵܗ̇ ܐܝܼܕܹܗ ܠܡܹܐܚܲܕܼ ܩܸܫܬܵܐ ܕܩܘܼܫܬܵܐ. ܩܪܝܼ ܠܠܸܓ̣ܝܘܿܢܹ̈ܐ ܕܲܫܡܲܝܵܢܹ̈ܐ ܕܲܢܣܲܝܥܘܼܢܵܝܗ‌ܝ: ܥܲܕܠܵܐ ܢܸܦܸܠ ܘܢܸܗܘܸܐ ܓܘܼܚܟܵܐ ܠܲܒ̣ܥܸܠܕܲܪܹܗ‌܀ ܟܬ̣ܘܿܒܼ ܘܫܲܕܲܪ ܠܹܗ ܣܲܩܪܵܐ ܕܲܫܡܵܟ ܕܪܲܒܿ ܡ̣ܢ ܟܠܵܐ: ܘܗܵܐ ܡܸܬ̣ܚܲܝܲܠ ܠܡܸܛܥܲܢ ܚܲܫܵܘ̈ܗ‌ܝ ܒܣܲܒ̣ܪܵܐ ܕܲܫܡܵܟܼ. ܐܲܪܡܵܐ ܐܝܼܕܼܵܟ ܒܲܟܼܬܝܼ̈ܒ̣ܵܬܼܵ‌ܐ ܕܦܘܼܪܩܵܢ ܚܲܝܵܘ̈ܗ‌ܝ: ܘܗܵܐ ܡܸܣܬܲܪܕܝܼܢ ܚܲܫܹ̈ܐ ܘܫܹܐܕܹ̈ܐ ܕܲܢܚܘܼܪܘܼܢ ܒܹܗ‌܀

ܩܪܝܢܐ؛ ܓ

ܡܘܬܒ̣ܐ؛ ܐ.

ܢܓ̰ܘܿܘ ܒܐܲܣܟܵـܪ̈ܵܘܵܬܲܝܗ‌ܝ ܦܵـܠܵܫܹ̈ܐ ܕܟܪ̈ܝܼܒܹܐ ܝَܢܵܐ ܡܸܢܹܗ: ܘܗܵܐ ܒܸܙܕܲܥܝܵܐ ܝَܢܵܐ ܡ̣ܢ ܦܘܼܩܕܵܢܵܐ ܕܫܸܡܵܐ ܕܐܝܼܬܘܼܬܘܼܟܼ. ܫܵܕܸܪ ܚܲܕَ ܡܲܠܲܐܟ̣ܵܐ ܐܲܝܟܼ ܒܥܸܕܵܢܵܐ ܕܐܵܬܘܿܪܵܝܵܐ: ܘܗܵܐ ܦܝܵܫܵܐ ܝَܢܵܐ ܒܘܼܪ̈ܒܸܙܹܐ ܚܲܝܠܵܘܵܬܹ̈ܐ ܕܒܝܼܫܵܐ ܐܵܢܝܼ ܕܚܘܼܪ̈ܕܝܼـܹܐ ܝَܢܵܐ ܐܸܠܹܗ. ܫܵܕܸܪܹܗ ܪܸܡܙܘܼܟܼ ܐܲܝܼܟܼ ܐܹܫܲܥܝܵܐ ܠܟܸܣ ܚܹܙܲܩܝܵܐ: ܡ̣ܢ ܓܹܢَܒ ܬܹܐܢܹ̈ܐ ܡܲܬܸܒ̣ ܪ̈ܲܚܡܹܐ ܥܲܠ ܒܪ̈ܝܼܢܵܬܲܢ. ܡܲܫܡܥܝܼ ܠܲܢ ܗ̇ܝ ܒܪܵܬَ ܩܵܠܵܐ ܕܠܟܸܣ ܚܹܙܲܩܝܵܐ: ܡܒܵܕܵܠ ܚܲܝܹ̈ܐ ܗܵܐ ܡܲܙܝܘܼܕܹܐ ܦܘܼܚܵܠܵܐ ܕܓܢܵܗܵܐ. ܗܹܐ ܝܵܐ ܡܵܪܝܼ ܡܲܕܥܸܪܲܢ ܠܟܸܣ ܨܵܚܘܼܬܵܐ ܕܦܲܓ̣ܪܵܐ ܘܕܓܵܢܵܐ. ܕܠܹܐ ܝَܠܹܗ ܚܪܝܼܒܼܵܐ ܒܚܪ̈ܲܒ̣ܝܵܬܹ‌ܐ ܨܵܘܵܢܹ̈ܐ. ܦܠܘܿܛ ܠܗܵܘܵܪܲܢ ܐܲܝܟܼ ܗܿܘ ܪܸܡܙܵܐ ܕܒܪܹܐܠܹܗ ܚܘܼܒܘܼܟܼ ܕܥܲܒ̣ܪܲܚ ܘܡܲܒܣܸܡܲܚ ܓܵܘ ܡܲܢܙܸܠ ܕܚܲܝܹ̈ܐ ܪ̈ܘܼܚܵܢܵܝܹܐ. ܒܲܗܪܸܢ ܦܲܐܬ̈ܘܵܬܲܢ ܘܛܵܥܘܝܼ ܒܪ̈ܲܚܡܘܼܟܼ ܠܸܛܠܵܩܲܢ: ܕܠܵܐ ܦܵܐܸܫ ܚܪܝܼܒ̣ܵܐ ܫܘܼܦܪܵܐ ܕܥܲܦܪܲܢ: ܗ̇ܘ ܒܫܸܡܘܼܟܼ ܝܼܠܹܗ ܛܒ̣ܝܼܥܵܐ. ܚܕܝܼ ܒܦܲܪܦܲܠܬܲܢ ܐܲܝܟܼ ܩܸܣܲܬܹܗ ܕܒܪܘܿܢܵܐ ܙܥܘܿܪܵܐ: ܘܗܲܡܙܸܡ ܥܲܡܲܢ ܒܩܵܠܹ̈ܐ ܕܗܹܒ̣ܝܼ ܕܪ̈ܫܝܼܡܹܐ ܝَܢܵܐ ܒܝܼـܹܗ. ܥܲܡ ܥܵܠܕܝܼܵܢܵܐ ܦܠܸܚܠܲܢ ܚܘܼܪܵܝܼ ܘܙܠܸܡܠܲܢ ܗܵܩܲܢ. ܘܒܚܸܪܒܵܝܘܼܬܵܐ ܕܫܵܗܘܵܬܝܵܬܹ̈ܗ ܕܚܝܼܵܠܲܢ ܒܝܼܫܵܐܝܼܬ. ܚܛܹܐܠܲܢ ܘܡܘܼܟܪܸܒܠܲܢ ܐܸܠܘܼܟܼ ܘܥܒܸܕܠܘܼܟܼ ܫܵܦܵܩܲܬ ܒܥܸܕܵܢܵܐ ܕܟܪܸܒܠܘܼܟܼ ܝܲܢ ܒܸܟܪܵܒܵܐ ܝَܘܸܬ ܗَܘܵܐ: ܘܠܹܐ ܚܵܫܚܲܚ ܕܩܵܪܲܚ ܓܵܢܲܢ ܒܢܘܿܢܹ̈ܐ ܕܫܸܡܘܼܟܼ. ܗܲܒَ̣ܠܲܢ ܕܗܵܘܲܚ ܐܲܝܟܼ ܕܒ̣ܝܼܩܹ̈ܐ ܒܗܵܩܵܐ ܕܦܸܠܚܵܢܵܐ ܕܒܲܝܬܘܼܟܼ: ܘܫܵܩܠܲܚ ܐܸܪܘܵܢܵܐ ܐܲܝܟܼ ܡܸܣܟܹܢܹ̈ܐ ܡ̣ܢ ܨܘܼܦܪܘܼܟܼ. ܘܐܸܢ ܡܵܨܝܵܐ ܡܲܟܡܸܠ ܒܦܸܠܚܵܢܵܐ ܕܚܲܝܠܵܐ ܕܪܸܡܙܘܼܟܼ̣. ܘܡܵܝܬَ‌ܝܼ ܠܐܲܫܟܵܪܵܐ ܣܸܪ ܕܟܬܸܒ̣ܠܘܼܟܼ ܒܘܼܬ ܕܝܼـܲܢ. ܟܸܣܠܲܢ ܐَܡܸܪܘܼܟܼ ܐܵܕܝܼܵܐ ܡ̣ܢ ܡܵܘܬܵܐ ܚܝܼܠܵܘܟ̣ܘܿܢ: ܘܡ̣ܢ ܛܠܵܩܵܐ ܕܠܵܐ ܝَܕܸܥܬܵ‌ܐ ܕܸܪܵܘܟ̣ܘܿܢ ܠܟܸܣܠܝܼ. ܦܵܩܸܕ ܠܫܵܦܵܩܲܬܘܼܟܼ ܕܟܵܣܹܐ ܒܹܨܘܼܪܘܼܬܲܢ ܒܓ̰ܘܼܒܵܐ ܕܚܸܩܪܵܐ: ܘܡܲܬܸܒ̣ ܒܐܝܼܕܲܢ ܪܲܗܒ̣ܘܼܢܵܐ ܕܚܲܝܹ̈ܐ ܐܲܝܟܼ ܥܸܙܲܩܬܵܐ. ܦܲܪܦܘܼܠܹܐ ܝܘܲܚ ܒܪܸܡܙܘܼܟܼ ܕܬܵܪܸܨ ܩܵܕَܡܲܢ ܕܸܒ̣ܚܵܐ ܕܒܪܘܿܢܘܼܟܼ: ܘܛܵܪܸܕ ܡ̣ܢ ܗܲܕܵܡܲܢ ܡܹܐܟ̣ܘܼܠܬܹܗ ܡܲܪܝܼܪܬܵܐ ܒܘܼܫ ܡ̣ܢ ܡܵܘܬܵܐ. ܘܐܸܢ ܐܝܼܬ ܕܗ̇ܘ ܒܲܚܘܼܠܹܐ ܝܼܠܹܗ ܒܦܘܼܪܩܵܢܵܐ ܕܚܲܝ̈ܝܲܢ ܘܒܬܵܘܲܒܬܲܢ: ܚܘܼܫ ܬܵܪܸܨܠܹܗ ܚܘܼܒܘܼܟܼ ܠܡܲܪܝܼܪܘܼܬܵܐ ܕܫܵܗܘܵܬܹܗ ܒܚܸܠܝܘܼܬܵܐ ܕܚܲܝܹ̈ܐ. ܩܪܝܼ ܠܡܲܠܲܐܟ̣̈ـܹܐ ܘܡܵܦܨܸܚ ܠܗَܘܿܢ  ܒܬܵܘܲܒܬܲܢ: ܐܵܢܝܼ ܕܦܫܸܡܠܗَܘܿܢ ܕܚܛܹܐ ܠܲܢ ܐܵܕܝܼܵܐ ܚܘܼܫ ܚܵܕܝܼ ܦܸܫܠܲܢ ܡܘܼܟܫܸ̈ܛܹܐ. ܣܵܙܓܸܪܘܼܢ ܐܵܢܝܼ ܕܟܪ̈ܝܼܒܹܐ ܗَܘܵܘ ܒܘܼܬ ܥܵܘܠܲܢ: ܘܡܲܕܸܪܘܼܢ ܠܟܸܣ ܚܸܠܡܲܬ ܕܣܢܝܼܩܘܼܬܵܐ ܕܚܲܝ̈ܝܲܢ. [ܬܲܪ̈ܥܹܐ ܕܡܸܛܪܵܐ] ܐܲܝܟܼ ܕܥܵܕܲܬ ܝَܢܵܐ ܒܚܲܝܠܘܼܟܼ ܟܹܐ ܫܵܥܫܝܼ ܠܗܵܘܵܐ ܘܝܵܗَܒ̣ܝܼ ܠܹܗ ܚܲܝܠܵܐ ܕܛܵܥܸܢ ܡܝܼ̈ܵܐ ܠܥܘܿܠܘܿܠ ܡ̣ܢ ܚܲܝܠܹܗ. ܕܵܪܝܼ ܓܵܘ ܦܘܼܡܹܗ ܠܵܓ̣ܵܘܹ̈ܐ ܕܫܲܝܢܵܐ ܘܕܣܵܙܓܵܪܘܼܬܵܐ: ܕܠܵܐ ܗܵܘܹܐ ܗܵܝܘܲܢ ܒܝܲܕ ܫܘܼܚܠܵܦܹܗ ܠܒܲܕܲܪ ܡ̣ܢ ܪܝܼܙܵܐ ܗܲܪ ܐܲܢܹܐ ܗܵܘܝܼ ܠܥܸܠܘܿܠ ܡ̣ܢ ܚܲܝܠܹܗ ܐܲܝܟܼ ܛܲܪ̈ܝܵܢܹܐ ܕܓܵܡܝܼ: ܘܓܵܫܩܝܼ ܠܦܲܐܬܘܵܬܹ̈ܐ ܕܐܲܪܥܵܐ ܠܚܲܝܠܵܐ ܕܪَܚܲܫܬܹܗ. ܘܚܵܙܝܼ ܠܪَܚܲܫܬܹܗ ܐܲܝܟܼ ܦܲܪ̈ܓ̰ܵܢܹܐ ܓܵܘ ܡܵܝܕܵܢ. ܘܓܵܕܠܝܼ ܟܠܝܼܠܵܐ ܕܫܵܟܲܪܬܵܐ ܠܫܸܡܘܼܟܼ ܕܩܲܡ ܡܵܚܕܸܬ ܠܲܢ ܒܝܼـܹܗ. ܗܹܐ ܝܵܐ ܡܵܪܝܼ ܩܵܒܸܠ ܡܲܠܚܲܡܬܵ‌ܐ ܕܗܹܡܸܙ̈ܡܵܢܲܢ ܐܵܦܸܢ ܕܡܘܼ̈ܣܠܝܹܐ ܝَܢܵܐ: ܗܲܒَ̣ܠ ܦܘܼܪܥܵܢܵܐ ܠܚܝܼܵܠ ܕܓܵܢܲܢ ܐܵܦܸܢ ܙܲܒܘܼܢ ܝܼܠܹܗ. ܗܹܐ ܝܵܐ ܡܵܪܝܼ ܡܲܚܫܸܚܠܵܗ̇ ܠܗܹܡܸܙܡܵܢ ܕܦܘܼܡܵܢ ܠܡܲܕܘܼܪܹܐ ܓ̰ܘܼܘܵܒ: ܕܡܸܢܘܼܟܼ ܫܵܡܥܵܚ ܕܬܘܼܘܸܒܠܗَܘܿܢ ܚܲܛܵܝܹ̈ܐ ܐܝܼܬ ܗܹܒ̣ܝܼ ܗܹܐ ܡܵܪܝܼ ܡܵܦܨܸܚ ܠܗܵܘܵܐ ܕܦܫܝܼܡܵܐ ܝܼܠܹܗ ܒܘܼܬ ܓܢܵܗܲܢ: ܘܡܵܘܬܒ̣ܵܐ ܝܼܠܹܗ ܦܘܼܡܹܗ ܟܠܝܼܠܵܐ ܕܢܵܛܘܼܦܝܵܬܹ̈‌ܐ ܕܣܘܼܙܓܵܪܲܢ. ܗܹܐ ܝܵܐ ܡܵܪܝܼ ܗܵܘܝܼ ܩܵܠܹ̈ܐ ܕܦܘܼܡܲܢ ܩܕܝܼܠܹ̈ܐ ܠܚܲܙܝܼܢܘܼܟܼ: ܘܦܵܬܚܲܚ ܘܫܵܩܠܲܚ ܦܘܼܚܵܠܵܐ ܕܓܢܵܗܵܬܹ̈ܐ ܘܬܘܼܪܣܵܝܵܐ ܕܙܲܒ̣ܢܵܐ.

ܡܕܪܫܐ؛ ܕ.

(ܒܲܦܬܲܚܠܲܢ ܡܵܪܲܢ).

     ܥܘܼܢܵܝܵܐ. ܠܵܐ ܡܵܪܝ ܬܲܗܡܸܐ ܡ̣ܢ ܒܵܥܘܼܬܼܵܐ ܕܡܸܣܟܹܿܢܘܼܬܲܢ: ܕܠܵܐ ܢܸܬ̣ܪܲܦܸܐ ܣܲܒ̣ܪܲܢ ܕܲܥܠܲܝܟ ܒܲܦܣܵܩ ܣܲܒ̣ܪܵܐ.

     ܒܵܬܹ̈‌ܐ. ܠܵܐ ܡܵܪܝ ܬܲܗܦܸܟܼ ܐܲܦܲܝ̈ܟ ܡܸܢܲܢ ܒܲܙܒܲܢ ܪܘܼܓ̣ܙܵܐ: ܕܠܵܐ ܢܒܲܙܚܘܼܢ ܒܲܢ ܫܹܐܕܹ̈ܐ ܛܪ̈ܘܼܢܹܐ ܐܲܝܟܼ ܕܲܡܥܵܕܝܼܢ. ܠܵܐ ܡܵܪܝ ܬܸܫܕܹܝܢ ܡ̣ܢ ܥܘܼܕܪܵܢܵܟܼ ܐܲܝܟܼ ܕܲܠܒܼܝܼܫܹ̈ܐ: ܒܫܸܦܠܲܢ ܐܲܝܟܼ ܕܲܒ̣ܩܲܕܼܡܵܐ‌܀ ܠܵܐ ܡܵܪܝ ܬܸܗܘܸܐ ܠܵܐ ܪܲܚܡܵܢܵܐ ܕܐܲܢَܬ̇ ܪܲܚܡܵܢܵܐ ܐܲܢَܬ̇: ܚܵܣ ܡܵܪܝ ܠܵܐ ܗ݀ܘܲܝܬ̇ ܡܹܐܡܲܪ ܐܸܡ̇ܪܹܬܼ ܠܦܘܼܬ̣ ܣܘܼܢܩܵܢܲܢ. ܠܵܐ ܡܵܪܝ ܢܸܙܥܲܪ ܫܸܡ ܪܲܒܿܘܼܬܼܵܟܼ ܒܥܸܠܲܬ̣ ܥܵܘ̣ܠܲܢ: ܠܵܐ ܕܹܝܢ ܙܵܥܲܪ ܘܠܵܐ ܐܸܢ ܢܲܪܫܲܥ ܐܵܠܸܦ ܐܲܠܦ̈ܝܼܢ‌܀ ܠܵܐ ܡܵܪܝ ܬܸܗܘܸܐ ܒܨܝܼܪ ܥܘܼܕܼܪܵܢܵܐ ܘܡܸܣܟܹܿܝܢ ܓܲܙܵܐ: ܐܘܿܗ ܕܲܓܵܠ ܗَܘܼ ܡܸܕܸܿܡ ܕܐܸܡ̇ܪܹܬ̣ ܥܲܠ ܐܝܼܬܼܘܼܬܼܵܟܼ. ܠܵܐ ܡܵܪܝ ܬܸܗܘܸܐ ܐܲܝܟܼ ܬܵܘܬܵܒ̣ܵܐ ܒܒܼܵܪܘܿܝܘܼܬ̣ܵܟܼ: ܘܠܵܐ ܐܲܝܟܼ ܐܵܪܚܵܐ ܕܣܵܛܹ̇ܐ ܠܲܡܒ̣ܵܬܼ ܒܲܕܼܠܵܐ ܕܝܼܠܹܗ‌܀

ܩܪܝܢܐ؛ ܕ

ܡܘܬܒ̣ܐ؛ ܐ.

ܠܵܐ ܡܵܪܝ ܗܵܘܹܝܬܿ ܐܲܝܟܼ ܒܲܪܢܵܫܵܐ ܟܲܕ ܐܲܢَܬ ܐܲܠܵܗܵܐ ܝَܘܸܬ: ܘܠܵܐ ܙܹܐ ܓܲܒ̣ܪܵܐ ܕܠܹܐ ܡܵܨܹܐ ܠܡܦܵܪܘܿܩܹܐ ܟܲܕ ܐܲܢَܬ ܦܵܪܘܿܩܵܐ ܝَܘܸܬ. ܘܐܸܢ ܓܢܵܗ̈ܵܬܲܢ ܗܘܹܐ ܠܗَܘܿܢ ܚܲܝܠܵܢܹ̈ܐ ܒܘܼܫ ܡ̣ܢ ܓܢܵܗܵܬܹ̈ܐ ܓܵܘ ܟܠܲܝܗܝ ܕܵܘܪܹ̈ܐ: ܐܲܢَܬ ܗܲܒَ̣ܠ ܦܘܼܚܵܠܵܐ ܒܘܼܬ ܚܵܬܸܪ ܫܸܡܘܼܟܼ. ܡܝܲܩܪܵܐ ܕܩܪܝܼܠܲܢ ܒܝܼـܹܗ. ܘܐܸܢ ܣܢܵܝ̈ܵܬܲܢ ܡܘܼܣܠܝܼܠܗَܘܿܢ ܠܦܲܐܬܘܵܬܹ̈ܐ ܕܗܵܘܵܐ ܨܸܦܝܵܐ: ܐܲܢَܬ ܠܵܐ ܡܲܚܙܸܬ̇ ܠܲܢ ܦܲܐܬܘܵܬܹ̈ܐ ܕܟܲܪܒܵܐ ܕܠܹܐ ܝَܢܵܐ ܚܫܝܼܚܹ̈ܐ ܩܵܬܘܼܟܼ. ܘܐܸܢ ܒܝܼܫܘܼܬܵܐ ܕܥܵܘܠܲܢ ܡܘܼܐَܟ̣ܸܠܵܗ̇ ܛܵܒ̣ܵܬܹ̈‌ܐ: ܐܲܢَܬ ܠܵܐ ܫܲܚܠܸܦܸܬ̇ ܫܸܡܵܐ ܕܛܵܒ̣ܘܼܬܘܼܟܼ ܕܠܹܐ ܦܵܐܸܫ ܫܘܼܚܠܸܦܵܐ. ܐܲܢَܬ̇ ܛܵܒ̣ܵܐ ܝَܘܸܬ ܘܟܹܐܢܵܐ: ܘܠܹܐ ܦܵܝܫܵܐ ܡܫܸܚܬܵ‌ܐ ܠܵܐ ܛܵܒ̣ܘܼܬܘܼܟܼ ܘܠܵܐ ܙܹܐ ܟܹܐܢܘܼܬܘܼܟܼ. ܐَܢܵܫܵܐ ܠܹܐ ܝܵܕܥܹܐ ܕܩܵܪܝܼܠܘܼܟܼ. ܒܫܸܡܵܐ ܕܚܫܝܼܚܵܐ ܝܼܠܹܗ ܠܫܸܡܘܼܟܼ: ܟܠܲܝܗ‌ܝ ܫܘܼܡܵܗܹ̈ܐ ܒܵܨܘܿܪܹ̈ܐ ܝَܢܵܐ ܠܓܘܼܪܘܼܬܵܐ ܕܚܸܩܪܘܼܟܼ. ܗ̇ܘ ܕܩܵܪܝܼܠܘܼܟܼ ܛܵܒ̣ܵܐ ܩܵܠܵܐ ܕܟܹܐܢܘܼܬܘܼܟܼ ܓܲܪܓܘܼܡܹܐ ܝܼܠܹܗ ܒܐܲܪܥܵܐ. ܘܐܸܢ ܡܸܕܪܹܐ ܩܵܪܝܼܠܘܼܟܼ ܟܹܐܢܵܐ ܫܡܲܝܵܐ ܘܐܲܪܥܵܐ ܡܸܠܝܹ̈ܐ ܝَܢܵܐ ܡ̣ܢ ܪ̈ܲܚܡܘܼܟܼ. ܗ̇ܘ ܕܩܵܪܝܼܠܘܼܟܼ ܟܸܣܝܵܐ [ܛܸܫܝܵܐ] ܗܵܐ ܓܸܠܝܹ̈ܐ ܝَܢܵܐ ܦܸܠܚܵܢܵܢ̈ܘܼܟܼ ܩܵܕَܡ ܥܲܝܢܹ̈ܐ ܕܟܠ ܒܸܪ̈ܝܵܬܹܐ: ܗ̇ܘ ܕܩܵܪܝܼܠܘܼܟܼ ܓܲܠܝܵܐ ܠܲܝܬ ܓܵܘ ܒܸܪ̈ܝܹܐ ܕܡܵܨܹܐ ܚܵܙܝܼܠܘܼܟܼ. ܫܡܸܥܠܘܼܟܼ ܗ̇ܘ ܕܩܲܡ ܩܵܪܝܼܠܘܼܟܼ. ܐܝܼܢܵܐ ܩܵܠܲܢ ܡܘܼܨܝܸܬܠܹܗ ܐܸܠܘܼܟܼ ܡ̣ܢ ܩܵܕَܡ ܕܩܵܪܝܼܠܘܼܟܼ: ܘܕܦܲܪܦܘܼܠܹܐ ܝܘܲܚ ܕܚܘܼܒܘܼܟܼ ܩܵܕܡܵܝܵܐ ܦܵܚܸܠ ܠܓܢܵܗ̈ܵܬܲܢ. ܠܹܐ ܝܘܲܚ ܒܝܼܕܲܥܝܵܐ ܠܵܐ ܡܨܵܠَܲ ܘܠܵܐ ܙܹܐ ܡܫܲܒܚܲܚ. ܒܸܙܕܲܥܝܵܐ ܝܘܲܚ ܕܐܵܡܪܲܚ ܗܹܡܸܙܡܵܢܹ̈ܐ ܕܠܹܐ ܚܵܫܚܝܼ ܐܸܠܘܼܟܼ. ܕܵܐܟ̣ܝܼ ܨܵܠܲܚ ܨܠܘܿܬܲܢ ܗܵܘܝܵܐ ܕܠܵܐ ܒܵܨܘܿܪܘܼܬܵܐ ܟܲܕ ܗ̇ܘ ܟܵܡܝܼܠ ܝܼܠܹܗ: ܘܕܵܐܟ̣ܝܼ ܫܵܒܚܲܚ ܠܗ̇ܘ ܒܝܲܕ ܫܘܼܒ̣ܚܹܗ ܟܸܠܝܵܐ ܝܼܠܹܗ ܡ̣ܢ ܫܘܼܪܵܝܵܐ: ܒܲܣ ܐܸܢ ܦܝܼܫܵܐ ܝܼܠܹܗ ܡܫܘܼܒܚܵܐ ܒܝܲܕ ܬܸܫܒܘܿܚܬܵܐ: ܘܐܸܢ ܓܵܪܘܘܼܣܹܐ ܝܼܠܹܗ ܒܫܘܼܒ̣ܚܵܐ ܕܡܸܢܲܢ ܒܸܗܘܵܝܵܐ ܝَܠܹܗ ܟܵܡܝܼܠ. ܘܐܸܢ ܦܝܵܫܵܐ ܝَܠܹܗ ܡܘܼܒܨܸܪܵܐ ܓܘܼܪܬܵܐ ܝܼܠܵܗ̇ ܒܵܨܘܿܪܘܼܬܹܗ ܡ̣ܢ ܬܸܫܒܘܿܚܬܹܗ. ܘܐܸܢ ܒܦܘܼܡܲܢ ܦܝܵܫܵܐ ܝَܠܹܗ ܡܩܘܼܕܫܵܐ ܡܲܙܝܘܼܕܹܐ ܝܼܠܹܗ ܥܲܠ ܬܸܫܒܘܿܚܬܹܗ. ܐܸܢ ܒܸܟܪܵܒܵܐ ܝܼܠܹܗ ܛܵܫܘܼܝܹܐ ܝܼܠܹܗ ܡܸܢܹܗ ܒܵܨܘܿܪܘܼܬܵܐ ܘܒܸܥܒ̣ܵܕܵܐ ܝܼܠܹܗ ܓܢܵܗܵܐ: ܘܐܸܢ ܣܵܙܓܘܼܪܹܐ ܝܼܠܹܗ ܐܲܚܢܲܢ ܡܘܼܚܙܝܼܠܲܢ ܓ̰ܲܕܵܐ ܕܣܘܼܙܓܵܪܵܐ. ܘܐܸܢ ܒܢܝܼܵܬ ܒܸܦܠܵܚܵܐ ܝܼܠܹܗ ܚܲܕَ ܡܸܢܝܼ ܒܗ̇‌ܝ ܥܸܕܵܢܵܐ: ܘܒܥܸܕܵܢܵܬܹ̈‌ܐ ܐَܚܹܪَ̈ܢܹܐ ܒܸܥܒ̣ܵܕܘܼܗܝ ܝَܢܵܐ ܡܲܓ̰ܒܘܼܪ ܠܝܼܕܲܥܝܵܐ ܡܸܢܕܝܼ ܕܠܹܐ ܝܵܕܥܹܐ ܗَܘܵܐ. ܘܐܸܢ ܐܵܗܵܐ ܠܹܐ ܝܵܕܥܹܐ ܠܝܼܛܵܐ ܝܼܠܹܗ ܦܘܼܡܵܐ ܕܐܵܡܸܪ: ܡܘܼܕܝَ ܨܦܵܝܘܼܬܵܐ ܩܸܢܝܵܐ ܝܼܠܹܗ ܒܥܵܩܸܠܕܵܪܘܼܬܵܐ ܕܒܸܪ̈ܝܵܬܘܼܗܝ. ܠܵܐ ܝܵܐ ܒܢܘܿܢܹ̈ܐ ܕܐܲܪܥܵܐ ܠܵܐ ܬܲܚܡܸܢܝܼܬܘܿܢ ܕܐܝܼܬܘܿܢ ܡ̣ܢ ܐܲܪܥܵܐ: ܠܲܝܬ ܒܐܝܼܬܘܼܬܵܐ ܡܸܢܕܝܼ ܕܝܼܠܹܗ ܒܵܨܘܿܪܵܐ ܡ̣ܢ ܐܝܼܬܘܼܬܵܐ ܫܸܡܘܼܗ̇ ܝَܕܸܥܝܵܐ ܝܼܠܹܗ ܒܕܵܝܸܡܘܼܬܘܿܗ̇: ܩܵܐ ܒܘܼܬ ܥܲܡܘܼܗ̇ ܝܼܠܵܗ̇ ܐܘܿܦ ܝَܕܸܥܬܘܼܗ̇ ܘܥܵܩܸܠܕܵܪܘܼܬܘܼܗ̇. ܩܵܕَܡ ܟܠ ܡܸܢܕܝܼ ܝܼܠܵܗ̇. ܘܝܑܼـܠܵܗ̇ ܕܵܐܟ̣ܝܼ ܕܝܑܼـܠܵܗ̇: ܘܠܹܐ ܛܵܠܸܩ ܠܵܗ̇ ܡܸܢܕܝܼ ܕܗܘܹܐ ܠܹܗ ܘܕܗܕܝܼܪܵܐ ܝܼܠܹܗ ܠܸܗܘܵܝܵܐ. ܗܵܕܟ̣ܵܐ ܘܵܓ̰ܸܒ ܝܼܠܵܗ̇ ܕܬܲܚܡܸܢ ܒܸܪܝܵܐ ܒܘܼܬ ܒܲܪܝܵܢܘܼܗܝ: ܘܐܵܗܵܐ ܕܲܝܢܵܢܵܐ ܝܼܠܹܗ ܒܲܪܢܵܫܵܐ ܕܬܲܡܸܡܠܹܗ ܩܵܘܠܹܗ: ܕܲܝܢܵܐ ܕܚܘܼܒܵܐ ܕܲܝܢܵܢܹܐ ܝܘܲܚ ܠܒܲܪܝܵܢܲܢ: ܐَܬܹܐܡܘܼܢ ܕܡܲܚܙܲܚ ܕܦܪܲܥܝܵܐ ܝܘܲܚ ܚܲܕَܟ̰ܵܐ ܡ̣ܢ ܪܵܒܵܐ. ܠܹܐ ܝܼܠܹܗ ܒܸܛܠܵܒܵܐ ܡܸܢܲܢ ܦܘܼܪܥܵܢܵܐ  [ܗܵܩܵܐ] ܐܲܝܟܼ ܕܝܼܠܹܗ ܒܵܨܘܿܪܵܐ: ܐܝܼܢܵܐ ܐܵܗܵܐ ܬܘܼܓܒܸܪܬܵܐ ܝܼܠܵܗ̇ ܕܐܲܚܢܲܢ ܩܵܢܲܚ ܡ̣ܢ ܚܲܙܢܘܼ̈ܗܝ: ܚܲܙܢܵܐ ܕܚܲܝܹ̈ܐ ܕܠܹܐ ܐܵܬܝܼ ܠܸܦܪܵܩܵܐ ܕܩܸܢܝܵܐ ܝܼܠܹܗ ܒܸܟܝܵܢܹܗ: ܘܫܵܗܒ̣ܘܼܬܹܐ ܝܼܠܹܗ ܪܵܒܵܐ ܕܝܵܗَܒܸܠ ܡܸܢܘܼܗ̇ ܠܸܒܢܘܿܢܹ̈ܐ ܕܒܲܝܬܹܗ. ܒܢܘܿܢܹ̈ܐ ܕܝܲܪܬܘܼܬܵܐ ܕܚܘܼܒܵܐ ܕܒܪܘܿܢܹܗ ܩܪܹܐܠܹܗ ܠܲܟܝܵܢܲܢ: ܒܘܼܬ ܕܗ̇‌ܝ ܬܵܠܘܼܥܡܲܢ ܝܼܠܹܗ ܘܡܵܠܘܿܦܲܢ ܚܘܼܒܵܢܵܐܝܼܬ. ܕܗܵܕܟ̣ܵܐ ܩܵܒܠܲܚ ܬܵܠܲܥܡܝܵܬܹ̈‌ܐ ܡ̣ܢ ܡܵܪܘܼܬܹܗ: ܘܠܵܐ ܣܵܩܕܲܚ ܒܓ̰ܘܼܢܼܓ̰ܵܪܹ̈ܐ ܕܟܸܦܢܵܐ ܘܕܡܲܪܥܵܐ. ܐܸܢ ܫܸܡܵܐ ܕܒܢܘܿܢܹ̈ܐ ܣܵܪܵܣܬ ܝܼܠܹܗ ܥܲܠ ܚܝܼܵܠܲܢ: ܒܲܣ ܚܘܼܫ ܡܲܩܘܲܚ ܐܘܿܦ ܡܲܪܕܘܼܬܲܢ ܕܝܼܠܵܗ̇ ܩܵܐ ܝܘܼܬܪܵܢܵܐ. ܕܠܵܐ ܒܝܲܕ ܬܲܡܒܵܠܘܼܬܵܐ ܩܲܒܠܲܚ ܓ̰ܘܼܢܓ̰ܵܪܹ̈ܐ ܡ̣ܢ ܒܲܪܝܵܢܲܢ: ܘܠܵܐ ܙܹܐ ܒܛܲܪܛܲܡܬܵ‌ܐ ܟܵܠܲܚ ܕܲܪܩܘܼܒ̣ܠ ܕܦܠܵܫܵܐ ܕܫܘܼܚܠܵܦܵܐ ܕܙܲܒ̣ܢܹ̈ܐ. ܐܵܗܵܐ ܐܵܚܟ̰ܝܼ ܛܵܠܒܲܚ ܡܸܢܹܗ ܒܥܸܕܵܢܵܐ ܕܓ̰ܘܼܢܓ̰ܵܪܵܐ: ܕܠܵܐ ܡܵܪܝܼ ܒܟܲܪܒܵܐ ܩܸܫܝܵܐ ܡܲܢܚܸܣܠܲܢ ܐܲܝܟܼ ܦܘܼܠܚ̈ܵܢܲܢ. ܐܲܝܟܼ ܒܪܘܿܢܵܐ ܕܐܝܼܫܲܝ ܒܬܵܢܲܚܬܵ‌ܐ ܦܲܪܦܘܼܠܹܐ ܝܘܲܚ. ܘܒܐܘܼܪܚܵܐ ܕܗܹܡܸܙܡܵܢܘܼܟܼ ܐܵܙܲܠَܚ ܠܘܲܥܕܵܐ ܕܬܵܘܒܵܟܵܪܘܼܬܵܐ.

