1ܚܘܼܒܵܐ ܕܐܵܚܘܿܢܘܵܬܹ̈ܐ ܥܲܪܩܸܠ (ܓܵܘܵܘܟܼܘܿܢ). 2ܘܡܵܘܗܘܼܒܲܬ ܕܠܟܸܣ ܢܘܼܟܼܪ̈ܵܝܹܐ ܠܵܐ ܢܵܫܝܼܬܘܿܢ؛ ܣܵܒܵܒ ܒܐܵܗܵܐ ܐ݇ܢܵܫܹ̈ܐ ܟܲܕ ܠܵܐ ܚܒܝܼܪܹܐ ܩܘܼܒܸܠܘܿܢ ܠܡܲܠܲܐܟܼܹ̈ܐ. 3ܕܟܼܘܿܪܘܿܢ ܠܐܵܢܝܼ ܕܝܼܢܵܐ ܐܣܝܼܪܹܐ؛ ܐܲܝܟܼ ܕܥܲܡܵܝܗܝ ܐܣܝܼܪܹܐ ܝܬܘܿܢ؛ ܠܐܵܢܝܼ ܕܝܼܢܵܐ ܡܘܼܠܝܼܸܨܹܐ؛ ܐܲܝܟܼ ܕܐܘܼܦ ܐܲܚܬܘܿܢ ܒܦܲܓܼܪܵܐ ܝܬܘܿܢ. 4ܡܝܘܼܩܪܵܐ ܝܠܹܗ ܓܒܼܵܪܵܐ ܒܟܠ؛ ܘܫܘܝܼܬܵܝܗܝ ܕܟܼܝܼܬܵܐ ܝَܠܵܗ̇. ܐܝܼܢܵܐ ܠܙܲܢܵܝܹ̈ܐ ܘܠܩܲܗܒܹ̈ܐ ܐܲܠܵܗܵܐ ܒܸܬ ܕܵܝܼܸܢ. 5ܠܵܐ ܗܵܘܹܐ ܡܲܚܸܒܵܢܵܐ ܕܙܘܼܙܵܐ ܚܝܼܵܠܵܘܟܼܘܿܢ؛ ܡܵܠܹܐ ܠܵܘܟܼܘܿܢ ܡܸܢܕܝܼ ܕܐܝܼܬ ܠܵܘܟܼܘܿܢ؛ ܣܵܒܵܒ ܕܒܓܵܢܹܗ ܐَܡܝܼܪܵܐ ܝܠܹܗ؛ ܠܹܐ ܫܵܒܼܩܸܢܘܿܟܼ؛ ܘܗܲܪ ܠܹܐ ܪܲܦܸܢ ܐܝܼܕܵܐ ܡܸܢܘܼܟܼ. 6ܗܲܕܟܼܵܐ ܐܝܼܬ ܠܲܢ ܕܐܵܡܪܵܚ ܒܚܘܵܪܦܵܬܘܼܬܵܐ؛ ܡܵܪܝܼ ܗܲܝܸܪܵܢܝܼ ܝܠܹܗ ܠܹܐ ܙܵܕܥܸܢ؛ ܡܘܼܕܝܼ ܥܵܒܸܕ ܠܝܼ ܒܲܪܢܵܫܵܐ؛ 7ܕܟܼܘܿܪܘܿܢ ܠܬܲܓܒܸܪ̈ܵܢܵܘܟܼܘܿܢ؛ ܐܵܢܝܼ ܕܗܘܼܡܙܸܡܠܘܿܢ ܥܲܡܵܘܟܼܘܿܢ ܗܹܡܸܙܡܵܢ ܕܐܲܠܵܗܵܐ؛ ܦܵܟܪܘܿܢ ܒܬܝܵܡܵܐ ܕܕܘܼܒܵܪ̈ܝ ܘܦܘܼܫܘܿܢ ܕܘܼܡܝܹܐ ܒܗܲܝܡܵܢܘܼܬܵܝܗܝ. 8ܝܼܫܘܿܥ ܡܫܝܼܚܵܐ؛ ܐܸܬܡܲܠ ܘܐܸܕܝܘܿ ܗܲܪ ܗ̇ܘ ܝܼܠܹܗ؛ ܘܗܲܠ ܥܵܠܲܡ. 9ܠܝܘܼܠܦܵܢܹ̈ܐ ܢܘܼܟܼܪ̈ܵܝܹܐ ܘܬܵܗܵܪܹ̈ܐ ܬܵܗܵܪܹ̈ܐ ܠܵܐ ܦܵܝܫܝܼܬܘܿܢ ܠܘܼܒܠܹܐ؛ ܣܵܒܵܒ ܫܵܦܝܼܪܬܵܐ ܝَܠܵܗ̇ ܕܒܫܵܦܵܩܲܬ ܡܲܩܘܵܚ ܠܸܒܵܘ̈ܬܲܢ؛ ܠܵܐ ܒܡܹܐܟܼܘܼܠܝܵܬܹ̈ܐ ܕܠܵܐ ܦܸܫܠܗَܘܿܢ ܗܘܼܝܸܪܹܐ ܐܵܢܝܼ ܕܚܕܸܪܘܿܢ ܒܝܼܵܝܗܝ. 10ܐܝܼܬ ܠܲܢ ܡܲܕܒܚܵܐ ܕܠܲܝܬ ܠܗ݇ܘܿܢ ܕܲܣܬܘܼܪ ܠܹܐܟܼܵܠܵܐ ܡܸܢܹܗ ܐܵܢܝܼ ܕܥܵܒܼܕܝܼ ܚܸܠܡܲܬ ܒܡܵܫܸܟܢܵܐ. 11ܣܵܒܵܒ ܐܵܢܝܼ ܗܲܝܘܵܢܹ̈ܐ ܕܡܲܐܘܸܪ ܗ݇ܘܵܐ ܕܸܡܵܝ ܓܘܼܪܵܐ ܕܟܵܗܢܹ̈ܐ ܠܒܹܝܬ ܩܘܼܕܫܵܐ ܡܒܵܕܵܠ ܕܚܛܝܼܵܬܹ̈ܐ؛ ܦܲܓܼܪ̈ܵܝ ܟܹܐ ܦܵܝܫܝܼ ܗ݇ܘܵܘ ܡܘܼܩܕܹܐ ܠܒܲܕܲܪ ܡ̣ܢ ܐܘܼܪܕܘܼܝ. 12ܣܵܒܵܒ ܕܐܵܗܵܐ ܐܘܼܦ ܝܼܫܘܿܥ؛ ܕܩܵܕܸܫ ܗ݇ܘܵܐ ܠܛܵܝܸܦܹܗ ܒܕܸܡܹܗ؛ ܠܒܲܕܲܪ ܡ̣ܢ ܕܲܪܘܵܙܵܐ ܩܘܼܒܸܠܹܗ ܚܲܫܵܐ. 13ܗܲܕܟܼܵܐ ܐܘܼܦ ܐܲܚܢܲܢ ܦܵܠܛܵܚ ܠܟܸܣܠܹܗ ܠܒܲܕܲܪ ܡ̣ܢ ܐܘܼܪܕܘܼܝ؛ ܟܲܕ ܛܵܥܢܵܚ ܠܵܘܡܹܗ. 14ܣܵܒܵܒ ܠܲܝܬ ܠܲܢ ܡܕܝܼܢ݇ܬܵܐ ܦܵܝܫܵܢܬܵܐ ܠܲܐܟܼܵܐ؛ ܐܸܠܵܐ ܠܗ̇ܝ ܕܝܼܠܵܗ̇ ܗܕܝܼܪܬܵܐ ܕܗܵܘܝܵܐ ܒܸܛܲܥܝܵܐ ܝܘܵܚ. 15ܒܲܣ ܒܐܝܼܕܹܗ ܡܵܐܣܩܵܚ ܕܸܒܼܚܵܐ ܕܬܸܫܒܘܿܚܬܵܐ ܒܟܠ ܙܲܒܼܢܵܐ ܠܐܲܠܵܗܵܐ؛ ܕܝܼܠܵܗ̇؛ ܛܥܘܼܢܬܵܐ ܕܣܸܦܘܵܬܹ̈ܐ ܕܡܵܘܕܘܿܝܹܐ ܝܢܵܐ ܠܫܸܡܹܗ. 16ܘܠܵܐ ܢܵܫܝܼܬܘܿܢ ܡܪܲܚܡܵܢܘܼܬܵܐ ܘܫܵܪܝܼܟܘܼܬܵܐ؛ ܣܵܒܵܒ ܕܒܲܐܢܹܐ ܕܸܒܼܚܹ̈ܐ ܟܹܐ ܫܵܦܸܪ ܐ݇ܢܵܫܵܐ ܠܐܲܠܵܗܵܐ. 17ܡܲܨܝܸܬܘܿܢ ܠܬܲܓܒܸܪ̈ܵܢܵܘܟܼܘܿܢ؛ ܘܫܡܸܥܡܘܿܢ ܠܗ݇ܘܿܢ؛ ܣܵܒܵܒ ܐܵܢܝܼ ܟܹܐ ܥܵܒܼܕܝܼ ܫܵܗܲܪܬܵܐ ܒܚܵܬܸܪ ܕܓܵܢܵܬܵܘ̈ܟܼܘܿܢ؛ ܐܲܝܟܼ ܐ݇ܢܵܫܹ̈ܐ ܕܝܵܗ݇ܒܼܝܼ ܚܸܫܒܘܼܢܵܐ؛ ܕܒܚܲܕܘܼܬܵܐ ܗܵܘܝܼ ܒܸܥܒܼܵܕܵܐ ܐܵܗܵܐ؛ ܘܠܵܐ ܒܬܵܢܲܚܝܵܬܹ̈ܐ؛ ܣܵܒܵܒ ܐܵܗܵܐ ܠܹܐ ܝَܠܵܗ̇ ܡܵܪܹܐ ܦܲܝܕܵܐ ܐܸܠܵܘܟܼܘܿܢ. 18ܨܵܠܹܡܘܿܢ ܡܒܵܕܵܠ ܕܝܼܲܢ؛ ܣܵܒܵܒ ܕܚܵܬܸܪܓ̰ܡܲܥ ܝܼܘܵܚ ܕܐܸܢܝܲܬ ܛܵܒܼܬܵܐ ܐܝܼܬ ܠܲܢ؛ ܕܒܟܠ ܡܸܢܕܝܼ ܒܸܒܲܥܝܵܐ ܝܘܵܚ ܕܨܦܵܝܝܼ ܬܲܓܒܸܪܵܚ ܓܵܢܲܢ. 19ܙܵܘܕܵܐ ܙܵܘܕܵܐ ܦܲܪܦܘܼܠܹܐ ܝܘܸܢ ܒܝܼܵܘܟܼܘܿܢ ܕܥܵܒܼܕܝܼܬܘܿܢ ܐܵܗܵܐ؛ ܕܒܘܼܫ ܓ̰ܲܠܕܹܐ ܦܵܝܫܸܢ ܡܘܼܕܸܪܵܐ ܠܟܸܣܠܵܘܟܼܘܿܢ. 20ܘܐܲܠܵܗܵܐ ܕܫܠܵܡܵܐ؛ ܗ̇ܘ ܕܡܘܼܣܸܩܠܹܗ ܡ̣ܢ ܡܝܼܬܹ̈ܐ ܠܪܵܥܝܵܐ ܓܘܼܪܵܐ ܕܡܲܪܥܝܼܬܵܐ؛ ܒܕܸܡܵܐ ܕܕܝܵܬܹܩܹܐ ܕܠܥܵܠܲܡ؛ ܕܝܼܠܹܗ ܝܼܫܘܿܥ ܡܵܪܲܢ؛ 21ܗ̇ܘ ܡܲܟܡܸܠܵܘܟܼܘܿܢ ܒܟܠ ܦܘܼܠܚܵܢܵܐ ܛܵܒܼܵܐ ܕܥܵܒܼܕܝܼܬܘܿܢ ܪܸܙܵܝܹܗ؛ ܘܗ̇ܘ ܦܵܠܸܚ ܒܝܼܲܢ ܡܸܢܕܝܼ ܕܫܵܦܸܪ ܩܵܕ݇ܡܘܼܗܝ ܒܝܼܸܕ ܝܼܫܘܿܥ ܡܫܝܼܚܵܐ؛ ܕܐܸܠܹܗ ܚܸܩܪܵܐ ܠܥܵܠܲܡ ܥܵܠܡܝܼܢ؛ ܐܵܡܹܝܢ. 22ܐܝܼܢܵܐ ܦܲܪܦܘܼܠܹܐ ܝܘܸܢ ܒܝܼܵܘܟܼܘܿܢ؛ ܐܵܚܘܿܢܘܵܬܝܼ̈؛ ܩܵܒܠܘܿܢ ܗܹܡܸܙܡܵܢ ܕܢܲܨܝܼܗܲܬ؛ ܣܵܒܵܒ ܒܚܲܕَܟ̰ܵܐ ܗܹܡܸܙܡܵܢܹ̈ܐ ܟܬܸܒܼܠܝܼ ܐܸܠܵܘܟܼܘܿܢ. 23ܐܝܼܢܵܐ ܝܕܹܥܡܘܿܢ ܕܐܵܚܘܿܢܲܢ ܛܝܼܡܵܬܹܐܘܿܣ ܦܸܫܠܹܗ ܫܸܪܝܵܐ؛ ܘܐܸܢ ܓ̰ܲܠܕܹܐ ܐܵܬܹܐ؛ ܥܲܡܹܗ ܒܸܬ ܚܵܙܸܢܵܘܟܼܘܿܢ. 24ܗܲܒ݇ܠܘܿܢ ܫܠܵܡܵܐ ܠܟܠܵܝܗܝ ܬܲܓܒܸܪ̈ܵܢܵܘܟܼܘܿܢ؛ ܘܠܟܠܵܝܗܝ ܩܲܕܝܼܫܹ̈ܐ. ܒܝܼܵܗ݇ܒܼܵܐ ܝܢܵܐ ܫܠܵܡܵܐ ܐܸܠܵܘܟܼܘܿܢ ܐܵܢܝܼ ܕܡ̣ܢ ܐܝܼܛܵܠܝܼܵܐ. 25ܫܵܦܲܩܲܬ ܥܲܡ ܟܠܵܘܟܼܘܿܢ؛ ܐܵܡܹܝܢ.