ܩܠܐ ܕܫܬܬܥܣܪ

ܒܪܘܼܟܵܒ̣ ܗܵܘ̇ ܕܒܼܐܝܼܬܼܘܼܬܹܗ.

ܢܸܫܩ̄ܠܘܼܢ ܛܘܼܪܹ̈ܐ ܫܠܵܡܵܐ ܠܥܲܡܵܟܼ. ܡܫܝܼܚܵܐ ܫܠܵܡܵܐ ܕܥܸܠܵܝܹ̈ܐ. ܘܫܲܝܢܵܐ ܪܲܒܵܐ ܕܬܲܚܬܵܝܹ̈ܐ. ܕܲܫ̣ܪܵܐ ܣܝܵܓܼܵܐ ܕܒܲܡܨܲܥܬܼܵܐ. ܘܣܲܒܲܪ ܫܠܵܡܵܐ ܠܪ̈ܲܚܝܼܩܹܐ ܘܲܠܩܲܪ̈ܝܼܒܹܐ܀ ܐܲܫܪܵܐ ܫܲܝܢܵܟܼ ܒܓܼܵܘ ܥܹܕܬܵܟܼ. ܘܒܲܛܸܠ ܡܸܢܵܗ̇ ܚܸܪ̈ܝܵܢܹܐ. ܘܟܼܠ ܣܸܕܼܩ̈ܝܼܢ ܘܟܼܠ ܦܘܼ̈ܠܵܓܼܝܼܢ. ܕܐܲܒܲܥ ܒܵܗ̇ ܐܵܟܹܠܩܲܪܨܵܐ. ܘܩܲܝܸܡ ܟܵܗܢܹ̈ܝܗ̇ ܒܲܚܢܵܢܵܟܼ. ܘܢܲܛܲܪ ܝܲܠܕܹܝ̈ܗ̇ ܒܛܲܝܒ̇ܘܼܬܼܵܟܼ. ܘܐܲܒܼܗܸܬܼ ܠܒܼܝܼܫܵܐ ܒܥܸܠܕܲܪܵܗ̇. ܘܲܣܚܘܿܦ ܠܟܼܠܗܘܿܢ ܣܵܩܘܿܪܹ̈ܝܗ̇܀ ܫܘܼܪܵܐ ܪܵܡܵܐ ܐܲܟܼܪܸܟܼ ܠܵܗ̇. ܨܠܝܼܒܼܵܟܼ ܚܲܝܵܐ ܘܲܣܓܝܼܕܵܐ. ܘܩܘܼܫܬܵܟܼ ܙܲܝܢܵܐ ܚܲܣܝܼܢܵܐ. ܠܘܼܩܒܲܠ ܣܸܕܼܪܵܘܗܝ ܕܲܢܟܼܝܼܠܵܐ. ܘܐܲܫܘܵܐ ܠܟܼܠܲܢ ܒܲܚܢܵܢܵܟܼ. ܕܢܸܫܦܲܪ ܠܨܸܒܼܝܵܢ ܡܵܪܘܼܬܼܵܟܼ. ܒܗܲܝܡܵܢܘܼܬܵܐ ܕܲܫܪܵܪܵܐ. ܘܕܘܼܒܵܪܹ̈ܐ ܕܲܡܪܲܥܹܝܢ ܠܵܟܼ܀ ܘܲܒܼܗܵܘ ܝܵܘܡܵܐ ܕܡܸܬܼܓ̇ܠܹܝܬ̇ ܒܫܘܼܒܼܚܵܟܼ ܪܲܒܵܐ. ܐܲܫܘܵܢ ܕܢܸܥܘܿܠ ܠܲܓܼܢܘܿܢܵܟܼ. ܥܲܡ ܟܹܐܢܹ̈ܐ ܕܲܫܦܲܪܘ ܩܘܕܼܡܲܝܟ. ܘܗܲܝܡܸܢܘ ܘܐܵܘܕܝܼܘ ܒܡܵܪܘܼܬܼܵܟܼ؛ ܕܥܲܡܗܘܿܢ ܢܵܘܕܸܐ ܠܛܲܝܒ̇ܘܼܬܼܟܼ. ܒܛܘܼ̈ܒܹܐ ܕܣܵܟܼܵܐ ܠܵܐ ܢܵܣ̇ܒ̇ܝܼܢ.

