1ܦܵܘܠܘܿܣ؛ ܫܠܝܼܚܵܐ ܕܝܼܫܘܿܥ ܡܫܝܼܚܵܐ؛ ܒܦܘܼܩܕܵܢܵܐ ܕܐܲܠܵܗܵܐ ܡܲܚܝܼܵܢܲܢ؛ ܘܕܝܼܫܘܿܥ ܡܫܝܼܚܵܐ ܗܹܒܼܝܼܲܢ؛ 2ܠܛܝܼܡܵܬܹܐܘܿܣ؛ ܒܪܘܼܢܵܐ ܫܲܪܝܼܪܵܐ ܒܗܲܝܡܵܢܘܼܬܵܐ؛ ܫܵܦܲܩܲܬ؛ ܘܪ̈ܲܚܡܹܐ؛ ܘܫܠܵܡܵܐ؛ ܡ̣ܢ ܐܲܠܵܗܵܐ ܒܵܒܲܢ ܘܡܫܝܼܚܵܐ ܝܼܫܘܿܥ ܡܵܪܲܢ. 3ܕܵܐܟܼܝܼ ܕܦܘܼܪܦܸܠܝܼ ܒܝܼܘܼܟܼ؛ ܟܲܕ ܒܹܐܙܵܠܵܐ ܝܘܸܢ ܗ݇ܘܵܐ ܠܡܵܩܹܕܘܿܢܝܼܵܐ؛ ܕܥܲܪܩܸܠܸܬ ܗ݇ܘܵܐ ܓܵܘ ܐܵܦܸܣܘܿܣ؛ ܘܦܵܩܕܸܬ ܗ݇ܘܵܐ ܠܐ݇ܢܵܫܵܐ ܐ݇ܢܵܫܵܐ ܕܠܵܐ ܡܵܠܦܝܼ ܝܘܼܠܦܵܢܹ̈ܐ ܐ݇ܚܹܪ̈݇ܢܹܐ؛ 4ܘܠܵܐ ܪܲܦܝܼ ܓܵܢܵܝܗܝ ܠܗܲܩܝܲܬܹ̈ܐ ܘܠܬܲܫܥܵܝ̈ܬܵܐ ܕܐܘܼ̈ܓ̰ܓܹܐ ܕܠܵܐ ܩܲܝܵܣ؛ ܐܲܢܹܐ ܕܟܹܐ ܡܲܩܸܡܝܼ ܡܲܩܲܪܵܨܘܼܬܵܐ ܙܵܘܕܵܐ ܡ̣ܢ ܒܸܢܝܵܢܵܐ ܕܐܲܠܵܗܵܐ ܕܝܼܠܹܗ ܒܗܲܝܡܵܢܘܼܬܵܐ. 5ܐܝܼܢܵܐ ܩܲܝܵܣܹܗ ܕܦܘܼܩܕܵܢܵܐ ܚܘܼܒܵܐ ܝܠܹܗ ܕܡ̣ܢ ܠܸܒܵܐ ܕܸܟܼܝܵܐ ܘܡ̣ܢ ܐܸܢܝܲܬ ܛܵܒܼܬܵܐ ܘܡ̣ܢ ܗܲܝܡܵܢܘܼܬܵܐ ܫܲܪܝܼܪܬܵܐ. 6ܘܡ̣ܢ ܕܐܲܢܹܐ ܚܠܸܛܠܘܿܢ ܐ݇ܢܵܫܹ̈ܐ ܘܩܠܸܒ݁ܠܘܿܢ ܠܗܹܡܸܙܡܵܢܹ̈ܐ ܒܵܛܝܼ̈ܠܹܐ؛ 7ܣܵܒܵܒ ܒܸܥܠܘܿܢ ܠܸܗܘܵܝܵܐ ܡܲܠܦܵܢܹ̈ܐ ܕܢܵܡܘܿܣܵܐ؛ ܟܲܕ ܠܹܐ ܝܢܵܐ ܦܲܪܡܘܼܝܹܐ ܡܸܢܕܝܼ ܕܗܲܡܙܘܼܡܹܐ ܝܢܵܐ؛ ܘܠܵܐ ܡܸܢܕܝܼ ܕܥܲܠܘܼܗܝ ܡܲܩܘܼܝܹܐ ܝܢܵܐ. 8ܐܝܼܢܵܐ ܒܝܼܕܲܥܝܵܐ ܝܘܵܚ ܕܢܵܡܘܿܣܵܐ ܛܵܒܼܵܐ ܝܠܹܗ؛ ܐܸܢ ܐ݇ܢܵܫܵܐ ܐܲܝܟܼ ܢܵܡܘܿܣܵܐ ܡܲܦܠܸܚ ܠܹܗ؛ 9ܟܲܕ ܝܲܕܸܥ ܕܠܟܹܐܢܹ̈ܐ ܢܵܡܘܿܣܵܐ ܠܹܐ ܝܠܹܗ ܡܘܼܬܒܼܵܐ؛ ܐܝܼܢܵܐ ܠܥܵܘܵܠܹ̈ܐ ܘܠܥܵܨ̈ܝܹܐ؛ ܠܪ̈ܲܫܝܼܥܹܐ ܘܠܚܲܛܵܝܹ̈ܐ؛ ܠܐܵܢܝܼ ܕܠܹܐ ܝܢܵܐ ܩܲܕܝܼܫܹ̈ܐ ܘܠܵܐ ܕܸܟܼܝܹ̈ܐ؛ ܠܡܵܚܝܵܢܹ̈ܐ ܠܒܵܒܵܘܵܬܵܝ̈ܗܝ ܘܠܡܵܚܝܵܢܹ̈ܐ ܠܝܸܡܵܬܵܝ̈؛ ܘܠܩܵܛܘܿܠܹܐ؛ 10ܘܠܙܲܢܵܝܹ̈ܐ؛ ܘܠܕܵܡܟܼܵܢܹ̈ܐ ܥܲܡ ܐܘܼܪ̈ܙܹܐ؛ ܘܠܓܵܢܒܼܵܢܹ̈ܐ ܕܐ݇ܢܵܫܹ̈ܐ؛ ܘܠܕܵܓܵܠܹ̈ܐ؛ ܘܠܥܵܒܼܪ̈ܵܢܹܐ ܥܲܠ ܡܵܘܡܵܬܹ̈ܐ؛ ܘܐܸܢ ܐܝܼܬ ܡܸܢܕܝܼ ܐ݇ܚܹܪ݇ܢܵܐ ܕܝܼܠܹܗ ܕܲܪܩܘܼܒܼܠ ܕܝܘܼܠܦܵܢܵܐ ܨܵܚ؛ 11ܐܲܝܟܼ ܐܹܘܵܢܓܵܠܝܼܘܿܢ ܕܚܸܩܪܹܗ ܕܐܲܠܵܗܵܐ ܒܘܼܪܟܼܵܐ؛ ܗ̇ܘ ܕܦܸܫܠܹܗ ܣܘܼܦܝܵܐ ܒܝܼܝܼ. 12ܫܵܟܘܿܪܹܐ ܝܘܸܢ ܠܗ̇ܘ ܕܩܲܡ ܚܲܠܸܢܝܼ؛ ܠܡܵܪܲܢ ܝܼܫܘܿܥ ܡܫܝܼܚܵܐ؛ ܕܚܫܝܼܒܼܸܢܹܐ ܡܗܘܼܡܢܵܐ ܘܡܘܼܬܒܼܸܢܹܐ ܠܚܸܠܡܲܬܹܗ؛ 13ܐܸܠܝܼ ܕܡ̣ܢ ܩܵܕ݇ܡܵܝܬܵܐ ܓܵܕܦܵܢܵܐ ܝܘܸܢ ܗ݇ܘܵܐ؛ ܘܛܵܪܕܵܢܵܐ؛ ܘܥܵܒܼܕܵܢܵܐ ܒܹܨܘܼܪ؛ ܐܸܠܵܐ ܦܸܫܠܝܼ ܟܘܼܪܡܸܢܵܐ؛ ܣܵܒܵܒ ܟܲܕ ܠܹܐ ܝܲܕܥܸܢ ܗ݇ܘܵܐ ܥܒܸܕܠܝܼ ܒܠܵܐ ܗܲܝܡܵܢܘܼܬܵܐ. 14ܘܙܸܕܠܵܐ ܪܵܒܵܐ ܒܝܼܝܼ ܫܵܦܵܩܲܬܹܗ ܕܡܵܪܲܢ؛ ܘܥܲܡ ܗܲܝܡܵܢܘܼܬܵܐ ܘܚܘܼܒܵܐ ܕܝܼܢܵܐ ܒܝܼܫܘܿܥ ܡܫܝܼܚܵܐ. 15ܡܗܘܼܡܸܢܬܵܐ ܝَܠܵܗ̇ ܗܹܡܸܙܡܵܢ؛ ܘܟܹܐ ܚܵܫܚܵܐ ܠܟܠܵܗ̇ ܩܵܒܲܠܬܵܐ؛ ܕܝܼܫܘܿܥ ܡܫܝܼܚܵܐ ܐ݇ܬܹܠܹܐ ܠܥܵܠܡܵܐ ܠܦܵܪܘܿܩܹܐ ܠܚܲܛܵܝܹ̈ܐ؛ ܕܩܵܕ݇ܡܵܝܵܝ ܐܵܢܵܐ ܝܘܸܢ. 16ܐܸܠܵܐ ܣܵܒܵܒ ܕܐܵܗܵܐ ܥܒܼܸܕܠܹܗ ܪ̈ܲܚܡܹܐ ܥܲܠܝܼ؛ ܕܒܝܼܝܼ ܩܵܕ݇ܡܵܝܬܵܐ ܡܲܕܸܥ ܗ݇ܘܵܐ ܝܼܫܘܿܥ ܡܫܝܼܚܵܐ ܟܠܵܗ̇ ܡܲܪܝܲܟܼܬܵܐ ܕܒܹܢܹܗ؛ ܠܛܘܼܦ̮ܣܵܐ ܕܐܵܢܝܼ ܕܝܼܢܵܐ ܗܕܝܼܪܹܐ ܕܗܲܡܸܢܝܼ ܒܝܼܹܗ ܠܚܲܝܹ̈ܐ ܕܠܐܵܒܲܕ. 17ܐܝܼܢܵܐ ܠܡܲܠܟܵܐ ܕܥܵܠܡܹ̈ܐ؛ ܠܗ̇ܘ ܕܠܹܐ ܚܵܪܸܒܼ ܘܠܹܐ ܦܵܝܸܫ ܚܸܙܝܵܐ؛ ܗ̇ܘ ܕܝܼܠܹܗ ܗܲܪ ܚܲܕَ ܐܲܠܵܗܵܐ؛ ܐܝܼܩܵܪܵܐ ܘܬܸܫܒܘܿܚܬܵܐ ܠܥܵܠܲܡ ܥܵܠܡܝܼܢ؛ ܐܵܡܹܝܢ. 18ܐܵܗܵܐ ܦܘܼܩܕܵܢܵܐ ܣܵܦܘܿܝܹܐ ܝܘܸܢ ܐܸܠܘܼܟܼܼ؛ ܒܪܘܼܢܝܼ ܛܝܼܡܵܬܹܐܘܿܣ؛ ܐܲܝܟܼ ܢܒܼܝܼܵܘ̈ܬܵܐ ܩܵܕ݇ܡܵܝܹ̈ܐ ܕܗ݇ܘܹܠܘܿܢ ܥܲܠܘܼܟܼܼ؛ ܕܦܵܠܫܸܬ ܒܝܼܵܝܗܝ ܐܵܗܵܐ ܦܠܵܫܵܐ ܫܵܦܝܼܪܵܐ؛ 19ܟܲܕ ܐܝܼܬ ܠܘܼܟܼ ܗܲܝܡܵܢܘܼܬܵܐ ܘܐܸܢܝܲܬ ܛܵܒܼܬܵܐ؛ ܗ̇ܝ ܕܟܲܕ ܐ݇ܢܵܫܵܐ ܐ݇ܢܵܫܵܐ ܪܘܼܦܹܠܘܿܢ ܡܸܢܵܝܗܝ؛ ܡ̣ܢ ܗܲܝܡܵܢܘܼܬܵܐ ܓܹܒܵܐ ܚܪܸܩܠܘܿܢ؛ 20ܕܡܸܢܵܝܗܝ ܝܠܹܗ ܗܹܘܡܹܢܹܐܘܿܣ ܘܐܵܠܹܟܼܲܢܕܪܘܿܣ؛ ܐܲܢܹܐ ܕܣܘܼܦܹܠܝܼ ܠܣܵܛܵܢܵܐ ܕܦܵܝܫܝܼ ܬܘܼܥܠܡܹܐ ܕܠܵܐ ܗܵܘܝܼ ܒܸܓܕܵܦܵܐ.