1ܒܲܣ ܐܸܢ ܩܸܡܠܵܘܟܼܘܿܢ ܥܲܡ ܡܫܝܼܚܵܐ؛ ܡܸܢܕܝܼ ܕܠܥܸܠܸܠ ܒܸܥܡܘܿܢ؛ ܐܲܝܟܵܐ ܕܝܼܠܹܗ ܡܫܝܼܚܵܐ؛ ܝܬܝܼܒܼܵܐ ܥܲܠ ܝܲܡܝܼܢܵܐ ܕܐܲܠܵܗܵܐ. 2ܡܸܢܕܝܼ ܕܠܥܸܠܸܠ ܚܫܘܿܒܼܘܿܢ؛ ܘܠܵܐ ܕܒܲܐܪܥܵܐ. 3ܣܵܒܵܒ ܡܸܬܠܵܘܟܼܘܿܢ؛ ܘܚܲܝܵܘ̈ܟܼܘܿܢ ܛܸܫܝܹܐ ܝܢܵܐ ܥܲܡ ܡܫܝܼܚܵܐ ܒܐܲܠܵܗܵܐ. 4ܐܝܼܡܲܢ ܕܡܫܝܼܚܵܐ ܦܵܝܸܫ ܓܸܠܝܵܐ؛ ܗ̇ܘ ܕܝܼܠܹܗ ܚܲܝܲـ̈ܢ؛ ܗ̇ܝܓܵܗ ܐܘܼܦ ܐܲܚܬܘܿܢ ܒܸܬ ܦܵܝܫܝܼܬܘܿܢ ܓܸܠܝܹܐ ܥܲܡܹܗ ܒܚܸܩܪܵܐ. 5ܒܲܣ ܡܲܡܝܸܬܘܿܢ ܗܲܕܵܡܵܘ̈ܟܼܘܿܢ ܕܝܼܢܵܐ ܒܐܲܪܥܵܐ ܙܵܢܝܘܼܬܵܐ؛ ܛܲܢܦܘܼܬܵܐ؛ ܙܵܘܥܹ̈ܐ ܚܲܝܡܹ̈ܐ؛ ܫܲܗ݇ܘܲܬܬܵܐ ܒܝܼܫܬܵܐ؛ ܘܛܲܡܲܥܟܵܪܘܼܬܵܐ؛ ܗ̇ܝ ܕܝܼܠܵܗ̇ ܣܓܼܵܕܬܵܐ ܕܨܵܢܲܡܹ̈ܐ؛ 6ܕܒܣܵܒܵܒ ܕܐܲܢܹܐ ܒܹܐܬܵܝܵܐ ܝَܠܵܗ̇ ܟܲܪܒܹܗ ܕܐܲܠܵܗܵܐ ܥܲܠ ܒܢܘܼܢܹ̈ܐ ܕܠܵܐ ܡܲܨܝܲܬܬܵܐ؛ 7ܘܒܲܐܢܹܐ ܐܘܼܦ ܐܲܚܬܘܿܢ ܚܕܸܪܵܘܟܼܘܿܢ ܩܵܕ݇ܡܵܝܬܵܐ؛ ܟܲܕ ܚܹܝܠܵܘܟܼܘܿܢ ܒܝܼܵܝ. 8ܐܝܼܢܵܐ ܐܵܕܝܼܵܐ ܡܲܢܝܸܚܘܿܢ ܡܸܢܵܘܟܼܘܿܢ ܐܲܢܹܐ ܟܠܵܝܗܝ؛ ܩܲܙܵܒ؛ ܟܲܪܒܵܐ؛ ܒܝܼܫܘܼܬܵܐ؛ ܓܘܼܕܵܦܵܐ؛ ܗܲܡܙܲܡܬܵܐ ܟ̰ܲܦܵܠ ܡ̣ܢ ܦܘܼܡܵܘܟܼܘܿܢ. 9ܘܠܵܐ ܕܵܓܠܝܼܬܘܿܢ ܚܲܕَ ܒܗ̇ܘ ܐ݇ܚܹܪ݇ܢܵܐ؛ ܟܲܕ ܫܘܼܠܸܚܠܵܘܟܼܘܿܢ ܠܒܲܪܢܵܫܵܐ ܥܲܬܝܼܩܵܐ ܥܲܡ ܟܠܵܝܗܝ ܦܘܼܠܚܵܢܘܼ̈ܗܝ؛ 10ܘܠܒܼܸܫܠܵܘܟܼܘܿܢ ܚܵܕ݇ܬܵܐ؛ ܕܒܸܗܘܵܝܵܐ ܝܠܹܗ ܚܘܼܕܸܬܵܐ ܒܝܕܹܥܬܵܐ ܒܕܡܘܼܬܵܐ ܕܒܵܪܝܵܢܵܐ ܐܸܠܹܗ؛ 11ܐܲܝܟܵܐ ܕܠܲܝܬ ܝܗ݇ܘܼܕܵܝܵܐ ܘܐܲܪܡܵܝܵܐ؛ ܘܠܵܐ ܓܙܘܼܪܬܵܐ ܘܥܘܼܪܠܘܼܬܵܐ؛ ܘܠܵܐ ܐܸܣܩܹܛܹܐ ܘܒܲܪܒܪܵܝܵܐ؛ ܘܠܵܐ ܪܹܓܵܐ ܘܐܵܙܵܕ؛ ܐܸܠܵܐ ܟܠ ܘܒܟܠ ܝܼܠܹܗ ܡܫܝܼܚܵܐ. 12ܠܒܼܘܿܫܘܿܢ ܗܲܕܟܼܵܐ ܐܲܝܟܼ ܓܘܼܒܝܹ̈ܐ ܕܐܲܠܵܗܵܐ ܘܩܲܕܝܼܫܹ̈ܐ ܡܘܼܚܸܒܹ̈ܐ؛ ܪ̈ܲܚܡܹܐ؛ ܘܪ̈ܲܦܪ̈ܲܦܬܵܐ؛ ܘܡܵܟܝܼܟܼܘܼܬܵܐ ܕܚܝܼܵܠ؛ ܘܢܝܼܚܘܼܬܵܐ؛ ܘܡܲܪܝܲܟܼܬܵܐ ܕܒܹܢܵܐ؛ 13ܘܗܵܘܝܼܬܘܿܢ ܒܸܚܡܵܠܵܐ ܚܲܕَ ܒܗ̇ܘ ܐَܚܹܪَܢܵܐ؛ ܘܒܸܫܒܼܵܩܵܐ ܚܲܕَ ܠܗ̇ܘ ܐَܚܹܪَܢܵܐ؛ ܐܸܢ ܐ݇ܢܵܫܵܐ ܐܝܼܬ ܠܹܗ ܥܲܠ ܚܲܒܼܪܹܗ ܕܲܥܘܝܼ؛ ܕܵܐܟܼܝܼ ܕܡܫܝܼܚܵܐ ܩܲܡ ܫܵܒܼܸܩ ܠܵܘܟܼܘܿܢ؛ ܗܲܕܟܼܵܐ ܐܘܼܦ ܐܲܚܬܘܿܢ؛ 14ܘܥܲܠ ܕܐܲܢܹܐ ܟܠܵܝܗܝ؛ ܚܘܼܒܵܐ؛ ܗ̇ܘ ܕܝܼܠܹܗ ܚܠܵܨܵܐ ܕܟܵܡܝܼܠܘܼܬܵܐ. 15ܘܫܠܵܡܹܗ ܕܡܫܝܼܚܵܐ ܬܲܓܒܸܪ ܠܸܒܵܘܵܬܵܘ̈ܟܼܘܿܢ؛ ܕܐܸܠܹܗ ܦܸܫܠܵܘܟܼܘܿܢ ܩܸܪܝܹܐ ܒܚܲܕَ ܦܲܓܼܪܵܐ؛ ܘܗܵܘܝܼܬܘܿܢ ܫܵܟܘܿܪܹܐ. 16ܗܹܡܸܙܡܵܢ ܕܡܫܝܼܚܵܐ ܥܵܡܪܵܐ ܒܝܼܵܘܟܼܘܿܢ ܒܕܵܘܠܲܬܡܲܢܕܘܼܬܵܐ ܒܟܠ ܥܵܩܸܠܕܵܪܘܼܬܵܐ؛ ܘܗܵܘܝܼܬܘܿܢ ܡܵܠܘܿܦܹܐ ܘܬܲܥܠܘܼܡܹܐ ܓܵܢܵܘܟܼܘܿܢ ܒܡܲܙܡܘܿܪܹ̈ܐ ܘܒܬܸܫܒ̈ܚܵܬܵܐ ܘܒܙܡܵܪ̈ܝܵܬܹܐ ܪ̈ܘܼܚܵܢܵܝܹܐ؛ ܘܒܫܵܦܵܩܲܬ ܗܵܘܝܼܬܘܿܢ ܒܸܙܡܵܪܵܐ ܒܠܸܒܵܘܵܬܵܘ̈ܟܼܘܿܢ ܠܐܲܠܵܗܵܐ. 