1ܦܵܘܠܘܿܣ؛ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܒܪܸܙܵܝܹܗ ܕܐܲܠܵܗܵܐ؛ ܐܲܝܟܼ ܩܵܘܠܵܐ ܕܚܲܝܹ̈ܐ ܕܒܝܼܫܘܿܥ؛ 2ܠܛܝܼܡܵܬܹܐܘܿܣ ܒܪܘܼܢܝܼ ܡܘܼܚܸܒܵܐ؛ ܫܵܦܵܩܲܬ ܘܪ̈ܲܚܡܹܐ ܘܫܠܵܡܵܐ؛ ܡ̣ܢ ܐܲܠܵܗܵܐ ܒܵܒܵܐ ܘܡܵܪܲܢ ܝܑܼܫܘܿܥ ܡܫܝܼܚܵܐ. 3ܫܵܟܘܿܪܹܐ ܝܘܸܢ ܠܐܲܠܵܗܵܐ؛ ܗ̇ܘ ܕܐܸܠܹܗ ܒܸܥܒܼܵܕܵܐ ܝܘܸܢ ܚܸܠܡܲܬ ܡ̣ܢ ܐܲܒܼܵܗܵܬܝܼ̈ ܒܐܸܢܝܲܬ ܕܟܼܝܼܬܵܐ؛ ܕܒܕܵܝܸܡܘܼܬܵܐ ܒܸܕܟܼܵܪܘܼܟܼ ܝܼܘܸܢ ܒܨܠܵܘܵܬܝܼ̈ ܕܠܲܝܠܹܐ ܘܕܐܝܼܡܵܡܵܐ. 4ܘܫܘܼܗ݇ܘܸܬܵܐ ܝܘܸܢ ܠܸܚܙܵܝܘܼܟܼ؛ ܟܲܕ ܒܸܕܟܼܵܪܵܐ ܕܸܡܥܹ̈ܐ ܕܥܲܝܢܘܼ̈ܟܼ؛ ܕܦܵܝܫܸܢ ܡܸܠܝܵܐ ܚܲܕܘܼܬܵܐ؛ 5ܒܕܟܼܵܪܵܐ ܕܐܝܼܬ ܠܝܼ ܥܲܠ ܗܲܝܡܵܢܘܼܬܵܐ ܫܲܪܝܼܪܬܵܐ ܕܒܝܼܘܼܟܼ؛ ܗ̇ܝ ܕܫܪܹܠܵܐ ܩܵܕ݇ܡܵܝܬܵܐ ܒܝܸܡܵܐ ܕܝܸܡܘܼܟܼ ܠܘܿܐܝܼܣ؛ ܘܒܝܸܡܘܼܟܼ ܐܹܘܢܝܼܩܹܐ؛ ܘܚܵܬܸܪܓ̰ܲܡܥ ܝܼܘܸܢ ܕܐܘܼܦ ܒܝܼܘܼܟܼ. 6ܣܵܒܵܒ ܕܐܵܗܵܐ ܡܲܕܟܼܘܼܪܘܼܟܼ ܝܼܘܸܢ ܕܡܲܪܥܸܫܸܬ ܚܲܠܥܲܬ ܕܐܲܠܵܗܵܐ؛ ܗ̇ܝ ܕܐܝܼܬ ܒܝܼܘܼܟܼ ܒܝܼܸܕ ܡܲܬܲܒܼܬܵܐ ܕܐܝܼܕܝܼ. 7ܣܵܒܵܒ ܠܵܐ ܝܸܗ݇ܒܼܵܚܠܹܐ ܐܲܠܵܗܵܐ ܪܘܼܚܵܐ ܕܙܕܘܼܥܬܵܐ؛ ܐܸܠܵܐ ܕܚܲܝܠܵܐ ܘܚܘܼܒܵܐ ܘܕܬܲܥܠܲܡܬܵܐ. 8ܒܲܣ ܠܵܐ ܢܵܚܦܸܬ ܒܣܵܗܕܘܼܬܹܗ ܕܡܵܪܲܢ؛ ܐܘܼܦ ܠܵܐ ܒܝܼܝܼ ܐܲܣܝܼܪܹܗ؛ ܐܸܠܵܐ ܩܵܒܸ݁ܠ ܒܝܼܫܵܬܹ̈ܐ ܥܲܡ ܐܹܘܵܢܓܵܠܝܼܘܿܢ ܒܚܲܝܠܵܐ ܕܐܲܠܵܗܵܐ؛ 9ܗ̇ܘ ܕܦܘܼܪܩܵܚܠܹܐ ܘܩܸܪܝܵܚܠܹܐ ܒܩܪܵܝܬܵܐ ܩܲܕܝܼܫܬܵܐ؛ ܠܵܐ ܐܲܝܟܼ ܦܘܼ̈ܠܚܵܢܲܢ؛ ܐܸܠܵܐ ܐܲܝܟܼ ܪܸܙܵܝܹܗ ܘܫܵܦܵܩܲܬܹܗ؛ ܗ̇ܝ ܕܦܸܫܠܵܗ̇ ܝܘܼܗَܒܼܸܠܬܵܐ ܐܸܠܲܢ ܒܝܼܫܘܿܥ ܡܫܝܼܚܵܐ ܡ̣ܢ ܩܵܕ݇ܡ ܙܲܒܼܢܵܐ ܕܥܵܠܡܹ̈ܐ؛ 10ܐܝܼܢܵܐ ܦܸܫܠܵܗ̇ ܓܠܝܼܬܵܐ ܐܵܕܝܼܵܐ ܒܓܸܠܝܵܢܹܗ ܕܦܵܪܘܿܩܲܢ ܝܼܫܘܿܥ ܡܫܝܼܚܵܐ؛ ܕܒܘܼܛܸܠܹܐ ܠܡܵܘܬܵܐ؛ ܘܡܘܼܚܙܹܐ ܠܹܗ ܚܲܝܹ̈ܐ ܘܠܵܐ ܚܪܵܒܼܬܵܐ ܒܐܹܘܵܢܓܵܠܝܼܘܿܢ؛ 11ܗ̇ܘ ܕܦܸܫܠܝܼ ܡܘܼܬܒܼܵܐ ܒܝܼܹܗ ܐܵܢܵܐ ܟܵܪܘܿܙܵܐ؛ ܘܫܠܝܼܚܵܐ؛ ܘܡܲܠܦܵܢܵܐ ܕܛܵܝܸܦܹ̈ܐ. 12ܣܵܒܵܒ ܕܐܵܗܵܐ ܩܵܒܘܿܠܹܐ ܝܘܸܢ ܐܲܢܹܐ ܡܸܢܕܝܼܵܢܹ̈ܐ؛ ܐܝܼܢܵܐ ܠܹܐ ܝܘܸܢ ܒܸܢܚܵܦܵܐ؛ ܣܵܒܵܒ ܒܝܼܕܲܥܝܵܐ ܝܘܸܢ ܒܡܵܢܝܼ ܗܘܼܡܸܢܵܐ ܝܘܸܢ؛ ܘܚܵܬܸܪܓ̰ܲܡܥ ܝܼܘܸܢ ܕܟܹܐ ܡܵܨܹܐ ܠܸܢܛܵܪܵܐ ܩܵܬܝܼ ܗܵܝܡܲܢܬܝܼ ܠܗ̇ܘ ܝܵܘܡܵܐ. 13ܕܒܼܘܿܩ ܠܘܼܟܼ ܛܘܼܦ̮ܣܵܐ ܕܗܹܡܸܙܡܵܢܹ̈ܐ ܨܵܚ ܕܫܡܸܥܠܘܼܟܼ ܡܸܢܝܼ؛ ܒܗܲܝܡܵܢܘܼܬܵܐ ܘܒܚܘܼܒܵܐ ܕܝܼܫܘܿܥ ܡܫܝܼܚܵܐ. 14ܠܗ̇ܝ ܗܵܝܡܲܢܬܵܐ ܨܦܵܝܝܼ ܢܛܘܿܪ ܒܪܘܼܚܵܐ ܕܩܘܼܕܫܵܐ ܕܟܹܐ ܥܵܡܸܪ ܒܝܼܲܢ. 15ܒܝܼܕܲܥܬܵܐ ܝܘܸܬ ܐܵܗܵܐ؛ ܕܕܸܪܘܿܢ ܡܸܢܝܼ ܟܠܵܝܗܝ ܐܵܢܝܼ ܕܓܵܘ ܐܵܣܝܼܵܐ؛ ܕܝܼܢܵܐ ܡܸܢܵܝܗܝ ܦܹܘܓܹܠܘܿܣ ܘܗܲܪܡܵܓܹܢܝܼܣ. 16ܝܵܗ݇ܒܸܠ ܡܵܪܲܢ ܪ̈ܲܚܡܹܐ ܠܒܲܝܬܹܗ ܕܐܵܢܹܣܝܼܦܵܪܘܿܣ؛ ܕܪܵܒܵܐ ܓܵܗܹ̈ܐ ܡܘܼܢܝܸܚܸܢܹܐ؛ ܘܒܫܸܫ̈ܠܝܵܬܵܐ ܕܝܸܣܘܼܪ̈ܝܼ ܠܵܐ ܢܚܸܦܠܹܐ؛ 17ܐܸܠܵܐ ܐܘܼܦ ܟܲܕ ܗ݇ܘܹܐܠܹܗ ܒܪܗ݇ܘܿܡܹܐ؛ ܒܚܵܒܵܛܘܼܬܵܐ ܙܵܘܕܵܐ ܛܸܥܠܹܐ ܐܸܠܝܼ ܘܡܘܼܫَܟ̰ܚܸܢܹܐ؛ 18ܝܵܗ݇ܒܸܠ ܠܹܗ ܡܵܪܲܢ ܕܡܵܫَܟ̰ܸܚ ܪ̈ܲܚܡܹܐ ܠܟܸܣ ܡܵܪܲܢ ܒܗ̇ܘ ܝܵܘܡܵܐ؛ ܘܟܡܵܐ ܕܥܒܼܸܕܠܹܗ ܚܸܠܡܲܬ ܐܸܠܝܼ ܓܵܘ ܐܵܦܸܣܘܿܣ؛ ܪܵܒܵܐ ܨܦܵܝܝܼ ܟܹܐ ܝܲܕܥܸܬ.