1ܐܝܼܢܵܐ ܐܵܗܵܐ ܗܵܘܸܬ ܒܝܼܕܲܥܝܵܐ؛ ܕܒܝܵܘܡܵܢܹ̈ܐ ܐَܚܵܪ̈ܵܝܹܐ ܒܸܬ ܐܵܬܝܼ ܙܲܒܼܢܹ̈ܐ ܩܸܫܝܹ̈ܐ. 2ܣܵܒܵܒ ܒܸܬ ܗܵܘܝܼ ܒܢܲܝ̈ܢܵܫܵܐ ܡܲܚܸܒܵܢܹ̈ܐ ܕܓܵܢܵܝ؛ ܡܲܚܸܒܵܢܹ̈ܐ ܕܙܘܼܙܵܐ؛ ܫܲܒܼܗܪ̈ܵܢܹܐ؛ ܪ̈ܵܡܹܐ؛ ܓܵܕܦܵܢܹ̈ܐ؛ ܠܐܲܒܼܵܗܵܝ ܠܵܐ ܡܲܨܝܸܬܵܢܹ̈ܐ؛ ܠܵܐ ܛܵܥܢܵܢܹ̈ܐ ܕܡܸܢܬܵܐ؛ ܒܝܼܫܹ̈ܐ؛ 3ܕܠܵܐ ܚܘܼܒܵܐ ܐܲܨܠܵܢܵܝܵܐ؛ ܠܵܐ ܥܵܒܼܕܵܢܹ̈ܐ ܕܨܘܼܠܗ؛ ܡܵܚܝܵܢܹ̈ܐ ܕܕܲܪܗܲܩ؛ ܙܘܼܒܛܸܢܹܐ ܠܫܲܗ݇ܘܲܬܬܵܐ؛ ܟܝܼܘ̈ܝܼܹܐ؛ ܣܵܢܝܵܢܹ̈ܐ ܛܵܒܼܵܬܹ̈ܐ؛ 4ܣܵܦܝܵܢܹ̈ܐ؛ ܡܘܼܠܝܸܙܹ̈ܐ؛ ܚܬܝܼܪܹ̈ܐ؛ ܡܲܚܸܒܵܢܹ̈ܐ ܕܚܘܿܫ̈ܝܼܹܐ ܙܵܘܕܵܐ ܡ̣ܢ ܡܲܚܸܒܵܢܹ̈ܐ ܕܐܲܠܵܗܵܐ؛ 5ܕܐܝܼܬ ܠܗ݇ܘܿܢ ܐܸܣܟܹܝܡܵܐ ܕܕܸܚܠܲܬ ܐܲܠܵܗܵܐ؛ ܐܝܼܢܵܐ ܒܚܲܝܠܘܼܗ̇ ܒܸܟܦܵܪܵܐ ܝܢܵܐ. ܐܵܢܝܼ ܕܗܲܕܟܼܵܐ ܝܢܵܐ ܦܨܝܼ ܡܸܢܵܝܗܝ. 6ܣܵܒܵܒ ܡܸܢܵܝܗܝ ܝܢܵܐ ܐܵܢܝܼ ܕܟܹܐ ܐܵܘܪܝܼ ܓܵܘ ܒܵܬܹ̈ܐ؛ ܘܣܵܠܒܝܼ ܒܲܟܼܬܵܬܹ̈ܐ ܡܘܼܛܥܸܢܹܐ ܒܚܛܝܼܵܬܹ̈ܐ؛ ܘܦܵܝܫܝܼ ܠܘܼܒܠܹܐ ܠܫܲܗ݇ܘܲܬܝܵܬܹ̈ܐ ܬܵܗܵܪܹ̈ܐ ܬܵܗܵܪܹ̈ܐ؛ 7ܕܒܟܠ ܙܲܒܼܢܵܐ ܒܸܠܝܵܦܵܐ ܝܢܵܐ؛ ܘܗܲܪ ܠܹܐ ܡܵܨܝܼ ܠܹܐܬܵܝܵܐ ܠܝܕܹܥܬܵܐ ܕܣܲܪܲܣܬܘܼܬܵܐ. 8ܐܝܼܢܵܐ ܕܵܐܟܼܝܼ ܕܝܲܢܹܣ ܘܝܲܡܒܪܹܣ ܩܸܡܠܗَܘܿܢ ܕܲܪܩܘܼܒܼܠ ܕܡܘܼܫܹܐ؛ ܗܲܕܟܼܵܐ ܐܘܼܦ ܐܲܢܹܐ ܒܸܩܝܵܡܵܐ ܝܢܵܐ ܕܲܪܩܘܼܒܼܠ ܕܣܲܪܲܣܬܘܼܬܵܐ؛ ܐ݇ܢܵܫܹ̈ܐ ܡܘܼܚܪܸܒܼܹܐ ܒܚܝܼܵܠ؛ ܘܡܘܼܣܠܝܼܹܐ ܡ̣ܢ ܗܲܝܡܵܢܘܼܬܵܐ ܓܹܒܵܐ. 9ܐܸܠܵܐ ܠܹܐ ܐܵܬܝܼ ܠܩܵܕ݇ܡܵܝ؛ ܣܵܒܵܒ ܐܲܗܡܲܩܘܼܬܵܝܗܝ ܒܸܬ ܗܵܘܝܵܐ ܝܕܥܝܼܬܵܐ ܠܟܠ ܐ݇ܢܵܫܵܐ؛ ܕܵܐܟܼܝܼ ܕܐܘܼܦ ܕܐܵܢܝܼ ܗَܘܹܐܠܵܗ̇. 