1ܐܝܼܢܵܐ ܐܵܢܵܐ ܦܵܘܠܘܿܣ ܒܓܵܢܝܼ ܦܲܪܦܘܼܠܹܐ ܝܘܸܢ ܒܝܼܵܘܟܼܘܿܢ؛ ܒܢܝܼܚܘܼܬܹܗ ܘܒܡܵܟܝܼܟܼܘܼܬܹܗ ܕܡܫܝܼܚܵܐ؛ ܕܒܦܵܬܵܐ ܟܘܼܦܵܐ ܝܘܸܢ ܠܟܸܣܠܵܘܟܼܘܿܢ؛ ܐܸܠܵܐ ܟܲܕ ܪܚܸܩܵܐ ܝܘܸܢ ܒܸܣܬܵܐ ܝܘܸܢ ܥܲܠܵܘܟܼܘܿܢ. 2ܐܝܼܢܵܐ ܦܲܪܦܘܼܠܹܐ ܝܘܸܢ ܒܝܼܵܘܟܼܘܿܢ؛ ܕܠܵܐ ܐܝܼܡܲܢ ܕܐܵܬܸܢ ܒܲܣܬܸܢ ܒܓ̰ܘܼܪܐܲܬ ܕܒܝܼܵܗ̇ ܒܸܚܫܵܒܼܵܐ ܝܘܸܢ ܕܩܲܫܕܸܪܸܢ ܥܲܠ ܕܐܵܢܝܼ ܕܒܸܚܫܵܒܼܵܐ ܝܢܵܐ ܐܸܠܲܢ ܕܐܲܝܟܼ ܕܒܒܸܣܪܵܐ ܒܸܚܕܵܪܵܐ ܝܘܵܚ. 3ܣܵܒܵܒ ܐܵܦܸܢ ܕܒܒܸܣܪܵܐ ܒܸܚܕܵܪܵܐ ܝܘܵܚ؛ ܐܸܠܵܐ ܠܹܐ ܝܘܵܚ ܒܒܸܣܪܵܐ ܒܸܦܠܵܫܵܐ. 4ܣܵܒܵܒ ܟ̰ܲܟܹ̈ܐ ܕܦܠܵܫܲܢ ܠܹܐ ܝܢܵܐ ܕܒܸܣܪܵܐ؛ ܐܸܠܵܐ ܚܲܝܠܵܢܹܐ ܩܵܕَܡ ܐܲܠܵܗܵܐ ܠܙܲܒܛܲܢܬܵܐ ܕܩܲܠܥܵܬܹ̈ܐ ܥܲܨܝܹ̈ܐ؛ 5ܘܒܸܣܬܵܪܵܐ ܝܘܵܚ ܚܘܼܫܵܒܹ̈ܐ؛ ܘܟܠ ܪܵܘܡܵܐ ܕܡܵܪܸܡ ܓܵܢܹܗ ܕܲܪܩܘܼܒܼܠ ܕܝܕܹܥܬܹܗ ܕܐܲܠܵܗܵܐ؛ ܘܒܸܣܠܵܒܵܐ ܝܘܵܚ ܟܠܵܝܗܝ ܚܝܼܵܠܹ̈ܐ ܠܡܲܨܝܲܬܬܹܗ ܕܡܫܝܼܚܵܐ؛ 6ܘܗܵܕܘܿܪܹܐ ܝܘܵܚ ܠܸܫܩܵܠܵܐ ܬܘܼܥܠܵܐ ܡ̣ܢ ܟܠܵܗܿ ܠܵܐ ܡܲܨܝܲܬܬܵܐ؛ ܐܝܼܡܲܢ ܕܦܵܝܫܵܐ ܬܲܡܵܡ ܡܲܨܝܲܬܬܵܘܟܼܘܿܢ. 7ܒܡܸܢܕܝܼ ܕܦܵܬܵܐ ܒܸܚܝܵܪܵܐ ܝܬܘܿܢ؛ ܐܸܢ ܐَܢܵܫܵܐ ܒܗܹܒܼܝܼ ܝܠܹܗ ܒܓܵܢܹܗ ܕܕܡܫܝܼܚܵܐ ܝܠܹܗ؛ ܐܵܗܵܐ ܚܵܫܸܒܼ ܡܸܢَܕܪܸܫَ ܡ̣ܢ ܓܵܢܹܗ؛ ܕܕܵܐܟܼܝܼ ܕܗ̇ܘ ܕܡܫܝܼܚܵܐ ܝܠܹܗ؛ ܗܲܕܟܼܵܐ ܐܘܼܦ ܐܲܚܢܲܢ. 8ܣܵܒܵܒ ܐܘܼܦ ܡܸܢܕܝܼ ܙܵܘܕܵܐ ܫܬܲܒܼܗܸܪܸܢ ܗَܘܵܐ ܥܲܠ ܗܘܼܟܡܲܢ ܕܝܘܼܗَܒܼܸܠܹܗ ܡܵܪܲܢ ܠܒܢܵܝܬܵܘܟܼܘܿܢ ܘܠܵܐ ܠܬܠܵܚܬܵܘܟܼܘܿܢ؛ ܠܹܐ ܦܵܝܫܸܢ ܡܘܼܢܚܸܦܵܐ. 9ܕܠܵܐ ܦܵܝܫܸܢ ܚܫܝܼܒܼܵܐ ܐܲܝܟܼ ܗ̇ܘ ܕܡܲܙܕܘܼܥܝܹܐ ܡܲܙܕܘܼܥܝܵܘܟܼܘܿܢ ܝܼܘܸܢ ܒܐܸܓܲܪ̈ܝܵܬܝܼ. 10ܣܵܒܵܒ ܕܟܹܐ ܐܵܡܪܝܼ ܕܐܸܓܲܪ̈ܝܵܬܹܐ (ܕܝܼܹܗ) ܝܵܩܘܿܪܹ̈ܐ ܝܢܵܐ ܘܙܲܪ̈ܒܵܢܹܐ؛ ܐܝܼܢܵܐ ܐَܬܵܝܬܹܗ ܕܓܘܼܫܡܵܐ ܙܲܒܘܼܢ ܝܼܠܵܗ̇؛ ܘܗܹܡܸܙܡܵܢܹܗ ܡܘܼܣܠܝܼܬܵܐ. 11ܐܸܠܵܐ ܐܵܗܵܐ ܚܵܫܸܒܼ ܗ̇ܘ ܕܗܲܕܟܼܵܐ؛ ܕܕܵܐܟܼܝܼ ܕܝܼܘܵܚ ܒܗܹܡܸܙܡܵܢ ܕܐܸܓܲܪܬܲܢ ܟܲܕ ܪܸܚܩܵܐ؛ ܗܲܕܟܼܵܐ ܝܘܵܚ ܐܘܼܦ ܐܝܼܡܲܢ ܕܩܘܼܪܒܵܐ ܝܘܵܚ ܒܦܘܼܠܚܵܢܵܐ. 12ܣܵܒܵܒ ܠܹܐ ܝܘܵܚ ܩܲܫܕܘܼܪܹܐ ܕܚܲܫܒܸܢܵܚ ܝܲܢ ܡܲܕܒܼܸܩܵܚ ܓܵܢܲܢ ܥܲܡ ܕܐܵܢܝܼ ܕܝܼܢܵܐ ܒܸܚܩܵܪܵܐ ܓܵܢܵܝܗܝ؛ ܐܸܠܵܐ ܐܵܢܝܼ؛ ܟܲܕ ܩܲܝܘܼܣܹܐ ܝܢܵܐ ܠܓܵܢܵܝܗܝ ܒܓܵܢܵܝܗܝ؛ ܘܡܲܕܒܼܘܼܩܸܐ ܠܓܵܢܵܝܗܝ ܥܲܡ ܓܵܢܵܝܗܝ؛ ܠܹܐ ܝܢܵܐ ܦܲܪܡܘܼܝܹܐ. 13ܐܝܼܢܵܐ ܐܲܚܢܲܢ ܠܹܐ ܫܬܲܒܼܗܸܪܵܚ ܙܵܘܕܵܐ ܡ̣ܢ ܟܝܼܘܼܠܲܢ؛ ܐܸܠܵܐ ܒܟܝܼܘܼܠܵܐ ܕܬܸܚܘܼܒ ܕܦܘܼܠܹܠܹܗ ܐܸܠܲܢ ܐܲܠܵܗܵܐ ܐܲܝܟܼ ܟܝܼܘܼܠܵܐ؛ ܠܸܡܛܵܝܵܐ ܐܘܼܦ ܗܲܠ ܠܟܸܣܠܵܘܟܼܘܿܢ. 14ܣܵܒܵܒ ܗܲܠ ܠܟܸܣܠܵܘܟܼܘܿܢ ܡܛܹܐܠܲܢ ܒܡܲܫܚܲܕܬܹܗ ܕܡܫܝܼܚܵܐ؛ 15ܘܠܵܐ ܫܬܲܒܼܗܘܼܪܹܐ ܙܵܘܕܵܐ ܡ̣ܢ ܟܝܼܘܼܠܲܢ؛ ܒܓ̰ܵܦܵܐ ܕܐَܚܹܪَ̈ܢܹܐ؛ ܐܸܠܵܐ ܐܝܼܬ ܠܲܢ ܗܹܒܼܝܼ ܕܟܲܕ ܓܲܪܘܸܣܵܐ ܗܲܝܡܵܢܘܼܬܵܘܟܼܘܿܢ؛ ܒܝܼܵܘܟܼܘܿܢ ܒܸܬ ܦܵܝܫܵܚ ܓܘܼܪܘܸܣܹܐ ܐܲܝܟܼ ܟܝܼܘܼܠܲܢ؛ ܠܒܘܼܫܵܝܘܼܬܵܐ؛ 16ܕܡܲܟܪܸܙܵܚ ܐܘܼܦ ܠܗ̇ܘ ܓܹܒܵܐ ܡܸܢܵܘܟܼܘܿܢ؛ ܘܠܵܐ ܠܫܬܲܒܼܗܘܼܪܹܐ ܒܟܝܼܘܼܠܵܐ ܕܐَܚܹܪَ̈ܢܹܐ؛ ܒܐܵܢܝܼ (ܡܸܢܕܝܼܵܢܹ̈ܐ) ܕܝܼܢܵܐ ܗܘܼܕܪܸܐ. 17ܐܝܼܢܵܐ ܗ̇ܘ ܕܫܬܲܒܼܗܸܪ؛ ܒܡܵܪܝܵܐ ܫܬܲܒܼܗܸܪ. 18ܣܵܒܵܒ ܠܹܐ ܝَܠܵܗ̇ ܗ̇ܘ ܕܚܵܩܸܪ ܓܵܢܹܗ ܪܸܕܝܵܐ ܝܠܹܗ؛ ܐܸܠܵܐ ܗ̇ܘ ܕܡܵܪܝܵܐ ܚܵܩܸܪܹܗ.