1ܒܢܘܿܢ̈ܝܼ؛ ܐܲܢܹܐ ܒܸܟܬܵܒܼܵܐ ܝܘܸܢ ܐܸܠܵܘܟܼܘܿܢ؛ ܕܠܵܐ ܚܵܛܝܼܬܘܿܢ. ܘܐܸܢ ܐ݇ܢܵܫܵܐ ܚܵܛܹܐ؛ ܐܝܼܬ ܠܲܢ ܦܵܪܲܩܠܹܝܛܵܐ ܠܟܸܣ ܒܵܒܵܐ؛ ܝܼܫܘܿܥ ܡܫܝܼܚܵܐ ܙܲܕܝܼܩܵܐ. 2ܘܗ̇ܘ ܝ݇ܠܹܗ ܚܘܼܣܵܝܵܐ ܡܒܵܕܵܠ ܕܚ̈ܛܝܼܵܬܲܢ؛ ܘܠܵܐ ܗܲܪ ܡܒܵܕܵܠ ܕܕܝܼܲܢ؛ ܐܸܠܵܐ ܐܘܼܦ ܡܒܵܕܵܠ ܕܟܠܹܗ ܥܵܠܡܵܐ. 3ܘܒܐܵܗܵܐ ܦܲܪܡܘܼܝܹܐ ܝ݇ܘܵܚ ܕܟܹܐ ܝܵܕܥܲܚ ܠܹܗ؛ ܐܸܢ ܢܵܛܪܲܚ ܦܘܼܩܕܵܢ̈ܘܼܗܝ. 4ܗ̇ܘ ܕܐܵܡܸܪ ܕܟܹܐ ܝܵܕܥܸܢܹܗ؛ ܘܦܘܼܩܕܵܢ̈ܘܼܗܝ ܠܵܐ ܢܵܛܸܪ؛ ܕܵܓܵܠܵܐ ܝ݇ܠܹܗ؛ ܘܣܲܪܲܣܬܘܼܬܵܐ ܠܲܝܬ ܒܝܼܹܗ. 5ܐܝܼܢܵܐ ܗ̇ܘ ܕܢܵܛܸܪ ܗܹܡܸܙܡܵܢܹܗ؛ ܒܗ̇ܘ ܒܬܪܘܼܨܬܵܐ ܡܘܼܟܡܸܠܵܐ ܝ݇ܠܹܗ ܚܘܼܒܹܗ ܕܐܲܠܵܗܵܐ. ܣܵܒܵܒ ܒܵܐܗܵܐ ܒܝܼܕܵܥܝܵܐ ܝ݇ܘܵܚ ܕܒܝܼܹܗ ܝ݇ܘܵܚ. 6ܗ̇ܘ ܕܐܵܡܸܪ ܕܥܲܪܩܘܼܠܹܐ ܝ݇ܠܹܗ ܒܝܼܹܗ؛ ܘܵܓ̰ܸܒ ܝ݇ܠܵܗ̇ ܐܸܠܹܗ ܕܚܵܕܸܪ ܐܲܝܟܼ ܕܗ̇ܘ ܚܕܸܪܹܗ. 7ܡܘܼܚܸܒ̈ܝܼ؛ ܠܹܐ ܝ݇ܠܹܗ ܦܘܼܩܕܵܢܵܐ ܚܵܕ݇ܬܵܐ ܒܸܟܬܵܒܼܵܐ ܝ݇ܘܸܢ ܐܸܠܵܘܟܼܘܿܢ؛ ܐܸܠܵܐ ܦܘܼܩܕܵܢܵܐ ܥܲܬܝܼܩܵܐ؛ ܗ̇ܘ ܕܐܝܼܬ ܗَܘܵܐ ܠܵܘܟܼܘܿܢ ܡ̣ܢ ܫܘܼܪܵܝܵܐ. ܐܝܼܢܵܐ ܦܘܼܩܕܵܢܵܐ ܥܲܬܝܼܩܵܐ ܗ̇ܝ ܗܹܡܸܙܡܵܢ ܝ݇ܠܵܗ̇ ܕܫܡܸܥܠܵܘܟܼܘܿܢ. 8ܡܸܢَܕܪܸܫَ؛ ܦܘܼܩܕܵܢܵܐ ܚܵܕ݇ܬܵܐ ܒܸܟܬܵܒܼܵܐ ܝ݇ܘܸܢ ܐܸܠܵܘܟܼܘܿܢ؛ ܗ̇ܘ ܕܫܲܪܝܼܪܵܐ ܝ݇ܠܹܗ ܒܝܼܹܗ ܕܒܝܼܵܘܟܼܘܿܢ؛ ܕܚܘܼܒܼܝܵܐ ܥܒܼܝܼܪܵܐ ܝ݇ܠܹܗ؛ ܘܒܲܗܪܵܐ ܫܲܪܝܼܪܵܐ ܐܵܕܝܼܵܐ ܦܝܵܫܵܐ ܝ݇ܠܹܗ ܚܸܙܝܵܐ. 9ܗ̇ܘ ܕܐܵܡܸܪ ܕܒܒܲܗܪܵܐ ܝ݇ܠܹܗ؛ ܘܣܵܢܹܐ ܠܐܵܚܘܿܢܹܗ؛ ܒܚܘܼܒܼܝܵܐ ܝ݇ܠܹܗ ܗܲܠ ܐܵܕܝܼܵܐ. 10ܐܝܼܢܵܐ ܗ̇ܘ ܕܡܲܚܸܒ ܠܐܵܚܘܿܢܹܗ؛ ܒܒܲܗܪܵܐ ܟܹܐ ܥܲܪܩܸܠ؛ ܘܟܦܘܼܪܝܵܐ ܠܲܝܬ ܒܝܼܹܗ. 11ܐܝܼܢܵܐ ܗ̇ܘ ܕܣܵܢܹܐ ܠܐܵܚܘܿܢܹܗ ܒܚܘܼܒܼܝܵܐ ܝ݇ܠܹܗ؛ ܘܒܚܘܼܒܼܝܵܐ ܟܹܐ ܚܵܕܸܪ؛ ܘܠܹܐ ܝܵܕܹܥ ܠܐܲܝܟܵܐ ܟܹܐ ܐܵܙܸܠ؛ ܣܵܒܵܒ ܕܚܘܼܒܼܝܵܐ ܡܘܼܣܡܝܼܵܝܠܹܗ ܥܲܝܢ̈ܘܼܗܝ. 12ܒܸܟܬܵܒܼܵܐ ܝ݇ܘܸܢ ܐܸܠܵܘܟܼܘܿܢ؛ ܒܢܘܿܢܹ̈ܐ؛ ܣܵܒܵܒ ܕܦܸܫܠܗ݇ܘܿܢ ܫܒܼܝܼܩܹܐ ܐܸܠܵܘܟܼܘܿܢ ܚܛܝܼܵܬܵܘ̈ܟܼܘܿܢ ܒܚܵܬܸܪ ܕܫܸܡܹܗ. 13ܒܸܟܬܵܒܼܵܐ ܝ݇ܘܸܢ ܐܸܠܵܘܟܼܘܿܢ؛ ܒܵܒܵܘܵܬܹ̈ܐ؛ ܣܵܒܵܒ ܕܝ݇ܕܸܥܠܵܘܟܼܘܿܢ ܠܗ̇ܘ ܕܝܼܗَܘܵܐ ܡ̣ܢ ܒܪܵܫܝܼܬ. ܒܸܟܬܵܒܼܵܐ ܝ݇ܘܸܢ ܐܸܠܵܘܟܼܘܿܢ؛ ܓ̰ܘܲܢܩܹ̈ܐ؛ ܣܵܒܵܒ ܕܓܼܠܸܒܠܵܘܟܼܘܿܢ ܠܒܝܼܫܵܐ. ܟܬܸܒܼܠܝܼ ܐܸܠܵܘܟܼܘܿܢ؛ ܝܵܠܹܕ̈݇ܐ؛ ܣܵܒܵܒ ܕܝ݇ܕܸܥܠܵܘܟܼܘܿܢ ܠܒܵܒܵܐ. 14ܟܬܸܒܼܠܝܼ ܐܸܠܵܘܟܼܘܿܢ؛ ܒܵܒܵܘܵܬܹ̈ܐ؛ ܣܵܒܵܒ ܕܝ݇ܕܸܥܠܵܘܟܼܘܿܢ ܠܗ̇ܘ ܕܡ̣ܢ ܒܪܵܫܝܼܬ؛ ܟܬܸܒܼܠܝܼ ܐܸܠܵܘܟܼܘܿܢ؛ ܓ̰ܘܲܢܩܹ̈ܐ؛ ܣܵܒܵܒ ܕܚܲܝܠܵܢܹ̈ܐ ܝ݇ܬܘܿܢ؛ ܘܗܹܡܸܙܡܵܢܹܗ ܕܐܲܠܵܗܵܐ ܥܲܪܩܘܼܠܹܐ ܝ݇ܠܵܗ̇ ܒܝܼܵܘܟܼܘܿܢ؛ ܘܓܼܠܸܒܠܵܘܟܼܘܿܢ ܠܒ̇ܝܼܫܵܐ. 15ܠܵܐ ܡܲܚܸܒܝܼܬܘܿܢ ܥܵܠܡܵܐ؛ ܘܠܵܐ ܡܸܢܕܝܼ ܕܐܝܼܬ ܓܵܘ ܥܵܠܡܵܐ. ܐܸܢ ܐ݇ܢܵܫܵܐ ܡܲܚܸܒ ܠܥܵܠܡܵܐ؛ ܚܘܼܒܵܐ ܕܒܵܒܵܐ ܠܲܝܬ ܒܝܼܹܗ. 16ܣܵܒܵܒ ܟܠ ܕܐܝܼܬ ܒܐܵܗܵܐ ܥܵܠܡܵܐ؛ ܫܲܗ݇ܘܲܬܬܵܐ ܕܦܲܓܼܪܵܐ؛ ܘܫܲܗ݇ܘܲܬܬܵܐ ܕܥܲܝܢܹ̈ܐ؛ ܘܫܘܼܒܼܗܵܪܵܐ ܕܥܵܠܡܵܐ؛ ܠܹܐ ܝ݇ܠܹܗ ܡ̣ܢ ܒܵܒܵܐ؛ ܐܸܠܵܐ ܡ̣ܢ ܕܐܵܗܵܐ ܥܵܠܡܵܐ ܝ݇ܠܹܗ. 17ܘܟܹܐ ܥܵܒܼܸܪ ܥܵܠܡܵܐ؛ ܗ̇ܘ ܘܫܲܗܘܲܬܬܹܗ. ܐܝܼܢܵܐ ܗ̇ܘ ܕܥܵܒܼܸܕ ܪܸܙܵܝܹܗ ܕܐܲܠܵܗܵܐ ܟܹܐ ܦܵܐܹܫ ܠܥܵܠܲܡ. 18ܒܢܘܿܢܝܼ̈؛ ܣܵܥܲܬ ܐ݇ܚܵܪܵܝܬܵܐ ܝ݇ܠܵܗ̇؛ ܘܕܵܐܟܼܝܼ ܕܫܡܸܥܠܵܘܟܼܘܿܢ ܕܐܵܬܹܐ ܐܲܢܛܝܼܟܪܝܼܣܛܘܿܣ؛ ܐܘܼܦ ܐܵܕܝܼܵܐ ܗ݇ܘܹܐܠܗ݇ܘܿܢ ܪܵܒܵܐ ܐܲܢܛܝܼܟܪ̈ܝܼܣܛܘܿܣܹܐ. ܘܡ̣ܢ ܕܐܵܗܵܐ ܒܝܼܕܵܥܝܵܐ ܝ݇ܘܵܚ ܕܣܵܥܲܬ ܐ݇ܚܵܪܵܝܬܵܐ ܝ݇ܠܵܗ̇. 19ܡܸܢܲܢ ܦܠܸܛܠܗ݇ܘܿܢ؛ ܐܸܠܵܐ ܠܹܐ ܗَܘܵܘ ܡܸܢܲܢ؛ ܣܵܒܵܒ ܐܸܢ ܡܸܢܲܢ ܗܵܘܝܼ ܗَܘܵܘ؛ ܠܟܸܣܠܲܢ ܒܸܬ ܦܵܝܫܝܼ ܗَܘܵܘ؛ ܐܸܠܵܐ ܦܠܸܛܠܗ݇ܘܿܢ ܡܸܢܲܢ؛ ܕܦܵܝܫܵܐ ܝ݇ܕܥܝܼܬܵܐ ܕܠܹܐ ܗَܘܵܘ ܡܸܢܲܢ. 20ܘܐܲܚܬܘܿܢ ܡܫܝܼܚܘܼܬܵܐ ܐܝܼܬ ܠܵܘܟܼܘܿܢ ܡ̣ܢ ܩܲܕܝܼܫܵܐ؛ ܘܟܹܐ ܝܵܕܥܝܼܬܘܿܢ ܠܟܠ ܡܸܢܕܝܼ. 21ܠܵܐ ܟܬܸܒܼܠܝܼ ܐܸܠܵܘܟܼܘܿܢ ܣܵܒܵܒ ܕܠܹܐ ܝܵܕܥܝܼܬܘܿܢ ܠܵܗ̇ ܣܲܪܲܣܬܘܼܬܵܐ؛ ܐܸܠܵܐ ܕܟܹܐ ܝܵܕܥܝܼܬܘܿܢ ܠܵܗ̇؛ ܘܣܵܒܵܒ ܕܟܠ ܕܲܓܵܠܘܼܬܵܐ ܠܹܐ ܝ݇ܠܵܗ̇ ܡ̣ܢ ܣܲܪܲܣܬܘܼܬܵܐ. 22ܡܵܢܝܼ ܝ݇ܠܹܗ ܕܲܓܵܠܵܐ ܐܸܠܵܐ ܗ̇ܘ ܕܣܵܪܸܒܼ ܕܝܼܫܘܿܥ ܠܹܐ ܝ݇ܠܹܗ ܡܫܝܼܚܵܐ؛ ܘܐܵܗܵܐ ܝ݇ܠܹܗ ܐܲܢܛܝܼܟܪܝܼܣܛܘܿܣ؛ ܗ̇ܘ ܕܣܵܪܸܒܼ ܠܒܵܒܵܐ ܘܠܒܪܘܿܢܵܐ. 23ܗ̇ܘ ܕܣܵܪܸܒܼ ܠܒܪܘܿܢܵܐ؛ ܐܘܼܦ ܒܵܒܵܐ ܠܲܝܬ ܠܹܗ؛ ܗ̇ܘ ܕܡܵܘܕܹܐ ܒܒܪܘܿܢܵܐ؛ ܐܘܼܦ ܒܵܒܵܐ ܐܝܼܬ ܠܹܗ. 24ܘܐܲܚܬܘܿܢ؛ ܡܸܢܕܝܼ ܕܫܡܸܥܠܵܘܟܼܘܿܢ ܡ̣ܢ ܫܘܼܪܵܝܵܐ ܥܲܪܩܸܠ ܒܝܼܵܘܟܼܘܿܢ. ܐܸܢ ܥܲܪܩܸܠ ܒܝܼܵܘܟܼܘܿܢ ܡܸܢܕܝܼ ܕܫܡܸܥܠܵܘܟܼܘܿܢ ܡ̣ܢ ܫܘܼܪܵܝܵܐ؛ ܐܘܼܦ ܐܲܚܬܘܿܢ ܒܸܬ ܥܲܪܩܸܠܝܼܬܘܿܢ ܒܒܪܘܿܢܵܐ ܘܒܒܵܒܵܐ. 25ܘܐܵܗܵܐ ܝ݇ܠܹܗ ܩܵܘܠܵܐ ܕܥܒܼܸܕܠܹܗ ܐܸܠܲܢ؛ ܚܲܝܹ̈ܐ ܕܠܐܵܒܲܕ. 26ܐܝܼܢܵܐ ܐܲܢܹܐ ܟܬܸܒܼܠܝܼ ܐܸܠܵܘܟܼܘܿܢ ܒܵܗ݇ܣ ܕܐܵܢܝܼ ܕܡܲܚܠܸܛܝܼ ܠܵܘܟܼܘܿܢ. 27ܘܐܘܼܦ ܐܲܚܬܘܿܢ؛ ܟܹܐ ܥܲܪܩܸܠܵܗ̇ ܓܵܘܵܘܟܼܘܿܢ ܡܫܝܼܚܘܼܬܵܐ ܕܩܘܼܒܸܠܵܘܟܼܘܿܢ ܡܸܢܹܗ؛ ܘܠܹܐ ܝ݇ܬܘܿܢ ܣܢܝܼܩܹܐ ܕܐ݇ܢܵܫܵܐ ܡܲܠܸܦܠܵܘܟܼܘܿܢ؛ ܐܸܠܵܐ ܐܲܝܟܼ ܕܡܫܝܼܚܘܼܬܵܐ ܕܝܼܹܗ ܡܵܠܘܿܦܵܘܟܼܘܿܢ ܝ݇ܠܵܗ̇ ܥܲܠ ܟܠ ܡܸܢܕܝܼ؛ ܘܫܲܪܝܼܪܬܵܐ ܝ݇ܠܵܗ̇؛ ܘܠܲܝܬ ܒܝܼܵܗ̇ ܕܲܓܵܠܘܼܬܵܐ؛ ܘܐܲܝܟܼ ܕܩܲܡ ܡܵܠܦܵܐ ܠܵܘܟܼܘܿܢ؛ ܥܲܪܩܸܠܗ݇ܘܿܢ ܒܝܼܹܗ. 28ܘܐܵܕܝܼܵܐ؛ ܒܢܘܿܢ̈ܝܼ؛ ܥܲܪܩܸܠܗ݇ܘܿܢ ܒܝܼܹܗ؛ ܕܐܸܢ ܦܵܐܹܫ ܓܸܠܝܵܐ؛ ܠܵܐ ܢܵܚܦܵܚ ܡܸܢܹܗ؛ ܐܸܠܵܐ ܗܵܘܝܵܐ ܠܲܢ ܚܘܵܪܦܵܬܘܼܬܵܐ ܒܐ݇ܬܵܝܬܹܗ. 29ܐܸܢ ܝ݇ܕܸܥܠܵܘܟܼܘܿܢ ܕܙܲܕܝܼܩܵܐ ܝ݇ܠܹܗ؛ ܝ݇ܕܸܥܡܘܿܢ ܕܟܠ ܕܥܵܒܼܸܕ ܙܲܕܝܼܩܘܼܬܵܐ ܡܸܢܹܗ ܗ݇ܘܹܐܠܹܗ.