ܡܕܪܫܐ؛ ܗ.

(ܒܲܒ̣ܪܝܼܟܼ ܗܵܘܿ ܩܵܠܵܐ).

     ܥܘܼܢܵܝܵܐ. ܐܹܝܢ ܡܵܪܝ ܢܸܫܘܸܐ ܠܗܵ‌ܝ̇ ܒܲܪَܬ̣ ܩܵܠܵܐ ܕܲܠܘܵܬ̣ ܕܵܘܝܼܕܼ: ܘܢܸܦܢܸܐ ܠܕܲܪܓ̣ܵܐ ܕܫܘܼܒ̣ܩܵܢ ܥܵܘ̣ܠܵܐ ܒܕܼܘܼܡܝܵܐ ܕܝܼܠܹܗ.

     ܒܵܬܹ̈‌ܐ. ܐܹܝܢ ܡܵܪܝ ܐܲܥܒܲܪ ܣܲܟܼܠܘܼܬܼ ܥܲܒ̣ܕܲܝ̈ܟ ܐܲܝܟܼ ܕܲܕܼܥܲܒ̣ܕܵܟܼ: ܘܐܲܫܡܲܥ ܐܸܢܘܿܢ ܩܵܠ ܫܘܼܒ̣ܩܵܢܵܐ ܕܲܫ̣ܡܲܥ ܟܹܐܢܵܐ. ܟܹܐܝܢ ܗَܘ̣ܵܐ ܕܵܘܝܼܕܼ ܘܲܚܣܲܡ ܒܝܼܫܵܐ ܘܥܲܒ̣ܕܹܗ ܒܝܼܫܵܐ: ܘܕܼܐܵܘܕܝܼ ܕܲܚܛ̣ܵܐ ܠܚ̣ܵܝܗ‌ܝ ܡ̣ܢ ܠܸܒܹܗ ܠܫܸܡ ܒܝܼܫܘܼܬ̣ܵܐ‌‌܀ ܘܐܸܢ ܬܵܘܕܿܝܼܬܼܵ‌ܐ ܠܚܵܬ݀ ܫܸܡ ܒܝܼܫܹ̈ܐ ܘܟܸܬ̣ܒܲܬ݀ ܛܵܒܹ̈ܐ: ܡܵܕܹܝܢ ܩܲܝܵܡ ܣܲܒ̣ܪܵܐ ܠܒ̣ܝܼܫܹ̈ܐ ܕܢܸܗܘܘܿܢ ܛܵܒܹ̈ܐ. ܛܵܒ̣ܵܐ ܕܲܫ̣ܒܲܩ ܓܵܘܪܵܐ ܘܩܸܛܠܵܐ ܒܡܸܠܲܬ̣ ܦܘܼܡܵܐ: ܫܒ̣ܘܿܩ ܣܘܼܪ̈ܚܵܢܹܐ ܕܲܫܟ̣ܝܼܪ̈ܵܬܲܢ ܐܲܝܟܼ ܡܵܐ ܕܲܫܒܲܩ̣ܬ̇‌܀ ܐܲܢَܬܘܼ ܕܲܫܒܲܩ̣ܬ̇ ܟܠ ܣܘܼܪ̈ܚܵܢܹܐ ܕܲܕܼܠܵܐ ܢܵܡܘܿܣ: ܐܲܢَܬ̇ ܐܵܦ ܗܵܫܵܐ ܫܒ̣ܘܿܩ ܚܵܘ̈ܒܵܬܲܢ ܕܲܕܼܠܵܐ ܛܲܟ̣ܣܵܐ. ܐܲܢَܬ̇ ܗَܘܼ ܕܲܫ̣ܪܲܝܬ̇ ܦܣܵܩܵܐ ܕܲܦܣܲܩ̣ܬ̇ ܥܲܠ ܩܵܛܘܿܠܹ̈ܐ: ܟܠܝܼ ܐܵܦ ܗܵܫܵܐ ܢܸܓ̣ܕܹ̈ܐ ܕܛܲܝܸܒ̣ܬ̇ ܠܛܵܠܘܿܡܘܼܬܲܢ‌܀

ܩܪܝܢܐ؛ ܗ

ܡܘܬܒ̣ܐ؛ ܐ.

ܐܲܢَܬ ܡܵܪܝ ܚܒܸܛܠܘܼܟܼ ܪ̈ܲܚܡܹܐ ܒܟܲܪܒܵܐ ܒܟܠܵܝܗܝ ܕܵܪܹ̈ܐ: ܘܠܵܐ ܝܘܼܗَܒܸܠܘܼܟܼ ܦܸܪܣܲܬ ܕܡܲܣܚܸܪܝܼ ܒܝܼـܲܢ ܣܵܢܝܵـܢܹ̈ܐ ܕܛܵܝܸܦܲܢ. ܐܲܢَܬ ܝَܘܸܬ ܕܬܘܼܚܸܒܠܘܼܟܼ ܓܘܼܪܘܼܬܵܐ ܕܚܘܼܒܘܼܟܼ ܥܲܠ ܙܲܕܝܼܩܹ̈ܐ. ܘܩܲܡ ܡܲܚܫܸܚܸܬܠܗَܘܿܢ ܕܦܲܪܦܸܠܝܼ ܒܝܼܘܼܟܼ ܐܲܢَܬ̇ ܠܹܐ ܝَܘܵܬ ܣܢܝܼܩܵܐ. ܒܚܘܼܒܘܼܟܼ ܡ̣ܢ ܫܘܼܪܵܝܵܐ ܦܘܼܚܸܠܘܼܟܼ ܓܢܵܗܵܬܹ̈ܐ ܕܛܵܝܸܦܲܢ. ܕܒܝܲܕ ܒܲܣܝܼܡܘܼܬܘܼܟܼ ܝܘܼܗَܒܸܠܘܼܟܼ ܠܗܵܩܵܐ ܕܪܸܙܵܝܵܐ ܕܟܹܐܢܹ̈ܐ. ܒܘܼܬ ܚܵܬܸܪ ܟܹܐܢܹ̈ܐ ܦܘܼܚܸܠܘܼܟܼ ܓܢܵܗܵܬܹ̈ܐ ܕܕܵܪܹ̈ܐ ܩܵܕَܡܵܝܹ̈ܐ: ܘܗܵܐ ܦܘܼܚܸܠܘܼܟܼ ܡ̣ܢ ܩܵܕَܡ ܕܦܲܪܦܸܠܝܼ ܠܒܲܣܝܼܡܘܼܬܘܼܟܼ: ܩܝܼܪܵܬ ܕܪܝܼܠܘܼܟܼ ܠܒܢܲܝܢܵܫ̈ܵܐ ܕܦܲܪܦܸܠܝܼ ܒܝܼܘܼܟܼ. ܕܐܝܼܡܵܢ ܕܦܲܪܦܸܠܝܼ ܒܝܼܘܼܟܼ ܒܸܬ ܬܲܚܡܸܢܝܼ ܕܡܵܨܝܵـܢܹ̈ܐ ܝَܢܵܐ ܠܸܟܠܵܝܵܐ ܕܲܪܩܘܼܒ̣ܠ ܕܒܝܼܫܵܐ. ܨܘܼܠܹܐ ܠܹܗ ܨܠܘܿܬܵܐ ܡܘܼܫܹܐ ܦܘܼܚܸܠܘܼܟܼ ܓܢܵܗܵܐ ܕܣܓ̣ܵܕܬܵ‌ܐ ܕܨܵܢܵܡ: ܘܠܟܸܣܠܹܗ ܐَܡܸܪܘܼܟܼ ܕܗܵܐ ܦܘܼܚܸܠܝܼ ܕܵܐܟ̣ܝܼ ܕܦܘܼܪܦܸܠܘܼܟܼ ܒܝܼܝܼ. ܨܘܼܠܹܐ ܠܹܗ ܨܠܘܿܬܵܐ ܝܼܫܘܿܥ ܡܘܼܟܠܹܐܠܘܼܟܼ ܓ̰ܘܵܓ̰ܝܵܬܹ̈‌ܐ ܕܫܸܡܫܵܐ ܘܣܲܗܪܵܐ. ܗܹܡܸܙܡܵܢ ܕܝܼܫܘܿܥ ܟܠܵܝܬܵ‌ܐ ܕܓ̰ܘܵܓ̰ܝܵܬܲܝ̈ܗ‌ܝ ܡܘܼܬܒ̣ܵܠܘܼܟܼ ܓܵܘ ܟܬܵܒ̣ܵܐ. ܨܘܼܠܹܐ ܠܹܗ ܫܡܘܼܐܹܝܠ ܘܪܸܡܙܘܼܟܼ ܩܲܡ ܓ̰ܵܘܸܒܠܹܗ ܒܩܵܠܵܐ ܕܓܲܪܓܲܡܬܵ‌ܐ. ܘܐܸܠܹܗ ܡܘܼܕܸܥܪܘܼܟܼ ܠܡܸܛܪܵܐ ܕܗܘܹܐܠܹܗ ܕܠܵܐ ܥܵܕܵܬ. ܨܘܼܠܹܐ ܠܹܗ ܨܠܘܿܬܵܐ ܕܵܘܝܼܕ ܕܚܙܹܐܠܹܗ ܠܡܲܠܲܐܟ̣ܵܐ ܗ̇ܘ ܒܸܩܛܵܠܵܐ ܠܛܵܝܸܦܵܐ: ܘܟܲܕ ܢܚܸܦܠܹܗ ܡܲܠܲܐܟ̣ܵܐ ܡ̣ܢ ܒܵܥܘܼܬܹܗ ܐܲܝܟܼ ܕܐܸܢ ܡܸܢܘܼܟܼ ܢܚܸܦܠܹܗ. ܩܲܡ ܩܵܪܹܐܠܘܼܟܼ ܐܹܠܝܼܵܐ ܡܘܼܩܫܝܼܠܘܼܟܼ ܠܦܵܘܚܵܐ ܘܛܥܸܢܹܗ ܡܸܛܪܵܐ: ܘܥܒܸܕܠܘܼܟܼ ܠܛܵܝܸܦܵܐ ܐܵܟܹܠ ܚܲܡ ܕܗܹܡܸܙܡܵܢ ܗ̇‌ܝ ܝܼܠܵܗ̇ ܕܐَܣܸܪܵܗ̇ ܘܫܪܹܐܠܵܗ̇. ܩܲܡ ܩܵܪܹܐܠܘܼܟܼ ܐܹܠܝܼܫܲܥ ܒܐܝܼܕܵܬ̈ܘܼܗܝ ܡܘܼܕܸܪܘܼܟܼ ܡܝܼܬܵ‌ܐ ܠܚܲܝܹ̈ܐ: ܘܠܢܒ̣ܝܼܘܼܬܹܗ ܚܘܼܫܒܸܢܵܠܘܼܟܼ ܓ̣ܵܠܝܼܒܘܼܬܵܐ ܒܣܵܒܵܒ ܕܡܵܘܬܵܐ. ܩܲܡ ܩܵܪܹܐܠܘܼܟܼ ܚܹܙܲܩܝܵܐ ܘܩܛܸܠܘܼܟܼ ܐܲܠܦܹ̈ܐ ܕܐܵܬܘܿܪ̈ܵܝܹܐ: ܗܵܕܟ̣ܵܐ ܟܲܕ ܪܵܒܵܐ ܓܼܠܸܒܠܹܗ ܒܣܲܝܦܹܗ ܕܡܲܠܲܐܟ̣ܵܐ. ܐܘܿܦ ܕܵܢܝܼܐܹܝܠ ܒܚܲܝܠܵܐ ܕܗܵܝܸܪܬܘܼܟܼ ܓܠܹܐܠܹܗ ܫܘܼܠܵܢܹ̈ܐ ܟܸܣܝܹ̈ܐ: ܩܵܐ ܪܸ̈ܙܵܝܘܼܗܝ ܓܕܸܠܗَܘܿܢ ܒܵܒܼܠܵܝܹ̈ܐ ܟܠܝܼܠܹ̈ܐ ܕܚܸܩܪܵܐ܀ ܓܵܘ ܟܠܲܝܗܝ ܕܵܪܹ̈ܐ ܨܘܼܠܹܐܠܗَܘܿܢ ܟܹܐܢܹ̈ܐ ܘܓ̰ܘܼܘܸܒܲܝܠܘܼܟܼ. ܘܐܲܢَܬ̇ ܒܵܠܲܬ ܝَܘܸܬ̇ ܒܕܵܘܪܲܢ ܣܵܦܝܼܩܵܐ ܝܼܠܹܗ ܡ̣ܢ ܙܲܕܝܼܩܹ̈ܐ. ܦܲܪܦܲܠܬܵ‌ܐ ܕܒܲܣܝܼܡܘܼܬܘܼܟܼ ܓܘܼܪܬܵܐ ܝܼܠܵܗ̇ ܒܘܼܫ ܡ̣ܢ ܟܠܲܝܗܝ ܟܹܐܢܹ̈ܐ. ܘܚܲܙܢܵܐ ܕܪ̈ܲܚܡܘܼܟܼ ܠܹܐ ܦܵܐܸܫ ܡܘܼܕܡܝܼܵܐ ܥܲܡ ܕܐܵܢܝܼ ܬܘܼܪ̈ܨܹܐ ܒܐܝܼܕܵܐ. ܚܘܼܒܘܼܟܼ ܝܘܼܗَܒܸܠܹܗ ܠܫܵܗܒ̣ܘܼܬܹܐ ܠܪܸܙܵܝܵܐ ܕܟܹܐܢܹ̈ܐ ܕܦܲܪܦܸܠܝܼ ܒܝܼܘܼܟܼ. ܒܪܸܙܵܝܘܼܟܼ ܣܵܚܒܸܬ ܕܘܼܟܬܵ‌ܐ ܠܲܝܬܿ ܓܵܘܵܗ̇ ܟܹܐܢܹ̈ܐ ܐܘܿܦ ܙܹܐ ܠܹܐ ܗܵܘܝܼ ܟܹܐܢܹ̈ܐ. ܕܝܼܘܼܟܼ ܝܼܠܵܗ̇ ܦܲܪܦܲܠܬܵ‌ܐ ܘܗܹܡܸܙܡܵܢܹ̈ܐ ܕܦܲܪ̈ܦܸܠܵܢܹܐ: ܡܲܛܥܘܼܢܹܐ ܝَܘܸܬ ܫܵܦܵܩܲܬܘܼܟܼ ܠܒܢܘܿܢܹ̈ܐ ܕܒܲܝܬܘܼܟܼ܀ ܩܵܐ ܛܵܒ̣ܬܵ‌ܐ ܗܵܘܝܵܐ ܕܕܝܼܘܼܟܼ ܕܵܐܟ̣ܝܼ ܕܝܼܠܵܗ̇: ܦܠܘܿܚ ܠܟܸܣܠܲܢ ܗ̇ܘ ܡܸܢܕܝܼ ܕܦܠܸܚܠܘܼܟܼ ܒܫܘܼܪܵܝܵܐ ܕܙܲܒ̣ܢܹ̈ܐ: ܡܵܢܝܼ ܦܘܼܪܦܸܠܹܐ ܒܝܼܘܼܟܼ ܕܒܵܪܸܬ ܠܵܗ̇ ܒܪܝܼܬܵ‌ܐ ܒܥܸܕܵܢܵܐ ܕܠܹܐ ܗَܘܵܐ. ܘܡܵܢܝܼ ܩܲܡ ܝܵܗَܒܸܠܘܼܟܼ ܪܵܥܝܼ ܕܐܵܣܪܸܬ̇ ܠܹܗ ܥܵܠܡܵܐ ܒܒܪܲܝܬܵ‌ܐ ܕܒܲܪܢܵܫܵܐ ܡܵܢܝܼ ܝܼܠܹܗ ܕܗَܘܹܐ ܠܹܗ ܩܵܬܘܼܟܼ ܪܵܥܝܼܬܟܲܪ ܕܩܵܪܸܬ ܠܲܢ ܨܲܠܡܘܼܟܼ: ܘܡܵܢܝܼ ܝܼܠܹܗ ܩܲܡ ܡܲܚܙܹܐܠܘܼܟܼ ܕܒܝܲܕ ܒܪܵܝܬܲܢ ܒܸܬ ܬܲܡܸܡܸܬ ܠܹܗ ܦܘܼܠܚܵܢܘܼܟܼ܀ ܘܐܸܢ ܒܝܲܕ ܒܪܵܝܬܲܢ ܘܲܕܟܠܲܝܗܝ ܒܸܪ̈ܝܹܐ ܠܵܐ ܛܠܸܒܠܘܼܟܼ ܗܵܝܸܪܬܵܐ ܩܵܡܘܼܕܝܼ ܒܸܒܥܵܝܵܐ ܝَܘܸܬ ܗܵܝܸܪܬܵܐ ܡ̣ܢ ܥܵܘܠܲܢ ܕܝܼܠܹܗ ܐܲܝܟܼ ܚܲܕَ ܒܲܩܬܵ‌ܐ ܡܘܼܣܠܝܼܬܵܐ: ܥܵܘܠܲܢ ܕܝܼܠܹܗ ܐܲܝܟܼ ܒܲܩܬܵ‌ܐ ܠܦܘܼܬ ܓܘܼܪܘܼܬܵܐ ܕܐܲܠܵܗܘܼܬܘܼܟܼ ܘܐܲܝܟܼ ܠܵܚܬܵ‌ܐ ܕܐܝܼܕܵܐ ܡܠܝܼܬܵ‌ܐ. ܐܸܢ ܦܵܐܸܫ ܩܘܼܝܸܣܵܐ ܒܝܵܡܵܐ ܕܪ̈ܲܚܡܘܼܟܼ. ܚܢܵܢܘܼܟܼ ܝܵܡܵܐ ܓܘܼܪܵܐ ܝܼܠܹܗ ܘܒܘܼܫ ܓܘܼܪܵܐ ܝܼܠܹܗ ܡ̣ܢ ܝܵܡܵܐ ܓܘܼܪܵܐ. ܘܪܵܘܡܵܐ ܘܥܘܼܡܩܵܐ ܪܵܒܵܐ ܒܘܼܫ ܙܥܘܿܪܹ̈ܐ ܝَܢܵܐ ܠܦܘܼܬ ܓܘܼܪܘܼܬܹܗ. ܓܘܼܪܵܐ ܝܼܠܹܗ ܚܢܵܢܘܼܟܼ ܫܡܲܝܵܐ ܘܐܲܪܥܵܐ ܡܲܩܘܘܼܚܹܐ ܝَܢܵܐ. ܕܟܲܕ ܠܹܐ ܗَܘܵܘ ܐَܡܸܪܘܼܟܼ ܘܗܘܹܐ ܠܗَܘܿܢ ܡ̣ܢ ܠܵܐ ܡܸܢܕܝܼ. ܘܡ̣ܢ ܠܵܐ ܡܸܢܕܝܼ ܒܪܹܐܠܘܼܟܼ ܟܠ ܡܸܢܕܝܼ ܒܘܼܬ ܕܝܼـܲܢ ܘܕܵܐܟ̣ܝܼ ܡܵܨܝܵܐ ܒܥܸܕܵܢܵܐ ܕܟܲܪܒܵܐ ܫܲܒ̣ܩܸܬ̇ ܠܲܢ. ܘܪܵܒܵܐ ܛܝܼܡܲܢܬܵܐ ܝܼܠܵܗ̇ ܘܠܹܐ ܐܵܬܝܵܐ ܠܩܲܝܘܼܣܹܐ ܡ̣ܢ ܗܹܡܸܙܡܵܢܹ̈ܐ: ܚܘܼܒܘܼܟܼ ܗ̇ܘ ܩܲܡ ܡܲܠܒܸܫܠܲܢ ܘܣܸܠَܩܠܹܗ ܘܩܲܡ ܡܲܬܸܒ̣ܠܲܢ ܒܕܲܪܓ̣ܵܐ ܕܫܸܡܘܼܟܼ. ܒܫܸܡܵܐ ܕܐܝܼܬܘܼܬܘܼܟܼ ܩܪܹܐܠܘܼܟܼ ܠܫܸܡܲܢ ܒܫܸܡܵܐ ܢܘܼܟ̣ܪܵܝܵܐ: ܘܐܵܕܝܼܵܐ ܒܸܬ ܗܵܘܹܐ ܒܕܲܪܓ̣ـܹܗ ܣܵܒܵܒ ܗܘܹܐ ܠܹܗ ܒܝܼـܲܝܗ‌ܝ ܒܦܸܠܚܵܢܹ̈ܐ. ܠܕܲܪܓ̣ܵܐ ܪܵܡܵܐ ܕܥܲܡ ܐܝܼܬܘܼܬܘܼܟܼ ܣܸܠَܩܠܹܗ ܥܲܦܪܲܢ: ܠܹܐ ܦܵܐܸܫ ܨܸܠܝܵܐ ܡ̣ܢ ܪܵܡܘܼܬܹܗ ܒܣܵܒܵܒ ܥܵܘܠܲܢ. ܡ̣ܢ ܝܲܡܝܼܢܘܼܟܼ ܒܸܬܝܵܒ̣ܵܐ ܝܼܠܹܗ ܦܲܓ̣ܪܲܢ. ܠܒ̣ܝܼܫܵܐ ܚܸܩܪܵܐ: ܕܠܹܐ ܦܵܐܸܫ ܡܘܼܒܨܸܪܵܐ ܚܸܩܪܹܗ ܒܒܵܨܘܼܪܘܼܬܵܐ ܕܩܵܫܕܵܪܬܲܢ. ܒܝܲܕ ܙܲܒܘܼܢܘܼܬܹܗ ܟܝܵܢ̈ـܹܐ ܦܲܪ̈ܡܝܼܵܢܹܐ ܠܹܐ ܡܲܣܠܝܼܠܹܗ: ܗ̇ܘ ܕܐܲܢَܬ ܡܝܘܼܩܸܪܘܼܟܼ ܒܫܸܡܵܐ ܓܘܼܪܵܐ ܕܐܲܠܵܗܘܼܬܘܼܟܼ: ܠܵܐ ܗܵܘܝܵܐ ܝܵܐ ܡܵܪܝܼ ܕܫܹܐܕܹ̈ܐ ܙܵܠܘܿܡܹ̈ܐ ܥܵܒ̣ܕܝܼ ܫܘܼܒ̣ܗܵܪܵܐ: ܒܹܐܡܵܪܵܐ ܝܼܠܹܗ ܕܗܵܐ ܗَܘܹܐܠܗَܘܿܢ ܟܘܼܦܹ̈ܐ ܘܐܝܼܕܵܬܲܝ̈ܗ‌ܝ ܗܘܹܐܠܗَܘܿܢ ܙܲܒܘܼܢ ܡ̣ܢ ܗܘܼܟܡܵܐ. ܠܵܐ ܝܵܐ ܡܵܪܝܼ ܕܚܵܕܝܼ ܣܵܢܝܵـܢܹ̈ܐ ܕܛܵܝܸܦܲܢ ܐܲܝܟܼ ܕܝܼܠܵܗ̇ ܥܵܕܲܬ. ܕܵܐܟܼܝܼ ܣܸܠَܩܠܹܗ ܠܕܲܪܓ̣ܵܐ ܪܵܡܵܐ ܕܐܲܠܵܗܘܼܬܵܐ. ܡܵܠܝܵܢܬܵ‌ܐ ܝܼܠܵܗ̇ ܕܡܘܼܣܠܝܼܠܗَܘܿܢ ܘܡܘܼܣܚܸܪܘܼܢ ܒܫܸܡܵܐ ܕܩܲܡ ܡܝܲܩܪܸܬ̇ ܠܲܢ ܒܝܼـܹܗ: ܡܲܫܬܸܩܠܗَܘܿܢ ܕܠܵܐ ܦܵܝܫܝܼ ܪ̈ܝܼܡܹܐ ܥܲܠ ܡܵܪܘܼܬܘܼܟܼ: ܒܡܸܨܥܵܝܘܼܬܲܢ ܒܣܵܡܵܝܗܝ ܝܼܠܵܗ̇ ܠܡܲܣܚܘܼܪܹܐ ܒܫܸܡܘܼܟܼ ܓܘܼܪܵܐ: ܘܒܝܼـܲܢ ܬܲܚܡܘܼܢܹܐ ܕܗܵܘܝܼ ܪ̈ܵܡܹܐ ܥܲܠ ܡܵܪܘܼܬܘܼܟܼ: ܕܠܵܐ ܣܵܒܵܒ ܗܘܹܐܠܗَܘܿܢ ܒܸܣܢܵܝܵܐ ܣܵܢܝܵـܢܹ̈ܐ ܠܫܸܡܘܼܟܼ: ܘܟܲܕ ܠܹܐ ܝَܢܵܐ ܡܨܵܝܵܐ ܕܨܵܥܪܝܼܠܘܼܟܼ ܒܝܼـܲܢ ܨܵܥܘܿܪܹ̈ܐ ܝَܢܵܐ ܐܸܠܘܼܟܼ. ܠܵܐ ܬܲܡܸܡܸܬ̇ ܠܵܗ̇ ܫܵܗܘܲܬܵܐ ܕܐܵܢܝܼ ܕܐܝܼܢܵܐ ܦܟ̰ܝܼܠܹ̈ܐ: ܘܠܵܐ ܙܹܐ ܦܵܐܸܫ ܒܸܢܝܵܐ ܒܸܢܝܵـܢܵܐ ܕܕܘܼܓܠܵܐ ܘܒܸܥܒ̣ܵܕܵܐ ܝَܢܵܐ ܫܘܼܒ̣ܗܵܪܵܐ ܒܝܼـܹܗ. ܢܓ̰ܘܿ ܒܪܵܡܘܼܬܵܐ ܕܚܝܼܵܠܲܝ̈ܗ‌ܝ ܕܢܵܦܸܠ ܒܐܲܪܥܵܐ: ܘܡܵܪܸܡ ܪܹܫܵܐ ܕܡܲܟܝܼܟ̣ܘܼܬܲܢ ܠܕܲܪܓ̣ܵܐ ܕܫܸܡܘܼܟܼ. ܦܵܪܸܩ ܠܹܗ ܟܝܵܢܲܢ ܡ̣ܢ ܐܝܼܕ̈ܵܬܲܝܗ‌ܝ ܡܲܚܪܸ̈ܒ̣ܵܢܹܐ: ܗܵܐ ܗَܘܹܐ ܠܹܗ ܙܲܒܘܼܢ ܘܦܪܸܩܠܹܗ ܦܠܵܫܵܐ ܩܸܫܝܵܐ ܥܲܡ ܐܵܣܟܵܪ̈ܵܘܵܬܘܼܗܝ. ܡܲܫܪܝܼܠܵܗ̇ ܐܝܼܕܘܼܟܼ ܥܲܠ ܐܵܣܟܵܪܲܢ ܒܵܨܘܿܪܬܵܐ ܕܚܲܝܠܵܐ ܕܗܵܐ ܒܨܸܪܵܗ̇ ܒܘܼܫ ܡ̣ܢ ܡܸܢܝܵܢܵܐ ܕܡܵܚܸܒܵܢܹ̈ܐ ܕܗܵܩܘܼܬܵܐ. ܘܒܲܗܪܸܢ ܦܲܐܬܘܵܬ̈ܘܼܟܼ ܓܵܘ ܒܲܝܬܲܢ ܡܘܼܣܠܝܼܵܐ ܘܡܸܠܝܵܐ ܡ̣ܢ ܥܝܼܩܘܼܝܵܬܹ̈‌ܐ: ܕܗܵܐ ܛܠܸܩܠܹܐ ܡܸܢܹܗ ܒܲܗܪܵܐ ܫܲܦܝܼܪܵܐ ܕܙܲܕܝܼܩܘܼܬܵܐ. ܡܲܩܸܡ ܠܹܗ ܪܸܡܙܘܼܟܼ ܐܲܝܟܼ ܐܲܦܸܛܪܘܿܦܵܐ [ܘܲܟܝܼܠ] ܥܲܠ ܬܲܡܒܵܠܘܼܬܲܢ: ܗܵܐ ܒܘܼܪܒܸܙܠܝܼ ܠܚܲܙܢܵܐ ܕܫܩܸܠܬܵ‌ܐ ܝܼܗَܘܵܐ ܡܼܢ ܚܲܠܥܵܬܘܼܟܼ. ܩܪܹܐܠܗَܘܿܢ ܡܲܠܲܐܟ̣ܹ̈ܐ ܘܦܵܩܸܕܠܗَܘܿܢ ܕܗܲܝܸܪܝܼܠܲܢ: ܗܵܐ ܥܒܸܪܗَܘܿܢ ܫܹܐܕܹ̈ܐ ܘܚܲܫܹ̈ܐ ܝܵܩܘܼܪܹ̈ܐ ܘܣܠܸܒܠܗَܘܿܢ ܚܲܙ̈ܢܵܬܲܢ. ܫܵܕܸܪ ܡܲܠܲܐܟ̣ܹ̈ܐ ܕܡܲܪܥܸܫܝܼܠܲܢ ܡ̣ܢ ܫܸܢܬܲܢ: ܗܵܐ ܐܲܝܟܼ ܓܵܘ ܫܸܢܬܵܐ ܡܲܛܒܘܼܥܝܲܢ ܝَܢܵܐ ܡܸܢܕܝܼܵـܢܹ̈ܐ ܨܵܘܵܢܹ̈ܐ. ܫܵܕܸܪ ܡܲܠܲܐܟ̣ܹ̈ܐ ܕܥܵܒ̣ܕܝܼ ܫܲܝܢܵܐ ܠܫܓ̣ܝܼܫܘܼܬܲܢ. ܗܵܐ ܟܠܲܝܗܝ ܐܵܣܟܵܪ̈ܵܘܵܬܹܐ ܕܸܪ̈ܝܹܐ ܝَܢܵܐ ܓܵܘ ܦܠܵܫܵܐ ܕܠܵܐ ܬܵܦܵܘܲܬ. ܘܐܸܢ ܚܲܝܠܵܘܵܬܹ̈ܐ ܕܪܵܘܡܵܐ ܠܹܐ ܝَܢܵܐ ܡܨܵܝܵܐ ܠܗܲܝܘܼܪܲܢ: ܦܲܪܦܘܼܠܹܗ ܝܘܲܚ ܝܵܐ ܒܲܪ ܓܸܢܣܲܢ ܥܲܡ ܪܲܒܘܼܬܘܼܟܼ ܕܥܵܒ̣ܕܸܬ ܫܲܝܢܵܐ ܩܵܬܲܢ. ܡܵܨܝܵܢܵܐ ܝܼܠܹܗ ܕܗܲܝܸܪ ܠܙܲܒܘܼܢܘܼܬܲܢ ܕܗَܘܹܐܠܵܗ̇ ܒܸܦܠܵܫܵܐ ܕܟܸܟ̰ـܚܹ̈ܐ: ܗ̇‌ܝ ܕܡܫܲܪܘܼܟܹܐ ܝܼܠܹܗ ܥܲܡ ܐܝܼܬܘܼܬܘܼܟܼ ܒܫܸܡܵܐ ܘܕܲܪܓ̣ܵܐ. ܟܹܐ ܝܵܕܸܥ ܕܦܲܪܦܸܠ ܒܘܼܬ ܓܘܼܢܗܵܟܵܪܹ̈ܐ ܚܘܼܒܵܢܵܐܝܼܬ: ܒܗ̇‌ܝ ܫܩܝܼܠܵܐ ܝܼܠܹܗ ܢܸܣܝܵܢܵܐ ܕܚܲܫܹ̈ܐ ܕܡܵܝܘܿܬܘܼܬܵܐ. ܣܵܒܵܒ ܓ̰ܘܼܪܒܵܐ ܝܼܠܹܗ ܒܟܠܲܝܗ‌ܝ ܕܩܸܢܝܵܐ ܝܼܠܹܗ ܟܝܵܢܵܐ ܕܡܵܝܘܿܬܹ̈ܐ. ܒܘܼܫ ܙܵܘܕܵܐ ܟܹܐ ܝܵܕܸܥ ܠܗܲܝܘܼܪܹܐ ܠܐܵܢܝܼ ܕܦܝܵܫܵܐ ܝَܢܵܐ ܓ̰ܘܼܪ̈ܒܹܐ. ܩܵܐ ܒܘܼܬ ܫܲܝܢܵܐ ܩܲܡ ܓܵܒܝܼܠܹܗ ܡ̣ܢ ܟܠ ܩܵܐ ܕܥܵܒܸܕ ܫܲܝܢܵܐ ܠܟܠ: ܡܲܟܡܸܠ ܒܦܸܠܚܵܢܵܐ ܨܸܦܝܘܼܬܵܐ ܕܫܸܡܹܗ ܩܵܐ ܒܘܼܬ ܣܘܼܙܓܵܪܵܐ ܩܵܬܲܢ: ܥܸܕܵܢܵܐ ܝܼܠܵܗ̇ ܐܵܕܝܼܵܐ ܕܡܲܚܙܹܐ ܒܝܼـܲܢ ܓܘܼܪܘܼܬܵܐ ܕܕܲܪܓ̣ـܹܗ: ܕܵܐܟ̣ܝܼ ܕܡܘܼܚܙܝܼܠܹܗ ܒܥܸܕܵܢܵܐ ܕܙܘܼܪܒܸܢܵܐ ܓܢܵܗܲܢ. ܘܐܸܢ ܟܲܕ ܒܝܲܕ ܫܸܡܘܼܟܼ ܥܒܸܕܠܘܼܟܼ ܣܘܼܙܓܵܪܵܐ ܥܲܡܲܢ ܟܡܵܐ ܓܵܗܹ̈ܐ ܒܡܸܨܥܵܝܘܼܬܹܗ ܥܒܸܕܠܘܼܟܼ ܣܘܼܙܓܵܪܵܐ ܥܲܡܲܢ ܕܠܹܐ ܝܘܲܚ ܗَܘܵܘ ܚܫܝܼܚܹ̈ܐ. ܐܸܢ ܡ̣ܢ ܡܵܘܬܵܐ ܘܐܵܟܸܠܩܵܪܨܵܐ ܒܐܝܼܕܹܗ ܩܲܡ ܦܵܪܩܸܬ̇ ܠܲܢ: ܟܡܵܐ ܒܘܼܫ ܙܵܘܕܵܐ ܒܸܬ ܦܵܪܩܸܬ ܠܲܢ ܡ̣ܢ ܚܝܘܼܟܹ̈ܐ ܕܒܲܩܝܵܬܹ̈‌ܐ ܡܘܼܣܠܝܼ̈ـܹܐ. ܐܸܢ ܒܲܡܚܵܝܬܹܗ ܠܙܩܝܼܦܵܐ ܥܩܸܪܹܗ ܚܲܢܦܘܼܬܵܐ ܘܝܗَܘܼܕܵܝܘܼܬܵܐ: ܒܲܣ ܟܡܵܐ ܗܵܣܵܢܵܐܝܼ ܝܼܠܵܗ̇ ܩܵܬܹܗ ܕܢܵܓ̰ܘܼ ܒܚܲܫܹ̈ܐ ܕܡܲܥܝܘܼܩܹܐ ܝَܢܵܐ ܐܸܠܲܢ. ܐܸܢ ܨܵܦܵܝܬܵ‌ܐ ܕܟܠ ܗ̇ܘ ܒܸܬ ܥܵܒܸܕ ܒܐَܚܲܪܬܵܐ ܕܙܲܒ̣ܢܹ̈ܐ ܟܡܵܐ ܩܵܕَܡ ܥܸܕܵܢܵܐ ܡܵܨܝܵـܢܵܐ ܝܼܠܹܗ ܕܡܲܒܨܸܪܵܗ̇ ܩܸܫܝܘܼܬܵܐ ܕܓ̰ܘܼܢܓ̰ܵܪܹ̈ܐ: ܐܸܢ ܗ̇ܘ ܐܝܼܬܠܹܗ ܗܘܼܟܡܵܐ ܥܲܠ ܒܹܝܬ ܓܲܙܵܐ ܕܐܲܠܵܗܘܼܬܘܼܟܼ. ܒܲܣ ܐܝܼܬ ܠܹܗ ܗܘܼܟܡܵܐ ܚܘܼܪܵܝܝܼ ܕܦܵܚܸܠ ܠܒܢܘܿܢܹ̈ܐ ܕܓܸܢܣܹܗ. ܦܵܚܸܠܵܗ̇ ܝܵܐ ܛܵܒ̣ܵܐ ܠܙܲܒܘܼܢܘܼܬܲܢ ܐܲܝܟܼ ܥܵܕܲܬ. ܘܗܲܒَ̣ܠܲܢ ܐܸܪܘܵܢܵܐ ܒܝܲܕ ܒܲܪ ܓܸܢܣܲܢ ܗ̇ܘ ܕܝܑܼܠܹܗ ܡܵܪܵܐ ܕܚܲܙܢܘܼܟܼ.

ܡܕܪܫܐ؛ ܘ.

(ܒܩܵܠ ܥܹܕܿܬܵܐ ܦܘܼܫ ܠܹܟ̣ܝ).

     ܥܘܼܢܵܝܵܐ. ܡܵܪܲܢ ܒܪ̈ܲܚܡܲܝܟ ܦܬܲܚ ܠܵܗ̇ ܬܲܪܥܵܐ ܠܒ̣ܵܥܘܼܬ̣ ܟܠܲܢ: ܕܲܒܼܬܲܟ̣ܫܲܦ̮ܬܵܐ ܡܩܲܪܒܼܝܼܢܲܢ ܠܵܟܼ ܘܪܲܚܸܡܥܠܲܝܢ.

     ܒܵܬܹ̈‌ܐ. ܨܠܘܿܬܲܢ ܬܸܗܘܸܐ ܦܝܼܪܡܵܐ ܕܲܟ̣ܝܵܐ ܡܠܸܐ ܬܲܪܥܘܼܬ̣ܵܐ: ܘܢܸܬ̇ܬ̇ܢܝܼܚ ܡܸܢܵܗ̇ ܨܸܒ̣ܝܵܢ ܚܘܼܒܵܟܼ ܘܢܸܬ̣ܪܲܥܸܐ ܒܵܗ̇. ܬܹܥܘܿܠ ܩܕܼܵܡܲܝܟ ܒܵܥܘܼܬ̣ ܟܸܢܫܲܢ ܪܵܚܹ̇ܡ ܐَܢܵܫܵܐ: ܘܦܲܢܵܐ ܒܪ̈ܲܚܡܲܝܟ ܫܹܐܠܲܬ̣ ܥܲܒ̣ܕܲܝ̈ܟ ܘܪܲܚܸܡܥܠܲܝܢ‌܀ ܪܵܚܹ̇ܡ ܐَܢܵܫܵܐ ܘܨܵܒܹ̇ܐ ܒܚܲܝܹ̈ܐ ܕܲܒ̣ܢܲܝ̈ ܐَܢܵܫܵܐ: ܣܥܘܿܪ ܠܲܒ̣ܪܝܼܬ̣ܵܟܼ ܒܪܸܡܙܵܐ ܢܝܼܚܵܐ ܕܒܲܣܝܼܡܘܼܬ̣ܵܟܼ. ܡܚܲܣܸܐ ܚܛܵܗܹ̈ܐ ܘܫܵܒܹ̇ܩ ܚܵܘܒܹ̈ܐ ܕܐܲܝܠܹܝܢ ܕܬܵܝܒܿܝܼܢ: ܚܲܣܵܐ ܚܵܘ̈ܒܲܝܢ ܘܲܥܛܝܼ ܥܵܘ̣ܠܲܢ ܘܪܲܚܸܡ ܥܠܲܝܢ‌܀ ܚܘܼܢ ܚܲܢܵܢܵܐ ܠܲܥ̇ܒ̣ܵܕܼ ܐܝܼܕܲܝ̈ܟ ܐܲܝܟܼ ܕܲܦܐܸܐ ܠܵܟܼ: ܘܲܠܚܝܼ ܒܪ̈ܲܚܡܲܝܟ ܠܐܸܫܛܵܪ ܚܵܘ̈ܒܲܝܢ ܥܲܕܼܠܵܐ ܢܸܥܫܲܢ. ܡܪܘܿܩ ܟܘܼ̈ܬܼܡܵܬܲܢ ܥܨܘܿܒ̣ ܫܘܼ̈ܡܵܬܲܢ ܘܐܲܣܵܐ ܡܘܼܡܲܝ̈ܢ: ܘܗܲܒ̣ܠܲܢ ܕܢܸܓ̣ܡܘܿܪ ܨܸܒ̣ܝܵܢ ܚܘܼܒܵܟܼ ܘܪܲܚܸܡܥܠܲܝܢ‌܀

܀ ܒܘܪ̈ܟܬ̣ܐ܀

     ܐܹܝܠ ܐܲܠܵܗܵܐ؛ ܕܫܪܹܝܠܵܗ݁ ܫܟܼܝܼܢܬܹܗ ܥܲܠ ܛܘܼܪ ܣܝܼܢܲܝ. ܡܲܫܪܝܼ ܫܲܝܢܵܐ ܕܐܲܠܵܗܘܼܬܘܼܟܼ ܒܥܵܠܡܵܐ ܫܓܼܝܼܫܵܐ‌܀

     ܐܹܝܠ ܐܲܠܵܗܵܐ؛ ܕܟܹܐ ܕܵܒܼܸܩ ܪܸܡܙܹܗ ܪܵܘܡܵܐ ܘܥܘܼܡܩܵܐ. ܣܢܘܿܕܠܵܗ݁ ܒܪܝܼܬܵܐ ܕܩܵܘܡܵܐ ܢܵܦܠܵܐ ܡܣܵܒܵܒ ܥܵܘܠܲܢ‌܀

     ܐܹܝܠ ܐܲܠܵܗܵܐ؛ ܕܒܪܹܐܠܹܗ ܬܹܒܹܝܠ ܒܪܸܡܙܵܐ ܙܥܘܿܪܵܐ. ܬܲܪܸܨ ܥܲܠܡܘܼܟܼ ܒܣܵܥܘܿܪܘܼܬܵܐ ܡܠܝܼܬܵܐ ܫܲܝܢܵܐ‌܀

     ܐܹܝܠ ܐܲܠܵܗܵܐ؛ ܕܒܪܹܐܠܹܗ ܢܘܼܗܪܵܐ ܘܝܵܗَܒܼܸܠ ܢܘܼܗܪܵܐ. ܡܲܙܪܸܩ ܒܦܲܐܬܲܢ؛ ܢܘܼܗܪܹܗ ܕܫܸܡܫܘܼܟܼ ܕܟܹܐ ܡܲܦܨܸܚ ܟܠ‌܀

     (ܬܲܪ̈ܥܹܐ ܕܡܸܛܪܵܐ). ܐܹܝܠ ܐܲܠܵܗܵܐ؛ ܫܲܚܠܸܦ ܠܐܵܐܲܪ ܠܸܦܨܝܼܚܘܼܬܵܐ. ܘܡܲܪܝܸܣ ܛܠܘܿܠܘܼܟܼ؛ ܡܸܛܪܵܐ ܢܝܼܚܵܐ ܥܲܠ ܚܲܩ̈ܠܵܬܲܢ‌܀

     ܐܹܝܠ ܐܲܠܵܗܵܐ؛ ܦܵܩܹܕ ܪܸܡܙܘܼܟܼ ܠܐܵܐܲܪ ܦܫܝܼܡܵܐ. ܘܡܲܪܝܸܣ ܛܠܘܿܠܘܼܟܼ؛ ܥܲܠ ܚܲܩ̈ܠܵܬܲܢ‌ ܒܪ̈ܲܚܡܹܐ ܕܡܸܢܘܼܟܼ‌܀

     (ܩܪܝܼ). ܐܹܝܠ ܐܲܠܵܗܵܐ؛ ܒܲܪܸܟܼ ܟܠܝܼܠܵܐ ܕܫܹܢَܬܵܐ ܒܪ̈ܲܚܡܘܼܟܼ. ܒܡܲܦܪܥܹܝܬܵܐ ܕܦܹܐܪܹ̈ܐ؛ ܘܸܕܡܲܗܨܘܼܠܹ̈ܐ ܥܕܲܡܵܐ ܠܥܵܠܲܡ‌܀

     ܐܹܝܠ ܐܲܠܵܗܵܐ؛ ܠܡܲܠܟܹ̈ܐ ܕܐܲܪܥܵܐ ܫܲܝܸܢܸܬܠܗَܘܿܢ. ܕܡܲܣܟܲܢ ܫܸܠܝܵܐ؛ ܘܢܝܼܚܵܐ ܚܲܝܲܚ ܒܫܲܝܢܵܐ ܕܡܸܢܘܼܟܼ‌܀

     ܐܹܝܠ ܐܲܠܵܗܵܐ؛ ܡܚܲܪܕܝܼ ܫܘܼܪܵܐ ܕܚܲܡܚܘܵܪܘܼܬܘܼܟܼ. ܠܐܵܗܵܐ ܥܘܼܡܪܵܐ؛ ܕܬܵܘܬܵܒܼܘܼܬܲܢ ܥܕܲܡܵܐ ܠܥܵܠܲܡ‌܀

     ܐܹܝܠ ܐܲܠܵܗܵܐ؛ ܪܲܡܪܸܡ ܫܘܼܪ̈ܘܼܗܝ ܘܢܛܘܿܪ ܠܸܒܢܘܿܢ̈ܘܼܗܝ. ܡܣܵܩܸܠ ܠܬܸܓܼܡ̈ܘܼܗܝ ܩܵܐ ܕܡܫܲܒܚܝܼܠܘܼܟܼ ܐܲܡܝܼܢܵܐܝܼܬ‌܀

     ܐܹܝܠ ܐܲܠܵܗܵܐ؛ ܒܲܪܸܟܼ ܠܪܲܥܝܵܐ ܦܵܛܲܪܝܵܪܟܝܼܣ. ܕܩܵܐܹܡ ܒܪܹܫܲܢ؛ ܒܕܘܼܡܘܼܬܵܐ ܕܡܘܼܫܹܐ ܥܲܠ ܝܼܣܪܵܝܹܠ‌܀

     ܐܹܝܠ ܐܲܠܵܗܵܐ؛ ܚܲܝܠܸܢ ܪܸ̈ܓܼܫܘܼܗܝ ܘܡܣܵܩܸܠ ܢܲܦ̮ܫܹܗ. ܒܚܘܼܛܪܵܐ ܕܙܲܪܒܘܼܟܼ؛ ܩܐܵ ܕܠܵܐ ܡܪܵܦܹܐ ܩܵܕَܡ ܒܘܼܪ̈ܵܢܹܐ‌܀

     ܐܹܝܠ ܐܲܠܵܗܵܐ؛ ܢܛܘܿܪܠَܗܘܿܢ ܒܪ̈ܲܚܡܘܼܟܼ ܠܪ̈ܵܥܵܘܵܬܹܐ. ܘܚܲܝܠܸܢ ܐܸܠܵܝܗܝ؛ ܕܡܲܪܥܝܼ ܠܦܸܣܩܵܝܗܝ ܒܗܸܫܝܵܪܘܼܬܵܐ‌܀

     ܐܹܝܠ ܐܲܠܵܗܵܐ؛ ܘܠܸܡܕܲܒܪܵܢܲܢ ܘܠܸܡܗܲܕܝܵܢܲܢ. ܒܲܗܪܸܢ ܠܪܸ̈ܓܼܫܘܼܗܝ؛ ܘܡܚܲܟܸܡ ܢܲܦ̮ܫܹܗ ܒܟܠ ܝܘܼܠܦܵܢܹ̈ܐ‌܀

     ܐܹܝܠ ܐܲܠܵܗܵܐ؛ ܠܣܵܒܹ̈ܐ ܣܩܝܼܠܹ̈ܐ ܘܸܠܩܲܝܘܿܡܹ̈ܐ. ܒܲܗܪܸܢ ܥܲܝܢܹ̈ܐ؛ ܕܠܸܒܵܘܵܬܵܝܗ̈ܝ؛ ܕܝܵܕܥܝܼ ܩܘܼܫܬܵܐ‌܀

     ܐܹܝܠ ܐܲܠܵܗܵܐ؛ ܘܸܠܩܲܫܝܼܫܹ̈ܐ ܕܡܟܵܗܢܝܼ ܠܫܸܡܘܼܟܼ. ܗܲܒܼܠܗَܘܿܢ ܗܵܩܵܐ؛  ܕܦܘܼܪܥܵܢ ܗܵܩܵܝܗܝ ܕܹܝܢܵܪ ܛܘܼܒܹ̈ܐ‌܀

     ܐܹܝܠ ܐܲܠܵܗܵܐ؛ ܘܠܸܡܫܲܡܫܵܢܹ̈ܐ ܕܡܫܲܡܫܝܼ ܠܡܲܕܒܿܚܘܼܟܼ. ܗܲܒܼܠܗَܘܿܢ ܙܘܵܕܹ̈ܐ؛ ܒܟܠ ܒܘܼܪ̈ܟܵܬܹܐ ܠܦܘܼܬܼ ܦܘܼܠܚܵܢܵܝ̈ܗܝ‌܀

     ܐܹܝܠ ܐܲܠܵܗܵܐ؛ ܘܸܠܚܒܼܝܼܫܵܝܹ̈ܐ؛ ܡܗܲܝܸܪܸܬܠܗَܘܿܢ. ܩܵܐ ܕܠܵܐ ܫܵܝܹܦ؛ ܙܲܪܥܵܐ ܕܪܘܼܚܵܐ ܡܐܵܗܵܐ ܒܲܝܬܵܐ‌܀

     ܐܹܝܠ ܐܲܠܵܗܵܐ؛ ܣܬܘܿܪܠَܗܘܿܢ ܡܵܪܝܼ ܬܚܘܿܬ ܛܠܵܢܝܼܬܘܼܟܼ. ܘܐܵܦ ܦܵܨܹܝܬܿܠܗَܘܿܢ؛ ܒܢܝܼܫܲܢܩܘܼܟܼ ܚܲܝܵܐ ܡ̣ܢ ܬܘܼܪ̈ܩܵܠܹܐ‌܀

     ܐܹܝܠ ܐܲܠܵܗܵܐ؛ ܡܗܲܕܹܝܬܿ ܐܤܠܵܝܗܝ؛ ܒܐܘܼܪܚܵܐ ܕܩܘܼܫܬܵܐ. ܕܡܵܨܝܼ ܕܡܵܛܝܼ ܒܝܲܕ ܥܘܼܕܪܵܢܘܼܟܼ ܠܐܲܬܪܵܐ ܕܥܸܠܸܠ‌܀

     ܐܹܝܠ ܐܲܠܵܗܵܐ؛ ܢܵܛܸܪ ܪܸܡܙܘܼܟܼ ܐܵܦ ܠܫܲܪ̈ܘܵܝܹܐ. ܡ̣ܢ ܚܘܼܙܕܵܓܹ̈ܐ؛ ܘܡܕܲܪܩܘܼܒܼܠܘܼܬܵܐ ܕܡ̣ܢ ܒܢܲܝ̈ܢܵܫܵܐ‌܀

     ܐܹܝܠ ܐܲܠܵܗܵܐ؛ ܡܲܩܒܼܥܝܼ ܓܵܘ ܦܲܐܬܵܝܗܝ ܨܠܝܼܒܼܘܼܟܼ ܚܵܝܵܐ. ܩܵܐ ܕܠܵܐ ܫܵܓܼܫܝܼ ܘܒܵܕܝܼ ܒܐܘܼܪܚܵܐ ܕܫܵܗܘܲܬܝܵܬܹ̈ܐ‌܀

     ܐܹܝܠ ܐܲܠܵܗܵܐ؛ ܣܲܚܒܸܪ ܠܟܪ̈ܝܼܗܹܐ؛ ܒܲܣܸܡ ܠܫܡܝܼܛܹ̈ܐ. ܚܲܝܠܸܢ ܥܝܼܩܹ̈ܐ؛ ܐܵܦ ܡܘܼܠܝܸܨܹ̈ܐ ܒܟܠ ܥܸܕܵܢܹ̈ܐ‌܀

     ܐܹܝܠ ܐܲܠܵܗܵܐ؛ ܠܕܐܵܙܠَܝܼ ܒܝܵܡܵܐ ܘܐܵܦ ܒܐܘܼܪ̈ܚܵܬܹܐ. ܡܲܕܥܸܪ ܐܸܠܵܝܗܝ؛ ܠܘܲܥܕܵܐ ܕܒܵܬܵܝ̈ܗܝ ܒܫܲܝܢܵܐ ܕܡܸܢܘܼܟܼ‌܀

     ܐܹܝܠ ܐܲܠܵܗܵܐ؛  ܒܲܪܸܟܼ ܠܣܵܒܹ̈ܐ ܕܥܬܸܩܠܗَܘܿܢ ܒܥܹܕܬܵܐ. ܡܲܩܒܼܥܝܼ ܕܘܼܒܵܪܹ̈ܐ ܕܙܲܕܝܼܩܘܼܬܵܐ ܓܵܘ ܪܸ̈ܥܝܵܢܵܝܗܝ‌܀

     ܐܹܝܠ ܐܲܠܵܗܵܐ؛ ܐܵܦ ܠܸܡܗܲܝܡܢܹ̈ܐ ܘܸܠܡܗܲܝܡܢܵܬܹ̈ܐ. ܡܲܟܸܦ ܐܝܼܕܘܼܟܼ ܡܠܝܼܬܵܐ ܪ̈ܲܚܡܹܐ ܥܲܠ ܢܲܦ̮̈ܫܵܬܵܝܗܝ‌܀

     ܐܹܝܠ ܐܲܠܵܗܵܐ؛ ܒܲܪܸܟܼ ܛܠܵܝܹ̈ܐ ܘܡܲܚܕܸܬܿ ܐܸܠܵܝܗܝ. ܘܢܛܘܿܪ ܠܸܥܠܲܝܡܹ̈ܐ؛ ܘܠܸܥܠܲܝܡܵܬܹ̈ܐ ܒܥܘܼܕܪܵܢ ܪ̈ܲܚܡܘܼܟܼ‌܀

     ܐܹܝܠ ܐܲܠܵܗܵܐ؛ ܒܲܪܸܟܼ ܠܐܲܬܪܵܐ ܕܬܵܘܬܵܒܼܘܼܬܲܢ. ܘܡܲܥܒܸܪ ܡܸܢܹܗ ܦܠܵܫܵܐ ܘܟܸܦܢܵܐ ܘܩܲܝܣܵܐ ܕܟܲܪܒܵܐ‌܀

     ܐܹܝܠ ܐܲܠܵܗܵܐ؛ ܩܲܒܸܠ ܨܠܘܿܬܲܢ ܐܵܦ ܒܵܥܘܼܬܲܢ. ܘܡܲܕܥܸܪ ܒܪ̈ܲܚܡܘܼܟܼ؛ ܟܠ ܡܲܛܠܵܒܲܝ̈ܢ ܡ̣ܢ ܒܹܝܬ ܓܲܙܘܼܟܼ‌܀

     ܐܹܝܠ ܐܲܠܵܗܵܐ؛ ܩܲܒܸܠ ܨܵܘܡܲܢ ܐܲܝܟܼ ܕܐܹܠܝܼܵܐ. ܘܐܵܦ ܨܠܒܼܵܘ̈ܵܬܲܢ؛ ܐܲܝܟܼ ܕܕܵܢܝܼܐܹܝܠ ܥܵܒܼܪܝܼ ܩܵܕَܡܘܼܟܼ‌܀

     ܐܹܝܠ ܐܲܠܵܗܵܐ؛ ܡܲܫܦܸܟܼ ܪ̈ܲܚܡܘܼܟܼ ܥܲܠ ܕܐܵܗَܐ ܟܸܢܫܵܐ. ܘܛܪܘܿܕ ܡ̣ܢ ܓܵܘܹܗ ܦܠܵܫܹ̈ܐ ܕܒܝܼܫܵܐ ܒܟܠ ܥܸܕܵܢܹ̈ܐ‌܀

     ܐܹܝܠ ܐܲܠܵܗܵܐ؛ ܐܵܦ ܠܐܲܒܼܵܗܲܝ̈ܢ ܘܸܠܪ̈ܲܒܵܢܲܝܢ. ܚܒܼܘܿܛܠܗَܘܢ ܡܵܪܝܼ ܥܲܡ ܣܝܼܥܵܬܹ̈ܐ ܕܟܸܢܫܹ̈ܐ ܕܪܵܘܡܵܐ‌܀

     ܐܹܝܠ ܐܲܠܵܗܵܐ؛ ܘܠܝܼ ܢܘܼܟܼܪܵܝܵܐ ܕܓܵܘܓܹܝܠܝܼ ܩܵܕَܡܘܼܟܼ. ܡܚܲܣܝܼ ܓܢܵܗ̈ܝـܼ؛ ܘܓܪܘܿܕ ܚܛܝܼܵܬ̈ܝܼ ܪܲܚܸܡ ܥܲܠܝܼ‌܀

     ܐܹܝܠ ܐܲܠܵܗܵܐ؛ ܘܸܠܡܲܠܦܵܢܵܐ ܕܩܵܡ ܡܲܠܸܦܠܝܼ. ܡܵܢܹܝܬܿ ܐܸܠܹܗ ܥܲܡ ܕܨܦܵܝܝ ܡܘܼܠܸܦܠܗܘܿܢ ܒܛܲܝܒܘܼ ܕܡܸܢܘܼܟܼ‌܀

     ܐܹܝܠ ܐܲܠܵܗܵܐ؛ ܬܸܫܒܘܿܚܬܵܠܘܼܟܼ ܡ̣ܢ ܟܠ ܦܘܼܡܹ̈ܐ. ܒܵܒܵܐ ܘܒܪܘܿܢܵܐ؛ ܘܪܘܼܚܵܐ ܕܩܘܼܕܫܵܐ ܥܕܲܡܵܐ ܠܥܵܠܲܡ‌܀    

ܟܪܘܙܘܬ̣ܐ.

ܢܩܘܼܡ ܫܲܦܝܼܪ ܟܠܲܢ ܒܚܲܫܵܐ‌ ܘܲܚܦܝܼܛܘܼܬܵܐ ܛܵܠܒܲܚ ܘܐܵܡܪܵܚ؛ ܡܵܪܲܢ ܪܲܚܸܡ ܥܲܠܲܢ‌܀  ܘܓ̰ܲܘܸܒܝܼ.  ܡܵܪܲܢ ܪܲܚܸܡ ܥܲܠܲܢ‌܀ ܐܝܼܬܝܵܐ ܡܬܘܿܡܵܝܵܐ ܐܲܠܵܗܲܢ ܛܵܒ̣ܵܐ. ܒܒܘܼܫܵܝܘܼܬܵܐ ܕܪ̈ܲܚܡܘܼܗ‌ܝ ܫܘܼܕܸܪܹܗ ܠܒܪܘܿܢܹܗ ܣܵܘܓܘܼܠ ܘܩܵܡ ܦܲܪܸܩܠܲܢ ܡ̣ܢ ܛܘܼܠܩܵܢܵܐ. ܒܝܼܫܘܿܥ ܕܡ̣ܢ ܓܸܢܣܲܢ. ܒܸܛܠܵܒܵܐ ܝَܘܲܚ ܡܸܢܘܼܟܼ‌‌܀ ܗܵܘ ܕܒܥܘܼܒܵܐ ܒܬܘܼܠܵܝܵܐ ܒܚܸܩܪܹ̈ܐ ܕܩܘܼܕܫܵܐ ܦܝܼܫܠܹܗ ܝَܠܝܼܕܵܐ. ܘܡܘܼܦܨܸܚܠܹܗ ܠܡܲܠܲܐܟ̣ܹ̈ܐ ܥܸܠܵܝܹ̈ܐ ܘܡܘܼܚܕܝܼܠܹܗ ܠܡܲܠܲܐܟ̣ܹ̈ܐ ܬܲܚܬܵܝܹ̈ܐ. ܘܫܘܼܒܸܚܠܗَܘܿܢ ܐܸܠܹܗ ܬܸܫܒܘܿܚܬܵܐ ܠܡܵܪܝܵܐ ܦܵܪܘܿܩܵܐ. ܒܸܛܠܵܒܵܐ ܝَܘܲܚ ܡܸܢܘܼܟܼ‌‌܀ ܗܵܘ ܕܙܪܸܩܠܹܗ ܢܘܼܗܪܵܐ ܕܓܸܠܝܵܢܹܗ ܙܲܪܝܼܦ. ܘܠܵܘܓ̰ܵܐ ܬܠܝܼܬܵܝܵܐ ܕܫܘܼܒ̣ܚܹ̈ܐ ܕܐܝܼܬܘܼܬܹܗ ܒܗܲܝܟܠܵܐ ܕܐَܢܵܫܘܼܬܲܢ. ܘܒܥܡܵܕܹܗ ܩܵܡ ܫܲܪܸܟܠܲܢ ܒܣܝܼܡܲܬ ܒܢܲܝ̈ܵܐ ܒܡܵܘܬܵܐ ܕܒܐܪܵܙܵܐ‌. ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܗܵܘ ܕܒܨܵܘܡܹܗ ܦܪܸܥܠܹܗ ܓܢܵܗܲܢ. ܘܓ̣ܠܸܒܠܹܗ ܠܡܵܪܘܿܕܵܐ. ܘܝܘܼܗَܒ̣ܸܠܹܗ ܓ̣ܵܠܝܼܒܘܼܬܵܐ ܠܙܲܒܘܼܢܘܼܬܵܐ ܕܟܝܵܢܲܢ. ܘܒܨܵܘܡܵܐ ܩܵܡ ܡܲܠܸܦܠܲܢ ܕܓ̣ܵܠܒܲܚܠܹܗ ܠܒܝܼܫܵܐ. ܘܒܨܠܘܿܬܵܐ ܒܲܛܠܲܚ ܠܹܗ ܦܲܢܕܹܗ‌. ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܗܵܘ ܕܥܲܠ ܓ̰ܲܗܫܵܐ ܦܝܼܫܠܹܗ ܚܩܝܼܪܵܐ. ܘܒܦܵܥܘܹ̈ܐ ܕܙܲܝܬܵܐ ܟܸܢܫܹ̈ܐ ܫܘܼܒܸܚܠܗَܘܿܢ ܐܸܠܹܗ. ܘܒܥܘܼܓ̰ܵܒܵܐ ܚܲܕܬܵܐ ܡܘܼܩܘܸܚܠܗَܘܿܢ ܐܸܠܹܗ ܐܘܿܫܲܥܢܵܐ ܫܲܒ̣ܪܹ̈ܐ ܕܠܵܐ ܗܹܡܸܙܡܵܢ‌. ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܗܵܘ ܕܒܩܢܘܿܡܹܗ ܡܘܼܚܙܝܼܠܹܗ ܫܘܼܠܵܡܵܐ ܕܡܘܼܟܵܟ̣ܵܐ ܒܚܲܠܲܠܬܵܐ ܕܐܲܩܠܹ̈ܐ ܕܬܲܠܡܝܼܕ̈ܘܼܗ‌ܝ. ܘܩܨܹܐܠܹܗ ܦܲܓ̣ܪܹܗ ܘܦܘܼܠܹܓَܼܠܹܗ ܠܦܘܼܚܵܠܵܐ ܕܚܛܝܼܵܬܹ̈‌ܐ. ܘܡܙܸܓ̣ܠܹܗ ܕܸܡܹܗ ܐܸܠܲܢ ܫܬܵܝܬܵ‌ܐ ܠܚܘܼܣܵܝܲܢ‌. ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܗܵܘ ܕܒܚܘܼܒܹܗ ܦܸܫܠܹܗ ܡܘܼܣܠܝܼܵܐ ܘܦܝܼܫܠܹܗ ܪܝܼܩܵܐ ܒܦܲܐܬܘܵܬ̈ܘܼܗ‌ܝ ܒܘܼܬ ܕܝܼܲܢ. ܘܐܝܼܕ̈ܘܼܗ‌ܝ ܘܐܲܩ̈ܠܘܼܗ‌ܝ ܦܝܼܫܠܗَܘܿܢ ܒܘܼܙܥܒܸܙܹ̈ܐ. ܘܥܲܠ ܪܹܫ ܓܵܓ̣ܘܼܠܬܵܐ ܣܘܼܦܹܝܠܹܗ ܓܵܢܹܗ ܚܣܝܼܬܵ‌ܐ ܠܒܵܒܵܐ ܫܲܕܪܵܢܹܗ‌. ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܗܵܘ ܕܨܠܹܐܠܹܗ ܠܫܝܘܿܠ ܘܓܼܠܸܒܠܹܗ ܠܩܵܛܘܿܠܵܐ. ܘܠܬܠܵܬܼܵܐ ܝܵܘܡܵܢܹ̈ܐ ܩܸܡܠܹܗ ܘܠܪܵܒܵܐ ܡܘܼܩܸܡܠܹܗ. ܘܡܘܼܩܪܸܒ̣ܠܗَܘܿܢ ܐܸܠܹܗ ܫܵܟܲܪܬܵܐ ܚܲܕܬܵܐ ܠܡܢܲܚܡܵܢܵܐ ܕܦܲܓ̣ܪ̈ܲܝܗ‌ܝ. ܒܸܛܠܵܒܵܐ ܝَܘܲܚ ܡܸܢܘܼܟܼ‌‌܀ ܗܵܘ ܕܡܘܼܚܙܹܝܠܹܗ ܠܬܐܘܿܡܵܐ ܒܸܙܥܵܐ ܕܐܝܼܕܘ̈ܗ‌‌ܝ ܘܕܘܼܟܬܵܐ ܕܪܘܼܡܚܵܐ ܕܒܕܸܦܢܹܗ. ܘܩܵܕَܡ ܥܲܝܢܵܐ ܕܬܲܠܡܝܼܕܘܼ̈ܗ‌ܝ ܐَܟ̣ܸܠܹܗ ܘܫܬܝܼܠܹܗ. ܕܡܲܙܒܸܛ ܩܵܬܵܝܗ‌ܝ ܒܘܼܬ ܩܝܵܡܬܹܗ ܘܗܝܼܒ̣ܝܼ ܕܩܝܵܡܬܹܗ‌. ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܗܵܘ ܕܣܸܠَܩܠܹܗ ܠܫܡܲܝܵܐ ܒܚܸܩܪܵܐ ܠܟܸܣ ܒܵܒܘܼܗ‌ܝ. ܘܗܕܝܼܪܵܐ ܝَܠܹܗ ܕܐܵܬܹܗ ܒܘܼܬ ܢܘܼܚܵܡܲܢ. ܐܲܝܟܼ ܣܵܗܕܘܼܬܵܐ ܕܡܲܠܲܐܟ̣ܹ̈ܐ. ܒܸܬ ܦܲܪܸܥ ܠܟܠ ܐَܢܵܫܵܐ ܐܲܝܟܼ ܥܲܡܠܵܐ ܕܦܘܼܠܚܵܢܹܗ‌. ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܗܵܘ ܕܒܪܘܼܚܹܗ ܚܲܝܵܐ ܘܩܲܕܝܼܫܵܐ ܡܘܼܚܙܝܼܠܹܗ ܩܵܬܲܢ ܐܘܼܪܚܵܐ ܕܫܪܵܪܵܐ ܘܚܲܝܹ̈ܐ. ܒܗܲܝܡܵܢܘܼܬܵܐ ܘܗܝܼܒ̣ܝܼ ܘܦܘܼܩܸܕܠܹܗ ܩܵܬܲܢ ܕܒܚܘܼܒܵܐ ܕܠܟܸܣ ܐܸܚܕܵܕܹ̈ܐ ܡܲܚܙܲܚ. ܘܒܡܲܪܚܡܵܢܘܼܬܵܐ ܬܲܡܸܙܲܚ ܫܸܚ̈ܬܲܢ ܒܦܘܼܚܵܠܵܐ ܕܓܢܵܗ̈ܵܬܲܢ. ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ 

     ܫܲܚܠܸܦ. ܫܡܸܥ ܒܵܥܘܼܬܲܢ ܘܪܲܚܸܡ ܥܲܠܲܢ. ܘܓ̰ܲܘܸܒܝܼ. ܫܡܸܥ ܒܵܥܘܼܬܲܢ ܘܪܲܚܸܡ ܥܲܠܲܢ. ܐܲܩܸܦ. ܒܵܒܵܐ ܣܓ̣ܝܼܕܵܐ: ܪܲܚܸܡܥܲܠܲܢ‌܀ ܒܪܵܐ ܡܬܘܿܡܵܝܵܐ: ܪܲܚܸܡ ܥܲܠܲܢ‌܀ ܪܘܼܚܵܐ ܕܩܘܼܕܫܵܐ: ܪܲܚܸܡ ܥܲܠܲܢ‌܀ ܗܝܼܒ̣ܝܼ ܕܚܲܝ̈ܝܲܢ: ܪܲܚܸܡ ܥܲܠܲܢ‌܀ ܝܼܫܘܿܥ ܡܲܠܟܲܢ: ܪܲܚܸܡ ܡܥܲܠܲܢ‌܀ ܫܡܸܥ ܩܵܠܵܐ ܕܪܹ̈ܓܵܘܵܬܘܼܟܼ: ܪܲܚܸܡ ܥܲܠܲܢ‌‌‌܀ ܦܲܚܸܠ ܓܢܵܗ̈ܵܬܲܢ: ܪܲܚܸܡ ܥܲܠܲܢ‌‌܀ ܓ̰ܲܘܘܸܒܠܲܢ ܚܲܢܵܢܵܐ: ܪܲܚܸܡ ܥܲܠܲܢ‌‌܀ ܒܲܣܡܵܐ ܠܹܗ ܒܚܲܝ̈ܝܲܢ: ܪܲܚܸܡ ܥܲܠܲܢ‌‌܀ ܪܵܚܹܡܢܵܫܵܐ: ܪܲܚܸܡ ܥܲܠܲܢ‌. 

