1ܣܵܒܵܒ ܐܲܚܬܘܿܢ ܒܝܼܕܲܥܝܵܐ ܝܬܘܿܢ؛ ܐܵܚܘܿܢܘܵܬܝܼ̈؛ ܕܐܘܵܪܬܲܢ ܕܠܟܸܣܠܵܘܟܼܘܿܢ ܠܵܐ ܗَܘܹܐܠܵܗ̇ ܒܹܐ ܦܲܝܕܵܐ. 2ܐܸܠܵܐ ܩܵܕ݇ܡܵܝܬܵܐ ܩܘܼܒܸܠܲܢ ܚܲܫܵܐ؛ ܘܦܸܫܠܲܢ ܡܘܼܣܠܝܼܹܐ؛ ܐܲܝܟܼ. ܕܒܝܼܕܲܥܝܵܐ ܝܬܘܿܢ؛ ܓܵܘ ܦܝܼܠܝܼܦܘܿܣ؛ ܘܗ̇ܝܓܵܗ ܒܐܵܓܼܘܿܢܵܐ ܓܘܼܪܵܐ ܗܘܼܡܙܸܡܠܲܢ ܥܲܡܵܘܟܼܘܿܢ؛ ܒܒܸܣܬܵܝܘܼܬܵܐ ܕܐܲܠܵܗܲܢ؛ ܡܲܫܚܲܕܬܹܗ ܕܐܲܠܵܗܵܐ. 3ܣܵܒܵܒ ܢܲܨܝܼܗܲܬܲܢ ܠܹܐ ܗ݇ܘܵܐ ܡ̣ܢ ܚܸܠܛܘܼܢܝܘܼܬܵܐ؛ ܐܘܼܦ ܠܵܐ ܡ̣ܢ ܛܲܢܦܘܼܬܵܐ؛ ܐܘܼܦ ܠܵܐ ܒܦܸܠܡܵܐ؛ 4ܐܸܠܵܐ ܐܲܝܟܼ ܕܦܝܼܫܹܐ ܝܘܵܚ ܡܘܼܚܫܸܚܹܐ ܡ̣ܢ ܐܲܠܵܗܵܐ ܕܦܵܝܫܵܐ ܣܘܼܦܝܼܬܵܐ ܒܝܼܲܢ ܡܲܫܚܲܕܬܹܗ؛ ܗܲܕܟܼܵܐ ܗܲܡܙܘܼܡܹܐ ܝܘܵܚ؛ ܠܵܐ ܐܲܝܟܼ ܕܠܒܢܲܝ̈ܢܵܫܵܐ ܫܵܦܪܵܚ؛ ܐܸܠܵܐ ܠܐܲܠܵܗܵܐ؛ ܗ̇ܘ ܕܟܹܐ ܨܲܚܨܹܐ ܠܸܒܵܘ̈ܬܲܢ. 5ܣܵܒܵܒ ܐܘܼܦ ܗܸܟ̃ ܠܵܐ ܡܘܼܦܠܸܚܠܲܢ ܗܹܡܸܙܡܵܢ ܕܫܵܕܲܠܬܵܐ؛ ܐܲܝܟܼ ܕܒܝܼܕܲܥܝܵܐ ܝܬܘܿܢ؛ ܘܠܵܐ ܒܡܵܗܵܢܵܐ ܕܛܲܡܲܥܟܵܪܘܼܬܵܐ؛ ܐܲܠܵܗܵܐ ܣܵܗܕܵܐ ܝܠܹܗ؛ 6ܘܠܵܐ ܛܸܥܠܲܢ ܠܚܸܩܪܵܐ ܡ̣ܢ ܒܢܲܝ̈ܢܵܫܵܐ؛ ܠܵܐ ܡܸܢܵܘܟܼܘܿܢ؛ ܘܠܵܐ ܡ̣ܢ ܐܚܹܪ̈݇ܢܹܐ؛ ܟܲܕ ܡܵܨܵܚ ܗ݇ܘܵܘ ܠܸܗܘܵܝܵܐ ܝܵܩܘܿܪܹ̈ܐ ܐܲܝܟܼ ܫܠܝܼܚܹ̈ܐ ܕܡܫܝܼܚܵܐ. 7ܐܸܠܵܐ ܗَܘܹܐܠܲܢ ܓܵܘܵܘܟܼܘܿܢ ܡܵܟܝܼܟܼܹ̈ܐ؛ ܘܐܲܝܟܼ ܓܲܪܘܸܣܵܢܬܵܐ ܕܓܲܪܘܸܣܵܐ ܝܵܠܕَܘܼ̈ܗ̇؛ 8ܗܲܕܟܼܵܐ ܐܘܼܦ ܐܲܚܢܲܢ ܡܲܚܘܼܒܵܘܟܼܘܿܢ ܝܼܘܵܚ؛ ܟܲܕ ܒܣܸܡܠܵܐ ܠܲܢ ܠܝܼܵܗ݇ܒܼܵܘܟܼܘܿܢ ܠܵܐ ܗܲܪ ܡܲܫܚܲܕܬܹܗ ܕܐܲܠܵܗܵܐ؛ ܐܸܠܵܐ ܐܘܼܦ ܓܵܢ̈ܬܲܢ؛ ܣܵܒܵܒ ܕܡܘܼܚܸܒܹ̈ܐ ܝܬܘܿܢ ܗ݇ܘܵܘ ܐܸܠܲܢ. 9ܣܵܒܵܒ ܒܸܕܟܼܵܪܵܐ ܝܬܘܿܢ؛ ܐܵܚܘܿܢܘ̈ܵܬܲܢ؛ ܓ̰ܵܗَܝܬܲܢ ܘܓ̰ܵܦܲܢ؛ ܟܲܕ ܒܸܦܠܵܚܵܐ ܒܠܲܝܠܹܐ ܘܒܐܝܼܡܵܡܵܐ؛ ܕܥܲܠ ܚܲܕَ ܡܸܢܵܘܟܼܘܿܢ ܠܵܐ ܥܵܒܼܕܵܚ ܗ݇ܘܵܘ ܝܘܼܩܪܵܐ؛ ܡܘܼܟܪܸܙܠܲܢ ܐܸܠܵܘܟܼܘܿܢ ܡܲܫܚܲܕܬܹܗ ܕܐܲܠܵܗܵܐ. 19ܐܲܚܬܘܿܢ ܣܵܗܕܹ̈ܐ ܝܬܘܿܢ ܘܐܲܠܵܗܵܐ؛ ܕܵܐܟܼܝܼ ܒܩܲܕܝܼܫܘܼܬܵܐ ܘܒܙܲܕܝܼܩܘܼܬܵܐ ܘܕܠܵܐ ܠܵܘܡܵܐ ܗَܘܹܐܠܲܢ ܠܟܸܣܠܵܘܟܼܘܿܢ ܕܗܲܡܘܼܢܹܐ ܝܬܘܿܢ؛ 11ܕܵܐܟܼܝܼ ܕܒܝܼܕܲܥܝܵܐ ܝܬܘܿܢ؛ ܕܒܟܠ ܚܲܕَ ܡܸܢܵܘܟܼܘܿܢ؛ ܐܲܝܟܼ ܒܵܒܵܐ ܒܝܵܠܕَܘܼ̈ܗܝ ܦܘܼܪܦܸܠܲܢ ܘܝܸܗܒܼܸܠܲܢ ܠܸܒܵܐ ܐܸܠܵܘܟܼܘܿܢ؛ 12ܟܲܕ ܒܸܣܗܵܕܵܐ ܐܸܠܵܘܟܼܘܿܢ ܕܚܵܕܪܝܼܬܘܿܢ ܐܲܝܟܼ ܕܚܵܫܚܵܐ ܠܐܲܠܵܗܵܐ؛ ܗ̇ܘ ܕܩܲܡ ܩܵܪܹܐ ܠܵܘܟܼܘܿܢ ܠܡܲܠܟܘܼܬܹܗ ܘܠܚܸܩܪܹܗ. 13ܣܵܒܵܒ ܕܐܵܗܵܐ ܐܘܼܦ ܐܲܚܢܲܢ ܫܵܟܘܿܪܹܐ ܝܘܵܚ ܒܕܵܝܼܡܘܼܬܵܐ ܠܐܲܠܵܗܵܐ؛ ܕܗܹܡܸܙܡܵܢ ܕܐܲܠܵܗܵܐ ܕܩܘܼܒܠܵܠܵܘܟܼܘܿܢ ܡܸܢܲܢ؛ ܠܵܐ ܐܲܝܟܼ ܗܹܡܸܙܡܵܢ ܕܒܢܲܝ̈ܢܵܫܵܐ ܩܘܼܒܠܵܠܵܘܟܼܘܿܢ؛ ܐܸܠܵܐ ܕܵܐܟܼܝܼ ܕܝܼܠܵܗ̇ ܫܲܪܝܼܪܵܐܝܼܬܼ؛ ܗܹܡܸܙܡܵܢ ܕܐܲܠܵܗܵܐ؛ ܗ̇ܝ ܕܒܸܦܠܵܚܵܐ ܝَܠܵܗ̇ ܒܝܼܵܘܟܼܘܿܢ ܕܗܲܡܘܼܢܹܐ ܝܬܘܿܢ. 14ܣܵܒܵܒ ܐܲܚܬܘܿܢ؛ ܐܵܚܘܿܢܘܵܬܝܼ̈؛ ܗ݇ܘܹܠܵܘܟܼܘܿܢ ܕܵܡܝܵܢܹ̈ܐ ܠܥܹܕܵܬܹ̈ܐ ܕܐܲܠܵܗܵܐ ܕܒܝܼܗܘܼܕ ܒܝܼܫܘܿܥ ܡܫܝܼܚܵܐ؛ ܕܗܲܪ ܐܲܢܹܐ ܩܘܼܒܸܠܵܘܟܼܘܿܢ ܐܘܼܦ ܐܲܚܬܘܿܢ ܡ̣ܢ ܡܸܠܲܬܵܘܟܼܘܿܢ؛ ܕܵܐܟܼܝܼ ܕܐܘܼܦ ܐܵܢܝܼ ܡ̣ܢ ܝܗ݇ܘܼܕܵܝܹ̈ܐ؛ 15ܐܵܢܝܼ ܕܠܡܵܪܲܢ ܝܼܫܘܿܥ ܩܛܸܠܘܿܢ ܘܠܢܒܼ̈ܝܼܹܐ؛ ܘܐܸܠܲܢ ܛܪܸܕܠܘܿܢ؛ ܘܠܲܐܠܵܗܵܐ ܠܹܐ ܫܵܦܪܝܼ؛ ܘܗܘܝܼܹܐ ܝܢܵܐ ܕܲܪܩܘܼܒܼܠ ܠܟܠܵܝܗܝ ܒܢܲܝ̈ܢܵܫܵܐ؛ 16ܕܡܲܟܠܘܼܝܲܢ ܝܼܢܵܐ ܕܗܲܡܙܸܡܵܚ ܥܲܡ ܛܵܝܸܦܹ̈ܐ ܕܚܲܝܝܼ؛ ܠܬܲܡܘܼܡܹܐ ܚܛܝܼܵܬܵܝ̈ܗܝ ܒܟܠ ܙܲܒܼܢܵܐ. ܐܝܼܢܵܐ ܡܛܹܠܵܐ ܥܲܠܵܝܗܝ ܟܲܪܒܵܐ ܗܲܠ ܚܲܪܬܵܐ. 17ܐܝܼܢܵܐ ܐܲܚܢܲܢ؛ ܐܵܚܘܿܢܘܵܬܝܼ̈؛ ܟܲܕ ܗَܘܹܐܠܲܢ ܝܵܬܘܿܡܹ̈ܐ ܡܸܢܵܘܟܼܘܿܢ ܙܲܒܼܢܵܐ ܕܣܵܥܲܬ؛ ܒܦܵܬܵܐ ܘܠܵܐ ܒܠܸܒܲܢ؛ ܒܘܼܫ ܙܵܘܕܵܐ ܚܘܼܒܸܛܠܲܢ ܕܚܵܙܵܚ ܗ݇ܘܵܘ ܦܵܬܵܘܟܼܘܿܢ ܒܫܲܗ݇ܘܲܬܬܵܐ ܓܘܼܪܬܵܐ؛ 18ܣܵܒܵܒ ܒܸܥܠܲܢ ܠܹܐܬܵܝܵܐ ܠܟܸܣܠܵܘܟܼܘܿܢ ܐܵܢܵܐ ܦܵܘܠܘܿܣ ܚܕܵܐ ܓܵܗܵܐ ܘܬܲܪ̈ܬܹܝ؛ ܘܡܘܼܟܠܝܼܵܚܠܹܐ ܣܵܛܵܢܵܐ. 19ܣܵܒܵܒ ܡܘܼܕܝܼ ܝَܠܵܗ̇ ܗܹܒܼܝܼܲܢ؛ ܘܚܲܕܘܼܬܲܢ؛ ܘܬܵܐܓ̰ ܕܫܘܼܒܼܗܵܪܲܢ؛ ܠܵܐ ܗܲܪ ܐܲܚܬܘܿܢ؛ ܩܵܕ݇ܡ ܡܵܪܲܢ ܝܼܫܘܿܥ ܡܫܝܼܚܵܐ ܒܐَܬܵܝܬܹܗ؛ 20ܣܵܒܵܒ ܐܲܚܬܘܿܢ ܝܼܬܘܿܢ ܚܸܩܪܲܢ ܘܚܲܕܘܼܬܲܢ.