1ܐܝܼܢܵܐ ܐܘܼܦ ܢܒܼܝܼܹ̈ܐ ܕܲܓܵܠܹ̈ܐ ܗ݇ܘܹܐܠܗܘܿܢ ܓܵܘ ܥܵܠܡܵܐ؛ ܐܲܝܟܼ ܕܐܘܼܦ ܓܵܘܵܘܟܼܘܿܢ ܒܸܬ ܗܵܘܝܼ ܡܲܠܦܵܢܹ̈ܐ ܕܲܓܵܠܹ̈ܐ؛ ܐܵܢܝܼ ܕܡܲܥܒܼܸܪܝܼ ܒܛܸܫܘܵܐ ܗܲܪَܵܛܝܼܩܘܼܝܵܬܹܐ ܕܬܠܵܩܵܐ؛ ܘܒܡܵܪܵܐ ܕܙܒܼܝܼܢܵܝܠܹܗ ܟܹܐ ܟܵܦܪܝܼ؛ ܟܲܕ ܡܲܝܬ݇ܝܝܼ ܥܲܠ ܓܵܢܵܝܗܝ ܬܠܵܩܵܐ ܡܘܼܠܝܸܙܵܐ. 2ܘܪܵܒܵܐ ܒܸܬ ܐܵܙܠ݇ܝܼ ܒܵܬ݇ܪ ܛܲܢܦܘܼܬܵܐ ܕܝܼܵܝܗܝ؛ ܐܵܢܝܼ ܕܒܣܵܒܵܒܵܝܗܝ ܐܘܼܪܚܵܐ ܕܣܲܪܲܣܬܘܼܬܵܐ ܒܸܬ ܦܵܝܫܵܐ ܓܕܝܼܦܬܵܐ. 3ܘܒܛܲܡܲܥܟܵܪܘܼܬܵܐ؛ ܒܗܹܡܸܙܡܵܢܹ̈ܐ ܨܢܝܼܥܹ̈ܐ؛ ܒܸܬ ܥܵܒܼܕܝܼ ܦܲܝܕܵܐ ܒܝܼܵܘܟܼܘܿܢ؛ ܐܵܢܝܼ ܕܕܝܼܘܵܢܵܝܗܝ ܡ̣ܢ ܩܵܕ݇ܡܵܝܬܵܐ ܠܹܐ ܝ݇ܠܵܗ̇ ܒܸܒܛܵܠܵܐ؛ ܘܬܠܵܩܵܝܗܝ ܠܹܐ ܝ݇ܠܹܗ ܒܸܢܝܵܡܵܐ. 4ܣܵܒܵܒ ܐܸܢ ܐܲܠܵܗܵܐ ܠܡܲܠܲܐܟܹ̈ܐ ܕܚܛܹܐܠܗ݇ܘܿܢ ܠܵܐ ܐ݇ܬܹܐܠܵܗ̇ ܠܹܗ ܡܘܼܚܲܒܢܵܝܗܝ؛ ܐܸܠܵܐ ܒܫܸܫ̈ܠܵܬܵܐ ܕܥܲܡܛܵܢܵܐ ܪܘܼܦܝܵܝܠܹܗ ܒܕܘܼܟܵܢܹ̈ܐ ܕܠܹܐܠܬܸܚ؛ ܘܣܘܼܦܝܵܝܠܹܗ ܕܦܵܝܫܝܼ ܢܛܝܼܪܹܐ ܠܕܝܼܘܵܢ؛ 5ܘܠܥܵܠܡܵܐ ܩܵܕܝܼܡܝܼ ܠܵܐ ܐ݇ܬܹܐܠܵܗ̇ ܠܹܗ ܡܘܼܚܲܒܢܹܗ؛ ܐܸܠܵܐ ܠܢܘܿܚ ܕܬܡܵܢܝܵܐ؛ ܟܵܪܘܿܙܵܐ ܕܟܹܐܢܘܼܬܵܐ؛ ܢܛܪܹܗ؛ ܟܲܕ ܛܵܘܦܵܢܵܐ ܥܲܠ ܥܵܠܡܵܐ ܕܟܵܦܘܿܪܹ̈ܐ ܡܘܼܬ݇ܝܹܠܹܗ؛ 