ܩܠܐ ܩܕܡܝܐ

ܒܪܘܼܟܵܒ̣ ܡܲܢ̣ܘܼ ܣܵܦܹ̇ܩ.

ܦܬܲܚܠܝܼ ܬܲܪ̈ܥܹܐ ܕܙܲܕܝܼܩܘܼܬܼܵܐ. ܦܬܲܚܠܲܢ ܡܵܪܲܢ؛ ܒܹܝܬ ܓܲܙܵܐ ܪܲܒܵܐ ܕܲܡܪܲܚܡܵܢܘܼܬܵܟ. ܕܢܸܣܲܒ̣ ܪ̈ܲܚܡܹܐ ܘܦܘܼܪܩܵܢܵܐ: ܠܓܸܢܣܲܢ ܡܸܣܟܹܢܵܐ. ܘܐܲܣܵܐ ܟܹܐܒܹ̈ܐ ܕܲܚܛܵܗܲܝ̈ܢ: ܒܣܲܡܵܐ ܪܲܒܵܐ ܕܲܚܢܵܢܵܟܼ. ܕܼܿܡܚܝܼܠ ܓܸܢܣܲܢ؛ ܒܪ̈ܲܚܡܲܝܟ ܢܸܬܼܚܢܸܢ.

ܫܘܼܚܠܵܦܵܐ ܩܲܕܼܡܵܝܵܐ

ܒܪܘܼܟܵܒ̣ ܪܹܫ ܚܲܝ̈ܠܵܘܵܬ݂ܵܐ.

ܐܲܠܵܗܲܢ ܒܹܝܬ ܓܵܘܣܲܢ ܥܲܫܝܼܢܵܐ. ܒܹܝܬ݂ ܓܵܘܣܲܢ ܐܲܢَܬ̇ܘܼ ܡܵܪܲܢ؛ ܠܵܐ ܬܲܪܦܹܝܢ ܒܐܝܼ̈ܕܲܝ ܒܝܼܫܵܐ: ܣܵܩܘܿܪܹܗ ܕܓܸܢܣܲܢ: ܘܣܵܢܐܹܗ ܕܲܟܼܝܵܢܲܢ. ܗܘ̤ ܓܹܝܪ ܣܲܚܦܲܢ ܡ̣ܢ ܫܘܼܒܼܚܼܿܢ؛ ܘܗܵܫܵܐ ܦܲܚܵܘ̈ܗܝ ܛܵܡܲܪ ܠܲܢ. ܒܪ̈ܲܚܡܲܝܟ ܢܲܛܲܪ ܠܣܵܓܼܘܿܕܲܝ̈ܟ؛ ܕܲܠܘܵܬܵܟܼ ܚܵܝܪܝܼܢ ܟܠܫܵܥ܀ ܨܠܝܼܒܼܵܟ݂ ܢܸܗܘܸܐ ܒܹܝܬ ܓܵܘܣܵܐ ܠܢܲܦ̮ܫ̈ܵܬܲܢ. ܘܒܹܗ ܢܸܬ݂ܚܵܘܪܵܢ ܟܘܬܼ̈ܡܵܬܼܵܐ ܕܣܲܢ̈ܝܵܬܲܢ. ܘܒܲܛܸܠ ܩܪ̈ܵܒܹܐ ܘܬܲܟ݂ܬܘܼ̈ܫܹܐ ܡ̣ܢ ܐܲܪܥܵܐ. ܕܥܘܼܡܪܵܐ ܫܲܠܝܵܐ ܘܲܡܫܲܝܢܵܐ ܢܝܼܚܵܐ ܢܸܥܡܲܪ܀ ܟܵܗ̈ܢܹܐ ܘܡܲܠ̈ܟܹܐ ܢܸܬ̣ܐܲܣܪܘܼܢ: ܒܚܘܼܒܵܐ ܫܲܠܵܡܵܐ ܘܐܵܘܝܘܼܬܵܐ. ܚܵܘܵܢ ܡܵܪܝܵܐ ܛܲܝܒ̇ܘܼܬܼܵܟܼ: ܘܦܘܼܪܩܵܢܵܟܼ ܗܲܒܼܠܲܢ ܟܠܝܘܿܡ. ܒܢܲܝܵܐ ܕܚܘܼܒܵܟ ܫܲܡܲܗܬܵܢ: ܒܛܲܝܒ̇ܘܼܬ݂ܵܟܼ ܡܵܪܵܐ ܛܵܒܼܵܐ܀ ܠܵܐ ܡܵܪܝ ܬܲܣܠܹܝܢ: ܘܠܵܐ ܬܲܗܡܸܐ ܚܝܵܪܵܟܼ ܡܸܢܲܢ. ܐܸܠܵܐ ܒܪ̈ܲܚܡܲܝܟ: ܣܥܘܿܪ ܡܲܪ̈ܥܲܝܢ ܘܐܲܚܠܸܡ ܟܪ̈ܝܼܗܲܝܢ. ܘܐܲܣܘܿܪ ܠܟܸܢܫܲܢ؛ ܒܚܘܼܒܵܐ ܫܲܠܵܡܵܐ ܘܐܵܘܝܘܼܬܼܵܐ. ܘܒܲܪܸܟܼ ܘܢܲܛܼܪ ܟܠܝܼܠܵܐ ܕܫܲܢَܬܵܐ ܒܛܲܝܒ̇ܘܼܬܼܵܟܼ: ܗܲܠܸܠܘܼܝܵܐ.

ܫܘܼܚܠܵܦܵܐ ܕܲܬܪܹܝܢ

ܒܪܘܼܟܵܒ̣ ܬܲܠܡܝܼܕܵܘ̈ܗܝ ܕܲܡܫܝܼܚܵܐ.

ܘܐܲܢَܬ̇ ܡܵܪܝܵܐ ܐܲܠܵܗܵܐ ܡܪܲܚܡܵܢܵܐ ܘܲܡܪܲܚܦܵܢܵܐ. ܐܲܠܵܗܵܐ ܡܪܲܚܡܵܢܵܐ ܚܘܼܣ ܥܲܠ ܥܲܡܵܟܼ. ܠܿܐ ܬܸܬܸܠ ܝܵܪ̈ܬܘܼܬܼܵܟܼ: ܠܚܸܣܕܵܐ ܘܡܘܼܝܵܩܵܐ ܕܥܲܡܡܹ̈ܐ. ܚܘܼܪ ܡ̣ܢ ܡܸܕܼܝܵܪ̈ܲܝܟ ܘܲܚܙܝܼ ܩܛܝܼܪܵܐ: ܕܣܲܒ̣ܠܝܼܢܲܢ ܡ̣ܢ ܒܥܸܠܕ̇ܒ݂ܵܒܹ̈ܐ. ܘܬܸܕܢܲܚ ܠܲܢ ܒܲܥܓܲܠ ܛܲܝܒ̇ܘܼܬܼܵܟܼ: ܕܠܵܐ ܢܹܐܡܪܘܼܢ ܥܲܡܡܹ̈ܐ؛ ܐܲܝܟܵܘ ܐܲܠܵܗܗܘܿܢ.

ܫܘܼܚܠܵܦܵܐ ܕܲܬ݂ܠܵܬ݂ܵܐ

ܒܪܘܼܟܵܒܼ ܝܵܕܲܥ ܚܘܼܫܵܒܹ̈ܐ.

ܗܵܘ̇ ܕܐܝܬܼܵܘܗܝ ܡ̣ܢ ܩܕܼܵܡ ܥܵܠܡܹ̈ܐ.ܐܲܒܼܵܐ ܚܲܢܵܢܵܐ؛ ܘܲܲܒ݂ܪܵܐ ܡܪܲܚܡܵܢܵܐ. ܘܪܘܼܚܵܐ ܡܪܲܚܦܵܢܵܐ: ܡܩܲܕܫܵܢܵܐ ܕܛܲܡ̈ܐܹܐ. ܩܲܕܸܫ ܦܲܓܼܪ̈ܲܝܢ ܘܢܲܦ̮ܫܵܬܲܢ: ܘܐܸܬ̣ܪܲܚܲܡܥܠܲܝܢ.

ܫܘܼܚܠܵܦܵܐ ܕܐܲܪܒ݁ܥܵܐ

ܪܹܫ ܩܵܠܵܐ.

ܠܸܠܝܵܐ ܠܠܸܠܝܵܐ ܡܚܵܘܸܐ ܡܲܕܿܥܵܐ. ܠܸܠܝܵܐ ܡܸܟܹܝܠ ܥܵܒܲܪ ܠܹܗ؛ ܘܐܝܼܡܵܡܵܐ ܩܪܸܒ݂ ܘܲܡܛ̣ܵܐ ܠܹܗ. ܐܸܬ̇ܬ̇ܥܝܼܪܘ ܐܲܚܲܝ̈ ܘܩܘܼܡܘ ܨܲܠܵܘ: ܥܲܕܼ ܐܝܼܬ̣ ܠܟܼܘܿܢ ܐܲܬܼܪܵܐ. ܕܡܵܪܲܢ ܐܸܡܲܪ ܒܲܣܒܲܪܬܹܗ: ܕܩܵܪܹܐ ܠܝܼ ܥܵܢܹܐ ܐ݇ܢܵܐ ܠܹܗ. ܘܲܕܼܢܵܩܹܫ ܦܵܬܲܚ ܐ݇ܢܵܐ ܠܹܗ: ܘܗܵܘܹ̇ܝܢ ܥܠܵܘܗܝ ܪ̈ܲܚܡܹܐ.

ܫܘܼܚܠܵܦܵܐ ܕܚܲܡܫܵܐ.

ܥܲܕܲܪܲܝܢ ܐܲܠܵܗܵܐ ܦܵܪܘܿܩܲܢ. ܥܠܲܝܟ̇ܘܼ ܥܵܕܼܘܿܪܲܢ ܣܵܝܡܝܼܢܲܢ ܬܘܟ݂ܠܵܢܲܢ. ܕܐܲܢَܬ̇ܘ݂ ܡܵܪܵܐ ܒܵܪܘܿܝܵܐ. ܐܵܦ ܡܲܚܝܵܢܵܐ ܕܟܼܠܵܐ. ܡܡܲܠܐ ܣܘܼܢܩܵܢܵܐ ܕܟܼܠ ܒܣܲܪ. ܡܫܝܼܚܵܐ ܪܲܚܸܡܥܠܲܝܢ.

ܫܘܼܚܠܵܦܵܐ ܕܸܫܬܵܐ

ܒܪܘܼܟܵܒܼ ܢܒܼܝܼܹ̈ܐ ܕܩܘܼܫܬܵܐ.

ܥܕܲܡܵܐ ܕܲܬܼܪܲܚܸܡܥܠܲܝܢ. ܒܼܿܬܼܪܲܥ ܪ̈ܲܚܡܲܝܟ ܗܵܐ ܢܵܩ̇ܫܝܼܢܲܢ ܐܘܿ ܡܵܪܹܟܠ. ܦܬܲܚܠܲܢ ܕܢܸܥܘܿܠ ܘܢܸܣܲܒ̣ ܡܸܢܵܟ݂ ܚܢܵܢܵܐ ܘܪ̈ܲܚܡܹܐ. ܒܚܲܫܵܐ ܘܕܸܡ̈ܥܹܐ ܡܦܝܼܣܝܼܢܲܢ ܠܵܟܼ. ܚܼܿܣܵܐ ܚܵܘ̈ܒܲܝܢ ܪܵܚܹܡ ܐَܢܵܫܵܐ. ܘܠܵܐ ܡܵܪܝ ܬܲܪܦܹܝܢ ܒܐܝܼܕܼܲܝ̈ ܒܝܼܫܵܐ. ܕܲܢܒܲܣܒܸ̇ܣ ܠܲܢ ܒܲܫܟܼܝܼܪܵܬܹܗ܀ ܘܲܥܩܘܿܪ ܡܸܢܲܢ. ܚܣܵܡܵܐ ܘܢܸܟܼܠܵܐ. ܘܡܹܐܟܲܠܩܲܪܨܵܐ ܘܣܸܢܐܲܬ̣ ܐ݇ܢܵܫܵܐ. ܘܨܘܿܒܼ ܒܲܢ ܚܘܼܒܵܐ ܘܡܲܟ̇ܝܼܟܼܘܼܬܼܵܐ ܘܒܲܣܝܼܡܘܼܬܼܵܐ ܘܲܡܫܲܝܢܘܼܬܼܵܐ܀ ܕܡܵܐ ܕܲܗ̤ܘܲܝܢ ܢܵܘܤܹ̈ܐ ܕܨܸܒܼܝܵܢܵܟܼ. ܢܸܫܦܲܪ ܠܵܟܼ ܐܝܼܬܼܝܵܐ ܡܬܼܘܿܡܵܝܵܐ، ܘܢܸܙܡܲܪ ܠܵܟܼ ܫܘܼܒܼܚܵܐ ܒܟܼܠܥܸܕܵܢ ܘܚܘܼܣܥܠܲܝܢ.