     ܫܲܚܠܸܦ. ܫܡܸܥ ܒܩܵܠܲܝ̈ܢ ܘܪܲܚܸܡ ܥܲܠܲܢ.  ܘܓ̰ܲܘܸܒܝܼ. ܡܵܪܲܢ ܪܲܚܸܡ ܥܲܠܲܢ‌܀ ܐܲܩܸܦ. ܥܲܠ ܫܲܝܢܹܗ ܕܥܵܠܡܵܐ ܘܫܠܵܡܵܐ ܕܟܠ ܦܸܢܝܵܬܹ̈‌ܐ. ܘܩܘܼܝܵܡܵܐ ܕܥܹܕܬܵܐ ܩܵܬܼܘܿܠܝܼܩܝܼ ܘܢܛܵܪܬܵܐ ܕܝܵܠ̈ܕَܘܿܗ̇. ܘܦܘܼܪܩܵܢܵܐ ܕܟܠ ܙܠܝܼܡܹ̈ܐ. ܒܸܛܠܵܒܵܐ ܝَܘܲܚ ܡܸܢܘܼܟܼ‌‌܀  ܥܲܠ ܚܘܼܠܡܵܢܵܐ ܕܐܲܒ̣ܵܗܵܬ̈ܲܢ ܩܲܕܝܼܫܹ̈ܐ: ܡܵܪܝ ܦܠ݁ܢ ܩܵܬ̣ܘܿܠܝܼܩܵܐ ܦܵܛܲܪܝܵܪܟܵܐ. ܘܡܵܪܝ ܦܵܠ݁ܢ ܡܝܼܛܪܵܦܘܿܠܹܝܛܵܐ [ܐܵܘ ܐܲܦܸܣܩܘܿܦܵܐ]: ܘܥܲܠ ܟܠܵܝܗܝ ܒܢܲܝ̈ ܚܸܠܡܲܬܵܝܗܝ. ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܥܲܠ ܟܵܗܢܹ̈ܐ ܘܡܲܠܟܹ̈ܐ ܘܫܲܠܝܼܛܵܢܹ̈ܐ ܕܡܲܩܘܸܬ̇ ܠܗَܘܿܢ ܒܗܝܼܒ̣ܝܼ ܕܗܲܝܡܵܢܘܼܬܘܼܟܼ. ܘܒܝَܕܵܝܥܬܵܐ ܕܒܝܼܘܼܟܼ. ܘܙܕܘܿܥܬܵܐ ܕܡܸܢܘܼܟܼ. ܘܒܪ̈ܲܚܡܹܐ ܬܲܓܒܸܪܝܼ ܐܘܼܚܕܵܢܲܝ̈ܗ‌ܝ ܒܚܘܼܒܵܐ ܘܣܘܼܙܓܵܪܵܐ‌. ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܥܲܠ ܟܠ ܥܵܡܪ̈ܵܢܹܐ ܒܛܘܼܪ̈ܵܢܹܐ. ܘܝܵܬܒ̣ܵܢܹ̈ܐ ܒܫܩܝܼܦܹ̈ܐ. ܐَܢܵܫܹ̈ܐ ܕܠܹܐ ܚܵܫܸܚ ܐܸܠܵܝܗ‌ܝ ܥܵܠܡܵܐ. ܘܥܲܠ ܟܠ ܕܒܥܘܼܡܪܹ̈ܐ ܫܲܦܝܼܪܹ̈ܐ. ܕܝܑܼܢܵܐ ܚܲܦܛܵܢܹ̈ܐ ܠܸܢܛܵܪܵܐ ܦܘܼܩܕܵܢ̈ܘܼܟܼ‌. ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܥܲܠ ܟܠ ܐܵܙܵܠَܢܹ̈ܐ ܒܝܵܡܵܬܹ̈‌ܐ ܘܒܐܘܼܪ̈ܚܵܬܹ‌ܐ. ܘܟܠ ܦܵܠܵܚܹ̈ܐ ܕܟܹܐܢܘܼܬܵܐ. ܘܥܲܠ ܝܲܚܣܝܼܪܹ̈ܐ ܘܡܫܲܥܒܕܹ̈ܐ. ܘܐܵܦ ܥܲܠ ܕܸܫ̮ܡܸ̈ܢܲܢ ܘܣܵܢܝܵܢܲܝ̈ܢ. ܒܸܛܠܵܒܵܐ ܝَܘܲܚ ܡܸܢܘܼܟܼ‌‌܀ ܥܲܠ ܡܸܪ̈ܥܝܹܐ ܒܪܸܡܙܘܼܟܼ ܕܦܵܝܫܝܼ ܒܣܝܼܡܹ̈ܐ. ܘܥܲܠ ܟܠ ܡܘܼܥܝܸܩܹ̈ܐ ܘܡܘܼܠܝܸܨܹ̈ܐ ܕܗܵܘܝܼ ܪܲܗܲܬ ܒܗܝܼܒ̣ܝܼܘܼܟܼ. ܘܐܵܦ ܥܲܠ ܙܲܒܘܼܢܹ̈ܐ ܘܡܸܣܟܹܢܹ̈ܐ ܕܦܵܝܫܝܼ ܣܢܝܼܕܹ̈ܐ ܒܝܲܡܝܼܢܵܐ ܕܡܵܪܘܼܬܘܼܟܼ. ܒܸܛܠܵܒܵܐ ܝَܘܲܚ ܡܸܢܘܼܟܼ‌‌܀ ܐܲܠܵܗܵܐ ܡܪܲܚܡܵܢܵܐ ܘܐܵܟ̣ܠܵܢܵܐ ܕܚܲܡ ܘܬܲܓܒܸܪܵܢܵܐ ܕܟܠ ܒܸܪ̈ܝܵܬܹ‌ܐ. ܗܵܘ ܕܒܕܵܘܸܠܬܵ‌ܐ ܕܒܲܣܝܼܡܘܼܬܹܗ ܟܹܐ ܡܲܫܦܸܟܼ ܛܵܒ̣ܵܬܹ̈ܗ ܥܲܠ ܒܝܼܫܹ̈ܐ ܘܙܵܠܘܿܡܹ̈ܐ. ܒܸܛܠܵܒܵܐ ܝَܘܲܚ ܡܸܢܘܼܟܼ‌‌܀ ܗܵܘ ܕܒܲܫܡܲܝܵܐ ܡܲܠܲܐܟ̣ܹ̈ܐ ܟܹܐ ܡܒܵܪܟܼܝܼ ܠܐܝܼܩܵܪܹܗ. ܘܣܪ̈ܵܦܹܐ ܡܩܵܕܘܼܫܹܐ ܝَܢܵܐ ܐܸܠܹܗ ܬܠܝܼܬܵܐܝܼܬ. ܘܡ̣ܢ ܡܵܘܬܒ̣ܹ̈ܐ ܦܝܵܫܵܐ ܝَܠܹܗ ܡܫܘܼܒܚܵܐ. ܘܡ̣ܢ ܡܲܠܲܐܟ̣ܹ̈ܐ ܦܝܵܫܵܐ ܝَܠܹܗ ܣܓ̣ܝܼܕܵܐ ܘܫܸܡܹܗ ܩܲܕܝܼܫܵܐ ܦܝܵܫܵܐ ܝَܠܹܗ ܡܘܼܪܡܵܐ. ܒܸܛܠܵܒܵܐ ܝَܘܲܚ ܡܸܢܘܼܟܼ‌‌܀ ܛܵܒ̣ܵܐ ܡܫܘܼܪܵܝܵܐ. ܡܩܘܼܕܫܵܐ ܐܝܼܬܝܵܐܝܼܬ. ܘܒܲܣܝܼܡܵܐ ܟܝܵܢܵܐܝܼܬ. ܕܡܼܢ ܠܵܐ ܡܸܢܕܝܼ ܩܵܡ ܒܵܪܹܐܠܲܢ. ܒܚܢܵܢܘܼܟܼ ܒܲܣܸܡܠܗَܘܿܢ ܡܲܪ̈ܥܲܢ. ܘܐَܣܘܿܪܘܼܢ ܒܪ̈ܝܼܢܵܬܲܢ ܒܕܸܪܡܵܢܵܐ ܕܡܪܲܚܡܵܢܘܼܬܘܼܟܼ‌. ܒܸܛܠܵܒܵܐ ܝَܘܲܚ ܡܸܢܘܼܟܼ‌܀ ܦܪܘܿܩ ܠܟܠܲܢ ܒܨܠܝܼܒ̣ܘܼܟܼ. ܘܥܒ̣ܘܿܕ ܫܲܝܢܵܐ ܠܥܹܕܬܘܼܟܼ ܦܪܝܼܩܬܵܐ ܒܕܸܡܘܼܟܼ ܛܝܼܡܵܢܵܐ. ܡܫܝܼܚܵܐ ܕܩܘܼܒܸܠܹܗ ܓ̰ܘܼܢܓ̰ܵܪܹ̈ܐ ܥܲܠ ܓܵܓ̣ܘܼܠܬܵ‌ܐ ܒܘܼܬ ܕܝܼܲܢ. ܘܪܲܚܸܡ ܥܲܠܲܢ‌܀

ܩܪܝܢܐ؛ ܐ

ܡܘܬܒ̣ܐ؛ ܒ.

(ܣܝܵܡܵܐ ܕܡܵܪܝ ܐܲܦܪܹܝܡ ܡܲܠܦܵܢܵܐ ܣܘܼܪܝܵܝܵܐ).

ܠܹܐ ܗَܘܵܐ ܚܲܙܝܼܢܵܐ ܫܒܸܩܠܹܗ ܐܸܠܲܢ ܒܵܒܲܢ: ܩܵܐ ܕܦܲܪܥܲܚ ܠܹܗ ܡܸܢܵܗ̇ ܕܵܝܢܲܢ. ܕܵܝܢܵܐ ܫܒ̣ܝܼܩܠܹܗ ܐܸܠܲܢ ܟܲܕ ܒܸܡܝܵܬܵ‌ܐ ܝܼܗَܘܵܐ: ܘܡܘܼܙܝܸܕܠܹܗ ܥܲܠܘܼܗܝ ܚܘܼܣܪܵܢܵܐ. ܐܸܠܘܼܟܼ ܚܫܝܼܚܬܵ‌ܐ ܝܼܠܵܗ̇ ܝܵܐ ܕܵܘܠܲܬܡܲܢܕ: ܕܪܲܚܡܸܬ ܠܬܝܵܒ̣ܘܼܬܲܢ. ܛܘܼܒ̣ܵܐ ܠܲܢ ܕܐܝܼܬ ܠܲܢ ܡܵܪܵܐ ܕܲܝܢܵܐ ܘܛܲܠܒܵܢܵܐ܀ ܡܵܪܵܐ ܕܲܝܢܵܐ ܒܸܛܠܵܒܵܐ ܝܼܠܹܗ ܡܸܢܲܢ: ܘܒܸܫܩܵܠܵܐ ܝܼܠܹܗ ܗ̇ܘ ܡܸܢܕܝܼ ܕܩܲܡ ܝܵܗَܒܸܠܲܢ. ܐܸܢ ܗܵܘܲܚ ܗَܘܵܐ ܕܲܝܢܵܢܹ̈ܐ ܩܵܐ ܣܢܝܼܩܵܐ: ܡ̣ܢ ܪܲܡܫܵܐ ܪ̈ܝܼܓܵܘܵܬܹܐ ܒܸܬ ܗܵܘܝܼ ܗَܘܵܐ ܥܒ̣ܝܼܕܲܢ. ܩܵܬܘܼܟܼ ܕܲܝܢܵܢܹ̈ܐ ܝܘܲܚܢَ ܝܵܐ ܒܲܪ ܛܵܒ̣ܵܐ: ܕܒܘܼܬ ܚܵܬܸܪܲܢ ܦܝܼܫܠܘܼܟܼ ܡܙܘܼܒܢܵܐ. ܡܵܪܵܐ ܕܲܝܢܵܐ ܦܝܼܫܠܹܗ ܡܙܘܼܒܢܵܐ: ܘܕܲܝܢܵܢܕܵܪܹ̈ܐ ܒܝܼܘܼܗܝ ܦܝܼܫܠܗَܘܿܢ ܚܹܐܪܹ̈ܐ܀ ܒܸܛܠܵܒܵܐ ܝܘܲܚ ܩܵܐ ܓܵܢܲܢ ܝܵܐ ܡܪܲܚܡܵܢܵܐ: ܡܲܙܝܸܕ ܠܲܢ ܬܘܼܪܣܵܝܵܐ ܕܙܲܒ̣ܢܵܐ. ܡܵܢܝܼ ܝܼܠܹܗ ܐܲܝܟܼ ܕܐܵܗܵܐ ܡܵܪܵܐ ܝܲܢ ܐܲܝܟܼ ܕܐܵܗܵܐ ܒܲܪ ܡܵܪܵܐ: ܠܹܐ ܝܘܲܚ ܒܹܐܡܵܪܵܐ ܕܦܲܪܥܲܚ ܠܹܗ ܐܘܿܦ ܠܵܐ ܐܝܼܬ ܒܚܲܝܠܲܢ ܕܦܲܪܥܲܚ ܠܹܗ. ܛܵܠܘܿܡܹ̈ܐ ܝܘܲܚ ܡܵܘܕܘܼܝܹܐ ܝܘܲܚ: ܠܣܢܝܼܩܹ̈ܐ ܟܹܐ ܡܬܲܪܣܹܐ ܦܵܬܘܿܪܘܼܟܼ܀ ܘܐܝܼܡܲܢ ܕܟܦܝܼܢܘܿܢ ܐَܬܹܐܠܗَܘܿܢ ܠܟܸܣܠܘܼܟܼ: ܘܐܝܼܡܲܢ ܕܣܒܸܥܠܗَܘܿܢ ܫܒ̣ܝܼܩܠܗَܘܿܢ ܘܪܚܝܼܩܠܗَܘܿܢ. ܐܸܢ ܣܢܝܼܩܹ̈ܐ ܝَܢܵܐ ܒܝܼܕܲܥܝܵܐ ܝَܢܵܐ ܠܬܲܪܥܘܼܟܼ: ܘܐܸܢ ܠܹܐ ܝَܢܵܐ ܒܸܩܠܵܒܵܐ ܝَܢܵܐ ܐܲܝܟܼ ܥܲܒܼܪ̈ܵܢܹܐ. ܗܘܹܐ ܠܹܗ ܟܲܪܒܵܐ ܓ̰ܡܸܥܠܗَܘܿܢ ܠܥܹܕܬܵܐ ܗܘܹܐ ܠܹܗ ܫܲܝܢܵܐ ܫܒ̣ܝܼܩܠܗَܘܿܢ ܠܥܹܕܬܵܐ. ܥܲܡ ܙܲܕܝܼܩܹ̈ܐ ܡܲܩܪܸ̈ܨܵܢܹܐ ܝَܘܲܚ: ܘܥܲܡ ܡܕܲܒܪ̈ܵܢܹܐ ܩܘܼܚܵܢܹ̈ܐ ܝܘܲܚ܀ ܘܐܸܢ ܚܲܕَܟ̰ܵܐ ܢܵܓ̰ـܘܸܬ ܒܝܼـܲܢ: ܗܸܟ̃ ܠܹܐ ܩܵܒܸܠ ܪܸܥܝܵܢܲܢ. ܐܲܢَܬ ܟܹܐ ܡܵܨܸܬ ܕܛܲܥܢܸܬ ܠܲܢ: ܫܵܦܵܩܲܬܘܼܟܼ ܝܼܠܵܗ̇. ܕܡܩܵܒܘܼܠܲܢ ܝܼܠܵܗ̇ ܐܝܼܡܲܢ ܡܘܼܥܝܸܩܵܐ ܝܼܠܹܗ ܝܲܠܘܼܕܵܐ: ܚܘܼܒܵܐ ܕܒܵܒܹܗ ܟܹܐ ܚܵܦܸܩܠܹܗ. ܓܘܼܪܬܵܐ ܝܼܠܵܗ̇ ܡܵܪܝܼ ܥܵܣܩܘܼܬܲܢ ܐܵܣܝܵܐ ܡܩܵܒܸܠ ܛܲܪ̈ܛܸܡܝܵܬܲܢ ܐܵܣܝܵܐ ܒܲܣܝܼܡܵܐ ܟܹܐ ܛܵܥܸܢ ܥܵܣܩܘܼܝܵܬܹ̈‌ܐ ܕܡܲܪ̈ܥܲܢ: ܠܹܐ ܝܼܗَܘܵܐ ܘܵܓ̰ܸܒ ܕܩܵܒܸܠ ܗَܘܵܐ ܡܒܵܕܵܠܲܢ. ܐܲܢَܬ ܝَܘܸܬ ܘܒܸܛܥܵܢܵܐ ܝَܘܸܬ: ܓܘܼܪܵܐ ܝܼܠܹܗ ܥܵܘܠܵܐ ܡ̣ܢ ܚܲܝܠܲܢ. ܘܐܲܫܟܵܪܵܐ ܝَܢܵܐ ܦܲܐܬܘܵܬܹ̈ܐ ܕܩܲܫܕܸܪ̈ܵܢܹܐ: ܐܘܿܦ ܠܵܐ ܦܲܪܨܘܿܦܵܐ ܕܬܲܝܵܒ̣̈ـܹܐ. ܡܘܼܚܙܹܐܠܲܢ ܒܸܬܝܵܒ̣ܘܼܬܲܢ: ܗ̇ܘ ܚܲܛܵܝܵܐ ܠܹܐ ܡܩܲܫ̃ܕܸܪ ܗَܘܵܐ܀ ܒܹܐܡܵܪܵܐ ܝَܠܹܗ ܕܚܵܐܸܪ ܗَܘܵܐ ܒܲܫܡܲܝܵܐ: ܚܲܕَܟ̰ܵܐ ܝܼܠܵܗ̇ ܠܩܲܫܕܲܪܬܲܢ ܕܒܲܫܡܲܝܵܐ ܐܲܚܟ̰ܝܼ ܓܵܫܩܲܚ: ܐܲܢَܬ ܒܵܒܵܐ ܠܬܸܦܸܠܘܼܬܲܢ. ܘܡܵܪܵܐ ܛܵܒ̣ܵܐ ܠܩܘܼܠܠܘܼܬܲܢ: ܐܲܢَܬ ܝَܘܸܬ ܕܲܪܡܵܢܵܐ ܕܡܲܪܥܲܢ. ܘܐܲܣܪܵܢܵܐ ܓܘܼܪܵܐ ܕܫܸܡܛܲܢ: ܐܲܢَܬ ܝَܘܸܬ ܦܵܬܘܿܪܵܐ ܕܟܸܦܢܘܼܬܲܢ܀ ܐܲܢَܬ̇ ܝَܘܸܬ ܡܲܒܘܼܥܵܐ ܕܨܲܗܝܘܼܬܲܢ: ܐܲܢَܬ ܝَܘܸܬ ܕܟܹܐ ܢܵܓ̰ـܘܸܬ ܐܝܼܡܲܢ ܕܟܹܐ ܪܲܚܡܸܬ. ܐܲܢَܬ ܝَܘܸܬ ܪܹܫܵܐ ܐܝܼܡܲܢ ܕܟܹܐ ܡܲܚܸܒܸܬ: ܐܲܢَܬ ܝَܘܸܬ ܕܟܹܐ ܪܲܚܡܸܬ̇. ܐܝܼܡܲܢ ܕܟܹܐ ܡܵܚܸܬ. ܐܲܢَܬ̇ ܝَܘܸܬ ܕܟܹܐ ܡܵܚܸܬ ܩܵܐ ܕܒܲܣܡܸܬ̇ ܬܲܥܠܸܡܬܘܼܟܼ ܩܵܐ ܡܸܪ̈ܥܝܹܐ. ܟܠܵܗ̇ ܚܸܙܝܼܢܬܵ‌ܐ ܕܕܸܪ̈ܡܵܢܹܐ ܝܼܠܵܗ̇: ܩܵܐ ܕܠܵܐ ܦܵܝܫܲܚ ܡܓ̰ܘܼܢܓ̰ܸـܪܹ̈ܐ ܩܲܡ ܡܓ̰ܲܢܓ̰ܸܪܸܬܠܲܢ܀ ܒܚܲܕَ ܓ̰ܘܢܓ̰ܵܪܵܐ ܙܥܘܿܪܵܐ ܟܹܐ ܦܲܪܩܸܬ̇ ܠܲܢ. ܡ̣ܢ ܓ̰ܘܼܢܓ̰ܵܪܵܐ ܓܘܼܪܵܐ ܕܓܹܗܲܢܵܐ. ܪܵܒܵܐ ܗܲܩ ܝܼܗَܘܵܐ ܕܡܵܚܸܬ ܗَܘܵܐ: ܐܝܼܢܵܐ ܪܵܒܵܐ ܚܲܡܠܵܢܵܐ ܝَܘܸܬ. ܒܚܲܕَ ܓ̰ܘܼܢܓ̰ܵܪܵܐ ܙܥܘܿܪܵܐ ܦܝܵܫܵܐ ܝَܢܵܐ ܒܘܼܛܠܹ̈ܐ: ܓ̰ܘܼܢܓ̰ܵܪܹ̈ܐ ܕܒܕܲܥܬܝܼܕ. ܚܲܕَܟ̰ܵܐ ܝܼܠܵܗ̇ ܕܟܹܐ ܡܵܚܸܬ̇ ܠܲܢ: ܘܒܝܵܘܡܵܐ ܕܝܼܘܵܢ ܠܵܐ ܡܵܚܸܬ ܠܲܢ܀ ܒܗܵܘܓܵܐ ܕܦܘܼܡܘܼܟܼ ܟܹܐ ܢܵܓ̰ܘܸܬ ܒܝܼـܲܢ: ܕܠܵܐ ܡܲܢܚܸܣܸܬ ܠܲܢ ܐܝܼܡܲܢ ܕܐܵܬܸܬ. ܐܸܢ ܐܵܟ̰ܡܸܬ̇ ܠܹܗ ܬܲܪܥܘܼܟܼ ܥܲܠܲܢ: ܒܝܵܘܡܵܐ ܕܝܼܘܵܢ ܦܬܘܿܚ ܠܹܗ ܐܸܠܲܢ. ܚܘܼܒܘܼܟܼ ܠܲܐܟ̣ܵܐ ܟܹܐ ܐܵܟ̰ܸܡ ܠܹܗ ܒܚܲܪܬܵܐ ܟܲܪܒܘܼܟܼ ܟܹܐ ܕܵܒܸܩܠܹܗ. ܟܲܕ ܐَܟ̰ܝܼܡܵܐ ܝܼܠܹܗ ܩܵܐ ܚܲܕَܟ̰ܵܐ ܥܸܕܵܢܵܐ ܒܸܬ ܬܲܩܬܸܩܲܚ ܚܲܕَܟ̰ܵܐ ܥܸܕܵܢܵܐ܀ ܪܵܒܵܐ ܟܹܐ ܬܲܩܬܸܩܝܼ: ܟܲܕ ܐَܟ̰ܝܼܡܵܐ ܝܼܠܹܗ ܪܵܒܵܐ ܥܸܕܵܢܵܐ ܐܵܚܘܿܢܘܵܬ̈ܝܼ ܡܲܪܥܸܫܲܚ ܛܠܵܝ̈ܵܬܲܢ: ܕܚܵܕܝܼ ܥܝܼܪܹ̈ܐ ܒܪܥܝܼܫܘܼܬܲܢ. ܒܲܬܝܵܒ̣ܘܼܬܲܢ ܦܵܝܫܲܚ ܡܟ̰ܘܼܟܒܸܢܹ̈ܐ: ܘܩܵܛܠܲܚ ܠܥܵܘܠܵܐ ܟܹܐ ܩܵܛܸܠܲܢ. ܡܚܹܐܠܹܗ ܪܹܝܚܵܐ ܕܣܸܪܝܘܼܬܲܢ ܥܲܠ ܦܲܐܬ̈ܘܵܬܲܢ: ܕܠܵܐ ܡܘܼܒܣܸܡܠܲܢ ܪܹܝܚܲܢ ܒܲܡܫܝܼܚܵܐ܀ ܗܵܐ ܒܹܐܟ̣ܵܠܵܐ ܝَܢܵܐ ܓܲܦܹ̈ܐ ܥܲܠܲܢ ܒܸܪ̈ܝܵܬܹ‌ܐ: ܣܵܒܵܒ ܕܒܵܪܘܿܝܲܢ ܡܘܼܟܪܸܒܠܲܢ. ܗܵܐ ܪܓܸܕܠܵܗ̇ ܐܲܪܥܵܐ ܬܚܘܼܬܲܢ: ܕܠܵܐ ܙܕܸܥܠܲܢ ܡ̣ܢ ܥܸܠܵܝܵܐ. ܫܩܝܼܦܹ̈ܐ ܪ̈ܵܡܹܐ ܬܠܸܚܠܗَܘܿܢ: ܕܪܝܼܡܠܵܗ̇ ܠܥܘܿܠܘܿܠ ܡܸܢܲܝܗܝ ܪܵܡܘܼܬܲܢ ܐܵܦ ܐܝܼܠܵܢܹ̈ܐ ܦܸܫܠܗَܘܿܢ ܥܩܝܼܪܹ̈ܐ: ܕܥܵܕܲܬܹ̈ܐ ܒܝܼܫܹ̈ܐ ܥܵܩܪܲܚ ܠܗَܘܿܢ܀ ܟܲܪܒܵܐ ܒܸܥܩܵܪܵܐ ܝܼܠܹܗ ܢܨܸܒ̣ܝܵܬܹ̈ܐ: ܩܵܐ ܕܐܲܚܢܲܢ ܥܵܩܪܲܚ ܠܗَܘܿܢ ܣܢ̈ܵܝܵܬܲܢ. ܡܚܹܐܠܗَܘܿܢ ܒܸܪ̈ܩܹܐ ܘܡܘܼܒܪܸܙܠܗَܘܿܢ: ܕܠܸܒܵܐ ܕܟܹܐܦܵܐ ܦܵܐܸܫ ܡܘܼܪܟܸܟ̣ܵܐ. ܚܘܼܫܟܸܢܘܿܢ ܢܲܗܝܼܪܹ̈ܐ ܒܲܫܡܲܝܵܐ. ܕܚܵܙܲܚ ܒܚܸܫܟܵܐ ܬܲܪ̈ܩܸܠܝܵܬܲܢ. ܕܒܝܲܕ ܒܲܗܪܵܐ ܠܹܐ ܚܵܙܲܚ ܗَܘܵܐ: ܚܘܼܫܟܸܢܹܗ ܒܲܗܪܵܐ ܕܟܹܐ ܚܵܙܲܚ ܒܝܼـܹܗ܀ ܡܘܼܢܬܝܼܠܗَܘܿܢ ܒܐܘܼܪܚܵܐ ܛܠܝܼܩܹ̈ܐ: ܘܝܵܕܥܵܢܹ̈ܐ ܡܘܼܦܟ̰ܸܠܵܐ ܠܗَܘܿܢ ܐܘܼܪܚܵܐ. ܡܘܼܚܪܸܒ̣ܠܗَܘܿܢ ܩܘܼܕܫܲܢ ܟܵܦܘܼܪܹ̈ܐ: ܬܪܘܼܨܘܼܬܵܐ ܒܕܘܼܓܠܵܐ ܡܦܘܼܫܩܵܐ ܠܗَܘܿܢ. ܟܵܗܢܹ̈ܐ ܡܚܹܐܠܗَܘܿܢ ܕܲܩܪܵܐ ܠܸܚܕܵܕܹ̈ܐ: ܚܠܝܼ̈ܛܹܐ ܡܘܼܪܸܡܠܗَܘܿܢ ܩܵܪَܢܵܐ ܐܵܚܘܿܢܘܵܬܹ̈ܐ ܪܕܝܼܦܠܗَܘܿܢ ܠܸܚܕܵܕܹ̈ܐ: ܚܲܕَ ܒܸܪܕܵܦܵܐ ܝܼܠܹܗ ܠܣܲܓܝܼܐܹ̈ܐ܀ ܣܵܒܵܒ ܕܩܠܸܒܠܲܢ ܡ̣ܢ ܒܵܪܘܿܝܲܢ ܥܒ̣ܝܼܕܸܚܠܹܗ ܠܵܘܡܵܐ ܠܫ̈ܒ̣ܵܒ̣ـܲܢ. ܕܐܲܝܟܼ ܡܲܬܠܵܐ ܗَܘܹܐ ܠܗَܘܿܢ ܐܸܠܲܢ ܗܹܡܸܙܡܵܢ̈ܘܼܗܝ: ܗܘܹܐܠܲܢ ܠܡܲܬܠܵܐ ܘܠܬܘܼܢܵܝܵܐ. ܒܗ̇‌ܝ ܕܡܟ̰ܘܼܦܠܸܢܵܐ ܠܲܢ ܐܵܦ ܐܘܼܪܚܲܢ: ܘܠܠܵܘܡܵܐ ܓܘܼܪܵܐ ܥܒ̣ܝܼܕܵܐ ܠܲܢ. ܥܒ̣ܝܼܕܸܚܠܹܗ ܠܵܘܡܵܐ ܠܒܲܪ̈ܵܝܹܐ: ܕܩܲܒܠܲܚ ܡܸܢܲܝܗ‌ܝ ܡܲܣܚܵܪܘܼܬܵܐ܀ ܗܵܐ ܒܵܩܘܼܪܲܢ ܝَܢܵܐ ܚܠܝܼܛܹ̈ܐ: ܐܲܝܟܵܐ ܝܼܠܹܗ ܚܲܝܠܹܗ ܕܲܫܪܵܪܵܐ. ܗܵܐ ܦܝܵܫܵܐ ܝܼܠܹܗ ܠܝܼܡܵܐ ܒܝܼـܲܢ ܐܵܕܝܼܵܐ: ܚܲܝܠܵܐ ܕܟܹܐ ܓܼܵܠܸܒ ܠܟܠ ܚܲܝ̈ܠܹܐ. ܛܘܼܫܝܼܠܵܗ̇ ܚܲܝܠܵܗ̇ ܚܹܐܪܘܼܬܲܢ: ܫܪܵܪܵܐ ܠܵܐ ܩܲܡ ܝܵܗَܒܸܠܹܗ ܓܼܵܠܝܼܒܘܼܬܵܐ. ܐܵܦ ܬܪܘܿܨܘܼܬܵܐ ܛܘܼܫܝܼܠܵܗ̇ ܚܲܝܠܘܼܗ̇: ܩܵܐ ܕܡܲܣܚܸܪܝܼ ܒܝܼـܲܢ ܚܠܝܼܛܹ̈ܐ܀ ܡܘܼܩܸܕܠܗَܘܿܢ ܛܲܡܐܸ̈ܐ ܥܹܕ̈ܵܬܲܢ: ܕܓܵܘܵܝܗܝ ܨܦܵܝܼ ܠܵܐ ܨܘܼܠܹܐܠܲܢ. ܡܲܕܒ̱ܚܵܐ ܟ̰ܠܝܼܦܠܹܗ ܕܩܵܕَܡܘܼܗܝ: ܒܕܸܟ̣ܝܘܼܬܵܐ ܠܵܐ ܥܒ̣ܝܼܕܠܲܢ ܚܸܠܡܲܬ. ܟܬܵܒ̣̈ـܹܐ ܩܲܕܝܼܫܹ̈ܐ ܡܩܘܼܛܩܸܛܠܗَܘܿܢ: ܕܠܵܐ ܢܛܝܼܪܝܼܠܲܢ ܦܘܼܩ̈ܕܵܢܘܼܗܝ. ܦܝܼܫܠܗَܘܿܢ ܣܠܝܼܒܹ̈ܐ ܝܲܩܝܼܪ̈ܵܬܲܢ [ܚܲܙܝܼܢܲܝ̈ܢ] ܛܝܼܡܵܢܹ̈ܐ: ܣܵܒܵܒ ܕܙܝܼܕܠܹܗ ܥܵܘܠܵܐ ܒܝܵܘ̈ܡܵܬܲܢ܀ ܙܘܼܪܒܸܢܵܐ ܚܸܡܬܹܗ ܕܡܲܠܝܸܨܵܢܵܐ: ܣܵܒܵܒ ܪܵܒܵܐ ܙܝܼܕܠܵܗ̇ ܢܲܙܵܢܘܼܬܲܢ. ܣܵܒܵܒ ܕܙܠܝܼܡܠܲܢ ܠܫܵܦܵܩܲܬ: ܫܬܝܼܩܠܵܗ̇ ܡܸܢܲܢ ܟܹܐܢܘܼܬܵܐ. ܡܘܼܐَܬܹܠܹܗ ܟܹܐܢܵܐ ܐܘܼܠܵܨܵܢܹ̈ܐ: ܣܵܒܵܒ ܕܐܲܢܹܐ ܓܢܵܗܹ̈ܐ ܡܘܼܐَܬܹܐܠܹܗ ܥܲܠܲܢ ܐܘܿܦ ܒܝܼܫܵܬܹ̈‌ܐ: ܕܝܼـܲܝܗ‌ܝ ܡܲܫܠܝܼܠܗَܘܿܢ ܒܝܼܫ̈ܵܬܲܢ܀ ܐܝܼܢܵܐ ܠܵܐ ܫܒ̣ܝܼܩܸܚܠܹܗ: ܐܵܦܸܢ ܕܐܲܚܢܲܢ ܫܒ̣ܝܼܩܠܲܢ ܐܸܠܹܗ. ܟܹܐ ܒܲܥܝܹܐ ܕܬܲܥܠܸܡܠܲܢ ܩܵܐ ܕܩܵܢܝܼܠܲܢ. ܐܲܢܹܐ ܟܠܲܝܗ‌ܝ ܗܘܵܘ ܠܗَܘܿܢ ܠܟܸܣܠܲܢ: ܕܡܲܙܒܸܛ ܠܒܲܗܣܹ̈ܐ ܪ̈ܲܚܝܼܩܹܐ ܒܡܲܙܕܸܥܝܵܬܹ̈‌ܐ ܙܥܘܿܪܹ̈ܐ ܚܘܼܫ ܙܲܕܥܲܚ: ܕܡܘܼܡܟܸܢ ܓ̰ܘܼܢܓ̰ܵܪܵܐ ܩܸܫܝܵܐ ܒܸܬ ܐܵܬܹܐ܀ ܬܝܵܒ̣ܘܼܬܵܐ ܘܡܲܟܝܼܟ̣ܘܼܬܵܐ: ܩܲܫܕܪܲܚ ܘܙܲܪܥܲܚ ܠܗَܘܿܢ ܒܓܵܘܲܢ. ܕܗܵܐ ܙܝܼܕܠܗَܘܿܢ ܥܲܠܲܢ ܡ̣ܢ ܟܠ ܓܹܒܵܢܹ̈ܐ: ܦܠܵܫܹ̈ܐ ܛܸܫܝܹ̈ܐ ܘܓܸܠܝܹ̈ܐ. ܕܠܲܒ̣ܫܲܚ ܣܲܩܵܐ ܒܸܢܚܵܦܵܐ ܝܘܲܚܢَ ܒܸܚܫܵܒ̣ܵܐ ܝܘܲܚ ܕܟܘܼܦܘܼܬܵܐ ܝܼܠܵܗ̇ ܕܠܲܒ̣ܫܲܚ: ܡܲܒܨܸܪܬܵܐ ܝܼܠܵܗ̇ ܣܲܩܵܐ ܠܚܛܝܼ̈ܵܬܲܢ: ܘܩܸܛܡܵܐ ܠܡܲܚܘܲܪܬܵܐ ܕܠܲܟ̈ܲܢ܀ ܬܝܵܒ̣ܘܼܬܵܐ ܝܼܠܵܗ̇ ܡܠܘܿܐܵܗ̇ ܣܲܩܵܐ ܝܼܠܹܗ: ܟ̰ܵܬܘܿܢ ܝܼܠܵܗ̇ ܠܒܲܫܬܹܗ ܥܲܠ ܦܲܓ̣ܪܲܢ. ܙܲܒܘܼܢ ܝَܘܲܚ ܩܵܐ ܣܲܡܵܐ. ܘܚܲܝܠܵܢܹ̈ܐ ܝܘܲܚ ܩܵܐ ܚܛܝܼܬܵ‌ܐ ܡܲܙܕܲܥܝܵܬܹ̈‌ܐ ܙܥܘܿܪܹ̈ܐ ܡܘܼܟܪܸܙܠܗَܘܿܢ: ܬܝܵܒ̣ܘܼܬܵܐ ܠܵܙܸܡ ܝܼܠܵܗ̇. ܠܵܐ ܬܝܵܒ̣ܘܼܬܵܐ ܕܝܵܘܡܵܢܹ̈ܐ: ܐܸܠܵܐ ܕܝܲܪ̈ܚܹܐ ܘܕܫܸܢܹ̈ܐ܀ ܠܵܐ ܚܲܕَ ܝܵܘܡܵܐ ܛܵܥܢܲܚ ܝܘܼܩܪܵܐ: ܘܠܝܵܘܡܵܐ ܐَܚܹܪَܢܵܐ ܫܵܪܸܚܠܹܗ. ܫܵܩܠܲܚܢ ܘܛܵܥܢܲܚ ܕܘܼܒܵܪܹ̈ܐ: ܕܙܘܵܕܹ̈ܐ ܠܐܘܼܪܚܲܢ ܗܵܘܝܼ. ܒܘܼܫ ܨܦܵܝܼܝ ܝܑܼܠܹܗ ܪܸܚܛܵܐ ܢܝܼܚܵܐ ܕܗܲܡܵܫܵܐ: ܡ̣ܢ ܪܸܚܛܵܐ ܣܲܓܝܼܐܵܐ ܕܚܲܕَ ܝܵܘܡܵܐ. ܐܸܢ ܓ̰ܲܡܥܸܬ̇ ܠܹܗ ܠܗ̇ܘ ܕܗܲܡܵܫܵܐ: ܒܸܬ ܗܵܘܹܐ ܚܲܕَ ܩܘܼܚܵܐ ܓܘܼܪܵܐ܀ ܕܵܐܟ̣ܝܼ ܕܡ̣ܢ ܢܸܛܘܼܦܝܵܬܹ̈ܐ ܡܸܠܐܵܐ ܓܘܼܪܵܐ ܟܹܐ ܗܵܘܹܐ. ܬܵܝܡܘܿܢ ܡܩܲܪܒܸܢܘܿܢ ܝܵܐ ܚܲܛܵܝܹ̈ܐ: ܠܲܫܪܵܪܵܐ ܕܐܸܠܵܘܟ̣ܘܿܢ ܟܹܐ ܒܲܥܝܹܐ. ܠܵܐ ܥܲܪܩܸܠܝܼܬܘܿܢ ܚܲܝܵܒܹ̈ܐ [ܓܘܼܢܗܵܟܵܪܹ̈ܐ]: ܕܡܵܪܲܢ ܦܠܝܼܛܵܐ ܝܼܠܹܗ ܛܲܐܘܿܝܹܐ ܒܵܬَܪܵܘܟ̣ܘܿܢ. ܒܲܣ ܒܡܲܠܝܸܙܬܵܐ ܗܘܵܝܡܘܿܢ ܬܲܝܵܒ̣̈ـܹܐ: ܓܢܵܗܹ̈ܐ ܩܵܕَܡܵܝܹ̈ܐ ܒܸܬ ܦܵܝܫܝܼ ܡܘܼܢܫ̈ܝܼـܹܐ܀ ܐܲܢܹܐ ܕܐܲܡܪܲܚ ܝَܠܸܦܠܲܢ: ܐܝܼܢܵܐ ܕܥܲܒ̣ܕܲܚ ܗܸܟ̃ ܠܵܐ ܝَܠܸܦܠܲܢ. ܠܚܲܒ̣ܪܹܗ ܟܹܐ ܠܵܝܸܡ ܟܠ ܐَܢܵܫܵܐ: ܐܝܼܢܵܐ ܠܸܩܢܘܿܡܹܗ ܐܵܦ ܠܵܐ ܐܸܢ ܚܲܕَܟ̰ܵܐ. ܠܲܟܹ̈ܐ ܕܐܝܼܬ ܒܐَܚܹܪَ̈ܢܹܐ: ܫܸܚܬܲܝܗ‌ܝ ܒܸܚܙܵܝܘܼܗ̇ ܝܘܲܚ. ܟܲܕ ܪܵܒܵܐ ܣܸܪ̈ܝܹܐ ܝَܢܵܐ ܘܡܟ̰ܘܼܦܠܸܢܹ̈ܐ: ܕܲܪ̈ܒܵܬܹ‌ܐ ܕܐܝܼܬ ܒܩܢܘܿܡܲܢ܀ ܒܚܲܫܵܐ ܝܼܠܹܗ ܟܠ ܐَܢܵܫܵܐ ܥܲܠ ܣܲܟ̣ܠܘܼܬܲܢ: ܥܲܠ ܡܲܪܥܵܐ ܕܓ̰ܲܢܓ̰ܘܼܪܲܢ ܝܼܠܗ. ܒܚܓ̰ܵܠܬܵ‌ܐ ܝܼܠܹܗ ܟܠ ܐَܢܵܫܵܐ ܘܒܸܪܓܵܕܵܐ: ܣܵܒܵܒ ܕܵܘܸܠܬܵܐ ܕܦܸܠܲܢ ܦܝܼܫܠܵܗ̇ ܣܠܝܼܒܬܵܐ. ܐَܢܵܫܵܐ ܒܬܸܢܢܵܐ ܠܹܐ ܝܼܠܹܗ ܒܸܪܵܓَ̣ܫܵܐ: ܕܗ̇ܘ ܢܘܼܪܵܐ ܕܛܡܝܼܪܵܐ ܝܼܠܹܗ ܒܝܼـܹܗ܀ ܒܢܘܼܪܵܐ ܕܓܵܢܲܢ ܠܹܐ ܝَܘܲܚ ܒܸܪܵܓَ̣ܫܵܐ: ܟܲܕ ܬܸܢܢܘܼܗܝ ܡܵܣܡܘܼܝܲܢ ܝܼܠܹܗ. ܥܲܠ ܓ̰ܪ̈ܲܛܝܵܬܹ‌ܐ ܕܐَܚܹܪَ̈ܢܹܐ: ܟܠ ܐَܢܵܫܵܐ ܒܓܸܚܟܵܐ ܝܼܠܹܗ ܘܡܲܣܚܘܼܪܹܐ. ܡܵܢܝܼ ܚܙܹܐܠܹܗ ܫܸܚܬܵ‌ܐ ܕܓܵܢܹܗ: ܘܡܘܼܠܝܸܙܠܹܗ ܠܬܵܡܸܙܬܘܼܗ̇. ܟܲܕ ܥܵܘܠܵܐ ܓܘܼܪܵܐ ܛܸܫܝܵܐ ܝܼܠܹܗ ܒܝܼـܲܢ: ܘܗ̇ܘ ܒܵܨܘܿܪܵܐ ܓܸܠܝܵܐ ܓܘܼܪܵܐ ܝܼܠܹܗ ܩܵܬܲܢ܀ ܫܒ̣ܝܼܩܠܹܗ ܡܲܪܥܵܐ ܕܗ̇ܘ ܕܬܒ̣ܝܼܪܵܐ ܝܼܠܹܗ: ܘܒܗ̇ܘ ܕܚܲܕَܟ̰ܵܐ ܣܪܝܼܛܵܐ ܝَܠܹܗ ܡܥܵܓ̰ܘܼܒܹܐ ܝܼܠܹܗ. ܠܣܵܦܪܹ̈ܐ ܪܵܒܵܐ ܟܹܐ ܡܲܕܡܲܚ: ܘܠܦܪ̈ܝܼܫܹܐ ܙܹܐ ܚܲܒ̣ܪ̈ܵܘܵܬܲܝܗ‌ܝ ܝَܘܲܚ ܥܵܓ̰ܝܼܒܘܼܬܵܐ ܟܹܐ ܚܵܙܝܼ ܗَܘܵܘ: ܘܥܲܠ ܫܹܐܕܵܢܘܼܝܵܬܹ̈‌ܐ ܟܹܐ ܟܲܪܒܝܼ ܗَܘܵܘ. ܫܘܼܠܚܵܠܲܢ ܟܠܵܗ̇ ܐܵܕܵܒܘܼܬܵܐ: ܐܲܚܟ̰ܝܼ ܫܸܡܵܐ ܦܝܼܫܵܐ ܠܟܸܣܠܲܢ܀ ܡ̣ܢ ܦܸܠܚܵܢܹ̈ܐ ܛܵܒ̣̈ـܹܐ ܪܸܚܩܵܐ ܝَܢܵܐ: ܫܡܵܗܹ̈ܐ ܦܝܵܫܵܐ ܝَܢܵܐ ܒܹܝܬَܦܲܠܓܵܐ. ܒܲܣ ܫܡܸܥܡܘܿܢ ܝܵܐ ܣܵܘܓܘܼܠܝܼ: ܩܛܸܥܡܘܿܢ ܕܝܼܘܵܢ ܐܲܝܟܼ ܡܸܨܥܵܝܹ̈ܐ. ܐܲܝܢܝܼ ܝَܢܵܐ ܕܘܵܓ̰ܸܒ ܝܼܗَܘܵܐ: ܠܐܲܠܵܗܵܐ ܕܦܵܠܸܚ ܠܟܸܣܠܲܢ. ܐܘܿܦ ܐܸܢ ܕܙܲܕܝܼܩܹ̈ܐ ܝܘܲܚ ܗَܘܵܐ: ܚܫܝܼܚܬܵ‌ܐ ܝܼܠܵܗ̇ ܕܬܲܪܨܲܚ ܟܘܼܪܵܐ ܕܢܘܼܪܵܐ܀ ܕܒܝܼܘܼܗ̇ ܡܣܲܪܸܦܲܚ ܙܲܕܝܼܩܘܼܬܲܢ: ܐܲܝܟܼ ܐܝܼܘܿܒ̣ ܘܐܲܝܟܼ ܐܲܒ̣ܪܵܗܵܡ. ܒܲܣ ܟܡܵܐ ܘܵܓ̰ܸܒ ܝܼܠܵܗ̇ ܐܲܚܘܿܢܘܵܬ̈ܝܼ: ܕܦܵܝܫܲܚ ܓ̰ܘܼܢܓ̰ܸܪܹ̈ܐ ܠܩܲܕܪܵܐ ܕܓܢ̈ܵܗܲܢ. ܘܟܡܵܐ ܕܡܵܘܕܲܚ ܥܲܠ ܓ̰ܘܼܢܓ̰ܵܪ̈ܲܢ: ܒܵܨܘܼܪܬܵܐ ܝܼܠܵܗ̇ ܡ̣ܢ ܣܲܟ̣ܠܘܼܬܲܢ. ܠܵܐ ܛܲܪܛܸܡܲܚ ܐܲܝܟܼ ܐَܢܵܫܹ̈ܐ. ܕܠܬܲܥܠܸܡܬܵܐ ܠܹܐ ܚܵܫܚܲܚ ܗَܘܵܐ܀ ܐܸܢ ܟܹܐܢܵܐ ܦܝܵܫܵܐ ܝܼܠܹܗ ܬܘܼܥܠܸܡܵܐ ܘܫܬܝܼܩܵܐ ܝܼܠܹܗ: ܒܲܣ ܚܘܼܫ ܐܵܟ̰ܸܡܠܹܗ ܦܘܼܡܹܗ ܚܲܛܵܝܵܐ. ܠܵܐ ܚܘܼܫ ܛܲܪܛܸܡ ܕܦܝܵܫܵܐ ܝܼܠܹܗ ܬܘܼܥܠܡܵܐ: ܥܵܓ̰ܝܼܒܘܼܬܵܐ ܝܼܠܵܗ̇ ܕܩܵܒܘܼܠܹܐ ܝܘܲܚ ܫܵܦܵܩܲܬ. ܗ̇ܘ ܕܟܹܐ ܡܵܨܹܐ ܡܵܚܹܐ ܪܵܒܵܐ: ܐܝܼܢܵܐ ܒܪ̈ܲܚܡܘܼܗܝ ܚܲܕَܟ̰ܵܐ ܡܲܙܕܘܼܥܝܹܐ ܝܼܠܹܗ. ܐܸܢ ܡ̣ܢ ܒܵܬَܪ ܕܥܒ̣ܝܼܕܠܲܢ ܣܵܟ̣ܠܘܼܬܵܐ: ܒܗܵܘܓܹܗ ܕܩܵܛܝܼܵܐ ܦܝܼܫܠܲܢ ܡܓ̰ܘܼܢܓ̰ܸـܪܹ̈ܐ܀ ܐܲܝܟܼ ܐَܢܵܫܵܐ ܡܬܘܼܥܠܡܵܐ ܡܛܲܪܛܘܼܡܹܐ ܝܘܲܚ: ܚܙܵܝܡܘܿܢ ܚܘܼܫ ܠܵܐ ܡܙܲܪܒܸܢܵܐ ܬܲܥܠܸܡܬܲܢ. ܬܵܘܸܒܘܿܢ ܘܗܘܵܝܡܘܿܢ ܐܲܝܟܼ ܡܸܨܥܵܝܹ̈ܐ: ܕܐܲܝܢܝܼ ܘܵܓ̰ܸܒ ܝܼܗَܘܵܐ ܠܥܒ̣ܵܕܲܐ. ܗ̇ܘ ܟܹܐܢܵܐ ܠܛܵܠܘܼܡܘܼܬܲܢ: ܘܗ̇ܘ ܒܲܣܝܼܡܵܐ ܠܒܝܼܫ̈ܵܬܲܢ. ܐܲܪܥܵܐ ܕܝܘܼܗَܒܸܚܠܹܗ ܟ̰ܘܼܦܠܸܢܵܗ̇ ܠܲܢ: ܓܲܢܬܵܐ ܕܝܘܼܗَܒܸܚܠܹܗ ܛܘܼܡܝܵܗ̇ ܠܲܢ܀ ܦܲܪܕܲܝܣܵܐ ܕܝܘܼܗَܒܸܚܠܹܗ ܡܫܘܼܚܬܸܢܲܢ: ܫܝܘܿܠ ܚܠܝܼܨܠܵܗ̇ ܐܸܢ ܦܪܝܼܩܠܵܗ̇. ܟܹܐ ܡܲܫܥܸܫ ܗ̇ܘ ܒܵܪܘܿܝܵܐ: ܒܸܪ̈ܝܵܬܘܼܗܝ ܡܣܵܒܵܒ ܒܝܼܫܹ̈ܐ. ܒܲܣ ܗܘܹܐ ܠܹܗ ܣܵܘܓܘܿܠܝܼ: ܥܵܘܠܲܢ ܗܵܓ̰ܲܬ ܕܫܝܲܥܫܵܐ  ܒܲܬܝܵܒ̣ܘܼܬܲܢ ܒܸܬ ܦܵܐܸܫ ܡܛܘܼܟܣܵܐ: ܕܘܼܒܵܪܵܐ ܫܸܠܝܵܐ ܕܗܵܘܵܐ܀ ܡܵܠܘܿܦܹܐ ܝܼܠܵܗ̇ ܟܹܐܢܘܼܬܹܗ ܕܛܵܒ̣ܵܐ: ܠܥܵܘܠܵܐ ܕܠܵܐ ܦܵܐܸܫ ܬܘܼܥܠܡܵܐ. ܫܘܼܦܪܹܐ ܟܹܐ ܦܵܪܸܣܠܹܗ ܥܲܠ ܠܲܟ̈ـܲܢ: ܕܠܵܐ ܦܵܝܫܝܼ ܚܸܙܝܹܐ ܡܘܼ̈ܡܲܢ: ܚܘܼܒܹܗ ܟܹܐ ܛܵܫܹܐ ܠܒܲܚܝܼܠܘܼܬܲܢ: ܕܠܵܐ ܦܵܐܸܫ ܠܝܼܡܵܐ ܒܩܝܼܪܸܬܲܢ. ܠܓܹܢܵܒ̣ܵܐ ܝܘܼܗَܒܸܠܹܗ ܦܘܼܩܕܵܢܵܐ: ܕܠܵܐ ܦܵܐܸܫ ܡܘܼܢܚܸܦܵܐ ܒܥܵܡܵܠܘܼܗܝ܀ ܠܓܲܝܵܪܵܐ ܡܘܼܬܸܒ̣ܠܹܗ ܢܵܡܘܿܣܵܐ: ܕܠܵܐ ܦܵܐܸܫ ܓܸܠܝܵܐ ܦܘܼܠܚܵܢܹܗ. ܠܟܸܣ ܩܵܛܘܿܠܵܐ ܐَܟ̣ܵܠܬܵ‌ܐ ܕܓܲܦܘܼܗܝ: ܐܝܼܢܵܐ ܚܘܼܒܹܗ ܟܹܐ ܪܵܬܸܚ ܠܟܸܣܠܘܼܗܝ. ܠܕܲܓܵܠܵܐ ܬܪܘܿܨܘܼܬܵܐ ܓܠܹܐܠܹܗ: ܕܠܹܐ ܝܼܗَܘܵܐ ܒܵܨܘܿܪܵܐ ܡ̣ܢ ܪܵܒܵܐ. ܠܙܲܢܵܝܵܐ ܙܵܘܕܵܐ ܢܵܨܝܼܗܲܬ ܒܝܼܵܗܒ̣ܵܐ ܝܼܠܹܗ: ܕܠܵܐ ܡܓܲܪܡܸܠ ܓܵܘ ܫܸܚܬܘܼܗܝ܀ ܚܘܼܒܹܗ ܟܹܐ ܢܵܓ̰ܸܒ̣ ܒܚܲܛܵܝܹ̈ܐ: ܩܵܐ ܕܠܦܵܫܸܡܬܵ‌ܐ ܕܲܝܪܝܼ. ܒܢܘܿܢܹ̈ܐ ܕܠܵܘܡܵܐ ܗܘܵܘ ܠܗَܘܿܢ ܐܸܠܹܗ: ܟܟ̰ܸܚܠܹܗ ܒܣܵܩܸܠܬܵܐ ܕܠܵܘܡܲܝܗ̈‌ܝ. ܕܵܐܟ̣ܝܼ ܕܐܘܿܦ ܒܝܼـܲܢ ܒܸܟܟ̰ܵܚܵܐ ܝܼܠܹܗ: ܕܒܝܼـܹܗ ܣܵܢܝܘܼܬܲܢ ܦܵܝܫܵܐ ܡܣܘܼܩܸܠܬܵܐ. ܠܛܲܡܐܵܐ ܡܵܠܘܿܦܹܐ ܝܼܠܹܗ ܕܸܟ̣ܝܘܼܬܵܐ: ܩܵܐ ܕܦܵܐܸܫ ܡܝܘܼܩܪܵܐ ܡ̣ܢ ܚܵܙܝܵـܢ̈ܘܼܗܝ܀ ܠܒܝܼܫܵܐ ܡܵܠܘܿܦܹܐ ܝܼܠܹܗ ܛܵܒ̣ܵܬܹ̈‌ܐ: ܩܵܐ ܕܪܵܒܵܐ ܡܸܢܲܝܗ‌ܝ ܡܵܘܕܝܼܠܹܗ. ܠܡܲܪܝܼܪܵܐ ܪ̈ܲܚܡܹܐ ܡܵܠܘܿܦܹܐ ܝܼܠܹܗ. ܩܵܐ ܕܗܵܘܹܐ ܒܲܣܝܼܡܵܐ ܐܲܝܟܼ ܕܝܼܘܼܗܝ. ܠܛܵܠܘܿܡܵܐ ܙܹܐ ܡܵܠܘܿܦܹܐ ܝܼܠܹܗ: ܕܡܲܙܝܸܕ ܒܪܵܘܡܵܐ ܚܲܙܢ̈ܘܼܗܝ. ܘܠܓܹܢܵܒ̣ܵܐ ܕܦܝܵܫܵܐ ܝَܠܹܗ ܠܝܼܡܵܐ: ܩܵܐ ܕܒܐܸܪ̈ܘܵܢܹܐ ܦܵܐܸܫ ܡܩܘܼܠܣܵܐ܀ ܡܵܢܝܼ ܝܼܠܹܗ ܒܲܣܝܼܡܵܐ ܐܲܟ̣ܘܵܬܘܼܟܼ: ܝܵܐ ܥܵܒ̣ܘܿܕܲܢ ܡܪܲܚܡܵܢܵܐ. ܒܲܪܢܵܫܵܐ ܟܠܹܗ ܕܟܲܪܒܵܐ  ܝَܠܹܗ: ܘܥܲܠ ܒܵܪܘܿܝܹܗ ܡܛܲܪܛܘܼܡܹܐ  ܝَܠܹܗ. ܡܵܢܝܼ ܐܝܼܬܠܲܢ ܡܵܪܲܢ ܐܲܝܟܼ ܕܝܼܘܼܟܼ: ܦܹܐܪܵܐ ܟܹܐ ܕܵܡܹܐ ܠܝܵܠܘܿܕܹܗ. ܐܝܼܡܲܢ ܕܙܘܼܪܒܸܢܵܗ̇ ܡܵܪܝܼܪܘܼܬܲܢ: ܒܲܣܝܼܡܘܼܬܘܼܟܼ ܩܲܡ ܩܲܒܠܵܠܵܗ̇܀ ܗܵܐ ܒܸܠܝܵܡܵܐ ܝܑܼܠܵܗ̇ ܥܵܘܠܘܼܬܲܢ: ܠܟܹܐܢܘܼܬܵܐ ܕܠܹܐ ܦܵܝܫܵܐ ܠܝܼܡܬܵ‌ܐ. ܘܩܵܒܘܼܠܲܢ ܝَܠܵܗ̇ ܐܵܦܸܢ ܕܦܝܵܫܵܐ ܝَܠܵܗ̇ ܠܝܼܡܬܵ‌ܐ: ܡ̣ܢ ܟܵܦܘܿܪܹ̈ܐ ܕܣܪܝܼܚܠܗَܘܿܢ. ܐܸܠܘܼܟܼ ܫܘܼܒ̣ܚܵܐ ܕܠܹܐ ܙܵܠܡܸܬ̇: ܠܟܵܦܘܿܪܵܐ ܕܟܹܐ ܡܨܲܥܸܪܘܼܟܼ. ܐܸܠܘܼܟܼ ܫܘܼܒ̣ܚܵܐ ܕܠܹܐ ܐܲܟ̰ܡܸܬܠܹܗ: ܦܘܼܡܵܐ ܕܓܲܕܦܵܢܘܼܟܼ܀ ܠܵܐ ܫܵܒܸܩܠܲܢ ܡܵܪܝܼ ܩܵܛܝܼܘܼܟܼ: ܐܘܿܦ ܐܸܢ ܗܵܘܲܚ ܠܬܲܪܣܵܐ. ܣܵܒܵܒ ܠܹܐ ܡܲܚܦܸܠ ܡ̣ܢ ܕܗ̇ܘ: ܕܒܲܥܝܹܐ ܕܡܚܲܙܕܸܓ ܠܵܗ̇ ܓܵܢܹܗ. ܐܝܼܬܠܹܗ ܚܲܡ ܛܵܒ̣ܵܐ ܥܲܠ ܕܗ̇‌ܝ: ܓܵܢܵܐ ܕܐܲܚܢܲܢ ܫܒ̣ܝܼܩܵܐ ܠܲܢ. ܐܝܼܬ ܠܹܗ ܒܛܝܼܠܘܼܬܵܐ ܙܹܐ ܥܲܠ ܪܸܥܝܵܢܲܢ: ܐܵܦܸܢ ܕܗܵܘܢܲܢ ܠܹܐ ܝܼܠܹܗ ܡܦܲܪܡܘܼܝܹܐ܀ ܬܸܪܘܵܝܗܝ ܥܲܠܡܹ̈ܐ ܕܝܼܘܼܟܼ ܝَܢܵܐ ܝܵܐ ܡܵܪܝܼ: ܗܲܒَ̣ܠܲܢ ܫܲܝܢܵܐ ܝܵܪܝܼܟ̣ܵܐ: ܕܫܲܟܪܸܚ ܠܘܼܟܼ ܥܲܠ ܫܵܦܵܩܲܬܘܼܟܼ. ܗܲܒَ̣ܠܲܢ ܠܲܐܟ̣ܵܐ ܬܘܼܪܣܵܝܵܐ ܕܙܲܒ̣ܢܵܐ ܘܬܵܡܵܐ ܦܵܬܘܿܪܵܐ ܕܡܲܠܟܘܼܬܵܐ. ܝܘܼܬܪܵܢܵܐ ܒܐܲܪܥܵܐ ܗܲܒَ̣ܠܲܢ: ܘܡܘܼܠܟܵܢܵܐ ܒܪܵܘܡܵܐ. ܢܛܘܿܪ ܩܵܬܲܢ܀ ܠܒ̣ܝܼܫܬܵܐ ܕܠܹܐ ܒܲܠܝܵܐ ܗܵܕܸܪܲܢ: ܘܓ̰ܘܼܒܵܐ ܕܫܘܼܒ̣ܚܵܐ ܡܲܠܒܸܫܠܲܢ. ܗܲܒَ̣ܠܲܢ ܠܲܐܟ̣ܵܐ ܬܲܓܒܲܪܬܵܐ: ܘܓܵܘ ܦܲܪܕܲܝܣܵܐ ܒܘܼܣܵܡܵܐ. ܐܲܢܹܐ ܕܠܲܐܟ̣ܵܐ ܡܲܙܝܸܕܠܲܢ: ܘܬܵܡܵܐ ܒܪ̈ܲܚܡܘܼܟܼ: ܡܲܦܪܝܼܠܲܢ ܒܛܲܝܒܘܼܬܘܼܟܼ ܘܒܟܹܐܢܘܼܬܘܼܟܼ: ܗܲܒَ̣ܠܲܢ ܠܲܐܟ̣ܵܐ ܐܵܦ ܬܵܡܵܐ܀ ܒܫܵܦܵܩܲܬܘܼܟܼ ܘܒܟܹܐܢܘܼܬܘܼܟܼ ܡܘܼܕܲܚܠܘܼܟܼ ܠܲܐܟ̣ܵܐ ܘܬܵܡܵܐ. ܐܲܢَܬ̇ ܝَܘܸܬ ܡܵܪܝܼ ܝܵܗَܒ̣ܵܢܵܐ ܕܠܸܒܵܐ ܩܵܬܲܢ: ܕܒܥܹܩܘܼܝܵܬܹ̈‌ܐ ܕܚܘܼܪܕܝܼـܲܢ ܝَܢܵܐ. ܒܫܵܦܵܩܲܬܘܼܟܼ ܝܵܐ ܡܵܪܝܼ ܡܲܪܚܸܩ ܡܸܢܲܢ: ܒܝܼܫܵܬܹ̈‌ܐ ܕܓ̰ܸܡܥܝܹ̈ܐ ܝَܢܵܐ ܥܲܠܲܢ. ܒܝܼܘܼܟܼ ܡܵܪܝܼ ܘܥܲܡܘܼܟܼ ܥܲܒ̣ܕܲܚ ܫܘܼܒ̣ܗܵܪܵܐ: ܕܩܘܼܘܸܚܠܲܢ ܠܟܸܣܠܘܼܟܼ ܘܩܲܡ ܫܲܡܥܸܬ̇ ܠܲܢ܀ ܒܝܼܘܟܼ ܡܓܲܪܘܸܣܵܐ ܗܹܡܸܙܡܲܢ ܕܦܘܼܡܲܢ: ܕܩܲܡ ܓ̰ܵܘܸܒܸܬܠܲܢ ܐܲܝܟܼ ܕܐܵܢܝܼ ܕܓܵܢܘܼܟܼ. ܒܝܼܘܼܟܼ ܡܵܪܝܼ ܥܹܕܬܘܼܟܼ ܟܹܐ ܐܸܫܬܲܒ̣ܗܸܪܵܐ: ܠܟܸܣ ܟܵܦܘܿܪܹ̈ܐ ܕܟܹܐ ܣܵܢܝܼܠܵܗ̇. ܒܝܼܘܼܟܼ ܡܲܪܥܝܼܬܘܼܟܼ ܒܸܬ ܝܵܪܡܵܐ: ܕܡܸܢܘܼܟܼ ܫܩܝܼܠܲܝܠܵܗ̇ ܡܲܛܠܵܒܘܼ̈ܗ̇. ܒܝܼܘܼܟܼ ܒܸܬ ܚܵܕܹܐ ܟܠܹܗ ܟܸܢܫܲܢ: ܕܗܘܹܐ ܠܹܗ ܪܵܙܝܼ ܕܒܵܥܘܼܬܘܼܟ܀ ܕܡܵܣܸܩܠܘܼܟܼ ܟܸܢܫܲܢ ܫܘܼܒ̣ܚܵܐ: ܘܒܐܝܼܕܘܼܟܼ ܠܒܵܒܘܼܟܼ ܬܸܫܒܘܿܚܬܵ‌ܐ.

