1ܒܸܣܗܵܕܵܐ ܝܘܸܢ ܐܸܠܘܼܟܼ ܩܵܕ݇ܡ ܐܲܠܵܗܵܐ؛ ܘܡܵܪܲܢ ܝܼܫܘܿܥ ܡܫܝܼܚܵܐ؛ ܗ̇ܘ ܕܝܼܠܹܗ ܗܕܝܼܪܵܐ ܠܸܕܝܵܢܵܐ ܚܵܝܹ̈ܐ ܘܡܝܼܬܹ̈ܐ؛ ܘܒܓܸܠܝܵܢܹܗ ܘܡܲܠܟܘܼܬܹܗ؛ 2ܡܲܟܪܸܙ ܗܹܡܸܙܡܵܢ؛ ܘܟܠܝܼ ܒܚܵܒܵܛܘܼܬܵܐ ܒܙܲܒܼܢܵܐ ܘܕܠܵܐ ܙܲܒܼܢܵܐ؛ ܡܲܢܟܸܣ؛ ܘܬܲܥܠܸܡ؛ ܘܦܲܪܦܸܠ؛ ܒܟܠܵܗ̇ ܡܲܪܝܲܟܼܬܵܐ ܕܒܹܝܢܵܐ ܘܝܘܼܠܦܵܢܵܐ. 3ܣܵܒܵܒ ܒܸܬ ܗܵܘܹܐ ܙܲܒܼܢܵܐ ܕܒܝܘܼܠܦܵܢܵܐ ܨܵܚ ܠܹܐ ܚܵܡܠܝܼ؛ ܐܸܠܵܐ ܐܲܝܟܼ ܫܲܗ݇ܘܲܬܝܵܬܵܝ̈ܗܝ ܒܸܬ ܡܲܙܝܸܕܝܼ ܠܓܵܢܵܝܗܝ ܡܲܠܦܵܢܹ̈ܐ ܒܚܝܵܟܬܵܐ ܕܢܵܬܝܵܬܵܝ̈ܗܝ؛ 4ܘܡ̣ܢ ܣܲܪܲܣܬܘܼܬܵܐ ܒܸܬ ܡܕܸܪܝܼ ܢܵܬܵܝ؛ ܘܠܗܲܩܝܲܬܹ̈ܐ ܒܸܬ ܩܵܠܒ݁ܝܼ. 5ܐܝܼܢܵܐ ܐܲܢ݇ܬ ܗܵܘܸܬ ܪܥܝܼܫܵܐ ܒܟܠ ܡܸܢܕܝܼ؛ ܘܩܵܒܸ݁ܠ ܒܝܼܫܵܬܹ̈ܐ؛ ܘܦܠܘܿܚ ܦܘܼܠܚܵܢܵܐ ܕܡܲܫܚܸܕܵܢܵܐ؛ ܘܚܸܠܡܲܬܘܼܟܼ ܬܲܡܸܡ. 6ܣܵܒܵܒ ܐܵܢܵܐ ܡܐܵܕܝܼܵܐ ܦܝܵܫܵܐ ܝܘܸܢ ܨܘܼܢܸܨܠܵܐ (ܢܘܼܩܵܝܵܐ)؛ ܘܙܲܒܼܢܵܐ ܕܦܵܝܫܸܢ ܫܸܪܝܵܐ ܡܛܹܐܠܹܗ. 7ܐܵܓܼܘܿܢܵܐ ܫܵܦܝܼܪܵܐ ܦܠܝܼܫܵܐ ܝܘܸܢ؛ ܪ̈ܲܗܛܝܼ ܬܘܼܡܸܡܹ̈ܐ ܝܘܸܢ؛ ܗܲܝܡܵܢܘܼܬܝܼ ܢܛܝܼܪܵܐ ܝܘܸܢ. 8ܡܐܵܕܝܼܵܐ ܢܛܝܼܪܵܐ ܝܠܹܗ ܐܸܠܝܼ ܬܵܐܓ̰ ܕܙܲܕܝܼܩܘܼܬܵܐ؛ ܕܒܸܬ ܦܲܪܸܥ ܠܝܼ ܡܵܪܝܼ ܒܗ̇ܘ ܝܵܘܡܵܐ؛ ܗ̇ܘ ܕܝܼܠܹܗ ܕܲܝܵܢܵܐ ܟܹܐܢܵܐ. ܘܠܵܐ ܐܸܠܝܼ ܗܲܪ؛ ܐܸܠܵܐ ܐܘܼܦ ܠܟܠܵܝܗܝ ܕܡܘܼܚܸܒܠܘܿܢ ܠܓܸܠܝܵܢܹܗ. 9ܚܵܒܸܛ ܕܐܵܬܹܬ ܠܟܸܣܠܝܼ ܓ̰ܲܠܕܹܐ؛ 10ܣܵܒܵܒ ܕܕܐܹܡܵܐ ܫܒܼܝܼܩܸܢܹܐ؛ ܟܲܕ ܡܘܼܚܸܒܠܹܐ ܐܵܗܵܐ ܥܵܠܡܵܐ؛ ܘܐَܙܹܠܹܗ ܠܬܹܣܵܠܘܿܢܝܼܩܹܐ؛ ܩܪܝܼܣܦܘܿܣ ܠܓܵܠܵܛܝܼܵܐ؛ ܛܸܛܘܿܣ ܠܕܲܠܡܵܛܝܼܵܐ. 11ܠܘܼܩܵܐ ܝܠܹܗ ܒܢܲܦ̮ܫܹܗ ܥܲܡܝܼ. ܠܡܵܪܩܘܿܣ ܫܩܘܿܠ ܘܡܲܝܬ݇ܝܼ ܠܹܗ ܥܲܡܘܼܟܼ؛ ܣܵܒܵܒ ܡܵܪܹܐ ܦܲܝܕܵܐ ܝܠܹܗ ܐܸܠܝܼ ܠܚܸܠܡܲܬ. 12ܐܝܼܢܵܐ ܠܛܘܼܟܼܝܼܩܘܿܣ ܫܘܼܕܸܪܝܼ ܠܐܵܦܸܣܘܿܣ. 13ܥܵܒܵܝܬܵܐ ܕܫܒܸܩܠܝܼ ܓܵܘ ܛܪܘܿܐܘܿܣ ܠܟܸܣ ܩܵܪܦܘܿܣ؛ ܐܝܼܡܲܢ ܕܐܵܬܸܬ ܡܲܝܬ݇ܝ ܠܵܗ̇؛ ܘܟܬܵܒܼܹ̈ܐ؛ ܒܘܼܫ ܙܵܘܕܵܐ ܓܸܠܕܹ̈ܐ. 14ܐܵܠܹܟܣܲܢܕܪܘܿܣ ܙܲܪܓܵܪ ܪܵܒܵܐ ܒܝܼܫܵܬܹ̈ܐ ܘܡܘܼܚܙܝܼܸܢܹܐ. ܦܲܪܸܥ ܠܹܗ ܡܵܪܲܢ ܐܲܝܟܼ ܦܘܼܠܚܵܢܘܼ̈ܗܝ. 15ܘܐܘܼܦ ܐܲܢ݇ܬ ܗ݇ܘܝܼ ܗܸܫܝܵܪ ܡܸܢܹܗ؛ ܣܵܒܵܒ ܪܵܒܵܐ ܟܸܠܝܵܐ ܝܠܹܗ ܕܲܪܩܘܼܒܼܠ ܕܗܹܡܸܙ̈ܡܵܢܲܢ. 16ܒܝܵܗ݇ܒܲܠܬܵܐ ܕܓ̰ܘܼܘܵܒܝܼ ܩܵܕ݇ܡܵܝܬܵܐ ܠܵܐ ܐ݇ܢܵܫܵܐ ܗ݇ܘܹܐܠܹܗ ܠܟܸܣܠܝܼ؛ ܐܸܠܵܐ ܟܠܵܝܗܝ ܫܒܼܝܼܩܸܢܘܿܢ. ܠܵܐ ܦܵܝܫܵܐ ܚܘܼܫܒܸܢܬܵܐ ܐܸܠܵܝ ܐܵܗܵܐ. 17ܐܝܼܢܵܐ ܡܵܪܝܼ ܟܠܹܐܠܹܗ ܠܟܸܣܠܝܼ؛ ܘܩܲܡ ܚܲܠܸܢܝܼ؛ ܕܒܝܼܝܼ ܟܵܪܘܿܙܘܼܬܵܐ ܦܵܝܫܵܐ ܬܘܼܡܸܡܬܵܐ؛ ܘܕܫܲܡܥܝܼ ܟܠܵܝܗܝ ܛܵܝܸܦܹ̈ܐ؛ ܘܦܸܫܠܝܼ ܦܘܼܨܝܵܐ ܡ̣ܢ ܦܘܼܡܵܐ ܕܐܲܪܝܵܐ. 18ܘܒܸܬ ܦܵܨܹܐ ܠܝܼ ܡܵܪܝܼ ܡ̣ܢ ܟܠ ܦܘܼܠܚܵܢܵܐ ܒܝܼܫܵܐ ܘܒܸܬ ܦܵܪܸܩ ܠܝܼ ܠܡܲܠܟܘܼܬܹܗ ܕܒܫܡܲܝܵܐ؛ ܕܐܸܠܹܗ ܚܸܩܪܵܐ ܠܥܵܠܲܡ ܥܵܠܡܝܼܢ؛ ܐܵܡܹܝܢ. 19ܗܲܒ݇ܠ ܫܠܵܡܵܐ ܠܦܪܝܼܣܩܸܠܵܐ ܘܠܵܐܩܸܠܘܿܣ؛ ܘܠܒܲܝܬܵ ܕܐܵܢܹܣܝܼܦܵܪܘܿܣ. 20ܐܵܪܸܣܛܘܿܣ ܦܸܫܠܹܗ ܓܵܘ ܩܘܿܪܲܢܬܘܿܣ؛ ܐܝܼܢܵܐ ܠܛܪܘܼܦܝܼܡܘܿܣ ܫܒܸܩܠܝܼ ܡܸܪܥܝܵܐ ܓܵܘ ܡܝܼܠܹܛܘܿܣ. 21ܚܵܒܸܛ ܕܐܵܬܸܬ ܡܩܵܕ݇ܡ ܣܸܬܘܵܐ. ܒܝܼܵܗ݇ܒܼܘܼܟܼ ܝܼܠܹܗ ܫܠܵܡܵܐ ܐܹܘܒܘܿܠܘܿܣ؛ ܘܦܘܿܕܸܣ؛ ܘܠܝܼܢܘܿܣ؛ ܘܩܠܵܘܕܝܼܵܐ؛ ܘܟܠܵܝܗܝ ܐܵܚܘܿܢܘܵܬܹ̈ܐ. 23ܡܵܪܲܢ ܝܼܫܘܿܥ ܡܫܝܼܚܵܐ ܥܲܡ ܪܘܼܚܘܼܟܼ. ܫܵܦܵܩܲܬ ܥܲܡܵܘܟܼܘܿܢ؛ ܐܵܡܹܝܢ.