1ܐܵܗܵܐ ܡܘܼܚܸܒ̈ܝܼ؛ ܐܸܓܲܪܬܵܐ ܕܬܲܪ̈ܬܹܝ ܐܵܕܝܼܵܐ ܕܒܸܟܬܵܒܼܵܐ ܝ݇ܘܸܢ ܐܸܠܵܘܟܼܘܿܢ؛ ܐܲܢܹܐ ܕܒܝܼܵܝܗܝ ܡܲܪܥܘܼܫܹܐ ܝ݇ܘܸܢ ܒܕܟܼܵܪܵܐ ܠܚܝܼܵܠܵܘܟܼܘܿܢ ܬܲܡܝܼܡܵܐ؛ 2ܕܕܵܟܼܪܝܼܬܘܿܢ ܠܗܹܡܸܙܡܵܢܹ̈ܐ ܕܩܵܕ݇ܡܵܝܬܵܐ ܦܸܫܠܗ݇ܘܿܢ ܐ݇ܡܝܼܪܹܐ ܡ̣ܢ ܢܒܼܝܼܹ̈ܐ ܩܲܕܝܼܫܹ̈ܐ؛ ܘܠܦܘܼܩܕܵܢܹ̈ܐ ܕܡܵܪܲܢ ܘܦܵܪܘܿܩܲܢ ܒܝܼܲܕ ܫܠܝܼܚܹ̈ܐ ܕܝܼܵܘܟܼܘܿܢ؛ 3ܟܲܕ ܐܵܗܵܐ ܩܵܕ݇ܡܵܝܬܵܐ ܝܵܕܥܝܼܬܘܿܢ؛ ܕܒܸܬ ܐܵܬܝܼ ܒܚܲܪܬܵܐ ܕܝܵܘܡܵܢܹܐ ܡܲܣܚܸܪ̈ܵܢܹܐ ܒܡܲܣܚܵܪܘܼܬܵܐ؛ ܐܲܝܟܼ ܫܲܗ݇ܘܲܬܝܵܬܵܝ̈ܗܝ ܚܵܕܪܝܼ؛ 4ܘܒܸܬ ܐܵܡܪܝܼ؛ ܐܲܝܟܵܐ ܝ݇ܠܹܗ ܩܵܘܠܵܐ ܕܐ݇ܬܵܝܬܹܗ؛ ܣܵܒܵܒ ܡ̣ܢ ܕܟܲܕ ܒܵܒܵܘ̈ܵܬܲܢ ܕܡܸܟܼܠܗ݇ܘܿܢ؛ ܟܠ ܡܸܢܕܝܼ ܦܝܵܫܵܐ ܝ݇ܠܹܗ ܐܲܝܟܼ ܡ̣ܢ ܫܘܼܪܵܝܵܐ ܕܒܪܝܼܬܵܐ؛ 5ܣܵܒܵܒ ܕܛܘܼܫܝܼܬܵܐ ܝ݇ܠܵܗ̇ ܡܸܢܵܝܗܝ ܐܵܗܵܐ ܒܪܸܙܵܝܵܝܗܝ؛ ܕܫܡܲܝܹ̈ܐ ܐܝܼܬ ܗَܘܵܘ ܡ̣ܢ ܩܵܕ݇ܡܵܝܬܵܐ؛ ܘܐܲܪܥܵܐ ܕܡ̣ܢ ܡܝܼ̈ܵܐ ܘܒܝܼܲܕ ܡܝܼ̈ܵܐ ܟܠܹܐܠܵܗ̇؛ ܒܗܹܡܸܙܡܵܢ ܕܐܲܠܵܗܵܐ؛ 6ܐܲܢܹܐ ܕܒܐܝܼܕܵܬܵܝ̈ܗܝ ܥܵܠܡܵܐ ܕܗ̇ܝܓܵܗ ܛܒܸܥܠܹܗ ܒܡܝܼ̈ܵܐ؛ ܘܬܠܸܩܠܹܗ. 7ܐܝܼܢܵܐ ܫܡܲܝܹ̈ܐ ܕܐܵܕܝܼܵܐ؛ ܘܐܲܪܥܵܐ؛ ܗܲܪ ܒܗ̇ܝ ܗܹܡܸܙܡܵܢ ܚܘܼܡܝܹܐ ܝ݇ܢܵܐ ܠܢܘܼܪܵܐ؛ ܟܲܕ ܦܝܵܫܵܐ ܝ݇ܢܵܐ ܢܛܝܼܪܹܐ ܠܝܵܘܡܵܐ ܕܕܝܼܘܵܢ ܘܕܲܐܒܼܕܵܢܵܐ ܕܒܢܲܝ̈ܢܵܫܵܐ ܟܵܦܘܿܪܹ̈ܐ. 8ܐܝܼܢܵܐ ܐܵܗܵܐ ܚܕܵܐ ܠܵܐ ܦܵܝܫܵܐ ܛܘܼܫܝܼܬܵܐ ܡܸܢܵܘܟܼܘܿܢ؛ ܡܘܼܚܸܒ̈ܝܼ؛ ܕܚܲܕ݇ ܝܵܘܡܵܐ ܠܡܵܪܝܵܐ ܐܲܝܟܼ ܐܲܠܦܵܐ ܫܸܢܹ̈ܐ ܝ݇ܠܹܗ؛ ܘܐܲܠܦܵܐ ܫܸܢܹ̈ܐ ܐܲܝܟܼ ܚܲܕ݇ ܝܵܘܡܵܐ. 9ܠܹܐ ܥܲܪܩܸܠ ܡܵܪܝܵܐ ܒܩܵܘܠܘܼ̈ܗܝ؛ ܐܲܝܟܼ ܕܐ݇ܢܵܫܹ̈ܐ ܥܘܼܪܩܵܠܵܐ ܟܹܐ ܚܵܫܒܼܝܼ؛ ܐܸܠܵܐ ܟܹܐ ܡܲܪܝܸܟܼ ܒܹܢܹܗ ܥܲܠܵܘܟܼܘܿܢ؛ ܟܲܕ ܠܹܐ ܒܵܣܡܵܐ ܠܹܗ ܕܐ݇ܢܵܫܵܐ ܬܵܠܸܩ؛ ܐܸܠܵܐ ܕܟܠ ܐ݇ܢܵܫܵܐ ܠܬܝܵܒܼܘܼܬܵܐ ܐܵܬܹܐ. 10ܐܝܼܢܵܐ ܒܹܐܬܵܝܵܐ ܝ݇ܠܹܗ ܝܵܘܡܹܗ ܕܡܵܪܝܵܐ ܐܲܝܟܼ ܓܹܢܵܒܼܵܐ ܒܠܲܝܠܹܐ؛ ܗ̇ܘ ܕܒܝܼܹܗ ܫܡܲܝܹ̈ܐ ܒܩܵܠܵܐ ܓܘܼܪܵܐ ܒܸܬ ܥܵܒܼܪܝܼ؛ ܘܐܸܣܛܘܼܟܼܣܹ̈ܐ ܟܲܕ ܒܸܩܝܵܕܵܐ ܒܸܬ ܦܵܝܫܝܼ ܫܸܪܝܹܐ؛ ܘܐܲܪܥܵܐ ܘܦܘܼܠܚܵܢܹ̈ܐ ܕܒܝܼܵܗ̇ ܒܸܬ ܝܵܩܕܝܼ. 11ܒܲܣ ܣܵܒܵܒ ܐܲܢܹܐ ܟܠܵܝܗܝ ܒܸܬ ܦܵܝܫܝܼ ܫܸܪܝܹܐ؛ ܕܵܐܟܼܝܼ ܐ݇ܢܵܫܹ̈ܐ ܘܵܓ̰ܸܒ ܝܼܠܵܗ̇ ܕܗܵܘܹܝܬܘܿܢ؛ ܒܸܚܕܵܪܹ̈ܐ ܩܲܕܝܼܫܹ̈ܐ؛ ܘܒܕܸܚܠܲܬ ܐܲܠܵܗܵܐ؛ 12ܟܲܕ ܣܵܦܪܝܼܬܘܿܢ ܘܫܲܗَܘܸܬܝܼܬܘܿܢ ܠܐَܬܵܝܬܵܐ ܕܝܵܘܡܹܗ ܕܐܲܠܵܗܵܐ؛ ܗ̇ܘ ܕܒܝܼܹܗ ܫܡܲܝܹ̈ܐ ܟܲܕ ܝܵܩܕܝܼ ܒܸܬ ܦܵܝܫܝܼ ܫܸܪܝܹܐ؛ ܘܐܸܣܛܘܼܟܼܣܹ̈ܐ ܟܲܕ ܒܸܩܝܵܕܵܐ ܒܸܬ ܦܵܪܫܝܼ؛ 13ܐܝܼܢܵܐ ܠܫܡܲܝܹ̈ܐ ܚܵܕ݇ܬܹ̈ܐ ܘܠܲܐܪܥܵܐ ܚܲܕܬܵܐ؛ ܐܲܝܟܼ ܩܵܘܠܘܼܗܝ؛ ܒܸܣܦܵܪܵܐ ܝܘܵܚ؛ ܐܵܢܝܼ ܕܒܝܼܵܝܗܝ ܙܲܕܝܼܩܘܼܬܵܐ ܒܸܥܡܵܪܵܐ ܝ݇ܠܵܗ̇. 