ܡܕܪܫܐ.

(ܒܒܪܝܼܟ̣ܘܼ ܡܫܝܼܚܵܐ ܕܐܸܬ̣ܵܐ).

     ܥܘܼܢܵܝܵܐ. ܒܬܲܪܥܵܟܼ ܡܵܪܲܢ ܢܵܩ̇ܫܝܼܢܲܢ: ܘܡܸܢܵܟܼ ܪ̈ܲܚܡܹܐ ܫܵܐ̇ܠܝܼܢܲܢ ܛܵܒ̣ܵܐ ܕܠܵܐ ܟܵܠܹ̇ܐ ܪ̈ܲܚܡܵܘܗ‌ܝ.

     ܒܵܬܹ̈‌ܐ. ܒܬܲܪܥܵܟܼ ܢܵܩ̇ܫܝܼܢ ܚܲܛܵܝܹ̈ܐ: ܕܢܸܣܒ̣ܘܼܢ ܡܸܢܵܟ ܫܘܼܒ̣ܩܵܢܵܐ. ܠܬܲܪܥܵܟܼ ܐܵܬܹ̇ܝܢ ܬܲܝܵܒܹ̈ܐ. ܕܲܒ̣ܛܲܝܒܿܘܼܬ̣ܵܟܼ ܢܸܬܼܚܲܣܘܿܢ. ܥܲܦܪܵܐ ܓܒ̣ܝܼܠܵܐ ܓܵܥܹ̇ܐ ܡܵܪܝ: ܠܵܐ ܬܫܘܼܛ ܡܸܠܲܬ̣ ܡܵܝܘܿܬܹ̈ܐ. ܒܬܲܪܥܵܟܼ ܢܵܩ̇ܫܵܐ ܟܲܦܢܘܼܬܲܢ: ܫܕܼܝܼ ܠܵܗ̇ ܙܸܕܼܩܵܐ ܒܲܚܢܵܢܵܟ‌܀ ܠܘܲܥܕܵܟܼ ܪܵܗܹ̇ܛ ܟܠ ܕܲܟ̣ܪܝܼܗ: ܕܢܸܩܢܸܐ ܡܸܢܵܟܼ ܚܘܼܠܡܵܢܹܗ. ܠܘܵܬ̣ܵܟ ܚܵܐܲܪ ܟܠ ܕܐܲܠܝܼܨ: ܕܲܢܦܹܐܫܵܐ ܒܵܟܼ ܢܸܗܘܸܐ ܠܹܗ. ܒܫܘܼܦܪܵܟܼ ܚܵܐܲܪ ܟܠ ܕܲܣܢܸܐ: ܕܒ̣ܵܟܼ ܬܸܨܛܲܒܲܬ̣ ܣܲܢܝܘܼܬܹܗ. ܠܵܟ̣ܘܼ ܩܵܪܹܐ ܚܲܛܵܝܵܐ: ܕܲܒ̣ܫܘܼܒ̣ܩܵܢܵܟܼ ܢܸܙܕܲܕܲܩ‌܀ ܡܵܘܕܹܿܝܢܲܢ ܡܵܪܝ ܒܲܚܛܵܗܲܝ̈ܢ: ܠܵܐ ܬܸܟܼܦܘܿܪ ܒܲܢ ܛܲܝܒ̇ܘܼܬ̣ܵܟܼ. ܡܵܘܕܹ̇ܝܢܲܢ ܡܵܪܝ ܕܲܒܼܪܵܐ ܐܲܢَܬ̇: ܐܵܘܕܵܐ ܒܲܢ ܐܲܝܟܼ ܒܲܪ ܛܵܒ̣ܵܐ. ܕܲܣܢܲܝ̈ܵܐ ܚܢܲܢ ܡܵܘܕܹܿܝܢܲܢ: ܠܵܐ ܢܸܓ̣ܠܸܐ ܪܘܼܓ̣ܙܵܟܼ ܡܘܼܡܲܝ̈ܢ. ܛܵܠܘܿܡܹ̈ܐ ܚܢܲܢ ܐܘܿ ܛܵܒ̣ܵܐ: ܒܲܣܝܼܡܵܐ ܚܘܼܢ ܡܲܪܝܼܪܹ̈ܐ‌܀

ܩܪܝܢܐ؛ ܒ

ܡܘܬܒ̣ܐ؛ ܒ.