6ܘܠܡܕܝܼܢܵܬܹ̈ܐ ܕܣܕܘܿܡ ܘܕܥܵܡܘܿܪܵܐ ܥܒܼܸܕܠܹܗ ܩܸܛܡܵܐ؛ ܘܒܡܲܚܕܲܪܬܵܐ ܥܒܼܝܼܕܵܝܠܹܗ ܓܘܼܢܵܗܟܵܪ؛ ܟܲܕ ܡܘܼܬܒܼܵܝܠܹܗ ܠܛܘܼܦ̮ܣܵܐ ܠܟܵܦܘܿܪܹ̈ܐ ܕܝܼܢܵܐ ܗܕܝܼܪܹܐ ܕܗܵܘܝܼ؛ 7ܐܘܼܦ ܠܠܘܿܛ ܟܹܐܢܵܐ؛ ܕܦܵܝܸܫ ܗَܘܵܐ ܩܘܼܪܦܸܚܵܐ ܡ̣ܢ ܚܕܵܪܵܐ ܕܒܛܲܢܦܘܼܬܵܐ ܕܐܲܢܹܐ ܕܕܠܵܐ ܢܵܡܘܿܣܵܐ ܗَܘܵܘ؛ ܦܘܼܨܹܐܠܹܗ؛ 8ܣܵܒܵܒ ܒܚܙܵܝܵܐ ܘܒܫܡܲܥܝܵܐ؛ ܟܲܕ ܥܵܡܸܪ ܗَܘܵܐ ܗ̇ܘ ܟܹܐܢܵܐ ܒܓܵܘܵܝܗܝ؛ ܝܵܘܡܵܐ ܠܓܵܢܹܗ ܙܲܕܝܼܩܬܵܐ ܒܦܘܼܠܚܵܢܹ̈ܐ ܕܠܵܐ ܢܵܡܘܿܣܵܐ ܟܹܐ ܓ̰ܲܢܓ̰ܸܪ ܗَܘܵܐ. 9ܟܹܐ ܝܵܕܹܥ ܡܵܪܝܵܐ ܕܦܵܪܹܩ ܡ̣ܢ ܓ̰ܘܼܪܵܒܵܐ ܠܐܵܢܝܼ ܕܙܵܕܥܝܼ ܡܸܢܹܗ؛ ܘܠܥܵܘܵܠܹ̈ܐ ܕܢܵܛܸܪ ܠܝܵܘܡܵܐ ܕܕܝܼܘܵܢ ܟܲܕ ܦܝܵܫܵܐ ܓ̰ܘܼܢܓ̰ܸܪܹܐ؛ 10ܐܝܼܢܵܐ ܒܘܼܫ ܙܵܘܕܵܐ ܠܐܵܢܝܼ ܕܒܵܬ݇ܪ ܒܸܣܪܵܐ ܒܫܲܗ݇ܘܲܬܝܵܬܹ̈ܐ ܕܛܲܢܦܘܼܬܵܐ ܚܵܕܪܝܼ؛ ܘܠܡܵܪܘܼܬܵܐ ܡܲܣܠܝܼ. ܩܲܫܕܸܪ̈ܵܢܹܐ؛ ܫܩܝܼܠܹܐ ܒܚܝܼܵܠ ܕܓܵܢܵܝܗܝ؛ ܕܠܹܐ ܪܵܓܕܝܼ ܟܲܕ ܓܵܕܦܝܼ ܠܚܸܩܪܹ̈ܐ؛ 11ܟܲܕ ܡܲܠܲܐܟܹ̈ܐ؛ ܕܒܚܲܝܠܵܐ ܘܒܙܲܪܒ ܒܘܼܫ ܓܘܼܪܹ̈ܐ ܡܵܢܵܝܗܝ؛ ܠܹܐ ܡܲܝܬ݇ܝܼ ܥܲܠܵܝܗܝ ܩܵܕ݇ܡ ܡܵܪܝܵܐ ܕܝܼܘܵܢ ܕܓܘܼܕܵܦܵܐ. 12ܐܝܼܢܵܐ ܐܲܢܹܐ ܐܲܝܟܼ ܚܲܝ̈ܘܵܬܵܐ ܚܲܪ̈ܫܹܐ ܒܟܝܵܢܵܐ ܗ݇ܘܝܼܹܐ ܠܨܲܝܕܵܐ ܘܠܚܪܵܒܼܵܐ؛ ܟܲܕ ܒܐܵܢܝܼ ܕܠܹܐ ܝܵܕܥܝܼ ܒܸܓܕܵܦܵܐ ܝ݇ܢܵܐ؛ ܒܚܪܵܒܼܵܐ ܕܝܼܵܝܗܝ ܒܸܬ ܦܵܝܫܝܼ ܡܘܼܚܪܸܒܹܐ؛ 13ܟܲܕ ܩܵܒܠܝܼ ܥܵܘܠܵܐ ܐܲܝܟܼ ܗܵܩܵܐ ܕܥܵܘܠܵܐ؛ ܕܟܹܐ ܚܵܫܒܼܝܼ ܚܘܿܫܝܼܘܼܬܵܐ ܒܘܼܣܵܡܵܐ ܕܒܐܝܼܡܵܡܵܐ؛ ܠܘܼܟܸܢܹ̈ܐ؛ ܘܡܸܠܝܹ̈ܐ ܡܘܼܡܹ̈ܐ؛ ܕܟܲܕ ܟܹܐ ܡܲܒܣܸܡܝܼ ܓܵܢܵܝܗܝ ܒܡܲܚܠܲܛܝܵܬܵܝ̈ܗܝ؛ ܟܹܐ ܥܵܒܼܕܝܼ ܡܸܫܬܘܼܬܵܐ ܥܲܡܘܟܼܘܿܢ؛ 14ܟܲܕ ܥܲܝܢܹ̈ܐ ܐܝܼܬ ܠܗ݇ܘܿܢ ܡܸܠܝܹܐ ܩܲܗܒܘܼܬܵܐ؛ ܘܕܠܹܐ ܫܵܠܝܼ ܡ̣ܢ ܚܛܝܼܬܵܐ؛ ܟܲܕ ܫܵܕܘܿܠܹܐ ܝ݇ܢܵܐ ܠܓܵܢܵܬܹ̈ܐ ܠܵܐ ܩܘܼܝܹ̈ܐ؛ ܘܠܸܒܵܐ ܕܡܘܼܠܦܵܐ ܒܛܲܡܲܥܟܵܪܘܼܬܵܐ ܐܝܼܬ ܠܗ݇ܘܿܢ؛ ܒܢܘܼܢܹ̈ܐ ܕܠܵܘܛܬܵܐ؛ 15ܕܟܲܕ ܫܒܼܸܩܠܗ݇ܘܿܢ ܐܘܼܪܚܵܐ ܬܪܘܼܨܬܵܐ؛ ܩܠܸܒ̇ܠܗ݇ܘܿܢ؛ ܘܐ݇ܙܸܠܗܘܿܢ ܒܐܘܼܪܚܵܐ ܕܒܸܠܥܵܡ ܒܲܪ ܦܥܘܿܪ؛ ܗ̇ܘ ܕܗܵܩܵܐ ܕܥܵܘܠܵܐ ܡܘܼܚܸܒܠܹܗ. 16ܐܝܼܢܵܐ ܡܲܢܟܼܸܣܵܢܵܐ ܗ݇ܘܹܐܠܵܐ ܠܹܗ ܥܲܠ ܓܢܵܗܹܗ؛ ܟܲܕ ܚܡܵܪܬܵܐ ܠܲܥܠܹܐ ܒܩܵܠܵܐ ܕܒܢܲܝ̈ܢܵܫܵܐ ܗܘܼܡܙܸܡܠܵܗ̇؛ ܘܡܘܼܟܠܹܐܠܵܗ̇ ܠܐܲܗܡܲܩܘܼܬܹܗ ܕܢܒܼܝܼܵܐ. 17ܐܲܢܹܐ ܝ݇ܢܵܐ ܥܲܝܢܵܬܹ̈ܐ ܕܠܵܐ ܡܝܼ̈ܵܐ؛ ܥܢܵܢܹ̈ܐ ܕܡ̣ܢ ܓܵܪܕܵܒܘܼܠܹ̈ܐ ܦܝܵܫܵܐ ܠܘܼܒܠܹܐ؛ ܐܲܢܹܐ ܕܥܲܡܛܵܢܵܐ ܕܚܘܼܒܼܝܵܐ ܢܛܝܼܪܵܐ ܝ݇ܠܹܗ ܐܸܠܵܝܗܝ. 18ܣܵܒܵܒ ܟܲܕ ܗܲܡܙܸܡܝܼ ܚܬܵܪ̈ܝܵܬܹܐ ܕܒܵܛܝܼܠܘܼܬܵܐ؛ ܟܹܐ ܫܵܕܠܝܼ ܒܫܲܗ݇ܘܲܬܝܵܬܹ̈ܐ ܕܒܸܣܪܵܐ؛ ܒܝܼܲܕ ܦܲܚܙܘܼܬܵܐ؛ ܠܐܵܢܝܼ ܕܗܲܪ ܒܸܚܠܵܨܵܐ ܝ݇ܢܵܐ ܡܐܵܢܝܼ ܕܒܚܸܠܛܘܼܢܝܘܼܬܵܐ ܚܵܕܪܝܼ؛ 19ܩܘܼܠܠܹ̈ܐ ܐܵܙܵܕܘܼܬܵܐ ܐܸܠܵܝܗܝ؛ ܟܲܕ ܒܓܵܢܵܝܗܝ ܩܘܼܠܠܹ̈ܐ ܕܚܪܵܒܼܵܐ ܝ݇ܢܵܐ. ܣܵܒܵܒ ܠܗ̇ܘ ܡܸܢܕܝܼ ܕܐ݇ܢܵܫܵܐ ܓܼܠܝܼܒܵܐ ܝ݇ܠܹܗ ܡܸܢܹܗ؛ ܠܐܵܗܵܐ ܐܘܼܦ ܙܘܼܒܛܸܢܵܐ ܝ݇ܠܹܗ. 20ܣܵܒܵܒ ܐܸܢ ܟܲܕ ܚܠܸܨܠܗ݇ܘܿܢ ܡ̣ܢ ܛܲܢܦܘ̈ܵܬܵܐ ܕܥܵܠܡܵܐ ܒܝ݇ܕܹܥܬܵܐ ܕܡܵܪܲܢ ܘܦܵܪܘܿܩܲܢ ܝܼܫܘܿܥ ܡܫܝܼܚܵܐ؛ ܦܵܝܫܝܼ ܚܘܼܪܕܝܼܹܐ ܗܲܪ ܒܐܲܢܹܐ ܡܸܢَܕܪܸܫَ ܘܓܼܠܝܼܒܹܐ؛ ܗ݇ܘܹܐܠܵܗ̇ ܚܲܪܬܵܝܗܝ ܒܘܼܫ ܣܪܝܼܬܵܐ ܡ̣ܢ ܩܵܕ݇ܡܵܝܬܵܐ. 21ܣܵܒܵܒ ܒܘܼܫ ܨܦܵܝܝܼ ܗَܘܵܐ ܐܸܠܵܝܗܝ ܕܠܵܐ ܝܵܕܥܝܼ ܗَܘܵܘ ܠܐܘܼܪܚܵܐ ܕܙܲܕܝܼܩܘܼܬܵܐ؛ ܡ̣ܢ ܕܟܲܕ ܝܕܸܥܠܗܘܿܢ؛ ܕܵܝܪܝܼ ܡ̣ܢ ܦܘܼܩܕܵܢܵܐ ܩܲܕܝܼܫܵܐ ܕܦܸܫܠܹܗ ܣܘܼܦܝܵܐ ܐܸܠܵܝܗܝ. 22ܐܝܼܢܵܐ ܩܘܼܘܸܡܠܵܗ̇ ܐܸܠܵܝܗܝ ܕܡ̣ܢ ܡܵܣܵܠܵܐ ܫܲܪܝܼܪܵܐ؛ ܟܲܠܒܵܐ ܒܸܕܝܵܪܵܐ ܠܓܸܣܝܼܬܹܗ؛ ܘܚܙܘܼܪܬܵܐ ܣܚܝܼܬܵܐ ܠܓܲܪܡܲܠܬܵܐ ܕܛܝܼܢܵܐ.