1ܐܝܼܢܵܐ ܡܲܕܘܼܥܝܹܐ ܝܘܸܢ ܐܸܠܵܘܟܼܘܿܢ؛ ܐܵܚܘܿܢܵܘܬܝܼ̈؛ ܐܸܘܵܢܓܵܠܝܼܘܿܢ ܕܡܘܼܫܚܸܕܠܝܼ ܐܸܠܵܘܟܼܘܿܢ؛ ܘܩܘܼܒܠܵܠܵܘܟܼܘܿܢ ܘܟܠܹܠܵܘܟܼܘܼܢ ܒܝܼܵܗ̇؛ 2ܘܒܝܼܵܗ̇ ܒܸܚܵܝܵܐ ܝܬܘܿܢ؛ ܐܸܢ ܕܵܒܼܩܝܼܬܘܿܢ ܒܗ̇ܝ ܗܹܡܸܙܡܵܢ ܕܡܘܼܫܚܸܕܠܝܼ ܐܸܠܵܘܟܼܘܿܢ؛ ܐܸܢ ܕܵܟܼܪܝܼܬܘܿܢ؛ ܐܸܢ ܠܹܐ ܝَܠܵܗ̇ ܕܗܵܒܵܣ ܗܘܼܡܸܢܵܘܟܼܘܿܢ. 3ܣܵܒܵܒ ܕܣܘܼܦܹܐܠܝܼ ܐܸܠܵܘܟܼܘܿܢ ܡ̣ܢ ܩܵܕَܡܵܝܬܵܐ ܗ̇ܘ ܕܐܘܼܦ ܩܘܼܒܸܠܝܼ؛ ܕܡܫܝܼܚܵܐ ܡܝܼܬܠܹܗ ܣܵܒܵܒ ܕܚ̈ܛܵܗܲܢ؛ ܕܵܐܟܼܝܼ ܕܝܼܠܹܗ ܟܬܝܼܒܼܵܐ. 4ܘܕܦܸܫܠܹܗ ܩܒܼܝܼܪܵܐ؛ ܘܕܦܸܫܠܹܗ ܡܘܼܩܸܡܵܐ ܒܝܵܘܡܵܐ ܕܬܠܵܬَܐ؛ ܐܲܝܟܼ ܕܝܼܠܹܗ ܟܬܝܼܒܼܵܐ؛ 5ܘܦܸܫܠܹܗ ܚܸܙܝܵܐ ܠܟܹܐܦܵܐ؛ ܘܒܵܬَܪ ܕܗ̇ܘ ܠܬܪܸܥܣܲܪ؛ 6ܘܒܵܬَܪ ܗܵܕܵܐ ܦܸܫܠܹܗ ܚܸܙܝܵܐ ܠܙܵܘܕܵܐ ܡ̣ܢ ܚܲܡܸܫܡܵܐܐ ܐܵܚܘܿܢܘܵܬܹ̈ܐ ܡܸܚܕܵܕܹ̈ܐ؛ ܕܪܵܒܵܐ ܡܸܢܵܝܗܝ ܦܝܵܫܵܐ ܝܢܵܐ ܗܲܠ ܐܵܕܝܼܵܐ؛ ܘܡܸܢܵܝܗܝ ܕܡܸܟܼܠܘܿܢ. 7ܘܒܵܬَܪ ܐܲܢܹܐ؛ ܦܸܫܠܹܗ ܚܸܙܝܵܐ ܠܝܲܥܩܘܿܒܼ؛ ܘܒܵܬَܪܹܗ ܠܟܠܵܝܗܝ ܫܠܝܼܚܹ̈ܐ. 8ܐܝܼܢܵܐ ܒܚܲܪܬܵܐ ܕܟܠܵܝܗܝ؛ ܐܲܝܟܼ ܕܠܡܘܼܪܚܸܫܵܐ؛ ܦܸܫܠܹܗ ܚܸܙܝܵܐ ܐܘܼܦ ܐܸܠܝܼ. 