17ܘܟܠ ܡܸܢܕܝܼ ܕܥܵܒܼܕܝܼܬܘܿܢ ܒܗܹܡܸܙܡܵܢ ܘܒܦܘܼܠܚܵܢܵܐ؛ ܒܫܸܡܹܗ ܕܡܵܪܲܢ ܝܼܫܘܿܥ ܗܵܘܝܼܬܘܿܢ ܒܸܥܒܼܵܕܵܐ؛ ܘܗܵܘܝܼܬܘܿܢ ܫܵܟܘܿܪܹܐ ܒܐܝܼܕܹܗ ܠܐܲܠܵܗܵܐ ܒܵܒܵܐ. 18ܒܲܟܼܬܵܬܹ̈ܐ؛ ܗ݇ܘܹܡܘܿܢ ܙܲܒܛ ܠܓܲܒܼܪ̈ܵܢܵܘܟܼܘܿܢ؛ ܐܲܝܟܼ ܕܝܼܠܵܗ̇ ܒܸܠܚܵܡܵܐ ܒܡܵܪܝܵܐ. 19ܓܲܒܼܪܹ̈ܐ؛ ܡܲܚܸܒܘܿܢ ܒܲܟܼܬܵܬܵܘ̈ܟܼܘܿܢ؛ ܘܠܵܐ ܗܵܘܝܼܬܘܿܢ ܡܲܪܝܼܪܹ̈ܐ ܥܲܠܵܝܗܝ. 20ܒܢܘܿܢܹ̈ܐ؛ ܡܲܨܝܸܬܘܿܢ ܠܐܲܒܼܵܗܵܘ̈ܟܼܘܿܢ ܒܟܠ ܡܸܢܕܝܼ؛ ܣܵܒܵܒ ܕܐܵܗܵܐ ܫܵܦܪܵܢܬܵܐ ܝَܠܵܗ̇ ܩܵܕ݇ܡ ܡܵܪܲܢ. 21ܐܲܒܼܵܗܹ̈ܐ؛ ܠܵܐ ܡܲܟܪܸܒ݁ܝܼܬܘܿܢ ܒܢܘܼܢܵܘ̈ܟܼܘܿܢ؛ ܕܠܵܐ ܦܵܝܫܝܼ ܡܘܼܥܝܸܩܹܐ. 22ܪܹ̈ܓܵܘܵܬܹܐ؛ ܡܲܨܝܸܬܘܿܢ ܒܟܠ ܡܸܢܕܝܼ ܠܐܵܓܼܵܝܵܘ̈ܟܼܘܿܢ ܕܦܲܓܼܪܵܐ؛ ܠܐܵ ܒܚܙܵܝܬܵܐ ܕܥܲܝܢܵܐ؛ ܐܲܝܟܼ ܫܵܦܪ̈ܵܢܹܐ ܠܒܢܲܝ̈ܢܵܫܵܐ؛ ܐܸܠܵܐ ܒܦܫܝܼܛܘܼܬܵܐ ܕܠܸܒܵܐ؛ ܘܒܙܕܘܼܥܬܹܗ ܕܐܲܠܵܗܵܐ. 23ܟܠ ܕܥܵܒܼܕܝܼܬܘܿܢ؛ ܡ̣ܢ ܟܠܹܗ ܠܸܒܵܘܟܼܘܿܢ ܥܒܼܘܿܕܘܿܢ؛ ܐܲܝܟܼ ܕܠܡܵܪܲܢ؛ ܘܠܵܐ ܐܲܝܟܼ ܕܠܒܢܲܝ̈ܢܵܫܵܐ. 24ܘܝܕܸܥܡܘܿܢ ܕܡ̣ܢ ܡܵܪܲܢ ܒܸܬ ܩܵܒ݁ܠܝܼܬܘܿܢ ܦܘܼܪܥܵܢܵܐ ܕܝܵܪܬܘܼܬܵܐ؛ ܣܵܒܵܒ ܕܠܡܵܪܝܵܐ ܡܫܝܼܚܵܐ ܒܸܦܠܵܚܵܐ ܝܬܘܿܢ. 25ܐܝܼܢܵܐ ܥܵܒܼܕܵܢܵܐ ܕܢܵܐܗܲܩ ܒܸܬ ܦܵܝܸܫ ܦܸܪܥܝܵܐ ܐܲܝܟܼ ܡܸܢܕܝܼ ܕܥܒܼܸܕܠܹܗ ܢܵܐܗܲܩ؛ ܘܠܲܝܬ ܚܙܵܝܬܵܐ ܕܦܵܬܵܐ.