ܫܘܼܚܠܵܦܵܐ ܩܲܕܼܡܵܝܵܐ

ܒܪܘܼܟܵܒ̣ ܠܵܐ ܬܩܝܼܡܝܼܘܗܝ.

ܡܵܪܝܵܐ ܠܵܐ ܒܪܘܼܓܼܙܵܟܼ ܬܲܟ̇ܣܲܢܝ. ܠܵܐ ܬܲܟ̇ܣܝܼܘܗܝ ܒܪܘܼܓܼܙܵܐ ܠܥܲܒܼܕܵܟܼ ܕܡܸܬܼܓܵܘܲܣ ܒܵܟܼ ܡܵܪܝܵܐ. ܘܲܒܼܚܸܡܬܼܵܟܼ ܬܘܼܒܼ ܠܵܐ ܬܸܪܕܹܝܘܗܝ ܕܠܵܐ ܐܵܣܝܘܼ. ܐܸܠܵܐ ܐܲܢَܬ̇ ܐܵܣ̇ܝܵܐ ܕܪ̈ܲܚܡܹܐ. ܐܲܣܵܝܗܝ ܘܐܲܩܝܼܡܲܝܗܝ ܡ̣ܢ ܥܲܪܣܵܐ ܕܟܹܐܒܼܵܘ̈ܗܝ.

ܫܘܼܚܠܵܦܵܐ ܕܲܬܪܹܝܢ

ܒܪܘܼܟܵܒ̣ ܚܸܕܼܝܲܬ̤ ܡܲܪܝܲܡ.

ܐܲܢܗܲܪ ܐܲܦܲܝ̈ܟ ܘܢܸܬܼܦܪܸܩ. ܚܲܢܵܢܵܐ ܘܲܡܠܸܐ ܪ̈ܲܚܡܹܐ. ܠܵܐ ܬܲܗܡܸܐ ܚܝܵܪܵܟܼ ܡܸܢܲܢ. ܘܫܲܕܲܪ ܠܲܢ ܡ̣ܢ ܒܹܝܬܼ ܓܲܙܵܟܼ. ܚܢܵܢܵܐ ܘܪ̈ܲܚܡܹܐ ܘܦܘܼܪܩܵܢܵܐ.

ܫܘܼܚܠܵܦܵܐ ܕܲܬ݂ܠܵܬ݂ܵܐ

ܒܪܘܼܟܵܒܼ ܫܠܝܼܚܹ̈ܐ ܩܲܕܝܼܫܹ̈ܐ ܠܒܼܝܼ̈ܫܲܝ.

ܦܬܲܚ ܠܝܼ ܬܲܪ̈ܥܹܐ ܕܙܲܕܝܼܩܘܼܬܼܵܐ. ܦܬܲܚܠܲܢ ܡܵܪܲܢ ܒܹܝܬܼ ܓܲܙܵܐ ܕܪ̈ܲܚܡܲܝܟ. ܕܢܸܣܲܒܼ ܪ̈ܲܚܡܹܐ ܘܦܘܼܪܩܵܢܵܐ ܠܢܲܦ̮ܫ̈ܵܬܼܵܐ ܡܟܲܬܼ̈ܡܵܬܼܵܐ. ܒܲܕܼܡܘܼܬܼ ܓܲܝܵܣܵܐ ܕܪ̈ܲܚܡܵܟܼ. ܘܐܸܫܬܵܘܕܝܼܬ̇ ܠܹܗ ܡܲܠܟ̇ܘܼܬܼܵܐ.