9ܣܵܒܵܒ ܐܵܢܵܐ ܝܘܸܢ ܙܥܘܿܪܵܐ ܕܫܠܝܼܚܹ̈ܐ؛ ܕܠܹܐ ܚܵܫܚܸܢ ܕܦܵܝܫܸܢ ܩܸܪܝܵܐ ܫܠܝܼܚܵܐ؛ ܣܵܒܵܒ ܕܛܪܸܕܠܝܼ ܠܥܹܕܬܹܗ ܕܐܲܠܵܗܵܐ. 10ܐܝܼܢܵܐ ܒܫܵܦܵܩܲܬ ܕܐܲܠܵܗܵܐ ܝܼܘܸܢ ܡܸܢܕܝܼ ܕܝܼܘܸܢ؛ ܘܫܵܦܵܩܲܬܹܗ ܕܒܝܼܝܼ ܠܵܐ ܗَܘܹܐܠܵܗ̇ ܒܵܛܝܼܠܬܵܐ؛ ܐܸܠܵܐ ܙܵܘܕܵܐ ܡ̣ܢ ܟܠܵܝܗܝ ܓ̰ܹܗܠܝܼ؛ ܘܠܵܐ ܐܵܢܵܐ؛ ܐܸܠܵܐ ܫܵܦܵܩܲܬ ܕܐܲܠܵܗܵܐ ܕܝܼܠܵܗ̇ ܥܲܡܝܼ. 11ܒܲܣ ܐܸܢ ܐܵܢܵܐ ܘܐܸܢ ܐܵܢܝܼ؛ ܗܲܕܟܼܵܐ ܡܲܟܪܘܼܙܹܐ ܝܘܵܚ؛ ܘܗܲܕܟܼܵܐ ܗܘܼܡܸܢܵܘܟܼܘܿܢ. 12ܐܝܼܢܵܐ ܐܸܢ ܡܫܝܼܚܵܐ ܦܝܵܫܵܐ ܝܠܹܗ ܡܘܼܟܪܸܙܵܐ ܕܩܸܡܠܹܗ ܡ̣ܢ ܡܝܼܬܹ̈ܐ؛ ܕܵܐܟܼܝܼ ܐَܢܵܫܹ̈ܐ ܓܵܘܵܘܟܼܘܿܢ ܒܹܐܡܵܪܵܐ ܝܢܵܐ؛ ܕܠܲܝܬ ܩܝܵܡܬܵܐ ܕܡܝܼܬܹ̈ܐ؛ 13ܐܝܼܢܵܐ ܐܸܢ ܩܝܵܡܬܵܐ ܕܡܝܼܬܹ̈ܐ ܠܲܝܬ؛ ܐܘܼܦ ܡܫܝܼܚܵܐ ܠܹܐ ܝܠܹܗ ܩܝܼܡܵܐ. 14ܘܐܸܢ ܡܫܝܼܚܵܐ ܠܹܐ ܝܠܹܗ ܩܝܼܡܵܐ ܒܲܣ ܒܵܛܝܼܠܬܵܐ ܝَܠܵܗ̇ ܟܵܪܘܿܙܘܼܬܲܢ؛ ܘܒܵܛܝܼܠܬܵܐ ܝَܠܵܗ̇ ܐܘܼܦ ܗܲܝܡܵܢܘܼܬܵܐ ܕܝܼܵܘܟܼܘܿܢ. 15ܘܐܘܼܦ ܐܲܚܢܲܢ ܦܝܵܫܵܐ ܝܘܵܚ ܡܫَܟ̰ܝܼܚܹܐ ܣܵܗܕܹ̈ܐ ܕܵܓܵܠܹ̈ܐ ܕܐܲܠܵܗܵܐ؛ ܕܣܗܸܕܠܲܢ ܥܲܠ ܐܲܠܵܗܵܐ؛ ܕܡܘܼܩܸܡܠܹܗ ܠܡܫܝܼܚܵܐ؛ ܟܲܕ ܠܵܐ ܡܘܼܩܸܡܠܹܗ؛ ܐܸܢ ܗܲܕܟܼܵܐ ܡܝܼܬܹ̈ܐ ܠܹܐ ܩܵܝܡܝܼ. 16ܣܵܒܵܒ ܐܸܢ ܡܝܼܬܹ̈ܐ ܠܹܐ ܩܵܝܡܝܼ؛ ܐܘܼܦ ܡܫܝܼܚܵܐ ܠܹܐ ܝܠܹܗ ܩܝܼܡܵܐ؛ 17ܘܐܸܢ ܡܫܝܼܚܵܐ ܠܹܐ ܝܠܹܗ ܩܝܼܡܵܐ؛ ܒܵܛܝܼܠܬܵܐ ܝَܠܵܗ̇ ܗܲܝܡܵܢܘܼܬܵܘܟܼܘܿܢ؛ ܘܗܸܫ ܒܚܛܝܼܵܬܘ̈ܟܼܘܿܢ ܝܼܬܘܿܢ. 18ܒܲܣ ܐܘܼܦ ܐܵܢܝܼ ܕܝܼܢܵܐ ܕܡܝܼܟܹܐ ܒܡܫܝܼܚܵܐ ܬܠܝܼܩܹܐ ܝܢܵܐ. 19ܘܐܸܢ ܗܲܪ ܒܐܲܢܹܐ ܚܲܝܹ̈ܐ ܦܝܵܫܵܐ ܝܘܵܚ ܒܣܲܒܼܪܵܐ ܒܡܫܝܼܚܵܐ؛ ܒܘܼܫ ܫܲܩܝܼ ܝܘܵܚ ܡ̣ܢ ܟܠܵܝܗܝ ܒܢܲܝ̈ܢܵܫܵܐ. 20ܐܝܼܢܵܐ ܐܵܕܝܼܵܐ ܡܫܝܼܚܵܐ ܩܝܼܡܵܐ ܝܠܹܗ ܡ̣ܢ ܡܝܼܬܹ̈ܐ؛ ܘܗَܘܹܐܠܹܗ ܪܹܫܝܼܬܵܐ ܕܐܵܢܝܼ ܕܝܼܢܵܐ ܕܡܝܼܟܹܐ. 21ܣܵܒܵܒ ܟܲܕ ܒܝܲܕ ܒܲܪܢܵܫܵܐ ܗَܘܹܐܠܹܗ ܡܵܘܬܵܐ؛ ܗܲܕܟܼܵܐ ܐܘܼܦ ܒܝܲܕ ܒܲܪܢܵܫܵܐ ܗَܘܹܐܠܵܗ ܩܝܵܡܬܵܐ ܕܡܝܼܬܹ̈ܐ. 22ܒܲܣ ܕܵܐܟܼܝܼ ܕܒܐܵܕܵܡ ܟܠܵܝܗܝ ܟܹܐ ܡܵܝܬܝܼ؛ ܗܲܕܟܼܵܐ ܐܘܼܦ ܒܡܫܝܼܚܵܐ ܟܠܵܝܗܝ ܒܸܬ ܦܵܝܫܝܼ ܡܘܼܚܝܼܹܐ. 23ܟܠ ܐَܢܵܫܵܐ ܒܪܹܐܙܵܐ ܕܓܵܢܹܗ؛ ܡܫܝܼܚܵܐ ܪܹܫܝܼܬܵܐ؛ ܒܵܬَܪ ܗܵܕܵܐ ܐܵܢܝܼ ܕܝܼܢܵܐ ܕܡܫܝܼܚܵܐ؛ ܒܐَܬܵܝܬܹܗ. 24ܗܲܝܓܵܗ ܒܸܬ ܗܵܘܝܵܐ ܚܲܪܬܵܐ؛ ܐܝܼܡܲܢ ܕܣܵܦܹܐ ܡܲܠܟܘܼܬܵܐ ܠܐܲܠܵܗܵܐ ܒܵܒܵܐ؛ ܐܝܼܡܲܢ ܕܒܵܛܸܠ ܠܟܠ ܪܹܫܵܐ؛ ܘܟܠ ܗܘܼܟܡܵܐ؛ ܘܟܠ ܚܲܝܠܵܐ. 25ܣܵܒܵܒ ܘܵܓ̰ܸܒ ܝܼܠܵܗ̇ ܕܗܵܟܸܡ؛ ܗܲܠ ܕܡܲܬܸܒܼ ܠܟܠܵܝܗܝ ܕܸܫܡܸܢܘܼ̈ܗܝ ܬܚܘܿܬ ܐܲܩܠܘܼ̈ܗܝ. 26ܕܸܫܡܸܢ ܐَܚܵܪܵܝܵܐ ܕܒܸܬ ܦܵܝܸܫ ܒܘܼܛܠܵܐ؛ ܡܵܘܬܵܐ ܝܠܹܗ. 27ܣܵܒܵܒ ܟܠ ܙܘܼܒܛܸܢܹܗ ܬܚܘܿܬ ܐܲܩܠܘܼ̈ܗܝ. ܐܝܼܢܵܐ ܐܝܼܡܲܢ ܕܐَܡܝܼܪܹܗ؛ ܟܠ ܡܸܢܕܝܼ ܦܸܫܠܹܗ ܙܲܒܛ ܐܸܠܹܗ؛ ܡܲܥܠܘܼܡ ܝܼܠܵܗ̇ ܕܫܒܼܘܿܩ ܡ̣ܢ ܕܗ̇ܘ ܝܼܠܹܗ ܕܙܘܼܒܛܸܢܗ ܐܸܠܹܗ ܟܠ ܡܸܢܕܝܼ. 28ܘܐܝܼܡܲܢ ܕܦܵܝܸܫ ܙܲܒܛ ܐܸܠܹܗ ܟܠ؛ ܗܿܝܓܵܗ ܒܪܘܼܢܵܐ ܒܓܵܢܹܗ ܒܸܬ ܦܵܝܸܫ ܙܲܒܛ ܠܗ̇ܘ ܕܥܒܼܸܕܠܹܗ ܙܲܒܛ ܐܸܠܹܗ ܟܠ؛ ܕܗܵܘܹܐ ܐܲܠܵܗܵܐ ܟܠ ܒܟܠ. 29ܘܐܸܢ ܠܵܐ؛ ܡܘܼܕܝܼ ܒܸܬ ܥܵܒܼܕܝܼ ܐܵܢܝܼ ܕܒܸܥܡܵܕܵܐ ܝܢܵܐ ܡ̣ܢ ܓܹܒܵܐ ܕܡܝܼܬܹ̈ܐ؛ ܐܸܢ ܡܝܼܬܹ̈ܐ ܗܲܪ ܠܹܐ ܩܵܝܡܝܼ؛ ܩܵܡܘܿܕܝܼ ܒܸܥܡܵܕܵܐ ܝܢܵܐ ܡ̣ܢ ܓܹܒܵܝܗܝ؛ 30ܘܩܵܡܘܿܕܝܼ ܐܘܼܦ ܐܲܚܢܲܢ ܒܟܠ ܣܵܥܲܬ ܒܩܹܘܲܢܕܹܢܘܿܣ ܒܸܟܠܵܝܵܐ ܝܘܵܚ؛ 31ܒܝܼܡܵܝܵܐ ܝܘܸܢ ܒܗ̇ܘ ܫܘܼܒܼܗܵܪܵܘܟܼܘܿܢ؛ ܐܵܚܘܢܘܵܬܝܼ̈؛ ܕܐܝܼܬ ܠܝܼ ܒܡܵܪܲܢ ܝܼܫܘܿܥ ܡܫܝܼܚܵܐ؛ ܕܟܠ ܝܘܿܡ ܒܸܡܝܵܬܵܐ ܝܘܸܢ. 32ܐܸܢ ܐܲܝܟܼ ܕܓܵܘ ܒܢܲܝ̈ܢܵܫܵܐ ܦܠܸܫܠܝܼ ܥܲܡ ܗܲܝܘܵܢܹ̈ܐ ܓܵܘ ܐܵܦܸܣܘܿܣ؛ ܡܘܼܕܝܼ ܦܲܝܕܵܐ ܗَܘܹܐܠܵܗ̇ ܠܝܼ؛ ܐܸܢ ܡܝܼܬܹ̈ܐ ܠܹܐ ܩܵܝܡܝܼ؛ ܐܵܟܼܠܵܚ ܘܫܵܬܵܚ؛ ܣܵܒܵܒ ܩܵܝܕܲܡܬܵܐ ܡܵܝܬܵܚ. 33ܠܵܐ ܚܵܠܛܝܼܬܘܿܢ؛ ܨܵܘܗܒܲܬܹ̈ܐ ܣܸܪܝܹܐ ܟܹܐ ܡܲܚܪܸܒܼܝܼ ܠܕܘܼܒܵܪܹ̈ܐ ܒܵܣܝܼܡܹ̈ܐ. 34ܪܥܘܿܫܘܿܢ ܙܲܕܝܼܩܵܐܝܼܬ؛ ܘܠܵܐ ܚܵܛܝܼܬܘܿܢ؛ ܣܵܒܵܒ ܐܝܼܬ ܐَܢܵܫܹ̈ܐ ܕܝܕܹܥܬܵܐ ܕܐܲܠܵܗܵܐ ܠܲܝܬ ܒܝܼܵܝܗܝ. ܠܢܚܸܦܬܵܘܟܼܘܿܢ ܐܵܗܵܐ ܒܹܐܡܵܪܵܐ ܝܘܸܢ. 35ܐܸܠܵܐ ܒܸܬ ܐܵܡܸܪ ܐَܢܵܫܵܐ؛ ܕܵܐܟܼܝܼ ܒܸܬ ܩܵܝܡܝܼ ܡܝܼܬܹ̈ܐ؛ ܘܒܡܘܼܕܝܼ ܦܲܓܼܪܵܐ ܒܸܬ ܐܵܬܝܼ؛ 36ܝܵܐ ܟܝܼܡ ܗܵܘܢܵܐ؛ ܗ̇ܘ ܕܒܸܙܪܲܥܝܵܐ ܝܘܸܬ؛ ܐܸܢ ܠܵܐ ܡܵܝܸܬ؛ ܠܹܐ ܦܵܝܸܫ ܡܘܼܚܝܼܵܐ. 37ܘܗ̇ܘ ܡܸܢܕܝܼ ܕܒܸܙܪܲܥܝܵܐ ܝܘܸܬ؛ ܠܹܐ ܠܹܗ ܗ̇ܘ ܦܲܓܼܪܵܐ ܕܝܼܠܹܗ ܗܕܝܼܪܵܐ؛ ܒܸܙܪܲܥܝܵܐ ܝܘܸܬ؛ ܐܸܠܵܐ ܕܲܢܕܸܟܬܵܐ ܫܘܼܠܚܵܝܬܵܐ؛ ܡܩܵܘܡܵܐ ܕܚܸܛܹ̈ܐ ܝܲܢ ܕܒܲܪܙܲܪ̈ܥܹܐ ܐَܚܹܪَ̈ܢܹܐ؛ 38ܐܝܼܢܵܐ ܐܲܠܵܗܵܐ ܟܹܐ ܝܵܗَܒܸܠ ܠܹܗ ܦܲܓܼܪܵܐ؛ ܕܵܐܟܼܝܼ ܕܒܵܣܡܵܐ ܠܹܗ؛ ܘܠܟܠ ܚܲܕَ ܡ̣ܢ ܒܲܪܙܲܪ̈ܥܹܐ ܦܲܓܼܪܵܐ ܕܓܵܢܹܗ. 39ܟܠ ܒܸܣܪܵܐ ܠܹܐ ܝܠܹܗ ܚܲܕَ ܬܵܗܵܪ ܒܸܣܪܵܐ؛ ܐܸܠܵܐ ܚܲܕَ ܬܵܗܵܐ ܒܸܣܪܵܐ ܕܒܲܪܢܵܫܵܐ ܝܠܹܗ؛ ܘܐَܚܹܪَܢܵܐ ܒܸܣܪܵܐ ܕܗܲܝܘܵܢܹ̈ܐ؛ ܘܐَܚܹܪَܢܵܐ ܕܛܲܝܪܹ̈ܐ؛ ܘܐَܚܹܪَܢܵܐ ܕܢܘܼܢܹ̈ܐ. 40ܐܝܼܬ ܦܲܓܼܪܹ̈ܐ ܫܡܲܝܵܢܹ̈ܐ؛ ܘܐܝܼܬ ܦܲܓܼܪܹ̈ܐ ܐܲܪ̈ܥܵܢܹܐ. ܐܸܠܵܐ ܚܲܕَ ܬܵܗܵܪ ܝܼܠܹܗ ܚܩܝܼܪܵܐ ܕܫܡܲܝܵܢܹ̈ܐ؛ ܘܐَܚܹܪَܢܵܐ ܝܠܹܗ ܕܐܲܪ̈ܥܵܢܹܐ. 41ܚܲܕَ ܬܵܗܵܐ ܝܼܠܹܗ ܚܸܩܪܵܐ ܕܫܸܡܫܵܐ؛ ܘܐَܚܹܪَܢܵܐ ܝܠܹܗ ܚܸܩܪܵܐ ܕܣܲܗܪܵܐ؛ ܘܐَܚܹܪَܢܵܐ ܝܠܹܗ ܚܸܩܪܵܐ ܕܟܵܘܒܼܟܹ̈ܐ؛ ܣܵܒܵܒ ܟܵܘܟܼܒܼܵܐ ܡ̣ܢ ܟܵܘܟܼܒܼܵܐ ܦܪܝܼܫܵܐ ܝܠܹܗ ܒܚܸܩܪܵܐ. 42ܗܲܕܟܼܵܐ ܐܘܼܦ ܩܝܵܡܬܵܐ ܕܡܝܼܬܹ̈ܐ. ܟܹܐ ܦܵܝܸܫ ܙܸܪܥܝܵܐ ܒܚܪܵܒܼܵܐ؛ ܟܹܐ ܩܵܝܸܡ ܕܠܵܐ ܚܪܵܒܼܵܐ. 43ܟܹܐ ܦܵܝܸܫ ܙܸܪܥܝܵܐ ܒܒܹܨܘܿܪܘܼܬܵܐ؛ ܟܹܐ ܩܵܝܸܡ ܒܚܸܩܪܵܐ. ܟܹܐ ܦܵܝܸܫ ܙܸܪܥܝܵܐ ܒܙܲܒܘܼܢܘܼܬܵܐ؛ ܟܹܐ ܩܵܝܸܡ ܒܚܲܝܠܵܐ. 44ܟܹܐ ܦܵܝܸܫ ܙܸܪܥܝܵܐ ܦܲܓܼܪܵܐ ܐܲܨܠܵܢܵܝܵܐ؛ ܟܹܐ ܩܵܝܸܡ ܦܲܓܼܪܵܐ ܪܘܼܚܵܢܵܝܵܐ. ܐܸܢ ܐܝܼܬ ܦܲܓܼܪܵܐ ܐܲܨܠܵܢܵܝܵܐ؛ ܐܘܼܦ ܐܝܼܬ ܦܲܓܼܪܵܐ ܪܘܼܚܵܢܵܝܵܐ. 45ܗܲܕܟܼܵܐ ܐܘܼܦ ܟܬܝܼܒܼܵܐ ܝܠܹܗ؛ ܒܲܪܢܵܫܵܐ ܩܵܕَܡܵܝܵܐ؛ ܐܵܕܵܡ؛ ܗَܘܹܐ ܠܹܗ ܠܓܵܢܵܐ ܚܵܝܬܵܐ؛ ܘܐܵܕܵܡ ܐَܚܵܪܵܝܵܐ؛ ܠܪܘܼܚܵܐ ܡܲܚܝܼܵܢܬܵܐ. 46ܐܸܠܵܐ ܠܹܐ ܗَܘܵܐ ܩܵܕَܡܵܝܬܵܐ ܪܘܼܚܵܢܵܝܵܐ؛ ܐܸܠܵܐ ܢܲܦ̮ܫܵܢܵܝܵܐ؛ ܘܗܿܝܓܵܗ ܪܘܼܚܵܢܵܝܵܐ. 47ܒܲܪܢܵܫܵܐ ܩܵܕَܡܵܝܵܐ ܡ̣ܢ ܐܲܪܥܵܐ؛ ܥܲܦܪܵܢܵܐ. ܒܲܪܢܵܫܵܐ ܕܬܪܹܝ؛ ܡ̣ܢ ܫܡܲܝܵܐ. 48ܕܵܐܟܼܝܼ ܕܝܼܠܹܗ ܗ̇ܘ ܥܲܦܪܵܢܵܐ؛ ܗܲܕܟܼܵܐ ܐܘܼܦ ܥܲܦܪܵܢܹ̈ܐ. ܘܕܵܐܟܼܝܼ ܕܝܼܠܹܗ ܗ̇ܘ ܕܡ̣ܢ ܫܡܲܝܵܐ؛ ܗܲܕܟܼܵܐ ܐܘܼܦ ܫܡܲܝܵܢܹ̈ܐ. 49ܘܐܲܝܟܼ ܕܠܒܼܸܫܠܲܢ ܕܡܘܼܬܵܐ ܕܗ̇ܘ ܡ̣ܢ ܥܲܦܪܵܐ؛ ܐܘܼܦ ܒܸܬ ܠܵܒܼܫܵܚ ܕܡܘܼܬܵܐ ܕܗ̇ܘ ܕܡ̣ܢ ܫܡܲܝܵܐ. 50ܐܝܼܢܵܐ ܐܵܗܵܐ ܒܹܐܡܵܪܵܐ ܝܘܸܢ؛ ܐܵܚܘܿܢܘܵܬܝܼ̈؛ ܕܒܸܣܪܵܐ ܘܕܸܡܵܐ ܡܲܠܟܘܼܬܵܐ ܕܐܲܠܵܗܵܐ ܠܹܐ ܡܵܨܝܼ ܕܝܵܪܬܝܼ؛ ܘܚܪܵܒܼܵܐ ܠܹܐ ܝܵܪܸܬ ܠܵܐ ܚܪܵܒܼܬܵܐ. 51ܗܵܐ؛ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ ܣܸܪ. ܟܠܲܢ ܠܹܐ ܕܵܡܟܼܵܚ؛ ܐܝܼܢܵܐ ܟܠܲܢ ܒܸܬ ܦܵܝܫܵܚ ܡܘܼܚܠܸܦܹܐ؛ 52ܡܸܢܫܸܠܬܵܢܹ̈ܐ؛ ܒܛܲܪܦܲܛܬܵܐ ܕܥܲܝܢܵܐ؛ ܒܩܵܪَܢܵܐ ܐَܚܵܪܵܝܬܵܐ؛ ܣܵܒܵܒ ܕܒܸܬ ܩܵܪܝܵܐ؛ ܘܒܸܬ ܩܵܝܡܝܼ ܡܝܼܬܹ̈ܐ ܕܠܵܐ ܚܪܵܒܼܵܐ؛ ܐܘܼܦ ܐܲܚܢܲܢ ܒܸܬ ܦܵܝܫܵܚ ܡܘܼܚܠܸܦܹܐ. 53ܣܵܒܵܒ ܘܵܓ̰ܸܒ ܝܼܠܵܗ̇ ܕܐܵܗܵܐ ܚܵܪܒܼܵܢܵܐ ܠܵܒܼܸܫ ܠܵܐ ܚܪܵܒܼܬܵܐ؛ ܘܐܵܗܵܐ ܡܵܝܘܿܬܵܐ ܠܵܒܼܸܫ ܠܵܐ ܡܵܝܘܿܬܘܼܬܵܐ. 54ܐܝܼܢܵܐ ܐܝܼܡܲܢ ܕܐܵܗܵܐ ܚܵܪܒܼܵܢܵܐ ܠܵܒܸܫ ܠܵܐ ܚܪܵܒܼܬܵܐ؛ ܘܐܵܗܵܐ ܡܵܝܘܿܬܵܐ ܠܵܒܸܫ ܠܵܐ ܡܵܝܘܿܬܘܼܬܵܐ؛ ܗܿܝܓܵܗ ܒܸܬ ܗܵܘܝܵܐ ܗ̇ܝ ܗܹܡܸܙܡܵܢ ܕܝܼܠܵܗ̇ ܟܬܝܼܒܼܵܐ؛ ܦܸܫܠܹܗ ܒܸܠܥܝܵܐ ܡܵܘܬܵܐ ܒܓܼܵܠܸܒܘܼܬܵܐ. 55ܐܲܝܟܵܐ ܝܠܹܗ ܢܸܟܣܘܼܟ؛ ܡܵܘܬܵܐ؛ ܘܐܲܝܟܵܐ ܝَܠܵܗ̇ ܓܼܵܠܸܒܘܼܬܵܟܼܝ؛ ܩܲܒܼܪܵܐ؛ 56ܢܸܟܣܹܗ ܕܡܵܘܬܵܐ؛ ܚܛܝܼܬܵܐ ܝَܠܵܗ̇؛ ܘܚܲܝܠܵܐ ܕܚܛܝܼܬܵܐ ܢܵܡܘܿܣܵܐ ܝܠܹܗ. 57ܐܝܼܢܵܐ ܡܸܢܬܵܐ ܡ̣ܢ ܐܲܠܵܗܵܐ ܕܒܝܼܵܗَܒܲܢ ܝܼܠܹܗ ܓܼܵܠܸܒܘܼܬܵܐ ܒܝܲܕ ܡܵܪܲܢ ܝܼܫܘܿܥ ܡܫܝܼܚܵܐ. 58ܡܐܵܕܝܼܵܐ؛ ܐܵܚܘܿܢܘܵܬܝܼ̈ ܡܘܼܚܸܒܹ̈ܐ؛ ܦܘܼܫܘܿܢ ܡܘܼܩܝܹܐ؛ ܘܠܵܐ ܥܫܝܼܫܹܐ؛ ܒܸܙܝܵܕܵܐ ܒܟܠ ܙܲܒܼܢܵܐ ܒܦܘܼܠܚܵܢܵܐ ܕܡܵܪܝܵܐ؛ ܟܲܕ ܝܲܕܥܝܼܬܘܿܢ ܕܓ̰ܵܦܵܘܟܼܘܿܢ ܠܹܐ ܝܠܹܗ ܒܵܛܝܼܠܵܐ ܒܡܵܪܝܵܐ.