1ܘܚܙܹܐܡܘܿܢ ܕܟܡܵܐ ܪܵܒܵܐ ܝ݇ܠܹܗ ܚܘܼܒܹܗ ܕܒܵܒܵܐ ܠܟܸܣܠܲܢ؛ ܕܒܢܘܿܢܹ̈ܐ ܕܐܲܠܵܗܵܐ ܦܵܝܫܲܚ ܩܸܪܝܹܐ؛ ܘܝܼܘܵܚ. ܣܵܒܵܒ ܕܐܵܗܵܐ؛ ܥܵܠܡܵܐ ܠܹܐ ܝ݇ܠܹܗ ܒܝܼܕܵܥܝܲܢ؛ ܣܵܒܵܒ ܐܘܼܦ ܐܸܠܹܗ ܠܵܐ ܝ݇ܕܸܥܠܹܗ. 2ܡܘܼܚܸܒ̈ܝܼ؛ ܐܵܕܝܼܵܐ ܒܢܘܿܢܹ̈ܐ ܕܐܲܠܵܗܵܐ ܝ݇ܘܵܚ؛ ܘܠܵܐ ܦܸܫܠܹܗ ܓܸܠܝܵܐ ܗܲܠ ܐܵܕܝܼܵܐ ܡܘܼܕܝܼ ܒܸܬ ܗܵܘܲܚ. ܐܝܼܢܵܐ ܒܝܼܕܵܥܝܵܐ ܝ݇ܘܵܚ؛ ܕܐܝܼܡܲܢ ܕܦܵܐܹܫ ܓܸܠܝܵܐ؛ ܒܕܡܘܼܬܹܗ ܒܸܬ ܗܵܘܵܚ؛ ܣܵܒܵܒ ܕܒܸܬ ܚܵܙܲܚ ܠܹܗ ܕܵܐܟܼܝܼ ܕܝܼܠܹܗ. 3ܘܟܠ ܡ̇ܢ ܕܐܝܼܬ ܠܹܗ ܒܝܼܹܗ ܐܵܗܵܐ ܗܹܒܼܝܼ؛ ܟܹܐ ܕܵܟܹܐ ܓܵܢܹܗ؛ ܐܲܝܟܼ ܕܗ̇ܘ ܕܸܟܼܝܵܐ ܝ݇ܠܹܗ. 4ܟܠ ܕܥܵܒܼܸܕ ܚܛܝܼܬܵܐ؛ ܥܒܼܵܪܬܵܐ ܥܲܠ ܢܵܡܘܿܣܵܐ ܟܹܐ ܦܵܠܸܚ؛ ܣܵܒܵܒ ܚܛܝܼܬܵܐ ܥܒܼܵܪܬܵܐ ܥܲܠ ܢܵܡܘܿܣܵܐ ܝ݇ܠܵܗ̇. 5ܘܒܝܼܕܵܥܝܵܐ ܝ݇ܬܘܿܢ ܕܗ̇ܘ ܦܸܫܠܹܗ ܓܸܠܝܵܐ ܕܫܵܩܸܠ ܚܛ̈ܝܼܵܬܲܢ؛ ܘܚܛܝܼܬܵܐ ܒܝܼܹܗ ܠܲܝܬ. 6ܟܠ ܕܒܝܼܹܗ ܥܲܪܩܸܠ؛ ܠܹܐ ܚܵܛܹܐ. ܟܠ ܕܚܵܛܹܐ؛ ܠܵܐ ܩܲܡ ܚܵܙܹܐܠܹܗ ܘܠܵܐ ܩܲܡ ܝܵܕܹܥ ܠܹܗ. 7ܒܢܘܿܢ̈ܝܼ؛ ܠܵܐ ܐ݇ܢܵܫܵܐ ܡܲܚܠܸܛ ܠܵܘܟܼܘܿܢ. ܗ̇ܘ ܕܥܵܒܹܕ ܙܲܕܝܼܩܘܼܬܵܐ؛ ܙܲܕܝܼܩܵܐ ܝ݇ܠܹܗ؛ ܐܲܝܟܼ ܕܐܘܼܦ ܗ̇ܘ ܙܲܕܝܼܩܵܐ ܝ݇ܠܹܗ. 8ܗ̇ܘ ܕܦܵܠܸܚ ܚܛܝܼܬܵܐ؛ ܡ̣ܢ ܐܵܟܹܠܩܲܪܨܵܐ ܝ݇ܠܹܗ؛ ܣܵܒܵܒ ܡ̣ܢ ܫܘܼܪܵܝܵܐ ܐܵܟܹܠܩܲܪܨܵܐ ܚܲܛܵܝܵܐ ܝ݇ܠܹܗ. ܠܕܵܐܗܵܐ ܦܸܫܠܹܗ ܓܸܠܝܵܐ ܒܪܘܿܢܹܗ ܕܐܲܠܵܗܵܐ؛ ܕܒܵܛܸܠ ܗَܘܵܐ ܦܘܼܠܚܵܢܹ̈ܐ ܕܐܵܟܹܠܩܲܪܨܵܐ. 9ܟܠ ܕܝܼܠܹܗ ܗ݇ܘܝܼܵܐ ܡ̣ܢ ܐܲܠܵܗܵܐ؛ ܚܛܝܼܬܵܐ ܠܹܐ ܥܵܒܹܕ؛ ܣܵܒܵܒ ܒܲܪܙܲܪܥܹܗ ܒܝܼܹܗ ܥܲܪܩܘܼܠܹܐ ܝ݇ܠܹܗ؛ ܘܠܹܐ ܡܵܨܹܐ ܠܸܚܛܵܝܵܐ؛ ܣܵܒܵܒ ܡ̣ܢ ܐܲܠܵܗܵܐ ܗ݇ܘܹܐܠܹܗ. 10ܒܐܵܗܵܐ ܟܹܐ ܦܵܝܫܝܼ ܦܪܝܼܫܹܐ ܒܢܘܿܢܹ̈ܐ ܕܐܲܠܵܗܵܐ ܡ̣ܢ ܒܢܘܿܢܹ̈ܐ ܕܐܵܟܹܠܩܲܪܨܵܐ؛ ܟܠ ܕܠܵܐ ܥܵܒܹܕ ܙܲܕܝܼܩܘܼܬܵܐ؛ ܘܠܵܐ ܡܲܚܸܒ ܠܐܵܚܘܿܢܹܗ؛ ܠܹܐ ܝ݇ܠܹܗ ܡ̣ܢ ܐܲܠܵܗܵܐ. 11ܣܵܒܵܒ ܐܵܗܵܐ ܝ݇ܠܵܗ̇ ܡܲܚܒܲܪܬܵܐ ܕܫܡܸܥܠܵܘܟܼܘܿܢ ܡ̣ܢ ܫܘܼܪܵܝܵܐ؛ ܕܡܲܚܸܒܲܚ ܚܲܕَ ܠܗ̇ܘ ܐ݇ܚܹܪ݇ܢܵܐ. 12ܠܵܐ ܐܲܝܟܼ ܩܵܐܹܝܢ؛ ܗ̇ܘ ܕܝܼܗَܘܵܐ ܡ̣ܢ ܒܝܼܫܵܐ؛ ܘܩܛܸܠܹܗ ܠܐܵܚܘܿܢܹܗ ܘܣܵܒܵܒ ܕܡܘܼܕܝܼ ܩܛܸܠܹܗ؛ ܣܵܒܵܒ ܕܒܝܼܫܹ̈ܐ ܗَܘܵܘ ܦܘܼܠܚܵܢ̈ܘܼܗܝ؛ ܘܐܵܢܝܼ ܕܐܵܚܘܿܢܹܗ ܙܲܕܝܼܩܹ̈ܐ. 13ܠܵܐ ܥܵܓ̰ܒܝܼܬܘܿܢ ܐܵܚܘܿܢܘܵܬ̈ܝܼ؛ ܐܸܢ ܥܵܠܡܵܐ ܣܵܢܹܐܠܵܘܟܼܘܿܢ. 14ܐܲܚܢܲܢ ܒܝܼܕܵܥܝܵܐ ܝ݇ܘܵܚ ܕܫܘܼܢܝܹܐ ܝ݇ܘܵܚ ܡ̣ܢ ܡܵܘܬܵܐ ܠܚܲܝܹ̈ܐ؛ ܣܵܒܵܒ ܕܡܲܚܘܼܒܹܐ ܝܘܵܚ ܠܐܵܚܘܿܢ̈ܘܵܬܲܢ. ܗ̇ܘ ܕܠܵܐ ܡܲܚܸܒ ܠܐܵܚܘܿܢܹܗ؛ ܒܡܵܘܬܵܐ ܥܲܪܩܘܼܠܹܐ ܝ݇ܠܹܗ. 15ܟܠ ܕܣܵܢܹܐ ܠܐܵܚܘܿܢܹܗ ܩܵܛܹܠ ܐ݇ܢܵܫܹ̈ܐ ܝ݇ܠܹܗ. ܘܒܝܼܕܵܥܝܵܐ ܝ݇ܬܘܿܢ ܕܟܠ ܩܵܛܸܠ ܐ݇ܢܵܫܹ̈ܐ ܠܲܝܬ ܒܝܼܹܗ ܚܲܝܹ̈ܐ ܕܠܐܵܒܲܕ ܥܲܪܩܘܼܠܹܐ. 16ܒܐܵܗܵܐ ܒܝܼܕܵܥܝܵܐ ܝ݇ܘܵܚ ܚܘܼܒܵܐ؛ ܕܗ̇ܘ ܝܸܗܒܼܵܠܹܗ ܓܵܢܹܗ ܡܒܵܕܵܠܲܢ؛ ܘܐܘܼܦ ܐܲܚܢܲܢ ܘܵܓ̰ܸܒ ܝ݇ܠܵܗ̇ ܕܒܚܵܬܸܪ ܕܐܵܚܘܿܢ̈ܘܵܬܲܢ ܝܵܗ݇ܒܼܵܚ ܓܵܢ̈ܵܬܲܢ. 17ܐܝܼܢܵܐ ܗ̇ܘ ܕܐܝܼܬ ܠܹܗ ܡܵܐܠ ܕܥܵܠܡܵܐ؛ ܘܚܵܙܹܐ ܠܐܵܚܘܿܢܹܗ ܕܣܢܝܼܩܵܐ؛ ܘܕܵܒܼܸܩ ܪ̈ܲܚܡܘܼܗܝ ܡܸܢܹܗ؛ ܕܵܐܟܼܝܼ ܥܲܪܩܘܼܠܹܐ ܝ݇ܠܹܗ ܒܝܼܹܗ ܚܘܼܒܹܗ ܕܐܲܠܵܗܵܐ؛ 18ܒܢܘܿܢ̈ܝܼ؛ ܠܵܐ ܡܲܚܸܒܲܚ ܒܗܹܡܸܙܡܵܢܹ̈ܐ ܘܒܠܸܫܵܢܵܐ؛ ܐܸܠܵܐ ܒܦܘܼܠܚܵܢܹ̈ܐ ܘܒܣܲܪܲܣܬܘܼܬܵܐ. 19ܘܒܵܐܗܵܐ ܒܝܼܕܵܥܝܵܐ ܝ݇ܘܵܚ ܕܡ̣ܢ ܣܵܪܲܣܬܘܼܬܵܐ ܝ݇ܘܵܚ؛ ܘܩܵܕ݇ܡܘܼܗܝ ܒܸܥܒܼܵܕܵܐ ܝ݇ܘܵܚ ܚܵܬܸܪܓ̰ܵܡܥ ܠܸܒܲܢ؛ 20ܘܐܸܢ ܠܸܒܲܢ ܠܵܝܸܡ ܠܲܢ؛ ܐܲܠܵܗܵܐ ܒܘܼܫ ܓܘܼܪܵܐ ܝ݇ܠܹܗ ܡ̣ܢ ܠܸܒܲܢ؛ ܘܟܹܐ ܝܵܕܹܥ ܟܠ ܡܸܢܕܝܼ. 21ܡܘܼܚܸܒ̈ܝܼ؛ ܐܸܢ ܠܸܒܲܢ ܠܵܐ ܠܵܝܸܡ ܠܲܢ؛ ܚܘܵܪܦܵܬܘܼܬܵܐ ܐܝܼܬܠܲܢ ܩܵܕ݇ܡ ܐܲܠܵܗܵܐ. 22ܘܟܠ ܡܸܢܕܝܼ ܕܛܵܠܒܲܚ؛ ܟܹܐ ܩܵܒ̇ܠܲܚ ܡܸܢܹܗ؛ ܣܵܒܵܒ ܕܟܹܐ ܢܵܛܪܲܚ ܦܘܼܩ̈ܕܵܢܘܼܗܝ؛ ܘܫܘܼܠܹ̈ܐ ܫܵܦܝܼܪܹ̈ܐ ܟܹܐ ܦܵܠܚܲܚ ܩܵܕ݇ܡܘܼܗܝ. 23ܘܐܵܗܵܐ ܝ݇ܠܹܗ ܦܘܼܩܕܵܢܹܗ ܕܗܲܡܸܢܲܚ ܒܫܸܡܵܐ ܕܒܪܘܿܢܹܗ ܝܼܫܘܿܥ ܡܫܝܼܚܵܐ؛ ܘܡܲܚܸܒܲܚ ܚܲܕ݇ ܠܗ̇ܘ ܐ݇ܚܹܪ݇ܢܵܐ؛ ܐܲܝܟܼ ܕܦܩܝܼܕܲܢ ܝ݇ܠܹܗ. 24ܘܗ̇ܘ ܕܢܵܛܸܪ ܦܘܼܩܕܵܢ̈ܘܼܗܝ؛ ܒܝܼܹܗ ܟܹܐ ܥܲܪܩܸܠ؛ ܘܗ̇ܘ ܒܝܼܹܗ. ܘܒܵܐܗܵܐ ܦܲܪܡܘܼܝܹܐ ܝ݇ܘܵܚ ܕܟܹܐ ܫܵܪܹܐ ܒܝܼܲܢ ܡ̣ܢ ܪܘܼܚܹܗ ܕܝܘܼܗ݇ܒܼܸܠܹܗ ܐܸܠܲܢ.