1ܐܵܓܼܵܝܹ̈ܐ؛ ܥܒܼܘܿܕܘܿܢ ܒܵܪܵܒܵܪܘܼܬܵܐ ܘܗܵܩܘܼܬܵܐ ܠܟܸܣ ܪܹ̈ܓܵܘܵܬܵܘܟܼܘܿܢ؛ ܟܲܕ ܗܵܘܝܼܬܘܿܢ ܒܝܼܕܲܥܝܵܐ ܕܐܘܼܦ ܐܸܠܵܘܟܼܘܿܢ ܐܝܼܬ ܡܵܪܵܐ ܒܫܡܲܝܵܐ. 2ܒܨܠܘܿܬܵܐ ܗ݇ܘܹܡܘܿܢ ܕܵܝܸܡ؛ ܘܗܵܘܝܼܬܘܿܢ ܪܥܝܼܫܹܐ ܒܝܼܵܗ̇ ܘܫܵܟܘܿܪܹܐ؛ 3ܐܘܼܦ ܡܒܵܕܵܠ ܕܝܲܢ؛ ܕܐܲܠܵܗܵܐ ܦܵܬܸܚ ܐܸܠܲܢ ܬܲܪܥܵܐ ܠܗܹܡܸܙܡܵܢ؛ ܠܗܲܡܙܘܼܡܹܐ ܣܸܪ ܕܡܫܝܼܚܵܐ؛ ܕܣܵܒܵܒ ܕܝܼܹܗ ܐܲܣܝܼܪܵܐ ܝܘܸܢ؛ 4ܕܥܵܒܼܕܸܢܹܗ ܐܲܫܟܵܪܵܐ ܘܗܲܡܙܸܡܸܢܹܗ ܕܵܐܟܼܝܼ ܕܝܼܠܵܗ̇ ܘܵܓ̰ܸܒ ܐܸܠܝܼ. 5ܒܥܵܩܸܠܕܵܪܘܼܬܵܐ ܚܕܘܿܪܘܿܢ ܠܟܸܣ ܒܲܪ̈ܵܝܹܐ؛ ܘܦܵܪܩܘܿܢ ܦܸܪܣܲܬܵܘܟܼܘܿܢ. 6ܘܗܲܡܙܲܡܬܵܘܟܼܘܿܢ ܒܟܠ ܙܲܒܼܢܵܐ ܗܵܘܝܵܐ ܒܫܵܦܵܩܲܬ؛ ܡܘܼܡܠܸܚܬܵܐ ܒܡܸܠܚܵܐ؛ ܕܝܲܕܥܝܼܬܘܿܢ ܕܵܐܟܼܝܼ ܘܵܓ̰ܸܒ ܝܼܠܵܗ̇ ܐܸܠܵܘܟܼܘܿܢ ܠܡܲܕܘܼܪܹܐ ܓ̰ܘܼܘܵܒ ܠܟܠ ܐ݇ܢܵܫܵܐ. 7ܟܠ ܡܸܢܕܝܼ ܕܠܟܸܣܠܝܼ ܒܸܬ ܡܲܕܸܥ ܠܵܘܟܼܘܿܢ ܛܘܼܟܼܝܼܩܘܿܣ؛ ܐܵܚܘܿܢܵܐ ܡܘܼܚܸܒܵܐ؛ ܘܚܸܠܡܲܬܟܵܪ ܡܗܘܼܡܢܵܐ؛ ܘܪܹܓܵܐ ܥܲܡܝܼ ܒܡܵܪܝܵܐ؛ 8ܗ̇ܘ ܕܫܘܼܕܸܪܝܼ ܠܟܸܣܠܵܘܟܼܘܿܢ ܗܲܪ ܣܵܒܵܒ ܕܐܵܗܵܐ؛ ܕܝܲܕܸܥ ܡܸܢܕܝܼ ܕܠܟܸܣܠܵܘܟܼܘܿܢ؛ ܘܝܵܗ݇ܒܼܸܠ ܠܸܒܵܐ ܠܠܸܒܵܬܵܘ̈ܟܼܘܿܢ؛ 9ܥܲܡ ܐܵܢܹܣܝܼܡܘܿܣ؛ ܐܵܚܘܿܢܵܐ ܡܗܘܼܡܢܵܐ ܘܡܘܼܚܸܒܵܐ؛ ܗ̇ܘ ܕܝܼܠܹܗ ܡܸܢܵܘܟܼܘܿܢ. ܐܵܢܝܼ ܒܸܬ ܡܲܕܥܝܼ ܠܵܘܟܼܘܿܢ ܟܠ ܡܸܢܕܝܼ ܕܠܲܐܟܼܵܐ. 10ܘܒܝܼܵܗ݇ܒܼܵܐ ܝܠܹܗ ܫܠܵܡܵܐ ܐܸܠܵܘܟܼܘܿܢ ܐܵܪܸܣܛܲܪܟܘܿܣ ܝܲܚܣܝܼܪ ܕܥܲܡܝܼ؛ ܘܡܵܪܩܘܿܣ ܒܪܘܼܢܵܐ ܕܥܵܡܘܿܘܹܗ ܕܒܲܪܢܒܼܵܐ؛ ܗ̇ܘ ܕܦܸܫܠܵܘܟܼܘܿܢ ܦܩܝܼܕܹܐ ܒܵܗ݇ܣܹܗ؛ ܐܸܢ ܐܵܬܹܐ ܠܟܸܣܠܵܘܟܼܘܿܢ ܩܵܒ݁ܠܝܼܬܘܿܢ ܠܹܗ؛ 11ܘܝܼܫܘܿܥ ܗ̇ܘ ܕܦܵܝܸܫ ܩܸܪܝܵܐ ܝܘܼܣܛܘܿܣ؛ ܐܲܢܹܐ ܕܝܼܢܵܐ ܡ̣ܢ ܓܙܘܼܪܬܵܐ. ܐܲܢܹܐ ܒܢܲܦ̮ܫܵܝ ܦܵܠܵܚܹ̈ܐ ܝܢܵܐ ܥܲܡܝܼ ܒܡܲܠܟܘܼܬܹܗ ܕܐܲܠܵܗܵܐ؛ ܘܐܲܢܹܐ ܗ݇ܘܹܠܘܿܢ ܐܸܠܝܼ ܝܵܗ݇ܒܲܠܬܵܐ ܕܠܸܒܵܐ. 12ܒܝܼܵܗ݇ܒܼܵܐ ܝܠܹܗ ܫܠܵܡܵܐ ܐܸܠܵܘܟܼܘܿܢ ܐܲܦܵܦܪܵܐ؛ ܗ̇ܘ ܕܝܼܠܹܗ ܡܸܢܵܘܟܼܘܿܢ؛ ܪܹܓܵܐ ܕܡܫܝܼܚܵܐ؛ ܟܲܕ ܒܟܠ ܙܲܒܼܢܵܐ ܒܹܐܟܼܵܠܵܐ ܝܠܹܗ ܓ̰ܵܦܵܐ ܡܒܵܕܵܠܵܘܟܼܘܿܢ ܒܨܠܘܿܬܵܐ؛ ܕܟܵܠܝܼܬܘܿܢ ܟܵܡܝܼ̈ܠܹܐ ܘܬܲܡܵܡ ܒܟܠܹܗ ܪܸܙܵܝܹܐ ܕܐܲܠܵܗܵܐ. 13ܣܵܒܵܒ ܒܸܣܗܵܕܵܐ ܝܘܸܢ ܒܵܗ݇ܣܹܗ؛ ܕܪܵܒܵܐ ܩܲܝܪܲܬ ܐܝܼܬ ܠܹܗ ܥܲܠܵܘܟܼܘܿܢ ܘܥܲܠ ܕܐܵܢܝܼ ܕܝܼܢܵܐ ܓܵܘ ܠܵܕܝܼܩܝܼܵܐ؛ ܘܕܓܵܘ ܐܝܼܪܵܦܘܿܠܝܼܣ. 14ܒܝܼܵܗ݇ܒܼܵܐ ܝܠܹܗ ܫܠܵܡܵܐ ܐܸܠܵܘܟܼܘܿܢ ܠܘܼܩܵܐ؛ ܗܲܟܝܼܡ ܡܘܼܚܸܒܵܐ؛ ܘܕܹܐܡܵܐ. 15ܗܲܒ݇ܠܘܿܢ ܫܠܵܡܵܐ ܠܐܵܚܘܿܢܘܵܬܹ̈ܐ ܕܝܼܢܵܐ ܓܵܘ ܠܵܕܝܼܩܝܼܵܐ؛ ܘܠܢܘܼܡܦܹܐ؛ ܘܠܥܹܕܬܵܐ ܕܓܵܘ ܒܲܝܬܹܗ. 16ܘܐܝܼܡܲܢ ܕܦܵܝܫܵܐ ܩܪܝܼܬܵܐ ܐܵܗܵܐ ܐܸܓܲܪܬܵܐ ܠܟܸܣܠܵܘܟܼܘܿܢ؛ ܥܒܼܘܿܕܘܿܢ ܕܐܘܼܦ ܓܵܘ ܥܹܕܬܵܐ ܕܠܵܕܝܼܩܵܝܹ̈ܐ ܦܵܝܫܵܐ ܩܪܝܼܬܵܐ؛ ܘܗ̇ܝ ܕܡ̣ܢ ܠܵܕܝܼܩܝܼܵܐ ܩܪܹܡܘܿܢ ܠܵܗ̇ ܐܲܚܬܘܿܢ. 17ܘܐَܡܘܿܪܘܼܢ ܠܐܲܪܟܝܼܦܘܿܣ؛ ܗ݇ܘܝܼ ܗܸܫܝܵܪ ܒܚܸܠܡܲܬ؛ ܗ̇ܝ ܕܩܘܼܒܸܠܘܼܟܼ ܒܡܵܪܲܢ؛ ܕܗܵܘܸܬ ܬܲܡܘܼܡܘܼܗ̇. 18ܐܵܗܵܐ ܫܠܵܡܵܐ ܒܐܝܼܕܵܐ ܕܝܼܝܼ ܦܵܘܠܘܿܣ. ܗܵܘܝܼܬܘܿܢ ܒܸܕܟܼܵܪܵܐ ܠܝܸܣܘܼܪ̈ܝܼ. ܫܵܦܵܩܲܬ ܥܲܡܵܘܟܼܘܿܢ؛ ܐܵܡܹܝܢ.