14ܣܵܒܵܒ ܕܐܵܗܵܐ؛ ܡܘܼܚܸܒ̈ܝܼ؛ ܟܲܕ ܠܐܲܢܹܐ ܒܸܣܦܵܪܵܐ ܝ݇ܬܘܿܢ؛ ܐ݇ܟܼܘܿܠܘܿܢ ܚܲܡ ܕܕܠܵܐ ܡܘܼܡܵܐ؛ ܘܕܠܵܐ ܠܵܘܡܵܐ؛ ܐܸܠܹܗ ܦܵܝܫܝܼܬܘܿܢ ܡܫ݇ܟ̰ܝܼܚܹܐ ܒܫܠܵܡܵܐ. 15ܘܡܲܪܝܲܟܼܬܵܐ ܕܒܹܢܹܗ ܕܡܵܪܲܢ ܠܦܘܼܪܩܵܢܵܐ ܚܲܫܒܸܢܝܼܬܘܿܢ ܠܵܗ̇؛ ܕܵܐܟܼܝܼ ܕܐܘܼܦ ܐܵܚܘܿܢܲܢ ܡܘܼܚܸܒܵܐ ܦܵܘܠܘܿܣ؛ ܐܲܝܟܼ ܥܵܩܸܠܕܵܪܘܼܬܵܐ ܕܦܸܫܠܵܗ̇ ܝܸܗܒܼܸܠܬܵܐ ܐܸܠܹܗ ܟܬܸܒܼܠܹܗ ܐܸܠܵܘܟܼܘܿܢ؛ 16ܕܵܐܟܼܝܼ ܕܐܘܼܦ ܒܟܠܵܝܗܝ ܐܸܓܲܪ̈ܝܵܬܹܗ ܗܘܼܡܙܸܡܠܹܗ ܒܝܼܵܝܗܝ ܥܲܠ ܕܐܲܢܹܐ؛ ܐܵܢܝܼ ܕܐܝܼܬ ܓܵܘܵܝܗܝ ܡܸܢܕܝܼ ܥܲܣܩܵܐ ܠܦܲܪܡܵܝܬܵܐ؛ ܕܐܵܢܝܼ ܕܕܠܵܐ ܝܕܹܥܬܵܐ ܝ݇ܢܵܐ ܘܠܵܐ ܩܘܼܝܹ̈ܐ ܡܲܦܟ̰ܘܼܠܵܝܗܝ ܝ݇ܢܵܐ؛ ܐܲܝܟܼ ܕܐܘܼܦ ܠܟܬܵܒܹ̈ܐ ܐ݇ܚܹܪ̈݇ܢܹܐ؛ ܠܬܠܵܩܵܐ ܕܓܵܢܵܝܗܝ. 17ܒܲܣ ܐܲܚܬܘܿܢ؛ ܡܘܼܚܸܒ̈ܝܼ؛ ܟܲܕ ܩܵܕ݇ܡܵܝܬܵܐ ܟܹܐ ܝܵܕܥܝܼܬܘܿܢ (ܠܐܲܢܹܐ)؛ ܢܛܘܿܪܘܿܢ ܓܵܢܵܘܟܼܘܿܢ؛ ܠܵܐ ܗ݇ܘܹܐ ܕܟܲܕ ܦܵܝܫܝܼܬܘܿܢ ܠܘܼܒܠܹܐ ܒܵܬ݇ܪ ܚܸܠܛܘܼܢܝܘܼܬܵܐ ܕܐܵܢܝܼ ܕܕܠܵܐ ܢܵܡܘܿܣܵܐ ܝ݇ܢܵܐ؛ ܢܵܦܠܝܼܬܘܿܢ ܡ̣ܢ ܩܘܼܝܘܼܬܵܘܟܼܘܿܢ. 18ܐܝܼܢܵܐ ܓܲܪܘܸܣܘܿܢ ܒܫܵܦܵܩܲܬ ܘܒܝܕܹܥܬܵܐ ܕܡܵܪܲܢ ܘܦܵܪܘܿܩܲܢ ܝܼܫܘܿܥ ܡܫܝܼܚܵܐ؛ ܕܐܸܠܹܗ ܬܸܫܒܘܿܚܬܵܐ ܐܘܼܦ ܐܵܕܝܼܵܐ ܘܗܲܠ ܝܵܘܡܵܐ ܕܥܵܠܲܡ؛ ܐܵܡܹܝܢ.