ܡܲܨܠܲܗܲܬ ܒܝܼܵܗܒ̣ܘܿܟ̣ܘܿܢ ܝَܘܸܢ ܡܘܼܚܸܒ̈ܝܼ: ܐܲܝܟܼ ܕܩܵܐ ܒܢܘܿܢܹ̈ܐ ܦܲܪ̈ܡܝܼܵܢܹܐ. ܕܠܵܐ ܗܵܘܝܵܐ ܪܦܝܼܬܵܐ ܒܵܥܘܼܬܲܢ: ܣܵܒܵܒ ܕܐَܬܹܐܠܵܗ̇ ܚܲܠܥܲܬܲܢ. ܘܠܵܐ ܡܝܲܩܪܸܢܵܐ ܦܲܪܦܲܠܬܲܢ: ܡܣܵܒܵܒ ܐَܬܹܐܠܗَܘܿܢ ܡܲܛ̈ܠܵܒܲܢ. ܒܟܠ ܩܵܠܹ̈ܐ ܐܸܢ ܫܲܟܪܲܚ ܠܹܗ: ܙܠܝܼܡܬܵ‌ܐ ܝܼܠܵܗ̇ ܗܵܠܵܐ ܛܲܝܒܘܼܬܹܗ܀ ܒܟܠ ܦܘܼܡܹ̈ܐ ܐܸܢ ܙܲܡܪܲܚ ܠܹܗ: ܗܵܠܵܐ ܕܵܝܢܵܢܕܵܪܹ̈ܐ ܝَܘܲܚ ܠܫܵܦܵܩܲܬܹܗ. ܒܟܠ ܠܸܫܵܢܹ̈ܐ ܠܹܐ ܦܵܝܫܝܼ ܦܸܪ̈ܥܝܹܐ: ܛܵܒ̣ܵܬܹ̈‌ܐ ܕܥܲܠܲܢ ܒܸܥܒ̣ܵܕܵܐ ܝَܘܸܬ. ܒܨܸܒܥܵܬܹ̈‌ܐ ܠܹܐ ܦܵܝܫܝܼ ܡܚܘܼܫܒܸܢܹܐ: ܒܐܝܼܕܵܬܹ̈ܐ ܠܹܐ ܦܵܝܫܝܼ ܡܸܢܝܹ̈ܐ. ܢܸܛܘܼܦܝܵܬܹ̈‌ܐ ܕܡܸܛܪܘܼܟܼ: ܡܸܠܝܹ̈ܐ ܝَܢܵܐ ܒܛܸܫܘܵܐ܀ ܒܐܲܝܢܝܼ ܟܸܪ̈ܟܹܐ ܒܸܬ ܦܵܝܫܝܼ ܟܬܝܼܒ̣̈ـܹܐ: ܥܘܼܕܪ̈ܵܢܹܐ ܕܡ̣ܢ ܡܲܒܘܼܥܘܼܟܼ. ܒܐܲܝܢܝܼ ܠܘܼܚܹ̈ܐ ܒܸܬ ܦܵܝܫܝܼ ܪ̈ܫܝܼܡܹܐ: ܠܲܦܹ̈ܐ ܥܲܡܘܿܪܹ̈ܐ ܕܫܵܦܵܩܲܬܘܟܼ. ܐܲܝܢܝܼ ܟܝܘܼܠܹ̈ܐ ܒܸܬ ܦܵܝܫܵܐ ܟܝܼܠܬܵܐ: ܛܲܝܒܘܼܬܘܼܟܼ ܝܵܐ ܒܵܪܘܿܝܲܢ. ܒܐܲܝܢܝܼ ܦܘܼܡܵܐ ܒܸܬ ܦܵܝܫܵܐ ܡܗܘܼܡܙܸܡܬܵܐ ܒܲܣܝܼܡܘܼܬܘܼܟܼ ܝܵܐ ܥܵܒ̣ܘܿܕܲܢ܀ ܒܐܲܝܢܝܼ ܠܸܫܵܢܵܐ ܒܸܬ ܦܵܝܫܵܐ ܡܦܘܼܫܸܩܬܵܐ: ܚܲܥܠܲܬܘܼܟܼ ܝܵܐ ܫܘܼܒ̣ܗܵܪܲܢ. ܕܓܘܼܪܬܵܐ ܝܼܠܵܗ̇ ܡܸܢܲܢ ܡܵܘܗܲܒ̣ܬܘܼܟܼ [ܚܲܠܥܲܬܘܼܟܼ]: ܘܠܸܫܵܢܲܢ ܠܹܐ ܡܵܠܝܼ ܠܵܗ̇. ܥܲܡ ܙܲܕܝܼܩܹ̈ܐ. ܡܵܘܕܸܚܠܘܼܟܼ: ܥܲܠ ܡܵܘܗܲܒ̣ܬܘܼܟܼ ܕܠܟܸܣܠܲܢ. ܡܵܘܕܹܐ ܥܲܡܲܢ ܘܲܚܠܵܦܲܢ: ܗܵܒܹܝܠ ܕܦܹܐܪܵܐ ܡܘܼܩܪܸܒ̣ܠܹܗ܀ ܒܦܹܐܪܹܗ ܥܸܪ̈ܒܲܢ ܦܵܝܫܝܼ ܡܒܘܼܪ̈ܟ̣ـܹܐ: ܩܵܐ ܕܙܵܝܕܝܼ ܢܸܕܪܹ̈ܐ ܘܩܘܼܪ̈ܒܵܢܹܐ. ܡܵܘܕܹܐ ܥܲܡܲܢ ܘܡܒܵܕܵܠܲܢ: ܐܵܦ ܚܢܘܿܟܼ ܕܓ̣ܠܝܼܒܠܹܗ ܠܡܵܘܬܵܐ. ܡ̣ܢ ܐܲܝܟܵܐ ܕܝܼܠܹܗ ܡܲܕܟ̣ܸܪܹܗ: ܕܥܘܼܡܪܲܢ ܦܵܐܸܫ ܡܒܘܼܪܟ̣ܵܐ ܒܨܠܘܿܬܹܗ. ܘܚܢܘܼܟܼ ܕܓ̣ܠܝܼܒܠܹܗ ܠܡܵܘܬܵܐ: ܕܝܼܠܹܗ ܒܬܲܪܥܵܐ ܕܕܲܝܵܢܲܢ܀ ܗܵܘܹܐ ܡܓܹܢَܒܲܢ ܛܲܠܒܵܢܵܐ: ܕܡܲܥܒ̣ܸܪ ܡܸܢܲܢ ܚܘܼܙ̈ܕܵܓܹܐ. ܠܲܡܟ ܗ̇ܘ ܕܐَܡܝܼܪܵܐ ܝܼܗَܘܵܐ ܒܘܼܬ ܢܘܿܚ: ܕܐܵܗܵܐ ܒܸܬ ܝܵܗَܒ̣ܸܠܲܢ ܠܸܒܵܐ ܡ̣ܢ ܓ̰ܵܥܦܲܢ. ܒܘܼܪܟܬܘܼܗܝ ܗܵܘܝܵܐ ܥܲܡ ܛܵܝܸܦܲܢ: ܕܡܲܥܒܸܪ ܛܵܒ̣ܵܐ ܠܵܘ̈ܛܵܬܲܢ. ܘܐܵܦ ܢܘܿܚ ܕܢܛܸܪܹܗ ܠܩܹܒ̣ܘܼܬܵܐ: ܘܡܸܠܝܵܐ ܠܹܗ ܙܲܚܪܵܐ ܕܡܹܐܟ̣ܘܼܠܬܵܐ܀ ܒܲܝܬܲܢ ܦܵܐܸܫ ܢܛܝܼܪܵܐ ܒܲܨܠܘܿܬܹܗ: ܘܦܵܐܸܫ ܡܸܠܝܵܐ ܛܘܼܒ̣̈ـܹܐ ܘܛܵܒ̣ܵܬܹ̈‌ܐ. ܘܐܵܦ ܫܹܝܡ ܘܝܲܦ̮ܬ ܬܸܪܘܵܝܗܝ: ܕܡܟܘܼܣܝܼܠܗَܘܿܢ ܫܘܼܠܚܵܝܘܼܬܵܐ ܕܒܵܒܲܝܗ‌ܝ. ܨܠܘܿܬܲܝܗ‌ܝ ܡܥܲܪܝܵܐ ܠܫܘܼܠܚܵܝܘܼܬܲܢ: ܘܡܵܟܸܣܵܐ ܠܥܲܝܒܵܐ ܕܡܸܣܟܹܢܲܢ. ܡܸܠܝܵܐ ܗَܘܵܐ ܦܵܬܘܿܪܵܐ [ܨܘܼܦܪܵܐ] ܕܐܲܒ̣ܪܵܗܵܡ: ܒܛܘܼܒ̣̈ـܹܐ ܕܣܒܸܥܬܵ‌ܐ ܘܒܘܼܣܵܡܵܐ܀ ܘܐܝܼܣܚܵܩ ܕܙܪܸܥܠܹܗ ܐܵܦ ܚܨܝܼܕܠܹܗ: ܘܡܘܼܐَܬܹܐܠܹܗ ܟܲܝܠܘܼܗܝ ܚܲܕَ ܒܐܸܡܵܐܐ. ܨܠܘܿܬܹܗ ܡܒܲܪܟ̣ܵܐ ܚܲܩ̈ܠܵܬܲܢ: ܕܚܲܨܕܲܚ ܡܸܢܲܝܗ‌ܝ ܒܘܼܪ̈ܟܵܬܵ‌ܐ. ܝܲܥܩܘܿܒ̣ ܕܡܘܼܪܸܥܠܹܗ ܒܓܵܘ ܐܲܬܪܲܢ: ܘܙܝܼܕܠܗَܘܿܢ ܒܐܲܪܥܵܐ ܩܸܢ̈ܝܵܢܘܼܗܝ. ܨܠܘܿܬܹܗ ܕܨܘܼܠܹܐܠܹܗ ܒܐܲܬܪܲܢ: ܗܵܘܝܵܐ ܠܐܲܪܥܲܢ ܡܒܲܣܡܲܢܬܵ‌ܐ܀ ܐܲܝܟܼ ܢܘܼܪܵܐ ܛܫܝܼܬܵܐ ܗܵܘܝܵܐ: ܘܐܲܟ̣ܠܵܐ ܠܩܲܡܨܵܐ ܕܟܹܐ ܐܵܟܸܠܲܢ. ܘܟܲܕ ܫܘܼܕܸܪܹܗ ܐܲܒ̣ܪܵܡ ܓܘܼܡܠܘܼ̈ܗܝ: ܟܲܕ ܛܥܝܼܢܹ̈ܐ ܛܘܼܒ̣̈ـܹܐ ܠܐܲܬܪܲܢ. ܐܵܬܝܼ ܩܵܠܹ̈ܐ ܕܨܠܘܿܬܹܗ: ܟܲܕ ܛܥܝܼܢܹ̈ܐ ܩܵܬܲܢ ܒܘܼܪ̈ܟܵܬܵܐ. ܫܘܘܿܪ. ܘܕܣܘܼܩܸܠܹܗ ܠܐܲܬܪܲܢ ܘܫܘܼܕܸܪܹܗ؛ ܪܲܦܩܵܐ ܟܲܠܬܵܐ ܠܐܲܒܼܪܵܗܵܡ. ܐܸܠܲܢ ܚܘܼ ܡܣܵܩܸܠ ܘܡܫܵܕܸܪ ܡܵܪܹܗ؛ ܥܢܵܢܵܐ ܕܡܠܝܼܬܵܐ ܚܲܕܘܼܝܵܬܹ̈ܐ. ܘܐܲܝܟܼ ܕܙܸܕܠܗَܘܿܢ ܛܥܘܿܢܝܵܬܹ̈ܐ ܕܪܲܦܩܵܐ؛ ܘܚܘܼܠܸܢܹܗ ܙܲܪܥܘܿܗ݁ ܘܡܓܘܼܪܘܸܣ ܗَܘܵܐ ܠܹܗ. ܚܘܼܫ ܙܵܝܕܝܼ ܛܥܘܿܢܝܵܬܹ̈ܐ ܒܐܲܪ̈ܥܵܬܲܢ؛ ܕܥܢܵܢܵܐ ܦܝܼܫܠܵܗ݁ ܡܫܘܼܕܵܪܬܵܐ ܐܸܠܲܢ. ܩܪܝܼ. ܕܦܝܼܫܠܹܗ ܡܒܘܼܟ̣ܵܐ ܒܲܝܬܹܗ ܕܠܵܒܲܢ: ܐܲܚܢܲܢ ܒܲܨܠܘܿܬܹܗ ܦܵܝܫܲܚ ܡܒܘܼܪܟ̣ـܹܐ ܐܸܢ ܟܲܕ ܦܝܼܫܠܹܗ ܡܒܘܼܪܟ̣ܵܐ ܒܲܝܬܹܗ ܕܠܵܒܲܢ: ܕܥܸܣܪܵܐ ܓܵܗܹ̈ܐ ܕܘܼܓܸܠܹܗ ܒܝܼـܹܗ. ܦܵܐܸܫ ܡܒܘܼܪܟ̣ܵܐ ܒܲܝܬܲܢ ܒܲܨܠܘܿܬܹܗ: ܕܡܘܼܚܸܒܠܲܢ ܐܵܦܸܢ ܕܠܹܐ ܝܘܲܚ ܗَܘܵܐ ܚܸܙܝܘܼܗܝ. ܘܙܝܼܕܠܗَܘܿܢ ܥܸܪ̈ܒܘܼܗܝ ܒܐܲܪ̈ܥܵܬܲܢ: ܙܵܝܕܝܼ ܥܸܪ̈ܒܲܢ ܒܲܨܠܘܿܬܹܗ. ܗ̇ܘ ܕܡܘܼܦܪܸܥܠܹܗ ܡܲܪܥܝܵܐ ܠܥܸܪ̈ܒܘܼܗܝ: ܡܲܦܪܸܥ ܡܲܪܥܝܵܐ ܠܦܸܣܩܹ̈ܐ ܕܥܸܪ̈ܒܲܢ. ܐܵܗܵܐ ܐܲܪܥܵܐ ܒܦܵܣܘܼ̈ܥܝܵܬܹ‌ܐ: ܕܙܲܕܝܼܩܹ̈ܐ ܥܵܡܘܼܪܬܵܐ ܝܼܠܵܗ̇ ܟܠܵܗ̇. ܒܐܵܗܵܐ ܥܵܠܡܵܐ ܒܵܪܵܒܲܪ ܝܘܲܚ ܥܲܡܲܝܗ‌ܝ: ܚܵܫܚܵܚ ܕܗܵܘܲܚ ܥܲܡܲܝܗ‌ܝ ܒܝܘܿܡ ܢܘܼܚܵܡܵܐ. ܬܪܸܥܣܲܪ ܫܲܒ̣ܛܹ̈ܐ ܕܝَܼܠܝܼܕܹ̈ܐ ܝَܢܵܐ ܒܦܕܵܢܵܐ ܒܓܵܘ ܐܲܬܪܲܢ. ܒܲܨܠܘ̈ܵܬܲܝܗ‌ܝ ܦܵܝܫܝܼ ܡܒܘܼܪ̈ܟ̣ـܹܐ: ܬܪܸܥܣܲܪ ܝܲܪ̈ܚܹܐ ܕܫܹܢَܬܵܐ ܐܲܝܟܼ ܬܪܸܥܣܲܪ ܦܝܼܫܠܗَܘܿܢ ܡܒܘܼܪܟ̣ـܹܐ: ܡ̣ܢ ܝܲܥܩܘܿܒ̣ ܐܘܿܦ ܡܘܼܫܹܐ. ܨܠܘܿܬܹܗ ܕܝܲܥܩܘܿܒ̣ ܘܲܕܡܘܼܫܹܐ: ܒܲܪܟ̣ܵܐ ܠܲܢ ܝܲܪ̈ܚܹܐ ܕܫܹܢَܬܵܐ ܠܡܸܨܪ̈ܵܝܹܐ ܒܝܵܘܣܸܦ ܒܘܼܪܸܟ̣ܠܘܼܟܼ. ܕܫܩܝܼܠܹܗ ܘܚܒ̣ܝܼܫܠܹܗ ܓܵܘ ܒܹܝܬ ܐܲܣܝܼܪܹ̈ܐ܀ ܒܲܪܸܟܼ ܡܵܪܲܢ ܠܐܲܬܪܲܢ ܕܡܸܢܹܗ ܦܠܝܼܛܠܹܗ: ܝܵܘܣܸܦ ܡ̣ܢ ܚܒ̣ܘܼܫܝܵܐ ܕܟܵܪَܣܵܐ. ܐܸܢ ܡܘܼܫܹܐ ܠܛܵܝܸܦܵܐ ܕܟܦܝܼܪܹܗ ܒܲܨܠܘܿܬܹܗ ܡܲܢܢܵܐ ܡܘܼܨܠܹܐ ܠܹܗ. ܒܲܨܠܘܿܬܹܗ. ܒܲܪܸܟܼ ܠܐܲܪܥܲܢ: ܗ̇‌ܝ ܕܣܢܹܐ ܠܵܗ̇ ܨܲܠܡܵܐ ܕܐܲܒ̣ܵܗ̈ܘܿܗ̇. ܦܪܸܚܠܵܗ̇ ܘܣܸܩܠܵܗ̇ ܠܐܵܣܘܿܛܹ̈ܐ: ܐܵܦ ܣܲܠܘܲܝ ܡ̣ܢ ܓܵܘ ܝܵܡܵܐ. ܒܪ̈ܲܚܡܘܼܟܼ ܡܵܪܝܼ ܒܵܛܸܠܵܗ̇: ܠܡܲܫܪܝܼܬܵܐ ܕܩܲܡܨܵܐ ܡܸܢܲܢ. ܘܕܡܘܼܬܹܐ ܠܹܗ ܡܘܼܫܹܐ ܚܲܠܘܼܛܵܐ: ܐܵܦ ܩܲܡܨܵܐ ܥܲܠ ܡܸܨܪ̈ܵܝܹܐ܀ ܒܲܨܠܘܿܬܹܗ ܕܡܘܼܫܹܐ ܒܵܛܸܠܹܗ: ܠܙܲܚܠܵܐ ܘܦܵܪܚܵܐ ܡ̣ܢ ܐܲܪ̈ܥܵܬܲܢ. ܠܵܐ ܫܵܠܸܚܠܵܗ̇ ܝܵܐ ܡܵܪܝܼ ܟܘܼܬܝܼܢܹܗ: ܩܲܡܨܵܐ ܒܵܠܘܿܥܵܢܵܐ ܒܐܲܪ̈ܥܵܬܲܢ. ܕܐܸܢ ܫܵܠܸܚܠܵܗ̇ ܠܡܸܣܟܹܢܵܐ: ܒܸܬ ܡܲܫܠܸܚܠܹܗ ܡ̣ܢ ܠܒ̣ܝܼܫܬܘܼܗܝ. ܠܵܐ ܫܵܠܸܚ ܩܲܡܨܵܐ ܡܲܪܥܹܗ: ܘܕܵܝܸܪ ܘܠܵܒܸܫ ܨܵܚܘܼܬܲܢ܀ ܣܵܒܵܒ ܐܸܢ ܠܒ̣ܝܼܫܠܹܗ ܨܵܚܘܼܬܲܢ: ܐܵܦ ܐܸܠܲܢ ܒܸܬ ܡܲܠܒܸܫ ܡܲܪܥܘܼܗܝ. ܚܘܼܘܹܐ ܘܩܲܡܨܵܐ ܠܝܼܛܹܐ ܝَܢܵܐ: ܕܠܵܐ ܣܒܸܥܠܗَܘܿܢ ܡ̣ܢ ܫܦܲܠܬܲܢ ܐܲܚܘܿܢܘܵܬ̈ܝܼ. ܒܝܲܕ ܚܘܼܘܹܐ ܓܸܠܵܐ ܐَܟ̣ܝܼܠܲܢ: ܒܝܲܕ ܩܲܡܨܵܐ ܐܘܿܦ ܠܵܐ ܓܸܠܵܐ. ܙܵܠܵܐ ܕܕܹܝܡܵܐ ܝܼܠܹܗ: ܚܘܼܛܪܵܐ ܕܣܵܒ̣̈ـܹܐ ܘܣܵܒ̣̈ܝܵܬܵ‌ܐ܀ ܠܵܐ ܫܵܡܸܛ ܙܝܼܠܵܐ ܕܥܲܠܘܼܗܝ: ܣܢܝܼܕܬܵܐ ܝَܠܵܗ̇ ܟܠܵܗ̇ ܣܲܝܒܘܼܬܵܐ. ܒܟܠܵܗ̇ ܒܪܝܼܬܵ‌ܐ ܡ̣ܢ ܩܝܼܵܣܘܼܗ̇: ܥܲܠ ܕܗ̇ܘ ܩܲܨܠܵܐ ܒܸܣܢܵܕܵܐ ܝܼܠܵܗ̇. ܠܵܐ ܫܵܡܸܛ ܩܲܢܝܵܐ ܕܥܲܠܘܼܗܝ ܣܢܝܼܕܬܵܐ ܝܼܠܵܗ̇ ܗܲܝܘܵܢ ܘܐَܢܵܫܘܼܬܵܐ. ܡ̣ܢ ܩܲܢܝܵܐ [ܙܝܼܠܵܐ] ܕܡܲܣܚܵܪܘܿܬܵܐ ܩܲܡ ܝܵܗَܒ̣ܝܼܠܘܼܟܼ ܡܵܪܝܼ: ܙܵܩܘܿܦܹ̈ܐ ܟܲܕ ܡܘܼܣܚܸܪܘܿܢ ܒܝܼܘܼܟܼ܀ ܢܛܘܿܪ ܠܩܲܢܝܹܗ ܕܕܲܚܠܲܢ: ܕܒܝܼܘܼܟܼ ܘܒܙܵܠܘܼܟܼ ܠܵܐ ܢܟ̣ܸܦܠܲܢ‌܀ ܠܵܐ ܣܵܢܩܝܼ ܦܲܠܵܚܘܼ̈ܟܼ: ܝܵܐ ܒܲܪ ܡܲܠܟܵܐ ܕܵܘܠܲܬܡܲܢܕ. ܓܸܒܬܵ‌ܐ ܘܫܸܒܠܵܐ ܐܵܦ ܙܲܝܬܵ‌ܐ: ܝܵܗَܒ̣ܝܼܠܲܢ ܡܲܗܨܘܼ̈ܠܲܝܗ‌ܝ. ܗܵܐ ܓܵܘ ܒܪܝܼܬܘܼܟܼ ܚܸܙܝܼܢܝܵܬ̈ܘܼܟܼ: ܘܪܸܙܵܝܘܼܟܼ ܚܲܙܢܵܕܵܪܘܼܟܼ܀ ܪܸܡܙܘܼܟܼ ܟܹܐ ܡܵܨܹܐ ܡܲܓ̰ܪܝܼܠܲܢ: ܚܲܠܒ̣ܵܐ ܘܕܸܒ̣ܫܵܐ ܒܫܵܦܵܩܲܬܘܼܟܼ. ܡܲܠܟܹ̈ܐ ܒܸܙܕܘܼܥܬܵ‌ܐ ܒܸܩܝܵܡܵܐ ܝَܢܵܐ: ܕܡܘܼܡܟܸܢ ܚܵܣܪܝܼ ܚܲܙܢܲܝ̈ܗ‌ܝ ܐܝܼܢܵܐ ܐܲܢَܬ ܕܪܸܙܵܝܘܼܟܼ ܝܼܠܵܗ̇ ܡ̣ܢ ܫܘܼܪܵܝܵܐ: ܕܗܸܟ̃ ܠܹܐ ܚܵܣܸܪ ܘܠܹܐ ܡܲܣܟܸܢ. ܩܵܐ ܡܘܼܕܝܼ ܠܵܐ ܓ̰ܘܼܪܸܒܠܵܘܟ̣ܘܿܢ ܐܵܚܘܿܢܘܵܬ̈ܝܼ: ܕܡܵܪܵܐ ܛܵܒ̣ܵܐ ܐܝܼܬܠܵܘܟ̣ܘܿܢ܀ ܡ̣ܢ ܩܵܕَܡ ܕܪܹܝܓܵܐ ܒܲܥܝܹܐ ܕܩܵܪܝܼܠܹܗ: ܟܹܐ ܩܵܕܸܡܠܹܗ ܡܵܪܵܐ ܡܪܲܚܡܵܢܵܐ. ܘܐܸܢ ܡܥܲܪܩܸܠ ܕܫܲܡܸܥܠܹܗ: ܠܹܐ ܝܗَܘܵܐ ܕܚܘܼܒܹܗ ܒܸܬ ܡܲܣܟܸܢ ܐܸܠܵܐ ܕܡܵܠܸܦ ܠܐَܚܹܪَ̈ܢܹܐ: ܒܝܼܢܵܘܟ̣ܘܿܢ ܟܡܵܐ ܝܵܪܝܼܟ̣ܬܵ‌ܐ ܝܼܠܵܗ̇. ܩܵܐ ܡܘܼܕܝܼ ܠܐܝܼܘܿܒ̣ ܟܹܐ ܣܵܢܝܼ ܗَܘܵܐ؟ ܝܲܢ ܠܐܲܒ̣ܪܲܡ ܠܹܐ ܡܲܚܸܒ ܗَܘܵܐ܀ ܒܓ̰ܘܼܪ̈ܵܒܲܝܗ‌ܝ ܝَܠܸܦܠܗَܘܿܢ ܚܲܙܝܵܢܹ̈ܐ ܢܸܨܚܵܢܲܝܗ̈‌ܝ: ܕܡܘܼܥܒܸܪܲܝܗ‌ܝ ܠܹܗ ܠܐܵܓ̣ܘܿܢܵܐ. ܘܡܘܼܙܝܸܕܠܗَܘܿܢ ܒܝܼܝܹܗ ܟܠܝܼܠܲܝܗ̈‌ܝ. ܚܙܹܐܠܹܗ ܒܝܼܫܵܐ ܓ̰ܘܼܪ̈ܵܒܲܝܗ‌ܝ. ܒܸܢܟܼܵܦܵܐ ܗَܘܵܐ ܒܩܘܼܠܵܣܲܝ̈ܗ‌ܝ: ܐܸܢ ܐܲܠܵܗܵܐ ܐܝܼܬ ܠܹܗ ܕܵܘܣܬܵ‌ܐ. ܟܹܐ ܒܲܥܝܹܐ ܕܗܲܡܵܫܵܐ ܚܵܒܸܪ ܒܝܼܝܹܗ: ܕܟܡܵܐ ܡܲܚܸܒܵܢܘܼܗܝ ܝܼܠܹܗ: ܘܟܡܵܐ ܟܹܐ ܪܵܚܸܛ ܠܟܸܣ ܬܲܪܥܘܼܗܝ: ܠܹܐ ܒܲܥܝܹܐ ܠܹܗ ܩܵܐ ܕܫܵܩܸܠ ܡܸܢܹܗ. ܐܸܠܵܐ ܟܹܐ ܡܲܚܸܒܠܹܗ ܐܵܦܸܢ ܕܟܹܐ ܬܲܥܠܸܡܠܹܗ: ܣܵܒܵܒ ܠܲܝܬ ܟ̰ܵܪܵܐ ܡܘܼܚܸܒܝܼ. ܕܠܵܐ ܟܘܼܪܵܐ [ܕܢܘܼܪܵܐ] ܕܓ̰ܘܼܪ̈ܵܒܹܐ: ܕܵܘܣܬܹ̈‌ܐ ܕܙܲܒ̣ܢܵܐ ܒܸܬ ܦܵܝܫܝܼ ܦܪ̈ܝܼܫܹܐ. ܘܕܵܘܣܬܹ̈‌ܐ ܫܲܪܝܼܪܹ̈ܐ ܒܸܬ ܦܵܝܫܝܼ ܝَܕܸܥܝܹ̈ܐ: ܚܲܕَܟ̰ܵܐ ܩܘܼܝܹ̈ܐ ܗܵܘܝܼ ܒܲܨܠܘܿܬܵܐ܀ ܗܵܠܵܐ ܙܵܘܕܵܐ ܒܸܒܟ̣ܵܝܬܵ‌ܐ: ܟܲܕ ܡܘܼܚܙܝܼܠܵܘܟ̣ܘܿܢ. ܕܪ̈ܝܼܓܵܘܵܬܹܐ ܛܵܒ̣̈ـܹܐ ܝَܬܘܿܢ: ܒܗ̇‌ܝ ܗܹܒ̣ܝܼ ܕܐܝܼܬܠܵܘܟ̣ܘܿܢ. ܐܵܗܵܐ ܐَܡܝܼܪܵܘܟ̣ܘܿܢ ܩܵܐ ܐܲܠܵܗܵܐ: ܕܐܵܦ ܐܸܢ ܩܲܛܠܸܬ̇ ܠܲܢ. ܐܸܠܘܼܟܼ ܒܸܣܦܵܪܵܐ ܝَܢܵܐ ܪ̈ܘܼܚܵܬܲܢ: ܒܲܣ ܚܘܼܫ ܕܢܵܚܸܦ ܣܵܛܵܢܵܐ ܕܚܫܝܼܒ̣ܠܹܗ܀ ܕܐܲܚܟ̰ܝܼ ܚܲܕَ ܐܝܼܘܿܒ̣ ܐܝܼܬ ܗَܘܵܐ: ܚܘܼܫ ܚܵܙܹܐ ܠܐܝܼܘܿܒ̣ ܩܵܕَܡܵܝܵܐ. ܕܓܵܫܘܼܩܹܐ ܝܼܠܹܗ ܡ̣ܢ ܓܵܘ ܣܲܓܝܼܐܸ̈ܐ: ܚܘܼܫ ܚܵܙܝܼܠܹܗ ܒܝܼܫܵܐ ܠܐܲܒ̣ܪܵܗܵܡ. ܕܦܝܼܫܠܹܗ ܡܪܘܼܚܡܵܐ ܒܕܵܘܸܠܬܵܘܟ̣ܘܿܢ: ܚܵܙܝܼܠܹܗ ܛܵܒ̣ܵܐ ܠܦܵܬܘܿܪܹܗ. ܒܦܵܬܘܿܪܹ̈ܐ ܕܣܢܝܼܩܵܘܟ̣ܘܿܢ: ܚܘܼܫ ܚܵܙܹܐ ܒܝܼܫܵܐ ܘܢܵܟܼܹܦ܀ ܚܲܕَ ܝܗَܘܵܐ ܠܘܿܛ ܒܣܕܘܿܡ: ܘܐܵܕܝܼܵܐ ܙܝܼܕܠܗَܘܿܢ ܪܵܒܵܐ. ܒܐܵܗܵܐ ܐܲܬܪܵܐ ܕܦܝܼܫܠܹܗ ܡܒܘܼܪܟ̣ܵܐ: ܡܘܼܥܪܹܠܹܗ ܢܘܼܪܵܐ ܒܐܲܪܥܵܐ: ܕܦܪܝܼܩܠܗَܘܿܢ ܡܸܢܵܗ̇ ܙܲܕܝܼܩܹ̈ܐ: ܡܘܼܥܪܹܠܹܗ ܡܸܛܪܵܐ ܒܐܲܪ̈ܥܵܬܲܢ. ܕܙܝܼܕܠܗَܘܿܢ ܒܐܲܪܥܲܢ ܬܵܘܒܵܟܵܪܹ̈ܐ. ܚܵܙܹܐ ܛܵܒ̣ܵܐ ܒܐܵܕܵܒܵܘܟ̣ܘܿܢ܀ ܠܗ̇ܘ ܝܵܘܣܸܦ ܘܠܢܸܨܚܵܢܘܼܗܝ: ܘܝܵܗَܒܸܠܵܘܟ̣ܘܿܢ ܐܲܝܟܼ ܕܩܲܡ ܝܵܗَܒܸܠܹܗ. ܡܲܗܨܘܼܠܹ̈ܐ ܡ̣ܢ ܐܲܪ̈ܥܵܬܵ‌ܐ: ܕܠܵܐ ܗ̇ܘ ܝܵܗَܒܸܠܲܢ ܟܲܦܢܵܐ. ܐܲܝܟܼ ܕܗ̇‌ܝ ܣܒܸܥܬܵ‌ܐ ܕܒܹܝܬ ܝܵܘܣܸܦ: ܡܵܛܹܐ ܚܲܕَܬܵܐ ܠܥܲܬܝܼܩܬܵܐ. ܐܘܿܦ ܕܫܸܢܹ̈ܐ ܥܒ̣ܝܼܪܹ̈ܐ ܠܫܸܢَܬܵܐ ܚܲܕَܬܵܐ: ܝܵܐ ܕܦܘܼܫܛܵܗ̇ ܠܹܗ ܐܝܼܕܵܐ ܕܒܪܸܙܠܵܗ̇܀ ܦܫܘܿܛܠܲܢ ܐܝܼܕܵܐ ܠܸܚܨܵܕܵܐ: ܗ̇ܘ ܕܝܘܼܗَܒܸܠܹܗ ܐܲܩܠܹ̈ܐ ܠܟ̰ܘܼܠܵܚܹ̈ܐ. ܐܲܩ̈ܠܲܢ ܚܵܕܝܼ ܓܵܘ ܕܲܪ̈ܙܹܐ: ܚܠܵܦ ܩܘܼܦܝܼܢܹ̈ܐ ܘܩܸܛܲܥܛܹ̈ܐ. ܩܲܦ̈ܠܹܐ ܡܵܠܝܼ ܒܫܵܦܵܩܲܬܘܼܟܼ: ܝܵܐ ܕܡܘܼܙܝܸܕܠܹܗ. ܩܸܛܲܥܛܹ̈ܐ ܒܒܲܪܝܼܵܐ. ܡܲܙܝܸܕܠܲܢ ܓܕܝܼܫܹ̈ܐ ܒܚܲܩ̈ܠܵܬܲܢ: ܦܵܫܛܝܼ ܥܲܠ  ܚܲܩ̈ܠܵܬܲܢ܀ ܒܘܼܪ̈ܟܵܬܵ‌ܐ ܕܒܘܼܪܸܟ̣ܠܹܗ ܦܘܼܡܘܼܟܼ: ܓܵܢ̈ܵܬܲܢ ܥܲܡ ܚܲܩ̈ܠܵܬܲܢ: ܦܵܝܫܝܼ ܡܒܘܼܪ̈ܟܹܐ ܒܚܲܠܥܲܬ̈ܘܼܟܼ: ܠܨܲܝܵـܕܹ̈ܐ ܒܢܘܿܢܹ̈ܐ ܒܘܼܪܸܟ̣ܠܘܼܟܼ. ܠܐܲܟܵܪܹ̈ܐ ܒܒܲܪܙܲܪ̈ܥܹܐ ܒܲܪܸܟܼ: ܓܲܪܕܘܼܟܼ ܣܒܸܥܬܵ‌ܐ ܝܘܼܗَܒܸܠܵܗ̇. ܕܲܪܙܵܐ ܣܒܸܥܬܵ‌ܐ ܝܵܗَܒ̣ܵܐ ܠܲܢ: ܙܲܪܲܥܝܵܐ ܐܵܦ ܚܲܨܵܕܵܐ܀ ܚܵܕܝܼ ܡܐܘܼܕܵܠܹܐ ܐܲܝܟܼ ܕܐَܡܝܼܪܘܼܟܼ: ܫܠܝܼܚܹ̈ܐ ܕܦܪܝܼܟ̣ܠܗَܘܿܢ ܫܸܒ̈ܠܹܐ ܘܐَܟܼܝܼܠܗَܘܿܢ. ܒܝܼـܲܝܗ‌ܝ ܦܵܝܫܝܼ ܡܒܘܼܪ̈ܟ̣ـܹܐ ܚܲܩ̈ܠܵܬܲܢ: ܒܲܨܠܵܘܵܬܲܝ̈ܗ‌ܝ ܕܲܫܠܝܼܚܹ̈ܐ. ܦܪ̈ܝܼܟ̣ܵܬܵ‌ܐ ܒܲܪܸܟܼ ܘܗܲܒَ̣ܠܲܢ: ܒܲܨܠܵܘܵܬܲܝ̈ܗ‌ܝ ܕܲܢܒ̣ܝܼ̈ـܹܐ. ܗܲܒَ̣ܠܲܢ ܕܲܪ̈ܙܹܐ ܕܚܲܕܘܵܬ̈ܵܐ: ܕܣܲܒ̣ܥܲܚ ܡܵܪܝܼ ܘܡܵܘܕܸܚܠܘܼܟܼ܀ ܐܲܝܟܼ ܟܸܢܫܹ̈ܐ ܕܓܵܘ ܒܲܪܝܼܵܐ‌܀ ܝܵܐ ܕܟܹܐ ܡܲܚܹܐ ܠܒܢܲܝ̈ ܢܲܥܒܼܵܐ: ܠܵܐ ܡܲܟܦܸܢܸܬ̇ ܠܒܢܲܝ̈ܢܵܫܵܐ. ܝܵܐ ܕܝܘܼܗَܒܸܠܹܗ ܗܲܡܙܸܡܬܵܐ ܠܚܡܲܪܬܵܐ: ܒܲܣܡܵܠܘܼܟܼ ܗܹܡܸܙܡܲܢ ܕܦܘܼܡܲܢ. ܝܵܐ ܕܟܹܐ ܝܵܗَܒܸܠ ܡܹܐܟ̣ܘܼܠܬܵ‌ܐ ܠܚܘܼܘܹܐ: ܕܓܢܝܼܒ̣ܠܹܗ ܡܸܢܲܢ ܒܘܼܣܵܡܲܢ. ܡܲܙܝܸܕܠܲܢ ܡܵܪܝܼ ܒܘܼܣܵܡܵܐ: ܕܙܵܝܸܕ ܠܒܝܼܫܹ̈ܐ ܓ̰ܘܼܢܓ̰ܵܪܵܐ܀ ܚܕܹܐܠܹܗ ܚܘܼܘܹܐ ܕܚܙܹܐܠܹܗ ܠܐܵܕܵܡ: ܐܲܝܟܼ ܬܵܘܪܵܐ ܓܸܠܵܐ ܒܸܪܲܥܝܵܐ ܠܵܐ ܚܵܕܹܐ ܓܵܗܵܐ ܕܬܸܪܬܲܝ: ܟܲܕ ܐܸܠܹܗ ܠܓܸܠܵܐ ܡܲܒܪܸܙܸܬ. ܐܲܝܟܼ ܕܐܲܡܝܼܢܵܝܵܐ ܝܼܠܹܗ ܠܲܚܡܵܐ ܠܚܘܼܘܹܐ: ܝܵܐ ܡܵܪܝܼ ܗܲܒَ̣ܠܲܢ ܠܲܚܡܵܐ ܐܲܡܝܼܢܵܐܝܼܬ. ܕܟܹܐ ܐܵܟܸܠ ܥܲܦܪܵܐ ܕܠܵܐ ܓ̰ܲܥܦܵܐ: ܗܲܒَ̣ܠܲܢ ܣܒܸܥܬܵ‌ܐ ܡ̣ܢ ܓ̰ܲܥܦܲܢ: ܠܵܐ ܚܵܕܹܐ ܕܚܵܙܹܐ ܕܗܲܡܵܫܵܐ ܝܼܠܹܗ: ܠܲܚܡܵܐ ܕܝܼܘܼܗܝ ܡ̣ܢ ܕܝܼܲܠَܢ. ܙܵܝܸܕ ܘܵܝܹܗ ܥܲܠ ܠܲܚܡܹܗ: ܕܥܲܠ ܦܵܬܘܿܪܲܢ ܫܲܟܪܸܚܠܹܗ. ܚܙܹܐܠܹܗ ܠܐܵܕܵܡ ܒܹܐܟ̣ܵܠܵܐ ܓܸܠܵܐ: ܠܵܐ ܚܙܹܐܠܹܗ ܕܒܹܐܟ̣ܵܠܵܐ ܕܸܚܢܵܐ: ܚܙܹܐܠܹܗ ܕܩܸܛܥܝܵܐ ܡ̣ܢ ܦܸܪܕܲܝܣܵܐ: ܒܵܪܸܟ̣ܠܹܗ ܫܸܒ̈ܠܹܐ ܕܚܲܩܠܵܐ܀ ܡ̣ܢ ܓܹܢَܒ ܛܥܘܼܢܬܵ‌ܐ ܕܲܥܕܸܢ: ܗܲܒَ̣ܠܲܢ ܕܲܪ̈ܙܹܐ ܕܣܒܸܥܬܵ‌ܐ ܒܪ̈ܲܚܡܘܼܟܼ.  ܐܵܦ ܐܲܢَܬ ܛܵܒ̣ܵܐ ܟܹܐ ܝܲܕܥܸܬ: ܕܐܘܿܦ ܗ̇ܘ ܚܸܨܕܵܐ ܢܟ̣ܸܦܬܵ‌ܐ ܝَܠܹܗ. ܠܗ̇ܘ ܕܠܒ̣ܝܼܫܵܐ ܝܗَܘܵܐ ܬܸܫܒܘܿܚܬܵ‌ܐ: ܚܕܵܐ ܟܘܼܦܘܼܬܵܐ ܝܼܠܵܗ̇ ܕܗَܘܹܐ ܠܹܗ ܚܲܨܵܕܵܐ. ܗ̇ܘ ܕܗܘܼܟܡܵܐ ܝܗَܘܵܐ ܥܲܠ ܚܲܝܘܵܬ̈ܵܐ: ܠܵܘܡܵܐ ܝܼܠܵܗ̇ ܩܵܬܹܗ ܐܲܟܵܪܘܼܬܵܐ܀ ܠܗ̇ܘ ܕܩܪܹܐܠܹܗ ܫܸܡܵܢܹ̈ܐ ܕܟܠܲܝܗ‌ܝ. ܡܲܒܨܲܪܬܵܐ ܝܼܠܵܗ̇ ܐܸܠܹܗ ܕܩܵܪܝܼܠܹܗ ܦܲܠܵܚܵܐ. ܕܠܵܘܡܵܐ ܝَܢܵܐ ܛܵܒ̣ܵܬܹ̈ܗ: ܠܩܲܕܪܵܐ ܕܐܵܢܝܼ ܕܛܘܼܠܩܵܝܠܹܗ. ܡܲܫَܟ̰ܸܚܝܵܬܹ̈‌ܐ ܚܘܼܣܪܵܢܵܐ ܝَܢܵܐ: ܡܘܼܕܒܸܩܵܐ ܥܲܡ ܕܗ̇ܘ ܡܸܢܕܝܼ ܕܚܣܝܼܪܹܗ. ܐܘܿܦ ܒܘܼܣܵܡܘܼ̈ܗܝ ܕܟܸܟ̰ܚܵܐ ܝَܢܵܐ: ܩܵܕَܡ ܥܲܝܢܹ̈ܐ ܕܗ̇ܘ ܒܘܼܣܵܡܵܐ ܩܵܕَܡܵܝܵܐ ܘܕܠܵܐ ܦܘܼܪܡܝܼܠܹܗ ܡܘܼܕܝܼ ܛܘܼܠܸܩܠܹܗ: ܒܚܘܼܣܪܵܢܵܐ ܕܡܘܼܫَܟ̰ܸܚܠܹܗ ܐܸܫܬܲܒ̣ܗܘܼܪܹܐ ܝܼܠܹܗ. ܕܠܵܐ ܝَܕܸܥܠܹܗ ܕܛܘܼܠܸܩܠܹܗ ܠܦܲܪܕܲܝܣܵܐ: ܒܓܲܢܬܵ‌ܐ ܕܝܲܪ̈ܩܹܐ ܒܸܥܒ̣ܵܕܵܐ ܝܼܠܹܗ ܫܘܼܒ̣ܗܵܪܵܐ. ܕܠܵܐ ܪܓَܝܼܫܠܹܗ ܕܛܘܼܠܸܩܠܹܗ ܒܘܼܣܵܡܹ̈ܐ: ܒܓܸܠܹ̈ܐ ܕܚܲܩܠܵܐ ܐܸܫܬܲܒ̣ܗܘܼܪܹܐ ܝܼܠܹܗ. ܐܲܠܵܗܵܐ ܗܲܒَ̣ܠܲܢ ܠܸܒܵܐ ܕܬܲܚܡܸܢܲܚ ܐܲܝܟܼ ܪܸܙܵܝܘܼܟܼ܀ ܛܵܒ̣ܵܐ ܗܲܒَ̣ܠܲܢ ܫܡܸܥܬܵ‌ܐ: ܕܨܵܗܝܵܐ ܠܡܲܨܝܘܼܬܹܐ ܠܦܘܼܩܕܵܢܘܼܟܼ. ܡܵܪܲܢ ܗܲܒَ̣ܠܲܢ ܦܲܪܡܵܝܬܵ‌ܐ: ܕܒܝܼܵܗ̇ ܬܲܚܡܸܢܲܚ ܒܕܸܟܼܝܘܼܬܵܐ. ܐܲܝܟܼ ܕܐَܡܝܼܪܘܼܟܼ ܝܵܐ ܡܲܠܟܲܢ ܗܲܒَ̣ܠܲܢ ܚܘܼܫܲܒ̣ ܕܒܝܼܘܼܗܝ ܬܲܚܡܸܢܲܚ. ܐܲܝܟܼ ܚܘܼܒܘܼܟܼ ܗܹܒ̣ܝܼܲܢ ܗܲܒَ̣ܠܲܢ: ܦܲܪܡܵܝܬܵ‌ܐ ܕܒܝܼܘܿܗ݁ ܦܵܝܫܲܚ ܡܘܼܡܟܸܟ̣ـܹܐ܀ ܐܲܝܟܼ ܕܡܘܼܠܸܦܠܘܼܟܼ ܝܵܐ ܫܘܼܒ̣ܗܵܪܲܢ ܗܲܒَ̣ܠܲܢ ܝَܕܸܥܬܵ‌ܐ ܕܒܝܼܵܗ̇ ܦܲܪܡܲܚ ܕܐܲܠܵܗܵܐ ܝَܘܸܬ ܡܵܪܲܢ ܗܲܒَ̣ܠܲܢ: ܣܦܲܪܬܵܐ ܕܒܸܣܦܵܪܘܼܟܼ ܝܘܲܚ. ܝܼܫܘܿܥ ܗܲܒَ̣ܠܲܢ ܚܝܼܵܠ ܕܬܲܚܡܸܢܲܚ ܕܐܘܿܦ ܫܲܩܠܵܢܵܐ ܕܬܘܼܥܠܵܐ ܝَܘܸܬ. ܠܹܐ ܝܘܲܚ ܒܸܣܪܵܒ̣ܵܐ ܠܬܵܪܸܨܬܘܼܟܼ: ܩܵܐ ܕܐܲܡܪܲܚ ܣܸܢܝܵܐ ܝܼܠܹܗ ܪܘܼܟܵܒܼܘܼܟܼ܀ ܨܦܵܝܼܝ ܝܼܠܵܗ̇ ܥܵܒ̣ܘܿܕܘܼܬܘܼܟܼ: ܕܒܥܵܓ̰ܝܼܒܘܼܬܵܐ ܩܲܡ ܬܲܪܨܸܬ ܠܲܢ. ܠܵܐ ܐܲܝܟܼ ܕܐܸܢ ܠܲܝܬ ܒܝܼـܲܢ ܦܵܪܘܿܫܘܼܬܵܐ ܗܘܼܡܙܸܡܠܲܢ: ܣܵܒܵܒ ܐܸܢ ܗܵܘܲܚ ܗَܘܵܐ ܦܵܪ̈ܘܿܫܹܐ. ܐܵܦ ܠܵܐ ܠܕܐܲܢܹܐ ܒܸܬ ܗܲܡܙܸܡܲܚ ܗَܘܵܐ: ܘܐܸܢ ܗܵܘܝܵܐ ܗَܘܵܐ ܠܲܢ ܦܲܪܡܵܝܬܵ‌ܐ: ܐܵܗܵܐ ܟܹܐ ܡܲܨܝܵܐ ܠܩܘܼܠܵܣܘܼܟܼ: ܒܦܵܫܲܡܬܵ‌ܐ ܝَܘܲܚ܀ ܕܦܵܝܫܝܼ ܡܘܼܙܝܸܕܹܐ ܐܸܠܲܢ ܣܲܓܝܼܐܸ̈ܐ: ܣܵܒܵܒ ܕܠܵܐ ܚܲܠܥܲܬܘܼܟܼ. ܪܵܒܵܐ ܪܦܝܼܬܵ‌ܐ ܝܼܠܵܗ̇ ܚܹܐܪܘܼܬܲܢ: ܘܟܲܕ ܐܝܼܬ ܗَܘܵܐ ܠܲܢ ܪܸܥܝܵܢܵܐ. ܐܲܝܟܼ ܕܐܸܢ ܠܲܝܬ ܗَܘܵܐ ܠܲܢ ܣܵܒܵܒ ܚܛܹܐܠܲܢ: ܘܟܲܕ ܐܝܼܬܠܲܢ ܦܲܪܡܵܝܬܵ‌ܐ. ܐܝܼܢܵܐ ܐܲܝܟܼ ܕܠܲܝܬ ܠܲܢ ܣܵܒܵܒ ܥܒ̣ܝܼܕܠܲܢ ܢܲܙܵܢܘܼܬܵܐ: ܘܟܲܕ ܐܝܼܬ ܠܲܢ ܚܹܐܪܘܼܬܵܐ܀ ܐܝܼܢܵܐ ܐܲܝܟܼ ܕܠܲܝܬ ܠܲܢ ܣܵܒܵܒ ܕܩܠܝܼܒܠܲܢ: ܘܟܲܕ ܐܝܼܬ ܠܲܢ ܓܘܼܪܘܼܬܵܐ. ܒܹܨܘܼܪܘܼܬܵܐ ܝܼܠܵܗ̇ ܣܒܵܒ ܕܚܛܹܐܠܲܢ: ܘܟܲܕ ܐܝܼܬ ܗَܘܵܐ ܠܲܢ ܟܠ ܡܸܢܕܝܼ. ܐܝܼܢܵܐ ܚܲܛܵܝܵܐ ܠܲܝܬ ܠܹܗ ܗܸܟ̃  ܡܸܢܕܝܼ‌܀