10ܐܝܼܢܵܐ ܐܲܢ݇ܬ ܐَܬܹܠܘܼܟܼ ܒܵܬ݇ܪ ܝܘܼܠܦܵܢܝܼ؛ ܘܕܘܼܒܵܪ̈ܝܼ؛ ܘܪܸܙܵܝܝܼ؛ ܘܗܲܝܡܵܢܘܼܬܝܼ؛ ܘܡܲܪܝܲܟܼܬܵܐ ܕܒܹܢܝܼ؛ ܘܚܘܼܒܝܼ؛ ܘܚܡܵܠܬܝܼ؛ 11ܘܛܪܝܼܕܘܼܬܝܼ؛ ܘܚܲܫܝܼ؛ ܐܵܢܝܼ ܕܗ݇ܘܹܠܘܿܢ ܥܲܠܝܼ ܒܐܵܢܛܝܘܿܟܼܝ؛ ܘܒܐܝܼܩܵܢܘܿܢ؛ ܘܒܠܘܼܣܛܪܵܐ؛ ܐܵܢܝܼ ܛܪ̈ܵܕܝܵܬܵܐ ܩܘܼܒܸܠܝܼ؛ ܘܡ̣ܢ ܟܠܵܝܗܝ ܦܘܼܨܝܸܢܹܐ ܡܵܪܝܼ. 12ܘܟܠܵܝܗܝ ܐܵܢܝܼ ܕܒܵܣܡܵܐ ܠܗ݇ܘܿܢ ܒܕܸܚܠܲܬ ܐܲܠܵܗܵܐ ܕܚܲܝܝܼ ܒܝܼܫܘܿܥ ܡܫܝܼܚܵܐ؛ ܟܹܐ ܦܵܝܫܝܼ ܛܪܝܼܕܹܐ. 13ܐܝܼܢܵܐ ܐ݇ܢܵܫܹ̈ܐ ܒܝܼܫܹ̈ܐ ܘܡܲܚܠܸܛܵܢܹ̈ܐ ܒܸܬ ܡܲܙܝܸܕܝܼ ܥܲܠ ܒܝܼܫܘܼܬܵܝ؛ ܟܲܕ ܡܲܚܠܘܼܛܹܐ ܘܡܘܼܚܠܸܛܹܐ. 14ܐܝܼܢܵܐ ܐܲܢ݇ܬ ܥܲܪܩܸܠ ܒܐܵܢܝܼ ܕܝܠܸܦܠܘܼܟܼ ܘܦܸܫܠܘܼܟܼ ܡܘܼܩܘܝܼܵܐ ܒܝܼܵܝܗܝ؛ ܣܵܒܵܒ ܟܹܐ ܝܲܕܥܸܬ ܡ̣ܢ ܡܵܢܝܼ ܝܠܝܼܦܵܐ ܝܘܸܬ؛ 15ܘܕܡ̣ܢ ܝܵܠܕَܘܼܬܘܼܟܼ ܟܬܵܒܼܹ̈ܐ ܩܲܕܝܼܫܹ̈ܐ ܝܕܸܥܝܵܐ ܝܘܸܬ؛ ܕܟܹܐ ܡܵܨܝܼ ܥܵܒܼܕܝܼ ܠܘܼܟܼ ܥܵܩܸܠܕܵܪ ܠܚܲܝܹ̈ܐ؛ ܒܗܲܝܡܵܢܘܼܬܵܐ ܕܒܝܼܫܘܿܥ ܡܫܝܼܚܵܐ. 16ܟܠ ܟܬܵܒܼܵܐ ܕܢܦܝܼܚܵܐ ܡ̣ܢ ܪܘܼܚܵܐ ܕܐܲܠܵܗܵܐ ܡܵܪܹܐ ܦܲܝܕܵܐ ܝܠܹܗ ܠܝܘܼܠܦܵܢܵܐ؛ ܘܠܡܲܢܟܲܣܬܵܐ؛ ܘܠܬܘܼܪܵܨܵܐ؛ ܘܠܬܲܥܠܲܡܬܵܐ ܕܒܟܹܐܢܘܼܬܵܐ؛ 17ܕܗܵܘܹܐ ܟܵܡܝܼܠ ܐ݇ܢܵܫܵܐ ܕܐܲܠܵܗܵܐ؛ ܘܬܲܡܵܡ ܠܟܠ ܦܘܼܠܚܵܢܵܐ ܛܵܒܼܵܐ.