1ܦܵܘܠܘܿܣ؛ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܒܪܸܙܵܝܹܗ ܕܐܲܠܵܗܵܐ؛ ܘܛܝܼܡܵܬܹܐܘܿܣ ܐܵܚܘܿܢܵܐ. 2ܠܐܵܢܝܼ ܕܐܝܼܬ ܒܩܘܼܠܸܣܘܿܣ؛ ܐܵܚܘܿܢܘܵܬܹ̈ܐ ܩܲܕܝܼܫܹ̈ܐ ܘܡܗܘܼܡܢܹ̈ܐ ܒܡܫܝܼܚܵܐ؛ ܫܠܵܡܵܐ ܥܲܡܵܘܟܼܘܿܢ ܘܫܵܦܵܩܲܬ ܡ̣ܢ ܐܲܠܵܗܵܐ ܒܵܒܲܢ. 3ܫܵܟܘܿܪܹܐ ܝܘܵܚ ܠܐܲܠܵܗܵܐ ܒܵܒܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܒܟܠ ܙܲܒܼܢܵܐ؛ ܘܨܵܠܘܿܝܹܐ ܝܘܿܚ ܡܒܵܕܵܠܵܘܟܼܘܿܢ؛ 4ܡ̣ܢ ܕܫܡܸܥܠܲܢ ܗܲܝܡܵܢܘܼܬܵܘܟܼܘܿܢ ܕܒܝܼܫܘܿܥ ܡܫܝܼܚܵܐ؛ ܘܚܘܼܒܵܘܟܼܘܿܢ ܕܠܟܸܣ ܟܠܵܝܗܝ ܩܲܕܝܼܫܹ̈ܐ؛ 5ܣܵܒܵܒ ܕܗܹܒܼܝܼ ܕܝܼܠܵܗ̇ ܢܛܝܼܪܬܵܐ ܐܸܠܵܘܟܼܘܿܢ ܒܫܡܲܝܵܐ؛ ܗ̇ܝ ܕܡ̣ܢ ܩܵܕ݇ܡܵܝܬܵܐ ܫܡܸܥܠܵܘܟܼܘܿܢ ܒܗܹܡܸܙܡܵܢ ܕܣܲܪܲܣܬܘܼܬܵܐ ܕܐܹܘܵܢܓܵܠܝܼܘܿܢ؛ 6ܗ̇ܘ ܕܐَܬܝܼܵܐ ܝܠܹܗ ܐܸܠܵܘܟܼܘܿܢ؛ ܐܲܝܟܼ ܕܐܘܼܦ ܓܵܘ ܟܠܹܗ ܥܵܠܡܵܐ؛ ܘܒܝܼܵܗ݇ܒܼܵܐ ܝܠܹܗ ܛܥܘܼܢܝܵܬܹ̈ܐ ܘܒܸܙܝܵܕܵܐ ܐܲܝܟܼ ܕܐܘܼܦ ܓܵܘܵܘܟܼܘܿܢ؛ ܡ̣ܢ ܝܵܘܡܵܐ ܕܫܡܸܥܠܵܘܟܼܘܿܢ ܘܝܕܸܥܠܵܘܟܼܘܿܢ ܫܵܦܵܩܲܬ ܕܐܲܠܵܗܵܐ ܒܣܲܪܲܣܬܘܼܬܵܐ؛ 7ܕܵܐܟܼܝܼ ܕܝܠܸܦܠܵܘܟܼܘܿܢ ܡ̣ܢ ܐܲܦܵܦܪܵܐ؛ ܚܲܒܼܪܲܢ ܡܘܼܚܸܒܵܐ ܒܚܸܠܡܲܬ؛ ܗ̇ܘ ܕܝܼܠܹܗ ܒܚܵܬܸܪ ܕܝܼܵܘܟܼܘܿܢ ܚܸܠܡܲܬܟܵܪ ܡܗܘܼܡܢܵܐ ܕܡܫܝܼܚܵܐ؛ 8ܘܗ̇ܘ ܩܲܡ ܡܲܕܸܥ ܠܲܢ ܚܘܼܒܵܘܟܼܘܿܢ ܕܒܪܘܼܚܵܐ. 9ܣܵܒܵܒ ܕܐܵܗܵܐ ܐܘܼܦ ܐܲܚܢܲܢ؛ ܡ̣ܢ ܝܵܘܡܵܐ ܕܫܡܸܥܠܲܢ؛ ܠܹܐ ܝܘܵܚ ܒܸܫܠܵܝܵܐ ܡ̣ܢ ܠܨܵܠܘܿܝܹܐ ܡܒܵܕܵܠܵܘܟܼܘܿܢ؛ ܘܠܸܛܠܵܒܵܐ ܕܗܵܘܝܼܬܘܿܢ ܡܸܠܝܹܐ ܝܕܹܥܬܵܐ ܕܪܸܙܵܝܹܗ؛ ܒܟܠ ܥܵܩܸܠܕܵܪܘܼܬܵܐ ܘܦܲܪܡܵܝܬܵܐ ܪܘܼܚܵܢܵܝܬܵܐ؛ 10ܕܚܵܕܪܝܼܬܘܿܢ ܐܲܝܟܼ ܕܚܵܫܚܵܐ ܠܡܵܪܝܵܐ ܒܟܠܵܗ̇ ܫܦܵܪܬܵܐ؛ ܘܒܟܠܵܝܗܝ ܦܘܼܠܚܵܢܹ̈ܐ ܛܵܒܼܹ̈ܐ ܝܵܗ݇ܒܼܝܼܬܘܿܢ ܛܥܘܿܢܝܵܬܹ̈ܐ؛ ܘܒܸܙܝܵܕܵܐ ܒܝܕܹܥܬܵܐ ܕܐܲܠܵܗܵܐ؛ 11ܘܒܟܠ ܚܲܝܠܵܐ ܦܵܝܫܝܼܬܘܿܢ ܚܘܼܠܸܢܹܐ ܐܲܝܟܼ ܚܲܝܠܵܐ ܕܚܸܩܪܹܗ؛ ܠܟܠ ܚܡܵܠܬܵܐ؛ ܘܠܡܲܪܝܲܟܼܬܵܐ ܕܒܹܢܵܐ ܥܲܡ ܚܲܕܘܼܬܵܐ؛ 12ܘܫܵܟܪܝܼܬܘܿܢ ܠܒܵܒܵܐ؛ ܕܩܲܡ ܡܲܚܫܸܚ ܠܲܢ ܠܣܵܡܵܐ ܕܝܵܪܬܘܼܬܵܐ ܕܩܲܕܝܼܫܹ̈ܐ ܒܒܲܗܪܵܐ؛ 13ܘܦܘܼܪܩܵܚܠܹܗ ܡ̣ܢ ܗܘܼܟܡܹܗ ܕܚܘܼܒܼܝܵܐ؛ ܘܩܲܡ ܫܵܢܹܐ ܠܲܢ ܠܡܲܠܟܘܼܬܵܐ ܕܒܪܘܼܢܹܗ ܡܘܼܚܸܒܵܐ؛ 14ܗ̇ܘ ܕܒܝܼܹܗ ܐܝܼܬ ܠܲܢ ܦܘܼܪܩܵܢܵܐ؛ ܫܒܼܵܩܵܐ ܕܚ̈ܛܵܗܲܢ؛ 15ܗ̇ܘ ܕܝܼܠܹܗ ܕܡܘܼܬܵܐ ܕܐܲܠܵܗܵܐ ܕܠܹܐ ܦܵܝܸܫ ܚܸܙܝܵܐ؛ ܘܒܘܼܟܼܪܵܐ ܕܟܠܵܝܗܝ ܒܸܪ̈ܝܵܬܹܐ؛ 16ܣܵܒܵܒ ܒܝܼܹܗ ܦܸܫܠܹܗ ܒܸܪܝܵܐ ܟܠ ܡܸܢܕܝܼ ܕܒܫܡܲܝܵܐ ܘܒܲܐܪܥܵܐ؛ ܟܠ ܕܦܵܝܸܫ ܚܸܙܝܵܐ ܘܟܠ ܕܠܹܐ ܦܵܝܸܫ ܚܸܙܝܵܐ؛ ܐܸܢ ܬܪ̈ܘܿܢܘܿܣܹܐ؛ ܘܐܸܢ ܡܵܪ̈ܵܘܵܬܹܐ؛ ܘܐܸܢ ܐܲܪ̈ܟܘܿܣ؛ ܘܐܸܢ ܫܘܼܠܛܵܢܹ̈ܐ ܟܠ ܡܸܢܕܝܼ ܒܐܝܼܕܹܗ ܘܐܸܠܹܗ ܦܸܫܠܗَܘܿܢ ܒܸܪܝܹܐ؛ 17ܘܗ̇ܘ ܝܼܠܹܗ ܡ̣ܢ ܩܵܕ݇ܡ ܟܠ؛ ܘܟܠ ܡܸܢܕܝܼ ܒܝܼܹܗ ܟܹܐ ܟܵܠܹܐ. 18ܘܗ̇ܘ ܝܼܠܹܗ ܪܹܫܵܐ ܕܦܲܓܼܪܵܐ؛ ܕܥܹܕܬܵܐ؛ ܕܝܼܠܹܗ ܫܘܼܪܵܝܵܐ؛ ܘܒܘܼܟܼܪܵܐ ܕܡ̣ܢ ܡܝܼܬܹ̈ܐ؛ ܕܗܵܘܹܐ ܗ̇ܘ ܩܵܕ݇ܡܵܝܵܐ ܓܵܘ ܟܠ؛ 19ܣܵܒܵܒ ܕܒܣܸܡܠܵܐ ܠܹܗ (ܒܵܒܵܐ) ܕܒܝܼܹܗ ܟܠܵܗ̇ ܬܲܡܵܡܵܬܘܼܬܵܐ ܠܸܥܡܵܪܵܐ؛ 20ܘܒܐܝܼܕܹܗ ܠܣܲܙܓܘܼܪܹܐ ܥܲܡܹܗ ܠܟܠ ܡܸܢܕܝܼ؛ ܘܫܘܼܢܸܢܹܐ ܒܕܸܡܵܐ ܕܙܩܝܼܦܹܗ ܒܐܝܼܕܹܗ؛ ܒܝܼܹܗ ܗܲܪ؛ ܐܸܢ ܡܸܢܕܝܵܢܹ̈ܐ ܕܒܲܐܪܥܵܐ ܘܐܸܢ ܕܒܫܡܲܝܵܐ. 21ܐܘܼܦ ܐܸܠܵܘܟܼܘܿܢ؛ ܕܩܵܕ݇ܡܵܝܬܵܐ ܢܘܼܟܼܪ̈ܵܝܹܐ ܝܬܘܿܢ ܗ݇ܘܵܘ ܘܕܸܫܡܸܢܹ̈ܐ ܒܚܝܼܵܠܵܘܟܼܘܿܢ ܒܦܘܼܠܚܵܢܵܘ̈ܟܼܘܿܢ ܒܝܼܫܹ̈ܐ؛ ܐܵܕܝܼܵܐ ܩܲܡ ܫܲܢܸܢܵܘܟܼܘܿܢ؛ 22ܒܦܲܓܼܪܵܐ ܕܒܸܣܪܹܗ ܒܝܼܸܕ ܡܵܘܬܵܐ؛ ܕܡܲܩܸܡ ܗ݇ܘܵܐ ܠܵܘܟܼܘܿܢ ܩܵܕ݇ܡܘܼܗܝ ܩܲܕܝܼܫܹ̈ܐ؛ ܕܠܵܐ ܠܵܘܡܵܐ ܘܕܠܵܐ ܡܘܼܡܵܐ؛ 23ܐܸܢ ܡܸܓ̰ܸܕ ܥܲܪܩܸܠܝܼܬܘܿܢ ܒܗܲܝܡܵܢܘܼܬܵܘܟܼܘܿܢ؛ ܟܲܕ ܗܵܘܝܵܐ ܩܘܼܝܼܬܵܐ ܒܸܢܝܲܬܵܘܟܼܘܿܢ؛ ܘܠܵܐ ܦܵܝܫܝܼܬܘܿܢ ܫܥܝܼܫܹܐ ܡ̣ܢ ܗܹܒܼܝܼ ܕܐܹܘܵܢܓܵܠܝܼܘܿܢ ܕܫܡܸܥܠܵܘܟܼܘܿܢ؛ ܕܦܸܫܠܹܗ ܡܘܼܟܪܸܙܵܐ ܒܟܠܵܗ̇ ܒܪܝܼܬܵܐ ܕܬܚܘܿܬ ܫܡܲܝܵܐ؛ ܗ̇ܘ ܕܐܵܢܵܐ ܦܵܘܠܘܿܣ ܗ݇ܘܹܠܝܼ ܚܸܠܡܲܬܟܵܪܘܼܗܝ. 24ܐܵܕܝܼܵܐ ܒܸܚܕܵܝܵܐ ܝܘܸܢ ܒܚܲܫܝܼ̈ ܕܒܚܵܬܸܪܵܘܟܼܘܿܢ؛ ܘܬܲܡܘܼܡܹܐ ܝܘܸܢ ܚܲܣܝܼܪܘܼܬܵܐ ܕܐܘܼܠܨܵܢܹ̈ܐ ܕܡܫܝܼܚܵܐ ܒܒܸܣܪܝܼ؛ ܒܚܵܬܸܪ ܕܦܲܓܼܪܹܗ ܕܝܼܠܹܗ ܥܹܕܬܵܐ. 25ܗ̇ܝ ܕܐܵܢܵܐ ܗ݇ܘܹܠܝܼ ܚܸܠܡܲܬܟܵܪܘܼܗ̇؛ ܐܲܝܟܼ ܡܕܲܒܪܵܢܘܼܬܵܐ ܕܐܲܠܵܗܵܐ ܕܦܸܫܠܵܗ̇ ܝܘܼܗَܒܼܸܠܬܵܐ ܐܸܠܝܼ ܠܟܸܣܠܵܘܟܼܘܿܢ؛ ܕܬܲܡܸܡܸܢ ܗܹܡܸܙܡܵܢ ܕܐܲܠܵܗܵܐ؛ 26ܣܸܪ؛ ܕܝܼܗ݇ܘܵܐ ܟܘܼܣܝܵܐ ܡ̣ܢ ܥܵܠܡܹ̈ܐ ܘܡ̣ܢ ܕܵܘܪܹ̈ܐ؛ ܐܝܼܢܵܐ ܐܵܕܝܼܵܐ ܦܸܫܠܹܗ ܓܸܠܝܵܐ ܠܩܲܕܝܼܫܘܼ̈ܗܝ؛ 27ܠܐܵܢܝܼ ܕܒܣܸܡܠܵܐ ܠܹܗ ܐܲܠܵܗܵܐ ܕܡܲܕܸܥ ܡܘܼܕܝܼ ܝَܠܵܗ̇ ܕܵܘܸܠܬܵܐ ܕܚܸܩܪܹܗ ܕܐܵܗܵܐ ܣܸܪ ܓܵܘ ܛܵܝܸܦܹ̈ܐ؛ ܕܝܼܠܹܗ ܡܫܝܼܚܵܐ ܓܵܘܵܘܟܼܘܿܢ ܗܹܒܼܝܼ ܕܚܸܩܪܵܐ؛ 28ܗ̇ܘ ܕܐܲܚܢܲܢ ܡܲܟܪܘܼܙܹܐ ܝܘܵܚ؛ ܘܒܝܼܵܗ݇ܒܼܵܐ ܝܘܵܚ ܢܲܨܝܼܗܲܬ ܠܟܠ ܒܲܪܢܵܫܵܐ؛ ܘܡܵܠܘܿܦܹܐ ܝܘܵܚ ܠܟܠ ܒܲܪܢܵܫܵܐ ܒܟܠ ܥܵܩܸܠܕܵܪܘܼܬܵܐ؛ ܕܡܲܩܸܡܵܚ ܠܟܠ ܒܲܪܢܵܫܵܐ ܟܵܡܝܼܠ ܒܝܼܫܘܿܥ ܡܫܝܼܚܵܐ. 29ܕܒܵܐܗܵܐ ܐܘܼܦ ܒܹܐܟܼܵܠܵܐ ܝܘܸܢ ܓ̰ܵܦܵܐ؛ ܘܒܸܚܠܵܨܵܐ ܝܘܸܢ ܒܦܠܵܚܬܘܼܗܝ ܕܒܸܦܠܵܚܵܐ ܝَܠܵܗ̇ ܒܝܼܝܼ ܒܚܲܝܠܵܐ.