1ܐܝܼܢܵܐ ܒܸܒܲܥܝܵܐ ܝܘܸܢ ܕܝܲܕܥܝܼܬܘܿܢ ܡܘܼܕܝܼ ܐܵܓܼܘܿܢܵܐ ܐܝܼܬ ܠܝܼ ܡܒܵܕܵܠܵܘܟܼܘܿܢ؛ ܘܡܒܵܕܵܠ ܕܐܵܢܝܼ ܕܝܼܢܵܐ ܓܵܘ ܠܵܕܝܼܩܝܼܵܐ؛ ܘܡܒܵܕܵܠ ܕܐ݇ܚܹܪ̈݇ܢܹܐ ܟܡܐܵ ܕܠܹܐ ܝܢܵܐ ܚܸܙܝܘܼܗ̇ ܦܵܬܝܼ ܒܒܸܣܪܵܐ؛ 2ܕܦܵܝܫܝܼ ܝܘܼܗ݇ܒܹܐ ܠܸܒܵܐ ܠܸܒܵܘܵܬܵܝ̈ܗܝ؛ ܟܲܕ ܩܕܝܼܚܹܐ ܒܚܘܼܒܵܐ؛ ܘܠܟܠܵܗ̇ ܕܵܘܸܠܬܵܐ ܕܗܲܡܲܢܬܵܐ ܬܲܡܵܡ ܕܦܲܪܡܵܝܬܵܐ؛ ܠܝܕܹܥܬܹܗ ܕܣܸܪ ܕܐܲܠܵܗܵܐ ܒܵܒܵܐ ܕܡܫܝܼܚܵܐ؛ 3ܗ̇ܘ ܕܒܝܼܹܗ ܟܘܼܣܝܹܐ ܝܢܵܐ ܟܠܵܝܗܝ ܚܲܙܝܼܢܹ̈ܐ ܕܥܵܩܸܠܕܵܪܘܼܬܵܐ ܘܕܝܕܹܥܬܵܐ. 4ܐܝܼܢܵܐ ܐܵܗܵܐ ܒܹܐܡܵܪܵܐ ܝܘܸܢ؛ ܕܐ݇ܢܵܫܵܐ ܠܵܐ ܗܵܘܹܐ ܡܲܚܠܘܼܛܵܘܟܼܘܿܢ ܒܡܲܗܡܲܢܬܵܐ ܕܗܹܡܸܙܡܵܢܹ̈ܐ. 5ܣܵܒܵܒ ܐܵܦܸܢ ܒܒܸܣܪܵܐ ܪܸܚܩܵܐ ܝܘܸܢ ܡܸܢܵܘܟܼܘܿܢ؛ ܐܸܠܵܐ ܒܪܘܼܚܵܐ ܥܲܡܵܘܟܼܘܿܢ ܝܼܘܸܢ؛ ܘܒܸܚܕܵܝܵܐ ܝܘܸܢ ܕܒܸܚܙܵܝܵܐ ܝܘܸܢ ܪܹܐܙܵܘܟܼܘܿܢ؛ ܘܩܘܼܝܘܼܬܵܐ ܕܗܲܝܡܵܢܘܼܬܵܘܟܼܘܿܢ ܕܒܡܫܝܼܚܵܐ. 6ܒܲܣ ܕܵܐܟܼܝܼ ܕܩܘܼܒܸܠܵܘܟܼܘܿܢ ܠܝܼܫܘܿܥ ܡܫܝܼܚܵܐ ܡܵܪܲܢ؛ ܒܝܼܹܗ ܚܕܘܿܪܘܿܢ؛ 7ܟܲܕ ܡܘܼܩܘܝܼܹܐ ܝܢܵܐ ܥܸܩܪ̈ܵܘܟܼܘܿܢ؛ ܘܦܝܵܫܵܐ ܝܬܘܿܢ ܒܸܢܝܹܐ ܒܝܼܹܗ؛ ܘܦܝܵܫܵܐ ܝܬܘܿܢ ܡܘܼܩܘܝܼܹܐ ܒܗܲܝܡܵܢܘܼܬܵܐ؛ ܕܵܐܟܼܝܼ ܕܦܸܫܠܵܘܟܼܘܿܢ ܡܘܼܠܦܹܐ؛ ܕܒܝܼܵܗ̇ ܙܵܝܕܝܼܬܘܿܢ ܒܫܵܟܲܪܬܵܐ. 8ܗ݇ܘܹܡܘܿܢ ܗܸܫܝܵܪ ܠܵܐ ܗ݇ܘܹܐ ܕܐ݇ܢܵܫܵܐ ܣܵܠܸܒܠܵܘܟܼܘܿܢ ܒܦܝܼܠܵܣܘܿܦܘܼܬܵܐ؛ ܘܒܚܸܠܛܘܼܢܝܘܼܬܵܐ ܒܵܛܝܼܠܬܵܐ؛ ܐܲܝܟܼ ܣܵܦܝܵܢܘܼܬܵܐ ܕܒܢܲܝ̈ܢܵܫܵܐ؛ ܘܐܲܝܟܼ ܐܸܣܛܘܼܟܼܣܹ̈ܐ ܕܥܵܠܡܵܐ؛ ܘܠܵܐ ܐܲܝܟܼ ܡܫܝܼܚܵܐ؛ 9ܣܵܒܵܒ ܕܒܝܼܹܗ ܒܸܥܡܵܪܵܐ ܝَܠܵܗ̇ ܟܠܵܗ̇ ܬܲܡܵܡܵܬܘܼܬܵܐ ܕܐܲܠܵܗܘܼܬܵܐ ܓܘܼܫܡܵܢܵܐܝܼܬܼ؛ 10ܘܒܝܼܹܗ ܐܘܼܦ ܐܲܚܬܘܿܢ ܦܝܵܫܵܐ ܝܬܘܿܢ ܥܒܼܝܼܕܹܐ ܡܸܠܝܹܐ؛ ܗ̇ܘ ܕܝܼܠܹܗ ܪܹܫܵܐ ܕܟܠܵܝܗܝ ܐܲܪ̈ܟܘܿܣ ܘܫܘܼܠܛܵܢܹ̈ܐ. 11ܘܒܝܼܹܗ ܦܸܫܠܵܘܟܼܘܿܢ ܓܙܝܼܪܹܐ ܒܓܙܘܼܪܬܵܐ ܕܠܵܐ ܒܐܝܼܕܵܬܹ̈ܐ؛ ܒܫܵܠܲܚܬܵܐ ܕܦܲܓܼܪܵܐ ܕܒܸܣܪܵܐ؛ ܒܓܙܘܼܪܬܹܗ ܕܡܫܝܼܚܵܐ؛ 12ܘܦܸܫܠܵܘܟܼܘܿܢ ܩܒܼܝܼܪܹܐ ܥܲܡܹܗ ܒܡܲܥܡܘܿܕܝܼܬܵܐ؛ ܕܒܝܼܵܗ̇ ܦܸܫܠܵܘܟܼܘܿܢ ܡܘܼܩܡܹܐ ܥܲܡܹܗ ܒܝܼܸܕ ܗܲܝܡܵܢܘܼܬܵܐ ܒܦܠܵܚܬܵܐ ܕܐܲܠܵܗܵܐ ܕܡܘܼܩܸܡܠܹܗ ܡ̣ܢ ܡܝܼܬܹ̈ܐ. 13ܘܐܸܠܵܘܟܼܘܿܢ ܕܡܝܼܬܹ̈ܐ ܝܬܘܿܢ ܗ݇ܘܵܘ ܒܝܼܸܕ ܓܢܵܗܵܘ̈ܟܼܘܿܢ ܘܥܘܼܪܠܘܼܬܵܐ ܕܒܸܣܪܵܘܟܼܘܿܢ؛ ܩܲܡ ܡܲܚܹܐ ܠܵܘܟܼܘܿܢ ܥܲܡܹܗ؛ ܘܫܒܼܸܩܠܹܗ ܐܸܠܲܢ ܟܠܵܝܗܝ ܓܵܢܵـ̈ܗܲܢ؛ 14ܘܓܪܸܕܠܹܐ ܗܘܼܓ̰ܲܬ ܕܕܵܝܢܲܢ ܕܒܦܘܼܩܵܕܹ̈ܐ ܗ̇ܝ ܕܝܼܗ݇ܘܵܐ ܕܲܪܩܘܼܒܼܠܲܢ؛ ܘܫܩܝܼܠܵܠܹܐ ܡ̣ܢ ܐܘܼܪܚܵܐ؛ ܘܡܸܚܝܵܠܹܐ ܒܙܩܝܼܦܹܗ؛ 15ܘܒܫܵܠܲܚܬܵܐ (ܕܦܲܓܼܪܹܗ) ܓܘܼܠܹܠܹܐ ܠܐܲܪ̈ܟܘܿܣ ܘܠܫܘܼܠܛܵܢܹ̈ܐ ܒܐܲܫܟܵܪܵܐ؛ ܟܲܕ ܓܼܠܝܼܒܵܝܠܹܐ ܒܓܵܢܹܗ. 16ܒܲܣ ܐ݇ܢܵܫܵܐ ܠܵܐ ܕܵܝܸܢ ܐܸܠܵܘܟܼܘܿܢ ܒܐَܟܼܵܠܵܐ ܘܒܫܬܵܝܵܐ؛ ܝܲܢ ܒܵܗ݇ܣ ܕܥܹܐܕܵܐ ܘܕܪܹܫܵܐ ܕܝܲܪ̈ܚܹܐ ܘܕܫܵܒܵܬܹ̈ܐ؛ 17ܐܲܢܹܐ ܕܝܼܢܵܐ ܛܸܠܢܝܼܵܬܹ̈ܐ ܕܐܵܢܝܼ ܕܝܼܢܵܐ ܗܕܝܼܪܹܐ ܠܸܗ݇ܘܵܝܵܐ؛ ܐܝܼܢܵܐ ܦܲܓܼܪܵܐ ܕܡܫܝܼܚܵܐ ܝܠܹܗ. 18ܠܵܐ ܐ݇ܢܵܫܵܐ ܣܵܠܸܒ ܠܵܘܟܼܘܿܢ ܡ̣ܢ ܐܲܢܥܵܡܵܘܟܼܘܿܢ؛ ܒܪܹܙܵܝܹܗ؛ ܒܡܵܟܝܼܟܼܘܼܬܵܐ ܕܚܝܼܵܠ ܘܒܣܓܼܵܕܬܵܐ ܕܡܲܠܲܐܟܼܹ̈ܐ؛ ܟܲܕ ܒܸܟܠܵܝܵܐ ܝܠܹܗ ܥܲܠ ܡܸܢܕܝܼ ܕܠܹܐ ܝܠܹܗ ܚܸܙܝܵܐ؛ ܘܒܒܵܛܝܼܠܘܼܬܵܐ ܒܸܚܬܵܪܵܐ ܝܠܹܗ ܒܝܲܕ ܚܝܼܵܠ ܕܒܸܣܪܹܗ؛ 19ܘܠܹܐ ܝܠܹܗ ܒܸܕܒܼܵܩܵܐ ܪܹܫܵܐ؛ ܕܡܸܢܹܗ ܟܠܹܗ ܦܲܓܼܪܵܐ؛ ܟܲܕ ܦܝܵܫܵܐ ܗܘܼܝܸܪܵܐ ܘܡܘܼܩܘܝܼܵܐ ܡܸܚܕܵܕܹ̈ܐ ܒܓܲܝܹ̈ܐ ܘܒܫܸܪ̈ܝܵܢܹܐ؛ ܓܲܪܘܘܼܣܹܐ ܝܠܹܗ ܓܲܪܘܲܣܬܵܐ ܕܐܲܠܵܗܵܐ. 20ܐܸܢ ܡܸܬܠܵܘܟܼܘܿܢ ܥܲܡ ܡܫܝܼܚܵܐ ܡ̣ܢ ܐܸܣܛܘܼܟܼܣܹ̈ܐ ܕܥܵܠܡܵܐ؛ ܩܵܡܘܿܕܝܼ ܐܲܝܟܼ ܕܒܸܚܵܝܵܐ ܒܥܵܠܡܵܐ ܦܝܵܫܵܐ ܝܬܘܿܢ ܙܲܒܛ ܠܦܘܼܩܵܕܹ̈ܐ؛ 21ܠܵܐ ܩܲܪܒܸܢܸܬ؛ ܘܠܵܐ ܛܵܥܡܸܬ؛ ܘܠܵܐ ܕܵܩܪܸܬ؛ 22ـ ܐܲܢܹܐ ܟܠܵܝܗܝ ܕܝܼܢܵܐ ܠܸܚܪܵܒܼܵܐ ܒܡܲܦܠܲܚܬܵܐـ؛ ܐܲܝܟܼ ܦܘܼܩܵܕܹ̈ܐ ܘܝܘܼܠܦܵܢܹ̈ܐ ܕܒܢܲܝ̈ܢܵܫܵܐ؛ 23ܐܲܝܢܝܼ ܕܟܹܐ ܦܵܝܫܝܼ ܚܸܙܝܹܐ ܐܲܝܟܼ ܕܐܝܼܬ ܒܝܼܵܝܗܝ ܡܸܢܕܝܼ ܕܥܵܩܸܠܕܵܪܘܼܬܵܐ ܒܣܓܼܵܕܬܵܐ ܕܡ̣ܢ ܪܸܙܵܝܵܐ ܘܒܡܵܟܝܼܟܼܘܼܬܵܐ؛ ܘܒܡܲܣܠܵܝܬܵܐ ܕܦܲܓܼܪܵܐ؛ ܐܝܼܢܵܐ ܠܵܐ ܡܸܢܕܝܼ ܡܵܪܹܐ ܛܝܼܡܵܐ ܝܢܵܐ؛ ܠܣܒܲܥܝܵܐ ܕܒܸܣܪܵܐ.