     [ܐܲܩܸܦ ܘܩܪܝܼ ܐܲܢܹܐ ܒܘܼܪ̈ܟܵܬܹ‌ܐ ܐܸܢ ܠܵܚܡܝܼ ܠܙܲܒ̣ܢܵܐ: ܐܝܼܢܵܐ ܐܸܢ ܠܲܝܬ ܣܢܝܼܩܘܼܬܵܐ ܥܒ̣ܘܿܪ ܠܩܵܕَܡܵܐ]܀  ܒܪܝܼܟ̣ܵܐ ܝَܠܹܗ ܛܵܒ̣ܵܐ ܕܝܘܼܗَܒܸܚܠܹܗ: ܗܲܡܙܲܡܬܵ‌ܐ ܕܟ̣ܝܼܬܵܐ ܐܲܝܟܼ ܕܟܬܝܼܒ̣ܵܐ ܝَܠܹܗ. ܒܪܝܼܟ̣ܵܐ ܝَܠܹܗ ܕܝܘܼܗَܒܸܚܠܹܗ ܠܸܫܵܢܵܐ: ܡܲܠܵܠܵܐ ܐܲܝܟܼ ܟܸܢܵܪܵܐ. ܒܪܝܼܟ̣ܵܐ ܝَܠܹܗ ܕܫܵܦܵܩܲܬܹܗ ܝܘܼܗَܒܸܚܠܹܗ: ܕܩܲܒܠܲܚ ܡܸܢܹܗ ܛܲܝܒܘܼܬܵܐ. ܒܪܝܼܟ̣ܵܐ ܝَܠܹܗ  ܕܦܘܼܫܛܵܐ ܠܹܗ ܫܵܦܵܩܲܬܹܗ: ܕܠܵܐ ܩܝܼܵܣ ܥܲܠ ܒܝܼܫܘܼܬܲܢ܀ ܒܪܝܼܟ̣ܵܐ ܝَܠܹܗ ܕܝܘܼܗَܒ̣ܵܐ ܠܹܗ ܒܲܣܝܼܡܘܼܬܹܗ: ܕܠܵܐ ܒܲܚܸܠܬܵ‌ܐ ܥܲܠ ܒܲܚܸܠܵܢܹ̈ܐ. ܒܪܝܼܟ̣ܵܐ ܝَܠܹܗ ܕܫܘܼܕܸܪܹܗ ܚܲܠܥܲܬܹܗ: ܘܠܹܐ ܝَܢܵܐ ܒܸܦܪܵܫܘܼܗ̇ ܫܲܩܠܵܢܹ̈ܐ. ܣܵܒܵܒ ܠܵܐ ܦܪܝܼܫܠܹܗ ܚܲܩܠܵܬܹ̈‌ܐ: ܕܥܵܘ̈ܵܠܹܐ ܡ̣ܢ ܙܲܕܝܼܩܹ̈ܐ ܘܠܹܐ ܡܲܟܠܹܐ ܚܲܠܥܲܬܘܼ̈ܗܝ: ܡ̣ܢ ܢܘܼܟ̣ܪ̈ܵܝܹܐ ܕܡܢܘܼܟ̣ܪܝܼܠܗَܘܿܢ܀ ܘܠܹܐ ܕܵܒ̣ܸܩ ܡܘܼܗܒ̣ܵܬܘܼ̈ܗܝ: ܡ̣ܢ ܟܵܦܘܿܪܹ̈ܐ ܕܟܦܝܼܪܘܿܢ ܒܝܼـܹܗ. ܒܪܝܼܟ̣ܵܐ ܝܼܠܹܗ ܕܦܘܼܫܛܵܐܠܹܗ ܐܝܼܕܹܗ ܘܝܘܼܗَܒܸܠܹܗ: ܩܵܐ ܟܵܦܘܿܪܹ̈ܐ ܕܒܙܠܘܼܡܝܵܐ ܫܩܝܼܠܹܗ. ܒܪܝܼܟ̣ܵܐ ܝܼܠܹܗ ܕܡܘܼܚܙܝܼܠܹܗ ܩܵܐ ܕܐܵܢܝܼ ܕܝܼܘܼܗ: ܡܝܲܬܪ̈ܵܬܵܐ ܕܫܡܸܥܠܹܗ ܐܸܠܲܝܗ‌ܝ. ܣܵܒܵܒ ܠܲܝܬ ܒܘܼܫ ܓܘܼܪܬܵܐ ܡ̣ܢ ܐܵܗܵܐ: ܕܐܲܝܟܼ ܕܠܐܵܢܝܼ ܕܓܵܢܘܼܗܝ ܒܸܚܝܵܪܵܐ ܝܼܠܹܗ ܒܝܼـܲܢ܀ ܘܐܘܿܦ ܠܵܐ ܐܸܢ ܒܘܼܫ ܡܫܘܼܒܸܚܬܵ‌ܐ ܝܼܠܵܗ̇ ܡ̣ܢ ܕܗ̇‌ܝ: ܕܐܲܝܟܼ ܕܠܐܵܢܝܼ ܕܓܵܢܘܼܗܝ ܒܝܼܕܲܥܝܲܢ ܝܼܠܹܗ. ܘܠܵܐ ܙܹܐ ܒܘܼܫ ܡܥܵܓ̰ܒܲܢܬܵ‌ܐ ܝܼܠܵܗ̇ ܡ̣ܢ ܕܗܿ‌ܝ: ܕܐܲܝܟܼ ܕܠܕܲܗܒ̣ܵܐ ܡܨܲܪܘܼܦܲܢ ܝܼܠܹܗ. ܘܐܵܦ ܠܵܐ ܐܸܢ ܒܘܼܫ ܫܲܪܝܼܪܬܵܐ ܝܼܠܵܗ̇ ܡ̣ܢ ܕܗ̇‌ܝ ܕܐܲܝܟܼ ܕܠܣܹܐܡܵܐ ܡܬܲܡܘܼܙܲܢ ܝܼܠܹܗ. ܘܐܘܿܦ ܠܵܐ ܕܒܘܼܫ ܣܵܘܓܘܿܠ ܝܼܠܵܗ̇ ܡ̣ܢ ܗ̇‌ܝ: ܕܐܲܝܟܼ ܒܢܘܿܢ̈ܘܼܗܝ ܬܲܥܠܘܿܡܲܢ ܝܼܠܹܗ܀ ܐܵܦ ܒܘܼܫ ܡܘܼܚܸܒܬܵ‌ܐ ܝَܠܵܗ̇ ܡ̣ܢ ܕܗ̇‌ܝ: ܕܐܲܝܟܼ ܝܵـܪ̈ܘܿܬܹܐ ܟܹܐ ܩܵܪܝܼܠܲܢ. ܐܵܦܸܢ ܕܒܵܪܵܒܲܪ ܝܑܼܠܵܗ̇ ܫܵܦܵܩܲܬܹܗ: ܐܝܼܢܵܐ ܦܪܝܼܫܬܵܐ ܝܼܠܵܗ̇ ܪܵܒܵܐ ܟܹܐܢܘܼܬܹܗ. ܬܲܓܒܲܪܬܹܗ ܠܟܸܣ ܒܲܪ̈ܵܝܹܐ: ܘܦܵܝܕܹܗ ܠܟܸܣ ܓܵܘܵܝܹ̈ܐ. ܪܸܣܩܹܗ ܠܟܸܣ ܢܘܼܟ̣ܪ̈ܵܝܹܐ. ܘܚܲܙܝܼܢܹܗ ܠܟܸܣ ܒܲܝܬܵܝܹ̈ܐ܀ ܒܐܵܗܵܐ ܙܲܒ̣ܢܵܐ ܠܟܸܣ ܟܠ ܐَܢܵܫܵܐ: ܘܕܲܠܥܵܠܲܡ ܠܟܸܣ ܕܲܠܝܼܠܹ̈ܐ.. ܕܲܥܒܲܪ ܠܡܲܚܪܸ̈ܒ̣ܵܢܹܐ: ܘܕܲܥܬܝܼܕ ܠܣܵܓ̣ܕܵܢܹ̈ܐ. ܚܘܼܠܵܐ ܒܗ̇‌ܝ ܕܟܹܐ ܫܵܩܸܠ ܟܵܦܘܿܪܵܐ: ܒܲܣ ܡܓܲܪܘܘܼܣܹܐ ܝܼܠܹܗ ܛܵܠܘܿܡܵܐ. ܕܐܘܿܦ ܟܲܠܒܵܐ ܟܹܐ ܐܵܟܸܠ: ܡ̣ܢ ܠܲܚܡܵܐ ܕܒܢܘܿܢܹ̈ܐ܀ ܚܘܼܠܵܐ ܕܟܹܐ ܐܵܟܸܠ ܡ̣ܢ ܠܲܚܡܵܐ: ܒܲܣ ܒܵܪܵܒܲܪ ܝܼܠܹܗ ܕܲܪܓ̣ܘܼܗܝ ܥܲܡ ܒܢܘܿܢܹ̈ܐ.]

ܐܲܩܸܦ ܘܩܪܝܼ. ܒܪܝܼܟ̣ܵܐ ܝَܠܹܗ ܕܫܡܸܥܠܹܗ ܒܲܥܘܼܬܲܢ: ܘܠܵܐ ܡܥܘܼܪܩܸܠܗَܘܿܢ ܡܲܛ̈ܠܵܒܲܢ. ܒܪܝܼܟ̣ܵܐ ܝܼܠܹܗ ܕܫܘܼܕܸܪܹܗ ܡܵܘܗܲܒ̣ܬܘܼܗܝ: ܩܵܐ ܣܢܝܼܩܹ̈ܐ ܕܛܠܝܼܒܠܗَܘܿܢ ܡܸܢܹܗ. ܒܪܝܼܟ̣ܵܐ ܝܼܠܹܗ ܛܵܒ̣ܵܐ ܕܡܘܼܠܝܸܨܠܗَܘܿܢ ܪ̈ܲܚܡܘܼܗܝ: ܘܚܙܹܐ ܠܹܗ ܦܲܐܬܵܐ ܕܢܲܙܵܢܘܼܬܲܢ܀ ܒܪܝܼܟ̣ܵܐ ܝܼܠܹܗ ܕܥܒ̣ܝܼܕܠܹܗ ܪܸܙܵܝܲܢ: ܘܩܲܡ ܝܵܗَܒܸܠܲܢ ܦܬܲܚܬܵ‌ܐ ܕܦܘܼܡܵܐ. ܒܪܝܼܟ̣ܵܐ ܝܼܠܹܗ ܕܡܘܼܚܙܸܚܠܹܗ ܢܝܼܫܲܢܩܐ: ܕܠܹܐ ܝܼܠܹܗ ܡܘܼܣܠܝܼܘܼܗ̇ ܒܵܥܘܼܬܲܢ. ܒܪܝܼܟ̣ܵܐ ܝܼܠܹܗ ܕܝܘܼܗَܒܸܚܠܹܗ ܢܝܼܫܲܢܩܵܐ: ܕܠܹܐ ܝܼܠܹܗ ܡܲܣܠܘܼܝܘܼܗܿ ܠܦܲܪܦܲܠܬܲܢ ܒܪܝܼܟ̣ܵܐ ܝܼܠܹܗ ܐܘܿܦ ܐܸܢ ܡܲܣܠܝܼܠܲܢ: ܠܹܐ ܡܚܲܪܙܸܦ ܠܲܢ ܡ̣ܢ ܠܟܸܣܠܘܼܗܝ܀ ܒܪܝܼܟ̣ܵܐ ܝܼܠܹܗ ܐܵܦܸܢ ܕܟܹܐ ܡܲܢܚܸܣܠܲܢ: ܐܝܼܢܵܐ ܠܵܐ ܡܲܟܠܝܼܠܗَܘܿܢ ܡܲܛܠܵܒܲܢ. ܫܘܼܒ̣ܚܵܐ ܠܹܗ ܐܵܦܸܢ ܕܟܹܐ ܚܵܒܸܪ: ܐܝܼܢܵܐ ܠܹܐ ܒܲܥܝܹܐ ܕܕܵܒܸܩ ܟܝܼܢ. ܫܘܼܒ̣ܚܵܐ ܠܹܗ ܐܵܦܸܢ ܕܟܹܐ ܥܵܒܸܕ ܣܪܝܼܬ‌ܐ: ܐܝܼܢܵܐ ܒܘܼܫ ܙܵܘܕܵܐ ܟܹܐ ܚܵܒܸܛ ܕܥܵܒܸܕ ܛܵܒ̣ܬܵ‌ܐ. ܘܫܘܼܒ̣ܚܵܐ ܠܹܗ ܐܵܦ ܐܸܢ ܕܟܹܐ ܟܵܠܹܐ: ܐܝܼܢܵܐ ܩܵܐ ܕܙܵܘܕܵܐ ܝܵܗَܒܸܠܲܢ܀ ܘܫܘܼܒ̣ܚܵܐ ܠܹܗ ܐܵܦܸܢ ܕܟܹܐ ܟܵܪܸܒ: ܐܝܼܢܵܐ ܟܹܐ ܒܲܥܝܹܐ ܕܒܵܛܸܠܹܗ ܟܲܪܒܹܗ. ܫܘܼܒ̣ܚܵܐ ܠܹܗ ܐܵܦܸܢ ܕܟܹܐ ܠܵܝܸܡ: ܣܵܒܵܒ ܟܹܐ ܡܲܦܫܸܡܵܐ ܠܹܗ ܢܲܙܵܢܘܼܬܲܢ. ܒܪܝܼܟ̣ܵܐ ܝܼܠܹܗ ܕܟܹܐ ܒܲܥܝܹܐ: ܕܒܐܸܫܟܵܪܵܐ ܛܵܠܒܲܚ ܡܸܢܹܗ. ܒܪܝܼܟ̣ܵܐ ܝܼܠܹܗ ܛܵܒ̣ܵܐ ܕܠܹܐ ܒܲܥܝܹܐ: ܕܗܵܘܹܐ ܡܘܼܟܸܦܵܐ ܒܹܝܬ ܥܲܝ̈ܢܲܢ܀ ܫܘܼܒ̣ܚܵܐ ܠܹܗ ܕܟܡܵܐ ܟܹܐ ܒܲܥܝܹܐ: ܕܝܵܗَܒܸܠܲܢ ܒܚܘܲܪ ܦܲܐܬܘܼܬܵܐ. ܒܪܝܼܟ̣ܵܐ ܝܼܠܹܗ ܕܡܘܼܚܙܹܐ ܠܹܗ ܠܟܵܦܘܿܪܹ̈ܐ: ܕܐܲܝܟܼ ܕܠܐܵܢܝܼ ܕܝܼܘܼܗܝ ܟܹܐ ܫܲܡܸܥܠܲܢ. ܫܘܼܒ̣ܚܵܐ ܠܹܗ ܕܠܹܐ ܕܵܡܹܐ ܥܲܠܲܢ: ܕܠܒܵܒܘܼܗܝ ܟܹܐ ܕܵܡܹܐ ܟܠܹܗ. ܒܪܝܼܟ̣ܵܐ ܝܼܠܹܗ ܕܠܹܐ ܝܼܠܹܗ ܐܲܟ̣ܘܵܬܲܢ: ܕܗ̇ܘ ܐܲܝܟܼ ܓܵܢܘܼܗܝ ܡܪܲܚܡܵܢܵܐ ܝܼܠܹܗ܀ ܫܘܼܒ̣ܚܵܐ ܠܹܗ ܕܡܘܼܪܡܵܗ̇ ܠܹܗ ܩܵܪܢܲܢ: ܘܠܵܐ ܦܝܼܫܠܵܗ̇ ܡܘܼܣܠܝܼܬܵ‌ܐ ܒܵܥܘܼܬܲܢ. ܫܘܼܒ̣ܚܵܐ ܠܹܗ ܕܦܬܝܼܚܠܹܗ ܦܘܼܡܲܢ: ܕܡܸܫܬܲܒܼܗܸܪܲܚ ܕܐܲܠܵܗܲܢ ܝܼܠܹܗ ܒܪܝܼܟ̣ܵܐ ܝَܠܹܗ. ܕܡܘܼܙܝܸܕܠܹܗ ܝܵܗَܒܲܠܬܵܐ ܕܠܸܒܵܐ ܩܵܬܲܢ: ܕܒܦܵܫܲܡܬܲܢ ܠܵܐ ܫܒ̣ܝܼܩܲܚ ܠܹܗ. ܡ̣ܢ ܥܸܠܵܝܹ̈ܐ ܘܬܲܚܬܵܝܹ̈ܐ: ܫܘܼܒ̣ܚܵܐ ܠܹܗ ܠܥܵܠܲܡ ܥܵܠܡܝܼܢ. ܐܵܡܹܝܢ܀

܀ܡܕܪܫܐ ܕܒܘܪ̈ܟܬ̣ܐ܀

ܕܟܹܐ ܦܵܐܸܫ ܐَܡܝܼܪܵܐ ܥܲܠ ܬܲܪܥܵܐ ܕܩܲܢܟܹ̈ܐ. ܐܝܼܡܲܢ ܕܐܵܡܸܪ ܐܵܡܘܿܪܵܐ ܒܡܲܕܒ̱ܚܵܐ ܐܵܢܝܼ ܕܓܵܘ ܗܲܝܟܿܠܵܐ ܡܵܚܝܼ ܒܸܪܟܵܐ. ܘܡܓ̰ܵܘܸܒܝܼ ܕܓܵܘ ܗܲܝܟܿܠܵܐ ܪܹܫ ܥܘܼܢܵܝܵܐ: ܘܐܵܢܝܼ ܕܓܵܘ ܡܲܕܒ̱ܚܵܐ ܒܵܪܟܿܝܼ ܥܲܠ ܒܘܼܪܟܲܝܗ‌ܝ܀

     ܥܘܼܢܵܝܵܐ. ܒܸܛܠܵܒܵܐ ܝَܘܲܚ ܡܸܢܘܼܟܼ ܡܵܪܲܢ ܡܵܪܹܟܠ: ܒܸܛܠܵܒܵܐ ܝَܘܲܚ ܡܸܢܘܼܟܼ. ܡܵܪܲܢ ܘܪܲܚܸܡ ܥܲܠܲܢ܀

     ܒܵܬܹ̈‌ܐ. ܡܲܙܝܸܕ ܫܲܝܢܵܐ ܒܥܵܡܲܪܬܵܐ ܡܵܪܹܟܠ: ܘܲܫܠܵܡܵܐ ܒܟܠ ܦܸܢ̈ܝܵܬܹ‌ܐ ܡܫܲܝܸܢ ܟܠ. ܘܒܲܛܸܠ ܦܠܵܫܹ̈ܐ ܘܡܲܩܪ̈ܵܨܘܼܝܵܬܹ‌ܐ ܡ̣ܢ ܐܲܪܥܵܐ: ܕܥܘܼܡܪܵܐ [ܡܲܣܟܲܢ] ܫܸܠܝܵܐ ܘܢܝܼܚܵܐ ܥܵܡܪܲܚ ܡܪܲܚܡܵܢܵܐ. ܒܲܪܸܟܼ ܡܵܪܝ ܥܹܕܬܵܐ ܕܩܘܼܕܫܵܐ ܒܛܲܝܒܘܼܬܘܼܟܼ: ܕܒܕܸܡܘܼܟܼ ܦܝܼܫܠܵܗ̇ ܙܒ̣ܝܼܢܬܵ‌ܐ ܡܵܪܹܟܠ. ܘܠܒܢܘܼܢ̈ܘܿܗ̇ ܢܛܘܿܪ ܒܲܨܠܝܼܒ̣ܘܼܟܼ ܢܵܛܸܐ ܕܟܠ: ܡ̣ܢ ܚܘܼܙܕܵܓܹ̈ܐ ܕܡܵܪ̈ܘܿܕܹܐ. ܘܪܲܚܸܡ ܥܲܠܲܢ‌܀

     ܪܵܥܝܵܐ ܪܲܒܵܐ ܦܵܐܸܫ ܡܘܼܩܝܸܡܵܐ ܡܵܪܹܟܠ: ܕܡܸܢܹܗ ܝܵܠܦܲܚ ܨܸܒܼܝܵܢܘܼܟܼ ܡܪܲܚܡܵܢܵܐ. ܪܵܥܝܵܐ ܕܥܸܪ̈ܒܘܼܟܼ ܗܵܘܹܐ ܓ̣ܵܠܒܵܢܵܐ ܒܛܲܝܒܘܼܬܘܼܟܼ: ܩܵܐ ܕܡܚܲܣܹܐ ܥܲܠ ܡܲܪܥܝܼܬܘܼܟܼ. ܡܲܪܥܹܐ ܟܠ. (ܒܲܪܸܟ̣ܡܵܪܝ ܠܒܵܒܲܢ ܙܲܗܝܵܐ ܡܵܪܝ ܦܠܵܢ. ܘܦܵܨܝܼܠܹܗ ܡ̣ܢ ܟܠ ܒܝܼܫܵܬܹ̈ܐ ܒܛܲܝܒܘܼܬܘܼܟܼ. ܘܡܲܙܝܸܕ ܒܪ̈ܲܚܡܘܼܟܼ ܫܸܢܹ̈ܐ ܕܚܲܝܘܼ̈ܗܝ ܡܒܲܪܸܟܼ ܟܠ: ܡܒܲܗܪܸܢ ܒܫܘܼܒ̣ܚܵܐ ܟܵܗܢܘܼܬܵܐ ܕܦܝܼܫܠܵܗ̇ ܡܣܘܼܦܵܝܬܵ‌ܐ ܒܝܼܹܗ. ܩܵܐ ܕܡܲܙܝܸܕ ܒܟܲܟܪܵܐ ܕܝܘܼܗَܒܸܠܘܼܟܼ ܐܸܠܹܗ ܒܚܲܕܘܼܬܵܐ: ܘܠܵܒܸܫ ܓ̰ܘܼܒܵܐ ܕܓ̣ܵܠܝܼܒܘܼܬܵܐ ܒܕܘܼܒܵܪ̈ܘܼܗܝ). ܒܲܪܸܟܼ ܟܵܗܢܹ̈ܐ ܘܲܡܫܲܡܫܵܢܹ̈ܐ ܣܓ̣ܝܼܕ ܡ̣ܢ ܟܠ: ܕܡܸܢܵܝܗ‌ܝ ܝܵܠܦܲܚ ܙܲܗܝܘܼܬܵܐ ܚܲܢܵܢܵܐ.  ܒܲܪܸܟ̣ܡܵܪܝ ܐܵܦ ܠܥܵܢܘܵܝܹ̈ܐ ܡܩܲܕܸܫ ܟܠ: ܕܒܲܨܠܵܘܵܬܵܝ̈ܗ‌ܝ ܦܵܝܫܲܚ ܡܦܘܼܚܠܹܐ ܘܪܲܚܸܡ ܥܲܠܲܢ‌‌܀

     ܒܲܪܸܟܼ ܡܵܪܝ ܠܡܲܠܟܹ̈ܐ ܕܐܲܪܥܵܐ ܡܵܪܹܟܠ: ܘܡܲܩܝܸܡ ܠܗَܘܿܢ ܒܫܘܼܠܛܵܢܵܝ̈ܗ‌ܝ ܡܗܲܟܡܵܢܵܐ ܕܟܠ. ܘܡܲܙܝܸܕ ܫܲܝܢܵܐ ܒܲܝܢܵܬܵܝܗ‌ܝ ܡܫܲܝܢܸܢ ܟܠ: ܘܣܵܙܓܵܪܘܼܬܵܐ ܒܫܘܼܠܛܵܢܵܝ̈ܗ‌ܝ ܚܲܢܵܢܵܐ. ܒܲܪܸܟܼ ܡܵܪܝ ܐܵܦ ܠܪܹ̈ܫܵܢܹܐ ܡܕܲܒܸܪ ܟܠ: ܩܵܐ ܕܝܵܗَܒ̣ܝܼܠܘܼܟܼ ܡ̣ܢ ܚܲܙܝܼܢܲܝ̈ܗ‌ܝ ܡܲܩܢܹܐ ܟܠ. ܒܲܪܸܟܼ ܡܵܪܝ ܐܵܦ ܠܕܲܝܵـܢܹ̈ܐ ܕܵܐܸܢ ܟܠ: ܩܵܐ ܕܲܝܢܝܼ ܐܲܝܟܼ ܨܸܒܼܝܵܢܘܼܟܼ ܘܪܲܚܸܡ ܥܲܠܲܢ‌܀

     ܒܲܪܸܟܼ ܠܣܵܒ̣̈ـܹܐ ܘܲܥܠܲܝܡܹ̈ܐ ܡܢܵܛܸܪ ܟܠ: ܕܡܸܢܵܝܗ‌ܝ ܝܵܠܦܲܚ ܐܵܕܵܒܘܼܬܵܐ ܚܲܢܵܢܵܐ. ܒܲܪܸܟܼ ܐܵܦ ܠܓ̰ܘܵܢܩܹ̈ܐ ܡܒܲܪܟ̣ܵܢܵܐ ܕܟܠ: ܩܵܐ ܕܵܟ̣ܝܼܠܹܗ ܦܲܓ̣ܪ̈ܲܝܗ‌ܝ ܐܸܠܘܼܟܼ ܡܩܲܕܸܫ ܟܠ. ܡܸܪ̈ܥܝܹܐ ܢܦܝܼܠܹ̈ܐ ܦܵܝܫܝܼ ܡܒܘܼܣܡܹܐ ܡܒܲܣܸܡ ܟܠ: ܐܵܦ ܡܘܼܠܝܸܨܹ̈ܐ ܦܵܝܫܝܼ ܡܘܼܪܘܸܚܹܐ ܡܦܲܪܸܩ ܟܠ. ܢܛܘܿܪ ܒܘܼܫ ܠܐܵܢܝܼ ܕܨܵܚ ܝܑܼܢܵܐ ܡܢܵܛܸܪ ܟܠ: ܕܒܐܸܪ̈ܘܵܢܹܐ ܡܵܘܕܝܼ ܠܘܼܟܼ ܘܪܲܚܸܡ ܥܲܠܲܢ‌܀

     ܒܲܪܸܟܼ ܡܵܪܝ ܠܟܠܝܼܠܵܐ ܕܫܹܢَܬܵܐ ܒܛܲܝܒܘܼܬܘܼܟܼ: ܘܡܲܙܝܸܕ ܛܥܘܼܢܝܵܬܹ̈‌ܐ ܕܚܲܩ̈ܠܵܬܲܢ ܒܸܚܢܵܢܘܼܟܼ: ܡܲܕܥܸܪ ܠܟܸܣܠܘܼܟܼ ܠܸܛܠܝܼܩܹ̈ܐ ܡܚܵܒܸܢ ܟܠ: ܕܒܝܼܘܼܟܼ ܛܠܝܼܩܹ̈ܐ ܦܵܝܫܝܼ ܡܫَܟ̰ܝܼܚܹܐ ܡܵܫَܟ̰ܸܚ ܟܠ. ܡܲܟܫܸܛ ܐܵܦ ܠܚܲܛܵܝܹ̈ܐ ܡܦܵܚܸܠ ܟܠ: ܕܟܲܪܒܵܐ ܦܵܐܸܫ ܡܒܘܼܛܠܵܐ ܡ̣ܢ ܥܲܡܘܼܟܼ. ܒܲܪܸܟ̣ܡܵܪܝ ܠܟܠܵܗ݁ ܥܹܕܬܲܢ ܒܛܲܝܒܘܼܬܘܼܟܼ: ܕܠܬܸܫܒܘܿܚܬܘܼܟܼ ܢܛܝܼܪܵܗ݁ ܠܘܼܟܼ ܘܪܲܚܸܡ ܥܲܠܲܢ‌܀ ܦܲܪܦܲܠܬܲܢ ܩܲܒܸܠ ܡܵܪܲܢ ܒܸܚܢܢܘܼܟܼ: ܘܒܵܥܘܼܬܲܢ ܥܲܒ̣ܪܵܐ ܩܵܕَܡܘܼܟܼ ܡܓ̰ܲܘܸܒ ܟܠ. ܬܝܵܒ̣ܘܼܬܲܢ ܗܵܘܝܵܐ ܠܚܘܼܒܘܼܟܼ ܡܲܚܸܒ ܟܠ: ܕܸܒ̣ܚܵܐ ܡܩܘܼܒܠܵܐ ܕܣܵܙܓܵܪܬܵܐ ܒܟܠ ܥܕܵܢܵܐ. ܨܠܘܿܬܵܐ ܕܪܹ̈ܝܓܵܘܵܬܘܼܟܼ ܩܲܒܸܠ ܡܵܪܝ ܒܛܲܝܒܘܼܬܘܼܟܼ. ܘܒܵܥܘܼܬܵܐ ܕܸܡܫܲܒܚܵܢ̈ܘܼܟܼ ܫܲܡܸܥ ܟܠ. ܘܡ̣ܢ ܒܹܝܬ ܚܲܙܝܼܢܘܼܟܼ ܦܵܝܫܝܼ ܡܘܼܕܸܥܪܹ̈ܐ ܚܲܢܵܢܵܐ: ܡܲܛܠܵܒܹ̈ܐ ܕܣܢܝܼܩܘܼܬܲܢ: ܘܪܲܚܸܡ ܥܲܠܲܢ‌܀

     ܠܟܸܢܫܲܢ ܒܲܪܸܟܼ ܒܛܲܝܒܘܼܬܘܼܟܼ ܡܒܲܪܸܟܼ ܟܠ: ܘܡܲܙܝܸܕ ܠܟܸܣܠܲܢ ܥܘܼܕܪܵܢܘܼܟܼ ܡܗܲܝܸܪ ܟܠ.  ܘܗܲܒَ̣ܠܲܢ ܕܡܲܟܡܸܠܲܚ ܨܸܒܼܝܵܢܘܼܟܼ ܡܲܓܡܸܪ ܟܠ: ܟܠܵܝܗ‌ܝ ܝܵܘܡܵܢܹ̈ܐ ܕܚܲܝ̈ܝܲܢ ܡܲܚܹܐ ܟܠ.  ܒܲܪܸܟܼ  ܦܘܼܡܹ̈ܐ ܕܙܡܝܼܪܘܿܢ ܐܸܠܘܼܟܼ ܒܪܝܼܟܼܵܐ ܡܟܠ: ܕܐܲܝܟܼ ܫܝܼܦܘܼܪܹ̈ܐ ܙܡܝܼܪܘܿܢ ܐܸܠܘܼܟܼ ܦܵܪܘܿܩܲܢ. ܘܡ̣ܢ ܟܠܹܗ ܦܘܼܡܹܗ ܕܡܲܪܥܝܼܬܘܼܟܼ ܡܵܪܹܟܠ: ܬܸܫܒܘܿܚܬܵܐ ܠܫܸܡܘܼܟܼ ܐܵܡܹܝܢ:  ܘܪܲܚܸܡ ܥܲܠܲܢ‌܀

     ܒܲܪܸܟܼ ܡܵܪܝ ܠܐܵܗܵܐ ܥܘܼܡܪܵܐ ܒܛܲܝܒܘܼܬܘܼܟܼ: ܘܡܲܫܪܝܼ ܒܓܵܘܹܗ ܒܘܼܪ̈ܟܵܬܘܼܟܼ ܡܵܪܹܟܠ. ܕܗܵܘܹܐ ܠܡܹܐܢܵܐ [ܒܲܢܕܲܪ] ܘܒܹܝܬ ܓܵܘܣܵܐ ܠܡܘܼܠܝܸܨܹ̈ܐ: ܒܡܸܨܥܵܝܘܼܬܹܗ ܕܩܲܕܝܼܫܵܐ ܡܵܪܝ ܦܠܵܢ. ܘܡܲܫܦܸܚ ܪ̈ܲܚܡܘܼܟܼ ܥܲܠ ܟܸܢܫܲܢ ܡܸܣܟܹܢܵܐ: ܘܡܚܲܝܠܸܢܲܢ ܘܥܵܒ̣ܕܲܚ ܨܸܒܼܝܵܢܵܐ ܕܡܵܪܘܼܬܘܼܟܼ. ܘܡܚܲܣܝܼ ܓܢܵܗܲܝ̈ܢ ܘܚܛܝܼܵܬ̈ܲܢ ܡܚܲܣܹܐ ܟܠ: ܘܒܲܪܸܟ̣ܠܲܢ ܒܟܠ ܒܘܼܪ̈ܟܵܬܹ‌ܐ ܘܪܲܚܸܡ ܥܲܠܲܢ‌܀

     ܘܠܸܡܗܲܕܝܵܢܲܢ ܘܲܡܕܲܒܪܵܢܲܢ ܢܛܘܿܪ ܡܵܪܝܼ: ܘܡܦܵܨܝܼܠܹܗ ܡ̣ܢ ܟܠܵܝܗ‌ܝ ܒܝܼܫܵܬܹ̈‌ܐ ܒܛܲܝܒܘܼܬܘܼܟܼ. ܘܗܲܒَ̣ܠ ܐܸܠܹܗ ܡܵܘܗܲܒ̣ܬܘܼܟܼ ܗܲܡܵܫܵܐ: ܘܡܲܙܝܸܕ ܒܪ̈ܲܚܡܘܼܟܼ ܫܸܢܹ̈ܐ ܕܚܲܝ̈ܘܼܗܝ ܡܲܚܹܐ ܟܠ. ܕܥܸܠܬܵܐ ܝَܠܹܗ ܠܲܢܝܵܚܲܢ ܘܚܲܕܘܼܬܲܢ: ܗܲܒَ̣ܠܹܗ ܘܡܲܙܝܸܕ ܠܹܗ ܪܘܼܡܪܵܡܵܐ ܠܟܸܣ ܡܲܠܟܹ̈ܐ. ܘܒܸܣܬܵܝܘܼܬܵܐ ܠܟܸܣ ܟܠ ܐَܢܵܫܵܐ ܒܸܚܢܵܢܘܼܟܼ: ܘܗܲܒَ̣ܠܹܗ ܚܘܼܠܡܵܢܵܐ ܕܦܲܓ̣ܪܵܐ ܥܲܡ ܓܵܢܵܐ ܒܬܪܹܝ ܛܵܩܹ̈ܐ. ܘܩܲܒܸܠ ܢܸܕܪ̈ܘܼܗܝ ܘܩܘܼܪ̈ܒܵܢܘܼܗܝ ܘܐܸܪ̈ܘܵܢܘܼܗܝ: ܘܲܨܠܵܘܵܬ̈ܘܼܗܝ ܘܒܵܥܘܼܝܵܬ̈ܘܼܗܝ ܘܡܲܛܠܵܒܘܼ̈ܗܝ. ܘܡܵܢܬܝܼܠܹܗ ܒܟܠܵܝܗܝ ܦܘܼܠܚܵܢ̈ܘܼܗܝ ܡܲܢܬܹܐ ܟܠ. ܘܡܒܲܗܪܸܢ ܒܫܘܼܒ̣ܚܵܐ ܟܵܗܢܘܼܬܵܐ ܕܦܝܼܫܠܵܗ̇ ܡܣܘܼܦܝܼܬܵܐ ܐܸܠܹܗ. ܘܩܵܢܹܐ ܒܟܲܟܿܪܵܐ ܕܝܘܼܗَܒܸܠܘܼܟܼ ܐܸܠܹܗ ܒܚܲܕܘܼܬܵܐ: ܘܡܲܢܬܹ‌ܐ ܒܥܵܢܘܵܝܘܼܬܹܗ ܒܥܘܼܕܪܵܢܘܼܟܼ. ܘܠܵܒܸܫ ܓ̰ܘܼܒܵܐ ܕܓ̣ܵܠܝܼܒܘܼܬܵܐ ܒܕܘܼܒܵܪ̈ܘܼܗܝ: ܘܐܵܙܸܠ ܠܵܩܵܕَܡܵܐ ܒܟܠܵܝܗܝ ܕܘܼܒܵܪ̈ܘܼܗܝ ܐܵܡܹܝܢ: ܘܪܲܚܸܡ ܥܲܠܲܢ‌܀

     ܘܐܸܠܝܼ ܚܲܛܵܝܵܐ ܘܩܵܪܝܼܒܵܝܵܐ ܘܡܸܣܟܹܢܵܐ: ܗܲܒَ̣ܠܝܼ ܡܵܪܝܼ ܚܘܵܪ ܦܲܐܬܘܼܬܵܐ ܒܛܲܝܒܘܼܬܘܼܟܼ. ܘܡܚܲܣܝܼ ܓܢܵܗ̈‌ܝܼ ܘܚܛܝܼܵܬ̈‌ܝܼ ܥܲܡ ܓܘܼܢ̈ܚܝܼ: ܘܦܵܚܸܠ ܘܪܲܚܸܡ ܥܲܠ ܥܲܢܝܼܕ̈ܝܼ ܡܚܲܣܹܐ ܟܠ. ܘܫܲܪܸܟܠܗَܘܿܢ ܥܲܡ ܦܹܐܪ̈ܘܼܟܼ ܬܲܡܝܼܡܹ̈ܐ: ܘܘܲܥܢ̈ܘܼܟܼ ܡܠܝܼܠܹ̈ܐ ܐܵܡܹܝܢ: ܘܪܲܚܸܡ ܥܲܠܲܢ‌܀  

܀ܒܘܪ̈ܟܬ̣ܐ܀

ܒܨܠܵܘܵܬܵܘ̈ܟܼܘܿܢ: ܡܲܫܪܹܐ ܡܵܪܲܢ ܒܐܲܪ̈ܒܲܥܦܸܢܝܵܬܹ‌ܐ: ܫܠܵܡܵܐ ܫܸܠܝܵܐ. ܘܫܲܝܢܵܐ ܢܝܼܚܵܐ ܒܨܠܵܘܵܬܵܘ̈ܟܼܘܿܢ܀        

ܒܨܠܵܘܵܬܵܘ̈ܟܼܘܿܢ: ܟܠܵܝܗ‌ܝ ܡܲܠܟܹ̈ܐ ܕܒܟܠ ܐܘܼܚܕܵܢܹ̈ܐ: ܒܚܘܼܒܵܐ ܗܵܘܝܼ ܘܣܲܙܓܵܪܘܼܬܵܐ ܒܨܠܵܘܵܬܵܘ̈ܟܼܘܿܢ܀  

ܒܨܠܵܘܵܬܵܘ̈ܟܼܘܿܢ: ܥܹܕܬܵܐ ܦܪܝܼܩܬܵ‌ܐ ܒܕܸܡܵܐ ܚܲܝܵܐ: ܪܵܝܸܡ ܩܵܪَܢܵܘܿܗ̇ ܥܲܠ ܟܠ ܬܵܘܕܝܼܬܵܐ ܒܨܠܵܘܵܬܵܘ̈ܟܼܘܿܢ܀

ܒܨܠܵܘܵܬܵܘ̈ܟܼܘܿܢ: ܪܲܥܝܵܐ ܪܲܒܵܐ ܦܵܛܲܪܝܵܪܟܝܼܣ: ܡܬܲܓܒܸܪ ܠܦܸܣܩܹܗ ܬܲܡܝܼܡܵܐܝܼܬ ܒܨܠܵܘܵܬܵܘ̈ܟܼܘܿܢ܀

ܒܨܠܵܘܵܬܵܘ̈ܟܼܘܿܢ: ܠܒܵܒܲܢ ܙܲܗܝܵܐ ܡܵܪܝ ܦܠܵܢ. ܣܵܢܸܕܠܹܗ ܡܵܪܲܢ ܒܚܘܼܛܪܵܐ ܕܥܘܼܫܢܵܐ. ܒܨܠܵܘܵܬܵܘ̈ܟܼܘܿܢ܀

ܒܨܠܵܘܵܬܵܘ̈ܟܼܘܿܢ: ܪ̈ܵܥܵܘܵܬܹܐ ܕܓܵܘ ܟܠ ܐܲܬܪܵܐ: ܦܵܝܫܝܼ ܡܣܘܼܩ̈ܠܹܐ ܒܟܠ ܚܲܠܥܲܬܹ̈‌ܐ ܒܨܠܵܘܵܬܵܘ̈ܟܼܘܿܢ܀

ܒܨܠܵܘܵܬܵܘ̈ܟܼܘܿܢ: ܟܵܗܢܹ̈ܐ ܕܡܩܲܕܫܝܼ ܐَܪ̈ܵܙܹܐ ܣܓ̣ܝܕܹ̈ܐ: ܟܠ ܒܘܼܪ̈ܟܵܬܹ‌ܐ ܐܵܬܝܼ ܥܲܠܲܝܗ‌ܝ ܒܨܠܵܘܵܬܵܘ̈ܟܼܘܿܢ܀

ܒܨܠܵܘܵܬܵܘ̈ܟܼܘܿܢ: ܠܲܡܫܲܡܫܵܢܹ̈ܐ ܡܫܲܡܫܝܼ ܡܲܕܒܿܚܹ̈ܐ: ܟܠ ܥܘܼܕܪ̈ܵܢܹܐ ܗܵܘܝܼ ܥܲܡܲܝܗܝ  ܒܨܠܵܘܵܬܵܘ̈ܟܼܘܿܢ܀

  ܒܨܠܵܘܵܬܵܘ̈ܟܼܘܿܢ: ܡܚܲܟܸܡ ܡܵܪܲܢ ܠܝܼܚܝܼܕܵܝܹ̈ܐ: ܒܗܸܪܓܵܐ ܕܟܬܵܒ̣̈ـܹܐ ܘܐܵܦ ܦܲܪܡܵܝܬܵܝܗܝ ܒܨܠܵܘܵܬܵܘ̈ܟܼܘܿܢ܀

ܒܨܠܵܘܵܬܵܘ̈ܟܼܘܿܢ: ܐܵܗܵܐ ܥܘܼܡܪܵܐ ܦܵܐܸܫ ܢܛܝܼܪܵܐ: ܡ̣ܢ ܟܠ ܚܘܼܙܕܵܓܹ̈ܐ ܕܡܚܲܙܕܸܓܵܢܹ̈ܐ ܒܨܠܵܘܵܬܵܘ̈ܟܼܘܿܢ܀       

ܒܨܠܵܘܵܬܵܘ̈ܟܼܘܿܢ: ܡܗܲܝܸܪ ܡܲܪܲܢ ܠܲܡܫܲܒܠܵܢܲܢ: ܘܪܹ̈ܫܵܢܹܐ ܕܥܘܼܡܪܹ̈ܐ ܘܐܵܦ ܠܣܵܒ̣̈ـܹܐ ܒܨܠܵܘܵܬܵܘ̈ܟܼܘܿܢ܀

ܒܨܠܵܘܵܬܵܘ̈ܟܼܘܿܢ: ܡܗܲܝܸܪ ܡܵܪܲܢ ܐܵܦ ܩܵܐ ܡܗܲܝܡܢܹ̈ܐ: ܘܝܵܠܕܝܼ ܒܢܘܿܢܹ̈ܐ ܕܙܲܕܝܼܩܘܼܬܵܐ ܒܨܠܵܘܵܬܵܘ̈ܟܼܘܿܢ܀

ܒܨܠܵܘܵܬܵܘ̈ܟܼܘܿܢ: ܓܲܒ̣ܪܹ̈ܐ ܘܢܸܫܹ̈ܐ ܥܲܡ ܟܠ ܕܲܪ̈ܓܹܐ: ܒܲܪܸܟܼ ܐܸܠܵܝܗܝ ܡܵܪܲܢ ܝܑܼܫܘܿܥ ܒܨܠܵܘܵܬܵܘ̈ܟܼܘܿܢ܀

 ܒܨܠܵܘܵܬܵܘ̈ܟܼܘܿܢ: ܡܓܲܪܘܸܣ ܠܝܲܬܘܼܡܹ̈ܐ ܘܬܲܓܒܸܪ ܠܐܲܪ̈ܡܸܠܝܵܬܹ‌ܐ: ܘܬܲܪܣܝܼ ܠܟܦܝܼܢܹ̈ܐ ܘܡܲܙܝܸܕ ܐܸܠܵܝܗܝ ܒܨܠܵܘܵܬܵܘ̈ܟܼܘܿܢ܀        

ܒܨܠܵܘܵܬܵܘ̈ܟܼܘܿܢ: ܡܲܥܒܸܪ ܬܵܙܝܼ ܡ̣ܢ ܚܲܫܵܢܹ̈ܐ: ܘܗܲܝܸܪ ܠܣܢܝܼܩܹ̈ܐ ܘܒܲܣܸܡ ܠܡܸܪ̈ܥܝܹܐ ܒܨܠܵܘܵܬܵܘ̈ܟܼܘܿܢ܀ 

ܒܨܠܵܘܵܬܵܘ̈ܟܼܘܿܢ: ܝܵܗَܒܸܠ ܡܵܪܝܵܐ ܕܘܼܒܵܪ ܚܲܝܹ̈ܐ: ܐܵܦ ܠܝܲܠܘܼܕܹ̈ܐ ܕܒܝܼـܹܗ ܦܵܝܫܝܼ ܡܦܘܼܨܝܹ̈ܐ ܒܨܠܵܘܵܬܵܘ̈ܟܼܘܿܢ܀

ܒܨܠܵܘܵܬܵܘ̈ܟܼܘܿܢ: ܗܵܘܹܐ ܦܘܼܪܩܵܢܵܐ ܠܟܠ ܕܦܝܵܫܵܐ ܝَܢܵܐ ܡܓ̰ܘܼܪ̈ܒܹܐ: ܘܥܵܒܸܕ ܠܗَܘܿܢ ܚܹܐܪܹ̈ܐ ܡ̣ܢ ܢܝܼܪܵܐ ܕܒܝܼܫܵܐ   ܒܨܠܵܘܵܬܵܘ̈ܟܼܘܿܢ܀

ܒܨܠܵܘܵܬܵܘ̈ܟܼܘܿܢ: ܗܵܘܹܐ ܫܪܵܝܵܐ ܠܟܠ ܡܘܼܠܝܸܨܹ̈ܐ: ܘܐܵܦ ܦܘܼܪܩܵܢܵܐ ܠܟܠ ܐܲܣܝܼܪܹ̈ܐ ܒܨܠܵܘܵܬܵܘ̈ܟܼܘܿܢ܀

ܒܨܠܵܘܵܬܵܘ̈ܟܼܘܿܢ: ܠܟܠ ܠܡܓ̰ܘܼܢܓ̰ܸܪܹ̈ܐ ܒܟܠ ܥܵܩܵܬܹ̈‌ܐ: ܡܲܪܘܸܚ ܡܵܪܝܵܐ ܘܝܵܗَܒܸܠ ܢܝܵܚܵܐ ܒܨܠܵܘܵܬܵܘ̈ܟܼܘܿܢ܀ 

ܒܨܠܵܘܵܬܵܘ̈ܟܼܘܿܢ: ܠܐܵܙܵܠَܢܹ̈ܐ ܒܝܲܡܹ̈ܐ ܘܐܵܦ ܐܘܼܪ̈ܚܵܬܹ‌ܐ: ܬܲܓܒܸܪ ܐܸܠܵܝܗܝ ܒܐܘܼܪܚܵܐ ܕܫܲܝܢܵܐ ܒܨܠܵܘܵܬܵܘ̈ܟܼܘܿܢ܀  

ܒܨܠܵܘܵܬܵܘ̈ܟܼܘܿܢ: ܝܲܡܝܼܢܵܐ ܕܡܵܪܲܢ ܫܲܪܝܵܐ ܥܲܠܲܢ: ܘܪ̈ܲܚܡܹܗ ܕܝܑܼܫܘܿܥ ܗܵܘܝܼ ܥܲܡܵܘܟ̣ܘܿܢ ܒܨܠܵܘܵܬܵܘ̈ܟܼܘܿܢ܀  

ܒܨܠܵܘܵܬܵܘ̈ܟܼܘܿܢ: ܫܘܼܒ̣ܚܵܐ ܠܡܵܪܝܵܐ ܡܢܵܛܸܪ ܥܲܒܼܕ̈ܘܼܗܝ. ܘܫܵܟܲܪܬܵܐ ܠܗ̇ܘ ܕܚܘܼܝܠܸܢܹܗ ܠܟܸܢܫܲܢ ܒܨܠܵܘܵܬܵܘ̈ܟܼܘܿܢ܀

ܒܨܠܵܘܵܬܵܘ̈ܟܼܘܿܢ: ܐܵܦ ܠܐܲܡܪܵܢܹܗ ܕܡܹܐܡܪܵܐ ܗܲܝܸܪ: ܘܐܵܦ ܠܟܲܬܒ̣ܵܢܹܗ ܡܲܚܫܸܚ ܠܪ̈ܲܚܡܹܐ ܒܨܠܵܘܵܬܵܘ̈ܟܼܘܿܢ܀  

ܒܨܠܵܘܵܬܵܘ̈ܟܼܘܿܢ: ܡܵܪܝܵܐ ܡܲܫܦܸܟܼ ܟܠ ܒܘܼܪ̈ܟܵܬܹܐ: ܘܪ̈ܲܚܡܹܐ ܬܵܦܸܚ ܥܲܠ ܓܵܢ̈ܵܬܲܢ ܒܨܠܵܘܵܬܵܘ̈ܟܼܘܿܢ܀  

ܒܨܠܵܘܵܬܵܘ̈ܟܼܘܿܢ: ܕܲܥܪܲܚ ܟܠܲܢ ܘܙܲܡܪܲܚ ܫܘܼܒܼܚܵܐ: ܠܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܕܫܵܐ ܠܥܵܠܡܝܼܢ ܐܵܡܹܝܢ܀

ܘܐܵܡܪܝܼ ܩܲܕܝܼܫܵܐ ܐܲܠܵܗܵܐ؛ ܘܐܲܒܼܘܢ ܕܒܲܫܡܲܝܵܐ؛

ܘܚܵܬܿܡܝܼ ܨܠܘܿܬܼܵܐ. ܘܲܡܫܲܪܝܼ ܒܥܘܿܢܝܼܬܼܵܐ ܕܩܲܢܟܹ̈ܐ

ܐܲܝܟܼ ܕܝܑܠܵܗ݁ ܪܫܝܼܡܬܵܐ ܒܚܘܼܕܼܪܵܐ.

ܚܘܬܿܡܐ ܕܥܠ ܬܪܥܐ ܕܩܢܟ̈ܐ؛

ܕܐܲܪܒܥܒܼܫܒܐ ܕܒܥܘܬܼܐ.

ܐܲܠܵܗܵܐ ܕܫܲܡܸܥ ܘܓ̰ܲܘܸܒ: ܫܡܝܼܥ ܨܠܘܿܬܵܐ ܕܦܲܪ̈ܦܸܠܵܢܹܐ. ܡܲܫܪܝܼ ܪ̈ܲܚܡܘܼܟܼ ܐܲܡܝܼܢܹ̈ܐ: ܒܐܲܬܪ̈ܵܘܵܬܹܐ ܘܲܡܕܝܼܢܹ̈ܐ‌܀

ܒܲܪܸܟܼ ܠܥܹܕܬܵܐ ܘܸܠܟܵܗܢܹ̈ܐ: ܕܣܵܙܓܹܪܝܼܠܘܼܟܼ ܒܩܘܼܪ̈ܒܵܢܹܐ. ܒܲܪܸܟܼ ܠܦܸܣܩܵܐ ܘܥܲܠܠܵܢܹ̈ܐ: ܩܵܐ ܕܚܵܕܪܝܼ ܐܲܝܟܼ ܦܘܼܩܕܵܢܹ̈ܐ‌܀

ܡܲܩܘܝܼ  ܡܲܠܟܹ̈ܐ ܘܕܲܝܵـܢܹ̈ܐ: ܩܵܐ ܕܵܝܢܝܼ ܕܝܼܢܹ̈ܐ ܟܹܐܢܹ̈ܐ. ܟܵܡܝܼܠ ܦܵܝܫܝܼ ܚܸܙܝܹ̈ܐ ܡܲܠܦܵܢܹ̈ܐ: ܕܡܲܠܦܝܼ ܟܬܵܒ̣̈ـܹܐ ܡܲܚܹܝܵܢܹ̈ܐ‌܀     

ܡܲܪܚܸܩ ܣܵܢܝܵـܢܹ̈ܐ ܕܡܫܲܡܫܵܢܹ̈ܐ: ܘܢܛܘܿܪܘܼܢ ܡ̣ܢ ܟܠ ܢܸܟ̣ܝܵܢܹ̈ܐ. ܕܘܿܢ ܒܹܝܠܲܢ ܘܸܠܡܲܚܪܸ̈ܒ̣ܵܢܹܐ: ܕܕܹܐܒ̣̈ـܹܐ ܝَܢܵܐ ܥܵܠܕܝܼܵܢܹ̈ܐ‌܀

ܗܲܒَ̣ܠ ܚܲܝܠܵܐ ܠܣܵܒ̣̈ـܹܐ ܬܲܩܢܹ̈ܐ: ܕܡܵܝܬَܝܼܠܘܼܟܼ ܢܸܕܪܹ̈ܐ ܘܕܲܫܢܹ̈ܐ. ܡܣܵܩܸܠ ܒܫܘܼܦܪܹ̈ܐ ܪ̈ܘܼܚܵܢܹܐ: ܠܲܥܠܲܝܡܹ̈ܐ ܘܸܠܛܲܠܝܘܿܢܹ̈ܐ‌܀

ܓܪܘܿܫ ܠܦܲܪܕܵܐ ܕܚܸܫܟܵܐ ܡ̣ܢ ܡܗܲܝܡܢܹ̈ܐ: ܩܵܐ ܕܡܵܘܕܝܼܠܘܼܟܼ ܒܟܠ ܥܕܵܢܹ̈ܐ. ܘܲܠܟܲܠܠܵܬܹ̈‌ܐ ܘܸܠܚܲܬܢܹ̈ܐ: ܡܲܦܨܸܚ ܒܝܵܠܹ̈ܕَܐ ܡܲܚܕܝܼܵـܢܹ̈ܐ‌܀

ܬܲܪܣܝܼ ܠܣܢܝܼܩܹ̈ܐ ܘܡܸܣܟܹܢܹ̈ܐ: ܘܗܲܒَܼܠܗܘܿܢ ܬܘܼܪܣܵܝܵܐ ܕܙܲܒ̣ܢܹ̈ܐ. ܙܪܝܼܥ ܒܘܼܪ̈ܟܵܬܹ‌ܐ ܒܟܠ ܙܲܪ̈ܥܘܿܢܹܐ: ܕܐܵܟ̣ܠܝܼ ܘܣܲܒ̣ܥܝܼ ܟܦܝܼܢܹ̈ܐ‌܀

ܡܲܚܕܝܼ ܡܵܪܝ ܠܟܠܵܝܗܝ ܦܫܝܼܡܹ̈ܐ: ܒܲܥܢܵܢܹ̈ܐ ܡܸܛܪ̈ܵܢܹܐ. ܡܪܲܚܸܡ ܡܵܪܲܢ ܥܲܠ ܐܲܟܵܪܹ̈ܐ ܕܡܵܝܬَ‌ܝܼ ܠܒܲܝܬܘܼܟܼ ܢܘܼܒܲܪ̈ܠܹܓܼܹܐ‌܀

ܢܛܘܿܪ ܡܵܪܝܼ ܕܵܘܸܠܬܵ‌ܐ ܕܥܲܬܝܼܪܹ̈ܐ: ܕܡܲܙܝܸܕܝܼ ܗܵܩܵܐ ܕܐܲܓܼܝܼܪܹ̈ܐ. ܓܘܼܡܘܼ̈ܟܼ ܗܵܘܝܼ ܣܸܬܵܪܹ̈ܐ: ܠܥܸܪ̈ܒܘܼܟܼ ܘܠܦܸܣܩܘܼܟܼ ܡܗܲܡܙܸܡܵܢܹ̈ܐ‌܀

ܦܲܬܚܵܢܵܐ ܕܥܲܝܢܹ̈ܐ ܕܣܸܡܝܹ̈ܐ: ܒܢܘܼܗܪܘܼܟܼ ܡܵܪܝܼ ܚܵܙܲܚ ܢܘܼܗܪܹ̈ܐ. ܝܲܡܝܼܢܘܼܟܼ ܡܒܲܣܡܵܐ ܟ̰ܘܼܠܵܓ̣̈ـܹܐ: ܘܫܲܪܝܵܐ ܚܒ̣ܝܼܫܹ̈ܐ ܘܐܲܣܝܼܪܹ̈ܐ‌܀

ܢܓ̰ܘܿܘ ܒܣܵܢܝܵܢܹ̈ܐ ܘܒܕܸܫ̃ܡܸܢܹ̈ܐ: ܕܛܘܼܫܝܹܐ ܝَܢܵܐ ܓܵܢܲܝܗ‌ܝ ܥܲܠܲܢ ܐܲܝܟܼ ܢܸܡܪܹ̈ܐ. ܗܲܒَ̣ܠܲܢ ܠܸܒܵܐ ܘܗܲܝܸܪ ܠܲܡܝܲܬܪܹ̈ܐ: ܘܦܬܘܿܚ ܦܲܪܡܵܝܬܵ‌ܐ ܩܵܐ ܒܪܝܼܪܹ̈ܐ‌܀

ܡܲܡܟܸـܟܼ ܫܘܼܒ̣ܗܵܪܵܐ ܕܙܲܝܵـܪܹ̈ܐ: ܕܠܵܐ ܛܵܫܝܼ ܫܪܵܪܵܐ ܕܫܲܪܝܼܪܹ̈ܐ. ܦܵܝܫܝܼ ܡܘܼܙܝܸܕܹܐ ܙܲܪ̈ܥܹܐ ܘܡܲܗܨܘܼܠܹ̈ܐ: ܕܣܲܒ̣ܥܝܼ ܓܘܼܪܹ̈ܐ ܘܐܵܦ ܙܥܘܿܪܹ̈ܐ‌܀

ܡܗܲܝܸܪ ܡܵܪܝ ܠܝܵܬܒ̣ܵܢܹ̈ܐ ܕܥܘܼܡܪܹ̈ܐ: ܕܗܵܘܝܼܠܘܼܟܼ ܪܹ̈ܝܓܵܘܵܬܵܐ ܥܝܼܪܹ̈ܐ [ܪ̈ܥܝܼܫܹܐ]. ܥܒ̣ܘܿܕ ܡܵܪܝ ܛܵܒ̣ܬܵ‌ܐ ܥܲܡ ܒܘܼܪܹ̈ܐ [ܣܲܟ̣ܠܹ̈ܐ]: ܐܲܝܟܼ ܕܥܒ̣ܝܼܕܠܘܼܟܼ ܒܟܠܵܝܗ‌ܝ ܕܵܪܹ̈ܐ‌܀

ܡܲܕܥܸܪ ܡܲܛܠܲܒ ܕܟܠ ܕܩܵܪܹܐ: ܐܲܝܟܼ ܕܐܵܢܝَ ܩܵܘܠܘܼ̈ܟܼ ܫܲܪܝܼܪܹ̈ܐ. ܨܠܵܘ̈ܵܬܲܢ ܗܵܘܝܼ ܐܲܝܟܼ ܥܸܛܪܹ̈ܐ: ܩܵܕَܡܘܼܟܼ ܒܪ̈ܲܡܫܹܐ ܘܐܵܦ ܒܨܲܦܪܹ̈ܐ‌܀

ܩܲܒܸܠ ܒܵܥܘܼܬܵܐ ܕܟܲܫܝܼܪܹ̈ܐ: ܕܫܵܗܪܝܼ ܒܠܸܠܝܵܐ ܥܲܡ ܥܝܼܪܹ̈ܐ [ܡܲܠܲܐܟܹ̈ܐ]. ܡܵܪܸܡ ܩܵܠܵܐ ܕܩܲܪ̈ܝܵܢܹܐ ܩܵܐ ܕܫܲܒܚܝܼܠܘܼܟܼ ܒܡܲܙܡܘܼܪܹ̈ܐ‌܀

ܫܲܢܸܢ ܘܓ̰ܵܡܥܝܼ ܠܒܘܼܪ̈ܒܸܙܹܐ: ܩܵܐ ܕܩܵܝܡܝܼ ܓܵܘ ܥܹܕܬܘܼܟܼ ܒܣܸܕܪܹ̈ܐ. ܘܐܵܬܝܵܐ ܘܫܵܪܝܵܐ ܡܲܠܟܘܼܬܘܼܟܼ: ܓܵܘ ܛܵܝܸܦܘܼܟܼ ܘܥܲܒܼܕ̈ܘܼܟܼ ܚܹܐܪܹ̈ܐ‌܀

ܫܘܼܒ̣ܚܵܠܘܼܟܼ ܡ̣ܢ ܟܠ ܒܸܪ̈ܝܹܐ: ܐܵܣܸܪ ܚܲܨܵܐ ܕܓܲܢَܒܵܪܹ̈ܐ. ܘܸܠܬܵܓ̰ܹ̈ܐ ܕܡܲܠܟܹ̈ܐ ܟܹܐ ܫܵܪܹܐ: ܐܵܡܹܝܢ ܘܐܵܡܹܝܢ ܒܟܿܠ ܕܵܪܹ̈ܐ‌܀ ܐܵܕܝܼܵܐ ܘܒܟܠ ܙܲܒܼܢܵܐ ܘܠܥܵܠܲܡ ܥܵܠܡܝܼܢ‌♰

܀ܫܠ̣ܡ܀

ܟܬܼܵܒܼܵܐ ܕܡܹܐܡܪܹ̈ܐ ܕܒܵܥܘܼܬܵܐ ܘܒܘܼܪ̈ܟܵܬܵ‌ܐ: ܒܥܘܼܕܪܵܢܵܐ ܕܛܲܝܒܘܼܬܵܐ ܐܲܠܵܗܵܝܬܵ‌ܐ. ܐܸܠܹܗ ܠܒܵܒܵܐ ܫܘܼܒ̣ܚܵܐ: ܘܠܒܪܘܿܢܵܐ ܪܘܼܡܪܵܡܵܐ: ܘܠܪܘܼܚܵܐ

ܕܩܘܼܕܫܵܐ ܠܥܵܠܲܡ ܥܵܠܡܝܼܢ:

 ܐܵܡܹܝܢ.

ܛܒܼܝܥܬܼ̈ܐ ܕܗܘܦܪܟܝܐ ܕܟܠܝܦ̮ܘܪܢܝܐ:

ܥܕܬܐ ܕܡܕܢ̱ܚܐ ܕܐܬܼܘܪ̈ܝܐ.

ܟܠܝܗܝ ܙܕܩ̈ܐ ܢܛܝܪ̈ܐ.

ܒَܝܕ ܠܡܪܢ.